رواية سلطان زمانه الفصل الثالث 3 - بقلم زهراء العراقيه

من اخمص قدمي لراسي ارجف رفعت كذلتي دخلتها بالشال من ارتباكي ما اعرف شسوي الزلم اول ما نزلووا كأنهم ما مستوعبين الي يشوفوه ...
واحد خزرني بقلق و صاح

" مااااات ؟؟؟؟
كلهم مخيفين من كثر فخامتهم هي لحظات سريعه عقلي ما فكر بشي غير بالهروب خليت وركضت كل قوتي واني اتخيل الزلم وراية تركض .. كمت الهث وما وكفت استمريت بالركض . وصلت لباب المدرسه .. دخلت ركض مذعورة للمغاسل غسلت ادية
ورحت للصف شفت البنات كاعدات ينتظرن المدرسة تدخل كعدت بالرحلة ارجف اعتقد لفتت نظر الجميع .. التمن علية النسوان وصديقتي ضلت تسأل اشبيج
اني مجاوبها صورة فلم الرعب بعدها بعيوني .. الشاب و الزلم والدم .
" م مبيه مبية .
" ليش اترجفين . و وين جنطتج
صفنت بالوجوه
" م م مدري عفتها ... اتعرض ال الي جلب وعفتها
نمت على الرحلة من هبطتي احس صدك صار عندي هبوط .. صديقتي مسدت على ضهري وجابن الي ماي اشرب
شربت كان ريكي ناشف .. وبعدني الهث من الخوف
البنات واسني عبالهن صدك كلاب متهجمه عليه .. ما ادري اشلون الفت هاي الجذبة يمكن من خوفي لا اتورط بشي كمت اسفط حجي ...
ما اكول ذاك اليوم عدى على خير لأن ضليت بس اتخيل وميته خوف وما مركزة بشي ... رجعت للبيت وحلفت بعد ما اطلع من غير الخط .. اتلكاني ابوية
وحاسبني اشلون اطلع من غير الخط وحدي ..
دخلت لغرفتي منهكة كبل اخذت ملابس و وجهي للحمام ... طبيت جوة الدوش واني بس اتخيل الي صار بيه اليوم ...اااه ياربي اني شورطني و وكفت وهسة شصار بيه ؟
دخلت لغرفتي لكيت دعاء كاعده يم سهير
" رهوف احضرلج الغده ؟؟
ليش طلعتي من غير ما تاكلين شوفي وجهج اشلون صاير اصفر
" لا دعاوي ما اشتهي
سهير
" اشبيج ولج لسج ضايجه من كلام ام عابد الدفش

اتكدرت اكثر من تذكرتها يبوووا منها
اتعذرت مني دعاء لأن صاحتني وخلتني بموقف مزعج .. لكن طلعت ام عابد هي مصرة الا تحجي كدامي ..اووف منها كل الي صارلي بسببها

بيومها كوة دخل الزاد لزردومي ...

ردت انام
تذكرت الولد وهيئته يااااربي خطية ليش هيج مكسريه ....اوف انوب ذوله منوا وشراح يصير بيه المسكين معقولة مااات ااااااه لا ياربي اكيد عنده امه تعبانه وسهرانه الليالي حتى ابنها يصير رجال يموت هيج والله حرامات ...
تذكرت تصنيفه عليه وهو بأتعس حالاته ياااربي ما اعرف ليش حفظت شكله وحسيته شاب زين وطيب
اني غبيه شلعت كلبه كله بسببي لو عندي سرعة بديهة من اول ما شفته اروح ادك بالبيبان او اتصل بالشرطه او اسعاف . ليش اتغابيت حيل ...اااه بس هم جان تورطت بسالفته وشيخلصني من اهلي اذا دروا ...ياربي معقولة هسه الولد روحه فارقت جسده !!
ما كدرت انام واني بس اتخيل بيه وضميري دمرني احسه اذا ميت فبسبب غبائي كتلته ..للشاب

مر شهر يمكن او اكثر الا كدرت ارجع اشوية مثل قبل بس كل ما اتذكر السالفه اتكدر ..صرت اخاف اطلع وحدي ..
كنت كاعده انضف بشاشة تلفوووني ودك التلفون
وضهر كدامي اسم رقمي2 عااااا ياااااالله
شمرته على الفرشه من خوفي وضليت صافنه على رقمي ..... هذا رقمي مال جهازي الصرصور الي اخذه للمدرسة وياي ...اني اني عفتة بيد الولد وشردت ...هذا منو يتصل بيه عااااا
وكفت يم زوية واعض بصابيعي واني اشوف تلفوني كل ما تخلص المكالمة تجدد غيرها .. اخير شي غلقته وحطيته بالمجر وطلعت من غرفتي .. متت خوف رحت ادور على سهير ردت احجي الها كلشي واشوفلي حل .... لكيتها خاتله بالمطبخ تتغازل ويه الحب ....عفتها ورحت لغرفة دعاء شفتها مسدوده استحيت ادكها اخاف فرات يمها ... اخر شي رجليه اخذتني لغرفة الجهال ..كعدت يمهم وهمه ما صدكوا اجي حتى اسولف الهم قصص ...كملت واشوية الخوفة خفت ...بس حيل كسرت خاطر نفسي حسيت نفسي بوحدي اهنا محد يسألني اشبيه الكل ملتهي بحياته .. رجعت لغرفتي ولكيت سهير هم تخابر .. لفيت راسي ونمت على ضحك اختي ويه خطيبها ....
.
ضل الرقم يدك واني اخاف واغلق التلفون ولا مرة اشجعت افتحه ..
بيوم كانت نهى تطبخ و دعاء ببيت اهلها و سهير بالدوام لأنها موظفة بالصحة . والرجال اكيد هم بشغالهم بابا مدير عام بدائرة حكومية واله اسمه ومركزة .. و اخوتي هم كلهم موظفين والحمدلله بسبب نفوذ بابا ومعارفة ابسرعه يحصلون تعيين

نهى" رهف رهف
اجيتها واني امسح الكحلة اريد اتحضر للمدرسة
"ها
"حبابه ابسرعه طلعي الحاوية سمعت صوت سيارة
ركضت ... سحلتها سحل كانت ثقيلة عليه متروسه مو مال هم نفوت اهل البلدية .... طلعتها ووكفت همزين بعدهم براس الشارع ما واصلين النا ..بس ما دخلت اعرف شغلهم كلش زين كل ما يجون يشمرون حاويتنا بوسط الشارع واكثر من مرة تنوخذ ومانعرفها وين اتروح انتظرهم افضل الي ..
اهنا شفت طفل جيرانه ضحكت بوجهه واني اخرب ضحك عين بيها كحله طووخ وتحديد وعين فارغة
اجاني يركض .. عمره 5 سنوات وفره حيل امه صديقتي دوم تحطه يمي من تطلع للطبيب لانها حامل وهو متعود عليه .. شلته وطلعت من جيب صدريتي نستله وهو فرح يضحك وابوس بيه وكنكن ..ما منتبها للسيارة صارت واكفه ابصف بيت جيرانه ... وعامل البلدية اخذ حاويتنا ..وذب محتواها بالسيارة
كنت الاعب الطفل ...
باوعت شفت عامل النظافة كان ملفلف وجها ما مبين بس اعيونه يباوع الي ويذب بالنفاية .
نزلت الطفل راح . وابتسمت اله
" حباب حطها يم بابنا مو تشمرها بوسط الشارع ..
ما رد عليه بس ما شال عينه عني ...اني بداخلي هلكت ضحك ... واخيرا واحد باوع بوجهي .. عفته ودخلت للبيت ......
كانت سهيرة بالمطبخ تخابر خطيبها .. واني وحدي بالغرفة صافنه على رقمي الي ما بطل رن عليه !
بهاي اللحظه هم دك ردت اضغط على الحمرة وارفضة غلطت وردت
" الوووو واخيرا
كنت صافنه على نفسي بالمراية اشوف نفسي واني كاعده انتبهت ياااا اني فاتحه خط .....وصوت رجل اااه هاي شنو
"الوووو رهف مووو ردي
نبرة صوته هادئة جدا و رغم البحة الرجولية الي بيه لكن حسيته يتكلم بأرتقاء ورقة .
جذبتني الى ان اهمس واني حاطه التلفون على اذني وايدي ترجف
"الو !
" رهف ...اشلونج ...اشلون صحتج
ازداد اضطرابي ... غلقت الاتصال واني الوب منو هذا وشمعرفه بيه ...عااا تلفوني يمه .. بس اشلون عرف اسمي رهف !!!!
ياربي شنو اني شورطت روحي معقولة ذوله المافية .كتلوا الولد واخذوا تلفوني ودا يتصلون بيه حتى يقتلوني .. اي لأني شاهد على كلشي .. يااااا الله شيل هذا الهم عن فكري
ضليت اروح وارجع بالغرفة ساعه ادعي وساعه ابجي وتلفوني ما بطل رن . باوعت لنفسي بالمراية
وضربت وجهي بأثنين ادية
" ارتاحيتي .....اشوكفج يالثولة ......ورطتي نفسج
وراح اتخسرين دراستج
اي اي لا اتباوعين هيج بغباء اكيد اهلي بس اكول الهم يبطلوني .. اااه شورطتي نفسج يارهف يا غبرة وثولة
ضليت اهزء نفسي وابجي ...واسمع صوت رسائل على الفايبر ...
اتقربت يم فوني .. .
شفتها من رقم غريب ...منو هذا
مسحت دموعي .. وشمرت الفون بالمجر كله كارهته
تالي الليل والناس كلها نايمة بس رهوف كاعده وكاتلني الضيم اني شسويت بروحي وشنو من ورطه اني بيها ....تذكرت التلفون طلعته .. فتحت الرسائل الي على الفايبر ...
" يمعوده ست رهف لا تخافين ردي اني الشاب الي شفتيه على الارض
يمعوده مرايد شي بس ارجع الج غراضج
الووو
ردي

انفرجت اساريري من شفت المسجات كبل من غير تفكير اخذت رقمه ورحت فتحت صفحته وشفتها اااي هووو هذا هو بس شنو هذا .. خرب جمال مو طبيعي لو ما اني شايفته بالحقيقة لكنت ظنيته كذاب سارق صورة مودل اجنبي وحاطها .. ضليت أتأمل بجماله .... ابيض وشعرة اسوووود ثخين ولحيته محدده بارزة رجولتة .. ابتسامته والغمازة المنفرده فد شي . لا ولبسه ياربي لبسة والاناقة الاخاذة . اعيوني احتارت بيمن اتركز ...فلست صفحته ... عمرة 28 ياااااي اني اصغر منه ..من بغداد ...اويلي فديت بس الاماكن مال صورة كأنها بالخارج مو اهنا ماخذها ....
تأكدت هو وبعده حي الحمدلله . رديت بمسج بالفايبر
"هاي انت عايش واني متت الف مرة من تأنيب الضمير
ابسرعه صارت مرئي !
رد عليه
" اكدر اتصل لو لا
باوعت لأختي نومها كلش ثقيل
بس احتاريت اني ابد ما مسويتها بس اكو سر، جاذبية صوته لهسة ترن بأذني خلتني اورط نفسي واكول اي
اتصل هو من رقمه
واني الخوف اكلني اكل بالقوة فتحت خط
" مساء الخير ...رهف
" ه هلا
انت هو ؟
" نعم اني هو
"منو ؟؟
"ههههه
ضحك برزانه بعثرني بضحكته
"اني الي عفتيه بوسط الشارع وركضتي بكل قوتج
"ها ها
افتشلت من نفسي نزلت التلفون وضليت اعض اعض بأصابيعي
رجعته على اذني
" الو وين رحتي
كان صوته واضح عليه النعاس
"اشلون شرده شردتي
" ت ترة اني ابنية
" ادري ابنية
" اي اي ومن حقي اخاف
"اي والله صدقتي ...اصلا انتي شوكفج مرة ثانية لا تورطين نفسج بهاي القصص
"يااا يعني تريدني اشوفك وامشي عااادي
" اي احسن ما تتورطين بشي
انقلبت السالفه انوب هو يحذرني
" رهف عيسى
" انت انت شمعرفك بأسمي !!!!!!!!!!
"ههه
اسمج مدرج بداخل دفاترج
"هااااااا
نسيت
" اكول انت مشروع كاتبة خواطر ممتازة جدا
ابتسمت واتسعت فرحتي من عجبة اسلوبي
" ها مشكو........
هديت خصلت شعري واجيت اضرب نفسي راشدي على غبائي بلعت لعابي ورديت بخوفه
" انت انت شمدريك
ضربت جبيني بين ما هو يضحك
مدري التهي بسماع رنات ضحكته لو الطم على حظي طلع قاري دفتر خواطري االصغير وخرابيطي
اتحولت ضحكاته على سعل وكحه قوية ...ذكرتتي بأول مرة سمعت صوته
" ب باجر اخابرج حتى
انطيج جنطتج
" لا لا ما اريدها احركها ... اشتريت كتب ومشى الحال شكرا الك ..
سديت الخط واني متعجبه على نفسي اشلون كدرت احجي وياه

ما دك عليه ثاني يوم رغم اني صح رفضت بس كنت متمنية بداخلي يتصل علية مرت ايام ومشت ايام واني ما زال اتصاله يشغل فكري.
هاي الفترة كانت صعبة عليه بسبب الامتحانات وهم العريس اه من يجيني عريس ما احصل غير التعاسه والخبصة هالمره اكبر مني ب15 سنة رفضت وخواتي حاولن يقنعني وزعلت حيل من موقفهن اني رافضه الفكرة اني ازوج شخص عنده اطفال صح هو مطلق بس اعرف نفسي مو حمل تربية طفل مو الي وخاصه اكبار ... وهاي السالفه اتهيج عليه المواجع من يتقدم الي احد ... بيوم احد الامتحانات طلعت من البيت من وقت ب 10 ونص اروح لبيت صديقه قريبه علينا نراجع سوة ومناك اخوها يوصلنا .. لابسة صدريتي ولافة شالي مطلعه منه كذلتي ومن خلف حاطه قراصه مخليتها تضهر بشكل يعجبني ..
صار بوجهي عمال البلدية حيل استخطيتهم بعز الحر همه واكفين والشمس تسطع شيتحملون وكفه الشمس لو ريحه الزبل لو اللفافات الي مغطين بيها وجهم .... رجعت للبيت جبت دوركه و كلاص ورجعت سكبت ومديت ايدي للرجل كان يفرغ بالحاويات بالبداية صفن علية ...نظرة اعيونه كانت مستغربة على متعجبة ...خله ايدي ترعش حسيت تصرفي اخرق
ابتسمت كوة وكلت
" الله يساعدكم و يرزقكم
اخذ واخيرا من ايدي الكلاص كأنه اجه بوقته صكه كله جرعه وحده سكبت اله واحد ثاني هم شرب نصة رحت ردت انطي الثاني هو اجه ورايه
اشر بايده يريد الدوركه
انطيتها اله واني مستغربة ... اخذها وراح هو انطه جماعته واني على وكفتي رجعلي انطاني الدوركه
"رحم الله والديج
اخذتها ودخلت مستعجلة اريد الحك اروح من طلعت شفت السيارة اتحركت .... اني ركضت تقريبا ورحت لبيت صديقتي ...

طلعت من الامتحان ... انتظر والدي كال ما اكدر اجيج اتأخر نص ساعه ..
نسيت اخذ تلفوني حتى من يجي يتصل عليه اضطريت انتظرة برة بالشارع ...
دقايق مرت ووكفت كدامي سيارة حديثة من اتقربت عليه وكفت وانفتحت القمارة من فوك....اني اعيوني من وحدها جذبتها لمعة السيارة والي صاعدها .شاب مفتول العضلات ببدي ابيض ربع ردن لابس مناظر شمسية
التفت علية واشر
اني باوعت منا ومنا اكيد مو الي وغلست
رفع المناظر عن وجهه اني ضليت ارمش بعيوني ممصدكه الي كدامي هذا هو ؟؟؟ الشاب ابو خشم منحوت نحت بس اعيونه هالمرة ملفتات للنظر ماشفتهم عدل ذيج المرة ولا بالفيس عسلي وذبلانه رفع ايده واني اتخربطت احوالي من شفت تلفوني الصرصور بايدي يلالي لا والله ايده الي تلالي مو صرصوري
احتاريت شصرف اروح اله ؟؟! لو شنووو بعد وقت على جية والدي عيب خل اخذ تلفوني منه ...
اتقدمت كم خطوة وصرت يمه ...
فتح الباب وفاجئني بنزولة صار امامي الشاب الطويل . مرحبا رهف ....
" م مراحب
جرئتي المعروفه اختفت كدام هذا الحضور القوي ..
" هذا تلفونج ...ست هاربة .. وراح للسيارة رجعلي شايل بأيده جنطتي الي على شكل قربة سودة وبيها سحابة حربية تك يده بيها ... اخذتها منه بأيد ترعش
" اتفضلي
وليش واكفه اهنا تحبين اوصلج
" لا لا بابا جاي
"اها الله يخليه الج
اروح لا اسبب الج موقف محرج
هو يحجي واني جسمي خاني يرجف مووو خوف من بابا لأن ادري مراح يوصل هسة بس وكفتي وياه هي بحد ذاتها تموت عود اني المطلعه والي دك سوالف ويه اولاد خالاتي وعمامي اشبيه هسه عايشه دور الانثى الخجولة كدامه
غمز الي وكال
" ترة صدك انت موهوبة بنقل المشاعر بالنسبة لعمرج كدامج مستقبل مبدع ..رهف
"عمري؟؟؟
"اي يعني اقصد بصراحه مو مال وحده عمرها 16
اتحجر الكلام ببلعومي ضليت اباوع اله ببلاهه
هو ابتسم واشر بأيده مودع ورجع صعد وراح ..

واني واكفه صنم
" 16 !!!!!!!!!!!!!!
ابتسمت زين هو ما شاف المدرسة مسائي مكتوب اسمها بالكتب عاااا صدك هو شدلاه بيها خرب غبائي اكيد قرة اسمها وهمزين ما ركز بالعمر اثاري الكصر هم اله فوائد ههههه
رحت للبيت وبس اباوع لوجهي بالمراية فرحانه بس معقولة وجهي مبين عليه مو مال مراهقة هههههه
دك تلفوني طفرت اله عبالي هو تاليها طلع رقم صديقه ...اي صديقه عزيزه كانت بئر اسراري واعزها اكثر من نفسي طلعات وطبات اني وياها حتى تداين مني افلوس اخر مرة اخذت مني 500 الف سلفتي كلها واني بنفس طيبة انطيتها وكتلها على راحتج ..
واختفت فجاءة ومن اتصل ما اترد ومن اعاتب تبرر هي مشغولة وتزعل الى ان عرفت من صديقات بعيدات هي مخطوبة !!!!!انصدمتواتعاركت وياها اني وياها كنا نتنفس سوة ليش عبالها ما افرح الها
مع هذا بعد العركة انتظرت منها اعتذار وارجع والله بس هي اجت شمرت الفلوس بوجهي وطلعتني اني غلطانه !!! عجيب الناس ليش صارت تخفي افارحها كدامي كاني راح اسرقها منها ما رديت عليها
رن مرة ثانيه اجيت انطيها رفض طلع هو رقمه اني حفظته شفهي فتحت من غير تردد لان هو اخذ مني شي خاص
" مرحبا
" اهلا سيف
" يا هلا بالهصوت
"ااا امم ليش ما رجعت الي دفتري
" اي دفتر
" دفتر الخواطر
" اها مو طلبتي احرقهم !
"اني م ما ما ... اه انت رجعتهم بعد كلهم ليش هو ماكوا ...بعدين اشلون عرفت عنوان مدرستي ووقت خروجي واجيت
" يا الله كل هاي الاسئلة لازم اجاوب عليها
ترة والله كلها سهلات
بعدين تعاي امنين عرفتي اسمي !!!
"هااااا!!!!!
انصرعت من الفشلة شكوله اله ماخليت برنامج ما بحث على رقمه وطلعت بروفيلاته كلها خنب
" ها ا عرفته من دزيت مسج الي بحثته بالفيس حتى اتأكد انت نفسك مو المافية تهدد
رد مستغرب
"شنو
بعدين هلك ضحك عليه
دخلت اختي سديته بوجهه ورسلت رساله اله يحرك الدفتر
رسل هو صورة للدفتر وهو مفتوووح خرب
"ليش اغلب كتاباتج حزينه
رغم صغر سنك
ضجت من هاي الكلمه احسها ثقيلة عليه
" ملاحظه اني صح في صف الرابع اعدادي لكن بمدرسة مسائية
"اهااا فهمت اسف اسف جدا لكن ليش مبين عليج ذكية
" لو ذكية مكان تركتها
من رسلت الرسالة الاخيرة عضيت شفتي ندم اني شجاني وانفتحت هيج وياه معقولة لهالدرجه صايره حالتي بس اريد اتشبث بشخص والغي وياه
لمت نفسي بين ما اشوف جاري الكتابة
واخيرا وصلتني الرسالة
" مو دوم التصرفات الخاطئة اتكون بسبب الغباء مرات الضروف تحكم .الذكاء هو نضل نحاول نصلح الي فات هو هذا الصح
" صحيح كلامك
اهنا ردت ارسل مع السلامه و اودعه وداع ينهي كل شي
لكن كلامه صفني من وصلني
" مرات نوكف نفسنا بباب حلم واحد وكل ظنه لو تحقق هو راح يكون طريق نجاحنا الوحيد ..مع ان اكو اكثر من باب مفتوح الك انت ما اشوف غير المسدود بوجهك واتحاول تفتحه وما تتمتع باي شي بالتالي لا المفتوح ولا المغلق ...ما تلكه غير اعصار اذا انفتح بوجهك هذا الي صار بيه من لكيتيني على الارض مثل الجثة الهامده ..
خانتني كلماتي شرد على كلامه اني فهمته كلش زين لكن اضاهر حياته صعبة جدا الله يكون بعونه زين من طلع منها سالم
وبالتالي ما طلع مني غير كلمه
"حمدلله على سلامتك
"حيييل توك ذكرتي تتحمدين !!
هم عضيت شفتي هالمره حيل شنو اني ما تحمدت اله من قبل !!!اه يا بعثرت افكاري
ما رديت
وهو انتظر ردي من شافني تأخرتي اتمنى الي ليلة هانئة وراح بس ما ودعته وداع حازم ومانهيت التواصل بينا .. ضليت بس افكر واستنتج شنو قصته .....!!؟؟
بيوم ثاني هم اتصل واني بصراحه كنت على نار اتمنى يتصل !!!
طولت مكالمتنا متهزة فرصة سهير دوم اتعوف الغرفة واتروح تختل بمكان تخابر خطيبها واني الي الغرفة بأكملها !! قفلتها ورديت عليه ...حاولت انعم صوتي اكثر فوق ماهو ناعم حيل
" مرحبا
اشكثر حبيت هاي الكلمه ممعقولة هاي الكلمه منه ياربي مدا اتخيل هذا الشاب الحليوة يكلمني الي !!

بهذا اليوم اهواي تحاورنا بمواضيع عده .. لكن كل مانوصل لموضوعه يغيره لحد ما فضولي سيطر عليه وسألته بصورة مباشرة
"سيف انت شنو الي صار وياك بذاك اليوم ومنوا الناس الي اجوي يمك واني شردت !!!؟؟
تنهد وسكت اشوية
جاوبني بضيق خلك
" تعرضت للخطف والسرقة .. والي اجوي اهلي كانوا مفزوعين علية
"اهاااا هيج السالفه الحمدلله همزين ما قتلوك
" خلصتي امتحانات
صفنت على تغيره للموضوع احنه وين وهو وين راح
" اي على وشك الانتهاء
" صدك ترة عدنا كوفي شوب ..اتكدرين تجين ؟
"ها
"اقصد انتي واهلك اقصد بس المحك
"هااا ليييش ؟؟؟؟؟؟؟

يتبع