رواية سلطان زمانه الفصل الثاني 2 - بقلم زهراء العراقيه

اخذت اوراقي حتى تمليهم من غير ان ترفع راسها واشوفني حتى ؟ يمكن لضيق الوقت وتزاحم الطالبات عليهم بذاك اليوم بس اني كنت اتلوة من الكعب الي لابسته وصارلي فترة مو هينة واكفه انتظر  ومن سوء حظي ما مليت الوثيقة عبالي الا المعاونه او الكاتبة تمليها بس بعدين شفت بعض البنات همه ملوها ...
سألتني الي لهسة ما ميزتها معاونه او كاتبة
" شسمج ؟؟؟؟
" رهف عيسى
"اسمج الثلاثي عيني
"رهف عيسى عبد الرحمن
" عمرج
جاوبت بارتباك واضح
" 27 سنة  من مواليد ******
" وين وثيقتج مال مدرستج المتوسطه ؟؟
"اها نسيتها بأيدي
كنت متوترة وكأني اليوم رجعت ذيج الطالبة ام 15 سنة واكفه كدام المديرة وترجف ما اعرف ليش المدرسين الهم هيبة وبالقلب خوف واحترام كبير جدا ، طلعت من المدرسة اتوجهت لسيارة كان نوعها جارجر سودة فتحت الباب وجلست ابصفه ابتسمت بتأنيب ضمير على تأخيري
" ها ليش تأخرتي ؟!
"والله بابا هوسة وتعرف وقت التسجيل يصير عليهم لود
شغل السيارة ورد ساخط
"هي مسائي مال فايتهن الوقت اشعجب هوسة عليهم ؟
من سؤالة الف غرزة بيه اندجت بيه شنو يقصد كان بفايتهن الوقت عن الدراسة لو شي ثاني ؟؟؟

باوعت من الجامة سويت نفسي ما تأثرت بكلمته وخفيت عبرتي عنه ...
" هسة انروح للبيت خلصتي ؟؟؟
"ها لا للمستوصف اكمل الوثيقة
تأفف والتاف متوجه الها اعرف هو ما راغب بكل الموضوع بس لأني الحيت وشاف  الحماس بعيوني يمكن رضا عسى و لعل يشوف بته البائسة مرتاحه ..
سويت الفحوصات ورجعت للمدرسة  دخلت للأدارة الهوسة ماكوا غير كم وحدة ..... استلمت مني المعاونة ورقة القبول وسجلت اسمي بسجل عدها . اهنا اجت مرة اربعينية كعدت يمها ....
"ها ست ملك خصلتي
"اي مبقى شي بس اخلص الي بايدي  .
باوعت الي بطرفة عينها من فوق لجوة وكالت للمعاونة الي ملتهية تكمل كتابة
"هاي طالبة عدنا اتريد اصير لو اخت طالبة ؟؟
المعاونة "لا هي الطالبة
ردت بضوجة
"اني مديرة هاي المدرسة
اني رجلية اهتزن من عرفت هاي المديرة ياويلي اشكثر اخاف من المديرة كان بحلكي علكه كانت بين اسناني ما امضغه بس من الرهبة التهيت بيها وكمت امضغ
" الدوام يبدي 9/25
تجين
واشرت علية بأصبعها
"تلتزمين بزي موحد و هذا المكيااج قطرة ما اريد منه .....ومن توكفين كدامي احترام الي ما اتعلكين ..
يلا خلصنا صرتي يمنا اكدرين ترحين لبيتج ...
هي تحجي واني ارجف رجيف قوي من طلعت لمت نفسي الف مرة اشلون اعلج كدام الست !!! صعدت مع ابوية ورجعت للبيت لكيت مرت اخوية دعاء مسوية الغدة كبل غيرت ورحت اكل ...كعدنا كدام الميز ....ابوية يتوسطنا بجلسته و على يمنتة اخوية فرات ومرته دعاء وابصفهم ابنهم رامي عمرة 9 سنوات ..وابصفة اني جالسة وعلى الجهة الثانية كاعد اخوية الكبير سامي ومرته على يسارة وابصفها بناتها الثنين واختي سهير صايرة على جهة بابا اليسرة هاي عائلتي مكونه من اب واثنين اخوة واختين وحده مزوجة  واسمها صرح والثانية سهير مخطوبة 
فرات عندة ولد واحد واحبهم حيل وابنهم اني ربيته

سامي هو اكبر وحد بينا عنده اثنين بنات حباب و دوبلوماسي وهو يحل بمكانه بابا  بغيابة.. 
عائلة هادية وراكزة
......
بالليل رحت حتى احط دوركة ماي على ميز جرباية بابا ..
دكيت الباب واجاني صوته الحنون
"ادخل بوية
دخلت حطيته و شفته يرتب بملابسة
"اجاي اسوي بابا ؟ دجيب احنه نرتب الك
ردت اخذ قميصة منه بعد ايده عني
"كان رتبتوهن من البداية عدل
روحي ما احب ترتيبكم ..
صفنت عليه اشوية وعلى الكنتور ..ياربي ابوية ولا يغير طبعه الكنتور مرتب اكثر من حياتي
" يا بوية اشو سهير رتبتهم الك ومسفطات بعد شتريد ؟؟ مو حتى البناطير وحد والقمصان وحد
شمر بايده
"روحي روحي
عرفت اني هو شيريد يسوي خليت وطلعت عفته على راحته ...والحسرة بكلبي  .. رحت لسهير كاعده على الجرباية .. كانت تحمل نفرين ..هي كانت غرفة فرات بس حب يجدد فاخذناها اني وسهير الغرفة تسكام عراقي راقي وفخم بعد ما كانت اسرتنا مفصولة اني وسهير كمنا ننام سوة بيها ...كعدت يمها كنت مهظومة
" يمكن بابا راح يرجع ملابس ماما للكنتور
عافت سهير التلفون ضيقت نضرها عليه
" اشلون راح يرتاح هيج ؟؟؟ كل ما ننزلهن يرجع يطلعهن ويحطهن كدامه
" عوفي على راحته سهورة
هزت ايدها وكالت
" عود قيس هم مثل بابا ؟؟
ابتسمت من قارنت خطيبها بأبوية
"لا يعيني  بابا ماكو منه ابد ما نسى ماما لو واحد غيره ورة الاربعين يزوج كافي هو صارله ست سنوات ما يقبل لا نشيل ملابسها ولا يقبل احد يشيل  صورتها من الاستقبال ...
كملت واني اتأمل السكف بذهن حالم
" ااااااهييي هم عود الكه واحد يحبني مثل حب بابا لماما ؟؟؟
ضحكت سهير
" ولج انقرضوا تعاي شوفي قيس بس راسلته من صفحه ثانية رد وسواني مزوجته ومطلكه منه وماخذه افلوسه ههههههه
"ههههههه صدك والله لو تشاقين
"ههههههه والله ؛ زعلت يومين وضحك عليه ورجعت المهم كولي الي بعدج متحمسة لفكرة الدوام
"ايييي كلش ... الله سهير ما مصدكه راح ارجع طالبة والبس ذيج الصدرية السودة والكصيبة ورة ضهري
"يبوووو عليج الناس تدعي تخلص منها وانت ميته عليها ؟؟
" ولج ما اعرف شصارلي انوب من رحت سجلت يكلك طفلة توترت وخفت من المديرة
"ههههه اشجابج للضيم كنتي مدلله
"اي والله هههههه بس والله حاسه نفسي راح ارجع اعيش ايام حلوة ... افضل من الروتين الملل
" اي بس يا رهف مو يومين واتكولين مليت
اضجورت من كلامها
"اووف ليش انتي واخوتي ما مقتنعين هااا
" مو انتي بوكتها من جنتي طالبة خلصتي ثالث واشكد اتوسلنا اكملين ما رضيتي والله شنو اريد  ارتاح الدراسه هم ..
"كافي كافي سهير
" ههههههه هم ضاجت بس انتي هوائية كلش
" غير تسكت
انطيتها صفحتي وحطيت ايدي جوة خدي
ليش ما يصدكون بيه عبالهم فترة وامل وحرامات الفلوس الي دفعتهم ممم يعني صح اني اهواي متعبة بابا بمشاريعي المنزلية الفاشلة واعاني من الفراغ القاتل لكن شسوي لازم ادور على نفسي مليت جدا من حالي ...كل الناس تتحرك الا اني واكفة بمكاني ماعندي جديد ... اشوف صديقاتي كلهن شهادات الا اني يمكن هذا النقص الي بية ... ما اعرف عندي رغبة كبيرة بهذا الموضوع واحس اني ظلمت نفسي بالسابق ...كنت طفلة ما افتهم شي وياريت اصرفت احسن لكنت بحال افضل  .. اعرف كل الي جاي اسوي متأخر لكن افضل من ما اضل نفسي على الاقل اطلع من البيت املي فراغي بشي اني متحمسة اله ويا سبحان الله يغير الانسان من حال الى حال صرت اتمنى البس ثوب الدراسة تمني !!!!
.
اضجورت وحزت بنفسي وشتمت حظي العاثر من كان الجو عجة حمرة ( عاصفة رملية) بأول يوم دوامي خرب عليه فرحتي وما قبل بابا يوصلني حتى هو ما راح للدوام كعد كال ما اشوف اسوق هو اني نضري على كدي ...
ثاني يوم الا دوامت  
واتعودت وفاجأت  الكل من ضليت على نفس  التحمس على العكس كمت ما اشتغل بالبيت دومي اقرة وعلى حضي التربية قسمت الرابع من عام الى قسمين ادبي وعلمي اذكر على زمني كان الرابع عام  .اختاريت  القسم الادبي ... اتعرفت على زميلات ومدرسات 
طلعت من مود الفراغ الي كنت معيشة نفسي بيه ،
بيوم كنت اتحضر حتى اروح للدوام كانت الساعه ب11 وربع  ودعاء اتحضر اكل .. اندكت الباب
رحت افتح الباب وجان اصير بوجهي جارتنا ام عابد
"هلا هلا برهوفة
جرتني بوستني اني احتصرت ضوجتي بداخلي ودخلتها اصنع الترحيب !
كعدت بالهول ورحت اصيح لدعاء او نهى مرت سامي وحده منهم تكعد يمها واخلص منها
"دودو حبابه اجت ام عابد روحي اطلعي
ورحت لغرفتي اكمل تبديل ... وكفت كدام المراية .. ما عاجبتني الصدرية احسها عريضه واني احب البس مجسم على الجسم .. اووف انوب وجهي تعبان  من غير مكياج اووف مرة حطيت كريم اساس المديرة هزئتني يكلك اطفال مو نسوان نظامها  صارم والله اعرف مدارس صباحي ويحطن اشكال ...
اني بيضة حيل وقصيرة وجسمي ممتلئ عندي بطن صغيرة ما اكدر اسميها كرش ولا هم انكر وجودها .
اني اشوف ملامحي عادية جدا لكن غير اااه يا غيري محد يشوفني اصلا !!
طلعت من سمعت دعاء اصيحني ...
وكفت يمهن هي وجارتنا
"هلا بالعروس .... يا من صدكج لابسة صدرية والي بكدج بزرن
و هذا سهم من سهام الكلام المسموم الي يرموه الناس عليه من غير ما يثمونوه
دعاء " رهوفة جايج عريس خاله ام عابد اتعرفه
اخذت نفس طووويل محاولة امسك اعصابي وما ابجي كدامها من كسرت بخاطري وكلت مستنتجه حظي
"ارمل لو مطلق لو شايب هالمرة ..
"يا اشبيج خالة اتقلدين ؟؟؟
دعاء
"لا خالة مو قصدها
" ما قلدت بس خالة اني منو كالج اريد ازوج ؟؟
"ليش يااا ما تردين ترتاحين ...الي بعمرج جهالن بطولهن
دعاء
"رهوف اكعدي واسمعي ..
غمزت الي حتى لا اثور بوجه ام عابد واكعد اتهدة
كعدت واني طالعه روحي
"هو مزوج ... بس مرته هاملة نفسها ومراويته النبي العربي ...ويريد وحده تعتني بنفسها ...اني كلت ماكو مثلج وحده معتنيه بروحها
" يااا شنو شايفتني خاله ... هذا هيج واحد ما اله امان يعني قدر الله وصار عندي اطفال ما كدرت اعتني بروحي هم يروح يطك الثالثه ..هههههه هذا اشكد ناكر الع...
قبل لا اكمل سكتتني دعاء حتى لا اعصب .. وهي تفاهمت ويه المرة ردتها بأدب .. واني سكتت لكن بأخر شي من رادت تطلع ذبت عليه سم من كالت يلا ماكو نصيب اصلا هو منو يكول يوافق ياخذها اذا شافها بس اني احبكم واسعى بالخير الكم خاصة ام سامي الله يرحمها مفضله عليه اهواي وردت اريحه من اسعى لبتها
اني ما رديت بشي ... ولا كلمة طلعت مني غير اني من حزني وانكساري ...رحت وكفت كدام مرايتي وعاتبت نفسي اني ليش الله خالقني من دون اخوتي هييج ليش خشمي كبير ليش حلكي اكبر ؟؟ اعيوني اشدعوه اصغار ماخذه مساوئ ملامح امي وابوية و خالتي وكلها لازكه بيه صايره شي ثاني مختلف عنهم من انجمعن بيه كلهن ...اريد صفه بوجهي اتخلي اي احد يبتسم من يشوف ملامحي ويتفأل حالي حال البنات ...ماكو ..ليييش ؟؟ شنو ذنبي دوم اتعاير بخلقتي .. مسحت دموعي  . ووخذت جنطتي وطلعت ما انتظرت لا الغده ولا ابو الخط يجي .. مدرستي بينه وبينها حيين مو قريبه علينا بس من خنكتي ردت امشي بلكت ترتاح نفسيتي ..الساعه اتعدت الوحده يمكن لأن طلعت هي فوق ال12
بس المشي كان بطيى امشي وفكري شارد ..بعدين من اذكرت الجرس يدك ب1 ونص شفت الساعه وسرعت ؛ كانت الفروع  شبه فارغه الناس كلها ببيوتها ...او بعدها بأشغالها  .. الجو دافي بوجود الشمس  لا هو حار ولا هو بارد  .. امشي بسرعه ومشيت من الفروع حتى اختصر الطريق ..  طلعت على ساحه .. عكبتها ابسرعه .... و طلعت من دربونه اطل على شارع خدمي  ..  عرفت بعد شارعين واوصل للمدرسه  .. اتقدمت بالمشي وشفت شي من بعيد على الارض ماكدرت اميزة شنو هذا مرة رجال ...شخص واكع على الارض .. اتقدمت بالمشي وكمت اسارع .. وعرفته رجل من بديت اتقرب بس ليش على الارض؟؟
باوعت يمنى يسرة ...اريد اشوف بشر اهنا ماكو الدنيا ضهر وهذا الشارع ابيوته سنطه وبس صوت العصافير تتعارك اسمعه ردت سيارة تمشي على الشارع ماكوا يكلك مهجور ..هو الحي جديد  اساسا هاي الاحياء كلها جديده  انبنت ،، اذكر المدرسة كانت يم مصانع تبعد عنها كم كيلوا متر .. بس بعد الهدم اتحولت ابيوت .. عرفته شاب من وكفت فوك راسه مترددة اتقرب اكثر لو اروح
يالله مبين متخربط لو بي شي ماكو احد ينام اهنا على الرصيف!!!!
" يا ولد ...بيك شي
عرفت سؤالي مو منطقي ياربي شسوي معقولة فخ الي دسكتي يارهف منو اعمى ينصب الي فخ دنكت وركزت بيه ..ااه طالع من خشمه دم ؟؟ هذا صدك متخربط مو جذب .. ايدي ترجف كوة دنيت راسه حتى اشوف وجهه  وابعدتها عنه.ااااه هاي شنووو شاب الله  ناعم عليه بجمال وبياض .. تركت الحالة الي هو بيها وركزت بخشمه اشلون منحوت نحت لعد ليش ياربي ما ناعم عليه مثله استغفر  الله اني شفكر هسة والولد خشمه مغرك اشفاهه بالدم  شسوي هسة ...طول وعرض شكومه منه هذا
ضليت اتلفت عسى ولعل يفوت احد ...
همست
"يا ولد  يا ولد
تجرأت  اكثر وضربت خده بخفه لحيته جكجكت ايدي
مدري ليش رعشت وكمت ...
كمت متخوفة ياربي شسوي هسة هذا امنين طلع الي انوب لا بيه اعوفه وامشي ولا اكدر اسوي اله شي ..
من ربكتي ما عرفت شصرف بهذا الموقف فقدت ادراكي ...كل الي فكرت بيه اصحيه .. ...
طلعت بطل ماي من جنطتي جنت مشتريته  بالطريق عطشت .. ورشيت على وجهه  ووون
"اااااه ...
كمت اشوف عينه تنفتح وتنسد ويتأوه متألم
"خوية تسمعني  خوية
ركز نظرة الخافت عليه ..
" م ما ماي
كبل حطيت البطل بحلكه خليته ينقط عليه . ضل يسعل شرك
" خوية اشبيك انت تتاذى!!!
" لا لا    متونس
اااهااا هذا شيكول ؟؟؟
يسخر مني خرب حقة هو كاضي واني اسائلة
انتبهت لروحي حاطه ايدي جوة راسه وساندته  وراسه قريب عليه .. نزلته مخترعه من نفسي خرب من طلب ماي نسيت نفسي .. وكأن هو عايز ركع براسه  واني كملتها عليه .. تأوه حيل واني رجعت انحيت عليه
" شسووي خوية كوول
ادموعي طلعن وخفت كمت ارعش كلي .  الموقف مكان سهل واحد شابع كتل مبين ومدد بالشارع..واني وحدي ما اعرف شسوي طرت ببالي فكرة اعوفه واشرد لكن اكو شي مانعني وهو انسانيتي ..  اذا عفته يضل ينزف .. لأن  راسه مفشوخ .. باوعت لأيدي برعب من انتبهت على الدم
" د دك دكي باب الج ي ران
مافهمت كلامه
وهو عاده بالقوة
صدك وين كان عن بالي غايب اروح ادك البيبان اخلي الناس تطلع اشوفه ...يمكن الخوف سطرني .. رحت دكيت باب ولزكت عليه محد فتح
رجعت اله ابجي
" مح محد يفتح شسوي حباب كول
" ا ار وحي لغيره
هي واضحه بس اني بعد انسطرت
"ما ما حروح اخاف محد يفتح حباب سامحني
" ي لا ي ي معو د ة ت تع تع ي
الولد ضل يسعل ...
ضل يريد ينطق صار صعب عليه النطق ..
" هسة ش شسوي
"تلفو ن ج
اني طلعته وحطيته بايده ظنيته هو يريد يتصل
لكن هو ايده كوة حركها
" خ ب يمعو د انت انت
بعده ما كمل جملته اجني من يمنا سيارات مظللة وكفت يمنا ونزلوا منها زلم  اتخوف واني صافنه ممستوعبة شي !

يتبع