رواية سليله الانتقام الفصل الرابع والعشرون 24 - بقلم taratel

.. تقربت اريد اشوف منو اليحجي مديت راسي اشوف منو جانت ضلمه حيل تقربت اكثر حسيتهم شافوني وتقرب ظلهم عليه

.. رجعت بخطواتي وانداريت خايفه متاكده طلعوا ورايه وشافوني بس اني ما لمحت اشكالهم صعدت فوك يم ملاك لكيتها على نفس وضعها سديت الباب وطلعت متجهه لغرفتي اول ما فتحت الباب لكيت ضبع يفتح بلمجرات

الـِن: شتسوي

.. اندار عليه ورجع يكمل

الـِن: هاي شبيك احجي شتريد

.. اندار عليه واتقدم اتجاهي وكال

ضبع: اريد قلم

.. حسيته كاعد يجذب عليه تركته وكعدت على السرير وهو بقى واكف وحجيت

الـِن: ضبع اني اليوم سمعت شي

.. اندار عليه وثبت عينه بعيني
ضبع: شسمعتي

الـِن: رحت للمخزن اطلع الجدوره وجان اسمع بس همس يكولون ضبع يعرف بينه كتلنه رضوان

.. تقرب عليه وكعد يمي ثبت عينه عليه وكال

ضبع: سمعيني عدل
الـِن: شكو
ضبع: لا اتنزلين يمهم ولا تاكلين من اكلهم ولا تحجين وياهم ابتعدي يدمروج برمشه عين تلكين نفسج بتهلكه

الـِن: ليش لهدرجه موذين وشلون جنت عايش وياهم

..باوعلي ورجع كال

ضبع:صرت نفسهم واكثر يله كدرت اعيش وياهم

الـِن:طلعني منا او لا تدري طلكني احسن

.. سكت ما جاوبني ودار وجهه عني

..رجعت كرصته قوي باايده وحجيت

الـِن: لا عبالك نسيت شسويت بيه كتلتني وشمرتني بلصحراء

.. ابتسم وخله ايده على راسه وكال
ضبع: ساعه السوده الي كتلتج بيها وعفتج لو متاكد ميته يله راجع

الـِن: حقير والله فلا اثق بيك بعد فد واحد حيوان وجلب

.. جر رجلي وخلا راسه عليها

الـِن: وخر عني نوبه راسك شكبره

.. دار راسه عليه وصار مقابيل وجهي قريب حيل رفع خصله من شعري وثبت عينه بعيني اخذ ايدي وخلاها على عيونه

.. قربت اصابعي لوجهه تستكشف ملامحه وصلت لرموشه واني اعدهن
.. غمض عينه
الـِن: لا تغمض عيونك وانت يمي احبهن

..وبس فتحهن حطيت اصبعي بعينه وفكسته بيها كمز عني وهو لازم عينه ومتالم

ضبع: وسم شسوويتي
الـِن: ارجع حقي الضاع المحد يرجعه اليه كتلتني وشمرتني بلصحراء ماكلت هاي مرتي حبابه ما مسويتلي شي الفقيره الهادئه بس شنو انت واحد جلب لا لا الجلب وفي

..بعدني ما مكمله كلامي وهجم عليه وكعت على السرير وصار فوكي قيد ايديه باايده واخذ شفتي بعمق

.. ادفع بي ميتحرك مقيد جسمي برجلي وايده الثانيه تتجول على جسمي

.. ماابتعد اله حس عليه اختنكت بعد شويه وهو مثبت عينه بعيني كانما ينتظر شي

.. دفعت ايده عني ولزمته من ياخه قمصيه مقربته عليه من جديد صار ما يفصلني عنه بس سانتيمترات قليله ثبتت عيني بعينه وحجيت

الـِن: لاتلعب عليه ضبع

.. حجيت كلماتي هاي ودفعته عني قوي ارتد وهو يباوعلي بنظرات استفهام

الـِن: اي لا تباوع هيج صرت اعرفك ضبع من تسوي هيج يعني اكو مكسوره جديده يعني راح تسويلك فد سالفه وتكسرني بيها من جديد

.. تقرب عليه وهو يلزم ايدي
ضبع: ماكو شي هلمره

.. بعدت ايدي عنه وحجيت
الـِن: انت لو غيرك جنت نايم بحضني واخذتني بـ٢ بليل وذبحتني ورجعت بكل دم بارد

.. عدل ملابسه وطلع بدون مايحجي ولا كلمه
..بقيت افتر بلغرفه غسلت وجهي ورحت على غرفه ملاك فتحت الباب ودخلت لكيتها كاعده

الـِن: شلون صرتي

..هزت براسها الي ونزلت دمعه مسحتها وحجت

ملاك: مااصدك فقدته ماكاعد اصدك الـِن ما اصدك معقوله راح وبعد ما اشوفه هيج بهاي السهوله

..نزلت عيني وحجيت

الـِن: مراحل الحزن خمسه انتي هسه بلمرحله الاولى وهي الانكار ماتصدكين فقدتي تحسينه بعد موجود تنسين هو مات اصلا المرحله الثانيه هي راح تكون الغضب راح ادكولين ليش رب العالمين اخذه من عندي ليش بس اني بلرغم اكو غيرج عايشين هاي المشاعر المرحله الثالثه المساومه والرابعه الاكتئاب راح تبدي تنطفي عندج المشاعر الفرح والشغف تشوفين الدنيا بلون واحد اما اخر مرحله هي التقبل يا اما راح تتقبلين الي صار وياج وتعيشين حياتج ويبقى ذكرى بگلبج يا اما لا وتبقين انسانه تعيسه تعيشين بنفس الهاله الحزينه وهذا باايدج

..جانت مركزه وياي بكل كلمه اكولها
..ابتسمت ونزلت راسي

الـِن: تدرين اني ما عشت هاي المشاعر راسا تقبلت انجبرت اتقبل العشته والشفته مو هين بلنسبه اليه عاصم يكتل امي بحضني

..نزلت دمعه بطرف عيني مسحتها وابتسمت
الـِن: تدرين من ماتت امي محد واساني عليها محد جان وياي محد كالي الله يرحمها

..اتقربت عليه وهيه تحضني وتبجي
ملاك:حبيبتي الله يرحمها

الـِن: اني من احجيلج هيج مااريد اقهرج بس الواحد من يشوف مصيبه الناس تهون عليه مصيبته ولو ماكو مصيبه مثل موت انسان عزيز وتهون

..مسحت دموعها وحجيت
الـِن: صيري قويه ملاك لا تضعفين اني متاكده هو لو جان موجود ما راح يحب يشوفج هيج مكسوره

.. لزمت ايدي قوي وحجت
ملاك: الـِن كتلو

..باوعتلها بنظرات قلق وحجيت
الـِن: منو الكتله
ملاك: اهل القصر
الـِن: شنو يحصلون من يكتلو
ملاك: ورث وفلوس وقصر هذا الي يحصلو كاتلين روحهم على هذا القصر اليقبض الروح شكد اتمنى اطلع من قضبانه

..حجيت بااستفهام متجاهله كلامها
الـِن: تعرفين منو ؟

.. هزت براسها بمعنى لا وحجت
ملاك: مااعرف منو بلتحديد بس اذا اريد احجي راح اكلج كلهم من كبيرهم لصغيرهم حتى مهيوب هسه يطلع اله ايد
الـِن: ليش يكتلون رضوان علمود الورث والقصر هنه مو لمهيوب

..هزت راسها نافيه
ملاك: لا مو لمهيوب لاخو واخو من مات مسجل كلشي بااسم بابا رضوان وهمه كاعدين هيج ضيوف
الـِن: شنو استفادو من مات رضوان اول وتالي راح يطلعون

..هزت براسها ونزلت عينها
ملاك: بابا رضوان عنده وصيه ادكول الاملاك من يموت تنتقل لـ اطفاله من نور
الـِن: بس هيج ظلمج
ملاك: لا ماقصر ويايه من جان موجود

..نزلت عينها بقهر وحجت
ملاك: بابا رضوان ما جان يريد اسماء تاخذ ورث لان اذا اني سجله بااسمي امي الها حق بلورث وراح تاكله

الـِن: وهسه وين راح يروح
ملاك: يتوزع لابناء مهيوب واحفاده

..فتحت عيني بصدمه وحجيت
الـِن: ليش

.. دفعتني باايدها وحجت
ملاك: شو وخري عني دوختيني سالفتهم سالفه همه ذوله

..ابتسمت وحجيت
الـِن: تجين ويايه ننزل جوه بحديقه القصر لعبت نفسي من كعده البيت

.. لزمت ايدي ونزلنه جوه لكينا بس براء ورحمه كاعدات اول ما شافني عينهن ما شالانها عني طلعت اني وملاك من تحت نظراتهن

الـِن: ذني شبيهن
ملاك:كاعد يطبخلج طبخه

.. سكتت بعد ما حجيت طلعنه بلحديقه جانت تجننن الحشيش والورد اشكال والاشجار ونسمه هوا بارده

ملاك: تحبين الخيل

..هزيت براسي بمعنى اي وحجيت
الـِن: احبهن بس عمري وحياتي ماشايفته بلحقيقه

.. تعالي لعد اراويج
.. ضلينه نمشي بلحديقه مسافه جبيره جانت كلها حشيش ووود حيل معتنين بيها لحد ما وصلنه كدام اسطبل ودخلنه جان متروس خيول يطلع بيهن ١٧ واحد اول مادخلنه جان واحد واكف ينطيهن اكل يفتح مجر خارجي ويخلي بي اكل ويسده

.. سلمت عليه ملاك ودخلنه اشكالهن حيل حلوه وتختلف عن الصور اكبار وضخمات واكو قصار القامه والوانهن مطعمه جوزي وابيض وشعرهن ابيض

.. كلهن جانن ياكلن الا واحد جان كاعد وما يتحرك جان لونه اسود فحم حجيت

الـِن: ملاك هذا شبي ليش بس هذا منعزل

..اندارت عليه وهيه تتقرب تشوفه وحجت
ملاك: العمرد
الـِن: شنو
ملاك: هذا حصان ضبع خبل على صاحبه لا تتقربين عليه هسه يدفرج ويموتج بلمكان
الـِن: صدك لعد على صاحبه

..ابتسمت
..رجعت حجيت
الـٍن: ليش ما ياكل

..حجت بااستهزاء
ملاك: عيني هذا ما ياكل اله من ايد ضبع واليوم يمكن ما جاي اله

.. بعدنه نحجي ودخل ضبع اتقرب اول ما شافني استغرب بعدين من شاف ملاك اتقرب عليها وهو يحضنها ويبوسها من راسها

ضبع: شلون صارت حبيبتي

..ابتسمت تجامله ورجعت حجت
ملاك: الحمدالله زينه

..رفع نظره عليه وخزرني وكال
ضبع: شتسون هنا
ملاك:  اجيت اشوف الـِن الاسطبل

..تقربت عليه واني اجره حيل من ايده واضغط عليها وابعده عن ملاك وصرت بيناتهم وباوعتله بنظرات ترجي


الـِن: ضبع الله عليك خلي اصعد على هذا الحصان

..واشرتله على العمرد

ضبع: لا ميقبل

..لزمت باايده اترجى
الـِن: حباب ضبع والله بنفسي اصعد خيل

ضبع: توكعين
الـِن: انت اصعد وياي ما اوكع

.. بقيت اتوسل بي وملاك تقنعه يله قبل

..راح فتح الباب والعمرد بس شافه ضل يصهل اخذ ضبع باايده تفاح ويوكله جان شكله يخوف اسود فاحم وحيل ضخم جان رشيق وطويل عكس الخيل البقيه

..طلعه خارج الاسطبل وهو يمشي بشكل دائري ربط بلحلقه ورجع اخذ السرج وخلا عليه وعدله صعد عليه وجان يمشي بشكل خفيف لحد ما تقرب عليه وصاح

ضبع: يله تعالي
الـِن: لا ماريد بطلت يخوف

..تقرب عليه اكثر ونزل من عنده
.. جر ايدي حيل وشالني واني اصيح
الـِن: لا ضبع عليك الله بطلت ماريد ولج ملاك الحكيلي

..شبيج وسم لا تضحكين

.. جانت بس تضحك وضبع شايلني يريدني اثبت
الـِن :شبيج وسم لا تضحكين

..صاح بيه بصوت قوي
ضبع: الزمي السرج

.. لزمته قوي خايفه شالني من خصري بخفه وخلاني على الحصان اول ما خلاني الحصان تحرك واني لزمت بااكتاف ضبع اريد انزل

الـِن: هاي شبيك ضبع ماريد بطلت نزلني اخاف

.. ماجاوبني وصعد خلفي لزم سير الخيل وايده الثانيه حاوط بيها خصري وضل يمشي بي على كيفه 

.. حيل خايفه مغمضه عيني ولازمه السرج قوي احس نفسي راح اوكع حسيت على انفاس بركبتي فتحت عيني لكيت ضبع يوخر بخصلات شعري وهو يشتم بركبتي طبع بوسه خفيفه عليها وكال

ضبع: شكد حلو استغلال الفرص
الـِن: يله كافي خل ننزل

..بس حجيت هيج شد على خصري اكثر وقربني عليه

.. حجيت بخوف واني مغمضه عيني خايفه
الـِن: ضبع خايفه

..تقرب وهو يهمس بااذني
ضبع: لا تخافين وانتي يمي

.. طبع بوسه خفيفه على ركبتي وقريب اذني ورجع كال
ضبع: فتحي عينج

..فتحت عيني بخوف واني اباوع حولي لكيت ملاك تباعلنه وتضحك

.. حاوط خصري اقوا
.. حرك السير بحركه سريعه وضرب برجله على الخيل
.. مشت سريع ضل يجرها اكثر وتركض
..احس گلبي راح يوكف غمضت عيني واني خايفه

ضبع: فتحي عينج لا تسديها

.. تحرك بينا بحديقه القصر جان المنظر يجنن الاشجار وقت مغربيه وصوت العصافير الهوا البارد شعري الطاير حسيت الهوا تغلغل لاعماق فروه راسي

.. مشاعر اول مره اعيشها مشاعر الفرح الي نحرمت من عدها سنين

.. رجع خفف سرعه الخيل من رجع بينه للاسطبل وملاك جانت كاعده اول ما وصلنه صاحت

ملاك: وين رحتو صارلي ساعه كاعده انتظر

.. نزل من الخيل وانطاني ايده ونزلني
.. جنت حيل فرحانه نظراتي لضبع بهذا اليوم جانت عباره عن فرح وحب اول مشاعر عشتها ويا

.. اجا الولد اخذ الخيل من السير ودخله للاسطبل
.. رجع ضبع رفع نظره عليه وهو يكول

ضبع: فرحانه؟

..هزيت راسي بقوه بمعنى اي وحجيت
الـِن: حيل فرحانه

.. قدم ايده وهو يتلمس حنكي بخفه والابتسامه بانت على ثغره

ضبع: لو ادري بيج هيج تفرحين كل يوم اخذج فره با العمرد

.. ابتسمت ورجع كال
ضبع: اشتريلج خيل

الـِن: اي ضبع الله عليك اريد خيل

.. ابتسم بعفويه اول مره اشوفها على ضبع
ضبع: بت عاصم ولا تستقر تريد خيل

.. كرصته باايده حيل
الـِن: اريد خيل ولونه ابيض وشعره اصفر

.. اتقرب عليه وهو مثبت عينه بعيني اخذ خصله من شعري يبعدها وكال

ضبع: يعني يشبهج هيج لونه ابيض وشعره اصفر

.. بعدني ما مجاوبه وفزيت على صوت ملاك

ملاك: يمعودين صدك جذب رجليه وكعن وواحد يتغزل بلثاني خل نروح

.. ابتسم ضبع وهو يندار متجهه للقصر بقيت اني وملاك نمشي ورا مسافه

..لزمتني من ايدي قوي وحجت
ملاك: الـِن تحبين ضبع
الـِن: لا
ملاك: جذابه من عيونج مبينه
.. نزلت راسي خجلانه وابتسم

.. وكفت وضغطت على ايدي القت نظره على ضبع الجان يبعدنه بمسافه مو قصيره ورجعت ثبتت عينها بعيني

..عينها جانت مليانه قلق وخوف كالت
ملاك: الـِن لا تحبين ضبع ابد ياذيج ابتعدي عنه

..نزلت عيني بااسى وحجيت
الـِن: شبيج ملاك مااحبه

.. ثبتت عينها بعيني
ملاك: لاتنسين كلامي ابد وخلي ترجيه بااذانج

.. ضليت حايره
..ابتسمت بوجها لاغيه الخوف والقلق من ملامحي
..جريت ايدها واني احجي

الـِن: يله امشي ندخل جوه برد الجو

.. اول ما وصلنه لمدخل القصر لكينه سياره عاليه لونها اسود بلباب
..حجت ملاك بااستفهام
ملاك: سياره اشتر شعنده هنا

.. دخلنه للقصر وصار كبالنه اشتر وضبع كاعد مقابله ويمه طفله صغيره تجنن

.. دخلت واني اسلم عليهم

الـِن: شلون صارت بطنك

اشتر: لا تخافين صلحتها

الـِن: اكيد هذا صفوري سولفلك

.. دنك راسه وابتسم
.. تقربت ملاك على الطفله وهي تخلي عينها بعين اشتر وكالت

ملاك: عادي اشيلها

..اشرلها براسه وهو يكول

اشتر: هي اجت علمودج

..اخذتها من عنده وصعدت بيها للغرفه ولحكتهم
..جانت تجنن بيضه ومدبدبه وسوالفها تخبل ضلينه نلاعب بيها اني وملاك بلساعه لحد مااجا ضبع وكال

ضبع: يله ملوكه راح ترحون

.. اخذها وطلع رجعت باوعت لملاك ونظراتها جانت حيل حزينه
الـِن: ماعرفت بي مزوج
ملاك: مرته ميته
الـِن: خطيه الله يرحمها

.. سكتت رجعت حجيت

الـِن: شلون ماتت
ملاك: الي سمعته يكولون كتلوها اعدائه

..حطيت ايدي على شفتي وشهكت
الـِن: ولج ملاك عزا بس يا يكتلوني اعداء ضبع وخاصتا ذوله اهل القصر اني ما مرتاحلهم گلبي

..ابتسمت
ملاك: كلشي توقعي منهم

..صفنت عليها ورجعت حجيت متذكره شي
الـِن: صدك ملاك نور ماكو
ملاك: نور رجعت اعتكفت على نفسها وازيد بعد على موت بابا رضوان

..حجيت بحزن
الـِن: خطيه الله يساعدها صعبه
ملاك: جانت تحبه حيل

..ضلينه نسولف شويه ورحت لغرفتي انام

.. حطيت راسي على السرير ولاول مره انام واني فرحانه وسعيده بس ياترا راح تستمر؟؟

.. نايمه حسيت الباب انفتح
..غمضت عيني
..رجعت حسيت انسحبت بحضنه ماكدرت افتح عيني مغوشه رجعت غمضت عيني واخر شي حسيته يطبع بوسات خفيفه على اكتافي

..كعدت الصبح على صوت طرقات الباب

الـِن: تفضل

.. دخلت وحده من العاملات وكالت
- ينتظروج جوه

.. هزيت براسي وكمت على حيلي غسلت وبدلت ونزلت جوه لكيتهم ملتمين واحد جان مترأس الكعده اشرلي ضبع اروح يمه

..كعدت يمه واخذ ايدي ضغط وثبت عينه بعيني وكال
ضبع: اريدج وياي اليوم

.. سكتت وهزيت براسي مااعرفت شنو جان قصده!!

ضبع: روحي صيحي لملاك تنزل علمود نبدي

..صعدت اصيحها ونزلنه اني وياها كعدت على الجهه الثانيه لضبع كعدت وجانت نظراتي عليه ونظرات على الي بدا يحجي ويقسم الورث

الوصيه ادكول الاملاك والورث وكل شي يخص رضوان عبدالله نعمه يرحن لوريثته الشريعه ابنته من زوجته نور وبسبب موت طفلته الاولى وعدم حصوله على طفله اخرى منها سيتم توزيع الورث لابناء مهيوب نعمه واحفادهُ وال ١٠٪؜ سيتم توزيعه للمنظمات الخيريه بااسمهُ

..جانت عيني على ضبع

ضبع : ومنو كال بنته ميته

..كال هيج والانظار كلها صارت عليه ماعرفت شسوي باوعت لملاك الي جانت تباوعلي بقلق وهزتلي براسها اهدء

.. رجع كال المحامي
-ليش بنته ميته الي ادري بيها ماتت وهي طفله

.. شال ايده وهو يحضن اكتافي وكال
ضبع: بنت رضوان عبدالله نعمه يمي وزوجتي شرعا وقانونا

.. كلها كامت على حيلها مصدومين وبس اصوات الهمس اسمعها
..حسيت نفسي دخت حجيت بهمس يم اذنه

الـِن: ضبع شكاعد تحجي شنو بنت رضوان اني مو بنته

.. ترك اكتافي وهو ياخذ فايل جان يمه وانطا للمحامي يقرا ورجع كعد نفس كعدته تحت صدمتهم

.. حجه واحد بيهم
- منو كال هيه هاي بنت رضوان شنو اليثبت

.. ما جاوبه ولا رفع نظره عليه جان مركز نظراته على المحامي

.. واني جنت مااعرف شصاير وشكاعد يصير بس اباوعلهم بعيوني حايره بس اريد واحد يفهمني اني شنو الي دخل ليش كال اني بنت رضوان

.. حجه المحامي وهو يسد الملف
- التحليل صحيح ميه بلميه ويؤكد تطابق الجينات ٩٩٪؜
الـِن هي بنت رضوان عبدالله نعمه

.. حسيت نفسي دخت عيوني غوشن غمضت قوي اجت ملاك من جهتي لزمت كتفي قوي

ملاك: الـِن

.. الصدمه الثانيه الي هزت القصر هز وكسرتني اني

-تنازل المدعوه الـِن عبدالله نعمه عن كل ما ترثه من رضوان عبدالله نعمه لزوجها ضبع رفدان نعمه

..ماكدرت احجي شي احس نفسي تقيدت رفعت نظري عليه جان مركز عليهم وابتسامه خبيثه على ثغره وهو يشوفهم يتعاركون معترضين على الوصيه

.. نزلت دمعه بطرف عيني ثبتت عيني على الارض واني اعيد ترتيب الاحداث الي ابالي وكل شي عشته من بيت عاصم لحد ما اجيت للقصر رفعت نظري عليه وحجيت بخذلان

الـِن: ليش

..جاوبني وهو مركز وياهم والابتسامه ما غابت عن ثغره
ضبع: تستاهلون

.. رفعت ايدي لملاك واشرتلها تلزمني

.. اخذت ايدي ماكدرت اكوم على حيلي مااحس بروحي
.. صعدتني فوك للغرفه فتحت الباب وهيه تباوعلي بعيونها القلقه

ملاك: ادخل وياج

.. هزيت راسي نافيه وسديت الباب قفلته
..كعدت بلكاع على رجلي واطلقت صرخاتي المكتومه

.. شنو حزن ..شنو الم.. شنو خذلان.. شنو كسر
..ليش اني اعيشهن سوه !! شنو ذنبي ؟

.. كعدت اضرب بلكاع وابجي اشهك حسيت على دكاته القويه للباب

ضبع: الـِن فتحي الباب

.. رفعت راسي ومسحت دموعي متجهه للبلكونه فتحت بابها وصعدت على البلكونه واني اباوع للارض

.. رجعت رفعت راسي للسما
الـِن: ليش ياربي اعيشهن كلهن سوه

..صار صوت ابذني جوه
-الحكوو راح تشمر روحها من البلكونه

.. رجعت قدمت رجلي للبلكونه كارهه الحياه
..حسيت على دفره الباب تفلش ودخل ضبع ورا ملاك

..تقدم عليه وعيونه خايفه تترقبني

..حجيت بصوت مبحوح فاقد للقوه ضعيف بعيون يائسه مخذوله

الـِن: خطوه وحده تتقدمها اشمر نفسي
ضبع: لا تسويها
ملاك: حبابه الـِن انزلي

الـِن: ليش خذلتني ليش
..ليش من حبيتك كسرتني؟
..ليش تتفنن بتعذيبي؟
..ما اذاك گلبك واني اشكيلك من عاصم؟
..مااذاك گلبك واني احجيلك شكد بنفسي اكول بابا؟
.. مااذاك گلبك واني ابجي على امي الماتت وهيه مو امي؟؟

.. مااذاك گلبك وانت تكسرني ؟
..تدري لبارحه عشت شعور اول مره بحياتي اعيشه
عشته بقربك جنت حيل فرحانه جنت متاكده هاي الفرحه ماراح تدوم

.. عيوني غوشت من الدموع مسحتهن وابتسمت
الـِن: اني راح اروح وخلي الورث والقصر ينفعك يا ضابع

..درت وجهي مغمضه عيني
..وحسيت عليه ايد سحبتني قوي ولمتني بحضنها رفعت راسي وشفتها نور

..دفنت راسي بحضنها واني اشهك وهيه تحضن بيه قوي وتبجي

.. الام الوحيده الي تدافع بروحها شفتها بماما نيران ضحت بروحها علمودي وهسه نور نقذتني من موت محتوم ..

..حضنتها حيل بعدتني عنها وهيه تطبع بوسات متفرقه باانحاء وجهي وادكول

نور: رجعتي لحضن امج يا ماما والله احميج بروحي واخذج منهم

.. مسحت دموعي وجنت مستغربه الوضع وحجيت
الن: ما راح اعتبرج امي ولا راح اعتبر المات هو والدي ربيت بعيد عنكم ربتني وحده سباعيه وبطله حمتني بروحها مستحيل اكول لغيرها ماما

..لزمت ايدي وهيه تبوس بيهن

نور: لا ادكولين بس اهم شي ابقي يمي اهم شي رجعتيلي

.. رفعت عيني على ضبع الجان واكف يشاهد ومثبت عينه عليه

.. ابتعدت عنها وتقربت عليه صرت مقابيله وحجيت
الـِن: ليش
ضبع: علمودج ما تكدريلهم

.. ضليت اضرب بقبضه ايدي على صدره حيل وجان يرتد فقدت واني اضرب بي وابجي

.. جرني حيل وحضني لصدره واني ابجي
.. بعدته حيل باايدي واني اخذت كوب المي على الميز وركعته براسه ارتد ليورا من الالم وانكسر الكوب باايدي صار قطع صغيره وايدي الي نترست دم

..وكع على الارض وهو لازم راسه متالم اتقربت عليه ملاك تشوفه شبي ونور لزمتني من اكتافي تقربني عليها خايفين من خطوه ضبع

.. كام على حيله وهو يتقرب عليه نور خلتني وراها خايفه عليه

نور: ابتعد ضبع وخر عنها

.. دفع نور على جهه وهو يجرني من ايدي التنزف ويقربها عليه وعيونه متروسه قلق صاح بصوت

ضبع: لج غبيه ليش اذيتي ايدج

.. تقرب عليها وهو يوخر الكزاز الناعم من ايدي
.. جانت عيني عليه كارهته
..بعدت ايدي قوي عنه واني احجي

الـِن: لو يبقى اخر يوم بعمري يا ضبع ما راح اسامحك

.. كلت هيج ورجع بخطواته وهو حاط ايده على راسه نزل ايده الجانت بيها دم وطلع

..تقربن عليه ملاك ونور وهنه يشوفن ايدي ويمسحنها
.. اخذتني ملاك تغسل ايدي ووجهي بس جنت جسد بلا روح
.. رجعتني للغرفه وكعدت على السرير حاطه راسي بين اديه وصافنه
..رفعت نظري لملاك وحجيت

الـِن: حبابه ملاك روحي شوفي شبي ايده جانت متروسه دم
ملاك: غير فشختي ابنه هسه ناخذ منج فصل

.. عافتني وطلعت بقت نور كاعده يمي وهيه تسولف

نور: ١١ سنه انتظرناج اني ورضوان كل يوم احط راسي على صدره ونكعد نعدد الاسامي الي راح نسميها الج وبيوم الي اجيتي بي سماج الـِن بيومها سئلته عن معنى كال اسمها المعجزه باالاغريقيه وانتي جنتي المعجزه بلنسبه النه

..نزلت راسي ورجعت حجت

نور: اخذوج من عندي ١٨ سنه ورجعتيلي بمعجزه

.. اتقربت عليه وهيه تطبع بوسات خفيفه على راسي وكالت
نور: انتي معجزتي

الـِن:ممكن تطلعين برا دايخه

.. تركتني وطلعت خليت راسي على السرير واني اتذكر الاحداث الصارت غمضت عيني ونزلت دمعه حاره على خدي بس مو بحراره گلبي مسحتها واني اكول

الـِن: شنو الما صار بعد بيج؟؟

.. شويه ودخلت ملاك رفعت نفسي الها وحجيت

الـِن: ها ملاك شبي

ملاك: اخذو الولد للمستشفى راسه حيل متاذي وماقبل يروح واخذه ادم سحل

الـِن: يستاهل

..سكتت وطلعت وسدت الباب وراها

.. مر اسبوع واني على هلحاله مااطلع ولا انزل بس ملاك تجي عليه لو نور ماجنت احجي ضبع ما شفته بعد يوم عن يوم واني احقد عليه اكثر لحد ما اندك الباب طرقات خفيفه ودخلن

الـِن: اليوم يمي شعجب
براء: اجيت اشوفج ماكو مختفيه
رحمه : نسئل عليج
الن: انتن ما تسئلن كولن عدنه سالفه نريد نخوطها

.. ضحكت وحده منهم بصوت مقرف ورجعت حجت
براء: عفيه عليج ذكيه
الـِن: شتردين
براء: ماتردين تتخلصين من ضبع

.. ابتسمت وحجيت
الـِن: اي
رحمه: خلي ايدج باايدنه وطلعي من حياتج ونطلعه من القصر

..فكرت والحقد ماليني
الـِن: شلون

براء: الي سمعنا ضبع كتلج وشمرج بلصحراء تكدرين تبلغين عليه وتهمه ثانيه بكتل اخوج هاي تهمتين تخلي يخيس بلسجن وياخذون من عنده الرتب المتباهي بيهن

الـِن: اذا ابلغ عليه راح يعرف شلون
رحمه: معليج عوفيها علينه بس الي عليج ترحين تشهدين ضده وتوقعين على البلاغ

الـِن: اطلعن افكر اول

..طلعن وبقيت ابحدي مرت ساعات وانفتح الباب ودخل ضبع ووكف بلباب وهو يلقي بنظراته عليه دخل وسد الباب كال
ضبع: نكدر نحجي
الـِن: اطلع

..جانت عيونه قلقه اول مره اشوف ضبع بهاي الحاله تقرب عليه وهو يبعد خصله من شعر ويطبع بوسه على وجناتي ويكول

ضبع: اليوم سجلتلج بلجامعه راح تداومين طب اميرتي

..اخذ ايدي وهو يطبع بوسه خفيفه عليها

..جريتها حيل من عنده بدون ما اباوع عليه
الـِن: اطلع

..اتقرب عليه اكثر وعيونه تتوسل
ضبع: شنو اسوي الج

..اخذ ايدي وضغط عليها قوي وكال
ضبع: اخذج نسافر وتغيرين جو

.. اخذ اصابع ايدي وهو يحسب كل اصبع جان يعد بي دوله

ضبع: اخذج لتركيا لو لندن لو باريس لو استراليا لو لبنان

الـِن: اطلع برا ضبع ماريد اشوفك

ضبع: لا تأذيني بيج

..كال كلماته هاي وطلع مرت ايام واني على نفس وضعي ماتغير يجي كل يوميه يتوسل بس احجي ويا جنت رافضه الفكره نهائيا رحمه وبراء بعد ما رجعن ولا شفتهن لحد ما اجا اليوم الي انقلبت بي الموازين

..كاعده با البلكونه الجو عصريه اخذت غطوه من الغرفه ورجعت للبلكونه حسيت على الباب نفتح انداريت لكيته

الـِن: نعم شتريد

..تقدم عليه وكال
ادم: ليش مقدمه بلاغ باالضبع

..هزيت راسي نافيه كلامه
الـِن: ما مقدمه
ادم: الضبع انسجن

...................................

شرار: ريم خل نتزوج

..سمعت كلماته هاي الصعقني بيهن واني متجهه للباب فتحته وحجيت
ريم:برا شرار

..تقدم بااتجاهي يتطلع وصل يمي وكال
شرار: خليني اصلح غلطي

..نزلت دمعه بطرف عيني مسحتها واشرتله على الباب
..طلع
..سديت الباب ورا ورجعت واني خايفه لا يطلع صدك ضليت ابجي قوي واني اضرب على بطني

..مسحت دموعي ونزلت جوه اخذت عنوان الصيدليه ورحت الها اول ما دخلت لكيت نفسه الولد الي شفته بلمخيم

ريم: اعذرني تاخرت بس صارلي ضرف اكدر ابلش الشفت المسائي

-مامحتاج هسه بس تكدرين اليوم تعوضين عن الصبح

..هزيت براسي وطلع جانت وياي وحده بنيه لـ١٠ خلص الشفت

..اخذت تحليل ااكد بي ضنوني

..رجعت للشقه اول ما فتحتها لكيت شرار كاعد

ريم: شعندك هنا
شرار: وين جنتي
ريم: معليك
شرار: ريم احجي وين جنتي

..خفت من نبره صوته وحجيت
ريم: اكو ولد شفته بلمخيمات وساعدني الكالي شغل بصيدليه
شرار: اي شخص تعرفي بلمخيمات تكطعين تواصلج ويا وهاي الفتره لا تطلعين لحد ما يلكفون
ريم: ماكدر اعوف الشغل واني محتاجته

..بقى كاعد رحت بدلت ورجعت لكيته على نفس كعدته
ريم: شرار شعندك هنا اطلع
شرار:شقررتي

..سكتت ما جاوبته

..دخلت للحمام واخذت التحليل حللت وكعدت على البانيو واني مترقبه الجهاز

..خوف وكرهه ذات

.. بان خط واحد والخط الثاني جان خفيف حيل
..فتحت عيني بصدمه واني احط ايدي على شفتي

..طلعت وما جان عندي غير هذا القرار
..لكيته كاعد بلصاله ومنزل راسه اول ما طلعت رفع راسه عليه وعيونه تنتظرني

ريم: شرار اني موافقه

..نزل راسه بقهر وهو يكول
شرار: خلص لعد باجر نروح نعقد

..هزيت براسي ورحت للغرفه واني اقفلها وخليت راسي على السرير مستسلمه

.. كعدت على صوت الجرس كمت على حيلي افتحه لكيته شرار فتحته وبقى واكف بلباب

ريم: هاي شبيك ادخل
شرار: ما متعود عليج هيج رجعي سدي وفتحي

..قبل ليكمل كلامه سديته عليه ورحت بدلت وطلعت لكيته ما موجود

.. بس طلعت فتح باب شقته الي جانت مقابيلي وطلع
شرار: يله نروح للمحكمه واخذج للصيدليه مناك

..هزيت راسي وطلعنه
..رحنه للمحكمه واول مادخلنه جانت كلها تسلم على شرار وتعرفه وبساع كملونه الاجراءات وطلعنه لزم ايدي وكال

شرار: ماريدج اصحح خطئي اريدج تكونين شريكه حياتي والي صار بعد ما نكدر نغيره

..عتيت ايده قوي وحجيت
ريم: تحلم

..مشيت وعفته وراي صعدت بلسياره شويه واجا صعد اخذني للصيدليه

شرار: شوكت اجيج
ريم: ب٣

..هز راسه وراح
..دخلت للصيدليه ولكيت نفس الولد سلمت عليه وكعدت اشتغل

.. كاعده ارتب الادويه وشفت شرار دخل وهو يسلم على علي وكفت على حيلي اول ما شافني ابتسم وكال

شرار: يله

..اخذني وطلعنه

شرار: بعد ما تداومين
ريم: شرار ترا ما كاعد نلعب يا مداومه يا تاركه الشغل
شرار:انتي ليش ما تفتهمين مادام دخلتي وياهم وكعدتي وحجيتي ووافقتي على كلامهم بعد ما يعوفوج

..نزلت راسي وحجيت
ريم: بس هذا الشهر وراها يصدرون الوثايق ونبقى على التعين

..سكت

ريم: شرار هذا شنو العطر

شرار: شنو

..اتقربت اخذ ايده واني استنشقه بقميصه

..بعدها وهو يكول

شرار: هاي شبيج انجلبتي

..صارت عندي لحضه ادراك وبعدت نفسي عنه واني اسوي نفسي لعبانه

ريم: اصلا لعبت نفسي

..سكت بعد ما حجه وضليت احوس كلساع واقرب نفسي عليه بس في سبيل اشتم عطره

..اول ما فتح باب الشقه ودخلنه لزم ايدي مقربني عليه

شرار: انسوي عرس

.. اخذت ياخه قميصه مقربتها لخشمي واشتم بيها روحي صارت بعطره كانما هو الهوا الوحيد الي اريد اتنفسه

شرار: شو ابتعدي عني كاعد تخوفيني بس يا تردين تغتصبيني وتنتقمين مني

..ماجنت اسمع كلامه مستمتعه واني اسنشق عطره الي جان بلنسبه اليه عالم ثاني

..رفعت راسي عليه وحجيت

ريم: انزع

.. فتح عينه بصدمه

شرار: هاي شبيج ريم
ريم: انزع قميصك شبيك

.. ضل واكف مصدوم
.. ماحسيت اله على دموعي تنزل وامسح بيهن واصيح

ريم: انزع مو كتلك انزعه

.. من صدمته نزع القميص وبانت عضلات جسمه اخذت القميص منه ومقربته لخشمي

..رفعت عيني عليه

ريم: اطلع يله
شرار: اطلع مصلخ شنو شيكولون عليه
ريم: اطلع شرار

شرار: دنطيني شي استر روحي بي

..عفته تحت نظراته متجاهله كلامه وماخذه القميص مقيدته باايدي واشتم بي

.. كعد كدامي بلصاله
شرار: شوكت تخلصين اريد قميصي بلا زحمه

..خزرته ورجعت قربت القميص
ريم: ما انطي

شرار: ترا قميصي والله

..ما جاوبته عفته على جهه وكمت اشرب مي
..انداريت لكيته ماخذ القميص باايده
..رحت اركض للصاله وجريته من عنده وصحت

ريم: هاي شبيك شرار شكد نحس
شرار: يمعوده مو حتى قميص يوسف الصديق مو هلكد عردو بي

.. اخذته منه واني ادخل للغرفه واخلي يمي خايفه يضيع
.. شويه واندك الباب ودخل
ريم: شبيك تفتر على راسي مصلخ البسلك شي
شرار: ومنين اجيبلج الشي وانتي بايكه قميصي
..سكتت ما اجاوبه
شرار: خل نحجي
ريم: شنو بس يا تريد القميص ما انطي
شرار: اخذي الج

..تقرب عليه وكعد كدامي
شرار: اني اريدج تكونين زوجتي كدام الكل واخطبج من اهلج واهلي يعرفون
ريم: مو تدري اهلي ميتين
شرار: فكري ماعندج خوال لو عمام

..هزيت راسي نافيه
ريم: اهل امي جانو غير طائفه ومن امي تزوجت والدي  اتبرو منها وعمامي عندي بس واحد ومات

..سكت ورجع كال
شرار: اهل امج وين ما تعرفين
ريم: البصره

.. هز راسه وهو يكول
شرار: يصير خير راح انشوفهم

.. سكتت رجع كال
شرار: تعرفين لقبهم لو اسم جدج
ريم: .....

شرار: سهله لعد

.. طلع ومرت الايام واروح للصيدليه وشرار جانت ياخذني ويرجعني

شرار: شوكت اجيج
ريم: اتاخر اليوم لا تجيني ارجع تكسي

..خزرني
شرار:شعدج
ريم: راح اخذ شفت ثاني
شرار: وشوكت تخلصين
ريم: قبل المغرب

..هز راسه وراح دخلت للصيدليله بقيت اشتغل حسيت اكو الم بطني رحت للحمام لكيت اكو دم خفت راسا طلعت حاجيت علي

ريم: علي اكدر اخذ ريست اطلع بي ساعه وارجع
علي: ماكو مشكله

.. طلعت وجان اكو مجمع طبي دخلت بي رحت لدكتوره نسائيه سوتلي فحوصات بلبدايه وتحليل دم
-مبروك ماما حامل

..هزيت راسي بقهر
ريم: اي دكتوره اعرف حللت منزلي

..اخذتلي سونار وكملت الفحوصات وهيه ادكول
- دخلتي بشهرج الثالث
..هزيت براسي
- لا تعبين نفسج بعدج بلبدايه وهذا الدم نتيجه التعب والارهاق شويه داري نفسج بلبدايه
- هذا اول طفل الج
ريم: اي

..تقربت على بطني وهيه تشوفها
-بطنج راح تبدي تكبر منا ورايح
.. رفعت راسي عليها وكلت
ريم: اريد اسقطه
..باعتلي وهيه مصدومه كالت
-اعذريني مااكدر اسوي عمليه اسقاط جنين اتحاسب عليه بس اذ ما تردي تكدرين تاخذين ادويه

..هزيت راسي وطلعت منها اول ما وصلت للصيدليه لكيت سياره شرار واكفه

..تقربت عليه اول ما شافني صاح
شرار: وين جنتي

..صعدت بلسياره من دون ما احجي
..لزم ايدي وبعيونه قلق
شرار: شبيج مبين تعبانه

..درت وجهي للجه الثانيه اباع على الطريق شفته اخذ غير اتجاهه
ريم: وين رايح

..اندار عليه وكال
شرار: نشتري حلقات ونطلع نشتريلج ملابس ونتعشا برا ونرجع

ريم: تعبانه رجعني

..ماسمع كلامي واخذني لمحل ذهب اول ما نزلنه حجيت
ريم: مو لازم

..لزم ايدي ودخلنه طلعنه الولد الجان واكف حلقات
شرار:اختاري

..اختاريت وحده جانت كدام عيني اخذها يريد يلبسني ياها جريتها بسرعه ولبستها وشلت ايدي

ريم: ها وهسه ما خلصنه

..هز راسه وكال
شرار: تردين بعد شي سوار كلاده مااخذج هيج
ريم:ماريد شرار حباب كافي خل نطلع

..خزرني وكال للولد
شرار: اريد كلاده وسوار

.. طلعله اشكال
شرار: يله اختاري
ريم: ماريد شبيك لا تلح

.. ما سمعني واخذ سوارات ثنين وكلاده على ذوقه واتحاسب وطلعنه للسياره

شرار: شبيج اليوم
ريم: مادري شبيه خل نرجع حباب
شرار: نتعشى ونرجع ضاملج خبر حلو

..هزيت براسي اخذني لمطعم جان حيل حلو وراقي كعدنه كال
شرار: شتاكلين

..باوعتله بعيون محتاره وحجيت
ريم: اريد جزر

.. رفع عينه عليه وضحك
شرار: كومي بابا كومي

..باوعتله محتاره
ريم: شبيك

..اخذ ايدي وهو يكومني اشرلي اصعد بلسياره
..صعدت كعدت انتظره شويه واجا جان جايب اكل سفري خلا ورا

ريم: ليش
شرار: غير تردين جزر

.. سكتت ما حجيت شويه ونزل يم محل ورجع صعد جايب جزر
..باوعتله واني فرحانه
..اخذت الجزره ولزمتها كانما ما شايفه جزر عمري وحياتي
ريم: جزر

.. سكتت واخذت الجزر اكل بيهن وهنه ما مغسولات لحد ما صاح بيه

شرار: كافي تكرطين اذاني صارت بيها وشه

..ماهتميت وكملت اكل
..شفته مد ايده ياخذ وحده ضربته عليها وحجيت
ريم: لا تتعده حدودك

.. جر ايده وكال
شرار: ما شايف هيج صلافه ماخذه قميصي وهسه ما تنطيني جزر
ريم : شدخل هاي بهاي

..سكت ماحجه لحد ما وصلنه كال
شرار:هاج مفتاح الشقه صعدي فتحيها وشويه واجي وراج

..صعدت فتحتها كعدت شويه على ما عزلت الصاله انداريت لكيته يدك الباب رحت افتحله لكيته شايل باايده صندوك جزر

ريم: هذا المن
شرار: اليه علمود ما تحطين ايدج عليه وتشاركيني

..مديت ايدي اشوفه كانما شايفه كنز
..باوعتله بعيون متوسله وحجيت
ريم: شويه

..هز راسه وكال
شرار: والله حلوه هاي جدره اعله ناره وعينه على جاره

ريم: حباب

.. راح خلا على الميز بلمطبخ ورجع كال

شرار: تعال كدامي
ريم: شكو

.. كعد بلصاله وكعدت كدامه خايفه لان راسا انكلب وجهه

شرار: لكيت خوالج

ريم:اي؟
شرار: راح اخذج الهم

..بس كال هيج احس گلبي انعصر

شرار: تردين اخذج يمهم تبقين واجي اخطبج من عدهم

..هزيت براسي وحجيت
ريم: بكيفك

شرار: بس ماريدهم يعرفون اني اعرفج راح اخذج كانما ماعندج احد

..ثبتت عيني بعينه وحجيت
ريم: صدك ماعندي احد

.. نزل راسه كال
شرار: حضري نفسج باجر نطلع

.. هزيت براسي وهو طلع ورحت للمطبخ اعزله

.. طلعنه الصبح متجهين لخوالي الي ماعمري شفتهم ولا التقيت بيهم قبل لا انزل من السياره كال

شرار: شفتهم ويدرون بيج جايه بلغتهم بكلشي انتي جنت ادرسين ومات عمج وهسه ماعندج احد واهلج ماتو افتهمتي

.. هزيت راسي ونزلت

.. جان بيت جبير دك شرار الجرس وطلعنه ولد طويل حيل بشرته سمره وشكله بشوش

-تفضلو

..سلم عليه شرار وهو يعرفه عليه من كاله
شرار: ريم بنت خالك

..الولد ضل مصدوم بلباب بعدين يله ضل يحي بينه ودخلنه للبيت كعدنه بلصاله جانت فارغه شويه ودخلت مره جبيره حيل هيه و٣ بنات وياها

..تقربت عليه وهيه تمد اديها البارزه منهن الشراين من الكبر وكالت

-تعالي يمه تعالي

..باوعت لشرار الي هزلي براسه وكال
شرار:روحي

..كمت على حيلي واني اتقرب عليها بس وصلت الها شبكتني وضلت تشم شم بيه وتبوسني  والدمعه بعينها كالت

- راحت اميمتج يبعد روحي

..باوعتلها وهزيت راسي

..رجعت شبكتني وهيه تحضن بيه اقوه وتبجي

.. بعدتني عنها وهيه ادكول
- شلونج وين جنتي عايشه تعالي كعدي سولفيلي

..جنت مصدومه ومااعرف شحجي كعدت مقابيلها وضلت تحجي وياي

.. شويه ودخلن البنات واستقبلني

شرار: اني رايح الامانه ووصلتكم بعد

..تشكر من عنده الولد الجان موجود وطلع شرار واني عيني عليه

.. شويه ودخلت مره ثانيه اتقربت عليه وهيه تبجي عرفتها بعدين هاي خالتي والبنات ال٣ بناتها كعدن يحجن وياي وهنه يستفسرن على حياتي السابقه على عيشتي وامي شلون جانت شويه وحجت الحجيه

-صبن الغده راح يجون

..حطت ايدها على كتفي وهيه ادكول
-اخذي راحتج حبيبتي البيت بيتج كومي غسلي وارتاحي شويه ويجي جدج وخوالج

..هزيت راسي وكمت مااندل الحمام سئلت وحده من البنات

ريم: عفيه وين الحمام اريد اغسل

..اشرتلي على مكانه ورجعت كالت
- ما تلبسين حجاب

..باوعتلها واني مستغربه من سوالها وكلت
ريم: اي

..باوعتلي بنضرات ماعرفت افسرها وحجت
-بس احنه ماعدنه حده ما تلبس حجاب

..تركتها تحجي ورحت للحمام اغسل
..بعدني اغسل وسمعت اصوات عاليه مديت راسي وشفت زلم هواي دخلو طلعت واني صافنه عليهم

..تقدمت واني اشوفهم صاحت عليه الحجي
-تعاي يمه تعاي شوفي خوالج وجدج

.. تقربت اكثر وكلها صارت انظارها عليه اول ما دخلت خفت ونزلت راسي سلمت عليهم كلهم وعلى جدي

.. مر شهر واني يمهم معاملتهم حلوه وزينه اليه شرار بعد ما شفته  جان بس قميصه يمي وكل يوميه قبل لا انام اشمه واخلي على صدري يله ماعرف ليش هيج روحي صارت بعطره وبطني بدت تكبر والبنات بدن يلاحظن عليه اعراض الحمل بدت تزيد

.. كاعده ونفسي تلعب وتقربت عليه الحجيه
-شبيج يمه

..تقربت على الحجيه واني اسولفلها
ريم: عفيه سمعيني ماعندي غيرج احجيله بس انتي حسيت بيج بدفو امي

..لمتني لحضنها وكال
-احجي حبيبتي
ريم: اني متزوجه وحامل

..حطت ايدها على صدرها وشهكت
-منو ولج ما كالو مزوجه
ريم: الي جابني لهنا هو زوجي بس راد يخطبني من اهلي لذلك جابني هنا

..لزمت ايدها وباوعتلها بنظرات توسل وحجيت
-الله يخليج ساعديني كون اوصل اله بس ماعندي رقمه ولا عندي مبايل

-سمعي الحجي يبقى بيناتنه لا تحجي كدام البنات لو كدام خالتج اي مخلوق ماريده يعرف فهمتي اذا عرفو يذبحوج

..هزيت راسي
ريم: والله محد يعرف بس ساعديني لازم احاجي يجي يخطب بااقرب فرصه

.. مسحت على شعري وكالت
-لا تخافين هسه اشوفلج الرقم من حسيون

..هزيت راسي بقلق وكعدت انتظرها شويه ورجعت عليه وهيه شايله مبايلها والرقم بورقه وقدمتهن اليه وكالت

- هاج اتصلي عليه هذا رقمه

..اخذت من عنده واتصلت عليه شويه يله جاوب راسا حجيت

ريم: شرار انت وين
شرار: ريم؟
ريم: اي
شرار: شلونج
ريم: شوكت تجي تخطبني
شرار: ريم امي معارضه على الخطوبه وهسه هيه بلمستشفى
.. سكتت مصدومه
شرار: ابقي هسه يم خوالج لحد ما اقنعها
ريم: الى متى

..سكت ورجع كال
شرار: مادري

.. سديته من عنده واني ابجي شافتني الحجيه واجت تقربت مني
-شبيج يمه

..مسحت دموعي وابتسمت
ريم: ماكو شي حجيه

..ربتت على اكتفي وكالت
-كومي حبيبتي يم البنات ساعديهن بعد شويه راح يجون عمامهم

..هزيت براسي ورحت يمهن جانن كاعدات بلمطبخ بدينه نحضر الاكل حسين بدوخه انداريت عليهم عيوني غوشن ماحسيت الا واني واكعه بلكاع ويذبون عليه مي

..فتحت عيني لكيت نفسي بلمستشفى واحد من خوالي كاعد كبالي تقرب عليه وهو يكول
-منين حامل

..................

.. كاعده بلغرفه مااعرف شسوي حياتي صارت من اتعس للاتعس الشي الوحيد الجان حلو من تجي ملوكه وتكعد
يمي جان اشتر دائما يجيبها ويجي يشوف ضبع وانزل يمها كل ما تجي تلهث من النظافه والجمال واكعد العبها واوكلها لو نطلع اني وياها بلحديقه الـِن معتكفه على نفسها بلغرفه وما تطلع واحتار وين اروح

.. كاعده ووصلتني رسايل فتحتهن لكيت نفس الصور كمت على حيلي خايفه

.. اخذت المبايل وفتحتهن وحجيت
ملاك: منو انت
-عجبنج الصور
ملاك: شتريد
- اريدج
ملاك: امسح صورك الجذابيه ياجلب وكافي كلساع داخلي من حساب عود تخوفني
- هاي الصور راح توصل لعمامج

.. حظرته وماهتميت نزل للحديقه

.. طلعت اتمشى بحديقه القصر ولكيت الفلاح يزرع بلورد واكو ورد ثاني يمه جان طالع يجنن لونه اصفر اتقربت عليه وحجيت

ملاك: عمو تكدر تسويلي باقه من هذا الورد الاصفر اخليها بغرفتي شو عجبني شكله
-زهره الاوركيد
ملاك: مااعرف شسمها بس عجبتني

..قطفلي من عدها وصارن باقه اخذتها ورجعت يم بوابه القصر واني اشتم بيها ردت ادخل وشفت سياره اشتر دخلت التفت ووكفت انتظره نزل

..تقربت عليه وحجيت
ملاك: وين ملاك الصغيره لعد
اشتر: نايمه
ملاك: هاا

..راد يدخل وصحت ورا
ملاك: اشتر
..اندار عليه
اشتر: ها
ملاك: اريدك تساعدني بموضوع

..تقرب عليه وهو ينزع نظارته الشمسيه وبانت عيونه وحجه بااستغراب
اشتر: شكو
ملاك: اني ماحجيت لضبع لان اخاف من رده فعله

..بعدني ما مكلمه وطلع ضبع وسلم عليه ودخلو بقيت برا شويه ودخلت لكيتهم كاعدين بلصاله رحت للمطبخ سويت اكل واكلت طلعت لكيته ماموجود صعدت لغرفتي شويه وانفتح الباب

ضبع: شلون صارت
ملاك: منو قصدك الـِن

..هز براسه بمعنى اي
ملاك: كارهتك حيل لا تروحلها خليها تهدء
ضبع: ماكدرت احجيلها
ملاك: بس صعبه عليها

..اتجه للباب يطلع قبل ليطلع اندار عليه وكال
ضبع: ديري بالج عليها واي شي تحتاج اتصلي عليه

..هزيت راسي وطلع
.. شلت مبايلي لكيت نفس الاشعارات ونفس الصور
.. ضليت حايره ماعرفت شسوي حظرته وكعدت على حيلي محتاره اراسل اشتر لو اكول لضبع

.. رحت على اصدقاء ضبع ولكيت اشتر من ضمنهم راسلته

.. هلاو اشتر اني ملاك

.. ماجاوبني ضليت انتظره بلساعه ماكو اخر شي شمرت المبايل ورحت نمت

..كعدت على اصواتهم العاليه
.. كمت على حيلي واني اشيل شعري فتحت الباب لكيت اسد متهجم على غرفتي وادم يجر بي
..تقرب عليه وهو يصيح

اسد: ولج كح.. اليوم اغسل عارج رحتيلج اشهر ورجعتيلنه ساق..

.. دخلت للغرفه ودخل ورايه سحلني من شعري وهو يضرب بيه على انحاء جسمي باايده ورجله

.. ضليت اصيح استنجد بضبع بس ماكو
..ادم لزم اسد ويبعده عني دخل عمي احمد الي كمل عليه شعري اتكطع بيدهم ماكدرت احمي نفسي من عدهم

..وكعت بلكاع ابجي وعمي احمد يدفر بيه ابطني حسيت روحي طلعت من الالم صحت

ملاك: يعني هو هيج اليتيم تلتمون عليه حسبي الله ونعم الوكيل عليكم ياا جلاب

.. نزل اسد وصار بمستواي وهو يشد بشعري حيل وكال

اسد: منو بعد الكم ضبعكم وانسجن

.. فتحت عيني بصدمه
ملاك: مستحيل ضبع ينسجن ليش

..ضربني حيل على راسي وهو يطلع مبايله ويراويني نفس الصور
اسد: هاي صورج يا ع..
..هزيت براسي نافيه
ملاك: والله اسد ذني مو صوري والله مفبركيها

.. لزم شعري حيل وهو يجر بي كال
اسد: ذبحج حلال يا سا..

.. ادم الوحيد الجان يدافعلي بيهم بس عمي احمد واسد ما خلو والباقين جانو يشاهدون حتى امي ما ساعدتني وخلصتني من ايدهم

ملاك: والله لو بابا رضوان موجود لو ضبع محد يمد ايده بس هسه استقويتو ياجلاب

..كلت هيج لو تخبلو عليه كل واحد يضربني من جهه جسمي صار قطعه زركه من الضرب وكل واحد يتهدد بشكل اخر شي كالت خالتي

رحمه: لا تكتلوها خل نزوجها ونخلص من عارها

..كالت هيج لو احس اختنكت والهوا ما يمر بريتي ماكدر اتحمل بعد انهاريت احس الدنيا غوشت بعيني صحت بصوت ضعيف
ملاك: بابا وينك الحكلي يردون يكتلون بنتك

.. اتقرب عليه اسد وهو يدفرني على بطني بكل قوته وكال
اسد: خل نزوجها بااسرع وقت ونطم عارها ما تبقى عدنه الليله

..طلعوا وعافوني واكعه بلكاع مااكدر احرك ايدي  من كد ماحميت نفسي بيها احس انكسرت وتاذيني

..كمت على كيف واني اروح بااتجاه المبايل اخذته اتصل على ضبع ماكو ميجاوب معقوله صدك انسجن رحت على الرسائل لكيت اشتر ما شايف الرساله دزيتله

ملاك: ليش كل ما احتاجك تخذلني وليش من احتاج المساعده بس انت الكاك؟؟

..رجعت دزيتله رساله ثانيه وكتبت
ملاك: اتصل على ضبع ماكو واني واكعه بمشكله ثاني مره التجئ الك تساعدني لاتردني هلمره وعوضني عن دماري الاول الجان بسبكك وهسه يردون يدمروني من جديد

..رجعت دزيت اخر رساله
ملاك: اليوم عمي احمد يريد يزوجني وماابقى بلقصر عفيه ساعدني

.. جانت اخر رساله دزيتها وحذفت الرسائل من يمي كعدت بلغرفه ابجي منتظره واقعي المجهول

..شويه ودخل عليه اسد وهو يجرني من ايدي ينزلني جوه دفعت حيل واني اصيح
ملاك: انت خبل صدك تحجي هسه طلعت سوالفكم

..رفعت اصبعي بتهديد
ملاك: والله يااسد لو يدري بيك ضبع اله ينهيك من الحياه

تقرب عليه وهو يلوي اصبعي ويضحك ضحكته المقرفه وكال
اسد: ضبعكم بح بعد ما يطلع راح يزنجر بلسجن

..باوعتله بنضرات خوف ورجع كال
اسد: راح ننزل ويعقدلج الشيخ حركه وحده تسويها ترحين بيها افتهمتي وتدرين بينه ما ينكدرلنه وضبعكم وودع بعد

ملاك: خايفين من عنده لذلك سويتوها بساع بساع بس والله لو طلع مااتخيل شراح يسوي بيك

..بس حجيت هيج بانت على ملامحمه الخوف ورجع جرني من ايدي

..عتيت ايده حيل وصحت
ملاك: ماابعد انت مسوي هاي الصور يا حيوان

..جرني حيل منزلني جوه

..اول ما نزلني لكينه اشتر متوسط الصاله وويا شرطه
..بس شافو اسد رفعوا اسلحتهم عليه وصاح واحد عليه

-ارفع ايدك بسااع

..راسا ترك ايدي والخوف باين عليه ابتعدت عنه واني اتجه لاشتر وصرت بظهره ولزمت بااكتافه وهمست

ملاك: اشتر ساعدني

.. اتقرب عمي احمد يريد يشوف شكو ليش كلبجو اسد وحطو على راسه السلاح هوه هم واخذوهم اثنيهن القصر جان هوسه وعباره عن شرطه

..اندار عليه
..ثبتت عيني بعينه وحجيت
ملاك: باامانتك
اشتر: بروُحي

..لزم ايدي حيل وطلعني برا القصر اشرلي اصعد بسيارته
..رحت ركض واني افتحها واصعد بس اريد اخلص من القصر

..كعدت شويه واني اشوف عمي احمد واسد صعدوهم بلسياره وشويه يله شفت اشتر اتقرب وصعد بلسياره

ملاك: شصاير ليش اخذهم

..اندار عليه وكال
اشتر: ما تنخذلين مرتين

..نزلت راسي واني ابجي بسكته استحي يسمعني احس نفسي مكسوره حيل

..حرك السياره وطلعنه من القصر حجيت تحت بكائي
ملاك: صدك ضبع مسجون
اشتر: اي
ملاك: شوكت يطلع
اشتر:مااعرف شوكت بس مطوله سالفته
ملاك: شنو تهتمته

..سكت ماجاوبني وراها كال
اشتر: ايدج ليش هيج شايلتها
ملاك: تاذيني
اشتر: منو ضربج

..باوعتله ونزلت عيني رجع كال بصوت اعلا
اشتر: منو ضربج عليها
ملاك: اسد

.. سكت ما حجه بعد شويه ورجع كال
اشتر: راح اخذج لبيت اهلي ماكو احد بي بس امي واختي وملوكه الصغيره

..هزيت راسي وحجيت
ملاك: الى متى
اشتر: من يطلع ضبع

..ابتسم ورجع كال
اشتر: اول مره شردتي مني وهسه شردتي الي عجيب
..كال اخر جملته وغمزلي باابتسامه

.. درت وجهي عنه للجهه الثانيه وحجيت
ملاك: الحياه تجبرك

.. سكت ما حجه ولا اني حجيت بعد لحد ما وصلنه كدام بيتهم دخل السياره بلكراج

..اول ما نزلنه جانن اكو ثنين عاملات يغسلن نزل وراح تقرب عليهن وهو يشرف على تنضيفيهن

اشتر: هذا مغسول ؟

..هزتله براسها بمعني اي
اشتر:رجعي غسلي

..احتقن وجهه
..اندار عليه واشرلي اجي يمه تقربت عليه وحجيت

ملاك: لو منها اله اركعك بلسطل

..اندار عليه ورجع يمشي فتح باب الدخول ودخلنه البيت جان يلمع لمع من النظافه الارض يمكن اشوف نفسي بها

.. اول ما دخلنه جانت اكو وحده كاعده بلصاله وكاعده يمها وحده تسوي باظافرها حيل جانت حلوه شعرها اصفر قصير وملامحها تجنن

..قربني عليها وهيه بس شافته حضنته وراسا ابتعد ورفع راسه عليه وكال
اشتر: ملاك بنت عم الضبع

..بس شافتني اجت عليه حضنتني وبوستني
-حبيبتي اهلا بيها

..باوعلي وكال امي
..بس كال هيج فتحت عيني حيل

ملاك: امك
..ابتسمت وكالت
-شبيه ولج
..ابتسمت بوجهه
ملاك: على بالي اخته

..بس كلتلها هيج كيفت
..شويه ودخلت بنيه وبيدها ملوكه الاجتني تركض
..شبكتها بوستها جانت هستوها سابحه تقربت عليه البنيه هم وسلمت عليه

..كعدنه بلصاله واني عيني على اشتر خايفه جان مخلي ملوكه بحظنه تقربت يمه وحجيت

ملاك: شوكت يطلع الضبع
اشتر: خلي لا يطلع لان لو طلع يحرك الاخضر واليابس

..باوعتله بخوف لان اعرف بضبع يسويها

..اندار عليه وهو يثبت عينه بعيني كال
اشتر: ليش اسد ضربج

..نزلت راسي وسكتت
..رجع كال وهو مضيق عبنه ومثبتها عليه
اشتر: مسويه شي

..بس كال هيج فتحت عيني بصدمه حسيته يعرف بلصور درت وجهي للجهه الثانيه واجت اخته كعدت يمي

..ابتسمت بوجهي وهيه ادكول
-اني رفل

..رجعت ابتسمت بوجهه وحجيت
ملاك:حبيبتي واني ملاك

رفل: تعالي وياي للمطبخ لا تبقين كاعده هنا
..هزيت راسي الها واني اتبعها للمطبخ

رفل: ادرسين
..نزلت راسي وحجيت
ملاك: اي مكمله وانتي
رفل: ادرس طب اسنان

..هزيت براسي ولفت نظري الطباخ جان عليه هواي جدوره بس شافتني عرفت كالت

رفل: هاي علمود اشتر نطبخ هلكد اكله بجدوره خاصه بي وامي تاكل دايت وذني اليه اني وياج وهاي جدوره الخدم

ملاك: خطيه
رفل: حيل

..كعدت يمها شوي وضلينه نسولف صبينه الغده وغسلنه الاماعين واخذتني لغرفتها

رفل: تردين انطيج شي ترتاحين بي علمود تنامين
ملاك: ياريت والله

..طلعتلي دشداشه قصيره

ملاك: ماكو غيرها شويه ضيكه

..باعتلي وكالت
رفل : ترا ماكو احد هنا

..هزيت راسي واخذتها لبستها جانت حيل ضيكه حجيت
ملاك: ماعندج غيرها

..بعدني ما مكمله وملوكه فتحت الباب وصار اشتر كبالي كعدت بلكاع واني احاول اضم نفسي

-عمه باب يكول صبيلي غده

..اخذت ملاك وطلعت وسدت الباب
..كمت على حيلي اشيل شعري كعكه حسيت الباب انفتح انداريت لكيته اشتر دخل وسد الباب

ملاك: اشتر اطلع برا
..تقرب عليه اكثر وجرني عليه وفتح كتر شعري وخلا ينزل كعد يرتب بخصلات شعري وهو يكول

اشتر: استري عليه الله يستر عليج

..ابتعدت عنه واني اجر بلدشداشه اغطي رجلي

..ابتسم وهو يكول
اشتر: لو تغطين نفسج بشعرج احسن
ملاك: اطلع هاي شبيك

..تقرب عليه وهو يجرني من خصري ويحاوط اديه وجهه قريب عليه شكد حاولت ابعده ماكدرت نزل باايده وهو يضغط على خصري تقرب على اذني يهمس وهو يكول

اشتر: جانت اكو شامه هنا حلوه
.. من كال هيج دفعته قوي عني
..ابتسم وضيق عيونه وطلع

كعدت على السرير واني ايدي على گلبي الي يدك بلثانيه الف شويه ودخلت رفل هيه وملاك

رفل: ما نمتي لعد

..هزيت براسي نافيه

رفل: نامي هاي غطوه وارتاحي

..نمت على السرير واجت يمي ملوكه وهيه تحضني وتلعب بشعري حسيت عليها نامت ونمت

..كعدت على صوت اشتر وهو يكول لرفل صيحيها اليه حسيت عليها من فتحت الباب كمت على حيلي

رفل: اشتر يريدج

..كمت على حيلي وحجيت
ملاك:تكدرين تنطيني شي اعرض من هذا

..طلعتلي تراك لبسته جان شويه احسن طلعت لكيت اشتر صاير نار وبس يفتر ويخابر ويصيح ما فهمت شي كعدت كدامه انتظره يكمل سد المبايل وثبت عينه عليه وكال

اشتر: الـِن وين

ملاك: مادري غير بلقصر

اشتر: الـِن شارده

....................................
لهنا وخلصنه البارت 🥺💗

كتبولي توقعاتكم؟ ♥️