رواية #سلالة العنفوان...ذنب عينيك الفصل التاسع والتسعون 99 - بقلم الكاتبه سمو العراق

الذنب القبل الاخير
رواية...ذنب عينيك..سلالة العنفوان
بقلمي...نور سمو العراق

💔💔💔💔💔💔💔💔

أبي سلام على روحك النائمة لمدة طويلة، ورائحتك المختبئة في جوف الأرض، جعلك الله في النعيم، ورزقني رؤيتك يا حبيب.

....................

يعز عليه افارككم جنت الي نعم الاهل ونعم الرفقاء صدك يعني راح نفترك بعد ما انجمعت گلوبنا علئ المحبه والعطف والحنان

منو الي راح يشاركني فرحتي وحزني ويخفف همي بهذا الزمن

اودعكم بدمعات عيوني اودعكم وانتم نظر عيني اودعكم وبگلبي نار لاهبه ومتوجره شكوول شحجي شريد اسوي اكول اخذوني وياكم بعد ما الي حياة من بعد ما شفتكم وانتحبت علئ عظامكم ..

شهكت من البجي من قريت اسم تميم صارت عظام يا تميم وتفسخت جثتك وبعدها جنسيتك دليل وثبوت علئ ان هل جثه تحمل اسمك

تكطع عندي الامل وتذبحني اكثر وتكطع الشك من اليقين تبين الي ان انت متت وهل جثه هي جثة اخوويه تميم ...

ما جنت خايفه منه ولا متازمة بالعكس عبالك جثه كاملة مو كوم عظام حضنته وهو بالكونيه وبجيت بصوت عالي عبالك هسه مات واني اعاتبه اعاتب جثته المضلومه...تمييم خووويه تميم ما كلت اختي وين راحت وين صارت خويه تعذبت من بعدكم وطل هذا وصبرت كلت صبر جميل يا قربئ باجر تلتقين باخوج وابوج باجر تتكحل عيونج بيهم وينزاح عنج كل هل تعب

ما جنت ادري يا تميم راح يزيد همي همين ولصارلي بكف وضليمتكم بكف خوووويه تمييييم خويه شسوي حاجيني كووولي شسوي شلون انساكم شلون ازيح هل غيمة الي غيمت علئ حياتي بعد ما شفتكم هيج مدفنون

صرخت بصوت...خووويه حاجيني لا تضل ساكت تميم حبيبي شلووون بيه شلون اعيش واني اشوفكم هيييج مكومين بكواني خووويه لك والله من جنت تعثر كلبي يكلك اسم الله شلون بيه هسه واني اشوفك لا حال ولا لووون حاجيني لا تضل ساكت

جنت منهاره بفضاعه حسيت بذياب يحاول يوكفني وكذلك الشامخ بس هيهات شفت احبابي من بعد سنين شفت ابوي واخويه من بعد ما طك كلبي وشاب لكيتهم شلون اتركهم شلون اعوفهم شلون ابتعد عنهم

درت وجهي لذياب وجاوبته بتوسل...فدوه لا تحرموني منهم لا تخلوني بحصرتهم خلي اريح نفسي خلي اشبع منهم والله كلبي مجمر عليهم صاير نار

رد عليه الشامخ...جدي بعد جدج كومي كطعتي كلوبنا الله يرحمهم ويحسن اليهم شهداء مضلومين يشفعولج بالاخره

سحبت ايده ردت ابوسها بس هز سحبها ما قبل مسحت دموعي واني اشهك ...الله عليكم القران عليكم بس خلوني اتوادع وياهم والله مدا تحسون بشعوري ما اكدر ما احجي وياهم ذول اهلي شوفو بعينكم شصاير بحالهم

ذياب جر نفس ورد عليه ...بويه قربان حتئ حرام عليج والله خلينا ندفنهم احسن هيج انتي جاي تعذبينهم وتعذبين نفسج والله

شهكت برعب وحطيت علئ صدري...ذياااب تريد ما شوف ابويه ما اودعه ما اشمه

باوعلي باسئ وحزن وعيونه تلمع...شتشمين يا قربئ هو شضال بي كومي حبابه كومي

شهكت من البجي وصرخت بصوت عالي ...لا ذياااب لا تعرف شنو الضال بي ضاله حنيته ضال حبه وعطفه عليه ضال اسمه الي حملته وافتخر بي ابويه هذا جسم ابويه وهذا هيكله لو بس اصبع منه يهمني يا ذياب يهمني ويوجع كلبي ويدمرني ...

مديت ايدي علئ الكونيه واني ادور بانهيار ورعب ورجفه واصرخ...يابه يابه تكعدلي لو اروح يابه اجيتك من الغربية للحله اجيتك يبعد روحي اجيتك يالحنين اكعدلي شوفي شلون تغيرت علئ فراكك

حضني ذياب حيييل وهو يهدي بيه وبجه بصوت عليه انكسر خاطره عليه كعد يواسيني علئ ابويه ويطيب خاطري

جنت مثل الجثه الهامده بين اديه جنت تعبانه ورايحه روحي وكل احساسي فقدته من شفت اهلي معقوله هذا تقديرهم بگونيه مال طحين مخلينهم ضالين بس العظام

ماحسيت علئ روحي الا انغمئ عليه وحقي لان ما كدرت اشوف طريقي بعد ولا كدرت احجي كلمة انهيار صار عندي عيوني ما صرت اشوف بيهن والدموع والله والله ما توكع وحده وثنين علئ عشره عشره مطر حتئ متفاجئة منين كل هل دموع

انغمئ عليه بسبب التعب والبجي والحال الكسيف حسيت بالمي يبللني فتحت عيوني ببطئ شفت الشامخ علئ راسي هو وذياب وبعدها ذياب شالني وخلاني بالسياره...

خلاني بالسياره بعد ما ثكل لساني اريد احجي اكوله فدوه ذياب جيب اهلي وياك لا تخليهم بهل صحراء سنين وهم هنا

صار عندي تفكير ما اعرف شلون اوصفه حاله من الهلع بس لا دفنوهم وهم عايشين لو كتلوهم ودفنوهم يارب شكالت رواحهم من سوو بيهم هيج ياربي شسوي راح اطك من القهر والحزن فدوه ربي فدوه اروحلك طمني عنهم يارب ان شاء اللة ارواحهم بخير تحت ضلك وتنتقم من اعدائهم وقتلتهم شر انتقام يارب...

مشت بينه السياره وبعدها ويانه اسعاف حجيت ويه ذياب بتعب وهمست ذياب وين اهلي

رد عليه بحنان وهدوء...بالاسعاف راح ينقلونهم للطب الشرعي وبعدها ان شاء اللة ندفنهم بس تواصلت ويه سليم اخوج وكال اجي يا الله يتم الدفن

فزيت من مكاني مرعوبه...دره بيهم ميتين

جر نفس ورد عليه...يدري من زمان بس هو راح يادي مراسيم الدفن لذلك لازم ننتظر سليم يدفن الجنازه ...

مسحت دموعي و وجهي بحسرة...خطيه سوده عليه هسه يجي تعبان بضيم حاله يجي علئ مصيبه هاي بدل ما يلتقي بأهله ويضمهم الصدره ويلتجئ الهم ليش يارب صار بينه هيج

رد عليه بتنهيده...دوام الحال من المحال الله يصبركم علئ مصابكم والله يرحم اهلكم ويجازي كل واحد جان سبب بموتهم

شهكت من بين دموعي...امين اميين الله لا يوفق كل من جان السبب والله اهلي فقره والله كله من فياض النذل هو السبب بموتتهم الله ينتقم منه اريد اكتله بيدي اريد اذبحه...

رد عليه بقهر...انهزم النذل متكاون ويه الوادم كلها وحياتو مهدده لهذا السبب هو انهزم وما معروف مكانو وين

عضيت شفايفي بقهر...اووووف روحي تغلي عليه اكو واحد هيج يسوي باخو معقوووله ولك شنو يهودي حتئ اليهود ما تسوي سوايتك ولك شلون طاوعتك نفسك تاذي اخوك و وابنه ومن وراك يندفنون ضلم والله ضلم هسه لو مسوين شئ كلبي احسه حيطلع من مكانه والله قهررر قهر..

اغمض عيوني ما اعرف شنو يتراوالي بس عظام وجماجم وتراب وناس تتراكض بسرعه افتح عيوني خايفه خايفه من كل شئ وكلبي يدك سررررريع سريييع

ما ادري شصار بيه ما اعرف اوصف الصار بيه بهل لحظه صرت مثل المجنونه...بس اصرخ واتكمز واعيط بصوره مو طبيعيه صورتهم مدا اتروح من مخيلتي الوصله المشدوده علئ عيون تميم الي بعدها موجوده هو صار عظام وهي بعدها هاي الوصله سببت عندي حاله نفسيه

طريق صار مثل طرءق الموت خلصته حزن اشوف الدنيا مغيمه رغم الجو عادي اشوف العالم كلها تصرررخ بالشوارع رغم هدوئها اشوف الحياطين تبجي وتدوي وكل شئ يصرخ اشوف كبور ما تروح من مخيلتي ....شسوي ياربي...

.................................

فاروق...

اليوم يوصل اخو قربئ من مشهد لبغداد حتئيدفن جثث اهله بصراحه فاجعه ما بعدها فاجعه جانو الهم امل ان هم عايشين بس للاسف هم ميتين من زمان وتنفذ بيهم حكم الاعدام وماتو من زمان الله يرحمهم ويسكنهم فسيح جناته...

انتظرته بالمطار اجه هو وبناته ثنين وبعد وياهم عائلة استقبلته وتعرفت عليه جان خطيه مهموم وحزين استقبلته ببيتي صدك اشتريت بيت بعد السقوط ببغداد واستقريت بي اني وبناتي وتخرجت الحمد لله...حتئ سوزان تخرجت وهسه حامل...

ما قبل الولد يكعد ببيتي كال لا اريد اروح اشوف قربئ والله صدك اخذته بعد ما اصر عليه اخذته بناته جانن وياه هن ثنين استحيت اسالة وين مرتك فخليت وسكتت وما حجيت شئ...

وصلنه للغربية بعد طريق طويل وجان الوضع شويه ما يطمن خاصه بعد السقوط ...

اول ما دخلت لمنطقة بيت الشامخ وما اشوف الا قربئ،طلعت بعد ما هم كلهم طلعو هو سليم قلص عيونه وهو يباوع الها بباستغراب كأن ما عرفها بلع غصته وهمس...قربئ

ركضت عليه وهي تتعثر بخطواتها وتصرخ بصوت...سليم سليييم خوووويه تعال تعال اشمك تعال خويه تعال داوي جروحي تعال واسيني علئ مصيبتي

ركض عليها ملهوف وحضنها مثل الطفله وهو يصرخ بصوت عالي ويبوس بيها...ولج خوووويه ولج قربى خووويه ميت عليييج والله كلبي،وروحي وعقلي،كله يمج خووويه يا ريحة امي

جانت بس تبجي وتصرخ وتبوس،بي وتضمه الصدرها وتنتحب بجت العالم علئ،حالها وهو اردئ من حالها يبوس وبوجهها ويحضنها تكسرت اضلوعها وهي تشهك وتنتحب علئ صدره...

رفعت رأسها وهي تبجي...مات ابويه وتميم يا سليم ماتووو شفتهم شفتهم بس عظام ينكسر كلبك عليهم

غمض عيونه وهو يصبر نفسه ويمسح بدموعه كال....دريت وحلفت فيااااض اكتله لو يضل يوم بعمري

بعدها ابتسم وهو يحتضن وجهها بجفوف اديه ..كبرانه صايره مره بس بعدج ما تغيرتي مثل ما انتي حلوه وعيونج بريئة

همست اله...كبرت يا سليم صار عندي ولد وثنين بنات علي بالمدرسه هاي السنه شاطر والكل يحبه

باسها بخدها..شلون ما يحبونه اذا انتي امه مثل العسل ربي يحفظهم

مسح دموعه بفشله وهو يرد عليها..ههه نسيتني العالم ما خليتيني اسلم عليهم ...

اجه سلم علئ الشامخ وعلئ ذياب وعلئ حذيفه ودخلوه جوه هو وبناته قربئ لازمتهن وتبوس بيهن هن البنات ما يفهمن عليها دكولهن اني عمتجن وهن يحجن ايراني ما يفهمن عراقي بس يجنن مو بنات حيل حلووات..

ارتاح يوم كامل وبعدها صار الدفن والتشيع جان تشيع مهيب ونصب مجلس اعزاء والعالم صارت تجيه..

جنه كاعدين بالفاتحه ودخل ولد زين بالعمر ابيض شويه ولابس غتره اني اعرفه هذا بس ناسيه اول ما دخل الراس الجادر وهو ضل يضغب بصوت عالي وانهيار تام وكفنه كلنه من مكانه

و وكف سليم وهو مركز بالشخص الي اجه همس...يوسف

ركض عليه ويوسف يصرخ...ولك سليم ولك خويه سليم شلون الي عين واقابلك شلون الي نفس واجي خووويه مشتاقلك تعال خويه تعال ما عندي اهل غيرك وغير اختك اني متبري من الكل

ركض عليه سليم وحضنه ويوسف يصرخ ويبجي...يا عمي يا ابو سليم والله والله اخذ ثارك من عيون فياض الكلب اني كتاله اكتله واشرب. من دمه خويه سليم خجلان منك شسوي

سليم مسح دموعه ورد عليه...كافي يوسف كافي انت ما الك شغل بلي صار كل لشه تتعلك من كراعها وانت ما غلطان الغلط هو ابووك وانت دومك ضده وما مسانده واني اعرف شلون اخذ حق اهلي منه

شهك وهو يمسح بدموعه...ما خليت مكان ما دورت بيه عليه اختفئ ماكو يكولون انهزم مدري وين

سليم بوعيد...وين يروح لو يطير للسما هم اكتله واذا ما كتلته الله موجود ويعرف شلون يذله مثل ما ذله هسه وخلاه مثل الجريذي محتار وين يضم نفسه

يوسف بحسره...لك سليم اني واحد من ضحاياه اني وامي امي لحد الان ما توعي علئ شئ رفعت عليه قضية ومتحلف بيه بس اشوفه احط طلقه براسه واكتله ونعل والدي والديه وساعة السوده العرفته بي ...

سحبه وهو يحجي وياه بهدوء...تعال سلم علئ نسابتي بيت الشامخ واكعد خلي نضيفك

صدك اجه سلم واخذنه من خاطره وكعد شرب جاي ومي وضل كاعد بين ذياب وسليم ويسولف وياهم...

طبعا ذياب رجع علئ شغله رائد وانطو امتيازات لان جان سجين بسجون النظام وانه منو لزمني وكال هااا صديق الريس اليوم يصكوك

كتلهم عمي...ما مصادقه هو صادقني ...

بعد الدفن مشت الامور طبيعيه من غير قربى عندها شويه حاله من هلع والخوف وبعدها راجع بيها اخوها وذياب وصارت زينه وحاليا اخوها كاعد عندها...

و عرفت هو متزوج ايرانيه ومطلكه ومنطيته بناته جابهن واجه لان ما يقبلون هناك يسجلوهن مدرسه الا هنا...

وه. حاليا كاعد يم اخته خطيه بين ما يشوف شيسوي ببيت اهله بعد ما سقط النظام وضل البيت تراب لازم يبني ويشوف شيسوي...خطيه انوب برگبته ثنين بنات...

الشامخ كال رب ضارة نافعه ذياب لو ما مسجون وصار السقوط هم جان خسر وظيفته بس الحمد لله رب العالمين رزقو الخاطر وييلادو وحرمتو والحمد لله من رجع الدوامو وراح يترفع...

وفياض لحد الان ماكو طفر هل طفره طفره مدري وين وله وكرايبه كلها شردت وياه مدري وين ولو اهل شرهان وام بثينه وبنتها كلها شردت ويه فياض...

.............

قربى ... بعد مرور اشهر

اليوم سليم اخويه معزوم بمزرعة جدو الشامخ عزيمة بس زلم ، والبنات بناته بقن يمي ... يلعبون سوى وي هدير وغدير ...

ساعة يتعاركون وافاككهن ساعة مسويات صلح كل اثنين سوى ويلعبون بيت بيوت ... واني اباوعلهن واتذكر ايام قبل من جنت اكبر منهن بشوي والعب بلعابتي الكطونية واكصصلها قطع قماش والبسها وشكد تتشكك لعابتي واروح لامي ابجي وهي تخيطها الي سودة عليه ماما الله يرحمج بهاليوم رحتي من هالدنيا ولا شفتي احفادج لا اولادي ولا بنات سليم

اتخيل امي ابيناتنا هسه ، امي حنينة احجي عنها مو لانها امي لا بس هي صدك طيبة وفقيرة لذلك الله اختارها تغادر هالدنيا وتروح يمه رحمته يمكن مارادها تشهد على استشهاد بابا وتيم وتشتتنه اني وسليم مرادها تتعذب وتشوف كل هذا العذاب الي شفته اني وعشته بكل تفاصيله ايام عشت بيها حزني بكامل قواه

فززني صوت غدورة وهيه توجه كلامها اليه وتسألني بلطف وبراءة : ماما شنو رأيج نسوي كيكة ونفاجئ بيها بابا وخالو

كرصتها من خدها بخفة حبيبي الي ياخذ راي الماما

البنات هم وراها رددن نفس كلامها عبالك مسوين مظاهرة ..

اخذتهم للمطبخ وبلشنا نسوي كيكة .. ورى ما خبطناهه وخليناهه بالفرن حتى تنخبز رتبنا المطبخ ونظفنا وغسلنا المواعين ، سوينا كريمة الكيك وخليناهه بالثلاجة

سبحت البنات وحدة ورى اللخ ومشطتهم .. وكل شوي وحدة تسألني عن الكيكة ، الى ان طلعتها وخليتها بالمطبخ تبرد حتى نزينها بالكريمة ....

للعصر اجو سليم وذياب ... دخل ذياب للغرفة متعود ينام العصر شويه وبقى سليم يمي بالمطبخ

ظل يطل وراه شويه واحسه متوتر ومبين خجلان ومحتار شنو يحجي ...

كتله ها سليم خويه شكو ؟
رد بارتباك : اكلج شنو ذياب نام ؟
جاوبته اي شوي ويكعد ...ليش اكو شي هواي مبين عندك حجي
عدل ياخته وكح وكال البنات خما شلعن قلبج ؟
جاوبته لا علواه عليهن اصلا مونساتني

راح كعد ع الكرسي وكال اكلج خيتي ام علي اليوم شفت بنية بالمزرعة مال جد ذياب الشامخ حفظه الله ورعاه بس موووو بنية صارررووخ

عكدت حواحبي وسألته منو هاي ؟

جاوب : والله ماعرفها هو اني اريد اسألج عنها يابه حسنها يشل شل انيقة ومبينة شخصية حتى مشيتها مختلفة تمشي وعبالك الورد الي بالمزرعة كله ينحني الها ....

ظل يوصفها الي عرفت هاي فريال ، احس الدم انسحب من وجهي احس عركت .... ماكو اله فريال ينعجب بيها سليم !!

انوب هي تشوف كل الناس اقل منها وعدها هي روحها ونفسها فووك الكل انقهرت على سليم وخفت عليه لا يتعمق باعجابه هذا

فززني صوته من صفنتي وهو يوجهلي كلامه وين رحتي خيتي ليش صفنتي عرفتيها منو مو ؟

جاوبته واني احك بجبيني ها اي هاي فريال بنت عم ذياب ... حجيت كلامي واني اتظاهر بالصبر

كال هااااا زين احجيلي عنها بعد اكثر حبيت اتعرف عليها زين اءءءاا اذا اتقدم الها يعني اخطبها توافق هيه ؟
وكال بهمس يعني بيت الشامخ ينطون الي مرة لوو لا !؟

شهكت اني وهو تفاجئ هااا شبييج خيييرج قربى قربى

جاوبته هااا لا ماكو شي بس عبالي شفت عنكبوت ع الحايط واني هسه منظفة

جاوبني خرعتيني والله يمعودة عبالي شي المهم نرجع لموضوعنا قربى شكلتي عليها هيه شسمها البنية ؟

جاوبته بعد تنهيدة بصبر شبه نافذ : فريال

جاوب وهو مبتسم والله حلوو حتى اسمها مميز ...

باوعتله بعدم رضا هو جان مبتسم بتفكير واني بقلبي اكوول هاي يمته لحكت تركز بيها هلكد

قطعت الكيك وصبيت الجاي وللجهال العصير سويتلنا كعدة عصرونية حلوة مرتبة وطلعتها بالحديقة وسليم والجهال نقلوا ويايه الاغراض على الميز بالحديقة

فتت جوه اشوف ذياب حتى يكعد ويانه ، بس جنت حيل محتارة وبالي شارد وافكر بكلام سليم واعجابه بفريال

فتت للغرفة ذياب جان كاعد هستوة رحت يمه خليت راسي كتفه وجريت حسرة شكبرها عبالك ذبيت كل همومي على هالكتف

هو خله ايده على راسي ورفعه باتجاهه صارت عيوني بعيونه باوعتله عاكد حواجبه وملامح مستفسرة
كال شبيها قرباني شنو هالحسرة هاي شاغل بالج شي مهمومة شي ؟

هزيت راسي وحجيتله عن كلام سليم
كتله انت تعرف اخويه بسيط وفريال تباوع للعالي ماريد اخويه يحصل حجايه منهم او يجرحوه بالكلام

رد عليه بسيطة لاتهتمين انه احجي وياه ..

وخرت من على كتفه وبسته بخده كتله والله محد غيرك ينقذني من المواقف الصعبة الله يخليك الي

غمزلي كال عد عيناج وانه هسه امر بظرف صعب ماتكدرين تنقذيني

كمزت من الجرباية اصلا اني جايه اعزمك خوش مسويه عصرونية بالحديقة يله حبيبي بلا كسل وكوم غسل وامشي بره والكل ينتظرك عود انقذك بغير وقت

كعد ظل يحك بشعره من وره ويتصنع الانزعاج ويكول يولو اريد انفرد بيج مشتاكلج من الصبح بعيدة عني انتي

لزمته من ايده وسحبته بس والله ثكيل عبالك عصفور يسحب سيارة وهو عود يساعدني ويسوي حركات مال كسلانيين ويتثاوب والله احس نفسي ويا طفلة

كام غسل وطلع بره بالحديقة سليم حاجاه بحماس
ها ابو علي اني اريد اناسبكم

كح ذياب وعدل ياخة دشداشته وكال ابشر كبع واخذ
اني توترت واباوع لذياب مخنزرة

ذياب كمل كلامه كال انت بس اشرلي عليها وانه عد عيناك

ظليت اكحكح عود اريد انبه ذياب بس هو يباوعلي ويدور وجهه بس لا يريد ينتقم مني لان مانقذته قبل شويه
ظليت اهز برجلي محتارة ...

سليم جاوب والله اني اليوم شفتها بنت عمك قربى تكول اني ما اعرفها بس حجيت لقربى وقربى تكول اسمها فريال بلكي تشوفلياهه

ذياب خله ايده على لحيته وكال لسليم والله يا خويه ما ادري شكلك بس هاي فريال ماتفيدك اتعبك ياخويه اسألني عنها انه ابن عمها واعرفهة كلش زين

وانت يا سليم يا خويه عندك بنيات ويحتاجن وحدة تداريهن تصير الهن ام مكان امهن الي عافتهن وفريال ما اظنها هاي الام الي تحمل مواصفات تأهلها تكون بمثابة امهن

جاوب سليم بخيبة أمل ليش شبيها فريال ؟

ذياب : لا يغرك الشكل والمظهر سلوم احنه مانحجي هيج نكرهك او نكرهها ، لا نريد مصلحتك فريال للاسف بس شكل جوهرها صفر وتتعبك اخذها مني الحجاية ....
كال اخر كلماته وايده خلاهه على صدره

باوعت لسليم جان يباوع عليه وملامحه مخذولة
ابتسمت بوجهه وكتله

شنو رأيك بحفصة حماتي
والله حبابة وخوش بنية ....

همس ما اعرفها اني بعد كلام ذياب اريدها كون تخلي الله بين عيونها وتدير بالها علئ هل بنات منو الهن ... ودار وجهه يباوع لبناته يلعبن ...

جريت نفس...بس والله حفصه حبابه وطيبه حيل واكيد ما تضرهن واذا حاولت اكو من يردعها اخوتها وجدها ما اعتقد تاذيهن

ابتسم كال.. شوفيها الي بس خاف ذياب يكول حط عينه علئ اختي

ضحكت ..ههههههههههه لا لا ما يكول يخاف مني

ذياب مد راسه من الباب كال...شكلتي ول مصكوعه

ضحكت...يعني ما تخاف مو اني متسبعه باخويه ههههه

هز ايده كال...مو اورج ور انتي واخوج

سليم ضحك...ولج انلصمي لا ابن الشامخ يسوينه شوكتين كولة الشامخ هههه

ضحك ذياب علئ كلامه وهو كال لذياب..حاب اناسبك شدكول اريدك تصير خال الجهال

رد عليه ذياب...اتشرف والله اصير خال جهالك

...............

قربئ...

بعد مرور سنين...2017

صار عندي ولد من مواليد 2005 سميته عمر هذا بزر الكعده متعبني حييل حييل واحد عنيد والبراسه براسه وكل يوم جايني اني حترك المدرسه والوضع ما عاجبني وهاي،يوميه اني عرك وياه واكول لابو عليه بس يحجي وياه ويفهمه يسكت مخلي احنه بمدرسه اهليه ذياب يكول اني اريد ابري ذمتي امام الله واخلي،يكمل دراسته ويعتمد علئ نفسه بالمستقبل

علي مرحله ثانيه محاسبه علي ما شاء اللة عليه مثل النسمه البارده حيل حباب ويموت عليه يعشكني وكل ما شاف ابو حاضني لو يبوسني وكلها...هااا هااا حس بالسناكل ترا جفاف عاطفي صحراء قاحله وابو يرد عليه ما تتزوج منو لازمك

بس علي عندي من النوع المهمل وعجوزي يعني يجيني يوم باجر عندي دوام اختاريلي ملابس علئ ذوقج وحضريهن الصبح البس اذا ما اختاريت اله الكاه كالب غرفته كلاب مسويها سوك الجمعه ...

وغدوره ما شاء الله عليها اخاف يحسدوني عليها ادب وجمال واخلاق وذكاء حييل ذكيه بحيث بالسادس هي جانت علمي طلعت معدل 96 وعندها درجات مال ذوي الشهداء مالت جدها ما تتخيلون فرحتي بمعدلها جنت مثل الخبله بس ابجي عليها...من فرحتي ...

دخلت فحص بصر والخاطرها والخاطر علي اخواها لان دوامهم هنا استقرينا ببغداد...

جانت حيل حلوه وناااعمه تلبس لبس حلو محتاره شنو اشتري الها اجيب الها احلئ الملابس وارقاها وابوها ينطيني فلوس يكول ما اريد تقصرين ويه دكتورتنا وهي من النوع فقيره وهاااادئه تكسر الخاطر حتئ لو ساكته

وعليها عيون تور ور كولة ابوها يكول جنها عيونج تشبهج من جنتي بكدها

وهااا هي بيها طبيعه حييل متعلقه بيه مرات اروح لبيت اخوي سليم ابات يمهم يوم هو سليم تزوج حفصه وصار عنده اطفال منها من غير بناته من زوجته ذيج من اروح البيت اخوي وابوها يجيبها اليه باليل تبجي مخلصتها مشتاقه لأمي دكوله

كلتلها لعد شلون اذا اموت تتخبل من احجي هيج تحضني وتضل تحجي..والله ازعل عليج اذا تحجين هيج حجي اموت وراج اخليهم يدفنوني واني عدله وياج

اضل اضحك عليها انوب احضنها وابوسها واطيب خاطرها...

دخلت للكليه هي ما حافه ابد داومت المرحله لاولئ نصها ما حافه بعدها كالت..ماما حفي حواجبي سويهن بناتيات مو حفاف لان البنات كولها حافه

اخذتها حفيتها ما ردت اخلي بنفسها شئ ردت اعوض نفسي ببناتي واشتريت الها اغراض واجيت وتلكتني هدير ام اللسان متخصره كالت...هلاووو هلاوو اي عجل غديره حفافه وكطاطه واني خايبة الرجا كاعده هينا بالبيت مثل المطي محد مهتم المشاعري واحساسي

ضحكت عليها...لج ماما غير بالكليه وتحتاج ملابس ورتبت حواجبها ان شاء اللة من تدخلين جامعه اسويلج مثلها...

كعدت رجل علئ رجل وهي لابسها تراكها ابو الدباديب وشعرها كصير جنها سوزان قبل هم ضعيفه وهم حلوه مثلها ههههههههههه

كالت بعصبية...تمام ندخل كلية ليش ما ندخل بس عود من ادخل كلية كولي لا عيب ولا حرام ورا تحفيني

رديت عليها بمزح...جيبي معدل 102 واحفج

وكفت بحماس...والله اجيب بس تحفيني

ضحكت...تمام اتفقنه

اخذت كتابها وراحت تركض صعدت فوك تقره مكيفه مستعده تطلع ميه بس المهم تحف حواجبها ...

هي دلوعتنا هدير ابوها يموت عليها ولوتيه وسياسيه عندها وسائل اقناع مو طبيعيه تكدر تقنع ابوها وتطلعه من عصبيته ...

ومخلصتها ويه بنات فاروق يداومن سوه ويجن سوه وكل ما تعاركت وياهن وخابرت فاروق وكلتله...عمو رجاءا طلع بناتك من حياتي كرهني بروحي...

وهو يكلها...هو عمو اني كادرلهن حتئ اطلعهن من حياتج دطلعيهن من حياتي وشرط عليه ازوجج صديقي طيار ...

وهي مكيفه علئ سوالفه تموت علئ عمها وعماتها وعماتها يكولن نحبها تجيب الطاقه الايجابيه لان حركه وهوسه مو مثل غدير هادئة لا هاي خابصه لامه ولا جنها كبيره تلعب ويه الزعاطيط

اخذها عود ويايه خطار تروح تلعب ويه الجهال وتخبص لامه عاد اجيبها واجي وبنات فاروق اخس منها اذا ضحكن جيب الي يسكتهن وضحكتهن مفضوحه وطيبه وياهن يبووو نشييل...اذا اجتمعن بالضيم...

محمد ابن وئام كبر صار ضابط ويشتغل ويه خاله ذياب صاير ما شاء اللة عليه ثكيل وحلووو يجنن و وئام كاتله روحها عليه تباوعله مثل هلال العيد

قبل فتره رحنه الهم وهو من دون البنات شفته يباوع الغدير وهي غدير هم حسيت بيها مبادلته النظرات بس مستحيه ابتسمت بداخلي عزا قربئ بناتج كبرن وصارن يحبن هههههه ...

يا الله وين جنت اني وذياب عشاق من صدك تخيلت نفسي ويه ذياب ورجعت بذاكرتي لايام زمان الله يحلي ايامج يا غدير ذكرتيني بشبابي هههه

الناس تغيرت الصغير ما ضل صغير كبر والكبار ماتت بيبية فاروق ماتت هي وجده الله يرحمهم ويحسن اليهم جانوا ناس طيبين ...

وفاروق باع شكو شئ عنده بالبصره واستقر ببغداد هو وبناته وامه وعنده ولد صغير اسمه قاسم سماه علئ جده الله يرحمه...

والشامخ عايش بهل سنين الاحنه بيها جنه

فريال تزوجت واحد جبير بالعمر بس مو شايب لا وسط وصار عندها ثنين ولد واحد عنده ضمور بالدماغ ...

و وفاء،وحذيفه صار عندهم بس بنيه ما شاء اللة حيل سمينه تعاني من السمنه بس حليوه والله وبعد ما صار عندهم بس والله حليوه رغم سمينه وكلتله خويه راجع بيها خطيه لان هذا مرض مو عافيه وصدك اخذها راجع بيها طلع عندها هرمون الشهيه صاعد ونظمه الها...

ثاني يوم الكل بالدوام بس اني ضاله اخوط بالجدوره وانضف ذياب بالدوام صار رتبه عاليه بالدوله ما اكدر افصح عنها...

والبنات بالدوام وعلي كذلك بالكليه وعمر هماتين واني الوحدي انظف واشتغل واطبخ الحمد لله فرحانه بعائلتي واتمنئ الهم كل الخير

وحتئ من اشتغل وانظف وامسح واكنس انظف من نفس راضيه ومرتاحه ...

بس جان اكو هم بداخلي يخص اهلي لحد الان فياض عايش وخاتل ببيته رجع علئ بيته وما يطلع ابد ابببببد الناس تنطي اكل وشرب وتعطف عليه وصاير مسكين وذليل و وسخ ولو هو ما يستاهل حتئ العطف ...

بس بعد اكو ناس بكلوبهم رحمه حتئ لو جان الانسان حقير وطاغي يا سبحان الله هو شكد جان طاغي تاليها هسه حاله حال الجلب...

وعنده حبايه بوجهه هاي صار سنين حتئ ما يراجع واحد غيره مات بس ما اعرف ليش الله مخلي نص خده طار ودومه يكولون ملثم

راد يكتله سليم بس اني وابو علي ما قبلنه سلمناه لرب العالمين وان شاء اللة ياخذ جزاءه ...ويتعاقب

مرات العالم دكول بيته مسكون والجهال تخاف تفوت منه كد ما اضلم ويخوف وبس هو بي جنه مشرد يكولون بي جني...

بعد الله هو يعرف شلون يحاسبه...الله كريم...

طفيت الجدوره ودا اسوي زلاطه وهي دخلت عليه غدير الكحل سايل وتبجي وتشهك صرخت برعب و وكفت. .يمه غدير غدوره شبيج

نهاية البارت...يتبع

كونوا انتم كونوا بخير...احبكم 💔

نور سمو العراق😘

لا تنسوا التصويت و المشاركه بكم نكتمل🌷