#تاروت
البارت «15»
بقلمي: زينب علي
حلواتي لا تنسون التصويت+تعليق بين الفقرات ومتابعة الحساب ♥️
و لتخافين اذا اشتاگ
افتش بالهوى المر بيج
هلبت جايب حجايه
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
حكمة: يماااا ابنيييي راح يبوووو
طلعت بسرعة شفته يتنفس بصعوبة عقج وجه بألم وحجه
يمان: مابيه شي يمه بس رجلي نجرحت من الجام
اتقربت منه شفت رجله مشگوگه من جام الباب بس مو هواي وجاي تنزف ركضت جبت الاسعافات الاولية من البيت وحكمة مخليه رأسه بحضنها حاضنته وخيال واكفة تباوع عليهم بصدمه گعد شگيت بجامة التراك مالتة وعقمتلة الجرح وشفته حجتيت
رميم: يحتاجلها خياط وهم لازم تروح للمستشفى لان موزين عليك هم هناك يسوولك الازم
هز راسه ساكت ورجع عيونه على خيال وكأنه منتظر منها شي وهي بس تباوع بعيونها من دون اي ردة فعل حتى ملامحها جامدة
حكمة: ياهو هذا الضرب علينا شصار
يمان: يمان خلي ندخل جوه منا الناس تباوع
وصدك الجيران كلها صايره بالبستان حجوا وياهم شويه بعدها حكمة گومت يمان اباوع الخيال باوعتله من فوك اليجون وكأنها تريد تصدك ان فعلا مابي شي وواكف على طوله
دارت وجها رادت تدخل ماتحملت لزمت راسها وداخت بسرعة لزمتها وهو استقبلها بحضنه صحت بخف
رميم: خيااللل شبييجج
حكمة: ياا ولج ماعت روحها روحي جيبيلها ماي ركضي
رفعها خله راسها على صدرة وحضنها حيل يهمس
يمان: ماكو شي هاي من الهبطة
گام وشالها رغم رجله متعورة بس ماهتم شالها ومشه بيها لاستقبال وانا ركضت جبت عطر ومي
خليت على ايدي اشممها العطر حتى تصحصح وهي دايخه
حكمة: يمكن هبط ضغطها
رميم: خلي ننقلها للمستشفى فدوه
اندك الباب الجوه والرجال جيرانا يحجي
ابو محمد: هاا حجيه محتاجين شي خو ما بيكم شر
گامتله حكمة تحجي
حكمة: ابو محمد بس خابرنا الاسعاف البنيه تخربطت وهي مريضة سوده عليه
ابو محمد: اتصلنا على جيه اذا ماتتحمل ننقلها بالسيارة
رميم: ايي فدوه ماجاي تصحه
گام يمان يريد يشلها ماگدر رجله تنزف باوعتله حكمة وگالت
حكمة: دگعد وينك ووين جروخك تريد تشيلها ورجلك مفتوحه مثل حلك السمجة
رميم: هاي وصلت الإسعاف
حجيتها بعد ما سمعت صوت الإسعاف صار قريب دخلوا اخذوهم ثنينهم وانا وحكمة اخذنا ابو محمد وراهم
خيال رجعوا خلولها مغذي لان عدها هبوط بالضغط ويمان خيطوا رجله بعد ما خيال صحصحت شويه وكدرت توكف ورجعنا للبيت عافتنا وصعدت وانا بقيت اسمع يمان وحكمة يحجون
حكمة: ماگلتي ششفت هاي الهوسه كلها الصارت عليمن
يمان: يمه عرفت ياهو يحاول يدخل البيت
حكمة: ياهو
يمان: الشاهين اكيد تعرفينه
عضت على اصبعها وحجه بحرگه
حكمة: ايا جلب ابن الجلب
يمان: على كيفج يمه الگفه وين يطير
حكمة: شبي بيتي ويريد يدخله شمحتاج فلوس
خله ايده على عيونه وحجه بحيرة
يمان: مادري حكمة كلشي مادري عقلي وكف ليش هيج يسوي
حكمة: جا تسألني دگول الروحك بهذا شغلكم الطايح حظه طبعا ما تعرفون غير الزبايل والنطايح
بقى ساكت كلشي ماحجه كامت وطلعت جنت واكفه بالباب ردت اروح وراها استوقفني وگال
يمان: ليش الهسه بعدج گاعدة خيالي شلون صارت
رميم: بعد الصار منو يگدر ينام وخيال فوك
يمان: من تنام صيحيني اشوفها
رميم: معليه ماتدخل قبلها ترزلت
يمان: لا تصيرين خبيثه
رميم: والله ماتدخل تريدها تعدمني اذا تريد تشوفها بس من بعيد
گام تمدد على فراشه وحجه
يمان: بس صيحيلي ومعليج
عفته وصعدت فوك شفتها نايمة رجعت نزلت اريد اخبره وسمعته يحجي بالنقال
يمان: تطلعلي الشاهين وين ماجان اريده الكلب ... باجر امر الكم الگاه موجود انا اعرف شغلي ويا
سكت شويه ورجع گال
يمان: لا شفته بالكاميرات ويا 3 والشاهين اعرفه لو مو مغطي ورحه لو يلبس عباية نسوان هم معروف شرحبيل ماوصيك بعد .... الرسائل الهسه مالگيتلهن شفرة تحلهن جربت كل الشفرات الممكن نستخدمهن لسه اشتغل عليهن بس بالنهاية احلهن اكيد
تنهد بحسرة وحجه
يمان: لا باتر مو بريء هو غاط بالسالفه وكل الادله تشير اله وهو بنفسه اعترف بكتلهم راح انجن اريد اعرف سبب واحد يدفعه هالفعل ماكو سبب منطقي
ماتحملت الكلام عفته ورجعت صعدت للغرفة افكر شنو هاي الشفرات والشاهين منو اخذت نقالي وشلت الحظر من عنده كتبتله " هلاو "
مشافها غير من گعدت الصبح للدوام لگيته كاتبلي
" لا هلا رجعت الخبيصه "
دزيتله
" ارجع اسويلك بلوك ؟
اتصل بيه باوعت على سرير خيال وراي ماكو نازله فتحت خط وحجيت بنعاس
رميم: ازعاج من الصبح
باتر: دخيلك يالحمزة كشش كش انصرف شني من صوت هذا
رميم: غير جنت نايمه شتريد اغنيلك
باتر: ولا تستقر بت عجرم
ضحكت بتصنع بس بصوت وحجيت
رميم: هسه راح اكوم اتريك وابدل واطلع للدوام
باتر: جريدة الصباح المعتادة
رميم: يعني ماتريد احجيلك تمام ارجع البلوك
باتر: تهددين
رميم: غير انت تخاف من مرتك وهم ماتحب تسمع مني كلت ارجع اختفي
باتر: بلا خرط وروحي هسه بعدين نحجي
حجه الكلام وسده بوجهي حتى مانطاني مجال احجي
نزلت تريگت وبدلت وطلعت وهيج مرت الايام ورجعت اقوي علاقتي مثل قبل وخاصة بعد ماشفت تقرب واضح منه صرت اتدخل بكل تفاصيل يومه وصار يحجيلي وين يروح ووين يجي وحتى باليوم الما اسولف بي ويا هو يجي يسألني حتى احجيله بس احسه هيج مجرد يسولف مامهتم وانا مقتحمة كل اليوم اسولف باذنه لو اتصال لو مراسلة
بدأت الامتحانات ونشغلت بالدراسة وخاصة هاي اخر سنه واتخرج
وبيوم جنت بالدوام ودك تليفوني شفته هو جاوبته
باتر: من الاخير شوكت اكدر اشوفج خاف تضربيني بوري وماتجين
رميم: مو نطيتك عنوان المعهد خلص انتضرني على الشارع العام بس اطلع من الدوام اجيك
باتر: وتعرفين سيارتي
رميم: اعرفها لونها كحلي مو نفسها بالصورة
باتر: ايي هي وانا لابس ابيض تلگيني يمها
رميم: بعد الدوام انتظرني
باتر: خوش بس اذا طلع بوري احمسج بلوك رباعي الابعاد وسيراميك مكة
رميم: دروح شگد تلح
سديته منه ورحت الصديقتي هي جان بيتهم بالجزائر صحتلها
رميم: طيف مو تنسين ورا ساعتين من نرجع من الدوام امرلج حتى حتى ندرس
اشرت على عيونها وحجت
طيف: تدللين ريمه من عيوني مري شوكت ماتردين
على مانتهى الدوام رحت للحمامات غير ملابسي جنت محضرتهم غير ملابس الدوام رتبت شكلي وخليت عطر هواي واتصلت بخيال كلتلها اتأخر طالعة ويا زميلاتي گوه اقتنعت خليت البنات يحجن وياها يلا
اخذت تكسي وطلعت الغير معهد بمنطقة بعيدة عن المعهد مالتي الاساسي من عندة ورجعت للشارع العام اباوع على السيارات شفت سيارته من بعيد واكفه
گلبي صار يدك حيل ودموعي تنزل مدريه شبيه خوف على حقد كلهن ...كلهن اجتمعن بداخلي هديت نفسي شويه اشتميت هوى وطلعت تليفوني اتصلت عليه
رميم: شفت سيارتك انا صرت مقابيلك
باتر: وينج مقابيلي
رميم: مراح تگدر تشوفني لان انا جنيه
باتر: دخيلك ياداحي الباب دخيلك هسه صدك تطلعين جنيه
افتريت من ورا صرت خلف سيارة واحجي اشوفه بقى يدور بعيونه حجه
باتر: عوفي لعبة الغميضان وطلعي
رميم: شلون اطلع غير تصيح حلال
بلا نقاش خلا ايده يم حلگه وصاح بكل صوته
باتر: حلاالللل
رميم: خبال هاي صدك سويتها عيب منا الناس
باتر: العيب بالجيب ماعندي شي اسمه عيب انا يلا اطلعي هسه تطلعين تشتغليني وماجايه
رميم: باوع الجهة المعهد هسه تلگاني بوجهك
دار عينه الجهه المعهد سديته اتقربت حجيت من ورا
رميم: سلام
فز باوعلي وحجه
باتر: نعله على عدوج هو هيج گطعتي الخلفة
ابتسمت نزع نظارته يباوع عليه
باتر: هاي انتي رميم ؟
رميم: ليش اكو غيري
باتر: طلعتي انفلاقية اكثر من الصورة
رميم: عدل الفاظك انفلاقية شنو
باتر: دخيلك يالحمزة يعني تطگين بالگاع
انتبهت الروحي وانا واكفة بصفه افكر هذا شنو من بشر شضخمه يعني يمان شكد ضخامه بطول بس هذا ضعفه يمكن اذا ينفخ عليه اطير
باتر: يلا اصعدي
رميم: لا وين اصعد مو شفتني هاي هي انا اروح
باتر: صديقتي وصديقتي وخابصتني وتالي اشوفج وماضيفج شي
رميم: لا اروح او نمشي ما اصعد بالسيارة
باتر: انتظريني اطبگ السياره واجيج
راح مدري وين طبك السيارة ورجع يمشي ويحجي
باتر: خايفة مني
رميم: شكلك يخوف بس انا مااخاف
باتر: غير حية
ابتسمت ومشيت ورا بقينا نتمشى ونسولف هو ماخذ راحته وكأنه متعود او يعرفني من سنين اما انا كوه مسيطرة على روحي احس گلبي يغلي غلي وصار يأذيني
گعدنا بمطعم مرطبات وانا اتلفت حواليه
باتر: هسه يلگفنا واحد من اخوانج السبعة
رميم: خاف انا ماخايفة خوفني اكثر
ضحك نزع نظارته يباوع عليه بتدقيق واحس نظراته سهام تخترقني من احجي يركز بكل حرف اگوله وكأنه يقراني بس الحمد لله گدرت اسيطر وحتى ماتلعثمت گدامه وجاوبه ونسولف باريحيه
جاي نحجي فجأة صدمني بسؤال
باتر: شبيها ايدج كل شويه تغطينها
رميم: هاا يايد
باتر: اشوفج حريصه عليهن ولازمه ردنج بجفوف اديج حتى ايدج ماتبين
رميم: لا تركز بيه عادة من الطفولة الزم اكمام ايدي ماحبهن يبينن
سكت ماحجه شي بس احس نظراته هايمه تتفحص تفاصيل وجهي
باتر: انتي شلون هيج
رميم: يعني شنو شلون ؟
باتر: بالتليفون السانج شطوله يلعلع بالواقع كتله خجل مبتسمه
رميم: هههه يمكن لان اول مره اشوفك
باتر: لا انتي تجمعين الضدين خجل مغلق بوقاحة ظاهريه حتى لبسج عصري وعلى الموديل بس تصميم فستانج كلاسيكي
رميم: هاي شنو شبسرعة گدرت تحلل شخصيتي
باتر: من سوالفج الحلوة
حجه الكلام وبعدها حمحم وكمل
باتر: ايي ان شاء الله ماتكون اخر مرة نلتقي
رميم: اتمنى
شابك اديه وقدمهن گدامه على الطاوله حجه وكأنه يستجوبني
باتر: ايي ريمه هسه نحجي بالجد منو انتي
رميم: احنا كل مانتقرب اكثر ترجعنا النقطة البداية
باتر: لان مامقتنع بسالفة طلع حسابي گدامج فجأة بقدرة قادر وثنينا من نفس المحافظه وجنتي تحجين وياي وتسولفين اصغر تفاصيلج الانسان ماتعرفينه مو مطي انا منو دافعج عليه
رميم: تريد تصدك كيفك ماتريد تصدك انا انسحب وبعد ماكتبلك شي
باتر: بكل هاي السهولة
رميم: الموضوع مايتطلب سهولة وصعوبة ترتاحلي اهلا وسهلا ماترتاحلي الله ياك يعني اكيد انا ماداخلة وياك على طمع ولا طمعانه بسيارتك الاخر مديل وفلوسك انا هم بنت دلال وشايفة وعايفة وعيوني متروسة
ابتسم بجانبية وهمس
باتر: كلاشنكوف مو لسان
كمت اخذت جنطتي وحجيت بنزعاج
رميم: وهسه من رخصتك انا تاخرت وهم خاف واحد من اهلي يشوفني گاعدة وياك يعدموني
باتر: طنگرت
رميم: لان انت كلامك مدري شلونه ترا مو حالة هاي انا ابقى ابرر كل دقيقتين تحسسني لان راسلتك بالبداية انا وحدة موزينه على العموم فرصة سعيدة تشرفت بحضرتك هاي اخر مره تشوفني
كام وحجه بعدم اهتمام
باتر: نجبي
رميم: هاا
باتر: اششش نجبي وامشي اوصلج يلا
رميم: لا انا اخذ سيارة أجرة
رفع حاجبة يحجي
باتر: واخوانج السبعة يقبلون تصعدين وحدج بتكسي عادي
رميم: لا محد يقبل بس شسوي اليوم مضطرة
باتر: انا اوصلج
رميم: ماكدر اصعد وياك انا ارجع مراح انوكل عادي
عفته وطلعت وانا اردد
رميم: اذا ما جرعتك المر اذا ماخليتك توصل مرحلة الهوس والادمان انا مو رميم
باتر: شجاي تحجين
رميم: متوهم ماحجيت شي
سكت بس عرفت بي راح يمشي وراي حتى يندل عنواني وصلنا السيارته ومناك اخذت تكسي انطيته عنوان بيت صديقتي كل شويه اباوع سيارته ماكو بس انا متأكده هو وراي الحد ما وصلت الصديقتي دگيت الباب فتحتلي ودخلت
بقيت فوك الساعتين يمها ندرس وانا قلقة كل شويه ادز اخوها واكله شوف خاف اكو سيارة غريبة بشارعكم يگول ماكو الحدما تطمنت رجعت للبيت ...
وهاي جانت اول مرة نلتقي
❛❛❛❛
خيال"
جنت هسه راجعة من الشغل اول مافتحت الباب صار بوجهي استغربت اليوم جاي قبلي كل مره يدخل وراي رجله بعدها مضمدة كاعد على باية الدرج يگلب بنقالة
تجاهلته ومشيت حجه
يمان: عطرج واصل السابع جار
خيال: لا تدخل عسى ما يوصل السابع سماء انا حره
يمان: من شوكت انتي تحبين العطور القوية
خيال: من يوم العرفتك بي وانا ذوقي بالنازل
طلعت حكمة من المطبخ تحجي
حكمة: خيبين الله احد روسيه بزازين ماتتگابلون حتى الفارة والبزون هم نوبات يعقدون هدنه ويتصافون
خيال: قيدي ابن بنت اختج حكوم لان صاير مسعور خاف يعضنا
حجيتها وانا اصعد سمعته حجه
يمان: چلب الچلبج
خيال: الچلبك
صعدت للغرفة لگيت رميم گدامي سلمت عليها وحجيت
خيال: وين جنتي
رميم: ماطالعت بعد من هذاك اليوم من المعهد للبيت ولا تحركت
خيال: بعد شكد وتخلصين امتحانات
رميم: مابقى شي بس هالاسبوع
اخذت ملابس وردت اروح للحمام وهي رجعت خلت راسها بالتليفون باوعتلها وحجيت
خيال: ضامة عليه شي
گلبت عيونها بملل وحجت
رميم: لا
عفتها ورحت للحمام بس طلعت سمعت تليفوني يدك شفته ياسين بسرعة جاوبته جان يحجي بأرتباك
ياسين: ااا احم خيال تگدرين تجين البيتي اليوم
خيال: خير ياسين كدرت تعرف شي مهم
ياسين: لا اقصد اي اي ماكدر احجي بالتليفون المفروض تجيني حتى تشوفين بعينج
خيال: هسه راح يصير ليل باجر الصبح اجي
ياسين: الموضوع مايتحمل تأجيل لازم هسه تجين
خيال: الهالدرجة مهم
ياسين: علمودج انا بكيفج
خيال: لا لا هسه اطلع واجيك
غلته من عنده ونزلت جوة هو جان گاعد يم حكمة بالمطبخ حجيت
خيال: حكوم ترحين وياي مشوار صغير ماكدر اروح الوحدي لان بعيد
حكمة: اروح وياج بس مشوارج مايتأجل الباجر الدنيا صارت ليل
خيال: لا ضروري
بالعجل فز يحجي
يمان: وين رايحين
تجاهلته وحجيت
خيال: خاله على ماابدل الگاج جاهزة
يمان: غير نعرف وين
عفته وطلعت واسمعه صار عصبي يصيح ماهتميت بدلت ونزلت لگيت حكمة جاهزة وهو واگف يمها الشر يتطاير من عيونه
خيال: جاهزة حكوم
حكمة: جاا هو انتي تنردين ديلا جاهزة
يمان: سيارة بالباب تاخذكم وترجعكم انا لو ما رميم ورجلي اخذكم
خيال: ميحتاج ريح نفسك
يمان: ماكو طلعة
گوة قنعتني حكمة اقبل بالسيارة الجابها النا
طلعنا ...
رميم"
نزلت بعد ما خيال وحكمة طلعن شفت يمان لازم نقالة ومدري بيمن يتصل ومبين عليه معصب باوعتله وحجيت
رميم: شكو
يمان: يعني شكو غير اختج الراح تقضي عليه بتصرفاتها
رميم: صدك انا مو ممرتاحة الهاي الروحه ليش ماتروح وراهن
يمان: وانتي
رميم: صيح الام محمد البيتهم جوارينا تگعد وياي ورجلها حباب مايگول شي
صفن عليه شويه بعدها اخذ تليفونه واتصل بالرجال فهمه وماكو دقايق واجت المره البيتنا عافها يمي وطلع حتى بصعوبه يمشي يضغط على جرحه ...
❛❛❛❛
خيال"
نزلنا استغربت يم بيت ياسين هواي سيارات وهذا السايق الجابنا بقى فوك الساعتين تايه يدور على العنوان ويفتر بينا
حكمة: دولاب دولبه المفلوك يمتى صار عده كل هاي السيارات
وكفت وحجيت
خيال: لا حكمة گلبي مامرتاح خلي نرجع
حكمة: جا المن جبتينا دولبين بيه بهالليل اذا خايفه امي ماكو شي
خيال: السيارات غريبة باعي كلها مضللة تخوف
حكمة: خلي نصيح الهذا الثور الودا ويانه
خيال: لا لا نرجع وعود نجي بغير وقت
ردنا نرجع فجأة انفتح الباب وطلعت نفس البنت الي شفناها اول مره حجت ببتسامة
- تفضلوا ياسين منتظركم جوه
خيال: لا تأخر والوقت غير مره نرجع
سحبتني حكمة من ايدي وهي تحجي
حكمة: مابينا حيل نرجع نوبة الثانية بعد وصلنا خل ندخل
گوة سحلتني ودخلتني اول مادخلنا ماحسيت الا طلعوا ثنين من غرفة يسحلون بياسين وهو دمه يسيل جابوا يسحلون بي سحل صرخت بخوف من انشمر گدامنا مدمه من فوك الي جوه باقي بس نفس يصعد وينزل كلشي ماينشاف منه من الدم والضرب جمدت بمكاني بس حكمة صارت تصرخ
حكمة: يمممههه هايي شنهيي انتم منين
اباوع للبنت گعدت بالزاوية وضمت راسمه بين رجليها بخوف وتبجي بفزع ماعرفت شوي
لزمت حكمة حيل وحجيت بهمس
خيال: حكمة الباب ورانا خلي نطلع بسرعة
طلع واحد من جوة يحجي بس شفته عرفته
الشاهين: وين تطلعين يحلوة عبالج سهلة
من شافته حكمة تسبعت وراحتله تحجي بعصبية
حكمة: هذا انت ياخسيس يا سافل يالماعندك نخوة وحمية جاي تتسبع على حريم
الشاهين: مرت ابنج ما تگعد وسببتلنا ازعاج كلنا نصفيها ونخلص بس مو هسه قريبا جاي دورها
حكمة: بيك خيل طخها الا افنيك فني لا عبالك مره جبيرة وكلشي ماكدر اسوي
الشاهين: حسابي مو وياج حجية اريد احجي جم حجاية للحلوة واروح منا
حجه الكلام وهي نزعت شحاطيتها وطاحتله دگ اجوا يردون يوخرونها اشرهم يعني لا تتقربون
حكمة: تهددنا شوهين ابو الوصخ هذا فادك كله من ورا ولدي صار
اتقربت لزمتها وانا احجي
خيال: منو دزك لهنا
الشاهين: يرادلها علم طبيعا خطيبج هو دزنا نسحل ياسين لان وكعت بيده ملفات تكشف اخو متورط بموت اهلج ناخذهن منه
سديت ايدي حيل وحجيت
خيال: انت جذاب
الشاهين: حتى هو دزنا ندخل البيت الحجيه وندور اذا اكو ملفات واوراق عندج تخص القضية ناخذها انتي كاعده ويا داهيه مو بشر
حجيت بدموع
خيال: ليش هيج سويت بياسسيين اذا هاي الحقيقة
الشاهين: تردينه يكتلني اذا مانفذت اوامره بالحرف الواحد جا اليوم انا بمكان ياسين مدمه واخس من حالته
راد يطلع رجع باوعلنا وحجه
الشاهين: جبتج هنا اريد تعرفين جزء من الحقيقة في امان الله
لطمت حكمة على وجها وهي تصرخ
حكمة: لا شافك الله يالچذاااببب لا شافك الله يما گوة تريد تلبس السالفة براس يمان نذل
بقيت كلي ارجف واهتز مثل السعفة ماعرف شسوي وين الحقيقة تاهت عليه شلون يمان دازه شلون اتصل عليه وخلاني اجي ليش يريدني اعرف الحقيقة دخت الخوف تملك گلبي وانا اباوع ياسين البعدله شويه يصير جثه اتقربت يم البنيه احجي
خيال: فدوة احجيلج كلمة انتي شفتي الصار بعينج
سدت اذانها وحجت بخوف
- كلششيي ماشفت مااششفتتت وخروا لا تلزموونييي اريد اهليييي
طلعت نقالي واتصلت بالشرطة خبرت على الصار وگعدت ابجي يمها وهذا باقي بس نفس كوه يسحبه وحكمة گعدت يمه تهفيله حتى يجي هوا شويه واندفر الباب ودخل يمان گامتله حكمة تحجي
حكمة: هذا صاحبك دمه الولد ويگول انت كلتله
يمان: منو صاحبي يمه احجييي
حكمة: وين اكوو غيره الشاههين باع شمسوين بالولد راح يموت ليش هيج سويت
يمان: شسويت الشاهين صار فترة ادور عليه اريد بس الزمة ماكو فص ملح وذاب
گمتله احجي بعصبية
خيال: انت واحد جذاب وردتهم يقتلون ياسين لان عنده ملفات انا بنفسي اخذتهم من حاسبتك
يمان: بلا خبال وشوفي الحقيقة وين يا محامية انا لو اريد من اول يوم اسحله بس اذا انا نفسي ماعرف شنو محتويات الرسائل والمحادثات واريد واحد يفهم بيهن وعفته يشتغل كلت بعدين نحجي وافهمج بس انتي الانتقام عامي عيونج ماتردين تشوفين الحقيقة
خيال: انا لو اشوف الحقيقة جان شفتها من جنت مستغفلني بس للاسف على گولتك انا ماشوفها
سكت مني دقايق واجت الشرطة والاسعاف نقلوا ياسين واحنا بقوا يحققون ويانا الابنيه ماقصرت حجت كلشي شافته رادوا ياخذونا للمركز يمان تخبل ماخلا واحد ماتصل عليه يلا عافونا نرجع بس هو اخذوا وياهم والبنيه اجوا اهلها يمها وصارت هوسه
رجعنا انا وحكمة للبيت ورميم تتسأل حجينالها كلشي وهو النص الليل يلا رجع شفته من الشباك جوه وحكمة تحجي ويا
بقيت محتارة الكلام الي گاله الشاهين صح لو غلط وليش هيج حجه واعترف ان هو دخل للبيت وبعلم يمان وكلام رميم المالته الي وان هي سمعت يمان يريد فعلًا جان يدور علية تعبت من التفكير وقررت ثاني يوم ارجع اقدم اوراقي افتح القضية من جديد وهذا الصار ...
وبيوم جنت كاعدة يم حكمة بغرفتها اشتغل باوراق عندي وهي تباوع تلفزيون دخلت رميم تحجي
رميم: حكوم الاسبوع اللخ يوم الاثنين خطوبة صديقتي فدوه خلي نروح دام خلصت امتحانات وبعد ماعندي شي وهي عزمتني
حكمة: وين بيتهم صاير
رميم: بالناصرية هي جانت وياي بالمعهد فدوه خلي نروح والله ضوجه حتى اذا نبات يمهم شكو بيها
حكمة: ايي اخذجن واروح شعدنا فروخنا التبجي ورانا
باستها وحجت بفرحة
رميم: اروح فدوه
خيال: اگعدي انا ماكدر اتحرك عندي شغل
رميم: خيال يخلص عمرنا وشغلج مايخلص والله
خيال: عندي قضية طلاق لازم اكون حاضرة يعني شلون غير شغل
حكمة: انتي ابقى احنا نروح ونرجع مانبات
خيال: كيفكم انا ماكدر بالنسبة الي اذا متباتن عادي
لميت اوراقي وطلعت اسمعهن يتفقن على الروحة
وبالليل حكمة اخذت رميم وراحت حتى تشتري ملابس جنت گاعدة بالمطبخ والحاسبة گبالي اتصلت تطمت على ياسين مرته كلتلي زين اليوم بدأ ينتبه عليهم لان جان عنده ارتجاج بالمخ
جنت صافنه بشاشه الابتوب ماحسيت الا اجتني بوسة خطف على خدي فزيت بسرعة وگمت عض على شفته وگال
يمان: شحلاة الفزة اذا اچكچك خدج بلحيتي
صحت بي
خيال: منووو سمحلك تتعده حدودك ويااييي
يمان: مرتي
اتقدمت دفعته حيل احجي
خيال: اياك تلزمني مرة ثانية مقرف
ضحك يحجي
يمان: اكو واحد يگعد بالظلمة
خيال: مثل ظلام گلبك عادي
سحبني عليه همس
يمان: شما تنطفي الدنيا يفز گلبي بضوه عيونچ
خيال: شتريد
يمان: حلك
شلت الحاسبة وحجيت
خيال: تافه
صاح وراي
يمان: ماحسها غلطة جنج تتغزلين بيه
خيال: لانك حيوان وبلا احساس
مد راسه من باب المطبخ يحجي
يمان: كافي تعبت من هذا الكلام الحلو على كيفج وياي
خيال: حيوان لئيم
يمان: تتحرشين
خيال: جنك قرد منو يتحرش بيك
عض على شفته حيل عفته وصعدت فوك على مارجعن رميم وحكمة ورا 3 ايام راحن للخطوبة من الصبح وانا الشغلي
رجعت للبيت من وكت لان محد بي تفاجأت من دخلت للمطبخ ولگيت الاكل جاهز على الطباخ والبيت مرتب ونظيف ومحد موجود بي
عبالي حكمة دازه وحده من الجيران ماهتميت صعدت فوك سبحت وبدلت واخذت راحتي باللبس لان موصيه حكمة تگله لا يرجع للبيت طول ماهي مموجودة
نزلت جوة وانا انثر بشعري اريده ينشف
وكفت يم الطباخ اصب اكل النفسي حسيت شي وكف وراي بباب المطبخ باوعت شفته واكف يباوع عليه وبيده علاليگ وهو صافن حجيت بلا اهتمام
خيال: خير شجابك
يمان: انتي خير شرجعج
خيال: ليش اخذ منك موعد حتى ارجع للبيت
يمان: وانا اخذ منج موعد هم يلا ارجع
ماهتميت اخذت الاكل وكعدت اكل باوعلي وحجه
يمان: طيب طبخي مو
خيال: لا تگول انت طابخ ومسوي كل شغل البيت
جاوبني وهو يغسل بالفواكة
يمان: جا مثلج انا رجال معدل ونادر
خيال: شنو قصدك
يمان: هيج اقصد ناس بيضة ماتعرف تسوي
رجعت اكل وهو هم صب اكل وكعد گبالي ياكل خلصت وگمت قبله ردت اصعد فوك حجه
يمان: حتى مواعينج انا اغسلهن غير سالفة هاي
خيال: انت مسوي الاكل يعني انت تغسل منو عاتب عليك
عفته وصعدت للعصر مانزلت ولا حكمة ورميم رجعن كل شويه اتصل بيهن اخر شي صار لليل والاوضاع جانت خطرة كلش ماخلوهم يجون گالت نبات ونرجع الصبح سكتت ماكو غير حل
ردت انام ماگدرت وبيومها جان هوا عالي وعاصفة كلش قوية اريد بس اغمض عيوني ماكو اخر شي فتحت الباب ونزلت
لگيته گاعد بالصالة اول ماشافني حجه
يمان: هاا خفتي
خيال: منين اخاف بس صوت الهوى قلقني لا اكثر
يمان: نامي جوه وانا اصعد فوك
خيال: لا انام بغرفتي
يمان: خوش وانا انام بغرفة حكمة
خيال: لا انت تبقى جوة
يمان: انا اكول ثنينا ننام جوة احسن حل
عفته وصعدت ماكدرت انام صوت الهوى كلش مرعب وصرت اتخيل شغلات تخوف ماعندي غير حل اخذت فراش ونزلت هو هالمره جان نايم بالصالة على التخم وسلاحة بصفة
فرشت فراشي فتح عيونه وحجه
يمان: هاا شو اجيتي ماتخافين مني
خيال: جرب سوي شي وشوف
يمان: وحدنا قابل شسوين
خيال: اكسر ايدك التمدها عليه
يمان: اخخخ اويلي اموت بيج عنيفتي
خيال: انت شبيك مازوخي ماتمل من الغلط
يمان: اذا منج لا اذوب وانصهر عليج
فرشت فراشي وتمددت بي حجه
يمان: مو اگعد الصبح الگاج بحضني
ماجاوبته غمضت عيوني وغفيت فزيت على جكجه برگبتي جمدت بمكاني من سمعت بهمساته
يمان: اخخخ لو تدرين شكد جاي ادوس على روحي الخاطرج
غمضت عيوني حيل وهو صار يسحبني اله اكثر ويدخلني الحضنه ماعرف ليش بقيت مغمضه عيوني وحتى ماعترضت بقيت جامدة اسمعه يحجي
يمان: عطرج يفزز گلبي وجروحي همم مو بس گلبي حنيت الريحتك خليل گلبي
سديت على ايدي حيل واحس گلبي فضحني ودگاته الجنونه صارت واضحة وتدك بصدره وهو حاضني رفع نفسه همس بأذني
يمان: ماجاي اميز بين دكات گلبج وكلبي ثنينهن يدگن بنفس الجنون
رجع همس بأذني وانفاسه الحارة على بشرتي
يمان: أشتهي تقبيلك عشراً و عناقك
ألفا و أرغب بإحتضَانك شهراً
و البقَاء معك عمرًا
أختصرُها لك ؟ طامِع بكل ما
بك و لا أكتفي طمعا
ماعرف شلون دفعته حيل ووخرته من عندي كلشي محجيت غير صعدت فوك للغرفه كلي ارجف قفلتها عليه
وماگدرت انام للصبح بدلت وطلعت للشغل ماريد اشوفه من رجعت جانن رميم وحكمة راجعات .....
❛❛❛❛
وتر"
مرت الايام وعبير مازالت حالتها من سيء للاسوء بعد ما عجزوا الاطباء وياها بهاي الاربع اشهر قرروا يسوولها عملية زراعة كلى
خلصت امتحانات جنت گاعده بالحوش على الدرج منتظرة خبر من ابوي يطمني على عبير دخل سنان ابن عمي شافني واجه بتجاهي
نفخت بملل خله رجله على البايه بصفي وحجه
سنان: شلونها بنت عمي الصاكة
وتر: احترم نفسك شنو هاي الالفاظ
سنان: بنت عمي راح تصيرين معاقه بعد منو يقبل بيج اكيد مرجعج الي
باوعتله بطرف عيني وحجيت
وتر: حتى اموتها النفسي وبعدين شتقصد بكلمة معاقة
صدمني من گال
سنان: راح ياخذون كليتج العبير رغم العملية خطرة عليج بس هم مايهتمون الحالتج المهم يعيشونها
يحجي الكلام بطريقة مستفزه وكأنه يضحك او متشمت بيه عفته ودخلت جوة مصدومة من كلامة معقوله هيج يردون يسوون زين ليش انا يخاطرون بيه وينقذون اختي رحت للاستقبال شفت مرام گاعده تاكل حب وتباوع على مسلسل هندي
وتر: يابرودة اعصابج اختي بين الحياة والموت وبابا حاير بيها وانتي هنا گاعدة
مرام: ومرض لا تصيحين هسه اتصلت بي كال زينه جنها حصان
وتر: مرض بگلبج
من بعد ماعرفت بيها مو امي صرت حتى مااحترمها وحتى من تضربني اني هم اليطلع بيدي اسوي اضرب واخرمش فجأة حسيت نفسي انسحبت من شعري
مرام: حيوانههه ليشش ماتحترميينن
وتر: وخررري عوفيني حقيرة
احجي بالكلام وادفع بيها
مرام: منو مقوي راسج علينااا ادب سز ......
بقت تفشر دفعتها حيل وركضت للغرفة قفلتها عليه ادري بيها كلشي تسوي وانا ماكدرلها جني فارة يمها بقت تدك بالباب واسمع سنان مدري شيحجي وياها وهي تغلط عليه
للعصر وانا ما طالعة الحد ما سمعت صوت ابوي بالبيت لا طلعتله ركض
وتر: بابا شلونها عبير
اباوع عليه جان وجه تعبان حجه
حكيم: كلش تعبانه باقية بين الحياة والموت
وتر: والحل شنو يعني تبقى هيج غير نسويلها العملية
باوعلي وكأن بعيونه حجي
حكيم: ماكو متبرع الحد هسه متطابق ويا انسجتها
رحت گعدت يمه احجي بدوموع
وتر: يعني شنو بابا اختييي راححح تمووت
حكيم: انتي ماتردينها تموت مو
وتر: طبعا غير اختي مستعده افديها بروحي
حكيم: تتذكرين من كلنا سوينا تحاليل هذاك اليوم علمود تطابق الانسجه
وتر: ايي
بقيت صافنه بي تذكرت كلام سنان ومرام تباوعلي ببتسامة شماته عرفته شنو راح يحجي
حكيم: محد من عدنا انسجته متطابقة بس انتي اذا تردينها ترجع مثل قبل الازم تنطيها وحده من كلياتج
كمت وحجيت بدون تردد
وتر: وانا مستعده انطي الاختي كل حياتي مو بس جزء مني گوم بابا اذا يردون هسه خلي ياخذوها ....
#يتبع...
𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵
بقلمي: زينب علي
شنو رأيكم بالقصة والاحداث
معثوراتي لا تنسون التصويت+ متابعة الحساب+ تعليق بين الفقرات ♥️
متابعة ممتعة🦋
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!