رواية تاروت الفصل السابع وثلاثون 37 - بقلم زيـنـب علـي 🦢

#تاروت

البارت «38»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

يمدلولة
الگمر شامة على خد الليل
ماطحنا بعشگ
لكن خذانا السيل .

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

گاعدين بالصالة نباوع على اهل الغفلة الي ماعرف منين طلعوا جانوا ثنين قطع الصمت واحد منهم وگال

طالب: ايّ يابه وانا خبرتكم چنت عايش برا مادري باخوي  اصلا هيچ صاير بيهم اجيت هنا زياره وردت اجي اشوف سليمان ونصدمت صدمة عمري من كلولي نقتل هو وعائلته وبناته مايعرفون عنهم شي بقيت ابحث ورحت وسألت ودلوني على هل رجال

حچاها وهو يأشر على يمان

يمان: وهسه المطلوب من عدنا شنو

تجاهل كلام يمان وباوعلي وگال
طالب: انا جاي هنا استسمح منكم وانتن بناتنا والظفر ما يطلع من اللحم شني ماتسوون حقجن بويه بس يشهد عليه الله لا اعرف ولا احد كلي وكل ما سأل يكولون لاهي بحياته ومستقر

خيال: وكل هاي السنين ماسألت هسه يلا نزلت عليكم الرحمة والعطف وصرتوا تدورون علينا

طالب: لا امي ولا ابوي يعرفون وانا من دريت بالسالفة خبرتهم وشرطوا علينا مانرجع الا وانتن وياينا لا تنسين اخر ما تبقى من ريحة سليمان بس انتِ واخيتچ

خيال: يعني هسه المطلوب

طالب: المطلوب احنا نتشكر من استاذ يمان والحجيه ام يمان على هذا موقفهم ونعم الجار انتم وفضلكم دين بركبتنا الاخر يوم واطلب من بنياتي يجن ويانا ونتفاهم وياهم ومايصير خاطرهم الا طيب

هزيت رأسي ضحكت بستهزاء
خيال: مستحيل

طالب: انا ماجاي افرض عليكم انا اطلب منكم على الاقل بس تعرفوا على بيت جدكم

الكل ساكت وداخل بحالة صدمة ردت احچي جان ينط الي اسمه عبد العزيز وگال بتهكم وتعالي

عبد العزيز: شنو ما يرحن ويانا بكيفهن باقيات گاعدات يم ناس غرب تريد العالم تاكل وجهنا غصبًا عليهن يرجعن ويانا نبقى اهلهن واولياء امورهن

طالب: مو هيج التفاهم عبد العزيز

عبد العزيز: لا هيچ ونص والماتمشي بشورنا طلقة براسها ونخلص منها ماعدنا بنات يمشن بشورهن

راد يحچي يمان اشرتله بمعنى طول بالك ولاترد ضحك مستهزأ وهز ايده ما عاجبه ، رجعت نفسي على القنفة مسترخية وحجيت ببرود

خيال: شوف اذا تحسب هسه هذا حچيك كله يأثر بيه او يعني راح اخاف منك واگول او عمي هددني انت غلطان عصابات ما گدرت تهز مني شعراية و من اعدك عمي ومحسوب عليه هذيج ساعه عود اهتم الحچيك هسه صاير رجال وهزتك الغيرة علينا وتصيح ولي امري وينك بالمحكمة شو انا وبنية عمرها١٦سنه وحدنا ؟
وينك من تمرضنا شو انا ورميم وحدنا بالمستشفى ما شفنا واحد بيكم وينك من رميم يسولها ستدعاء ولي امر محد راح الها غيري وينكم بتخرجي وكفت وحدي وينكم من ماعندي فلوس اشتري النفسي هدوم البسهن
هسه تريد تصير ابو الحنيه براسي هذا حچيك روح بيعه على الزواج مو على خيال بت سليمان وهيلين الي تركتوا وتبرتوا منه لان تزوجها وهي فقط من غير جنسية

عبد العزيز: شگد صلفة انتِ وما محترمة ولچ محد مربيچ غصبًا ما عليچ ترجعين ويانا وانا اعلمچ الاحترام

گام يمان صاح بي
يمان: احترم نفسك واعرف الكلام الجاي تحچي وانت گاعد ببيتي وصار ساعة ساكتلك

صاح بغضب
عبد العزيز: انت لا تدخل بينا بين بنات اخونا وغصبًا ما عليهن بالذوق بالعافية يرجعن ويانا غصب

رميم: اهووو بالله ماتكعد انت وغصبًا عليچ خبصتنا والله قديم وسوالفك كلش قديمة تغصب منو انا لو خيال ؟

عبد العزيز: اثنينچن واريد اشوف واحد يعرض بدربي والمره الخذتچن تبقى غريبة بجميع الاحوال

حسيت حكمة نقهرت من گالت
حكمة: هسه طلعت غريبة رحم الله والديكم

لزمت ايدها ورميم حچت بصتصغار تأشر عليه
رميم: تغصبني اروح وياك ولك انت دجاجه ما أمن بيدك اخليها أأمن بيدك على نفسي واختي الي مابي خير الاخو اكيد مابي خير الضنا قاعدة ثابتة هاي

شنط عيونه يباوع عليها بخزرة
رميم: عزيزي عمي عم الغفلة انت طول خمس سنين ماتعرف عن اخوك شي وهسه جاي تنطيني حكم ومواعظ بالاخلق والتربية وتگول مانحچي ويا ومانعرف اخباره هذا مو عذر ولا فخر ترى عار عليكم هذا الشي اكو واحد مايعرف شي عن اخو من التسعينات لليوم وهسه جاي بكل سهولة تهدد وتريدنا نأمن بيك ونروح وياك

طالب: على كيفچ مو هيچ الكلام بنيتي خلونا نحلها بالتي هي احسن وتقدرون خوفنا وغيرتنا عليكم

الكل سكت وهي دارت انظارها اله تحچي
رميم: شوف حنيتكم المصطنعة وغيرتكم المعدومة وتقديرها مموجود احنا شخصيًا ما مقدرينها ولا نريدها انا متزوجة وحامل يعني سالفة اجي وياك گطنه وطلعها من ذانك وبلها واشرب مايها واختي خيال هم مخطوبه وزوجها متحدد بعد جم يوم يعني احنا ما محتاجينكم عدنا زلم ورانا لا تفكرون تجون تبيعون مراجلكم عليه واذبح واصلخ صارت قديمة هالحركات كلش

ابتسم عبد العزيز بخبث وگال
عبد العزيز: وانتِ شلونچ عاد تزوجتي قاتل اهلچ صايرة حنينة وكلبچ عليهم وبكل عار تكولين حامل من قاتل اهلچ

انصدمت اذا يعرف بسالفة باتر إذًا هو على علم بينا من زمان انتبهت عليها گامت وحچت اخر كلام چنا نتوقع رميم تحچي

رميم: تخسه تاج رأسك وتاج راسكم كلكم ماتمس رجلي بحجاية هذا الي تكول عليه قاتل اهلي تبرأ وطلع مو القاتل انت لو بيك خير جان عرفت قضية اخوك نفتحت وطلع قاتلها ورجلي الي جاي تحاول تمسه بسمك رجال يسواكم كلكم على الاقل ما طلع ناقص غيرة يترك عرضه بالشارع ولا يعوف اخو بشدة ولك هي قطرة وبالكصة طاحت منكم من زمان بعد شترجه منكم اكثر

احس باتر يباوع عليها بعد له شويه عيونه يتحولن قلوب حب وحكمة تأشرلها بمعنى ( هاهوو ) يمان مبتسم ردت اضحك واحنا بنص الموقف اخر شي گام باتر لزم ايدها وگال بهدوء

باتر: ارتاحي هواي حچيتي بالأساس كلامهم ماراح يقدم ولا يأخر

رجع التفت عليهم وگال
باتر: صار ساعة اسمعكم وساكت ردت تكملون كل العدكم انتم تدرون جيتكم عار عليكم وعيب تحجون وتهددون وتحطون عينكم بعين البنات لو لا

اتقرب يم عبد العزيز يباوع له بنظرات شر رجع ردف مكمل كلامه
باتر: وبعدين اريد افهم يا بنات تاخذهن ذول وين جنت عنهن كل هاي السنين والي جاي تكول عنها غريبة هاي امهن وغصبًا عليكم والگلت عنه غريب هذا رجلها وانا اخوها ورميم مرتي غصبًا عليك وبشرع بالقانون وافصم ظهرك اذا تنفست مفهوومم

يمان: اعتقد أن احنا سمعانكم للأخير وهذا جان احترام المرتي ومرت اخوي مو احترام الكم وشفتوا الرد سمعتوا بأذنكم واعتقد الي سمعتوا كلش كافي وينتهي الحجي لهنا وهسه من غير مطرود الباب ينتظركم

اتقرب طالب لزم يمان من كتفه يحچي ويا بهدوء
طالب: استاذ يمان الله يخليك احنا اجينا نحل ازمة صارلها سنين مانعقدها بالزايد

يمان: ماسمعت تهديد وكلام اخوك اذبح واكتل وين عايششن يهدد نسوانا ببيوتنا تقبلها على روحك

طالب: يابه حقكم عليه وعبد العزيز من حرورة دمه هيچ گال معليكم بي

هو گال هيچ لو عبد العزيز شاط صار الشرار يتطاير من عيونه صاح بي بعصبية
عبد العزيز: هذا الكلام توجه الروحك مو الي لو مو مزوجات ومخلفات غصبًا عليهن يرجعن ويانا واحنا نقرر بعدين نخليهن يم رجولتهن لو لا مهما يكن هن تزوجن واحنا ماندري شمدرينا ازواجهم صالحين طالحين يناسبونا لا بس شترجه من بنات شابات طلعن وراحن يم مره غريبة عدها بس ولد مايعرفنها غير والله شني چانت جيىانهم

خرجت حكمة من صمتها وصاحت بي سكتتنا كلنا

حكمة: اسمع ولك صار ساعة تبغگ علينا وكلشي مافهمنا من الخريط مالك ياهي هاي الغريبة انا تگول البنيات روحي غريبة عليهن ولك مو ماريد احچي ليش تحچيني گوة الغريبة الي تحچي عليها لميت لحمكم وحافظت عليه من الناس الماتخاف من الله عاديت ولدي الربيتهم وضيعت سنين عمري عليهم الخاطرهن انا ما احچيلك هيچ حتى اعاير بنياتي بالي سويته والله ورسوله شاهدين عليه وعلى نيتي بس ردت من خلال كلامي اوصلك شگد انت عديم مروة وماعندك غيرة ولا ناموس من تعرف بنيات اخيك محد الهن وعايفهن يم مرة غريبة على گولتك وعدها ولد

اتقربت منه تأشر بيدها وتحچي
حكمة: ولكم شگلتوا الروحكم من انت تعرف بنيات اخوك وحدهن وعايفهن ماگلت يمكن يوگعن بيد ناس ماتخاف من الله ماكلت يمكن ياخذونهن يشغلونهن بمكان مو زين يبيعونهن ياهو يگول انا مره زينة بلا اخذتهن وقشمرتهن وبعدين بعدهن اتاجر بيهن اذا ما مأمن على بنات اخوك يمي كل هاي المدة وهسه جايني تطالب بيهن وتهدد شلون خليتوهن عدي لو هي بس وكت المصالح تذكرهن

عبد العزيز: يامصالح الجاي تحچين عليها شني سليمان عنده ورث

حكمة: خايب تعلمني بنمايمك الدنية عرفت راح تخسر كلشي ابوك يطردك ويحرمك يمكن من الورث لو مارديت اله ووياك بنيات المرحوم هالجيتني تهورف ذبحت روحك عليهن وتصيح شرفنا يا شرفنا ولا انت ما كاتلك الشرف كاتلتك الفلوس

صاح بيها
عبد العزيز: تخسين

حكمة: انت تخسي وتعگب امثالك ما ترفع صوتها عليه فهمت يو لا

بس حچت هيچ ماحسيت غير باتر طفر عليه جره من هدومه يصيح

باتر: هاي عليمن ولك تعلي صوتك على امي احسب روحك لا عشت ولا صرت ولا طلع صوتك جبان

لزمه يمان وطالب هم صار بالنص صارتلهم هوسه صرنا نعيط راد يموته من الضرب وحكمة فرفحت گوه يمان بعده يصيح عليه

يمان: بسسس شبيك تخبلت مهما يكن گاعد ببيتنا

باتر: گاعد ببيتنا خلي يعرف قدرة زين يحفظ احترامه مو كاعد ببيتنا ويهوبز

اتقربت منه حكمة لزمته تتوسل بي
حكمة: بداعت غلاتي عندك عوفه خلي يولي مثل الچلب ينبح ويسكت

ابتعد منه يأشر عليه ويحچي
باتر: هاي الخاطر امي راح اعوفك بس النا حساب ماخلص

عبد العزيز: ولا حسابي خلص وياك

راد يرجع عليه لزمه يمان وعبد العزيز خزر باتر وطلع من البيت انتبهت الطالب صاح بقلة صبر

طالب: مو هيچ يا جماعة گلنا نتفاهم ونحلها بالهدوء مو هيچ

يمان: اخوك ماخلا كل طريقية للتفاهم

اتقرب عليه طلع رقم من جيبه ماخذه من ايده يمان خلا على التخم وگال

طالب: هسه صارت مشاحنات ومشاكل مانگدر نتفاهم هذا رقمي وانا اخذت رقمك من المحلات مالتكم من رحت اسأل عليكم ان شاء اللّٰه نحچي ونوصل الصورة حل

رجع باوع علينا انا لازمة رميم وواگفة على صفحة گال
طالب: انتن بابا انا مقدر ظروفچن ووضعچن بس اتمنى تفكرن بالموضوع اجدادكم باقين بحسرة شوفتكم

خيال: الموضوع منتهى بالنسبة النا ماعدنا أهل وسمعتوا جوابنا

طالب: ميخالف من تهدأ النفوس النا كلام ثاني ان شاء الله

انتبهت الهمسة رميم عوجت حلگها تحچي
رميم: لا شافكم الله

عافنا وطلع والولد ورا طلعوا غمته حكمة وگالت

حكمة: روحة مردي الهوا شرجي

دخلوا الولد رجعنا گعدنا ساكتين وضايجيين من الصار جان باتر ندس رميم وگللها

باتر: كبدي شني هاي ماعرفتك وانت تدافعلي

ابتعدت منه تحچي
رميم: يبووو وخر لا تصدگ روحك وتعيش الدور اذا دافعت عليك لان بجميع الاحوال انت محسوب عليه ابو جهالي تريد الناس تاكل وجهي

باتر: الحية الا تذب سمها ماتعرف تحچيلها حچاية بيها خير

حسيت بيها فزت مثل الكرصها من ورا گامت من يمه گعدت بصفي تحچي
رميم: اوي وخر أنت متنعطا عين فاسق

بقوا يتداهرون وحكمة تضحك عليهم رفعت انظاري على يمان شفته صافن يفكر يهز برأسه عرفت صارت فد فكرة بباله انتبه علينا وگال

يمان: يمه منين طلعتي بسالفة محددين موعد العرس چان گلتيلهم متزوجين وهاي هي هسه شلون اذا صارت عشاير باچر بس عكبة يطالبونا بعرس

حكمة: ايّ هلا بيهم نسوي عرس

فزيت گمت وصرت احچي
خيال: لا لا مستحيل يصير هذا الشي اي عرس وانا اريد اتطلك بشكل رسمي ونهائي

باتر: اوو شگد قديمة علومچ

حكمة: صارلنا ست سنين نسمع هاي الجملة بس ماتطبقت لليوم

خيال: هو انا شايفة دربي ياحكوم مجاي تشوفين نطلع من مشكلة ندخل بالثانية

رجع نفسه يمان على التخم يمسح على شواربة ويحچي ببتسامة خبيثة
يمان: يعني تردين تطلگين هاا

خيال: وباقرب فرصة

يمان: خوش نشوف منو يربح انا لو انتِ

سكتت من عنده وهو شمرلي بوسة بالهوا وطلع من البيت يضحك وهم يصنفون علينا ويضحكون عفتهم وصعدت احضر جنطة رميم خليتلها كل الاشياء التحتاجها مؤقتًا نزلت ركنتها على صفحة

وباتر گام وگال
باتر: انتم ابقوا بحرب البسوس الله لا يدخلنا بيها وانا اخذ مرتي واطير تأخرنا على البيت

مد ايده الرميم يحچي
باتر: زوجتي العزيزة هيا بنا نحلق

لمزت ايده وگامت لزمت بطنها تحچي
رميم: اخخ بطني راح اجيب

حكمة: يا خيبة شمالچ صدگ تحچين ايّ طبعًا تجيبين من العصبية

باتر: صدگتي يمه هي هاي رميم كل ما زانت الجلسة وصاحت راح اجيب وبعدين تطلع لو تريد تنام لو جوعانة

حكمة: وصمه شوف مرتك شبيها

باتر: بالبيت اشوفها يمه قابل هنا

ضحكت وهي ضربته على كيف تحچي
رميم: شبيه جوعانة اريد منسف

باتر: دهاكم يلا وين اكو انثى رقيقة تاكل منسف

رميم: لا تخليني اطلع جبار الي بداخلي هسه وتعرف جبار شيسوي بالعيون

لزم عينه بخوف فقدت عليهم من الضحك
حكمة: شلايتي غير حبلة لا تحرمها من شي

باتر: اسكتي يمه والله لو تسمعين بسالفة تمن العدس لو الكيك الا تاخذيني منها بعد ما تنطيني

عافته ومشت گدامه تحچي
رميم: اوي عيني هو تمن عدس قابل شسويت قوزي

باوع الحكمة وگال
باتر: يمه عذرينا مرتي فوصة

حكمة: اللّٰه يعينك يمه چا شگول تحمل چا بس تعرف تحبلها بفرخين

بقوا يشاقون ويضحكون على طالعوا وحكمة ماخلت وصية ما گالتها الباتر حتى يدير باله على رميم طلعوا وانا گلبي مرتاح لان اشوف حكمة هيچ حريصة على اختي طول ما هي تمشي ويا توصي بي طلعوا ورجعنا دخلنا للبيت

درت انظاري بالمكان اريد اعرف يمان وين راح اختفى فجأة شفته واگف بآخر الحديقة شفت حكمة دخلت الغرفتها وسدت الباب لو تنام لو تقرأ قرآن بس حسيتها ضاجت من كلامهم دگيت الباب ودخلت شفتها گاعدة على سجادتها اتقربت يمها

نزعت نظارتها وگالت
حكمة: هاا شمالها خوختي

گعدت يمها حضنتها احچي
خيال: ادري بيج ما تبينين حزنچ وضوجتچ
بس شهد الله عليه انتي وهيلين واحد ولو هيلين عايشة ماتسوي الي سويتي التوكف ضد ولدها حتى تحمينا ما معتبرتها مره غريبة وحتوتنا امي انتِ طول ما انا عايشه ابقى يمچ وتحت ظلچ وعمري ماعوفچ لا انا ولا رميم انتي امنا غصبا عليهم كلهم

حضنتني وباستني تحچي
حكمة: بنيات روحي مليتن حياتي شعندي غيرچن بس كون ماتعوفني

خيال: شبينا تخبلنا نعوفچ علمود أهل بعمرهم ما چانوا موجودين بحياتنا لو بالچذب سألوا علينا بيوم من الأيام مستحيل نعوفچ حكوم وراح يجي يوم وتشوفين كلنا ملتمين تحت جناحچ

حكمة: بعد روحي فدوه لهذا الكلام الحلو الله يرضى عليچ ويفتحها بوجهچ يبعد اهلي

بقيت شويه حاضنتها نحچي الحد ما حسيتها شويه الضوجة راحت يلا عفتها وطلعت شفت يمان بعده على نفس گعدته ومكانه خليت حجاب على راسي وطلعت رحت له شفته صافن يدخن كتفت اديناتي وحچيت

خيال: شنو ببالك ناوي تسوي

رفع رأسه عليه عقد حواجبه يحچي
يمان: شني وياي تحچين !

خيال: اكو غيرك احد هنا

يمان: ضايجة واجيتي تطلعينها بيه شبيچ بابا الشيطان راكب راسچ اليوم

خيال: اريد اتطلك يعني مو گوه هي واذا ما طلگتني اخلعك خلع

گام وگف شمر الجگارة طفاها برجله وگال ببرود
يمان: تدللين بس خلي نخلص من سالفة عمامچ وصار يجرالچ

خيال: يعني موافق ننفصل وتطلگني بلا مشاكل

يمان: مو هذا طلبچ هاي هي يجرالچ

خيال: هاي هي

گلبي نبض حيل من حچيتها وحسيت شي وگف بحنجرتي مدري شبيه دگ تليفونه طلعة من جيبة مافهمت على شنو يحچي بس الفهمته يحچي ويا دائب ردت اروح استوقفتني كلمته من گال

يمان: وبنت الشاهين جبتها لو بعد ... خوش من توصل انطيني خبر

حچه ويا شويه وسده انتبه عليه بعدني واگفة

يمان: ها

خيال: منو بنت الشاهين شجابها علينا

يمان: سالفة طويلة

خيال: اريد اسمع

يمان: هو خلا بنته امانة يم دائب وهي بنت ماعندها احد والعالم اليمهم كاعدة يردون يسافرون وين نوديها ماعرف

رفعت حاجبي احچي
خيال: شكد عمرها ؟

يمان: تقريب 17 سنة وحتى دار ايتام مايستقبلونها

خيال: وين راح تودونها

ورث جگارة باوعلي بطرف عينه مرسومة على وجهة ابتسامة مستفزة

يمان: اتزوجها

گلب عيوني
خيال: هه بالعافية ابو النسوان

يمان: كلمة ثانية وتصيرين وصلتين اذا عاجبچ ابقي واگفة گدامي

خيال: مستفز

يمان: روحي منا

خيال: منو ميت عليك والله يالله

اباوع عليه عض على شفته حيل ويسحب نفس من الجگارة وينفخه قوي عفته ودخلت للبيت ادردم واحچي عليه ...

صعدت الغرفتي افكر بموضوع بنت الشاهين منين طلعت شفت تليفوني شاشته ومضت اجاني إشعار شفته من عنده على الواتساب كاتب

يمان: " حتى ليوجعن كلبي أحبهن لو يجن منچ "

كتبت له
خيال: " خلي بنت الشاهين تفيدك ابو النسوان "

رجع دز
يمان: " في وسط الأغنيات
بين كلمات الشعر
في المقاهي و الشوارع
في نظرات الأعين
في جميع النصوص التي كتبت
والأهم في أعماق رُوحي
( أحسچ ظل يرافگني ) "

غصب عني ابتسمت شمرت تليفوني وطلعت اوراق قضيتي ورجعت اشتغل عليها ...

❛❛❛❛

رميم"

اول ما طلعنا من بيت حكمة صعدت بالسيارة وهو افتر صعد يمي لزمت بطني احچي

رميم: اريد منسف

فرك اديناته يحچي بحماس
باتر: دعوفي المنسف شوفيييي شجبتللجج

رميم: شنو ؟!

مد ايده ورا سحب كيكة خلاها بحضني وگال
باتر: احلى كيكة من حفلة خطوبة مرت اخوي

رميم: شنو حفلة خطوبة مرت اخوك

باتر: سالفة طويلة روح گلبي التهي بالكيكة لا تشلغلين بالچ

باوعت للكيكة مكتوب عليها اسم وتر ومحمد مخربط بس كدرت اميزه والكيكه سايحة بالعلاگة من الحر كلشي مباقي بيها حتى متنأكل
رميم: منو هذول

جان يسوق انتبه عليه مد ايده خربط اسم محمد باصبعة يحچي

باتر: خلي يولي هذا المخنث

رميم: اريد منسف باتر

باتر: ياطلابة المنسف بويه اليوم عيد وين الگالچ منسف هسه

رميم: مشكلتك متقشمرني بكيكة خربانة

باتر: امري لله ماريدها تطلع بولدي ندور منسف

حچاها وانتبهت على تليفونه دگ باوع له وباوع لي تنهد وغلقة ماجاوب رجع دگ حسيت علامات الانزعاج بينت عليه حچيت

رميم: جاوب يمكن شي مهم

باتر: لا مو مهم

بقى تليفونه يلح بالاتصال واشعارات هواي وحده ورا الخ استغربت اخر شي سوى صامت وخلا يمه بس گلب الشاشة مايخليني اشوف

رميم: منو هذا الي لح الهالدرجة

باتر: شغل ليش خليتي بالچ بالتليفون

رميم: وليش حتى اخلي بالي ميهمني اصلا اعرف بس لان لح وبعدين مو بحالك انا وجهالي نريد اكل

سكت مجاوب بقى يدور مطعم حتى ننزل نأكل الحد ما لگه نزلنا اكلنا وهو ضاج كلش حتى ملامحة نگلبت وعينه بالتليفون يكتب ماهتميت خلصنا ورجعنا للبيت

وهيج مر كم يوم هو مضطرب وباله مشغول ماعرف ليش.

❛❛❛❛

وتر"

مرت ايام من طلعت من بيت حكيم دائب اول سبوع مگابلني وگاعد يهتم بيه مثل الطفلة الحد ما صرت زينة وگدرت شويه اتعدى الصدمة النفسية الي مريت بيها من بعدها صرت ما اشوفه كلش انشغل يطلع من الصبح لليل يرجع يتطمن عليه وينام وثاني يوم يطلع وهكذا بحيث حتى الاكل مااشوفه الا صدفة وكله يگول مشغول

وبيوم گعدت الصبح كالعادة ملل گمت رحت للحمام غسلت وتوضيت بعدها صليت وبقيت شويه متمدده بمكاني اتصفح بالتليفون الي جابه الي صارت تقريب الساعة 8 طلعت من الغرفة صارت غرفته گبالي تنهدت احچي

وتر: اكيد مموجود

اتقربت فتحت الباب على كيفي شفته نايم استغربت شعجب اليوم ما طالع من الصبح

من الملل بدلت ملابسي وطلعت سويت حملة تنظيف للبيت ولو هو مو كلش وصخ اصلا بس من الملل اندمجت انظف غسلت الصالة والمطبخ مسحت الدرج الاثاث وغرفتي وكلشي كملت وعطرت البيت كله بعدها دخلت سبحت وطلعت مشطت اخذت التليفون ورحت للمطبخ شغلت اغنية واندمجت اسوي ريوگ الي واله

انتبهت على طكطكه وحركة صارت بالبيت عرفت بي گعد نقلت الريوك على ميز الطعام رفعت راسي شفته دخل للمطبخ يباوع حواليه مستغرب

تلمس الكاونتر باصبعة مثل الي يشوف اكو غبار لو لا رفع حواجبه وسوه حركة بحلگه تدل على التعجب

حچيت ببتسامة
وتر: صباح الخير

دائب: صباح النور منظفة البيت ؟

وتر: ايّ من الملل

هز رأسه ساكت حچيت
وتر: اكيد جوعان سويت ريوگ

احسه ينصدم ويرفع حاجبه ويا كل كلمة احچيها اتقدم فتح درج الكاونتر طلع غلاية الگهوة وگال

دائب: اكلي انتِ الف عافية انا ماريد راح اسوي گهوة

حسيته يتجاهلني وماقبل ياكل وياي بلعت ريگ بقهر وگلت
وتر: بس انا حسبت حسابك بالريوگ يلا حباب تعال ناكل

دائب: ماتريگ الصبح راح اشرب گهوة

اتقربت منه ردت اخذ الغلاية من ايده احچي
وتر: انا اسويها الك

جرها حيل
دائب: ماكو داعي عندي ادين مامكسر اگعدي اتريگي انتِ

حسيت وجهي گب وهفت من الفشلة كلش كسر بخاطري انطاني ظهره وگف على الطباخ يسوي گهوة وانا طفت تليفوني وصرت اشيل بمواعين الريوگ التفت عليه يحچي

دائب: اكلي ليش شلتيهن

وتر: ماريد شنو اسوي بهذا الاكل كله انا عمودك سويته من اجوع اسوي لفة واكل لا تخاف ماموت نفسي من الجوع بس لان ماقبلت تتريگ وياي

دائب: السانچ ادب سيز

ما جاوبته سكتت بس حركته كلش حزت بخاطري انا اصلا منتبة عليه كلش صاير يتجنبني اتجاهل وجودي تمامًا وگعد يشرب گهوة ويتصفح بتليفونه وانا اغسلت الموعين ماتحملت دموعي حسيتهن رادن ينزلن حچيت بقهر

وتر: يعني بعد ما ضمنت وجودي يمك شكو باقي حابسني تروح وترجع قافل عليه الباب شنو عصفورة وتخاف تطير

دائب: خير ست وتر وين تردين اوديچ يعني

وتر: مو تگول عندك اهل عرفني عليهم على الاقل

دائب: مو وكتها بابا گعدي وسكتي

نفخت بملل ماگدرت اسيطر على دموعي صارت تنزل من وحدها انتبه عليه گام اتقرب مني يحچي

دائب: عليمن هاي الدموع

وتر: شنو سجن الى متى ابقى هنا شوكت اعيش حياتي مثل البشر من حكيم الك وين اروح

دائب: بس يهدأ الوضع ارجعچ للمدرسة

وتر: منا الحد مترجعني للمدرسة اكون منتحرة من الوحدة

ماعرف ليش فقد أعصابه جرني من ايدي يصيح عليه

دائب: وين تردين اوديچ وييننن

دفعته وزدت بالبچي اصيح
وتر: اييي مليييتتتت هو هذا هم حظي انولد ماعندي عائلة ولقيطة

بس حچيت هيج حسيت ايده سدت حلگي مرده مرد فتحت عيوني مصدومة وهو يحچي بصياح

دائب: اششش اششش لا تجيبين هاي الكلمة على لسانچ اگصه الچ مرة ثانية

وخرت ايده
وتر: هاي الحقيقة يعني لو عندي اهل مابقى سجينة عندك ولا عبدة عند حكيم ومرته

لزمني من رأسي يحچي وياي
دائب: هاااي شبيها شبيچ اليوم متخبلة بابا

وتر: دووخرر مو مليت ولعبت نفسي

عفته و ركضت للحمام ابچي وهو يصيح وراي

دائب: خبال حتى خبال اي والله انا اعلمچ ادب سيز

دخلت وصحت عليه
وتر: انت ادب سز

حچيتها وقفلت الباب صار يدگ بالباب حيل وصيح عليه حتى اطلع ماطلعت الحد ما حسيته ماكو والبيت صار هدوء يلا طلعت من الحمام شفته ماكو طالع رجعت للغرفة بقيت طول اليوم ضايجة وابچي من الموقف الصار الصبح ومن تجاهله الي بحيث وصل مرحلة بالتجاهل حتى مايباوع بوجهي انتبهت على نفسي انا ليش الهاي الدرجة مهتمة اله اصلا

صارت عصرية كلش وانا ماطلعت ولا اكلت شي وهو مارجع للبيت نعست هستوني اريد اغفه سمعت تليفوني يدگ شفته هو بسرعة جاوبت

وتر: ها

دائب: ووجعا

وتر: شبيك

دائب: گومي بدلي راح ارجع للبيت الگاج جاهزة حتى بسرعة نطلع

وتر: شكو وين راح تاخذني

دائب: تگومين لو اغير رأيي وابطل

وتر: تهددني ماريد اطلع اذا هيچ

تنهد صوت نفاسه ضرب سماعة التليفون
دائب: يلا بابا گومي لا تعاندين راح نسير يم فد ناس مو ضايجة

وتر: ايّ

دائب: ديلا گومي بدلي انا بالطريق

غلقته من عندة وگمت بسرعة غسلت وجهي وطلعت ملابس طلعة فستان صيفي ابيض وبي ورد وردي صغار كلش وحجاب بلون الوردات سادة من رجعت لگيتهن هو مشتريهن الي وحذا ابيض رتبت نفسي ورحت الغرفته خليت من عطره وطلعت تلاگه وياي هستوه داخل للبيت

دائب: جاهزة

وتر: ماعندي شي

دائب: بس اسبح وابدل على السريع

عافني وراح عود گال على السريع بقى فوگ الساعتين يلا جهز ردت اطلع من الباب بس فتت من عنده گال

دائب: اوكفي

باوعت له متفاجأة
وتر: شكو

اتقرب مني ياخذ نفس يشمشم
دائب: مخليه من عطري

وتر: ايّ وين المشكلة

دائب: وليش بلا

رفعت كتفي وحچيت ببراءة
وتر: احبه

مشيت گدامه رجعت باوعتله شفته صفن عليه يبلع ريگه بصعوبة همس

دائب: ليش؟

وتر: عطرك مميز احبه كلش

حمحم مشى وهو يحچي
دائب: الحمد لله راح نطلع لا تعيدين هذا الكلام مرة ثانية

استغربت حالته رغم متجاهلني بس حسيت مدري شبي طلعنا وكل مااحاول اسأله وين رايحين يگول من نوصل تعرفين

تقرب ساعة ووصلنا بيت قبل لا ننزل گال
دائب: تذكرين باتر اخوي الطلعچ من نسوان بيت حكيم

اتذكرت سوالفة تلقائيًا ضحكت
وتر: تذكرته

دائب: اليوم جايين البيته تعرفي عليهم هو وزوجته حبابة راح تحبينها منتظرينا هسه تلگينهم

نزلنا بعدنا ما داگين الباب ثنيهم طلعولنا كأنهم جانوا يتسابقون على الباب باوعلهم دائب وگال

دائب: صدك جذب كل واحد شكبره راح تصيرون ام واب تتعاركون على الباب

رميم: انا استقبلكم اول

باتر: عمي وخري انا استقبل اخوي ومرته اول

رميم: اهوو باتر لا تقهرني

باتر: انا رجال البيت ولججج

دائب: سوادين اي والله

جانوا يتعاركون من كل عقلهم منو يتسقبلنا اول ودائب يضحك سلم عليهم بعدها انا سلمت باوعتلي البنت جانت كلش حلوه جمالها ملفت حامل لابسه صدرية حوامل لونها نيلي اتقربت مني وگالت بتعجب

رميم: اووييي فدوه لله شنو هاي فستقة ومكشرة

ابتسمتلها وهي اجت بوستني وحضنتني صفح لا بطنها كلش كبيرة مبينه حامل بأشهرها الأخيرة الي يشوفها يگول تعرفني من سنين لزمت ايدي وگالت الدائب

رميم: فدوه هاي بعد ماانطيها راح اخذها اربيها ويا جهالي

ابتسمت احچي
وتر: ياريت

رميم: فدوة هاي سنو هاي

دائب: ربوا روحكم اول مره وبعدين تبنوا بنتي وربوها

باتر: والكيتلي ماحجيت الا الصحيح

دائب: قابل اغشك

دخلنا جوه والبنت الي اسمها رميم بعدها لازمه ايدي تسولف وتضحك وياي وانا بس مبتسمة ماعرف شحچي گعدنا بالصالة بسولفون

رميم: جوعانين ثواني ويكون الاكل جاهز

دائب: ياريت عدنا الخانم اليوم مماكله شي يمكن

حمحمت احچي
وتر: لا اكلت

باوعلي بنظرة عدم تصديق قاطعنا باتر من گال

باتر: مو تدللون ترى مرتي كلش شاطرة بالاكل وانا اليوم حلفت يمين قسم الا هي تطبخ الكم

هزت ايدها تحچي
رميم: ماسولفتلكم رجلي كلش متعاون وياي بحيث من كد ما وردة مال الله ما خلاني اوكف وياي وياي يساعدني

دائب: ايّ الله يخلي الج

حجاها واخذ كلاص المي يشرب وانا نطيت احچي
وتر: يااا فدوه مبين متزوجين على حب

اباوع الدائب غص بالمي يگح وهم يضحكون ماعرف على شنو

باتر: والله يا زوجة اخي العزيزة ماسولفلچ شلون قصة حب جانت تسهرني للصبح تشكيلي شلون اظفرها نكسر وانا غصبًا عليه ابقى اسفت گهوة وچكاير واواسي حتى ماتصير بيها عقدة نفسية

وتر: اوويي الله يخليكم البعض

باتر: امين امين هاي بعدني ما سولفتلچ شلون اهلها ماقبلوا ينطونها الي قاتلت قتال حتى اخذها

هو يحچي ودائب ورميم ميتين ضحك رجع اشر عليها وگال

باتر: بس انا قفلت وكلتلهم لو هالمركب لو ماركب

دائب: هوووب عوف سوالفك گدام بنتي ترى بعدها طفلة

باتر: عمي يا طفلة غير تلاحگناها بالدقيقة 90 الا ربع

گامت رميم وگالت
رميم: اويي گومي وياي نجهز الاكل الزلم گعدتهم تگصر العمر

گمت وياها رحنا للمطبخ وصرت اجهز الاكل وياها البنت كلش لطيفة وهيج الحنان يفيض منها من تحچي وياي مبتسمة وابد ماسألتني ليش انتِ يم دائب ليش هو متزوجج نحچي بمواضيع عامة

بعدها شفت باتر دخل للمطبخ اتقرب من رميم يحچي

باتر: اساعدك بشي روح گلبي

رميم: لا هاي وتوره الحلوة جاي تساعدني

گرصها من خدها يتحرش بيها درت وجهي من عدهم حسيت مكاني غلط عفتهم وطلعت رجعت گعدت يم دائب انتبه عليه

دائب: هاا اجيتيني

وتر: بالمطبخ ثنينهم حسيت نفسي كائن متطفل

دائب: لا ترا ما بينهم شي ماتحبه

وتر: يعني شنو هي مو حامل

مسح على وجه يضحك
دائب: هم صدك حامل لا تشغلين بالچ

بعدها گعدنا ناكل وباتر ماخلا شي يعتب عليه على طفولة دائب ما طلعها وكل شويه يعيد سالفة امي بقت تجلف بي سبع ساعات يلا بينت الفانيلة مالته من الوصخ وهو يغلط ويحچي عليه ورميم فاقده من الضحك

ننقل بالمواعين وهو يساعدها لو لزم ايدها يمشيها انتبهت عليهم شگد يحبها عيونه ماتنشال منها يبقى ملاحقها بنظراته وهي هم عيونها بيهن حب غريب والكيميا الي بينهم تجنن

رجعنا گعدنا حمحم دائب وگال
دائب: الله يعجل فرج الچاي

باتر: هسه وين اكو جاي دلفري گوم انت سوي

گمت وحچيت
وتر: انا اسوي بس دلوني

باتر: والله عمي بنتك طلعت ام بيت

وتر: اعجبك بالچاي هسه تشوف شگد طيب

رميم: گعدي حياتي انا اسوي ماريد اتعبچ

وتر: قابل شنو ينرادله بس دليني مكان الچاي وين

دلتني ورحت للمطبخ سويتلهم چاي وگعدنا نشرب

باتر: احچيلكم اول يوم وين شفنا دائب

ضربة يحچي
دائب: نچب واسكت

رجعله الضربة يحچي
باتر: وعلي الا احچي

دائب: احچي وشوف شيصير بحالك

قطعت النزاع رميم وگالت
رميم: انا سامعة السالفة من حكمة احچيها وافض نزاعكم

وتر: احسن حل

رميم: اسمعي يا عيني هاي حكوم تگول مره جنا گاعدين بمنتزة انا الولد وجان اشوفلچ واحد لازم طفل يضرب بي لان وگع بنته الصغيرة من المرجوحة وهي دافعتله واخذته

دائب: ها اها رحم الله والديچ حچيتيها بدون زيادة او نقصان

ابتسمت عرفت هاي الطفلة انا وهو عينه صارت عليه بسرعة غير الموضوع وگال

دائب: شنو سميتوا جهالكم

رميم: بعدنا مامقررين بس اكيد على ذوقي

فز باتر يحچي
باتر: شني على ذوقچ هو انتِ منيلچ ذوق

جاوبته ببرود
رميم: هو لو عندي ذوق ما چان اختاريتك ابو جهالي

اول مره اشوف دائب هيچ يضحك الدرجة شرگ بالچاي من قوة الضحك وباتر يرزل بي ورميم هم تضحك وهيج مر الوقت بين شقاهم وسوالفهم الحلوة

طلعنا منهم گوه وكل شويه تحلف دائب حتى يرجع يجيبني عليها طلعنا وعفناهم رجعنا للبيت دائب على نفس بروده وياي بس وصلنا البيت عافني ودخل ينام احسه حتى ما فرحان مثل قبل بتواجدي ويا

تمددت حتى انام وبالي كله يمه ماعرف ليش يعاملني بكل هالبرود وكل شويه جي ببالي كلمتة لو تصيرين الهوا ماشمچ لو مو احبچ .

❛❛❛❛

رميم"

بعد ما طلعوا دائب ووتر رجعت گعدت اتفرج على التلفزيون حسيت بي گعد بصفي مد ايده يفرك رگبتي من ورى احس ثگل الحمل موتني ورجليناتي وارمات كلي وارمه همس

باتر: شوكت ترحين مراجعة

رميم: باچر ادخل بالسابع وتجي خيال تاخذني الموعد الدكتورة

باتر: ماكو داعي انا اخذچ وهي تروح ويانا اذا حابه

هزيت راسي بأي وغمضت عيوني من لمساته شويه وحسيت ايده صارت على رجلي حچيت

رميم: ايدك

باتر: شبيچ دلك جسمچ مو وارم

بعدتها وحچيت
رميم: خلصص

باتر: ديلا عيني لو ما صاير بس افوت منچ تسيحين

رميم: باتر توخر مني لا ابجي هسه على كيك واخليك تحير بروحك بنص الليل

باتر: دخيلچ اروح اسبح احسن

ابتسمت باسني وگام دخل للحمام يسبح وانا صرت الملم بالصالة على الخفيف گوه بيه ما بيه لگيت تليفونه على التخم شلته اريد اصعده وياي حسيت بي رج بيدي مسوي صامت

انصدمت من اجت عيني على الشاشة وقريت اسم طيف رفعت حاجبي احچي

رميم: هاا وكاتبها طيف هم اي خلي نجاوب ست طيف ليش لا

فتحت خط وبقيت ساكته ماسمع بس صوت بجيها ومناشغها تگول

طيف: اكيد جنت يمها لان متجاوبني لا تگعد يمها باتر جاي اموت حس بيه

رميم: وليش يمه حتى يحس بيچ رجلج وانا ماخذته

سكتت شويه وبعدها گالت
طيف: هاي انتِ رميم

رميم: ورمه الترم عيونچ ولچ انتِ ماتستحين تتصلين بنصاص اليالي وتتبچبچين الرجال متزوج وراح يصير عنده جهال

طيف: هووب هوب عيني على كيفچ ترى رجلچ هو لازگلي ويركض وراي بالحبيات وخلاني اتعلق بي واذا ممصدگة شوفي سجل مكالماته اذا موجود شوفي اليوم شكم مره متصل عليه

رميم: چذابة

طيف: دروحيله وهو يحچيلچ گليله من چنت عايفتك وطلعت من السجن وين خلصت كل هاي المدة وبدربچ گليله شلونه حضن طيف ينسي الهموم مو

من سمعتها هيج تحچي حسيت نار وشتعلت بگلبي گمت افور وعيوني صارن يحرگني حيل

طيف: زوجچ يا حلوة من عفتي رجعلي اصلا مو بس هالمرة هو كل ما تعوفينه يجيني

رميم: چا شگد رخيصة وتعترفين وقابلة تكونين سلعة الشخص معتبرچ بديل ومرهم جروح لا اكثر ياخذ منچ الي يريده وبعدها يشمرچ وترجعين تتوسلين يارخيصة يا ماعندچ كرامة

قبل لا تحچي سديت التليفون وصعدتله كلي ارجف مدري شبية فقدت اعصابي دخلت للغرفة لگيته بعده يسبح اتقدمت دگيت الباب حيل بكل قوتي اصيح

رميم: باااتر اطلعععع اطلع بسرعة

اجاني صوته يحچي
باتر: رميم شبيچ يوجعچ شي

رميم: يوجععنيي گلبييي اطلع باتر اطلع

احچي وضرب بالباب حيل ماگدرت اسيطر على نفسي فقدت اعيط وهو يگلي

باتر: ولچ بس البس اصبري

رميم: اطلع لا تلبس

فتح الباب وطلع لابس بس البجمامه ملامحة خايفه اتقدمت عليه اضرب بي واصيح

رميم: حقير الله لا ينطيك اعرفك تريد تنتقم منيييي بنفس طريقتي حقير خاين انا جان عندي عذر انت شنو عذرك هيج تسوي بيهه خاييننن

لزمني يحچي بخوف
باتر: رميم شبيچ بطنچ لا تتحركين هيچ بس اهدي

اضرب بي وهو يلزم ايدي
رميم: خايف عليه لو صدگ تخاف ماسويت هيج بيه الخاين انا شلون امنت بيك

لزم اديناتي ودارني حضني من ورى حتى ماتحرك يهمس بأذني محاول يهديني

باتر: اششش على كيفچ اهدي

رفعت راسي ابچي بحرگة وبصوت عالي واصيح
رميم: خاين شلون امنتتتت بيككك شلوونن ماخليت احتمال ببالي ان انت ممكن تنتقم مني بنفس الطريقة الي انتقمت منك بيها

باتر: شجاي تحچين رميم اي انتقام شبيچ

دفعته وتملصت منه بصعوبه صحت بوجهة
رميم: وطييفففف

عقد حواجبه مستغرب يحچي
باتر: طيف شبيها هاي شجابها علينا

غمضت عيوني سديت على ايدي حيل احچي
رميم: اتصلت على تليفونك وجاوبتها

فتح عيونه حيل وگال
باتر: وين تليفوني

اخذته من الجرباية شمرته عليه حيل اخذه فتحه ماعرف شسوه بي وطلع تسجيل المكالمة يسمع بي اباوع عليه وجهة انگلب وعيونه تحولن صارن يخوفن عض على شفته يحچي بعصبية

باتر: ايا بنت الكلب

شمر التليفون لزمت راسي ابچي واحچي
رميم: ممكن تفسرلي شنو معنى كلامها

باتر: چذابة وداعت امي تريد تخرب بينا

رميم: اذا ما شايفة شي منك مستحيل هيج تحچي من جنت انا ببيت حكمة انت جنت تروح يمها مو

باتر: ولچ بويه وين اروح يمها چذابه هاي هي لازگتلي لزگة وانا جنت اتصل بيها من جنت متخبل واريد بس انتقم منچ

رميم: ليش تتصل بيها ليشششش

باتر: حتى احاسبها لان ضمت عليه كل كلامي وياها استجواب لا اكثر هي مازوخية تحب واحد يهينها ولطشت بيه بويه ماريدچ مرتي حامل ماتقبل تبتعد شسويلها انا 

دفعته احچي
رميم: چذاب دقيقة وحده مابقى يمك

باتر: وروح امي من يوم التزوجتچ بي لليوم ما حاچي ويا وحده غيرچ

رميم: چذاب انت واحد چذااااببب

ردت اروح لزمني يريد يمنعني ويا فرة ايدي اجت بوجهه ضربة قوية غمض عيونه شد على شفايفه بغضب وعصر ايدي حيل عطت متألمة قربني اله يحچي

باتر: يعني عبالچ ما اگدر أأذيچ لا عبالچ سكتت مرة مرتين عشرة يعني ساكتلچ ضعف مو البتار الي يضعف گدام مره بس اگول خطية ماتتحملين نفخة مني اطيرچ انتِ والبطنچ ومحمد رميم هواي تجاوزتي حدودچ وياي وانا مستخطيچ وساكت

صرت اجر بأيدي منه واحچي
رميم: اريد اشوف منو يبقالك عوفني يا خاين

باتر: منو خاينچ بابا هاي وحده مسمومة مريضة تريد تحرگ گلبچ وحصلت الي تريده

لازم اديه ويحچي بعصبية وانا بس دموعي صارت تنزل واريده يعوف اديه

باتر: هسه اول تالي هيچ يصير بحالچ من وراي الوجه مطعون احمر وتبچين عليه

رميم: وخر باتر رجعني الاختي ماريد بعد واعيش وياك

باتر: انا اطلع انتِ لا تطلعين من البيت ماتردين وياي ميخالف لا تطلعين وانا اروح

عفته وگعدت على الچرباية خليت اديناتي على وجهي ابچي

قرفص گدامي يباوع الوجهي درت نفسي منه احچي
رميم: يلا قرر لو انا اطلع لو انت

باتر: انا اطلع خليچ هنا

بقيت ساكته وهو گام بدل ملابسة واخذ سويچ سيارته باوع عليه وگال محذر

باتر: ماتطلعين من البيت بلا ما تكتبين الي واذا ردتي ترحين البيت حكمة ممنوع الوحدچ الا واحد من اخواني ياخذچ واتمنى تكسرين كلامي حتى اكسر رجلچ

عافني وطلع سد الباب حيل بعصبية رجعت ابچي مدري شبية حساسيتي كلش زايدة وكل شويه اتخيله هو وياها اموت من القهر اگب واهفت من وحدي

مدري شلون نمت من التعب والقهر گعدت الصبح على صوت تليفوني يدگ شفته خيال بسرعة جاوبتها بتعب

رميم: ها خيال

خيال: صح النوم يا كسلانه گومي بدلي ورانا مراجعة اليوم

رميم: اوو نسيت مايصير تتأجل اليوم

خيال: شبي صوتچ بيچ شي

بسرعة عدلت نفسي احچي
رميم: لا لا بس نعسانة وهسه گعدت من النوم

بقت تلح عليه ماحجيت شي ماريد اشغل بالها گمت بيه مابيه غسلت وبدلت شلون مجان اجت خيال اخذتني الموعد الدكتورة مالتي مال بداية كل شهر طلعت كل الامور تمام ، حاولت ابين گدام خيال على قدر الامكان ان ما بيه شي انتبهت شويه وسألتهي مره مرتين شبيه ماگلت وهي هم چانت كلش مشغولة تليفونها ما سكت اتطمنت عليه ورجعتني للبيت وراحت

رجعت للبيت وخيال وحكمة من وكتها صارن يجهزن للاطفال حتى جنطة الولادة جهزوها الي وهيج مرت ايام هو ماكو اختفى اختفاء كلي حتى ماتصل عليه وانا من اريد اروح البيت حكمة اكتبله بس يشوف ما يجاوب ويجي يمان لو خيال ياخذوني ومن يسألوني عليه اكلهم مشغول وهيج مر اسبوع هو ما بين ابد

وبيوم بالليل چنت متمددة على مكاني وتليفوني على الواتساب صارت تجيني رسالة ورى رسالة عبالي خيال بالبداية بس بعدين شفتهن بصمات من عنده بسرعة فتحتهن وصرت اسمع كله بصمات من طيف تتوسل بي بس حتى يجاوبها وبصمة من البصمات تگلة ، حتى اذا تغلط عليه ميخالف بس سمعني صوتك

وبعدها هواي شغلات منها تغلط عليه منها تعتذر منه وتگله ، ردت احرگ گلبها وهيج حچيت لان متجاوبني ولا بعمرك انطيتني عين

احس نفسي ارتاحيت مدري شلون مثل الهم وانزاح من على گلبي اخذت تليفوني وكتبت له

" انت وين ؟ "

دزلي
باتر: " معلچ لا تدخلين "

رميم: " ارجع للبيت هسه"

باتر: " ايبااا بعد عندچ اوامر ثانية مدام "

رميم: " باتر ارجع للبيت نتفاهم "

شافها مجاوبني رجعت اتصلت بي رفضني متت من القهر وخاصة من غلق تليفونه ومن بعدها ابد ما جاوبني

عافني يومين اتصل بي ماكو ادزله مسجات بس يشوف ميجاوب حتى كتبت له راح اجيب عندي الم هم يشوف وميجاوب

عفت التليفون جعت نزلت اسوي اكل بعدني بالمطبخ وحسيت باب البيت انفتح حچيت ويا نفسي

رميم: معقولة اجه

بالعجل طلعت من المطبخ شفته واگف گبالي يم الباب بعدني محاچيه رفع حاجبه وگال بضوجة

باتر: اجيت اخذ ملابس

عافني وصعد فوك صعدت وراه شفته مخلي الجنطة على الچرباية ويخلي بيها ملابسه دخلت للغرفة وسديت الباب ، سندت نفسي عليه التفت عليه يحچي

باتر: ها تردين تاخذيني رهينة

رميم: شكو بيها نعكس الادوار

باتر: دوخري من الباب بس اهفي عليچ تطيرين

لزمت بطني احچي
رميم: يهون عليك

باتر: رميم ابتعدي خلي اطلع

رميم: واذا ما ابتعدت شيصير

باتر: لا تبتعدين غصب عليچ

اتقربت منه تعلگت برگبته احچي بزعل
رميم: راح يصير اسبوعين عايفنا ماتخاف علينا احنا زعلانين منك بابا

باتر: انتي زعلي جهالي معليهم

رميم: هيچ صارت

باتر: حتى تشكين بيه زين

برطمت احچي
رميم: انا وجهالي نغار عليك ونريدك بس النا

غمض عيونه ورجع فتحهن يحاول يستوعب الي حچيته

باتر: شگلتي ما شفت

ضحكت احچي
رميم: ماسمعت قصدك

باتر: اي هي هاي شني

رميم: انا وجهالي نغار على ببا مالنا

جرني عليه وجذبني من راسي ناحيته غمض عيونه يحچي

باتر: تعزفين على الوتر الحساس ام جهالي

رميم: لا تروح ابقى يمنا نريدك

باتر: شتردين بالضبط

رميم: ننطي النفسنا فرصة نبدي من جديد على الاقل

جذبني اله اكثر انفاسنا صارت مشتركة يحچي بخدر
باتر: بشرفچ هي مال نبدي من جديد بطنچ واصله الحلگچ وبعدين نسيتي سالفة الاظفر للفجر سهران وياچ ماوكفت بعينچ

ابتسمت قربت نفسي اله واندمجنا ببوسة عميقة مليانه مشاعر دافية واشتياق ماعرف شنو صار يمكن من التوتر او لان گلبي صار يدگ بسرعة حسيت صارت تقلصات ببطني كلش قوية

ابتعدت غمضت عيوني بألم لزم ايدي يهمس
باتر: شبيچ حبيبي

رميم: باتر بطني توجعني اخخ

ماهتم هواي عباله اشاقه ويا همس
باتر: ماتعبرين سوالفچ عليه اليوم ماتفلتين مني

رميم: باتر بطنيييي راح اجيييببب

باتر: ابد ماكو لا تحاولين الا اليوم مااعوفها

گعدت على الچربايه صار الالم ماگدر اتحمله وحسيت اشياء صارت تنزل عليه وهو لاطش بيه مايقبل يعوفني رفعت راسه صحت بي

رميم: بااااتر ركزززز ويااايييي والله راح اجيييببب يمه بطناااايييييي

عطت حيل فتح عيونه يحچي بخوف يباوع على ايده

باتر: رميم: هاي شني

لزمته من ياخته اصيح
رميم: راححح اجييبببب صار ساعة اصيح وانت ملتهي بسوالفك الطايح حظهاااا

گال بخوف
باتر: بعدچ بالسابع

رميم: هوو بيددييي راحح اموتتت سوي شييي اتصل على اختييي

باتر: شني شسوي هسه

شفته توتر اكثر مني مايعرف شيسوي اخذت نفس احچي بهدوء
رميم: باتر طلعلي ملابس واتصل بخيال او خاله حكمة وخلينا نروح للمستشفى

مسح على وجهة بخوف وگال
باتر: ايي

گام بسرعة طلعلي ملابس وساعدني حتى ابدل صوتي مايطلع بس دموعي تنزل وهو احس بي كله يرجف گوه مسيطر على نفسه

گومني گوه نزلني الدرج وصلني للسيارة صعد وانطلق بيها بالطريق اتصل على خيال وگللها ماسمع بس صياحها

على ما وصلنا المستشفى خاص متت من الألم وحست ميي نشف ماقبلوا ينتظرون اهلي يجون لازم يدخلوني عملية بسرعة لان عندي ولادة بلا طلق قوي ماگدر اولد طبيعي

لزمت ايده حيل احچي بدموع
رميم: باتر

حضن راسي الصدرة يحچي
باتر: ها يگلبي لا تخافين هسه تدخلين وتطلعين جهالنا بحضنچ

رميم: باتر

باتر: كيانه انتِ ولچ لا تموتين گلبي يا روحه

لزمت ايده خليتها چوه خدي وهمست بدموع وانا اباوع الوجه
رميم: اذا صار بيه شي دير بالك على اطفالي

خلا ايده على حلگي
باتر: اشش ما راح يصير شي

همست
رميم: انا احبك اتذكر هاي الكلمة

صفن عليه شويه بعدها رجع حضن راسي يبوس بي ويبوس بأديناتي ويحچي

باتر: ميت بيچ انا من الشفتچ لليوم

اخذوني من عنده گوه احسه مايريد يغوفني دخلني الصالة العمليات حتى الالم نسيته كل فكري يم اطفالي خاف عليهم خطر لان بشهر السابع من بعدها انطوني بنج ما حسيت بشي رحت وسط الظلام ...

❛❛❛❛

خيال"

اول مااتصل بيه باتر نزلت گعدت حكمة ويمان وبدلنا بسرعة بسرعة اخذت جنطة الولادة وطلعنا للمستشفى الگالوا عليها طول الطريق انا ادعي وحكمة تدعي ويمان متوتر حتى گوه يسوق

اول ما وصلنا سألنا عليها ودلونا على الردها وصالة العمليات لگينا بس باتر موجود وعيونه حمر  احس اي واحد يحچي ويا يبچي

اتقربت عليه حكمة تحچي
حكمة: هاا وينها رميم

خيال: باتر طمنا وينها

باتر: دخلوها الغرفة العمليات وگالوا ادعولها

حكمة: عرفت بيها ماتكمل شهورها بچر وتؤم ما تتحمل

خيال: يارب فدوه الاسمك اختي بأمانتك

يمان: شوكت دخلت

باتر: من ثلث ساعة تقريبًا والهسه محد طلع وطمني

طبطب على كتفه يحچي
يمان: لا تخاف هسه يطلعون سالمين

اباوع الحكمة طلعت قرآنها وگعدت على صفحة تقرأ وانا افتر ماخليت دعاء ما دعيته واهمس
خيال: يمه ادعي البنتچ محتاجه دعائچ

شويه وطلعت الممرضة تركض مقبلت توكف شويه ورجعت بيدها بطل دم گوه لزمناها

باتر: شبيها مرتي راح يصير ساعة هي جوه

جاوبته مستعجلة

- المريضة صار عدها نزف حاد وخسرت دم هواي والاطفال نقلوهم للخدچ حالتهم مستقرة

خيال: يمه يعني شنووو شبيها اختييي

- ادعولها حالتها ويا النزف خطرة ...

    يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

شنو توقعاتكم للمستقبل

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

TikTok: zeinab_.ali1
Insta: zainab__.ali1

متابعة ممتعة🦋