رواية سلام قلبي الفصل الخمسون 50 - بقلم غير معروف

تقات:اخر مرة شفته قبل شهرين عيوني تدورة بكل زوايا البيت الصبح التهي بالجهال وشغل البيت لان سكينه حامل خالتي سعاد تساعد بالتكدر عليه وامي هالايام الله هاديهة هي تلزمهم واني اشتغل ما عندي مجال افكر بس بالليل من احط راسي على المخدة احن لحضنه سوالفه غيرته اطلع صورة اغفى على ملامح وجهة اغسل مواعين العشه والافكار تتراطم براسي سمعت صوت الباب يندك حيل الولد نايمين الباب انفتحت من السركي الجوة متت خوف اسمع صوت خطوات على الدرج التفت عادل وامين نزلوا فتحوا الباب طب جاسر وفهد لازمين علي منا ومنا ضليت الطم دشداشه جاسر كلهة دم وفهد البدله مصبوغه احمر ويغلط على علي لان جسمه جثيث ويسحلون بي سحل

امين: اشششششش صوتج ميطلع فوتي صعدي الجهال بالغرفه الفوك وحضري الفراش بسرعه اطببه يسبح حتى ينام

تقات: رحت ركض طلعت غراضهم اجت ذكريات ويايه رتبنه المكان اريد استوعب شنو صار

ذكريات: لا تخافين فهد يكول ما بي شي

تقات: طلعوا من الحمام بس بجامه خاصرته كلهة مشخطه وحرك بيهة يمشي وحدة مو مثل اول ما اجه

فهد: لك شبيك اذا مو كدها شكو رايح

علي: عمر تطشر جان يتعشى ويايه كلهم جانوا يمي ياكلون شلون راح شلون الله المن خلقنه حتى يعذبنه ليش يريد يختبرنا رفعت راسي يلا فشلت اني كافر اخذني ذبني بجهنم قابل

فهد: انت شتخربط هذا كفر كلمن حد يومه

علي: دقيقه طلعت بس ادخن جكارة ارجع الكاهم طشار محد احتار مثل حيرتي بوقتهة ما اعرف هذا العضام والشعر المن كلهة طشار راحوا كلهم هسة لو الكتلهم رجال يواجه ما احترك اجرب يوصل لجتف ازغر زلمه بيهم

فهد: يلا تعال نام

علي: ما اريد وخر عني

تقات: يدفع بيهم ويتعارك يفتر بالبيت يلوب ما كعد كلنه يمه حالته تخوف

فهد: امشي روح نام حتى باجر نطلع للتشيع

علي: شتشيع مينعرف هاللحم المن الهذا لو لذاك شتشيع رماد صفوا ربعك فهد ما بقه شي عمر فرحان اجاه ولد على اربع بنات اجة السند حتى ما شاله بحضنه ما كبر بأذنه

تقات: يبجي ونبجي وياه مندري شنسوي

ايوب: كول يا الله علي شبيك

علي: المن ماتوا بس كولي المن حتى الحرامي يعيش وين الوطن حتى يكولون للوطن ما شفنه منه شي بس موت صارت كاعه مثل الحوت بس تبلع بهالشباب وتيتم جهالهم

ذكريات: روحوا جيبوا مهدء صخام راح يموت لو يضل هيج

فهد:لا معليج هسة نطلع للتشيع ويرجع ينام

ذكريات: انت شبيك متشوفه راح يموت هذا هم ايمان وتريد تموته

فهد: اششش معليج لا اجي اشك حلكج

تقات: طلعوا الفجر رجعوا الولد فهد وعلي ماكو كالوا التحقوا تحرير المنطقه الصار بيهة الانفجار واجتهم اخباريه ماخذين الضابط اسير يمهم وهو نفسه عمر صديق علي طلع عايش ذكريات بس تبجي لان فهد غلق جهازة وعلي اصلا مياخذ وياه موبايل ضلينه اسبوعين عايشين برعب نخاف من دكه الباب والموبايل متنه ابو فهد دوم مسافر واصلا ميدري شيصير لان شغله برة بس امة تلطم حالهة حالنا

ذكريات: اني اعلمك يا فهد اريد اشوف منو يبقالك بس ارجع اخليك تتوسل وما ارجع اكنس الطرامه وافرفح وتقات تلم ورق الحديقه وصلنه قريب يم الباب هلكنه ضهريه شمس خدودنه جمرت

تقات:هسة خل يرجع والله كريم موتي ذبحي صدوك شخبار شمس

ذكريات: تعاركوا هي وجاسر لان امه كالت ازوجه لمت هدومهة وراحت ومناك تروح للمدرسه ابوهة ماخذلهة سيارة تروح وتجي بيهة

تقات: اني موضفه واستحي اكول لامين اريد اشتري سيارة خرب خل يجي الا اشتري

ذكريات: هههه على شنو تستحين عمي شوفي الناس وين وصلوا اني احتمال اسوق الهمر اليطلع بي فهد

تقات: ايباااه شوف منو يحجي خل يخزرج واريد اشوفج واكفه على رجلج

ذكريات: اشو العندج مثل العندي بربج كم يوم متسمعين اذا حصلتي راشدي ابو الطكه

تقات:احنه متطورين راشدي شنو بس يضوج يخنكني حتى اذا يصير رومانسي البوسة بيهة خنكه هههههه

ذكريات: هههههههه يسويلج كلادة حتى متحيرين شتلبسين

تقات: ههههههه شر البليه ما يضحك اشتغلي بسرعه حتى خشمي وجعني من الحر اندكت الباب رحت افتحهةاضحك على حجيهة فتحتهة علي صار بوجهي عكدة حواجبه وخزرته جفلتني

علي: نسمع اني وفهد ونضحك وعمر بصفنه مورم وجهة يضحك ولازمني يكولي خل تخر سوالفك كلهة يلا اهدك

فهد: بالنبي راح ارجعك وهالمرة ادزك لابو بكر البغدادي اخلي يتونس بيك

عمر: اي مو اني كح....ة حتى يتونس اول مرة اسمع ضابط يدزوا دلفري

علي: اكولك ليش متسكت ترى رتبته اعلى منك يشكك ويدزك وين ميريد وانت ساكت

عمر: سكتنه افتح الباب وخلصني

علي: دكيت الباب اجت فتحتهة صفنت بوجهي وخافت سوي طريق خل يفوت الولد شلون خدود بويه بيضه ولايحتهة الشمس اوووف صبررر احجي بداخلي صافن عليهة

تقات: احم اي هسة شكد اشتاقيتله واريد احضنه طبيت بسرعه اني وذكريات

ذكريات: ما شفتي فهد ما طب وياه

تقات: لا كلشي مشفت بس هو ويخزر

ذكريات: صخام بوجهي ليش ما اجه بس لا بي شي

تقات: شبيهة الراح تخلي يتوسل اسكتي خل اسمع لزكت وجهي يم الباب اسمع شيحجون انفتحت صار وجهي بصدر علي طب بسرعه وراة فهد وسدوا الباب

علي: شعدجن يم الباب تتهامسن والولد واكف متستحن

ذكريات:عفته يحجي ركضت لفهد حضنته سحبني لضلوعه يضحك

فهد:مجلوبه اشتاقيتلج

ذكريات:اني اكثر حبيبي امشي ارتاح شعندك واكف

فهد:علي ابقه يم عمر وافرشله لان امين كال يبات يمي اني رايح انام شلت ذكريات وصعدت للغرفه

ذكريات: متسلم على امك وخاله سعاد

فهد: هسة اوصلج للغرفه حتى انزل اسلم واشوف ضرغام اني هنام كلبي يطكطك عليه اريد اكل خدودة اوووف جنت بس اشتاقلج وميت صرتوا اثنين والله اشبع قهر هناك

ذكريات: نزلني انقهرت عليه نزل بسرعه دقايق وصعدلي كبل للجربايه متعودة عليه اول يوم ملهوف شيسوي لازم اسكت حتى لو اذاني لان تعبان وطالعه روحة وراهة اطلعهن وازعل واتدلل عليه لان هو بس يبتعد ينام على وجهة من التعب ميباوع لوجهي ومينطيني مجال احجي بس هالمرة من ابتعد جر جكارة رفعلي حاجبه اشرلي بعيونه

فهد:تعاي كعدي هنا

ذكريات: رحت كعدت كباله

فهد: شوفي الحجي الراح احجي محد يعرف بي بس امين واني وايمان وهسة انتي اذا حجايه طلعت منج او من غيرج راح تتحاسبين انتي لان هواي تحملتج حتى ما احجي ويطلع الحجي واشك بيج بس انتي رايدة هيج طبج مرض ايمان من ضربتهة جانت زعلانه اول ما اجت لبيتنه كتلهة ايمان عندج طفل ازعلي وابقي يمي شكد متحبين احطج على راسي بس طلاك لا تفكرين بي تخسرين كالت لا ما اريدة خلي يطلكني جاسر وابويه رادوا يرجعوهة بنفس اليوم اني صفيت وياهة على يابو كرامتهة وخطيه وهالوحدة وبقت اجو شيوخ ويه رجلهة وعيالهة راد يرجعهة وما قبلت وكفت بوجهم  وحدي صاف وياهة لان حق وهو ماذيها ردت اسويله كرصت اذن حتى ميعيدها اروح للشغل ورة شهر ارجع فجاءة الكاهة بحضنه ووين بغرفتي زين ما ذبحتهة وانتي لازمتلي ايمان وايمان لج المفروض اذبحهة هي متتحمل وتريدة شكو باقيه بالله لو حبلت وهي يمنه شلون صار مو خوش و عناد ويايه كال مو ابني اني شسوي من ذاك اليوم اني لساني مطاخ لسانهة ولا اريد اشوفها اصلا فلا تجيبيلي سيرتهة بعد اكرهج وياهة واما علي ليش ما انطي مهدء وما اخلي ينام لان بالتشيع تتغير نفسيته يجون شيوخ ورجال دين يشجعونه والشباب يطلعوهم بزفه ويجون اهلة يحتاجون نصبرهم اني مار بهيج شي واعرف شلون اطلعه من حالته وهسة يلا طفي الضوة اريد انام يومين ما نايم

ذكريات: حضنته بدون اي كلمه ساكته حطيت ايدي بشعرة منا من غفه ردت اعوفه فز لزمني قيدني بحضنه ما خلاني انزل

تقات: ذكريات وفهد صعدوا اني وعلي واكفين واحد صافن على الخ نزل فهد بوس امه والبقيه ضل يعظ بخدود ابنه وصعد بسرعه علي جله صوته قبل الحجي

علي: احم احم بس اريد فراش نضيف لان هذا مجروح ولازم جديد حتى لا يلتهب الجرح

تقات: اي هسة اجيب فوك بغرفتي اكو بس فوك الكنتور خل اشوف حسنين وين ينزلهن

علي: اني انزلهن

تقات: صعدنه اني وياه مرينه من غرفه ذكريات سمعنه صوتهم بالغرفه اني فتحت عيوني مصدومه شلون يعلون صوتهم ذولة ونين واهات مشيت بسرعه للغرفه جسمي رجف من الفشله هو نزل الفراش بسرعه ونزل

عمر: شكو جاي يمي متولي يم مرتك هيييي يبه وين صافن

علي: اصلا ولايمه لشوكت هيج تضل حالتي اريدها اني ارعن واعترف بهذا الشي بس ذلتني شكد توسلت خليت راسي على المخدة غفيت الف حلم شفت استغفرت ربي كمت توضيت وصليت بالليل اجه امين والولد كالوا نروح لبغداد نودي عمر لاهلة لان هو بس اتصل ما كدر يروح وضعيته تعبانة كلش هسة صار احسن

تقات:يحجون وصديقهم بالبيت كلش مأمنين بي رغم فرحتهم بس كل شوية يصفنون يتحسرون ويترحمون للماتوا امي وخاله سعاد كالوا نزور وذكريات هم سكينه كالت من زمان ما رايحين اقترحوا نروح بكوستر كيفنه بس لازم ب5 نطلع منا مو خوش سالفه هسة ب1 شوكت انام شوكت نكعد طشوا كلمن بمكان علي نام على القنفه وكال حضري ملابسي القهرني ما شاف جهالة ولا سال عليهم ضجت كلش بس ما بينتله حسيت ساعه 3 شفته يم فراشهم يبوس بيهم ويشمهم ونزل كعدنه لبسنه كلنه لل6 يلا مشت السيارة العائلة كلهة اجت بحيث ولا كرسي فارغ كعدت يمي ذكريات وعلي وفهد بصفنه والباقين كلمن يم مرته بس خالة سعاد وعمت سكينه وحدهم وعمر كاعد بالصدر يم السايق هو وحسنين الطريق كله سوالف وضحك والكبار كضوهة زيارات وقران وضلوا يحجون وليش ايوب نصيحله امين هي السالفه جدي سجل كلشي باسمه وينطي فلوس وسافر اربع سنين رجع لكاهن نفسهن كلشي ما متغير كاله انت من اليوم اسمك امين وصلنه لبغداد زرنه ودعوا عمر ورجعنه ما كدرنه نروح للنجف وكربلاء لان سكينه تعبت وكلنه حسينه بيهة شي خصوصا هي اشهرها الاولى

سكينه: حبيبي روحوا انتوا وارجع ويه اخوية

ايوب: لا شدعوة امشي نرجع من تكومين بسلامه اجيبهم يزورون

علي: جريت فهد من ياخته اكعد يم مرتك وخلي تعوف مرتي اريد اكعد يمهة

فهد: حسنين نزل راح يبقه هنا لان عندة سفر ولازم من مطار بغداد يطلعون مال منحة مدري شنو وعمر هم راح اكعد بالصدر واسحبلك واحد ويايه وافهم ذكريات تعوف سراكم فارغ بس انت وياهة

علي: صدوك رجعنه للسيارة فهد جر عماد وصعدوا بالصدر على ابو انت الشيخ وبالصدر ذكريات اخذت الجهال انطتهم لشمس ولامي اني لزكت بصفهة هي باوعتلي ودارت وجهة الشباك جريت ايدهة عصرتهة حيل الطريق كله لازمهة طبينه للبصرة كلهم ناموا بس السايق ومطفي الاضوية لان عبرنه كل السيطرات حاوطت جسمهة بيدي نفسهة تغير

تقات: همست باذنه شبيك ترة احنه بالشارع

علي: منو يشوفنه ضلمه وكلهم نايمين وبعدين لا تقربين حلكج لاذني وانفاسج الحارة كلهة بركبتي لان راح اغتصبج

تقات: هااا

علي: خمطت شفايفهة سحبت جسمهة عليه ونزلت شويه احنه بالنهايه مننشاف هي ساعه ترفس بيدي وساعه تذوب وصلت لبيتي الجنت اخذهة بي صحت نزلنه هنا

ايوب: شنو وين نازل

علي: احنه بالاخير يرفعون الكراسي يلا ننزل امه محمد كلهة تنزل يلا  من نزلوا كلهم جريت ايدهة بسرعه نزلتهة مأمن الحجيه بالبيت تنضفه لان اسبوعين انطوني اجازة وكلتلهة روحي نضفي

ايوب:هسة غير يحجي وين مولي

علي: شلت تقات يلا باي ديروا بالكم على جهالي باجر اجي اخذهم

ايوب: لك اهبل وين رايح

علي: دكيت الجرس سمعت خطوات الحجيه فتحتهة تضحك

الحجيه: هلا يمه ها رضت مريتك

علي: اي خالة الغرفه جاهزة مو

الحجيه: كلشي جاهز يلا اني اخذ عباتي واروح راح يجي الحجي عليه

علي: بامان الله يمه طببت تقات للغرفه ورجعت انطيتهة فلوس و انتضرت رجلهة اجه يلا طبيت لكيت تقات بعدهة كاعدة  جفتت عليهة نزعتهة بسرعه ذايبه بحضني وتتجاوب ويايه صوتهة ونتهة كلشي متغير حسيتهة كبرانه وواعيه خبلتني بحركاتهة

ايوب: والله مو صاحي

عماد: لا والله عاقل خلي يدللهة هواي تاذوا ثنينهم

مناجات: جا الا تتاذة المرة يلا يدللهة رجلهة

عماد: افا عليج يسمعوج لبالهم ما مدللج بس هم حكج عليه الفترة الفاتت هاملج انه تدللين نهايه الاسبوع اخطفج لتركيا

ايوب: ها شيخنه شو كاعد تزحف لاختي

عماد: عاد انت لازك باختي وساكت وهذا ابن عمك لباله تمشي عليه شيخ اكعد بالصدر ماشيته وما خجلته لخاطر الرتب الي على جتوفه

فهد: هههههههه ولكم احس روحي بمسلسل بدوي رحمه لله انت ومرتك يالشيخ لا تحجون

ذكريات: شبيك مو جنت تتعارك بدايه عرسنه الا احجي مثلك

فهد: خايبه دحكي كدام ولا تفتحين بوزج

ذكريات: هههههه عفيه

ايوب: اشوفهم يضحكون احس حياتي كامله كلش يمكن خسرت حبي وندمان وعضيت اصابعي ندم لان نور تنخسر ما تخسر جانت بلسم بحياتي رغم سكينه تحبني اكثر صح اني ما اعرف شنو بداخلهة بس الرجال يحس من النضرات وبالفراش وهواي مواقف بس ما عوضتني حنيه واهتمام نور الله يحفظهة ويسعدهة صح اتحسر عليهة بس اتمنالهة كل خير

شمس: اباوع لجاسر باشتياق رغم تركته من امه بدت تخطبله حقهة وحقه بس ما بيدي شي ومستحيل اتقبل يتزوج عليه اغار عليه مو بيدي اهتميت بدراستي نجحت من الثالث والرابع والخامس وزعلت يم اهلي بابا اشترالي سيارة عشت حياة هادئة لحد واحد محرم من 2019 جنت رايحة لمدرس الكيمياء احضر للسادس جنت اصف السيارة اريد انزل تفاجاءت بثنين ضخام دفعوني داخل السيارة حطو وصله بخشمي ما حسيت الا ورة مدة ما ادري شكد شادين عيوني صوت بنيه عرفتهة اخت عامر تحجي مدري ويامن يردون اهلي يتنازلون ويسحبون قضيه مال اطلاق نار على بيت عمي لمن شردت وهو اجه ضرب بقيت يمهم 30 يوم وهم خدروني وانشمرت بمنطقه على اطراف بغداد بوقتهة صحيت مثل المخبله احس اشوف الدنيا لاول مرة عامر ما اعرف عنه اي شي غير هو مسافر خارج القطر عندة مليارات بحسابه امه وابو حاليا بالسجن سويت عمليه لعيوني تبديل عدسة وحتى غيرت لونهن لرصاصي لان من ضربني بيوم العرس ما اشوف بيهن زين ضاعت عليه هاي السنه صح داخلة بس لسه ما امتحنت واحس ما محضرة عدل لان من رجعوني عفت الخصوصي تعرفت على زوجت عامر الثانيه التزوجهة ورايه بنيه هم حلوة وطبب عليهة اربع شباب ورفعت عليه قضيه والضباط الجان متابع قضيتي تابع قضيتهه وضل يمشي بالقضيه بنفسه لمن شافنه مضلومين وهسة هي مخطوبه واني وياهة نفس الصف بس بغير شعبه هي ادعولي الله يسهل عليه بالامتحانات وانجح واطلع معدل هذا جزء من حياتي وضلم عامر ولو احجي كلشي مراح تصدكوني اكيد

نور: شهرين واسبوعين مرن ايوب كل يوم يتصل بامين ويفتح كامرة امين تعلق بي يضل يسولفون ويضحكون فرق التوقيت جان يضوج تالي اتفقوا على ساعه معينه ومرات امين يتصل ايوب نايم بس يجاوبة بدون ملل حياتي استقرت وياه كلش لحد ما اجينه للعراق زيارة امين يشوف ابو ونشوف اهلنه من وصلنه لبغداد كال عيب ندز امين فارغ لازم نشتري شي مرينه لمول المنصور نشوف اي شي طبينه لمحل رجالي سلام تصنم وبنيه مبينه حامل هي وزوجهة هم صفنت طفل اجه يركض من بعيد كلتله ماما لا توكع ابو صاح سلام دير بالك اني كلت اكيد اكو شي ممعقولة كله صدفه بعدين عرفت السالفه

سلام: طبينه للمول حاضن نور وامشي وياهة فجاءة صارت بوجهي اغاريد اول حب بحياتي اول غدر اول دمعه اول جكارة رجعتني لسلام الضعيف وياهة شخص ما تخيلت ابد ترتبط بي نفس الضابط الرادهة وسجني ما معقولة هي صفنت وراهة لزمت ايدة حيل وصارت وراة صدمني من صاح اسمه مسميتة على اسمي هو شال ابنه وطلع كبل هي صاحت عباس وين عايفني رجع ركض حضنهة وراح حاضنهة ويمشون ورة فترة عرفت من صديقي الماخذ بنت عمهة هو مسمي سلام كايللهم هو عرفنه هو خاطبهة اربع مرات يلا قابله بي والله كويه ههههه اخذت امين لابو فرحان عفنا اسبوع خابر يكولي ها نسيتوني كتله اني بالباب افتح وصدوك جنت رايحله نور تضحك تكولي هذا ضرتي شدعوة هيج متعلق بي

2019/1/6

عيد الجيش

فهد: جنت طالع واجب 30 يوم ما شايف اهلي وصلني فيديو من ذكريات فتحته واكفه يم سيارتي الباب مفتوحة مبين واحد بالسيارة يصور لابسه ملابسي العسكريه لونهن اسود القديمات وبسطالي والبيريه منزلة شعرهة الذهبي نازل جوة خصرهة لازمه ضرغام بصفهة واغنيه كيكي مشتغله هي تركص وضرغام وياهة يهز اني شفتهة ابو ابويه اشتعل

ذكريات: كل عام وانت بخير حبيبي انشاء الله ربي يحميكم ويخليكم سور للوطن لواء فهد ما ناوي ترجع راح نصير 3

فهد: سمعت حجيهة وشلون تحرك ايديهة على بطنهة طرت جعل محد سوة كيكي بس هالعيون هو ياهو الاجه وسوة كيكي نزلت بامر طارئ وصلت ب3 بالليل ونمت بحضنهة

لهنا وانتهت قصتنه انشاء الله كدرت اوصللكم حياة كل شخص انذكر اسمه شمس كلشي صار وياهة حقيقي ما عدا زواجهة من جاسر اما الباقي كله حقيقي شمس بالحقيقه لسه عذراء اخر مكيدة من عامر واهلة هي خطفهة وكص شعرهة اليعجبني بهالبنيه مهما وكعهة ترجع توكف وتضحك هي ويايه بنفس الصف اليشوف ضحكتهة ميكول عدهة ضيم وشايفه كل هذا اما البقيه ايوب عايش بندم ضياع نور وسلام استقر وياهة وصار عدهم جود

ذكريات العزوف 💔💔
نجاة محمد