رواية سليله الانتقام الفصل السادس 6 - بقلم taratel

ادك بابي اعله روحي بجف الاوهام
وصدى صوتي يرد ويدك عليه
ويناديني واكومن واوصل الباب
اثاريني اوصلت بس ناسي ايديه
__________________

اخر شي شافته عيني ضبع وابتسامه على ثغره وراها فقدت ومااعرف شنو الي صار

......

نور: لج يردن يكتلنها
ملاك: يكتلن منو احجي يكتلن منوو
نور: يكتلن بنتي اني

.. وكع گلبي جريت نفس
ملاك: صدك تحجين كتلنها من زمان

.. لزمت ايدي وبعيون مترجيه
نور: والله سمعتهن كالن بت رضوان
ملاك : ماما شبيج صدكي يتخيلج من كد ما ترديها ترجعلج

نور: مو كلتيلي اني اصدكج وكلتيلي الن انخطفت وكلتي راح نساعدج تلكيها هاا وينه حجيكم يله بنتي رجعت يله رجعوها لحضني
ملاك: اني حاجيت ضبع كال مو هيه
نور: وانتي تصدكين بضبع
.. باوعتلها بقلق ولزمت ايدي
نور: لج ملاك ضبع يقتل القتيل ويمشي بجنازته ترباه ايدي واعرفه اكثر واحد لازم نخاف من عنده ضبع

ملاك: بس مستحيل ياذيها
نور: ضبع عامي الانتقام ميهم اذا راح ياذيها او لا
اني متاكده هنه خططن لهذا الشي من قبل سنوات اني متاكده اسماء انطت بنتي لعاصم علمود من يكبر ضبع ينتقم من عاصم عن طريقها

... باوعتلها والصدمه معتليه ملامحي

ملاك : معقوله اكو هيج بشر يفكر بهلطريقه القذره هاي
نور: اكو ضبع
.. باوعتلها بحيره
ملاك : وهسه شنسوي
نور: نوصل العيار لباب الدار
ملاك : مفهمت
نور: راح نكعد ونشاهد
ملاك: صدك تحجين

ابتسمت...

نور: ضبع يعرف كلشي
ملاك: شنو الي يعرفه
نور: يعرف بكل مخططاتهن ضدها وكاعد يلعب على البطيئ ..
ملاك : وشتتوقعين راح يسوي
نور: راح يكتلها قبلهم

فتحت عيوني بوسعهن
ملاك: ماما نور شكاعد تحجين اكو شي ماثر على عقلج حبيبتي
نور: مراح يقتلها لحد اخر نفس راح ينقذها لان هيه الورقه الرابحه بلنسبه اله
ملاك : واحنه شنو دورنه المفروض
نور: مستحيل ارجع اخسرها مره ثانيه
ملاك: محد يصدكج يعني حتى اني هسه احجي واتجاوب وياج بس ماتوقع هذا صحيح ماما نور

.. باوعتلي وابتسامه غريبه
نور: راح اثبتلج هذا الشي اليوم على الغده
ملاك: وشنو الي يستفاده بعد من ينتقم من عدها وعاصم وانسجن
نور: اكو هواي شغلات جوه هذا القصر محد يعرفهن ومخفيه لذلك ملاك لا تامنين بااحد هنا حتى اني لاتامنين بيه كولشي يصير تحت تدبير دقيق

لزمت ايدي ورفعت اصبعي الصغير
نور: هذا اصبعج لو انجرح فهذا من تخطيطهم عبالهم يلعبون مثل مايردون
ملاك : وشنو اول شي نسوي
نور: نطلع ضبع من القصر 
ابتسمت..
ملاك : ماما نور صدك تحجين هسه لو ادكليلي نطلع مهيوب من القصر اكلج اي بيها مجال بس مال ضبع ويطلع منا ما توقع

نور: يطلع يطلع اذا لعبنه بورقته الرابحه
..هزيت راسي بااستنكار
ملاك: شلون يعني منو قصدج الن؟!
..هزت راسها باايجاب
ملاك: وشلون
نور: راح نسبقهم ونخليلها السم
ملاك: صدك تحجين تردين تموتيها مو هسه تصيحين بتي وبتي

...ابتسمت بقهر
نور: لازم تطلع من القصر وهاي الطريقه الوحيده من ضبع يشوف ورقته الرابحه بخطر راح يلعب من بعيد لان لو خسرها راح ينتهي انتقامه منهم

ملاك: والله حرام عليكم باالي كاعد تسوو بلبنيه من كل الجهات تريد تگتله علمود انتقام انتقام اكثر كلمه سمعتها بهذا القصر الانتقام بس لو اعرف منين تاخذون الانتقام طلعتو روووحي

... هزت راسها نافيه
نور: كتلج هواي اسرار مدفونه بلقصر ما تطلع كل جهه ضامه سر لو طلعت ينهدم القصر على روسنه

ملاك: شكد تمنيت اطلع من هذا القصر وما ارجع ابد
نور: لازم نتعايش اذا ما تغديتي بيهم يتعشون بيج 
ملاك: اني ماريد شي حاليا بس البنيه تطلع من القصر سلامات وبس
نور: ساعديني لعد

... حجت الي رادت تسوي

نفذنا وخططنه اله بلحرف رجعت لغرفتي منتظره اللحظه الي راح نبدي بيها خايفه حيل قلقه لا يصير عليها شي حسبي الله ونعم الوكيل عليهم شلون ناس قذره رحت اخذت مبايلي لكيت رساله من رقم غير معروف فتحتها ولكيت صوري !! دزيت ..

..منو انت
..ليش كم واحد دازتله هاي الصور
.. بس واحد نذل وحقير وميستاهل
.. حوليلي ٥٠٠ دولار واحذفهن
.. الي تريده انشره الصور ومابيهن شي لابسه ومحترمات ولا عبالك اخاف من عندك ويلا ديي
.. ورا دقايق دزلي صور مفبركه مو اني بس حاط شكلي على اجسام رخيصه لدرجه
.. ياجلب يا ابن جلب تندك بيه يمكن نسيت اني منو يا سيف الخايس هسه اخابرلك ضبع يشك حلكك وخلي انعلس من عنده ولا تضحك عليه انت ياجلب
..راسا الصور نحذفن والحساب انحذف كل وبالي هاي الصور نحذفت للابد ما توقعت راح تطلع بيوم من الايام وتكون سبب بدماري  ...

....................

.. كعده واني احس بااصوات ماكدر افتح عيني احس اكو شي لازمها ثكيله حيل جسمي مكسر فتحت عيني شوي شوي على البطيئ لكيت نفسي بلغرفه وكاعد كدامي بهيئته المعتاده  اتقرب يمي من شافني بديت اصحى

الن: شنو الي صار وياي
ضبع: تسممتي
الن: شلون
ضبع: اكو احد حاطلج سم بااكلج
الن: الله اكبر على راسكم مو عائله كولها مجرمين رجعني لدك عاصم ولا هذا الضيم كل يوميه

..خله ايده على كصتي كانما يقيس حرارتي

ضبع: امكانيه بلحجي مو طبيعي هسه وصلتي الموت وكعدتيلي لسانج شطوله
.. درت وجهي للجه الثانيه ماريد اشوفه رجع سحب وجهي باايده وعصره

ضبع: ليش تدورين وجهج
الن: عيونك تخوفني
ضبع: وعيونج تضيعني

..دفعت ايده
الن: اوف اوف عوف هذا الحجي الماصخ وكوم من يمي ماريد نفسيتي تعبانه

ضبع: شبيها نفسيتج تعبانه
الن: لا صدك جذب جنت بلمالديف افتر هوه غييير رادو يكتلوني ويله وينه حجيك مو كتلي اني موجود واحميج اني بعد مااتحمل على ساعه اموت

.. رفعت اصبعي بتهديد
الن: شوف ضبع اني من باجر طالعه من القصر ادور على حمدان بلكت يلفيني ولا ابقى عايشه هنا ناس تذبح بناس

ضبع: ليش تدورين عليه اني ادليج عليه وين
الن: وين؟؟
ضبع: بلفتحه الرابعه على ايدج اليسرى القطعه السادسه حاطين صورته بلبدايه وهسه مغيريها مسويله مجسمه

..ضربته بقبضه ايدي على صدره
الن: تضحك عليه كوم من يمي كوم
..كام وقبل لا يطلع باوعلي وكال
ضبع:محتاجه شي
الن : لا ماريد شي اطلع
ضبع:حظري نفسج يومين ونرجع لبغداد
الن:ليش
ضبع: تشهدين بلمحكمه ضد عاصم وهاشم

.. باوعتله بقلق

الن: يصير ما اروح؟
ضبع: ليش
الن: اخاف

.. تقرب عليه وبوجهه نظره استفهام

ضبع: شكو منين تخافين
الن: من عاصم الجلب خاف يكتلني مثل ماكتل ماما نيران

.. تقرب واكثر وخله ايده على شعري

ضبع: تخافين يابابا واني يمج
الن: يوو ولا يكعد سبع البرمبه غير مساع تسممت يمك واني كاعده هيج لطش لطش عليك وسمموني ورادو يموتوني

.. ضحك خفيف وضربني خفيف على شفتي

ضبع: هذا السانج راح يعم عليج

..عافني وطلع ضليت محتاره ما اعرف شسوي نوبه من كد ما الكانونه شكلت بيدي ايدي كولها ورمت شويه واجت ملاك تتطمن عليه ضلينه نسولف شويه

ملاك: تنزلين يمنه شويه تغيرين جو

.. هزيتلها راسي وساعدتني ننزل سوه اول ما نزلنه جانو كولهم كاعدين يسولفون ويضحكون بس نزلت الكل سكت ويباوعولي بنظرات غريبه هه عود نازله اغير جو يم هاي هاي الووجوهه الي تسد النفس صاح اسد

اسد: الحمدالله على سلامتج
الن: الله يسلمك
اسد : تعالي ملاك جيبيها هنا خل نشوف الحلوه شبيها
.. جاوبته وهيه تباوع لضبع الي ماشال عينه مني ويخزر بيه عبالك مدري شمسويه
ملاك: لا خليها يمي ما ترتاح يمك

كعدتني يمها ويم الي تسميها ماما نور وهيه بس تبتسم بوجهي واني خايفه منها تقربت عليه ولزمت شعري باايدها شعري الي يشبه شعرها عيناً بس ليش ما جنت اصدك بذاك الوكت واكذب على نفسي ؟؟!

نور: شلون صرتي حبيبتي
الن: الحمدالله
نور: بعدج خايفه من عندي
الن: لا ما اخاف
نور: اعذريني يمكن فقدت عقلي من شفتج
الن: مو مشكله الله يرحمها
نور: لا ادكولين الله يرحمها ما ميته هيه كولي ان شاء الله تلكيها
.. باوعت لنور بااستغرب الي هزتلي براسها
الن: ان شاء الله تلكيها وترجع لحضنج
... ابتسمت الي
.. حجاتني وحده من الموجودين
.. اي الن سولفينه
الن: نعم شسولفلج
.. وين جنتي شلون جانت حياتج وي عاصم
الن: الحمدالله بخير
.. يمعوده صدك تحجين يا خير هذا الاب كتل الام والابن لاعب بيج

.... فتحت عيني بصدمه بوقتها ماعرف شنو الي اسوي او احجي اتمنيت ما اضعف تمنيت ما تنزل دمعتي الكل جان ساكت ينتظر جواب من عندي يعني شجاوبهم وهيه هاي الحقيقه .. حجت ملاك

ملاك: روان انلصمي
روان: شبيج غير نريد نعرف

... كل هاي الاحداث صارت تحت نظراته الي جان ماخذله زاويه ويباعلهم من بعيد يحدد يا فريسه هلمره راح يهجم عليها منو الي راح يكون من نصيبه اردف بهدوء والكل سكت ..

ضبع: وانتي منو علمود تعرفين خال وليد عم بنيه

... تلبكت وخافت

روان : لا بس غير نعرف الي كاعده ويانه شنو

ضبع: ماتوقع كاعده ابيتج

.. الهدوء الغريب من حجه ضبع فعلا جان شي غريب كانما خافو لا ميخافون ذوله بس كانما يعرفون ورا حجايته هاي اكو شي ثاني .. وجه نظراته لملاك

ضبع: ملاك صعديها فوك ترتاح

.. ساعدتني ملاك اكوم بس ماعرف شنو الي صار حسيت بنفسي فقدت التوازن ماحسيت الا واني بحضنه يصعدني الدرج ولافه ايدي على ركبته

ومن جهته الثانيه جانت يمه ملاك ..

.. حجيت بتعب

الن: انت شوكت تبطل سالفه الدرج نوبه منا اني دايخه
ضبع: هسه انتي مو دايخه
الن: امم
ضبع : خلي راسج على صدري واسكتي
.. كرصته بركبته حيل
الن: لا عبالك نسيت السالفه اول واحد راح تتحاسب انت

ضبع: حاضر
.. حطيت راسي على صدره لان جنت حيل دايخه

الن: اليوم شو انت كولش هادئ كاعد تقلقني

.. ما احس اله اندار بيه على جهه الدرج يريد يشمرني
لزمته ملاك واني لازمته قوي خايفه صدك يسويها

ضبع: كلمه وحده زايده منج هسه هنا اشمرج

ملاك: لا صدك تحجي على بختك ضبع وللله لو وكعت هنا تنتهي بعد
.. رجع كمل طريقه
الن: مره ثانيه اذا وكعت لا تصعدني من الدرج
ضبع: اي حاضر ست واحنه نكعد نشيل ترا تعبتيني لا مكيفه وتشوفين نفسج كلساع تنشالين عبالج خفيفه

.. لزمت عضلاته وكتله
الن: وذني شنو فائدتهن لو بس نفخ
..توقف وباوعلي
ضبع: ذني فائدتهن من الزمج واجعصج بذاك الوكت راح تعرفين فائدتهن

..مفهمت قصده شفت ملاك تضحك سكتت رجعت حطيت راسي وهمست
.. حقير
..سمعتج
..طبعا اذاناتك شكبرهن اكيد تسمع
.. وصلنه للغرفه فتح الباب وخلاني على السرير

ضبع : باجر نطلع الصبح
.. باوع لملاك واشرلها
ضبع: وانتي هم حضري نفسج انروح نشوفلج سكن
..هزتله براسها وطلع واجت يمي

ملاك: لج يا فرعونه هاي شمسويه باابن عمي
الن: خير شمسويه
ملاك: ولله وطلعتي داهيه هذا ضبع هيج تحجين ويا
الن: شبيج ملاك شحاجيه
ملاك: ماينكدرلج يا ملعونه
الن: على اساس ابن عمج ينكدرله

.. ضحكت
الن: شو كومي عني خل انام
.. طلعت وهيه تضحك عجيب امرهم هاي العائله احس كولهم مو طبيعين .. نمت مستسلمه للتعب ولاخر دمعه نزلت مني
.............

كعدت الصبح واني كلي نشاط اليوم راح اروح اكمل اجراءات الماجستير واخيرا طلعت من غرفتي اشوف ضبع وين صار لكيته واكف كدام غرفه الن ويدك بيها تقربت عليه

ملاك: شكو شبيك
ضبع: بله ما تدخلين تشوفيلي هاي الخبله وين صارت تاخرنه

.. فتحت الباب ودخلت لكيتها لامه رجليها وتبجي تقرب الها
ملاك: يا شبيج الن شكو شصاير
.. فتح ضبع الباب على السريع واجا يمها رفع راسها والقلق واضح بعينه

ضبع: شكو شبيج ليش تبجين
.. رفعت راسها اله تحت شهكات بجي خفيفه
الن: ماريد اروح حباب ضبع ماكدر مكاعد يروح عن بالي شكلها

.. كالت كلماتها وشبكت ضبع وهوه هم بس اذا كلت شبكها راح اكون كذابه شبكها قوي دخلها بروحه رجع بعدها بهدوء وهوه يمسح باايدي دموعها

ضبع: لا تخافين والضبع بظهرج لا تخافين ابد والله ماخلي احد يتقربلج وخشمي يشم الهوه محد يطخج افتهمتي
... هزت براسها اله

.. باوعت لضبع والحيره اكلتني اردفت وي نفسي
.. صدك يا ضبع هاي مشاعرك لو مثل كل مره الحيله والمكر قانونك ...

ملاك: حبيبتي الن احنه وياج موجودين لا تخافين بس راح توكفين كدام القاضي وتحجيله كولشي صار

.. هزت براسها

ملاك: يله لعد كومي حضري نفسج واني راح اروح اشوف ماما نور واجي

الن: تمام

... رحت لكيت الباب مفتوح على خفيف تقربت سمعت صوت بابا رضوان يم نور
تقربت اشوف لكيتها كاعده على السرير وهوه كاعد على الارض ولازم ايدها يترجاها
..........

رضوان : سامحيني يبت گلبي سامحيني

.. سحبت ايدي منه حيل

نور: عفتني بااكثر وقت احتاجيتك بي ماجنت اليه السند
رضوان: والله انجبرت انجبرت علمود مياذوج اكثر بعد

نور: طبعا ما تكدرلهن
.. لزم ايدها وباسها
رضوان: راح ينحل كولشي قريبا كالها وعيونه بعيونها كانما يدور شي ؟؟ من باوعلها بس يمكن ما لكه الجواب ترك ايدها وطلع
...........

..شفته اتقدم على الباب دكيته على السريع
من شافني مسح الدمعه الي جانت بعينه وابتسم بوجهي

رضوان: صباح الخير باباتي
ملاك: صباح النور حبيبي .. ماما نور كاعده
رضوان : اي موجوده دخليلها
.. ابتسمت بوجها هوه طلع واني دخلتلها لكيتها على نفس كعدتها مثبته نظرها على الارض رحت سريع يمها خفت ترجع لنفس حالتها القديمه

ملاك: ماما نور
نور: ها حبيبتي
ملاك: خوفتيني خو ما بيج شي
نور: لا ماماتي مابيه شي
ملاك : راح نروح لبغداد اني وضبع والن واجيت اودعج
نور: توصلون بسلامه يروحي
.. ابتسمت وردت اطلع صاحت وراي

نور: ملاك

.. انداربت
ملاك: نعم

نور: تعالي

.. تقربت عليها
نور: خطوتنه الجايه
ملاك: شنو ؟
نور: نبعد الن عن ضبع

.. باوعتلها بااستغرب
ملاك: ليش
نور: ياذيها
ملاك: قصدج ضبع ياذيها
..هزتلي براسها

ملاك: ماتوقع اله مصلحه من راح ياذيها وهيه بلنسبه اله ورقته الرابحه

نور: نسيتي شسوه قبل ٣ سنوات

... باوعتلها بصدمه وبخيبه
ملاك : لا ما نسيت
نور: خلص بعد انتي رايحه وياهم الي اريده من عندج تبعدين الن عن ضبع 

ملاك: تدرين اول مره اشوف ضبع يضحك واول مره اشوفه يسولف وينطلق وي احد بعدها

نور: ضبع ماينعرف واحد مكار

ملاك: لا تنسين شنو الي صار ويا وخلا يوصل لهلمرحله ماما نور نسيتي شنو سوو بي وشكد اذو لا نصير احنه والدنيا عليه

.. تقدمت غلقت الباب واجت يمي حجت بهمس

نور: رضوان مو ابن مهيووب .....

........................

.. طلع ضبع كمت شلت شعري ودخلت اغسل وبدلت ملابسي واخذت الي احتاجه بكم يوم هذني وطلعت انتظره برا لحد ما اجا

ضبع: خلصتي شغلج
الن: اي خلصت بقت ملاك ماكو
ضبع: هسه تجي الحكيني

.. اتجه للدرج باوعتله
الن: ما
اندار عليه ..
ضبع: شكو

.. باعت على الدرج افتهم

ضبع: بس لو اعرف شنو مشكلتج وي الدرج
الن: وبس لو اعرف شنو مشكلتك وي المصعد

.. رجع عليه سحلني من ايدي واتجه نحو المصعد ضغط على زر المصعد ننتظره يجي بهاي الاثناء اجت ملاك بس مو نفسها الي اول مره شفتها الصبح جانت تضحك هسه وجها مكلوب نزلنه سوه وصعدنه بلسياره
صعدت هيه بلصدر واني ورا ضبع خلا جنطنه ورا واتجهنه لبغداد طول الطريق وملاك ساكته واني ما متعوده اسكت بس من شفتها خنست حتى هوه حس عليها بس جان ساكت صرت بااتجاه المقعد مالتها وندستها من ورا باعتلي بنضرات حزينه او نضرات ماعرف شنو افسرهن

ملاك: ها
الن: شبيج شكو
ابتسمت بوجهي
ملاك: ماكو شي حبيبتي
الن: لعد ليش هيج وجهج معنفص
ضحكت
ملاك : يا ولج تقلدين على وجهي
الن: لابس مبين عليج ضايجه خو مصاير شي حتى ضبع حس عليج
.. وندسته باوعلي
ضبع: شكو
خزرته
ضبع : اي صحيح شبيج
ملاك: يوو هاي شبيكم مابيه شي بس شويه خايفه من الخطوه الي راح اسويها صعبه عليه بحدي وي بنات مااعرفهن

ضبع: لا تخافين ارتبلج الوضع هناك وان شاء الله ترتاحين وتعجبج الشقه وياج ثنين بنات بس من اقسام مختلفه

ملاك: تمام

... سكتت ملاك ويمكن بعد ما حجت ولا حرف خلصت الطريق نايمه وبس اني جنت اهرت على راس ضبع الي مره يجاوبني ومره يغلس

الن: ضبببع

ضبع: وسم وزقنبوت زرفتي طبله اذني
الن: ليش متجاوبني من احجي وياك
ضبع: ليش شحجيتي ما سمعت
الن: اي شوف حتى ما منتبهلي
ضبع: لا حول الله ما تنامين وتخلصيني من شرج هسه مو هاي ملاك ذابتها على الصامت
الن: واذا نمت منو يسولف وياك وبله من تشوفنه نايمين تنعس وتنكلب بينه السياره ونموت وعاصم الجلب يطلع براءه

ضبع: يله هاهيه هاهيه بس كعدي وماريد اسمعلج صوت

.. كعدت ضايجه دقايق ورجع
ضبع: شو سكتي

.. جاوبته بتململ
الن: عجيب حرت وياك مااسكت ميعجبك اسكت هم ميعجبك شتريد مني بلا زحمه استاذ ضبع

..سكت واني هم سكتت شويه ورجعت احجي ويا ماكدر اذا مااسولف يمكن اطك واموت وهم رجع لنفس الوضع مرات يجاوبني ومرات يغلس لحد ما دخلنه بغداد ووقف ضبع السياره كانما جان ينتظر شخص وفجاءه انفتح باب السياره الامامي

ضبع: ملاك كعدي رجعي ليوره خل شرار يصعد بلصدر

.. نزلت وهيه مغمضه عيونها نداريت على الشباك ولكيتها ملطوخه  بلولد ومطفيه من الرئيسي

الن: عزاا شكد ثوله هاي البنيه

.. فتحت الباب الي يمي وكعدت حطت راسها على كتفي ونامت

.. اندار عليه الولد الي كعد بلصدر وهوه يحاجيني ثبته نظره على ملاك وكال

شرار: شلونج ست الن

..باوعتله يحجي وياي ومثبت نظره على ملاك
حجيت بنفسي ... شبي هذا احول

الن: الحمدالله
.. ماحست اله ملاك فتحت عيونها وصاحت بصوت ..

.....................

.. راحت غلقت الباب واجت همست بااذني

نور: رضوان مو ابن مهيوب

..فتحت عيني بصدمه وماعرف شسوي
ملاك: ماما نور شكاعد تحجين

نور: رضوان ابن اخو مهيوب
حتى القصر مو بااسمه بااسم رضوان

.. ايدي ضلن يرجفن موقف حيل صعب حجيت بصعوبه
ملاك: والن ليش يحاولون يقتلوها بااي طريقه

..باوعتلي بنظرات حزن وكالت

(محادثه قديمه وسريه بين مهيوب ورضوان)..

الشيخ: تهددني
رضوان: مااهددك يعمي بس الي رادها گلبي اخذها وانت تعرف اني اكدر والقصر والاملاك كولها بااسمي ومحترم قرارك لانك صرتلي اب وتعبت عليه ووصلتني

... وهيج شرط الشيخ عليه الشروط الي كولنه نعرفها....

رضوان:حطيت شروطك واني عندي شرط
الشيخ: كول
رضوان: بس ولدي من نور الهم حق بلورث

ابتسم الشيخ وكال
الشيخ:الورث ورثك والقصر قصرك والفلوس فلوسك الي يعجبك سوي

..............

نور: وهيج رضوان كتب وصيه من يموت الورث ينتقل لاولادنه اني ويا بس رب العالمين ما رزقنه بس باالن حاولو يبعدوها عني اذا بعدوها ورضوان ماغير الوصيه كل الي بلقصر الهم حق بلورث وفعلا هاي الوصيه مازالت موجوده وهذا الي يردو

ملاك: وضبع شنو يستفاد لان ماتوقع ضبع يطمع بلورث وهوه ما محتاج

نور: ضبع كل الي يريده الانتقام منهم وبس ..هواي اسرار بلقصر محد يعرفهن واني متاكده راح يجي اليوم الي ينكشف بي كلشي

نور: لازم تبعدين ضبع عن الن لازم تطلع خارج لعبتهم لان لو حصل عليها ضبع الوحيده الي راح تتاذه هيه

ملاك: شلون ابعده ضبع ماينكدر عليه

ابتسمت
نور: مانبعد ضبع عنها هيه الي راح نبعدها عنه
ملاك:شلون
نور: لازم الن تعرف حقيقه ضبع شنو

..... خططنه للخطه عمري وحياتي ماتمنيت ادخل بموامراتهم بس خايفه عليها صح ماعرفتها هواي بس حبيتها حسيته صدك هيه نفسها اختي طلعت من الغرفه ولكيتهم واكفين قريب المصعد نزلنه وتوجنه لبغداد الطريق كوله واني افكر بلشي الي راح اسوي هل هو صحيح لو خطا لحد ما نمت

..كعدني ضبع على صوته المزعج وهو يكول ارجع ورا فتحت الباب واني فاتحه عيوني على النص النعسه بيهن ماريد تطير انضربت بحايط فتحتهن قوي واتجهت للمقعد الخلفي حطيت راسي على كتف الن ورجعت اكمل نومتي بس ماكدرت من ورا اصواتهم المزعجه فتحت عيني على البطيئ واشوف شخص حاط عينه بعيني

.. خفت حيل وصحت بصوت عال

ملاك: يمممه

.. اندارلي ضبع والي كاعد يمه

ضبع: وسم شكو شبيج انكرصتي

اشرت على الي كاعد يمه
ملاك: جنييي

.. بلحضه ادراك رجعت للواقع وحسيت بلشي الي سويته استحيت حيل

شرار: اوكف اوكف ضبع نزلني هنا ادكول عليه جني اني جني نزلني كلتلك

.. شكد استحيت من نفسي وضبع وكف السياره وكله
ضبع: انزل

.. ترك يده الباب وباوع لضبع ودزله بوسه بلهوا وكال
شرار: شبيج مرتي ما تتحملين شقه  كمل كمل خل نلحك لا عاصم يشرد

.. هز ضبع براسه وتوجهنه للمحكمه
..............

الن: وصلنه لباب المحكمه نزلنه ضبع والي ويا جانو لابسين زيهم العسكري وين ما نروح جانو ياخذولهم التحيه العسكريه لو يسلمون عليهم كعدنه ننتظر يصير دورنه طلع واحد وصاح بااسمي دخلت واني خايفه لزم ايدي
ضبع: لاتخافين اني وياج
.. شد على ايدي حييل يمكن جان كاسرلياها لو ما كرصته باايده
الن: ايدي شبيك كاعد تاذيني
..ترك ايدي وتركني ادخل لغرفه القاضي دخلت وجانو مجموعه من المحامين كاعدين صاحني القاضي اكعد على الكرسي المقابيله لحتى يجيبون القاتل اجت عيني على ضبع الي سوله مكان يكعد بي ويراقب ..شويه ودخل عاصم وايدي مكلبجه وشكله صاير اسود وضعفان ما ينعرف لحيته عاليه دخلو وماخليت عيني بعينه بدا القاضي يسئلني اسئله اعتياديه لحد ما بدا شويه شويه يتعمق باالاسىئله جنت كل ما اخاف تجي عيني بعين ضبع الي يحاول ياشرلي بيده اهدء لحد ما خلص كل اسئلته تقريبا طولت الجلسه واخذوا استراحه خمس دقايق طلعت ولكيتهم ينتضروني بلباب

ملاك: ها بشري
.. هزيتلها براسي
شرار: صيري سباعيه
..من كال هيج احس الدنيا خنكتني حيل والدمعه بطرف عيني راسا نزلن دموعي التمو عليه يحاولون يهدئون بيه

ضبع: خر.. عليك شرار هسه اله تحجي
شرار: عمي شحجيت صيري ضعيفه صيري ضعيفه لا تصيرين قويه
.. ابتسمت على مناكرهم .. راح ضبع جابلي مي شربته وتقربت عليه
الن: شكرا لوكفتك ويايه عمري وحياتي مراح انساها

.. ابتسم ابتسامه عمري وحياتي مراح انساها  فعلاً جنت اعرف ورا هاي ابتسامته اكو شي ...مجهول!!

.. بلحظتها صاحو علينه ندخل علمود الحكم دخلنه

.. دُنيا مُقـبلةٌ بزخَارفِها، وإنسانٌ مُتكالبٌ على مَفاتِنها.
- ماديةٌ سَيطرَت، فاستلبَت العُقولَ وصارَ الإنسانُ آلة.
- يَــقينٌ غابَ، وباطلٌ بالـزَّيف يَحيَا، وتَــفاهاتٌ بالجَهر تَتــواتَــر.
- وبَيتٌ غابَ لسببٍ أو لآخر.
- والمؤنسِاتُ الغالياتُ صِرن في نظر المَوتُورينَ سِلعة، والقواريرُ فَـواخــير.

...وبهيج نطق القاضي بلحكم على عاصم بالاعدام شنقا حتى الموت اما بلنسبه لهاشم حكموا عليه بلسجن ٦ اشهر طلعت من المحكمه واني فرحانه حيل كدرت اخذ حق امي كدرت انتقملها بس بلقانون مو مثلهم ..

.. صعدنه بلسياره واتصل مبايل ضبع شاله اردف ب٣ كلمات وحده ورا الثانيه
.. وين انت
..طاحظك
.. خوش

شرار: منو هذا
ضبع:اشتر
شرار:شيريد
..خزره

..باوعله شرار وحجه بمبايعه
شرار: اوي ترا اني مو مرتك وتخزر بيه اوي

..ضحكنه على سوالفه رجع اردف بكل جديه وبكل نبره رجوليه ولا كانما هوه نفس الشخص الي حجه هسه

شرار: ليش ما اجا

..حجه على كيف عباله ما نسمع
ضبع: لبارحه متاخرين بلملهى
شرار: شوكت يعقل مادري
ضبع: عنده مهمه هناك
شرار: اكيد خطره
ضبع: شتتوقع من اشتر مياخذ الشي الهين
شرار: اله فد يوم يروح بلرجلين ..

...... وصلنه لمكان ماعرف وين بس يمكن مجمع سكني جان حيل راقي خلو السياره بلكراج ونزلنه ولاكانما بلعراق مكان يجنن صعدنه بلمصعد لحد ما وصلنه مدري ياطابق واني صافنه على الجمال والنظافه

الن: وين رايحين
ضبع: لشقتي
الن:والجني شعنده ويانه
..باوعلي بصدمه ورجع باوع لضبع الي بانت عليه الابتسامه

ضبع: لا تباوعلي مو بيدي

اردف شرار بطفوليه ومضيق عيونه
شرار: شوفي ولج انتي جنج وحده صفره ما حبيتج

الن: ضببع شوف شيكلي وحده صفره ماحبيتج

..ثبت عينه بعيني عيونه الي جانت بنفسي امرهن مرور الكرام كل ما جان يثبت عينه بعيني لازم اضيع بيهن مو شي عادي مثل لون البحر الصافي .. اردف

ضبع: لا يحبج المهم اني احبج

.. كالها هيج لو الصدمه الي على وجهم بانت

الن: ايع حتى انت ماريدك تحبني

ابتسم وتوجه فتح باب الشقه دخلنه بيها جانت قطعه من الجمال من احدث الديكورات والنظافه وعطرها يجنن دخلنه همه راحو للصاله واشرلنه اني وملاك على الغرفه وعلى الحمام كال

ضبع: هناك غرفه واكو حمام واكو بعد غرف وهناك المطبخ اخذن راحتجن

.. رحنه للغرفه بدلنه وغسلنه ارتاحينه شويه ولكيناهم جايبين الغده وتغدينه

شرار: الصفره
الن:هاا
شرار: حلو عرفتي اسمج يعني
الن: شتريد
شرار: جاي جاي بداعت ضبع
الن: ما دام كلت بداعت ضبع ماكو جاي
شرار: يله عمي بداعت عاصم

.. كمت سويتلهم جاي شوي واجتني ملاك
ملاك: الن حبابه نسيت مبايلي بلصاله وهسه اجيت لكيت شرار كاعد يمه شلون استحي اروح اكوله انطينيا

الن: عادي روحيله كوليله انطيني مبايلي يمك بلا زحمه وهسه ينطي الج

.. سوت مثل ما كلتلها كعدت اراقبها واضحك عليها راحت يمه كالتله سحبه من يمه وانطاهيا بدون لا يباوعلها حتى .. لزمت المبايل وهيه مبتسمه فجاءه اختفت ابتسامتها وعيونها توسعت اجت يمي وجها صار اصفر ماعرف شلون خطت هاي الخطوات ووصلتني جرتني من ايدي ودخلتني للغرفه

ملاك: لج الن الحكيلي
الن: شكو شبيج
ملاك : جايتني رسايل تهديد وصور مفبركه والمبايل جان يم شرار يعني اكيد شافهن وهسه يحجي لضبع والله ضبع يذبحني وميخلي بيه قطره دم وحده

الن: بس اهدي وفهميني السالفه من البدايه
.. بدت تشرحلي عن علاقتها بواحد وشلون بده يهدد بيها لحد اخر لحضه وحاليا ..

الن : لا تخافين هسه تعالي وياي خل نشوف شنو الاوضاع بس صدكي ما معقوله يكعد ويحجيله ..

.. طلعنه نتمشي على كيف نشوف صار كبالي ضبع بس هوه ما شافنه جان كاعد يمه شرار ويحجيله شي وضبع عيونه حمر دم وقابض على ايده وفجاءه ضبع كام على حيله وصاح بصوت رج البيت رج

ضبع: ملاااااك

_______________

ولهنا خلص البارت💕💕 تطلبوني بعد بارت انزله بليل ان شاء الله وشكرا لكلامكم الحلو والعسل مثلكم دااحاول شكد ما اكدر اجاوب الكل وان شاء الله ماطول عليكم بلتنزيل ♥️♥️

نجي لفقرتنه المعتاده

- تتوقعون اكو سر اكبر من رضوان مو ابن مهيوب ؟
- شنو غايه ضبع؟
- تتوقعون اكو احد اله ايد وكاعد يمشي الاحداث على كيفه ؟؟
-تتوقعون هاي الرسايل نفسها الي راح تودي ملاك للمشهد الي تشوقناله كولنه♥️🔥