رواية #سلالة العنفوان...ذنب عينيك الفصل السابع والتسعون 97 - بقلم الكاتبه سمو العراق

الذنب39
رواية...ذنب عينيك...سلالة العنفوان
بقلمي...نور سمو العراق

💔💔💔💔💔💔💔💔💔💔

.....................أتقن الغياب وأنا أتقنت الحنيِن، وكل منا أدمن ما ھو عليه

..............................

مرات الانسان من توصل بي الفرحه الحد الإغماء تكون فعلا هاي اكبر فرحه و وصلت المرحلة الهيام والاكتفاء...

خطيه خالتي تخربطت من فرحتها وحقها محد جان يتوقع ان ذياب يطلع من السجن ويقضي بس تلث سنوات من بعد ما انحكم عشرين سنه ...

ياالله فعلا فرحه تدمع الها العيون والله والله ما اعرف هل شئ مجرد ما يكون من الذاكره يكون اسعد يوم وابجي من فرحتي ويغلبني الحنين...

ذياب ابتعد مني وهو ملهوف علئ امه وهم كانوا مشغولين بيها ويحاولون يصحيها...

هو ركض عليها وشالها بين اديه مثل الطفله ويحاول يصحي بيها ويبوس،بيدها وبراسها ويحجي وياها بحنان..يمه يمه حبيبتي عليش هيج تسوين كولي يا الله هذا انه هينا جدامج

فتحت عيونها بتعب واهدابها مبلله بالدموع همست بوجع ...يمه ذياب كول هذا مو حلم...

رد عليها وهو يبوس بيدها...افرحي يا ام ذياب مو حلم ...هذا انه جدامج

حضنته بلهفه وهي تبجي علئ صدره وتشهك وتضمه اكثر وكأن عبالك راح ما تلتقي بي ابد...

اني جنت ارجف عليه جنت اريد احضنه ابوسه ما اكتفيت منه ما شبعت منه ولا ارتويت تلث سنوات بعيد عني وكل سنه عندي بألف عام ...

شال امه واخذها للبيت والموسيقى والركص وعمر جان جاي وياهم ومحمد ابن وئام ذاب لحم بالركص من بين دموعي ضحكت عليه متحمس زياده يركص بذمة ومن كل كلبه. 

وصلنه للبيت وخالتي خلاها علئ القنفه وهي،بعدها متمسكه بي وتبجي وحاضنته ما تريد يبتعد عنها ولا دقيقه ما جانت تدري اكو قلب يرجف عليه ويريد يحضنه مثلها...

الشامخ صاح بيها...ام ذياب يووول كافي تراج تعبتي ذيبنا وبعدين ناس جثيره منتظرته ومزهبه حالها تا تشوفو خلي يتنفس شويه

ردت عليه بدموع وألم...بووويه ما اكدر وليدي هذا صار تلث سنين ما شايفتو اخليني اشبع منو واشم عطرو فدوه يا عمي...

جر نفس...بويه ما كايل شئ،بس خطيه تعبتي،واكو ناس ضاله بس تدحك بعيونها انطي الغيرج فرصه يحضنو هههه

هي عرفت يقصدني كلتله...اي مو هو بعدين يروح يمها ويسد بابو انه بس هساع

اني انحرجت وهو ضحك كلها..ول يمه فضحتينا عاد مو هيج ههههههههه

باوع عليه وتنهد بفرحه اعرف بي يريد يلتقي بيه يحضني اكثر يضمني الصدره يشبع انفاسه بيه ابتسمت عليه وهو سوالي،حركتة المعتاده بخشمو

ضحكت ونزلت عيوني واني اتمنئ اخذه واطير بي ابتعد عن العالم كله بس اني وياه

نظراته جانت تفسر عليه صح ملهوفه عليه يا قربان بس امي حاليا اولئ بيه ههههه

فعلا هذا الحسيت بي وما ضجت ابد رغم جنت اريد احضنه بس حاسه باحساسها ماكو احن من الام علئ ولدها رجعت مثل الطفل من يتعلق بأمه هي هيج متخبله علئ ذياب ومتمسكه بيه بقووه...

بعدها كوه اخذه الشامخ منه وطلع بي هو جان مزين ومحدد لحيته ولابس دشداشه بيضه كولش حلوه طالعه عليه ...

كلبي جان يرجف عليه بس صبرت نفسي كوه اصبري يا حلوه صبرتي تلث سنين وكنتي ناويه تصبرين عشرين سنه يعني ما تكدرين تصبرين كم ساعه عجيب امرج هههههه...

هكاتين حضننه اخواته حفصه و وئام وضلن يبجن رغم وئام التقت بي ببغداد وبجت وياه وحضنته بس خذيه ممصدكه كل شويه وباسته وحضنته

قبل لا يطلع كال بلهفه وحب...ويلادي وييين ؟

ابتسمت وباوعت الهم الخووونه ولا كأن ابوهم جاي العالم تطش جكليت وهم يجمعون بي،وكل واحد جيسه وتاركين ابوهم الوحده

ضحكت عليهم صحت...تعالو ماما تعالو هذا ابو

اجو خطيه خجلانين وهدير لا اصلا ما اجت ختلت بحضني خايفه ومستحيه منه

هو لمعت عيونه بالدموع من شافهم فتح اديه الهم بس هم جانو ما الهم اي ردة فعل حقهم هم اصغار وما يعرفونه..

تقرب منهم اكثر وحضنهم وهو يبوس،بيهم ويشمهم ويضممهم حيييييل ويشبع انفاسه منهم وهم استجابو اله وضل مكيفين عليه

وهو مصدوم بيهم..هههه حبيبي علي كبار صاير زلمه ول اريد ازوجو

رجع باوع الغدير وهو يضحك ويبوسها بخدها...ول ول ول هاااي غدير عفتها طفله كبرانه ولا عرفتها

ضحكت..هههه عجل شوف هدير هم صايره مره ولسانها طووويل اطول منها وتسمي خالتي باسمها وتغلط ولسانها زفر ما عندها تربيه هههه

نزل علي،وغدير وتقرب مني راد ياخذها مني وهي عكفت نفسها وحضنتني وصرخت ما رادته خافت منه لان ما تعرفه ...

هو ضحك كله...ول بويه حبيبتي عليش ما تجيني انه ابوووج حدري عندي خليني اشوفج

خزرته وضمت راسها بصدري وتباوعله عاقده حواجبها وشاده شفايفها

حجيت وياها بحب...ماما يروحي هذا بابا شبيج

سالتني بذهول...فاروك هذا « فاروق »

ضحك كلها...لا يول لا تخربطين انه مو صديق الريس

تقرب منها بحنيه وسحب ايدها باسها وهي سحبتها متعصبه ما تقبل ول ول تمنيت روحي مكانج رافسه نعمتج برجلج يا هدير حظوظ ...

بعدها ضل يشاقيها ويضحك وياها وهي اخذت عليه وشمرت روحها بحضنه وتبوس بي وهو متخبل عليها يشمها ويشم شعرها ومن طلع اخذها وياه واخذهم كلهم فرحان بشوفتهم ورجع شملنا برجعة ذياب الحمد الله

ذبحو الذبايح وكل شويه واحد من الجيران جايب موسيقئ وجاي والجكليت ويطشو فعلا الجيران اهل شلون الهم موقف ويانه وكل جار مدة سبعة ايام كل يوم معزوم عند بيت منهم....

جاب الشامخ طباخ وهو عازم الديره كلها سوو دليميه وطرشي وفاكهه ولبن وخضره احنه غسلنه الخضروات وحضرنه البصل والطرشي ...والفاكهه غسلناها...

وهو كل شويه ودخل ذياب للمطبخ جان شايل دشداشته من طرفها بيده ولازم سبحته بنفس الايد وهو يستعجلنه ...يله بووويه استعجل بس قربان عادي بكيفج لاتستعجلين لو يموتون جوع لا تستعجلين

كلتله وئام...اي عجل احنه نستعجل وحرمتك لا ما تستعجل صدك انتم بيت الشامخ ما تصيرلكم جاره

حك رگبته بارتباك...هاااا لا مو قربان تنظف بالخضره والخضره اخر شئ ناخذها لهذا السبب انه اكلها لا تستعجلين تا تنظفها عدل...وتغسلها زين هذا القصد

ردت عليه حفصه...اي اي صدكنه يووول لاتحلف

ضحكت اني...ول تغارن مني عجل غير زلمتي ضليت بالضيم من دونو حتئ الكلام كطعتو

هو عقد حواجبه...كال شنو تخورستي بغيابي هههههه

جريت نفس وسكتت...

وئام كالت...روح يا ذياب سوالف جثيره صارت بغيابك

باوعلي بدهشه كال...شنو السالفه يووول احجن

جاوبته..حبيبي ماكو شئ ان شاء اللة نكعد اني وياك ونتفاهم ماكو شئ والله

جر نفس كال...يله بويه استعجلن راح نصب الغدا والله مشتهي الدليميه اووووف ول بويه طك كلبي علئ الاكل من بيتنا ...

جاوبته بمرح...تدلل يروحي انت اشبعك اكل بس خلي نستقر شويه

ضحك كال...شبعيني دلال بويه وغمزلي وراح

و وئام تصيح وراه ول ذياب اخلاقك صايره زفت ندري بيك دخلت سجن بس مو هيج

هو يضحك وعافها واني ضربتها بعكسي واضحك دنجبي خلينه متونسين صار كومه ما متغزل بيه سنين خيه سنين ...

ردت عليه بضحكه...حقج خيه حقج حاسه بيج والله ههههههههه

خلصنه العزيمه  الحمد لله  بس لحد الان ما فرغ البيت وكل شويه واحد جاينه ...

...................

فاروق ...

بس،خلصت العزيمه واروح اجيب سوزان واجي والله زعلت شني عود العالم كلها اجت للعزيمه الا اني وبناتي

حجيت وياها يابه يمعوده يا ام الغيره بعد كلبي،بعد روحي بطلي هل سوالف بناتج بعدهن صغار وين موليه قصدي وين رايحه وهي لزكت اله تروح

بعد شسوي جبتها واجيت هاي اني،ضال اروح واجي مسوي الغربيه باب الشرجي من وره الشامخ وزمرته وسوزان ومكاميعها...

اخذت يوم ارتاحيت بيه وبعدها خليت وجبتها وهو مستمر الشامخ يذبح ويكصب ويسوي عزايم وفرحان

من خلصنه العزيمه كعدنه انه وياه وذياب و حذيفه هو جان كاعد وساكت ويسبح بسبحته كال....انه اريد احجي وياكم يا ويلادي انتم كلكم نظر عيني،وكلكم من روحي

سكتت بس تنهدت ما واثق من كلامه باوعلي كال ...ول ذياب انت وحذيفه هذا فاروق اخوكم ونعم منو ضلمتو جثير وفضلتكم عليه وتجبرت وطغيت عليه بس بين معدنو وبين ان انه شكد ظالم وقاسي ومتعجرف شغله وحده انه اريدكم تعرفونها

اخوكم فاروق ما تجازونو بكد شعر راسكم وانت يا فاروق ما تجازي لو تقدملو روحك كل يوم يجي يسال عن ويلادك وحرمتك ومن انت بالسجن مستعد يقدم روحو بس تا تطلع انت من هل ازمه

ضحكت...هههه مو وكت كلامك ابو محمد ومهما صارت بينه ظروف يضلون اخوتي وسندي والدم عمره ما صار مي

كال..كفو منك كفو منك يا ابو عمر والله انك رجال وبالف رجال...ماكو منك واحد نضيف وكلو غيره وشهامه

جاوبته بملل...شكرا علئ الاطراء الجميل

ضحك كال...مو اطراء هذا هاي الحقيقه يا فاروق يا بعد جدك ونعم ما ربه قاسم البصراوي والله انت كفو لاهل البصره رغم كل ظروفك بس ما حقدت علئ اخوتك

بللت شفايفي بحيره جاوبته...لان هم نظيفين وگلبهم طيب ورغم انت وبناتك حاولت تعادينه بس الحمد لله علئ خلانه ايد وحده وما كدر اي واحد منكم يشعل نار الفتنه بينه...

ذياب رد عليه...كفو منك يا ابو ديلان والله لو اقدملك روحي مااجازيك الحياة مواقف وانت ثبتت موقفك وجنت نعم الاخ ونعم منك يا فاروق وثق بالله انه احبك اكثر من اخوي من امي وابوي...

ضحكت...ههههه لا بويه لا يزعل علينه حذيفه ولو هو من دون احساس

حذيفه ضاج...يووول شبيه من دون احساس مطي انه مطي

جاوبته...لاحشاك يبا نتقشمر وياك

الشامخ كال...دامكم متصافين انه حاب اسولف وياكم بموضوع

عقدنه حواجبنه...اي شنو هل موضوع

جر نفس كال...اريد اقسم املاكي بينكم قبل لا الله ياخذ امانتو وراح يكون تقسيم بالانصاف وكل واحد ياخذ حقو بالتساوي...

ضحكت...لا يبا انه اعفيني ما اريد من املاكك شئ

وكف منتفض من مكانه كال...لا فاروق بداعة جدك قاسم لا تضوجني انه اريد اعوضك

جريت نفس...الي،صار ما يتعوض يا ابو محمد والذاكرة بعدها تشتغل عندي انه ما نسيت الصار من قبل...

تنهد وقبض على سبحته كال ...حقك انه ما الومك ولا احجي عنك حقك جدي فاروق انه مقصر وياك من ساسي الراسي وضلمتك بس الحمد لله صحيت علئ حالي وناوي اعوضك

رديت عليه...ماكو داعي تعوض يا ابو محمد الله هو الي عوضني وخلاني اوكف علئ رجليه اكون عائلة واخلص دراستي الله عوضني بجدي قاسم بامي بذياب وبسوزان وبناتي شفت ان العوض من الله ولو بعد حين املي برب العالمين جان جبير والحمد لله ..ربي ما كسر خاطري وصرت احسن من غيري

تقرب مني ولزم جتفي كال بجبروت...وانه هذا الي مفرحني وهذا الي خلاني احبك واحترمك واقدرك لان ثبتت انك رجال وكفو من دون ما تسند نفسك علئ اي واحد سندت نفسك بنفسك يا بويه ورفعت راسنا وما حسيت بعدم وجودنا بحياتك...

بللت شفايفي،بحيره ومسحت علئ،لحيتي جاوبته...جان بضهري رجال بصراوي ما خلاني بعازه وعلمني علئ الشهامه والرجولة وخلاني ثبتت نفسي

طبطب علئ جتفي كال...ونعم منه والله زين ما ربه ما قصر والله يدخل الجنه بيك

ضحكت...وانت تدخل جهنم بيه ههههه واحد ادخله للجنه و واحد ادخله للنار خرب حظك ابو الفوارق هه

ذياب كتم ضحكته و حذيفه لا بدون خجل ضحك والشامخ خزره...بعصبية سكته من مكانه

جر نفس كال...ادري بويه ادري ضلمتك وخطيتك بركبتي اليوم الدين انه ما اريد منك شئ بس اريد اكرمك اريد اساويك بين اخوتك حتئ لو ما تبريني الذمه...

عضيت شفتي وجريت نفس.  بس انه ما اريد منك شئ،ولا اريد من املاكك انه بس اريد ما تقصر ويه وئام انه اكدر اسيطر علئ نفسي واعين نفسي بس هاي بنيه تضل تفرحها الكلمه الحلوه...

كال...لا ان شاء اللة وئام ما مقصر وياها وصفيت حسابي،وياها ضل حسابي بس،وياك يا بعد جدك...

جاوبته...الحمد لله علئ كل حال كتلك انه ما محتاج شئ لا املاك ولاشئ وان شاء اللة انه وياك ما بينه شئ

رد عليه...بس هذا ملك ابوك ملكك انت انه ما اريد احرمك منو مثل ما اخوتك الهم حق انت هم الك حق

جريت نفس...بس والله ما محتاج شغلي جاي يمشي بالبصره وباجر عكبه ان شاء اللة اتعين واكدر اعين نفسي

قبض على سبحته ورد عليه...بس هذا ملك ابوك وامانه عندي يا فاروق لازم اوزعو بينكم

ذياب رد عليه....اي فاروق هل شئ لازم يتوزع بينه هذا حلالك من ورث ابوك لازم تاخذو واذا ما اخذتو حرام عليك ترا ...

جربت...انه من اتقرب عليكم ومن اعيش وياكم ومن تفرحون افرح الكم ومن تحزنون احزن الكم مو عمود شئ ولا منتظر منكم شئ بالعكس انه هذا السويته بدافع الاخوه لا اكثر ولا اقل

رديت عليه الشامخ...واحنه من ردنه نوزع الورث بينكم مو عمود شئ بس لان هذا حقك انت فهمت عليه بويه

تقرب مني ذياب وحضني كال...كافي،فاروق تعبت الشامخ كافي بووويه هذا حقك ولازم تاخذو شئت ام ابيت انت هم عندك بنات ابو التوم بعد ومحتاجات جثير شغلات وتامن مستقبلهن وهذا ورث ابوك لا تحرمهن من ورث جدهن

سكتت ما حجيت كال الشامخ...السكوت علامة الرضا دام هيج ان شاء اللة من باجر نحول الاملاك كل شخص منكم ياخذ حقو حتئ اخواتكم الهن نصيب يا يبوووي مفهوم

رد عليه ذياب...اي مفهوووم عجل من باجر نعين محامي ونقسم الأملاك بينه وكل واحد بينه ياخذ حقو

صح جنت ما حاب هل موضوع بس من تقسمت الأملاك حسيت ان فعلا هم غزر بيهم الوكفات وان هم مو ناس طماعه والحمد لله علئ كل حال ...

................

قربى...

من بعد غياب التقينه من جديد والتم شملنا الحمد لله بس لحد الان ما شايفه ذيبي مخلصها عزايم وخالتي تنام يمه اهئ فدوه خاله حسي بيه اريد ذيبي حبابه

بس خطيه يعني شسوي ابنها قرة عينها حقها رغم الوم عليها انوب ارجع الوم عن نفسي...

الشامخ كال باليل ...يله يووول يله بيت ذياب من دون مطرود روحو علئ بيتكم تراكم طولتو 

خالتي ردت عليه...لا فدوه بويه خليهم بس اليوم تعودت انام يم ذياب

جاوبها بملل...ول ول خليهم يرحون البيتهم يرتاحون يتسامرون ما مليتي ترا حرمتو هم الها حق بي وحده غيرها طلعت مضاهره عليج...

عضيت شفتي بخجل كتله...لا عمي عادي خلي خطيه

باوعلي بنص عين كال...افاااا لو ما ميته بس تا تختلين بذيبي

حمر وجهي وانصدمت من خجلي ونزلت راسي بفشله وذياب ضحك كال...لا يالشامخ لا تخجلها...

حط ايده علئ جتف ذياب كله...يله يبووي اخذ حرمتك وروح

والله صدك اخذنه اغراضنه ورحنه بالسياره والجهال جانوا نايمين ..

اول ما دخلنه نومهم بمكانهم وسمه باسم الله وبعدها باوعلي جنت واكفه بمكاني،ومبتسمه ومتلهفه عليه تقرب،مني وحضني حيييييل باسني،بخدي وشفايفي وبعنقي ويشم بشعري كال...يوووول مشتاقلج ميت عليج ما تعرفين شصار بيه من ابتعد عنكم

نزلت عيوني بصمت جاوبته...لو تشوف حالي،يا ذياب بغيابك ما اعرف شلون عشت عشت مكسور خاطري وضهري

كال...سمعت من بيت عمي،انتي فقدتي صوتج بعد ما انسجنت وما حجيتي الا صدر العفو..

جاوبته بحزن...كالو عندها انهيار عصبي وما يرجع صوتها الا بصدمه ثانيه تخيل اني ما طلع صوتي حتئ من طلكت بهدير بس من صدر العفو طلع صوتي اثاري فرحتك فاقة فرحة ولادتي و وجعي بهدير

رفع ايدي وباسها كال...هدير حلوه مثلج ما شاء اللة تشبهج جثير

ضحكت...وانت منو اخلفه تشبهها بيه

رد عليه...اي بويه عجل شلون شكو شئ حلو نكول يشبهج

تجرئت وبسته حييل وحضنته كتله بهمس ورجاء...احببببك ؟

جر نفس وحضني ...عجل انه شكول تخبلت من انحكمت عشرين سنه كلت شلون اعيش بعيد عنها اطلع شايب ما اخلص شبابي وياها ما اسعدها ولا افرحها يخلص العمر وانه وهي ابعاد عن بعض بس الحمد لله الله رحمنا وصدر العفو ولطف بحالنا ...

بللت شفايفي...اي والله يا ذياب شعوري مثل شعورك لو تعرف جنت شكد انقهر علئ نفسي وعلئ الجهال وعليك شلون نعيش ببعد وغربه وكل واحد منه بديره بس الحمد لله

كال بحزن...جنت اتمنئ اخليكم بكلبي واقفل عليه جنت اريدكم قريبين مني احس بيكم بكل لحظه

باوع عليهم وعض شفته بالهفه كال...اكلكم اكلكم تقبلون. اكلكم يووول

ضحكت...ههههههههههه يابه لو تشمرنه بالزباله هم قابلين

سحبني،وحضني كال...لا بووويه لا يووول انتم بنص كلبي زباله شنو

ابتسمت بحب...انت شنو تسوي سوووي كوولشي منك حلو والله

كعد وسحبني كعدني بحضنه كال..اي يووول احجلي شلون جنتي تخلصين وكتج من دوني

جاوبته بانزعاج...اووه ذياب لاتذكرني عشت بماساة وحزن محد يعلم بي غير الله جنت بحاجتك بكل لحظه جنت حيل فاقده الامل بكل شئ

سكت ثواني كال...اي جنت ماكل همج جثير ومتعجب شلون راح تعيش من دونج عشر سنين وانه الما اصبر علئ فراكج...

حطيت راسي علئ صدره وضاع مني الكلام بعدها حجيت بهمس...ذياب وين اهلي ما طلعو بالعفو اشو

جر نفس ورد عليه...والله يا قربان شكلج احتمال ما شملهم العفو

دمعت عيوني...عبالي افرح بيهم هماتين بس شو طولو معقوله ماتو سوده عليه

كال...لا ان شاء اللة مبيهم شئ حبيبتي كولي يا الله

همست...يا الله

سحبني تمدد ومددني بصفه وهو يمسح على شعري ويحجيلي عن عشقه وحبه اليه وهيامه بيه واني احجيله  عن حزني بغيابه وحبي زاد اكثر واكثر الي

نمت علئ صدره مصدر حبي وحناني ولهفتي احببه يا ناس احبه واول مره انام راسي بارد

ثاني يوم اجه الشامخ كال هد عليه فياض ويريد فصل لابن اختو وتكاونت وياه وطردتو

بس انتبهت بوجهو حبايه ماكله جزء من خدو وهل شئ مقزز ومقرف

وانوب كال ذيب دمو مهدور بويه ذيب دير بالك علئ نفسك بعد جدك هذا غدار يغدر بيك

خفت من كلامه حيل وبعدها بوقت قليل صار الحرب والعالم ضجت بهل احداث...

..............

فاروق ...

19 / 3 / 2003 ....

بدت العمليات العسكرية الي شنتها امريكا وحلفائها
على العراق ، بحجة وجود أسلحة نووية وقنابل ذرية ،
واسلحة دمار شامل صنعها العراق واخفاها .

ورغم عدم ايجاد هاي الاسلحة الي زعمت امريكا انو هي موجودة  من قبل مفتشين الدوليين
الا انو امريكا اصرت ان  تقود الحرب مع حلفائها لاحتلال العراق .

الحكومة قبلها وزعت هواي مواد غذائية بالحصة وانطت نصائح بالتلفزيون وبدينا نخلي لاصق على الجام وبالليل ابد مانفتح الاضوية .

جانت الاغاني الوطنية بالتلفزيون شغالة واجتماعات صدام حسين وهو لابس الزي العسكري ويه أعضاء  حكومته مستمرة .

الكل كعد عن شغله والتزمنا بيوتنا ، انغلقت المدارس والجامعات والدوائر ... فعلا هالحرب كانت مختلفة عكس الحروب السابقة وكأنو هاي الحرب مقدر الها تكون بنهاية مختلفة وتصنع تاريخ مختلف

وبدت تنطلق الطائرات الامريكية باتجاه العراق ومن قواعدها العسكرية الموجودة بالدول العربية للأسف

متعود العراق ينغدر من مايسمى  بأشقاءه العرب ...
الي جان دومه واكف وياهم بالسراء والضراء

وصارت الصواريخ الامريكية تغزو سماء العراق واظلمت بغداد التاريخ والحضارة والعلم والادب وصار يغزوها الظلام والصواريخ الامريكية

عشنا ايام عصيبة مانعرف شوكت يوكع علينا صاروخ ويقتلنا ... مثل مااقتل هواي عوائل بحجة قصف مباني حكومية وتوكع على عوائل بحالها

خو من تصيح الغارة نعيش برعب .. الغارة او الصفارة الي تعلن عن اختراق الطائرات والصواريخ للجو العراقي وتنبه الناس حتى ياخذون احتياطاتهم ، يطفون الاضوية او الشموع لان كهرباء ماكو فالناس اعتمدت على الفوانيس واللات والشموع او يبتعدون عن الجام

جان صوت هالغارة بحد ذاته مرعب وخاصة للاطفال والنسوان ... خو سوزان تحتار وين تختل تلزم البنات وتختل وراي وتكضيها مناحة

جدتي صالحة علما تخلص الغارة تصيح وتتعدا الطيارة الف مسبة والف شتيمة احصل منها
ولك فارووغ ماكتلك نولي لديرتنا نولي للبصرا يايبنه هنا شنسوي ولك اذا مانموت بالغصف نموت من الخوف

جاوبتها ع الاساس البصرة مابيها قصف اقرب شي القواعدهم هي البصرة جده انت شتحجين شتكولين الكاتبة الله يصير شسوووي بعد

واستمرت الحرب واحنه مانعرف ليلنا من نهارنا ، بالليل صواريخ تعبر من فوكانا وبالنهار صوت الاطلاقات وانفجارات المباني المقصوفة تهز الشقة هززز

اباوع لبناتي لسوزان لامي جدتي وجدتي وانه بداخلي اخوض حرررب اكثر ضراوة من هاي الحرب المشتعلة
والي وقودها هذا الشعب ...

حرب خوف وقلق ، ماريد افقد شخص احبه وبالي همين يم كرايبي والاتصالات مكطوعة بيننا وماعرف شنو اخبارهم بهاللحظة ...

..

بعدها اشتد القصف على بغداد  ... كلنا جنه ننام  بنص الصالة هاي اذا كدرت عيونه تغفى ...

جانت جدتي لازمة السبحة وتسبح وترجف من الخوف بناتي يصرخن ويبجن جدي يردد الحوقلة سوزان وشهكة البجي والرجفة معتليتها لازمة البنات وامي هم تسبح وتستغفر وترجف جان رعب حقيقي وجدتي تصيح يمه طبوولنا يييمه ايوولنا لامريكان يممه راح يذبحونه وينطونه علف لجلابهم يييمه شلووون بينه انه تاليتي اصير علف لجلاب الامريكان

كتلها جده قابل شمسويه بحياتج وتردين تصيرين علف لجلب الامريكي

كالت والله مامسويه شي بس من جنت ياهلة (شابة) جنت اللبس مزلط (لبس صلوخ)

جاوبتها ياا جا هاي بسيطة عبالي كاتلتلج جلب ...

وبيوم 9 / 4 / 2003

انتهى القصف ومرت الساعات ومن خلال الراديو جنه نسمع  الاخبار بي وسمعنا عن سقوط بغداد واختفاء قوات الحرس والجيش العراقي المفاجئ من شوارع العاصمة 

طلعت للشارع انا ومجموعة من اصدقائي وجواريني
ونشوف الفوضى كدامنا والحواسم والجيش الامريكي منتشر والي دنس باقدامه ارض بغداد

جان منظر العراقي الي يحرك ويخرب ويسرق اشد قسوة وقهر من منظر الجندي الامريكي الي يتجول بارض العراق وبكل حرية

رجعت للشقة وجهت كلامي بحزن والم لعائلتي جهزوا روحكم راح نروح للغربية بعد مانبقى هنا

كعدت بالكاع ضايج اجه جدي كعد يمي سألني خيرك فاروغ بويه شنو صاير صدك عود طبو الامريكان

تنهدت وانه اتربع برجلية جاوبته اي والله جدي طبو لبغداد الشوارع متروسة امريكان

ظل يصفك بايدينه لا حول ولا قوة الا بالله الك الله يا عراق ما ظل بعد بس الامريكان يحتلونه وينجسون ارضنه الطاهرة بالله هاي شلون راح تصفى

جاوبته كتله بالايام الجاية راح نلكى اجوبة لاسئلتنه والله ياجدي وضع الشارع جوه يمووت قهر اكو واحد هيج يسووي ابلده روح شوف ماخلوا دائرة لا بناية كلها لابنك كلها تحوسمت

جدتي كالت ناس كاتلها اليوع يايمه سنين وهم ماشايفين الخير هل هبوا هسه يسترزكون

جا هيج يسترزقون رووحي شووفي التخريب والحرك الوادم عبالك مامصدكة

كالت قابل كلها جاي تحرك وتخرب

لا والله مو كلها اكو شرفاء ويا كثرهم مامدوا ايدهم لا حوسموا ولا خربوا ولا صفكوا للمحتل الاجنبي الي ماجاي لسواد عيونهم لا والله عنده غايات وتبين ع الايام السودة الي راح تجي

يمه اسم الله كول يا الله جا الوادم هم تعبت من حكم صدام لا ظال واحد ما كص ذانه لا ظل حرب مادششنه بيها بلكي بيها الخير

الله كريم جدتي الله كريم انه اروح اشوف سوزان ووين

رحت شفت سوزان تبجي وتبدل للبنات وتخلي الملابس بالجنط وكفت يمها سألتها شبيج تبجين ؟ تردين نبقى ابغداد ؟ ترى راح يصير فرهود وانحلال لا عبالج الامريكي يحميج

باوعتلي كالت لا مقهورة على بغداد صدك بغداد سقطت مااصدك احتلونا الامريكان يعني شنو راح نصير مثل فلسطين وياخذون ارضنا !!

ضحكت لا يابه مو هيج ع الاساس امريكا داخلة تحررنا من صدام هيج سمعت بالشارع وبالراديو فترة ويطلعون وترجع الامور كلها لوضعها الطبيعي

مسحت دموعها كالت ان شاءالله بس فدوة فاروق اريد اروح اشوف بابا قبل منطلع منا

اي ان شاءالله نمر عليهم هسه يله اخذي شكو شي مهم حتى اشوف الوضع شلونه ونشوف يمته نطلع منا ...
هزت راسها ورجعت تحوس بالغرفة وتخلي بالجنط ...

بعد ما سيطر الجيش الامريكي على كل العراق كدرنا نطلع من بغداد وتوجهنا للغربية وهناك جان على طول الطريق

للرمادي سيطرات للجيش الامريكي وكل شوي منزلينا تفتيش

بس والله ياحيف الامريكي يفتشني!!!! على ارض بلدي وجان وياهم مترجم لهجته عربية

وسوزان مابطلت عيونها تجري وجدتي تدردم وماقابلة نروح للغربية تريد تريد ترجع للبصرة تتطمأن على حبايبها هناك

جدي وامي ساكتين وبعيونهم حيرة خطية بس انه اريد الهم مكان أمن بس هالفترة ، طول الطريق وانه اقنع بجدتي حتى تسكت بس هي شبعتني شتيمة

وكلما نوصل لسيطرة بيها امريكان كالت تف لا هلا ولا مرحبا وتغمهم من الجامة همزين مايفتهمون عليها جان سحلوها لابو غريب ...

وصلنا للغربية وارتاحت روحي من اطمنت عليهم الحمدلله الكل بخير ومابيهم شي نزلنا اغراضنا واستقرينا فترة يمهم ...

نهاية البارت...يتبع

كونوا انتم كونوا بخير...احبكم 💔

نور سمو العراق 😘

اعتذر بنات ما نشرت البارحه اجه زوجي من السفر وجنت مشغوله بي

أن شاء اللة لو البارت القادم لو البعده البارت الاخير