رواية سليله الانتقام الفصل الحادي عشر 11 - بقلم taratel

هاي الدنيا وتعبها وناسنه التركض
هلي يم المغيسل كلشي راح يفض
اضحكوا تهامسوا ماشوف انه مغمض
لجن يم الله كلشي بساعته من احجي
وحك الساك والعرش مابيكم اليعرض
___________________

..باجر نروح نعقد
..كال هيج لو صعقني بكلامه عفته واتجهت للمطبخ طلعت سجينه من الجراره وخليته بظهري ورجعتله رفع نظره عليه وكال
ضبع: هاا

..اتقربت عليه حيل هوه كاعد واني واكفه فوك راسا وفجاه طلعت سجينه وخليتها على ركبته
الن: شوف ضبع دير بالك تلعب وياي واني بت عاصم الجلب ودم الاجرام يمشي بدمي
..ضحك ضحكه تجنن ضليت صافنه بيها وماحس جر السجينه من ايدي وسحبني عليه كعدني بحظنه وخلا السجينه على ركبتي وهمس يم اذني
ضبع: وهسه
الن:الدنيا دواره
..ضغط على السجينه
ضبع:هاا
.. جاوبته واني ابلع ريكي على كيف وخايفه
الن: يا يا ضب ضب شبيك ما تتحمل شقه

.. ضغط على السجينه حيل حسيت شي نزل من ركبتي رفعت ايدي اتلمس نزلتها وشفت دم باايدي

الن:ضبع حباب والله اشاقه وياك شبيك
ضبع: حضري نفسج لباجر
الن: ما ما يله تريد اذبحني ولا اقبل بيك ترا مو كوه شبيك ياخي ونزل السجينه وعوف اللعب الماصخ
ضبع: خوش لعد منين ترديني اذبحج

.. خفت حيل جان كلامه جدي وخاصتا من ضغط على السجينه اذاني حيل نزلن دموعي على ايده يلا وخر السجينه ودفعني وراح جاب قطن وديتول وكعد يعقملي الجرح الي هوه سواليا باايده وخلالي لزكه عليه وتقرب باسه على كيف

ضبع: لاتعيديها بعد بنيتي
الن: الله يشيلك ويشيل بنيتك كون تجرحني وتداويني شنو انت مرريض
ضبع: لسانج لسانج شلوون بي
..جريت ايده قووي وعضيييته حيل بكل قوتي بس مابدر من عنده اي شي ولا كانما كاعد انجلب عليه عفت ايده وكرصته
الن: احجي كول اخ
..رفع عينه عليه وخزرني
ضبع: عود انتي ليش ما اتوبين
الن: من تبطل عنيي يله اتوب
ضبع: خوش لعد كومي نامي لا تبقين كاعده
الن:معليك
ضبع: لاحول الله
الن:ولاقوه الا باللله
ضبع:استغفرالله
الن: هاي منين طلعت الديانه

...ضحك قوي يمه ضحكته تأسر قلبي
ضبع:كومي الن كومي راح تجلطيني
الن: ما
ضبع: عود ليش بس انتي ما تخافين من عندي
..هزيت بااكتافي بمعنى ماادري

كعد مدري شيسوي بلحاسبه واني كاعده يمه ما جايني نوم بقيت ماعرف لشوكت وماحسيت على نفسي ونمت كعدت على صوت الجرس كمت لكيته مغطيني وخرت الغطا ورحت فتحت الباب لكيته شرار

شرار: سترك الهي شنو هاي الكفشه
الن: ادخل

رجعت واني اتثاوب واجر بنفسي جر للصاله واعدل بشعري
الن: شعندك جاينه اليوم من الصباحيات
شرار: وين ريم
الن: ياعزا نسيت

..التفت لكيت ريم تقدمت عليه وسلمت وهو جاوبها اخذها وطلعوا بقيت بس اني ابحدي حيل كاعد اضوج ومااعرف شسوي احتاريت شنو اسوي اجت ابالي فكره بما انو ضبع ماكو بس خفتت يرجع ويعاقبني بس بعد اني مااتوب رحت تمشيت بخطوات بطيئه لغرفه ضبع فتحتها متنفتح قافلها انزعجت ورجعت ضليت ادور بلصاله ماكو شي اسوي قررت انزل افتر بلمجمع السكني لبست قمصلتي وعدل شعري ونزلت جوا الاجواء تجنن حتى مول وحديقه واطفال يلعبون بلحديقه كعدت اباوعلهم وتقرب عليه واحد وهو يكول
-سلام
الن: وعليكم السلام تفضل شرايد؟
-اول مره اشوفج هنا جديده بلسكن
الن: اي والله جديده
-وين تسكنين بيا طابق
الن: يمه بس يا تريد تخطفني

.. ضحك الولد
-لا والله بس عجبني اتعرف عليج
.. باوعت لكيت سياره ضبع صارت كدامنه يركنها يمه الخوف ضليت اكل بروحي اكل ماعرف شسوي الولد يحجي وياي ولا يمي بس اني مثبته نظراتي على ضبع وادعي ما شافني شويه ونزل من السياره وعينه اجت بعيني واتجه نحوي يمه رجليه ضلن يطكطن من الخوف ابتعدت عن الولد واتجهت نحوه

.. اجا عليه وهو يلزم ايدي قوي
ضبع:شمنزلج جوه
الن:ضبع شبيك ترا اني مو رهينه عن الخلفوك متت صارلي باالاسبوعين محبوسه بلشقه فوك
ضبع: وهذا منو
الن: منو منو
ضبع: الي جنتي واكفه يمه تركني واتجه على الولد بدون كلام ضربه بوكسي بوجهه وكع الولد ونزل عليه ضبع وضل يضرب بي لحد ما دما تدمي نوبه خطيه كدام الاطفال ضلو يتصارخون من الخوف رحت عليه ردت ابعده عن الولد ماكدر كسر وجهه تكسر التمو الناس يبعدو فقد ضبع حيل ضخم ضخم وما ينلزم لحد ما تركه ولزم ايدي الي صارت عباره عن دم من ورا وسحلني سحل للشقه وابجي

الن: انت خبل شسوالك الولد وتضربه

..تقرب عليه بصياح
ضبع:وهسسه انتيي تبجين عليه
الن: والله ماابجي عليه ماابجي عليه بس على الموقف الي خليتني بي
ضبع: ليش موقف شنو خليتج بي تعرفين هذا منو وشيسوي
..جاوبته واني ابجي
الن: والله والله مااعرف منو بس اجاني وسلم وكال انتي جديده هنا وسئلني بيا طابق اسكن
ضبع: وجاوبتي؟؟
الن: لا ماكتله

..هدء شويه ورجع عليه يمسح بدموعي
ضبع: كافي لا تبجين
.. رفعت عيوني عليه وكرصته
ضبع:اخ يابت عاصم الجلب
..نزلت عيوني
ضبع: كافي مو ردتيني اكول اخ وهسه كلت
الن:يعني تجذب عليه ما تاذيت

..ابتسم ورفع وجهي
ضبع: لاتبجي ياهلاكي
الن: شمسويتلك عمي انت هلكتني هلاك
ضبع: مولسان رشاشه يلحمزه
الن:كوم عني ماريد اشوف وجهك
ضبع: ليش بس اني اريد اشوف وجهج الحلو

..رفعت وجهي وحجيت بتهديد
الن: شوف ضبع لا عبالك تلعب عليه بحجيك الحلو لان لو تموت مااقبل بيك

ضبع: تقبلين
الن:ليش اقبل
ضبع:لان الضبع رايدج
الن: بس اني ماريدك
..خله عينه بعيني وحجه
ضبع: ترديني
الن:الله على الثقه الي مو بمحلها
ضبع:صلفه
الن: صلف
ضبع:لسانج
الن:لسانك
ضبع:ها على الخير تحولتي ببغاء
الن:كوم عني بساع ضوجتني
ضبع: شوفي لازم نعقد اني وياج
الن:كافي ضبع لاتلح بلموضوع عفيه كتلك ماريد يعني ماريد
ضبع:لازم احميج منهم
..باوعتله بقلق
الن:منين تحميني
ضبع:منهم
الن:منوو
..رفع وجهي باايده
ضبع:لازم نكشف الاوراق بعد
الن:هاي شبيك ضبع يا اوراق

..تركني وطلع شيريد من عندي ويا اوراق ومنين يحميني والله دخت ياالهي مكاعد استوعب ولا اتحمل الي كاعد يصير ضبع كاعد يشمر الحجي ويعوفني تايهه
شويه وكمت سويت الغده وهوه دخل يسبح اندك الجرس رحت شفت بلكامرا هذا صفوري وريمه فتحتلهم الباب ودخلو

الن : ها شصار
ريم : مصار شي قدمت افادتي ورجعنه
الن: دوامج شلون راح يكون
ريم: مااعرف والله عندي امتحانات هلفتره والاقسام الداخليه ميستقبلون ماعرف يمكن اشوفلي شقه لو بيت اجرر
شرار:تكدرين تكعدين بشقتي اني هاي الفتره ما موجود
الن: لا عيني لا ماكعدها وياك نوبه تروح تسويلها شي للبنيه انت ما تتأمن اخليها يمي
شرار: لج ادبسزز شمسويلج
الن: ماكو اكعدها يمي هنا بلشقه
شرار:انتي وداخله دخيله لا مكيفه كاعده يم ضبع وتتحامين بي ترا على اي لحضه يطلعج بجلاليق وتجين تتوسلين بيه اخليج يمي
الن: ميسويها ضب ضب
شرار: شنووو ضب ضب لا لا ضبع ضب ضب يمه سمعج اتكليله هيج
..هزيت براسي بمعنى اي ضحك وكال
شرار: بسيطه يا ضب ضب اله الزمها عليك هله عيد وجابه العباس

..نسولف وريم خربانه من الضحك علينه وشويه ودخل ضبع اول ما تلكا شرار
شرار:ها ضب ضب شلونك
ضبع:اكل خ..
شرار: هاي شبيك لو مو حلوه من حلكنه بس من ذولاك الناس
..باوعلي بخزره ورجع باوعله
ضبع: طبعا حلكهم ينكط عسل

.. شرار سكت تحت الصدمه كمنه اني وريم حضرنه الغده وصبينا تغدو همه وكعدوا يسولفون بلقضيه اخذت الجاي الهم وكعدت استمع شصار

ضبع: كل الادله تدل هيه وي نصرت ابو المخدرات
شرار: وشلون
ضبع: بس لو اشتر الجلب يفتح مبايله
شرار: قافل كلشي صدك جلب
..اخذت رشفه من الجاي وحجيت
الن: ضباط جيس حب ولحد الان مالكيتو ملاك
..باوعلي ضبع وهوه يخزر بيه وشرار غص بلجاي
الن: هاي شبيك صفوري
شرار: لكيناها

..فتحت عيني قوي
الن: الله عليك شرار احجي صدك لكيتو ملاك
شرار: لكيناها لكينها بس لحد الان ما محددين الموقع
الن: زين شلونها تعرف عايشه ميته وويامن حباب شرار احجي لا تصير بارد
شرار:ماعدنه معلومه شلونها ومانعرف وين ما خذيها
شرار: ماعرف وين
الن:ليش كل هذا الهدوء اذا عرفتو العصابه الي خاطفيها روحو هاجموها شوفو سوو اي شي
ضبع: اي حركه خطأ تروح بيها
الن:لعد شلون عفيه ضبع ليش هلكد بارد وهادئ سووي شي گلبي راح يوكف عليها

شرار: لان قضيه هاي العصابه واكعه بيد الاشتر
الن:وشنو يعني
شرار:يعني منتهيه
الن: ومنو هذا الاشتر
شرار:هذا تكه ضبع الثانيه
..باوع لضبع وكله
شرار:بسيطه خل يخلص المهمه ويرجع اله اسولفله على ضب ضب ونكعد اني ويا نمززق بيك
ضبع:افتح حلكك وشوف
شرار:اكللله اخونه واكع بلعسل وغمزله
..اني وريم كاعدات مثل الاطرش بلزفه ماعرف شنو الي يحجو ويلمحون اله اخر شي كام ضبع نام واني وشرار وريم بقينه كاعدين نسولف انتبهت لريم حيل هادئه بس اذا حجت حجايه تقصف قصف

الن:شار حباب اريد منك شغله
شرار: شتردين اذبحلج ضبع
الن:الله حجيت الي بگلبي
الن:ولايهمج جيبيلنه السجينه
..كمت جبت السجينه واجيت انطيتيها

..طلع كلنسه من جيبه وشال بيها السجينه وخلاها يمه
الن: ها
شرار: اوكفي شويه

..طلع مبايله يخابر

شرار: الو جيب دوريه للمجمع ..... اكو جريمه قتل وسلاح الجريمه موجود والفاعل هم موجود

..اندار عليه وكال
شرار:يله حضري نفسج راح يجون ياخذوج
الن:يااا شرار اني شكو انت تريد تكتله
شرار:حرضتيني على صاحبي مع الاسف مره تدخل ابينه
الن:عزاا شرار حباب والله مااي علاقه
..عافني وشال السجينه بلكلنس ودخل لغرفه ضبع جان نايم بدون تيشرت على بطنه والوشم الي مزين كتفه من ورا عباره عن حيه ونمر اتقرب شرار يمه وحط السجينه على ركبته راسا ضبع فتح عيونه وكال
ضبع: شيل السجينه وعوف سوالف الزعاطيط

..رحت يم شرار احاول ابعد السجينه عن ضبع بس ميوخر
الن:حباب شرار لا تكتله الله يخليك
شرار:اتحبي
الن:لا بس ماعندي غيره

..ضليت ابجي واحاول اوخر شرار الي بقه حاط السجينه على ضبع وضبع اصلا رجع غمض عيونه ونام يدري بشرار بوخه

..كعدت ابجي ضبع بس سمعني ابجي كعد وجر السجينه من شرار وشمرها
ضبع:ليش تبجيها ياحيوان
شرار: هاي شبيج والله نشاقه
ضبع:مطي متصيرلك جاره
.. طلع شرار واني بقيت امسح عيوني الي من البجي صارت دم كعد ضبع يم رجليه ورفع راسي باايده
ضبع: ليش تبجين
الن: خفت يكتلك
ضبع: تخافين عليه
..هزيت براسي بمعنى اي
ضبع: لا تخافين عليه

..تقرب مسح على وجناتي وكال
ضبع: لا تحبيني تضيعين وياي
الن:مااحبك بس اني اداري مصلحتي اذا متت وين اروح

..ضحك وكال
ضبع:لا تخافين اذا صار عليه شي اني مامن ناس تبقين بحمياتهم مراح يقصرون عليج بشي
الن: خوش لعد هاهيه موت

ضحك وكال
ضبع: ديري بالج تحبيني
الن:هاي شبيك لحيت كتلك مااحبك
ضبع: اني ضايع مشتت مكاعد الكه الطريق الي يرجعني لحياتي سلبو من عندي اعز شي وما زالو همه رسمولي الحياه الي اعيشها
..لزمت ايده
الن: اني اساعدك تلكه الطريق والله اساعدك مثل ماساعدتني واكون وياك بكلشي مراح انسى معروفك حياتي كلها
..شال ايدي وقربها لشفته طبع بوسه خفيفه على باطن ايدي وكال
: اقبلي نتزوج وخل ننتقم منهم اني وياج انتِ تاخذين حقج واني اخذ حقي منهم ...

..............................

..مرت ساعات والسياره تمشي بينه ماوكفت ابد باوعت على البنيه الي يمي وحاجيتها
ملاك:شنو الي جابج هنا
..باعتلي وكالت
.. جنت راجعه من الدوام اشتغل بمعمل خياطه وطبكت عليه سياره واخذتني وهسه اني هذا حالي
ملاك:شنو اسمج
..اسمي سلمى
ملاك: تتوقعين وين ماخذينه
سلمى : لو يتاجرون بااعضائنه لو يبيعونه للملاهي
..سكتت وسئلتني
سلمى :انتي شنو جابج هنا
ملاك: والله مادري جنت كاعده بشقه سكن جامعي والبنات ما موجودات بس اني ودخلو عليه ٣ وخطفوني
سلمى: حسبي الله ونعم الوكيل عليهم
ملاك: تتوقعين نكدر نشرد
سلمى : شردت وله عشت اني بلنسبه لاهلي ميته بعد
..باوعتلها بااستغراب
ملاك:لييش
سلمى: اذا رجعتلهم عايشه راح يكتلوني واذا بقيت هنا راح اموت اذا بلحالتين اني ميته
ملاك: المفروض يفرحون لان راح ترجعيلهم
سلمى : والشرف

..تقربت همست بااذنها
ملاك:اخذو ؟ اتقربولج
سلمى:راح ياخذوا مابقى شي
..لزمت ايدها وحجيت
ملاك:خلي ايدج باايدي والله نشرد منا ونخلص
..هزتلي راسها
ملاك:عادي اسئلج سوال
سلمى : نعم
ملاك: ليش ادكولين ياعلي ادركنا
..شوفي احنه نكول ياعلي بكل شده ومايردنه نكول ياعلي اقتداء بلرسول محمد (ص) لان جان ينادي على الامام علي بكل شده فيا علي ادركنا

..ابتسمت الله اول مره اعرف
سلمى: متعرفين الامام علي
.. باوعتلها بخجل
ملاك: انولدت بعائله ماتعرف الدين شنو انولدت بعائله ما تعرف للحرام شي شكد جنت احب اتعلم من اشوف صديقاتي الي ويايه بلجامعه بس من ارجع للقصر اكرهه اسوي شي من كد ما اشوف الحرام الي يسوو ويشتغلون بي والشي الوحيد الي اعرفه هوه الله عز وجل والنبي وبس
سلمى : واني عكسج انولدت بعائله علويِه ساده ما خايفه هسه بس على شي واحد
ملاك:شنو
سلمى : خايفه على امي وابويه مقعدين وماعدهم احد اخواني متزوجين وطالعين وبس اني اداريهم ياترا هسه شصار بحالهم منو الهم اذا امي عطشت على منو تصيح يجوز هسه يصيحون عليه ومايلكوني يمهم
..ضلت تبجي وتحجي كالت
سلمى :هسه عبالهم شردت اخلص من ضيمهم لان دائما اكلهم تعبتوني بس لا والله ندمانه على كل حجايه حجيتها بس اريد ارجع واشبكهم واحضنهم ومااعوفهم ابد طلعت من البيت واني احجي وادردم عليهم كلت ارجع واراضيهم بس مارجعت شلون امي راح تشيل عليه بگلبها العمر كله شلون

..ضلت تبجي متت عليها من القهر واني اشوفها واسمع كلامها حيل صعبه اجا على بالي بابا رضوان عرف هسه اني وين لو ضبع شنو كاعد يسوي اني ادري بضبع هسه كالب الدنيا عليه ومتاكده راح يلكاني

..كعدت اهدء بيها ضلينه نسولف الطرق كله الجو برد وملابسنه خفيفه نص من البنات ضلن يصيحين ويدكدن على الباب واني سلمى كاعدات ورا وكفت السياره وواحد من عدهم فتح الباب شفت ورا مكان مثل الصحراء والدنيا ليل ضلام حالك رفع المسدس وماشوف بس نار من فوهه المسدس وصووت عالي خليت ايدي على اذاني ودنكت حيل خاايفه البنات ضلن يركضن مثل الطير المذبوح ويصارخن كتلو البنات الي كاعدات يم الباب كتلوهن وهنه بعمر صغير وبدون رحمه !! زين ليش مو حرام...

..رفعت راسي واني اصيح على سلمى الي جانت مدنكه نفسي حاولت اكعدها واكلها اكعدي رفعي راسج راحو بس درتها عليه شفت الدم مالي ملابسها كلبتها ولكيت طلقه نابته بصدرها وعيونها مفتوحه على وسعهن خفت حيل خفت بجيت صحت والبنات الي يمي يصرخن ونبجي كلنه على المشاهد الي كاعد تصير ويانه لحظات ماتنسى ابد ما نحس اله وكفو السياره ورجع نفسه فتح الباب وكتل كم بنيه وكال
..صوت واحد وانهيجن هنا
..الكل سكت وبس صوت الشهكات المكتومه مسموع
سد الباب ورجعت السياره تمشي تقربت على سلمى وغمضت عينها وهمست بااذنها
ملاك: علي وياج

..القهر الحزن الالم كلمات ما توصف شعوري بذاك اليوم وبذيج اللحظه خطف قتل اغتصاب كلشي شفت بعيني والاصعب منهن الطريق المجهول مااعرف وين ماخذينه وعلى اي لجضه نودع الحياه شكد جنت اتمنى اموت ولا اعيش واشوف اسوء من هيج بس شنو الممكن اشوفه اسوء من هيج؟؟

..الليل كله ادك بينه السياره مشي ماوكفت بعد ولا للحظه الجو برد حيل شويه وكفت وفتحو الباب الدنيا ضلام صعدوا كم واحد وبدو ينزلون بلبنات والمقتولات يسحلوهن سحل اجوي اخذو سلمى وجروها من رجلها حيل بدون رحمه وشمروها والبنات هم يشمروهن بسياره صغيره واحد منهم جرني من ايدي ونزلي دخلونه لمخزن حيل جبير صفينا يمكن ٣٠ بنيه دخلونه لغرفه صغيره صايره بنص المخزن ضلينه كاعدين نترقب لحد ما طلعت الشمس ولا وحده كدرت تنام منا لمن فتحو الباب واحد بيهم اشر عليه وكال
..ذيج هناك جيبوها تقدم عليه واحد ضخم سحلني من ايدي وطلعني اخذوني ماعرف وين خلوني بسياره صغيره لطريق مجهول ماكدرت احجي كلمه عرفت الي يحجي ينكتل وصلنه لبيت صغير شكله غريب الشمس بدت تطلع دخلنه للبيت الي جان متروس بنات وكلهن لابسات فساتين وكاعدت يعدلن بشعرهن  كانما هسه راجعات من حفله تقدمت وحده بيهن يجي عمري ب٣٠ وحاجت الولد الي لازمني
-منو هاي
-قطعه بلباكيت
-اي مبين عليها حلوه بس كون شاطره وما تزعجنه
-تزعجبج بلبدايه وانتي تعرفين شتسويلها
..ضحكتله ضحكه مقززه ولزمتني من ايدي واخذتني جوه دفعت ايدها
-ها يحلوه ما اتفقنه هيج
ملاك:الله يخليج حبابه ساعديني
-عادي تتعودين كلنه اجينه هيج بعدين كيفنه راحه فول
ملاك: عليج الله والله ماكدر اهلي ينتظروني حبابه
..جنت احجي بس لا حياه لمن تنادي كعدتني بغرفه متروسه وصخ ومكياج وكلنس وفساتينهن مشمرات يمكن يطلع ب٧ بنات بلبيت هذا باوعتلي وحجت

-شوفي صيري مودبه وحبابه علمود نداريج زين بس لا والله تسوين مشاكل وتخربين اشغالنه هسه اخابرلج بلقيس تجي  تشوي على اذانج البصل

..باوعتلها بخوف
ملاك: والى متى راح ابقى هنا
-ماتبقين هنا شويه وراح يجون عليج
ملاك:منو
-بلقيس
ملاك:منو هاي
-اشترتج للملهى مالتها
..هزتلي بخصرها وكالت
-يعني راح ادكين وتركصين ..
......................................
يوم ٢٠١٤/٩/حزيران
..بهذا اليوم انتهى حلمي وحياتي عائلتي كلشي بيه انتهى بهذا اليوم انسلب من عندي اعز ما املك

قبل يوم
..كاعدين نحضر لخطوبتي وفرحانين اشترينه كلشي لباجر دك مبايلي كمت رحت لغرفتي شلته واني فرحانه واحس الكاع ما شايلتني من الفرحه

ريم: ها حبيبي
-مثل ما وعدتج وفيت
ريم:اروحلك فدوه
-مامصدك واخيرا راح تصيرين اليه
ريم: ولا اني واخيرا بعد معاناه
- هوه غير ابوج حقنه بلكوه يله قبل بيه ولله ليش شنو انت جندي وبتي صيدلانيه
ريم: مومهم اني قابله
-احس نفسي راح اموت من الفرحه ماكدر انتظر لباجر ماتجين نزوج هسه
ريم:عززاا ازهر شبيك صدك تحجي
ازهر: باجر بس نخطب اله اشبعج بوس وعود كولي عزاا

..ابتسمت وكتله
ريم:عييب استحي شبيك
ازهر:مرتي ليش استحي
..مر اليوم ولا اني الي كدرت انام ولا هو بقينه للصبح نسولف ونضحك ومنتظرين ساعه الصفر!!

.. كاعده ولابسه فستاني جان لونه بنفسجي فاتح اللون الي يحبه اختاريته علموده كاعده وانتظرهم يجون كملنه كل التحضيرات دخلو اهله بس هوه ماكو
اجت يمي سناء اخته سئلتها

ريم: عفيه سناء لعد ازهر وين
سناء:مادري كال روحو للحفله قبلي اجيب الورد واجي
..ابتسمت اتذكرت كلي راح اجيبلج ورد طبيعي لون ابيض مثل متحبين كعدت انتظره بلساعه البنات كدامي يركصن ويغنن فرحانات وفجاءه وكف الدي جي وتحولت الحفله للفاتحه دخلت  امه وهلهت وصاحت بصوت عالي رج البيت رج

- ابني راااح شهييد

٢٠١٤/٩/حزيران
-سيطر تنظيم دا١عش الارهابي على الموصل والمناطق المجاوره لها بعد فرض الحصار على آمرلي  وانسحاب القوات العسكريه من الموصل وعزلها عن بقيه مدن العراق راح ضحيتها ٣٠ الف شهيد بطل في الموصل و٢٠٨ الف شهيد بطل لتحرير العراق من الجبناء الانذال، وبدأ القصف حيث سبيت النساء  واغتصبت ديانات التسامح والحب وتيتمت الاطفال ومات كبار السن من الخوف وتدمرت المباني والمدارس واصبحت الجوامع المقدسه اماكن القتل والذبح وتزينت الموصل الحدباء بدماء الشهداء الابطال ودماء الاطفال الابرياء ودماء النساء المغتصبات ودماء الرجال المقاتلين الشرفاء وهكذا تزينت الموصل بلسواد ... الي يوصل لهذا النص يقرا الفاتحه  يستاهلون نذكرهم

..طالعين سيارتين بليل اضلم حالك مينشاف شي صعدت بسياره بيت عمي لان سيارتنه ماكفت شكد توسلت باامي اصعد وياهم بس ماقبلت صافنه بلفراغ وعلى الشوارع الفارغه البيوت المهدومه عايفين كلشي ورانه بيوتنه وشغلنه ومدارسنه وحلالنه ضليت اباوع اريد اشوف سياره اهلي وين ماكو

ريم: عمو شو اهلي مو ورانه اوكف خل نشوفهم
-عمو ماكدر اوكف هاي المنطقه خطره نطلع من عدها واشوفهم وين بس يمكن طلعو كدامنه
..ضليت محتاره ماعرف وين اباوع وگلبي نار عليهن لحد ما عبرنه المنطقه دك مبايل عمو وسمعت صوت واحد يكله
-عبرتو
-اي الحمدالله
-السيارات الوراكم كلها اتذبحت
..هنا اني نهاريت عرفت فقدت كلشي جان بلنسبه اليه اهلي وحب حياتي نزلت من السياره ورجعت اركض بس اريد ارجعلهم ماريد اعيش ركض ورايه عمي وهو يلزمني ويبجي

ريم: الله يخليك عمو رجعني والله ماكدر اعيش بدون اهلي
..ضليت اضرب على راسي واملش بشعري يعني شنو بعد ما اشوف امي ولا اسمع دعواتها من اطلع للدوام الصبح يعني شنو بعد ماعندي سند ورا ابوي بعد ما اتعرك وي ريام على الملابس ولا اخبث على احمد

.. ادك على راسي وصدري وابجي بصوت عالي
ريم: ولج يممه رجعولي رجعو اخذوني ويااكم ليش عفتوني

-يابابا ماندري هسه همه وين على كيفج يجوز عايشين مو كتلج شفتهم كدامي

.. حجيت بشهكه
ريم:جانت عيني عليهم جانو ورانه واختفووو
..كومني عمو ورجع صعدني بلسياره واحنه نبجي كلنه نبجي مانعرف شنو نهايتنه نموت نعيش..

وصلنه كركوك ب١١ الصبح بيومها شكد دورنه فندق ماكو كلها متروسه هواي ناس تهجرت وطلعت من الموصل واجت بكركوك نمنه بلشارع جان الي يروح ويرجع يباوع علينه ثاني يوم عمي اجرنه بيت وكعدنه بي ومازال البحث عن اهلي ماخلينه احد ما خابرنا وسئلنا اخاف رايحين الهم وماكو مرت الاشهر والسنين تحرر العراق بفضل ابطالنه الشهداء بدت الناس ترجع لبيوتها عمي قرر نروح نعيش باالانبار ورحنه فعلا وكل هاي السنين مااعرف اهلي وين ..

عشت يم بيت عمي وشفت الظيم والذل والانكسار هذا الي يعيش بدون اهل هيج يصير جانو يتمنون اتزوج خاصتا عمتي وبناتها بس اني مااكدر اتخطى ذاك اليوم ابد ولا اكدر اتخطى ولا انسى بدت حياتي تصير اتعس من عمي اشتغل حارس بمدرسه وبقيت تحت رحمه مره عمي وبناتها

ريم:خاله جوعانه ماكو شي اكله
..شفتها ضمت الاكل بلثلاجه وقفلتها بلمفتاح
-لا ماكو شعدنه قابل بس نعلف عليج
ريم:مو هذا اكو اكل بلثلاجه
..ما ضامته لحلكج بناتي باجر لو كعدن شياكلن وخاف عامر من يرجع ما يجيب ريوك ويا

..باوعتلها باالم وكسره خاطر
ريم:خاله والله صارلي يوم كامل ما حاطه شي بحلكي حتلو خبزه
راحت للسطله الموجوده على السنك نذب بيها الاكل الباقي ونغسل الاماعين ..راحت عليها طلعتلها من عدها خبزه مبلله من بثل الجاي طلعتها وهيه لعبانه نفسها وخلتها على السنك
-هاي موجوده تردين اكلها

..غسلت ايدها وطلعت تقدمت للخبزه وباوعت
اني بنت الدلال والعز صح ابويه جانت حاله مو كلش بس ما فديوم قصر علينه بشي جان يجيبلنه احسن الاكل  وانواعه جان يكول علمود من تكبرون وتشوفون الناس ماادكولون هذا الشي ما نعرفه هيج عشت ابيت عمي لحد ما رجعت ادرس صيدله وانطو منحه للمهجرين والاحداث بس بيومها ماكدرت ادرس باالانبار قدمولي على بغداد وهذا جان بلنسبه اليه المنقذ ورحت هناك درست خمس سنوات لحد ما انخطفت ملاك من الشقه وانتو تعرفون الباقي

ريم:اكدر اطلب منك طلب
شرار:كولي
ريم : تدورلي اهلي
شرار:وينهم
ريم:بمخيمات اللاجئين
شرار: انطيني معلومات عنهم وراح ادورلج
..كمت جبت ورقه وكتبتله بيها المعلومات الي يريدها
ريم:شوكت راح تدورهم اليه
شرار:ادورهم بس اريد منج شي
ريم:شنو
شرار:يقين...

.................................
بمكان ما..

..كاعدين انضف باالاسلحه
-اليوم وصلتلهم وجبه جديده
-منين هلمره
-منين خاطفيهن ماعرف بس اكيد من انحاء العراق
-تتوقعون عليمن راح يوزعوهم هلمره
-للحجي ولبلقيس
-متاكد
-هاي شبيك ادكل لاشتر متاكد!!
..ابتسم اشتر بمكر
وهو يطلع المعقم مالته ويمسح ايده اردف اليمه باانزعاج
-كافي شبيك ريحه المعقم كتلتني من كد ما اتطلعه وتمسح بي
..غلس عليه وهو يتجه على جنطته ويطلع كوب سفري ويخلي بي مي

حجه واحد منهم
-اني ما احسد بس مره الاشتر ما راح  تتعب بغسل الاماعين
جاوبه الثاني وهو يكول
-بس راح تتعب بغير شي

كعدوا يضحكون تحت انظاره كام وزع عليهم الهويات الي راح يستعلموها للمهمه
-شوكت نبدي
اشتر:باجر
.................

نور: والله لخليهم يجرعون السم
اسد:ماتوقعتها منج صراحه
نور:امشي وراي ومعليك
اسد: بس اريد حصتي
نور:حصه الاسد الك لا تخاف
..ضحك ضحكته المقرفه
نور: وصيتهم مايتقربون الها
اسد:وصيت مثل ماكلتي
نور:عفيه ماريدها راسا تموت اريدها تنازع لحد اخر نفس
اسد:ليش هيج تسوين
نور:احرك گلبه
اسد:منو ضبع
..هزت براسها نافيه
نور:رضوان
..ابتسمت وكالت
نور:عاش هوه وبته ومرته حياه سعيده وبس اني تاذيت من وراهم واجاهم اليوم الي راح يحسون بشعوري وازيد ...
................................
مشهد من المستقبل

اشتر:ولك شراااار باايدي هاي سلمتها الهم

_______________________
لهنا وخلصنا البارت 💕💕
كتبولي رأيكم بلتعليقات راح اقراهن كلهن
بنات اذا عندي اخطاء املائيه غلسوا عليهن لان دا انزل البارت بدون لا اراجعه ♥️♥️🥺

اليوم انتو كتبولي توقعاتكم 💕💕