رواية #سلالة العنفوان...ذنب عينيك الفصل السادس والتسعون 96 - بقلم الكاتبه سمو العراق

الذنب 38
رواية...ذنب عينيك...سلالة العنفوان
بقلمي ...نور سمو العراق

💔💔💔💔💔💔💔💔💔

يصحبني الشوق ويسلمني بيده إلى الحنين، ثمّ يوصلني الحنين إلى باب الذكريات، يطرق الباب ويجري ليختبئ ويراقبني وأنا أقلب الصفحات التي رتبتها، بعد أن أنتهي أغضب وأنثرها في كل مكان، وأخيراً أعود لأرتبها كما كانت وأغلق الباب خلفي، هكذا يفعل الشوق والغياب حين يحتاج أن ينفض الغبار عن مقتنياته الخاصة ونحن وذكرياتنا من مقتنياته الخاصة.

تنوية..بنات رجاءا هاي الأحداث خلصت وانتهت ابتعدوا عن الطائفيه وبلا سب المات الله يرحمه وهو يتجازه ويه ربه ونقلت الحدث سابقا بحذافيره اقصد علئ النظام السابق

.................

اقسئ شعور علئ الانسان هو شعور الغياب من يغيب عليه انسان يحبه دائما يجتاحني شعور بالوحده والالم ورغم كل هذا عندي امل ان التقي،بي واحضنه واشبع روحي من عطره واضل علئ امل انتظاره مهما طال الزمن وطال الغياب...

دائما اضل واكفه بنص الطريق اعشق شوفته والتقائي بيه واخاف من غيابه وتنتفض عندي الاحاسيس و المشاعر...

وبعد ما غاب عني ذياب تلث سنوات تقريبا حسيت نفسي شفته بصورة اوضح وحسيت نفس بحاجتة اكثر حسيت بمدئ تاثيرة علئ روحي وعقلي وشخصيتي وبغيابه حبيته اكثر وكرهت نفسي اكثر ...

من سمعت خبر العفو العام بالتليفزيون روحي فرت من جسمي ما عرفت شلون اتصرف بس جنت اصرخ مثل المرعوبه ...

مثل الطير الي تحرر من سجنه عبالك اني المسجونه عبالك اجه العفو اليه العفو جان بمثابة اطلاقي حره...

طلعت خالتي تركص وتهلهل الشامخ اخذ مسدسه وطلع ضل يرمي فرحان بالعفو الصدر وحفصه تركص ويه خالتي واجت ام سيف هم تهز وتركص والجوارين عبالك ابنهم الي محكوم مو جيرانهم يهلهلون ويطشرون جكليت والدك والركص...

وبعدها جيرانه جاب موسيقئ وفرقه ضلت تدك ببابنه ويعزفون ويركصون والشامخ يكت فلوس عليهم ...

وخالتي تهلهل واني ابجي من فرحتي وكلبي الطاير عبالك العفو مثل المباراة واجه هدف باخر دقيقه فرحه عمت علئ كل الشعب..

بس للاسف اكو هوايه ناس مجرمه وقتله ومغتصبين طلعو من السجن يعني العفو شمل البريئ والمجرم

وهماتين اكو ناس بريئة الله فرج عنها وطلعت من هل زنزانه المضلمه...

من بين شعوري بطلعت ذياب تذكرت اهلي وفرحت اكثر معقوله اهلي راح يطلعون ويشملهم العفو تصير الفرحه فرحتين

نزلت دموع الفرح ياربي شنو هل لطف والمحبه معقوله اهلي وذياب يطلعون بنفس السنه والتقي،بيهم بنفس السنه

حضنت اديه الصدري وانحب بفرح الحمد لله يارب الحمد لله علئ لطفك وكرمك ويارب يرجعون سالمين غانمين يااارب ...

خالتي باوعت عليه واني باوعت الها ضحكت واجت تمشي سريع عليه واني ركضت الها ركضت بحب ولهفه حضنتها واني ابوس بيها وابارك الها عن ذياب...

كلتلها...شفتي خاله شفتي ربي ما يرضئ بالضلم ما راد يكون ذياب بعيد عني ولا عنج عشرين سنه هواي والله هواية الحمدلله سنتين ولا كل هل سنين

احتضنت وجهي بصدمه ودهشه واني باوعت الها مستغربه ضلت تصييح...الحكوووو ول يا ابو محمد قربان حرمة الذيب طلع صوتها من بعد تلث سنين صلاوات كلووووووووش...

رمشت بعيوني مصدومه وخليت ايدي علئ شفايفي شهكت بضحكه .ههههاي اي والله صدك صدك والله طلع صوتي يممممه محمد يمه طلع صوووتي ...غدير يمه هدييير...

الشامخ باوعلي جان لازم مسدسه رفعه ليفوك كال...وهاي الطلقه الصوت قربان

وضل يرمي وخالتي تهلهل رغم جانت الدوله قويه والعالم تخاف بس بيومها صار رمي مو طبيعي تحس الناس كلها عندها سلاح...

ضحكت وهو تقرب مني وباس راسي كال...والله لاذبح كل الدواب اليوم علئ هل اخبار.

ضحكت واجت حفصه باركت اليه دخلت جوه واني،اركض فرحانه مثل الفراشه اتنقل من مكان المكان روحي ما ساعيتها الفرحه

مرتبكه خجلانه متحمسه شلون اقابل ذياب شلون التقي بي شلون رايح يكون لقائنه يمكن اذا حضنته كل اهل الانبار ما يبعدوني عنه

تلث سنين يا ذياب تلث سنين وانت ماكو تلث سنين واني مشتاقه لعيونك الحلوه وعطرك الاسر تلث سنين ودمعتي مانشفت عليك ولا قطعت الامل بيك

صرخت بنص البيت بصوت عالي واني اضحك من فرحتي والدموع تارسه وجهي....احببببببببك ذياااااااب احبك امووووووووت عليك

انتظرتك يا سجيني مثل يوسف ويعگوب اتمنئ تجيني مثل لمح البصر كون بس ارمش الكاك كدامي .

شهكت من بين دموعي،ورحت باوعت للمرايه مسحت علئ وجهي يا لازم اعدل نفسي لازم اكون حلوه حتئ ذياب ينعجب بيه لازم احضر نفسي اكون عروس بليلة عرسها..

رتبت شعري وفتحته خلصت السنين الي فاتت بغياب ذياب كله رابطته ولا فديوم فتحته خليته هيج مثلما يحبه ذياب واباوع الوجهي الي جان اصفر صار احمر مثل الدم رجع الدم بوجهي وملامحي استبشرت

جريت نفس وزفرته والضحكه شاگه حلكي...يا الله معقوله هيج الحب يسوي يعني بس عرفت ذياب راح يرجع واجاه عفو عام رد وجهي ورد وارتاحت نفسيتي ياربي لعد شكد احبه ...

اجه الشامخ رجع فتح التليفزيون وطلع بيها صدام حسين حجه عن العفو كال بس الي كانوا ضد الدوله ويه إيران ذول ممشمولين...

خفت شويه كلت معقوله اهلي ما يطلعون بس اهلي مو ويه إيران ولا معارضين ولا الهم اي دخل بالحكومه ما اعرف شلون هيج صاىت عليهم تهمه باطله والله اهلي ما الهم ذنب وابرياء...

خالتي كالت بفرحه...بويه يالشامخ انه اخذ قربى للسوك اشتري الها ملابس واخذها اصبغ شعرها واحفها عجل غير هي ما حافه وجهها وحواجبها من انسجن ذيب لحد هساع

رد عليها...اي بويه سون التردنه وانه راح اخابر رجل شوتيه اريده يروح يلتقي بذياب بعد العفو وبلكي الله ويطلع هل ايام ونذر عليه تلث ايام انه اذبح واوزع للفقره...

جاوبته...الله يخليك يا عمي خيمه علئ روسنا والله احنه من دونك نضيع ...

رد عليها...ول ول شهل كلام بووويه انه لو بيدي اذبح قتيبه فدا لذياب انه غير العراق اليوم كلو ما سايعني اليوم من فرحتي انه گبل جنت اكول انطي كل حلتلي ومالي بس تا يرجع ذياب مو هساع اجاه عفو من دون مقابل غير هاي رحمه من رب العالمين

ردت عليه...اي والله صدك انطينه حالنه ومالنا وما حصلنه شئ من طلعتو الحمد لله يلي،لطف بحال حرمتو و ويلادو وطلع وراح ينور بيته ويفرح عائلتو

جنت اضحك وفرحانه ودموعي ماخذهن الواهس،ويه ضحكتني هم الهن حصه بهل موقف ابجي واضحك بنفس الوقت

كال الشامخ...يولو سمعينه صوتج الحمد لله يوم الطلع وذياب بعدو ما اجه هينا عجل غير يورنه ور عليش انخرست ومنو وياهو وادحكو زين انتم السبب ههههههههههه

جان يضحك واكتافه تهتز وضحكته عاليه ماليه البيت يا سبحان الله جنه صدام حسين من يضحك هم هيج بس اني شكد جنت اضوج منه واخاف منه بس الله قذف بكلبه الرحمه تجاهي بحيث ما شفت اي اذيه منه الحمد لله يارب من لطفت بحالي...

مر يومين السجون صارت بيها فوضئ. بس الحمد لله العفو شمل ذياب ...وخالتي اخذتني للسوك اشترت الي ملابس وشغلات حلوه وهماتين اشترت الي سوارات وساعه ...وتراجي خراخيش العيد

واخذتني حفت وجهي وحواجبي بس ما قبلت اصبغ شعري ما احب اصبغه احسه محلو ولونه احلئ وذياب يحبه هيج...

رجعت فرحانه عبالك عروسه وديجهزون بيها الجهال كبروا علاوي خمس سنوات ونص حيدخل بالسنه السادسه وغدير اربع سنوات و هدير سنتين ..

عضيت شفايفي بفرحه يجي ابوهم يشوفهم كبار ويفتهمون علي السنه الجايه بالمدرسه او هي هاي السنه لازم بالمدرسه بس للاسف ما عنده جنسيه ...

صفنت واني افكر ومبتسمه يا الله ذياب هسه ينصدم بيهم عافهم اطفال وهدير اصلا ما شايفها هسه بالمستقبل علي يتسخر لابو وشنو يطلب منه يروح يجيب اله اووووي فدوه ربي يحفظهم ويخليهم اليه يارب اميين...

.....................

وئام....

من سمعنه خبر العفو العام بالتليفزيون واحنه ما نعرف نهلهل نصرخ نلطم ما نعرف شنو نسوي بالضبط اني صكيت بمكاني ابجي واصرخ وعمتي تهلهل وعمر يهلهل وياها واحسن منها اصلا

من شافني مصطكه وابجي حضني بحماس،وهو يزكح...ولج وئااااام وئاااام اخوووج راح يطلع ذياب اجاااه عفووو اجاه عفووو

حضنتو بقووة وانه اصرخ وابجي ...عمررررر اخوووي ذيبي راح يطلع الحمد لله يارب الحمد لله

تركت عمر وركضت علئ علئ عمتي وهي تبجي تحاضنه ونبجي سوه وهي تمسح علئ شعري وتبجي بصوت عالي كالت ...الف مبروووك الف مبروك وئام يمه الحمد لله الحمد لله الي نصر ذيب علئ اعدائه وما خله واحد يتشمت بي الحمد لله

رفعت عيوني للسماء بفرحه...الحمد لله يارب الحمد لله عمر فدوه خلينه نروح لذياب

رد عليه بضحكه...ولج وين نروح شايفه هسه الفوضئ،مال السجون صدك تحجين

جاوبته...عجل خلينه نروح لفاروق نحتفل وياه وهناك امي،وجدتي فدوه اخذنه عمه احجي وياه

كلتلها...اي والله يمه عمر اخذنه خلينا نفرح ونتونس ما شفنه الفرحه من زمان

رد عليها...مو صار رمي اخاف عليكم ...لا انوب وحده منجن تجيها طلقه تايهه وانوب نبتلي وتروح فرحة ذياب...

جاوبتو...لا لا حباب عمر والله ما يصير بينه شئ

رد عليه محمد...اي اخذنه خلينه نتونس صدام انطه عفو وطلع المساجين وانت ساجنه هينا دطلعنه يمعود وانطينه عفو

عمر بضحكه...خو انت ابو اللسان منو يكدرلك دومك غالبني جنك امك

طيبه كالت...اي طلعنه متنه حابتنه هينا « حابسنه »

طبعا طيبه محتاره ساعه تحجي بغدادي ساعه انباري مشكل يا لوز ما تعرف شتريد بالضبط ههه

كال...يله ولكم روحو بدلو خلونه نروح وناخذ موسيقئ تدك بالشارع ...

والله صدك بسرعه رحنه بدلنه وكملنه ورحنه بالسياره والشوارع ضاجه بالعالم والركص والهوسات احلئ من العيد والله...

رجال نازع شماغو ويركص يصيح...منريد الاكل والماي بس سالم ابو عداي

والهتافات والعالم تصيح...بالروح بالدم نفديك يا صدام ...

علئ عناد امريكا صدام انطانه عفو

يكولون يكولون عدنه سلاح امريكي ما يدرون ما يدرون عدنا بطل تكريتي

جان يوم يجنن مشرق ومشع بس جانت العالم فعلا ترمي حتئ استغربت منين جابت العالم كل هل سلاح وشلون يرمون ...

كل شخص عندو سجين فرحان جثير بهذا الخبر وتبيض السجون والمعتقلات ومحمد مطلع نفسو من الجام ويهز جتف ويهز رگبه ولا عندو تربية واخلاق مع العلم اني دوم اعلمو واادبو بس هو هيج اخلاقو شسويلو...

كتلو بفرحه...عمر فدوه اخذني البيت عمي ابو فريال اريد اتشمت بيهم فدوه

رد عليه بحده...ولج عيب الشماته حرام

جاوبتو بحزم...لا بيهم حلال ما تدري شكد جانن يتشمتن بيه من جان ذيب بالسجن

جر نفس كال...لا خلي يولون انتي مو ما تحجين وياهن من يوم الكتلتي فريال عيب ترحيلهم

رديت عليه...لا يول ما عليه بيها انه اريد ابشر عمتي صبيحه اكيد هساااع تفرح تموت من فرحتها

دحكلي بنص عين...تفرح موو وانتي رايحه تبشريها شلج بيها هاي انوب ...

ضحكت...عفيه عمر اخذنه عمه حاجيه ولا ياخذ كلامي كلامي بالنسبه الو مثل السم ولا مره استجاب الي واخذ كلامي

جرت نفس كلتلو...عمر اخذها هاي فلفله اذا ما اخذتها تضل تنك عليك سنه كاملة ليكدام

رد عليها...يمه ما اريد مشاكل وياهم

جاوبتو...لا ما نسوي مشاكل يمه هي وئام تبشرهم وتركص وتجي

فر السياره كال...اكدر الجن اني اكلتني وشربتني

ضلينه اني وعمتي وحده تدحك للثانيه فرحانات ونتغامز ونتلامز عود احنه مسيطرات وعمر يمشي براينه والنريدو نسوي ههههه

وصلنه علئ بيت عمي،ودخلنه وانه اطش جكليت واصيح واركص بنص الصاله...وصدام انطانه عفو علئ عناد كل شامت صدام انطانه عفو علئ عناد كل شامت...وصدام حسين يلوگ النه كللللللللللوش ...ذياب فرجو عنو اجاه العفو تعالو باركولنه يووول تعالو يا بيت عمي افرحو الفرحتنه

عمتي وقتيبه واكفين مصدومين وجدتي تصفك وعمتي صبيحه مجتقه اديها وتخوزر بيه

وفريال نزلت من فوك تمسح بخشمه طاكتها انفلونزا لابسه كلو اسود وجاكيت طويل اسود ونعال شبشب المفلوكه حلوه...

من شفتها ضليت اركص واهز ..وذياب انطو عفو علئ عناد كل شامت ..كللللوش

حطت اديها على راسها كالت...اوووه كافي صرعتينا راسي يوجعني مدا تشوفين مريضه هسه درينه طلع هو حتئ حرام يطلع لان قاتل نفس بريئة واصلا هذا العفو ضلم لهواية ناس بس،بعد واحد شيكول

تخصرت...والله بيج خير روحي كولي للسيد القائم العفو لانطيتو غلط تا يشكج بالنص يالله امشونه خلونه نروح الفاروق انه اليوم ناويه افر الديره كلها وكلللللللللووووووش...

بالروووح بالدم نفديييك يا ابو عداااااي كللللللوش وذياب يا جكليته حامض حلو بباكيته وذياب جكليت وحرمتو نستله كلللللوش

سحبني عمر بعصبية وزكح بوجهي...شبيج وسم تخبلتي تهلهلين وتركصين شبيج انجنيتي

جاوبتو بحماس...فرحاااانه فرحانه يوووول شسوي مو بيدي اخوي محكوم عشرين سنه وطلع بالعفو انه هساع اريد الكح ملابس،واركص بالشارع

سحبني من جتفي ولكحني بالسياره..تزع ملابسها هي والله انطيتج مجال حتئ اشك الخلفج والله ويالله للبيت مو صوجج صوجي اني المطي الماخذج وافتر بيج تخبلتي ...

ضحكت...لا بروح ابوك بس الفاروق اريد اعيش الفرحه ويه فاروق

عاط بيه...امشي،والله لا فاروق ولا بطيخ مو صوجج صوجي اني جني مطي تجيبيني يسره وتاخذيني يمنئ

تنهدت...حسدتنا فريال شافتنا متفاهمين اقره المعوذتين

ساق السياره ورد عليه...انلصمي

انه ما اكدر انلصم ضليت اصفك واهوس و ويلادي يركصون ومحمد ماخذ وضع الاهتزاز يهز جتف ويرد ليوره ....

ورجعنه وعمر ما اخذنه لبيت فاروق طنكر علينه بعد والله اله اكول الفاروق عليه عجل من وصلت يم فاروق تخبل ما يصير هيج

.........................

فاروق ...

فرحتي اليوم مايوصفها وصف ، يمكن اضعاف فرحة المساجين الي انعفى عنهم واهاليتهم .. لا والله عبالك انولدت من جديد .. عبالك انه المطلق سراحي مو ذياب

جنت واكف كبال المراية اعدل بجهرتي وادندن وفرحان واغني هاي الاغنية لزكت بلساني من البارحة جان طالعة على التلفزيون

اغني وارفع بجتافي الله يخلي الريس الله يطول عمره وادعيله بكل ساعة
ودخلت عليه سوزان بيدهه وحدة من البنات ظلت تركص ولازمة ايد ديلان وتحركها وتغني وياي وانه اصفك واضحك واغنيلهم

ودخلت علينا جدتي صالحة تهف بعبايتها وتصفك وتهوس وتدبچ وتكول وصدام حسين يعودلنه وصدام حسين يعودلنا

كتلهااا هوووب جده من اجاه يعودلج الله عليج منين جبتيها هاي

كالت ياااع فاروغ شمالك اسمعها بالتالفزيون هالنساوين وهالرياييل يدبچون بيها وتعلمتهه

جاوبتتهه لا يمعودة يكولون يلوكلنه مو يعودلنه

كالت يااا جاا وذني ماسمعت عدل جاا شمالك انته

وانه أأشر باديه كتلها يعني وذنج ماتسمع الهوسة عدل بس تسمعين صوت البوسة من ابوس سوزان بالمطبخ وانت بالصالة

اييي فاروغ عادك لاتحط عينك على وذني واحد شعده قير ذاناته ...

اكلج جده انت وعبايتج ومتحضرة وين رايحة ؟

صدك مااكتلك يمه فاروغ يده فارووغ انه متزهبة عمني اريد اروح وياك تييب ذياب

شسووين رايحة وياي جده هوسه هناك وخاف تضيعين وين الكاج كعدي هنا احسن الج من الهوسة

كالت بشبه عصبية لااااع فاروغ لااا انه محتمة حتم (مُصرة) اروحن وياك حالي حال هاي النسوان يدبجن ويهوسن للريس جاا هم اريدن اهوس جا انه وحد عنهن ماتكلي

هاا يعني ما فرحانة لذياب بس تردين ترحين تردحين ودبچين غيره من النسوان مو

كالت معترضة لا والله وروح ابوي وعيونك انه جا اعزه ذياب خوش ريال ماطلعت منه العيبة

كتلها جده انه مو وحدي رايح وياي الشامخ همين وأنت وياه مثل البطنج والحية واحد مايطيق الثاني

كالت وأنه ياهي مالتي بي شمخاني هو بدربه وأنه بدربي

جاوبتها صاك سنوني مو احنه دربنا واحد جده

كالت جا روح شسويلك اجابل التلفزيون واهوس واخلي شليفة و دليمه يدبجن وياي

سوزان جاوبتها بامتعاض ؛- بيببي عفية شوكت تلفظين اسماءهن صح ديلان و شيفان ديلان وشيفااان فدوة الفظي يله

باوعتلها جدتي بنظرة عدم رضا وردت اعوذ بالله منك يالساني همبببييت البامية شكد تنفخ هسه لو انه مسميتهن مو احسن من هالاسماء الخرطي

تريد تحجي سوزان جدتي قاطعتها وسألتني بحماس ها صدك فاروغ هم تيبون مزيقا ؟

وانه رحت للمراية اتأكد من طلتي للمرة الاخيرة واباوع لساعتي باستعجال جاوبتها اي جدة اكيد جم ذياب عدنا هاي فرحة العمر بعرسي مافرحت هلكد

باوعت لسوزان معبسة حواجبها ، وانه ظليت انزل حواجبي واصعدهن وابتسم

جدتي كالت جاا شلون حرام عليكم شني ماراح ادبج ع المزيقا

سوزان كالت فاروق خطية بيبي لخاطري اخذها ...

كالت اول مرة تحجين حجايه بيها خير تعاي هل احبنج
ولزكت سوزان ببوسه على خدها

وانه بوست البنات وطلعت من الغرفة جدي قاسم خطية محضر روحه ...يروح ويانه ...

شاف جدتي كال هم تروح ويانه
هي غطت وجهه بالعباية عود خجلانة ..

انه كتله اي ناخذها ونس ...

هي وخرت العباية وكالت جنكم على ونس ابشروا ...

جدي كال يله بويه يله ...

طلعنا من الشقة وجدتي ورانا ...
واباوع للساعة كل شوية ... اجرنا تكسي من الشارع ورحت على بيت عمر هناك جدي ... الشامخ وعمر وطلعنا كلنا سويه ...

اغلب الوكت ساكتين محتفظين بحشد من المشاعر بداخلنا .... ماتوقعنا بيوم من الايام القدر راح ينصفنا ويرزقنا هاي الفرحة الي جنه ننتظر منها بصيص امل يسعدنا ويحرر ذياب من سجنه ويرجعه لعائلته امه وعشكه واطفاله والنا كلنا ...

وصلنا للسجن وجانت هووسة حشود من المساجين واهاليهم واصوات الهوسات والطبل والدك وهوسات تمجد بصدام والبعث وقرار العفو وتلعن وتسب امريكا واسرائيل

نسوان وزلم ووكالات الصحافة والحرس كلها متجمعة بهالمكان ...

جدتي شافت الهه نسوان وراحت وكفت بصفهم وظلت تهوس وياهم " صدام انطانه العفو على عناد امريكا "

واحنه واكفين ننتظر طلة ذياب علينا .. جدي قاسم كلساع ويندسني بوويه فاروغ صيح على يدتك كلها بسچ مرغلت روحها فشلتنه

همست باذنه جدي خليها متونسة قابل كل يوم تهوس لو كل يوم صاير عفو

من جعة ثانية الشامخ كلي ذياب ماشفت
وقطع كلامه وعدل اسمي وكال فاروق هاا تاخر ذياب بس لا مامشمول

حقه هو باله كله يم ذياب ... جاوبته لا جدي الكل مشمول بس ماجاي تشوف انت الاعداد شكدها وشكبرها

ظلينه ننتظر الى ان بين ذياب من بين المساجين .. شايل اغراضه وغتره ملفوفة حول رقبته طلع مبتسم وهو يعبي رياته ويتنفس الحرية بعد سنتين من الحبس

توجهنا اله حضناه واحد واحد وسلمنه عليه وتحمدنه اله بالسلامة الضحكة لا فاركتنه ولا فاركته ... واخيرا ضحك النه الحظ وافرج عنه ورجعه النا وبين اهله وناسه من جديد

دنك باس ايد الشامخ ولأول مرة اشوف الشامخ يبجي سمعت صوت بجيته وجتافه الي تهتز وانه اعرف ذياب عزيز على كلب الشامخ بس اليوم لا اتضحت معزته اكثر واكثر من نزلت دموعه عليه

اجه دوري وحضنته كال بلهفة فارووق واخيرااا يااخي بعد ماكو زيارات دااخل السجن بعد راح نتشاوف واحنه بره مو ابين اربع حياطين

رجعت حظنته مرة ثانية كتله والله شوفتك داخل السجن تختلف عن هنا حتى صوتك متغير يااخي عبالك حلم والله

كال يمعودين دخذوني منا لا صدك يطلع حلم ...

ضحكنا و اخذناه بالسيارة واخذنا ويانه موسيقى وجدتي كلتلهم ماريدكم تبطلون كون تدكون لمن ما تعيزون وهم لا تبطلون ذبت لحم جدتي ع المزيقا على كولتها

وانطلقت بينا السيارة باتجاه الغربية وهناك راح يصير لقاء العاشقين ...
.......................

قربئ....

اليوم شنو اليوم اسعد يوووووووم بحياتي كولها اليوم انولدت من جديد اليوم قربى عروس بحياتي كولها ما حسيت مثل جمال هذا الاحساس

فعلا اليوم عبالك داخله الجنه برجليه هذا اليوم ادفع اله كل عمري وما اتحسف اليوم ذياب يجي من بغداد للغربية اليوم تنور الغربيه بيه وبوجوده اليوم اني ما اعرف اوصف نفسي البهجه ماليه صدري

وضاله منو اشوفه ابوسه وكل شويه وحضنت حفصه وبستها وهي دكول وفري بوساتج لذياب يول كافي كل شويه وبايستني

ضحكت...ههههههههههه دخلي يجي،يوووول ابوسووو عشرين بوسه ابوسو من راسو لحد جدمو

ضربتني وهي تضحك وخلت وراحت كالت...ادبسز منحرفه ههههههههههه

ابتسمت واني اباوع النفسي،جنت لابسه فستان احمر كصير بي فراشات وبي ياخه من كدام ودكم وحزام علئ الخصر ولابسه حذاء بيضه ناصيه

وشعري رفعت نصه بطباقه والنص الثاني خليته مفتوح وهو منفوش طالعه حلوه وخليت حمره لونها احمر وخطيت كحل وكل شويه اعدل نفسي،واضحك وارتب بشعري وابتسم عبالك عروسه ...

حطيت ايدي على صدري وحجيت بلهفه...هااا خاله ما اجووو

ردت عليه بتنهيده...لا والله يمه بعدهم

باوعت علئ،الجهال هم منتظرين وكل شويه كالو...هو تنو ما اده...« هو شنو ما اجه » متحمسين ويايه رغم ما يعرفو هم بس لان يشوفوني متحمسه

ضحكت...هسه يجي من تشوفو حضنو وبوسو حيييل هذا ابوكم مفهوم

ردت هدير...بوته عييييل «ابوسه حيل»

شلتها وبستها.. اي انتي،بالذات لان انتي الوحيده الي ما شافج ذياب ولا حضنج ولا باسج

هي جانت ما تفهم عمرها سنتين وكم سنه بس جانت لان تشوفنه فرحانين هي هم فرحانه وتصيح ابويه اح اجي...

وفاء طلعت من غرفتها جانت نايمه كالت...وين راح حذيفه اريده يجيبلي جبن اريد اتريك

خالتي ردت عليها...راح يجيب جم راس غنم تا يذبحهن لان ذياب اليوم يجي

ردت بتافئف...وهسه شلون اموت جوع هو مو يعرف اني من ما اتريك يهبط ضغطي...استغفر الله ياربي

خلت وراحت الغرفتها خالتي غمتها من دارت وجهها واني صدك ضحكت عليها اليوم مخلصتها ضحك...

خالتي كالت كلبي،يوجعني خلي اطلع برا اخذت الجهال وطلعت برا واني ضليت افتر بمكاني وافرك باديه بتوتر وخوف وقلق وارتباك وفرحه ما اعرف شعوري اتمنئ بس يجي بسرعه بس اشوفه كدامي ....

اجت حفصه تركض كالت بصرخه ولهفه...اجه ذياااااب اجه العالم كلها تركض تعالي حدري يا قربان

ركضت ملهوفه وارجف ذيااااااااااب ذياااااب حبيبي

طلعت من البيت شفت ذياب من بعيد سودخ عليه يعمري متغير هوووايه بس يضل بعيني اجمل واحلئ انسان دحكته عيني

بجيت بصوت عالي من شفته العالم تهلهل وتصفك والموسيقئ والشامخ علئ يمينه وفاروق على يساره يعدلون بي وهو يضحك فرحان

وشفت خالتي تركض ملهوووفه وتتعثر بخطواتها وتصرخ بصوت عالي ومكسور...يمه ذياااااب ينظر عيني يمممه يا حبيبي

هو باوعلها وركض عليها وصلت عنده حضنها وباسها يبوس،بيدها وراسها ويشمها ويضمها الصدره

وهي تصرخ وتبجي .تبوس بيده وبصدره نزل ودنك الها وهو يبوس رجلها

دنكت عليه وحضنته مثل،الطفل ورافعه راسها للسماء وتصيح ...الحمد لله ياربي الحمد لله رجعتلي ابني سالم وفكيت اسره الحمد لله ياربي الف شكر الك يارب...

وهو جان مشغول بيها يمسح دموعه بشيلتها ويبوسها ويبوس اديها انتبه عليه والشامخ اخذ امه منه

فتح اديه وهو يستدعيني الحضنه كدام كل العالم الموجوده

رجليه جانت ترجف وحده تضرب بالثانيه خطوتين ما كدرت امشي الموقف هزني هز ...

اركض عليه احس المسافه طولت بينه والدموع حجبت عندي الرؤيه ورجليه ماتت وكل جسمي يرجف وريكي جف

وصلت عنده وهو الي وصل عندي اصلا سحبني الصدره وهو يبوس،براسي واني اصرررخ واشهك بصوت عالي فززت كل العالمما نطقت ولا كلمه ولا حجيت بس جنت ابجي بصوت عالي وهو يهدي بيه ويسكت بيه...حبيبتي يعمري انتي اسكتي كافي راح يوكف كلبج ول بويه ادري هيج تبجين ما طلعت من السجن ولا طالبت بالعفو

جنت بس اشهك علئ صدره واكثر العالم بجت عليه سمعت الشامخ وهو يصيح...ول ول فاروق بعد جدك نساوينه ما ناويات يخلنه فرحانين ام ذياب تخربطت..

‏"كم هو جميل، أن أنام بجانبك، أن أستيقظ بجانبك من جديد، جلد على جلد. لا شيء بيننا، لا يوم، لا ليلة، لا خوف، لا ضجيج. أن نكون معًا ودائمًا، واحدًا".

| غونثر دايكه

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لا تنسوا التصويت و المشاركه بكم نكتمل 🌷

مقطع يخص العفو...