رواية #سلالة العنفوان...ذنب عينيك الفصل الرابع والتسعون 94 - بقلم الكاتبه سمو العراق

الذنب36
رواية...ذنب عينيك ...سلالة العنفوان
بقلمي...نور سمو العراق

💔💔💔💔💔💔💔💔💔💔

الفراق يزرع في القلب حزنًا لا ينتهي، ويجعل الروح تهيم في صحراء العمر فلا يخفف من وطأة الحزن لحظة الفراق إلا أمل اللقاء القريب.

...................

قربئ...

الم و وجع لا يطاق ردت اصرخ ردت واحد منهم يساعدني واحد منهم وجع بطني منااا والم برجلي منا ما كدرت اكوم الدم اخذ حيز مني...

زحفت علئ ركبي ودكيت الباب بقوووه فلشته بيدي لان استعانيت بي بدلا عن صوتي...

دكيت مرتين تلاثه واجت حفصه كالت...هااا قربئ محتاجه شئ

ضليت ادك بالباب حيل واريدها بست فهمني بعدها حست اني بخطر ركضت حفصه سمعت خطواتها وهي تصيح...حدرو هينا قربى ما اعرف شبيها بسرعه حدرو

اجه الشامخ يركض واني بس ادك الباب كال...هااا جدي شصاير بيج شئ

ضربت علئ الباب بقوه وهو افتهمني الضاهر كسر الباب بقوة بنيته شافني،واكعه والدم مغطيني،وهو تخبل صاح بصوت عالي...وووول جيبن عبايه بسرعه البنيه تنزف

خالتي ام ذياب لطمت خدها ...ول ول تنزف الجاهل راح يموت ول شلون وكعتي شلون انه بحرمة ذياب بس الصدمات والقهر متحملتو يا ربي ...

شالني الشامخ وهي راحت ويانه احس ضهري انكص واحس صدك صرت عبئ عليهم وتعبتهم وهم ما يستاهلون الضيم والقهر

بس شسوي مو بيدي والله كل شئ ديصير ويايه قدر ومقدر ما اعرف ليش الظروف معاكستني ...ما اعرف ليش،بس الاذيه محصلتها من حضي بس ارجع واكول يمكن هذا اختبار من رب العالمين وامتحان ربي ديخبرنه ويمتحنه وان شاء اللة نكون كد الإمتحان

ماكو اصعب من الولاده ألم الولادة يُعادل كسر 42 عظمة وهو ثاني أشد ألم بعد الحرق حياً، اللهم إنّي أسألك الجنة لحبيبةٍ أنجبتني".

الم الولاده شكد صعبه و وجعها لا يطاق  ورغم كل هذا الوجع بس،صوتي ما طلع  ماااا طلع وهذا الشئ جاي يخبلني ويجنني ليش بعد هذا هو يعني تخورست يعني بس ما اسمع اطفالي كلام حلو

ما العبهم ما اناغيهم ما انصحهم ليش هيج ليش صوتي احس مثل المخنوكه ما اكدر اعيش هيج من دون صوت من دون كلام مثل الواحد الي رابطني...مقيدني حتئ،ما اكدر اعبر عن احساسي بولادتي ولا اكدر اطلع اهاتي و وجعي...والمي...

اخذوني،بالطوارئ بسرعه فحصتني الدكتورة كالت ...لازم عمليه بسرعه لان الطفل بخطر وهي نازفه هواية ...

كلها الشامخ بلهفه...اي سويلها يوول سويلها المهم عدنا الام نريدها تطلع بالسلامه اهم شئ سلامتها ...

اسمعه يحجي ويه الدكتوره رغم الوجع الي هد حيلي بس كلامه يرن باذاني واحس بفرحه تغلغلت لاعماق روحي...

فرحت وتمنيت ذياب ويايه بس لاسف هاي اني كل حمل ذياب مو ويايه وكل ولاده ذياب ما موجود ويايه

وهذا الي قاهرني جنت اتمنئ ذياب وياي يواسيني يهديني،يوكف ويايه بس قدر الله وما شاء فعل والحمد لله على كل حال...

اخذوني للعمليات بسرعه جنت اباوع للصاله والدمعه بعيني ونظراتي خالية تعبانه ومهمومه مكتوم علئ صدري...

اجت الدكتورة حجت ويايه كالت...هذا اول طفل

رفعت اصابعي الها واشرت بيهن...تلاثه

كالت ...هااا ثالث طفل كلهم عمليات لو هاي اول مره

جريت نفس ومجاوبتها احتاريت شلون اجاوبها...

باوعتلي بغموض كالت...هااا انتي،ما تحجين

اشرت الها براسي

تنهدت كالت...ان شاء اللة تكومين بالسلامه

بعدها اخذت ايدي،وضربتني ابره بالكانوله بالوريد  وجعتني حيل وبعدها حسيت اغمئ عليه او رحت بغيبوبه ماكعدت الا بعد وقت طويل و واني اون من الوجع الوجع باذاني مو بمكان ثاني

فتحت عيوني واني ارمش واهدابي مبلله من الدموع مديت ايدي بعفوية علئ بطني  ماكو طفل رمشت اني وين وين...اتذكرت اخر شئ جنت انزف و وكعت بالحمام وبعدين كالو راح نجيبج بعملية ...

شكد صعبه من اتلهف علئ شئ بس ما اكدر اكول شئ ولا اكدر احجي ولا اصيح وحده منهم تبرشني بطفلي وين صحته شلونها زين لو صحته مو تمام هواية اسالة تدور ببالي ولهفة من اعماق روحي لهل طفل الجان عايش ويايه بهمي وحزني واهاتي،وعذابي علئ ذياب...

اجت يمي الدكتوره رفعت الها ايدي بخوف اشرت الها أسألها على الطفل

كالت ببتسامه..بنوته هي حليوة مثلج بس نااااعمه وضعيفه حييل ولازم تضل بالخدج...

استبشرت ملامحي،بفرح يعني صارت عندي،بعد بنيه يا ربي الحمد لله والشكر الف الحمد لله يارب 

ما كدرت احجي وبعدها دخلت عليه خالتي ام ذياب مسحت علئ راسي وهي تمسح بدموعها...

اشرت الها بخوف بمعنئ...الطفله بيها شئ

ردت عليه...لا يمه ما بيها بس جنت اتمنئ ذياب ويانه يفرح بذريته ويشوف بنيته ويخليها علئ،صدرو يبوسها ويحضنها...

بس بعد شنسوي هذا المكتوب الحمد لله على سلامتج يمه

دمعت عيوني وعضيت شفايفي اكتم عبرتي عصرت صدري من ذكرتني بذياب وبمواقفه ويايه والله لو فعلا موجود جان هسه اني اسعد انسانه بس تضل دوم فرحتي مكسورة...

بس نحمده بالسراء والضراء...

البنيه الحمد لله تحسنت شويه وضلت كم يوم بالمستشفئ ...وبعدها طلعوها وسميتها هدير مثل ما راد ابوها...شكد تمنيت يشوفها ذياب كلت بس تكبر شويه اخذها للمصور اصورها و ودي صورها لابوها لو اخلي فاروق يا خذها اله..

هدير ما اريدها مكسورة خاطر ما اريد يكولون عليها شؤؤم عود اول ما اجت علئ الدنيا او اول ما حملت بيها ابوها انسجن اريد احسس الكل ان هل بنيه فال خير علينه وما اندخل اقدارنا بقدوم اي شخص

لان حرام وبعدين الشحص يتحسس ويتاذه لذلك مل اريد تمشي عليها سالفة الشؤؤم مثل ما نعتتها  وفاء كالت فالها مو خير اول ما حملت بيها قربئ انسجن ذياب

............

سوزان...

كنت كاعده مخليه شيفان علئ رجلي اليمين وديلان علئ رجلي اليسار وكل وحده ممه بحلكها بس هن ناعمات حييل ضعاف جنهن بنية جسمي...حجمهن صغير...

احجي وياهن بحب...حياتي ماماتي انتو يدادا يحلوات شنو هل عصافير الحلوه احبج اموووت عليجن يمه فدوه حتئ بوطيطه طلكتها الخاطرج

لا لا والله حتئ الجامعه والصيدلة تركتها الخاطر هل عيون الحلوه والخلقه الي تجنن يااااااي،يجنن ححسدهن

ونبي كوله البسهن نفس لون حتئ من يكبرن وحتئ نفس الملابس

دخل فاروق هز ايده كال...هسه داكه مغازل وياهن مدكليلي شكو شو هن معصعصات جاا ما تتغازلين بيه شو ضخم وشحلاتني...

ضحكت كتله...هههههه فدوه حبيبي تغار من ديلا وشيفو

باوعلي بطرف عينه ولبس قميصه

حجيت بصوت طفولي اتصنع ديلا وشيفو كتلة...لا بابا لا تغار ماما تحبك

ضحك واجه كعد بصفي باسهن ثنينهن وشالهن بس خاف منهن لان ضعاف وعظهمن يطكطك

كال ...جنهن انتي قبل مركة البيتنجان ههههه يابسات

ضربته بعكسي...شكد لئيم يعني اني يابسه

رد بهيام...غير تجننين ترفه شحلاتج جنك كيكه اسفنجيه

ابتسمت وبسته بخده اتصل التليفون هو راح رفع السماعه ضل يحجي وبعدها كال...هااا يعني جابت بنيه اي،الحمد الله سموها هدير ترا ذياب يريدها هدير

ابتسمت خطيه معناها قربئ جابت بس هسه هي بالثامن شلون جابت اني سامعه الطفل بالثامن ما يعيش يموت...

بس الله اذا كاتب تعيش تعيش وان شاء اللة يارب تعيش وتقر عين قربى بيها...

من خلص المكالمه اجه يمي و وملامحه مستبشره كال...قربئ جابت بنيه

ضحكت كتله ...ان شاء اللة الف مبروووك ياااي تصير صاحبة شيفان وديلان يكبرن سوه اوووي يوم عيد الي اشوفهن سوه كبار وبالجامعه...

ضحك كال...وانه اصير الشوفير مالهن اودي واجيب

جاوبته ببراءة...اي اي عفية فاروق ما اريد بناتي احد ياخذهن غيرك انت تاخذهن وتجيبهن اخاف يخطفوهن

جر نفس كال..لحيتي سوزان وسرحتي بخيالج للبعيد

ابتسمت...من هسه دا اريد اامن مستقبلهن

ضحك كال...اي لازم ترا وانه هم من هسه جاي اامن مستقبلهن

ابتسمت علية...فدوه الكلبك حبيبي الله يخليك سند النه ...ادري بيك متقصر ويانه...

باس راسي كال...راح اطلع اني بلكي اروح لرجل عمتي،يخليني التقي،بذياب

جاوبته...تمام يله روح حبيبي

خله وراح واني،كاعده العب بالبنات واغني الهن

اندك الباب بقوه رحت كلت منو ما احد جاوب فتحت الباب واشوفها فريال وامي صبيحه

ماما اول ما شافتني غلبها الحنين وسحبتني وحضنتني،وهي تبجي بصوت عالي وتنوح وتبوس،بيه واني،جامده بمكاني لا اتحرك يسره ولا يمنئ ما اعرف شصار بيه وما اسمع بس صوت امي الناحب....

...........

فاروق ...

صار يومين وانه محتار شلون اوصل لذياب واخبره عن ولادة قربئ وقدوم طفله جديده وكبرت عائلة ذياب وزادت فراوله ثانيه

حجيت ويه رجل عمتي،شوتيه حتئ ينسق الي،ويه الضباط واشوف ذياب والتقي،بي،واخبره عن قربئ وعن ولادتها...

والحمد لله كدر يحددلي يوم ورحت بي اله جنت فرحان راح اشوفه راح التقي بي واخيرا الحمد لله يارب

تمشيت بداخل السجن اليوم جاي محمل وشايل لعضيدي ذياب مو بس جايب اغراض وادخلهن بالواسطة لا جايبله خبر ابشره بي

استوقفني التفكير لحظة خبر يفرحه ويضوجه بنفس الوقت ..

هم يفرح صارت عنده بنيه مثل فلعة الكمر لو راح يضوج لان صارتله بنيه ثانية وهو بعيد عنها وهنا بظلمات وغياهب السجون وهو محبوس بين اربع حياطين ويه ساعات وايام وسنوات الانتظار القاتلة
وهو بعيد عن عائلته وبيته جهاله  وحب حياته

صار وقت الزيارة دخلت عليه بعده بهيبته بس ملامح الحزن تشع من عيونه ..

تلكاني باللهفة والاشتياق حضني وبضحكة حزينة
شلونك فاروق امي وقربى والجهال شلونهم

خليت ايدي على كتفه اطبطب عليه
بخير الحمدلله كلهم يسلمون عليك واحد واحد يسلم عليك اكعد اكعد ذياب جايبلك بشارة راح تفرحك

تحسر وكعد اي بشرني يول  فاروق كول شعندك ...

خليت ايدي على زنده وبابتسامة كتله  اجتك بنية اخت لغدورة وعلاوي

بلهفة كال الله يبشرك بالخير وشلونها قربى ان شاءالله بخير خو ما متأذية احجيلي فاروق شلونها

تحسرت ووراها ابتسمت وبداخلي فكرت جنت اتمنى ابشره وهو حر طليق واكله تتربى بعزك ودلالك بس شسوي شكلها راح تتربى وتكبر وتبلغ وهي بعيدة عنه

جاوبته بخير والله لتخاف عليها بخير والبنية الفصعونة كلش حلوة لا يظل بالك ولا تفكر احم روحك ذياب شوف شصاير بيك

جر نفس وكال اوووف فارووق اووف هساع انه شنو ؟ المفروض افرح اضوج لو شنو ؟ شنو هالقدر هذا وشنو هالمصير الي لفني هاللفة وبعدني عنهم وحرمني من شوفة بنيتي وهيه توهه طلعت للدنيا .. مو المفروض هساع انه يمها ويم امها

انه على طول افكر فاروق وهسه زاد تفكيري شنو مسوي انه والله مااتذكر مسوي شي لو مأذي أحد وابتليت بهاللبوة

جاوبته بجدية حكمة ربك هاي ذياب ماتدري الله شنو ضاملك !! هيج ولا غير شي

كال شنو هيج ولا غير شي اعدام يعني ؟ والله لو اعدام احسن من هال... استغفرك ياربي
وظل يفرك بوجهه ويستغفر ورد باوعلي

كال فاروق ادري مامنك كصرة بس انه كلبي مفرفح عليهم اريد تحجيلي عنهم ولا تسكت احجيلي عن علاوي وسوالفو غدورة شلونها شتحجي شسولف كبرت صارت طويلة هاي التفاصيل اريدها فاروق

ظليت احجيله عنهم وكتله اجيبهم الك تشوفهم بس خلي قربى توكف على رجليها

كال فاروق ليش احس قربى بيها شي وانت ضام عليه !!

ارتبكت ... افااا ذياب صدك جذب شنو هالحجي ترى والله الكل مداري قربى وعينه عليها خاصة جدك الشامخ اول مرة اشوفه يعامل وحدة غريبة هيج مثل معاملته لقربى

كال هي قربى على نياتها فقيرة وطيبة وحبابة عجل انه شون حبيتها بس ترى ها  ذكية وما تنغلب ورغم هذا اريدك تدير بالك عليها فاروق بالذات انته ومااوصيك بعد ترى فياض ماراح يسكت وراح يظل يحوم عليها

جاوبته والله بدون ماتوصي ذياب كلنه مدارينها ومحاوطينها لا تخاف واذا عن فياض تنكسر رجله وايده اذا قرب عليها ..

تأفأف وكال اخخخ فارووق اخخخ والله لهفتي عليها مثل الجمر بداخلي ماينطفي انه شلون بيه والله ماادري

تهون وتكضى صارت ماتوكل ولا تنفع والمشوار شكله مطول  لذلك ظليت احجيله على جهاله وسوالفهم وتفاصيل يومهم مثل ما هو طلب مني ...

احجيله عنهم وهو مبتسم يهز راسه والحزن غميج بعيونه وشكله يذبح كلبي ويدمي وانه واكف عاجز مابيدي شي وشكد صعبة الرجال من يظل عاجز يسوي شي لأخوه  ....

اجه الشرطي يعلن عن انهاء وقت الزيارة .. حضنت ذياب وسلمت عليه وهو لحد اخر لحظة قبل ما اطلع من يمه يوصي على قربى وامه وجهاله ....

بعدها كال...اي،صدك فاروق تذكرت قربى هذا مو شهر ولادتها عجل شلون ولدت

جاوبته...خطيه بعد صارت عندها ولاده مبكره

جر نفس وزفره كال...هو انه من حملت لحد هساع وانه بس ادعيلها الله يبعد عنها كل شر ويكومها بالسلامه

جاوبته..واميين

كال...سلملي عليها جثير وكول للكل مشتاق الكم يووول

بعدها طلع من جيبه ورقه كال...هاي الرساله اخذها انطيها القربئ بس لا تفتحها يووول مفهوم

ابتسمت...اي مفهوم مفهوم كاتب غزل مو

رد عليه بملل...دنجب

ضحكت...انجبيت يبا بس لاتزعج نفسك وتطير رومانسيتك الورقية

ضحك وسحبني باسني وهو حاضني كال...ونعم منك انت ثلثيني واخوي وعضيدي ما اجازيك فاروق

بادلته الحضن وجريت ونفس وانه بيه صرخه جاوبته...لا يبا ما مسوي شئ حتئ تجازيني عليه...انت اخوي عيب هل كلام

بعدها ودعته طلعت وانه بداخلي اتأمل يجي يوم اطلع منا وهو وياي ... والله بلحظتها يمكن اهلهل من الفرحة

.................

قربى :

جنت متمددة على السرير سانده جسمي بعكسي وبنتي هدير كبالي اباوعلها وهي نايمة ، مكمطة ناعمة وصغيرة سبحتها قبل شويه وكحلتها عمتي بكحل حجر
صارت تجننن

غمضت عيوني وتنهدت تمنيت احجي وياها بس صوتي مايعيني احس اوتاري الصوتية تالفة فد نوب ولايمكن بعد اكدر احجي بيوم

مررت اصبعي على جبينها واحجي بداخلي بروح مكسورة يعني شلون مراح تسمعين صوت امج للابد !!!
ولا راح تشوفين ابوج اله بعد العشرين سنة تمر !!!

يا ترى انت محظوظة لو سيئة حظ!! لا اعتراض على حكمك ياربي ... ياربي اكتبلها حظ حلو هالبنية هاي

تمددت ونمت على ظهري ... غمضت عيوني وافكر بذياب اكيد هسه ملهوف على شوفتها اكيد مقهور بعد عمري سودة عليه ذياب حرموك من شوفة بنيتك

ماحسيت غير بس بدموعي تجري على جوانب وجهي ... بقيت عيوني مغمضة .. حسيت بايد ناعمة تمسح بدموعي ...

بقيت مغمضة اتمنيته هذا ذياب يجي يمسح دموعي ويطيب جروحي يمكن بساعتها يرجعلي صوتي وعافيتي وفرحتي وكل شي

لزمت الايد الي جانت تمسح دموعي واسمع صوت غدورة يمي وهي تسألني .. ماما لتبجين باتر (باجر) يطلع بابا

شهكت واني اباوع على غدير اخذتها وصعدتها خليتها على رجليه ... ظلت تباوع لاختها
وتكولي دكحي نيه نامه (دحكي البنية نايمة)

بوستها بخدها ... باوعتلي سألتني ليش ماتلعب وياي ؟

هزيت راسي الها وهي تباوعلي محتارة من سكوتي طفلة متعرف الي داتمر بي امها ... جنت اتمنى احجي وياها ... اكوللها من تكبر تلعب وياج
بس مااكدر مو بيدي ياريت بيدي

نزلت من السرير معصبة بوجهه الطفولي البريء مسويه شنوفه بشفايفها وتبعد بشعرها عن وجهه وكالت
ماما متحجي واختي متلعب ويايه يالبي ياالبي
(ياربي ياربي)

ضحكت الها واشرتلها باصابع اديه بمعنى تعالي ...
هي اجت تقربت مرة ثانية وصعدت يمي حضنتها حيل وبوستها اوووف يااريحة ذياب بيها

الله يساعد كلبك ذياب  ... اني يمهم ابووس بيهم واحضنهم ومااشبع منهم شلون متحمل انت  بعيد عنهم

الله يصبر كلبك وكلبي  المتهشم ببعدك ...يا ترئ فاروق كلك قربئ جابت وشنو جان شعورك شنو ردة فعلك اكيد فرحت الفرحتي يا ذيبي...

فرحت من الشامخ ذبح فدا لان جبت بالسلامه

..........

وئام ...

من زمان الفرحة غايبة عن كل العائلة عدا الشامتين بينه وبمصيبتنه ..

اجاني عمر كال جدي عزمنا بالغربية ذابحين ذبيحة بمناسبة سلامة قربى ذياب موصيهم وهو بالسجن

دمعت عيوني وظليت ابجي بعد عيني اخوي والله مايستاهل الي يصير بي يعني والله ظلم يصير عنده بنيه وحرام عليه يشوفها

اجه كعد يمي كال سمعي وئام خاف تشوفين فريال هناك تسمعج حجي ديري بالج تكبين وتسوينها قضية انطيها اذن الطرشة

هو يدري بيه شكد متحملة عليهم وعلى حجيهم واريدها من الله على الله اشوفهم حتى اتكاون وياهم وهو عمر دوم يوصي امه ماتحجي كدامي شي من حجيهم حتى لا اتعصب

لان العصبية جاي تأثر عليه ... وحتى على صحتي .. ضغطي يرتفع لو عيني تنزف لو راسي يكب عبالك يريد ينفجر

مو هينه عليه الاخو غالي على اخته دووم يصير عزيز اخيته وخاصة اذا جان اخو بشهامة وحنية وغلاة ذياب مايهون عليه احد يتشمت بي والله اتمنى اكطعهم بسنوني وصلة وصلة

ظل عمر يوصي بيه مااتكاون وياهم واني بس اهز راسي بس ممقتنعة ناوية نية كشرة

انطلقنا للغربية ووصلنا للبيت الجبير مال العائلة وهناك كلهم متجمعين وشفت جهال ذياب اويلي يكسرون باب الكلب متتت من القهر واني اشوفهم عبالك شوفة يتامى خلاف ابوهم

حضنتهم وبجيت من كل كلبي وبحركة مايستاهلون هالورود المفتحة ينحرمون من ابوهم

ظليت ادور بعيوتي على قربى المسكينة رغم حزنها شفتها واكفة مبتسمة الي سلمت عليها وحضنتها

شفت فريال بس ماسلمت عليها ... هي مدري شنو شاورت وفاء اختها وظلت تضحك وتكركر من عسى صوتج الخرس والله الخرس الج مو لقربى المسكينة

دخلت للمطبخ اساعدهم رغم تعبانة ... اجت فريال واسمعها تحجي وراي اي وئام شدعوة ماسلمتي عليه ترى الجلب العضاج كتلناه

التافيت عليها وكتلها بعصبية والله ماغيرج الجلبة انت شلون تشمتين بذياب ولج ؟ والله صوج جدي يعزمكم على ذبيحة بنتو

خلت ايدها على حنجها وباستهزاء كالت يااا هذا منو كلج وكملت كلامها بضحكة وخلت ايدها على حلكها ...

بيدي الجفجير اتمنيت اضربها بي بس سمعت وصية عمر لمن يوصيني بالطريق ويكول اذا تعاركتي اله ارجعج لبغداد وتحلمين ترحين للغربية بعد وكمل كلامه كال الناس مناقصها مشاكل  وضيكة خلك لا تزودينها عليهم ...

اتراجعت  باخر لحظة  والا هي مستاهلة الجفجير ...وشرط على خشمها وسنونها حتى انوب اريد اشوف شلون تتشمت

اجه محمد للمطبخ وكالي تعااي شوفي طيبة شسوت بملابسها ... طلعت شفت عمر لازمها ويخزر بيه الظاهر سمعني لان اني جان صوتي عالي

بس تقربت منه اريد اخذ طيبة لزمني من ايدي وقربني كلي عليه وهمس بأذني : اني شكتلج وئام ؟

واني عبثا اسحب ايدي منو سألتوه هاي شبيك قابل شسوويت

كال بعصبية مو سمعتج تعيطين وئام مو مال مشاكل اني ماريد اتدخل بينجن انتن نسوان بس ترى الكل ضايج لا نحملهم اكثر من طاقتهم عيب  ولزمي نفسج

هزيت راسي وروحي تغلي منهم  .. فريال وحبربشيتها ...

رحت يم قربى بالغرفة خطية هي ماتحجي بس لازمة بنتها وتدحك عليه اخذتها منها وصرت العبها احسلي ابقى هنا ماريد اشوف وجه فريال والله كلما اشوفها تجيني رغبة مجنونة بقتلها

ورى الغده تجمعنا كلنا بالمطبخ الي تغسل المواعين والي تنظف والي تسوي جاي  والي تصب جاي بالاستكاين وتروح توزع للزلم

دخلت ام ذياب وظلت توزع جوكليت وتكول بنات لاتنسون تقرون الفاتحة لاموات المسلمين ولاتنسون ذياب من دعائكم

ضحكت فريال وكالت اكولج عمه بعد يا دعاء الي يفيد تره هو انسجن عشرين سنة وتاشر باصباعها العشرة تصعدهم وتنزلهم على راحة ايدها وتكول بدلع عشرررين يعني لاسنة ولا سنتين اسأليني اني محامية هو زين اخذ عشرين سنة مااخذ اعدام

ظلت ام ذياب تدحك عليها  ودمعتها بعينها .وبس ساكتة ... فريال تريد تطلع ودتحجي وينج وفاء جيبيلي علج اووي الخروف مالتكم مال العزبمة زفر

اني تبعتها لزمتها من شعرها  ورجعت راسها على الكاونتر وهي عاااطت ... والكل انتبهوا على صوتها العالي وهي تعيط متألمة ...!
...........

قربئ...

بعد مرور شهرين تقريبا الحمد لله صحتي تحسنت حاولت ابتعد عن حزني شويه وانتبهي النفسي،والأطفالي،لان ضليت متركزة بنقطه وحده وبنيت عليها الهم والغم يعني ذياب،بعد ما يطلع وبعد ما اشوف ذياب

جريت نفس كافي،يا قربئ اصبري،وانتبهي الاطفالج مو واحد هم ولا ثنين تلاثه ربيهم احسن تربية وخلي من يطلع ابوهم كون يطلع وراسه مرفوع ومفتخر بيهم ...

حاولت اطلع من قوقعة الحزن الي،دا امر بيها واتاقلم ويه الوضع الحمد لله كدرت اجتاز شويه من ماساتي...

وفاء راحت الاهلها من جبت لحد الان دكول اني ما عندي مسؤؤليه علئ شنو ضاله كاعده عندهم لو يكعدوني،ببيت ذياب،لو ما ارجع

وحذيفه يصيح ويستريج يريدها وكل يوم يروح الها ومتقبل تروح وياه وجدو وخالتي ما يقبلون وفاء تطلع من البيت...وتكعد ببيت ذياب متخبلين من هل سالفه ...الشامخ يكول اطلكها وما اكعدها ببيت ذياب...

استغفر الله ما ادري شبيها دكها ومدكوكها بيت ذياب شكد نفسيتها ضعيفه عينها علئ اكلاك غيرها ولا تستحي هي ورجلها واني هم ما قبلت ما اريد يكعدون ببيتي...

وسيف هل ايام هادئ ما يتحرش بيه مبتعد عني كل البعد بس عود شنو مخلي عينه علئ فريال واكع بالحب الاخ بلكي يتزوجها ونخلص منهم ويكفونه شرهم صدك اذا تزوجوا يتطبق المثل الطيور علئ اشكالها تقع ...نفس الزباله حشا السامع...

كاعده اكطع بالخضره من المزرعه .اشوف سيارات طبكت استغربت شنو هل سيارات معقوله النه

تنحت علئ صفحه وهم نزلوا منها رجعت اركض جوه دخلت اندك الباب بقوه

طلع حذيفه الهم هو والشامخ ودخلوهم جوه راحت حفصه سوت جاي وراحت تتسمع عليهم واجت كالت ..ذول جايين عليج

انصدمت...شنو جايين عليه اشرت الها بيدي،بمعنئ شكو

كالت...ما اعرف والله اروح افتهم الموضوع واجي

خلت وراحت تركض وراها بعشر دقايق اجت وجهه مخطوف اشرتلها تحجي كالت...لج هذول جايين عليج اخوج دازهم من الاهواز اخوج سليم ويردون ترحين وياهم...لان راح تنرفع عليج دعوه من بنت عمتج اخت شرهان ...

نهاية البارت...يتبع

كونوا انتم كونوا بخير....احبكم 💔

نور سمو العراق😘

لا تنسوا التصويت و المشاركه بكم نكتمل...

اعرف البارت قصير وما بي احداث بس اليوم جان عندي دوام ان شاء اللة باجر اكمله الكم تكمله لهذا البارت...اعتذر عن التقصير لكن ظروفي حالت بيني