رواية تاروت الفصل السادس عشر 16 - بقلم زيـنـب علـي 🦢

#تاروت

البارت «16»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

وانت تدري
تدري كل ليله
بغيابك ينهدم ثلثين عمري

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

وتر: گوم بابا اذا يردون هسه خلي ياخذنوها

ثنينهم بقوا صافنين بيه ما متوقعين مني هذا الرد يمكن ، بلع ريگ بحيرة وحجه

حكيم: يعني موافقة تنطين الكلى مالتج الاختج

وتر: طبعًا اذا هذا الشي يخليها تطيب انطيها كلياتي ثنينهم مو بس وحدة

اباوع على مرام فاتحة عيونها بصدمة وهو يخزرها مثل اليحذرها گام من مكانه احتضني يبوس براسي ويحجي بفرح واضح

حكيم: الله يخليكم الي ومايحرمني منكم

بقيت جامدة بمكاني اول مره يحتضني ويحجي وياي بهاي الطريقة رفع راسي يحجي

حكيم: باجر نروح للمستشفى حتى يسوولج الفحوصات اللازمة

بين الخوف وقلقي على حياة اختي قبلت بكلشي لكن حسيت اكو شي مو طبيعي بس تجاهلت ماخليت ببالي ماعرف هم ليش جانوا متخيليني ارفض

لليل رحت ويا ابوي للمستشفى دخلت حتى اسوي تحاليل كملناهم كلشي فحص تام هواي تأخرنه وتعبت من الفرة وانا جنت طول اليوم ما ماكله شي اول ماطلعنا حسيت بروحي دخت الگاع افتر بيه لزمت ابوي انتبة عليه وگال

حكيم: الله الله شبيج دختي

وتر: كلش دخت بابا مدري شبيه

حكيم: تعاي گعدي هنا خلي اصيح للممرضة واجيج

حجاها بعد ماگعدني على الكرسي راح صاح الممرضة قاست ضغطي وحجت

- ضغطج مصفر مماكلة ؟

وتر: ايي مماكلة شي من الصبح

- وسويتي تحاليل طبعا هبط ضغطج مايحتاج مغذي وهسه لازم تأكلين او تشربين عصير على الأقل

راحت وابوي توسل بيه حتى يجيبلي أكل ماقبلت

وتر: جيبلي بس عصير بابا

حكيم: انتظريني اجيبلج عصير وارجع

بقيت گاعدة مسنحه ومسطورة حسيت بشخص وكف فوگ راسي رفعت انظاري اله شفته گدامي واگف وعاگد حواجبة بستغراب غمضت عيوني ورجعت الوضعي اجاني صوته گال

دائب: شسوين هنا

وتر: شعليك !

دائب: دحجي قبل لا تنسحلين بنص المستشفى هسه

فزيت احجي

وتر: ومنو انت حتى تسحلني هسه يجي ابوي وروح منا

اتقرب عليه لزم ايدي حيل وانا جنت دايخة حتى ماكدر اقاومة

دائب: شسوين هنا بابا احجي

وتر: اذا متعوفني هسه اصيح والم عليك المستشفى كلها انت شبيك مريض

حرك راسه بطريقة يتوعدلي بيها وگال

دائب: خوش رايح بس اذا طلع البالي صح ماتلومين الا روحج

حجيت بخوف اول مرة اخاف من تهديده عيونه جانت تجدح شر

وتر: روح منا هسه يجي ابوي ويشوفك شگله روحح

دائب: رايح بسيطة

مافهمت شنو يقصد عافني وراح وگف بعيد مني لحظات واجه بابا تنفست براحة لو باقي بعد شويه جان شافه شيخلصني اتقرب مني انطاني العصير

حكيم: اشربي حتى اذا صرتي زينه نصعد نشوف عبير

شربت العصير وهو واكف يباوعلي من بعيد ويخزر كلش خفت من نظراته الحادة واصلا وجودة اخر فترة وكل مااطلع يسألني وين رايحة ووين راجعة كلش صار مستفز ويخوف بالنسبة الي انرعبت

صعدنا شفت عبير شويه وحجيت وياها ردت ابقى بعد لكن كلش دايخة رجعنا للبيت

مر كم يوم على ماطلعت التحاليل انسجتي متطابقة بس عندي اللتهابات ومشاكل لازم اعالجها بالبداية وانطوني علاج واستمريت عليه الحدما كملته

وبيوم جنت نايمة فزيت على صياح مرام تگعد بيه وتحجي

مرام: گوميي ابوج يريدج بالصالة گاعد

بلا ما اجاوبها گمت غسلت وجهي ورحت للصالة

حكيم: بعد سبوع للعملية

وتر: حدوو موعد

حكيم: تحاليلج طلعت سليمة لازم نستعجل

بقيت ساكتة بس الخوف تملك گلبي ماعرف شسوي كل الاعرفة اريد اختي تعيش وما نفقدها طلعت منهم صاحت وراي مرام انطتني ورقة وگالت

مرام: اطلعي جيبي الغراض المكتوبة بيها

وتر: هم انا اطلع روحي انتي

مرام: بلا كلام زايد وروحي يلا ، حكيم انطيها فلوس

انطاني فلوس وحجه

حكيم: ميخالف اطلعي جيبيهن وتعاي

وتر: والله تعبت الف مره اطلع باليوم

خزرني حتى اسكت ماحجيت شي

اخذت الفلوس وطلعت من البيت اشتريت الاشياء من الاسواق ورجعت امشي وسارحة بافكاري فزيت من صوت سيارة وكفت گبالي معترضة طريقي حجيت

وتر: اتمنى يوم واحد اطلع ومااشوفك گدامي وملاحگني مثل ظلي اتمنى

دائب: اصعدي بابا لازم نحجي

وتر: شنو اصعد وبعدين بصفتك منو تحجي وياي روح منا الناس

دائب: بنيتي اسمعي الكلام لازم نحجي بس ماترهم بالشارع

وتر: روح منا عفيه هسه اليشوفنا يوميه معترض طريقي وتحجي وياي شيگول علية

نزل واتقدم عليه

دائب: تصعدين لو اتصرف غير تصرف

وتر: دوخر شبيك انت خبل اعرفك تعرفني

دائب: جنيتي على روحج

جان يحجيها بطريقة مرعبة عفته وردت اروح صاح وراي

دائب: اذا مانطيتيني مجال احجي راح اتصرف غير تصرف 

ماهتميت الكلامه دخلت للبيت گلبي يرعد من الخوف حتى ريگي نشف شمرتهن بالمطبخ وصحت

وتر: بعد ماطلعع خووشش ماطلع

مرام: ومرض شبيج تصيحين كنالج بس اليوم

وتر: كل مره تكولين بس اليوم وانتي كل شويه تطلعيني على شغلة

حجيتها بهظم ومسحت دموعي النزلن

مرام: امشي لجج

رادت تكمل وقاطعها صوت ابوي يحجي

حكيم: مرااامم عوفييي البنيه

مرام: صايره عرمه وترادد

حكيم: معليج بيها من اليوم ، وانتي روحي الغرفتج كافي مشاكل تحركي

عفتهم وطلعت رحت للغرفة خوف وقهر وتفكير بالعملية وخاصة سمعت خطرة وتشكل خطورة على حياتي دموعي من وحدهن صارن ينزلن بقيت ابجي اريد اسكت ماكو فوك الساعتين الحدما خويت كلش يلا گمت

لليل كلش راحو ناموا بس انا بقيت گاعدة مليت من الغرفة والحبسه وجانت حارة طافية الكهرباء كمت طلعت للحوش گعدت على الدرج الجو يخنگ وانا روحي لايبه مدري شبيه ماتحملت كمت افتر رايحة راجعة بمكاني

دخلت جوه اخذت ملابس ودخلت اسبح اول ماطلعت من الحمام سمعت صوت طبه قوية بره ركضت اباوع من شباك الصالة كلشي ماكو هدوء بس بزازين 2 يتعاركن ماهتميت

مشطت شعري وردت ارجع اطلع اول مافتحت الباب وطلعت ماحسيت الا ايد خشنه حاوطتني من الخلف وسد حلگي مالحگت اصرخ همس باذني

- اششش ما كو خوف من بعد اليوم

غمضت عيوني كلش دخت ماكدر اقاوم مثل التخدرت ولگيت روحي بوسط الظلام ماحسيت بشي بعد غير من گعدت على برودة تداعب خدي

فتحت عيوني بثاقل راسي ثگيل وماتذكر شي من الصار ركزت نظري زين شفت نفسي نايمة على قنفة ومتغطية وهو گاعد على الكرسي يمي مد ايده يداعب بخدودي ومرسومة على وجه ابتسامة

دائب: صح النوم يحلو

فتحت عيوني حيل هزيت راسي احاول اركز بي شهگت وكمت گعدت رفعت الغطى اغطي بروحي وحجيت بخوف ورهبة

وتر: شجابننيي هناا منو انت ليش جبتني شتريد

دائب: لا تخافين كلشي صار المصلحتج

وتر: شنو المصلحتييي شجاي تحجي انت رجعني الاهلييي رجعني بابا هسه يقلق عليه

ابتسم بجانبية وگام راد يروح بلا ميجاوبني خليت الغطى على راسي وكمت صرت اصيح وابجي واحجي بعصبية

وتر: انت خاطفنيييي يعني رجعنييي الاهلي اريد ابويه اريدة ماتفههمم

دائب: صيري عاقلة ولا تشلعين گلبي

وتر: رجعني الاهلي راح اكلب عليك الدنيا

دائب: صيحي محد يسمعج انتي جوه الگاع بنيتي

جان يحجي ببرود وكأنه المسوي شي عادي وانا المفروض اتقبل الفكرة وارحب بيها بلا مقدمات ركضت ناحية الباب اريد افتحة واطلع لزمني مانعني شمرت الغطى وصرت اضرب بي اصرخ بكل صوتي واستنجد الحدما حسيت صوتي بدأ يروح وحبالي الصوتية تتگطع فقدت

رجعت عليه صرت اضرب بي حيل وصرخ رغم خايفة وكلي ارجف ماعرف منين اجتني القوة ماسحيت بروحي الا ونرفعت من الارض شالني شيل صرت اصرخ بكل صوتي

وتر: لا تلمسنيييي حقييرررر نزلنييي نزلنيي

دائب: لا تخليني أأذيج اشششش

حجه الكلام وشمرني على سرير صاير بنهابة الغرفة صرت ارفس برجليه حتى ما يسيطر ويلزمني جنت منهارة وابجي بصوت عالي وصريخ

دائب: لا تخليني اربطج اذا هديتي

وتر: شتريد منييي عوفنيي

دائب: اهديي بابا اشششش

وتر: حقييررر وخرررر

لزم فكي مرد وجهي مرد بيده وحجه بعصبية

دائب: تسكتين لو تنربطين

صرخت بالزايد سد حلگي بيده عضيتها حيل ولا اهتم صك على اسنانه وگال بعصبية

دائب: الظاهر عاجبج تنربطين يجرالج

حجاها ولم اديه الصدري خله ركبة رجله عليهن حتى ماتحرك وجر حبل جان على تاج الجرباية وكأنه محضره تخبلت كل جسمي صار ينكث برجفة خوف ضربته حيل برجلي ماحسيت الا اجاني راشدي منه سطرني سطر  دخت وعيوني غوشت ماگدرت اتحرك بعد بس دموعي تنزل وصوت البجي مالتي صار عالي هو صار يربطني اديناتي رجليه ربطني من فوگ الي جوة

دائب: هاي حتى توبين وتعقلين والا شردة ماتگدرين تشردين حتى اذا عفت الباب مفتوح

حجيت بدموع
وتر: مريضض

لزگ حلگي يحجي

دائب: اشش ماريد اسمع نفس

عافني وطلع وانا بقيت ابجي وادعي ربي يخلصني ماعرف هذا شيريد مني وليش خاطفي

هلگت من البجي والخوف غمضت عيوني ودخلت بسبات ...

❛❛❛❛

رميم"

طلعت من الصالة للحديقة على صوت حكمة تصيح بعصبية شفتها واكفة يم مريه تحجي وياها بعصبية تصيح وتگلها

حكمة: شذرة تطلعين ولدج الحرامية لو احرگ عشايركم

شذرة: سمي بالرحمن حكمة شبيهم ولدي بيش قصروا وياج

حكمة: لا ماقصروا عداهم العيب خليتهم حراس على بيتي وتالي طلعوا نخلة دگل والثمرة حبابوك

شذرة: وهسه شتردين

حكمة: طلعين ولدج وتكولين همه وين يجون يشهدون على دوسة بيتي

شذرة: مادري بيهم ولدي وين كل الاعرفه يشتغلون ببغداد

حكمة: هاهوو ماتدري بيهم خيبة شوفي تطلعينهم احسنلج هاي السوالف مو عليه

شذرة: تهددينا يحكمة

حكمة: لا ماهددكم بس منا اليومين اذا ماطلعوا ولدج واعترفوا على دوسة بيتي بيوتكم افلشها على روسكم

شذرة: ماتايهيلج عدنا عشاير تسد عين الشمس

اتقربت منها لزمتها رادت تكتل المريه وخرت ايدي وحجت

حكمة: هديني انعل حتى ابو عشايركم لا ابو اصلكم لا ابو خيركم لا عبالكم ساكتة يعني هاي هي

رميم: على كيفج خالة اكيد يطلعون وين يرحون قابل

بقت تصيح وهذيج هم تصيح حتى الجيران صارت تباوع علينا گوة جريتها جوة دخلتها وهي تصيح

حكمة: تهددني بعشيرتها شذرة ام الخرنوب

رميم: حكوم اعصابج راح اخبر يمان

حكمة: عوفي هذا الشلايتي بس اشوفه يرتفع ضغطي ، بس خل الزم ولد شذرة انا اعرف شغلي

رميم: هو ياسين شيريد يسوي

حكمة: يشتكي على يمان يكول زلامة هيج سوو بيه وهذا الجبان شوهين المطي شارد

رميم: وولد شذرة شلون شسوين بيهم

حكمة: خيبة اكيد يعرفون منو التفق وياهم وطفوا هذن اليصورن

رميم: عليج سوالف ياحكوم اكو واحد يعترف على نفسه

حكمة: ايي ويا حكمة كلشي يصير بس دخل احضه بيهم

حجت الكلام وگامت توضت وطلعت طلعت وراها للاستقبال گعدت تقرأ قرآن وانا كعدت اتصفح بتليفوني خيال بالشغل وانا بعد التخرج طگني ملل

ماعندي غيرة كتبتله

رميم: " صباح الخير "

وسديت التليفون شمرته بصفي اباوع للتلفزيون طالع برنامج صباحي دقايق ودك تليفوني وصلني اشعار معلن رسالة جديدة

فتحتها كاتب

باتر: " صباح الانوار "

كتبتله

رميم: " الانوار لو الجزيرة "

باتر: " ها ها ها ماتضحك قديمة "

رميم: " قديمة مال هاون "

باتر: " هاون مال نومي "

ضحكت رجع كتب

باتر: " نومي نامي "

رميم: " بطل مو نهديت حتى على روحك تحشش "

ماجاوب شويه ورجع اتصل كمت للمطبخ بس فتحت خط حجه

باتر: شوكت اشوفج فضيني

رميم: شتشوف مني اذا ماكو دوام ماگدر اطلع امي ماتقبل

باتر: دبريلج سالفة بس يمي لسانج اطول من سنة الجوعة يم امج تنخرسين

رميم: افف ماشي ادبر حجه واگللها بلكي توافق

باتر: شتردين اجيبلج وياي

رميم: تسلم عيوني ماريد شي

تنهد بحسرة وحجه
باتر: هيج حلو انا

رميم: ليش؟!

باتر: گلتيلي عيوني وعيونج يموتن من جمالهن

صدمني بكلامة اول مرة يحاجيني بهاي الطريقة بسرعة داركت الموضوع وردت استغل الفرصة

رميم: صدگ وبعد

باتر: رموشج سيوف بتارة وحاجبج نسر فارش جناحه بجسارة

حسيت بحرارة فجأة دبت بيشرتي وصعدت الوجهي انتبهت على نفسي مشنجة روحي وسادة على ايدي حيل بغضب

رميم: هههه شبيك اليوم مستخف خير

باتر: وسيراميك مكة انتي مو مال واحد يعاملج برقة معاملة جبوري ابو الشربت هواي عليج

رميم: قبل شوية جنت تتغزل بجمال عيوني وتكول عليهن يموتن

باتر: مو بس عيونج يموتن

رميم: لعد !!

باتر: الجنطة والدشبول ياخذن العقل اخخخ اخخ

فهمت قصده بسرعة بس ثولتها وحجيت

رميم: شسويت اليوم

باتر: بالشغل جنت بالمستودع گاعد وافكر بيج

رميم: بس

باتر: جا شتردين

رميم: اريدك تنهوس بية

باتر: منا وهيج

رميم: ان شاء الله

بقيت احجيلة عن يومي وشنو سويت اول ماگعدت من بعدها صار عندة شغل وراد يروح حجيت 

رميم: باتر

باتر: هاا ريمه

رميم: لا تنسى 03.03

حجيت الرقم بالانگليزي ضحك وحجه

باتر: حافظة على الغيب وداعتج يجي يوم واعرف معنى

رميم: طبعًا

باتر: باي

غلقته من عندة دقايق ووصلني رقم قصير من عنده متكوب " 63.02 "

رجعت كتبتله

رميم: "صرت تلعب مثلي"

باتر: " اذا لعبت شراح يصير "

رميم: " انا المنتصرة بالنهاية "

باتر: " بلا شك "

عفت التليفون باوعت الوجهي بمراية الكاونتر صاير حمر دم وگلبي يدك سريع ماعرف اذا بديت انجح كلامه دليل على ان هو بدأ يلين لازم اشوفلي طريقة اقنع بيها خيال حتى اطلع وحدي

اخذت تليفوني واتصلت على طيف جاوبتني ومبين اثر النوم على صوتها

طيف: انتي ماتبطلين گعدتج مال العجايز من الصبح

رميم: نجبي وسمعيني فد ساعتين واتصلي على خيال كليلها باجر الصبح مسويه جمعة بنات عيد ميلاد حفلة اي شي وعزميني

طيف: وين اكو عيد ميلاد الصبح

رميم: اهوو شمدريني دبريها

طيف: يدلل استاذ باتر اول شي عنوان بيتنا وصار عنده وهسه ندبرله طلعة ليش لا صايرين

رميم: گلب گلبي انت اذا صار البالي انطي الج هدية

طيف: يمه شكله بالصورة ويخوف بس ايده بگدي بالواقع شطلع يمه كائن غير مرئي

رميم: عفيه خوفيني بعد

طيف: دروحي خلي اكمل نومتي واشبع نوم روحي

رميم: مو تنسين ومن توافق رجعيلي خبر

ودعتها وسدته وراحت مر الوقت حضرنا الغدا انا وحكمة على مارجعت خيال وراها دخل يمان يصيح وجانت اصواتهم توصلنا من برا الحدما دخلوا للبيت اسمعه يگللها

يمان: انتييي صدك تحجين يعني هذا حل بالسبة الج

خيال: لا تدخل بشغلي ميخصك افتهمت

كامت حكمة وهي تحجي

حكمة: ياستار استرنا گبت بين الفارة والبزون

طلعت من المطبخ طلعت وراها وهم مستمرين واحد يصيح على الثاني يردون ياكلون بعض

حكمة: خير ياطير اليوم بادينها من وكت

يمان: ماكو شي

خيال: لاا اكوو حكمة گولي الابن بنت اختج خلي يكون بعيد عني وعن شغلي مافارغتلة انا

يمان: اشتغلي صح محد يگلج على عينج حاجب

خيال: مشتغلة صح وغصبا عليك موانت التعلمني شلون اشتغل

صاح بيها رج البيت رج وهو يحجي

يمان: خطر القضية الجاي تبحثين عليها خطرة هاي الناس انتي مو گدهااا افتهمييي

شمرت جنطتها وتقدمت عليه وكفت گباله وهو خازرها بتحدي حكمة صارت بينهم تحجي عليهم وهم ولا يمها واحد يخزر بواحد

خيال: انت منين تعرف بشغلي هاا منين جبت هالمعلومات منيينن

يمان: ماكو شي يصعب عليه اعرف كلشي حواليج ويخصج

خيال: لا عبالك تخوفني حتى انسحب مراح انسحب وانت واخوك بس اكشف هاي القضية ثنينكم تنسحلون حتى اذا مو علمود كتل اهلي المهم تنسحلون

يمان: طز بيه وباخووييي انتيي تتأذييننن افتهمي يابشرر

باوعت عليه من فوك الي جوه وعافته وصعدت الدرج راد يروحلها لزمته حكمة تحجي

حكمة: بسسس ماجزعتوا ما مليتوا كافي لا تدخل بشغلها

خيال: حكوم مو اكلج اربطي صاير مسعور لا يعضنا

هز راسه بوعيد وحكمة گالت

حكمة: انتي هم جاي دورج هسه اكعد وياج واشوف شني سالفة القضية

عافتهم وصعدت ويمان بقى يشيل روحه ويدگها من وراها عفت حكمة يمه ودخلت اجهز الغدا واصبه ورا دقايق هدأ البيت وكعدنا ناكل وهم واحد گاعد گبال الاخ هو يخزر وهي مسويه نفسها مامهتمة وتاكل بكل هدوء وهو حتى مااكل عافنا وطلع

حكمة: مريتي على ياسين اليوم شصار بسالفته

خيال: يريد يقدم دعوى بس المشكلة الشاهين محد يعرف غير اسمة ويمكن هذا مجرد لقب لا اكثر ماعتقد يستفاد شي

حكمة: اخخ لو الگه ولد شذرة ويعترفون

خيال: صح ما سألتي عليهم وين

حكمة: شلون ماسألت بلكي الله ويطلعون

دخل يمان باوعتله وحجت بشك

حكمة: بيوم الحرامي دخل انت وين جنت

يمان: گاعد يم دائب جان عندي شغل ويا وانا والشاهين جنا متعاركين واذا ماتصدگين بيه اتصلي بدائب هو يحجيلج

حكمة: جا هو عصفر كفل زرزور وثنينهم طيارة

يمان: شقصدج

حكمة: هيج سلامتك ماقصد

هز ايده ماعاجبه وكف بالباب ورث جگارة ويا طلعة خيال من المطبخ شمر الدخان عليها اختنگت وصارت تگح وتحجي

خيال: حيوان

يمان: وانا هم اموت عليج تعاي ابوسج عنيفتي

خيال: باستك حية ان شاء الله

يمان: تسكتين لا شوف شسوي هسه

خيال: شسوي

سحبها علية مدري شهمس بأذنها انتبهت عليها صارت حمره وانا وحكمة بس نباوع عليهم ونضحك

دفعته وصعدت وهو طلع وحكمة طلعت وراهم وهي تحجي

حكمة: يموتون اذا يتصافون ساعة وحدة

غسلت المواعين وصعدت فوك توضيت ودخلت اريد اصلي شفتها متمدده على فراشها ونقالها بيدها باوعتلي وحجت

خيال: خابرتني طيف

رميم: احم ايي شعجب شتريد

خيال: تكول مسويه لمة بنات وتريدج ترحيلها الصبح

رميم: اووي هاي بطرانه مابيه حيل اطلع

خيال: لا روحي غيري جو احسن من گعدته البيت دام ماعندج شي وهي گالت اجي عليها هي ابوها ياخذونج ويرجعونج

رميم: اذا هيج ميخالف

اباوع عليها بقت تباوع عليه بتركيز خرجت من صمتها وحجت

خيال: كأنج متغيرة اخر فترة

رميم: يعني شلون

خيال: مادري هواي اشوفج لازمة التليفون وخانسة مو من عوايدج

رميم: قبل جنت مشغولة بالدراسة هسه گاعدة وساكته شترديني اسوي

باوعتلي بنظرات شك وسكتت اخذت سجادة الصلاة وطلعت اصلي بالصالة الفوك دعيت ربي يسامحني وهلگد بجيت سجدت وبقيت ابجي بحرگه بحيث سجادتي حسيتها نگعت بدموعي ...

من بعدها ثاني يوم الصبح وصيت طيف ماتجي الا من تطلع خيال للشغل يلا

بدلت روتبت نفسي على اخر حباية اتصلت بية طيف وگالت صرنا جوة سلمت على حكمة البقت تحجي عليه لان كاشخه تگلي تنحسدين عفتها وگوه طلعت

صعدت وسلمت طلعت نقالي دزيتله مسج على الخط

رميم: " انا طلعت بعد ساعة فارغ تگدر تشوفني "

ثواني ورجع دزلي

باتر: " شني بعد ساعة غير تنطيني خبر من البارحة حتى اجهز نفسي "

رميم: " شسوي قابل "

باتر: " اسوي شيرة هسه انتي شعليج غير ارتب روحي "

رميم: " لا تتساخف وياي "

باتر: " دروحي هسه وفد ساعة تلگيني على الشارع يم منطقتكم "

فزيت على صوت طيف تحجي وتخزر بيه

طيف: رميم كلتيلي رايحه تشوفين شغل المكتبة اول مرة وبعدها تمرين علينا صح

رميم: ايي اي صح نزلوني على الشارع العام وانا اخلص موعد المكتبة وارجع

ماحجه شي ابوها نزلوني على الشارع العام

طيف: مو تتأخرين منتظرتج

رميم: ان شاء الله

عافوني وراحوا حسيت گلبي گام يخفق حيل تمشيت شويه اشتم هوى حتى اهدأ على ما مرت ساعة تقريبًا دك تليفوني شفته هو جاوبته

باتر: وينج انا راح اوصل منطقتكم

رميم: انا على الشارع

باتر: هاي انتي الابسه اسود

رميم: ايي

باتر: خوش انتظريني اطبگ السيارة واجيج

انتظرته شويه واجاني يمشي وصل يمي سلم وحجه

باتر: نمشي لو نصعد تكسي حتى نبعد عن منطقتكم

رميم: لا بيتنا بيعد منا خلي نتمشى شويه حتى ارجع امي منتظرتني

باوع عليه يتفحصني واكثر شي يباوع بعيوني ونظراتي الاجاهد حتى اسويها طبيعية

ظاهري ثلج طبيعية ومبتسمة بس بداخلي نيران براكين ثأرة ودموع من دم

باتر: هاا حية وينه السانج المايسكت بالتليفون خنستي

رميم: افتح موضوع شتريد احجيلك على صبغ الاضافر المو عاجبني

باتر: دخيلج لا هذاك اليوم سهرتيني للفجر وانا نعسان تحجين على الصبغ الموعاجبج وخاف اروح وتزعلين باقي اشرب گهوا وجگاير اجاهد النعاس

رميم: تخاف على زعلي

باتر: وسيراميك مكة اخاف عليه ومنه هم بس تطنگرين تخنسين وتشمريني بقائمة الرفض

جان يحجي ويباوعلي ابتسمت بتصنع

انتبهت علية جان لابس بدي سمائي درجة لونه حلوه مو مزعجه مخطط بالعرض بابيض نص ردن وهو هم رافع اكمامة وبنطرون جينز اسود وحذاء رياضي ابيض

يمشي برزانه فارض هيبته الواضحة بطوله وضخامه جسمه الرياضي صاير كلش ملفت للنظر

اشوف بنات يمرون من يمنا اكو بيهن يعلگن عيونهن عليه وهو يمشي بصفي مامهتم اليشوف رزانة مظهره ابد مايتوقع عندة جانب كوميدي مرح وجانب إجرامي بشع كل تصرفاتة متنحزر

يعني ماتوقعة شوكت يمزح وشوكت يحجي جد يضحك عليه ماخذني على گد عقلي يجاريني حسب الموقف صدگه من جذبه ماينعرف امشي وسارحة بي افكر واحلل بشخصيتة انتبهت علية يصوفر فزيت حجه ببتسامة

باتر: وين سرحتي بيه لا تخلين عقلي يسافر للمريخ

رميم: يعني شنو ؟

باتر: يعني مثل ماگال محمد ابن السالم سفرتني المريخ دخلتني التاريخ متگلي وين الحب اي حب اي بطيخ

ابتسمت وگوه عليه جبرت روحي جبر جان مخلي ايده بجيبه ويمشي مديت ايدي خليتها على ايدة بسرعة وكف حسيته جمد بمكانة حجيت

رميم: هاا

باوع على عيوني نزل بنظراته الشفتي بعدها الايدي حجيت ببتسامة

رميم: هه اسفه لزمتك بس تعبت شويه من المشي

بلع يرگ رفع حاجبة وحجه

باتر: نگعد

رميم: لا وين نكعد ماكدر اتأخر

باتر: كل مرة هيج تسوين ماتطولين نص ساعة

رميم: ميخالف خليها على غير مرة

كملنا مشي حجه
باتر: لا تضلين لازمتني

رميم: ليش زعجتك

نغزني گلبي من مد ايد الثانية خلاها على ايدي يتحسيها وهمس

باتر: بالعكس

مشى اصبعة على ايدي وحجه

باتر: اويلي خرب مصنمج مو ايد مصبوبة صبابة

رميم: حلوة ايدي

باتر: انعم من الريش جنها سيراميك مكة ودافية حرارتها وصلت الگلبي

بقى يلح واصر عليه الا نگعد ،گعدنا اكلنا ايس بقينا نحجي شويه وهو احس نظراته تغيرت عن اول طلعة جان يدقق وياي واحسه يدرسني وحذر هالمرة لا غير يباوعلي بنظرات هايمه بتفاصيلي ويبتسم ويا كلامي وانا احجي هيج عيونه بعدلهن شوية ويتحولن قلوب حمر

ساعتها ادركت ان انا مشيت صح وجريته الداخل الخطة مالتي من بعدها رجعني النفس المكان الجنا بي وراح كل شويه يباوع ورا حتى يشوفني

قبل لا اوصل البيت طيف دزلي رسالة كاتب

باتر: "لزمة ايدج حنينة بيها دفو يجنن كل مره لزمي ايدي هيج حسيته مثل جف امي"

رميم: " تدلل من عيوني "

سديت التليفون ورحت البيت طيف بقيت يمها للعصر ورجعت مرتاحة لان تقريب خمسين بالميه من الخطة نجح بعد ينرادلة شغل ....

❛❛❛❛

خيال"

فزيت من النوم مرعوبة هاي ثاني مرة اشوف بابا بالحلم يوصيني على رميم گعدت عرگانة صايرة مي وجسمي يختض من الرهبة والخوف

باوعتلها جانت لازمه تليفونها تگلب بي ومبتسمة انتبهت عليه وحجت

رميم: اسم الله خوخه بيج شي

مسحت على وجهي ودموعي ماردت اذكرها او اقلقها حجيت ببتسامة

خيال: ماكو شي حبيبتي بس عطشت

كامت وحجت
رميم: اجيبلج مي نسيت اصعد وياي

قبل لا احجي نزلت جابتلي مي اخذته من ايدها وگعدتها بصفي لزمت وجها وحجيت بدموع

خيال: رميم گلبي مامرتاح الله عليج صاير شي ضامة عليه شي

صفت بوجهي ثواني بعدها هزت راسها وهمست

رميم: خيال ماكو شي شبيج ليش هيج قلقة

جريتها الي حضنتها حيل اشم وابوس بيها

خيال: محد بقالي بس انتي من ريحة اهلي وين اضمج رميم ماريد تتأذين ، بشعراية ماريد احد يلمسج

رميم: لا تخافين علية اصير حية ويا اليريد يأذيني وبعدين مداشوفين گاعدة بالبيت وساكته وين طالعة قابل

خيال: خليج هيج دائمًا تحت انظاري

رميم: هو انا يمج

خيال: لا ترحين على مكانج ابقي نايمة بحضني خلي اتطمن وانام

رميم: ههههههه تحسسيني طفلة

خيال: هو انتي طفلة لا تشوفين روحج كبرتي ترى بعدني اشوفج عمرج سنتين واخاف عليج حتى من نسمة الهوى تمر بيج خاف تتأذين

حضنتني حيل باستني وحجت

رميم: احبج

خيال: مو بگدي والله يلا غمضي عيونج ونامي

بوستها هواي غطيتها وياي ولميتها الحضني هيج يلا حسيت روحي مرتاحة ونمنا

ثاني يوم الصبح عفتها نايمة وبدلت ونزلت

واحنا گاعدين على الريوگ كل شويه اوصي حكمة واگللها عينج على رميم

حكمة: ياستار ياربي خويله شمالج لحيتي ويا البت

خيال: مادري خالة والله كلش قالقتني وخاصة حلم بابا المتكرر

حكمة: لا تخافين انا اليوم اسويلهم ثواب وادفع صدقة على روحهم وصدقة دفع بلا ان شاء الله ماكو شي

سكتت بعد ما طمنتني شويه طلعت للشغل بعدني بالسيارة واتصل بيه ياسين جاوبته

خيال: صباح النور بشرني صار شي جديد

ياسين: القوا القبض على الشاهين واحتمال يطلبونج شاهد

خيال: صدك ايي ماكو مشكلة المهم لزموا العار

ياسين: انا هسه بالمركز

خيال: جايتلك انتظرني

خليت ابو الخط يرجع بيه للمركز بعدني ما واصلة رجع اتصل بيه ياسين فاجأني من گال

ياسين: الولد اسمه الشاهين ومعترف بكل الصار وان هو ضربني بس مو نفسه الشاهين النعرفة

خيال: ياسين لا تجنني يعني شلون مو نفسه

ياسين: يعني خلا واحد بداله يشيل القضية كلها من هاي وتأكدي ان هذا واحد داهية داهية وملعب

خيال: شنو من بشر هذولي بس اريد افتهم

ياسين: حرت دماغي افتر بس بسيطة عبالهم اعوف الملفات لو ابقى الف سنة اشتغل عليهن احلهن يعني احلهن

خيال: ياسين ماريد اسببلك مشاكل

ياسين: غيرت البيت والقضية صارت يمي بعد معليج انتي يجيج الصافي ، ماكو داعي تجين للمركز طلعت انا

سديته منه الف فكرة اجت ببالي كل الدلائل اتجهت للـ الشاهين بس مستحيل شلون هيج انا شفت اخو يمان طلع من بيتنا منو جاي يلعب على منو يمان يلعب عليه لو الشاهين ويمكن احتمال مو بعيد الشاهين جاي يلعب علينا كلنا هواي هواي سألة براسي هوسه مالها حل

واريدلي ملف واحد بالقضية مفهوم ماكو كلها مشفرة رحت للمكتب وبعدها للمحكمة خلص شغلي ورجعت من وكت

دخلت البيت وهو وراي ماحجيت شي تجاهلتة وسلمت على حكمة ورميم وصعدت سحبت وصليت ونزلت

دخل للمطبخ يحجي
يمان: يمه باجر اروح البغداد منو يبقى يمكم

حكمة: توكل ابو محمد موجود نخلي يحرسنا يوم ، ماكلتلي شسوي رايح

باوع عليه وحجه
يمان: شغل

حكمة: بس كون شغلك بي خير

يمان: من ارجع نشوف

حجه الكلام وگعد گبالي يدخن ويباوعلي انزعجت من نظراته المتمركزة عليه حجه

يمان: مو كلتلج ماتگدرين للشاهين هذا مسنود من ناس كبار محد يگدرلهم

خيال: بس رب العالمين موجود ويگدرلهم

يمان: ونعم بالله بس انتي ابقي بهذا عقلج وعنادج شوفي وين وراح يودينا

حجاها وكام طلع ماهتميت...

لليل كلش الوقت تأخر وكلها نايمة نزلت جوة اريد اشرب مي شفته بالمطبخ جاي يعمر بالنرگيله ويدندن باوعلي بطرف عينه وغنه بصوت عالي

يمان: برضاك لو مو برضاك عاجبني اتغزل بيك
الليلة راح اتحداك اسمع گلبي يغني عليك

شربت مي وهو باوعلي وگال

يمان: خيال عوفي الشاهين عليه ولا تدخلين

خيال: شنو قصدك تريد تاخذ مكاني بالشغل ترى انا المحامية وانت

اتقرب مني يحجي

يمان: انتي ما تردين روحج

خيال: خايف عليه على اساس كول انطيني مجال اسجل دور بطولي عوف سالفة خوفك عليه

يمان: خوش انتي موجودة وانا موجود ونشوف منو اليوگع الشاهين اول

كتفت اديه احجي

خيال: يعني تتحداني

يمان: هذا الموجود فزة گلبي

اتقربت منه خله ايده على الكاونتر واتقرب عليه لزك بيه كلش حجيت وانا اباوع بعيونه

خيال: قل للحمير وان طالت معالفها لن تسبق الخيل في ركض الميادين

يمان: شماي عنيف خليلي

خيال: بعدك ماشايف شي

ردت اروح لزمني ماخلاني اتحرك دارني وحصرني على كاونتر المطبخ يحجي

يمان: مشتاگلج خيالي الواسع

خيال: يشتاقلك ملك الموت وخر مني

رفع راسي وخه راسه برگبتي يهمس

يمان: اوصل مراحل بالسكر من ابدي اشم بعطرج

رغم هوسه مشاعري ودگات گلبي بقيت هادئه وحاولت ادفعة مني مايتحرك لازگ بيه رفع راسه وحجه بصوت خدران

يمان: اويلي من اشم ريحتك خليلي ادوووخخخ

خيال: شيفيد بعد وشنتظر منك اذا انا بالوكت الجنت بي محتاجه تلملمني وترممني انت كسرتني

باوع علية وبلع ريگ عض على شفته التحتيه بحسرة وحجه

يمان: اريدج شلون شلون بيه

خيال: فات الاوان صدگني فات مانرهم بعد طلعت من عقلي وگلبي صعب ترجع مستحيل

يمان: وانا شسوي بروحي اذا كل نسمة هوى اشهگها وانتي ماكو تذبح بيه كوة ادخلها الريتي

ماحجيت ردت اطلع رجع منعني شابك اديه على خصري خلة انفه على خدي يحجي بخدر

يمان: من يوم الصرت بي بهاي الدنيا لليوم من اول نسمة هوا تفوت الريتي واشتمها الهاي اللحظة انا ماشايف بحياتي شي حلو غيرج حنيتلك خليل گلبي

ماگدرت اتحمل وحسيت روحي الدموع والحرارة بدت تتجمع بعيوني دفعته وصعدت ركض دخلت للغرفة من الخوف والرجفة العتلتني قفلت الباب

ورجعت المكاني لحظات ووصلني مسج منه اغنية جانت المحمود التركي اسمها ياحبيبي شغلتها اسمع بيها

حس فيني وبحنيني
فيك ما فيك احتويني
انت عيني وكل نظرها
ظلمة من دونك سنيني
لو تدري شكثر أحبك
وتدري بيك أموت
من كثر ما أنادي باسمك
حتى ما ظل فيني صوت
يا حبيبي يا طبيبي
أنسى اسمي لو تجيني
يا حبيبي بس تعال
فيك ظني ما يخيب
روحي تبعد لو عفتني
حالي يقهر لو تغيب
بالدنيا كلها ما ابدلك
شعندي غيرك يا حبيبي
يا أحلى قسمة ليا صارت
أنت بالدنيا نصيبي

بلا شعور اسمع ودموعي تنزل بغزارة خلصت وطفيتها وانا بعدني ابجي سمعت صوت من جوه كمت باوعت من الشباك شفته گاعد بالحديقة يشرب نرگيلة فتحت الشباك وصلني الصوت يسمع نفس الاغنية امسح دموعي ويرجعن ينزلن

ماعرف شنو اقسى من قتال اهلك اخ حبيبتك وحبيبك گبالك وماتگدر تروحلة حسيت الاغنية كلش رهمت علينا

مانمت للصبح هو هم بقى گاعد برا للفجر باوعتله يلا دخل بدل وطلع ماعرف شعندة ببغداد

وانا هم صار الصبح بدلت وطلعت عيوني ورامه ماردت احد يشوفني خاصة رميم

صبحت على عمو ابو انس صاحب الخط مالتي وطلعنا شويه التفت علية وحجه

ابو انس: هاي السيارة شبيها

خيال: ياسيارة عمو

ابو انس: هاي السودة الورانا يأشرلي نطيته مجال حتى يفوت بقى يأشرلي يريدني اوگف

درت راسي باوعت وراي شفتها سيارة سودة مضللة حجيت

خيال: دير بالك توگف عمو كمل فدوة

ابو انس: جاي يضايقنا شبي هذا شارب من الصبح نايم

بقى يضايقنا يريد نوگف وكل شويه يريد يضرب السيارة واني اصرخ وابو انس يغلط عليه طلعت تليفوني ردت اتصل ماسمعت غير صوت الطلقة

والسيارة جانت تمشي سريع حسيتها طارت بينا ونگلبت ....

  يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

معثوراتي لا تنسون التصويت+ متابعة الحساب+ تعليق بين الفقرات♥️

متابعة ممتعة🦋