رواية سلطان زمانه الفصل الحادي والعشرون 21 - بقلم زهراء العراقيه

غادة  سألتها
" عمة اشبيها ايدج

نبض قلبي احسة صار بطيئ ونظري احسه باهت الصورة صارت بلا الوان، روحي كلها بهتت مدا استوعب حوراء  الي تاركه الف سؤال ببالي ببيتي وعمة  الاولاد اصير  .. جمدت بمكاني .. واشوفها كدامي تشرب ماي واني فكري احتار بشنو يفكر صار بيه تزاحم
ابنية شابة وحلوة و زوجي يتحلم بيها لا وبعد بنت عمه الي ربى ببيته
ضليت افرك بأديه بقوة
بينما  ردة فعل سلطانه خلت الشك يقين .. خافت واخذتها من ايدها بالقوة مشتها ودخلت لغرفتها وسدت الباب .. اني جلست على الطقم وايدي على جبيني ....
"غاده ...منو هاي عمتج ؟؟
"اي عمتي حوراء
"اها واشعجب جايه ؟؟
سكتت ما جاوبتني ...
الريحه كبت اثاري اني نسيت السمك بالطاوة خليت البنات  يتولن امرة واني البية مكفيني ..سمعت صوت سيارة دتدخل عرفته سلطان اجه ع الغده . رحت للحديقة وكفت امام السيارة واتخوصرت اله ...نزل و بطرف حلكه جكارة ..من شافني رماها وداس عليها
"اليوم الحلو اهنا امتانيني
" الله يساعدك قواك الله
"حط ايده متني واخذني وياه للداخل
" اوكف ... سلطان اكو خطار اخاف طلعوا للهول بلا ما تدخل عليهم
"منو !!؟؟
"حوراء عمة الجهال
ابتسمت بحقد وغيره
" هاا ؟
كأنه ما صدكني
محمد شاف خاله واكف يمي
اشرله وسلطان راح اله اني ضليت  بمكاني اضرب برجلي الارض بتوتر ومتخوصره اله واشوف محمد يوشوش اله
وسلطان وجه انكلب وصار يباوع الي بقلق .. وراح لغرفة سلطانه دكها
واني رحت خلفه
"سلطانه افتحي خل افهم حوراء شسوي اهنا ..
انفتحت الباب وحوراء الي فتحتها كانت لازمه عباتها بأيدها
" سلطان تعال شوف حالي كله هذا من و......
جرتها سلطانه قبل لا تكمل دخلتها ودخلت اخوها  وسدت الباب بوجهي ..  احتركت شفت محمد استحى من تصرف امه عفته ورحت بالهول انتظرهم يطلعون ...مرت ساعه وهمه ماكو ..
غاده "خاله اصب اكل
خاله
خاله رهف اصب غده
"اووه صبي اني شعليه دعوفيني بحالي  ...
زهكت روحي .. حطن الاكل على الميز واخيرا الباب انفتح طلعت سلطانه    وسدت الباب وراحت اتريد تاكل ..اني ثرت كمت على حيلي وفتحت الباب
"شنو الي دا يصير
كان كاعد كدامها وهي تبكي وحاط ايده خده
من شافني زفر نفسه وتنهد كانه ما حاب دخولي
"اويلي عيوني بالاول سكتت كلت اختك وياكم ..بس وحدكم والغرفه مغلقه لا هاي واكفه ..
دخلت سلطانه خلفي
"ها رهف
" ها شنو ما اتكولون الي شنو الي دا يصير واشبيها هاي البنية  ؟؟
سلطانه "اهدي بالاول ليش اصيحين .....
حوراء تبكي  وطلعت ايدها ملفوفه بشاش ابيض
تجاهلت سؤالي وكالت
" سلطان اصرف لا تخليهم يتولوني
"شصرف انت بطلعتج هاي كلبتي الدنيا
اخوج مراح يسكت
سلطانه "بس اخر شي يخطر ببال عايد واخوته حوراء يمك سلطان
صحت
"شكو احد يفهمني شي
سلطانه " ماكوا شي عيني مشاكل عائليه عادي اتصير من رخصتج روحي اتغدي وعوفينا اني واخوي انحل مشكله البنية . 
خزرت سلطان وطلعت لغرفتي ..انتظر شي منطقي منه ...

ولو جيتها مو مشكلتي اصلا اذا بس على الجيه الواحد يصدك عدها مشكله عادية  . بس شكي بيها السابق هو الي مفور دمي  ...
...
اجاني سلطان شكله حاير بزمانه خلع ملابسه بجزع وكعد حاط اديه على وجهه
"خير انشالله اشبيها
" شارده من اهلها وجايه
كعدت يمه
سألته بأهتمام
"ليش
"عدهم مشاكل وبس يدك بيها عايد مخليها شارده منهم
"اها وكأن احنه بعازة الى مشاكل مع هذا الي اسمه عايد
ليش جايتنا
"لأن تدري اهنا هي بحماي
"لا والله وشنو الي بينكم حتى يخليها واثقه
رفع راسه وصفن بوجهي بينما  اني رافعه حاجب عليه وصاكه اسناني
اخذ نفسه ببطئ وثقل
" شوفي رهف ..  البنية شاردة من ظلم اهلها . ولان اني عندي مشاكل وياهم ما يتوقعون هي يمي اخر شي ممكن يجي بالهم فهي جايه الي شسوي هسه ما ادري اذا رجعتها يكتلوها ذوله ماعدهم رحمه وحاير هسه شسوي بيها
"اهاااا
"اشبيج رهف
" تدري يا سلطان كلش زين اني اعرفها قبل لا تجي وبفضل خروتك بأسمها بأحلامك .. فاض صبري يا سلطان مراح أسألك شنو بينكم بس حط الله امام اعيونك وراعيه بيه  ليش ازوجتني مدامك مو صافي الي
صاح بقله صبر
"انت شجاي اتخربطين
وكفت كدامه واشر عليه بأتهام
" لا تحاول سلطان تتهرب اني كل ليلة انام و دمعتي بعيني ... احلامك بيها و
"كافي انعل ابو احلامي ماعندي شي وياها
" خليني اكمل ... اذا ماعندك شي ليش خايف عليها ليش هي بس من بيت عمك تهمك
ترة سمعت مكالمتك
تنهد وكانه احتار شنو يبرر الي اتمنيته ما يصغر بنظري ويكذب
"رهف حبابه هسه مو وقت اشرح الج
شي
" بس سؤال واحد اريدله جواب
حطيت عيني بعينه
"ليش ازوجتني .؟؟؟ شنو غرضك ...؟ ذليتني و هنتني بالبدايه وكلت جنت حاقد عليج بس و عبالي انتهى الخصام صدمتني بهاي حوراء بعدني ما تهنيت بشي الله عليك سلطان جاوبني حيرتني وياك
" خليني ساكت رهف احسن . 
انت قافله على القضية . بس ترة الي براسج اوهام ماكو شي من الي بالج
"لا والله ...... ممكن تفسير لعد
مسح وجه وباوعلي
"اكعدي لا اضلين واكفه فوك راسي
كعدت
لزم ايدي وباسها
" حوراء بت عمي الصغيره
هزيت راسي
" وعايد انسان عديم الرحمه ... بسبب غلطه اختها يريد يقتلها
"شنو مافهمت
"ااااوف شفهمج سالفه طويله ... حوراء اختها الي اكبر منها غلطت طمست راس اخوتها بالطين
'اي
" وعايد طلع ضيمه بحوراء كل يوم البنية داخله مستشفى ... وهاي شوفة عينج شردت واجت يمي
جاوبته بعدم تصديق
"وليش تتحلم بيها
صفن اشويه وباوع للفراغ.
بصوت هادئ
" احسها مثلي مظلومه وياهم دوم اتحلم بعايد يكتلها هذا الحلم دوم يراودني دووم
اشوف جثتها اكبالي ....رهف  انت ما اتعرفين عايد ونذالته ... لو عمي ماعنده رحمه .. لا تصورين انطوني افلوسي برضاهم
"لعد اشلون اخذته
' بالقوة والقانون ...
هسه مو موضوعنا هذا .
وكف امامي وسحبني من ايدي وكفني وحملني صدري على صدره و اقدامي على خصرة من الجهتين
" انتي حبي الاول والاخير رهفتي حوراء هاي طفله ما تعني الي شي غير اني خايف عليها حيل
هزيت راسي  مصدكه ودموعي بعيوني
حطيت انفي على انفه
" انت ما قبلج  مرة اجت ولا بعدج اجت وحده ..والله ندمان اذا بجيتج وقسيت عليج بيوم
سامحيني رهفتي
قبلته بعمق
ابعد شفته وسألني
" والله لأعوضج بس اذا لحكت
حطيت شفتي على شفته ما اريد يكمل
ابعدني وابتسم 
"واذا خلاني عايد عايش ... !!
ضربته على صدرة
"كافي عاد
لزمته من عنقه
"اشحده يوصل يمك .  اكله بسناني والله
" ديلا انزلي سلمي على البنية ولا تحسسيها ضايجه منها
قبل لا يطلع لزمته من ايده واشرتله على صدرة كان لابس فانيله بيضه جبت قميصه لبسته
" اي بس اشكد راح اضل يمنا
" ما اعرف والله بيني وبينج ورطه وحاير بيها اذا عرف عايد شخلصني منه

خفت عليه من هذا عايد ومشاكل بيت عمه اووف
نزلت لجوة حتى اتغده حيل جعت شفت البنيه كاعده بالهول وسلطانه تتوسل بيها تاكل لكمه
"اهلا وسهلا حوراء
باوعت الي بنظرة عشوائية

حوراء" هاي زوجه سلطان مو ؟؟
سلطانه
"اي مرته رهف ..خوش ابنيه وحبابه .... بس هي لأن ما اتعرفج عصبت قبل اشويه
رجعت باوعت الي
" اعذريني راح اثقل عليكم
بس شسوي غير اخواني ما رحومني
رجعت تشاهق وحسيتها مهظومه والعبرة خانكتها

كعدت يمها
سلطانه
"محلوله عيوني انت انشالله سلطان يشوف حل ...

اني بقلبي كلت يا محلوله  لايصه هي طلعتها من البيت معناها قتلها صار حلال  اشلون سلطان راح يصرف ما اعرف ....
دخل سلطان يمنا وبيده التلفون
وجه كلامه لحوراء
"راح اخابر صلاح اشوف الاجواء اشلونها بالبيت
" اي خابره
وكفت يم سلطان
"منو صلاح ؟
" ابن عمي
"اهااا دخت
سكتني سلطان
"الو صلاح اذا احد.يمك لا تذكر اسمي
انت اشلون اتكول لاختك تشرد يمي
سكت سلطان واني حطيت اذني على الموبايل اريد اسمع صلاح شنو يكول
سلطان ابعد التلفون وفتح اسبيكر وباوع الي بمعنى ارتاحي رهف
" اخر مرة شبعها كتل منا من اغمى عليها خفت عليها اتموت كلت الها اشردي لبيت خالتي
ما جبت طاريك ابد  ما ادري بيها يمك لحد ما خابرتني هي جانت واصله يمك...ااااخ لو بس اعرف ليش اجتك
هاي الرعنه
الجو مكلوب عليها والله اخاف لا ينهدر دمها
" اااخ منك اكوا واحد يكل لأخته اشردي وين عقلك
يلا عود وافيني بكلشي جديد

سلطانه اخذي البنيه ترتاح
اشرلي بعيونه اصعد وراح كدامي لفوك ...
....
سألته
"هسه شنو راح اسوي
"اشمدريني ...تعاي يمي
كعدت يمه
"جان ببالي اليوم اخذج للطبيبه
جيتها خربت كلشي عليه
انطرحت يمه
"اااهه
"ها بعده ضهرج
"لا بس نسيت اخذ حبوب بعد الغده وهم اصلا نسيت اتغده
اووف
" تردين انروح لدكتور ضهرج ما مطمني اااخ لو بس اعرف ليش ما كلتي الي من وكت
نمت على ايده
" استحيت
"شنو ولج
" ههه خفت اتكول عني هاي صايرة تفصيخ
"هههههههههههههههههه
ضحك من كلبه رغم هو ضايج
ولج انت مصيبه  ... مصيبه انتن النسوان .. بس انت صدك تفصيخ
ضربته على صدره
"قابل جذب عبالج ما ادري لاعبه بخشمج هاا
تعجبت طلع منتبه
"اسكت كافي شنو تفصيخ هاا
معشت كذلته بخفه وانطيته ضهري

..
قلبي مكان مرتاح اي نعم اني عرفت حقيقة الموضوع لكن هم تبقى شابة ببيتي  وتصرفات اهلها ما اطمن الرعب اتسلل لقلبي من عواقب جية حوراء ..
باوعت للساعه صارت ب3 العصر ابعدت ايد سلطان عني حتى اكوم بدون ما اصحي سلطان كذلته على اعيونه ما اشوفهن ونايم . انوب حط رجله عليه
ابعدته بخفه على كيفي وكمت ...
نزلت لجوة ماهي بالهول ...رحت لغرفة سلطانه
الباب مفتوح ...شفتها مقرفصه نفسها وتبجي بصمت
دخلت

" حوراء رايده شي
سطرني صوت شخير سلطانه ...
" مسحت دموعها وباوعت الي بنظرات مكدرت افسرها غير نظرات حاقده كارهتني حيل حسيت نفسي عدوةو واكفه كدامها ....عفتها ورحت
يا اللهي آتني القوة من لديك اني بالقوة مصبرة نفسي على فكرة انها راح تبقى فترة يمنا واتكوم اتحسسني هي كارهتني اشلون ناس هاي فوك ما اتحملها ببيتي .. كعدت بالهول يا بس لا تغار مني .
مصيبة اذا جانت هي تحب سلطان واتغار عليه .اي هو صدكته ما يكن الها مشاعر من نظراته الها لكن هي اشعرفني شنو بداخلها ااااه شنو من مصيبة ونزلت على راسي
نزل سلطان شايل الهم كله راح لشغله وكال اني على اتصال مع صلاح ...
سلطانه فهمتني ان صلاح اخو عايد وعم الجهال مقعد وهو افضل واحد بيهم عنده ضمير  كالت حوراء كانت طفله او مراهقه من هي كانت يمهم ما الها شغل بيها اشوف وتسكت لان صغيره ...
سألت سلطانه عن السبب حتى أتأكد من الكلام ولو اني من داخل مصدكه كل كلمه طلعت من سلطان لأن كان صادق ..كالت الي نفس كلامه .
بس بقيت ما مرتاحه لنظرات حوراء الي ...

بدلت من سلطانه طلعت الملابس عليها اطوال واعراض .   بدلت من غاده طلعن بيهن ضيق لأن غاده ضعيفه وحوراء جسمها رشيق وبيه امتلائة مغرية.. 
احرجتني سلطانه من طلبت مني ثوب لحوراء
رحت جبت الها ثوب عريض على العمدا واخذته وراحت تسبح ....
كنت انتظر سلطان يرجع الساعه متأخره كانت
سمعت صوت سيارته .. انتظرته وانتظرته ما صعد !!
الفار لعب بعبي .  لبست روبي ونزلت بخفه ..كانت الانارة خافته حيل ..
وصلت للهول امشي واتلمس اشو هدوء .. بالهول وين سلطان معقول بعده بالسيارة ..؟؟
فتحت البرده اجاني ضوة الحديقه .. شفته واكف امام سيارته وحوراء امامه اسولف .. اتقربت على الشباك لزكت بيه لزك ...
اريد اسمع شي
ما يجيني  صوتهم ...سلطان نظراته على الارض واديه خلف ضهره ..بس هي متقربه اله حيل ومدري شنو اتكول شفته رجع للخلف وطخ بالسيارة وهاي شو ادنت عليه تقريبا اجت اطخ بيه سديت البرده بعصبيه ورحت سلطان شافني جايه عليهم
ندستها بطرف اصبعي واتكتفت ووكفت يمها
"خير انشالله
ما جاوبت
دفعتني وفاتت لجوة بكل وقاحه
سلطان اتقرب يمي دفعته ورحت معصبه ...
بغرفتنا
"ممكن افهم شنو تحجون نص الليل
"اس يمعوده حسج
" سلطان قسم بالله اذا ما جاوبت .......
"اش شنو ولج اتهددين بية
شفته كام هو ينتر وراح يصير هو عليه ابو الراهي وتنقلب الأدوار  بسبب صوتي العالي . سكتت ما بيدي حيله
هو هم طلع يسبح من رجع سويت نفسي نايمة
الصبح
حايرة اشلون اواجه حوراء هاي  واطلعها من بيتي

كاعده وافكر ... ونسيته نايم ما كعدته ولا رحت سويت ريوك  ..
صحى من وحده
نزل لجوة ....تذكرت البلوة الي بالبيت نزلت خلفه .
بس شافني سأل
" وين الريوك
" هسة اسويه ...
شوف سلطان اليوم  اخر يوم لحوراء اهنا شوفلك صرفه ما اريدها اهنا
"يصير خير اليوم راح اصرف
"اوكي
دك تلفوني ... دعاء كانت تتصل
رحت بالممر
"صباح الخير
اشلونج رهوفه
"هلا هلا بدعاوي
"مشتاقين
"ااني اكثر  والله
"اكولج ما اتمرين النا اليوم
' قبل ايام كنت يمكم
بقلبي كلت جنيت اجيكم وبيتي مصيبة
" لا حبي اليوم تعاي الله عليج معزومه
" لا اتحلفين دعاوي مكدر اجي
" يمعوده  حتى لو ما اتباتين منا منا
' لا حبي مكدر ذاك اليوم يمكم
" اذا على سلطان اخلي فرات يحجي وياه
بنفعال رديت عليها بلا
" على راحتج .. يلا حبي اخذي راحتج ..
اوف وقتها دعاء مو  من طبعها الالحاح هسة بس لا زعلت ....
شفت دعاء طلعت
"انتظري ...البسي شي على راسج سلطان بالمطبخ
" ها اي
رجعت للغرفة  لبست وراحت كبل للمطبخ ...واني وراها
شفت سلطان يقلي بيض
حوراء "هههه وخر خل اقلي الك
اني سكتت وخزرته
" لا عندي امريتي اسوي الي ...
ابتسمت واتقربت يمه وعافلي الطاوة  ....
راحت اتغسل وجهها
اووف ولا طايقتها كون اليوم يخلصني منها سلطان ..
طلع للعمل واني اشتغل رن فوني ..وكانت نهى هالمرة
بعد السلام صارحتني بشي قلقني حيل
" حبيبتي رهف بصراحه احنه ردناج تجين اليوم وانت ما قبلتي ...بس مهما كانت ضروفج حاولي تجين
" شنو ليش خوفتيني  صاير شي
تلعثمت وكالت الي بابا مريض وهو يريدني اجي . ما صدكتها من كالت مرضته بسيطه متت من خوفي عليه ..اتصلت بسلطان
" الو سلطان الحكني
"شكووو عايد اجاكم
"لا لا
صوتي كان شبه الباكي
" لعد شنووو سلطانه  بيها شي
"لا تخاف  محد بيه شي
"لعد شكو رحمه لربج عندي بيعه اشعندج متصلة
"بابا ...سلطان بابا مريض ويريد يشوفني
" ها عمي لا والله ما يستاهل
دقايق واني يمج ..
رحنا الهم وكان بابا بصحة غير جيدة ... البارحه نايم بالمستشفى  بس محد كايل الي اليوم الا جابوني ما يردون يتعبوني ... حيلي انهد من شفت نومته بالفراش اتمنيت العلة اتصير بيه ويكوم النا ابوية

سلطان للضهر اترخص بعد ما اطمن على بابا 
بس اني بقيت يمة وما كال الي اشوكت يجي  ..
طلعت خلفه بالحديقه اوصله للباب
"اشبيج افرجيها  ترة ابوج بخير صار
" بابا امنين اجته بداية الجلطة
اجيت ابكي
"اسكتي رهوفه حبيبتي مابي شي الرجال
باسني وراح ... رحت لبابا ...
اشوف الاجواء  مكركبة بالبيت  اجت صرح العصر
شافت بابا نايم ما دخلت  اله ...راحت  لغرفه نهى ودرعة الباب عليها
وصارت عركه كلامية من اتهجمت صرح على نهى اني مثل الاطرش بالزفه لكن بعدين فهمت السالفه بابا متمرض لأن سامي يريد يعزل نهى كاينه عليه وبسبب مشاكل بينها وبين دعاء ... بابا كلشي ولا ولده يتركون البيت يحب لمة الاحفاد  ...
احتاريت بمشاكلهم واشلون الحل كلت من يجي سامي اكلمه بلكت يستجيب كلشي ولا بابا ، 
صار الليل ..وكلمنا سامي كال اجلت الفكرة لكن راح اسعى الها راح اخذ قرض واشتري قطعه ارض اني كبرت لازم استقل ...
عشيت بابا و شربته علاجه ... فرح بشوفتي حيل ..
نيمته ورحت صليت صلاة الليل  ودعيت ربي يشفيه الي  .. 
خواتي صرح هي البارحه كانت وياه بالمشفى وسهير اجت الصبح والعصر راحت لأطفالها ...
 
رحت لفراشي ونمت .......فززني حلم من عز نومي لن حوراء كاعده بالصاله وسلطان يمها يلعب بشعراتها واني كاعده على الميز اريد ابجي ..كعدت من النوم مختنكه ...دكيت على سلطان ما رد عليه ..مرة واثنين وثلاثه مارد عليه ...
التخيلات مالها حدود ...  انهجم بيتي راح سلطان اشلون اعوف البانزين يم النار لو مو يحبني سلطان اذا مرة تقربت لأي رجل ما يكول لا ... ضليت احوس 
واتصل وما يرد برد قلبي يااارب وخليه يرد  .. 
الفجر ما نايمه اني ... دكيت عليه ما ارد ... ورة اشويه اتصل بيه هوو
فتح خط
استقبلته بصوت باكي
" هااا خلصت سلطان ...ليش ما اترد وين جنت هااا
الو
بصوت ناعس
" ها حوراء شتردين ؟؟؟؟؟؟؟

   يتبع