رواية #سلالة العنفوان...ذنب عينيك الفصل الرابع والثلاثون 34 - بقلم الكاتبه سمو العراق

الذنب 31
رواية ..ذنب عينيك...سلالة العنفوان
بقلمي...نور سمو العراق

💔💔💔💔💔💔💔💔

الحب
هو شخصان مليئان بالإضرار يتركان العالم جانبا ويحاولان ترميم بعضها البعض بهدوء تام

........................

أعلنت عن ثورة مستحيل تنخمد إله اذا انطاني الحبوب

تمسكت بالسجين مثل الغريق الي يتمسك بكشايه هي املي الوحيد اذا ما انطاني الحبوب فعلا اكتل نفسي هل حبوب قادتني للجنون

ما اكدر اتخيل نفسي بدونها ادمااان فعلا ادمان ما اكدر...

توسلت بي بعيوني الدامعه ...والله اذا ما انطيتني الحبوب اكتل نفسي

جانت السجين جديده وحاده واسمع سوزان كل شويه وعاطت بفاروق وكلتله...متت من هاي السجين حاده جرحتها لاصابيعي..

هو من شاف اصراري ودموعي ورجفتي كال...انطيهن الج يوول بس اهدي وكوني طبيعيه هن مالاتج الج انتي انه ما اخذهن منج

تقرب مني خطوه ورجعت خطوتين صرخت بي لا تتقرب...والله اذا تقربت والله اكتل نفسي

رد بحيرة قلق...بويه شبيج انه اريد مصلحتج والحبوب هينا الج كلهن بس عوفي السجين وحدري اخذيهن...

رجفت شفايفي ودموعي تتسابق علئ خدودي كتله...لاااا خليهن بالكاع واني اخذهن اني اعرفك جذاب تريد ستسوي عود اخذهن وتلزمني بيدك وتاخذهن مني

غمض عيونه بارتباك
بعدها كال...لا يول مو هيج وهاي خليتهن هينا...

نزل روحه علئ الارض وخلاهن و وكف باستقامه واني مشيت بحذر والسجين لسه بيدي و اباوعله وارجع اباوع للحبوب متناسيه الكمين الي،ورايه

اول ما نزلت نفسي دا اخذهن ومتطمنه من ذياب ما احس اله بدفعه قويه و واحد لزم ايدي حييييل وكسرها صرخت و وكعت السجين من ايدي وذياب ركض عليه احتضني وشالني واني ارافس
برجلية واعيط سد حلكي بيده و دموعي ترست ايده...

وفاروق الحقير هو اخذ الحبوب وهو الي ضربني وكسر ايدي اخذ السجين

وذياب بسرعه رفعني الصدره مثل الطفل واحتضني كلي بداخله واني ارفس برجليه

زمجر بغضب...فاروق اخذ الحبوب والسجين واطلع بسرعه والكحن بالمجاري ضيع اثرهن ...

هو كال هيج واني تخبلت ضليت اصرخ بصوت عالي...لاالاا لا تشمرهن مالاتي ما اكدر اعيش من دونهن

انسد الباب وطلع فاروق هو ومرته واني احس روحي
طلعت ضليت اضرب بذياب بنهيار تام وارجع املخ شعري حييل كطعته بديه

هو مددني بالكاع ولزم اديه بيد وحده يتفاده ضرباتي العنيفة وبعدها ثبت رجليه برجله

جان فوكاي وعيون قابلت عيونه عيوني تعبانه وهالكه الوجع وعيونه مثل جرح السيف نظراته تجرح

همس بحديه...قربااان اهدي وساعدي تا اساعدج انه ما اريد اخسرج انه احببج واذا تحبيني حاولي تساعديني

شهكت بدموع...ما اريد ما اريد اريد بس الحبوب فد حباب والله والله شتريد اسويلك لو دكولي اشمري روحج بالشط اشمرها بس انطيني حبايه وحده بس وحده

رد عليه بنرة حزن...لا تعذبيني قربان والله البيه مكفيني انه مثل لمعبر طفل وعايف طفل بالي كلو عندج وعقلي ما يشتغل اله بتفكيرج ومناك شغلي واهلي كل شئ تاركو حاولي تضحين لخاطري هاي الحبوب راح تدمرج تعفين شنو راح تدمرج

ليش يول شبابج الحلو وجهج عيونج الي شالن ذنبي وما وكعت اله بذنب عيونج وراضي بهل ذنب تاليها تخربين شئ احبووو

ادحكي شلون ذبلانات ورايحات السواد هالكهن والدموع عمتهن انه يهون عليه اشوفج تبجين ؟ يهون عليه اشوف دمعه من دموعج تنزل وانه اكون سبب

لا بويه اني يمكن اكون قاسي ويه الكل اله ويه بنيتي قربان ما اكدر اقسي عليها هي قربان الذيب
قطعه مني شلون ابجيج وانزل دموعج

بس انه غير لخاطرج ولخاطري همين هاي الحبوب دمار يا بويه واذا ضليتي تاخذينها راح تموتين ترضين تموتين وتهديني الوحدي ؟ انه منو الي من بعدج وكلبي ما حب وتعلق اله بيج شنو ذنبه

رفعت راسي ودفنته بعنقه وشفايفي تهمس علئ بشرته بجيت بانين مجروح...ما اكدر ذيبي ما اكدرحس بيه هل شئ عندي مثل لهوا تقبل واحد يكطع عنك الهوا انت جاي
تكطع عني الهوا

حط شفايفه علئ شفايفي وكطع باقي كلامي ابتعد شويه وهس بهدوء ...ادري والله ادري بس عليش تخلين الشماته تتشمت بيه وبيج

انه من اخذتج غصبا عن روحي
واهلي وعشيرتي وديرتي
افتخر بيج مريتي وحبيبتي حاربت اهلي واهلج ونفسي بس حتئ احافظ عليج شلون انوب تدمنين وتموتين...

تضحكين عمج العار وتوصلينه الغايته تفرحينه وقهرين امج ...هساع اكيد امج زعلانه منج وما ترضه عليج بهل حال التعيس

شهكت بدموع تحرگ....لاااا امي
والله مو قصدي ازعله والله بس ما اكدر

مسح دموعي بثنين اديه بقسوة ...تزعل عليج اذا ضليتي مصره تاخذين الحبوب والعالم يكولون بنت ام سليم ما عرفت تربي صارت مدمنه ويحجون و
يطعنون بعرضج

لزمت ايده بتوسل....ساعدني ذياب ساعدني ما اكدر

باس خدي وضمني لصدره...لا تكدرين واريدج انتي تساعديني ادري راح تتعبين بس أفضل من ان تدمنين انطي لروحج صبر وخلي هل سموم تطلع من جسمج

وانه اوعدج وعد وعد الحر دين ادللج واحبج واصونج وهااا واخليج تترسين البيت ويلاد وبنيات بعد شتردين

ابتسمت من بين دموعي...اخف عشرين طفل ومثل من كتلك قبل مو صح

رد عليه ثقه..لا بويه خمسه وعشرين زيدتج خمسه بعد شتردين

همست بتعب...اريد حبوب

باسني يريد ينسيني...لا ترديني انه اعرفج وانسي الحبوب وخلينه نفكر باشياء حلووة مثل من يصير عدنه ولد شنو نسمي واذا بنيه شنو نسميها

رديت عليه واني افرك بخشمي...انه اريد اذا ولد نسمي علي ولبعده عمر

كرص خدي وضحك ...عجل حلوه وانه اسمي البنات وحده عائشه و وحده فاطمه شنو رايج

هزيت راسي بأي وبعده عقلي يدور عن الحبوب

رجع كال...بس هااا اريدهن حلوات اريدهن كون شعرهن مثل شعرج هيج مجعد حيل احبوو

رديت عليه...اني ما احبه محلو يلعب لنفس انوب ميتمشط

مسح عليه بحنان...انه امشطو واسرحو وابوسو بعد شتردين

بلعت ريكي وسكتت وبس دموعي بغزارة تنزل اريد حبوب بس هو بكلامه دينسيني شويه ...

لزمته وهمست...لا تعوفني خليك وياي انت دتنسيني وكلامك حلو وحبيته خليك وياي

وكف وشالني مددني علئ الفراش وشعري مفتوح وتضاعف حجمه لان جان مضفور...

حضني ويباوع لعيوني كال...يله اريدج تطيبين تا افاجئج بشغله حلوه تحبينها

حضنته...اني ما احب بس انت

رد عليه...ولان. تحبيني
انه قررت اخليج جنه لبيت الشامخ وغصبا عنهم ...واعترف بيج جدامهم...

بسته وضميته لصدري وفرحه مكسوره تخللت بداخل روحي حبيت اعترافه بيه وقررت اطيب اني اريد اهل ومحد الي اهل غير ذياب واهله

وفكرت فاروق ما قصر ويايه واجه من البصرا لبغداد بس حتئ يجيبني من بيت عمب وينقذني من ضلمهم

ضل يمسح على راسي ويقره عليه ايات قرآنية واني احك بجسمي وابجي وافرك بخشمي بعدها غلب عليه النعاس ونمت بين احضانه واني متمسكه بي...

.....................

فلفله...

جنت كاعده بالحديقه وانه افور من عصبيتي ول اني فلفله هيج واحد مثل عمر يسوي بيه ويشك بيه ما ادري شبي مريض نفسي شكوكي حيل

اني
قررت اخابر علئ
عمتي واتگاون وياها والله شنو باليتني بابنها الخبل الشكوكي...

وانوب تريد سيف يتشمت بيه والله بلوا وطاحت علئ راسي انه وين اتحمل هيج شخص والله اچتلو واحسب الله ما خلقو...

رحت رفعت السماعه وخابرت علئ عمتي شويه واجاني صوتها كالت...الوو منو وياي

جاوبتها...اني وئام عمه

كالت...همزين خابرتي شبي عمر شو من اجه منج وهو متضايق وروحه بخشمه انت مسويتله شئ اني سألته وهو مجاوب

رديت عليها بعصبية...اي شيجاوب ابنج واحد مخبل رسمي والله شلون تحجين ويه معلم حمودي عمري خمسين سنه ويسمع صوتج وتفرفرين

ضحكت..ياااا صدك عود غير يغار عليج يا عمه هو عمر طبعه اذا يحب يغار

هزيت ايدي...لا والله هذا مو حب هذا شك وبعدين اني خطيتي بركبتج عجل زوجتيني ابنج وانتي تعرفين بي شكوكي ومريض نفسي

جاوبت بحده...لا دكولين علئ عمر مريض نفسي احترمي نفسج وئام ولا تنسين نفسج احنه بينه عقد ولازم تحترمينه سلمتج الفلوس تتحملين عمر

رديت عليها من بين اسناني...بس هذا اسمو استغلال

كالت. استغلال مو استغلال انتي رضيتي محد ضربج علئ ايدج وكلج روحي ضيعي فلوس اخوج واني انطيتج
فلوس يفتحلج صالونين فتحملي عمر واسكتي

جاوبت بصدمه...حتئ لو يموتني بشكه

ردت ببرود...حاولي تروضينه وان شاء الله العرس
وره شهر من وفاة اخوي لان عمر حجه ويه جدج وجدج وافق

انصدمت. وافق بدون ما ياخذ اذني

جاوبت بملل...وئام عمر الف وحده تتمناه بس هو طبعه شكوكي انتي حاولي تروضينه وتعيشين وياه هو يحب
البنيه المؤدبه وانتي مؤدبه وشريفه واكيد بمرور الايام يغير نظرته عنج وحاولي تحضرين باقي اغراضج لان الزواج ما ضل عليه شئ

قفلت التليفون بوجهها صدك لستحو ماتو اخوها هساع مات وهي تدور اعراس انوب هو رافع خشمو عليه

والله اذا تزوجتو وضل بهذا اسلوبو اكرهو بروحو اخلي يتركني وغصبا عنو

والله حيرة اني شلون راح اتزوج واحنه ما صار جم يوم صارت النه معارك شلون راح نتاقلم ونعيش حياة طبيعيه...اتعس عرسان علئ وجهه الكرة الارضية...

.......

سوزان

ونبي دا اموت هاي شنو الي يشوفني يكول كاعده بمافيا اني مخطوفه وهياته البنيه هماتين مخطوفه مدري مهزومه

فاروق مدا اخذ منه حق ولا باطل وانوب طلعت هاي البنيه تشرب حبوب بس معرفت حبوب شنو تكبسل لو مدمنة مخدرات ...اوووي الدنيا تخوف

حتئ دا اتفزز باليل اخاف من الأجواء الموجوده بهذا البيت علئ ساعه وتطلعلي جنيه وهو بعد بس الجني مطلع بهذا البيت....

ذياب طلع من الغرفه بعد ما نامت البنيه بس هو قفل الباب عليها لان هي مجنونه اجت تذبح نفسها اني من الخوف اجه بغمئ علية...

و فاروق اخذ الحبوب منها وشمرهن بالشط الي مقابيل لبيت...

ذياب صاح علئ فاروق كله...فاروق وين وديت الحبوب ؟

رد عليه بعدم اهتمام...شمرتهن بالشط

ذياب..يووول هساع الوادم كلها تصير مدمنه من وراك

فاروق...جااا شسوي اشمرهن بالمجره الصراصر تدمن اشمرهن بالشط الوادم تدمن ..شلون بله اشربهن انه

ابتسمت ومد ايده بجيبه طلع فلوس كله...فاروق من دون امر العليك اريدك تروح للسوك تجيب فواكهه وخصروات ولحم تعرف قربان تحتاج تغذيه وعناية

رد عليه..صدك جذب ابو علاوي رجع فلوسك انت خطار وبالبصرا وناخذ منك فلوس لا وسفه علئ شواربي رجعهن اني اجيب من عندي

ضحك ذياب وطبطب علئ كتفه...ادري بيك ما تقصر واعرفك سبع بس ميخالف انه وقربان الضاهر راح نطول عندك فلازم نتعاون انه وياك يوم عليه ويوم عليه وانه لو ما اخاف عليها جان انه رحت بس ما اكدر اخليها لوحدها وهي متعلقه بيه وبحاجتي

فاروق رجع فلوس ذياب ورد عليه...ميخالف نتعاون بس هاا اليوم عليه ولا تخاف الحمد لله انه الله رازقني خير من الله وان شاء الله باجر عليك

ذياب جر نفس كال...يله ميخالف عجل اليوم عليك وباجر عليه وان شاء الله انه وياك واحد ماكو فرق

فاروق...اكيد بس ترا اني احله

ذياب..هههه انت احله بس اني اطول

فاروق...بشبر واحد ماكو فرق وهااا خاف دكول اني ذكي وانت غبي لا انه ذكي صح شمرت الحبوب يا يبا بس شني خليت حبايه وحده حتئ من نروح لبغداد ونعرضه علئ الدكتور يسجل عليه علاج او يفهمنه شلون نعالجها

ذياب حط ايده عليه...كفووو كفو منك ابو عمر والله صدك انت كفو...

رد عليه بفرح...يله هسه روح يم قربى واني راح اروح للسوك اتسوك واجي

ذياب راح الغرفته وفاروق كال...الحكيني

مشيت وراه اطك بكعبي وهو لزم راسه...دحت دخت كافي تطكين علية بكعبج جنج حصيني البسي نعالي

جاوبته...اووووع اني البس نعال مال زلم سوري ما اكدر رجلي تطمس

رد عليه بسخرية...انهجم بيتج امهات الفجل انوب متكدر تلبس نعال زلم هسه ميخالف اجيبلج من جدتي نعال

انتي تدرين بجدتي تحب الكشخه والابهه تفيك كدام صاحباتها وتشتري كله من الغالي والزين رغم الحصار

جاوبته...اوك بس اريده حلوو وهااا اريده احمر اني احب اللون الاحمر وصغير وناعم

رد عليه...تردي مراهق لو شايب محمر محكل ولج هو نعال بت الشحاطه هو نعال

جاوبته...لا تغلط واحترم نفسك دتتجاوز واني ساكته واكول ميخالف بس شوف بعد حتئ اكول محسوي اوك

رد عليه...من زين طبخج مركتج ورديه

كتفت اديه...بسيطه درب الكلب علئ الكصاب تجي لو متجي

هو لزم شعري بيده وجراني واني اصرخ...اوووي اوووي اوووي

كال بعصبية...عيدي بله شكلتي عيدي ؟

جاوبته واني لازمه ايده...دا اكولك درب الكلب علئ الكصاب هيج تكول بيبي

رد عليه بغضب...انعل ابوج لابو جدتج ولج لسانج طولان

رمشت بعيوني واني اباوعله...يعني شنو القصد

عاط بوجهي...يعني القصد اني جلب وانتي لكصاب

حطيت ايدي علئ خدي...يااا عزا ونبي عبالي
قصده عود تجيب اكل واني
اسوي انت تعرف بيه اني محترمه ما احب اتجاوز علئ شخص وان كان عدوي هذا مو اتكيتي

ابتعد عني وهو يخزر بيه حاولت اغير الموضوع كتله...اي منيلك فلوس وحتجيب مسواك

لبس قميصه كال...تعاي دكمي

كشرت عن ملامحي...حلم ابليس بالجنه

دكم اول دكمتين كال...اروح الجدي قاسم يحويلي من بستانه وبلكي ينطيني دجاجه من دجاجاته نطبخها عشا اليوم

تقدم مني ولزم ايدي علئ ببراءة...تعبت واني ادكم دكميلي يبا طاحت اديه

لزمتهن بعصبية ودكمت اخر دكمتين من يم صدره واباوعله متعصبية واخزر بي وهو مستناس علئ كولته

دنك عليه وباس رگبتي واني دفعته حيل...عزا بعينك كوون متستحي ابد ولا عندك تربية

رد عليه بثقه...اي والله تربية شويمخ شتترجين مني

غمزلي وطلع وهو يغني وراح يتسوك ...همزين حيجيب دجاجه مطبوخه لان مبيه
حيل اطبخ ابد...

................

قربى...

فتحت عيوني مصدومه ومفزوعه وكفت اترنح بمشيتي واحك بجسمي احس روحي ما شايلتها وعندي حاله من الهيجان

ملخت شعري حييل احس ما بيه حيل اشيل حتى شعري حكيته حييل...

دا اريد افتح الباب ما انفتح اتخبلت هاي شنو ليش قافلين لباب عليه ضليت ادك بالباب حيييل ماكو محد اجه

فتحت الشباك وصحت بصوت عالي ومبحوح...ذياب ذييب ويينك

اجت سوزان تركض كالت...هااا ذيب راح هسه يجي

صرخت بوجهها...طلعيني افتحيلي الباب اختنكت افتحي لباب خليني اطلع

رفعت اديه بخوف كالت...والله ما عندي المفتاح عند ذياب. .

فركت وجهي بقسوة وصرخت بيها...انعل ابوووج افتحييي الباب يمه روووحي يمممه راح تطلع

ردت عليه بحزن...مراح اجاوبج ولا اسبج لان اتكيتي ميسمحلي

هي تحجي واني احس عقلي راح يوكف ومن تحجي تنرفزني ملخت شعري ...ولج افتحي الباب انعل حتئ اتكيتج

جاوبت باستنكار...ونبي ماعندي

عفت الشباك وركضت علئ الباب واني افلش بي ولك ذيب ووينك تعال طلعني راح اموووت اختنكت...

محد جان يجاوبني حطيت ايديه علئ الحايط وضربت راسي مرتين بالحايط وصوت نحيبي واصل لسابع جار...

شفت الدم نزل من راسي علئ وجهي وكعت علئ الارض واني اصرخ وارجف شفت سوزان طلت من الشباك وهي تباوعلي صرخت...ياااا عزا لج ليش دتسوين بروحج هيج...

شويه وركضت وسمعتها تصيح...ذيب الحك هاي البنيه ضربت راسها بالحايط ودتنزف

ثواني وانفتح الباب دخل وبيده علاكه شمرها علئ الارض وركض عليه رفعني وهو يمسح بوجهي كال بحزن...عليش هيج بويه شمسويه بروحج

صرخت بي...ليش تعوفني ليش وليس تقفل عليه الباب اني اخااف

نزع قميصه وخلاه علئ الجرح كال بقلق...لا بويه ما عفتج رحت اجيبلج جم شغله وقفلت لباب لان خايف عليج عجل انتي ما تدرين المنطقه بيها ذيابه واخاف تاكلج

شهكت ببكاء...انطيني حباية

رد عليه...ما تدرين ؟ غير فاروق لكيته شاربه كلو وطيحت حضو وكتله حبوب
قربان شلون تشربهن

دمعت عيوني بحزن ...ما خلالي ولا وحده

رد عليه...اي بويه سرطهن كلهن

مسحت دموعي وراسي احسه طار منه المخ كتله...وهسه شلون اريد حبوب

مسح دموعي...خوش بويه ان شاء الله اطلع لبغداد من الصبح واجيبلج بس توعديني
تصيرين حبابه وما تضوجين فاروق وسوزان

هزيت راسي بأي حضني كال...عليش ضربتي راسج

جاوبته ببكاء...خفت عفتني ورحت

جر نفس...لا شلون اعوفج وما اكلج بس رحت جبتلج فواكهه لان فاروق تاخر وراح اسويلج عصير تشربينه زين الج

لزم راسي كال...بله اشوف جرحج

شافه كال...اروح اجيب من المستوصف علاج واجي شد راسي بالقميص وطلع وقفل الباب...

شوية واجه ما تاخر يمكن عشر دقايق جايب معقم وشاش لف الجرح وباس راسي جابلي عصير برتقال طبيعي وشربني

شربت شوية وطعمه مر بحلكي وجابلي اكل اكلت شويه ونمت وهو يسولف عليه ويحجيلي عن الغربية وعن اعتزازه بمحافظته وحبه الها ...

واني استمع اله واحاول اتناسه ولو ما اكدر بس من ابدي ارجف واحك هو يلزم اديه ويفتح موضوع وياي ويصبر عليه

دفعته بسرعه وركضت فتحت الباب وطلعت هو عباله انهزمت ركض وراي شافني دخلت للحمام تقيئت شنو اكلته

دك الباب كال...هاا بويه بيج شئ ادخل اساعدج

جاوبته واني اغسل بوجهي ...لاااا ماكو داعي كملت بس معدتي مدري شبيها...

غسلت وطلعت انطاني لخاولي نشفت وجهي ولزم ايدي كال...خلينه نروح للكورنيش نغير جو شويه

ابتسمت ولزمت ايده وارجف واحك وافرك بخشمي و وجهي وخلينه وطلعنه للكورنيش شويه احس نفسيتي تغيرت ...

........

فاروق...

رحت لجدي حويت من عنده مخضر وفواكهه وكعدت يم امي شويه اريد اجيبها تشوف جنتها شلون معدله

جدتي جانت كاعده طلبت منها نعال كالت ما عندي بس غندره چوبلس ...والله عاد اني اخذتها منها احسن من قندرة سوزان تطك عليه بيها

وهم اخذت منهم دجاجه مال عرب ريشها احمر وعصبيه مبينه بس الحمد لله ما تبيض ولا عندها كتاكيت مبينه معصية وجبيرة بالعمر جنها بكد جدتي...

اخذتهن ورحت وجدتي تصيح وراي ...روح روح من اخذت سيان لحد هسه واحنه ما شفناك بعد شلون اخذت صوصان مدري سيان وين نشوفك

ضحكت عليها ورحت وصلت للبيت لكيت ذياب ماخط مرته ورايح وجايب فواكهه وهم متسوك جايب سمج...ولحم

جنت لازم الدجاجة من رجليها وهي تصيح وتگاگي من دخلت سوزان كمزت...يااااااي شكد حلوه لونها احمر يله عبالك بوطيطه بس علئ كبيره

تنهدت بحزن ...شتاقيت البوطيطه بس اني هماتين ما اريده يجي حبيبي ميتحمل حر البصرا وهو مايع وروحه بخشمه...

كلتلها بملل صاير اغار من بوطيطه...خلي اروح اذبحها لا ارتكب جريمه واذبحج

ردت عليه...اوووي عفية اذبحها برا ما احب اشوف كائن لطيف ينذبح كدامي...

اخذت السجين وطلعت وذبحتها وجبتها هي شافتها تباوعلها بحزن...حبيبتي الله يرحمج ويهلكج قاتلج

بلوعتلها بطرف عيني...سوزان ليش تخليني اذبحج وراها روحي فوري مي حتئ نصلخها ...

فتحت عيونها مصدومه...هااا عززززا لا مستحيل تخليها بالمي الحار وتنتف ريشها

جاوبتها...راح انتف شعفتج وحق الزهرة

كعدت علئ الدرج وكعدت رجل علئ رجل كالت...مااا روح انت اني ما اشاركك بجريمتك

عضيت شفتي...سوزان مع احتراماتي الج بس تدرين انتي وحده تحب لاهانه ولج ليش ما تكومين لا ارتكب بيج جريمه

شو هاي بسرعه بجت من كل عقلها...فاروق عفيه ما احب هيج اشياء روح انت فور مي واصلخها وكصصها اني ما اكدر وما اعرف لا تجبرني

جريت نفس مدري شبيه انقهرت عليها واني اعرفها هي صدك ما تعرف مو تتصنع

رحت فورت مي وانتظرت حتئ اصلخ الدجاجه طلعت
قندرت جدتي وضحكت كلتلها برومانسيه ...سوزي تعاي

ردت عليه بخوف بس تتصنع القوة...سوري ما اكدر اعذرني رجليه توجعني

اجت وكعدت بصفها وهي ابتعدت وجهها انزعج كلتله. جبتلج قندرة

كالت...قصدك حذاء موو اي عفية تعبت من الكعب

طلعت لقندرة الجوبلس وهي تسودنت هاااي شنو اني سوزي البس حذاء لاستيك وانوب سوده وبيها طين يبووو والله لو تدري ماما خرب استايلي ونبي تنتحر

جاوبتها بفرح...صدك دلبسيها يله بلكي تنتحر...

شمرتها ومشت متعصبه وشعرها الكصير طاير كتله مال اغراء مال الزمها ودك بوس بس خاف تموت بعدها يابسه خل تسمن يله...

والله كعدت سويت الدجاجه وكملتها وعلمتها شلون تطبخها...وهي كعدت تطبخ وكل شويه وكالت فاروق...اخلي ملح ملعقه لو ملعقتين

جاوبتها..خلي خاشوكتين واسكتي

كعدت ويه ذياب بعد ما اجه وجايب قربى كال..اليوم باليل اطلع لبغداد اريد اروح اطيح حظ شرهان وفياض ومناك اريد اروح للدكتور صديقي حتئ يصرفلي علاج الها...

والله صدك تعشينه وطلع لبغداد ما اسولفلكم علئ مركة سوزان لاستيك واجر بيها بعدها ما مستويه جابتها واجت..

كال ذياب...اروح اجيب من المطعم هاي قربى روحها بخشمها وانوب الدجاجة هيج ما تكدر تاكلها لا انوب تتعارك هي والدجاجه...

صدك راح جاب وخله وراح لبغداد

.............

سوزان...

ثاني يوم الصبح ...جان البيت فارغ بس اني وقربى شفتها واكفه علئ الشباك وتبجي

انقهرت عليها حيل تقربت منها وجريت نفس همست...حبيبتي محتاجه شئ

مسحت دموعي وهي تشهك...ذياب ما اجه تأخر

تنهدت...لا لسه ما اجه اذا حابه سولفي ويايه اعتبريني اختج ...انتي ما عندج اخوات ؟

بلعت ريكها...لا ما عندي بس اخوان اثنين

سوزان...لعد وينهم اهلج عنج امج وينها

شهكت من بين دموعها واني حيل انقهرت عليها وتذكرت ماما كالت...ماما ميته

همست...الله يرحمها ويجعل مثواها الجنه ...انتي شنو علاقتج بذيب

ردت بثقه ولمعة عيونها بفرح...زوجي وحبيبي وابوي وكلشي هو يموت عليه واني حيل احبه..

انصدمت صدمة عمري بس محجيت..عزا العزاني ذياب متزوج والله لو يعرف جدو والله يمكن ينجلط

محجيت شئ البنيه لحالة مأساوية ما اكدر اصدمه واكلها زواج غير مرحب بي من عشيرته وذياب فريال محجوزه اله

وذياب مبين حيل يحب هاي البنيه وهي
تحبه واني من زمان كلت لفيفي ترئ ذياب ميحبج لان واضح من تصرفاته

كلتلها ببتسامه...مبروك ان شاء الله

ردت عليه..شكرا انتي شنو تقربين لذيب

ابتسمت...اني بنت عمته وهو ابن عمي وفاروق زوجي

صفنت كالت.. شلون انتي بنت عمته وهو ابن عمج خاف ابن خالج ؟

هزيت راسي واني اضحك...اي اي ابن خالو ههههه اني مو لبنات كلها دكول عمو فمتعوده اصيح علئ خوالي عمو

كالت...اريد اروح للحمام عفية اريد اسبح

جاوبتها...اوك يجي فاروق واخلي يفتحلج الباب

والله صدك اجه فاروق فتح الها لباب وهي تريكت انوب دخلت تسبح ورجعت الغرفتها وهي تتلفت وتحك بجسمها وتهمش همش ولازمه ملابسها...

دخلت للغرفة واني رحت اجيب الها مشط دورت دورت ملكيته رحت للغرفة الثانية جبته واجيت

سألت فاروق كتله ذياب ما اجه...

رد عليه...لا خابرته من الرجال وكال رايح علئ بيت عم مرته لاكي فاتحه ببابهم مدري منو ميت عندهم وكال ان شاء الله راجع ورايح للدكتور وصارفله علاج

عفته واجيت دخلت للغرفة

واني انصدمت...لاااا مستحيييل ما اصدك شلون سوت هيج

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لا تنسوا التصويت و المشاركه بكم نكتمل 😍

اعرف البارت قصير واحداثه قليله بس تعرفون رجع الدوام مدمج ودا اداوم تلث
ايام وحاره تموت حر ومدا اركز بالاحداث ان شاء الله ما اقصر وياكم بس شويه يستقر وضعي

لان اني ما اكدر اكطعها حرامات وانتم متفاعلين وياها لذلك مكملة رغم الظروف😬