رواية تاروت الفصل الأربعون 40 - بقلم زيـنـب علـي 🦢

#تاروت

البارت «42»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

طوارفها ثلج ، ومكحلة بليل
وسواد البؤبؤ يوديني سفرة
هاي عيونها ، والباقي مضموم
اغار عليها ماراويك شَعرة
بكثر ما حلوة اني الاسمر الطوخ
من اذكُرها تصير خدودي حمرة

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

خيال"

تبسمرت بمكاني من اعترفت اله وبشكل مباشر اتذكرت من اعترف الي اول مره بوكتها ردت انجلط ماعرفت شسوي اروح لو ادخل عليهم مصدومة سمعته يگللها

يمان: شبيچ بابا انتِ شوكت لحگتي تحبيني حتى ما صار شهرين من شفتچ وعرفتيني

زينة: اي شهرين شهرين بس بعمري محد اهتم الأمري مثلك ليش تعلقني بيك ليش تهتم الاصغر تفاصيلي اني بعمري محد مهتم بيه هالشكل وحتى محد فد يوم من الايام گلي شبيچ

يمان: انتِ غلطانة هذا مو حب وعيب اصلًا توكفين گبالي وتعترفين وانا على ابواب زواج وبگد ابوچ

زادت بالبچي وتشهگ من كل گلبها نصدمت چنت شاكة بس ماتوقعت الهالدرجة رغم رميم گالت بس ماخليت ببالي

دخلت عليهم شفتها ميته من البچي ويمان واگف گبالها صدمته ما تقل عني بس شافتني صارت تمسح بوجها وتحاول ترتب شعرها قبل لا يحچي يمان سبقته وگالت

خيال: يمان اطلع برا اريد احچي وياها

نفخ بتعب يحچي
يمان: خيال لا تفهمين الموضوع غلط

خيال: ماراح افهم غلط يمان انا مو طفلة حتى افهم الموضوع غلط واشخصن الموضوع بس اريد احچي ويا زينة على انفراد احنا بنات ونفهم على بعض

باوع عليه بحيرة تنهد وطلع گمت سديت الباب وكعدت على القنفة واشرتلها تگعد بصفي هي بس تباوع عليه بخوف

خيال: لا تخافين تعاي گعدي خلي نحچي شويه

گعدت تفرك بأديها بلعت ريگ وگالت بدموع
زينة: انا ما عرف شسويت بس صدگيني مجرد حچيت مشاعري

خيال: سمعتچ تگولين اليمان ان انتِ محد اهتم بيچ ليش ابوچ وين عنچ امچ ، وين چتني عايشة

زينة: امي ماعرفها من فتحت عيوني على الدنيا لليوم انا عايشة ويا بيبيتي ام ابوي وچانت ماتحبني وتعنفني من الصغر الهسه

اتسغربت كلامها

خيال: ابوچ وين چان عنچ

زينة: ابوي جنت مازلت مااعرفة اشوفه صدف بالمناسبات هو شامرني يم امه وبس ينطيها فلوس حتى تدير بالها عليه ومن انسجن طردتني وسلمتني للناس الي اجو من طرف يمان

خيال: وحبيتي يمان لان اهتم بيچ وساعدچ ؟!

هزت راسها بلا كلام لزمت راسي بتعب اريد اعرف شلون اتصرف وياها والبنت ترجف ترجف من الخوف رادت تموت وبس تشهگ لزمت ايدها وهي مثل الفزت حچيت وياها بتفهم

خيال: الي جاي تحسينه انتِ هذا مو حب صدگيني بس انتِ ظروفچ خلتچ تحسين بهاي الاشياء بحكم محد چان يهتم بيچ ووالدچ مچان يشوفچ ومنعزلة كل الوكت طبيعي من فجأة يجي شخص يهتم بيچ ويسأل عليچ يهتم الادق تفاصيلچ لا اراديًا انتِ راح تحسين نفسج تحبي بس هذا مو يعني انتِ تحبينه حب كحبيب وحبيبته لا

زينة: ماعرف انا ماعرف شنو الحب بس حسيت بي

خيال: افتهم امي افتهم صدگي الي جاي تحسين بي مو حب لا مجرد ان انتِ عندچ نقص عاطفي واهتمام وشفتي بشخص طبيعي راح تتوهمين ان انت تحبي وخاصة هسه انتِ بمرحلة مراهقة اي شخص راح يملي نقصج العاطفي ولو بكلمة صغيرة راح تتعلقين وتحسين نفسج تحبينه وتفكرين بي ، بالإضافة إلى ان انتِ بعدچ صغيرة ويمان ترى كلش چبير عليچ مراح يناسبچ اصلا باي شكل من الاشكال

نزلت راسها وهمست
زينة: اعرف والله

خيال: المهم انتِ بعدچ صغيرة وبعدها الحياة گدامچ هواي بعد راح تتعرفين على ناس ممكن تتعرفين على الشخص الي يناسبچ الي مو تحبينه لان هو يهتم بيچ لا تحبينه الذاته الشخصه المواقفة وياچ تحبينه كأنسان يعني مو مجرد لان عوضلچ نقص

كل ما احچي هي تزيد بالبچي دموعها تسيل بغزارة گمت وحچيت

خيال: زينة انا ما راح اخذ منچ ردة فعل واعصب لان انا ماره عليه هيج اشياء ومتفهمة موقفچ بس صدگيني يعني يمان مو بس وياچ ويا اي شخص يحتاجة هو راح يهتم بي ويقدم اله المساعدة وادري بيچ فكرتي ان هو بعد راح يتزوج بعد خلص راح يعوفني ويهتم المرته وممكن فكرتي انا راح ابعده منچ بس حابه اگلچ انا ويمان علاقتنا مو البارحة واليوم ولا هسه بدأت بمجرد ماتزوجنا لا انا ويمان صار سبع سنين سوى وزواجنا مراح يغير من الوضع شي لو اريد جان بعدته منچ من اول يوم دخلتي بي علينا

زينة: انا آسفة

خيال: صدگيني ماريدچ تعتذرين بگد مااريدچ تطلعين يمان من راسچ ولا تفكرين الحب مو هيچ مو مجرد احب شخص لان ينطيني اهتمام هو ما خاصني بي جاي تشوفين بعينچ يمان يهتم للكل حرفيًا البيت كله يمان مهتم بي ، زينة الحب اعمق بي اشياء اكثر من هيچ وانتِ بعد وراچ كلية ووراچ وضيفة لا بد يجي يوم من الايام وتلگين الشخص المناسب الچ يعني كلهم الا يمان مو الشخص المناسب الچ اصلا

زينة: وهسه شراح يصير

گالتها بخوف وارتباك وگفت گبالها احچي
خيال: لا عبالچ اسوي هوسة ومشكلة لا غلطانة انا مو من هذا النوع ولا تعجبني هاي التصرفات اصلا اريد منچ هسه تگعدين وتفكرين بكلامي اكيد راح توصلين التقطة حل ، بس اذا تفكرين ان تحبين يمان ويوم من الايام راح يصير بينكم شي فـ انتِ جدًا غلطانة لا مستحيل مستحييلل يمان في يوم من الايام يفكر ان يخوني ويا وحدة غيري .

عفتها وردت اطلع اول مافتحت الباب صار بوجهي واگف قريب الباب مخلي اديه بجيبوبه ردت اتجاوزه لزمني يحچي

يمان: خيال لحظة

خيال: وخر يمان ماله داعي نحچي بالموضوع بس كل الصار صوچك انت السبب بي

يمان: وانا شعلي هاي فوگ زينيتي

خيال: يعني شتريد يصير من تهتم بالبنت وتدخل بأدق تفاصيلها وهي بعدها مراهقة طبعًا راح تتكون عدها مشاعر

يمان: المفروض شسوي اشمرها بالشارع وهي امانة عندي وانتِ تعرفين كلش زين امي ما راغبة وجودها بالبيت

خيال: حكمة انت تعرف بگلبها صح بالبداية اعترضت بس مستحيل تعوفها

اخذ نفس وزفره خلا ايده ورى رأسه صفن يفكر
يمان: وهسه شسوي انا

خيال: لا تسوي شي حچيت وياها وهي اكيد راح تفكر بكلامي وتعرف غلطها

اثنينا حولنا انتباهنا الصوت رميم اجت تحچي

رميم: شنو السالفة وين رحتوا الناس راحت وانتم ماكو

رحتلها احچي
خيال: هنا احنا تفاهمنا بموضوع وهسه طالعين

مشى گدامنا وهي لزمت وجهي تباوع بي بعدها وخرت شعري من رگبتي تتفحصها

خيال: شبيچ ؟

رميم: حمرتچ مامتحركة من مكانها ورگبتچ مالبيها اثار جريمة شچنتوا تسوون لعد

دفعت ايدها
خيال: انتِ صايرة منحرفة فد مره ماخذة سوالف باتر كلهن

رميم: لا تخافين هسه يموني ابو طول الحلو هم يحرفچ

هزيت ايدي معاجبني رجعنا للقاعة شفتها فارغة محد موجود غير حكمة وبيبي وعمتي وكم وحدة من معارف حكمة

خيال: يا هاي الناس وين راحت

رميم: غير طلعوا باعي الساعة بيش انتم وين جنتوا

وگفنا على صفحة حچيتلها على الصار بقت صافنه بوجهي مصدومة

رميم: يعني توقعتها تحب يمان بس مو تعترف اله لا وبهيچ يوم

خيال: لا تنصدمين بعدها صغيرة رميم من ترجعون للبيت عينچ عليها خاف تأذي نفسها كل شي يصير مراهقة ومندفعة بمشاعرها

رميم: لا طبعًا لتخافين راح ادير بالي عليها

اتقرب يمان وگف بصفي صاحت علينا حكمة گالت الولد يردون يدخلون راحت رميم جابتلي بشت طويل لبسته وضميت شعري جواه وخليت شال على راسي دخلوا باتر ودائب رحت گعدت يم بيبي وعمه گاعدات يم حكمة يسولفن على الحنة وشصار خلال الحفلة ...

وتر"

دخلوا الولد للقاعة شفت دائب دخل ويا باتر ثنينهم چانوا لابسين زي خليجي كامل وگفت يمي رميم سمعتها تگول

رميم: عفية ولد حكمة مو ولد چنهم شاردين من علبة چكليت

وتر: باعي دودي طالع صاك

رميم: يمه رجلي احلاهم العيون صارت عليه هاچ الزمي اروح الحگ على رجلي

انطتني الأكبر وراحت اله بقيت اضحك عليها انتبهت الدائب عيونه صارت تفتر بالقاعة الحدما استقرت نظراته عليه چان واگف ويمان گدامه مدري شيحچي ويا وهو من بعيد صافن بيه رفعت الاكبر ابوس بي اشرلي يعني نزلي ابتسمت وانطيته بوسه بالهوا مسح على وجه يأشرلي بسيطة ضحكت اتقدم عليه استغربت لان جنت واكفة بنص القاعة اتقرب مني سوه نفسه يأخذ الاكبر من ايدي اخذه وگال

دائب: ادب سيز صيري عاقلة وبطلي هاي حركاتچ

وتر: اوويي اصلا كلشي ما سويت انت مدري شبيك بس تخوزر عيونك يخوفن

جنت احچي وهو يباوع على عيوني وينزل نظراته الحلگي عقد حواجبه

دائب: هاي شمخليه بعيونچ

وتر: عدسات

دائب: لون عيونچ الطبيعي احلى وهذا شني على حلگچ

وتر: يعني شنو حمرا

دائب: ادب سيز طالعة تموتين احترگت روح حكيم

گالها وصار يبوس بالاكبر
وتر: يجنن هالطفل خلي ناخذه ويانا

دائب: اهله ماينطونه شنو رأيچ نجيب مثله

وتر: شلون نجيب منه ليش هو ينطلب من النت

دائب: لا حبيبي يتكون بالبيت وتحديدا بغرفتنا واذا تردين بالصالة عادي حتى بالمطبخ هم ترهم

صفنت عليه شويه يلا ادركت الموضوع رجع حچه ببتسامة مستفزة

دائب: انتِ بس البسي الشورت الاحمر والباقي عليه من اول يوم ازرگچ بتوأم مثلهم

گلبي صار يدك حيل اول مره يحچي بهذه الاسلوب وياي
وتر: انت واحد ميستحي اگعد راحة ابو بنيتي

ضحك اتقرب مني اكثر ماحسينا غير حكمة واگفة يمنا گالت
حكمة: ها شو واگف هنا شعندك

دائب: هاا اي اجيت اخذ الأكبر

حكمة: اي دخذه وروح شعدك تبسمرت هنا

اجت رميم

رميم: مجتمعين على صديقتي شكو

حكمة: اريد اخطبها الدائب شتگولين اهلها ينطونها

رميم: مو گلتلچ محجوزة حكوم

دائب: يمه وين تعرفين اهلها يمكن ابوها ما ينطيها

حكمة: اي ادري بي ماينطيها انا اله

ابتسم صار يبوس بالاكبر ويلعب ويا گالت رميم

رميم: راح نطلع بعد تأخر الوقت والولد وراهم يرحون للمزرعة

دائب: صديقتچ انا اوصلها الاهلها

نطت حكمة تحچي ويا رميم
حكمة: يا يا شنهي تردين تزيدين فروخنا بعد توأم مثل ما جبتيها انتِ ورجلچ ترجعونها

اجه باتر يحچي
باتر: اي يمه اي احنا ناخذها شعدنا نخلي بنت حديثة حمره صفره تروح ويا دائب الفاسد

دائب: طيح الله حظك

باتر: ميخالف المهم احنا نوصلها ويلا خلي نطلع لان تأخرنا وانطيني ابني اشيله انا

بقوا يتداهرون قطعت نقاشهم رميم

رميم: بسسس هي اصلا ماخذه اذن من ابوها اليوم تبقى يمي بما ان انتم راح تبقون للصبح ماترجعون وباجر عدنا عرس

حكمة: خوش اذا هيچ

سكتت ماحجت شي طلعنا من القاعة خيال راحت ويا بيت جدها ورميم ماكدرت تروح علمود جهالها رجعنا انا وياها وزينة ويا حكمة والولد طلعوا بوجهم للحفلة مالتهم ...

❛❛❛❛

رجعنا للبيت من التعب كبل صعدت الغرفتي بس سلمت على جدو وصعدت سمعت تليفوني يدك شفته يمان جاوبته

خيال: بعد حتى هنا لحگتني

يمان: ديري بالچ تبدلين انتظري

خيال: شتريد ؟!

يمان: انتظري قاديق لا تبدلين وبس

ماخلاني احچي سد الفون وراح ردت ابدل بس بعدين بطلت فكرت دام گلي لا تبدلين يعني جاي نزعت العباية الخليجية وعدلت مكياجي شويه واندك الباب اجاني صوت عمه فاتن فتحت الباب وگالت

فاتن: خوختي نزلي جوه رحلچ اخذ اذن من ابوي يريد يشوفچ

ماگدرت اعترض
خيال: عمه جدو وين

فاتن: دخل الغرفته حبيبتي لا تخافين يلا الولد ينتظر بالاستقبال الكبير

نزلت عمه نزلت وراها حافيه بس بعدني بالفستان طلعت من باب الصالة للاستقبال يصير بابه خارجي من الحديقة وادخل له شفته گاعد على التخم ومسترخي هم

خيال: شتريد صاير شي

حجيتها واتقربت كلش عليه وگفت گباله
يمان: حسيتچ جوعانة جبتلچ اكل واجيت

خيال: اسم الله عليك گلب والده

ضحك سحبني من ايدي گعدني بحضنه يهمس
يمان: الأكل حجة اجيت حتى مااخليچ تحسين راحت كشختچ على الخالي

خيال: اهوو يمان لا تتسخف

حضن خصري وخلا انفة برگبتي حسيت صارت عندي قشعريرة غمضت عيوني همست
خيال: يمان بطل سوالفك

شال راسه يعدل بشعري ويحچي
يمان: زعلتي مني اليوم

خيال: لا ليش حتى ازعل

يمان: سمعتي كلام صح مو بيدي بس المفروض ما تسمعينه وخاصة بمثل هيچ يوم

خيال: لا تكبر الموضوع وبعدين عادي مايهمني

يمان: صدگ ما يهمچ

خيال: انت كلك ما تهمني

ابتسم باس رگبتي على كيف
يمان: جسمچ فاضحچ وجاي يتفاعل وياي لا تكابرين

ردت اگوم ماخلاني ثبتني حسيت اصابيعه تغلغلت بشعري ونفسة صار يداعب وجهي انخفض تنفسي وصرت اسحب الهوا بصعوبة باس خدي بسرعة دفعته وگمت

خيال: خلص يمان اطلع

گام وگف يحچي بعصبية
يمان: شبيچ الخاطر ربچ خيال لا تجزعين

خيال: مالها داعي يمان انت تعرف الزواج شكلي وخلص

اتقدم عليه رجعت الي ورا صار يحچي بمكر
يمان: شنو رأيچ نفض السالفة هنا ببيت جدج

ردت ادطلع سبق خطواتي وسد الباب بسرعة ووكف گباله

يمان: وين تردين تشردين

خيال: لا تسوي وخر

رحت للباب ادفع بي اريد اطلع بحركة سريعة منه سحبني الحضنه عصرني على الباب

خيال: اذا ما وخرت هسه اصيح والهم امه لا إله إلا الله عليك

سند راسه على رأسي يهمس بذوبان
يمان: تگدرين شو بلا جربي

ردت احچي ماقصدي اصيح بسرعة اخذ شفتي بقوة مسكتني دفعته حيل ولا اهتز گطع نفسي ومايقبل يوخر لزم اديناتي صعدهن على رگبته ورجع حاوط خصري بأديناته رفعني اله وكمل گطع نفسي وحسيت الهوا الحابسته خلص يلا عافني وابتعد يبوس بخدي على كيفه دفعته لزمت حلگي المتبنچ

خيال: شبيك انت تخبلت

كرص انفي وگال
يمان: لا تتحديني بعد خوش

خيال: ايع شگد صاير مكروه ومستفز

ضحك لزم راسه دايخ
يمان: شسويتي بيه هسه شلون اسوق دخت كلش

خيال: حتى تتوب ومره ثانية ماتتقرب مني

ضحك باس ايدي
يمان: تأخرت لازم اروح

رجع باسني هواي بوسات من خدي يهمس
يمان: وتنسين تتحضريلي الباچر

همست
خيال: احلام العصر

يمان: دشدي روحچ شبيچ سحتي

فتحت الباب وطلعت احچي عليه وهو طلع وراي يضحك بسرعة صعدت الغرفتي سبحت وبدلت بعدها حجيت ويا رميم هواي بقينا نحچي يمها وتر باقية دزتلي فديوات من حفلة الولد دازهم الها باتر

گاعدين بمزرعة وهواي اكو ناس وفرقة موسيقية نفسها الي جابوها اليوم للقاعة وطبعًا باتر بالنص خاطهم خوط وركص الكل الا دائب بكل الفديوات واكف صنم بس يضحك وگوه يصفگ

من بعدها گوه جبرت نفسي انام بعد قلقل وتوتر وتفكير عميق كدرن اغفى ...

❛❛❛❛

يمان"

خلصنا الحفلة بحدود الساعة 2 صاعدين بنفس السيارة انا اسوق ودائب يمي باتر صاعد ورا

باتر: بعد وكت مو مال نرجع للبيت

دائب: الساعة 2 يا وكت هذا خلي نرجع لبيوتنا

باتر: اهووو حچه الا يعارض شسوي راجع البيتك المره ويمنا بعد شسوي بالبيت يمان اطلعنا على الشط صار هواي ما گاعدين هناك

يمان: صدك خلي نروح نگعد على الشط شويه حتى اذا نص ساعة

دائب: بس نص ساعة انا صوچي مااجيت بسيارتي

طلعنا للشط گعدنا مثل گعدات زمان اباوع المنظر الماي بالظلمة بس الكلوبات عاكسة بيها من اشوف المنظر هيج كل المواجع تهيج وترجع ببالي وكأنها اليوم صايرة حولت انتباهي الصوت دائب يحچي وياي

دائب: ليش هذا الاصرار على خيال رغم انت تدري بيها ما متقبلتك ويمكن ماتحبك

يمان: تكابر مستحيل تكون ماتحبني واحلفلك هسه ومتأكد مليون بالمية هي رايده هالزواج اكثر مني بس هي تكابر والسويته انا مو قليل

باتر: بس مالها داعي احس خيال كلش مكبرة الموضوع يعني انا الي هو انا ومتهم طلعت منها وحياتنا انا ورميم تقريب مستقرة وتجاوزنا هذيج المرحلة

يمان: مالومها انا وحقها شما تسوي محد يعرف خيال بگدي ودائما ابرر تصرفاتها وحتى ما اشوفها تبالغ الجاي تسوي كلش طبيعي لو وحده غيرها حتى بوجهي ماتباوع بعد

ورث جگارته وگال
دائب: شدعوة

يمان: تخيل انت تثق بشخص سنه كاملة مسلم كلشي بيده وتثق بي ثقة عمياء الدرجة اجيبلها اوراق من القضية اگللها شوفيهن ما تقبل تكول مخليتها وراك انت خلص كلشي ، خيال ثقت ونكسرت من اقرب الناس الها بهذيج الفترة وانا اعترف چنت حقير كلش حقير رغم هذا هي بعدها تحبني بس تكابر وانا راح اسوي المستحيل حتى اخليها تسامحني

دائب: الله يساعدك عليها انا مني اعصابي تلفت

باتر: ولا يگعد روميو العاشق شفناك وانت تسهر ايام وليالي گبال بيت المسعدة خلف الله على خيال وتصرفاتها

دائب: وانت سحت تسرسحت على محروستنا لان كتبتلك طالع حلو شبيك سحلت سمعتنا بالوحل الرهبان والرهبان هاي تاليتنا گاعدين نواسي رواحنا من ورى الحب

يمان: بس لحد يعترض على ان قواريرنا يستاهلن التعب مثل ما احنا تعبنا هن تعبن الضعف ويانا

باتر: عمي انا قارورتي المستبدة محد تحمل حملها

دائب: وانا بنيتي كلش كافي عليها متحملة خبالي ومزاجيتي

صاح باتر بصوت عالي
باتر: اللهم صل على محمد وال محمد ظهر الحق وزهق الباطل ان الباطل كان زهوقا

ضربه صاح بي
دائب: ومرض شبييككك فضحتنا

باتر: اول مره تنطي بروحك

گام وكال بقلة صبر
دائب: انا اگول خلي نرجع للبيت احسن باجر ورانا عرس

يمان: يلا

گمنا صعدنا بالسيارة بعدني هسه جاي نحرك ماحسينا غير الطلق والرمي صار يمطر علينا مانعرف منين يجي نزلنا رؤوسنا اليجوه مصدومين نريد نعرف شجاي يصير مانگدر نرفع راسنا باتر يصيح

باتر: خب شنييي هذا الطلق علينا مو علينا

صحت بي
يمان: طبعًا علينا ماتشوف السيارة تزرفت

انتبهت الدائب سحب سلاحه يريد ينزل كضيته
يمان: شبيك تخبلتتت اگعددد

دائب: تريدهمممم يكتلوناا عوفني يمان خل انزل

لزمنا انا وباتر كوه على ما خلصت الهوسه وصوت الطلق صار بعيد راد ينزل صاح بيه باتر

باتر: حرك يمان بسرعة هذا يريد ينتحر

حرگت مسافة بعيدة عن المكان الجنه بي طبكت السيارة ونزلنا شفناها مزرفة تزرف

باتر: يعني هاي لو ما سيارة يمان ضد الرصاص چا هسه احنا متزرفين بمكانها عادي شباب ماكو شي

يمان: يعني اجتني جم رسالة تهديد واتصال بس مااضنيت راح تصير صدك

دائب: انا هم اجتني اتصالات قبل يومين بس ماهتميت

باتر: ترى احنا گاعدين وساكتين وخلينا هيج مايصير لازم نتحرك

يمان: بس خل يخلص العرس

شمرت السويچ على باتر
يمان: هاك ضمها بعيد ودير بالك وحده من البنات تعرف واهم شي امي

اخذها باتر وانا ودائب رجعنا بسيارة اجرة من الشارع العام .. صار الموضوع خطر ولازم نتخذ خطوة جدية هالمرة ...

❛❛❛❛

خيال"

گعدت الصبح على صوت التليفون يدگ شفنه رميم جاوبتها گالت جايين بالطريق

گمت بسرعة دخلت للحمام سبحت ومشطت بعدها صليت و رتبت نفسي وغراضي كلهم مجهزتهم رميم كلشي ممكن احتاجه ماخذته اعرف بيها حريصة مراح تنسى شي

نزلت لگيت عمه وبيبي گاعدات وجدو هم سلمت عليهم وطلعت رحنا للصالون ونعاد نفس الروتين انا ورميم ووتر

لبست بدله واصريت على الحجاب حتى ماتقيد حتى اذا القاعات منفصلة وهم انا بالاساس محجبة وبدلتي مو كلش ضخمة بس شكلها رغم بساطتة فخم

وتر ورميم لبسن نفس الفساتين بس الوان مختلفة رميم لبست لون اخضر ملكي ووتر ابيض على كريمي مو ابيض ناصع ومكياجهن خفيف وحجابات

رجعنا باتر البيت جدي هناك لكيتها كلها ملتمة عمامي ونسوانهم وجهالهم كلهم بيبي صفية بس تبچي وكل شويه تحضني وتگول عين الباردة حتى بخور بخرتني وعمه فاتن كل شويه تحضني رميم ووتر بقن يمي

بقن يركصن على مااجت الزفة الباب بيت جدي مع اقتراب صوت الهورنات والفرقة الموسيقية وتيرة التوتر والخوف تزاد بگلبي ويصير يدگ حيل حسيت حتى اذاني انسدن ودموعي صارت تنزل من وحدهن ماعرف ليش

رميم: خيال اعدمچ اذا بچيتي بعد والله تردين مكياجچ يخرب وتخزينا بالقاعة

خيال: ماكدر هو بيدي

رميم: امدا حظي هاي عود انتِ الچبيرة المفروض انتِ تعلميني بس احنا صارت بالعكس المهم لا تخافين چكة ابره

گرصتها احچي
خيال: شو أنتِ مصدگة الموضوع

رميم: ليش ما اصدگ نسيبي سبع مو صح وتر

وتر: طبعًا اصلا مبين ناويها عليچ اليوم

خيال: ياا هاي بقيتي ليلة وحده يم هاي العايقة فسدت اخلاقچ

وتر: اوييي شحچيلچ البارحة دخلتني يمها دورة مجانية سولفتلي كل السوالف من الصفر

گالتها وگامن يضحكن بقيت احچي عليهن وهن يضحكن عليه وصفت وياهن عمه فاتن هم بيبي صفية صارت تحجي عليهن حتى ما يخوفني

شويه ودخل جدو گمت له وگفت باسني براسي يحچي

عدنان: الف الف مبروك جدي شايفة كل الخير

خيال: الله يبارك بيك جدو

جابتله بيبي صفية علبة فتحها ولبسني تخم ذهب كامل احس الموجودين صاروا يتهامسن

خيال: ليش غلبت نفسك جدو

باس راسي وگال
عندنان: تستاهلين جدي الغالي للغالي ماكو شي يغلا غليچن

رميم: حظوظ شكو عليها العالم جدو چا وانا

خزرتها وهو گللها
عدنان: حقچ جدي الج واحد مثله

باسته تحچي
رميم: اشاقة وياك حبيبي

صفية: حتى روحي انطيها الجن بنات الغالي

حجتها وبجت ثنينا رحنا عليها حضناها بعدها لزمت ايد جدو من دخل يمان لابس قاط اسود وقميص ابيض مع ربطة عنق طالع انيق اول مرة اشوفة بلبس رسمي كامل

اتقدم علينا وجدو سلمني اله بقى كومه يوصي عليه وهو ماكو غير كلمة بعيوني يردد بيها

بعدها باس راسي وهمس
يمان: مبروك فزة گلبي

سكتت لزمت ايده وطلعنا وسط الموسيقى وصخب كلش عالي شارع بيت جدي كله سيارات وناس ماينشاف حتى عمامه هم شفتهم موجودين ، اول ما صعدني بالسيارة اجت رميم تركض نزعتني التخم الي لبسه الي جدو تحچي

رميم: جدو تخمك حلو بس يخرب كشخة البدلة

خيال: رميم عيب هسه بيبي بالقاعة تشوفه ما هو

رميم: شنو رأيچ تعوفينه مخرب كشختچ اصفر يلالي وين گاعدين هذا يلبس ويا القفطان المغربي باچر

نزعتهن الي اخذتهن وراحن صعد بصفي يسوق وهو ساكت رغم الفرحة واضحة عليه بس حسيته منزعج وكل شويه ينافخ علا صوت الأغاني وباوع عليه

يمان: طالعة تموتين شلون بيك خليلي فوك ضيم گلبي لابسه حجاب

خيال: حتى ماتقيد مثل البارحة واعرف بالولد يدخلون وياك

ابتسم شغل السيارة وحرك يمشي على وتيرة الزفة انتبهت عليه لزم ايدي بقيت ساكته ماحجيت شي گال

يمان: طلعي تليفوني اخذي صورة الادينا على نفس هالوضعية

خيال: اوي يمان مالي خلك

يمان: يلا بسرعة بلا نقاش

تنهدت مديت ايدي بجيب الستره مالته واخذت تليفونه اخذت الصورة ونطيته اله اباوع خلاها ستوري وكتب عليها

‏انه واعدها بـ عرس فوك الغيوم
وهي تعرف لو وعد رجالها

من بعدها الرهبان لعبوا لعب كل شويه يگطعون الشارع سوو الزفة 3 ساعات يلا وصلنا للقاعة

لزمت ايده ووكفنا مقابيل الباب اول ما انفتح گدامنا اشتغلت اغنية الدخولية اسمهايا غالية سمي ودخلي باليمين  مدري شصار بيه احس بطني خبطت ردت اتخربط من هيبة الدخولية اباوع خاله حكمة ورميم وبيبي دموعهم تنزل ويهلهلون من اول ما دخلنا

يا غالية سمي ودخلي
باليمين يمناج يا فال البنات
الصالحات
يا غالية ها اليلة كل المسلمين
قاريلج يا الغاليه المعوذات

وصلني للكوشة وگعد شويه وطلع مستعجل بدأت اجواء العرس اغاني وركص نسيت نفسي شويه ويا الاجواء قبل لا يدخل يمان حتى نرقص سلو تفاجأت من گالوا راح تصير رقصة الاخت العروس واخو العريس

عرفتهم باتر ورميم ضحكت اجتني حكمة حجيت وياها بعدم تصديق

خيال: هذول صدك يحچون راح يركصون وحدهم

حكمة: الشلايتي والفوصة شتترجين منهم يلا خليهم فرحانين

ضحكت اشتغلت اغنية هزي هزي ودخل باتر اباوع الرميم خلت جهالها يم عمه فاتن ووتر وراحتله تتمايل عض على شفته يصيح

باتر: اوووففف ربييييي جلطة جلطة مو مره

تگابلوا ثنيهم ركصوا ركص صفنوا القاعة كلها كعدت تباوع عليهم انوب گعد ركبه ونص يصفگلها وهي دارت حوله تركص صرت احجي ويا نفسي اكو شبيها اختي تحولت صافيناز فجأة

هزي هزي
وبيه جرحي خل يعرفونج شنو
الله خالق وحدة منج
بعد مثلج وين اكو
كلبي يا حبيبة خلص
حتى الهوى هز وركص
لعبي بيه وطلعي روحي ع كلوب
الناس كمزي
هزي هزي رجفي خصرج
اركصلي وبعد هزي

ركصوا من كل كلبهم هي تهز وهو يهز وياها الحد ما خلصت الاغنية باسها وطلع ضحكت عليهم من كل گلبي ووتر تروح وترجع تگول اوي حلوين

بعدها بشويه علنوا على دخول يمان حتى نستعد للرقصة انفتح الباب واول مدخل اشتغلت اغنية اليسا على بالي حبيبي عيوني غرغرت بالدموع اتقرب يمي لزم ايدي واخذني ويا النص القاعة كالعادة حضني وصرت اتمايل ويا على كلمات ونغمات الاغنية سند رأسه على راسي غمضت عيوني وحسيت بروحي طرت العالم ثاني ويا وخاصة ويا كلماتة من گال

يمان: وسط كل المشاكل والتعب بحياتي
انتِ الوحيدة اللي گادرة ترتبين هوسة افكاري

همست
خيال: يمان

يمان: روحي انتِ شطالعة اليوم شطالعة شسوي بيچ هسه

باس ايدي وهمس
يمان: حالف اسوي شي ولازم اسوي

فتحت عيوني اباوع عليه همس
يمان: إنتِ جري الكحلة وعيونچ تجر گلبي

باس طرف انفي ورجع كمل
يمان: حالف ابوس كحلة عيونچ بهذا اليوم

سكتت وغمضت عيوني اتقرب باس جفن عيني على كيفة وابتعد بقى هيج حاضني احتار شيسوي ساعة يبوسني ساعة يتغزل الحدما خلصت الاغنية وبعدها كملنا كل الفقرات وطلع مر الوقت ورجع دخل من جديد حتى نطلع للبيت

وهم نعادت الفرقة الموسيقية والولد واصدقائهم وكل معارفهم سووله زفة محترمة گلبوها گلب

صعدنا بالسيارة زفونا للبيت مشغل اغني وفرحان بس انا رغم حاولت اوكون طبيعية دگات گلبي ورجفة جسمي ماگدرت اسيطر عليها وخاصة ضجت ونزعجت من سمعت رميم ووتر يسولفن على الصار وياهم البارحة

وصلنا للبيت محد دخل بس احنا حتى حكمة گالت محضرة كل شي ماكو داعي تنزل فتح الباب ودخلنا البيت هدوء يصوصي انوب مخلين بي اضاءة خافته شموع وتارسين البيت نفاخ احمر

شمرت نفسي بتعب على التخم وهو دخل وراي شغل اضوية الصالة اباوع عليه نزع السترة وشمرها على صفحة بعدها صار يفتح بأزرار قميصة

گمت وگفت احچي بخوف
خيال: شجاي تسوي

فتح حزامه نزعة واتقرب مني يحچي

يمان: كلش تحملت كلش

خيال: شبيك شمتحمل قابل

لزكت روحي بزاوية الصالة وهو صار  يعد بأصبيعة

يمان: نكد زعل عناد غلط رفض لعبان نفس طلعان روح شلعان گلب

خيال: حرام عليك ويني ووين هاي السوالف

يمان: خيال تتذكرين احلام العصر

خيال: شتريد

يمان: تعاي اطبقهن بيچ

هجم عليه بسرعة ركضت صرت ورا القنفة احچي
خيال: شبيك انت ما شايف هو هيچ

يمان: تعاي وصيري حبابة

خيال: وخر يمان والله اصرخ هسه

يمان: عادي عروس ومن حقچ

گالها واجاني ركضت اصيح
خيال: يماااانننن بعدني بالبدلة يماااننننن

يمان: هو انا اريدچ بالبدله دتعاي

شردت منه اصيح
خيال: يمماااننننن حباب كافي بداعة حكمة

يمان: تعاي خيال

شمرت عليه الكوشة اصيح
خيال: انت شبيك تحولت شبيك

يمان: اطبق بيچ احلام العصر

خيال: ماريدك گوه

يمان: اي گوه

خيال: زين انا جوعانة

يمان: مو مشكلة ناكل بعدين

جان يحچي وملامحة جدية وهالشي يخوفني ويرعبني اكثر انتبهت الدرج صار وراي بسرعة بلا تفكير شلت البدلة وركضت بتجاة الدرج حسيت بي ركض وراي تعثرت وطحت على الدرج لزمني يحچي

يمان: يلا خبال لا تتكسرين

خيال: يمان فدوة مو هيچ خوفتني منك

يمان: شمسوي انتِ شاردة

يحچي ولازمني من رجلي حتى ما اشرد دفترته حيل وگوة گمت البدلة عرقلتني هالمرة ما ركض وراي يمكن خاف عليه اوگع صعدت بوجهي للغرفة ردت اسدها عليه ماحسيت غير الباب اندفع وهو يحچي

يمان: لا تشلعين گلبي خلي نحچي

خيال: والله چذاب مااثق بيك

يمان: بس نحچي شبيچ كلشي ماسوي اشاقة وياچ چنت

خيال: والله

يمان: اي حبيبي

مدري شبيه صدگته وابتعدت من الباب فتحه ودخل مرسومة على وجه ابتسامة شريرة سد الباب واتقدم عليه

لميت روحي احچي
خيال: شبيك

يمان: شبيه

خيال: مادري

هو يتقرب وانا ارجع الي ورى لزمني من اديناتي وسحبني عليه

همست بدموع
خيال: يمان باع شسويت بيه

مسح دموعي يهمس
يمان: شسويت

خيال: بهذلتني هو هيچ

باس خدي بعمق وگال
يمان: كلشي ما سويت انتِ تنطنطين وحدچ

دفعته بقوة ماخلاني اتحرك دفعني على الحايط والتهم شفايفي بلهفة وشغف ماقبل يبتعد مني الحد ما خلاني اتفاعل ويا ......

     يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

شنو توقعاتكم للمستقبل

معثوراتي لا تنسون التصويت+ متابعة الحساب+ تعليق بين الفقرات @zainab_ali1 ♥️

متابعة ممتعة🦋