رواية سر المقابر الفصل الأول 1 - بقلم حميدة عبدالحميد

بنرجع من الشغل انا وصحبي كل يوم الساعه وحدة بليل عشان طبيعة شُغلنا بياخد زمن. وفي طريقنا بنجي مارين بي جنب المقابر وطول فترة شغلي كُنت بشوف بت في منتصف العشرينات تقريبآ تجي المقابر ومعاها طفل عمرو بين ٣ سنة وسنة ونص او اقل. الحكايه دي استمرت معانا قريب ال 6شهور.كانت بتجي على طرف حيطة المقابر وتفرش شوال السكر العادي دا وتقعد فيهو وتقعد ولدها جنبها ومن ثم يكون عندها كيس صغير تقريبا فيه أكل ٠٠٠
السؤال الكان مُحيرني هي بتعمل شنو هنا؟ ومعقولة تكون مشردة أو م عندها اهل يلموها طيب الولد دا ابوهو وين؟ ولا هي مجنونه وشكلها بيوحي انو نصيحه.
يوم طلعنا من الشغل وجينا مارين بنفس الطريق ونفس الزمن. وقفت طوالي حوته قال لي في شنو وقفت. رديت ليه وانا بعاين اتجاها وقلت ليو والله ي محمود الفضول قتلني عديل ولازم اعرف قصة البت دي شنو عاين لي بعدم مبالاة وقال م عندنا بيها شغله. م اشتغلت بيهو طوالي كسرت ونزلت من الظلط وقلت ليه م فرقت ي صحبي المهم لازم اعرف قصتها وقفت العربيه قدامها وا اول م شافتنا حضنت ولدها عليها شديد وظاهر عليها خافت مننا بركت رجولي قدامها وقلت ليها معليش ي اخت بس انتي بتجي هنا لي شنو؟؟
عاينت لي مسافه ومن ثم بدت تعمل حركات غريبه شديد م قدرت افهمها وختمتها بضحكة غريبه. محمود عاين لي وقال طلعت مجنونه ي أمجد ٠٠٠
ارح نمشي لانو لو إتاخرنا اكتر من كدة ناس الدورية ح يمسكونا في الشارع قمت على حيلي وعايزين نمشي ضربت رعدة قوية هزت المكان كلو ٠٠
طبعا نحن في فصل الخريف الشافع خاف شديد وامو حضنتو عليها اكتر والشي الفت انتباهي انو البت دي م مجنونه بس في حاجه حصلت ليها وخلتها تبقى كدا عاينت لي حوته وقلت ليو ح اسوقها معاي البيت وتقعد مع امي قال لي بصدمه واعي انت بتقول في شنو؟ امك مرا كبيرة في السن وفوق دا كلو قاعدة براها كيف تودي ليها بت مجنونه. أمجد انت جنيت؟ قلت ليو لا ي حوته البت دي م مجنونه ومشيت عليها ٠٠