الفصل السابع

رواية سر المقابر الجزء السابع 7 بقلم حميدة عبدالحميد سر المقابررواية سر المقابر الحلقة السابعة في أقل من نص ساعة وصلت وكنت م واعي عديل بنفسي. . كل همي كان امي وزمرد وولد اختها يكونو كويسين. اول م وصلت لقيت الشارع هادئ والباب كان فاتح ضلفتين استقبلوني اتنين من نسوان الحله وهم طالعين من بيتنا دخلت بهلع ولقيت امي قاعده في طرف السرير وجنبها جارتنا الاتصلت لي قبيل. وقفت قدامها وقلت ليها مالك يُمه؟ وزمرد وين

دموعها نزلو زي السيل. قالت لي شالوهم ي أمجد كانو اكتر من نفر. جوو مسلحين عديل. وماف زول قدر يتكلم معاهم. وفتشو البيت فوق وتحت عشان الأوراق وم لقو شي. كسرو العدة كلها وخربو خراب وبعدها فاتو شعرت براسي لافي والدنيا حسيت بيها ضيقه شديد ٠٠٠ قعدت في الكرسي وكل معالم الغضب كانت مسيطرة على يتهجمو على بيتي انا.؟ كويس هم براهو هبشو النار

قلت لي امي من متين طلعوا قالت لي قبل شويه كدا بس اوع تفكر تلحقهم ي أمجد الناس ديل مسلحين وكعبين شديد قلت ليها وزمرد اخليها ليهم ي امي؟ مستحيل طبعا. قالت لي بحسرة وخوفها على بس كدا ح تعرض نفسك للموت ي أمجد وانا بموت لو حصلت ليك حاجه قمت من الكرسي وقعدت جنبها وقلت ليها انتي بتعرفي ولدك سمح ي امي مستحيل ارضى بالغلط وانا م بقدر اعيش تاني مرتاح من بعد م عرفت قصة زمرد. قالت لي بس قلت ليها امي ح اسوقك وا

اوديك لي ناس خالتي هناك تقعدي معاهم كم يوم. ملامح وشها اتبدلت للخوف قالت لي وانت؟؟ قلت ليها ح امشي ليهم هناك واشوف فهمهم شنو وح اجيب زمرد جوه عين اي زول فيهم. قالت لي بس قلت ليها امي انا قررت خلاص ولو ختيت حاجه في راسي لازم أعملها استسلمت للأمر الواقع وقالت لي بنبرة كلها حزن ربنا يحفظك قمت ولميت كل ملابسها في الشنطه. ونسوان الحله فاتو.

طلعنا. على ناس خالتي وصلتها ودخلت معاها ل جوا خالاتي اتكلموا معاي كتير وقالو لي دي بت غريبه لا بتعرفها ولا تاني لي تسوي في نفسك كدا بس م اشتغلت بيهم. ٠٠ ودعتهم ورجعت البيت. عندي سلاح طلعتوا من الخزنة واتصلت لي صحبي اسمو ياسين. انا وهو أصحاب روح بالروح درسنا الأساس والثانوي والجامعة كلهم مع بعض بس افترقنا في الشغل ٠٠ بعد جرس طويل حتى فتح شنو ي فردة الليله ياداب اتذكرت صديق طفولتك ضحكت وقلت ليو

وهمي ياخ. وشنو قبيل شايفك طرف الظلط لأمي ليك كم جركانة بنزين شكلك دخلت في عالم السوق الأسود ٠٠ ضحكت بسخرية وقال اي انا ما زيك انت وحوته. م بحب شغل الإهانة والذلة بحب انفرد براي ي صحبي. قلت ليو. كدي خلينا من دا كلو في موضوع لازم احكيهو ليك خير حاصل شنو؟؟ بديت احكي ليهو بقصة زمرد لحدي اخر حاجه حصلت بالله دا كلو حاصل وانا م عندي خبر. يعني هم دايرين يتقاو ويسترجلوا على بت ضعيفه؟؟ أمجد ياخ يحصل دا كلو ودابك جاي تكلمني؟؟

طبعا ياسين قلبوا حار وكرهتوا في الدنيا دي زول يأذي مراة كان بعرفها او. لا رجع وواصل كلامو وقال وفوووق دا كلو جاين يتهجموا على بيت خالتي ويخربو ليها؟ لا هم جادين تمام انا هسي جاي عليك وم يبقى اسمي ياسين عوض. عثمان لو م خليتهم يندموا. صراحه ياسين طلع جادي اكتر مني وفي التهور زول يلحقوا ماف طلعت من البيت واتنظرتو في أقل من عشرة دقيقه لقيتوا واقف قدامي قال لي ارح قلت ليو اول ح اشيل بنزين احتياطي وبعدين جبت الشي معاك؟

قال لي ح نمشي بيتنا بهناك اطلع الكلاشن حقي. وصدقني ح بمسحهم جت وخلي يسجنوني مؤبد بعدين قلت ليو لا م للدرجة قال لي ارح وم تكتر كلامك. ركبنا واتحركنا على بيتهم ٠٠ انتهينا من الجزء الأول وح ندخل في الجزء التاني بس م الآن . لانو حاليا م قادرة اركز على الرواية ال ح تتطبع كتاب بإذن الله ولازم اسلمها لدار النشر نهاية الشهر ٠٠ فعشان كدا مُضطرة اقيف هنا لفترة بسيطه جدا بإذن الله و اركز على الروايه الورقيه ٠٠٠

الجزء التاني بإذن الله ح يكون ب اسم جديد وح يكون فيه تحديات وحاجات كدا لا انصح بها أصحاب القلوب الضعيفه بعدين٠٠ ح تبدأ مغامرة شيقه بين ياسين وامجد وزمرد وح تظهر شخصيات مختلفه٠٠٠وتفاصيل كتيرة ح تعرفوها فيما بعد ٠٠ ودمتم بخير الي لقاء قريب جدا بمشيئة الله تعالى