رواية #سلالة العنفوان...ذنب عينيك الفصل الثاني والأربعون 42 - بقلم الكاتبه سمو العراق

الذنب 37
رواية..ذنب عينيك..سلالة العنفوان
بقلمي...نور سمو العراق

💔💔💔💔💔💔💔💔💔

هذا قلبي ؛ من هُنا مرّ القساة.

......................

وئام

مرات يراودنه شعور يوجع نحاول نتغاضه عنه بالنسيان ومجاراة الامور ونتخلص منه الوحدنه من دون دخيل

يعني تعودنا ان نزيل اوجاعنه بالنسيان بس هيهات ذكرياتنا واوجاعنه مستحيل تنسئ لذلك احنه نكتم بصدرنه وما انذي غير رواحنه بدل ما نداويها...

فعلا اني انحرحت جرح قوي طفله وتزوجت واحد اكبر مني بعشرين سنه جنت حتئ من امشي وياه عبالهم بنته

اكرهه حد العمئ مااحبو مو بيدي جنت بقوقعة الطفوله هاجست اخذ برائتي،وطفولتي سنتين مرن وياها مثل سنين يعقوب بس،عذاب ودموع

اشوفو وحش اكره ضخامتو اكره من يدخل للبيت اكرهو ما احبو ولا فد يوم حبيتو مو بيدي مشاعري تجاهو بس كره ماكو اي موده بينه...

من يدخل للبيت هاجس شيطان دخل علينه وحتئ من حملت بمحمد كرهت روحي اكثر وجنت اتمنئ يگع ولا يضل ببطني

ومن حملت كطعت الامل من الخلاص جنت اكتم بداخلي والشامخ استغل عدم وجود اخواني وزوجني

اتذكر من رحنه نعقد بالمحكمه والقاضي سالني...موافقه بالزواج

جاوبتو بكل اصرار وعناد...لاااااا ما موافقه ما موافقه ومستحيل اوافق مستحييل

القاضي ما قبل يعقد النه ومن رجعنه الشامخ اجرم بحقي ملخني تملخ وحبسني،وبعدها زوجني من دون عقد.

قبل لا يزوجني كال ...راح نرجع نعقد اذا رفضتي احط طلقه براسج واچتلج

ما خفت اني اخذت جنسيتي ورحت دفنتها بالسطح وكلت الهم ضاعت درور رادو ماكو بعدها تزوجنه اجباري من دون عقد ومن صار محمد اضطريت اعقد تا اخلي عندو اصل ولو اصل الشامخ ما يعجبني..

عمر ...اعرفو من قبل لا يتزوج جان دائما مساند فاروق واني همين لهذا السبب فاروق يحبو چثير

ما فديوم هاجست عمر من نسل الشامخ اهاجس مثل شخصية اخواني ما عندو خبث ما عندو كراهيه

اتزوج وره زواجي وما استمر بزواجو چثير طلك هو واختو بنفس الشهر الكل تفاجئ من الموضوع بس هم تكتمو علئ هل موضوع

مرة سنين علاقتي مو چثير قويه ويه عمر ولا اعرفو جثير جانت ظروفي صعبه وما اريد اعيد الماضي الشامخ رافض زواجي من اي واحد

ودوم من اروح للبصرا يتگاون وياي ودوم يخلي حجتو بمحمد واني محمد هو بلسم الحياة بالنسبه اليه لهذا السبب اني جنت مجاريتو للشامخ

من عمر خطبني تحت طلب من امو وضياع الفلوس اني وافقت ومو بس لهذا السبب لا اني ما جنت اعيد نفس المأساة الي عشتها ببيت شاهين

بيت عمي ابو شاهيين اكرهم من افوت من بابهم اسد عيوني ما اريد ادحك بابهم ولا اريد التقي بيهم يكفي الي شفتو منهم

بنو مني شخصية عدوانيه متمردة غبيه ومتسرعه بعد ماجنت هادئه ومطيعه وحبوبه...

ما ردت اعيش بنفس الضفط ولا بنفس توتر الاعصاب والشد العقلي ردت اعيش حالي من حال البقيه وردت يكون الي ذاتي واختياري

مو الشامخ كال اريدج لسيف اصير السيف ردت اغير الواقع لكن للاسف طلع الواقع اتعس

عمر نفس شاهين ضرب ذل اهانه وشك ردت اداوي روحي بعمر تالي رجع كسرني من جديد...

عمر ردته سندي اذا الدنيا تكون ضدي بس للاسف جانت صدمتي،بي جبيرة

بأيام الخطوبه تقبلته تقبلت كلامه جنت اكول هاي مو شك غيره بس اخر موقف دمرني وبعد هو المكتوب على الجبين لازم تشوفو العين

وكل شي بالقسمه والنصيب،والحمد الله علئ كل حال هذا نصيبي،من الدنيا

وكع من طوله ونبضه ماكو وهذا الي رعبني هزيت جسمه الي متصلب من برودة الجو ودموعي تتسابق ...عمر عمررر شبيك يووول اكعد عمر

عفتو وركضت والمطر يضرب علئ جسمو بغزاره فتحت الباب دحكت عمتي كاعده تحوك صرخت بصوت فززتها...عمه عمه الحكي،عمر ما اعرف شبي وكع وما يتحرك

شمرت السناره من ايدها وهي مفجوعه وتلطم علئ وجهها وتصرخ...يمممه وليدي،يمه عمر يمه كله من ضيم النسوان الله لا يوفقهن

ركضت عليه من شافته واكع بالحديقه والمطر مبلل جثته صرخت ونزلت نفسها عليه حضنته وضمته لصدرها باسته وهي تحجي وياه...يمه عمر حاجيني حبيبي يمه سوده بوجهي

اني ركضت للشارع وضليت اصيح...يا ناس يا عالم فدوه واحد منكم يجي عمر مااات تعالو فدوه اخذو للمستشفئ

جان شتا والعالم كلها ببيوتها محدره محد طالعه ركضت علئ،بيت جيرانهم بصفهم دكيته حيل خسفتو تخسف وادحك للشارع والمطر مثل لزلال

طلع ابنهم لابس قمصلتو وكاضبها بيده كال بقلق وخوف ...هااا خويه شكو شكو صاير وياج شئ

بلعت ريكي وجاوبتو من بين دموعي...فدوه اني زوجت عمر ابن ابو عمر جيرانكم زوجي ما اعرف شبي تخربط و واكع بلكي تاخذو للمستشفئ اذا ما اسبب الك احراج

هو رد عليه بغيرتو العراقيه ...افااا هسه بس البس شحاطتي اجي بسرعه

اجت مرتو تركض وراه وهو اجه وياه ولد اصغر منو بشوي كلنه وما كدرنه نشيل عمر ما شاء الله جسمو وعضمو خشن كسر ظهور الزلم يله كدروا يشيلو

ومرتو ضلت بالبيت ومحمد عندها كالت بحنيه ..روحي خاله ويه زوجج اني اضل يم الطفل

مسحت دموعي وركضت وراهم وشعري منفوش والله لو يكعد عمر ويشوفني اله يذبحني عجل طالعه وافتر بالبيبان وبنص الزلم

بس والله الخاطروا حتئ لو ما احبو بس،يعز عليه ابن عمتي قبل لا يكون زوجي وهم هو صديق فاروق يحبو....

وصلنه بالمستشفى اخذو بالطوارئ وهو لا حياة لمن تنادي،وعمتي كتلت روحها كتل ..يمه عمر يمه وليدي يمه لو ادري هيج ما زوجتك محد رحمة بحالكم يبعد امك...

سوو الدكاتره والممرضين الإجراءات اللازمه كالو. صايره عندو جلطه خفيفه بس هو ما اعرف ليش دخل بغيبوبه

عمتي حجت ويه الدكتور كالت...هو من قبل كم سنه هم دخل بغيبوبه

استغربت اول مره اسمع عمر دخل غيبوبه عود صدك تحجي عمتي ياربي دخيلك شنو هل عائلة الغامضه الي ماينفهم راسها من رجليها الله يعيني عليهم

انوب حمودي يبعد امه ضل لوحده بس لا يكعد ويستغرب ويضل يبجي سوده عليه حبيبي...

الشئ الوحيد الحلو الي صار بحياتي ...ربي يحفظو الي ما اتخيل حياتي من دونو...

................

قربان...

اخذت علاجي وطلعت دا اغسل ملابس الذيب فدوه اروحله

غسلتهن وشريتهن فوك بالسطح علئ الحبل باوعت الهن وصفن مبتسمه يا الله كل شي يخص ذيب،احبه

خليت ونزلت بعد كم يوم حنة عسوله وعزمتني واني كلت اخذ سوزان ويايه لان سوزي خطيه حبابه ومطالعه تتونس ابد فحبيت اشوفها تقاليد اهل البصره..

نزلت نظفت البيت كله وسوزان غسلت مواعين وراحت تقري فاروق وذياب دوم يضحك عليها يكولها...ترا فاروق ماخذ صفر بالاملاء وچتلو الجهال

وهي تضحك...لا لا لا فاروق شاطر ونبه دوم منتبه عليه وحافظ شنو ادرسه

وبعدها سألته بشك...فدوه ذياب،صدك فاروق صف سادس علمي

جاوبها بعدم معرفه...الي اعرفو هو بالاعداديه بس واصل للسادس او لا ما اعرف لان هو بالدفرات يا الله طلع من الثالث متوسط

هي تركع الفاروق وتبرر...اي الثالث صعب حيل حقه يضل هلكد الحمد لله هو سبع وبطل من طلع من الثالث

وهاي هيج مخلصيها ذياب،يذم بفاروق وسوزي تدافع عنه دفاع مستميت

دخلت للغرفه لكيت ذياب نايم وحاضن اديه لصدرو رفعت ايدو ودخلت بحضنه...صايره احجي انباري كله عجل ويول وادحك كله من وره ذياب لساني اخط علئ لهجته

من حس بوجودي لف اديه علئ اكتافي،وضمني،حيل لصدره

كتله بهمس...حبيبي نايم

رد عليه بنفس الهمس...قيد النوم

تدنيت عليه أكثر...اي صدك ذيبي بعد كم يوم عرس عسوله اروح موو ؟

رد وهو مغمض عيونو...عجل عليش ما ترحين روحي غيري جو ونعشي نفسيتج ان شاء الله ترتاحين

مديت شفايفي بزعل...ليش تحجي وانت مغمض ما عاجبك تدحك بوجهي

ابتسم من بين نومتو..ول قربان انه مغمض وصورتج بس هي تبرالي مغمض،ومفتح ما اشوف غيرج

فزيت بفرحه...صدك احلف حتئ اصدك

فتح تك عين...هي مصكوعه ما انام من وراج جنج طفل توه متعلم يحجي وفرحان بلسانو ما تعرفين تسكتين

بلعت ريكي بفشله ..هااا بس لا ضجت بس والله اني لان محد يحجي ويايه هسه وهماتين انت تريد تروح وتتاخر ببغداد عاد اجمع سوالفك واستذكرهن حتئ يسدن وحشتي عنك

عدلت كعدته وضحك بصوت ...ههههههههههه والله يا قربان صدك لسانج عسل وطويل انه عود زعلان شلون تكعديني،من نومتي وتاليها اكعد انه متلهف لسوالفج يعثرة كلبي...

ضحكت...اي اني من تتعصب انت بسرعه اخلق الأعذار احب من تمدح بيه لذلك بسرعه اطلع عذر وتصير عندي،سرعة بديهيه شفت شلون من تمدحني اصير ذكيه...

حط ايده وره راسي وسحبني انصدمت بصدره كال. انه دوم امدحج واحبج وهساع دام طارت نومة عيني راح اخذج للسوك ونشتري ملابس لحنة عسولة

همست...لا لا نام انت تعبان حبيبي نام عندي،هواية ملابس والله

رد عليه باستنكار...لا بويه اريدج كشختهن واتباها بيج واريد الكل يعرف قربان ماخذه رجال تفتخر بي وما خلي شئ بنفسها...

ابتسمت ما عجبته ردة فعلي كال...يله بوسي اطمسي خدي عجل بس من بالشارع تردين تخسفين وتسوين طسات بخدي...

ضحكت...ههههههههههه مدري شبيه بس،بالشارع اصير رومانسيه

جر نفس...شلون بله نكعد بالشارع حتئ نحصل رومانسيه

تقربت منه وبسته بخده...يله هاي،بوسه كافي بعد

سحبني،وباسني،بعمق عيونه الي من التقي،بيهن انسه الدنيا اضيع بيهن بحر من الاسرار بيهن كل ذنوبي معاناتي الالامي فرحتي وحنيتي اله بيهن اهلي الي مضيعتهم وشوقي،الهم غالبني دوم

ما متقرب مني،من تمرضت لحد الان مراعي حالتي الصحيه بس صح يحضني ويبوسني ويدللني فدوه الكلبي كولش احبه واحترمه...

خلينه وطلعنه اني وياه بعد ما بدلت ملابسي اخذني اشترالي،ملابس علئ ذوقه يكول احب تلبسين علئ ذوقي وطبعا ذوقه حيل حلو اي طبعا حلو غير اني احد اذواقه...

شكد جنت فرحانه بيهن عبالك طفله وابوها اشترالها ملابس للعيد وطبعا جان حصار والسلعه غاليه حييل ومن نشتريها نستعز بيها ونحبها اكثر من روحنا

لذلك جنت كل شويه اطلعهن واصفن بيهن واضمهن الصدري

وهاا كدرت شافهن عليه وانطاني رأيه تخبل عليه كال...بشرفي ولا وحده بحلاتج من كرابتي

المشكله فاروق هماتين هيج يكول لسوزي مندري منو اليحجي صدك ومنو جذاب هههه

...............

سوزان ..

ما شاء الله من دون حسد فاروق كولش شاطر ويستوعب بسرعه ذكي عيني،بارده عليه

بس لو يترك سوالفه شويه كان طلع الاول علئ العراق بس هو شنو ميبطل سوالفه

كل شويه وكال..سوزان بوسه سوزان بعد بوسه

واني ونبي،ميته قهر وصابره وكاعده ادرس بي ومن وره الباب والطباشير واكتب واحل تمارين وان شاء الله هو حيقدم خارجي ان شاء الله ثنينه جامعه بس هو اكيد مسائي،لان اكبر مني وعمره ميتقبلو بالصباحي...

دخلت لكيته مركز بالكتاب ويحل ويدخن وعاقد حواجبه بتركيز..ابتسمت فدوه للشاطر الي ديدرس ومتعب نفسه...

كعدت مقابيله وبوطيطه يمه كاعد يكمز شكد حلو هيج شئ بوطيطه وفاروق كاعدين عبالك هم اطفالي الاعزاء الي لازم افتخر بيهم

كعدت يم فاروق...هااا فاروق عيني بشر حفضت هاي التمارين لو بعدك حتئ،اذا بعدك ارجع اشرح من جديد ما عندي شئ

تنهد ...حفضت ثنين واحد عبالك حزوره بسرعه حفضته بس البقيه مصيبه ما ينحفضن اصعب من اخلاق الشامخ

رجعت خصلة شعري وره اذني...فاروق يا عيني،انت بس انتبه عليه مو دا اشرح الك شوف هذا الرقم تضربه بهذا الرقم وهيج تطلع الناتج الكلي

رجع حله هو صفكت...عفيه شطووور يااااي شلون حلو بسرعه تستوعب ما تتعب مو اثول كنت اضنك

زمخ بوجهي...انحبي انجبي وانلصمي لا تكعدين تجفصين يبا شبيه اثول اكيد مو اثول انه لاعبت الملچ چعاب وغلبته

تعصبت..اي لتصيح ما اعرف نسيت هسه المهم اقره زين

شمر القلم متعصب...بعد ما اقره تعبت اعصابي انوب انتي لا تبوسيني لا تحجين وياي كلام حلو حتئ يصير عندي نشاط واستعد للقراءة...

رمقته بنظره حااده...عوف البوس وانتبه لدراستك

احتدت ملامحها زعلان ...شلون انتبه وانتي من تجين تطيرين انتباهي وتشتتين افكاري واضل اضرب اخماس باسداس وما يطلع عندي ناتج كلي..

ضحكت..ههههههههههه لعد يله حروح اني حتئ تستوعب اكثر

سحب ايدي...يبا بس شويه انطيني بوسه لان اضل بس افكر اذا ما اخذت بوسه ولا اني قاري ولا اني محصل بوسه ...

غمضت عيوني...يله بوسه وحده مو اكثر تمام

رد عليه ببراءة...اي وداعة الشامخ بس،بوسه وحده

شو بعدني ما غمضت عيوني وفاروق هجم اخذ عدد من البوسات ما مذكور بالارقام العشرية بالرياضيات

دفعته بغضب...بدل هل سوالف انتبه لدراستك وبطل هاي السوالف دراستك اهم من البوسه

عض شفته...اووووف لا بالقران بوستج اهم من دراستي ومن عشيرتي

وكف وهزيت ايدي وهو رجع يقره ويدخن الدخان شنو بالموضوع ما اعرف جوز ينطي حافز مثل لبوسه الله اعلم بعد فاروق ودراسته...

مر كم يوم وقربى عزمتني حنة بنت خالها وكلت الفاروق كال روحي

وهو وذياب راحو لبغداد توسلت بي اروح البغداد ما قبل يكول مو هسه بعد خليته براحته هسه لو كاعد قاري كم فصل من الأحياء مو احسن ما دايح ببغداد...

.....................

قربى ...

اليوم حنة عسولة فرحانة كلش الها خطية واخيرا راح تتزوج شوية طولت خطوبتهم وهماتين متحمسة اشوفها بالبدلة

اخذتنا خالة ام فاروق و سوزان هم اجت ويانه و رحنه الصبح لبيت بيبي ، اول مادخلنه سلمنه عليهم وخالة ام عسولة كطعت سوزان من البوس خطية جعصتها جعص وسوزان مصدومة ...

هيه خالة جلثوم عود دترحب بيها بس بطريقتها
..... كعدنا واجت بيبي رحبت بيهم وفرحانة بيهم لان من طرف ذياب اول مرة يجوهم

سألت خالة جلثوم على عسولة كالت راح خذتها خالتها لبيت خديجة الولافة تولفها للحنة

يمه غروبة اليوم اريدج تذبين لحم بالحنة ماريدج تكصرين ابد راح اجيب داكوكات يدكن بالحنة اجرتهن

ياايمه جاا اول فرحتي عسيلة صارلي شكد ابيع بباكات الشبزي وايمع ويدتج ماكصرت هم چــملتني وايد من الراتب مالتها مالة الشهيد خطية

جاوبتها فدوة خالة الله يرزقج ويعوضج والله يسعدها ويهنيها عسولة تستاهل ام قلب الطيب

ردت اي ولج هم راح اييب ببسي اوزع بالحفلة وسوينه كيك بالفرن مال بيت ام اسعود

خالة ام فاروق كالتلها يا جا شلچ بي الببسي هسه يصير معارچ عليه جان شريبت بكلاصات خوطي وانطي للوادم

بيبي أيدت رأي ام فاروق وكالت باعتراض چــا ماكتلها عبالج كتلها الحكومة صارلها جم سنة مانعه الببسي والوادم هسه عطشانة علي هسه يصير چــاتل ومچــتول

ظلينا نضحك . خالة كالت لا ابوها حتم حتم اله ييب ببسي جاا اول فرحتنا عسيلة هم نريد نفرح بيها ....
واشترينا ٤ صناديك بيبسي ...

ام فاروق كالت هسه اهل المنطغة يسمعون بيبيسي حتى المامعزوم يجي

ردت خالة جا طبهم طوب الي يجي بليه عزيمة يكعد بليه فراش وانه اعرفن حبايبي لعازمتهم ...

بعدها كمنه نعاونهم واخذت سوزان ع الشط اني والبنات خطية تونست صار هواي محبوسة وظلينا نباوع على الجهال وشلون يسبحون بالشط

وراها اجوي شباب نظفوا الكاع من الحشيش والشوك وسوو كعدة حلوة للفرقة الي راح تجي بالحنة

تغدينا الحمدلله وبعدها الظهر اجت عسيلة تخبل طالعة رغم الحر شوية مسيح المكياج ...

شغلولها المبردة وكعدت كبالها على السرير امها تباوع عليها ومدمعة عيونها وبيبي تمسح دموعها بالشيلة مالتها ...

وامها صاحت على خالو اجه شافها وهم وكف يم الباب يباوع عليها وعيونه دمعت هيه كامت وراحت حضنته بوسها على اديها وراسها وهيه هم تبوس بي وتبجي دموع الفرح امتزجت ويه دموع الحزن ...

بعدها راح خالو ودخلنه اني وسوزان سلمت عليها من شافتني فرحت هواي وصااحت غريييبة العووبة اجييتي ولج ...

كتلها اي شلون مااجيج بهذا اليوم ...

كالت شحدج ماتجين ؟؟؟

باوعت على سوزان وشاورتني منو هاي ولج يديده اول مرة اشوفها ...

سوزان خلت راسها بالمبردة حتى تتهوى لان محترة ...رغم شتا بس بوخه

كتلها بصوت ناصي هايه مرة حماي زوجة فاروق صديق ايهاب

جاوبت بصدمة ولللج حلووة هاي مو تخلين ايهاب يشوفها عليج العباس ... خرب حضي

كرصتها بيدها ولج عيب سكتي لاتسمع وبعدين وبعدين هو ميجي للحنة وين يشوفها مو بيبي تكول فال محلو يجي للحنة ميصير يشوفج قبل العرس ..

عينها على سوزان الي جانت ترفع بشعرها ليفوك
تهوي ركبتها ...

كالت ها اي جا لاتجيبينها بالعرس ولج انه بنات خالاتي كتلهم والله لتصير كدام ايهاب بالعرس اله انزع الكعب لابيض وعلى راسها لا والله حرامات الكعب الابيض عليهن

ضحكت ولج شلون بالله يغمض الرجال مايباوع

كالت بأصرار أي افكس عيونه فكس والله شحده يباوع لغيري

هسه كافي كركة مكياجج سايح شوية
عدلناه الها اني وسوزان

انتظروا الشمس تروح وطلعوها برا بالكاع بمكان الكعدة اول شي مشغلين مسجلة وبعدها التموا الناس وظلوا يجون

وراهم اجو الفرقة مالة الداكوكات نسوان سمرات وعدهن طارات وكعدن عددهم اربعة تقريبا وظلن يغنن ويدكن بالطار صارت وناسة وانطلقنا اني والبنات وحتى سوزان وظلينا نركص ذبينا لحم

شفت عسيلة تأشرلي من بعيد وهي بالكوشة مالتها رحت عليها ها تردين شي ؟

سحبتني وهمست بأذني ولج هاي البقدادية ذبت احم صخام انوب عليه امهات بقداد

ضحكت شتردين منها ؟

كالت كوميني اريد اركص

مديت ايدي سحبتهل كتلها يله كومي .. ظلت تهز بأكتافها لا ما ما عيب استحي

كتلها كيفج اني رايحة اركص هيه سحبتني مرة ثانية
كالت ولج امداج ظلي لحي عليه لحييي امي ماتقبل اركص تكول عيب العروس لازم ثكيلة تصير انت كلما ارفض جريني وجيبي وياج البقدادية ذيج خل اكشخ بيها كدام كرابتي

ضحكت على فطاريتها وصحت لسوزان كومناهه تركص وهيه عود خجلانه وخبلتنا تكعد وتشاورنا وتكول كوموني وامها تخوزر بيها

اخذنا عود سحل هيه وصلت للنص ودفعتنا وذبت لحم بالركص حتى عطوبها وكعت من التسريحة لحد ما امها وخالتها اجو كعدوها وتولوها عيب وعيب

رجعت كعدت وتأشرلي من بعيد تعالي كوميني واني ماخذني الواهس وي سوزان الفرقة هاي تسوي واهس للركص والبنات كلهن منطلقات ..

بعدها صاحت علينا خالة نوزع الببسي ، طلعنا الصناديك من البيت صناديك نايلون ثكيلة كولش اني وسوزان تكابلنا وشلناهم وظلينه نوزع وسوزان تصيح...هااا شنو حتقوئ عضلاتنه حوكع اني وياهم

وزعوا حب شمس بس الكيك احترك بالفرن خطية و الناس فرحوا بالببسي ونسوا الكيك وتعاركوا ع الكسارات مالة الببسي لان جان بطالة كزيز وعليها لوكه متنفتح اله بمكسارة ....

خلصت الحنة سلمت عليهم وبوست عسيلة بقيت هواي حاضنتها راح اشتاقلها كلش هواي ...

اخذتنا ام فاروق ورجعنا للبيت ..

.............
وئام

بالمستشفئ دكتور جلال شفتو من دحكت عليه خليت ودرت وجهي متوتره

تقرب مني كال...وئام شلونج

بلعت ريكي بخوف...هلا هااا انت منين تعرفني

عقد حواجبو...شنو منين اعرفج انتي غير عدنا منظفه جنتي

هاجست مثل الي كبو عليه ماي كتلو...شنووو انت شتحجي اني ايمت صرت منظفه شبيك دكتور توك فايق من البنج لو شنو

خزرني...ما اسمحلج تتجاوزين عليه بكلامج واني ما مكذب انتي اعرفج

جاوبتو بعناد...اي وهساع شتريد

فتح اديه بعدم معرفه...ما اريد شئ بس،حبيت أتأكد هذا المريض زوجج مو

رد بغرور...ليش يخليج تشتغلين منظفه ما يشتغل هو

صكيت علئ اسناني. وانت شعليك والله حلوه هاااي وبعدين احنه هساع تزوجنه ما صار چثير وهو ما يعرف اني اشتغل منظفه وغلطة وغلطتها رجاءا لا تسويلي مشاكل...

تركني وراح من دون ما يرد عليه هاجست اشتعلت نااار ما يصير هيج حياة نعل كل شويه واحد نابص الي ما عندهم غير فلفله...

رحت الغرفة عمر شفتو نايم بهدوء والاجهزة علئ صدرو وجهاز التنفس بخشمو تنهدت شسويت بروحك يا عمر

عليش هيج دمرت نفسك معقوله انبو ضميرو عليه وهيج سوه برحو والله لو اعرف ما خليتو

مسحت دموعي الغزيره وعمتي راحت للبيت كالت راح اخلي محمد عند بيت ابو فريال حتئ ترحين هناك

ضليت ادحك العمر واعاتبو بعيوني انهضمت منو وجرحو لحد هساع ما طاب..

هاجست بيد علئ كتفي فزيت مرعوبه ودرت وجهي بسرعه وقويه عليها...عليا

ابتسمت بحزن وباستني...اي عليا شلونه عمر ما صار زين ما كعد والله امي خابرتني واجيت مثل المخبله عليه

جريت نفس حزين...لا والله لهساع ما كعد ولا يحرك ايد ولا رجل

مسحت دموعها كالت...هاي نفس حالته قبل من غدرت بيه سهيمه

كضبت ايدها بتوسل...فدوه عليا احجيلي عمر شبي عليش هيج اعصابو تالفه

تنهدت شافت زوجها اجه من بعيد كالت.. اسكتي بعدين اسولفلج هسه مو وكته ابد

سكتت استسلمت للامر الواقع من شفت زوج عليا الثاني خفت هاجس عمر راح يكعد حتئ وهو مريض وعلئ فراش المرض اخاف منو والله واهابو

سلم عليه واني درت وجهي من دون ما ادحك الوجهو وجاوبتو...هله خويه هله

استغرب ردة فعلي وابتعد عني شويه واجت امو لعمر ضلت تسولف هي وبنتها بعدها كالت الها اذا تردون ترحون اخذو وياكم وئام لبيت عمها لان ابنها مناك وهناك جدج موجود كالو بالطريق علئ جيه

هزت ايدها...هسه اني ميته عليه يله وئام امشي امشي خلينه نروح نشوف شصاير ببيت عمج

ام عمر...لا مو اليوم جايين شيوخ الغربيه تا يخطبون فريال لذيب

فتحت عيوني مصدومه...شنو ذياب لفريال بس الي اعرفو ذياب ما يحب فريال

عليا...ههههههه ماكو حب بقانون جدج

خلينه ورحنه كعدت ليوره بتوتر وافرك باديه حييل وجود عليا وزوجها يوترني اهاجس اكو حلقة وصل بينهم تدور علئ عمر...

الطريق صار شطوله ماكو هيج حتئ لعبت نفسي وانقرفت ...

المهم وصلت للبيت لكيت البيت صاير ضجه والشيوخ متواجده وكالو ذياب موجود ...

جنت بحاجة لاخويه تمنيت احضنو اشكيلو وابجي علئ،صدرو هم هو وهم فاروق

خطيه فاروق جاي عليه من تزوجت بس جنت بالفندق ما شافني واني شكد مشتاقه اله

حضنت ابني حبيبي وبستو محد من البنات سالني عن عمر لا فريال ولا امها بس جدتي ...

فريال علئ اخر حبايه مسويه شعرها لورات ولابسه فستان طويل وبسيط بس حلو وحاطه مكياج فاتح وفاتحه شعرها الاسود...

بس تمشي متوتره وبعدها حجت ويه اخوها وابتسمت كالت لاختها...اذا اجه ذياب صعدي لغرفتي مفهوم او اكلج جيبي لغرفة جدتي

دخل ذياب و وفاء حجت وياه شفتو من بعيد جنت تعبانه ورجلي خدرت لان جنت مخليه محمد علئ رجلي وهو نام

صعد بايات الدرج وراح فوك بس ما عرفت وين رايح كلت احتمال يريد يلتقي بفريال قبل لا يخطبها الله اعلم بعد

نهاية البارت...يتبع

كونوا انتم كونوا بخير...احبكم 💔

نور سمو العراق 😘

لاتنسوا التصويت و المشاركه بكم نكتمل 😍