رواية تاروت الفصل الثامن وثلاثون 38 - بقلم زيـنـب علـي 🦢

#تاروت

البارت «39»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

شگد أحبـه الغيض البگلبك حبيبي
ايموت اذا صدفة أبتـسم

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

خيال: يمه يعني شنووو شبيها اختييي

- ادعولها حالتها ويا النزف خطرة

عافتنا وركضت دخلت جوه بقيت صافنة وراها بس دموعي تنزل احتاريت شسوي وماعرف شجاي يصير بأختي سمعت صوت باتر يصيح عليهم

باتر: شبيها مرتي واحد منكم يفهمنا شجاي يصير

لزمه يمان يجر بي ويحچي بهدوء
يمان: على كيفك تعال اگعد لا تصيح احنا بـ مستشفى

باتر: يعني نبقى هيج واگفين محد ينطينا لا حگ ولا باطل

دموعي صارت تنزل بالزايد وهو بقى يصيح فقد عليهم گامت له حكمة گوه سحبته گعدته على صفحة تحچي ويا

حكمة: ولك يمه فرفحت گول يا الله وادعيلها صياحك مايفيدها بشي

عافنا وابتعد على صفحة يمسح على رگبته من ورا انتبهت على اديناته يرجفن والعروگ برزت ثواني ورجعت طلعت الممرضة گالت

- محتاجين دم لازم تتبرعون الها

خيال: اي انا اختها تگدرون تاخذون مني

اتقرب هو يحچي
باتر: وانا هم تگدرون تاخذون مني

جاوبته الممرضة
- متبرع واحد يكفي واختها احسن شي ، تعاي وياي

عفتهم ورحت وراها امشي واحچي
خيال: فدوه شنو وضعها هسه

- جاي نحاول نسيطر على الوضع بس النزيف حاد وخسرت هواي دم جاي يسبب الها مضاعفات

لزمت گلبي بيدي ويا كل كلمة تحچيها احسها تزرف گلبي والف فكرة تجي ببالي استغفر ربي وارجع ادعيلها ، سوولي الازم واخذت مني دم طلعت يمان جان واكفلي بالباب لزم ايدي مشيت ويا گال

يمان: دختي

اومأت بنفي بقى لازم ايدي يمشيني من الخوف الصار بگلبي حسيت كل ثگل الدنيا صار على صدري حتى النفس گوة اسحبه

يمان: جاي ترجفين خيال شبيچ يوجعچ شي

همست
خيال: يمان كلشي ولا اختي خايفة

يمان: لا تخافين رميم قوية وراح تطلع منها

غمضت عيوني  احچي
خيال: يارب يارب الله يسمع منك

لاف ايده على جتفي حاوطني والثانية لازم بيها ايدي يمشيني ويحاول يطمن بيه

وصلنا المكانه شفت بس حكمة موجودة بنفس مكانها گاعدة تقرأ قرآن باتر ما هو گعدني يمان بصف حكمة وراح جابلي عصير گوه جبرني اشرب شويه منه بعدها عافني وراح طلع عرفته يدور على باتر دقايق ورجعوا دخلوا ثنينهم باتر گعد على باية الدرج ويمان واگف فوگ راسي

رفعت راسي شفته مكتف اديناته وواگف يباوع عليه رفعت ايدي لزمها حيل عصرها بيده محاول يهديني ويطمني

حكمة: خايبين الله احد وحيد منهم يريح گلوبنا ويطمنا

يمان: يمه لاتزيدون الوضع سوء اكيد جاي يسوون العليهم واكثر

حكمة: بس بطوا شنهي خلي يحسون بينا

گام باتر وگال بنبرة مهددة
باتر: راح افلش الردها على رؤوسهم هسه بلا شني مصلوبين هنا عايفينا

يمان: يابه اكيد من يصير شي مهم يخبرونا مو اسلوب هذا لو نسوي شي بي خير لو ندعيلها يم واسع الرحمة ونسكت

هز ايده باتر ماعاجبه ووگف على صفحة مكتف اديه رغم طولوا جوه لكن  الكل دخل بحالة هدوء وترقب مانريد ننصدم حتى الاطفال محد سأل عليهم بس الممرضات اخذوا الجنطة مالتهم من عندي وراحن

ورا ساعة تقريبًا طلعت الدكتورة اول واحد راح لها يمان وكلنا گمنا ورا

يمان: بشري دكتورة شلونها بنتنا

سوت حركة بحلگها تدل على الاسف وگالت
- كدرنا نسيطر على النزيف بس تبقى حالتها خطرة لازم ننقلها للعناية اربعة وعشرين ساعة تحت المراقبة من بعدها نگدر نحدد حالتها الحرجة

باتر: دكتورة مرتي تعيش مو

- ادعولها تعدي الاربعة وعشرين ساعة بخير

حچتها وراحت لزمت گلبي الي انعصر وماگدرت اسيطر على نفسي كلش دخت ردت اطيح انتبهت عليه حكمة وصاحت

حكمة: يمه طاحت البنت الزمها يمان

حسيت اديناته حاوطتني بعدها صار عندي اغماء ...

فتحت عيوني راسي ثگيل كلش شگد مر وكت شكد الساعة مادري لگيت نفسي بيدي مغذي الممرضة تشيله الي لان خلص وبس يمان گاعد يمي يمسح على شعري همست

خيال: وين اختي

همس يطمني
يمان: ان شاء الله زينة وتگوم الجهالها بالسلامة

حچيت بدموع
خيال: بعدها على وضعها

يمان: ادعيلها يگلبي

باوعت حوالية حكمة ماكو انتبهت الصوته گال
يمان: امي راحت تشوف الصغار خطية محد وصلهم

صفنت بالسقف دموعي تنزل صار يمسحهم بيده ويحچي

يمان: ليش هيچ يروحي تضعفين بوكت اختچ محتاجتچ بي

خيال: يمان وضعها خطر وموزين ماريد افقدها اموت والله

يمان: ليش تفاولين عليها المفروض تصيرين قوية وتگومين هسه تدعين الاختچ وتمدينها بالقوة انا ما متعود اشوف خيالي الواسع بهاي الحالة

خليت ايدي على عيوني ابچي وأهمس
خيال: تعبت تعبت تعبت والله

يمان: المؤمن مبتلا وانتِ مؤمنة لازم اتصبرين على حكم رب العالمين مو انا اعلمچ هاي السوالف المفروض انتِ تعلميني

خيال: يمان تعبت من الوحدة تعبت وانا اشوف اعزاز گلبي يختفون من عيوني واحد ورى الخ ، وين امي وين ابوية وين اخوية ... وين رميم ؟

نصه عليه يمشي بأبهامه على خدي ويحچي بهدوء وياي
يمان: اهلچ مكانهم الجنة ان شاء الله ورميم قويه وراح تعدي وهسه تشوفين وانتِ بس شدي حيلچ

خيال: ايّ

مسحت دموعي ورجعت حچيت
خيال: وين باتر

يمان: ولا ادري بي التهيت بيچ وماشفته بعد

خيال: خطية چان خايف وين راح

يمان: هسه اشوفه

راد يروح لزمته مانعته جلست روحي وگلت
خيال: انا اشوفه انت روح ورا خالة هي هم مابيها حيل

يمان: تعاي وياي

طلعنا انا ويا من قسم الطوارئ رجعنا النفس مكانا مالگينا احد

خيال: باتر ماهو هو

يمان: مادري يمكن طلع بره يدخن جگارة اروح اشوف امي وبعدين اشوفه اگعدي هنا

گعدني وراح ورا خالة حكمة ماگدرت اصبر اريد اشوفه وين گمت طلعت للحديقة لگيته گاعد على صفحة يدخن اتقربت گعدت بصفة دار وجه مني يمسح بدموعه

مديت ايدي لزمت ايده تحسر بألم طفة الجگارة وطبطب على ايدي بهدوء انتبهت عيونه منتشر بيهن خطوط حمر والتعب واضح بوجه همست

خيال: تحبها

ابتسم بحزن ورجع سحب جگارة ورثها اخذ منها نفس قوي شمرة وگال بصوت مبحوح

باتر: المستبدة مالتي الحب تافه گدام مشاعري الشايلهن الها تدرين رغم مصارلها بس جم ساعة غايبة عليه بس كلش حنيت الصوتها

رفع رأسه الي يفوك سحب نفس قوي وكال
باتر: اوووفف تملكني الدنيا كلها من تصيحلي بتاري وتتنعوص عليه حتى للعذاب وياها والشلاع الگلب اشتاقيت

خيال: الهالدرجة

باتر: واكثر سميتها روح گلبي تتخيلين الگلب يسوه بلا روحه

صفن شويه بعدها مسح عيونه ببطن كف ايده اخذ نفس حمحم وگال بنبرة يصطنع بيها القوة
باتر: تدرين چنت مقرر انتقامي انفذة بعد ماتولد انا ادري بروحي كلشي ماگدر اسويلها بس اضحك واقشمر نفسي وبداخلي مامعترف بضعفي گدامها الحد قبل جم يوم وانا اخطط شلون انتقم منها بس هسه يلا حسيت بتفاهة تفكيري

عض على شفته بقهر نزلت دمعة منه ما اهتم الها ضحك بحزن وهمس

باتر: انا اكبر ضعيف گبال عيونها

خيال: لا تخوفني منك

عبس حلگه وگال
باتر: هاي چويات روحي الماتبرد أأذي روحي ما أذيها

خيال: هنيالها بيك اختي

باتر: خيال شگد اذتني خذلتني حطمتني واحلف الف مره اردلها الصاع صاعين بس من تصير گبالي انسى كلشي وابقى افكر شلون اخليها تحبني شسوي حتى تحس بيه گلتها وراجع اگولها انا گدامها كل مره اطيح بخسارة ما تعوضها خسارة ولا الف نصر

خيال: ليش هاي الدرجة تحبها ؟!

باتر: لان بأختصار هي اول حطام يرممني اطهر شي يمسني اول توبة وبداية طريق الصلاح

غمضت عيوني حيل دموعي تنزل گام وگف وگال
باتر: لا تبچين مرتي قوية وراح تعدي هاي المحنة ادري بيها كلش قوية

مدلي ايده لزمتها وگمت ويا دخلنا للمستشفى لگينا يمان وحكمة موجودين بمكانهم ويمان يحاول يقنع خالة حتى تروح للبيت وهي ماتقبل گعدت بصفها احچي

خيال: خاله گومي ارجعي ارتاحي ان شاء الله منا للصبح تكون حالة رميم مستقرة

حكمة: ميلوا مني ماتحرك منا الا بنتي تگوم واشوفها بخير

خيال: باعي وضعچ تعبتي فدوه اروحلچ گومي ارجعي للبيت

حكمة: مالكم غرض بيه

باوعت لـ يمان اشر لي يعني خليها سكتت وهي باوعت الباتر وگالت

حكمة: ماشفت جهالك

جاوب بعدم اهتمام
باتر: اول مره اشوف اممهم وهم بعدين لاحگ عليهم

بقينا گاعدين ننتظر ويمان ماخلا شي مسوى وكل شويه يروح يسأل عن حالتها يگلوله سيطرنا على النزيف وسوينا العلينا مانگدر نحكم على حالتها الا تصحه ويفكها البنج

من بعدها بدأت حكمة تتعب وضغطها تخربط گوه قنعناها يمان يحجزلها غرفة حتى ترتاح بيها اخذها وراح وياها

بقينا گاعدين انا وباتر ننتظر طلعن ثنين ممرضات من غرفة العناية گمت بسرعة وحچيت ويا وحده منهن

خيال: فدوة شلونها اختي ماگعدت

- وضعها مستقر حاليًا ننتظرها تگعد

خيال: نگدر نشوفها

- ان شاء الله للصبح تكون حالتها احسن ومستقرة اكثر وتگدرون تطمنون عليها

باتر: لا انا هسه اريد ادخل اشوفها

- هسه كلش صعبة وخطر عليها هي اول ما تبدي تستجيب وتحاول تصحى من البنچ راح ينقلونها الغرفة ثانية كلكم تگدرون تشوفونها

حاول وياهم بس مو بعصبية احس بي حتى ما بي حيل يصيح عليهم او يسوي مشكلة بعدها عافني وراح للدكتورة ماخلوا يدخل ابد

راد يموت مثل السمجة من يطلعونها من المي احسه متزوهر وبس يلوب احتاريت اطمن روحي لو اهدي وحاول اطمنه اخر شي تعبت كلش گعدت على باية الدرج اباوع عليه وهو يلوب

اجه يمان گعد يمي
خيال: خاله وين

يمان: عفتها تصلي بالغرفة

خيال: وانت وين جنت

يمان: حجزت غرفة خاصة الرميم جانوا يجهزون بيها وزينوها بنفاخ وورد

خليت ايدي على راسي ابچي
خيال: هي وينها خلي تعدي منها سلامات والله كريم

يمان: ريمي قوية لا تفاولين عليها ولا تصيرين ضعيفة

رفعت انظاري الباتر وحچيت بقهر
خيال: شوف حالة شلون يلوب راح يموت

يمان: تدرين صار شگد ما شايف باتر بهالحال من يوم ما جانت امي تتمرض هيج يبقى يلوب عليها

حچاها وباوع الساعته
يمان: راح يصيرلها 4 ساعات هي طالعة من العمليات

خيال: ايّ باوع صارت صبح

بعدني احچي وشفت الدكتورة ووياها ثنين ممرضات اجن يركضن مستعجلات بسرعة فزيت عليهن گلبي انخمش

خيال: دكتورة فدوه شكو

جاوبتني وهي تلبس كفوفها
- المريضة بدأت تصحى

باتر: يعني شراح يصير

- ان شاء الله خير ادعولها

عافتنا ودخلت مشيت على صفحة بعيد عنهم لازمة گلبي وادعيلها ماكو دقايق وطلعوها ماصدگت بقيت واگفة بعيد ماريد اسمعهم شنو يحچون بس صافنة عليهم

احس الدم رجع يمشي بجسمي من شفت الوجوه استبشرت وباتر ابتسامته بينت رحتلهم اركض مالحگت اسمع شي غير الدكتورة من گالت

- راح ننقلها الغرفتها تگدرون تروحون يمها

كلي ارجف ارجف بصورة مو طبيعية وبودي اسجد بنص المستشفى اخذوها وراحوا وباتر وياها لزمني يمان يحچي

يمان: انا اكمل الإجراءات وانتِ اخذي امي وروحي وراهم

اومئت بالموافقة ورحت الغرفة حكمة خطية شفتها جانت غافية اتقربت گعدتها على كيفي

گعدت مخترعة لزمتني تحچي
حكمة: يمه دخيلچ يم الحسين شبيها اخيتچ

خيال: نقلوها الغرفتها خالة صار نگدر نشوفها صحت

حكمة: الله هم صل على محمد وآل محمد يا ما انت كريم يارب يالله

اخذتها ورحنا دلونا على الغرفة اول ما دخلنا شفت باتر مخلي كرسي وگاعد يمها مخلي رأسه على مخدتها وجهة بوجها وايده الثانية يمسح على شعرها ومدري شنو يهمسلها وهي بس تون بألم

حمحمت حكمة وگالت
حكمة: شنهي احنا اجينا

ولا اهتم بقى على نفس وضعه اتقرب عليها كلش خلا انفه يم انفها اخذ نفس قوي منها وگال

باتر: حكمة روحي مو وكتچ هسه

دفعته تحچي
حكمة: شلايتي على الاقل احترم وجودنا خلي نشوف الفرخة شبيها

غطه وجها بيده وگال
باتر: لا تباوعون عليها ريمتي تنحسد يمه ماريد احد يشوفها

حچاها وصار يبوس بوجها عيونها خدودها انفها حلگه ويهمس
باتر: اروح فدوه الوجهچ

گعدت على صفحة اباوع عليهم مبتسمة منظرهم طالع يجنن وحكمة بقت ترزل بي گوه يلا ابتعد منها شويه گعدنا يمها اباوع عليه صارت تفتح عيونها وترجع تسدهن وتون من العملية همست بألم

رميم: اخ يمه وجع مو طبيعي جسمي يوجعني

خيال: اسم الله امي انتِ

باتر: سوده عليه

اتقربت يمها ابچي واهمس
خيال: ريت الوجع بيه ولا بيچ

رميم: بتار

مسح على وجها يحچي
باتر: روح گلب بتار انتِ ها

تحچي بدموع
رميم: بتار طيف گالت جنت بالسجن هي شمدريها بيك

باتر: بربوگ هاي حبيبي كلشي تعرف تروحلچ فدوه

رميم: شمدريها تريد تنتقم مني شمدريها ، انت خاين

باتر: غير اگلچ بربوگ وداعت امي ماخنتچ

هي تحچي وهو من كل عقله يجاوبها ويبرر
حكمة: شنهي هاي شجاي تحچي مافهمنا

باتر: يمه هاي الفوصة تحاسب بيه حتى وهي بهذا الحال

خيال: بعده مارايح مفعول البنج مجاي تعرف شتحچي

رجعت گالت

رميم: باتر

باتر: ها يروحه

رميم: وين جهالي مو ببطني وينهم

باتر: بس صيري زينة انعل ابو جهالچ لو حبلتي انوب على هالضيم هذا

حكمة: هاا تريدها تكرك والله خوش لو مو سبع فروخ ماردون راسي

باوعلها وگال
باتر: ايّ مو انتِ تخلفينهم مو احنا

بقت تحجي عليه وهو ولا مهتم بس يباوع الرميم ويبتسم شويه ودخل يمان يتطمن عليها بقينا گاعدين يمها الحدما بدأت تصحصح ويروح مفعول البنج تمامًا وصاروا ينطونها مهدئات علمود الألم

باتر ماقبل يعوفها ولا لحظة ، انتبهت الحكمة گالت

حكمة: ماجبنالها هدوم هسه تگعد شنلبسها

خيال: هسه ارجع للبيت اجيبلها ملابس نظيفة بس گلبي ما ينطيني

حكمة: دگومي روحي انتِ ويمان وانا اروح اشوف الصغار

عفنا باتر يمها وطلعنا انا ويمان للبيت بعدنا بالطريق وسمعت تليفونه يدگ باوع للشاشة وگال

يمان: هذا دائب

حچاها وجاوبه فتح مايك اجانا صوته يحچي

دائب: انتم وين من البارحة لليوم محد يجاوبني يمان موضوع مهم

يمان: مشغولين برميم ولدت

جاوبه بندهاش
دائب: اه يمتى وليش انا مادري باتر الخايس صار اب

يمان: هو انت وينك حتى ما تسأل علينا من البارحة احنا نركض

دائب: اتصل عليكم محد يجاوب غير تتصل بيه هسه انا اروحلهم

يمان: انا راجع للبيت نجيب چم غرض و نلتقي هناك

حچاها وبعدها گله على اسم المستشفى
يمان: ما گلتلي شنو الموضوع

تنهد يحچي
دائب: بنت الشاهين وصلت استلمها انا ماگدر

بسرعة باوعلي سد المايك وخلا التليفون على أذنه بقى شويه ساكت يسمع دائب شنو يحچي بعدها كلشي ما گال غير

يمان: هاي هي انا ارجعلك خبر

سد التليفون باوعت اله بطرف عيني وحچيت
خيال: مبروك عروستك وصلت

ضحك يحچي
يمان: محد غيرچ تصير عروستي

خيال: لا والله

يمان: وداعت وجهچ الحلو

خيال: عوف وجهي ولا تحچي وياي بعد

وگف السيارة گبال الباب طفاها وگال
يمان: مو ماترديني ليش ضجتي

خيال: وعلى شنو اضوج متوهم

عفته ونزلت ضربت باب السيارة حيل فتحت باب البيت ودخلت معصبة دخل وراي لزمني من ايدي جذبني اله يحچي

يمان: كل هذا وماضايجة بعد شويه ترتكبين بيه جريمة

خيال: شنو رأيك اذا ما عفتني ارتكب بيك جريمة هسه دام وحدنا

يمان: كلشي يطلع منچ بس ماعوفچ الا اعرف ليش ضجتي

خيال: ترى راح تروح تجيب بنت قاتل اهلي شنو تريد مني اسوي ابوسك واكلك شكرًا حبيبي

ابتسم اتقرب مني يهمس
يمان: اووفف اذا تسوينها هسه تكسبين بيه أجر

خيال: يمان وخر من وجهي

يمان: وان ما وخرت

جريت ايدي منه مايقبل يعوفها وحچيت بصوت مخنوگ
خيال: يمممااانن

يمان: شبيج راح تبچين وينها الي تريد ترتكب بيه جريمة

خيال: اهووو يمان مو بدينا بسوالفك هسه من صدگ ارتكب بيك جريمة

يمان: ليش ما تخليني انا ارتكب بيچ جريمة حتى تحبلين بتوأم وفد مرة يتربون ويا جهال اختچ واخوي

خيال: صاير متستحي وخر لا تتقرب مني

ردت اصعد رجع لزمني فرني حصرني على محجر الدرج يحچي

يمان: استفرد بيچ واشبع شوگي

عطت بصوت عالي
خيال: يمان راح اطيح شبيك

قرب وجهه مني رجعت براسي الي ورا استغل الفرصة بسرعة رفع الحجاب وخلا رأسه برگبتي گمت اصرخ بصوت عالي سد حلگي يحچي

يمان: اشش محد يسمعچ وحدنا ترى

گوه سحبت روحي من بين اديناته وصعدت ركض ردت ادخل للغرفة واسد الباب عليه خلا رجله مانعني ادفع بالباب بكل قوتي واصيح

خيال: منحرف والله الا ارفع عليك قضية تحرش

يمان: ايّ وشتگليلهم رجلي حاول يبوسني وانا ماخليته

دفع الباب حيل ودخل ركضت صرت ورا الچرباية اعيط عليه

خيال: حاول تتقرب وشوف تعتبر صدگ ما رايد روحك

عض على شفته وگال بلهفة
يمان: انا اريدچ ياهو گالچ رايد روحي

شلت المخدة شمرتها عليه وصعدت على الجرباية اريد اعبر على الجهة الثانية ماحسيته غير لزمني من رجلي سحبني عليه مددني وصار فوگي فتح حجابي وشمره

خيال: شبيك نچلبت من الصبح

يمان: اريد بوسة

صرت ادفع وضرب بي لزم اديناتي وگال
يمان: شبيچ نمونه هي بوسة

ردت احچي ماخلاني گطع كلامي واخذ شفتي بقوة مسكتني صرت ارفس برجلية ثبتهن بين رجليناته ماخلاني اتحرك وكمل مشوارة جمدت بمكاني وغمضت عيوني احس كل ذرة بجسمي صارت ترجف وگلبي فضحني بدگته العالية عاف ايدي وخلا ايده على گلبي ابتعد يهمس

يمان: اول مرة گلبچ يكون بهالحال وانتِ وياي

لزمته من ياخته مغمضة عيوني اهمس
خيال: يمان

يمان: اووفف يا فزة گلبي من يسمع اسمي بصوتچ

گالها ورجع من جديد باسني ماعرف ليش ويمتى اندمجت ويا وصرت ابادله البوسة ، زادت حرارة انفاسة المضطربة وصار يتجرأ ويتعمق اكثر فجأة وبلا اي مقدمات ابتعد مني وگام گال بصوت تعبان ونفس عالي

يمان: حضري غراض اختچ على مااسبح واطلع تلگيني جوه

عافني وطلع من الغرفة باوعت النفسي القميص كل ازراه مفتوحة وصايرة فلم

خيال: المنحرف ابو النسوان انا الك اذا تقربت عليه مرة ثانية

صفنت شويه وبعدها ردفت مأنبة نفسي
خيال: هسه اليسمعچ يگول حاربتي حرب احد ولا يكول سحتي بين اديناته

غميت نفسي وگمت طلعت ملابس الي ورحت للحمام سبحت وطلعت رحت الغرفة رميم القديمة طلعتلها ملابس واشياء ممكن تحتاجهم خليتهن بجنطة ونزلت چان كاعد بالصالة يحچي بالتليفون ماسمعت شي بس من گال

يمان: عندي شغل باچر مر عليه تلگاني متواجد

غلقه اول مانزلت باوعلي وگال
يمان: هذا عمچ

خيال: منين اجاني عمي وشيريد

يمان: يسأل عليكم

خيال: كون خبرته برميم ولدت

يمان: لا طبعًا لتخافين ، كملتي نگدر نطلع

حجاها وهو يباوع الحلگي ببتسامة

رفعت حاجبي احچي
خيال: شبيك ؟

يمان: منو جارح شفتچ

مشيت كدامة احچي بضوجة
خيال: واحد مسعور نچلب عليه بس انا اعلمه

طلعت من البيت وانا اسمع بس صوت ضحكته صعدت بالسيارة ادردم عليه طول الطريق للمستشفى هو يسمعني بكل سعة صدر ومبتسم

❛❛❛❛

رميم"

فتحت عيوني على ألم خفيف ببطني وانحاء مختلفة من جسمي احس راسي ثگيل بس منتبة اميز الي حوالية شفت باتر وحكمة واگفين على راسي همست بدموع

رميم: اريد مي عطشانة

اتقرب يمي لزم ايدي يبوس بيها يحچي عيونه مغورگة بالدموع
باتر: الحمد لله على السلامة حبيبي

لزمت ايده حيل احچي
رميم: وين جهالنا شصار بيهم

باتر: بعدني ما شايفهم حالي من حالچ

اتقربت حكمة باستني براسي وگالت
حكمة: بخير بس بعدهم صغار كلش وخلوهم بالخدچ

حچيت بدموع
رميم: الله عليچ خاله بداعت عزاز گلبچ ما بيهم شي جهالي

حكمة: والله ما بيهم شي كل شويه رايحة رادة عليهم

رميم: اريد اشوفهم

باتر: خلي حالتچ تستقر واخذچ

رميم: اريد مي عطشانة

باتر: هسه اصيح الدكتورة ونشوف

طلع صاح للدكتورة اجت شافتني وضعي مستقر بس الالم ما ينحمل انطتني مهدئ وطمنتهم على وضعي شربوني مي قليل تطمنت عليه وطلعت وحكمة طلعت وراها گالت اتطمن على الصغار

درت انظاري الباتر احچي بزعل
رميم: ليش بعدك الهسه ما شفت جهالنا ماتردهم هسه يزعلون من عدنا ثنينا ما شفناهم

باسني من حلگي يكز على اسنانه ويحچي
باتر: اروح فدوة الهالصوت والبرطومة هاي جعلني فداها

رميم: يوو باتر انا وين احچي وانت وين اريد جهالي ماتحمل ماشوفهم

باتر: صار هسه اخليهم يجيبونهم النا هنا

رميم: خاف موزين عليهم

باتر: انا ادبرها معليچ

دخلت حكمة كعدت تحچي
حكمة: الحمد لله كاملين ووزنهم كل واحد 2 كيلو ما شاء الله گالت الدكتورة يحتاجلهم اسبوع ونص اسبوعين بالحضانة وهاي هي يطلعون

رميم: اريد اشوفهم شلون اتحمل اكثر

گام وكال
باتر: هسه ارجع

حكمة: وين رايح

باتر: هسه اجي وهم دائب راح يجي

حكمة: مبارك همزين تذكرنا الشلايتي

راح باتر وطول مارجع مدري شيسوي اكو شي بباله شي شويه دخل كعد بصفي باس راسي وگال

باتر: شويه ويجون جهالنا

حكمة: بالخدچ شيجيبهم

باتر: راح ينقلونهم بحاضنات لهنا يبقون على ما نطلع

رميم: وينهم شوكت يجيبوهم

باتر: هسه جابوهم وراي

حكمة: ولكم لا تمرمطون بالفروخ من هسه

حجتها وانفتح الباب ودخلوا ثنين حاضنات زجاجيات يدفعون بيهم رفع السرير شويه جلسني حتى اگدر اشوفهم اول ما خلوهم گبالي وعيني وطاحت عليهم دموعي صارت تنزل مملبسيهم شي بس بالحفوضات الي اكبر منهم صايرة كلش صغار وناعمين قربوهم كلش يمي حچت الممرضة

- تگدرين تمدين ايدچ منا تلمسيهم

مديت ايدي من الفتحه لزمت ايد واحد منهم ورجعت لزمت الثاني اهمس بدموع

رميم: ماماي حبايب روحي

باوعت الباتر صافن عليهم عيونه تلمع ببتسامة لاف ايده حواليه وحاضني حچيت

رميم: شنو رأيك بجهالنا

باتر: معجزة هذول شنو هاي النعومة حياتي

رميم: ليش هيج هادئين وساكتين

الممرضة: لان بعدهم كلش صغار مو بنشاطهم وهذا الشي طبيعي لان اجو بالسابع يحتاجلهم فد اسبوعين وحتى رضاعة طبيعية حاليًا ماكو

رميم: راح يبقون يمي

الممرضة: على ماتطلعون من المستشفى نرجعهم

عافتنا وطلعت اتقربت حكمة وگالت
حكمة: شني راح تسمونهم

رميم: خلي تجي خيال ونقرر

كام باتر اتقرب كلش يمهم يباوع عليهم وحكمة عدلتني وغطتني زين وخلت حجاب فوگ راسي لان الولد على جيه وفعلا شويه وندك الباب دخلوا ثلاثتهم خيال ويمان ودائب

اجتني خيال ملهوفة گعدت بصفي حضنت راسي تبوس بيه وتحچي بدموع

خيال: الحمد لله على سلامتچ امي ولچ وگعتي گلبي عليج  ليش هيج تسوين بيه

رميم: لا تبچين هاي انا يمچ كلشي ما بيه

خيال: الحمد لله والشكر ربي

بقت شويه حاضنتني بعدها الولد سلموا عليه وباركولي يمان مابقى شويه وطلع گال عندي شغل بقى بس دائب اتقرب يم الصغار يباوع عليهم ويحچي

دائب: اريد واحد يقنعني ابو البنات صار اب

باتر: هسه غير يسكت سيد دائب اية الله العظمى

دائب: هو انت مال اب انت بثنين صخول ما اسرحك

حكمة: كافي من هذا شقاكم الماصخ وخلونا نسميهم

باتر: بكيفچ يمه انتي سميهم

حكمة: انا اسمي واحد وانتم الكم الثاني

باوعت الخيال ورجعت گالت
حكمة: قبل جم يوم انا وخيال اختارينا اسم الأكبر واحد منهم اسمي الاكبر

رميم: ياعمري يجنن

اتقرب باتر لزم ايدي وگال
باتر: واحنا نسمي الكرار

دائب: الاكبر والكرار كلش حلو مبروك ابو الاكبر انهجم بيتك اسمك اكبر من راسك

صاحت بي
حكمة: انهجم بيت العدو شمالك ولك

باتر: عوفي يمه يغار لان انا تزوجت وهو راح يبقى عانس

گعدت حكمة وگالت بعدم تصديق
حكمة: ايّ الخبر اليوم مطمطم باچر يطش بالولاية

ابتسمت باوعت الباتر باس ايدي حيل وهمس
باتر: ام الاكبر

همست
رميم: ابو الكرار

بقى دائب يمنا كاعد حكمة توصلي بي على باجر من اطلع يحضر ثنين ذبايح حتى بعدين يوزعوهم على الناس شويه وراح حكمة ماقبلت ترجع وباتر هم بقوا يمي خيال: وحكمة وباتر

ثاني يوم سوولنا خروج وطلعنا بدون الاطفال گالوا بس تستقر حالتهم نرجع ناخذهم ماقبلت حكمة ارجع البيتي الا يمها اول ما وصلنا ذبحوا جوه رجلي ذبحتين وجايبين موسيقى وفرقة تعزف يمان ودائب سووها عرس

دخلنا للبيت اني مخليني بالكرسي المتحرك وحكمة وخيال يمشن كدامنا اول ما دخت حكمة للبيت ماحسينا غير صاحت صيحه خلتها كلها تسكت

حكمة: هاي شني البت منين

باوعت شفت بنت كلش حلوة كلشش جنها كردية وبعدها صغيرة واكفة بباب المطبخ تفرك بأديها بخوف واحسها ترجف

رجعت صاحت
حكمة: ماتحجون منين هاي

اتقرب يمان منها يحچي بهدوء
يمان: خلي افهمچ يمه

حكمة: فهمني يلا شني هاي

يمان: هاي البنيه أمانة يمي وجبتها الچ ادري بيچ ماتعوفين الامانة

حجت خيال محتجة على كلام يمان
خيال: يعني سويتها وجبت بنت الشاهين

باتر: عود صدك تحچون بنت الشاهين

يمان: ايّ بنته وين اوديها اذا اهلها ذبوها اخليها بالشارع

حكمة: شني ولك شني بت الشاهين وتريد تگعدها ببيتي

دائب: اهدي يمه البنت مالها احد زحمة علينا نعوفها بالشارع تقبلينها على شواربنا

حكمة: منين جبتوها الي من يا مصيبة

بقوا يفهمون بيها اباوع للبنت وجها مخطوف وبس دموعها تنزل

گومني باتر على كيف وگال
باتر: خلي ندخل نرتاح السالفة مو يمنا

حجاها ودخلني الغرفة حكمة مددني على الجرباية وهم اصواتهم بعدها طالعة عدلني على مكاني وطلع وراهم شويه ودخلت خيال ضايجة تعزل بالغرفة بعصبية وتحچي ماعرف شنو همست

رميم: خيال

تنهدت تحچي
خيال: آسفة امي گعدتچ

رميم: لا ما نايمة شصار بره بنت الشاهين شجابها علينا

خيال: الشاهين مخليها أمانة يم الولد ويمان احتار وين يوديها اضطر يجيبها يمنا ويم حكمة

رميم: راح تعيش هنا إذا ماعدها اهل

خيال: والله ماعرف حكمة سكتت بس ابد ما قابلة والبنت بعدها صغيرة خطية شذنبها جانت ترجف مثل السعفاية من الخوف

رميم: انتبهت عليها خطية

تنهدت وگالت
خيال: اصعد اجهزلها غرفتچ القديمة ترتاح بيها احسن ما تبقى يم حكومة بس تخزر بيها

ضحكت حكمة من ما تحب بشر تبقى بس تخوزر بي بوستني خيال عافتني وطلعت

هستوني غمضت عيوني حسيت على الباب انفتح شفته باتر دخل

باتر: ريماي نايم

رميم: لا تعال

اتقرب تمدد بصفي بحذر ومد ايده جوه راسي نومني عليها وگال

باتر: هسه ردت روحي

گرصته من خاصرته احجي
رميم: وين چانت روحك

باتر: يم حيتي هدمت ثلثين حيلي بهاليومين

همست
رميم: تحبها

اتقرب باسني من حلگي بوسه سطحية وگال
باتر: روح گلبي هي

ابتعد شويه باوع بعيوني يحچي
باتر: اكو وحدة قبل لا تدخل للعملية اعترفتلي بشي خطر كلش

غمضت عيوني احچي
رميم: لا تصدگ الانسان وكت الخوف كلشي يگول

باتر: يعني ما تحبيني

رميم: لا

باتر: بس انا عاشگچ

اتقربت بسته بخده دار وجهه الي بست شفته بهدوء وابتعدت ابتسم وانا ضميت راسي برگبته گال
باتر: اگول عود شوكت تطيب عمليتچ وتشيلين الغرز

رميم: مو هواي فد اسبوعين

باتر: اووفف شيصبرني انا بهاي الحالة

رميم: شتقصد

باتر: سوالف مال فساق

ضحكت بصعوبة
رميم: اصلا المفروض اربعين يوم

فز يحچي بصدمة
باتر: لا العباس عليچ شني اربعين يوم

رميم: شبيك فززتني

باتر: رميم ابقى هيج شهر وعشر ايام

رميم: هو بكيفي هي هاي

گام مني وصاح بكل صوته
باتر: يمااااا يمااا

شهگت لزمته احچي
رميم: يا باتر شجاي تسوي

باتر: بس اصبري شويه يمااا

دخلت حكمة تحچي بعصبية
حكمة: وغمااا شمالك نگرصت

باتر: عود صدگ مايصير اتقرب المرتي الا بعد اربعين يوم حتى من تطيب عمليتها

حكمة: غير نفسة وانت شمالك ملهوگ عليمن مستعجل

باتر: شني ترا مو عدل هذا

گومته من الچرباية تحچي
حكمة: دگوم گووومم الفرخة طلعت من حلگ الموت وهو يفكر بسوالف طايح حظها

باتر: وين اروح اريد انام هنا

حكمة: وين تنام هنا جنك عيل لنك دافرها ومطلع مصارينها ربحي بيمن انا بيك لو ببزرك الچلاب ولد الچلاب

ضحكت احچي
رميم: رحم الله والديچ حكومتي

حكمة: انتي نطمي وانت يلا بره بره

طلعته من الغرفة گوه طرد وهو يتعارك وياها يريد يبقى طلعته وسدت الباب تحچي

حكمة: زلم ماتصيرلكم چارة الفرخة طالعة من الموت وهو وين يفكر

حجيت بزعل
رميم: خاله خطية فتحيله الباب

اشرت بأيدها تحچي
حكمة: هاهوو هاهوو الفوصة استجني اليوم طلعتي من حلگ الموت

ضحكت وهو بقى يدگ بالباب ولا قبلت تفتحه اله الحد ما مل وراح

من بعدها مرت الايام و زينة بنت الشاهين بقت بييت حكمة رغم ما قابلة بس ساكتة وهي البنت هم صوتها ما ينسمع طول الوكت بالغرفة بس تنزل تاكل وترجع تصعد ...

❛❛❛❛

يمان"

صعدت سيارتي رايح اشوف طالب عم البنات صارله اسبوعين يزن على راسي لازم اشوفك وضروري نحچي مللني

بعدني بالطريق واتصل عليه فرات جاوبته
يمان: ها فرات

فرات: اگلك مافلستوا راح يصير شهور انتم لا سائلين على شغل ولا متابعين عمل

يمان: ويني ماعندي مجال احك راسي شبي الشغل المحلات والمعرض شغلهن ماشي بس الرصيف شبة موقف يوميا يمرر بضائع وكلها مواد غذائية تسويقية مابيها كل عيب

فرات: شكد قديم انت عمي الرصيف مالتكم مدري منو جاي يشتغل من وراكم جاي تتمرر منه بلاوي سودة

يمان: من شوكت هذا الحچي انا صار سنة موقف بي اي بضاعة مو قانونية مستحيل تمر من خلالة

فرات: لازم تجي حتى تشوف بعينك

يمان: خاب منين اتلگاها ما تگلي منين خلي اشوف هذا شيريد واجيك

سديته منه واتصلت بدائب
يمان: انتم وينكم عن الشغل بلا انا الف سالفة ببالي انتم شبيكم اذنكم سايلة

جاوبني بنعاس
دائب: ونهيمة شبيك تصيح

يمان: عوف كلش بيدك وتروح الفرات هسة

دائب: اهوو هم هذا الغثيث اكيد صاير شي

يمان: ماكو فيرك غثيث الغثيث التگول عليه لازم شغلك صار له شهور لا كل ولا مل

دائب: ديلا هن محلات يفتر عليهن ويرجع

يمان: دعوف حچيك الماصخ وروحله شوف شني السالفة وبعدها اشوفك ببيت امي

حجيت الكلام وسديته منه بلغ مااخذ جواب حتى يضطر يسوي وصلت الكوفيشوب الي موجود بي عم البنات اول ما شافني گام سلمت عليه وگعدت احچي

يمان: ايّ استاذ طالب اسمعك

طالب: شوف استاذ يمان انا متفهم موقفكم ومتفهم موقف البنات بس بويه مايصير يبقن مقاطعات اهلهن رغم كلشي بغض النظر عن الظروف المصارت بالماضي بس نبقى اهله قبلتوا أن ما قبلتوا والله شاهد على كلامي امي وابوي راح يموتون على شفوتهن بالنهاية يبقى الدم واحد والظفر ما يطلع من اللحم

يمان: بس مال تگدر تاخذهن مستحيل الاثنين متزوجات

طالب: على حد علمي انت وخيال مجرد خاطبين بعدكم ما متزوجين

يمان: المهم المطلوب هسه شنو

طالب: اول واخر طلب اطلبة منك تقنع البنات يزورن جدهم وبيبيتهم ويتعرفون على اهلهن معليكم بكلام عزيز هذاك اليوم انا اضمن لك هو بعد ما يتعرضلهن بشي وخاصة خيال لا تعتقد ابوي يخليها يمكم اكثر من هيچ وانتم مابينكم شي رسمي

باوعت له بطرف عيني
يمان: حچيك ما يوكل خبز شوفلك غير سالفة

طالب: استاذ يمان خليك متعاون وياي وخلينا نحچي الحقيقة خيال بعد جم يوم تطلع عروس من بيت اهلها وگدام العالم هي عدها اهل وعمامها كلهم واصلين شگد حلوة كدام العالم وانت تعرف كل بنت بهيج يوم تحتاج تطلع من بيت اهلها عروس حتى تحس بروحها عندها سند واهل وراها

يمان: من الاخير گلي سوي عرس وطلع خيال من بيتنا

طالب: عليك نور

يمان: وان ما سويت

طالب: اخذ يا مشاكل وحتى البنات ماراح يرتاحن ولا راح يأمنن يمشن وحدهن بعد انا جاي احچي هيج السلامتهن وسلامتك وانا اضمنلك بعد هاي الخطوة ماراح تشوفهم ابد

يمان: الموضوع يحتاج تفكير ولا تنسى مو بي انا صاحب القرار هي هم المفروض تقرر تريدكم او لا

طالب: اخذ وكتك وانا بأنتظار اتصالك واتمنى تاخذ كلامي على ان نصيحة مو تهديد

كلامه كلش دوخني ودخلني بمتاهات الها اول ما الها آخر سلمت عليه وگمت اتصلت بدائب گال ماكو داعي تجي مارحت ادري بي بعدين يجيبلي كل تقارير الشغل درت سيارتي ورجعت للبيت

❛❛❛❛

خيال"

مر اسبوعين على عملية رميم صارت زينة وشالت الخياطات بقوا بس الصغار باچر يخرجوهم يوميا نروحلهم وكل الامور تمام

طلعت من غرفة حكمة صار گبالي يمان هسه راجع من بره جان طالع ماعرف وين انتبهت الزينة بنت الشاهين جانت گاعدة على الدرج حكمة مسويتلها گعدت استجواب ماخلت شي ما سألتها عليه وهي عيونها تعلگت بيمان وبقت ماشية ويا من اول ما دخل الحدما گعد بالصالة بصف حكمة

بس انتبهت علي اباوع عليها بسرعة گامت وصعدت فوگ هي هيج طول هالاسبوعين خانسة وماطلعلها صوت تحجي على كد السؤال جواب

دخلت للمطبخ اكمل غسل مواعين واسمع يمان وحكمة يتبسبسون ماعرف بشنو بس مبين الموضوع مهم بعدها دخلوا للغرفة الي هو گاعد بيها وسدوا الباب عرفت دام صار بيها اجتماع يعني السالفة خطرة

هيج مر اليوم عادي ثاني يوم خرجوا الاكبر والكرار للبيت جان يوم فرحة وكلنا مجتمعين بالبيت حكمة مسويتلهم اسبوع لان اسبوعهم خلصوا بالمستشفى فـ سويه الهم متأخر

ملتمين كلنا بالصالة ومخلينهم بالنص دخل باتر باوع علينا وصاح

باتر: هسه انا وين اكعد صدگ چذب

حكمة: صدگ صاير البيت ما يكفينا يمان شوفلنا بيت غير هذا شويه اوسع ويكفينا كلنا

يمان جان ضايج متنرفز ماعرف شنو شاغل باله من البارحة لليوم باوع الحكمة وگال بضوجة
يمان: رجعت على يمان يعني هذول ثنين ثيران يمچ ماتگليلهم

دائب: ديلا هو بيت الله لا يعوزنا الك

حكمة: وبعدين انت الچبير اتحمل من باجر تدورلنا غير هذا البيت

مد ايده وكال
يمان: الله وايدچ جيبي فلوسچ منين اجيبلكم انا الشغل صار سنه واكف

باتر: اكلكم صدگ الشغل واگف اگول انا محدق

دائب: همزين من انتبهت

ضربه وكال
باتر: انت اسكت

دائب: محترمك الخاطر مرتك هسه اگوم امدك هنا وعلي

رميم: ترا ابونا مانقبل عليه

دائب: هو وفروخه على گولة امي ابطنهم بطن

رميم: بابانا قوي محد يگدرله

تخبل عليها سحبها يبوس بخدها حيل ويحچي
باتر: يروحلكم فدا ونذر هو ودائب

رجعوا يتعاركون الحدما صاحت بيهم حكمة يلا سكتوا

حكمة: اي نرجع السالفة البيت نحتاج بيت بي فد سبع غرف

خيال: شدعوة حكوم

حكمة: انا حسبتها ببالي يمان دور بيت حسب هذا الاساس سبع غرف اكثر مو اقل

گام وكال
يمان: انا مالي شغل خلي ولدج يدورون

اتقرب بوس الجهال وعافنا وطلع صاحت وراه
حكمة: مو اتنسى تأثث

صاح
يمان: فكوا مني ياخة روحي صايرة بخشمي

ضحك باتر يحچي
باتر: وسيراميك مكة يمان بعدله نفخة ويطك بوجوهنا الا يصيح بينا الوير

دائب: الا يخلي بس طشارنا وراه

بقينا گاعدين نسولف بعدها تغدينا سوه وبعد الغدا الرهبان مدري شعدهم اجتماع مغلق بالاستقبال وفوك الساعتين حكمة تلوب تريد تسمع شي ماكو

تاليتها طلعوا كلهم وجوهم مگلبه ماتتفسر ومنو نسأله شكو يگولون كلشي ماكو

رجعت اعزل بالمطبخ وارتبه بعد ما خلصت المواعين انتبهت على صوت الباب يندگ وصلني عفت من ايدي ورحت فتحته استغربت محد موجود ردت ارجع ادخل انتبهت بالارض ورقة بيضة مثبت بطابوگة صغيرة بسرعة اخذتها ودخلت للبيت فتحتها اقرأ بقيت صافنة وثاغرة حلگي من محتوى الرسالة ماحركت ساكن من الصدمة معقولة اكو هيج ناس تسوي ...

      يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

شنو توقعاتكم للمستقبل

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

TikTok: zeinab_.ali1
Insta: zainab__.ali1

متابعة ممتعة🦋