الفصل السادس

رواية سر المقابر الجزء السادس 6 بقلم حميدة عبدالحميد سر المقابررواية سر المقابر الحلقة السادسة عاينت ليه بكل هدؤ وقلت ليو ح تركب موترك انت والخايب المعاك دا وتتخارجو ، طلع سكينة من ضراعو وقال لي شكلك عايز تدفن هنا على طول ٠٠

رجعت خطوة لي ورا وهو اتقدم على وظاهر عليهو جادي شديد. وعايز يغدر بي وخصوصا وانا ما معاي شي عشان ادافع بيهو عن نفسي كان رافع سكينـ.ـتو ومخليها في وضع الإستعداد إذا حاولت امسكها منو أو امسك هو ح يطعني بيها على طول. كنت حذر شديد انو م اتصرف اي تصرف غلط . بعد م رجعت خطوتين لي ورا. وحسيت بحجر كبير تحت رجلي وشكلو كان حجر متين وقوي. كنت بعاين ليهو جو عيونو وهو زي الوحش المفترس وراجي أقل غلطه مني عشان يطعني

وانا بحركة سريعة نزلت تحت ورفعت الحجر وجيت بيهو ف وشوو انفوا وقتي اتكسر وبقي ينزف بطريقه خياليه جدع السكينة من الألم الكان حاسي بيهو وانا رفعتها على طول. الشاب التاني المعاهو اندفع على وهو شايل سكينة برضو بس انا سبقتو وشرط ليو جزو كبير من يدو ٠٠ عاينت لي زمرد وقلت ليها قومي ارح. من دون تردد قامت وهي بترجف شلت الولد وركبتهم العربية ودست فرامل وخليت ديلك غرقانين في دمهم ٠٠

قطعت نص المسافه واتصلت لي صحبي عبدالله شغال في الشرطه حكيت ليهو بكل شي قال لي نحنا حاليا عاملين دورية وقريبين من المقابر ح امشي عليهم واقبضهم قلت ليو خير قفلت الخط ومسحت وشي بكفة يدي ٠٠ عاينت بالمراية لي زمرد كانت لسه خايفه وح تموت من الخوف. اتنهدت وقلت ليها م تخافي هم يتسجنوا ان شاء الله وح اخلي عبدالله يديهم مؤبد عديل لانو هم حاولو يقتلوني ودي جريمة قتل عمد من دون م ترفع راسها قالت

بس هم لا واحد ولا اتنين هم كتار. وبعد م يعرفو بالشي الحصل لي عاطف وحسن. ح يجو ب كمية. كبيرة خلاص انا انتهيت. وانت زاتك حتكون في خطر لانو لو ختوك في راسهم صدقني م ح تسلم منهم قلت ليها تمام انا زاتي ختيتهم في راسي. ونشوف اخرتهم شنو ٠٠

وصلنا البيت. ٠٠ لقيت امي لسه نايمه ٠٠ خليت زمرد وولدها يمشو غرفه تانيه. وانا طلعت برا. كنت مشتت ولازم اتصرف عشان احمي الانسانه دي. طلعت تلفوني ورجعت لي عبدالله. دخل الجرس الأول والثاني حتى رفع٠٠ اها ي زول قبضوهم؟ ما لقيناهم يا أمجد شكلو فاتو وحاليا نحنا هناك وشايف الدم مدفق في الأرض ٠٠٠ قلبي ضرب وبقيت اتلفت زي المجنون بس م يكونو تابعوني!!

قلت ليو انت متأكد الناس ديل معوقين شديد ياخ . واحد عمود انفو مكسور وواحد يدو مشروطة معقولة يكونو قدرو يتحركو؟ ي أمجد حاليا انا في المكان الوصفتوا لي وزي م قلت ليك شايف دم مدفق في الأرض لكن بشر واحد مافي طيب تمام قفلت الخط. وحيرتي وشتاتي زادو اكتر٠٠٠ عاينت للساعه والزمن فات خلاص. دخلت جو واتوضيت ع طول لانو دقايق بس والاذان التاني يأذن وانا ماشي على الباب اتذكرت المرة الفاتت لمن زمرد استحضرت على صوت الاذان

فهل لمن يأذن هسي برضو ح تحصل ليها نفس الحاجه وتستحضر؟ وقفت في الباب والاذان أذن ولمن انتهى م سمعت صوت اي صراخ أو كدا. شكلها نامت طوالي طلعت ع المسجد. صلينا ولله الحمد والمفروض اطلع الشغل على طول بس خايف على زمرد تحصل ليها حاجه أو يجو البيت هنا ٠ اتصلت لي حوته وقلت ليو الليله م ح اجي قال لي ان شاء الله خير قلت ليو خير بحكي ليك لمن نتلاقه قالي تمام قفلت الخط ومشيت البيت

لقيت ناس امي كلهم صاحين وقاعدين تحت شجرة النيمة. صبحت عليهم وامي قالت لي م شاء الله لقيت البت وولد اختها والحمدلله ي أمجد طلعت نصيحه ابتسمت وقلت ليها يعني حكت ليك قالت لي اي ٠٠ جريت كرسي وشبكت يدني مع بعض ووجهت كلامي لزمرد وقلت ليها الأوراق والاملاك دي كلها لي م اتصرفتي بيها انتي واختك زُمر. قبل تتوفى ٠٠

قالت لي انا م عارفه هم وين بالضبط لا المشاريع ولا البيوت. امي قبل تموت ورت ابوي بيهم واعمامي كلهم عارفين ونحنا كنا صغار وامي ماتت بدري شديد الوقت داك عمري كان ٣سنة وزُمر عمرها ٥سنة. امي كانت وحيده م عندها زول غير ابوي. ولمن ابوي مات الوقت داك كان عمري 8 سنة وعمر زُمر 12 سنة. والأوراق كانت معاها وزُمر رغم صغر سنها كانت مفتحه شديد وحافظت على الأوراق واعمامي كانو مفكرين ابوي دسه الورق قدر م حاولو يلقوهو بس م قدرو

وامي كان عندها صحبتها مرة طيبه شديد. وبتخاف الله زُمر ودتت ليها الورق وهي دستو حكت لي حاجات كتيرة وكل مرة كنت بتفاجي ياخ ديل كلاب وحيوانات م عندهم ذرة رحمة ولا انسانيه ، بس همم الآن لمو مع الزول الغلط وانا ختيتهم عديل في بالي قلت ليها طيب ممكن اشوف الورق واعرضو على محامي يمكن يقدر يعرف الحاجات دي وين. وتبيعيها كلها وتريحيهم منها ابتسمت وقالت َ م عندي مشكلة قلت ليها تمام ٠٠٠

اتحركت على الخزنة وطلعت الشنطة بعثرت منها الورق. وجيت طالع بيهم. الأوراق كانت كتيرة شديد قلت ليها اعتبري البيت بيتك انتي وولدك وامي ان شاء الله م بتقصر معاكم وطلعت. مشيت لي صحبي شغال في الأراضي اديتو الورق شالو وعمل ليهو أبحاث دقيقه. لحدي م قال لي وهو مُحتار ماشاء الله المرا دي عندها املاك تقيله خلاص . وبقي يوريني أسماء المشاريع كلها والبيوت وموقعهم وين ب الضبط. حسيت نفسي أنجزت إنجاز عظيم ٠٠

شكرتو وطلعت. على القسم عشان افتح بلاغ. مسافه الطريق جاتني مكالمة من رقم غريب. استغربت حيكون دا منو مثلا. فتحت الخط وجاني صوت مرا وكان م غريب علي الو ي ود امجد. وين انت تعال البيت سريع في اتنين نفر دخلو جو البيت وسامعة صوت ََ جوطه شديد. قبض فرامل وقلبي ضرب ضربه قوية اكيد ديل هم كسرت ملف واتوجهت على البيت. ٠٠٠