رواية تاروت الفصل السابع وأربعون 47 - بقلم زيـنـب علـي 🦢

#تاروت

البارت «49»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

ماتجين؟
وانتي تدرين بعشگنا
وحسب تقليد الضلوع .. الشبكه دين
وحيل مؤمن كلمن توضه بحبيبه
وكافر الماعنده دين
وانتي وين ؟
كل شبر بيناتنه يدردم حنين
هااا تجين
بيه واهس سندباد
وذاك چتفه الماتعب من ياسمين

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال "

كلنا داخلين بحالة صدمة وذهول مانعرف شنو صار وشلون وشوكت شبسرعة صار بين باتر ورميم كل هذا وتطلقوا رسمي ورا ما كلها انتِ طالق السيد طلب منه يگولها مره ثانية لكن هو رفض عاف المكان وطلع للصالة ودائب طلع ويا السيد وخاله عافتهم ودخلت الغرفتها رجعت انظاري على رميم شفتها طلعت وراهم وانا وراها اتقربت من باتر وهو گام وگف بتثاقل باوعتله وگالت تحاول تخفي غصتها

رميم: كل هذا صار حتى اثبتلك يا ابو ولدي انا ماتعاير بموت اهلي ولا اتعاير انا وحيدة وما عندي اهل ما يحتاچ يكون عندي اصلا انا اهل نفسي ومحد يگدر يكسرني وراح اثبتلك هذا الشي

گالت الكلام وعافته وصعدت

گعد على القنفة ما اشوف الا الدم صار ينگط على ملابسه گام انفه ينزف بطريقة تخوف بسرعة يمان ركض اله ونزل راسة وكومه

مجانت عند باتر اي طاقة حتى يسند نفسه يمان بالكوة لازمه اخذه للحمام

ركضت اروح للمطبخ اجيب كلينكس وثلج وحبوب ضغط اخذتهم وطلعت بسرعة

لكيتهم راجعين للصالة وباتر گاعد بس دموعه تصب بحيث اختلط دمعه ويا دمه وما يحچي اي شي وحتى يمان من يحجي ويا ما يجاوبه اتقربت احچي

خيال: يمان انطي هذا علاجه يمكن ضغطة ارتفع

اخذهم من ايدي يريد ينطي لحبوب مايقبل يشرب صاح بي

يمان: امشي للمستشفى لا تنجلط گوومم وياييي

وخر ايد يمان
باتر: كلشي ورا رميم ماله معنى وهان عليه اموت يطبني طوب

دار انظاره عليه وگال

باتر: هي مراح تطلع من البيت مو

خيال: لا ماتطلع خاله حكمة ماتقبل

باتر: وعادي ابقى بالبيت انا هم

اباوع له گوه ياخذ النفس والحچاية تطلع من حلگه ترجف حجم الحزن الي بعيونه يشرح حالته وشلون مابي حيل حتى يسند نفسه گلتله بدون تردد

خيال: لا ماعدها مشكلة

گام گوه راد يطلع من البيت تلاگه ويا دائب شاف حالته تخبل لزمه يحچي بخوف

دائب: شبيك باتر شنو هالحالة

باتر: اخذوني منا اريد اطلع

اخذه دائب وطلعوا من البيت وراح وراهم يمان

رجعت صعدت فوگ اريد اشوف رميم واشوف وتر يمها تگلها

وتر :ياختي كلبچ ما نكسر عليه ما نقهرتي ولچ روحي طلعت وانا اشوفه شلون يفرفح عليچ

رميم هنا كلمات وتر وكانها القشة الي قسمت ظهر البعير صارت دموعها وحده ورا وحده تنزل وصارت تشهگ وصوت البچي يطلع منها عالي انهارت مثل الي نفجرت نزلت للارض ولمت رجليها خلت راسها بينهن وصارت تبچي بحرگه اول مره اشوف رميم تنهار الهالدرجة نمردت مرد ماعرف على منو انقهر واشيل هم منو گعدت يمها جريت راسها الحضني رفعت راسها تحچي وتشهگ

رميم: يعني شنو عبالچن انا هينه عليه تطلگت من زوجي وابو ولدي والشخص الي احبه انا حبيته رغم كلشي صار ومن طلع بريئ دست على نفسي وگلت احتوي بدل ما اعند وارفض واعرف بي لو ما راجعة له محد يخلص من شره دست على نفسي وركضت الحضنه وشمرت كلشي وراي من اذيه وكلام جارح اخذني وتزوجني وتمم زواجه وهو يوم بعد يوم يثبتلي هو القاتل انا عشت ليالي من جحيم بين احضانه كل هذا عبرته وعديته وگلت ميخالف يتغير انا راح احتوي

دگت على صدرها حيل گالت بنهيار

رميم: محد بيكم شاف الموضوع من نظري تخيلي الشخص الي معتبرته سندچ يعيرچ بأكثر شي حساس عندچ من يعيرني ماعندي احد ويگلي شنو ماسوي تسكتين وتبقين تتوقعين اسكت ليش ماتگولون صح غلطان والي صار ثمن غلطة وياي ليش كلكم تتحكم بيكم عاطفتكم حكموا عقلكم شويه ليش سهله عندي هذا باتر قطعة من روحي سهله اشوفه هيج بس الفرق باتر عبر عن كسرته انا ماعرفت الفرق باتر حجه وبچه انا ماعرف لا احجي ولا ابچي كسرتي اكبر من كسرته بالف مره وتليفون ما فتحه رغم گلتله وعد افهمك واسمعك للنهاية بس فتحه وماقبل

خيال: مراح تفهمينه امي ولا راح تفهمين شغلهم

رميم: خيال انا من جان متهم بقتل اهلي فهمته هسه صرت ما افهمه ولا اعرف ليش هيچ سوه

گاتلها وتر بلوم
وتر: ريمه حتى اطفالچ ردتي تتخلين عنهم ردة فعلچ چانت قوية

رميم: على شنو تلوموني لان گلت اعوف اطفالي تتوقعين اذب اطفالي مخبلة شبيه هذول روحي شلون اتركهم مستعده اعوف روحي والدنيا كلها في سبيلهم بس حتى لا ياخذهم نقطة ضعف ضدي هيج حچيت لان اذا بينت اله راح يكدر يأذيني بـ أطفالي وانطي لزمة عليه انا مو غبية واخليهم ساحة حرب بينا وجهالي على جثتي اتركهم واذا چنت باقية بهذا البيت لحد لان فالخاطرهم لان مايهون عليه اخليهم يكبرون بدون اب

باوعت الوتر وگالت
رميم: وحتى وان تركتهم فـ خيال يمهم وعمامهم وحكمة وانتِ ومستحيل اتركهم محد يعرف اطفالي اكثر مني ومحد حريص عليهم اكثر مني بس باتر غلططط ولازم يعرف مو رميم الي ينگال الها ماعندج اهل انا اكسر ظهر اكبر واحد يحاول يقلل مني

وتر: انا وياچ وافهمچ بس باتر حتى ما مد ايده عليچ مجرد كلچ ماعندچ احد چنتي تكدرين تسوين اي عقاب غير طلاق ابتعدي عنه لا تسامحين بسهولة بس ماتوقعت توصل للطلاق

رميم :اكسر ايد الي تنمد عليه ولو مادها عليه حتى بالسجن اذبه لان الي يضرب مره يضرب الف مره بحياته باتر ما سواها ومدها عليه ولا راح يسويها ومحد يسويها لان يعرفون شنو انا وشنو اسوي اذا تحسبين ان من تذبين دمعتين وتستعطفي وتگولين اوي ضربني راح ينقهر عليه غلطانه مره مرتين وبعدين تصير ضربتچ اسهل منها ماكو وكرامتچ تنهان والي تسكت على الضرب حيل بيها وابو زايد ترا اذا ترجعين للواقع انا بطركي بطرك خيال والي هي زوجة اخو ؟

مسحت وجها وگامت من الأرض تحچي
رميم: انا وحدي وبيت جدي مابيهم شدة ظهر من عمامي وانتِ طالعة عندي بس بيت ابوي بس مو معنى اخلي يدوس عليه لان ماعندي احد لو اعرف اشتغل باي مكان حلال ولا ابقى تحت رحمة واحد يستصغرني والعين الي ما امليها والي يشوفني بالعين الصغيرة افكسها مو انا الي يهيني احد ويگلي احچي ويا بنات وبكيفي تردين يخوني گبالي واسكتله لا المفروض يزوج عليه ويجيب مرته البيتي واسكت لان ماعندي احد وهو يحبني هذا مبرر ؟ والله يحبني متعلق بيه مبرر !

خيال: بس يبقى كل الي سوى بالماضي

رميم: حتى لو ماضي ما قبل بي ماضيه يبقى بالماضي بس اذا رجع وصار گبالي يعني صار حاضر وهو يخوني وادوس على گلبي اذا ذلني

خيال: جاي نگلچ ان بساعة عصبية واحد كلشي يحچي وباتر لاتنسين ترا زين ومنه هيچ مسيطر على اعصابه شكد مر بمعاناة ومر بسوالف شي طبيعي ممكن يكون اسلوبة حدي ممكن يكون مايعرف يحجي ويوزن كلماته

رميم: وانا ما لاگية كرامتي وگلبي بالشارع حتى استغني عنهن علمود والله استاذ باتر يعاني هو شدمر البنات غير هذا تفكير ؟
والله سكتي خطية مايقصد والله لاتحچين من يهينچ عادي فاهمين المشاركة غلط وفاهمين التحمل غلط ماكلچ حياة كاملة وبدون مشاكل وان الرجال لازم اربعة وعشرين دهن ودبس بس عركه خفيفة مره عديتها عديتها اله مره بتليفونات وعديها مره من اجاني قميصه بس ريحه نسوان وعديها مره تأخر وعديتها وعديتها من غير البرامج وصخام وجهه وعديت سالفة طيف وگلت ميخالف بس من يزيد الموضوع عن حدخ ينگلب ضده كلشي اله حد كلشي اله حد ويوكف بعد وباتر عبر كل حدوده وخلص

انا ما انذل واسكت ما اقبلها على نفسي وانتهى .

الكلمة الاخيرة گالتها بعبرة شفايفها ترجف خلت بطن كف ايدها على جبينها ونزلت راسها دموعها صارت تقطر منها گالت بصوت مهضوم غاصة بالبچي

رميم: باتر اول طفل ربيته واول حب حبيته احسه بروحي حبيته من اول مره حسيت بدمه صار بداخلي من اول حركة الاطفالي  ما انسى اي شي منه انا اموت بكلشي بي باتر نضر عيني بس عزة نفسي ما تخليني اسامح لان احبه لا اموت عليه لان هو اهم شي بدنيا عندي الكلمة مالته هضمتني لان انا اشوفه بعيني الچبيرة ما تحملت فكرة باتر يستصغرني باتر عمره ما مد ايده عليه او جرحني بس بهالموقف حسيت روحي هواي تأذيت لان ما متعودة علي هيج والله راحت روحي وانا اشوفه يكول اليمان

(رميم العايش على نفسها تحرم عليه )

خيال احس بنار حرگتني بس و الله احبه فهموا احبه بس جرحي منه مايهون صعبة الي تحبي يهينچ ويستصغرچ ماتحملت ان عينه تستصغرني ماتحملت

من شفتها هيج انهارت رحت حضنتها وحسيت نفسي بعد مالي طاقة ضليت ابچي وياها وشفت وتر تبچي بعيد علينا فتحت الها ايدي اجتني ركض وصارت تبچي اكثر

حضنت رميم وگلتلها
وتر: ماقصدي انا ماعرف بس نقهرت عليه

ورميم هم شبكتها تحچي
رميم: تهون تهون عندي قاعدة بعقلي تگول
سنحيا بعد كربتنا ربيعًا كأنا لم نذق بالأمس مرًا

بقينا هيچ گاعدين وحده حاضنة الخ ...

❛❛❛❛

يمان"

گاعدين على شط ثلاثتنا وكلنا ساكتين

سمعت تليفون يدگ شفت باتر طلع تليفونه وجاوب سكت شويه وبعدين صاح

باتر: وشنو هسه شراح يصير يعني ... يمتى يجون من يمتى هذا الحچي وهسه تفكرين تگليلي من يمتى مصخم وياچ وكايلچ شكو شيييي يصير تگليلي غبيييية

لزمته واشرتله يهدأ ما اهتملي رجع گال
باتر: ومن يمتى تصخمين وتدزين رسالة ... خوش خوش هذا شوكت الحچي خـ*ا بيچ دروحي روحي

سده وباوع النا وگال بتعب
باتر: گوموا نجيب اسلحتنا راح يصير هجوم على الرصيف مالتنا يردون يعبرون بضاعتهم

فزيت احچي
يمان: منين جبت الخبر

باتر: يمان يعني منين جبته اكيد من الگـ*** يسر وهذا ميمير باز جان يمها البارحة واشتغلته حسب الخطة

دائب: يلا خلي نتحرك انا راح اخابر علي

طلع تليفونه وگبل خابر علي كله جيب شكو قوة تعرفها وياك وتعال للميناء راح ينزلون بضاعتهم وينلعب بينا

بسرعة رحنا للبيت وجان هدوء صعدنا جبنا اسلحتنه بسرعة بس من نزلنا باتر ماكو تأخر وهو فوگ

رميم ..

جنت كاعده بالغرفة متمددة وولدي گبالي ماطايقة نفسي وعيوني وارمة من البچي عافوني البنات ارتاح رادت وتر تاخذ الاطفال بس ماخليتها احس ما اريد افارگهم واريدهم يملون عليه مكانه الفارغ

ما حسيت الا الباب اندفع حيل وطب باتر اول ما شافني متمددة على الچرباية صفن شويه يمكن استغرب وجودي بغرفتنا بعدها استدرك الموضوع

گبل طب غير هدومه وفتح شي من جوه الكنتور ولبس حزام وحط بي اسلحة ثنين وحط مثل سجينه الگلادة بركبته وحده بالبنطرون وثانيه بالردان واخذ مثل رشاشة بس لونها كله اسود ولبس حزام كله طلق وطلع مخازن ثنين وحطهن بجيب الستره ولبسها بقيت صافنة هذا كله ضامه بخزنة الكنتور

اجه يمي اتقرب كلش جر نفس حيل مني وباس راس الأكبر والكرار رفع انظارة عليه وگلي

باتر: حطامي چويات روحي الماتبرد أمانة يمچ هذول وكل ما تشوفينهم شوفيني بيهم

بقيت ساكته ما نطيت ردة فعل تنهد وعافني بسرعة وطلع

حجم الخوف الصابني من منظره وكمية الاسلحة الاخذها شي حسيته اشبه بالحلم وكلماته وليش وصاني عليهم شقصده !

فزيت لازمه گلبي ودگاته الجنونية صارت احسها بأيدي خليت جهالي بنص الچربايه وحاوطتهم بالمخاد وطلعت بسرعة من الغرفة نزلت جوه اريد افهم الموضوع كلهن ملتمات بالصالة حتى زينة ومحد يعرف الموضوع وليش الرهبان طلعوا متسلحين بس حكمة تفرفح تعض على ايدها وتحچي

حكمة: يايابه يابويه مايجوزون من هذا طبعهم الا يخلون الواحد يفرفح وراهم يلا

خيال: اي والله شنو هالمصيبة يربي محد بيهم قبل يحچي

اشرتلها تسكت وماتزيد حال حكمة لان من صدك وجها صار اصفر من الخوف وبقينا هيچ الحدما لليل كلش سمعنا بالاخبار ان صايرة اشتباكات عشائرية قرب الميناء

متنا من الخوف ونتصل بيهم محد يجاوب بقينا بس ندعي مابيدنا شي نسوي غير الدعاء

❛❛❛❛

يمان"

ركبنا سياراتنا وانطلقنا بالطريق شفنا سيارات علي وجماعته اشرولنا صرنا نمشي وياهم واكيد مشينا قبلهم حتى محد يشك بشي

اول ما وصلنا لگينا الميناء يصفر الطير الطاير ماكو  اجه حيدر ولد يشتغل باليناء گللنا ان اكو حملة جاية على رصيف

الضابط الي ويانا گال
- انتم صعدوا على السطح واحنا هنا معليكم بالباقي

اباوع الباتر طلع تليفونه عقد حاجبه مدري شنو يقرأ

علي: ها شوفنا شنو وصلك

باتر: رسالة مضمونها

اكو سيارة صافة بداية الميناء مو من الداخل خارج بمسافة بسيطة

مكتوب " ينزل واحد منكم نتفاوض ويا وينحل كلشي وعد يرجع صاغ سليم"

دائب: انا اروح

يمان: مستحيل اخليكم انا اروح

باتر: لا تحچون بكيفكم الرسالة وصلت الي يعني انا اروح

گالها وشتد الرمي وما گمنا نسمع تقربنا واحد على ثاني حتى نسمع بعضنا زين صاح علي بكل صوته

علي : فدائي الي يروح مستحيل يرجع خلوا ببالكم

دائب :لازم واحد يروح عددهم مضاعف النا واذا اجت شرطه هسه شلون البضاعة كلها صخام مخدرات وشكو شي ممنوع نروح بستين داهية

يمان :خلص انا انزل بعدين حتى لو اجو هاي رتب جوه مو بعينك اصلا اكو قوه عدنا جوه

درت وجهي اريد احجي ويا باتر شفته ماهو كبل گمت وگفت على حيلي ما شفت غير نسحبت من جوه وعلي صاح عليه

علي: ولكككك اثول وين گايم تريد تموت

يمان: عوفني علي هذا الخبل راح وذب روحه بالنار

علي: جان لازم واحد منكم يروح وهذا باتر سبقكم خلي ننتظر ونشوف شيسوي

دائب: من كل عقلك ابقى گاعد هنا انتظر وأخوي بنص الموت

صاح بينا
علي: لا تخافووونن عليه هو سبع ويعرف يتصرف بس خلوا

گلبي راد يوگف وراه دائب كل شويه يريد ينزل گوة علي مچلب بينا مايخلينا ننزل وراه حتى يأمن علينا وهم مانخرب الخطة

باتر ...

طلعت من منطقة الاشتباكات بالقدرة مدري شلون لو اقل زلة چان رحت بيها شفت سيارة سوده اول ما شافوني تقربت نزل سايق فتح الباب ركبت وشفت المسمى ميمر باز مسؤل العصابة گاعد

ميمر باز: اهلا برهبان نورت السيارة

باتر: منورة بعاراتها بدون حجي زايد شنو تريد !

ضحك بصوت عالي وگال
ميمر باز: ابد كل الي اريده منكم مجرد البضاعة مالتي تنزل على الميناء بالرصيف مالتكم وانا حاضر شكد ماتردون من فلوس ادفعلكم

باتر: اسمع علم يوصلك ويتعداك والگدامك مو لعب جعاب ولا ابن البارحة اذا مرت بضاعتك من يم رصيف مالنا مو تحط على رصيف لا تمر على وتتعدى راسك اخلي بداية البصرة وجسمك بنهايتها سمعت

ميمر باز: راح اعيد العرض مخدراتي ومواد ممنوعة وجليكان ادويه ممنوعة دوليا واسلحة تنزل على رصيفكم وشكد تردون فلوس انا حاضر

ثروة من خلال السماعة الي بأذني انطاني ايعاز  وگال
ثروة: انزل باتر من سيارة بسرعة

ربتت على كتفه وحچيت
باتر: نشوفك على خير بيبي راح نشتاق

وعفته ونزلت حققت المطلوب وسجلتله صوت وهو يتفاوض وياي علمود انزل بضاعته الممنوعة على الرصيف مالتي

ابتعدت مسافة من سيارة مجرد ما مشيت حسيت وراي صار  اصوات سيارات واشتباكات طگياها ركضة ام الكيلوا وشفت سيارة اخوتي صارت گبالي

يمان..

ما صدگت من اخذ الاعترافات منه والضابط گال تحركوا رغم الاشتباك الصار وتبادل اطلاق نار بين جماعة ميمر والجيش ببداية مدخل الميناء ماهتميت رحت للسيارة ركض دائب وياي

سيارات الجيش حاصرت ميمر ماخلته يفلت واحنا توجهنا الباتر شفته وهو جاي من بعيد بالكوه يمشي نزلت ركض عليه بعدني ما واصل اله وشفته طاح روحي طاحت ويا نزل دائب يركض عليه ويصيح

دائب: الحگ يمان يمكن متصوببببببب

ركضت عليه ثنينا شلنا نگلب بي نباوع الجسمه مابي اي خدش ولا اثار دم يعني ما متصوب جست نبضه صار ضعيف احس صوتي راح اريد اصيح بدائب حتى نشيله ماكو

ماعرف شلون طلع صوتي وصحت
يمان: دائب عِيني نشيل اخونا بسرعة

جره مني وگال
دائب: خلي على ظهري يمان ساعدني لا تضعف هسه

شلته بيه مابيه خليته على ظهر دائب وهو شاله يركض بي للسيارة

گبل طلعنا بي للمستشفى وهناك گالوا ان صاير عنده انهيار عصبي بالاضافه الى جهد وعنده فقر دم ياريت تنتبهون عليه اكثر

ضلينا صافنين وكاعدين حواليه اتقربت منه اتأمل وجهة شفت بي عيون نرجس من تنام تعبانة من ورا صمد حتى شمرة ايده مثلها اول مره انتبه على اخوي واشوف ملامحة شكد تشبه ملامح أمي شفت السواد الي تحت عينه نفس السواد الي تحت عيونها من جان يضربها مشعول الصفحة ماتحملت گمت حضنته وصرت ابچي حسيت دائب حط ايده على جتافي وطبطب عليه

دائب: باتر قوي وراح يعديها يمان هونها وتهون

يمان: صعب شعور العجز الي احسه تجاهكم صعب اشوف وليدي متأذين وماكدر اخفف عنهم

دائب: كافي عدنا نشوفك حوالينا كلمة ابني منك كفيله بأنها تطيب جروحنا كلها ابوي

جريته عليه حضنته احچي
يمان سند وعون الاخر نفس بروحي

بقينا گاعدين الحدما گعد باتر مجرد ما فتح عيونه كام وگال

باتر: شصار

دائب: الحمد لله على السلامة يالصگر ميمر باز صار بقبضة العدالة

شال المغذي من ايده جره جر لزمت ايده ودائب گله
دائب :وين وين مايصير تگوم خلي يكمل المغذي ونطلع

دار انظاره بالمكان يباوع بنضرات فارغة وخالية من الحياة همس

باتر: مو مهم دائب المغذي ما يطيب شي ولا يغير من ألم روحي خلي نرجع بدال ما نشغل بال امي هسه تلگاها على اعصابها

گام وشال چاكيته وعافنا وطلع من الغرفة ماگدرنا نمنعه حتاريت ويا اخذنا المغذي واخذنا العلاج وطلعنا ورا لگينا واگف يم السيارة

صعدت انا حتى اسوق وصعد يمي دائب اتقرب باتر وگف يم باب دائب

باتر: اصعد يمكم ماريد اصعد ورا وحدي

دائب: خلص انا اگعد ورا وانت اگعد گدام

باتر :لا يمك اگعد بس شوي اتدنه

وفعلا دائب اتدنه وگعد يمه باتر المنطقة الچنا بيها مسافة عن بيتنا بنص طريق

باتر نام على جتف دائب اباوع الدائب شال چاكيته الورا وغطاه بي وسند راسه على راس باتر

مشهد كفيل بأن يحسسني ان الرابطة الي زرعتها بينا امي حكمة اقوى من رابطة الدم ارتباط روحي قبل مايكون عائلي مستحيل بيوم ينتهي او يختفي الاي سبب كان ادركت بلحظتها احنا خوتنا هي السبب الي يخلينا الهسه عايشين لان اذا واحد من عدنا راح كلنا نصير ولا شي دائب الصغير العاقل الهادئ وابو المهمات الصعبة
باتر الابن الوسط الي الگاع ما تشيله من وكاحته وهوسته هو سبب ضحكتنا الي مستحيل يكدر شخص يغلبه
يمان الابن الاكبر العقل المدبر والاب الروحي الي يستمدون منه القوة

وكلنا تحت مسمى الرهبان ابناء حكمة

❛❛❛❛

خيال"

خابرت يمان وگلي انهم راجعين بطريق تنفست الصعداء واخيرًا  الحمد لله مابقى غير عصابة وحدة هواي ارتاحيت وفعلا چانت الاخبار تنقل ان القوات الامنيه القت القبض على عددت خلايا بالبصرة وكل ما اسمع الخبر احس بالفخر بس هذا مايعني ان الرهبان ما يتحاسبون الي سوو ممكن يكون ساعد الامن بصورة او بأخرى بس الفساد ما يوگف تروح خلية تجي الفين خلية لكن على الاقل سوو الي عليهم ولازم ياخذون جزائهم بالقانون ورب العالمين يحاسبهم بدنيا ولا بالاخرى واكيد لازم ينظفون من جوه قبل ما يتركون شغلهم

نزلت بشرت خاله حكمة طلعت تدري ويمان متصل عليها قبلي والبنات هم ارتاحوا ورجع الدم الوجهم عفتهن صعدن فوگ رميم تدرس وتر وانا رحت الغرفتي اخذت تليفوني شفت يمان دازلي مسج كاتب

"يحلو جاي مشتاگلك"  وحاط ايموجي الفيس الي يغمز والنار

بتسمت على سوالفة

گمت اريد اشووف شنو البس شفت جربت كذا لبسة وشفت كل بدلات النوم ضيگه من البطن وزنودي كبرانه واحس نفسي صايره سمينه باوعت الروحي بالمراية احچي

خيال: شنو معقولة انا الهالدرجة سمنانة معقولة گعدت البيت تسمن الواحد هيج مارتاحيت للسالفة

لبست روبي ورحت الغرفة البنات

لگيت رميم درس وتر وگفت بالباب احچي

خيال: ماتحسون انا صاير عندي كرششش

كلتها ونزعت الروب وضبيت الفستان من ناحية بطني هزت ايدها رميم تحچي

رميم: باع هاي راح تجيب وتكول سمنانه ماتشوفين بطنچ شلون صايره راح تصير اكبر من بطن وتر وبطنچ نفس بطني مبين توم اوگفي اجيبلچ اختبار حمل ولو مبين

وتر: انت اختباراتچ ما تخلص

رميم: لا بيه مرض مال اختبارات منزلية بس تتاخر عليه يومين ركضت للصيدلية وجبت ثنين 3 صايرة بيه خوفة

انتبهت من صفنتي من رميم عافتنا وطلعت حچيت
خيال: شجاي تمسلتين شجابني حامل يااا اكيد بالغلط صار

وتر: اهووو النهار كله تتفاعل ويوميا تتفاعل وكل ما شافت ابويه يموني ابو طول الحلو تلزمه وتطيح بي تفاعل وتكول بالغلط

ضربتها احچي
خيال: ادب سز صايرة فد مره طالعة عينچ وبعدين باع منو يحچي عيرتني بعارها وحملتني كوارها همزين من اول مره على الاقل صارلي قرن متزوجهه ما حبلت على الريحة

وتر: اصلا ابنكم ملهوگ مو الغلط منييي هو ما صدك شافني لابسه احمر هجم ثور مو رجال

بنص صدمتي ضحكت كون يسمعها هيچ تحچي دخلت رميم وانطتني اختبار الحمل وعلمتني شلون اسوي طبيت سويته هستوني طالعة جرته وتر من ايدي اريد اشوف مايخلني اخذنه وابتعدن على صفحة ما سمعت الا عاطن هيييييي وهي ركضه وتر سوت الدرج شبختين ولا يگول حامل الخبلة
من الحماس صارا تصيح

وتر: خيال حكمة حامل خيال حكمه حامل

اماگدرت انزل بملابسي بقيت فوك اصيح عليها اريد اسكتها وهي بعدها تصيح دخلوا الولد

ودخل يمان مستغرب يحچي بخوف
يمان: شكو شبيكم شهالصياح بابا وشنو حكمة حامل منين حبلت امي

طلعت حكمة من غرفتها وهي شيل شحاطتها تصيح

حكمة: ولچ يمصگوعة خرعتيني وگفتي گلبي المشلولشة شمالچ شني حكمة حامل ، حامل منين من صخام وجهج صخمت وجهي

صارت تضحك تقربت تبوس بيها وتحجي
وتر : امي خيال حامل قصدي

رحت للغرفة بدلت ملابسي ولبست حچاب واسمع يمان گلها بصوته المصدوم مايعرف شيحچي
يمان : خيال حامل من شوكت منين

ويا نزلتي رده دائب بضحكة
دائب: يعني منين من شيب الخلفني

رميم: ها ابو نسب شني منين غير منك جا من زرف الحايط

اجاني بسرعة حضني گبالهم يهمس
يمان: يعني صرتي ام شهم وصرت ابو شهم من صدگ

خيال: مصدومة قبل شويه ما حسيت بشي بس هسه ويا كلمتك حسيتني ملكت الدنيا اي حبيبي من صدگ

باس راسي حيل وبقوا يباركولنا رغم الفرحة بس فرحتنا مكسورة ومالنا واهس الكل شي اباوع الباتر اتقرب وگال

باتر: مبروك تگومين بالسلامة ويتربى بعزكم

گالها بدون روح يادوب ابتسامه بسيطة وعافنا وراح للغرفة الجوه راحت حكمة وراه ماعرف شنو حچت ويا وطلعت سدت الباب عليه

بعدها راح كل شخص الغرفته دائب صاح الوتر ماقبلت تروحله وتحججت برميم جاي تدرسها اباوع عليه يأشرلها بسيطة وهي خاتله ورا رميم الي تضحك عليها اخذتها وصعدت واحنا هم صعدنا الغرفتنا بين مشاكسات يمان وفرحته بالخبر مامصدگ گال باجر نروح نسوي تحليل دم وبقينا سهرانين ويا بعض شويه ماقبل اسويله اكل بس سبح وخلاني بحضنه ونام بسرعة من التعب

ثاني يوم رحنا الصبح سوينا تحليل وتاكد حملي بعدها دخلها على الدكتورة تفاجأت من كلتلي بنص شهري الثاني وانا مادري بروحي حامل طلعنا ورجعنا للبيت وكالعادة كلهم نايميين بس خاله تصلي بنص الصالة بس انا وحكمة ويمان گعدت يمان بصف خاله يحچي

يمان :يمه خلي دائب يروح الامه حرام عليه والله يحاسبه عليها

حكمة: يحاسبه علمود وحده ذبته بالشارع همزين ماكلته الچلاب

يمان: حبيبتي ادري بيعا مو خوش ادمية وادري مو زينة وحتى الجنه مو جوه رجليها ويطب بيج انتِ للجنة بس يمه دائب تعرفين شگد يحبها بس هو عنده انتِ لا تصعدين ولا تنزلين بحيث عايفها بس حتى ما يزعلچ لاتتوقعين احد ياخذ مكانچ يمه لحم جتافنا منچ احنا نفرها فر واخرتنا جوه رجليچ بس يشوفها يطمن عليها

حكمة: يطگها عرچ ولا يوصلها

يمان: يمه خطية دائب لخاطره هيه تولي بس هو خطية

حكمه: اخاف خاف يحن الامه وينساني امي جانت تكول ربوني وانا وليد هلي

يمان: هاي انتِ كلتيها ربوني وانا وليد هلي واحنا اهله هذن خواته واحنا روح دائب مو خوانه وعد يمه دائب مايعوفچ ولا ينساچ صدگيني واخذيها من هالشارب خلي يروح يتطمن عليها واخلي وتر ويا وانتِ تعرفين ام السان حسره على المره تحچي

حكمه: لان اخاف ربي واخاف الله يعاقبني ويخليكم تعوفوني راح اقبل بس ونور محمد اگطع العصه على راسها اذا ابني تغير وحق العباس ابو راس الحار ماتخلص من شري

گام يمها يبوس بيها باس ايدها وراسها يحچي

يمان: حكمتي كلنا جوه رجلينچ ونبقى جوه جناحچ

عافنا كام يصيح الدائب دگ الباب ودخل الغرفته شويه وطلعوا ثنينهم

ودائب راح على رجلين حكمة يريد يبوسهن ماخلته رفعته تحچي وتبوس براسه

حكمة: يمه ابني قدرك عالي بعد امك

ورجعت باسته بين حواجبه باس ايدها يگللها
دائب: امي الي ماكو بحنيتها انتِ

حكمة: دروح شوف اميمتك الفوصة وارجعلي بساع

دائب: بسرعه اروح وارجع واريد حلاوة چكليتيه من هاي الادين الحلوة متفقين

حكمة: من عيوني ينضرها

ابتسم باس خدودها وگام راح الغرفته بعدها صعد فوك يمكن گعد وتر لان نزلت ورا وهي مبدلة صبحت علينا وهو هم بدل واخذها وطلعوا

بوقت قريب للغدا صعدت ورا يمان الغرفتنا اريد اصلي اول ما فتحت الباب جمدت وگلبي صار يرجف ويرفرف من شفته ساجد على السجادة ويصلي ماگدرت اسيطر على رجفة جسمي گعدت مقابيلة على الچرباية اباوعله شلون مغمض عيونه ويصلي بكل خشوع ودموعي صارن ينزلن من وحدهن وحده ورا الثانية الحد ما خلص صلاته وگام اجاني كمت بسرعة حضنته وصرت ابچي بصوت عالي ماعرف ليش ماگدرت اسيطر على مشاعري

حضن راسي يهمس
يمان: اششش يعمري عليمن هالدموع

خيال: ما مصدگة عيوني من شفتك تصلي والله ممصدگة عيوني

بعدت راسي منه رفعته اديناتي احتضنت وجهة اهمس
خيال: يمان من شوكت تصلي

يمان: من فترة مو قريبة بس هيچ بيني وبين ربي ماتشوفوني

خيال: ليش هو هالشي ينضم

يمان: ردت عبادتي بيني وبين رب العالمين حتى لا تنحسب عليه رياء او اسقاط واجب فقط وهسه بكل مره اتوجه بيها للسجادة احس بروحي رايح للجنة وهيچ ابقى كل شويه اباوع للساعة وانتظر الصلاة شوكت تصير

حضنته اهمس
خيال: ليش ؟!

تنهد يحچي
يمان: السجادة راحة للمتعوب وانا بكل مره احس همومي من تتجمع فوگ راسي اروحلها احس من اسجد الربي همومي كلها تطيح

زدت بالبچي رفع راسي يبوس بيه ويحچي
يمان: خليل گلبي فرحان بيه

خيال: اريد اخليك بنص گلبي حبيبي طايرة من الفرح بيك

باسني حيل وهمس
يمان: يعني بهالمناسبة راح تنطيني مكافئة

خيال: صير حباب اريد اصلي

يمان: اوو ماگلتلچ هاي هم تعتبر عبادة لان الي ترفض رجلها الملائكه تلعنها

خيال: صدك

يمان: وداعت شهم تعاي

سحبني عليه قبلني وانا اضحك اخذ مكافئته على گولته وبعدها سبحت وصليت ونزلنا حكمة ما قبلت نتغدا الا يرجع دائب وكل شويه تتصل عليه ...

❛❛❛❛

وتر"

من طلعنا ورحنا الامه بالطريق قبل لا نوصل باوعت عليه وگلت

وتر: ماريد اروح ولخاطر حكمه جايه

دائب: شبيچ يعني شهالحجي هاي امي صح مو خوش ام بس تبقى امي ماعرف ليش ما جاي تفهمون هالنقطة

وتر: ماريد مو جبر يعني تالي اسوي شي ماريده

دائب: ميخالف الخاطري انتِ مرتي

وتر: ام ابنك مو مرتك اكو فرق

دائب: اخخخ احلا ام ابني بالدنيا اخرب عليك

باوعتله طرف عيني ابتسم خلا ايده على بطني يتحسيها

دائب: بعد شگد ونگدر نعرف شنو جنسه

وتر: انا حاليا بنهاية الثالث تقريب بعد شهر او نص شهر نگدر نعرف

ايده بقتت تتحسس على بطني بعدها نزلها شويه الفخذي حسيت صارت عندي ردة فعل وگلبي دگ بنبضات قوية بسرعة دفعتها

وتر: شيل ايدك

رجعها ولزمني هالمره بطريقة اجرأ من القبلها
دائب: قريت الحوامل وخاصة بهيچ فترة يحتاجون حنان وطريقة خاصة بالتعامل

حسبت انفاسي شلت ايده نترت
وتر: دائب لا تلزمنيييي والزم حدودك

رجع ايده صحت
وتر: هو عناد مو جاي اگول لا تلزمني

دائب: ورجعتي گلتي الزم حدودك وانت حدودي لزمتچ

هزيت ايدي معاجبني رفع حاجبه وانا هم رفعت حاجبي بتحدي عض على شفته بسرعة درت وجهي منه گال

دائب: راح نبقى طول العمر هيچ

وتر: اي نبقى هيچ

دائب: ونخلصها زعل

وتر: لا ليش زعل الراح راح والصار هم راح واحنا راح يصير بينا طفل يعني نرجع على علاقتنا القديمة بغض النظر عن انا حاليا حامل منك نرجع العلاقة الاب وبنته

دائب: هااا حچي جديد هذا

وتر: هذا العندي

هز رأسه يحچي بوعيد
دائب: خوش الله كريم يصير خير

وصلنا للبيت واول ما فتحتلنا الباب ودخلنا انصدمنا ثنينا

شفنا الشقة معزلة وريحة الطبخ تعط وطلعت هي ولابسه دشاشه وحاطه كحلتها وحمرتها وللامانه المره جميلة جدًا جمال دائب كله منها بس هي ناعمة ما ماخذ نعومتها اعتقد اخذ ضخامته من ابو

اول ما فتحت الباب وشافت دائب حضنته تكچي

اوتار: يمه هلا بابني هلا بچبيري المعدل گلبي نطف عليك حبيبي

دائب بس طبطب على ظهرها و وخرها يحچي بثگل

دائب: اهلا شلونچ محتاجة شي ناقصج شي علاجچ كامل محتاجة دكتور مسواك اي شي مصرف

اوتار: يابعد گلبي يا حبيبي ما محتاجة غير سلامتك وشوفتك گلب امك ليش گطعت بيه گلبي نطف عليك حبيبي

دائب : جنت مشغول وعندي شغل وماگدرت اجي واصلا ماله داعي لان اصلا دزيتلچ مسواگ كامل بالبيت وحاط فلوس على الميز

اباوع عليها ملامحها شكد جميلة بس خباثتها وسماويتها طاغية على وجهة تنهدت تحچي

اوتار: يمه البيت وحشة عليه وحدي كاعدة ليش ما تجي يمي تبقى وانا امك ومهما صار تبقى ابن بطني وطالع من گلبي ومحد حريص عليك ويخاف عليك بگدي

لزمت ايده وگالت
اوتار: يمه كل انسان يغلط وانا غلطت بس يا يمه خو ما نظل العمر كله نفكر بالي راح تبقى ابني وبجري واول فرحة الي بس چنت طايشة

ندسته وهمست بصوت ناصي
وتر: اي صح محد حريص عليك وعلى فلوسك بگدها شافتك دجاجة تبيض الها ذهب

اشرلي اسكت وحچه وياها
دائب: اول شي حچاية انا امك هاي بطليها لان تحسسني بالقرف انا امي حكمة الف مره كلت انا ابن حكمة ابن ام يمان وماكدر اترك اخوتي وعائلتي واجي هنا شعندي  هنا شمتيهه ومرتي ماتكدر تعوف خواتها وامها حكمة وحامل وتحتاج عناية ومحد يعرف بيها غير امي

اوتار: بس المره الله يجازيها بالخير تورطت يا امي غير ترجع الامك ربتك ومشكورين هسه ترجع الاهلك يمه اكو مثل يكول ربوني وانا وليد هلي لو الحجية ماتريد تعوفك لان طمعانة بفلوسك

هنا اخر قطرة تحمل فاضت راد يحچي وانا نترت ايده مني وگمت وگفت فوك راسها حچيت

وتر: من تحچين بأمي حكمة تحسبين حساب للحرف الي يطلع منچ الف مره قبل ما تنطقينه وهو بالاصل ابنها مو ربته امي حكمة هي اصلا امه وهو ابنها وهذا المثل يمشي عد مثلچ وامثالچ هذا الحجي ما يمشي نفسه خاف تحسبين دائب نفس ولدچ الشفية ويعضون الايد الي نمدت الهم غلطانه الي بين دائب وامه وخوانه اكبر من سمچ الواضح ترا مو اغبياء لا انا ولا هوه واضحة غايتچ مو حريصه عليه حريصة على الفلوس ويا غلط الي تحچين عنه ٣٠سنه غلطچ انتِ يتم وتشرد بس انتِ هيج غلطچ تشوفين ابنج يتسول بالشارع تديرين وجهچ عنه ولا عبالك تعرفينه ولا عبالك تشوفينه ابنچ يگعد يم باب بيتچ تذيين عليه الماي من سطح حتى يگوم

ثنينهم صفنوا عليه وگفت گبالها احچي
وتر هاي اغلاطچ وتردين اجي يمچ شطبع بيا طبع انيم ابني بالشارع لو اطرده من البيت لو اجيب الصوندة الابو حتى يضربه ولو ابو مو زباله نفس الي جان عندچ سمعي وهاي اعتبريها رساله من امي حكمة الحضرتج الي بين حكمة ودائب وخوانه لو عشره منج ما يكسروا ولا يهزون منه شعره وهسه من رخصتج خالة ام رجلي تنتضرنا كوم دائب

شلت السويج وجنطته وطلعت وهو اسمعه يگللها

دائب: مع السلامة ديري بالج على نفسچ ورقمي يمچ اذا حتاجيتي شي

عافها وطلع وراي رحعنا للبيت ...

❛❛❛❛

خيال"

نص الليل طلعت من الغرفة اريد انزل اجيب ليمون متت عليه بنص الليل بعد ماخليت يمان يدخن نص باكيت الجگاير

نزلت جوه اخذت الليمون من المطبخ وصعدت مريت من غرفة زينه وسمعها تگول

زينة: والله عيب عليك عليك هيچ تحچي

بلا مقدمات رحت فتحت الباب ونصدمت من الي شفته

    يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

تتوقعون شنو سالفة زينة؟ 🌚💔

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

متابعة ممتعة🦋