رواية تاروت الفصل السادس والعشرون 26 - بقلم زيـنـب علـي 🦢

#تاروت

البارت «27»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

Insta: zainab__.ali1

Tiktok: zeinab_.ali1

اساسك غشني
ليش من اولك تخدع
يخيط العنكبوت بطلعتك تلمع

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

رميم:

باوعت على اثر ايدي وحچيت

رميم: مابقى شي نلتقي قبل رأس السنة بيوم حتى كلشي يتوضح

باتر: شتقصدين

رميم: من نلتقي تعرف

باتر: راح تعترفين

رميم: بـ شنو ؟

باتر: بحقيقة مشاعرچ اتجاهي

رميم: ايي بالضبط هيج شي

باتر: گوليها هسه وريحيني

رميم: لا وجه لوجه تصير احلى ...

بقيت احچي ويا وشويه واتفقنا وين نلتقي سديته وردت اطلع من المطبخ جفلت من شفت يمان صار گدامي عگد حواجبه يباوع لي بنظرات مستفسرة بلعت ريگ بخوف وحچيت ببتسامة مصطنعة

رميم: هلا محتاج شي

يمان: ويا منو چنتي تحچين ؟

رميم: هاا ويا صديقتي

هز رأسه بحركه مامصدگني بيها مسح على لحيته يسوي

يمان: اممم

رميم: شنو

يمان: لا هيج ماكو شي

رفعت كتفي بحركة مادري وردت اصعد صاح وراي

يمان: ريماي صديقتچ تگليلها اشوفچ مو اشوفك

بسرعة رجعت نزلت عليه احچي

رميم: هه جنت اتشاقه وياها وبعد طلعت مني هيج لا تركز

يمان: اتمنى اتمنى رميم كلامچ صح

بقيت ساكته مادري ليش حسيته سمع كل كلامي ويا باتر ابتسم بوجهي وعافني ودخل للمطبخ وانا هم عفته وصعدت فوگ ركض خايفة ادري بـ يمان يلگفها بسرعة فتحت الباب ودخلت للغرفة صارت خيال گبالي

خيال: شبيچ سم الله من راكض وراچ وجهچ مايتفسر

رميم: شبيكم اليوم وياي لا تبزعوني كلشي مابيه

لملمت غراضها واوراقها وحچت

خيال: الي كلام وياج لا عبالچ اعوفچ بس هسه ما فارغة

رميم: وين رايحة

خيال: انزل جوه عندي شغل ويا يمان

حجتها ببرود سوت نفسها ممهتمة رگصت حواجبي وحچيت

رميم: ايّ عيني اركضي انزلي تأخرتي عليه خطية منتظر هسه تلگينه

خيال: شنو قصدچ !

رميم: يماني ابو طول الحلو منتظر على نار حتى تبدون تشتغلون

خيال: على القضية غير

رميم: اووو اهم شي القضية

خيال: ادب سز شنو تقصدين

فتحتلها الباب وحچيت
رميم: اقصد لا تخلين نسيبي ينتظر اقصد القضية تنتظر

خيال: من ارجع احاسبچ

رميم: تمام بس مو ترجعيلي مثل يوميه دايخة وترجفين

رادت ترجع عليه بسرعة سديت الباب اضحك عليها وجها صار مايتفسر من الخجل بقت تصيح وترزل بيه بعدها نزلت فتحت تليفوني بسرعة اختفت ابتسامتي من قريت المسج الدازه الي كاتب

باتر: " اريد نلتقي بمكان بعيد والوحدنا حتى نتفاهم وما اريد اعتراض لا تخافين وانتي وياي "

صفنت شويه افكر بكلامه هو لازم اشوفه بمكان منعزل واليريد يصير خلي يصير رجعت كتبت له

رميم: " تمام انا اجيك للمكان الاتفقنا عليه وانت حدد المكان الي تريده "

دزلي
باتر: " هاي هي حبيبي متفقين "

تنفست بعمق صارلي فوك السبع اشهر انا اخطط الهاي اللحظة ولازم اگون گدها

تمددت على فراشي اريد انام ماكو عيوني طار منهن النوم قلق توتر خوف شويه سحبت تليفوني واتصلت بي طلعلي مغلق وساد النت هالايام هواي صاير يختفي

بقيت سهرانه افكر مادري شگد مر من الوقت انفتح الباب ودخلت خيال رأسا سويت نفسي نايمة حسيت بيها تقربت مني گعد على حافة سريري ماسمع بس صوت تنهيدتها وكأنها تباوع الوجهي عدلت شعري وهمست

خيال: لو بس اعرف ليش گلبي مثل النار عليچ ليش جايني احساس اريد اضمچ واحميچ من عيون الناس

رادت تگوم لزمت ايدها ماخليتها حچيت

رميم: ابقي لا ترحين

باوعتلي وحچت ببتسامة

خيال: مسويه روحچ نايمة حتى تخلصين من الحساب

رميم: شسوي اذا اريد انام بحضنچ

بعدت الغطا وتمددت يمي اخذتني الحضنها  وتبوس بشعري وتعدل بي بأيدها

رميم: ليش خايفة عليه

خيال: انتي بقية اهلي طبعًا اخاف عليج شعدني غيرچ

حضنتها حيل وغمضت عيوني حسيت بأملنها نمت محاسه بشي من بعدها مرت الايام هي ويمان مشغولين يشتغلون على الجريمة وانا اشتغل واخطط للمجرم وحلفت الا اوصله الحالة اخلي يتعذب لا يگدر ينساني ولا ينتقم مني ولا يوصلني

وقبل رأس السنة بيوم گوه قنعت خيال وخليتها تسمحلي اطلع من البيت وفهمتها رؤى اخت ميعاد عازمتني وجان شرطها حكمة توصلني ماعارضت ابد ردتها بس تسمحلي جنت واگفة گبال المرايه اكمل لبسي لبست فستان مجبات لونه اخضر غامق مخملي يناسب الجو ونسقت ويا حجاب وحذاء لو بيج حسيتهم رهموا مع بعض خليت مكياج ناعم بس ثقلت سموكي العيون باوعت النفسي بالمرايه حسيت عيوني صارن يجدحن والعبرة خنگتني ماسمحت النفسي ابچي هفيت على وجهي اهدئ بنفسي رشيت عطر اخذت جنتطتي لبست البشت مالتي الاسود فوگ الفستان ونزلت اول ما شافتني حكمة گالت

حكمة: اللهم صل على محمد وال محمد شني طالعة هيج هسه تنحسدين خايبة

رميم: من حوري عاد منو يحسدني

حكمة: جنچ البخت

ابتسمت باوعت الخيال عاگدة حواجبها مستغربة من لبسي

خيال: طلعتج ماتحتاج كل هاي الكشخة

حمحمت وحچيت

رميم: لا مناسبة لان هي مسويه تجمع بنات قابل اروح مبهذلة

سكتت بس مبينه الضوجه على وجها بستها باوعت الحكمة وحچيت

رميم: حكوم نروح

حكمة: ماعندي شي بس البس عباتي

لبست عبايتها وطلعت وياها جانت مأجرة سيارة واكفتلنا بالباب انتبهت سيارة يمان ماكو سألت حكمة

رميم: حكوم يمان وين

حكمة: طلع من الظهر مارجع للبيت بعد

طمنت احسن مموجود صعدنا بنص الطريق وصلني مسج منه مدري ليش حرك مشاعر الخوف بداخلي

باتر: " 7.4.6 "

وكتب وراها

باتر: " صارلنا سبع اشهر واربع ايام كلها دقايق ومن توصلين يمي تصير ست ساعات بالتمام محضرلچ مفاجأة بهاي المناسبة "

مادزيتله شي اول ما وصلنا شارع بيت ميعاد حچيت

رميم: حكوم مو الا ندخل تكدرون تنزلوني هنا

حكمة: لا انزلچ بالباب واخلي گلبي يرتاح عليچ يلا

رميم: مايحتاج

حكمة: لاله لا يحتاج اسكتي ترا نرجع

حجتها خزرتني لان الرجال يسمع سكتت نزلوني يم الباب كلش

حكمة: يلا دگي الباب ودخلي بساعج

رميم: ايي تگدرون ترحون

حجيتها وسويت نفسي اعدل بحذائي على ما حركت السيارة وطلعوا من الشارع بسرعة طلعت تليفوني واتصلت بي

جاوبني
باتر: وين صرتي

رميم:انت بنفس المكان راح اخذ سيارة أجرة واجي

باتر: لا ابقي يمج انا اجي ماكو تكسي هسه

رميم: قريبة عشر دقايق

باتر: لا

ماقبل اتحرك بقيت منتظرته عرفت سيارته اول ماشفتها من بعيد توترت كلش وحسيت بخفقان گلبي الي بدأ يزيد غمضت عيوني وسلمت امري الربي

رميم: ربي انت معيني وماكو غيرك معين

اشرلي بضوء السيارة يعني شفتچ اتقربت وانا احس جسمي يرجف نفضت كل الافكار من راسي واتقدمت امشي بثبات وابتسامة صعدت ويا وحچيت

رميم: هلاو

مد ايده وشغل ضوء السيارة جان لابس كله اسود اباوع عليه غمض عيونه حيل وعصرهن بيده هز رأسه ورجع يباوع عليه

رميم: شبيك

حچه بذهول

باتر: لك لك لك شووو هيدا شو هيدا انت تريد تدهرنا اليوم

ضحكت احچي
رميم: شكو كلبت لبناني

باتر: شو لبناني لك انا نگلبت على البطانة هسه رميم تردين تسترين على روحچ منا ورجعي البيت اهلچ

رميم: هاي شبيك صدك تحچي

باتر: وسيراميك مكة مال نروح للمكان الحاجزة وانتي هيج گدامي مااضمن الج روحي

رميم: باتر لا تشاقه

باتر: وحمزام الحمزة ماتشاقه شني شگالولچ عليه حديد وهيج مسويه بروحچ

باوعت النفسي مستغربة

رميم: شمسويه

باتر: هو انا لو شميت عطرچ اخدر مو انوب ضاربتلي تخم مكياج وفستان باللون الي يحبه گلبي وكعبچ جنه گعب *** يطگطگ

شهگت بصدمة من لفظ الكلمة گدامي ضربته حيل وحچيت

رميم: شلون هيج تحچي متستحي

ضحك يحچي

باتر: تسترين على روحچ وتنزلين لو نعلگها اليوم للصبح نختم الليلة بفرخ ابن حرام

وسعت عيوني حيل ردت اموت من الصدمة اول مره هيج يحچي وياي بهاي الجراءة فتحت الباب بضوجة وردت انزل بسرعة لزمني من ايدي يضحك بالعجل سحبتها منه احچي

رميم: وخر باتر لا تلزمني شلون هيج تحچي وياي

جرني رجعني للسيارة يضحك بصوت عالي لزم ايدي يحچي

باتر: يايمه صارت ترجف اشاقه وياچ روح گلبي

رميم: خوفتني اريد انزل وخر

باتر: امداني اذا أأذيج بيوم توقعي الاذية من الكل الا مني احافظ عليچ اكثر من روحي واحطچ بعيوني وغمض عليچ

زادت رجفتي وكلامه خلا عيوني تدمع غصب عني

باتر: هاي ليش عيونچ صارت تلمع

رميم: من برودة الجو يمكن

باوعلي بطرف عينه وسكت شغل السيارة وحرگ

رميم: وين رايحين

باتر: مكان حلو

اومأت بموافقة ساكته افكر وارجع الخطة براسي فجأة انتبهت عليه باوعتله بصدمة من شغل اغنية كاظم الساهر يامستبدة

قالت
قالت لكل الأصدقاء
هذا الذي ما حركته أميرة بين النساء
سيستدير كخاتم في أصبعي
و يشب نارًا لو رأى شخصًا معي
سترونه بيدي أضعف من ضعيف
و ترونه ما بين أقدامي كأوراق الخريف
يا مستبدة

أنت التي أسميتها تاج النساء
اقسي على قلبي
و مزقيه لو أساء
يا مستبدة
الويل لي
الويل لي
يا مستبدة
الويل لي من خنجر طعن المودة
الويل لي كم نمت مخدوعًا على تلك المخدة
الويل لي من فجر يوم ليتني ما عشت بعده
الويل لي الويل لي يا مستبدة
إني أعاني إني أموت إني حطام
حاشاك عمري أن افكر بانتقام
إني لك قلب وحب واحترام
صبرا يا عمري لن تري دمعا يسيل
سترين معنى الصبر في جسدي النحيل
فتفرجي هذا المساء رقصي الجميل

باوع لي وگال

باتر: شگد بيها خذلان هاي الاغنية

رميم: اول مره اعرف بيك تسمع الكاظم

مسح على شعرة ونزل ايده الوجهه باوع لي بنظراته الثاقبة خلت گلبي راد يطلع من صدري وخاصة من گال

باتر: بس من اشعر بالخذلان اسمعه وهاي الاغنية تشبهج

رميم: انا مستبدة

باتر: حسنچ مستبد من اصير گبالچ كل قوتي تتبخر احس بروحي عاجز گدامچ

مديت ايدي تحسيت وجهة بظهر كف ايدي مال برأسه عليها همست

رميم: تحبني باتر ؟

ابتسم بتعبت وگال

باتر: احبچ الدرجة عايش على تفاصيل يومچ

رميم: هواي تحبني ؟

باتر: احبچ الدرجة احس العالم كله مزيف وانتي الحقيقة الثابتة

رميم: اذا طلعت مجرد وهم واختفيت من حياتك

لزم ايدي عصرها حيل بيده الدرجة حسيت اصابيعي طگن يتنفس بغضب ويحچي

باتر: اموت انتهي ترتكبين بيه جريمة

ابتسمت
رميم: انا نقطة ضعفك

باتر: واعترف ايّ

ورث جگارة فتح الجامة شويه باوع لي ورجع كمل
باتر: بعمري ماعندي نقطة ضعف منين طلعتي بدربي

رميم: معقولة تحبني الهالدرجة

باتر: ريمه انا 3 نسوان حبيت بحياتي امي نرجس وامي حكمة

من گال اسم حكمة گلبي صار يغلي واختنگت باوع الوجهي بنظرة سريعة ورجع عينه على الطريق گال ببتسامة

باتر: ماسالتي الثالثة مني

شابكت اديناتي ضغطتهن حيل باوعت له رجع ردف

باتر: امي نرجس وامي حكمة وانتي

حجاها واخذ نفس من الجگارة حيل ايده الرجفة بيها واضحة قبل لا تخلص شعل الثانية

رميم: وين ماخذني بعد شگد ونوصل

باتر: مو گلت لا تخافين مني مستعد أاذي روحي وما اخليچ تتأذين ، وهاي راح نوصل

فعلًا لحظات ووصلنا بيت بمنطقة كلش راقية وكف السيارة وكال

باتر: يلا ننزل

رميم: وين جايبني باتر بيت وبليل لا لا مانزل

لزم ايدي وحچه بحزم

باتر: يلا ريمه انزلي 

رغم جنت خايفة بس بمجرد ما اتذكر هدفي والاريد اوصله كل الخوف يتبدد ويتحول قوة

نزلت من السيارة باوعت للبيت جان كلش كبير الباب مالتة حديد اسود مشبك بي ممر من الحديقة المدخل البيت فتح الباب واشرلي ادخل

سميت باسم الله واتقدمت بكل ثبات امشي هدوء كلشي مينسنع غير طرقات الكعب مالتي وهي تنقر على ارضية الممر الرخامية

رعب قلق قوة انتظار

قلوب متوجسة بشعور الخوف
انفاس حارقة
عيون حادقه
نظرات شاخصة الأبصار
كنت اهمس قوة ثم قوة ثم إنتصار
مكان مخيف تعلوه رائحة الخذلان
امشي بثبات واسحب خلفي كل ذلك العنفوان
حسنًا اضن قد أن الأوان  (03.03)

سبق خطواتي وفتح باب البيت مرسومة على وجه ابتسامة بريئة

باتر: ادخلي برجلج اليمين

ابتسمت وحچيت

رميم: عاجبني ادخل باليسار

باتر: معناها ليلتنا سوده

دخلت واني احچي

رميم: وين اكو ليالي بيض

فزيت من سد الباب حيل ضحك وحچه
باتر: آسف فلت من ايدي

درت عيوني بالمكان البيت فارغ صوتنا يدوي بي بالنص طاولة زجاجية عليها ورد واكل اتقدم انطاني وردة وگال

باتر: جنت اتمنى ان اليوم نهاية العام حتى ادخل سنة جديدة وانتي وياي

ابتسمت احچي
رميم: اعتبرها اليوم بداية جديدة

رفعت راسي اباوع الوجهة ورجعت حچيت

رميم: طلعت رومانسي هذا كله انت محضره

باتر: والوراچ هم

باوعت وراي جان اكو دب قطني كلش كبير مثبتة وسط تول مثبت بالحايط عليه نشرة بيضة وشجرة الكرسمس ابتسمت احچي

رميم: حلو

جريت الكرسي وگعدت اطرافي مثلچة وكلبي يخفق حيل حسيته صار وراي اتقدم وگف گبالي ولوه رگبته يباوع عليه

رميم: شبيك

باتر: صار وقت الحقيقة ريمه

رميم: ايّ حالياً كلش وقتها

فتح تليفونه گلب شويه واتقدم شمره گدامي اخذته اقرأ المكتوب بي شفت سكرين مسجاتي ويا طيف اتذكر مره جنا نحچي وهي گلتلي

طيف: انتي تحبينه ؟

رميم: شبيچ بابا شنو احبه انا مااحب بس روحي

طيف: شتردين منه

جانت تكتب وانا متأكدة السكرينات يوصلنه اول بأول كتبتلها

رميم: شفته صعب ومايهتز ردت اطيحه

طيف: بهاي السهولة

رميم: اخلي يصير مثل الخاتم بيدي وافره فر بكيفي

طيف: حرام عليچ اذا ماتردي عوفي اكو غيرچ تستاهلة

رميم: هو يحبني الي مايريد غيري

رفعت راسي مرسومة على وجهي ابتسامة عگد حواجبه وگال

باتر: هم گولي هاي مفبركة

رميم: لا هاي انا كتبتهن ودزيتهن

رفع تك حاجب منتظرني اكمل كمت وگفت نزعت البشت وشمرته على الكرسي بقيت بس بالفستان باوعلي من فوگ الي جوه نظراته هامت بيه اتقربت منه عدل وكفته يبلع بريگه

درت حوله احچي
رميم: صفر ثلاثه نقطة صفر ثلاثه باترى شنو معناها اممم الصفر الاول معناة البداية

التفت عليه نصف التفاته يسمع الباقي خليت ايدي على كتفه حسيت جسمة انطه ردت فعل

رميم: الثلاثه الاولى مراح تاخذ مني غير 3 اشهر فقط حتى توگع بحبي النقطة انتهاء المرحلة الاولى .
الصفر الثاني صفرت السنة وهاي احنا بنهايتها الثلاثه الثانية راح انفذ بيك 3 اشياء

خليت ايدي على صدره اضرب واحچي بحرگه
رميم: احرمك مني ، اخليك تتمنى الموت ، انفذ انتقامي واخذ حق اهلي

03.03: رمز التلاعب بالمشاعر وعدم جدية الطرف الآخر

باوع عليه وسع عيونه بصدمه وكأنه اكتشف الموضوع اتقدمت صرت گباله رفعت ايدي گدامه وحچيت

رميم: باتر تتذكر هاي الايد

صوت انفاسه صار عالي وساكت بس يباوع عليه احسه مصدوم رافض يصدگ

رميم: طبعا تتذكرها قبل كم سنه مثل هيج أيام خليت بيها اثر مايروح

حجيتها ورفعت ردن فستاني باوعت الوجه صار يتصبب عرق بشكل مو طبيعي طلعت اثر الجرح الي بأيدي وحجيت

رميم: تتذكره باتر

حچه بصوت يرجف مشنج روحه وعرقه كلها بينت

باتر: منين هذا الاثر بيدچ روح گلبي ؟!!!

ابتسمت وحچيت
رميم: هذا الاثر الي بأيدي هو اثر جرح عافه بيه المجرم الي قتل اهلي وخلا شخط بروحي ماينسي

اباوع عليه ضحكت وكأنه جان يعرف بالموضوع بس مايريد يصدگ بي طك رگبته اكثر من مره يفر بيها فر وگفت گباله وحچيت بحرگه اسد بأيدي حيل

رميم: سليمان هيلين ضرغام ضحاياك وضحيا حقدك تتذكرتهم مو تتذكرهم يا مجرم

عافني وراح جر الكرسي وكعد خلا  ايده على الطاوله وسند رأسه عليه اتقربت منه احچي

رميم: راح تنحرم من شي تحبه ياترى راح تحس بناري راح تحس بعذابي ، ماعتقد هو المثلك وين يحس

رفع رأسة باوع عليه عيونه حمر وجهة مايتفسر

باتر: تعادلنه ؟

رميم: عفوا بشنو تعادلنا لو تجمع كل خذلانك مراح توصل ذرة من شعوري الا في حال موتت اهلك گدام عينك بس بهاي نتعادل

باوعلي وعيونه تلمع همس

باتر: خذلانچ كسرني اكثر من اهلي

رميم: تستاهل

باتر: شني الشعور الي بداخلچ هسه

اتقربت احچي بأذنه بفحيح

رميم: غل حقد كراهية

غمض عينه حيل رفع راسه الي فوگ تنهد وضحك بقهر ويسوي

باتر: اخخخ اخخ ههههه هاي تاليتي

رميم: هاي البداية بيبي

ورث جگارة وحچه

باتر: دمرتيني رميمي صرتي حطامي

رميم: بعدك ماشايف الدمار

باتر: الا تتأذين ليش هيج سويتي ليش

رميم: منو يأذيني اذا قصدك انت ماعتقد راح تنطيني اكبر من الاذى السابق وهو كتلت اهلي

باتر: راح تتمنين الموت وماتلگينه

رميم: شنو تريد تسوي سوي

گام من مكانة بحركة سريعة جفلت ورجعت الي وراء اتقرب مني حيل بحيث لزگ وجهي بوجهه انفاسة صارت على بشرتي ابتعدت بخطوات قليلة اباوع العيونه

بريق عينيه يعكس الشظايا بداخله

سحب نفس من الجگارة وحچه كلمة كلمة يجر بيهن

باتر: راح اشعلچ مثل هاي الجگارة الي بأيدي واسحب روحچ مثل مااحسب الدخان منها وبعدها اذبج بأقرب حاويه لا على بالچ تگدرين تلوين ذراعي

حچيت ببتسامة
رميم: بس بعدها راح تتألم عليه راح تعاني أضعاف معناتي

اشرت على صدره باصبعي وحچيت وانا اباوع بعيونه

رميم: لان انا عايشه هنااا بگلبك ومسحلته الوحدي انت تحبني

غمض عيونه حيل يحچي بهدوء مرعب
باتر: كافي رميم

رميم: تحبني تموت عليه ماتگدر تنكر

باتر: اسكتي

رميم: غرگان بيه انت غركاان افهم هذا الشي

باتر: بسسسسس اشش اسكتي

حجاها بصوت يدوي بالمكان الفارغ واتقدم عليه رجعت الي ورا

باتر: ليش هيج سويتي شلون انطاچ گلبچ تكسريني

رميم: شلون انطاك گلبك تقتل عائلتي وتيتمني

سحبني عليه لزم فكي حيل يهمس بأذني
باتر: ادمرچ راح اخليچ تدورين الموت وماتلگينه

رميم: اصير بين اديك وماراح تلمس مني شعره وحده

دارني بحركة سريعة كله يرجف اديناته يرجفن مد ايده على طرف حافة فستاني من ناحية كتفي يريد ينزله غمضت عيوني حيل ادري بي ما يسويها وهم ماريد ابين ضعفي گدامه فجأة حسيته دفعني حيل يصيح

باتر: ليشش هيج سووييتتيييييي

استقبلت الحايط بيدي غمضت عيوني متألمة درت وجهي اله يفتر بنص الصالة يمسح بعيونه ايده ترجف انطاني ظهرة رفع رأسه يباوع للسقف

باتر: وصفتچ بحنية امي صرتي تجرين بدمي شلون هيج تسوين بيه

گالها وباوع عليه مانطيت اي ردة فعل غير ابتسامة الانتصار اتقدم مثل الثور الهائج دفر الطاولة كلبها وهو يصيح ويرعد اتقدم على النشرات والزينه الي بالحايط كلها گطعها وشمرها ماخلا شي كام يملخ ويشمر ويغلط ويفشر احسه مثل الما مستوعب عباله حلم يريد شي يصحي

اتقدم عليه يصيح

باتر: ولج ليش ليش ليش بس فهميني راح اموت

صحت بي
رميم: اسأل نفسكككك ليششش ليشش كتلت عائلة كاملة ليش يتمتني ليش حرمتني من اهلي ليش شمسويلك

سحبني عليه بس هالمره مبين فاقد مايحس بشي دفعته بخوف احچي

رميم: وخر لا تلمسني مقرف

سحبني أكثر دفعته حيل وگوه تملصت من بين ايده واتقدمت للارض اخذت البشت لبسته ردت اشيل جنطتي اول ما گمت  ماحسيته الا انطاني دفرة كلش قويه طيحني للگاع عطت متألمه اتقرب نصه گبالي يباع بعيوني

باتر: من اليوم صرتي حصتي من اليوم صرتي تخصيني انا وبس

رميم: شراح تسوي تقتلني مثل ما قتلت اهلي اصير ضحيتك الرابعة

جر ايدي لواها وعصرها حيل

باتر: ضحيتي الرابعة بس بطريقتي الخاصة

دفعته وگمت كلي ارجف حجاها بصوت مخيف وعينه باوعتلي بقذارة اول مره اشوف هاي النظرة بعيونه اتجاهي

رميم: شنو تريد تسوي سوي مايهني اليطلع بيدك سوي بس بعدها راح تموت بدالي الف موته

جان گاعد بالارض رفع رأسه الي ابتسم وگال
باتر: ربحتي المعركة تگدرين ترحين هسه

اتقدمت للباب بسرعة قبل لا اطلع صاح وراي

باتر: جنت اضن نفسي وطن روحچ ماضنيت الوطن ينخان

نبضات گلبي اعتلت نزلت من عيني دمعة حزينة ماعرف ليش بسرعة مسحتها حسيته تقرب مني يحچي

باتر: موتيني رميم لعبتي اللعبة صح

التفتت عليه شفت واگف وراي ودموعه تنزل ابتسمت بنصر وهالحركة كلش استفزته ردت اطلع ماحسيته غير سحبني من ايدي دفعني على الحايط ضربني بي حيل عطت متألمة

ردت اتحرك ماخلاني اتقدم عصرني حيل بينه وبين الحايط يحچي

باتر: رغم انتقامچ بس انتي تحبيني مو اي تحبيني يلا اعترفي

رميم: احب الموت ومااحبك امقتك

باتر: انا الكتلت اهلچ وانتي رغم هذا تحبيني

دفعته حيل مايندفع جرني عليه يريد يحضني تخبلت صرت ادفع بي واتلاوه ويا واعيط

باتر: اششش ماريد اسمعلج نفس

رميم: حقير مجرم قاتل

صار يجذبني اله اكثر روحي طلعت وانا اقاومة قوتي لا شي مقابل قوته دارني وحضني من ورا سد حلگي

كلها لحظات ماحسيت غير الباب اتفلش علينا يندگ حيل وصوت يمان يصيح

يمان: باااتررر افتح البااااب احسن الك

وسعت عيوني بصدمه وكلي صرت ارجف بخوف يمان شجابه دفعني حيل وحچه

باتر: حلو حبيبتي وأخوي متفقين عليه كلش حلو هسه كتملت اللعبة

حجاها وفتح الباب دخل يمان بسرعة خنگ باتر من ياخته يحچي

يمان: وين رميم احچييي وينهاااا شسويتلها

اشرله بكل برود بمعني وراك احتاريت شسوي بقيت الملم بنفسي عافه واجاني بسرعة

يمان: شسوويينن هنااا رميم شسوويينن

حچيت بدموع اشهگ

رميم: خلي نطلع منا فدوه يمان اخذني منا طلعني

اتقدم عليه يصيح

يمان: شسوالججج ليش هيج سويتي رميم ليششش

مسحت دموعي وزدت بالبچي رجع على باتر خنگه يحچي بأعصاب

يمان: شسويتلها باتر لو ماس شعرايه منها ماتلوم الا روحك

باتر: اسألها هي تحچيلك

دفع يمان وراد يطلع رجع سحبه عليه يحچي

يمان: حسابي وياك بعدين بسيطة

باتر: كلكم اشتركتوا بهاي اللعبة عليه اتحملوا الراح يصير من اليوم

يمان: حاول تتنفس الا ادفنك وانت عايش

حجاها واتقدم عليه سحب ايدي حيل وطلعنا من البيت يمان صاير نار ويمشي سريع يجر بيه جر اول ماصعدنا السيارة

صار يصيح عليه بعصبية راد ينجلط احسه يغلي يغلي بس انا هادئه مانطيت اي ردة فعل شغل السيارة وصاح بيه

يمان: احجججييييي شصار

تنهدت وصرت احجيله من اول ما حجيت ويا باتر الهذا اليوم الحدما وصلنا يم بيتنا هو بس يستمع الي ساكت ويدخن وكف السيارة يمسح على وجها يحچي

يمان: شلون هيج تسوين رميم

رميم: سويت السويته وما متندمة ولو رجع بيه الزمن هم ارجع اعيدها

يمان: شلون اگدر احميچ منه هسه

رميم: لا تخاف يحبني مايگدر يأذيني

صاح بيه

يمان: مصييبة ولج مصيبة ان باتر يحبچ مو حل

ضرب ايده حيل بعصبية تنهد وحچه بهدوء

يمان: انتي ماتعرفين شنو معنى ان باتر يحبچ صرتي خط من خطوطة الحمر الغير قابلة للنقاش حتى انا ماتجرأ اتقرب منها

رميم: انا دخلت روحي بهاي اللعبة وانا اعرف شلون اطلع منها

يمان: خيال ماتدري مو

رميم: محد يدري وماريد أحد يدري خيال اذا عرفت تموتني والله

تحسر صفن شويه يفكر هز رأسه وگال

يمان: تمام انا اتصرف انزلي هسه

مسحت وجهي وعدلت شكلي ونزلت

يمان: من يسألنچ كليلهن اتصلت على يمان ورجعني

هزيت راسي بـ ايّ عافني وشخط السيارة حيل منطلق بيها رفعت راسي اباوع للسماء اخذت نفس عميق ماصدگ شلون طلعت وانا رحت برجليه مهيأة نفسي للموت ...

دخلت للبيت صارت بوجهي حكمة اول ما شافتني حچت

حكمة: ها ياهو رجعچ للبيت ماتصلتي بيه

حمحمت وحچيت ببتسامة

رميم: اتصلت على يمان رجعني ماردت اتعبچ حكوم

طلعت خيال من المطبخ مبينه جانت تسوي عشا باوعت لي بأستغراب وحچت

خيال: شبسرعة رجعتي شبيچ كأنچ متبهذلة

رميم: شبيجن تعبت ونعست ورجعت صاعدة اسبح وانام

خيال: رميم وجهج مو طبيعي

رميم: هبط ضغطي مابيه شي انا صاعدة انام

حكمة: قبل لا تطلعين جنتي جنچ ورد

رميم: هسه هم ورد بس ذبلان شويه انام واكعد اصحصح لا تخافن

عفتهن وصعدت فوگ اخذت ملابس ودخلت سبحت وطلعت اتنبهت على تليفوني يدگ شفته هو انطيته رفض وطلعت الخط مالتي كسرته وشمرته وگعدت سديت كل برامجي الممكن يتواصل وياي منهن خليت بس الواتساب اريد اشوفه بلا شيسوي رحت شمرت نفسي على الجرباية بتعب تمددت تغطيت ونمت باجر ورانا تحضيرات مال دورة السنه اهلنا ...

❛❛❛❛

يمان:

نزلتها وحركت السيارة راجع عليه اريد اشوفه شيسوي مستحيل باتر يسكت مستحيل من سابع المستحيلات

وصلت نزلت شفت سيارته بعدها موجودة وباب البيت مفتوح بسرعة دخلت للبيت شفته گاعد على الدرج يدخن رفع راسه الي وگال ببتسامة

باتر: ها نجحت لعبتكم

يمان: على شني ناوي باتر

باتر: على كل الخير

يمان: اذا رميم صارلها شي كل خير ماتشوف ادمرك باتر

كام وگف يحجي

باتر: اووو حلوو حلو يدافع الاخت المدام

يمان: تعوف رميم باتر جاي تفهم

باتر: هاي هي

يمان: يعني شني

باتر: اعوفها

بعد ما گالها ابتسم بستهزاء واتقدم يريد يطلع يمسح على رأسه من ورا

يمان: بهذا هدوئك على شني ناوي

رجع باوعلي منظره ثابت بس داخله صخب عالي صوته واصلني

باتر: افرها فر واخبطها واشرب صافيها مو البتار الينضحك عليه ويسكت

عافني وطلع طلعت ورا اتصلت بدائب بسرعة جاوبني النعاس بصوته

دائب: اكو واحد هسه يتصل شني هـ الازعاج

يمان: وين انت تعوف كلشي وتجيني

دائب: اجلها للصبح ماكدر اطلع هسه

صحت بي

يمان: انا بالمستودع نص ساعة والگاك يمي

سديته ورحت للمستودع ماعرف شسوي مالگيت غير الشاهين گبالي طلعت بي شكو حرگة بداخلي ردته بس ينطلع لو يعترف يغير كلامة ماكو مصر على نفس الحچي

دخل دائب شافني مستلم الشاهين

دائب: اليوم متخبل شبيك

يمان: لگيت باتر وريتني ما لگيته ولا شفت زوله الخايس

دائب: وانت مطلعني علمود هاي

خليت ايدي على راسي افكر گعدت سولفتله كل الصار

دائب: مو بنت هاي جنية عمي سبعه جابت راس البتار

يمان: انا وين احچي وانت وين تفكر باتر مايسكت راح تتأذى

دائب: وكلشي مانگدر نسوي

يمان: والحل

دائب: تگعد وتتفرج باتر ما راح يسكت الا يسوي شي يفجعنا كلنا بي

يمان: مستحيل اخلي يأذيها

دائب: مستحيل تگدر توكف بوجهة احتمال يحبها وما يأذيها بس راح يسوي سوالف صادمة ماينحزر ابن بليس

بقيت صافن على دائب محتار شلون اتعامل ويا الموقف ماكو حل غير نگعد ونتفرج ...

❛❛❛❛
رميم:

كعدت على صوت خيال تحچي

خيال: شبيچ امي فاصلة الفيشه صار ساعة اگعد

فزيت احجي

رميم: شصاير

خيال: راح الوكت گومي دانجهز

عافتني وطلعت حسيت تليفوني يدگ شفته هو فتحت خط هدوء ماكو صوت ثواني وسده

ماهتميت كمت غسلت ونزلت جوه نجهز مسوين ثواب على روح اهلنا كل سنة حكمة توزعه على الفقراء

خلصنا انتبهت على صوت حكمة تصيح بسرعة طلعت من المطبخ اريد اعرف شبيها شفتها واكفه گبال يمان تأشر عليه وتصيح بعصبية

حكمة: هم تريد تطلعني من بيتي گلتلك ماتحرك منا

يمان: يمه جاي تفهمين عليه المكان خطر عليكم لازم ننتقل الغير بيت محد يعرفة بس افتهميني

حكمة: لاله لا كلشي مابينا گاعدين وساكتين ماتحرك منا

اتقربت خيال منهم تحچي

خيال: يمان شنو السالفة ليش لازم ننتقل

باوع عليه تنهد وحچه

يمان: الموضوع خطر ننتقل الغير بيت على ما تخلص القضية ليش ماتسمعن مني

حكمة: ماگعد بمكان من فلوسكم الحرام انام واصلي واصومن بي تالي عمررييي

يمان: يمه الوضع مؤقت

بقوا يحچون وياها هو وخيال وهي ابد رافضة اتقدمت يمهم ماحسيت غير الباب انفتح ودخلت سيارة يدگ هورنات ورا بعض خبص الدنيا گلبي راد يوگف وانا اشوفها سيارة باتر الكل دخل بحالة صدمة متفاجأين من دخوله وبهاي الطريقة

وگف السيارة ونزل منها يحچي بصوت عالي بضحكة

باتر: رحمة الله والديكم استريحوا استريحوا ماكو داعي للاستقبال

راح له يمان يصيح بعصبية

يمان: انت شجابك هنااااا وانا شمحذر

باتر: شمحذر الؤلؤة الثمينة الجنت ضامها نكشفت البارحة

حجاها وباوع لي ببتسامة گلبي صرت اسمع دگاته بأذني حسيت الارض افترت بيه من الخوف باوعت الخيال عاگدة حواجبها وتباوع عليه بأستغراب

يمان: اطلع برا

بعد يمان من طريقة اتقرب بتجاهي ماعرفت شسوي بقيت متبسمرة بمكاني واباوع عليه وهو يتقرب مني ونظرات الشر بعيونه ....

   يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

البتار على شنو ناوي حسب توقعاتكم؟ 🌚💔

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

Insta: zainab__.ali1

Tiktok: zeinab_.ali1

متابعة ممتعة🦋