رواية تاروت الفصل السادس وأربعون 46 - بقلم زيـنـب علـي 🦢

#تاروت

البارت «48»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

وعاونتـك علـي
من شفت عذرك خاب
قنعت النفـس كلتلهــا يتغيــر
لا كصرك طول لا فاد بيك الطيب
ﻻ ﺷﻤﺴﻚ ﻋﻠﺖ ﻭﺍﻟﺮﺍﻛﺪ ﺍﺗﺒــــــﺨﺮ
ﻻ ﻣﺪك ﻭﺻﻞ ﻭﺍﻟﻌﻴﻦ ﺷﺎﻓﺖ ﻧـــــﻮر
ﻻ ﻛﺼﺮك ﻃﻮل ﻻ ﻟﻐﺰك ﺍﺗﻔﺴــــــــﺮ

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

رميم"

لگيت بجيب قمصلته حبوب ونوع هلوسة يستخدمونها الحالات خاصة ومو اي مرض وهذا ممنوع اذا مو بوصفه طبية لان يخلي الانسان يفقد ويحجي حجي بدون وعي بين قوسين يستعمولنه كنوع من انواع المخدرات والممنوعات اذا جان الي ياخذه ماعنده الي يحتاج هذا العلاج

احتاريت شلون اتصرف شسويله احس قبق راسي نشال من مكانه يربي شجاي يسوي باتر ليش هيج معقولة يحچي ويا بنات لا لا ابد ممعقولة مااصدگ زين والتأخير والتليفونات وهسه حبوب هلوسة

بين ذهولي وصدمتي بهالموقف بدون وعي كعدت على الاريكة واحاول اچذب عيني رجعت اقرأ الحبوب

انفتح باب الحمام حيل وطلع باتر مستعجل بس لاف المنشفة على خصره مثل الناسي شي ويريد يلحگ عليه بس ما لحگ شاف شريط الحبوب بيدي

ضرب على جبينه بأسف اشر بأيده يحچي
باتر :اوكفي رميم افهمج لاتفهمين غلط

ماشفت كبالي غير بطل ماي شلته وشمرته عليه كز على اسنانه بغضب وصاح

باتر: شبيچ تخبلتي رميم شنو هالرعونية

صحت بي
رميم: اصحى على نفسك شجاي تسوي هاي حبوب تدمرك تدمرك ماتبقي عقل بيك تنهيك شجاي تسوي شلون تفكر انت شبيك هيج صاير فد مره شصاير وياك يخليك تسوي كل هذا لاتحسب السكتت عنه مره اسكت عنه مره ثانية

باتر : اول شي افتهمي وبعدين تصرفي اصلا هاي لحبوب مو الي وما ابلعهن مجرد اشتريتهن وبعدين عرفت شنو هن وشسوي بيهن

رميم: شايفني ثولة لو غبية گبالك ترى صيدلانية وهاي الحبوب يا باتر ما تنطي الا بوصفه طبية ومن دكتور اختصاص

اجه بتجاهي بعصبية جرهن من ايدي حيل وگال
باتر: هاي الحبوب انطونياهن علمود الشغل عدنا بيهن مهمة واذا ما تصدگين هذا يمان وروحي له هو يفهمچ

گالها وشال قمصلته رجع ضم الحبوب بيها ويباوع عليه بخزرة اشرت براسي بمعنى بسيطة شلت جهالي خليتهم بالكريكوتات مالتهم وشلتهم هو متخصر يباوع عليه ردت اطلع من الغرفة صاح وراي

باتر: وين موليه شبيچ تخبلتي بنص الليل

باوعت له احچي
رميم: لا تخاف هسه راجعتلك اصبر لي

اخذتهم ورحت دكيت الباب على وتر خليتهم يمها سألتني اذا صاير شي گلتلها ماكو بس خليهم يمچ

رجعت للغرفة جان مبدل وواگف يمشط بشعره كتفت اديناتي وحچيت وانا اطبطب برجلي على كيف

رميم: وين سويچ سيارتك

عقد حاجبه مستغرب
باتر: شتشوين بي

رميم: اريد سويچ سيارتك

گلتها وتقدمت على الميز اريد اخذه سبق خطواتي شاله وگال
باتر: بلا خبال بابا استقري

رميم: باتر يا اما تنطيني السويچ يا اما تطلگني هسسههه افتهمتتت هسه تطلگني

اتقرب صاح بوجهي حسيته طرش اذاناتي
باتر: انتِ شبييييججج اليوممم الخاطر ربچ شبيچ راكبچ الشيططااننن

شمرت نفسي عليه اريد اخذ السويج واصيح
رميم: شيطان يركبك ويخلصني منك جييبببب السويججج باتر قسمًا بالله اذا ما نطيته الي اليوم ليلتك سودة مصخمةةة

رجع الي ورا صارت الچرباية ورا طاح عليها ماصدگت باتر طاح حتى اگدرله بسرعة ركضت وذبيت روحي فوگه گام يصيح

باتر: ولكممم بويهههه فطستتييي

رميم: شيفطسك اكبر من الحيط انطيني السويچ لو صدك هسه تفطس

ضم ايده وراه وحچه
باتر: يعني شتسوين بي گليلي وانا انطي الچ

سحبت ايده حيل طلعتها من جوا كل هذا وانا گاعدة فوگه صرت اجر بيها حيل

رميم: هده ولكككك انطينيييي

مايقبل بقى يتلاوه وياي ماتحملت اخر شي نزلت على ايده عضيتها حيل فتحها وصاح بألم جريت السويچ منه گمت وانا احچي

رميم: اييي دجيييببببب عاااددد

كمت ركضت بي لبست روبي الشتوي واخذت حجابي وتوجهت للباب ماحسيت غير جرني من شعري عطت بكل صوتي اجر بأيده اريده يهدني ماكو اخر شي درت راسي عليه وعضيتها حيل بكل قوتي رجعني عليه حضني من ورا يهمس

باتر: ريمه بلا خبال للسيارة ماترحين يعني ماترحين

غمضت عيوني حيل هديت نفسي اخذ نفس قوي درت عليه وخر شعري من وجهي يباوع بعيوني اتقربت شميته من رگبته حسيته هدأ رفعت راسي شفته مغمض عيونه بسرعة دفعته حيل أردت الي ورا بس ما وگع طلعت ركض خارج الغرفة ركض وراي لزمني يم الدرج يحچي

باتر: ولچ بابا شبيچ اليوم هسه الي يشوفنا شيگول

رميم: يگول ثنين مخابيل معليهم بينا

باتر: هسه شنو تردين

رميم: تفتحلي السيارة لا والله والله وداعت ولدي اخليك هسه بهاللحظة تطلگني وكلشي ينتهي

صفن بوجهي يفكر بعدها همس
باتر: ماافتحها

نترت ايدي منه وگلت بقهر
رميم: إذًا ضام عليه شي خليك انا نازلة افتحها

جرني حيل وصاح بكل صوته
باتر: رميييمممم كافيييي عااااد

انفتح باب الغرفة وطلع يمان ورا خيال وحكمة صارت تصيح من جوه تريد تعرف شبينا

ماجاوبت احد بسرعة نزلت جوه للكراج فتحت سيارته وصرت ادور بيها الحدما لحگيت التليفون ضامه بيها حاولت افتحه ما انفتح  اخذته ونزلت شفته واگف بالباب مكتف اديناته يباع عليه فتح عيونه حيل مصدوم من شافني نزلت والتليفون بيدي تجاوزته وصعدت للغرفة ركض تحت انظار الكل وهو صعد وراي سد الباب وگال

باتر: انطينياه رميم

رميم: افتح التليفون باتر لا تخليني اسوي شي بحياتك مشايفه

صاح
باتر: كافي رميم كافي التليفون ما افتحه شنو تردين تسوين سوي كافي لعبتي نفسي جاي اكلج صخام بعيني شغل خلي اكمل صخامي وافهمچ هسه صارلي ساعة اصيح حمار وتصيح احلبه

رميم: اذا ما عندك شي ليش متفتح التليفون يعني

باتر: يعني لو اريد اخونچ خايف منچ بس صارلي ساعة احچي اگول الحبوب مو انا شربتهن ولا راح اشربهن والـ*ـرا التليفون شغل مايصير تشوفين شنو بي عقلچ ما يستوعب هيج شي مااااا يستوعبببب

اتقربت يمه احچي
رميم: باتر هسه صار عقلي مايستوعب بس من وكفت بنص محكمة وحدي جان عقلي يستوعب من تركتني ويا ثنين اطفال بطني وانت الغلطان جان عقلي يستوعب من مكالماتك وسوالفك ويا طيف عقلي يستوعب من فريتك فر جان عقلي يستوعب هسه تكول عقلي مايستوعب باتر

ضربت على الطبلة بأيدي حيل
رميم: انا رميم باتر انا رميم الحية افرك فر انت وعشرة منك لو مو رجلي وابو اطفالي ادوس على اكبر واحد اذا الشغله مستني ومست كرامتي انا هيج تسوي وتصخم وياي انا حبوب هلوسة وتليفون ماتقبل تفتحه

شمرته گدامه وصحت
رميم: التليفون هسه تفتحة لا وروح هيلين وضرغام وسليمان والله اروح وما شوف لي اثر وتعرفني ما احجي عبث سمعتني التليفون فتحه هسه

غمض عيونه حيل نفخ بملل لزم ايدي جرني گعدني بصفه وگال بصوت تعبان
باتر: ريماي اروح فدوة الوجهچ الحلو التليفون اذا نفتح مراح تتفهمين ومراح تقتنعين ليش تأذيني وتأذين نفسج وياي وروح نرجس ومعزتها عندي بس يخلص الشغل التليفون وكلشي جوه رجلچ بس عوفي هسه

رميم: تريد تضحك عليه بكم كلمة التليفون فتحه كافي حجي مايفيد لا توصلني المرحلة تخليني اتركك وعد اذا فتحت التليفون راح اسمع شنو تحجي للنهاية وراح احاول اتفهم

ثار ودفع الطبلة حيل واشتغل الصياح بثانية اتحول
باتر: جاي اكلج مراح تتفهمين ولا تستوعبين شهالغباء وما مجبور ابرر الج وين ماتردين تولين ولي طبچ مرض وما مسموحلچ تدخلين بشغلي احچي ويا بنات اطلع وياهن اسوي اليعجبني حلگچ ماتفكينه وتحچييينننن

رميم: وليش يمه اتحمل واسكت شني ماخذني فصلية

باتر: ما ماخذچ فصلية بس ماعندچ مكان تروحيله ولا عندچ اهل غيري بكل الاحوال تنچبين وتسكتين وتنگبرين هنا وانتِ الممنونة

شطت احس اذاناتي صارت تطلع دخان وعيوني گبن نار امتلن بالدموع مالگيت گدامي غير شيشة العطر شلته ورگعت بيها لزمها وصاح

باتر: انت تخبلتييييي رسمي تخبلتيييي والله يعني هو هيچ التفاهم عندچ

رميم: خليت التفاهم الك ابو التفاهم

سحبت حجابي وطلعت من الغرفة كلهم جانوا گاعدين بالصالة الفوگ اول ما فتحت الباب حكمة عافتني ودخلت للغرفة اسمعها تصيح عليه

حكمة: شمالك تخبلت يوميه مفرفح گلب البت

وبعد هواي حچي ترزل بي وانا گعدت على القنفة خليت اديه الي يرجفن على وجهي گعدت يمي خيال وگالت

خيال: شبيكم رميم يعني ميصير يوميا انتم على هالحال

رميم: راكبنا جني الخاين ماينعدل لو يموت ابو البنات

يمان هم صار يحجي وياي ويردون يفهمون شنو الموضوع لان السالفة كلها زادت عن حدها وانا چنت فاقدة ماعرف بنفسي شنو احچي باوعتله وگلت

رميم: يمان مااحچي وخاصة الك بالذات لان اعرف باتر لو الدنيا كلها تگله انت غلطان مراح تنطي بي لا تسوي روحك مهتم مثل ماسويت قبل راح تسوي هسه

صاحت بيه خيال
خيال: شبيچ رميم لا تجفصين احجي عدل واحترمي مو ماخذتنا بصوتچ العالي

رميم: خيال الماي ماشيه من جوه رجلينا وكلشي ما فاهمين واكبر غبيات احنا

عفتهم ورحت الغرفة وتر اخذت جهالي وطبيت بغرفتهم قفلت الباب عليه بس اسمعهم يحچون خليت اذني على الباب اسمع كلامهم

يمان: خلص خلوها براحتها واكيد باتر هو الغطان

خيال: ماضجت من هيج حچت ؟

يمان: لا ريماي مثل بنتي وصديقتي مستحيل ازعل منها ولو ما اخوي جافص بطنها مستحيل هيچ تحچي واكيد اخوي هو الغطان ريمه ما تغلط

خيال: يمان ضام عليه شي ريم ما تهروت عبث مو صح

صار هدوء شويه والباب صار تندگ عليه ويمان يگول

يمان: ام الأكبر افتحي الباب احنا مو اصدقاء مو عيب تخليني واكف بالباب فتحي واكسرلچ رأس باتر

مسحت دموعي وفتحت الباب بس شافني امسح بعيوني گال

يمان: اوف اوف ريمه تبجي على باتر الخايس لا الموضوع چايد ولو اخوي الي طلع مصوب كالعادة

رميم: شبي چنه صل عرج ما يطگه

يمان: على بختج طابره حاجبه وصدره صاير ازرك فلك فلك راسج يالگويه ولج كافي تعنفين بي رحمي الولد

عفته ودخلت دخل وراي راح للجهال يبوس بيهم حيل ويشمشمهم يلعب وياهم خيال واگفه بالباب وهو شال الكرار خلا بحضنه وگال

يمان: المهم گليلي شصار ليش ضوجج هذا الارعن گليلي واخذلج حقج من عيونه وعيون ابو الخايس

گعدت يمه وسولفتله السالفة كلها فرك على وجهة بحيرة وكال

يمان: ريمه تثقين بيه ؟!

رميم: اكيد

يمان: من هالرگبه افتهم الج السالفة كلها والتليفون بيدچ ينحط بدون رمز وما ينسمح منه شي وهذا شاربي مو عليه اذا اخلي يچذب عليچ بحچاية وحدة

رميم: لا يمان ماريد بعد اي شي من باتر الي حجاه مراح انسى والي نكسر ما يتصلح وباتر انا ويا راح نتطلگ هواي تعبنا لا انا افتهم عقله ولا هو يفهم عقلي وبعدين هو انسان مو گد المسؤولية وما يگدر يعوف سوالفه

يمان: مو الهاي الدرجة رميم انتِ تعرفين شگد باتر يحبچ فكري بالموضوع لا تكبرينها

رميم: قراري مابي رجعة اريد اثبت له مو رميم الي ينلوي ذراعها شبيه ما عندي اهل عندي بيت جد اروح اگعد يمهم وانچب واذا على جهاله خليهم على گلبه ما يلوي ذراعي بيهم يمان الله يخليك اذا معتبرني اختك مثل ما تگول وتعزني طلبتك وما ريدك تردني باچر يجي سيد ونتطلگ هاي اذا تعتبرني اختك اذا معتبرني مجرد مرت اخو مالها احد كاعدة بيتنا لا تجيب سيد ولا تخلي يطلگني

يمان: الامور ما تنحل هيج وانتِ هسه عصبية

رميم: انا مو طفلة واخذ قرار بتسرع كتلك اذا تعزني ومعتبرني اختك خليني اطلگ وگله يطلگني بدون مشاكل لا وحق الله اهچ بليلة ظلمة ومحد بيكم يعرفلي خبر حتى اختي

صفن عليه متفاجأ وخيال فتحت حلگها مصدومة من كلامي تنهد وگال
يمان: اهدي هاي هي يجرالچ باچر سيد وتطلگون وراح انطيچ وكت فكري وانا وياچ بكل قرار تاخذينه حتى يكون بعلومچ انا وياچ مو ويا

رادت خيال تحچي ما خلاها اخذها وطلعوا صارت تصيح اسمعها تگله لا تنطيها عين تكبر راسها بالزايد

حضنت جهالي ابچي وهو سمعت حكمة تصيح عليه ورگعة باب البيت وصوت السيارة اكيد طلع ولا همني الجهنم الحمره

من بعدها حاولت خاله حكمة تحچي وياي وهي وخيال بس يمان مايخليهم عافوني وحدي كل ما اتذكر كلامه اموت من القهر اشب وانطفي بودي اختفي من الوجود عفت كلشي على موده ونسيت كلشي تاليها يعيرني ما عندي غيره ويدور بنات عليه ...

❛❛❛❛

خيال"

حاولنا نحچي ويا رميم انا وخاله حكمة وحتى وتر ماقبلت تسمع من عدنا ويمان بعدنا من غرفتها گوه

دخلت للغرفة شفت يمان مخلي تليفون باتر گدامه يباوع عليه ويدخن سديت الباب ما حچيت ويا اخذت ملابس ودخلت للحمام بدلت وطلعت وهو على نفس الگعدة ما متحرك يدخن ويفكر گعدت بصفة احچي

خيال: يمان التليفون شبي

نفخ الدخان بحرگة وگال
يمان: بي مصايب سوده بي بلاوي وطلايب متأكد إذا رميم شافت الي بداخله مو فقط ويا باتر ما تحچي حتى ويانا تگطع علاقتها

حچيت بصدمة
خيال: يعني شنو يخونهاااا ؟

لزم ايدي رجع گعدني بصفه وگال
يمان: ما يخونها اهدي بس شغل وهذا الشغل كلش مهم النا خيال كلش مهم لازم يدخل بي يعني تخيلي محد يعرف بي غيري انا وهو ودائب حتى ويا روحنا مانحچي ولازم باتر يدخل بي

خيال: شنو من شغل هذا اليهجم بيته غير بي نسوان اكيد

يمان: لو ما باتر وهذا شغله احنا مراح نطلع من شغلنا وكلشي ما نگدر نسوي ولا نتحرك خطوة وحده

خيال: وما لگيتوا غير باتر يدخل بي

يمان: شنسوي محد يجيدها غيره

خيال: خلي نحاول نحچي ويا رميم

يمان: اششش ديري بالچ يطلع شي ابد ابد اقل زلة من عدنا يضيع الاول والتالي وهم رميم راح تقودها عاطفتها ما راح تتحكم بروحها مهما كانت رزنة وقوية راح تتحكم بمشاعرها وتخرب علينا الاول والتالي

خيال: بس انت هيچ جاي تنهيهم يمان رميم طالبة الطلاگ واعرف بيها ما تتراجع

يمان: ما گدامنا غير ان ننفذ طلبها منا الحدما يخلص هالشغل واكيد هي بعدين راح تتفهم بس هسه مستحيل اذا خرب كلشي كلنا ننتهي وتكون ضربة قاضية بالنسبة النا

فركت راسي بتعب وگلت
خيال: اووفف شوكت ينتهي هالشغل ونخلص ونرتاح

يمان: ما بقى شي خطوات قليلة تفصلنا عن بر الامان يارب تعدي على خير

حضنته احچي
خيال: خطية باتر راح يتعذب من بعد قرار رميم

يمان: شنسوي حبيبي لازم يضحي فترة على ما ترجع الامور طبيعية كل واحد بينا يدفع الثمن خلي ندفعة بالدنيا ولا بالاخرة

غمضت عيوني بالي يم رميم بس هي ما قبلت تسمع ولا تحچي ويا احد ، قربت نفسي على يمان حيل ريحة الجگاير ضربت بخشمي وصارت ويا انفاسي كلش استلطفتها خليت راسي برگبته اخذ نفس قوي سمعت صوته همس

يمان: شبيك خليلي مو وكتها هسه

خيال: ريحة الجگاير طيبة

رفع راسي يباوع الوجهي مستغرب گال
يمان: اول تالي تحبين ريحة الجگاير وانا اذا دخلت للغرفة ادخن ماتخلين شباچ ما تفتحينه وتخبصين الامه خبص

رجعت راسي برگبته احچي
خيال: اووو مادري يمكن من ضغط الاشياء الي جاي تصير ويانا هالايام هرموناتي متخربطة فد مره

سكت ما حچه شي وانا گمت طفت الضوء ورجعت ماگدرت انام بس اتگلب وهو هم قلق وانا مو احسن حال منه ساعة انام على ايده ساعة اخلي راسي بركبته ساعة اوخر انام بعيد عنه ماعرف شجاني تزوهرت اريد بس اغمض عيوني ماكو اخر شي گمت شغلت الضوء رفع رأسه وگال

يمان: شجاچ اليوم

خيال: ماعرف يمان مو گادرة انام

فتح اديناته وگال تعاي هسه انومچ انا

رحت يمه وهم نفس الحاله ماگدرت اغمض عيوني اخر شي گمت گعدت سحبت باكيت الجگاير هو يباوع عليه عاقد حاجبه  خليتها بحلگه وورثتها اخذ منها نفس وشالها گال

يمان: شبيچ عمري اكو واحد هسه يدخن

خيال: ريحة الجگاير طيبة دخن وهسه انا انام حباب دخن

جرني نيمني بحضنه وهو يدخن واني مخليه انفي يم حلكه استنشق ريحة الجگاير وهو ياخذ نفس من الجگارة وبعدها يرجع يبوسني بحلگي الحد ما نمت ...

مرن 3 ايام باتر ماكو ما بين وحكمة سمعت برميم طالبة الطلاق ولانفصال لعبت لعب حتى گالت اتبرا منكم كوه سدوا الموضوع ويمان گللها خليها تفكر يلا سكتت ...

شغلهم چان مار بفترة هدوء لان جانوا يحضرون للروؤس  الكبار مره سمعت يمان يحچي ويا علي ويگله ناخذ فترة شهر نختفي عن الاضواء وبعدها نعاود ...

❛❛❛❛

وتر"

البيت متوتر ويمر بفترة صعبة بسبب مشكلة باتر ورميم امي كل شويه تفرفح والضغط صاعد ومحد يگدر يحچي وياهم رميم سادة عليها وهو برا البيت

طلعت من المدرسة كالعادة دائب منتظرني برا صار هو يجيني بعد ما جرحه صار زين صعدت ويا ساكتة شغل السيارة وگال

دائب: السلام لله مو البني آدم

گلت
وتر: هلاو

ودرت وجهي منه شال ايدي باسها وگال
دائب: وعليكم الهلاو

بقيت ساكتة الجو جان مغيم كلش والدنيا كأنها مگلوبة هوا عالي وزخات مطر انتبهت عليه شغل اغنية قيس هشام اسمها شمسويلك ماهتميت بقيت ساكته شفته ما رجعنا للبيت بقى يفتر باوعتله وگلت

وتر: رجعني للبيت تعبانة ووراي هواي دروس ما جاوبني اتقرب عليه تجه ايده بنص الكشنات يغني ويا الاغنية

ما ضلت كلمة حب حلوة..
إلا و بيها ما غازلتك
گلتلك عيني و گلتلك روحي..
ما أتوسل و اتوسلتك
ليش تنزل دمع عيوني..
وتخلي الناس يلومني؟
يا ابن الناس ارحمني دخليك ... شمسويلك

تفاجأت ان هو صوته كلش حلو بس مانطيت اي ردة فعل رجعنا للبيت بوجهي الغرفة حكمة بوستها وسلمت عليها بعدها رحت للبنات جانوا بالمطبخ سلمت عليهم وصعدت بدلت بعدها مر الروتين اليوم عادي

لليل عدلت فراشي ودخلت بي اريد انام اجاني إشعار على الواتساب صورته نايم والغرفة شبه ظلمة كاتب جواها

" تجين "

نفخت بملل وكتبت له
" بطل سوالفك دائب راح يجيك بلوك "

سديت التليفون غمضت عيوني ونمت ماعرف شگد مر وقت

فزيت من النوم هيچ اجاني احساس اريد اعضه استغفرت ربي ماكو بقيت الوب روحي رادت تطلع احس كلبي نطف بس اريد اعضه

عدلت گعدتي ورجعت باوعت للصورة الي دزها هيج احس سنوني نصكت اريد بس اعضه استغفرت احچي

وتر: يربي انا معليه هاي ابنه يريد يعضه

گمت نزلت وتسحبت الغرفته شوي شوي فتحت الباب على كيفي وشفته نايم ما لابس شي من فوك والغطا شامره على صفحة عيوني صارن يشوفنه مثل توم وجيري من يشوف الحمه ورحت ركض وگبل عضيته من زنده ما اشوفه الا مشعني من شعري يصيح

دائب: وثول وخري غبية شجاي تسوين

زدت بالعضة وهو مشعني أكثر مدري شصار رغم هو مااذاني ابد بس انا صرت ابچي واشهك تنهد جرني الحضنه مسح دموعي وگال

دائب: شبيج بابا شنو تتحولين بالليل

وتر: هو انا لو ابنك اشتهى يعضك هسه يعني مو ذنبي

دائب: انتِ سوي المصايب وذبيهن براس ابني المگرود

هو جاي يحچي وشفت عضلة ايده رجع الي احساس اريد اعضه رجعت عضيته بس هالمرة ما بعدني بس يردد بألم

دائب: احترگت عشيرتچ احترگت عشيرتچ وحكيم وياهم

رفعت راسي وحچيت
وتر: بعد اريد اعض ما جاي اشبع

جرني الحضنه غطاني يحچي
دائب: اشبعي عض براحتچ بس ابقي هنا وخليني انام

ما جاوبته ولا فكرت بشي چان كل همي اعض وهاي هي بقيت اعضعض بي وكل ما أأذي بالعضة يسحب ايده وبعدها يرجعها على هالحال الحدما غفيت وانا يمه ماحاسة على شي

گعدت الصبح على صوت تليفونه يدگ جاوب ماعرف شنو حچه شويه بعدها فزيت من صاح بكل صوته

دائب: شنو شبيها وينها هسه خوش هسه جاي جاي

وما شفته الا فز بسرعة يطلع النفسه ملابس ويرجف صاير عصاب وعيونه صارن حمر ويغلط ويفشر اخر شي انطاني ظهره رفع راسه الي فوگ عصر عيونه وصار يشهگ انصدمت من حالته اتقربت احچي

وتر: دائب شبيك شنو صار ليش هيج حالتك ويامن حچيت

ما رد عليه بس ردف بصوت مخنوگ وهو يلبس تيشيرته
دائب: مو وكتچ اوتار

كمل وراد يطلع اعترضت طريقة احچي
وتر: ما تطلع دائب يا تفهمني حالتك يا رجلي على رجلك شنو صار

گال بقلة صبر
دائب: وخري من دربي وتر اريد الحگ عليها

وتر: منو هي ماتطلع وحدك اريد اروح وياك

گعد على الچرباية وگال
دائب: روحي لبسي شي وتعاي يمكن احتاجچ

صعدت بسرعة للغرفة لبست عباية خليجية ولفيت الحجاب شلون مچان ونزلت طلعت ويا بس احنا الكل چان نايم

مرت نص ساعة تقريبًا وطبينا المنطقة شعبية وصلنا لحد فرع ضيگ طبگ السيارة ونزل بسرعة نزلت ورا شفته راح يم مره كاعدة بالباب تبچي ركضت عليهم وكفت يمه اشوفه راد يحضنها بس مثل الي تذكر شي حمحم وكعد يمها كلها بصوت مخنوگ

دائب: شبيچ يمة ليش كاعدة هنا تبجين بهالبرد

ماترد بس تضرب على راسها خفيف وتبچي رجع گلها بنبرة توسل

دائب: بس كليلي يمة شبيچ ياهو غاثج ليش هيج حالتچ

كالها وباوع اليمها لگه جنطة هدوم بصفها مشمورة گام افتر يسد على ايده بعصبية ويغلط
دائب: يمه بردي كلبي بس احچي

جاوبته بنحيب

اوتار: يا خالة شگلك ولدي طردوني ولدي طردوني من بيتي علمود نسوانهم

ما مفهمت شي وليش دائب اجه علمودها تشبهه الرسمه الي بالبيت بس مو نفسها الرسمه الي بالبيت تنطي شبه بيني وبينها مثل الي دامج ملامحنا انتبهت على صوته گللها

دائب: كومي يمه هما مايردونچ انا اريدچ

اوتار: لا خاله هسه اشوف احد من اهلي يجيني لاتعب نفسك مشكور

مدلها ايده وگال
دائب: يمه گومي وياي اعتبريني ابنچ يمه وگومي وياي فدوه وانا مو الوحدي هاي مرتي وياي

اخذها من ايدها گومها التفت عليه وگلي

دائب: سُكرة تعاي اسنديها وياي

ماعرف ليش ما صاحلي بأسمي يمها بس بعدين عرفت السبب مشيتها للسيارة المره جانت ترجف وهو شال جنطتها وكعدها بسيارة اخذ بطل مي وغسل وجها وراح من الاسواق وجاب الها ماي وعصير وشربها گوه ماتقبل بس هو يجبرها شويه ارتاحت صعد بالسيارة وگال

دائب: يمه شلون صرتي

لزمت خاصرتها بألم وگالت

اوتار: اطلب منك طلب

دائب: تأمريني مو تطلبيني عيوني الچ

اوتار: بعد روحي سالمة عيونك بس اريد توديني الدكتوري يصير يم جسر المحاكم احس روحي تعبانة كلش

دائب: صار هسه اوديچ

حرك السيارة والطريق كله هي تبچي وهو يهدي بيها ويردد يمه انا ابنچ لا تهتمين

اباوع عليها رغم كبر السن بس احسها صغيرة ، مرتبة يعني مو اكول محتاجة وشي وشلون دائب يأمن ياخذ احد من شارع مايعرفه وهيج مهتم ظليت طريق كله حسبه توديني وحسبة تجيبني

وصلنا نزلنا وياها ودائب دفع هو الكشفية ورغم هي توسلت بي مايدفع بس ما سمع منها

همزين چانت العيادة شبه فارغة گعدنا وهو راح حچه ويا السكرتير وكمل الاجراءات شويه ورجع سألها على الإسم من كلتله اوتار احس صاعقة نزلت على جسمي يعني شنو هي هاي اوتار أمه بقيت صافنة احاول استوعب الموضوع

فتحت عيني على وسعها والشهگة طلعت مني خلتهم يلتفتون عليه ارفعت انظاري الدائب شفته اشرلي بيده ان اهدي وراها اشر على شفايفه اسكتي گمت وگفت على صفحة احاول اهدي نفسي يعني ابد ما توقعت دائب يروح ياخذ امه بعد كل هالسنين ورغم كل شي صار

دخلها للدكتور وانا بقيت برا من بعدها طلعنا راجعين بالطريق خلت ليدها على كتفه وگالت بدموع

اوتار: يمه سويت وياي الي ما سوو وياي ولدي الله يحفظك الشبابك الله يوفقك ويستر عليك ويخليلك امك ومريتك

اباوع عروك رگبته كلها بينت واشوف عيونه تلالي بيها الدموع مسح عيونه وهمس

دائب: يمه انا هم ابنچ

تحسرت تحچي
اوتار: لو عندي ولد مثلك ما صار هيج حالي هنيال امك بيك

هنا دائب بعد ما تحمل اخر دمعة چان حابسها طاحت بعدها ترك العنان للدموعة الصارت تنزل وهي گلتله

أوتار: اسفة خاف ذكرتك بأمك

گال بصوت يتصنع بي القوة
دائب: انا امي عايشة وموجودة بس ماتريدني بس عندي ام ثانية ام يمان هاي امي الحقيقة الي اطب للجنة بيها والجنة جوه رجليها هي موجوه رجل امي الذبتني

اوتار: هي الخسرت الي عدها ولد مثلك ما ينعاف

ابتسم بحزن وبقي ساكت رجعت گالت
اوتار: فا گلتله يمه رجعني للبيت انا زاحمتكم هسه احچي وياهم وبالكت نوصل الحل هم كل مره يذبوني ويطردوني وارجع اتفاهم وياهم ويدخلوني

دائب: يمه هما ذبوچ وانا شتريتچ عوفيهم راح اوديج البيتي تعيشين هناك معززة مكرمة كلشي تردينه جوة رجلچ

اوتار: لا يمه ما ازاحمك انت ومريتك قابل تورطت بيه يا خاله

قرص خدي وگال
دائب: هاي مرتي وام ابني وما تضوج بالعكس تفرح بالي يجيها بس هسه هي يم امي باقية لان حامل

باوعت عليه وگالت
اوتار: يا شهر عليچ

اندرت عليها وگلت بقهر
وتر: مو مهم شگد عليه المهم ابني يربى بحضني ومن يگلي يمه اريد انام بحضنچ اضمه بنص روحي

سكتت محد بعد حچه على ما وصلنا الشقة صغيرة  تصير بطابق ارضي فتح الباب دخل جنطتها وگال

دائب: من اليوم هذا بيتچ اعتبري

اوتار: ثگلت عليك انا بس هالچم يوم باقية بعدها اشوف واحد من اهلي ياخذني بلكت بنتي يحن گلبها عليه

دائب: ما يحتاج

كالها ودخل الوحده من الغرف شويه وطلع بيده ورقه خلاها بيدها وگال

دائب: هذا رقمي من تحتاجين شي اتصلي عليه

ردنا نطلع صاحت ورا بصوتها اليرجف بعد ما ركزت بوجه زين

اوتار: انت منين ما گلتلي اسمك

غمض عيونه حيل اندار عليها وگال
دائب: اسمي دائب وابوي اسمه شهاب الدين بس انا ما مسجل بأسمه تعرفين هذا الاسم من قبل مار عليچ لو نسيتي واندفن ويا السنين

تعرفين ابوي الحقيقي عزيز لو نسيتي عزيز

نشغت حيل لطمت على صدرها وصاحت
اوتار: انتتتت دائب انت ابني

ابتسم هز راسه بأسف وگلها
دائب: لا مو ابنچ انا ابن حكمة تعرفين منو امي حكمة ! تعرفينها لو احچيلچ عليها

اتقرب عليها يأشر على نفسه ويحچي بحرگة
دائب: امي حكمة الي من كتلها بردان يمه لفتني بشيلتها امي حكمة الي كل ما شافتني صاحت شمعة بيتي مو الي گلتلي الله ياخذك

صاح بيها
دائب: امي لمتني من شارع وسوتني بششششرر سوت الي عائلة صار عندي ام واخوان اذا اطيح الكاهم قبلي يطيحون مو الي  نيمت ولدها بحضنها وانا بتانكي امي الي ماتنام الليل اذا تعرف بيه برا بيتي من ادخل واتصل عليها يلا ترتاح وتطمن

باوع عليها گعدت بالگاع وصارت تدگ على وجها وتبچي بنهيار قرفص گدامها ورجع كمل كلامه

دائب: الاكل تگطعه من حلگها وتحطه بحلكي ما تنطيني فضايل امي من جنت اجي مغثوث تكلي اكسر ظهر الي يغثك امي ما شافتني انضرب وسكتت امي ما نطتني حجابها من شتاقيت الها امي حكمة لمتني بحضنها امي الي غسلتلي ودرستني وكلتني وشربتني وحمتني وسوتني انسان بعد ما جنت نكرة

جان يصيح ويحچي بانهيار والشهگة بصوته لزمت وجه وگالت

اوتار: يمه ابني انت

نتر اديها وصاح
دائب: بأي حق تكليلي ابني بأي حق من شوكت انا ابنج من شوكت من شمرتيني بشارع ونطيتيني شال حتى ما انساچ من صار بيه تيفو من ورا شمس لو من زخت علي بـ 3 الفجر بطرگي بطرگ تراك نص ردان مشكك صارلي قرن لابسه تدرين امي حكمة شسوت من بردنه !شكت دشداشتها وخيطتها النا بجايم حتى ما نبرد !

امي ما عافتني ومن شافتني انضرب من رجال غريب حمتني ورا ظهرها والي شالتني تسع اشهر طلعت من احشائها جانت هي تجيب الصوندة اله حتى يضربني

مسح دموعه وگال بنبرة شويه اهدأ
دائب: تدرين من كلت الامي اريد انام بحضنج شكلتلي كلتلي تعال نام بنص روحي  هاي امي مو امي الي گلتلي روح نام بالسطح من شوكت انت متعود على حضني ، ديري بالج تگولين ابني انا ابن حكمة الي شالتني من الشارع وسوت الي اخوان وخوات وبيت وزوجة واطفال وعزوة وسند

مو الي شمرتني وجانت تكلي شجابك على ذول تقارن نفسك بيهم وتكول اخواني

نزلت يم رجليه وتبچي وتصرخ وتحچي
اوتار:  يمه ابني كتلني الندم وراك والله كتلني الندمممم ردت اموت بحسرتك

كومها وكلها
دائب: لا تجذبين كل أسبوع اجيچ اكعد بالباب وما اجيتي ولا هتميتتي ولا كلبچ حسج بيه اصلا لاتجذبين دائب الي جنتي تضحكين عليه مجرد ما تصيحين اله كبر وتغير اوتار كبر يمه كبررر كبرتني الدنيا بيوم النطيتني شال بدال حضنچ يمه الدنيا داست عليه بوكت الي نمت بسطح وولدچ ناموا بحضنچ الدنيا داست علي بوكت الي اخذوا بنتي مني

ضرب على راسه وكلها
دائب: الدنيا كبرتني من نترس راسييييي وانا اسمعچ انتِ ورجلچ شتحجونن شاب راسي من سوالفچ انتِ ويا وانا طفل شاب راسي من نكتلوا جهال گبالي كبرت من اسمع الجهال يغتصبونهم گبال عيني وماعرف شوكت يجي دوريييي

گام وگف وگال
دائب: هسه تگليلي كتلني ندم يمه يا ندم ، يمه انا عشت شي محد عايشه ومحد شايفه بس الله يعوض وأنتِ مهما يكون تبقين شلتيني 9 أشهر ودينچ برگبتي لازم يرجع
بس ديري بالج تكولين ابني انا ابن حكمة وبس

لزم ايدي وعافها تبچي بالگاع اخذني وطلع سد الباب عليها وطلعنا من العمارة الطريق كله بس يشهك بكتم لحد ما صف سيارة على صفحة بعد ماگدر يتحمل

جرني اله حصني وگال وهو يشهگ

دائب: وتر حسيت بلسعات صوندة تحسين بجسمي رجعت وصوت الجهال رجع بذاني وهم يغتصبوهم وتر رجع نفسي يضيع مني وانا احس بچلاب حواليه وتر طعم اكل الحاويات رجعليي من جديد وتر سميتچ على اسمها لان احبها اموت عليها بس لا تعوفيني مثلها

مسحت على رأسه وهمست
وتر: خلي نرجع الحكمة راح تسكن جروحك يمها

هز رأسه وابتعد ورجع يسوق ظل هيج يبجي ينحب لحد ما وصل للبيت اول ما دخلنا هو بوجه راح الغرفة حكمة دخلت ورا اول ما شافته گال يمه بصوت مهضوم سدت قرآنها وگامت تلگته بلهفة تگله

حكمة: شبيك يابعد امك شبيك يمه ليش صوتك مهضوم والدموع مغرگة وجهك يابعد روحي ياهو غاثك هسه اخابر اخوتك اخليهم يكسرون ظهره ياهو وياك امي

تحچي وتمسح بوجهه وترفع شعره من عيونه حضنها وضل يبچي بصوت كلش عالي ويگلها

دائب: يمه رجعت يمه امي اوتار رجعت يمه اليوم شفتها كاعدة نفس گعدتي اليوم شفتها مكسورة نفس كسرتي وحالتها مثل حالتي يمه العافتني اليوم اخذتها انا العافتني علمودهم ذبوها وانا اخذتها الي باعتني اليوم اشتريتها بروحي يمه بروحي اشتريتها اليوم رجعت ابن 9 سنين

شال اديها يبوس بيهن ويحچي
دائب: يمه شلون عبرتيني هاي الحالة عبريني ياها هسه يمه نار كبره بصدري يمه النار تسعر بصدري ماتقبل تطفه

يحچي ويفرفح بروحه
دائب: يمه انا ابنچ بس انتِ يمه انا ابن حكمة انا مو ابنها

باس راسها باس اديناتها ويگلها
دائب: يمه ما انساها شلون خيطتي هدومج حتى تدفيني يمه ما انسى شلون ضميتيني ورا ظهرج حتى لحد يطگني

گعدت على الچرباية هو تمدد على رجلها بقت حاطه رأسه بحضنها وتمسح عليه وتقرأ ايات قرآنية الحدما نومته وهو من التعب غفى خلت المخدة جوه رأسه وطلعت من الغرفة تحچي وضايجة ما قابلة ابد على سواية دائب ان جاب اوتار وخلاها يمه بعد كلشي سوته اخذت تليفونها واتصلت على يمان شويه ونزل هو وخيال ما قبلت تحچي الا يجي باتر وبقت تلح عليه الحدما جابته وگعدتهم بالصالة حچتلهم كلشي صار وانا هم حچيت گام باتر وگال بعصبية

باتر: وهسه شني هاي هم قصة وتحتارون بيها مثل ما شمرته بالشارع وگلبها ما رف عليه هو هم خلي يشمرها يطبها مرض خلي ولدها الي عافت دائب علمودهم يلفونها

ويا كلامه انفتح الباب وطلع دائب من الغرفة يحچي

دائب: مستحيل اسويها مهما يكن تبقى امي وانا هسه رايحلها

اباوع على حكمة صارت تبچي وحسيتها مثل انهضمت من كلمة دائب گلتله

حكمة: اذا رحت الها لا انا امك ولا تعرفني

دائب: شجاي تحچين يمه

حكمة: انت ابني وانا الربيتك وهاي ماتوصل بيتي ولا تعتبة واذا معتبرني صدك امك ماتوصل الها ولا تروح الها واذا طلعت ورحت الها انسى عندك ام اسمها حكمة

لزم رأسه وگال
دائب: بس فهميني يمه وين اوديها وين اطيرها

گام يمان لزمه وگال
يمان: اهدأ هسه نشوف حل

انتبهت على باتر حچه
باتر: روح وديها دار مسنين

ما حسيت الا دائب ماعرف شلون طفر ضرب باتر بوكس وصاح بي

دائب: اذا نرجس عايشة تذبها بدار المسنين

رجع باتر ضربه حيل وصاح
باتر: ماتقارن نرجس بهاي امي الاخر نفس لامتنه بحضنها لا تقارن فهمتتت

صارت حكمة ويمان بينهم اباوع الدائب الدموع صارت تلالي بعيونه گله

دائب: مو ذنبي امكم الاخر نفس تحبكم وانا امي اول شي ضحت بي انا

گالها وراد يطلع من البيت باوع عليه على باله اروح ويا ماتحركت ضميت روحي ورا خيال هز راسه وعافنا وطلع من البيت

يمان عافنا وطلع وراه

حكمة ظلت طول اليوم ضغطها معلك كل شويه تقيسه الها رميم ماكو معلگ ماينزل وماتقبل تاكل شي او حتى تاخذ علاج وتلوم بروحها

تكول ماربيتهم سنين حتى هسه يتعاركون علمود هيج وحدة بحياتهم ماتعاركوا ولا واحد غث الثاني هسه تالي رباي وشكاي يتعاركون من شوكت باتر يضرب اخو علمود شي من شوكت يمان يسكت وما يحل البينهم من شوكت دائب يغث خوانه من شوكت

حسيت حكمة القهرة كاتلتها حيل خفنا عليها خاف تنجلط باتر بس صارت المشكلة طلع ويمان لحگ دائب واحنا بقينا هيچ گاعدين وساكتين ...

❛❛❛❛

يمان"

طلعت ورا دائب يادوب لحگت عليه براس الشارع گبل شخطت السيارة وطلعت ورا عرفته وين رايح دائمًا من يختنگ يروح للشط وصلت هناك لگيته گاعد بنفس المكان مالتنا واسمع البچي مالته انا اخو اول مره بحياتي هيچ اسمعة هيج بحيث بچه بچي نحب نحيب رافع سحاب القمصلة على وجه بس عيونه طالعة ويبچي گعدت يمه بلا كلام صفن شويه بعدها گال

دائب: صح هي مو خوش ام بس انا احبها هي امي وما مستعد اخسر حكمة علمود احد بس اوتار شلون اعوفها ولدها عافوها انا هم اعوفها

خليت ايدي على ظهره وسحبته الحضني احچي
يمان: بابا اسمعني للنهاية احنا هواي غلطنا وهواي سوينا اشياء ما ترضي الله والي جاي يصير حاليا هو دفع الثمن للي صار وللي سوينا ، هاي حالتنا والصار كله خلاك تذكر من اول يوم وعيت بي لدنيا لليوم مو صح

دائب: صح اليوم وكأني رجعت عشت طفولتي من جديد كلها بظرف ساعات

يمان: زين ما تحس هذا الشي جاي يذكرك بكلشي سويته حتى تتغير امك وحكمة مكدور عليهم وسهله ، انا وباتر وياك وامي ماكو اطيب من گلبها خلي نحل الموضوع وونطي الامك بيت وتگعد بي

دائب: واعوفها تعيش وحيدة

يمان: ايي تعيش وحيدة هذا جزات انها دفرت رزق رب العالمين الها وتركتك والي صار وياك اليوم اكبر برهان من رب العالمين حتى تفكر بحياتك وحياة ابنك ، ترا الموضوع ما يقتصر على الشغل وبس الموضوع من جوه من داخلنا احنا نريد نتغير لو لا

دائب: طبعًا لازم نتغير ونظف داخلنا قبل خارجنا

يمان: جيد ولا تتوقع رب العالمين حملك فوگ طاقتك لا رب العالمين سوه كل هذا علمود تحس على نفسك ويختبرك بالصبر ويختبر بر الولدين عندك وحتى تعرف تربي ابنك صح وتتعلم

تنهد يحچي
دائب: عتبي مو عليكم عتبي على بنت گلبي الما وگفت وياي

يمان: ماتگدر تلوم وتر لان ما اجت وياك وتر بنت حكمة ومستحيل تتقبل امك لانها انسانة أذت رجلها واحنا كلنا ما نتقبل شخص أذاك شحال وتر طفلة ومتعلقة بيك وامي من غيرتها عليك هيچ سوت ماتريد واحد ياخذ ابنها من حضنها يعني تخيل انت  يجي واحد غيرك يگلك اريد اخذ وتر وهو ابوها الحقيقي تقبل تفرط بيها وتنطيها

دائب: لا طبعًا انا ربيتها ولازم ترجع الي

يمان: شفت الموضوع بي جوانب هواي ما لازم تشوفه من جانب واحد واعتبر الي صار وياك اليوم هو الثمن الي دفعته مقابل كلشي سيئ مر وسويته بحياتك هاي رسالة الك من ربك

ضربت على ظهره حيل وحچيت بحزم
يمان: شراع السفينة بيدك اعرف شلون تقودها صح وترسيها على بر الامان

شبگني حيل وگال
دائب: ابوي انت

يمان: ابني العاقل

ماحسينا الا دائب اندفر من ورا حيل وصوت باتر يصيح
باتر: شنيي عود هم عندك كرامة وتزعل

شد على حلگة بغضب وگله
دائب: طيح الله حظك كسرت ظهري واصابتي بعدها توجعني

جره وگومه فتح اديناته يحچي
باتر: دتعال اشبكني انا المنقذ مالتك

حضنه ويگله
باتر: انت اخوي وضربتك مثل ضربة رميم احلى من العسل على گلبي

وبس هذا الصار

خيال ..

خيال: يعني انت هسه صالحت باتر ودائب

يمان: ايي من چنا گاعدين على الشط

بعده يحچي واسمع صوت حكمة صاحت من جوه
حكمة: وروح ابوي وتعب رباي يا يمان ويا باتر ويا دائب احسب من الواحد للخمسة الي ما اشوفه مزروع كدامي اله العب على ظهره شحاطة الفواتح

گام يمان طلع من الغرفة وانا ورا باوع الي وگال
يمان: واحدنا مشيب وهي بعدها تهددنا بشحاطة الفواتح

نزلنا لگينا باب غرفة حكمة مفتوح الولد دخلوا عليها وانا ورميم ووتر بقينا واگفن بالباب نباوع عليهم

دائب يم رجليها ويمان بصفها حاضنها وباتر فوك راسها يبوس بي وبقوا يبوسون بأديها ورجليها

باتر يگلها
باتر: لا تضوجين ولا تهتمين هسه اجيب الج جهال توم ثاني وربيهم

يمان: مرتي ماتقبل تجيب جهال وانا اخاف منها ربيني انا وهذا دائب ابنه اكيد ماعنده تربية هم ربي وربي ابنه ونرجع الرهبان الصغار وهم عندچ بت دائب وتيره ام السان وسويلنا اعادة تربية ولا ضوجين ولا تهتمين يبعد رويحتي

باسها باتر وحچه
باتر: بس انا متربي من گاعي ما احتاج يمه

ضربته وگالت
حكمة: كلهم مگدور عليهم ولدي فقره بساع يتقشمرون الا انت يعربيد البساتين ما تنكض اسمعني الي مزعلها اليوم تصالحها لا اطلع شحاطه الفواتح وانت وجهالك وين ما يوجعكم

درت انظاري على رميم ماحجت شي بس عافتنا وصعدت وهو صاح

باتر: بهاي المناسبة راح يمان يعزمنا على أكل

كلمن راح بصفحة ويمان وخاله گعدوا بالصالة عفتهم وصعدت على رميم لگيتها گاعده تبدل الجهالها وگفت بالباب احچي

خيال : ريمه انتِ بخير تراجعتي عن قرار الطلاگ مو

رميم: لا ما تراجعت وهمزين صعدتي ياريت تروحين اليمان وتگليله اريد احجي ويا هسه

خيال: تمام گومي وياي گاعد بالاستقبال هو وحكمة ودائب راح بغرفته وباتر طلع بالحديقة سمعته قبل لا اصعد يگول عنده شغل

لبست حجابها ونزلت وياي وفعلًا ماكو غير حكمة ويمان وجهوا انتباهم النا گعدت گبالهم وگالت

رميم: يمان انت سكتت عن الموضوع وانا سكتت لان شفتك ما فارغ بس اعتقد هسه الوقت مناسب هم انتو ماخذين ريست من الشغل وهم وضع البيت مستقر ياريت هسه كلشي يتم وتجيب سيد ونطلك من باتر

قبل لا يحچي يمان صاحت بيها حكمة
حكمة: شنهي رميمه ذانچ سامعة الي يطلع من حلكچ تردين تعوفين باتر تردينه يموت وراچ بعدين هذا ابو ولدچ شلون هيچ تسوين هاي العايزة تالي هذا كله تتطلكون باتر اثيول وطول عمرج تمشينه على العجين مايخربطة ضبي ونعلي ابو طاهره بس مو تطلگين منه ،

يمان: بعدين ياهو كلچ باتر يقبل يطلگ هو بعز المشاكل مچلب بيچ بيده ورجله هسه يطلك

هنا رميم ثارت عليهم

رميم: انتم شنو محسبين يعني انهان واسكت لو ينداس علي واعبرها لاتنسون انا رميم بت سليمان لا تتوقعون انهان واسكت انا اريد اطلك فتهمتوا لو لا رضيتوا او لا جهاله خلي ياخذهم محد يلوي ذراعي وبعدين مصدگين باتر يتحمل مسؤولية هو مسؤوليته ما متحملها مايعرف يتصرف حتى ويا نفسه تقنعيني يتحمل جهال صغار

اتقربت گعدت گبال خاله حكمة لزمت ركباتها تحچي بعبرة
رميم: خاله تقبليها يگلي ماعندج اهل انا النفسي كلشي لايتوقع لان ماعندي احد انجب وسكت عندي بيت سليمان وعندي بيت جدي وعندي وظيفه احسن عيشه اعيش خاف محملني منيه ما عاش ولا كان الي يركبني فضل امداه يوم يعاير مرته لان ماعدها اهل هذا هسه باقل موقف هيج حجه بعدين شيسوي ! من تحچون احجوا حچايه حق لا تاخذكم عواطفكم وتبررون الغلط

يمان: حقچ الغلط ما يتبرر وباتر غلط

گامت وگالت
رميم: وانا ما مجبوره اتحمل اغلاطه الطلاگ اذا ما تم اليوم تحلمون حلم اگعد هنا دقيقة وحدة وجهالكم خذوهم انتم انا رميم محد يلوي ذراعي

حكمة: بس مايصير هيج لو كلها تطلگت من اول مشكلة جان الناس كلها متطلگه

رميم: طبهم طوب الي تقبل بالاهانه وتسكت عساها وابو زايد انا ما اقبل انا الله خلقني هيج شلون تطلگوني لا اطلك بطريقتي

يمان: هاي هي يجرالچ هسه اكول الدائب يجيب سيد

ويا حچاية يمان دخل باتر عيونه حمر اتقرب على رميم يحچي

باتر: ريمه شجاي تحجين طلاگ شنو الي تردين تطلگينه تعرفيني ما اقصد الحچاية ومستحيل اعيرچ بيوم انا الي ما اسوه بدونچ انا النكرة بدونچ

ما جاوبته كبل طلعت صعدت فوگ وراد يروح وراها  لزمه يمان

دار على يمان وعيونه بدأت تجمع دموع گله

باتر: يمان بروح نرجس احجي كلمة شنو تطلگ تريد تعوفني والله ادري غلطت من عصبت عليها بس والله بساعة عصبية ماعرفت شلون حجيتها بس ردتها تسكت مادري يمان بداعت امي حكمة بالخوه الي بيني وبينك لا تخليها تسويها مستحيل ما اطلگها فتهمتوا ما اطلگ

الكلمة الاخيرة گالها بصايح وعصبية رجع صاح
باتر: باحلامكم اطلگ رميم مستحيل اعوفها مستحيل كلشي مر وما عفتها اعوفها هسه

يمان: انت مجبور تطلگها باتر رميم اذا ما طلگتها راح تطلع ومحد يشوف الها اثر وانت اكثر واحد تعرف رميم ما تحجي شي اذا ماتكون دارسته الف مره

ضرب على راسه يصيح
باتر: ماگدر ماگدررر

يمان: ميخالف ما اكلك طلكها كلش تكدر ترجعها بعدين بس خلي تعدي هاي المهمة بس مشينا باتر رميم ترجع الك بس مو هسه بالوقت الي نكون مصفين كلشي تفهمها على كيفك واكيد ترجع

باتر : يمان شجاي تحجي بروح امي شجاي تحجي رميم اذا تطلگت ما ترجع تفهم ماترجع مستحيل اسويها واتركها او اطلگها اطلع من البيت ما تشوفني تعتبرني ميت بس ما اطلگها ، تعرفون شنو البنية الي عايش على نفسها تحرم علي !

گعدوا حكمة يمان گوه وحكمة تگله
حكمة: يمه البنية جرحها جبير مشي طلاك واكيد بعدين رميم ترجع يمه بس هسه البنية جرحها اخضر لا تزيد الطين بله

گوه سكتوا يمان قنعة يجيبون سيد وتطلگون شرلي يمان اصيح دائب ماتدخلت ولا حچيت لان حسيت اختي من صدك مجروحه طلع دائب ويمان گله يروح يجيب سيد حتى ينهون كلشي طلع دائب كوه عليه وباتر يشيل روحه ويرگعها اتقرب يم يمان يحچي

باتر: يمان بروح امي بروح امي لاتخليها تطلگ اسوي اي شي انعل ابو شغل لابو الميناء لابو ساعة الگشرة كلشي ولا رميم اذا تعوفني ادمر يمان احچي كلمة وياها

يمان: بس اهدأ خلي نفهم

باتر: تدري شنو رميم بنسبة الي رميم نرجس بعيني تفهم شنو نرجس بعيني رميم يعني اتيتم مرتين يمان خليتني اروح الحكمة وحرمتني  باخر لحظة ويا امي لا تحرمني من رميم

حضنه يمان يگله
يمان: باتر حبيبي اهدأ شويه عيني بس اصبر بس خلي نخلص وهي ترجع رميم برجليها ترجع بس اصبر

باتر: لاتگلي اصبر بحضنها وما اتحمل تشيل ايدها عني لا تخبلني وتگلي تصير مو حلالي ولكك تعبت بيها تعبت هيج تروح علمود ك*** من انعل ابو لك*** الي يبعدوني عنها يمان روحي جاي تحترك ولك يمان نار شبت بضلوعيييي شلون رميم تروح مني ولك ام الاكبر هاي شلون انطق الكلمه ولك روحي تطلع قبل طلوع الكلمة مني

بقيت صافنة على خاله ووتر صارت تبچي ماتحملت صعدت فوگ وحكمة حلگها يبس مدري شنو احچي يعني توقعت الموقف راح يكون صعب بس مو الهالدرجة

گعد يمه يمان يمسح بدموعة وباتر روحه تلوب ويشهك ويا كل دمعه العبرة خانگته يريد يحچي مايكدر اديه يرجفن

اخذه يمان وگومه للمطبخ لان حكمة كلش تعبت رحت وراهم وكفت بالباب اشوفه حضنه ويحچي ويا بتفهم

يمان: باتر ابني بس شد على نفسك ابوي انت هذا الثمن هذا ثمن اغلاطك الفاتت كلها گلتلي بس نطيح هذول هاي هي وگلتلك ندفع ثمن غالي وكلنا جاي ندفع دائب بأمة وانت برميم وانا ماعرف الدور شلون يجيني

يحچي وهو يشهك واحس خلصت طاقته

باتر: كل شي ولا رميم اخذوا روحي ولا تاخذون رميم مستعد ادفع عمري وحياتي كله وابقى ويا رميم لو دقيقة وحدة

افتر بالمطبخ يحچي
باتر: اختبارك صعب ربي اختبارك صعب كلشي عديت بس هاي ماعديها ادري غلطت ادري سويت كلشي ياربي بس مو برميم ربي مو برميم  طلعها بيه انا ربي روحي لابت تريدها بس اشمها الاخر لحظة ولك يمان ما استوعب الي جبتها بالاه والويلاه تروح مني ولك جبتها بتعب العمر كله جبتها بطلعان روح راحت مني هيج

انتبهنا على صوت وتر گالت
وتر: السيد وصل ودخله دائب للاستقبال

باتر عاف يمان واجاني يحچي بترجي
باتر: اروحلچ فدوة بس خليني اشوفها بس احچي وياها الاخير مره بس احجي وياها يعني يهون عليها تكلي انت ابني الثالث وتيتمني هي اكيد مايهون عليها الاكبر والكرار يبچون اكيد مراح تقبل اتأذه بس خلوني اشوفها اريد اشمها بس اشوف عيونها

ماعرفت شحچي مسحت دموعي وگلت
خيال: باتر اهدأ ترا رميم باقية كبال عينك هي هسه هواي مجروحة منك اكيد فد جم أسبوع وكلبها يهدي واكيد ترجعون تعقدون واصلا تكدر ترجعها خلال العده اهدأ راح تموت باوع نفسك شلون صرت ، انت مو تگول انا اختك امشي وياي بس خلي نسايرها وانا ما اطلع بت ابوي اذا ما رجعتها الك خلال العده بعد بس هدي مردت گلبي

باتر"

مشيت وحسيت روحي زحفت بأقدامي الموقع إعدامي ويا كل خطوة مني احس روحي تنسحب الداخل مغارة مظلمة مابيها غير صوت صدى يردد بأنايشد الألم الراح تلازم روحي بعدها

وصلت وتثاقلت رجلي ونفسي ضاگ عليه وروحي بدأت تضيع مني شفتها گاعده وجهالنا بحضنها بكل شموخ كالعادة قوية وشرسة والقوة تلالي بعيونها ولا هامها شي وانا احس نفسي جاي ياخذون امي مني تذكرت بليلة من ليالي گتلها

باتر: حطامي المستبدة افعاي رميمي ريماي مرمري مراري امي

بوست ايديها وشميت ركبتها وهمست
باتر: راحتي بالدنيا انتِ

باوعتلي بعيونها التاخذ عقلي وتسلب اخر ذرة إدراك عندي وهمست بسؤالها المعتاد
رميم: تحبني ؟

باتر: ظلمتيني من گلتي تحبني وظلمتيني من گلتي مهوس بيه وظلمتيني من گلتي يعشگني وظلمتيني من گلتي انا مصدر أمانه الوحيد وظلمتيني شما سميتيني
انا عايش على نفسچ ، الدنيا المابيها حطامي ما تنعاش لحظة ريماي

بأستني بهدوء وكلتلي بصوتها اليسكن جروحي وكلشي يهدء بيه من اسمعه

رميم: أحبك بتاري

باتر: احبج حطامي

وعيت من لحظاتي على كلمة طلعت مني بدون ماعرف وما احس اشك انا الكلتها مستحيل انطقها مستحيل

باتر: انتِ طالق

   يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

ماعرف شنو احچي گلبي انمرد 😔💔

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

متابعة ممتعة🦋