رواية تاروت الفصل الحادي وأربعون 41 - بقلم زيـنـب علـي 🦢

#تاروت

البارت «43»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

امِن ما يلوحك بالگلب نسيان
انا ساعة رمُل لبگلبي ما يطلع

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

سحب الغطا من الارض يغطي بيه ويحچي
يمان: بيج شي يعمري

حركت راسي برفض

يمان: تعاي هنا تعاي

سحبني الحضنه نومني على ايده وحضني يهمس بأذني

يمان: خليل گلبي مامصدگ مخليچ بحضني اووف  تدرين شجاي احس

بعدت راسي شويه منه اباوع الوجه خلا انفه على انفي
خيال: شجاي تحس

يمان: حاضن احلامي وامنياتي كلهن بين اديه

ماعرفت شجاوب تناقض فضيع بداخلي رغم متقبلته وابد ممانعت اعيش ويا علاقة حقيقية بس هم اكو بعد رفض بداخلي ناحيته مااعرف بشنو اوصف شعوري بلحظتها كلش مخربط، جنت افكر وسارحة بي نزل راسه باس حنكي وگال

يمان: وين سارح حبيبي

خيال: بوضعنا

يمان: شبينا تخبل وعين الله علينا

خيال: ماادري بس انا بعدني مااثق بيك

تنهد بتعب شدني اله يعدل بشعري
يمان: انا غلطت بحقچ واعترف وحقچ ماتثقين بيه بس انا اوعدچ راح ارجعلج هاي الثقة من اول وجديد بس اصبري عليه خلي اشوف دربي

خيال: نشوف

يمان: اگلج شي

خيال: شنو

يمان: احس ما رقصنا سلو بالعرس حلو

گام ابتعد مني سحب ايدي وگال
يمان: گومي وياي

حچيت مستغربة

خيال: شنو تريد تسوي

يمان: هسه تشوفين

كمت وجريت الغطا وياي متغطية بي وهو لبس بعدها جر شرشف الچرباية اتقرب مني يحچي

يمان: ارفعي اديناتچ

خيال: يمان شتريد تسوي

يمان: يلا يلا بله عناد

جر الغطا مني رفعت اديناتي اضحك لف الشرشف عليه وشده من فوگ راح للبدله اخذمنها البرگع خلا على راسي ومايخليني احجي واعترض شغل اغنية بتليفونه  ياگمر عندي حبيبة ، سحبني اله وحضن خصري اديناتي صارن على صدره نزل نفسه سند رأسه على راسي يهمس ويا كلمات الاغنية

ياگمر عندي حبيبة احلى من كل البنات
من طبع دجلة وفاها عيونها بلون الفرات
موعد وشاطي جفنها
غارت الحورية منها
بيها اشكال الدلال
ياگمر يابو الليالي ودع النجمة وتعال
ارسم الفرحة بسمانا
طيوف ونجوم وخيال

يمان: حابچ حيل والبخت الجمعني بيچ

غمضت عيوني حيل رجع گال
يمان: وانتِ تحبيني ؟ صار شگد ماسامع هاي الكلمة منچ حتى اليوم بوضعنا الخاص مانطقتيها

خيال: يمان تعرف جوابي

يمان: اعرف بيچ تحبيني بس ميخالف اريد اسمع عوفي كلشي على صفحة هسه بروح اهلچ خلي نعيش يومنا الحلمنا بي من سنين ويكون ذكرى لطيفة نضمها الباقي سنينه الجايه

حضنته ضميت راسي برگبته وهمست
خيال: احبك حيل

يمان: اخخ اخخ وينه حلگچ خلي ابوسه وينه شو

رفع راسي يبوس حيل ويحچي
يمان: روحي مفرفحة عليچ

صارت عيني على صدره بي اثار كومه واكو اثنين مثل الحفر صايرات الي فوك تلمستهن غمض عيونه وگال

يمان: كل اثر عاف بيه وجع وموقف ما ينسي الهسه يأذيني الا هذا حسيته مثل العسل على گلبي

مد ايده گدامي شوفني اثر الجگارة من حرگته بيها مررت ايدي على الاثر تنهدت بضيق احچي

خيال: هواي مرت علينا ايام صعبة

يمان: استسهلهن من اصير بحضنچ

گالها وشالني بحركة سريعة ضحكت اعيط
خيال: يمان بلا خبال وين ماخذني

يمان: نسبح مو جوعانة حتى ننزل ناكل

ضحكت وهو هم ضحك يمشي بيه ويكزكز سبحنا وطلعت مشطت وبعدها توضيت ورحت حتى اصلي وهو عافني ونزل بلا كلام غلست ماحچيت شي نزلت ورا اكلنا بعدها گعدنا شفنا فلم طول الليل بقى مخليني بحضنه مايقبل يبتعد عني ولا لحظة الحدما نمت حسيت بي شالني يمشي بيه

ماگعدت غير ثاني يوم الصبح تليفونه يدگ اخذه وطلع خارج الغرفة جاوب شويه ورجع انا گاعدة بس مغمضة عيوني

حسيت بي باس كتفي داعب خدي يگعد بيه ويهمس
يمان: صباح الراحة

خيال: نعسانه يمان حباب اريد انام

يمان: راح يجن امي ورميم كالت بعد فد ساعة يوصلن تعاي اگلچ شغلة قبل لا يوصلن

بسرعة فزيت گمت من الچرباية احچي
خيال: اگعد هسه يوصلون اريد ابدل

سحبني من ايدي
يمان: دتعاي تعاي خمس دقايق هيچ چنچ ماتدرين مثل البارحة

خيال: يمان اگعد

بسته بخده ورحت اركض بتجاة الحمام وهو اسمعه يصيح

يمان: احترگت روح صمد تعاي ولججج

من بعدها على مابدلنا ورتبنا نفسنا انا لبست قفطان سوو الي مال صباحية لونه ازرق على نيلي ويمان لبس دشداشة بيضه نزلنا ثنينا بعدنا على الدرج انفتح الباب ودخلن حكمة بالبداية وبعدها رميم وزينة اول ما شافتنا حكمة طگتها بهلهولة طويلة راحلها يمان حضنها يبوس براسها

حكمة: صباحية مباركة يبعد عيني ونظرها الف مبروك

يمان: الله يبارك بيچ حبيبتي

رجعت باركتلي ورميم هم خلت جهالها على صفحة واجت باركت النا حضنتني تهمس

رميم: الوجه منشنش وراكم سالفة مو فارغة

كرصتها حيل من زند ايدها رجعت همست
رميم: صارت بيها گرصة اريد احلف السالفة مو خاليه الحگيني للمطبخ بسرعة

اخذت صينية الريوگ من ايد زينة واشرتلي الحگها للمطبخ عفت حكمة تحچي ويا يمان اسمه يگللها

يمان: منو جابكم يمه

حكمة: باتر وصلنا وراح گال عندي شغل ويرجعون هو ودائب

دخلت ورا رميم للمطبخ لگيتها متخصرة ووكافتلي اول مادخلت سحبتني من ايدي تحچي

رميم: تم مو عليچ الله گولي اي فرحتي نسيبي البارحة وتم كلشي

جريت ايدي منها
خيال: شو انتِ زايعتها فد مره استحي على وجهج عاد

خلت كتفها على كتفي دفعتني تلعب بحواجبها وتحچي
رميم: دام صار بيها استحي يعني الامور كلها تمام دگولي يلا دگولي مو انا اختچ حبيبتچ

ضحكت وسعت عيونها ورجعت گالت
رميم: لا لا عليچ الله صدك تحچين

خيال: اي والله شبيچ حسيت ان هاي هي بعد كافي وبجميع الاحوال انا مراح اتقبل شخص بحياتي غير يمان

ماحسيتها غير طگتها هلهولة طرشت اذني بيها حاولت اسكتها ماكو متسمعني وگفت بباب المطبخ واستلمتنا هلولة ورا هلهولة

خيال: رميم بشرفچ كافي فضحتيني

دخلت حكمة بلا ماتعرف شنو السالفة بس افتهمتها من هلاهل رميم وهم صارت تهلهل بعدها حضنتني وصارت تبچي

حكمة يبعد روحي ادري بيچ عاقلة وتفهمين وتعرفين مالج غيره ولا هو اله غيرچ

خيال: فدوه العينچ حبيبتي

حكمة: فرحتي گلبه وكسبتي بي اجر هالمسكين هذا مشلوع گلب من هو طفل لليوم

گطعت كلامنا رميم وگالت
رميم: اتصلت بيه بيبي گالت العصر نجي هسه مايگدرون يطلعون لان بيت طالب راح يرجعون يسافرون

من بعدها هو رجع دخل للبيت واتريگنا وراها اجوا الولد وگعدوا يسولفون حكمة يمهم ورميم بالمطبخ تجهز للغدا گمت يمها اول مدخلت انتبهت الحالتها رغم تضحك وتشاقه بس اكو شي حاير بعيونها وحتى باتر هادئ مو مثل العادة خابصنا بس مخلي جهاله بحضنه ويسولف ويا الولد

باوعتلها جانت وگفه تسوي زلاطة وگفت يمها حچيت
خيال: بيچ شي مو على بعضچ

رميم: ها لا ماكو شي

خيال: رميم اعرفچ اذا بيچ شي گلبي يعلمني شبيكم انت وباتر صاير بينكم شي

تنهدت تهمس
رميم: ماعرف شگلچ خيال مدري شبينا كل ما تتصلح الامور بينا احس بعدنا بنفس المكان مانتحرك

خيال: شبيكم البارحة تركصون وشحلاتكم تخبلون انحسدتوا ؟!

رميم: وحتى البارحة مابينا شي بس خلي اسولفلچ وانتِ احكمي

خيال: خلي نصعد فوگ للغرفة بعد وگت للغدا

صعدنا للغرفة ذبت نفسها على الچرباية گعدت گبالها احچي

خيال: يلا سولفيلي خلي اعرف شنو سالفتچ الوجه مگلوب

رميم"

من رجعنا من عرسكم للبيت هو تليفونه طول الطريق ماسكت ولا لحظة اخر شي سوى صامت وما قبل يجاوب ماحچيت شي بس انتبه عليه ضجت ونزعجت لزم ايدي باسها وگال

باتر: مشتاگلچ ريماي

رميم: انا هم ماگلتلي منو جاي يتصل عليك جاوب

ابتسم يحچي
باتر: مو شي مهم علمود الشغل باچر اكمله المهم هسه انا روحي رايحة عليچ واليوم البيت فارغ اوييلييي العب لعب على واهس اخوي

رميم: اويي تعبانه وولد ووين اوديهم

باتر: امي موجودة

رميم: لا باتر خطية خاله تعبانة

باتر: اشش معليچ ماتگول لا تكيف دخلي نوصل

ضحكت وهو اخذ الطريق كله يحاول يشاقيني ويضحكني بس عرفت اكو شي بداخلة سالفة مو خالية وصلنا للبيت اول مادخلنا سألتني حكمة

حكمة: صاحبتچ وين بعد ولا تفطنت عليها

رميم: اي حكوم راحت ويا ابوها مو اجه للزفة

گالت بعدم تصديق
حكمة: هاا ويا ابوها اي خوش بالمبارك راح نزيد توأم بعد

ابتسمت وباتر راد يحچي بسرعة سحبته من ايده احچي
رميم: اليوم هواي تعبنا خلي ندخل نرتاح

باتر: شبيچ خلي احچي ويا امي

سحبته گوه ادري بي خبيث هسه يفتن على دائب صعدته الدرج دفع وانا احچي ويا خاله مااخلي يحچي

رميم: خاله الجهال نايمين وشبعانين ومبدلين هم بعد مايگعدون للصبح واذا گعدوا اتصلي بيه انزل راح ننام بالغرفة الفوگ

حكمة: خلوا فروخي يمي وانتم الله وياكم شلايتيه

اباوع الها دخلتهم هي وزينة للغرفة
باتر: ليش ما خليتيني اگول الامي عليه چا راحتله بهاليل وعلي

رميم: لا تصير خبيث اكيد اكو شي براسه هو من يشوف الوقت مناسب يگللها

بعدني هسه فتحت باب الغرفة سحبني عليه رجعني على الحايط يهمس
باتر: حيتي

رميم: روحها

باتر: فدوه الروحها مشتاگلچ روح گلبي

رميم: اوويي وخر تعبانه اريد اسبح

باتر: تعاي ماكو تعبانة

عفته وطلعت اركض للحمام قفلته عليه وهو وراي مايگدر يدك الباب حيل ولا يكدر يحچي بصوت عالي اتقربت يم الباب احچي

رميم: ارجع للغرفة راح تصعد البنت تشوفك شتگول

باتر: رميم احترگت عشيرتچ اطلعي

مجاوبته مل ورجع للغرفة سبحت وطلعت لابسه بس روب الحمام لگيته نازل جايب ملابس اله والي من جوه باسني وگال

باتر: انتظريني اسبح واجيج

بقيت امشط واجفف بشعري بالمرايه صارت عيني على تليفونه صار بي وميض مشمور على الچرباية اتقربت منه وماعرف ليش گلبي صار ينبض حيل شفت تجي اشعارات على برنامج التليگرام بس هواي مسجات فوك 70 وميطلع المسج بس وصول رسالة جديدة وعدد المسجات حاولت افتحه ماگدرت وهو مسوي بصمة على وجه ومغير الرمز

رجعته على مكانه من سمعت صوت باب الحمام فتح مو خوف بس ردت اسايره واعرف شجاي يصير بلا ما اتسرع رجعت المكاني ارتب بشعري گبال المرايه دخل للغرفة وسد الباب اتقدم عليه حضني من ورى رجعت نفسي عليه خليت راسي يرتاح على صدره باس شعري يحچي

باتر: أجيتچ مسومر تعب وبكيف گلبچ بعد

درت عليه احتضنت وجه بأثنين اديه اهمس
رميم: اضمك بگلبي من التعب

غمض عيونه صار يتنفس بصعوبة گوه يجر التفس ودگات گلبه مو احسن حال من گلبي ورجفة جسمي

باتر: يتعب گلبي كلش يتعب گبالچ

رميم: انا أحبك

باتر: هنيالي ريماي هنيالي وروح امي بعد كلمة يمه الي تگولها حكمة ثاني كلمة تهود بيها جروحي هي هاي گلمتچ جعلني مانحرم منها

رفعت نفسي على اطراف اصابيع رجليه وهو رفعني اله من خصري باسني وتبادلنا بوسه دافية مليانه مشاعر حلوه تتسلل من گلبي الگلبه من بعدها ختمنا ليلتنا بعالمنا الخاص وهاي چانت اول مره من بعد الي صار كله

سحبني الحضنه خلا ايده جوه راسي نزل ببوساته من جبيني الانفي الحلگي ابتسمت حاضنته همس
باتر: حضنچ بيتي

رميم: نعست

باتر: نامي يعمري تعاي بحضني ونامي باجر نگعد من الصبح اكيد

درت نفسي هو حضني من ورا مقفل اديناته عليه على صوت همساته ومغازلته الي كلش نعست بعدني هستوني اريد انام وحسيت بي اخذ تليفونه اتنهد بضيق رفع نفسه يباوع الوجهي سويت نفسي رايحه بسابع نومة سحب روحه مني حسيت بي بدل فتح الباب وطلع

بسرعة گمت ورا اخذت الروب لبسته ونزلت شفته طلع للحديقة ركضت دخلت للستقبال اباوع عليه من الشباك شفته يحجي بالتليفون ويضحك ومنطلق يسولف حاولت افتح الشباك شويه حتى بس اسمع شجاي يحچي ماكو ماكدرت اسمع شي

بقيت واكفه بباب الاستقبال اول ما دخل تفاجأ بيه گال

باتر: دخيلك ربي شنزلچ مو چنتي نايمة

كتفت اديناتي
رميم: ويا منو چنت تحچي

باتر: ما ااحجي طلعت اشتم هوا

رميم: باتر تضحك عليه بهاي عيوني شفتك تحجي بالتليفون ومنطلق تضحك

تنهد بتعب وگال
باتر: شغل بعدين تعرفينه

رميم: بس احنا شغلنا بنص الليل يعني سكتت من تليفونك مسكت طول الطريق وماحجيت شي وهسه شفتك بعيوني تحجي وتنكر

ابتسم حضني
باتر: اروح فدوه لليغار عليه

رميم: تريد تضيع السالفة بهاي سوالفك

باتر: غير شغل

رميم: خلي شغلك يفيدك

حجيتها بعصبية وصوتي صار عالي سحبني من ايدي بعصبية بسرعة تحول

باتر: صوتچ لا تعلينه احنا مو الوحدنا

دفعته ورحت للغرفة الجوه طلعت ملابس وصعدت فوگ سبحت وهو رجع للغرفة صرت اغلي من القهر اعرف اكو شي بس شنو هذا الما جاي اعرفه بعدها نزلت اريد اخذ الجهال من حكمة خطية فزت حسبالها بيه شي طمنتها واخذت الاكبر صعدته اول شي وبعدها الكرار وهو يباوع عليه متفاجأ ومستغرب من حركتي خليت الكريكوتات بنصنا

باتر: عود صدك تحچين مشتاگلچ اريد بحضنچ

رميم: دير بالك تحچي وياي دير بالك

باتر: حبيبي بلا خبال عليج الله

رميم: احضن جهالك ونام

عفته ودرت وجهي منه وغطيت حتى راسي احچي
رميم: انا رميم تچذب عليه دصبرلي

باتر: الحرب العالمية الثالتة مو

مجاوبته توسل راد ابد مانطيته اي ردة فعل بس الموضوع بقى ياكل بيه وماعرف شسوي انت شتگولين

خيال"

صفنت عليها افكر تنهدت
خيال: ممكن يكون شي علمود شغلهم ليش تفكرين بأشياء مو حلوة

رميم: بس شغلهم وتفاصيله كلهن اعرفهم وهو بنفسه يحچيلي

خيال: وهم مستحيل باتر يخونچ

رميم: لا لا مو خيانة بس اكو شي چبير جاي يصير وبالايام الجاية تنكشف

خيال: خوفتيني

رميم: لا تخافين چا هم ليش سموهم الرهبان يخبطونها ويشربون صافيها وهسه تشوفين

ردت احچي اندگ الباب ودخلت زينة تحچي
زينة: خاله حكمة تدور عليكم

خيال: يلا جايين

گمنا نزلنا جوه وهم بعدهم يحچون دخلن رميم وحكمة للمطبخ يكملن الغدا خلصنا الغدا الولد طلعوا والعصر اجت بيبي وعمه فاتن باركولي بقوا للعشا ماقبل يمان يطلعون طلبنا اكل جاهز وبعدها طلعوا كلهم رجعوا البيوتهم گالت حكمة يومين وننقل غراضنا لهذا البيت هي رادت اسبوع تعوفنا وحدنا بس يمان ماقبل گللها عندي شغل وبس باچر گاعد بالبيت

عفته گاعد على التلفزيون صعدت فوگ بدلت ملابسي الشي مريح ورجعت نزلت ويا نزلتي سمعته يحچي بالتليفون ويگول

يمان: فرات السيارة تزرفت رغم هي مصفحة وضد الرصاص بس هواي صار طلق عليها ومن مكان قريب واحنا جنا بداخلها

نصدمت من رجع گال
يمان: بيوم الحنه من رجعنا صارت ويانا بس انا ماجاي اعرف منو هيج سوه وليش

انتبه عليه نزلت بسرعة حچه
يمان: فرات بعدين نحچي باي هسه

غلقه قبل لا يحچي سبقته وحچيت بخوف
خيال: يمان شنو هذا السمعته

يمان: اهدي حبيبي ماكو شي حادث صغير

خيال: حادث صغير وسمعتك تگول زرفوا السيارة علينا منو هذول

مسح على وجه بتعب
يمان: ماعرف منو بس ضربوا علينا وشردوا

صحت بعصبية وخوف احس روحي صرت اهتز مثل السعفة
خيال: طبعًا ماتعرف منو هو اليدخل بهذا الشغل شيتوقع يعني شمرون عليه ورد ترا مراح تشوف غير الرصاص

يمان: دخلت وتندمت وناوي اطلع بس غير اريد اشوف طريقة نطلع منها

خيال: اكبر جرم بتاريخ البشرية تطلعون منها بلا عقاب والله اكبر جرم

حچيتها بأعصاب فاقده لزمني من ايدي گعدني بصفه يحچي

يمان: صح وياج حق بس انا ماگدر اجازف بخواني لو اعرف اسلم روحي واشبل كل التهم منهم هم اسويها

حچيت بدموع
خيال: ليش هيج سويت يمان من البداية المفروض تعرف هذا مو طريق ينمشي غلط غلط

يمان: راح احچيلچ بس هذا لا تعتبرينه مبرر ابد ابد مو مبرر الي وانا غلطان من ساسي الراسي بس هم خلي احچيلچ اريد اطلع الي بداخلي كله

مسحت دموعي اباوع عليه غمض عيونه بقلة صبر وترث جگارة سحبني الحضنه خلا راسي على صدره ادري بي مايريدني اشوف ملامحة وهو يحچي گال

يمان: فد يوم من الايام چانت الدنيا شتاء وبهذا الاسبوع كله مطر ابد ماسكتت ودائب طلع برا يلعب طوبه زلگ ونكسرت رجله

بيومها صح انا اخذته وجبرتها اله بس مايفيد اكيد محتاج علاج وتغذية وعناية وهواي امور وحكمة چانت بوكتها عدها بداية قلب وماتگدر تخيط انكسر ظهرها من المكينة وصار عدها تلف بااعصاب ايدها ومحتاجة عملية بهذاك الوكت كلش كلش مكلفة يعني لو اشتغل عمري كله ماگدر أأمنلها المبلغ

زين امي منا ودائب منا مكسورة رجله ومتألم ومحتاج علاج كملها باتر واتمرض هم صارت عنده جرثومة بالامعاء بحيث انطرح بالفراش مايشيل لا ايد ولا رجل

شسوي طلعت للشغل على باب الله چانت الدنيا باردة برد تكص گص والهوا مثل السيوف يجرح من البرد وانا لابس بس فانيلة خفيفة ولابس فوگه جاگيت باتر صغير عليه يادوب مكفيلي حتى ماگدر اسده لبست حذائي وجواريبي وطلعت اشوفلي شغلة على الاقل تخليني اسد علاجهم مو شرط ناكل عود من ارجع اسوي اي شي المهم ادبرلهم علاج

بيومها حفرت الگاع حاول اشتغل بكل الطرق رحت للعلوة حتى اشتغل حمال ورحت للمخظر محد قبل يشغلني رحت للعرباين هم محد قبل اضطريت اروح ارجع للعلوة حتى اشتغل حمال شسوي بعد

صدك بعد ما كملت شغل وشلت طن طن گواني طحين اخر شي انطاني بس خمس الف دينار زين انا الخمس الف وين انطيها اليا حلگ

گلتله يعني انا نزلتلك نص الحمل الخمسة شويه على الاقل انطيني 10 الف دينار دفعني حيل وغلط عليه وغلط على امي ابن الهيج هيج روح منا وهاي كلش كافي عليك

الله لا يشوفچ شلون صرت ارجف وحسيت الحرارة صارت تطلع من راسي كلش انهضمت من سب امي

وانهضمت ان انا نكسر ظهري بالاخير خصلت بس خمس الاف دينار حمدت ربي ورجعت البيتنا جان البيت كلش بعيد عن السوگ دگيتها مشي الحدما وصلت تقريب الساعة 4 العصر

اول ماطبيت لگيت الوجوه مگلبه امي مو يمهم نايمة بغرفتها دائب نايم وبس باتر گاعد اتقربت يمه احچي

يمان: شكو باتر البيت هدوء

جاوب بقهر وغصة
باتر: اجه ابو البيت يريد ايجاره الفات مال شهرين 500 الف وگال اريد فلوسي هسه وابو المولده هم يريد فلوسه 100 وضريبة الكهرباء 50 وانت تعرف هاي بداية شهر وكلها تريد فلوسها ودائب گال الامي ان هو جوعان وامي مالگت شي توكله غير بصل والفلفل بالثلاجة شتوكله حتى بيض ماعدنا

بعده يحچي وسمعت دائب صرخ حيل كعدت من النوم يصرخ من رجله طبعا يعني كسر مو شويه ويحتاج حبوب مسكن تسكن المه اباوع عليهم مدري تباوع الحالتي الطين واصل لركبي وكاتلني البرد وميت من التعب والجوع وكاتلتني الهضيمة على سبة امي منا باتر ادري بي يكابر على مرضة ومتأذي وامي مابيها حيل تشيل حتى روحها ودائب يصرخ من وجع رجله

وانا عندي بس خمس الاف وين احطها وشلون ادبرها احتاريت بزماني صفنت وگلت هسه هي لا ابو الايجار يقبل بخمسة ولا العلاج بخمسة خلي اطلع ارجع اجيب فلوس من جديد حتى اذا ليل اي شغلة اشتغل لو اطلع 15 الف هم نعمة

رحت ادور اي شي وطبعًا شغل الليل مو مثل الصبح لا تگدر تشتغل حداد ولا تگدر تشتغل فيترجي كلشي ماكو ششتغل احتاريت

طلعت امشي بلا تفكير بس اريدلي مكان اشتغل بي مليت من الفره گعدت على الرصيف اباوع على اديه صايرات زرگ من البرد محصور بيهن الدم

صارت شهگة قوية بصوته وكمل
يمان: هنا انا اول مره ابچي بيها من بعد وفاة امي وانا كاعد على الرصيف ابچي ما حسيت لا واحد خلا بيدي الف استغربت كلش لحظات يلا ادركت ان الشخص عباله انا اجدي اخخ هنا نهضمت بالزايد وحسيت بالذل يعني انا مامجدي ولا ماد ايدي الاحد

المهم تركت الالف على الرصيف وگمت كملت مشي لهناك ولگيت نجار مفتح رحتله ركض گلتله عمي تريد عامل

جاوبني
- شتعرف تشتغل

يمان: كلشي اشتغل عسى ما انظف وراك هم قابل

- تمام اشغلك

يمان: وشكد تنطيني

- راح انطيك عشرة لان عندي شغل هواي واريدك تمشي وتكص هذا الخشب كله 

فكرت ان 15 الف هم بيها باب وجواب اشيل 5 للمسواگ وتبقى عشرة رجعت گلتله

يمان: زين واذا انظفلك الورشة بعد مانخلص

- هاي من الزينات تصير 15

كلت كلش زين ايدي فوك الايدين اذا حصلت عشرين اليوم كلش تمام

على ماكملت شغلي ويا انطاني فلوسي وطلعت الساعة ب 9 تقريب رحت الاقرب صيدلية احتاريت شجيب وشخلي يعني انا ماگدر اشتريلهم كل واحد علاجة فكرت اشتريلهم كلهم مسكن تسكن الامهم والله كريم وابو الصيدلية هم گال عندي هاي ابر تسكن المهم اخذتهن طارن اول عشرة من الفلوس

زين بقن عشرة خمسه اخذت بيهن مسواك للبيت وبقن عندي خمسة ضميتها وهيج مرن الايام وانا على هاي الحالة زادت المصاريف الخمسة الاف ما گامت تكفي والعشرين ماتكفي ووين ماتروح اهانه بأهانه على ابسط شي اليسوه والمايسوه يصكع بيك يغلط عليك ابسط شي من ادفع العربانة بلا سبب تسمع الغلطة تجيك من واحد والله شني ساد عليه الدرب شويه

مرت عليه ايام مابيه حيل ماعندي قوه ادفع العربانة بس مجبور ادفعها ماعندي قوة لا ماكل لا نايم لا مرتاح ومامخلي لگمة بحلگي اسند بيها طولي تخيلي مرات ابقى يومين بلا اكل ردت انگطع بالنص

هذا مختصر عن الشي الچنا عايشينا لا تغرچ الحالة الاحنا بيها هسه

خيال: بس انت جنت تكدر تكسب رزقك من الحلال

يمان: خيال تعبت تعبت كلش ماصارت عندي طاقة تحمل اكثر زين امي تريد تموت كدامي گلبها كلش اذاها وانا من المستحيل اكدر أأمن مصاريف علاجها لهذا اول مااجتني فرصة للاسف ومن شدة غبائي رحتلها بلا ما افكر يالعواقب

خيال: فلوسك كلها حرام

يمان: لا لا ابد شوفي الفلوس الجنا ناخذهن اعرف بيهن مايدومن لهذا صرنا هيج نتلف بيهن سيارات ملابس اشياء وقتية صدگيني اما بيوتي عقاراتي على الرصيف هذن فلوسهن مو حرام

خيال: منين جبتوهن

يمان: شوفي بعد سنين طويلة حكمة طلعلها ورث من رجلها المرحوم على تالي وكت ولد اخوته انطوا الها امي شاطرة شالت الفلوس كلهن وكالت سوو بي محل ذهب وشغلوا الي ماگلنا لا فتحنا محل المحل صار ثنين وثلاث واربع محلات بعدها معرض سيارات وبيوت وعقارات وهذا كله بالنص ويا حكمة يعني احنا الـ 3 بنص وامي الها نص الوحدها اما الشغل الاسلحة الي تتمرر من الرصيف مالتنا هاي فلوسها للتلف وداعتج لفه مامشتري بيها كله ملابس سيارات وغيرها

خيال: ليش كملتوا بهذا الطريق

يمان: غباء قلة وعي غفلة شتردين تسمينه سمي بس اخخ اخخ لو يرجع بيه الزمن وروح امي اكص ايدي وماشتغل بهذا الشغل

صرت اشهگ واحچي
خيال: شلون راح تطلعون من هذا الشغل يمان شلون شلون بس فهمني

احس نفسي فقدت مسح عيونه ببطن كف ايده حيل وسحبني اله يبوس بوجهي ويحچي

يمان: لا تخافين عدنا خطة راح نمشي عليها اهدي يعمري

حضنته حيل خليت راسي برگبته استنشق عطرة وهمس
خيال: خايفة يمان لا مو خايفة انا مرعوب

يمان: اششش لا تفكرين هسه انت بين اديه فكري بلحظتنا وبس

خيال: انا احبك لا تعوفني

يمان: اعوف روحي وابقى يمچ

شالني وگام وانا وانا تعلگت برگبته مثل الطفلة صعدنا الغرفتنا وطبعا بين اديناته من صدگ خلاني افصل واتفاعل ويا وانسى كلشي كل الافكر بي هو وبس واتشوق الكلمات الغزل التطلع منه وبهرني بيهن

من بعدها مرت يومين ونقلنا الغراض من هذاك البيت لهذا بيتنا واستقرينا بي تقريبًا وهنا بدأت مهمة الرهبان يطلعون من الصبح مايرجعون غير نص الليل ماعرف الشنو جاي يخططون بس اكيد شي كلش چبير وخطير كالعادة والمصيبة الاكبر مايقبلون يحجون ولت اي شي وصايرين اعصاب حتى منگدر نحچي ونستفسر اول ما يدخل يمان يحضني ويگول بداعتي لا تساليني عن شي اضطر اسكت

بحيث باقين هيچ گاعدين ومخلين گلبنا بشيشية على ساعة توگع وتنكسر ونروح بيها كلنا مو بس هم

❛❛❛❛

وتر"

جنت احچي ويا رميم تنقلي ادق الاحداث الي تصير ببيت حكمة غلقتة من عدها وگمت طلعت من الغرفة جنت لابسه دشداشة كلش قصيرة لونها ماروني ومرتبه شعري ومخلية حمرتي الحمرا

گلت الاحمر فگرني هذيج المره خلي نغير هالمرة البس ماروني طلعت من الغرفة جوعانة رحت الغرفته اريد اكله يسويلي اكل

سمعته يحچي بالتليفون يگللها
دائب: ليلى لا تلحين وين تردين تجين شسوين اصلا ماكو من التعب روحي طافرة حتى المحرك طافي شتردين مني الخاطر محمد

سكت شويه ورجع گال
دائب: بويه مافيدچ والله مافيدچ صرت شايب بعد الدرجة مرتي وياي وبنفس البيت مابيه حيل اتقرب منها المحرك مو طافي لا محترگ ومشعلول ابو اصل اصله

انا شفته هيج حچه لو جن جنوني جان ادفر الباب واضرب عليه حيللل سويت روحي على اساس مقهورة كلشش متأثرة الى ابعد حد انا صح نقهرت بس هنا كلش بالغت

صحت بي كلتله
وتر: اي عيني ليش لا من بابها مسوي روحك كلش ايه الله العظمى تستحرم تشوفني لابسه شورت ومن بابها الخانوم تريد تجيك ووين البيتي هي هاي الناقصة والله بس تجيبها البيتي ابو المحرك ؟؟؟!

گوه خفه ابتسامته يحجي
دائب: من شوكت صار بيتچ

وتر: والله بيتي من اول يوم دخلت بي لهنا الهسه افتهمت وماسمحلك تلغي وجودي وتمحيني بهاي السهولة انا وتر دائب

گام اخذ جگايرة وطلع للصالة وانا امشي ورا واحچي

وتر: لا وتكلها طافي شقصدك يعني شقصدك جان استحيت تحجي ويا وحده ثانية وانت عندك وتررر

اباوع عليه گعد على التخم ورث جگارة وخلا المنفضة على رجله يدخن ويباوع عليه ساند راسه على ابهام ايده

تخصرت احچي
وتر: بس انت ماتنعدل تموت على امهات تجميل وشهادات العليا صوجي انا الباقيهههه يمككك هسه اروح الحكمه وابقى وحدك هنا ومن المحرك يشتغل اجي احرك البيت على راسك وراسها

دائب: هسه انت ضايجة لان المحرك مايشتغل تحبين اشغله الچ

وتر: عشتو يشغله اشوفك اجيتك عود ومتعبه نفسي عبالي رومانسي حالك حال خلك الله فالح بس كفخني علساس جايب تايهه ويخاف عليه هو ولا عبالك اول ما جابني تلاحكت عليه بدقيقة 90 بالوقت البدل الضائع

دائب: تعاي اگلچ شغلة

گالها وعيونه لا اراديا نزلت على رجلية تجاهلت نظراته الخلت گلبي يدگ بسرعة وحچيت

وتر: انا تخوني ويا هاي نهار كله خابصني وبنتي وبنتي وهسه كاعد يحچي ويا نسوان ، خوب بعرس يمان ماظلت بنية ما صعدها حنين سوده عليه كلش

بقيت الغي اجيب واخلي ماعرف شنو احچي وهو بس يباوع عليه ويسحب جگاير وحده ورا الثانية مايحچي بس صافن وسرحان بيه

وتر: شبيك متحجي على الاقل گول شي لو السانك بلعة الطير هاا عفوا نسيت المحرك ميشتغل طافي لهذا انت حتى كلام ماتگدر تحچي

دائب: مو گلتلچ اشغله الج انتِ معترضة وماتقبلين

انا مامفتهمة شنو الموضوع واخرط عامي شامي من كيفي كتفت اديناتي احچي
وتر: شتشغل منه شو بلا شوفني يلا هز طولك ابو الشهادات العليا خليني ساكته

ضيق عيونه وگال
دائب: يعني عاجبج ! سهلة غالية وطلب رخيص

تلعثمت احچي بخوف وارتباك
وتر: يعني شنو

هز رأسه بوعيد اباوع عليه طفه الجگارة وگام ....

     يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

باتر شضام يا ترى 🌚💔 ؟!

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

متابعة ممتعة🦋