رواية تاروت الفصل السابع عشر 17 - بقلم زيـنـب علـي 🦢

#تاروت

البارت «17»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

شينساهن ....
اگلب بالصور واتگلب وياهن

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

السيارة جانت تمشي سريع حسيتها طارت بينا ونگلبت استقرت على الشارع وصوت شخطة السيارة الثانية فاتت من يمنا سريع

السيارة مگلوبه بينا وانا بقيت معلگه بحزام الأمان على الكشن بكامل وعيي صرت اصرخ  بخوف واسمع صوت ابو انس يحجي بصوت مخنوگ

ابو انس: انتي بوعيج عمو خيال

خيال: ايي عمو ايي بس عالقه بحزام الامان

ابو انس: ابقي يمج بلكت اگدر اطلع

حجه الكلمة وصرت اسمع صوت دفر يمكن يريد يفتح الباب بقيت بس اصرخ الحدما سمعت صوت سيارة وكفت وصار صوت صياح والناس بدأت تلتم دنگ واحد دگ الجامة البصفي يصيح

- ديري وجهج راح نكسر الجام

خليت اديه على وجهي وصاروا يضربون بالجام ويكسرون بي الحدما تفلش وصار صوتهم واضح بالنسبة الي

وانا مگلوبه وحسيت الدم تجمع براسي ومنا الحزام ماگدر اتحرك حجه وياي رجال كبير بالعمر

- لا تخافين بويه راح الولد يجيب سجين حتى نگص حزام الامان هاج گضي ايدي على مايجي

ومدلي ايدة الزمها حتى يطمني وانا بس ابجي واصيح على ابو انس

- لا تخافين الزلمة طلع مابي شي بس شويه جروح بسيطة

خيال: فدوة عمو اتصلوا بالشرطة والاسعاف

- على جيه لا تخافين

صرت اسمع صوت هواي ناس مخبوصين على ماجاب الولد سجينه وصاروا يگصون بحزام الامان لان ماينفتح شكل

كصوا وصرت اكدر اتحرك عطت متألمة رجلي دب بيها وجع ماينحمل صرت اعيط بالزايد صاح واحد منهم

- متعوره لا واحد يحركها يولد البنية متعوروة

خيال: رجلي راحح امووتت ماگدر احركها

رجلي ورگبتي صار بيهن وجع

- بس تحملي شويه على مانطلعج الاسعاف بعيد يلا سباعية تحملي

حاولوا يطلعولي گوة من بعد صريخ وبجي لان رجلي مكسورة ماكدر احركها ولو حرگة بسيطة ثواني واجت دورية شرطة ووراها إسعاف يردون يشوفون رجلي وانا اصيح اريد جنطتي كل الاوراق والحاسبة وتليفوني بيها انطونياها متبهذلة بس مابيها شي لان السيارة مو هواي تگلبت بينا بس مره وحده ووكفت

بس لزمتهن حسيت راسي افتر وكلش دخت تخربطت ماگدرت اتحمل غمضت عيوني ومادريت بعد

گعدت على صوت حكمة تحجي وتفرفح بس فتحت صارن بوجهي ثنينهن يبجن حكمة ورميم

رميم: گعدت اروح اصيح للمرضة

طلعت وحكمة گعدت يمي تبوس بيه وتحجي

حكمة: وگعتي گلوبنا

حجيت بألم
خيال: منو گللكم

حكمة: اتصل بينا انس وگال مسوين حادث واجينا على عمى عيونه شفناج بهذا الحال

خيال: ابو انس شلونه

حكمة: نقلوكم ثنينكم للمستشفى ابو انس حالته كلش موزينه اكيد انقهر على سيارته هم كلش تخربط فرد نوب

انتقهرت عليه سكتت ماگدر احجي احس جسمي كله متكسر دخلت الممرضة ووراها رميم كعدت يمي تبوس بيه وتبجي بقيت اطمن بيها جيكتني وطلعت

ماكو شي خطر بس رجلي مكسوره لان صارت جوه الكشن ورضوض بالرقبة ، دقايق ودخل يمان حجيت ويا رميم بنزعاج

خيال: هذا شجابه مو جان ببغداد

رميم: ايي اتصلت بي حكمة بالطريق بعده ورجع

انتبهت عليه حجه

يمان: هاي شصاير

حكمة: كول شنهو الماصاير ربك قدر ولطف الحمد لله على كل حال

باوع عليه بلوم وغمض عينه يتنفس بغضب اتقرب مني ماحجيت غمضت عيوني حجه

يمان: ماتسمعين الكلام والبراسج تسوينه

خيال: لا تدخل انت

يمان: شلون راح تخليني الزگها دفره اكسر رجلها الثانية

خيال: رجال انت سويها

راد يحجي صاحت بي حكمة

حكمة: بسسس ماتشوف حالتها وكت مكافش هسه

يمان: خل نطلع منا وانا الج بسيطة وسهلة

عافنا وطلع اجت الشرطة اخذت اقوالي وراحوا بقت القضية مفتوحة

طلعوني للبيت على عكازات لان رجلي مكسورة وهو مرتاح لان راح اگعد بالبيت احس الموضوع صار بصالحة

رجعنا بسيارته اتقدمت رميم رادت تساعدني حتى انزل ماگدرت سمعت صوته حجه

يمان: انطيني مجال ريمه

رميم: شراح تسوي

يمان: اشيلها انزلها لو تبقى بالسيارة اليوم

لزمت رميم وحجيت

خيال: لا رميم اكدر انزل انتي بس ساعديني

رميم: ماتگدرين هو انتي رگبتج ماتگدرين تحركينها

خيال: رميم انا انزل حتى مساعدتج ماريدها

حجيت الكلام من بين اسناني لزم باب السيارة فتحه حيل وحجه بلا مايهتم الكلامي

يمان: وخري رميم معليج بيها

ابتعدت وهو اتقرب يريد يشيلني حجت بغضب

خيال: لا تلزمني ماريد

يمان: خوش دتعاي

شالني على كيفه وطلعني من السيارة ماكدرت احجي شي لان فعلًا ماكدر اتحرك خزرته وحجيت

خيال: كافي نزلني

يمان: اوصلج للبيت

خيال: انا امشي

مشى بيه وحجه
يمان: من نوصل اريد كروة التوصيلة مو تنسين

خيال: انطيك وجع

قربني عليه كلش وهمس

يمان: وجعج عافية احبج عنيفتي

سكتت ودرت وجهي منه وكف بالباب ورجع حجه
يمان: مشتاگلج

خيال: نزلني

يمان: وصلنا مابقى شي

حجاها ودخل للبيت دخلني جانوا محضريلي الغرفة الجوة صايرة بصف الاسقبال كلش

قبل لا ينزلني رفعني اله وانا دايره وجهي منه باسني ورى اذني واخذ نفس قوي يهمس

يمان: مو عطر لو شميته ترد روحي وتهيد جروحي

خيال: حيوان

يمان: يا نوع

حجاها وضحك

خيال: حمار وحشي

يمان: مقبولة منك خليل گلبي

خيال: دنزلني شبيك لطشت ابقى معلگة بحضنك اليوم

يمان: ياريتج

گلبت عيوني منزعجه وهو نزلني للجرباية على كيفة باسني بخدي بوسة سريعة وطلع قبل لا احجي شي

دخلت رميم تحجي وهي مبتسمة

رميم: كل غراضج التحتاجينهم نزلتهن هنا الج

خيال: حسابتي والاوراق

رميم: هم يمج

خيال: انطينايهن

عدلتني خلت مخدة ورا ظهري وخلتهم يمي كلهن وطلعت ...

❛❛❛❛

وتر"

فتحت عيوني شفت نفسي نايمة على السرير ومتغطية بسرعة فزيت اباوع النفسي بعدني بكامل ملابسي اتذكرت من البجي والصريخ نمت على الگاع شصعدني للجربايه اباوع حواليه ماعرف هسه نهار ليل

انفتح الباب لميت روحي وحضنت نفسي متغطية خليت حجابي على راسي ولفيته شلون مجان

دخل يخزر بيه بيده جنطة سودة صغيره شمرها على الميز وحجه

دائب: صح النوم

مجاوبته خزرني وحجه

دائب: گومي اكلي

وتر: ماريد رجعني الاهلي

احجي برجفة وصوت مبحوح حتى ما اباوع بوجه

دائب: دكومي يلا بدون لغوة وتعيدين عليه اسطوانة كل يوم

نترت الغطى وكمت وكفت احجي بحرگة واضرب رجلي بالگاع بعصبية

وتر: انت شبيك مخبللل رجعنييي الاهلي راح يصير سبوعيينن انا هنااا رجعنييي

دائب: ولج بابا شلعتي گلبي شوكت تفهمين ماعندج أهل ماكو اهل غيري افتهمي 

وتر: عندي انت حااول تفهممم عندي اهل واب وعمام

راد يطلع ركضت صرت گباله احجي بدموع واشهك اترجه بي

وتر: فدوة بداعة خواتك بستر امك خليني ارجع الاهلي والله رااحح امووتتت افهممم

حاجاني بكل برود

دائب: موتي يطبج مرض

دفعني من گدامه وتوجه للباب ماعرفت شسوي من حرگة گلبي ركضت على جك المي جانت گزاز شلتها وركضت عليه ردت اضربها برأسه من ورا ماحسيت غير اندار عليه لزم ايدي فاتح عيونه بصدمة اخذها مني صرت ادفع بي وابجي واغلط

دائب: اششش

وتر: حقيررر حقيرر

ضربني راشدي من قوته احسه طرشني سحبني من حجابي انزع لزم شعري حيل يحجي بعصبية

دائب: بعد كل ما تسوين هيج تنضربين وتنامين

سحلني سحل للجرباية شمرني عليها يحجي

دائب: يرادلج تربية من جديد اريد اسمعلج نفس مره ثانية ماتلومين الا روحج

وتر: حقييررر

دائب: اششش كافييي بنيتي

وتر: لا تلمسنييي وخررر

سد حلگي حيل واني على الجرباية مايريدني اصرخ خنگني اريد اتنفس ماگدر

دائب: اسكتييي بسسس بعد

صرت ادفر بي واتحرك مايعوفني يزيد ماينقص قررت اهدأ واسكن حتى مايقسى عليه بس هدأت ابتعد مني وهو يحجي

دائب: من البداية وهيج اعقلي

ماجاوبته جريت الشرشف وغطيت نفسي بي ارجف حتى راسي غطيته وخليت ايدي على حلگي كاتمة صوت البجي مالتي ماريد استفزه خاف يأذيني وبقيت ساكنه على هالحاله الحد ما طلع من الغرفة وسمعت قفلة الباب

وخرت الغطى اباوع بالغرفة ماكو طالع منها كمت دخلت للحمام اغسل بوجهي وابجي باوعت بالمرايه اصابع اديه بخدي وصاير احمر

طلعت شفت جنطة الملابس الجابها الي منثرة ومطلعلي ملابس على صفحة فززني من حجه وراي

دائب: بدلي وتعاي وراي راح اعوف الباب مفتوح

ماكدرت احجي خفت عافني وطلع بقيت افور مادري شسوي بعمري شلون اخلص من عنده درت عيني وانتبهت الجنطة الصغيره الجابها بعدها على الميز ركضت عليها فتحتها ونصعقت من الشفته

كل مستمسكاتي واوراقي الثبوتية كلها موجودة اخذتهن وطلعت من الغرفة الانا بيها جان اكو درج مقابيلها منه واصعد للبيت صعدت ركض شفته گبال صرت اصرخ

وتر: منييننن جبتتت اوراقي ومستمسكاتييي منين جبتهننن

دائب: من بيت حكيم جا منين جبتهن من زحل

وتر: منو نطاهن الك اهليييي وييننن

دائب: هم گالت اهلي شوكت تفهمين ماعدجج اهللل ماكوو بححح

جان يحجي بطرقة مستفزه وواكف مدري شيسوي أكل

وتر: منوو انطاك مستمسكاتيييي

دائب: انا اخذتهن

وتر: اهليي ويننن جانوا

حجيتها بدموع صاح بيه

دائب: بجهنم ماعدج اهل كولي بيت حكيم العار

وتر: انت العار لا تغلططط على باابااا

ابتسم بجانبية واستهزاء ركضت للشباك اضرب واصيح

وتر: ساعدووننيييي ساعدوونيي

دائب: هو ياهو يسمعج لا تتعبين صوتج الحلو على الخالي بلاش كبد

ماهتميت بقيت اصيح اخر شي مل مني لزم ايدي شدني منها حيل عطت متألمه حجه وهو يمشي بيه للباب

دائب: خل اشوفج خاف ماتصدگين

فتح الباب وطلعني بره البيت اباوع بعيوني جانت ليل والمكان مبين يخوف بس بيته وسط الهيمه ماكو غير بساتين وطريق ترابي ضيق مقابيل البيت منطقة تخوف ومرعبة حجه

دائب: هاا تردين احد يسمعج يلا صيحي خلي تلتم عليج الواويه والذياب يلا وين راح صوتج

بقيت ارجف ولزمت ايده حيل احتمي بي حجه

دائب: شو مچلبه بيه هديني مو تردين اهلج يلا صيحي روحي بكيفج مالي شغل بيج بعد

وتر: انت رجعني

دائب: فوك حگه دگه هديني وتوكلي يلا

صحت بي
وتر: انتتت خطفتنييي يعني انت ترجعنييي

دائب: مارجع انا تردين رجعي وحدج ماتردين ادخلي واگعدي جوه مثل الحبابة هذا العندي

راد يدخل بسرعة لزمته وصرت احجي وابجي

وتر: بداعت عزيز گلبك بداعت اغلى شخص على گلبك رجعني الاهلي فدوه

جنت احجي وروحي تفرفح حتى صوتي متقطع لزم وجهي يمسح بدموعي ويحجي

دائب: وين ارجعج اليا اهل بابا

وتر: اهلي اهلي مو جنت گاعده يمهم غير عندي اهل

دائب: اهلج الرادوا يموتونج وياخذون كليتج

وتر: غير اختي محتاجتها وانا قابله انت شعلييك

دائب: ايي براحتج ارجعي وانا داخل

حضنت ايده حيل ابجي خايفه منه ومن المكان

وتر: لا لا ماروح ادخل وياك بس احلف ماتلمسني

عگد حواجبه وحجه
دائب: شلمسج

وتر: ماتأذيني ماتلمسني

مسح وجه وگال ببرود

دائب: بعدج صغيرة بابا لا تفكرين بهاي السوالف

سحبني من ايدي ورجع دخلني للبيت وقفل الباب وتنهد براحة ماعرف ليش حسيته جذب عليه من گلي المنطقة مابيها احد غيرنا لان جانت ظلمة وانا ماشفت شموجود ورا الأشجار

اتقرب عليه حاوطني بسرعة فزيت دفعته مني وانا احجي

وتر: لا تلزمنييي حرامم حرام ولا تتقرب مني بعد

دائب: اعقلي وماتقربلج ولا اطخج وعد

ابتعدت منه واني ابجي بحرگه

وتر: اريد اهلي

دائب: ماكو اهلج اكو انا ترديني تعاي

حجاها وفتح اديه يعني حضنيني

وتر: اريد بابا اريد ارجع البيتنا

دائب: هذا الباب گدامج تردين اطلعي

وتر: الصبح اطلع

دائب: لا الصبح بعد ماكو ينقفل الباب تردين هسه اطلعي

وخرت البردة اباوع من الشباك ظلمه وبس نباح الكلاب طالع المنظر شگد مااوصفة جان مرعب بالنسبة الي مااوصل مشاعر الرعب الحسينها

گعدت على صفحة ابجي وهو تنرفز لان يسمعني ابجي واشهگ صاح بيه

دائب: يعنييي تموتين روحج على ناس رادوا ياخذون اعضائج

وتر: اريد اهلي

حجيتها وصرت ابجي بالزايد مثل الطفل ويريد امه واليمه يگلوله ماتت انا هيج حالي گعدت وخليت راسي بين ركباتي وبقيت ابجي هو سكت من عندي

ابجي وادعي بگلبي عليه ربي يخلصني منه اخر شي قررت انتظر للصبح واشوف المكان ، رفعت راسي وحجيت بشهگه اثر البچي

وتر: القبلة باي اتجاة

دائب: هاا

وتر: القبلة وين اريد اصلي

اشرلي بلا مايحجي على الاتجاة وهو يسوي بالكل گمت رجعت نزلت للغرفة توضيت ولفيت شالي زين وصرت اصلي واصلي يمكن قضيت الصلاة الفاتتني كلها مال سبوع بقيت اصلي للصبح وابجي

اخر شي تعبت خويت من البجي تمددت بمكاني وغمضت عيوني حسيت بنفسي غير نرفعت من الگاع بس ماعندي طاقة افتح عيوني او اجاوب

خلاني على الجرباية وغطاني مدري شگد مر من الوكت وگعدت اباوع بعدني بنفس المكان بس هالمرة باب الغرفة مفتوح صعدت اتسحب على كيفي شفت البيت هدوء وفارغ مبين ماكو احد

وضوة داخل من الشباك ركضت للشباك باوعت منه من الجهتين صدك ماكو احد بس البيوت بعيدة كلشش يادوب تبين ، ركضت للباب ادگ بي واصيح

وتر: منووو يسمعنيييي اني مخطوفة ساعدوني فدوه ساعدووننييي

سمعت صوت فتحتة قفل الباب رجف جسمي بخوف وبتعدت من الباب دخل بلعت ريگ بخوف باوعلي رافع حاجبة وگال

دائب: شكد اعيد عليج لا تتعبين روحج محد يساعدج ولا احد يسمعج

وتر: انت موكلتلي البارحة روحي افتحلي الباب اروح هسه

دائب: لا عيني لا ميصرف هذا الكلام البارحة راح ويا البارحة واحنا ولد اليوم كبدبد

اتقدمت للباب لزمني وحجه

دائب: منين جاييه هاي الصلافة يعني واگف گبالج وتردين تطلعين گابلة وبزه بعينه

وتر: ارييددد اطلع عووفنييي شسوي بيه ماخذنيي

دائب: ارسمج اباوع عليج بكيفي

وتر: بداعة عزيز گلبك رجعني

شال ايدي باسها بسرعة سحبتها منه ابتسم وگال

دائب: انتي عزيز گلبي حيلي

جزعت من تصرفاته صرت الطم على وجهي واحجي

وتر: اريد اطلع اريد اطلع

دائب: وجهج شعليه بابا

عفته وگعدت على صفحة ابجي اتقرب مني يريد يلزمني گمت وحجيت بنهيار

وتر: مايصيررر تلزمني يابشررر حراااممم مايصير تلزمنييي

دائب: حكيم الگـ*** خوش يربي عفيه بنيتي عفيه

وتر: لا تغلط على بابا

دائب: اشششش اسكتي لا حتى انتي اغلط عليج

رجعت گعدت وبس دموعي تنزل اتقدم گعد گبالي وحجه

دائب: شتردين اسويلج من غير كلمتج المعتادة مال رجعني الاهلي لان مستحيل

وتر: وانا كلشي ماريد غير ترجعني ماريد ابقى هنا ماريد حسس عاد

دائب: مااحس انا

مسحت دموعي وحجيت بعصبية وتهجم

وتر: هو انتم الزلم كلكم هيج حمير بلا احساس

دائب: والوالد مخطط لو سادة

حجيت من بين دموعي بتعجب
وتر: هاا !

دائب: صار ساعة خابصتنا بابا وبابا تاليها طلعتي مطي، زين ماگلتيلي شنو نوعة مخطط لو سادة

وتر: احترم نفسك ولا تغلط

حجيتها ورحت ركض نزلت للغرفة سديتها عليه وگعدت افكر اريد طريقة اطلع بيها مناا

شويه فتح الباب خلالي اكل وراح مر كم يوم وانا بس ابجي واتوسل بي وهو لا كأنه يسمعني واصلا مو بباله كلامي

انتبهت عليه كم مره من ينام بالصالة والمفاتيح يعلگهن يم الباب يمكن ضامن ان انا ماكدر اتحرك واخاف وبيوم ضهرية صعدت اباوع هو متمدد على القنفه ونايم منطي ظهره للباب

رجعت نزلت خليت الحجاب على راسي وصعدت اخذت المفاتيح واول ما فتحت الباب سمعت صوته صاح

دائب: وين موليه

ماجاوبته طلعت اركض وصيح ساعدوني وهو طلع وراي عثرت ووگعت حيل ماهتميت رجعت گمت وكملت ركض اباوع المكان منطقة مقطوعة هيمه والبيوت تبين من بعيد يعني لو اركض ساعة يمكن ماوصلهن ومستحيل صوتي يوصلهم بس بقيت مستمرة استنجد عسى واحد يسمعني وهو يركض وراي

گوه اركض رجليه يرجفن بخوف وگلبي صار يأذيني حتى الرؤية صارت تغوش ماشوف زين استسلمت ووكفت بجميع الاحوال ماگدر اركض وهو سريع يلحگ بيه گعدت وصرت اصرخ وابجي بحركه والم التراب بيدي بلا مقدمات وبلا مايحجي اي شي سحلني من شعري وهو ساكت لزمت ايده وحجيت

وتر: مااروحح عوفني موتني هنااا ومارجعع

دائب: گومي بابا يلا

وتر: ماتحرك ماتحرك رجعنييييي

تنفس بغضب ونصه شالني واني اعيط كل صوتي واتحرك گوه مسيطر عليه دخلني للبيت وسد الباب نزلني وحجه بهدوء مرعب خله گلبي يرجف

دائب: تشردين موو وتر 

وتر: مريض مختللل

رجع عليه خنگني رفعني من الارض بقيت واگفه على اطراف اصابعي وبس دموعي تنزل حجه صاك على اسنانه

دائب: تلعبين وياي هسه اشوفج اللعب على أصوله

دفعته حيل ووخرته مني نزلت على الارض اگح واخذ نفس بكل قوتي حسيت بنفسي اختنگت

وتر: عوفني اطلع ليش خاطفنييي ليششش

دائب: انتييي ماتفهمييننن بابا كلششيي جاييي يصير المصلحتججج افهمي يابشررر افهمي

وتر: معليك انت انا اريد انطي كليتيييي الاختي اريد اطلع منا اختي راحح تموتتت يعالم اختي

سحبني من ايدي گومني يهز بيه ويحجي
دائب: ماعندج اخت ماعندج يضحكون عليج

ماگدرت اتحمل اكثر من هيج تفيت بوجه مسحها بكف ايده وابتسم ببرود كلها لحظات ونرفعت من الارض شالني على كتفه توجه بيه للغرفة راح صوتي من الصياح وگلبي تعب من الخوف

شمرني على الجربايه وجاب الحبل طبگه وهو يحجي

دائب: انتي ماتجين بالعيني واغاتي الا بهاي الطريقة الظاهر

ردت گوم ماخلاني ثبتني گوه ولزگ حلگي ورجع ربطني وطلع

بقيت على هاي الحلة لليل يمكن لان هواي مر وقت وانا هيج وبس ابجي

انفتح الباب ودخل جاب كرسي خلا گبالي وحجه

دائب: ايي ست وتر شتردين هسه

تحركت فتح حلگي حجيت

وتر: افتحنييي

دائب: ادري بيج ماتقصدين مافتحج بابا

وتر: افتححح ادييههه حرام ابقى گدامك هييججج والله مايجوز انا محجبه وانتتت غريييب

جنت بلا حجاب والثوب الابسته مرفوع يادوب تغطيني وهو مامنتبه الحدما نزل انظارة ناحية رجليه اباوع بقى نظره شاخص عليهن تحركت ابجي وحجي

وتر: لا تباوع لااا تباوععع

مسح على وجه ياخذ نفس بحيل صدره عافني وطلع بسرعة ورى شويه رجع دخل فتحني وحجه

دائب: خوش حظري روحج بالليل نعقد

ويا كلمته حسيته انطاني طعنة بگلبي عبالك ضربني طلقة ماگال نعقد

وتر: انت تخبلت انت شنووو من بشر شتريد منيي شتريد

دائب: لا تخليني اغير كل الخطط البراسي هسه وتشوفين شي عمرج كله ماشايفته افتهمتييي

وتر: لو تموتت لو تبقى بس انت ماسوي هذا الشي ماريدك رجعني الاهلي

دائب: بالليل يجي واحد يعقدلنا

اجت فكرة ببالي سكتت بسرعة حجه وكأنه قراني

دائب: لا عبالج من يجي تستنجدين بي لان ياوتر وحق الخلقج وخلقني وخل الكائنات يكون هذا اليوم هو اخر يوم بحياتج

وتر: وانا مسعدة ادفع حياتي كلها والبالك مايصير

هز راسة بوعيد عافني وطلع تخبلت بقيت ادگ والطم متت مدري شسوي بروحي

ورا كم ساعة رجع دخل وانا گعدت بالزاية لميت روحي وجسمي كله يرجف بخوف

دائب: گومي يلا

وتر: لو تذبحني هنا ماتحرك

جرني من شعري حيل غمضت عيوني ودوعي صارت تنزل

دائب: گوميي گلت

ردت اصرخ بسرعة سد حلگي وحجه

دائب: نفس واحد ابوج حكيم العار الخابصتني بي يصير بعداد الموتى

فتحت عيوني حيل مصدمة بكلامها هزيت راسي برفض ودموعي صارت تنزل

دائب: راح اشيل ايدي نفس ماريد اسمج مفهوومم

سكتت وبعد ايده بحذر طلع نقاله وحجه

دائب: وهاي حتى تصدگين

حجاها وشمر النقال عليه شفت صورة بابا وواحد لازم المسدس على راسه تخبلت ردت احجي خله ايده على حلگه بمعني اسكتي

خليت اديه على حلگي واحجي بصوت مخنوگ

وتر: شسويتله شسوويتلههه

دائب: بعدني كلشي مامسوي القارار بيدج بنيتي

وتر: شتريد اسوي

دائب: كلشي اگوله تطبقينه بالحرف الواحد واول شي هسه تگومين مثل الشاطرة تغسلين وجهج الحلو وتصعدين للغرفة الفوگ توكفين ورا الباب يلا

وتر: كلشي اسوي والله كلشي بس تعوف ابوي وماتأذي

دائب: كتلج واذا سمعتي كلامي حتى صوته اخليج تسمعين

عافني وطلع كمت اسحل بروحي بجيت لطمت خليت راسي بالمخده صرخت الحد ما مليت صرخات مكتومة حتى لا يسمعني ويأذي بابا ، دخلت غسلت وجهي وطلعت من الغرفة لگيته منتظرني بالباب سحبني بقوة من ايدي ودخلني للغرفة وسد الباب

ورى شويه سمعت صوت اصوات طالعة تخشبت من الخوف والرهبة وكمت لزگت اذني على الباب اسمع صوت غريب يگله

- اخذنه موافقة الوالد وهسه ناخذ موافقة البنت

صفنت افكر شنو موافقة الوالد وينه هو الوالد ماخليت ببالي الرهبة البگلبي ماخلتني اركز على شي افتح الباب ابتعد بسرعة عن الباب مد راسه واني باوعتله بنظرات تتوسل ماهتم وهمس

دائب: جربي ترفضين وشوفي شيصير

مسحت دموعي وحجيت بلا ما اباوعلة من الرعب عمري ماباوعت بوجه

طلع وعاف الباب شويه مفتوح بدأ الشيخ يحجي نصدمت بالمبالغ الگالها مبالغ خيالية وكلش عالية كمل العقد

ورا شويه دخل عليه بسرعة فزيت باوعلي من فوك الي جوه وحجه

دائب: يلا ريحتج من هم الحرام وحرام ست وتر

وتر: اذا تقربت مني والله اموت نفسي

هز ايده ماعاجبه وحجه
دائب: ماميت عليج بعدج بطول زري

وتر: مريضض انت روح تعالج

دائب: بدون كلام تبقين بهاي الغرفة بعد نفس ماريد اسمعلج

حجيت بخوف
وتر: لا لا انزل للغرفة الجوه

دائب: انا شگلتتت

سكتت وبس دموعي تنزل طلع وهو يحجي بستهزاء

دائب: مبروك يا عروسة هه

بقت ساكتة خاف احجي ويأذي اهلي هذا مبين مايهدد كبل ينفذ ....

❛❛❛❛

رميم"

هاي الايام المرت كلها خيال ماتنام يمي وانا مستغله الوضع الليل كله مخليه باتر بأذني واسولف بأذنه وهو هم تعود على هالوضع وحتى صار مايفارگني يريدني طول الوكت ويا واسولفله شسوين ووين رحت ومنين اجيت

زلت من الدرج صارت گبالي حكمة حجت بنفس مگطوع تعض على اصبعها

حكمة: اخخخ من خويله ام راسسس يابس

رميم: شبيها ليش معصبة حكومتي

حكمة: خيبه شلعت گلبي على ما تجيتها و وكفتها على العكاز توسلت بيها خيبه خلي يشيلج ماترضه

رميم: غير تصيحين عليه ليش تشلعين گلبج

حجيتها ودخلت للمطبخ شفتها گاعدة وكالعادة الحاسبة گبالها تشتغل بيها بوستها باوعتلي وگالت

خيال: اليوم گاعدة من وكت

رميم: الساعة 9 وين الوكت

دخل يمان يحجي بالنقال وصاير عصبي يفور

يمان: انت زمااللل اكله رحت وعلى نص الدرب رديت

باوع الخيال بخزرة وكأنه يلومها ورجع گال

يمان: فرات انت تروح الولد شغلة كلها تمدح بي وهم محد يعرفة هنا يعني احسن حل حتى نفكهن هو هذا

بقى يحجي شويه وسده حجت

خيال: شناوي تسوي

يمان: لا تدخلين بشغلي خليج خارج قوس

رميم: واضحة نسيبي يريد يجيب مهكر او شخص يعرف بسوالف شفرات من بغداد حتى محد يعرفه هنا

يمان: هاي الناس التفتهم مو مثل بعض العالم حواوين

خيال: انت حواوين

حكمة: صبحنا واصبح الملك لله فتحنا اول عركة لليوم

خيال: خاله مشوفين الفاظه

يمان: بس انتي من تغلطين محد يحجي على الفاظج

حكمة: ولكم بسسس ريگي نشف من وراكم ، رميم انطيني ماي اخذ حباية الضغط راح يصعدونه من ورى عمايلهم

خيال: من ورا عمايل الحواوين

اباوع عليه ضحك شمرلها بوسه عافنا وطلع وهيج مر اليوم عادي بين عرك يمان وخيال الي مايتگابلون وخيال گاعدة بالبيت

لليل صعدت للغرفة اول ما صارت الساعة 12 موقت ادري بي يتصل جاوبته حجه بحسره

باتر: هسه بلا شبيه انا جني مراهق ينتظر صاحبة وگاعد انتظر الساعة شوكت تصير 12

رميم: يعني هذا اعتراف انت جنت منتظرني

باتر: ايي سيراميك مكة انگطع گلبي على ما صارت الساعة 12 وتصلت عليج

رميم: طول اليوم نتراسل شوكت لحگت تشتاقلي

باتر: ماگدر انام الا اسمع صوتج

گمت وتمددت على الجرباية وبقيت احجيله كلشي مر بيومي

باتر: هاي هي هو هذا يومج

رميم: لا هواي حجي

باتر: مشتاق اشوفج

رميم: لا لا ماگدر اطلع وخاصة هالفترة اخوي المسافر يمنا ماگدر اتحرك

باتر: مشكلتج دبري روحج اذا ماكو اجي البيتكم

عدلت گعدتي وحجيت بخوف احس گلبي صار مثل الطبل بأذني

رميم: ووو وين تجي البيتنا لا باتر دير بالك

باتر: جاا طلعي اشوفج حتى اذا من بعيد يلا ريمه گولي اي لا تكسرين واهسي

رميم: ماگدر وانت دير بالك توصل البيتنا

باتر: باجر من الصبح تلگيني بالباب

رميم: حتى بعد من صدگ تحلم تشوفني بعمرك انت ماتخاف عليه من اخواني يعني

باتر: انهجم بيتج بالحية طلعتي تخافين

رميم: شنو قصدك يعني اني تايها وماعندي اهل يخافون عليه هيج انا بنظرك

باتر: لا تحورين كلامي قصدت انتي حية وقويه محد يگدرلج

بتسمت وحجيت بفخر

رميم: حتى انت ماتگدرلي

باتر: ووگعت على وجهي هم يا ست زيرو ثري دوت زيرو ثري

رميم: هسه دير بالك تجي باجر

باتر: اهووو زين عندي حل حتى اشوفج افتحي كام

رميم: لا عاد لهنا .....

ردت اكمل قاطعني بصياح

باتر: لا يروح بالج بعيييد هووو اقصد فتحي كام اشوفج وسدي بسرعة واذا ماتقبلين باجر اگعد ببابكم واگعد اصير مثل صاحبي الله يذكره بالخير

رميم: منو صاحبك

باتر: واحد خبل بس اموت عليه المهم يلا روح گلبي شوفيني عيونج شوو وينهن عليج سيراميك مكة

ضحكت بصوت وحجيت

رميم: حلفتني بحلفانك الماكو منه بس بسرعة اسده مااطول

باتر: ميخالف

كمت طفت الضوه وخليت الاضاءه خافته كلش حتى مايبين شي من الغرفة خاف كلشي يصير وگعدت على مكتب خيال المسويته للشغل وفتحت كام خليته على وجهي وهو هم فتح كام جان متمدد ولابس فقط كيمونه بيده جگارة يباوعلي بتركيز اخذ نفس وحجه 

باتر: دخيل الله شلون خلقة

رميم: لا تتغزل حرام

باتر: ولا تگعد علوية رميم بنت الساده

رميم: شبيك غير حرام وبعدين احنا مجرد اصدقاء شكو بعد

غمني وسد الكامره مالته وحجه

باتر: سديها سديها ماريد بعد

سديتها وحجيت

رميم: بعد احسن اوويي

بقيت احجي ويا الحدما سمعت صوت انفاسه ونام بالمكالمة ومو بس هيج حتى اول مايگعد الصبح يتصل عليه وطول اليوم وحتى هو يگول انا بالشغل يكتبلي

غلقته منه وانا احس بالانتصار بدأ يوگع اريد بعد اكثر واكثر

نزلت اريد اتطمن على خيال هي جانت كاعده بالمطبخ وكالت من اتصل عليج نزليلي حتى ارجعها للغرفة سمعت اصواتهم طالعة هي ويمان من المطبخ رجعت صعدت لان ادري بي هسه يشيلها غصب عليه وياخذها للغرفة

❛❛❛❛

خيال"

جنت گاعدة بالمطبخ نتراسل انا وياسين ويسولفلي ان راح يوصل للشفره خلال هاي الايام

دخل يمان باوعلي وحجه

يمان: شمگعدك بالظلمة خليلي

خيال: لا تدخل

يمان: اذا بيك ماتدخل جا بمنو ادخل

تفست بغضب ردت اگوم سحب العكازات ووگعهم بالگاع صحت بي

خيال: انت شبيك متخلف انطينياهم اريد اگوم

يمان: اشيلك انا حبيبي

خيال: اذا مديت ايدك ولمستني اكسرها

يمان: جا ابقي اليوم هنا بالمطبخ نامي

سندت نفسي على الميز والحايط وكمت وانا رافعة رجلي وحجيت بعصبيه

خيال: يمان لا تخلي صوتي يطلع انطينياهم اريد اروح الغرفتي

استغل وضعي وتقرب مني حاوط خصري بديه ولزگ بيه تخبلت وماگدر اتحرك رجلي تموتني من الالم

خيال: اتعد منيي يماانن

صار يبوس بخدي وحجي

يمان: اموت على اسمي بصوتج من تگولينه تفززين گلبي

دفعته من صدره اريده ايبتعد ماكو

خيال: راح اصرخ والله

يمان: اسكتج ببوسه

خيال: دير بالك تسويها احرگك وانت عايش

اتقرب مني خله انفه على خدي غمضت عيوني وجسمي صاير يرجف بين اديه همس

يمان: جا مو ماترديني جا ليش كزبرتي وشعلتيني

خيال: انت ماتجي بالاسلوب ادري بيك

يمان: اجي بالحنية

خيال: هسه اعلمك الحنية تدلل

حجيتها وخليت راسي برگبته وعضيته حيل وهو كلشي مايسوي غير يسحبني عليه اكثر فوخت گلبي ووخرت سند رأسه على راسي ويحجي بصوت ذايب

يمان: اووفف ريت كل عقاب بالدنيا هيج

خيال: تستاهل

اتقرب عليه اكثر حجيت
خيال: يمان عوفني ماگدر اتحرك

يمان: اريدك خليل گلبي

خيال: ماريدك

يمان: احبج

خيال: اكرهك كره العمى

رفع راسه يباوع بوجهي يعدل بشعري ويحجي

يمان: صدك خليلي

بقيت صافنه عليه وگلبي يرجف احس من يدك يحس بي لان حاضني حيل كل قوته وهو نظراته تتوزع من عيوني الحلگي الملامح وجهي

ردت احجي بلا سابق انذار سندني على الحايط سكتني ببوسه عميقه صرت ادفع بي واحرك براسي اريده يبتعد ماكو گوه دفعته من عندي وابتعد بس بعده لازمني حتى ما اوگع مسحت حلگي بقهر وحجيت بدموع وصياح

خيال: هاييي شسوويتتت انتتت منو سمحلك تتعدى حدودك ويااييي

يمان: اهدي

ماگدرت اتحمل ضربته راشدي حيل بحرگة صرت اضرب بي حيل واعيط بكل صوتي نزلن رميم وحكمة من فوك يركضن

رميم: اسم الله شكو

حكمة: شبيج خويله ولكم شصاير

خيال: رميم تعاي سنديني

دفعته حيل ورميم تقربت انطتني العكاز وسندتني طلعتني من المطبخ هو بقى ساكت صافن عليه التفتت عليه وحجيت

خيال: اخر مره تتعدى حدودك وياي المره الثانية اسوي شي مايعجبك

يمان: ميخالف حبيبي المهم ريحت گلبي وانت هم

تنفست بغضب عفتهم وطلعنا وهو بقى يحجي ويا حكمة البقت تلوم بي وهي ماتعرف شنو السالفة دخلتني رميم وخلتني على فراشي

بقيت افرفح كل ماتذكر السوى وهي تهدي بيه وتحاول تخليني انام الحدما غفيت وهي تسولف وتلعب بشعري...

رميم"

عفت خيال نايمة وطلعت باوعت من الشباك شفته كالعادة گاعد برا يدخن هاي يوميه هيج وجه الصبح يلا يدخل جوه عفته وصعدت للغرفه شمرت نفسي على السرير وبسرعة نمت لان مسطورة

كعدت الصبح على تليفوني الي يدك ولح بالدگ وحده مكالمة ورا مكالمة جريته وجاوبت اجاني صوت باتر يحجي

باتر: رميم ابوج ضابط بالاسخبارات

بسرعة فزيت بشهگه وحجيت
رميم: هااا ؟؟!

   يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بارت اليوم ضريف استعدادا للمصايب القادمة 🦦💔

بقلمي: زينب علي

شنو رأيكم بالقصة والاحداث

معثوراتي لا تنسون التصويت+ متابعة الحساب+ تعليق بين الفقرات ♥️

متابعة ممتعة🦋