رواية تاروت الفصل الرابع عشر 14 - بقلم زيـنـب علـي 🦢

#تاروت

البارت «13»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

وقد تُصبح روحي
ساعة رمل،وينزل فيها
الفراغ البطيء!

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

همس بأذني بكلمات حسيتهن مثل السم وينحقن بگلبي

بصوت ذايب

يمان: خلي يصير بعلمج انا احبج وحبي فوگ الحد ومسحيل بيوم من الايام اتخلى عنج بس لا تنتظرين مني اتخلى عن اخوي ووصية امي ماكدر حاولي تحسين بيه مستعد اعوف الخاطرج الدنيا والبيها الا اخوي

رفعت راسي باوعت بوجه جان مغمض عيونه ويحجي دفعته مني وحجيت

خيال: مجرمين شتوقع منك غير الخذلان هو التهون عليه حياة الناس ما يهون عليه يظلمني

يمان: لا تحاولين مااكرهج

خيال: اذا تكرهني ماراح تتعذب وانت تشوف المصايب التوگع على راسك من وراي انا اريدك تبقى حابني حتى تتعذب حسب الاصول

ارتجه على الباب وميل راسه يباوع عليه بتعب كملت كلامي

خيال: والله وروح اهلي الا اخليك تجرع السم وماتجرعني

يمان: الساحة الج انا اشتغل وانتي اشتغلي ونشوف منو اليربح بالنهاية

خيال: انشوف وهسه وخر من خلقتي اريد اطلع ماتحمل هالقرف اكثر من هيج

رفع حاجبه وحجه بطريقة مامصدگ كلامي
يمان: الهالدرجة خليلي

خيال: واكثر الدرجة بعد دقيقتين اذا ماختفيت من گدامي ممكن اتقيأ بنص وخلقتك

ضحك وعينه صارت على ايدي السادتها رجع باوعلي وحجه

يمان: اخذتي معلومات تفيدج شاطرة

خيال: وخر اريد اطلع

يمان: بسرعة خمنتي الشفرة لان تعرفين نقاط ضعفي وين

ابتسمت بفخر وحجيت

خيال: الاعتراف بنقاط الضعف هزيمة

يمان: مو مشكلة انا مهزوم بعيونج

خيال: افتح الباب راح افلشه فوگ راسك

اتقدم عليه يحجي
يمان: صايرة عرمة

خيال: وهسه شتريد

يمان: حلك

خيال: لو يصير علاجك تموت گدامي وماتحصل هذا الشي الاخر لحظة بعمرك

طلع باكيت جگاير من جيبه سحب جگارة ورثها وحجه

يمان: يگولون حلاتها بالغصب بيها لذة من نوع اخر

خيال: جرب وشوف شسوي

گعد على التخم يدخن
يمان: شسوين احنا وحدنا والباب مقفول

اتقدمت عليه رفع راسه يباوع عليه جريت الجگارة من ايده اخذت منها نفس وهو صافن بيه نصيت عليه جريت ايده جان رافع اكمام قميصه شلت الجگارة وطفيتها بيده وانا اباوع بعيونه ، ماانطه اي ردة فعل غير ابتسم بجانبية وحجه

يمان: هاي الله قدرج عليها

خيال: مو ذنبي اذا انت حيوان ومتحس

فزيت من گام وگف وصار يفتح بقميصه رحت بتجاه الباب لزمني وگال

يمان: مااحس بنار الجگاره لان جسمي شبعان بيها ومتعود بكل شبر منه لسعه شكل

درت عيني عليه ونصدمت بمنظر جسمه جان مشطب من ناحية صدره وبطنه ومبين اثار قديمة كلش لان مباقي منهم الا شي قليل وعلى صدره مبين لسع النار انتبهت عليه يحجي

يمان: 69 اثر من غير الراحن كملتيهن انتي صارن 70 بالتمام كلهن تعذبت بيهن الا الاخير مثل العسل على گلبي

فزيت على صوت الباب صارت تندگ بقوه وحكمة تصيح

حكمة: يمان طلع البت راح احرگ البيت على راس الخلفك

عفته وصرت ادور على المفتاح الشمره الحدما لگيته وحكمة مستمره تصيح وتهدد فتحت الباب وطلعت صارن گبالي رميم وحكمة شافته يلبس بقميصه لطمت على خدها وحجت

حكمة: شسوالج ولج احجي

تحجي وتگلب بيه

خيال: ماكو شي خاله لا تخافين

عفتها تحجي عليه وصعدت للغرفة احس الحرگه وكفت بحنجرتي صارت توجعني من القهر صار عندي خبط مشاعر ما عرفت افسره شنو

توجهت للحاسبة مالتي خليت بيها الفلاشه وصرت ادور بيها وادخل على ملفات اريد افهم شي ماكو كل الاوراق مكتوبة بس بطريقة مشفرة احتاريت شلون افك التشفير انتبهت على رميم اتقربت گعدت يمي وگالت

رميم: شلگيتي

درت اللابتوب عليها وحجيت

خيال: كلشي مشفر ومكتوب بطريقة الرسائل المعناة

رميم: ليش ماتاخذين الحاسبة الياسين هو هكر واكيد يعرف بهاي السوالف

خيال: ذكرتيني من ايام الجامعة ما سمعت اخبارة بعد وين الگاة

رميم: اذا تذكرين هو جان عنده محل الكترونيات بالعشار يمكن بعده بنفس المحل نسأل عليه هناك

كمت وحجيت
خيال: ماكدر اتحمل الباجر هسه اروح

بدلت ملابسي واخذت الحاسبة وردت اروح حكمة ماقبلت اطلع وحدي الا تروح وياي اخذتها وطلعنا تحت انظارة المستفسرة

❛❛❛❛

رميم"

بس طلعن خيال وحكمة من البيت كبل صعدت ركض اخذت تليفوني دخلت على الانستا شفته ناشر ستوري صورتة على الكورنيش يشرب ارگيله كتبتله

" طالع حلو اليوم "

ماجاوبني عفته ونزلت سويت شي اكله دخل يمان للمطبخ فتح الثلاجة ياخذ مي سكتت ماحجيت ويا سمعت صوته گال

يمان: رميمي انتي هم زعلانة عليه اكيد

تنهدت بتعب وحجيت
رميم: اجذب عليك اذا كلتلك لا زعلانة ومحترگ گلبي كلش هم بس ماحقدت

يمان: ليش

رميم: لان لو انا بمكانك واختي متهمة بجريمة قتل اعوف الدنيا واكف بصفها احذب العالم واصدگها

يمان: شعجب ماگلتي اوكف ويا العدالة

رميم: خلينا من المثالية الزايدة كل احنا بشر وتقودنا عواطفنا

سند ايده على الكاونتر وحجه بحيرة

يمان: برأيج خيال راح يجي يوم تسامحني

رميم: لا

يمان: الله يبشرج بالخير

ضحكت وحجيت
رميم: تريد اچذب عليك خيال من تحقد على شخص بعد هاي هي امي الله يرحمها جانت تكللها گلبج جلمود مايحن ماجنت اعرف معنى هالكلمة غير من طلعنا من المحكمة وشفتها طول الطريق للبيت هي ماهتزت ولا وگعتلها دمعة من يومها قريت عليك السلام ، انت جاي تشوف بعينك

هز راسه ساكت رجعت حجيت

رميم: حتى اذا صارت معجزه وطلع اخوك بريء خيال ماتسامحك من هسه اكولها الك

يمان: الله يريح گلبج مثل ماريحتي گلبي

حجه الكلمة كرص خدي وطلع من المطبخ اخذت اكلي وصعدت فوك فتحت تليفوني لگيته مجاوبني تقريب ورى نص ساعة كاتب

" كل يوم حلو مو بس اليوم "

دزيتله صورة للأكل وكتبت " جاي اكل "

كتب " الف عافيه "

ضحكت وكتبتله " شبيك هالكد ثكيل شدعوة "

ردني بـ " ماكو اثگل مني وسيراميك مكة "

كتبتله " اريد اتصل عليك انطيني رقمك "

" ستري علينا بويه واثكلي شتردين برقمي ماانطي اتصلي على الماسنجر "

كتبتله " واذا جبت رقمك "

" شتردين انطيج"

كمت نزلت جوة اشوف يمان وين شفته گاعد بالحديقة صافن ويدخن دخلت للاستقبال ادور على تليفونه شفته على الشحن اخذته بي رمز بس كتبت مواليد خيال فتح مامغير الرمز مالته

رميم: نسيبي كلش موزين بالرموز بكلشي لازم يخلي شي يخص خيال

دخلت على سجل الاسماء كتبت باتر طلعلي الاسم وعنده خمس ارقام كلهن نقلتهن بجهازي ورجعت كلشي المكانه وطلعت رجعت للغرفة فكرت اذا اتصل عليه هسه يشك خليها كم يوم يلا

بقيت افكر شلون ممكن اتقرب منه هو جبل مايهزك ريح اذا انا مااكتب هو ابد كلشي مايدز بقيت اگلب بصوري لكيت صورة حلوة ماخذتها بالمعهد غطيت نص وجهي وكتبت عليها عبارة ونشرتها بالحالة

ورا ساعتين لكيته متابعني وراد على الحالة كاتب " هاي انتي هيج حلوة ؟ "

كتبتله " انت شتگول "
دزلي " جذابه مبينه انتي جنج جبار ابو الشربت "

سويت نفسي ضايجه وكتبتله " شكرًا "

رجع دزيلي " زعلتي "

" لا " كتبتها وسديت النت واخذت تليفوني ونزلت غسلت المواعين صارت عصر كلش وحكمة وخيال بعدهن ماكو بدت الدنيا تظلم ويمان سيارتة ماكو طلعت للحديقة جانت وحده من الجيران تخبز بتنور طين بيتهم بصف بيت حكمة دائما من اطلع تحجي وياي اسمها هيله سلمت عليها وكعدت يمها على بلوكه حجت

هيله : ميلي غادي لا النار تلهب ويهج الحلو شيخلصنا من حكمة

رميم: لا عادي ضايجة اريد اسولف وياج

هيله : لا تحجين حبوبة اللهم صل على محمد وال محمد راح احسدج

ضحكت على سوالفها
رميم: مو الهالدرجة

هيله: جنج حلقومة حتى هذاك اليوم من سمعنا بسالفة الحرامي خفنا عليجن وابو محمد گال خاف واحد من الحراس طمع بالبنيات

رميم: معقولة ؟؟

جانت تخبز وتحجي اتقرب مني وحجت بصوت هادئ شوية

هيله: يگولون شايفين واحد منهم عابر من السياج وبالمرتين مطفين هذن اليصورن

رميم: منو گال

هيلة: ابو محمد سامع من الگهوة الناس كلها تحجي احسن شي سوته حكمة جابت كرايبها حتى تسكت الوادم

بقيت افكر بكلامها معقولة واحد من الجانوا واكفين بالباب زين شنو مصلحتهم مالگيت جواب الاسألتي فتحت تليفوني بس اجاني النت ووصلن المسجات الجان دازهن مافتحتهن ورا دقايق اتصل على الماسنجر ترخصت منها وكمت اتمشى بالحديقة وجاوبت

رميم: تفضل

باتر: يزيد فضلج لا سلام ولا صخام كبل تفضل

رميم: انت مدري شبيك ماتتحاجه مسوي نفسك ثكيل على اساس

باتر: وانتي زاحفة

رميم: ليش يمه زاحفة عليك ومادري بروحي انت شايف وجهك بالمرايه لو مرايات بيتكم متكسره

باتر: دخيلك يحزام الحمزة موش لسان يصلي صلي جا ياهي اليوميه ترد على الحالة مالتي

رميم: وانت لزگت بهاي واذا رديت اصلا هو ليش اسمه تواصل اجتماعي غير سوو حتى نضيف بعض ونتفاعل بس انت شكلك زاحف بس بثكل

باتر: كلامج ينگط سم جنج حيه صفره

رميم: وانگط سم

باتر: بيها الخير ان شاء الله انا هم احب الحيايه

رميم: ليش ؟

باتر: هيج احسهن يونسن ، المهم كون زعلتي اشاقة وياج ترى تخبلين جنج سيراميك مكة

رميم: ومتصل شتريد

باتر: عندي شغل بس افرغ نحجي خوش مبينه سوالفج تونس والحمزة

رميم: ميخالف

سده ماصدگت راح يصير شهر هو على كد سؤال وجواب ومرات مايجاوب فكرت لازم استغل هالفرصة واتقرب اكثر ...

❛❛❛❛

خيال"

طلعنا للعشار وسألنا على اسم ياسين الجوكر هيج جان لقبه عرفوا بس گالوا ان الولد عزل محل الاجهزة ونقل الشغل البيته اخذنا العنوان ورحنا للبيت اول مانزلنا من السيارة الاجرة حجت حكمة

حكمة: دولاب دولبك يمفلوك وين حاط بيتك ورى الشمس

خيال: حكوم هي كلها ساعة

حكمة: خايبة دمشي تكسرت من السيارة بلكي الله ويعرف يفكلنا خلي اعرف السربتيه شمصخمين

دگينا الباب طلعتلنا بنيه شابه حجت ببتسامه

- تفضلوا منو رايدين

حكمة: يمه جايين على ياسين المهكرجي

بسرعة حمحمت وحجيت
خيال: ااا ياسين جايين على ياسين موجود عندي خلل بالحاسبة مالتي

باوعتلي بنظرات غريبة ورجعت دخلت راسها وصاحت

- ياسيينن جماعة بالباب عليك

طلع يعدل بشعرة اول ماشافني فتح عيونه مامصدك وحجه

ياسين: يابه هاي خيال

خيال: شلونك ياسين

ياسين: تمام انتي شخبارج وينج بعد ماشفناج

خيال: الحمد لله والله مشاغل

حكمة: نبقى بس سلام لو نخلص شغلنا ونروح

انتبه عليها وحجه

ياسين: اسف يابه تفضلوا تفضلوا

دخلنا وهو يسألني عن احوالي والبنية ضيفتنا ، سولفتله عن الموجود بالحاسبة فتحها وبقى فوك النص ساعة مدري شيسوي ويكتب بعدها گال

ياسين: خيال منين جايبه هاي المراسلات

خيال: لازمة قضية وهاي الامور ضروري اعرفها معلومات مهمه

ياسين: هاي رسائل مشفرة وشفرتها خاصة يعني بين قوسين رسائل معماة مو اي شخص يكدر يفك الشفرة مالتها وهم ممكن هم مسوين تشفير خاص بيهم

خيال: يعني شلون

ياسين: يعني مثلا انا وانتي نتفق على فد شفرة خاصة احنا نصنعها مانستخدم شفرة قيصر او فينجر المعروفات بعلم التعمية

خيال: دخت ومافهمتك

دار الحاسبة علية وحجه
ياسين: التشفير بصورة عامة شلون يصير مثلا اكتبلج نص ( الاجتماع يوم غد صباحًا ) شلون اشفرها اجي اقسمها كل خمس حروف وحد ومثلا بدل حرف الالف اخلي تاء يعني اختار ثالث حرف برتيب الابجدي بعد الحرف الاصلي من الكلمة وهيج تكون الرسالة غير مفهومه هاي يسموها تعمية ظاهرية واكو تعمية قلبية هاي محد يكدر يفهمها غير المرسل والمستلم المراسلات العندج من هذا النوع لعد السواها شكد داهية وذكي

خيال: يعني افهم من كلامك مراح اكدر استفاد شي من هذا كله

ياسين: بحالة وحده لازم تعرفين الشفرة الخاصة المستخدمينها بهالحالة فقط تكدرين تقرين المسجات وبكل سهولة

حجاها ورجع يحاول ويكتب فوك الساعتين وماكدر يعرف شي اخر شي گال عوفي الفلاشة يمي اشتغل عليها واذا اعرف شي ارجع اتصل عليج ايست ماعندي غير حل نسختها على الحاسبة وعفتها يمه طلعنا انا وحكمة الشبعت نوم ببيت الولد

حكمة: كملتي شغلج

خيال: لا ماعرف يفك الشفرة

حكمة: يمن كون صگع صار اربع ساعات شاتلنا هنا شيسوي

خيال: ولد بنت اختج داهية مو ذنب الولد

حكمة: غدي منه ومن زولة ولا رتاحيتله

رجعنا وجانت الدنيا ظلمة ويا دخلتنا انتبهت على رميم جانت كاعدة بالحديقة عيونها بتليفونها الصاير مايطيح من ايدها شافتنا واجت علينا تحجي

رميم: وين عفتني الوحدي

حكمة: سودة عليه خفتي جا حارسنا وين

جانت تحجي وتقصد يمان جاوبتها

رميم: ماعرف اخذ سيارتة وطلع

خيال: خاف طلع ورانا

رميم: لا وين قبل شويه جان موجود

دخلنا للبيت ورميم تسولف الحكمة على كلام هيله كعدت يمهن افكر شلون ممكن احصل الشفرة من واعرفها من يمان ...

سوينا اكل واكلنا بس انا وحكمة رميم صعدت للغرفة و هو مايجي هسه يرجع بالليل كلش بس ينام والصبح يطلع وهيج مرت الايام لا انا لاگيه الشفرة ولا گدرت افهم شموجود بالمحادثات

وبيوم تأخر الوقت كلش وهو ماراجع حكمة تلوب اعرف بيها عليه بس ما تريد تحجي ولا تريد تتصل بي صعدت الغرفتها وانا بقيت گاعدة بالمطبخ عندي قضية اراجعها باجر المرافعة سمعت صوت سيارة وكفت بره كمت باوعت من الجام الباب شفت سيارة بيضة دخلت مو سيارته ونزل من عدها فرات بس شفته عرفته افتر نزله سانده وهو يمشي بثكل سمعتة يگله

فرات: متگلي شجاك اول تالي انت تشرب

يمان: تعبان فرات لا تصير الناصوح براسي

فرات: واطيح حظك وابقى وراك الحدما تبطل كل سوالفك التعبانة افتهمت لو لا

يمان: يمعود مالي خلك سوالفك هسه ... لا لا روح انا ادخل للبيت بعد

سلم عليه وراح ردت ارجع للمطبخ مالحگت فتح الباب ودخل شافني گدامة عصر عيونه حيل ورجع فتحهن حجه

يمان: هاي انتي لو كالعادة طيفج

خيال: اني وطيفي ثنينا سراب بالنسبة الك

ردت اروح اتقدم بسرعة لزمني وگفني وسحبني عليه غمضت عيوني حيل همس واحس ايده اللازمني بيها ترجف

يمان: دمرتيني فزة گلبي دمرتيني

خيال: بعد ماشايف من دماري شي من اخليك ببالي اسويك تراب ادوس عليك واعبر

ضحك وحجه

يمان: مقبوله منك خليل گلبي بس مره ثانية ماراح اطول بالي اكثر من هيج لا دوسين ببطني

خيال: شتريد تسوي سوي

قربني اله اكثر وگال

يمان: وين اضمج هسه قوتج بنص روحي

دفعته

خيال: دوخر لا تتقربلي مره ثانية

اباوع علية غمض عيونه بقلة صبر اتقدم علية مالحگت اسوي شي صرخت بصوت مكتوم من حسيت اصابع اديه نطبگت على فكي رجعني على الحايط يحجي بعصبيه

يمان: خيال لا تختبرين صبري لان بدأ ينفذ

حجيت بصعوبة وألم

خيال: شيل ايدك مني يمان وبعدين لا تهدد كلشي ماتگدر تسوي

رفع راسي يباوع بوجهي يكز على اسنانه ويحجي
يمان: كلشي اگدر اسوي كلشي اليخطر والمايخطر ببالج ومنهن انتي مرتي والبينا مباح لا تنسين هاي النقطة

خيال: شگد حيوان لعد عفت كلشي ورجعت على شهوتك

بعدني احجي ماحسيت الا جرني عليه خله راسة برگبتي وسعت عيوني حيل تخبلت صرت ادفع بي وهو ماكو مايتحرك ماخذ راحته ومقيدني بحضنه

خيال: يمان وخر راح اصرخ والله

حجيتها بصوت عالي رفع راسه مني ردت احجي ماحسيته غير سد حلگي ويحاول يسحبني للاستقبال جان سكران مايدري بروحه شيسوي

ماعرف شلون دفعته حيل وهو توازنه مختل ارتد الي ورا وطاح ويا الطيحه مالته راسه صار على الحايط اباوع عليه غمض عيونه وفقد الوعي بقيت مصدومه بمكاني خليت ايدي على حلگي وحجيت

خيال: يعني شنو مات ياربي مادري هيج راح يصير

نصيت عليه اگعد بي واحجي
خيال: يمان شبيك كووومم

خليت اذني على صدره بعده يتنفس يعني ماميت احتاريت شلون اسحبه للاستقبال ركضت للمطبخ فتحت المي وترست الكلاص ورجعت دراته عليه صار يحرك بحواجبه نصيت عليه احجي

خيال: كوم ساعدني ادخلك للاستقبال

كوه جريته عدلته وخليته يوكف جان ماحس الا شمر كل ثگله عليه ردنا نطيح انا ويا بالعجل سندته گوه بيه مابيه دخلته للاستقبال وهو يخط برجليناته شمرته على التخم لزم راسه بالم ونام على القنفه ردت اطلع ورجعت من شفت تليفونه صار يضوي وهو بجيبه

رجعت عليه بخطوات متردده مديت ايدي بجيبه اريد اخذ التليفون فزيت من لزم ايدي وهمس

يمان: اششش عيب لا تتحرشين وبعدين تستشرفين براسي

دفعت ايده وطلعت بسرعه احجي
خيال: الفاسد تستاهل الرگعه الصارت براسك

ويا طلعتي صارت گبالي حكمة سألتني عليه وكلتلها رجع

❛❛❛❛

وتر"

مرت الايام وانا ساكته مثل بلاع الموس لا اكدر احجي على عبير خاف تنتكس ولا اكدر احجي الامي اليمكن بس تعرف تشنقنا ثنينا ومايرفلها جفن

خلصت العطلة كلها انا عايشه بخوف وقلق انوب عبير مستمرة ماتقبل تحجيله الحقيقه ولا تقبل تعوفة كل مره تگلي اليوم وباجر وانا منتظرتها تفرج

دخلت للغرفة لگيتها تحجي بالتليفون وتضحك ومرتاحة واصلا ماناويه تحجيله انوب ماخذه كل تفاصيل حياتي الفرق بس تحجي بصوتها مو بصوتي تخصرت وحجيت

وتر: انتي شوكت ناويه تخلصيني من هاي المصيبة باجر دوام هم تتكرر الحاله

بسرعة سدته وعاطت بيه
عبير: انتي شبيج زين ما سمعجج شنو راح يكون موقفي

وتر: جان فكرتي قبل لا تخلين نفسج بهالموقف الخايس

اباوع عليه سكتت ودموعها صارت تنزل قبل لا تحجي صاحت عليه امي عفتها وطلعت

مرام: وتر روحي للاسواق جيبي معجون وارجعي بسرعة بيت خالتج على جيه

حجيت بملل
وتر: يمه ماعدكم غيري ويااسواق مفتحه هسه الساعة 2 الظهر

مرام: الاسواق الي على الشارع مفتحين هسه ديلا حبيبتي روحي وارجعي بسرعة حتى ترتبين نفسج

رفعت حواجبي مصدومة من طريقة امي بالكلام اول مرة ماتعيط بيه وتسويها هوسه وصياح

وتر: يمه اكو شي

مرام: لا عمري وين اكو دروحي حتى ترجعين من وكت

لبست حجاب وعبايه كتف وطلعت ظهرية وكالعادة المسعد سيارتة بابنا اول ما شافني طلعت نزل من السيارة تجاهلته ومشيت حجه

: وين رايحه

وتر: وشعليك بيه انت شبيك

خزرني وحجه
: تأدبي

وتر: تأدب انت وابتعد من طريقي اريد اروح اشتري وارجع

: جم مره توبتج من طلعة الظهاري انتي ماتوبين

وتر: اكلك وردة انت منين تعرفني شو ماخذ ميانه

من حجيت هيج اباوع عليه والاول مره تظهر على وجه شبح ابتسامة حجيت

وتر: هو انت حلو بس غثه الصراحة

: مو بگدج انا بابا احترمي بنيتي

تجاهلته ومشيت عبرت الشارع وهو وراي اشتريت من الاسواق ورجعت وهو يمشي وراي باوعتله وحجيت

وتر: انت ملاك حارس وانا مادري

: ممكن كلشي توقعي

وتر: اكلك انت هواي اخرتني هسه امي تذبحني على القبلة

شمر الجگارة وحجه
: حضري ورحج كلها يومين 3 وتخلصين من شرهم بنيتي

هزيت يدي ماعاجبني الحجي وكفت سيارة يمه هو هذا الطويل يمكن صديقة انوب ثنينهم واحد اطول من الثاني سمعتة صاحله دائب اشرلي يعني روحي

عفته ورحت ركض دخلت البيتنا خليت المعجون بالمطبخ وردت اروح للغرفة سمعت صوت جاي من الاستقبال اكيد خالتي هنا شيخلص هاليوم ردت ادخل اسلم سمعت امي تگللها

مرام: بعد اربع اشهر وكلشي يخلص واعتبريها صارت الج

سولاف: بس مو تضحكين عليه وتاليها كلشي ماكو اطلع ايد ورا وايد گدام

مرام: لا يمعودة شسوي بيهن ثنينهن وهذيج راح تصحة الي خلگهن على الاقل ابنج رايدها وهم تخدمج

سولاف: وحكيم شنو رأيه

مرام: حكيم مايحجي بعد حجيي نحجي انا وياج ويا ونگله قسمة زينه وانتي مو غريبه اختي

مافهمت شي من كلامهن الحدما حجت كلمة خلت شعر راسي ويوكف

سولاف: هسه يكلج هن مو بناتج الحقيقيات خاف يعارض

مرام: مو بناتي بس انا ربيتهن وتحملت مسؤليتهن من جان عمرهن مايتجاوز الاربع والثلاث سنوات اخذيها مني وتر الزيد ابنج

فتحت الباب ودخلت عليهن كلي ارجف اباوع الامي وسعت عيونها بصدمه وسولاف حجت ببتسامه مرتبكه

سولاف: هلاو هاي وتورة شوكت اجيتي

حجيت بدموع
وتر: من جانت امي تكول هن مو بناتي الحقيقيات

ماحسيتها الا گامت عليه جرتني من حجابي تحجي

مرام: اسمعي ولج اذا عرفت بيج حاجيه الكلام السمعتي العبير اكص السانج الج افتمهتي لو لا

عطت بيها
وتر: يعنيييي صددككك انتييي موو امناااا

دفعتني ووگعت
مرام: صدك مو امجن وشتردين تسوي سوي بس مال توصل العبير حتى الهوى اكطعة منج

ماعرفت شسوي مصدومة حسيت صارت وشه بأذاني شكد جانت قاسية ويانا شكد مابگلبها رحمة اتجاهنا بس ابد ماتوقعتها هي مو امنا مسحت وجهي دخل ابوي وحجه

حكيم: منار شبيج ويا البنية حتى گدام الخطار تضربينها

مرام: خلي تولي طايحه الحظ صايرة متحترم

تحجي وتخزر بيه يعني مااكله عرفت بالسالفة

نصه عليه رفعني من الگاع وكفني وحجه
حكيم: روحي الغرفتج بابا معليج بامج المسودنه

عفتهم ودخلت للغرفه جانت عبير مو بيها مدري وين رايحه خليت وجهي بالمخدة صرخت المن مليت لطمت ملخت روحي تملخ ماعرف شسوي بنفسي

انفتحت الباب ودخلت عبير مخترعة

عبير: وتر هاي شبيج ليش هيج شكلج

وتر: مابيه شي امج اكو غيرها

عبير: رجعت ضربتج

مسحت دموعي وهمس
وتر: اي

عفتها وطلعت دخلت للحمام اغسل وجهي حسيت بيها وكفت بالباب تحجي

مرام: ماردتج تعرفين حتى لا تتحسسين من الموضوع

وتر: هه حنينه اسم الله عليج

مرام: اتقبلي الحقيقة انا مو امجن الحقيقيه امجن ميته وانتن صغار كلش ماتذكرنها

گعدت بالگاع ورجعت نهاريت بالبجي صرت اشهك حجت

مرام: لو تعرفين الباقي يمكن تنجلطين بمكانج

رفعت راسي باوعتلها

وتر: بعد شكوو اكثر من هيججج احجيي شكو

سمعت صوت ابوي من وراها حجه

حكيم: شصاير هنا

مرام: ماكو وتر عرفت الحقيقة

اباوع عليه بهت وجه راد يحجي قاطعتة وگالت

مرام: عرفت انا مو امها

غمض عيونه حيل واجه يمي گعد بقى كومه يحجي وياي وانا بس اهز راسي بعد مالي طاقة اجاوبه گومني ويا غسل وجهي ويحجي وياي بتفهم طلعنا من الحمام اسمعهن يحجن

مرام: انهجم بيت العيارة هسه هي هيج ميته عليه

سولاف: لا تنسين سنين وهي معتبرتج امها

عفتهم ودخلت للغرفة بلا اي كلام طفت الضوه ورحت للفراشي ابد ماطلعت من الغرفة بعد لليل كلش حسيت بروحي گبيت وصرت نار من السخونه

بعدت الغطى وگمت رحت للحمام رغم الجو بعده بارد ماهتميت دخلت سبحت بمي بارد اريد بس اصحصح طلعت اول مادخلت للغرفة عبير حجت

عبير: باجر عندج دوام مو

هزيت براسي ساكتة وكعدت امشط شعري بلا نفس حجت

عبير: شبيج حبيبتي جنها امي اول مره هيج تسوي وياج هو انا المريضة وماخلصانه منها

وتر: بس البشر عندة طاقة تحمل وانا بعد ماسكتلها

عبير: ياا ولج هاي امنا قابل شنسوي

ماجاوبتها لميت شعري وكمت حضرت ملابسي مال المدرسة وكتبي .... ثاني يوم دامت بالغصب جبرت روحي بس حتى مابقى بالبيت خلص الدوام وطلعت امشي الموقف الاشتراك مالتي حسيت واحد صاح وراي عبير عرفته من صوته محمد وكفت وباوعتله وحجيت بهدوء

وتر: نعم انا مو عبير انا اختها

اباوع عليه بقى صافن بوجهي ضحك وحجه بعدم تصديق

محمد: تشاقين وياي مو

وتر: اطلعلك جنسيتي حتى تصدك انا مو عبير انا اختها وعبير مشوفتك صوري وحاجيتلك عليه بس انا موو هي عبير تصير اختي الجبيره

اباوع عليه بقى مصدوم الولد عفته ومشيت صعدت بالسيارة مسافة بعيده بين المدرسة وبيتنا على ما وصلت لكيت سيارة الاسعاف ببابنا وصوت مرام تصرخ موتت نفسها بالصريخ ركضت عليهم وصرت ادفع بالناس اريد افوت وادخل البيتنا

وتر: شكووو شبيهم اهلييي باابااا

سوولي مجال ودخلت للبيت لگيتهم شايلين عبير يركضون بيها وهي حلگها ازرگ ووجها باهت صرخت بفزع عبالي ميته صرت اصرخ فرفحت لزمتني وحدة من جيرانا تحجي

- لا تخافين خاله ماميته بس تخربطت

وتر: شبيها تخربطت شبيها

- هو هذا ابو الكلى يمه على ساعة الساعة الله يصبركم ويشافيها

نقلوها وراحوا مرام وابوي وياها وانا بقيت الوحدي اكل بروحي واصيح

وتر: كله من وراي هيج صار بيها انا شحجاني ليششش صرت حقيرة وحجيت ربي اريد اختييي

لليل ابوي رجع مرام وهي ماطلعوها من المستشفى مرن يومين وهي بعدها وانا روحي رايحه عليها حتى دوامي ماداومت

ثالث يوم مرت عليه صديقتي وكامت تحجي عليه گوه سحلتني وخلتني ارجع للدوام مر سبوع وعبير ماطلعت ولا واحد ياخذني الها اشوفها اخر شي كالوا ان ماتصيرلها كل جاره بعد لازم تسوي العملية ....

❛❛❛❛

گاعدين نتغدا حجت حكمة موجه السؤال الي

حكمة: متأكدة من كلام هيلة معقوله ولد شذرة يسوونها ويدخلون البيتي

شربت مي وحجيت
رميم: كلشي توقعي حكوم الدنيا مابيها امان

اباوع عليها صفنت تفكر باوعت الخيال وحجيت
رميم: بس احسن خطوة سويتيها جبتي نسيبي يمنا احسن امان اكثر

باوعتلي بطرف عينها وحكمة حجت

حكمة: بس الگالي وحيد امان اطرده ماميته عليه وعلى حراسته

ويا حجايتها دخل للمطبخ وحجه

يمان: مكرود يمان كلها تحجي عليه صرت مثل السمج ماكول مذموم

حكمة: عبنك ماتمشي بالدرب العدل

باسها جر الكرسي وگعد گبال خيال وهي ولا اهتزت بقت گاعدة وتاكل بهدوء حتى عينها مارفعتها قدم اديناته يدك على الميز ويغني

يمان: على ساعة انفجر واكشف المضموم واشوفك جوه ضلعي الشايل هموم ... محد كال شكرا على تعبي صرت مثل السمج ماكول مذموم

حجت حكمة وهي تاشر بيدها
حكمة: سويلهم اشارة بالفيس مو تنسى

ضحكت على سوالفهم اباوع عليها اخذت اوراقها جانن گدامها وكامت طلعت من المطبخ وهو طلع وراها رادت حكمة تشيل المواعين ماخليتها حجيت

رميم: روحي حكوم الحكيهم راح يكافشون انا الم المطبخ

حكمة: دخليهم مسويلنا ونسه بالمكافش

ضحكت عافتني وطلعت وراهم وانا بقيت الم بالمطبخ شفت تليفوني دك جنت مخليته على الميز بسرعة ركضتله هذا اكيد هو وفعلا طلع هو يتصل بس جاوبت حجه

باتر: ليش مسويه حسابج خاص وشايله المتابعة وحاذفتني

رميم: الهالدرجة انا مهمه حتى انت منتبه على كل هذا

باتر: لا بس مو احنا صحبان وانتي اربعة وعشرين ساعة اموعة اذاني بتفاصيل يومج تجيبين وتحشين بأذني من سمج

رميم: شفتك مامهتم كلت اريحك مني وبعد مادزلك شي

باتر: اكلج ترا ما فارغلج رجال عندي شغل انا بس شفتج خانسه كلت يمكن صار بيها شي

رميم: هاا ايي صدگتك هنا عندك حق

سمعت صوت سيارة اشتغلت يمه وصوت الباب سألته

رميم: وين رايح

باتر: ماكو طالع من الشغل وراجع للبيت واجيتي على بالي كلت هاي الفرخه وين ولت

رميم: هاا

باتر: وعلا ، ماگلتيلي شجاي تسوين

سويت نفسي ماسمعة حجيت
رميم: شلون ماسمع النت ضعيف كلش

باتر: ولج اكول شجاااااييي تسوويين

رميم: اوي كلشي ماسمع النت كلش موزين عدنا مدري شبي

سديته وكتبت " النت ضعيف ماسمعك"

رجع اتصل جاوبته

باتر: ماكدر اكتب جاي اسوق انطيج رقمي سجلي يمج

ماصدكت بسرعة انطانيا وسجلته يمي كال اغلقي واتصلي عليه على الخط غلقته واتصلت عليه ماجاوبني قطعة وهو رجع اتصل

رميم: ليش هيج سوي خايف على رصيدي

باتر: لا انا عندي فاتورة مفتوح

رميم: هااا

باتر: وعلاااا

رميم: اوويي شبيك انت متقدر الانثى

باتر: اويلي على الانثى هسه غير نشوفج بلا صدك انثى خاف تطلع صاحبي وناصب عليه

رميم: الايام تثبت

باتر: وسيراميك مكة اذا طلعت ولد اسحلك وين ماجنت لا تلعب وياي

رميم: مو جان عندك حسابي شبيك انت

سكت شويه ورجع حجه
باتر: ماگلتي وين بيتكم انا الاعرفه انتي من البصرة بس ماعرف بيا منطقة

رميم: بيتنا بالجزائر

باتر: دخيلك ربي حمت الحيه

رميم: انت وين بيتكم

باتر: بعدين نحجي راح اوصل المرور ترديني اخذ مخالفة من وراج

رميم: گول ماتريد اكول وين ساكن وفضنا ليش هالجذب

باتر: يابه بيتي بمناوي باشا بس فكيني بعدين نحجي

رميم: تمام

باتر: شكتب على رقمج

حجيت ببتسامه نصر
رميم: اكتب على رقمي 03.03 .......

يتبع ....

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

وجان يبدي اللعب شتتوقعون رميم راح تتعامل ويا الموضوع بذكاء لو ماتجيها من ورا لعبها غير المصايب 🥲💔

بقلمي: زينب علي

شنو رأيكم بالقصة والاحداث

معثوراتي لا تنسون التصويت+ متابعة الحساب+ تعليق بين الفقرات ♥️

احبكم ♥️

متابعة ممتعة🦋

حسابي على الانستا