رواية سلطان زمانه الفصل الثاني والعشرون 22 - بقلم زهراء العراقيه

من كتابات زهراء العراقية
غلقت الخط و شعلات نار ودا توكع على صدري حرگتلي قلبي دك عليه ...واني بعدني بأثر الصدمة ..اخذت التلفون واني كل جزء بيه يرتعش طفيته و نار قلبي ما طفت اتحولت لجمر يحرك احشائي ...حسيت بوجع قوي براسي .. غطيت وجهي بأثنين ادية ....
"ااااااااااااخ
صرت ابكي وانحب بس اهاتي يطلع الها صوت ...
احساس الخيانة مر مثل العلقم وامر منه بعد ياخذ منك طاقتك كلها و يخليك بس جسد خاوي اتحس كلشي راح منك لا كرامة لا كبرياء وقلبي انتزع مني من غلط بأسمها ايقنت كل حلفانه كذب كل كلامه كذب بكذب بس هو قلبي المحب كان يصدك كلشي
انتهيت ...صبح الصبح .. واني على كعدتي ابكي على حالي واصفن على روحي اشلون بليتها بحب اذاني حيل ليتني ضليت على ذكراه وما اجاني هو احنه رجعنا لبعض حتى نفترق اني اعرف من اول يوم دخلت للبيت حسيت نفسي مراح ادوم بيه . من انام على صدرة ما اعرف ليش كنت احس يجي يوم واترك حضنه ..... سمعت صوت الجرس .. تذكرت بابا ...رحت غسلت وشفت رامي كاعد توه من النوم يفرك بعيونه وراح للباب ... دخلت لبابا .. بعده نايم ..
جلست جنبه ...
ليش يا بوية وكعت ...اريد اني اوكع على صدرك واشكيلك همي ماعندي غيرك ...اني بحاجتك ...كوم الي بابا ...مسحت دمعتي وكلت خل اروح اخابر سهير اشكي الها بعد ما يفيد الكتمان راح انفجر .طلعت من الغرفه ...
رامي"هذا عموا سلطان خاله .
"شنو؟؟؟
"كعدته بالاستقبال يصيحج
اشعنده جاي هذا
رحت اله و اني ناوية اطرده من البيت ومن حياتي يخسأ يشوف انكساري مرة لخ
دخلت ...
من شافني انتكأ على الطقم وحط رجل على رجل
" صباح الخير رهوووف
عضيت شفتي ندم اشلون قلبي غلط وحبك بيوم
استصغرته حيل بنظراتي
" اشعندك جاي ؟
" اشبيج اتحاجيني هيج ...اجيت حتى اتريك

غمزلي كرهت نظراته

" اطلع برة سلطان ....ما اريد اشوف خلقتك . ورقتي تجيني لهنا ....
نزل رجلة
"ايباااااه اشكثر انت متمسكة بيه
" كافي سلطان جاي من صباحيات الله حتى تغثني ..
" غير احبج .
"احبج ؟؟ لك انت صدك بلا ضمير
كعدت تعبت من الوكفه ودخت ....
" الله اعلم شنو الي بينك وبين بت عمك بالحلال لو بالحرام وجايني بكل عين قوية ...شنو اتريد انت فهمني ...
" غير مرتي اهنا
كان يتكلم بهدوء مستفز واني كدامه أتألم من الغيرة والخذلان ....
رغم كرامتي الجريحه اكابر انفجر كدامه وابكي
"شنو الي صار بينكم البارحه .. بس احترم رجولتك ولا تكذب عليه ...مرة ثانية.
" مرة ثانية ...
اشتعل غضب ..وصك على اسنانه
"شنو تردين اتعرفين هااا مثلا اشلون نامت بحضني ... لو اشرح الك اشلون شعرها سرح مثل الحرير
كان يتكلم بحقد ممزوج بغضب ... اني مستحملت اكثر حسيت اعصابي اتشنجت و وجع راسي انتقل لخواصري ... لزمت بطني احسها دا تتقطع ....
"ااااااااااااااه
ااااااخ
على صوتي اجاني رامي و امه و ما اعرف بعد شنو صار صرت اصيح من الوجع وضهري هم كام عليه ...
غمضت عيني و ما عرفت شصار ...
فتحت ...الصورة بدت تتضح ...هذا وجه بابا ...
'بابا ..
حسيت احد لزم ايدي .. وضغط عليها ...عرفته هو بابا
صرح " واخيرا كعدتي ابعدت شيشيه العطر عن انفي ..
ايدي بيها كانونه و موصل مغذي ...انتهبت اني بغرفتي و صرح يمي و بابا هم ...
صرح " خل اروح اخبر زوجج كاعد على اعصابه ..
ريكي كان ناشف اريد اكول لا ...مكدرت ....وغفيت
..
صحيت على لمسات ايد على شعري .صار بوجهي ..هذا الي حطمني ..
درت وجهي عنه
"روح ....روح ..
بكيت
" روح ما اريد ك
طبع قبلة على جبيني
" رهوفه والله اسف جنت اشاقه وياج
وخرت ايده عن شعري
ومسحت اثر قبلته
"اكرهك .....روح ..
" لا عندي شي ويه حوراء ولا بيوم ممكن اغلط بأسمها ...ولج انت اسمج محفور اهنا ..
اشر على قلبه بين ما اني الغضب ملى عيني
"اطلع برة ما اريد كذبك
" والله وراس ابوج اني اتعمدت اكول اسمها الفجر
" اطلع بره
صرت ارعش
"هشش اهدي ولج
واسمعي كافي
انت صاحية اتخابرين بيه الليل كله خبلتيني عبالي ابوج مات من شفت عدد المكالمات
ومن اتصل بيج اتكولين الي ها خلصت
ندس راسي بأصبعه
"شنو خلصت هااا
شنو الي جان بالج خبله انتي
واذا يعني وياي بالبيت مرة عبالج اني ياهي التجي تلعب عليه
اشكد اشوف نسوان بس لخاطرج صاين نفسي وصاينج
كنت ساكته وبس دموعي تجري
" حوراء من وديتج لهلج اخذتها لبيت خالتها الي بديالى واتفقت وياها اتكول هي مختلتها يمها
و ما اتجيب طاريي لا يقتلوها اخوتها وفضيت سالفتها ما اصدكين خابري سلطانه واسألي ...
دخلت صرح قاطعته سكت ..واني مسحت دموعي ..
"ليش باكية رهوفه
رد هو
"لا ماكوا شي دكتورة ..
ابتسمت صرح اله
"العصر حبي ناخذج نحلل الج نشوف سبب الاغماء شنو
" خواصري يوجعني مو بس ضهري ...
"اها
على العموم العصر ناخذج لعيادتي وللمختبر وانشيكج افضل ...
بس ترة عندج هبوط حاد ...
دربالك عليها ابو نسب
"اشعندي غيرها
طلعت صرح
"ليش اكذب عليه
" دستي ببطني
ههه شنو خلصت هاا شنو قصدج بيها ...ادري بيج وحافظج
اجيتج من الصبح حتى نراضي حضرة جناب الملكة اتلگيتيني بوجه يابس وكلام يسم البدن شنو رجولتي ها ولج والله ما بيوم كذبت عليج والايام تثبت
كعدت وانسندت على المخده ...اخذت فوني ودكيت على اخته
سلمت عليها وسالتها على حوراء وهو يباوع الي ويهز بايده
خلصت مكالمه
" وكف هو
العصر روحي ويه اختج طلع افلوس حطهن على الميز
وباتي يمهم من اصيرين زينه خابريني
طلع واني معرفت شكول ...يعني هو هم غلطان بعد ما اعرف صدكه من كذبه ..
صرح جاية لوالدي من الصبح اتريد اتروح لدوامها ومارة بينا تطمن عليه لگتني اني متخربطة
.
العصر رحت مع صرح بسيارتها ... لكينا المراجعين جايين قبلها ..حطت جنطتها وصعدت وياي للمختبر

كنت اول مراجعه اني اخذوا عينه من دمي
ورحت مع صرحه لعيادتها ...سالتني كم سؤال بعد نصف ساعه طلبت من السكرتيرة اجيب الها النتيجة ...
اني كان بالي شارد وافكر بهذا سلطان اشلون لعب بحالي لعب ..افكر اخاصمه على حرگان الاعصاب هذا
صرح " رهف رهف
انتبهت الها
"ها
كامت من مكتبها.
" يا روحي انت حامل
" ها لا شنو يعني شنو مافهمت !!
عادتها عليه اكثر من مرة .. والتحليل كدامي ما مصدكه ....اني حامل ...الصدمة اخذتني من فرحتي كومتني صرح ونيمتني على السدية .. اني صافنه مدا افهم شي اني حامل يعني ببطني جنين اشو ما حاسه بيه مدا اصدك اكو روح بداخلي ....
رفعت ملابسي و طلعت بطني ....اباوع لشاشة السونار ..
صرح " لج ماما انتي بشهر الثالث داخله .. وينج عن نفسج
" صرح الله يخليج صدك شوفي اكو غلط ممعقوله اكو طفل بهذا الحجم ببطني
"هذا اشكبره ...شو دتعاي راح اسمعج نبضه حتى اصدكين ...بكيت من سمعته مدا اصدك ولا استوعب
"كافي كافي صرح وكفيه احس دقات قلبه راح توقف
"صحته جيده لكن
"لكن شنووو
" الطفل نازل لازم راحه تامه ..
اكولج هم ينزل عليج شي
"لا بس اليوم وجعتني خاصرتي
"اوكي ما تحتاجين ربط لكن راحه تامه جسدية ونفسية
ابتعدت عن شاشه السونار وكالت الي
" رهوفه .. دربالج الله انطاج هذا الطفل رزق انتبهي لصحتج ترة الحمل الاول وبهذا العمر بعد الثلاثين اذا خسرتيه من الصعوبة اكدرين اتعوضيه
هزيت براسي واني ادموعي مغرقة وجهي
حطيت ايدي على بطني بأحشائي طفل دا يتنفس ويتغذا مني ..

بعد ما استوعبت الفرحه ... البيت كله فرحلي ...
وكلها درت الا واحد الي هو اب الطفل بالقوة ماسكه اعصابي كل اشوية اريد ادك عليه واكوله  لكن    ماكدر وبينا زعل الا اشوفه وجه لوجه  ... ما اجاني ثاني يوم واني بنار لهفتي لشوفته واكوله الخبر
بعد يومين  ..  خابرني كال الي اني بالطريق الكم جهزي نفسج اجي اخذج من الباب ما ادخل
"ليش يعني
" رهف جهزي نفسج
بودي ما البي طلبه لكن مو وقت عناد و تصرفات صبيانية واني حامل مو مال حركان اعصاب
لبست و خجلت من والدي هذا الي متعبني ليش ما يقبل يدخل يسلم على الرجال
اتصل بيه وطلعت اله ....
كان وجهه ما يتفسر
"صباح الخير
رد عليه بصوت يادوب سمعته
بهتت فرحتي وهو حتى ما باوع لوجهي ولخلقتي
وصلنا ولا ودي ادخل للبيت
"ما اتنزلين شنومتانية
" سلطان رجعني لبيت اهلي ...
غمضت اعيوني بقلة صبر
" ماني حمل مزاجياتك
نزل وتركني .....
نزلت بثقل من السيارة .. اتلگتني سلطانه بوستني
باوعت على الطقم الي بالهول
"تدرين هذا اشكثر كلفني
اههه حتى بعدني ما مكمله اقساطه لان اخوج ما قبل ينطيني

كان كله طكع و البيت معفوس عفس .. وكفت يم الدرج اشلون اصعد واني ممنوع عليه الدرج .لازم اكول لهذا الرجال اني حامل مو حتى يفرح لا على الاقل يداريني اني عندي انزلاق مو مال حمل ما عونت احصله  ..
صعدت درجه درجه بوسط الدرج كعدت ما كملت .... اشويه وكملت ورحت لغرفتي  عاد همزين بس اشوية تراب على الميز والعرش    .. رحت للحمام اغسل هم مرتب على حطة ايدي عاد زين سلطان مو مثلهم .. 
شفته كاعد على طرف السرير ومدنك راسه ..
غيرت ملابسي واسطحت اريح اوليدي ....

اجتنه سلطانه دكت الباب وكانت لابسه
"اني رايحه سلطان
ما جاوبها
شافتني نايمه اتقربت من يمي وهمست
'اخيتج كولي اله ينسى
"شنو ؟؟
تعاي انزلي خل اسولف الج

كنت تعبانه مو مال انزل بس خفت شصاير بغيابي
نزلت وراها
وكالت الي اوت البارحه .. طلع سلطان يجيبج ...راجع مزورك وجهه وماعرفنا اشصاير وياه ..
"شنو
"اي والله
رحت اله ...
كعدت جنبه ...ورفعت راسه ابسرعه ابعد ايدي
"هاي شنو وجهك
سلطان اشصاير
ما جاوب ....
عافني وراح ....اكول ليش الطريق كله ما باوع لوجهي !
اووف ياربي سترك شصاير وياه والله تعبت من كتمانه تعبني هذا  الرجل ...
اخذت علاجي وحاولت ما اشغل نفسي بيه زياده
تركته على هواة وعشت ايام بعيده عنه وهو بعيد عني منتظرة يتغير مزاجه الا ابلغه الخبر لاحظت سلطانه تغيري لا اهتم لتنظيف ولا للبيت بس بداخلي بركان ودي اشتغل لكن الزم نفسي بالقوة وما افقد السيطرة على نفسي ...
هي كل يوم اتروح لأمها اتكول مريضه وبعلم اخوها
هالمرة اضاهر متفقين ... 

وتاركتني بالظيم ...بيوم رجع سلطان وهم انطاني ظهره ....اني كنت  اتقطع من داخلي عليه احسه تعبان اكو شي صاير عنده ومدا يخليه يرتاح ...ارجع أساله وشنو يتغير ما يجاوب
احسه يتقلب بنومه ....اتقرب يمي .. واخذ ايدي  مدها حتى ينام ...
سحبتها عن راسه
"ما الك نومه يمي الا بعد ما اعرف اشبيك
تنهد وانطاني ضهره
ثاني يوم هم طلعت سلطانه وعافت هوستها عليه وما رجعت الضحى اضطريت انزل اطبخ وسط الهوسة .   كلثوم ورغده اتعاركن واتمالخن  ...سمعت صوت سيارة سلطان عرفته جاي ..
شفت ذني اتمادن شلعن شعور بعض دا افاكك بيهن
وجان تجيني ضربه خفيفه على بطني ...ومناك اخوهن الصغير يصيح انتبهت على شخابيط على الحايط باوعت للسكف وبصوت منهار صحت
"كااافي ولكم كافي ...الله ياخذكم ويخصلني
ماكنت ادري امهم اجت ويه سلطان جايبها
"ادعين على جهالي بغيابي
سكتت من شفتها كدامي ...
سلطان
" اشصاير ...
" اشصاير!؟،شووف حالي
وكفت كدامه
"بالله هذا بيت مال اوادم
هاي زريبه مال حيوانات  ..
عصر ايده حسيته راد يضربني ووكف على اخر لحظه
ابتعدت عنه
سلطانه
"  اشبيج عيني احد دايس الج على طرف جهال شسوي الهم يعني
"ربيهم ....يا اختي ربيهم مو تعبت منهم وتعبت من اخوج هذا هلكت مو حاله هاي العيشه وسطكم تقصر العمر. 
اشرت عليه
وانت لا تخزر بيه ...ايام بس اريد اشوفك طبيعي حتى ابشرك بحملي وانت ماكوو دومك طالع ومن تجي كأنك معاشر صخر لا كلمه طيبه ولا سلام حتى

عفتهم وكعدت على الدرج حتى حيلي انهد مكدر اتحرك بعد بس دموعي تشكي همي .  اجاني سلطان
" انت حامل ؟؟.
شنو اشوكت واشلون ..
ما جاوبته مختنكه بعبراتي
ما تصورت بيوم يعرف بهاي الطريقه واني منهارة ...
كعد جنبي يريد يتأكد واخته هم وكفت فوك راسي وكفت و صعدت وعفته ...
اجاني
"رهف الله عليج جاوبيني انت حامل
هزيت براسي  اي
"اي حامل
بس ندمانه والله ندمانه وخايفه على هذا الطفل .  لا يروح مني بعد ما علقني بيه  ..وكله منك ومن همك من ازوجتك لليوم ما شفت راحه ....

" ليش هيج دوم تحجين    .. اني مسوي الج شي؟ جارحج ؟...عايش بهمي لوحدي ما شيلتج  هم شي

اخذ باكيت جكايرة وطلع ضايج ....اني للعصر ما طلعت من غرفتي  .. اندكت بابي ...
"منو ...
فتحت الباب ودفعتها بالصينية ودخلت سلطانه .
"ها اشلون صرتي ...
حطتها على الارض
"تعاي اكلي
' ما اشتهي
" يمعوده اجبري نفسج لخاطر الي ببطنج ...
راح انزل اريد اروح لأمي
"مو جنتي يمها الصبح ؟
" اي والله بس عدها مراجعه شسوي ما عدها غيري
طلعت ..واني كمت كعدت كدام الصينية وخرت الخبز كباب شوي وطماطه شوي مو الغده الي طبخته ...اكلت  انفتحت شهيتي لأن ما احب طبخي ..
خلصت واتعاجزت انزل ...
رجعت انطرحت ...دخل سلطان فاجئني برجوعه
جانت الجكارة معلكه بحلكه ....
"كومي البسي ربطه
حطيت شالي على راسي
"ليش
"تعال علاوي ادخل
دخلوا الولد
"انزلي لجوة
راح ننقل غرفتج اهناك ...
" ها خوش
نزلت ... بالاستقبال ...واسمع هوستهم واصياح سلطان ...العصر كله همه يفترون بالبيت يعزلون رجعت سلطانه المغرب ...وهم اسمعها وياهم اشتغلت ..
صاحوا الي طلعت من الاستقبال دخلت لغرفة سلطانه وبيها اثاثي اتنصب ..
"بس سلطان ميز المراية صاير عكس اتجاه الضوة عدله الي ...
غيروا مكانه واني جلست على السرير .. ...
بالعشا هم سلطانه دزت على اكل جاهز
احسها فرحانه ومهتمه بحملي حتى اكثر من سلطان وهي الي متصله بيه يرجع ينقل غرفتي لجوة
صار الليل وحل الهدوء كلمن يسكن بفراشه يصاحب افكاره ..  واني سلطان عايفني ويشد بالسبلت ل11 الضوة مفتوح وهو يدخن و صاعد على السكملي
اني غفيت ..
الصبح كعدت لكيت نفسي بين احضانه  ..
ابتعدت عنه
" وين رايحه
كعد
" اشعندك حاضني
حتى مبروك ما سمعت منك ولا كأنه هذا الطفل الي كنت اتريده
انسند على اديه ونهض
واخيرا ابتسم بعد طول غياب صارلي اهواي ما شايفه ابتسامته
" اشلون اكلج مبروك وانت اتكولين ندامه
عمي انت جيبي الي ملك واني اربيه
رجع انطرح وبطنه طلعت ضربته عليها
" منو ملك عيني ..اني اريد ملاك ...
" لا ببطنج ولد واسمه ملك سلطان
"شو دروح

"لج تعاي وين رايحه
"اغسل واسوي الك ريوك
جلس جنبي
ولعب بشعري ...
" اول شي ...اني اسف
"شنو ؟؟
" ضوجتج اهواي لأن نفسيتي تعبانه وخلكي اكصير واياج حيل ...
همست
" ما احب اعتذارك انت بس خليك قريب عليه
حط شفاه على شفاي ونساني دنيتي كنت حيل مشتاقه لحضنه عطشانه وانرويت
همس
" وهاي ثانيا مشتاااااق
دا يقبلني كان مغمض خطرلي سؤال
"اكوول سلطان اشمدريك شعر حوراء  سرح
غص  وابتعد عني
باوعلي واشفاهه ترجف بعدين طكها ضحكه
وكفت واتخوصرت اله
" اعترف
" هههههههههههه حوراء  جنت اخليها كولجي من نلعب ولج ربت ويانا ...
اندكت الباب
"ترة الريوك جاهز ..
سلطانه  صاحت النا وراحت .
تعجبنا اليوم كاعده من وقت ..
رحنا اتريكنا  .  بيومها قضيتها نوم بحضن سلطان ما خليته يروح ...
بس اسمع هوسه بالبيت وصوت سحل اثاث اني مغلسه ..
العصر كعدت لكيت سلطان يلعب بفونه ..
"سلطان سلطوون ..
"اريد كنافه
" ها ميخالف من اطلع بالليل اجيب الج
طلعت من الغرفة اشو طقم القنفات ماهو بالهول والافراش مشيول ..... ما تدخلت وسألت 
بالليل كعدني سلطان
"شكووو سلطان اريد اناااام انااام
"حبي ما يصير اتنامين وشي بنفسج كومي
"ما اريد ...عوفني
كلتها وحطيت المخده على راسي
"ولج كومي لا تطلع بأبني شعرية كووومي
صاح بيه فززني
"شكو هاي خرافات
" مو بأيد علاء حبه فاصوليه مو خرافات
يلا اكي
حطها امامي

"ما اشتهي
"اكلي ..
راح للحمام يسبح واني كعدت بس ما الي نفس اكل
رجع شعره مبلل وكذلته على اعيونه ..مشطها للخلف و قلب بالتلفزيون على زي افلام طالعه اغنيه بالفلم هو يحب الافلام الهندية 
شفته شعره بعده رطب وفانيلته تارسها جسمه صاير وسيم هذا الرجال كل ما يتقدم بالعمر يحلى وينضج
راح يطخ ب 37 عمره وهو يحلى اكثر
"سلطان ..
"هاا
"حبيبي مشتهية شي واخاف يطلع بأبنك
" يبووو حتى ما اكلتي كنافه .. كولي اطلع جيبه الج عسى ما باليابان
"هههههه اريدك اتكوم تركصلي وعلي التلفزيون
باوعلي صفح
بدلع و دلال
"حبااااااب
"هذا الناقص الزلم اتهز للنسوان انطمري ونامي
"اهااا
اتعمدت انطيته ضهري و صعدت ثوبي كشفت عن رجليه ..
خلصت الاغنيه . سمعته يتأفأف
.طلع فونه اغنية  هم هنديه وصار يقلد شاروخان واني هلكانه ضحك ....

ما عرفت مضارب مع منو وضل شي مضموم عليه اني عفته للأيام هي كفيله تكشف الي كلشي ..كنت اخاف على نفسي حيل وما اطلع دوم ملازمه البيت  .. سلطانه  صارت اتراعي البيت  . حتى اشوفها بواهس تشتغل صارت من جربت النظافه ...شفتها تخيط تلبيسه للقنفات وهي اتعدل واتخطط  . ودوم اتروح لأمها تقريبا كل يوم اتكول احس هاي اخر ايامها ...
...
كنت كاعده ملانه من الكعده بالبيت
سلطان "اشبيه الحلو صافن
"مليت ...بودي اطلع  منا 
"تدلل الحلوة
لبست وطلعني وكان يسوق على مهلة ...ما افترينا مجرد اشترة الي عطر و وردة لازمتها بأيدي فرحانه بيها اكثر من العطر  !
ولازمه بأيده حيل
واتعشينا ...دنرجع بطريقنا للبيت ..لن احس آلم كلش قوي وترت سلطان اتصل بصرح كانت بالعياده كالت اله جيبها .... كالت الي الطفل نازل حيل والجارة مثقوبة .انطتني ادوية وابر وكالت ارتاحي لا اطلعين ابد من الحمام للفراش وللفراش للحمام فقط

قضيت ايام واني بخوفي على ابني لا يتركني ... صرت اشوفه حلم واخاف اصحى منه ....
ضليت دومي مريضه واعاني من وجع بالضهر .. رغم اني دوم نايمه حتى ملابسي لو سلطان يحطهن بالغساله لو اخته قايمين بيه ...
ضعفت و تعبت واحس نفسي دا احارب حتى ابني ما يفارقني ...حبيب قلبي ...وصلت لشهر الثامن .... واني على وضعي دوم نايمه بديت اسمن وبطني متر كدامي ؛؛؛طلعت من عيادة صرح وهو استقبلني اخذني من ايدي
"هااا بشري شنو ملك مووو
"ما طلبت اعرف الجنس
صاح 
"ليش
انتبه هو بالشارع نصى صوته
"ليش كل ما نجي ما اتقلبين
اني ادري بيج ملك بس حتى يطمأن قلبي
"واني قلبي خايف
مشيت قبله للسيارة وعفته يتأفأف
"اي ليش خايفه
" اخاف تطلع بنت واشوف ضوجتك واتحز بخاطري
"شنو سويتني كلش انتي
"انت ما ملاحظ نفسك اشلون خابصنا بالولد
اشبيها البنية
" عسى ما اجيبين عشر بنات ما يهمني والله بس كون هذا ولد ...اريد ملك
ساق ورجعنا للبيت
كعدنا ناكل كلنا سوة على ميز الطعام  .  وعلاء ينكت
رن تلفون سلطان شفته انقلب وجهه طفاه وكمل اكل ما اهتم للاتصال ...

بيوم الكل التهى بعمله بس اني وغاده بالبيت وام علاء عند امها اتروح صبحيات اتنضف الها البيت وتجي اهنا هم تطبخ النا ...
ندكت الباب طلعت غاده فتحتها
اني بالهول مكنكه ..
دخلت مدرعمه عليه حوراء  ....
" اشلونج رهف
نزلت تلفوني صافنه عليها هاي اشجابها الي !؟؟؟
"اهلا وسهلا
كلتها من غير نفس
حوراء"غاده روحي لغرفتج عندي كلام ويه مرت خالج
غاده" عمه شكوا
صاحت بالبنيه
اني اشرت الها اتروح ...
راحت
وكعدت حوراء امامي
" ما تردين اتعرفين رجلج شنو مسوي
"شنو مسوي ..زوجي كلشي ما مسوي بس انتم ابتعدوا عنه هو بخير
ضحكت بغضب
"رجلج طيح حظي وحظ اخوتي  .. رجلج دمر حياتي ومستقبلي ....رجلج دمرنا كلنا
عصبت
"اس كافي عاد
"حقج مخدوعه بيه
اني اجيت لهنا مخصوص حتى اكولج حقيقته
كلت مستهزئة
"وشنو بلا
" زوجج دمرنا واخذ افلوس منا بالغصب .
"شنو !!!!!!!!

يتبع