رواية سلطان زمانه الفصل الرابع والعشرون 24 - بقلم زهراء العراقيه

من كتابات زهراء العراقية
رديت عليها بثقة
" ادري !!
الي مثل ابوج ياكل حرام ما يتوب ولا يندم ....وسلطان  اخذ حقة  منه مو برضاه
حوراء فتحت عباتها ..ورفعت عن ثوبها ضاهرة الي ساقها مزرق كأنها مضروبة او مريضة
"وهاي الاثار الي بجسمي من منو ؟؟
اتنرفزت من الفكرة الي اجت ببالي
"لا هم تبليها براس رجلي ....روحي ذبي بلاك بعيد عني رجائا ..
" سلطان الي ذب بلاه عليه ...حتى يرجع افلوسه مثل ما يكول... دمرني ودمر مستقبلي ..من طالبة جامعية الى سجينة تحت رحمه عايد حسرة عليه اتنفس ...
حسيت بحركه ببطني ..كأنه الطفل  دا يتحرك داخل بطني ...
مسحتها بخفة
انتبهت  لحوراء عينها على بطني وتزفر نفسها بغل ..
ضميتها بأثنين ادية
" هسه اشرايده مني ترة مهما كلتي مراح اصدوك شي ...

" هذا الشي يعود الج ....
عيوني انتي  حسب قناعتج   بابا ما انطى فلس لسلطان ...اخذ افلوسنا منا بالتهديد ..  كان بابا عنده مشروع كبير وصاحب املاك
"غير كلها من ورث زوجي
قاطعتني معصبة
" لا كوله جذب سلطان ضيع افلوسه  .. هذا ورث بابا من جدي ... سلطان فوك ما بابا رباه وخلاه ببيته  باوع لأختي واعتدى عليها .....وبابا طرده وحقد علينا وباكنه وانسجن وبابا لأن طيب تنازل    . بعدها بكل حقارة استغل وضع اختي وسوء اخلاقها  وصورها مع صديقه وهدد بابا ...
صحت اش كافي ..كنت ارتعد من العصبية كلامها عن سلطان بهاي الطريقه وطلعته شيطان نرفزني وعصبني ثرت
"اطلعي برة ...برة ولي منا ...
"ما اصدكين موو
"برة ....ولي كله كذب
" والله اني بسبب عمله اختي  اندفنت واني عايشه ...
صحت
" لا تتبلين على سلطان اختج عار لا اذبين عارها على احد
بكت وردت بحرقة
"هي كانت متانية دورت سنة زوجها المات ادور وتزوج ابن الكلب الي اتحبه
"اهااا شنو من فسوق عدها اطلعي برة ما عايزة اني
ادراما ....
" والله سلطان هدد ابوي بالتصاوير  والافلام وخلاه بس يريد يستر علينا واحنه اهله قفل الا ياخذ الاول والتالي ..
من حلفت حسيت بتقلصات قوية  .
"ااه
انسندت على القنفه  ردت اكوم
حوراء
" الو ...
مو صلاح اني حوراء ...بگت جهازة وشردت مرة لخ اني ببيتك ...
اس لا تصرخ
شوف سلطان اني يم مرتك وسولفت الها شنو سويت
مثل ما دمرتنا وخليتنا نشتت دمرتك يا ظالم
اني احتميت بيك بعد كلشي سويته و انت شنو سويت شمرتني على خالتي للعصر اجه عايد شبعني كتل ماكو فايده حياتي انعدمت
طبعا كانت تصرخ لان هو اضاهر يصرخ ما يسمعها
ضلت اتصيح الو الو الو ...
واني اوجاعي ازدادت
كانت تبكي فوق راسي
صحت
" اطلعي برة ولي منا ...ما صدكت ولا حرف
غاده غاده

اجتني غاده
"ها خاله
اشبيج
' خا بري خالج
اااه اااخ ولج وجع مدا اتحمل    ااااخ
بطني
اخذت فوني ودكت على خالها .... واني اعصر بأيدي ...
واصيح على حوراء تطلع من البيت ..  
اتقربت يمي
" بعدج ما مصدكه .... والله سلطان هيج سوة ...
جريت ايدها من حركت كلبي ووجعي حسيت نفسي حولد واني مو بشهري
عضيت كفها بأسناني
خليتها اجر ايدها صارخه 
ضليت الوج من الوجع ....مكدر اكوم احس ضهري راح ينقسم  ....
اعصر واعصابي تلفت من الوجع ..ساعه اعض اصبعي وساعه اضرب على يدة القنفه وغادة اسمعها تخابر امها ...
"خاله لا تبجين امي بالطريق
اني انهاريت مو من الوجع لا ابد بس الخوف سيطر عليه كلت ابني راح مراح احطه بحضني واشمه

ربع ساعه احسها ساعات مرت عليه ودخلت سلطانه
"اشبيج ...ولج بعدج مو بشهرج ...
باوعت لثوبي كله مايات ..
'عزة العزاني بعدج ولج ما صارلج اسبوع بالثامن
مو زين الولاده
كنت اعصر بنفسي
"لا تتقلصين اتخنكين ابنج ..اخذي نفس بهوادة ...
ارفعي نفسج عن بنطج لا تتقلصين ..
"اتصلتي بخالج
"اي اي
كال جاي
" يا الله
انتبهت من عدلت كعدتي مرة عجوز  دخلت للبيت
"ها يمه خردتي لابو التكسي
" اي ...
اجت يمي هاي نفسها ام سلطان ..
ولج ليش واكفه هيج فوق راسها ... كوميها

كومني
طرحني ...
"لو تمشي يمه احسن
"لا يمه  خاف يوكع الطفل  علينا اهنا....
"اني اعض بأيدي واصرخ جابن الي عبايه لفني بيها
والحجية فوك راسي تقرة سورة ياسين 

سلطانه "وينك سلطان مرتك ولاده
خلصت مكالمه
صاحت "لج غاده شنو اشتغلت رهف ؟
شسوت ليش اجتها ولاده مبكرة
"ما ادري يمه عمتي حوراء اجت فجأةو مدري شنو حجن خلت خالتي تبجي واتصيح وطلعت من البيت
"الله لا ينطيهم صحه وعافيه ذوله شنو يردون منه
   يعني ما كفاهم
ام سلطان"مو وكته هسه يمة لا تتقلصين ضلي مددة لا تخافين يمه اهدي عادي ترة هذا رجلج شقواته رجال شضخمه ...ومن ولدته اسبيعي
لا تخافين يا يمة بيها خير ولادته  هذا يومه الي يطلع بيه على الدنيا مثل امامنا الحسين عليه السلام اجه قبل موعد ولادته يا يمة لا تبجين
هدأت اشوية خوفي قل
"هسة يجي ويلعب بيج لعب ...
دخل سلطان ...
"هاا رهف ...
امه " كوميها سلطانه
كومني بس اني مكدر امشي احس شي يريد يطلع مني غير وجع ضهري
"ما ما اكدر
"وخرن
صاح بيهن وشالني
واني وابجي
"نزلني سلطان اني وسخه نزلني
كنت ابكي و خرمشت صدره من الوجع
طلعني للحديقه وصاح
"اش احبج وانت وصخه
حطني بالسيارة وسلطانه كعدت يمي ..ضلت امه واكفه حايره وين تصعد
"يمه شنو متنايه اصعدي يم ابنج
كعدت اني ما منتبها الهم بس اتألم واكتم بصرخاتي
"يمه سوق عدل راح اتموتنا ..  رجعت السيارة للخلف حيل واني صرخت ...اجه يدعمنا ..
سلطانه "يمعود وصلنا سالمين .. 
امه  دارت وجهه عليه وكالت
"يمية صيحي يا مسهل سهل امري وخفف آلمي

صرت اردد بيها
سلطان" شنو هاي مو وكتها ...ليش هسة
سلطانه"اني ادري ياربي كون اجيب بالسلامه
بكيت وخفت
"يا يمه اشبيكم والله اني جبت سلطان اسبيعي
وضليت ابجي من طلكت ..لانه طلع من بطني اشكبرة حطيته بحظني  وشهكت  ..
وكذلته اشطولها  اوليدي ...كانت اتباوع اله ...
وهو احسه يمسح بعيونه ...وسرع السيارة ...
وصلنا للمستشفى... نزلوني وهذا سلطان معصب وبس يصيح على الناس
صارت كدامنا مرة من ردت ادخل
سلطان خرعها بصياحه
"دمشي اختي
خلاها تمشي على السريع  ..
راح للأستعلامات  وهم بس يكلمهم بصياح  ..اجه يسوي عركه .. المشفى اهلي .. اخذوني للفحص ..
بالسونار و كالت الطبيبة لازم ابرة تكملة رئة متت خوف
"يعني شنو
سلطانه " عاديه حبي اش  ..
ضربوني الابرة و اني شو بردت ... لبسوني ثوب للولادة عندي ولادة مبكرة والطفل نبضة زين لكن ماية الراس نافذة وهو نازل ومتهيئ للخروج ..
نص ساعه ورجع الالم عليه ..صرت اااصرخ واعض بطرف شال سلطانه
وخرته عني من انتبهت الها
"اشمالج هاج الشال البارحه غسلته
اوف ياربي هاي فاهمتني صح
ام سلطان من اتحط ايدها على بنطي وتقرة احسها اتبردني واهدأ ولا ودي اشيلها ... 
من كلش صرت ضربوني ابرة وخذوني للصالة مال الولادة ......
اشوية  افتر   واشوية اتوجع والطبيبه والممرضه يكولن طلع طلع سهلت وفعلا بأول خمس دقائق
صحت ....حسيت روحي دتطلع من جسمي وبردت حيل ..... احسهن جرن شي وطلعنه ...اريدافتح عيني مكدر ...النوم سيطر عليه ...
اسمع صوته رج الصاله رج ...بس اني ما بيه ارفع راسي اشوفه ....
الطبيبة   ضلت تشتغل بيه والممرضه راحت واني افتح واغمض واحس ضهري من الوجع خدر ...
عافتني الطبيبه وصاحت للمرضه تجي تغير الي من الغيار الي حاطته سلطانه الي . غيرت .. وابني ما اشوفه  يمنا ... !!!
ريقي ناشف و راسي يفتر ...صارعت الا طلعت الجمله من حلگي الناشف
" وين بتي ...؟؟؟؟؟؟
"ذيج بتج دا يغسلون الها طلعت وسخه هههه
مديت عنقي شفت الدكتورة ووحده وياها وكفات والممرضة اتناوش الدكتورة معطر
واخذوة الها لفاف و تلبيسة ..
لفوه وجابوه الي جلست على كرسي وحطوها بحضني
الطبيبة"وهاي بتج المستعجلة بصحة جيدة
ابتسمت بوجهي وعدلتها بحصني
ابتسمت رغم الالم والبهوت الي اني ، قبل اشوية كانت ما فارقه وياي وبس اريد ارتاح من الالم عسى ما اموت .هسة صرت اتمنى الدنيا تمني حتى اشبع نظري بشوفتها .. كانت قطعه حمرة بيضه مورمة
؛مبرطمه ومغمضه واتحرك براسها ...
دموعي صبن
'هاي بنتي  يروحي يا ماما ..
حلمت بيج من كان عمري 20 سنه تمنيت من ذاك العمر اصير ام وبيدي طفلي اغنيله ..أتأخرتي يروحي بس جيتج طيبت خاطري وبعد ما اريد شي من الدنيا احس نفسي امتلكت اعظم شي واخيرا حصلت رزقي .... من شهر السادس اني صار الي علم راح انت تجيني يروحي ضميت على ابوج جيتج وحتفظت بفرحتي لنفسي وخليته يصيح بأم ملك اجت وام ملك راحت ..
طلعت لبرة اخذتني الممرضة بردهة خاصه بيه ...نمت
وكالت راح اصيح لأهلك ...
غمضت اعيوني مرتاحه ..جابوا الي حليب حار ..  كعدت ...اشربه روحي احسها فارغه ....
دا اشرب  . ودخلوا عليه ...
ابتسم " وين بتي
حمدلله على سلامتج  بالاول هههههههه
هزيت راسي ..
سلطانه بوستني
"عليج الله ارفعي اديج وادعيلي الله يشفيني من هاي الامراض
يكولون دعوة النفسه مستجابه
ابتسمت
ام سلطان
مسحت على راسي
" حمدلله على سلامتج يمة
و تتربى بعزكم
انتبهت لسلطان واكف يم بنتي الي نايمه  واخته اجت يمه  و شالتها
"بسم الله
زين والله خشنه صلوات
سلطان مثل الطفل يمشي خلف سلطانه
ويباوع لبته .... حسيته دا يحس نفس احاسيسي
انطت الطفلة لأمها ...
اخذتها الحجية
بسم الله ...اذنت الها ...
كعدت تصرخ
هاج يمه رضعيها
رجفت اني ممجربة هذا الشي
"امنين الي حليب ؟؟
"دخذي البنية مستاحشه ريحتج خل اشمها
وتطمن ...
حطوها بحضني تتحرك وتبكي ...
حاولت ارضعها ما تعرف تاخذه
"اووف مدا تأخذه .
سلطانه ادخلت وساعدتني ...
شعوري كان غريب رغم الالم بس ردت يطلع الها شي يروي عطشها .
يا يمة عانيت الا ترستي حضني ... ياما صديقات حبلن و ولدن واني اخر من يعلم والسبب لأن محرومه صرت اكثر وحده مثيرة للحسد والغيرة
عند البعض .. خلصت من جملة خطية اشوكت يجي نصيبها من تزوجت وابتليت بخطية كبيرة بلكت تحمل وهذا السؤال صار بطرف السان كلمن شافني ..
وطول حملي واني خايفه لا افقدها قبل ما اقر عيني بشوفتها ...
سلطانه
"ليش ما نكمطها
"لا مو زين عليها ما اقمطها واربطها بنتي حرة

كعد يمي سلطان
"اسميها حرة
"هههههه لا اسمها ملك
ضل صافن عليه
" لا عبالج  اعديها من باجر اتحبلين واجيبين اخ الها
وملك راح يجي
ابتسمت
" ملك سلطان ...دشوفها مو كانها ملاك
اخذ نفسه وراح يسوي الها بيان بأسم ملك بفتح الميم ؛؛ 

ام سلطان تعبت ...دخل سلطان
" ها تردون شي
سلطانه
" اكلك روح وصل امي للبيت تعبت
وجيب وياك غده النا شوف مرتك شنو اتريد
"اريد حليب وحفاضات
"خوش خوش
كولي لأمج اتكوم
طلع وامه راحت خلفه
سلطانه "وين الله و يهدي گلب سلطان على امه
ادعي ادعي انت نفسه مستجابة دعوتج
"ادري اني بيا حال ههههه

نمت تعبانه ... العصر رجعنا للبيت
وبأيدي بنتي ماليه حضني  ..
بالغرفة . محتاسة بيها والبنات يمي يباوعن الها ... حطيتها على سريري واحتاريت اشلون اغير الها اخاف لا اخلع ايديها ...
اجت سلطانه غيرت الها واحسها راح تقطع اطرافها
"عفيه لا تنقطع ايدها
ضحكت عليه وانطتها ماي وشكر ماتقبل ارضعها ممة
اني ضهري كام عليه رجعت اخذت علاج ومسكنات اشوية ونمت اني والطفلة كانها تعبانه مثلي
كعدوني بالليل من اجوي اهلي ... اصروا اروح

وياهم شفت سلطان سكت ما اعترض لأن يعرف هاي الاصول ...لكن بودة ما اروح  عرفته من نظراته

صرح اتلم بغراضي الي اخذها واني طلعت للحمام
اتلكاني سلطان
" راح اتعوفوني
حتى ما لحكت اشيل ملك
" تعال شيلها ..
رجعت للغرفه ..حملتها وايدي ترجف .. 
صرح  ضلت اتباوع النا وتبتسم
سلطان "لا لا ما اكدر لا توكع
" شيلها سلطان
عرق وايده ترجف اخذها ...مني
"دربالك ...
بس باسها ورجعها
"اخذيها لا اذيها ما اعرف اشيل طفل
رحت مع بابا وصرح ونهى همه الي اجوني من سمعوا بولادتي...
رحت لبيت اهلي ما لكيت سهير سألت  عنها صرح
كالت ما اتعرفين رجلها نحس ما قبل باجر تجيج
يومين مرن عليه وسلطان يجي الصبح اشوية ويروح ويرجع بالليل يمنا من يتأخر الوقت يرجع البيت كان يضايق من سامي
...
كان بالي مشغول ببتي واتبع كل حركاتها ...من ترفع اديها من تعصر وتبكي ... اذا غصت روحي اتروح
كانت دعاء تضحك على اهتمامي الزائد بس حقهم محد بيهم مجرب شعوري ولا الامومه بتالي وقت
الشي من يجي بوقته تحس بسعاده لكنها ما تعادل اذا أتأخر عنك لدرجة يأست من جيته والله ينطكياه فجأة.  شعور لا يوصف  نستني كل الي حولي وكأن  الدنيا مابيها بس اني وياها !!
خابرني سلطان يطمن عني بوسط الليل
رديت عليه كنت سهرانه مع ملك
" ها سلطان
"سلطان  حاف .. كأنها  ملك اخذت مكاني ؟؟

فعلا اني احس نفسي جافه وياه بس ما اعرف ليش
" يا خوفي صدكتي كلام حوراء ...
"لا ما صدكت كلامها  كان مبالغ بيه ومبين كذب
احنه تكلمنا بهذا الموضوع ووعدتني ما انجيب طاريها هذي البنية اذتني لكن رغم هذا هي كانت سبب بتعجيل جيه بنتي

"اهاا
اشلونها
"هي زينه
سلطان
" هاا
"اني صح ما صدكت شي من الي كالته ..بس اريدك تحلف وداعت ملك انت ماالك اي علاقة بأختها .
" شنو قصدج ؟؟؟
" سلطان طمن قلبي الطريقه الي اخذت بيها افلوسك
ما مريحتني ترة
"وداعت ملك مالي علاقه
يلا ارتاحيتي
"اي والله ارتاحيت حيل هسة اكدر اطمن
الا اللعب بأعراض  الناس سلطان اني اعرفك كلش زين شهم وما اسويها ...
سكتت من شفت ملك غفت ....
همست
يلا حبيبي ملوكه نامت خل الحك انام
"خوش حبي روحي
"مو تنسى باجر تعال الصبح اتريك وياي
" هاا ما ادري
"تعال
"مو اكيد اخوج ما ينطي واهس للجية
' ما عليك بيه ..اني وملك انريدك .. نتريك وارجع وياك للبيت
"والله ...الله يفرحج واخيرا ههههه باجر من الفجر يمكم ... ومحضر مفاجأة الكم

.................   
الصبح نهى الحت عليه ابقى بعد لكن اني مكدر اشو ما مرتاحه يمهم رغم همه قايمين بيه واشتاقيت لغرفتي وبيتي ..
دنطلع سلطان شايل هزاز ملوكه ووراح للشارع حطه بالسيارة واني سلمت على دعاء و نهى ..  طلع سامي يريد يروح للدوام شافني واكفه
عباتي نزلت صعدتها
اجه سلطان شال الجنط
سامي " شنهاي انت صاير مثلهم جنج من العرب
سون طريق دروح ...
فات من يمنا وراح لسيارته
حيل ضجت
نهى ابتسمت
" هذا سامي يحب التصنيف ترة يشاقه
اخذ الجنط سلطان كانه ضاج
اني هم ضجت .. وصلت لبيتي كأني صارلي قرن عايفته حيل مشتاقه اله ...لكيت سلطان محضر الها كاروك وردي ونازل عليه التور من فوق ومجر خشبي الها حبيته
   ....
اخذتها سلطانه وسبحتها الي اني اخاف الزمها لا تفلت مني بالحمام ...كنت ابالغ بحرصي
لفتها الي ورحت ارضعها وانيمها
اشويه عانيت لأن سلطانه اديها هاجت عليها بيها تليف ونزلت للشغل والتنظيف ...
..بيوم اتمرضت ملوكه ..خابرت ابوها واخذناها للطبيب  .. من رجعنا سلطان راح جاب النا العلاج و  الي عصائر زبيب وليمون و تمر بالمكسرات حتى يكثر حليبي
وراح لعمله المغرب
دخلت عليه سلطانه وبيدها المبخرة اني احتجيت لا تخنك بنتي
صاحت لغاده تاخذها اتبخر البيت
وكالت
" خاف انحسدت لازم انطرك حرمل
"اوف من افكارج ام علاء
جنت اسفط بملابس ملوكه ...
" شدعوة دحطيهن كبل
" لا اشعندي غيرها
" ذكرتيني من جبت علاء جان عندي خياطات داخليه وعمتي تكرب عليه منا من التهبت وابني يصرخ محد يشيله عايد ...ما عنده ابد حنيه عليه جان يكلي دوم انتي عاله عليه ما يردني وعاشك وحده ثانية قبلي بس ابوه جبره يزوجني اههه
لا بيوم حسيت عند جهالي ابو ولا حسيت عندي رجل ... الله يخلي سلطان الكم  وما يقصر عليكم بيوم
ضجت عليها هم خطية
"الله يعوضج خير بولدج
"ااي انشالله
"بس انت ضلي معتنية بيهم
"اشعدي غيرهم غير هو الزمن كطع واهسي بالدنيا
اني جنت لازمه بيت عمي طابقين يلمع لمع وذاك
الطبخ مال العزايم اركب الهم ... تدرين عمتي من طردنا ابنها ضاجت اتريدني ابقى خدامه الهم ..
واني بعد الخدمه و صحتي الي راحت لكيت نفسي كاعده بخرابه لكمه ماعندي ..هدمه زينه ماعندي ..
كرهت عيشتي
من سلطان رجع كلشي... ما حسيت بقيمة شي ضليت متلوعه وما مرتاحه احس يجي يوم واتزول عنه النعمه احس الي اخذناه بالغصب راح يروح منا بالغصب ما اشوفيني ما جان عندي واهس اول ما اجيتي
"سلطانه ...الله عليج اشلون اخذ سلطان منهم
حقكم لا اكذبين عليه مرة ثانيه
"اااه شكلج اني .... الاحسن ما اتعرفين بس احنه اخذناهن بالغصب واني ما مرتاحه لحد الان بس اكول هي دنيا اذا اضل شايله هم اموت قبل وكتي
خل احاول اعيشها لخاطر جهالي
" شوفي سلطانه اني ويه سلطان  هو زين سوة من اخذ ورثه ... مو عبالج يغير شي اذا عرفت
"أسألي رجلج ...
ما اخذت منها جواب شافي .  ولا سلطان نفسه يقبل يذكره كدامي مرات تجيني لحظات اشك بكلام حوراء صح و اتعوذ من الشيطان وابعد هالفكرة من بالي سلطان حلف الي باغلى شي عنده بنته الي بدت تكبر وتحلووو واتبين معالمها ...
كبرت ملوكه وصار عمرها اربع اشهر ... واني فرحتي بيها  كبيرة ...
وسلطان هم  ...
ايامي عادية وتمر هادية و ممتعه مع ملك  وابوها
هي حظها افضل من حظي اخذت محاسن ابوها .. بشعرها الكثيف و اعيونه ومعانيه الحلوة على بيضه
صارت اميرة ابوها .. 

الساعه ب 10 بالليل  سلطان رجع اووف اشكد حاولت اني اخليه يرجع من وقت ماكدرت اجت هاي الفصعونه ملك خلته يرجع ب 10 ومرات ب9 يجيها ملهوف  . !!

كعدنا بالهول نسامر وسلطانه اتابع فلم من التسعينات قديم .. وشايله ملك اتركصها وسلطان ماد رجليه ومطروح على الارض
اولاد سلطانه كل واحد بكتر الي يقرة والي نايم والي يلعب بفونه ...
دك تلفون سلطانه ..
"الو
ها يمه خير
شكو ا
فزتتنا سلطانه من ردة فعلها 
يا يمه
حسام   .
بيا مركز
اوف يومه
سدت الخط
اخيتك سلطان حسام حاجزين عليه
اصرف
"شنو يا حسام
"اخويه اعتبره اخويه اني وبس وساعدني
تأفأف
"اخيتك هذا مراهق وامتحانات عنده ما اعرف ليش محجوز اهناك لا يضيع مستقبله الله يخليك
علاء كان بالاستقبال
اجانه
" وين يروح اكيد هذا سكط
"اش انت معليك
سلطان بعد اختك روح لحسام اوكف وياه الله يخليك امي متخربطه عليه بالكوة تحجي
خالي ما قبل يشوفه
تنهد وضل اشويه صافن  بعدها كام معصب من يمنا ...
وسلطانه خلفه
"حباب وين رايح لا اتعوفه يضوك الي ضكته  (يذوق الي ذقته)
سلطان
صاح بيها
"اييي رايح
رايح
"الله يحفظك لبتك
راحت هي هم لبست
وراحت وياه كالت اله وصلني لأمي بالاول متخربطه ..

يتبع