رواية سليله الانتقام الفصل السادس والعشرون 26 - بقلم taratel

ادم: الضبع انسجن

..هزيت راسي نافيه كلامه وتقدمت عليه
الـِن: شوكت انسجن
ادم : اليوم

...مسحت دمعه جان بطرف عيني وحجيت بصوت ضعيف
الـِن: ادم والله ما مقدمه شي
ادم: البلاغ بااسمج

..نزلت عيني واني استذكر اخر موقف
..رفعت راسي عليه بعيون خايفه وحجيت

الـِن: ادم مو اني هاي رحمه وبراء اخر مره اجني وكالن خل نسجن الضبع وخلي ايدج باايدنه

..ثبت عينه بعيني وكال

ادم: تعالي وراي
الـِن: شكو

..عافني وطلع رحت ورا اريد افتهم نزل وطلع من القصر
حجيت

الـِن: وين رايح
ادم: الحكيني ومعليج

.. طلع متجهه للاسطبل واول ما دخلت لكيته واكف بلبدايه صحت

الـِن: شبيك

..اشرلي
.. جان اكو خيل جديد لونه ابيض وشعره ذهبي يجنن شكله جان واكف يم العمرد بحيث صايره الوانهن متضادات العمرد اسود فحم والخيل لونه ابيض ناصع

..نزلت دمعه من عيني ومسحتها

ادم: كاعد تشوفين هذا الخيل

..هزيت براسي

ادم: هذا ضبع وصا عليه الج

..اندار عليه وهو يكول

ادم: اول مره اشفق على ضبع ثنينجن خذلتنه ذيج خانته وانتي طعنتي بظهره

..سكتت ونزلت راسي جانت بس دموعي تجري

ادم: ماتعرفين شنو مر بي ضبع
الـِن: نسيت شسوه بيه

.. نزل راسه وابتعد راجع للقصر
..تقدمت واني اشوف الخيل الابيض مديته ايدي اله اتلمس بشعره

.. سمعت صوت
-ابتعدي عنه لا ياذيج

..انداريت لكيت نفس الولد الي يشتغل باالاسطبل

..ابتعدت عنه واني اشوف العمرد نايم بلكاع حجيت

الـِن: شبي
- مريض

..فتحت عيني بصدمه

الـِن:ليش
- ما ياكل
الـِن: هسه جان واكف مابي شي
- مسوي اضراب عن الاكل
الـِن: انطيني اني اوكله
- ما نصحج

..اخذت تفاحه وقربتها اله ما اخذها جان بس نايم
..عفته وطلعت راجعه للقصر اول ما دخلت لكيت رحمه وبراء كاعدات سوه تقدمت عليهن

الـِن: شسويتن
رحمه: شنو
الـِن: شلون مقدمين بلاغ بااسمي

..ضحكت بقرف وهيه ادكول
رحمه: مو كلتي ابلغ شو هسه رف گلبج
الـِن: ما رف گلبي بس سويتن خطوه بدون علمي
رحمه: لا تخافين بعدنه ما ماشين عدل

..تقربت واني اكعد مقابيلها وحجيت
الـِن: شلون يعني
رحمه: يعني راح نخلي الضبع يدور يدور وياكل ذيله

..فتحت عيني بصدمه واني احجي
الـِن: ما فهمت
براء: مو زين عليج بعدج صغيره

..كالت هيج ابتسمت بوجها وحطيت رجل على رجل واني اعدل كعدتي

الـِن: تتوقعين منو الكتل رضوان

..فتحت عينها مصدومه

رحمه: شتقصدين

..طلعت ٣ اصابع باايدي وي كل اسم انزل اصبع

الـِن: رحمه .. اسد .. براء

..ثنينهن فتح عيونهن مصدومات

رحمه: لا تلعبين ويانه افتهمتي

..ماجاوبتها وصعدت فوك ضليت محتاره شسوي بقيت افتر شويه بلغرفه ورحت متجهه لغرفه نور

.. بس فتحت الباب لكيتها كاعده وحاضنه صوره بس شفاتني نزلتها انتبهت جانت صوره رضوان

الـِن: ادخل
نور: تعالي حبيبتي

.. دخلت يمها وكعدت مقابيلها على السرير وحجيت

الـِن: ضبع انسجن

..فتحت عينها بصدمه وكالت
نور: مستحيل الضبع كدروله

نزلت راسي بااسى وحجيت
الـِن: اني السبب

..باعتلي بااستغراب وكالت
نور:شلون
الـِن: رحمه وبراء مقدمات بلاغ بااسمي
نور: مو هنه
الـِن: لعد

..صفنت عليه واخذت ايدي وكالت
نور: كلهم مشاركين بتلفيق
الـِن: شلون لعد الله عليج خل نساعده

..ثبتت عينها بعيني وهيه ادكول
نور: اساعده بس بشرط
الـِن: شنو
نور: نطلع من القصر وترحين وياي لدهوك

..باوعتلها بااستغراب
الـِن: ليش
نور: لان لو طلع الضبع مستحيل يخليج عايشه
الـِن: بس اني معليه

..نزلت راسها وهيه ادكول
نور: مسجلاتج تسجيل صوتي وانتي تعترفين

..باوعت مفهيه مااعرف شصاير
الـِن: ما حجيت شي
نور: الي سمعته جان اكو تسجيل الج تعترفين بي بجرائم الضبع
الـِن: ماحجيت شي والله حبابه صدكيني

.. نزلت راسها وكالت
نور: ما اتخيل ضبع من يطلع شراح يسوي بيهم

..سكتت واني اباوعلها بقلق و كالت
نور: يخوف
الـِن: شلون لعد لازم نساعده الله يخليج ساعدني
نور: كولي تعوفين كلشي وتجين وياي ونبدي حياه جديده بعيداً عنهم

..لزمت باايدها وضغطت عليها
الـِن: ما اريد اعوف ضبع اريد ابين اله مو اني السبب
ماريد اعوفه بهيج موقف وهو يحتاجني

..جرت ايدها مني وهي ادكول
نور: ساعدي
الـن: ما تساعديني
نور:حجيت العندي

..هزت براسها نافيه

..عفتها وطلعت لكيت ادم واكف يريد ينزل صحت عليه
الـِن: ادم

..اندار عليه وهو يتقرب

ادم: نعم
الـِن: ساعدني
ادم: بشنو
الـِن: نطلع ضبع من السجن
ادم: ماكدر اساعدج
الـِن: ليش حباب الله يخليك ساعدني
ادم: لكو جثه هاشم يعني ثبتت عليه

..فتحت عيني بصدمه
الـِن: وشلون
ادم: انتي السبب ما جان لازم تنطين بي من البدايه

..ثبتت عيني بعينه وحجيت
الـِن: السوا بيه مو قليل
ادم: خلص لعد يستاهل لا اتحاولين تساعدي

..نزلت دمعه من عيني مسحتها وحجيت بصوت يرجف

الـِن: احــبـه

.. جان واكف وهو مركز بعيني
..ابتسم وكال

ادم: لا تحبي ما راح يشفعلج شي عند الضبع بعد
الـِن: شسوي واكدر اساعده

..اندار وهو ياشر على غرفه نور
ادم: الوحيده الي تكدر تساعدج

..نزل ايده ورجعت انداريت عليه
ادم: انسانه مو هينه اخطر وحده بلقصر روحيلها تساعدج
الـِن: نور ؟

..هز براسه بمعنى اي
الـِن: شتكدر تسوي
ادم: تسوي الي مايخطر على بالج
الـِن: شنو

..ثبت عينه بعيني وكال
ادم: النمله الي تمشي بلكاع نور تعرف بيها ليش تمشي ووين تروح

..تركته ورجعت للغرفه افكر شراح يصير اخذت قرار وفتحت الباب متجهه لغرفه نور

.. اول ما فتحتها لكيتها ماموجوده بس دخلت للغرفه رجع انفتح الباب ودخلت وراي

الـِن: شوكت نروح
نور: وين
الـِن: مو كلتي لدهوك

..ابتسمت وكالت
نور: هسه صرتي تفتهمين
الـِن: شلون يطلع
نور: عوفيها يمي
الـِن: شوكت
نور: اليوم الفجر نطلع لدهوك وراها يطلع

..تقربت عليها واني احجي
الـِن: ليش ماننتظر يطلع ونروح
نور: اذا طلع ضبع وشافج ما اضمنلج حياتج

..كالت هيج واحتلني الخوف لان ادري بي يسويها
الـِن: شلون نطلع اليوم منو ياخذنا
نور: ماريد احد بلقصر يعرف حتى ملاك

..هزيت براسي
نور: اختي هناك عايشه الي هيه خالتج ونروح  للشقه وناسس حياتنه هناك ماالنه عيشه هنا بعد

..هزيت راسي وطلعت صارت غرفه ضبع كبالي دخلت عليها جانت متروسه بعطره تقربت سديتها وطلعت

.. رحت للغرفه وكلعاده اخر شي احس بي اخر دمعه تنزل من عيني

..حسيت على نور تكعدني
نور: يله السايق ينتظرنه جوه

..كمت على حيلي وبدلت واخذت الاحتاجه و نزلنه اني وياها لكيت سياره بلكراج صعدنه بيها

.. طريق متعب وصعب ورا فتره دخلنه دهوك وجان الجو بارد باوعت لنور وهيه تتلمس اكتافي وتقربني عليها

نور: اني ورضوان مخططين بس يصير عدنه طفله نطلع من القصر ونعيش هنا والشقه الي راح نروحلها اشتراها من كالولي اني حامل جانت هديته اليه

..باوعتلها بنظرات استعطاف وحجيت
الـِن: الله يرحمه

.. سكتت بعد ما حجت لحد ما وصلنه للشقه جانت وحده واكفه بلباب اول ما شفت نور تقربت عليها تحظنها وتبجي بس شافتني ابتعد من نو وهيه تباوعلي بااستغراب واشرت عليه

- الـِن؟

..هزيت براسي الها بمعنى اي تقربت عليه وهيه تحضني وتبوس بيه ابتعدت من عندي وكالت

- واخيرا
..هزت راسها باايجاب وهيه ادكول
نور: واخيرا

..فتحت باب الشقه ودخلنه جانت صغيره وحيل حلوه ملمومه بيها غرفتين ومطبخ وصاله كافيه علينه

.. كعدت اخت نور تسولف وياها ورفعت نظرها عليه وكالت

-شنو تدرسين

الـِن: ضبع قدملي طب بعد ما ادري اذا نقبلت لو لا

..باعت عليه وهيه مصدومه ورجعت باوعت لنور

-ضبع!!
نور: زوجها

..بس كالت هيج شهكت ورجعت نظرها لنور

- صدك تحجين شلون تزوجيها لضبع
نور: ماادري
-نسيتي شسوه بذيج مرته صدك تحجين شلون خليتها تزوجه

..صحت بصوت
الـِن: ضبع مابي شي واصلا كلش زين وياي ومدللني ويحبني صح عنده تصرفات متناقضه بس يحبني

.. عفتهن ودخلت لوحده من الغرف جانت موثثه بلكامل

.. حطيت راسي على السرير مستسلمه للنوم

..كعدت على صوت نور وهيه تصيح

نور: كعدي راح تصير بـ ١

فتحت عيني ورجعت سديتهن احس نفسي تعبانه ماريد اكعد بس انام ماريد اعيش واتذكر هاي الاحداث الدمرت حياتي

.. كمت على حيلي واني اسئلها
الـِن: ضبع طلع
نور: باجر
الـِن: تتوقعين يعرف مكانه

.. صفنت عليه ورجعت جاوبت
نور: يعرف بس مو هسه
الـِن: شوكت
نور: من يخلص منهم

..سكتت ما فاهمه كلامها
.. باعتلي وهي مبتسمه
نور: تاكلين علمود بعد نطلع بعد شوي
الـِن: شمسويه شو اشتم ريحه حرك

..ضحكت وكالت
نور: ناسيه الطبخ
الـِن: لو كايله اني اطبخ

..ابتسمت وكالت
نور: اريد اجرب شعور الام

..اتقربت عليها وحضنتها من صدمتها وسعادتها بذاك اليوم ما راح انساها..

..حاوطتني باايدها وهيه تطبع بوسه على راسي وكالت
نور: نعيش اني وياج واعوضج

..ابتسمت بوجها وطلعت

.. مرت الايام عاديه بديت اتعلم لغه ودخلت معهد تعليم لغه واخت نور جانت دائما تجي علينه

..لبست قمصلتي واللفاف الجو حيل بارد
واني نازله
نور:وين
الـِن: للمكتبه
نور:تتاخرين
الـِن: اي اتاخر اليوم راس السنه
نور: يعني ما ترجعين نحتفل سوه

..هزيت براسي نافيه وطلعت اركض

..مرت ٨ اشهر على وجودنه هنا ضبع بعد ما شفته وماادري اذا طلع لو بعده على حسب كلام نور ادكول طلع بس اذا طلع ليش ما اجا يدور عليه ؟؟

..وصلت للمكتبه وبديت اعدل بلكتب شويه ودخلت

- اليوم متأخره
الـِن: نسيت اوقت المبايل
-همزين اجيتي قبله

..هزيت راسي ورجعت اعدل الكتب

..خلصت ورجعت لكيت حلا متجهه اليه

حلا: الـِن اكو كتب موجوده على الطاوله رجعيها

..هزيت براسي الها واتجهت للكتب

.. لكيت كتاب مفتوح وبي ورقه اتجهت عليها اخذتها باايدي واطرافي احسهن يرجفن باوعت حولي ماكو احد رجعت بنظراتي للورقه واني اخذها باايدي

..هلاكي

...................

اشتر: الـِن شارده
ملاك: وين راحت
اشتر: محد يدري بيها وين

..تقربت عليه واني خايفه
ملاك: ضبع يدري

..هز براسه نافي كلامي
اشتر: لا
ملاك: وشلون
اشتر: راح اروحله هسه ونشوف
ملاك : للسجن

.. هز راسه وهو يبعد نظراته عني وطلع

.. بقيت كاعده اني ورفل وملوكه الصغيره

رفل: ملاك شلون تعرفتي على اشتر

..باوعتلها بصدمه وحجيت
ملاك: مااعرفه بس ضبع صديقه

.. هزت راسها بشك

..بقينه كاعدين شويه ودخلت نامت هيه وملاك وبقيت انتظر اشتر يرجع شويه وحسيت على الباب انفتح
..كمت على حيلي اشوفه جانت ايده متروسه دم

..تقربت عليه بخوف بس شافني قبض ايده يخفي الدم

ملاك: شبيها ايدك
اشتر: ماكو شي

.. اتقربت عليه اكثر واني اخذها باايدي وافتحها
..رفعت عيني عليه

ملاك: وهذا شنو وين متاذي

..ثبت عينه عليه وسحب ايده وكال

اشتر: ماكو شي

.. نزلت راسي وحجيت

ملاك: شفت الضبع
اشتر: لا
ملاك: ليش
اشتر: ميخلون احد يشوفه

.. رفعت نظري عليه وحجيت
ملاك: والـِن
اشتر: الـِن هيه المقدمه البلاغ على الضبع

.. شهكت بصدمه واتقربت اكثر

ملاك: ضبع عرف

... تقدم عليه وهو يوخر خصله من شعري وينزل لمستواي

اشتر: يعرف

.. ارتبكت واني ابتعد عنه انداريت متجهه للغرفه وكفت على كلماته الي شعلت روحي نار

اشتر:ثاري الگلب مبيوك بوگه!!

.. ابتعدت متجهه للغرفه متجاهله كلماته حسيت على لزمته الايدي وجرني عليه حيل محاوطني من خصري

ملاك : هاي شبيك اشتر لا احد يجي

..ضربته على صدره ابعده عني
.. اخذ ايدي وعصرهه وهو يخليها على گلبه

اشتر: گلبي صار باايدج
ملاك: احركه
اشتر: فدوه الج

..تقربت عليه اكثر واني احجي بحركه گلب
ملاك: دماري الاول عمري وحياتي ما راح انسى الي سويته بيه اكرهك حيل اكرهك ولو يبقى اخر يوم بعمري ما راح اسامحك

اشتر: اكرهيني واني احبج

..حجيت بصوت ضعيف مستغرب
ملاك: تحبني!! تحب وحده انخطفت واشتغلت بلملاهي تحب انسانه اغتصبوها وسلبو شرفها

..ضربت على صدره حيل واني ابجي
ملاك: راح تبقى الغصه الوحيده البگلبي انت ما انسى الي سويته بيه اشتر ما انسى

.. حجيت واني اعلي صوتي خلا ايده على شفتي يمنع صوتي وهو يهمس بااذني

اشتر: انتِ اشرف من الشرف

.. رفعت نظراتي عليه واني اخلي ايدي على عيونه
ملاك: غلطان
.. بعده يريد يحجي وسمعنه صوت طلق قريب

..ابتعدت عنه خايفه واني اسمع صوت الطلق الي رج البيت رج كعدت امه ورفل وملاك تبجي اخذ سلاحه يريد يطلع وامه ما تخلي

.. دفعها وهو ياخذ السلاح وطلع
.. تفلش الجام علينه شردنه بلغرفه واحنه خايفات شويه وهدء الصوت واحنه نسمع اصوات الشرطه ملت المكان

.. شويه وفتح الباب
اشتر: خو ما بيجن شي

..تقربت عليه امه وهيه تبجي وتصيح
- اشتر شصاير احجي

اشتر: اخذو الشغلات التحتاجوها راح نطلع منا

- ليش ليش بس فهمني

.. ثبت نظره عليه وهو يبتعد

- كومي رفل حضري ملابسج بساع

.. حضرت ملابسها وكاعدين نشوف البيت الي تزرف تزرف وامه بس تبجي وملاك خايفه حيل وهيه مجلبه باابوها خايفه عليه

.. سمعت صوت شرار وهو يكول
شرار: وين ملاك
اشتر:جوه
شرار: خل تجي وياي

..تقربت عليهم واني اسمع

اشتر: امانه ضبع تبقى يمي
شرار:ليش اني مو كد الامانه اشتر
اشتر: كدها وكدود
شرار: شصار اشتر
اشتر: ابن عم الضبع علسته اليوم وراد يندك بيه

..حجه بصوت مستغرب
شرار: لا تلعب بلنار منا احمد ومنا جماعه نصرت يردون راسك

اشتر: يخسون والله

.. سكتو وبعد ما سمعتلهم صوت
.. اتجهت بخطواتي الهم واني خايفه شرار اول ما شافني وهو مركز وياي وصلت يمه وحجيت

ملاك: ارجع للقصر

.. فتح جكارته وهو يخزرني

..رفعت نظري لشرار

ملاك: شرار حباب رجعني للقصر

..باوعلي وكال

اشتر: خفتي

ابتسمت واني احجي..
ملاك: لا بس كاعد اسببلكم الاذيه اصلا اني وين ما اروح اسبب المشاكل والاذيه فاابقى بلقصر احسن على الاقل همه يستاهلون

..نفخ دخان جكارته بوجهي وهو يحجي بصوته المرعب

اشتر: ما ترجعين
ملاك: ما كاعد احجي وياك كاعد احجي وي شرار

..شرار الي جان مصدوم بلبدايه بعدين حجه
شرار: وين تردين اخذج
اشتر: اكل خ.. انت
شرار: هاي شبيك يول

..خزره وهو يرجع نظراته عليه وياشر بااصبعه بتهديد
اشتر: وحق الله يا ملاك هلمره لو سويتي الي براسج اله اكسر رجليج

.. باوعتله بنظرات خايفه
ملاك: شرار حباب احجي ويا

..رص على اسنانه وهو يتقرب عليه ويصيح

اشتر: غبيه ما تدرين جماعه نصرت خلوج ابالهم وسوها شغله عناد اله يرجعوج يمهم

..فتحت عيني بصدمه واني خايفه رجع كال

اشتر: وابن عمج العزيز راد يبيعج الهم

.. ماحسيت على دموعي من ينزلن بس جنت بصدمتي

.. حجه بصوت هادئ وكال
اشتر: مسحي دموعج ولا تخافين
ملاك: ما خايفه

.. ابتعد عني وهمه يصيحو بقى بس شرار الي مابعد نظراته عني ولا ثانيه

شرار: تزوجت

..رفعت نظري عليه وحجيت
ملاك: اي الف مبروك

..ثبت عينه بعيني وهو يكول
شرار: بس گلبي ما حب غيرج ولا يهوى

ملاك: الله يخليك شرار ابتعد عني مااتحمل والله بعد
شرار: من يوم الي انخطفتي بي واني متت وبس من اشوف عيونج اعيش

..نزلت عيني بحيره

شرار: انتظرتج يوم يوم سويت المستحيل بس في سبيل الكاج

.. ما جاوبته رجع كال
شرار: اقبلي بيه ملاك اني مو بس احبج اني روحي بيج

..صحت بصوت
ملاك: انت شتحجي شبيك مو تزوجت

..باوعلي وهو يحجي بكل ضعف
شرار: اطلكها علمودج

ملاك: ما ابني سعادتي على سعاده غيري
شرار: متحبني هيه هم
ملاك: شوف حبتك وله ما حبتك اني ما الي دخل ابتعد عني
شرار: ليش ترفضيني
ملاك: لك بابا متزوج متزوج شبيك

.. نزل راسه وفزيت على صوت اشتر وهو يصيح

اشتر: يله نطلع

.. انداريت على اشتر واني اتجهه اله اخذني وطلعنه لكيت الصاله عباره عن جام مكسر والكراج متروس شرطه

.. جر ايدي وهو يعصرها ويكول
اشتر: وين اضمج ماريدهم يشوفوج

..اندار عليه وهو يتفحص ملامحي
اشتر: استغفرالله
ملاك :شبيك شايف شيطان

..اخذ ايدي وهو يطلع كال
اشتر: لا شايف ملاك

.. نزلت راسي وجريت ايدي قوي منه واخذني للسياره جانت موجوده رفل وامها وملاك

اول ما صعدنه صاحت امه
- وين نروح اشتر اكو واحد يعوف بيته وحلاله

اشتر: بشكل موقت راح اخذج يم خوالي تبقين فتره على ما اامن الاجواء وارجعج

.. اخذ امه واخته لبيت خواله اول ما وصل صاحت امه عليه انزل وياها

اشتر: لا ما تروح راح ارجعها للقصر

.. فتحت عيني واني اباوعله بااستفهام
..ودعتني امه وخواته وبقيت بس اني حجيت

ملاك: مو مساع كتلت روحك علمود ما ارجع
اشتر: ما ترجعين
ملاك: لعد وين ما خذني
اشتر: مكان ما يلكوج بي جماعه نصرت

..حجيت بخوف
ملاك: اشتر حباب لا تخليهم يلكوني والله اخاف ماريد ارجع

اشتر: امشي عدل لعد ولا تشردين والي اكوله يتنفذ بلحرف الواحد

..هزيت راسي بخوف وحجيت

ملاك: وين ماخذني لعد

..سكت ما جاوبني مشى مسافه بعيده لحد ما دخلنه محافظه ثانيه جان دنيا الليل وظلام الشوارع مابيها اضويه ولا بشر نمشي على ضوه السياره جانت بساتين وهوا عالي حطيت راسي انام..

حسيت على صوته وهو يكول

اشتر: يله وصلنه

..فتحت عيني ونزلنه جان بستان جبير وبي بيت جبير وكدامه حرس هواي دخل السياره بلكراج وهمه يسلمون عليه

..فتحلي الباب ونزلت
ملاك: المن هذا البيت
اشتر: اليه

..هزيت راسي ودخلنه اول ما دخلت فتح الاضويه جان حيل حلو ومرتب تقربت واني اشوف اللوحات الغريبه على الحايط

..اشرت عليها واني احجي

ملاك: شنو هاي

..اندار عليه ورفع راسه للوحات

اشتر: شكو

ملاك: شكلهن غريب مو مال لوحات

..ابتسم واشرلي على وحده من الغرف وكال
اشتر: اخذي اي وحده تعجبج وكعدي بيها

.. هزيت براسي واني تاركته خلفي

دخلت لوحده منهن جانت بس سرير وميز وبنصها جانت اكو غرفه ملابس فارغه

.. دخلت بيها واني استكشفها طلعت لكيته كاعد بلصاله تقربت عليه اني احجي

ملاك: تبقى هنا
اشتر: اي
ملاك: ليش
اشتر: يمكن بيتي
ملاك: ما اثق بيك اطلع

.. ما جاوبني ولا رفع عينه عليه جان يباع بلتلفون

..تركته متجهه للغرفه قفلتها ونمت

..كعدت على صوته يدك الباب كمت على حيلي افتحه لكيته بوجهي

ملاك: شكو من الصبح
اشتر: تعالي
ملاك: شكو انت دومك تخلسني من اكعد شصاير

..اتجهه للصاله وكعدت كدامه رفع عينه عليه وكال

اشتر: خابروني هسه ضبع طلع

..فتحت عيني بسعاده
ملاك: الله عليك

اشتر: شوفي ملاك اذا جانت اكو ذره رحمه بگلبه سابقاً هسه ماكو

.. ضيقت عيني بخوف ورجع كال

اشتر: لازم نلكه الـِن قبله
ملاك: شلون نلكاها واحنه ما ندري بيها وين

.. نزل راسه ورجع كال
اشتر: ضبع حارك القصر والي بي

...............................

بارت صغير لعيون البنات الحلوات 💗 والناس التعليقاتها حلوه اعتبروا مشهد راح انزللكم تكمله اله ومثل ما اتفقنه بلبارتات القادمه 😘♥️

ما ينطيني گلبي جنتو تنتظرون وبعدين ما نزل ♥️

كتبولي شنو تتوقعون ضبع راح يسوي ترا حيل يخوف 🌚💔