رواية سلطان زمانه الفصل الخامس والعشرون 25 - بقلم زهراء العراقيه

من كتابات زهراء العراقية
اثاري حسام متعارك مع واحد ومضاربين يعني عركة شباب  بس الشاب مفتوح من راسه و مخيط واهله مقدمين  شكوى على حسام ... بيومها ما رجع سلطان اتصل بيه نص الليل
"ها سلطان وينك ؟
" اني ما اجي اليوم ..نامي
ام سلطانه متخربطة و اني بالمستشفى
"يا خطية ....اشلون صارت هسه
" احسن ...
"وحسام شسويت بأمرة
" حسام اووف امنين طلعت الي سالفته
لازم باجر اروح للناس الي ضرب ابنهم واتفاهم وياهم بس كون  يطلعون اولاد ناس مو قفاصة و يطالبون بفصل ..
"خوش عود طمني على امك اذا ...
قاطعني معصب
"مو امي يلا نامي
سدة بوجهي ..غريب هذا الرجال واكف وياهم وبايت اهناك ويصيح مو امي !!!
ايام وهو محتاس بيهم امه مدا تتحسن ابنها ما طلع وسالفته كانها راح اطول لأن الناس ما يقبلون يتنازلون وضاله اتلوج عليه ...ماقبل سلطان اروح ازورها .. وسلطانه وياها ...
بعد ايام
كنت ارضع ببنتي وخابرني سلطان كال اني راجع للبيت حضري الغدة
من اجه تفاجأت بجية شاب وياه ...
بعدين عرفته هذا حسام ناسية شكله اني ...
وخاصه هالمرة عنده لحية وشوارب ..كان نظرة على الارض  وخجلان .سلطان كال اله يروح يسبح ... واخذله غيار من علاء الي غيرته واضحه من اعيونه ما طايق خاله الصغيروالدخيل الجديد على عائلتنا ....
بالغرفة اتكلمت مع سلطان
"حبيبي  شنو الي صار
" ما صار
كالها بعصبية
اتنازلوا 
"صدوك والله طلعوا ناس بيهم الخير
تنهد
"اي
غيرملابسه وامرني اصب الغدة . بعد يومين تفاجأت
راح جاب اخته مو اهنا المفاجأة من امه وياها ...
بس كانت متغيرة و تعبانه  بكرسي يدفعها حسام ...
غريبة هاي الحياة ما تطلع منها الا وانت متعلم دروس  . المرة الي يعصب من انكوله هاي امك قايم بيها وحاير بعلاجها صح ما يتقرب الها ومداراته الها من بعيد بس جابها لبيته لأنه شبه مقعده محتاجه مدارة  هاي الفترة منا من اتكوم على رجليها وصحتها تتحسن..  احس بعيونها الخجل والندم احسه هو دهور حالتها اكثر من اشوف الي اتخلت عنهم همه الي شالوها ..بتها الي كل ما كانت تلجأ الها  ماتمد الها العون هي من قايم بيها ابنها الي ما شاف حنانها محتويها هسة ببيته
..................
كنت ادور على سلطانه تجي اتسبح ملك وياي .
شفتها بالاستقبال كاعده يم امها
استحيت اطلب منها من شفت ام سلطان تبكي
جلست جنب سلطانه
"خير اشبيها  عمة
" يا يمه لا توجعين قلبي
  لأن سلطان لحد الان ما يباوع بوجها انهضمت
وضلت تذكر الماضي
حاولت اني هم اهدئها 
سلطانه " يمه والله سلطان يحبج
لا تبجين
ترة حتى هو ما يهون عليه دمعج ...من اتخربطتي كلش ونقلوج للأنعاش
اخذ زلم واتفق ويه اهل الولد وفصلهم ... والله يا يمه دفع ثلاثه مليون الهم وبالكوة قبلوا هم
بس لأن حالتج ازدادت سوء وقلبج ضعف يا يمة طلعه لحسام حتى ما يحترك كلبج عليه
أيدت كلام سلطانه رغم الذهول الي صابني
"اي عمة ترة سلطان لا ليلة ليل ولا نهارة نهار بس حاير اشلون يطلع الولد
سلطانه ' لو ما طايقج مثل ما اكولين ما جان جابج لهنا تحت اعيونه .... يا يمة استهدي بالرحمن

رحت لغرفتي من سمعت صوت ملك تبكي اخذتها من غاده  وطلبت منها اساعدني هي بتسبيحها ..
.
ارضع بملك وسارحه بسلطان ... بير مال اسرار حزت بنفسي حيل ليش ما كال الي هو دافع افلوس ومطلع اخوه ليش دوم يضم عني  ولا كأني شريكه حياته وام بنته والاكثر الي حسسني اني بعيده عنه هو  اخته تدري واني لا  فزيت من ملك غصت بحليبي ..
رفعتها وضربتها بخفه على ضهرها ضلت شارگه ..  من خوفي عليها دمعت ولا احب اشوفها مختنكه ما اتحمل ابد سكتت هي ورادت بعد ترضع بس اني بكيت وضليت ابوس بيها اااه احسها نقطه ضعفي اشلون بيه  ...
بالليل نيمت ملك وابوها كان مطروح وسارح بفكرة ..
اخذت ثوب احمر  اللون ورحت للحمام سبحت من طلعت لكيته حاط  هدفون ويسمع ..اني اتمكيجت مثل قبل وحطيت عدسات و رموش .. وشعري ما مشطته تركته برطوبته مترول  بشكل جذاب .. جلست جنبه وابعدت السماعات عن اذنه
"هييي نحن هنا
ابتسم الي وكرص خدي
"تعاي
"ممممم اجيت
انطرحت ابصفه وراسي على ايده
"سلطان حبيبي ما اتحس احنه صرنا بعيدين عن بعض
"اشلون يعني
" مممم ما اعرف بس شو دومك سرحان اذا يمي ...
خو بمكان ما تفكر وحدك ليش ما اشاركني
مممم مثلا اشلون طلعت حسام .وشنو ناوي اسوي اتخليهم يمنا لو من اطيب امك يرحون
ابعد ايده ...
"دعوفي اهلي ... طالعه اشعين بالاحمر. 
خلع تيشيرته ...

كان نايم .كمت من يمه ضايجه ...لمحت نفسي بالمراية حمرتي نازله عن شفتي هزيت ايدي ساخره من نفسي ... ورحت دخلت جوة الدوش ...حايرة اشلون اتقرب لهذا الرجال ليش مبعدني عن خصوصياته  ..
عمتي من تحسنت اخذت ابنها وراحت لبيتها بس عادي اذا اروح ازورها مع سلطانه لأنها تعودت على حفيدتها ملك ..سلطان ما يعارض ولا يمنعها اذا اتريد تجي ويدري كلش زين بسلطانه تاخذ منه وتنطيهم هم عادي بأرادته لكن هو ماعده كلام مع امه ابد هو سلام وبس وابد ما رايح لبيتها
....
صار عمر ملك سنة كاملة  وتوها الا صارت تمشي وتوكع ...
اني كنت اغسل بالصحون بعد العشا .. كنت مكعدتها على الحجلة  اخاف عليها لا توكع وحدها .. 
طلعت من المطبخ اني مطمنه لأن البيت متروس ناس ما رحت خلفها  ...
حسيتها رجعت دخلت ...
التفت كأنما شخص حطها يمي ابتسمت عرفته منو من شفت وردة  حمرة بدين ملك    وحطتها بحلكها دجربها
طلع سلطان من خلف الباب
"ولج جوعية اكلتيها
ضحكت عليهم واخذتها معلوسه من بنتي ...ذكرتني بأول ورد اخذتها منه كانت مقطوعه وهذا اول عيد حب النا و ملك عدنا  .... قررت احتفظ بيها مثل اول وردة

وكفت امامه .. واخذت كفه الي لابس فيه الخاتم مالتي .. قبلته بشغف ..
راد يقبلني ضربته على صدرة
"ملوكه دتباوع
" يبووو اشلون بيه اذا كبرت .
"عادي حبي نعزلك بغرفه وحدك واني بتي بغرفه
" هي هاي الناقصه .... 
..........
الضهرية
نايمه مع زوجي وبنتي بمهدها   ...دك تلفون سلطان ..
ما رد  . اني كعدت ..اخذت التلفون اسويه صامت ..قريت اسم صلاح .. فزيت هذا مو ابن عمه

ما حطيته صامت انتهت المكالمه ..هم دك
"سلطان ...سلطان  اكعود هذا ابن عمك
سلطان صلاح دا يدوك
ابسرعه فز
"منو
"صلاح
اخذ الفون
"الو
ها صلاح ...شنو .. شنو
فرك اعيونه
انت شنو تحجي
عليك الله
اني جاي
"شكو سلطان سلطان
ما رد عليه ابد بدل وراح  ...
العصر كعدت من النوم .. درضع ببنتي
سمعت صوت سلطانه تحجي بصوت عالي
طلعت اشوف شكو ..طبعا غرفتي بعدها جو ما صعدت ... 
شفت سلطان كاعد بالهول ومغطي اديه بوجهه
" كول غيرها سلطان
لك بعدها طفله ...
يا يمه خطية  ما شافت شي بدنياها
كعدت سلطانه كدامه تنحب خلته يكوم طالعه روحه .. دخل للغرفه وقفلها عليه .. 
سألت سلطانه شكو شصاير .. جاوبتني من بين حسراتها ودموعها
" حوراء  بالعناية المشدده يا يابه بعدها طفله ...
شنو شافت هاي المسكينه ..
رن تلفون سلطان طلع ناسيه على الميز ..
اخذته اني
"هذا صلاح ...
اخذته مني سلطانه ابسرعه وردت
"الوو  صلاح بشر ..
شنو
يبووووووو
ضلت اتصيح فززتني
طلع سلطان
"ماتت يا سلطان البنية ماتت
بالبداية صفن على اخته مشدوه ..بعدين حسيته كأن الارض دارت بيه .. لزم الحايط وانتكأ عليه باديه ورجع للغرفه تارك الباب مفتوح
رحت خلفه ...
جلست جنبه على السرير
"سلطان وحد الله
اشبيك ..
متنه كان يهتز عرفته دا يبكي لأنه مغطي وجهه
ما اعرف اني هم حزنت  .   ما ردت هاي النهاية الها لكن ما تأثرت بموتتها كد ما حزنت على حال سلطان
لهلدرجه هي الها مكانه بقلبه حتى يبكي عليها و ينهار ؟؟؟؟؟؟؟؟؟؟
دخلت سلطانه هم كانت فاقده
"كلت الك يا سلطان لا اسويها عدها خوات لا تأذيهم بهيج شي عوفهم بخيستهم ...  راحت البنيه راحت
لا حول ولا قوة الا بالله العلي العظيم ...صلاح يكلي كله من ورة اخوج ...
ما رفع راسه ولا اتحرك بس صوت أهاته وونه
اخذت بنتي كعدت تصرخ مخترعه على صوت سلطانه ... وديتها يم البنات ورجعت اشوف المصيبه
لكيته ديحاول يكوم ما بيه حيل مدنك ما اشوف وجهه

"سلطان حبي
دا اريد اطبب عليه واخفف من حزنه .. بس مشكلتي ما اعرف كيف اواسي غيري
"كلنا على هذا الطريق ...
وكف ومشى من يمي بثقل
ما جاوب من كولت اله وين رايح . طلع من البيت كله ....
بالليل الا رجع ...
اني ما كدرت انام   .. اسمع صوته يم الباب
"حيك بابا حيك ... الف رحمة على بيك
فتحها ودخل يغني ...
استغربت ..كمت فتحت الضوة .. كانت مشيته غير متزنه
ويغني ..
"سلطان ؟!!!
" اشبيج اشرايده ...انت ...اشعدج اهنا روحي نامي بالمطبخ
"سلطاان
عرفته مو طبيعي اتقربت يمه شميت ريحته مشكلتي ابد.ما اعرف ريحه المشروب  بس كانت ريحته مقرفه
"هاي شنو سلطان انت شارب؟
" شنو يعني ...الواحد ما ينتعش
روحي روحي منا
"وين اروح انت ريحتك مقرفه شارب  شي ؟
انطرح على السرير وصاح
"منو مقرف خشمج اشكبره جنج فزاعه
"هشش راح اكعد البنيه
نام وغفى ابسرعه واني دقات قلبي اتقلصت حسيت بأنقباضه من اشوكت سلطان يشرب ؟ كلشي تحملت الا هاي مراح اتحملها ابد ..
فرشت على الارض ونمت .. كعدت رجلي توجعني .. حسيت احد داس عليها
سلطان "ليش نايمه اهنا ؟؟
" كعدت وشبكت اديه على ركبي
" ها سلطان صحيت ... من اشوكت انت تشرب ؟؟
دنك راسه خجلان
وكفت كدامه
" ما اتحمل بعد يا اما اتكول الي ليش هلكد متأثر بوفاة حوراء وليش سلطانه اتلوم بيك ... يا اما اروح لهلي  .
اضجور مني راد يروح
"وين رايح ... والله هالمرة مو كلام اذا طلعت هسه من الغرفه اني الم ملابسي واطلع ما اتحمل بعد ... طلع    واني اندفعت ضايجه من وضعي ...
طلعت ملابسي و دا الم .  اني عندي الشرب من كبائر الاثم بعمري ما شفت احد شارب مو انوب رجلي ..
دخل وبيده الخاولي شافني دا احضر بملابسي ...
كانت ملك تناغي بمهدها ...
"شنو اسوين ؟؟؟؟
"الي انت اشوفه ...  بعد ما اتحمل
كعد جنب الجنط على السرير
" تردين اتعرفين كلشي ؟؟؟؟
" اي
" اذا سولفت الج تنطين وعد ما ترحين منا
كعدت جنبه
"لا والله فلا اروح انت بس احجيلي ..شنو الي مغيرك .. من ازوجنا لليوم واني الاحظ بيك تغيير .. بس فرحتك بملك غيرتك اشوية  وحسيتك ارتاحيت وحتى احلامك وكوابيسك راحت ... وفاة حوراء ما احسها هي الي كلبت حالك هيج ...احس اكو شي
"مثليش يعني
ركزت بيه كان تعبان حيل حسيته بالكوة ياخذ انفاسه
" ما اعرف حزنك عليها اله تفسيرين .. لو انت تحبها
بالكوة كلتها اختنكت بالكلمه ...
"لو انت سبب موتها ..
"يا هي اهون الج
سكتت ما جاوبت يا ترى هذا السؤال لو انسأل لوحدة غيري شنو كان جاوبت ؟؟؟!!!!
" لا تخافين مو الاولى ....
الثانية !!!!
همست
"اشلون ؟؟؟
ليش سكتت
اشلون جاوب ....
شنو خصك بوفاتها؟؟؟؟
" اني شاركت بوفاتها .. 
"جاوبني سلطان اشلون ....؟؟؟
" مثل ما كالت الج هي ..... !
مستوعبت
"منو الي كالت
"حوراء الي كالته الج صحيح
كلت مندفعه
"كذذب
كذب ابد ما اصدك  .. ولا صدكت ابد بيها من كالت ..
باوعلي
بعيون دامعه وصوت يريد يبكي
"اني اكلج صدك
احس سهام ودا تنرش بوجهي مو كلام
" انت منو ؟؟
ها منو انت ..؟؟؟؟
جاوبني ..
صراخي خله ملك تبجي لأول مرة ماروح البي ندائها
ضليت صافنه على سلطان وفاتحه اعيوني على وسعها ...
كام هو الها انطاها ملاهي سكتها ورجع كعد جنبي
"اني سلطان ..الي انجرح من اعز احبابه ...
بيوم جنت طالع عماله وكفه لصديقي البخ بالحايط وخابرتني سلطانه  خفت لا بيها شي او محتازة شي
"حازم كمل انت اشويه وجايك
.
"ها سلطانه شكو
" ها عيني .. كالوا الي اخوج عاشك وما صدكت ...
شجاك مختارها اتخرع
" شنو جاي تحجين انت
" اسمها رهف مو ههههه
اجتي لبيتنا المشرف وشافته اشلونه وشردت
"شنووو
مصدكت الي اسمعه ..جنيت من عرفت بيج جايه وشايفه وضعي الكسيف  ... اشلون عرفتي واشوكت ما دريت ..لزمت كلبي وكلت ربي استرها ما اريد اخسرها بس هاي البنية ردتها منك ..ربي لا تعوفني  .
جان املي جبير انج مراح اتعوفيني لأن اتحبيني وانصدمت من ما رضيتي توكفين وياي ..
اظلمت الدنيا بوجهي .. من دزيت ام سلوان وطردتها مرت اخوج .. حاولت ما استنزف كل املي وابقى اضغط عليج بحبي ...
تذكرين اخر جملة سمعتها منج .. 
هاي الي قضت عليه ولليوم ما كدرت انساها 

تدري اني اشكد اصرف بالشهر  اااخ ياويلي اجت على جرحي ملح هاي الكلمه واني بجيبي يمكن ميتين الف . تفاليس بالنسبة الج .. اهه لو منصب ابوج الحساس الي ما يناسبني  ...
حقدت عليج بكد رحمة الله .. مر شهر من عفنة بعض واني احبج وحاقد عليج !!!! اريد اكرهج ما اكدر اهه لا وبعد اطلع الج اعذار  واني حاقد عليج ؟!.. هاي الرهفة وين اتناسبها عيشيتي ... ؟؟
الي مثلي يا يموت بحسرته يا يواجه الي غبنه ويوكف اله سجينه بالخاصر ياخذ منه حكه  ..
وانتي حكي يا رهف  مع هذا عفتج لنصيبج يا الحگج يا لا ...
بذاك اليوم عزلت من المحل واني حاقد على الدنيا كلها انتي وامي صرتوا نفس الصنف  ... و عمي صار عدوي ...........
احتاريت اشلون اكدر الزمه  من ايده الي توجعه ....
" راقبته شهور هو و ولده ما حصلت شي ... صار عندي هوس اراقب كل افراد العائلة  مرت فترة و بيوم راقبته راح لبته شيماء هاي الي اتبلت علية  من زمان
..جانت مزوجه وزوجها متوفي صارله اشهر .. هي من يوم يومها مو راحه ... تذكرتها وخليتها ببالي من راح الها .. جان بيتها  بالمشتل  بناء جديد رجلها سواه العا ومات بحادث مالحك يتهنى بيه  .. يوم واحد راقبتها بيه شفتها ادخل احد غريب للبيت وهي ابنها بطولها .. 
اهنا انفتح  الي باب حتى ادخل لعمي منه بس اشلون .... فكرت وفكرت هي ما صارله زوجها سنه من متوفي ..  بنص الليل اجيبه للبيت ...عدها اثنين بنات و ولد  عمره 14 سنه بذاك الوكت   
ضليت احوم حواليها  .. واحتاريت  شسوي  ...
يمكن قل تفكيري بيج بهاي الفترة وارتاحيت منج جنتي مسيطرة عليه .  بس هوسي زاد اشلون افجع هاي العائلة ....
   بيوم طخت عندي احطلها كامرات وافضحها واشفي حسرتي بعارهم المطموم  ... لا تستغربين اذا كلت الج حسيت الدم الي بينا صار ماي وما احسهم عرضي واهلي بس بعدين كلت شنو استفيد بالفضح .
اخذ الي اخذوه مني بالغصب وبس......
خططت وعفتها فترة رحت اكد واشتغل ... جمعت كم فلس اخذت كامرات خفية بالاقصاد ... وضليت انتظر الفرصه حتى احطهن ....
بيوم راحت لهلها  العصر ... ضليت مرابط يم بيتها صارت الساعه ب 12 بالليل وهي ما رجعت عرفتها راح اتبات اهناك .... 
طفرت على بيتهم ..  كسرت القفل ودخلت  لجوة .. فتحت الاضوية  حطيت وحده بالهول والثانية بغرفتها   ..  ما اكلج ما جنت خايف جنت ارجف اول مرة اصير مثل الحرامي ... طلعت من البيت بعد ما كسرت الكنتور و فردشته اخذت علبه ذهبها ..ومسحت بصماتي وطلعت من البيت ..
حتى تتحول قضية كسر القفل سرقه
شهر كامل اني تارك الكامرات الخفية ببيتها وما اراقبها انتظر بس الي ادخله للبيت يجي ...
جنت متلهف حتى اشوف وجه عايد الي ذل اختي ذل ما صاير وهو يشوف يلعب بعرضه   حتى ما بلغت احد على البوكه اني فسرتها خافت لا اهلها يخافون عليها ويشيلوها يمهم وتخرب سالفتها
..  ما طولت اكثر  من الشهر وسجلت كامرتي وكلشي صار عندي .. من غير ما اتعب ...
انتقل كلشي الي بث حي الي يصير بغرفة نومها  مو صور ..
رحت لبيتها ثاني يوم ....
دكيت الباب اجاني صوتها
منو
اني
منو انت
سلطان ابن عمج
من خلف الباب جاوبتني
" يا شنو كطفك عليه
"شيماء بس افتحي الباب ..
"ولي منا
"اها بس حبيت اراويج فلمج مع استاذ عادل 
"شنوو
"دفتحي افتحي
"ولي منا يا عادل هذا
" لا اتكابرين وانت ميته من الخوف .. عادل الاسمر افتحي خل نتفاهم ..
فتحت الباب  وجه كان اصفر
وترعش
" انت شنو اتكول يا عادل هذا عيب عليك
"  عيب عليه ؟
شوفي يا بت الناس ما اريد ينهدر دمج  بسببي
عندي الج افلام فرنسية محفوظه انتي والعينتين .. حدج للعصر اشردي منا .. الصبح افلامج يم ابوج واخوانج  ..
" ما ما فهمت
" اني افهمج فتحت جهازي واني لعبان نفسي من نفسي ..  ما اعرف من وكفت كدامها كسرت خاطري .  رغم وصخهاتبقى  مرة مكسورة... فتحت الفيديوا وابسرعه حطيته بعينها
لطمت على وجهاا اني اخذت تلفوني ورحت عفتها ..شارد منها ومن نفسي ....
المفروض اني اقتلها من اشوفه هيج مسوية .. مو اكعد اهدد بيها ...
الصبح دكيت بابها ماكو محد فتح تطمنت ورحت لبيت ابوها
طلع الي واحد من احفاده
ساعه مشتول بالديوانية ...انتظر عمي يطلع  الي ...
هاي اللحظه هونت عليه   خذلاني لنفسي   بس اريده يدخل واكسره مثل ما كسرني ....
شرف عمي .. جان لابس دشداشه وعابته و غترته مرتبة فوكها عكال ...
" سلاما عليكم
"وعليكم السلام عمي
ماوكفت اله ... حطيت رجل على رجل وهو باوعلي بطرف عينه ...
يم الباب ما دخل
"اشرايد ...اشكد محتاج ... مستعجل عندي موعد
"اههههه شنو مجدي منك من قبل
طلع 25 وشمرها بوجهي
"اخذها ولا اتارويني عرض اكتافك ما اريد احد يشوفك جاي الي ...
" ليش بالله عار عليك ؟؟
" اشكد رايد
استفزني حيل  خلاني اسرع بالامر
"يلا روح ..
انطاني ضهره
... حطيت قرص DVD
على الميز الي كدامي وكمت خلفه ..
حطيت التلفون كباله ...وكتله
"ايباه اذا اني اشوفني عار اجيك دشوف بتك اشلونها
لزم التلفون كأنه ممصدكه هاي بته .. وكع منه ..وشفته بعد ما يعرف ينطي وياخذ بالكلام .. وجهه صار ازرك ... ارتعش كدامي ... كعد بمكانه على الارض و خلع عكاله ويحك وبرقبته واعيونه طالعة عليه اخذت تلفوني
" عمي افلوسي كلها ترجع ...وذاك القرص بيه اكثر من فلم لبتك ينتشر بالعراق كله ...
عفته ورحت ...بس شو ما حسيت بأرتياح ولا شماته  ..بالعكس كلبي يتفطر آلم وبس اريد صورة عمي و وكعتة بالارض اتغيب عن عيني  !!!!

هو يوم و انقلبت الدنيا عدهم   دك اتصالات من اخوته حتى اتعرضت لمحاولة قتل لولا ستر الله جان متت   على ايد عايد
طلعت خارج المحافظه حتى اسلم منهم .. 
وهمه مخبوصين بعارهم ...
عمي الي ظل يدز ناس على سلوان بس يردون يشوفوني .. 
اني ما ادري بتهم وين راحت واشلون هجت ...بس الي ردته صارلي ... كان اهون  على عمي ينطيني كل فلس اخذه زور مني ولا الفضيحة.والله ما اخذت ربحه من مشاريعه الي دخلها بفلوسي ... اني بس اخذت ورثي
ورثي من جدي ...شنو ذنبي اذا هو وولده ضيعوا افلوسهم ؟؟ تدرين عمي قضى شبابه عاطل سكير
وجدي مات غضبان عليه ... وابويه جان عزيز عند جدي حيل فكتب اله بحياته قطعه ارض غاليه حيل غير ورثة الشرعي
من اتوفى ابوية تارك املاك .. عمي اتولاني اني واختي ..كأنه يطلع حقده بينا ودمرنا  دمار .
ما علينا كدرت اخذ كلشي منه و وعدته وعد رجال اني ما عندي مصلحه بنشر افلام بته واذا نشرتهن اني هم تلحكني الفضيحه ... من يومها والعداوة صارت بيني وبين عايد واخوته ...
بس ما يكدرون يحجون ويفكون احلوكهم كدام الناس ..همه بس كل فترة يدزون ناس تهجم عليه بالضرب وبالكوة مأمن على روحي ...
اما حوراء ... فهاي اصلا ما اذكرها ولا اذكر شكلها غير انها طفله ...
بيوم من اشتريت بيت وصارت احوالي معدله ..خابرني صلاح يغلط عليه ويشتم وفهمت اخته الصغيره الي ممزوجه عايد كاتلها كتله قوية داخله مسشتفى بسببي ... ومرة هي اتصلت بيه تبجي وتغلط عليه من تلفون صلاح
اني انقهرت عليها والذنب الي عايش بيه كبر من وكعت ضحية بسببي  .. كل يوم ضرب ومسبه ضيعوا مستقبلها  وهي هم ما تكعد وتسكت من تتعرض للضرب لا تشرد من البيت على غفلة يلكوها ماهية شككتهم بيها ...  اختها روجوا للناس سافرت اتعالج ابنها مريض بالهند ...بعد فترة كالو ماتت بحادث هي وأطفالها  ما اعتقد احد اقتنع خاصه عم الاولاد واهواي شائعات  عليه طلعت ولهذا اليوم مانعرف الها طريق . وحتى الي نهبت وياه ما ينعرفله طريق اضاهر بالفعل مثل ما كالت حوراء عدها علاقه بيه قبل لا يتوفى زوجها ... ومنتظرة دورة سنتة وعلى اساس يزوجها وهذا الشي مال يزوجها فلا اصدكه
.
بيوم  الي رحت لعمي اطلب منه بكل استفزاز يروح يقابل ابوج الي اتعرفت عليه بالقهوة وفهمته اني شريك بيها وهي لا تخصني ولا اني شريك بيها مجرد تابعه لصديقي ... ضليت كل يوم احوم اهناك حتى اتعرف عليه ... ولا تصورين بيوم اخبارج غابت عني ..  
المهم ... قابلت عمي وطلبت منه يروح يشرح لأبوج ..اشلون صار سؤء فهم بينا على الورث وقضيه سجني كانت ظلم حتى ابوج يقتنع بيه .. عمي جان مثل العمود وانكسر  ...كأنه بعده خايف مني لا أكد الاشاعات بالي عندي رغم اني حلفت حركتهن كلهن كدامهمم وما ضام شي عنهم ...

ردت اكوم اطلع ..
وكفت أكبالي شابة ..عينها مزوركه وايدها مخلوعه ..
" ها سلطان ارتاحيت ...اخذت افلوسك
عساك تحترك بيهم
ابوها صاح عليها واجت امها اخذتها عرفتها هاي حوارء  هيج كبرت .. واني من يومها اعيونها ما فاركت بالي .. دوم اتحلم بعايد يقتل بيها . لو يخنك بيها وهي تسنجد بيه ..
واني ما البي ....
الى ان البنية فقدت اعصابها من راد عايد يزوجها واحد مثله سكير ابو نسوان  ... حتى يخلص منها .
اعتقد صارت مشكله بينهم وهم ضربها واذها بالضرب .. خلاها بحاله هستريا  تطعن نفسها سكين
!!!!
اتوفت حوراء وارتاحت وعذبتني ...
كمل سلطان قصته واني بس جسد هامد من غير روح ....... 
اباوع اله ادموعه تجري ويدخن ....وبتي تصرخ ....شلتها ...درضعها واني بالي اصلا مو يمها ما اعرف اشلون شلتها يمكن هي غريزتي الي اتحركت 
؛كنت متوقعه هو ماخذهن بالغصب واعرف والله اعرف ...بس مو بهاي الطريقه ...حوراء ما كذبت
حوراء مظلومه ...دمها برقبة زوجي ...
زوجي الي واهمني هو اكثر واحد حريص على بنات الناس ..على مود كم فلس يبيع كل مبادئة
دموعي ما نشفت ابد . الصدمه كانت اكبر من توقعاتي .. هو ابد مو غامض هو مكشوف بس حبي الغبي حجب عني كلشي  .. احلامه و باله الي ما مرتاح ... كل هذا ما ربطته اني ..
طلع  سلطان  ...رحت تأكدت هو مو بالبيت .. ورجعت للجنط ..لبست واخذت بتي .. وطلعت .. سلطانه مو بالبيت  ما اعرف راحت للفاتحه لو لأمها ..  اني غلست عن أسألة اولادها وطلعت ...لبرة ... من وصلت للشارع صوت بداخلي ويكلي اشردي يارهف .. طلعي نفسج من هذا المستنقع ...
اخذت تكسي  ... وكبل لبيت اهلي ...
واني عازمه لا عودة ابد

وللنهاية بقية