رواية سليله الانتقام الفصل الثامن وثلاثون 38 - بقلم taratel

.. لم استطع ان اتقبل فكره رحيلك وان اخر لقاء بيننا منذ ثلاث شهور، اعلم انه لم يعد هناك مجال للعوده لكن كل ما اريده هو ان تعلم انك لن ولم تغادر قلبي ابدا، مهما حدث ومهما جرى ومهما مر ومهما مضى ستبقى دائما في قلبي، اليوم تذكرتك من جديد كنت اجلس بين اصدقائي وكنت اضحك كثيرا الى ان تذكرتك على حين غره مني غادرت المكان بسرعه وتوجهت لمقر احزاني خلف جدران غرفتي جلست لوحدي من جديد, ابكي بكل حزن يضعف قلبي , لـيتـنا لم نفترق ليـتك لم تـرحـل.

.. غلقت المُذكره وعيني على الساعه جانت ب7:5 كمت على حيلي سريع واني البس قمصلتي فتحت باب الشقه واني انزل رفعت راسي للسما وجانت تمطر مشيت سريع متوجهه للمعهد

.. اول مادخلت لكيتهم كاعدين بديت اشرحلهم واخر شي امتحنتهم خلصوا الامتحان وبديت اخذ من عدهم الاوراق وطلعت متجهه لغرفه المدرسين اول ماخطيت رفعو عينهم عليه

.. كعدت واني مبتسمه صارلي اسبوعين ادرس هنا اختلاطي قليل بيهم على كد السلام تقربت عليه وحده من البنات

- شلونج ملاك

.. ابتسمت واني اجاوبها

ملاك: الحمدالله

.. ثبتت عينها عليه وكالت

- رايدتج بموضوع

ملاك: تفضلي

.. اتقربت عليه وهي تهمس

- استاذ احمد دزني عليج من اول ما شافج انعجب بيج وخاصتا بعد ما سئل عنج وعرفنه اخلاقج ويريد يتقدملج

.. ابتسمت واني احجي

ملاك: افكر وارجعلج جواب

.. ابتسمت وكالت

- تمام انتظرج لعد

.. كمت على حيلي تاركتها خلفي اول ما طلعت شفت استاذ احمد ابتسم بوجهي خزرته وطلعت

.. اخذت مبايلي يتصل جاوبت واني احجي

ملاك: ها الـِن وين انتي

الـِن: انتظرج با الكوفي يله تعالي

.. غلقت الاتصال واني متوجهه الها وصلت واجت عيني عليها اتقربت عليها واجاني صوتها

الـِن: ليش تأخرتي

ملاك: اتاخرنه با الدرس اليوم

.. اشرتلي اكعد مقابيلها ضيقت عيني با استغرب وحجيت

ملاك: شكو كاعد تخوفيني

.. ثبتت عينها عليه بدون جواب رجعت حجيت بخوف

ملاك: ضبع بي شي؟

.. هزت ايدها با استهزاء

الـِن: شيصير بي هو هذا بسبع ارواح 

.. ابتسمت واني ارجع احجي

ملاك: لعد شنو

الـِن: قبل اسبوع جابو للمستشفى متصاوب

فتحت عيني بخوف

ملاك: وهسه شلونه

الن:مابي شي لا تخافين بس المشكله مو هنا

.. ضيقت عيني با استغراب وحجيت

ملاك: شنو لعد

.. ماجان اكو جواب ثبتت عينها عليه خايفه تحجي اخر شي كالت

الـِن: كومي نرجع

..رجعنه للشقه اندارت عليه وهيه ادكول

الـِن: عندج المفتاح مفتاحي نسيته جوه

.. هزيت براسي واني اتقرب افتح الباب

.. دخلنه والصاله جانت مبعثره حجيت بخوف

ملاك: بس اني ما تركتها هيج

الـِن: كل يوم تعوفيها هيج ادخلي ادخلي

.. خطيت بخطواتي للداخل واني مضيقه عيني بقلق متاكده ما جانت هيج

ملاك: الـِن هم اكو حراميه هنا

الـِن: لا امان

.. كعدت اعزل با الصاله وهيه راحت تنام نزيت على صرختها توجهت الها خايفه حجيت بصوت

ملاك: شكووو

..اشرتلي با اصبعها بخوف وكالت

الـِن: صررررصرر

.. اخذت نفس وحجيت

ملاك: الله ياخذج عبالي شنو شفتي

.. توجهت للصرصر وكتلته وحجيت

ملاك: يله هو هذا الي تخافين من عنده

.. ابتسمت وهيه تتقرب عليه حضنتني قوي وكالت

الـِن: احلا شي با الدنيا وجودج يمي

.. احتضنتها وابتسمت بعدتني عنها وكالت بخوف

الـِن: ملاك لو صار شي على الاشتر شتسوين

.. كلمات بس وخُلقن بداخلي خوف عظيم رجفت اطرافي وماحسيت على دموعي وهنه ينزلن اتذكرته وحجيت بغصه وبصعوبه

ملاك: الـِن اشتر بي شي؟؟

.. نزلت راسها وكالت

الـِن: مادري بس غير اخته ادكول مفقود صارله شهرين

.. بلعت ريكي بصعوبه وعيني عليها حطيت ايدي على گلبي وحجيت

ملاك: تصدكيني لو اكلج احس بي شي

.. ماجاوبتني تركتني متوجهه للصاله ما احس عندي طاقه كلامها اخذ نص حيلي كعدت على السرير وايدي ترجف غمضت عيني قوي

ملاك: شلون لو صار عليه شي راح اسامح نفس؟؟

.. مسحت دموعي وكمت على حيلي اتوجهه للصاله لكيتها كاعده تعزل حجيت

ملاك: لا تضمين عليه الـِن اشتر اذا بي شي احجي

.. ما جاوبتني وبقت تلملم با الصاله شويه واجاني صوتها وهي ادكول

الـِن: باجر راح نطلع ضبع من المستشفى واجيبه هنا لان ماعنده احد يداري وشوي جرحه بعده ما ملتئم

ملاك: اي احسن مهما سوا بيج ضبع بس لا تنسين شنو الي قدمه الج

.. كامت على حيلها وهيه تتقرب عليه حجت بنبره غضب

الـِن: شنووو سوه الي يله فهميني شنو سووه ماقدملي اي شي غير الدمار النفسي والجسدي

.. حجيت بضعف

ملاك: درستي ست سنوات با الغربه وصرتي دكتوره بفضله

.. ابتسمت با استهزاء وكالت

الـِن: تعبي هذا مو بتعب احد ولا بفضله

.. اتقربت عليها واني اضغط على ايديها

ملاك: ارجعي لضبع الـِن

.. خزرتني ورجعت كالت بحقد

الـِن: مستتتحيل ارجعله بس يصير زين اشمره با الشارع

.. ضحكت وحجيت

ملاك: شوفي لا تستقوين ابد على ضبع لان تعرفي هو شنو وهسه هو عايفج بمزاجه يريدج ترتاحين ويرجع

.. هزت ايدها با استهزاء وهيه مضيقه عينها

الـِن : لا عبالج اني الـِن القديمه الي ترجف من عنده والله ادوسه وامشي وماكو شي يوكف بوجهي

.. كتفت ايدي واني مثبته عيني عليها

ملاك: ليش ما كدرتي تتطلكين لحد هسه لعد

.. بعدت عينها عني وهيه تندار بدون جواب

.. اتوجهت للصاله وحجيت بصوت

ملاك: اليوم اجتني وحده دازها استاذ احمد يريد يخطبني

.. بس سمعتني راسا رجعت اندارت عليه وهيه تتقرب اخذت ايدي وعينها عليه بكل قلق كالت

الـِن: توافقين؟؟

.. هزيت براسي با ابتسامه

ملاك: اريد ابدي من جديد كافي صرت شكبرني خل اتزوج واكون عائله الى متى انتظر الاشتر وبعد صفحه وطويتها من حياتي باجر تحاجيها للبنيه وافهمها اني مطلقه واذا يريد يجي يتقدم

.. مالت بعينها بحزن وكالت

الـِن: تنسين الاشتر

نزلن دموعي وحجيت بتصنع

ملاك: اكدر

.. ثبتت عينها عليه بقلق ورجعت كالت

الـِن: من دموعج هاي بطلي هاي السوالف وابقي عنسي احسلج فاتج القطار بعد

.. ضربتها خفيف على ايدها وحجيت

ملاك: الي مايريدنه ما نريده

.. ابتسمت بوجهي وابتعدت عني متوجهه للغرفه بقيت كاعده با الصاله وگلبي ياذيني مسحت دموعي من حسيت عليها رجعت وهيه تتقرب عليه فتحت ايدي وقدمتلي ظرف

.. ثبتت عيني عليها با استغراب وحجيت

ملاك: شنو هاي

الـِن: لا تفتحينه هسه من تكعدين ابحدج وقبل لا ترجعين جوابج للاستاذ اقري هاي الرساله

.. حسيت بغصه بداخلي وحراره با اطرافي عرفتها من الاشتر معقوله صار الي ابالي!!!

.. حجيت بتلكؤ خايفه من جوابها وگلبي يريد يوكف من الخوف

ملاك: منين

الـِن: من الاشتر

.. فتحت عيني بصدمه وبدون وعي مزقتها قطع صغار وشمرتها تناثرت الاوراق على الارض

.. حسيت على الـِن وهي تضربني وصاحت

الـِن: لج خبببله شسويتي

.. جرتني من شعري قوي صحت متألمه رفعت اصبعها بتهديد وكالت

الـِن: والله راح تتندمين بكد شعر راسج هذا بس تعرفين

.. بعدت نفسي عنها وحجيت واني ابجي

ملاك: كااافي ما اريده افتهمي ما اريده خلص طلعته من حياتي ما اريد اسمع اسمه

.. اشرت على نفسي بقهر وحجيت

ملاك: كافي الى متى ارخص بنفسي علمووده اشتر انتهى من حياتي كافي

.. ضغطت على راسي منهاره ما اعرف شنو اسوي بقيت اضرب على راسي فاقده بس شافتني بهذا الحاله تقربت عليه تحضني وتمسح دموعي

.. ايدي ترجف ضميتها قوي وحجيت تحت شهكاتي المتواصله

ملاك: تعبت والله مثل الكابوس بحياتي مااريده

.. مسحت على شعري وهيه ادكول

الـِن: يله كافي خل يولي لا اتعبين نفسج هيج

.. بعدتني عنها وهيه تمسح ادموعي ومثبته عينها عليه

.. بعدت نفسي عنها واجت عيني على الاوراق المتناثره با الارض مسحت دموعي وبقيت الم بيهن شكد حسيت با الندم بوكتها ليش ما قريتهن؟

.. لميتهن با ايدي واخذتهن للغرفه فتحت الباب خليتهن على جهه وتممدت على السرير فاقده

.. فتحت عيني  على صوت الجرس كمت على حيلي افتح الباب واجت عيني عليه

.. تقدمت واني احضنننه قوووي حجيت

ملاك: ضببع

.. ضحك وهو يحضني بصعوبه دخل وجان شرار سانده والـِن من جهه ثانيه سلمت على شرار ودخلو با الصاله

.. ثبتت عيني عليه ورحت قريب عليه احضنه قوي وهو يبادلني حجيت

ملاك: مشتاقتلك ضبع هواي

.. رفع عينه عليه وكال

ضبع: مو اكول تسئلين

.. رفعت عيني على الـِن وحجيت بمكر

ملاك: الـِن متقبل احجي وياك

.. هزت ايدها با استهزاء وكالت

الـِن: طبعا ناكره المعروف طالعه على ابن عمج

.. ضحكت عليها واني فرحانه بشوفته بس الي خوفني اكثر نظراته اليه نظرات شفقه!!؟

.. بقى شرار شوي وكال

شرار: اذا احتاجيتو شي اتصلو عليه

ضبع: متقصر

.. ابتعد وهو يضغط على اكتاف ضبع وطلع سديت الباب خلفه ورجعت للصاله اجت عيني على ضبع وهو حاضن الـِن ابتسمت وطلعت بدون لا يحسون عليه حجيت بهمس  اقلدها مستهزأه

ملاك: مسسستحيل ارجعله مستحيل ديله بله

.. دخلت للمطبخ وبديت احضر الغدا سمعت صوتها وهيه تصيحني رجعت للصاله وضيقت عيني

.. كاعده وهيه منتجيه على ضبع رفعت اصبعها با امر

الـِن: جيبي مي لزوجي حبيبي خل يشرب دوا

..رفعت حاجبي وثبتت عيني عليها وهو يضحك حجيت بنبره

ملاك:اشو صار زوجي حبيبي ولبارحه منو يريد يشمره با الشارع

.. ابتعدت عنه وهيه تخزرني اندارت عليه وكالت بصوت هادئ

الـِن: زوجي حبيبي ترضاها بت عمك تحجي عليه

.. جاوبها بكل هدوء وهو يكول

ضبع: ما حجت اله الصدك بعد عليمن تحجي عليج

.. ضيقت عينها بزعل وكامت على حيلها عبرتني وكالت

الـِن: خل تفيدك بت عمك لعد

.. طلعت من الصاله للغرفه غلقت الباب قوي

.. جنت مضيقه عيني با استغراب هزيت با ايدي واني مثبته عيني عليه حجيت

ملاك: ها شبيها

.. ضحك بعفويه اتقدمت عليه وكعدت مقابيله سئلته

ملاك: شلون صرت

.. هز براسه بكل هدوء بدون لا يجاوبني ورجع كال

ضبع: شنو الي صار بينج وبين الاشتر مو استقتل علمودج ليش طلكج

.. بعدت عيني عنه وحجيت

ملاك: ما ادري

.. ثبت عينه عليه ورجع كال

ضبع: احجي ملاك شنو الي صار اشتر ليش طلكج وهو راد يكتل نفسه بس في سبيل ترجعيله سويتي شي خطأ؟؟

.. رفعت عيني بصدمه وايدي رجفت ضغطت باايدي على الكرسي خايفه اجاوبه بس!! معقوله هو تركني لان رخصت نفسي اله...

.. هزيت براسي بمعنى لا وحجيت

ملاك: قبل فتره اجت اخته وبنته يسئلوني عليه صارله شهرين مختفي

.. ما جاوبني بعد عينه عني وهذا الي خوفني اكثر اني اعرف ضبع اكثر من نفسي واذا بعد عينه من يحجي يعني اكو شي حاولت اقنع نفسي ماكو شي وانفض الافكار السلبيه من فكري شويه ودخلت الـِن وهيه لابسه فستان بيتي صيفي اسود قصير يجنن عليها وهيه بشرتها بيضه وجسمها حلو كاعد عليها ثبتت عيني على ضبع وهو مركز ويا كل خطوه تخطيها ابتسمت وحجيت

ملاك: اشو رجعتي

.. كعدت مقابيل الضبع وهيه تتكتف بعناد وحجت

الـِن: اي اني حجيت عليك واريد اشمرك با الشارع عندك مانع استاذ ضبع

.. هز براسه بمعنى لا وهو مبتسم رجع كال

ضبع: لا ليش امانع البيت بيتج

.. ابتسمت وهيه تباوعله بحقد رجع كال

ضبع: بس ترضيها زوجج حبيبج ينام با الشارع

.. ضحكت بمكر وكالت

الـِن: اي اقبل ونص هم

.. رفع اصبعه بتهديد وكال بكل مكر

ضبع: لسانج طولان يرادله

.. كال اخر كلماته وهو يغمزلها

.. بقيت فاتحه حلكي مفهيه شبيهم ذوله!! انداريت على الـِن وجانت خجلانه ومنزله راسها لو تخزره حجيت بصوت

ملاك: اكوم اشوف جدورتي احسن من الكعده يمكم صايرين تخوفون

.. اتجهت للمطبخ احضر الغده خليتها بصينه واخذتها لـ الـِن حجيت

ملاك: يله وكلي زوجج حبيبج

.. ضحكت وهيه تباوع على ضبع وحجت

الـِن: شوف بت عمك تغار

.. ضحكت عليها واني اقدملها الصينينه اخذتها من ايدي واتوجهت للمطبخ صبيت اليه وكعدت اكل ابحدي تركت الاكل ما اشتهي وغسلت وتوجهت للصاله جانت الـِن تاكل وناسيه ضبع وهو عينه عليها مبتسم حجيت بصووت

ملاك: ولج وكلي راح يموت من الجوع المن جايبته هنا تعذبي لو تدارينه

.. اندار عليه واشرلي

ضبع: مو مشكله اهم شي هيه تاكل

.. رفعت راسها عليه ودزتله بوسه بلهوا ضحكت عليها شكلهم يخرب ضحك

.. تركتهم ودخلت للغرفه اجت عيني على الظرف اخذت قطع من عنده حاولت ارجعهن بس ماكدرت ما مفهوم ولا كلمه نزلن دموعي وبجيت بحرگه گلب خليت ايدي على شفتي اخفي شهكاتي وحجيت بصوت غير مسموع

ملاك: وين انت ؟

.. مسحت دموعي متوجهه للسرير اخذت مبايلي اگلب بي شويه واجت رساله

-توالت الصدف حتى استطاعت ان توقعني في حبها،
عيناها كانتا كالسهم الذي اخترق شغاف قلبي،
بت اسيراً لها،
اقتربت بتردد لابوح لها خوفا من ان تقولي لي
لستَ الرجل الذي ابحث عنه!!
تملكني الخوف وانا اتجهه نحوها،
اقترب منها ولا استطيع النظر الى عينيها الساحرتين
ووجنتيها الورديتين
قلت لنفسي الحياه فرصه اكمل استمر لاتترد
وقفت امامها كطفل يشتاق لعناق امه،
قلت لها هل تسمحين لي ان اعترف لك بحبي يا ملاكي..

ضيقت عيني با استغراب واني اقرا اخر كلمه

- ملاكي

.. كتبت بخوف وايدي ترجف

ملاك: منو؟؟

.. ماجاوب بس انفتحت

ملاك: اشتر؟؟

.. ماجاوبني ولا فتح الرساله تركت المبايل على جهه وبقيت افتر با الغرفه خايفه فتحت الباب لكيت الـِن نايمه على رجل الضبع وهو يلعب بشعرها ابتسمت وحجيت

ملاك: الله يثخن

.. كرصت رجله وصاح متألم وهو يشد شعرها قوي

ضبع: سوالفج التعبانه بطليها

الـِن: اسمع بت عمك راح تموت من القهر لان اني ورجلي رجعنه وهيه بقت عنوسه

.. جانت تضحك من حجتها بس حسيت كلماتها سهام نبتت بگلبي نزلت راسي بحزن وابتعدت عنهم اخر شي سمعته وهو يحجي عليها فتحت الباب ودخلت للغرفه شويه ودخلت ورايه كالت

الـِن: ملاك والله مو قصدي شبيج

.. رفعت راسي وابتسمت بحزن

ملاك: ماحجيتي اله الحقيقه

.. تقربت عليه وهيه تكرص خدودي كالت

الـِن: لا عيني راح ننطيج لاستاذ احمد وتصيرين ست ملاك واستاذ احمد

.. جريتها من ايدها قوي سريع كعدت مقابيلي وحجيت

ملاك: سمعي الـِن وصلتني رساله ويمكن من الاشتر

.. فتحت عينها بصدمه وهزت راسها بمعنى لا

.. اخذت المبايل اراويها الرساله بقت مثبته عينها واخر شي رفعت راسها عليه وكال

الـِن: شلون يدزلج رساله وهو..

.. ضيقت عيني بااستغراب ماكملت كلامها ونزلت راسها حجيت بصوت خايفه

ملاك: شكو الـِن؟؟

.. رفعت عينها عليه وكالت

الـِن: شنو الي يثبت هذا الاشتر وبعد كل هذا ناويه ترجعيله شبيج انتي

.. گلبت عيني بحيره وحجيت

ملاك: اني احبه الـِن ومااكدر انسى

.. بعدن عينها عني وحجت

الـِن : انسي احسن

..هزيت راسي بمعنى اي وبداخلي حزن مستحيل احد يفهمه

..صريخ بماي ياهو اليفتهم وَني؟

بقت شوي تحجي وبالي مو يمها وطلعت كمت على حيلي بدلت وطلعت للمعهد

.. دخلت للمعهد بعدهم طلابي ما مكتملين كعدت با الغرفه واستاذ احمد كاعد وعينه عليه انقرف من عنده شكله وصخ ابتسمت على نفسي من وين ليوين!! من اشتر لهذا

.. هزيت ايدي با استهزاء وكعدت عينه عليه لعب نفسي اخر شي ابتعدت عنهم متجهه لطلابي بديت ادرسهم وخلصت اخذت جنطتي ردت اطلع وصار بوجهي خفت واني ارجع بخطواتي

.. ثبت عينه عليه وهو يعدل بحزام بنطرونه النازل وشكله حيل سمين وعمره تقريبا با الخمسين بكد بنته ماادري شلون تجرأ وحجه هيج

- اتوقع ست منى حاجتج مارديتلي خبر واني انتظرج

..ابتسمت وحجيت بهدوء

ملاك: استاذ احمد ماتوقع اكو نصيب بيناتنه

.. ضيق عينه بقرف وهو يبصق با الارض ورجع رفع عينه عليه كال

- وشنو المانع ست ملاك

.. رفعت حاجبي واني اخزره

ملاك: فارق العمر استاذ احمد

.. هز ايده وهو يكول

- مو زين اني ردت استر عليج وانتي مطلقه

.. رفعت اصبعي بتهديد وحجيت بصوت

ملاك: شنو تستر عليه مستوره وغصبا ما على راسك استحي على روحك جاي تخطب وحده بكد بنتك صدك ناس ما تستحي دوخر عن وجهي

.. طلعت واني افور من العصبيه نزلن دموعي و جسمي يرجف من اصعب المواقف الي مرت عليه حطيت ايدي على صدري واني ارفع راسي للسما

ملاك: يارب تعبت

.. مسحت دموعي واتصلت على الـِن

ملاك: الـِن تكدرين تجيني

.. جاني صوتها وهيه تصيح

الـِن: ليش شكو شبي صوتج

ملاك: ماكو شي بس تعاليلي

الـِن: وابن عمج وين اعوفه

.. ابتسمت على كلامها وحجيت

ملاك: يله مو مشكله

..بعدني ما غلقته واجاني صوتها وهيه ادكول

الـِن: اوكفي اوكفي وين راح تروحين اني راح اجيج

ملاك: بنفس الكوفي مالتنه اشرب كهوه راح انتظرج

الـِن: تمام

.. غلقته من عدها متوجهه للكوفي جان صغير وديكوره حيل حلو تصميمه ريفي شتوي وصيت على كهوه وكعدت انتظرها شويه ودخلت اشرتلها اتقربت عليه وهيه مبتسمه

..كعدت مقابيلي وكالت

الـِن: شنو شبيج

.. شرحتلها بشكل مختصر وهيه كلساع تريد ترجعلهم واني باالكوه لازمتها صاحت بصوت

الـِن: عوفيني اله اطلع بروووحه هذاا الكو...

.. كالت اخر كلماتها وما اتوقع بقى شخص ماسمع من كد ما المكان هادئ وبس صوتها يلعلع

.. غطيت وجهي مستحيه وحجيت

ملاك: الله ياخذج فضحيتنه امششي نروح

.. كمت على حيلي واني اسحبها قوي من ايدها وهيه بس تريد تهد وتتعارك

.. رجعنه للشقه وفتحت الباب بقيت رجليه متجمده بمكانهن واني اشم عطره معقوله موجود؟؟

.. دخلت الـِن قبلي ودخلت وراها خايفه اشوفه جان بس ضبع كاعد با الصاله وخابت ضنوني نزلت عيوني بحزن واني مثبتتهن عليه سمعته كال

ضبع: شبيج؟

.. بعدني ما مجاوبه وهجمت الـِن عليه وهيه تصيح

الـِن: ضبببببع الجلللب خاايني

.. رفع ايده وكال

ضبع: رجال فقير

.. بقت تشمشم با الشقه وماكو مكان ما نبشته تقريت عليه تشم بركبته ابتعدت عنه وحجت

الـِن: اشو ماكو

.. اندارت عليه وكالت

الـِن: كاعد تشمين العطر

.. هزيت براسي بمعنى اي

..صاح ضبع وهو يكول

ضبع: رضوووان ما مخلف بنات مخلف جلاب المفروض نشغلجن با السيطرات جلاب بوليسيه

.. ضحكت على شكلهم وهيه لازمته من ياخه قميصه تهدد بي ابتعدت عنه وبقت تفتر با الشقه الا ان رفعت شي من الكاع وهي ادكول

الـِن: هاي الي تخوني وياها عدها وهواس نظافه

.. فتحت عيني بصدمه وايدي رجفت واني احول نظري على الضبع

.. ثبت عينه عليه كانما يترقب ملامحي وكال

ضبع: الاشتر جان هنا

.............................

الـِن: اكووو

فتح عيونه بصدمه وبصعوبه كال

ضبع: تعالي

.. اتقربت عليه بخطوات خايفه ثبتت عيني عليه وكال

ضبع: شنو جان الوشم؟

الـِن: من كل كتف جناح وبا الوسط مكتوب كلمه

.. ابتسم ورجع كال

ضبع: اشو صايره حلوه

.. ضيقت عيني بخوف

الـِن: اكلك صاحبك ميت وانت هنا تتغزل بيه شبيك

ضبع: اشو تقربي اشوفج

.. رجعت بخطواتي واني اخزره

الـِن: ضبع الجلب صار شي بعقلك

.. حجه بصعوبه

ضبع: انتِ بعقلي وبگلبي

.. ابتسمت واني اتقرب عليه اكثر كعدت يمه على السرير وعينه مثبتها عليه حجيت

الـِن: ضبع هذا الاشتر

.. بعد عينه عني واخذ نفس وهو يكول

ضبع: لا مو هو

..اخذت نفس براحه وحجيت

الـِن: لعد وينه ضبع

.. ثبت عينه عليه واخذ ايدي يضغط عليها بصعوبه وقربها على شقته يطبع بوسه عليها

الـِن: شوف بطل هاي سوالفك واحجي لان گلبي راح يوكف احجي الاشتر وين

ضبع: ما ادري وين بس الي اعرفه مستحيل الاشتر يموت بهاي السهوله

الـِن: خطيه لعد شلون خل يدورون عليه كلهم عبالهم ميت ومحد يدور عليه

..ثبت عينه عليه وكال

ضبع: الجثه شنو وضعها

الـِن: طلقه بنص الوجه بس ضبع شنو من طلقه الي تشوهه وجهه بلكامل

ضبع: وين مكانها

الـِن: سمعت ادم يكول بعظمه الخشم

..ابتسم ورجع كال

ضبع: هاي قناصه الاشتر يعني هو الي كاتله

الـِن: وينه هسه

ضبع: المكان الي جان بي صعب واحد يطلع منه عايش

الـِن: وين جنتو ضبع

.. دار عينه عني وكال

ضبع: تعبان ما اكدر احجي

.. نزلت دموعي مسحتهن على السريع انتبهلي وكال

ضبع: شبيج

الـِن: تدري بنفسك شكد حقير؟؟

.. ضيق عينه با استغراب ورجعت حجيت بقهر

الـِن: ليش من كتلك ابتعد عني سمعتني هلمره ليش تركتني با اصعب فتره اليه ليش من احتاجيتك مالكيتك يمي ليش ما رجعت سئلت عليه ليش نسيتني بهاي السرعه ما فكرت بيه ماكلت شنو ُراح يكون شعورها

.. مسحت دموعي واني اشهك بدون صوت حجيت

الـِن: انت جذاب ما تحبني لو تحبني ماتركتني ثانيه وحده ولو احجي واكول ما اريدك الف مره ما تتركني لان انت تعرفني كلش زين من احجيها ما اقصد لا تبتعد عني بس اقصد العكس اني اريدك يمي بس ما تفتهمني

.. عقج حواجبه وكال

ضبع: مستحيل اعوفج بس ردتج ترتاحين وارجعج اليه مسحي دموعج يله

.. مسحتهن وحجيت بحزن

الـِن: يله احجيلي شنو صار وياك

.. گلب عيونه بملل وكال

...................................

.. كاعد مقابيله وعيني عليه نظراتي اله بكل حقد حجيت واني اضربه برجلي قوي على فخذه وحجيت بحقد

ضبع: شجابه العريس هنا

اشتر: يكولون تتهرب من عندي عضيدي

..ابتسمت بحقد وحجيت

ضبع: جهرتك التعبانه ما اريد اشوفها

.. نزل عينه بحزن وكام على حيله وهو يتقرب خلا ايدي على اكتاف الضبع وكال 

اشتر: البقيه بحياتك

.. ضغطت على راسي منزله للاسفل متألم وحجيت

ضبع: ما قصرت

..ضغط على كتفه وكال

اشتر:اعذرني ضبع مالحكته

.. كمت على حيلي واني احضنه قوي وابتعدت عنه حجيت

ضبع: لو ما انت حتى جثته ما الكاها ولا نعرف مكان اسد

اشتر: وصلت بعد فوات الاوان

.. غلقت عيني بقوه ورجعت كعدت على الكرسي وحجيت

ضبع: ليش دمرتها هيج وهيه ملاكك

..رجع لمكانه وهو يثبت عينه على ضبع كال

اشتر: عيونها والوطن وثنينهم غالين

ضبع: تدري بعد مستحيل ترجعلك بكل مره تلتجئ الك وتكسرها مو حرام عليك ما تخاف ترجعلك حوبتها ابتك

.. غلق عينه بقوه وفتحهن كال

اشتر: ياريت حوبتها بيه تطلع

ضبع: لا تخاف الك يوم على الي سويته بيها

.. اتقرب عليه وكال

اشتر: ضبع لو رجعت من هاي المهمه راح اجي اخطبها منك واريد كل شي يصير بشكل رسمي وكدام الناس كلها واذا متت انطيها هاي الرساله

.. قدملي الرساله بعدتها عني وحجيت بنبره غضب

ضبع: انجب ولك شنو كرن كدامك

.. ابتسم وكال

اشتر: راح اروح نادو علينه راح نحمي الخط الامامي الكم

.. كمت على حيلي واني الزمه من ياخه قمصيه وحجيت

ضبع: شنوو تروح وبا الخط الامامي شلون يخلوك هناك وهم يدرو كلش زين انت قناص

.. بعد ايدي عنه وكال

اشتر: اني طلبت

.. حجيت با استغراب وبنبره غضب

ضبع: ولك كو.. انت بعقلك

اشتر: ضبع افتهم ماعدنه اسناد قوي والخط الامامي ضعيف حيل اذا تفلش يكدرون يدخلولكم بكل سهوله

.. بقيت مثبت عيني عليه بخوف وحجيت

ضبع: اشتر تدري الي يصيرون با البدايه هم فخ عمرك شفت ضابط لو قائد ماخذ خط الامام بوجهه المدفع كل الموجودين جنود مضحين بيهم

.. ربت على اكتافه ورجع كال

ضبع: ارجع لمكانك وبطل هاي السوالف

.. بعد ايدين الضبع وابتعد عنه وهو يطلع اخر شي ابتسم وكال

اشتر: ادعيلي ولك

.. بقيت مثبت عيني عليه بقلق غلق الباب خلفه رجعت عيني بحيره لارجاء الغرفه واجت عيني على الظرف الي تركه على الميز اخذته واني اضمه با الجنطه

............

الـِن: وما تعرف بعد وين راح

ضبع: لا بس الي اعرفه اشتر ما يموت بهاي السهوله

الـِن: بزازين بسبع ارواح شيموتكم

.. ابتعدت عنه وحجيت

الـِن: راح اطلع اكمل عندي مراجعات لازم اخلصهن

.. ابتسم وكال

ضبع: اشتغلي عدل دكتوره

.. ابتعدت عنه اطلع واني مبتسمه

................................

اتسائل كيف سيكون شعُور النهايه السعيده؟؟
لشخص اعتاد على ان يخذوله الطريق؟
كيف هي العلاقات الامنه بالنسبه لانسان قضى عمرُه مرتجفاً ؟
كيف هو النوم بلا محاربه الارق؟
كيف هو اليوم بدون رعشه الايدين؟
اودُ أن اعيش هذه اللحظه عُندما تعطيِنا الحياه
فرصه حقيقه لنحيا لا ان نتظاهر بأننا على قيد الحياة.

.. دخلت للشقه واني استشق عطر طيب دخلت سريع واني عيني على ضبع خاايفه تقربت عليه واني الزمه من ياخه قميصه وحجيت بنبره غضب

الـِن: ضبببع خنتني يا جلب

.. ابتسم بدون جواب بقيت افتر با الشقه احاول المح شي الا ان لكيت معقم صغير قربته عليه اسئل سمعته وهو يكول

ضبع: الاشتر جان هنا

.. فتحت عيني بصدمه واني احولها لملاك الي جانت ترجف تقربت عليه وحجيت

الـِن: شعنده اجا

..اندار عليه وهو يجاوب بكل بردو

ضبع: اجا يشوفني

.. حسيت على ملاك طلعت من الصاله واتقربت على ضبع اخنكه واني ارجف

الـِن: احجي وين جان اشتر

.. شدني عليه وهو يضغط على خصري ومثبت عينه عليه مبتسم وكال

ضبع: عود انتي حليانه شنو السر ممكن اعرف

.. ضيقت عيني وحجيت بمكر واني قريب عليه

الـِن: اني اكلك السر شنو انت عجزت  وصرت شايب واني بقيت شابه حلوه

..ضحك قوي وهو يطبع بوسه خفيفه بركبتي ويشم بيها كال

ضبع: عجزت مو وصرت شايب

.. ضحكت خفيف واني اهز براسي رجع كال

ضبع: لو مو جرحي جان راويتج الشايب شلون

.. ابتعدت عنه بخوف وحجيت بمكر

الـِن: مو اكلك شايب

.. ابتسمت واني اكعد مقابيله حجيت

الـِن: ضبع اشتر شنو يريد جاوبني

ضبع: يريد يرجعها

الـِن: شنو يرجعها يلعب علينه شبي هذا يا مطلكها يا مرجعها يا تاركها ماكو خل يولي

ضبع: حضري نفسكم باجر راح يجيب عمامه وشيوخهم ويرجعوها

الـِن: شبيك ضبع اشتر ما يتأمن على ساعه يتركها

ضبع: الي صار اخر مره من رجعها مو حلوه كدام الناس والعالم ومن طلكها ويردها كدام واهلها والناس بس علمود يرد اعتبارها لان لحد الان بس يحجون بسيرتها

.. هزيت ايدي وحجيت

الـِن: حيل تعذبت من ورا خطيه

..اشرلي با ايده وكال

ضبع: تعالي

..تقربت عليه واني اكعد قريب حجيت

الـِن: شتريد

..ابتسم وهو ياخذ خصله من شعري يبعدها وثبت عينه عليه كال

ضبع: روحي من الدنيا انتِ

.. ابتسمت بخجل وضربته قوي على رجله صاح متألم

ضبع: خرب يومج مو يم الرومانسيه ابد

.. كمت عنه واني اضحك متوجهه لغرفه ملاك فتحت الباب ولكيتها تبجي حجيت بصوت

الـِن: هاي شبيج تبجين كومي خل اخذج للمركز نعدل ونسوي تنظيف بشره قبل لا تزوجين

..رفعت اصبعي بتهديد وحجيت

الـِن: هلمره اريد عرس رنان افتهمتي واني اكون حاظره واركص بعرسج

.. كامت على حيليها وثبتت عينها عليه بنظرات استفهام 

ملاك: شبيج الـِن

.. اخذت مبايلي واني اطلع بي اغاني اعراس ولزمت ايدها اركصها وهيه دموعها تنزل وممفتهما بعدتها عني وحجيت

الـِن: بس فهميني شبييج فاهيه

..مسحت دموعها ورجعت تحجي

ملاك: غير افتهم شكو

.. تمايلت بخصري واني اتقرب عليها حجيت بحماس

الـِن: اشتر رجع خطبج من الضبع وهلمره كل شي راح يكون على حسب الاصول مشيه وعرس وندك ونركص

.. فتحت عينها بصدمه ودموعها ينزلن كالت

ملاك: مستحيل ما اريده بعد

.. اتقربت عليها واني اجر خصلات شعرها الكثيفه

الـِن: شوفي ولج صرتي عجوز بعد منو ياخذج اقبلي با اشتر وهم ضبع كال غصبا ماعليها تقبل وبعد تدرين با ابن عمج لو كال كلمه تتنفذ

.. ابتعدت وهيه تكعد على السرير وبقت تبجي بصوت شكلها يكسر الگلب تقربت عليها وحجيت

الـِن: كافي ملاك خل نعيش نفس العالم

.. خليت ايدي على اكتافها واني انزل بمستواها رجعت حجيت

الـِن: اني وياج اقدارنه متشابهه حيل

..رفعت عينها عليها وهيه متروسه دموع ومتحوله للون الاحمر حجت بغصه

ملاك: دمرني شلون ارجعله بهاي السهوله

..اخذت ايدها واني اضغط عليها حجيت

الـِن: لكل شي واكو جواب واني متاكده عنده عذر مقنع اكعدي ويا واسمعي

..هزت براسها بمعنى اي ومسحت دموعها بقيت كاعده يمها الى ان نامت طلعت واني اسد باب الغرفه متوجهه للصاله اجت عيني عليه جان نايم اتقربت وحجيت

الـِن: ضبع

..راسا فتح عينه وثبتها عليه

ضبع: شنو

..حجيت بصوت مرهق

الـِن: اريد انام بحضنك

.. ابتسم وهو يبعد الغطوه ويفتح ايدي تقربت عليه واني انام يمه حسيت عليه ون با الم ابتعدت خايفه رجع جرني من ايدي قوي وهو يلمني بحضنه

..ثبتت عيني عليه وحجيت

الـِن: احبك ضبع

..ابتسم وهو يتلمس فكي با اصابعه الي بقت تتجول على ملامحي الى ان استقرت على شفتي ضغط عليها قوي وهو يتقرب

.. مرت ايام وبدينه نحضر للمشيه ورجعو ملاك جان واكف باالباب يريد يدخل يشوفها

.. جريتها من ايدها ارجعها للصاله وحجيت

الـِن: ماكو مو بهاي السهوله

ملاك: شبيج الـِن

..خزرتها وحجيت

الـِن: شبيج كاتله روحج بس تردين تشوفينه اوكفي خل نشلع گلبه

.. اشرتلها تدخل وفتحت الباب قليل صار كدامي مستغرب

اشتر: شلونج الـِن

الـِن: الحمدالله نسيبنه العلم

.. ابتسم ورجعت حجيت

الـِن: لا على بالك مكيف ننطيك بنيتنه هيج بهاي السهوله وترجع وياك انريد عرس معدل

.. ضحك وكال

اشتر: تدللين جنج على عرس بس خل اشوفها

.. سديت الباب قوي وحجيت من ورا الباب

الـِن: متشوفها اله بيوم العرس يله بيباي

.. انداريت عليها وحجيت

الـِن: صيري هيج سباعيه مو مكيفه راح تشوفي اثكلي اثكلي صيري نفس اختج

.. ضحكن البنات وبدينه نحضر لعرس الاشتر وملاك الى جان من احلا الايام الي عشتهن

.. لابسه فستان لون زهري نازك حيل واتمايل بجسمي وعيني عليها اخذت ايدها وبدينه نركص

..ثبتت عينها عليه وكالت

ملاك: ريم ماكو

..انداريت اشوف واشرتلها على مكانها وحجيت

الـِن: ملتهيه وي جهالها

.. ابتسمت وهيه تتقرب علينه وبدينه نركص ثلاثتنه واحنه لازمين ايادي بعض وجهال ريم يفترون يم رجلينه

.. شويه وصاحو راح يدخلون مشيت سريع اخلي شال على اكتافي العاريه وكفت بعيد واني مثبته عيني عليهم دخل اشتر وهو لابس قاط اسود يجنن الانظار جانت بس عليه ابتسمت وحجيت

الـِن: والله اختي ذواقه

.. حسيت عليه وهو يحضني من خصري ويقربني عليه
رفعت راسي عليه وحجيت بخوف

الـِن: والله احنه عائله ذواقه

.. ابتسم وهو يطبع بوسه خفيفه على راسي وكال

ضبع: هلاكي

............................

..واكفه امام المرايه اختار فستان حجيت بصوت بعد ما شفته طالع من الحمام ينشف بشعره

الـِن: صدك تحجي ضبع راح يجون وانت لحد الان ما مبدل

..ابتسم وهو يحضني من الخلف خلا راسه بركبتي وهو يطبع بوسات خفيفه كال

ضبع: عود ليش ما ينشبع منج

.. ضيقت عيني با استهزاء وحجيت

الـِن: عبالك يمشن عليه هاي السوالف مثل قبل روح حبيبي بدل راح يجون العالم عيب

.. حضني قوي وهو يخلي ايديه على بطني

.. حسيت بمشاعر الحزن اجتاحتني تصرفه طبيعي بس اني ليش صار بيه هيج!!

..حجيت بصوت حزين

الـِن: ضبع بعد ما يصير عدنه اطفال

ضبع: لا ادكولين هيج ربج رحيم

..نزلت عيني وحجيت بهمس

الـِن: مستحيل راح يصير عندي واني بيه صرع

.. دارني عليه وهو يحضني قوي وبعدني كال

ضبع: تتعالجين و الاسبوع الجاي اخذج للنمسا وهناك نشوف دكتور زين

..نزلن دموعي مسحتهن سريع وابتسمت مبتعده عنه

لبست فستان اسود ساده طويل وفتحت شعري انداريت اشوفه وهو يدخل لابس قميص لون ابيض  وهو مصرفن الردانات وبنطرون قماش رصاصي وحذاء اسود حجيت بصوت

الـِن: ناقصك بس زنجيل وتصير مجرم مافيا

..ابتسم واتقرب عليه اخذ ايدي وهو يطبع بوسه خفيفه عليه كال

ضبع: وانتِ طالعه اميره

..نزلت راسي بخجل اتقرب عليه ونزينه على صوت الجرس ابتعد عنه سريع واني اصيح

الـِن: يله انزل يمكن اجوي

.. نزلت قبله واني افتح الباب جانو ادم وازل سلمت عليهم واني اخذ الصينيه من ازل رفعت عيني عليها

الـِن: هااي شنو مسويتلنه

..ضحكت وكالت

ازل : بقلاوه

..ضيقت عيني على ادم وحجيت باابتسامه

الـِن: خوش مختارلك مره

..ضحك وهو يحضنها كال

ادم: شعندي غيرها

..ابتسمت على كلامه ودخلو للصاله اتوجهت للمطبخ احضر الاكل ونزل ضبع كعد يمهم جنت بس اسمع سوالفهم شويه واجت ازل يمي

ازل: شوكت دوامج

الـِن: راح نرجع للنمسا

..فتحت عينها بصدمه

ازل: ودوام ضبع شلون

..هزيت باايدي وحجيت

الـِن: ما اعرف بس على الاكثر يتركه

ازل: صحيح هو ما محتاجه عليمن شامر نفسه بنص الموت وهو عنده خير من الله شركات ومعارض سيارات

.. ضيقت عيني واني اكرصها ب ايدها

الـِن: عينج ولج لا تحسدينه

.. ضحكت بصوت واني هم انداريت على صوت الجرس وحجيت

الـِن: منو تتوقعين هلمره

ازل: اشتر وملاك

الـِن: ريم وشرار

.. ضحكنه واحنه متجهين للصاله فتح ضبع الباب وجانو ريم وشرار واطفالهم وريم بلكوه تمشي وبطنها شكبرها تقربت عليها واني احضنها وسلمت على شرار انداريت عليها واني اشوف جهالها وابوسهم جهال ريم حييل حلوين ويشبهوها بس با الهدوء لا طالعين على ابوهم ما ينحملون

.. خليت ايدي على بطنها وحجيت

الـِن: تردين تسويهم فريق كره سله حبيبتي؟

ريم: هم توأم

الـِن: الله يشيلج ادري هاي بس خلفتج كلها  توام

.. ابتسمت اخذت ايدها وتمشينه للصاله كعدنه يمهم وبس اصواتهم عاليه

.. عيني عليهم  احفاد مهيوب وهمه فرحانين ويسولفون منو الي يتوقع راح يكون حالنه هذا بيوم من الايام

شرار: وين اشتر

ضبع: اتأخرو لبارحه جانت طيارتهم اتوقع الصبح يوصلون

شرار: اتصل عليهم جهالي جاعو

..انداريت على ضبع وحجيت

الـِن: اتصل عليهم شوفهم وين لا ولد شرار ياكلونه همه وابوهم

.. ضحك شرار واشر عليه وهو يكول

شرار: مو اكلج صفره

..ضيقت عيني وحجيت

الـِن: صفوري

.. بعده ما مجاوبني واندك الباب كمت سريع افتحه جانو اشتر وملاك اتقربت عليها احضنها

الـِن: وين اتاخرتو

..رفعت ايدها جانت بيها صينيه مسلفنه قدمتها اليه اخذتها مصدومه

..دخلو للصاله ودخلت وراهم رفعت الصينيه وحجيت موجهه كلامي لملاك

الـِن: هاي انتي مسويتها؟؟

..ابتسمت وهي تنزل عينها كالت

ملاك: اي

..ضيقت عيني با استغراب وحجيت

الـِن: والله جذب

.. خزرتني

ملاك: ولج الـِن شنو قصدج اني ما اعرف اسوي شي

.. تركت الصينيه على الميز وكعدت مقابيل اشتر

الِـن:اشتر انت تدري بملاك ما تعرف تطبخ وحتى تنضيف ما تنضف اني شايله همك خطيه وادري بيك تتعقد من الهوسه والوصخ وهاي بتنه فاهيه

.. ابتسم بعده ما مجاوبني حجه ضبع ابرود مستفز

ضبع: هو ينضف ويطبخ

.. انداريت على ضبع واحنه نضحك عليهم كال

ضبع: ذاك اليوم رحتلهم لكيت المكرود الماسحه منا ووصله المسح منا ويجلف با الكاع

.. ضبع يرفع واني اكبس ناصبين عليهم

.. جر ايدها وهو يطبع بوسه خفيفه عليها وكال

اشتر: افتخر بهذا الشي واذا ساعدت ملاكي تستاهل احد يدللها ويساعدها

..ضحكت واني اكرص بضبع باايده صاح متألم

ضبع: شكوو

.. اتقربت عليه واني اهمس

الـِن: اتعلم شبيك

ضبع: والتمن الي اسوي من ترحين للدوام

.. ابتسمت واني اجعص بوجهه

الـِن: ذليتني هو مره وحده

.. بقينه نضحك ونسولف شوي وصاح شرار

شرار: يمعوودين راح نموت من الجوع

.. وجهاله ردوو ورا مثل الببغاء

.. كمنه نحضر الاكل على الميز والتمينه بعدني ما اكلت وسمعت ون ريم انداريت عليها وحجيت

الـِن: شبيج ليش متاكلين

ريم: بطني تاذيني

ازل : بس لا تطلكين علينه ولج

ريم: المفروض عمليتي بعد اسبوع

ملاك: ناخذج للمستشفى

.. صاحت بصوت اخترعنه كام شرار على حيله وهو يتقرب عليها كومها بصعوبه وبدت تصيح كلنه بالنه يمها وعينه عليها اخذها شرار وطلعنه ورا كل واحد اخذ سيارته ولاحكيها للمستشفى ورا ساعات جابت ريم ثنين توام ولد وبنيه سمتهم فهد ونارا

.. كاعده با البلكونه واكتبلكم قصتي رفعت عيني على ضبع وحولتها على بطني الي بدت تكبر واني اتلمسها بكل حب حامل با الشهر الرابع بعد ما اجينا للنمسا وبديت اراجع كال الدكتور يصير احبل لان الصرع نفسي وفقط من نفسيتي تعبانه يرجع عليه تركت العلاج وكدرت احمل بعد بعده اشهر

.. اني مو بطله اني مجرد انسانه حاربت وما استسلمت بعد كل شي صار استمريت بحياتي لان الدنيا ما توكف على حزن احد كل شخص هو بطل قصته وحياته فـ قاتلو على ماتحصلون الي تردونه اتمنى التوفيق للجميع  شكرا الكم لان انطيتونه من وقتكم

الـِن:انتظروني اسويلي دكه بضبع من جديد ونسويلكم جزء ثاني.... جذب جذب بنات خلوني كاعده وساكته

..................

.. ومثل ما بدينا القصه لازم تختمها ولهنا وخلصت قصتنا🥺💗 اتمنى استمتعوا با الاحداث وعشتوها ويانه

-القصه مليئه با الاسرار بس رتبت الكم الاحداث وحاولت اوصلها بشكل سهل ♥️💕

-رااااح اشتااق لتعليقاتكم هواي واشتاقلكم اكثر شكرا الكم ولوجودكم الحلو تركتو بصمه جميله بكل بارت💕

- نلتقي بقصه جديده مع احداث مشوقه قريبا👏🏻

..في امان الله💗