رواية #سلالة العنفوان...ذنب عينيك الفصل الثامن والتسعون 98 - بقلم الكاتبه سمو العراق

الذنب الأربعون
رواية...ذنب عينيك...سلالة العنفوان
بقلمي...نور سمو العراق

💔💔💔💔💔💔💔💔💔💔💔

غيّرتنا الحرب، أصبحنا لا ندري ماذا نقول، أو ماذا نريد أن نفعل. غيّرتنا الحرب، سرقتْ منّا إنساننا الصغير، ولغتنا العظيمة.

......................

وئام...

من بعد ما صارت الحرب انه ما ردت اضل ببغداد خفت من الوضع وضليت ابجي...انه ما اضل هينا تريدون اموت اني و ويلادي دقيقه ما اضل انوب اموت بالقصف ما رايده روحي

وعمتي مديحه هم جانت وياي تحجي...اي والله يا عمر ما نضل هنا انووب نموت نصير تشريب حتئ محد يدفنه احنخ لازم نروح للغربيه ننقذ رواحنا من هل حرب وانت تروح ويانه

رد عليها عمر بعصبية...اني دقيقه ما اطلع من بيتي،وانتن علئ شنو خايفات اكعدن واسكتن هنا ماكو شئ والعراق كله مهدد قابل بس بغداد

جاوبتو بنفس عصبيتو...ما الي شغل اروح اروح اني اخاف علئ ويلادي يمه محمد وطيبه راح يموتون يمه وين اروح اني والله اجتل روحي وراهم وكلو بسببكم يا عمر انت السبب اذا صار عليهم شئ

كال بملل...عمي روحي انتي وامي والجهال بس فكيني يالعله

اشرت علئ نفسي...انوب اني عله خلف الله عليك يا عمر والله لو ما الحرب الا اتطلك ويله ودينه ما نريد نموت بيد الامريكان الانجاس

والله حضرت كل شئ اخذنه الحصه واخذنه ملابسنه واغراضنه وافلوسنه جاب عمر لوري خله بيها الفراشات كلها والملابس ورحنه للغربيه صاعدين فوك الفراشات جانت كشف السياره وطيبه ومحمد مكيفين ما يدرون شنو السالفه ...

الشمس تدك بينه ونايمين علئ الفراشات وكل شويه وطلعنه لفات واكلنه وتمر ناكل وخبز وخلصناها منا لمن وصلنه للغربية نزلنا اغراضنه عبالك شايلين من مكان المكان...

رحبو بينه واستقبلونه كعدنه ناكل تمن وروبه جوعانين جنه عبالك مو تمن وروبه عبالك ناكل قوزي هم جان اكو قصف وهم ايام مرعبه وغارات جويه...

جنه نخاف وبيومها طلعت انه وحفصه حفصه راحت تكطع فواكهه واني اتمشئ شايله طيبه وهي اجت تركض ترررركض كلتلها بخوووف...شكووو شكووو حفصه

ركضت جدامها بدون ما ادري شنو السالفه كالت...اجونه الف ازلمة

هي ما كالت الف ازلمة واني صرت مثل الطياره والبيب بيب اركض واصررررخ اجووونه الف ازلمة الحكووو يول اجونه الف ازلمة...

نركض اني وحفصه فحطانات ونرجف رجف مو طبيعي وكف جدامنه الشامخ كال...ول ول ول شمالجن تتراكضن منو وياجن

صحت بصوت عالي...جدي اجونه الف ازلمه

عقد حواجبه باستغراب كال...شني هاي انوب الف ازلمه

وصلنه يمه حسينه بأمان كلتله حفصه..جدي سمعت الفلاحين يتهامسون بينهم يكولون دخلو لديالئ الف ازلمه من البيش مرگه مدري برگه وراح يدخلون علينه

هز ايده بعدم رضا كلها...ول وتتراكضن لان دخلو لديالئ الف ازلمه من البيش مركه شجابنه احنه علئ بيش مركه الكراد هساع من اكضبجن واكطع العكال عليجن اكو واحد يلومني عبالي دخلو الأمريكان علينه

اني ضربت حفصه علئ جتفها بقوه وزكحت بوجهها...ثول حتئ ثول بيش مرگه شنو الف ازلمة شنو جنيتي انتي هي مصكوعه...

كالت بخوف...انه شدراني عجل غير سمعت الفلاليح يكولون بيش مركه دخلو بدبابات ومدرعات عددهم الف ازلمه وشادين براوسهم شرايط حمر ويردون ينتقمون منه ويجتلونه وانه تخبلت ...

رديت عليها..تف عليج وانه اركض وخلصتها عليه الف ازلمه والف ازلمه امداج امده الألف زلمه وياج

خليت ورحت دخلت جوه حسيت شئ نزل عليه استغربت رحت للحمام شفته دم كلت يمكن الشهريه لان صار جثير ما جايتني وهساع من الخوف ومن وره الالف ازلمة نزلت

ضليت تقريبا عشرة ايام ونفس الوضع وروح للقابله كالت عندج طفل ومهدد بالاسقاط وكالت ديري بالج علئ نفسج وتمددي ولا تكومين

ول ول حامل وبالسقوط شسمي اذا ولد اسمي بوش واذا بنيه امريكا عجل اجه بالسقوط ههههههه

الله يهلكج يا حفصه يوم الركضتيني مثل المطي الما يدري بالدنيا طشت رشت يركض وره الي يركضون

عمر كال ما دام حامل خلينه نرجع البغداد كتلو ابد انوب يجونه بيش مرگة ويجتلونه خلينه هينا محد يمر بينه ومحد يكدر علينه...

وعمر ساكت ومتحمل وانه ارجف من الغارات وبعدها صار السقوط واحتلو بغداد...

................

قربئ...

من تصير الغارات اني مسودنه محد مثلي فاتحه مخده من المخدات ومخليه الكطن باذان غدير وهدير وعلي

وذياب يضحك عليه...هههه يول شمسويه بالويلاد عليش مخليه باذانهم كطن...

جاوبته بخوف وبراءة...ذياب مو اخاف من الغارات يصير عندهم انفجار بدماغهم عاد اخلي كطن حتئ ما يسمعون صوت القصف والغارات

ضحك...ول يابه ما يصير هيح عليش هيج خوافه كولي يا الله ان شاء اللة ما يصير هيج

زحفت يمه ولزمت اديه جانت طاكه الكهرباء كتله برجاء وقلق...فدوه ذياب خلي نروح البيت بيبي بالبصره بلكي هناك ماكو قصف

جر نفس ورد عليه...لا بويه هناك اكو قصف بكل مكان موجوده الغارات الجويه ببغداد وبالبصره بديالئ وبكل مكان يمكن احنه اامن هينا...

بللت شفايفي بخوف...خاف يصير بيكم شئ ما اكدر اتحمل

باس راسي ورد عليه...نموت كلنه سوه يووول

سالته بهدوء...ذياب ضايج لان سحبو منك كل الامتيازان وجردوك من الخدمه العسكرية

ابتسم كال...لا يول بالعكس الحمد لله ان انه خلصت من شغلي واذا صار السقوط اكدر ارجع

تمسكت بي بحب...يعني مزعلان مني انت خسرت كل شئ بسببي

باس شفايفي ورد عليه...لا بويه ما زعلان لو اخسر حياتي لخاطرج ما راح ازعل عاد مو وظيفتي...

حضنته حييل وبسته بصدره ...احببك

ضحك...جنج نسيتي الغارات والكطن وانشغلتي تتغزلين بيه

كمزت من مكاني....اي اي والله نسيت يمعود خلي اخليلك كطن تا ما يصير عندك انفجار بالدماغ من صوت القصف والغارات والجويه ...

اخذ الكطن من ايدي وهو يضحك عليه...يووول شسالفه راح تتخبلين انتي عوفي الكطن علئ صفحه

جاوبته...والله تخوووف الدنيا حنمووووت والله ليش انت ما مهتم

جر نفس...ول بابا انه خلصت عمري بالحروب هاي عندي مثل الكرزات ماكو شئ يخوف هينا عجل لو بساحة القتال شسويتي انتي شايفه حرب ايران لو يسولفولج عنها...

حضنته بخوف...الله يساعدكم انتم الشباب علئ الحروب والله مدري شلون جنتم تتحملون

كال...عجل فاروق مو ضرب نفسو طلقو واصبعه انكطم بالشغل وكال ان هو تصوب بالحرب كل هذا سواه بس حتئ يتسرح من الجيش وضيم الجيش بس والله الجيش يسوي الواحد زلمه ويخلي عندو صبر ويتحمل كل المصاعب ويعتمد علئ نفسو رغم سلبيات الجيش إيجابيات...

همست...الحمد لله اني بنيه جان متت من الخوف مو من القصف وهماتين الحمد لله سحبو منك الامتيازات وما شاىكت بالحرب لان اذا انت بالحرب واني ضاله هنا انتظرك اطك واموت

ضحك كال..رب ضارة نافعه صح انسجنت بس السجن نفعني وخلصت الحرب كاعد يمج وادحك للخوف بعيونج واصبر عنج

همست بضحكه...اي الحمد لله ربي بحبني وخلاك عندي الحمد لله لو ادري هيج ما بجيت عليك وانت بالسجن

ضربني علئ خدي علئ كيف وهو يضحك...شكد مصكوعه و وارتني ور عجل هان عليج البعد وانه الجنت اخلص ايام السجن اصبر روحي بذكرياتي وياج مسويها مسلسل وكل يوم اتذكر يوم من ايامي وياج

حضنته بحب...عليش تحبني هلكد يووول ؟

رد عليه ...عجل انتي شايفه روحج داحكه بعيونج انتي غير تورين ور ومو بس حلوه لااسلوب ولطافه وثقافه وادب ونعومه كل شئ بيج حلو احببج انه من الله ربي زرع حبج بصدري مو بيدي قدر هذا قدري وياج انربط...

جريت نفس...الحمد الله كل شئ قسمه ونصيب واني مكتوب الي ادخل السجن واتعذب بس حتئ التقي بيك وتعوضني عن كل شئ صار ويايه

حضني وسكت ما حجه سالته ...ذياب سليم يرجع من تسقط بغداد مووو ؟

رد عليه...اكيد يرجع ان شاء اللة وتتكحل عيونج الكحيله بي عاد انه افرح خال الويلاد راح يجينه وينور الديره بطلتو البهيه هههههه

ابتسمت...الله يوم عيد والله شكد مشتاقتله بس خطيه ما كدر يجي راد ياخذني بس اني ما قبلت اروح وياه واعوفك مو هسه من زمان من جان زواجنه سري ما ردت اعوفك صح بالبداية كلت اروح بس بعدها فكرت بيك وكلت لا ما اروح

كرص خدي...عفيه بأم علي ولا خاب ضني بيج ولا فقدت ثقتي بيج ولالحظه احبج والله من صدك احبج واعشكج حتى عطوبج احبها

ضحكت...هههههههه يا الله كل كلامك حلو حتئ ذمك حلو انت شنو من رجال اني صايره اخاف احجي بعلاقتنا اني وياك اخاف يحسدونه...

رد عليه..اي لا تحجين يووول و وخري الكطن من اذان الجهال ومن اذانج ما ادري شلون تسمعين

ضحكت...هههههه لا مو كولش مدخلتهن اسمعك اسمعك ما تشوف اتغزل بيك جني مشايفه زلم ولو وين شايفه ماكو واحد بشهامتك ورجولتك

سحبني ونمنه اني وياه نسيت وياه الحرب والغارات والقصف وكل شئ عصيب،ويخوف وصار السقوط واني انتظر خبر من سليم بس للاسف لحد الان ماكو......

بس بيت فاروق من صار السقوط لحد الان هم عدنه فرحانين بيهم والله وخاصه بناتي يحبن بنات عمهن فاروق ويلعبن سوه بس علي يخبث عليهن

واهل جداد فاروق هماتين اجو عدنه جده صالحه وجدو قاسم وباجي جميله فرحاااانه حيل بيهم
.....................

سوزان ...

كاعدة بحديقة بيت جدو الشامخ من فترة بعد السقوط والحياة متوقفة ، لا مدارس لا جامعات ولا دوائر محبوسين بالبيوت وشغل ماكو الاوضاع تخوف شوية وبعدها ممستقرة

وصارت حالات ثأر وانتقام وحالات قتل هوايه صارت والناس تخاف لان لا حسيب ولارقيب وحتى شرطة مرور ماكو بالشارع

لو الامريكان مرات ينظمون السير لو ناس تتبرع وهكذا ...

رغم الجو حلو بس ضووجة حيل ، مشتاقة لبغداد هواي ولشقتي ولدوامي ما اعرف شوكت ترجع الامور لوضعها الطبيعي ، صراحة ملل كولش وحتى كهرباء وخطوط تليفونات الارضي هم ماكو كولشي واكف ..

البنات ديلعبن بالحديقة واني اتصفن وافكر بمستقبل العراق وين جنه ووين صرنا ومنعرف شينتظرنا المستقبل كله مجهول وخاصة مستقبل اطفالنا

واني كاعدة صافنة اجتي فريال كعدت يمي
حركت ايدها كدامي ووين صاافنة !'

باوعتلها كتلها بالوضع هذا كله بعد شنو يا فيفي

حكت راسها كالت اني يمكن اهاجر ما ابقى على هيج وضع اني مااتحمل ابد

بعدها طلعت ماما كالت بعدج كاعدة هنا متملين انت ؟

جاوبتها ماما داانتظر فاروق يجي عليه اروح لبيت ذياب

كالت ومتبقين هنا عيني شنو هالبيت يكرص خما يكرص

فيفي جاوبتها لماما خليها عمة خليها اشتاقت لعيالها مدري شلون متحملتهم وياج وين مترحين اوووي لو اني اخيره لو اني لو اهله شنو هم جنطة وين متروحين وياج

جاوبتها هاي شبيج فريال ترة اهله اهله اني اروح اكوله اطرد اهلك !! من كل عقلج انت!!! وبعدين افرضي سمع كلامي وعاف اهله او حتى بدون مااكوله هو ميسويها صحيح بس ترى اني ميعجبني الرجال الي يقصر ويه امه هذا مدام مابي خير لامه مابي خير لا الي ولا حتى لبناته

وكملت واني ادور وجهي منهم والعب بشعري وبعدين حشاه فاروق يسووي هيج!!!

فريال خلت رجل على رجل وكالت اووي صاير لسانج شطوله هاي عود انت ام الاتكييت ...

جاوبتها عفية فريال اسكتي رجاءً اني مخنوكة ومن اختنك اضووج كولش واذا شخص يضوجني اكوم مااعرف شحجي لتخليني اتخلى عن اتكيتي

جاوبتها ماما لج عوفيها عوفيها هو لو يفيد الحجي وياها جان فادها كلامي مو حتوكع وصلة من لساني وهم بلا فايدة شسوالها فاروق مدري سحرها مدري شسوالها

رمشت بعيوني بدلع اي والله سحرني فدوه اروحله صدك سحرني اخخخ الله شكد احبه انوب تأخر عليه ظليت اتلفت واباوع للباب

كمت الكعدة وياهم تقصر العمر تمشيت باتجاه الباب وبناتي ركضن وراي رغم اسمع ماما وفيفي انتقدني بس مهتميت

اريد اروح لبيت ذياب احسن اكابل بيبي صالحة ولا اكابلهم والله ع الاقل بيبي تونسني بسوالفها حتى مرات اضحك من كل قلبي

اندكت الباب واكيد فاروقي هذا اجه .. فتحتها وهو فات والبنات اجن شمرن روحهن عليه وهو شالهن وبوسهن

تقربت منه كتله ها حبيبي اشو تأخرت !!
كال والله راحت عليه نومة
جاوبته يله نوم العافية اروح اجيب الجنطة واجي من زمان منتظرتك

هو رفع راسه وباوع على ماما وفريال كال هاي منو هذن ؟ هوانم گاردن ستي

جاوبته اي روح سلم عليهن ...

كال ولو مااطيقهن بس هاي لخاطرج

بدلع كتله اي حبيبي خليك مسالم ومتسامح

نزل البنات وتوجهنا باتجاه ماما وفريال كاعدات بالحديقة يم المرجوحة الحديد
سلم عليهن وردن بتكبر كالعادة ..

وفريال وجهت كلامها لفاروق كالتله اي عيني اخذها لمرتك بسرعة مدري شبيها هرموناتها مدري حامل اشو روحها بخشمها

جاوبها على اساس انتي عندج براغي مو هرمونات

ضحكت عليه من كل قلبي ولا يكعد
ماما كالت شنو سوزان من شويه ماده البوز اشو هو البارحة جابج يمنه يمتى لحكتي تضوجين يمتى لحكتي تشتاقيله وتفرحين بجيته

جاوبها فاروق هو هذا الغاثج مو

لزمته من عكسه بسرعة وكتله يله فاروق ادخل سلم على جدو واني اروح اجيب اغراضي واغراض البنات
سحبته من يمهم لا يصير تراشق بالكلمات ...

دخل هو سلم على جدو واني جبت اغراضي ... وبعدها سلمنا ع الكل وطلعنا وهو ظل يسألني شبيج ضجتي خما احد غثج

تقربت منه واحتضن ساعد ايده وكتله لا حبيبي والله بس اشو تعودت قربك مكان مابي انت اختنك منه

كال يااابوويه هنيالي والله .... مصيبة صااابت امج شكد اعشككككج ولج انت الله شنو ضاف لطينتج من خلقج!

ضحكت وكتله :- فاررووق صح هي ماما مو طيبة بس لتدعي عليها اولا لان امي وثانيا ماريد ترجع الدعوة عليك حبيبي ...

كال هذا هو ولا يهمج يباوع لوجهي ويضحك
وصعدنا بالسيارة وانطلقنا لبيت ذياب

دخل السيارة فاروق جوة ونزلنا اول وحدة تلكتنا بيبي صالحة وجانت فرحانة
كالت تعال فاروغ تعاي زوزان ايت الغوة (اجت القوة )
(الكهرباء)

فرحت وسألتها متفاجأة صدك بيبي اجت الكهرباء ياربي الحمدلله لان جاي صيف همزين صلحوها بلكي هماتين ترجع الحياة لطبيعتها فد نوب خطوط التليفون
والدوام

وهي كالت اي دامن ايت الغوة فاروغ ودينه لبالخصيب

كاللها كولي يالله جده شون اخاطر بيكم انه واوديكم بهالوضع خلي شويه الاوضاع تصير احسن وتدللين بس صبري عليه هاي الفترة

واحنه دانفوت جوه هم يحجون فاروق وبيبي

كلتله جاا هاي الغوة يابوها كون اكو شرطة تكض السلابة والحرامية بعد

جاوبها جده شبيج انت ترى والله ماكو بعده الوضع موزين

كالت جاا تلومني فاروغ والله عنو عليه حبايبي ابيتي ديياتي امنتهن يم ام كريم هسه تلكاهه ياعت وذبحتهم اخخخ يم مريم ام بطن ادري بيها ذبحتهم هسه

جاوبها وهو يكعد على القنفة بالصالة
وتنهد بتعب عود انه اجيبلج غيرهن شبيج جده تهمتي المرة ...

كالت اريد فسيفسات همين وبطوط وبشوش

كاللها تدللين وبعدين شمالج ويه ام كريم مدري هسه خطية عايشين مدري طاح عليهم صاروخ وكتلهم وانت حايرة بدجاجاتج

هي انتبهت لكلامه شوية وكلبتها مناحة وظلت تلطم
يبووي ايبوووي ..ام كريم ماتت لااا ماصدك جااا شني رااحن ديياتي غصدي راحت ام سالفة الحلوة بعد ما عندي صويحبة اسولف وياها كلي فاااروغ ساامع خبر انته

وتبجي . سووتلنه فاتحة بدون ميت

الكل اجه على صوتها ... وكوة سكتتها باجي جميلة وجدو قاسم فاروق يدري بسوالفها كاعد ببرود ويحاجيها ادري جده انه شنو عندي صارووخ اروح للبصرة اشمشم اخبار واجي كلتها الحجاية عليك يا الله ...

شويه سكتتت

وجدو قاسم كاللها انه ادري بيج ضايجة وانه هم ضايج هنانه جا حلوة عندي عايف كويعتي ونخلاتي والزرع بس قير نخاف على فاروق يكضونه سلابة يطكونه الامريكان وياخذونه مدري وين ماوين عگليهه انتي ترضين هجي يصير بينا

وهي تمسح دموعها كالت لع ماارضاها ....
وبعدها طلعت افترت بالبستان .

وبيومها فتحنه التلفزيون بس ولا قناة اكو ، كل القنوات العراقية مسددة نريد نشوف اخبار وضع العراق شصاير ماكو اي قناة بالتلفزيون ...

بس الحمدلله من جتي الكهرباء رغم جان اكو مولد بس البانزين كتلة عليه بالمحطات وازدحام كلش لأن أزمة بانزين صارت ...

والاطفال خطية يخافون من الظلمة وهماتين جاي صيف وحارة ...وبقينا ننتظر الاوضاع تتعدل شويه حتى نرجع لبغداد وهماتين بيبي خطية متعودة على ديرتها تريد ترجع بس باجي جميلة متونسة على البنات شيلان وديلان كولش قريبة منهم تحبهم وتلعبهم وهم هماتين يحبوها ....

....................

قربئ...

بعد ما تم السقوط 2003 وذاعت الاخبار الناس الي فاقده احبابها اتجهت للمؤسسات الحكوميه والدوائر تدور علئ ضحايا المختفيه من زمان...

اني جنت من هاي الناس جنت ادور علئ. اهلي ومتابعه الاخبار اول باول ما عندي غير الدموع والدعاء الهم جان عندي امل واحد بالميه ان هم عايشين جنت اخلص اليل ابجي عليهم

خاصه بعد ما انفتحت المقابر الجماعيه صار عندي رعب مو طبيعي،من اشوف رفاة الموتئ وضحايا المذابح صار عندي ردة فعل وخوف مو طبيعي الله يساعد ذويهم شلون يتعرفون عنهم

جنت عبالي ان هم مغيبين بالسجون بس الكل طلع من السجن الا هم واحس ذياب ضام عني شئ...

بعد ما انفتحت المقابر الجماعيه شفت تهرب ذياب وعدم تواجده ويانه من خلال الاخبار جنت حاسه ان هو ضام عني شئ ولهذا السبب هو يتهرب احس يعرف شئ عن اهلي....

يوم الجمعه جنه كاعدين نتغده وفتحت التليفزيون علئ الاخبار وطلعو العالم والمقابر الجماعيه هو داياكل نزل الخاشوكه من ايده كال...ديري القناة يووول

عقدت حواجبي وجاوبته...ليش خليني اباوع بلكي الله والكه خبر عن اهلي متت واني كل يوم متعذبه بسببهم وخايفه حييل بس انت دائما هيج متقبل اخلي واستفسر معقوله ضام عني شئ يا ذياب..

رد عليه بارتباك...لا بويه ما ضام شئ بس يا بويه احنه كاعدين نتغدا وحتئ حرام ندحك للجثث وناكل واحد حتئ ما الو نفس تا ياكل وهو يشوف الجثث والاهالي حالهم يكسر الخاطر...

وكفت وطفيت التليفزيون وكعدت ما كدرت اكل احس غصه بداخل صدري وهو رفع الخاشوكه راد ياكل نزلها وكال...الحمد لله

وبعدها خله وراح وكف وطلع برا جريت نفس وتعبت حالتي تركت الاكل وعفت بس الجهال ياكلون وحدهم وخليت وطلعت وراه ...

لكيته واكف ويدخن بشراهه ما اعرف شنو البي سكوته من يوم الي انفتحت بي المقابر الجماعيه وهو حالته حاله وما اعرف شنو الي بي...

وكفت وراه وبللت شفايفي جريت نفس وهمست...ذيااااب صاير شئ اهلي بيهم شئ

سكت مجاوبني حطيت ايدي علئ جتفه همست...موجودين بالمقابر الجماعيه مووو؟

دار وجهه عليه بسرعه وعقد حواجبه قابلته بعيون دامعه وبرجفه ...مو صح

عض على شفايفه ونزل عيونه باسف

فتحت عيوني مصدومه لزمته من ياخة قميصه برجفه وانهيار...موووو صددددك اهلي ميتيين موجودين بالمقابر الجماعيه

مسح وجهه بتوتر وارتباك كال...كولي يا الله قربئ ان شاء اللة ما بيهم شئ

صرخت بوجهه والدموع ترست وجهي...ذياااااااب صارلك سنين دكول ان شاء اللة ما بيهم شئ ذيااااب صارلك سنين تدري بيهم مو بخير ليش هيج تجذب عليه ليييييش كول اهلج ميتيين ...

لزمني وهو يهدي بيه من انهياري...بس اهدي اهدي يا قربئ كولي يا الله هذا امر رب العالمين مكتوب عليهم هيج يصير بيهم وبهيج وكت تعرفين ان الله اخذ امانتهم

بلعت ريكي بذهول وضياع...سنيين وانت تعرف سنين تعرف بعذابهم باعدامهم بموتهم وما دكولي يا ذياب لاااا ذياب لا فدوه مو هيج مو هيج يا ذياب مو هيج

جر نفس ورد عليه...انا لله وانا اليه راجعون

صرخت بصوت عالي...باااابا تمييييم لاااااااا عشت سنين واني علئ امل ان الگاكم عشت شنين واني كل يوم انتظر جيتكم وانتم ميتين واني ما ادري لااااا فدوه يابه لا منو الي غيركم اني والله صعبه انتم وامي تموتون لاااا فدوه يابه لا مو هيج الفراك

وكعت علئ الارض واني اضرب علئ خدودي وابجي واصرخ هو كعد بصفي وحضني الصدره وهو يرد عليه...حبيبتي بويه قرباني الله يرحمهم

رفعت راسي اله بوجع وحسىره احس كلبي،راح يطلع من مكانه شلووون انساهم وين الكه مثل حنانهم ما عندي غير الدمعه والاهات صعب فراكم والله صعب شلون واني الجنت كلي امل الكاكم ...

مسحت دموعي بحسرة واشهك من كل كلبي وهو جان مقيد مقاومتي ما جان يخليني ابجي طلع علي ابني علئ اثر الموقف الي صار كال بخوف وقلق...شبيج ماما ليش تبجين

شهكت وباوعتله بالم...اهلي ماتو يا علي اهلي ميتين من زمان

باوعت الذياب بانهيار...ذياب اهلي بالمقابر الجماعيه مووو؟

سكت وجر نفس ورد عليه...اي بويه بالمحاويل مقبرة المحاويل بالحله وانه عندي صديق بصليب الاحمر خبرتو اذا عرف عنهم يخبرنه وان شاء اللة نلكاهم وندفنهم من جديد

جاوبته بالم ورجاء وايدي علئ صدري...ذياب لا تحجي هيج توجع كلبي لا تخليني اصدك هم صدك ماتووو وبعد ما اشوفهم واني الي كلي أمل بيهم ومنتظرتهم علئ نااار

شسويتو بيه يا اهلي الي متئ اضل ابجي عليكم وانعاكم ومن بين دموعي والمي و وجعي راسي ضل ينفخ عليه تخربطت من الصدمه ومن الانهيار الصار عندي

ما جنت اتخيل لو مجرد خيال اهلي ماتو هيج موته اتخيلهم وهم يستنجدون بيهم ويطلبون منهم الرحمه يا ربي دفنوهم وهم عدلين لو كتلوهم ودفنوهم دفنوهم باليل لو بالنهار الله يساعد كلبكم شنو من رعب شنو من خوف الله يساعدكم...

انهرت صار عندي انهيار عصبي عليهم ما عرفت شلون اعيش من بعد هل صدمه رجفه وخوف وقلق عشت واقعهم عشت الخوف جسدت شخصياتهم وعشت رعبهم كل يوم نفس التفكير

تركت كل شئ ابتعدت عن العالم صار الحزن عنواني ولازكه بالتليفزيون وعيوني مورمه من البجي وخشمي صاير احمر وحتئ ما اشوف سوده عليه انتم هنا بدون لا غسل ولا تكفين محد نعاكم ولا رثاكم شنو من ضلم هذا ربي صبرني عليهم فدوه اروحلك

حجيت ويه ذياب كتله اريد اهلي منك اريد اهلي منك اشوفهم قبل كل شئ ولازم اشوفهم احضن عظامهم وملابسهم الرثه اشمهم حتئ لو بس هيكل عظمي هددته اذا دفنهم من دون ما اشوف يحرم عليه واحرم عليه

خطيه هو جان فاقد الوسيله فاقد شلون يصبرني عليهم و وعدني اذا عرف عنهم خبر راح ياخذني الهم

دخلنا ب2004 ما انسه هاي السنه ولا انسئ وجعها ولا مأساته ببدايتها بيومها ذياب اجاني هو والشامخ وهو يكول ...جدي يريد يحجي وياج يا قربئ

تحجبت اني من بعد ما صار السقوط رديت عليه...تفضلي جدي اهلا و سهلا بيك

كال بايمان وهو يسبح بسبحته...بويه...انتي انسانه مؤمنه وتعرفين ربج كلش زين الموت حق ومكتوب علينا كلنه وهذا امر ربنا وكلنا مرجوعنه لوجهو الكريم

نزلت راسي وجاوبته...ونعم بالله والحمد لله علئ كل حال

رد عليه بتنهيده كال...جثث اهلج لكوهم بمقبرة المحاويل وتواصلو ويه ابو علي لتسليم الجثث

وكفت والرجفه اعتلت كل جسمي رجليه ما كدرت اوكف عليهن من هول الصدمه وكلبي وجعني عبالك هسه ماتووو عبالك هسه انعدمو

شهكت من نص دموعي وبجيت بصوت عالي...يعني هذا هووو يعني اكطع الامل ماتوووو تميم وابوووي ماتووو الله ينتقم من كل واحد ضلمكم

ضليت ابجي بصوت عالي وصرخ والطم وخالتي ام ذياب و حفصه و وفاء وام سيف اجو كلهم ضلو يهدون بيه بس هيهات شلون اهدئ واني اتذكر مضلومية اهلي الله ينتقم من اعدائهم الله ينتقم ويعاقب كل شخص

حفصه وخالتي ضلن يبجن ويايه واخذن الجهال يمهن وااني وذياب والشامخ رحنه للحله المقبرة المحاويل الجماعية...

اخذنه الطريق كله اني بس ابجي وانحب وانعئ اهلي وجع ساكن بنص صدري عليهم امي ماتت ما ضاكت لوعت فراكهم ضل الهم والغم والحسره عليه اووووف يا ربي لا تفجع شخص بإنسان غالي عليه

الطريق صار طوووويل عليه واني اهمس جايتكم جايتكم يا نظر عيني جايه اذب همومي يمكم جايه اشوفكم من بعد سنين....

وصلنه الهاي المقبره المشؤؤمه الي يا ما ويا ما اخذت ناس وشباب ابرياء قبره ضمت الألف من الشباب والناس...

ضلينه واكفين والناس تطلع بالجثث كلها عظام و جماجم منظر تقشر وتنهز اله الابدان بحيث حسيت صارت عندي حاله نفسيه وخنكه مو طبيعيه والطريق ضليت ما اشوفه من الدموع

اثار انتباهي مره عجوز شاده عمامه علئ راسها ومخليه صورة ابنها الشهيد كدامها وحاضنه الجمجمه وهي تبجي ودكوله...شلونك يبعد امك شلونك بعدك حلو لو خرب لونك

جانت تحجي ويه جمجمة ابنها وحاضنتها مثل الطفل الصغير وتبوس بيها وتحاجي

يمة البيت وحشة وليش ماجيت
يايمة أعله بختك ترحل شلون
وليدي دموع ثكلى الصبت أعليك
تون وتنوح مو مثل الينوحون
اذا دمعاتي نشفن فوك الخدود
اظل عليك اصبن حتى الجفون
ولا ريدن عيوني ونورهن راح
وهيه بلاية نور شتسوة العيون
صاحبت المكابر ياضوة العين

و وحده تحاجي ابنها وحاضنه قميصه وهي تحاجي لحد الان اتذكر كلامها دكولها...
اصطفاني الموت ريتة صفا يابني
بصفوف الضحوا النة صفا يابني
بعلات الصوت صحت صفا يابني
خذاك الموت يايمة من ادية...

مواقف تشيب،الراس وتكبر الانسان الف سنه والي يشوف مصيبة غيره تهون عليه مصيبته جنت اباوع للعالم مثل العايش بدوامه دايخه ومذهوله من كم الناس الهائل

بعدها اجه واحد من جماعة الهلال الأحمر حجه ويه ذياب واخذنه وياة وكفنه بنص التراب و هو طلع كونية بيها كومة عظام كال...هذول اهلج كل كونية بيها جثه من جثث اهلج

شهكت مرعوبه كعدت بنص التراب وحضنتهم ردت اطلعهم بس ذياب ما قبل بس اصريت طلعت وحده منهم جانت جمجمه ومربوطه عيونه بخركه بيضه مسمره من تعب السنين انتبهت من طرف الكونيه طالع القميص مالته مخطط اذكره الهسه من اعتقلو بيه هاي جثة تميم

سحبت القميص وانزع من العظام ومن الرفاة سحبته اشم بي واصرخ وصوتي عانق عنان السماء

حسيت القميص اكو شي مديت ايدي بالجيب جانت محفظته وبخاخ جان قبل يختنك وجنسيته ..مكتوب اسمه الكامل ...تميييم يعقوب سلمان...

نهاية البارت...يتبع

كونوا انتم كونوا بخير...احبكم 💔💔

نور سمو العراق 😘

لا تنسوا التصويت و المشاركه بكم نكتمل🌷

ادري البارت حزين بس هذا حال اهل قربئ وقربى وهوايه ناس مثلهم للاسف انا لله وانا إليهم راجعون راح يضلون غصه بقلوب أهاليهم ...الله يرحمهم ويسكنهم فسيح جناته الرحمة لضحايا المقابر الجماعيه البعيدين عن اهلهم ومحبيهم ماتو ضلمو ودفنو ضلم من دون لا غسل ولاتكفين ولا مراسيم طقوس الدفن راحو لرب كريم وهم يشكون ضلم الحال والله رؤوف بالعباد وهو الجبار المنتقم من كل شخص ضلمهم صبرا جميل والله المستعان الرحمه والخلود الهم والرجم للطغاة كل من ظلم شخص بالباطل...

بإسمي الكاتبه نور سمو العراق فخورة بنفسي كوني كتبت عن المقابر الجماعيه واعتبره انجاز الي رغم اعرف ما راح ارضي كل الاذواق لكن اني بنظري ارخت التاريخ وذكرت مضلوميتهم والحمد لله