رواية تاروت الفصل السابع والعشرون 27 - بقلم زيـنـب علـي 🦢

#تاروت

البارت «28»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1

Insta: zainab__.ali1

حالف اسوي وياك وحدة بوحدة
حالف أوصلك مرحلة
المطلوب دم تحسده

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

رميم:

اتقرب مني ونظرات الشر بعيونه راسم على ملامحه ابتسامة ساخرة وگف مقابيلي رفعت حاجبي متحديته وخيال جرتني من ايدي الها وهي تحچي

خيال: شكو رميم شكو ؟!

رفعت اكتافي احچي
رميم: ماعرف

سحبه يمان يصيح

يمان: باتر اطلع برا يلا يلا من غير نقاش

باتر: ما ميت عليكم جاي اشوف امي

حچاها يباوع لي ببتسامة ورجع صاح

باتر: وينچ يمااا

اجته حكمة تحچي

حكمة: وغمااا حتى غماا ولك شلايتي شسوي جايني البيتي

ضحك سحبها يحضن ويبوس برأسها يباوع عليه ويحچي

باتر: ماگدر اعيش بدونچ اجيت اشوفچ حكمتي

ندستني خيال تهمس بحدة
خيال: شكو واگفين امشييي ندخل جوه

دفعتني بخفة گدامها دخلتني للبيت تحچي

خيال: ممكن تفسرين الموقف الصار مال قبل شويه

رميم: شدراني مو چنت واگفة وياكم

خيال: ليش يباوعلچ بهاي النظرات

رميم: اذا انتي تعرفين انا اعرف

مدت راسها تباوع من الباب وتحچي

خيال: وانا منين اعرف بس يمكن على باله انتي هي انا

رميم: احتمال هيج

حچيت الجملة وما حسيته الا اقتحم البيت ودخل علينا يمان يصيح ورى روحه فرفحت وباتر كلشي ميسوي بس يضحك

حكمة: راح تنط دنطينا درب نشوف اخوك شبي

باتر: شوفي حكومتي تقبلينها يوگف ويا الاعداء ويساندهم

ضربته حيل تحچي

حكمة: اعداء تشيلك وتخلصني من شرك گوم اطلع من بيتي لا بارك الله بيك

گعد على التخم يحچي

باتر: مقبولة منچ يمه

يمان: باتر لا تعبني يلا برا انهض

يحچيها ببرود ويأشر له حتى يگوم باوع لي وگال

باتر: لا على بالك تخلص مني بعد يوميا تشوفني مسير عليك نلعب شويه

خيال: شكد صلف أنت

مجاولها بس ضحك باوع لي وگال بنبرة ترجي

باتر: عطشان ممكن تسقيني خزرته خيال وحكمة گالت

حكمة: تشرب طحيل گوم اطلع من بيتي

باتر: جاي اشوفچ حبيبتي ما اشتاقيتيلي

حكمة: لا حول ولا قوة الا بالله اللهم ثبت علينا العقل والدين

باتر: هذا كله لان طلبت مي من الحلوة

صاحت بي خيال

خيال: احترم نفسك عاد

تجاهلها نفس الحالة يضحك سحبه يمان يدفع بي ويحچي

يمان: دطلع برااااا

باتر: حتى اذا تطردني مااجوز حالف اشفكم ليالي سودة مصخمة

طلعه من البيت گوه يمان صار نار وهو بس يضحك وحكمة تصيح عليهم

هزت ايدها خيال وگالت بقهر
خيال: هي هاي تاليتنا كتال اهلي گبالي وانا صافنه ماگدر اسوي شي

سديت على ايدي حيل وصعدت للغرفة اخذت تليفوني دخلت على الواتساب واتصلت عليه فتح خط يحچي

باتر: اووو ريماي اشتاقتلي روح گلبي

رميم: عود شتقصد من اجيت لهنا تخوفني تحلم تهزلي شعراية

باتر: يعني ماتخافين مني

رميم: ولا من اكبر واحد اخاف من ربي وبس والا انت شيطلع بيدك اكبر شي تسوي تقتلني وانا روحي متنازله عنها اهم شي شفتك بهاي الحالة واجيت بس حتى تشوفني

باتر: تستخدمين نقطة ضعفي ضدي

رميم: الانسان ما لازم يصرح بنقاط ضعفه لان ينلزم منهن وينلوي ذراعه بيهن

اخذت نفس اهدأ بنفسي ورجعت حچيت

رميم: ابقى بهاي الحالة اتعذب موت حقيقتك الثابتة طلعت مجرد وهم زائف وحلم وردي لا اكثر

باتر: غلطة الشاطر بألف

رميم: وانت غلطتك وياي بمليون

باتر: ماتخافين على اختچ !

من گال اختچ انصعقت كمت وگفت احچي بصوت يرجف

رميم: شنو تقصد

باتر: ههه الانسان ما لازم يصرح بنقاط ضعفة وانا اعرف نقطة ضعفچ تلعبين وياي رميم بسيطة لو ما لعبتكم على اصابيعي واحد واحد سهلة و اسهل منها ماكو

رميم: اعلى ما بخيلك اركبه امثالك ما يخوفوني واختي تعرف شلون تحمي نفسها

صار يضحك بصوت عالي غلقت الجاهز وشمرته ماگدر اسيطر على رجفة جسمي والرعب صار يحاوطني

من بعدها ثاني يوم رحنا للزيارة وزرنا اهلنا ورجعنا مرت الايام عادية هدوء نسبي بعد ماتصل ولا دز شي ويمان يلح على حكمة حتى ننتقل الغير بيت وهي قافلة انشلع گلبه يلا گدر يقنعها

وانتقلنا البيت هم مزرعة بس كلش بعيد وجان اوسع من البيت حكمة طابق واحد اربع غرف واستقبال

جنت انظف واعزل بالغرفة الي استقريت بيها سمعت صوت خيال طالع تحچي بحده بسرعة طلعت من الغرفة شفتها تحجي ويا يمان وتگله

خيال: انلزموا بس الضاحيا نجيب وين يمان تضحك عليه

يمان: انتي تردين تشتغلين على القضية صح لو لا

خيال: طبعًا بس خليها ببالك هاي ثاني مره أأمن بيك وانت ثاني مره تخذلني

حجتها بعبرة ومسحت دموعها رادت تدخل للغرفة ركض وراها سحبها عليه وحضنها يحجي

يمان: غير تفهمين مني وتخليني اشرحلج الموضوع

دفعته تحچي بعصبية

خيال: وخر لا تلمسني وخر يمان انا حالفة ماصدگ بيك

يمان: هسه انا چذاب خليني اثبتلچ

خيال: يلا اثبت يلا

يمان: فد شوي نطلع وتشوفين بعينچ

كتفت اديها تحچي بتحذير

خيال: والچذاب

اتقرب منها يحچي بذوبان
يمان: ينطونه حلگ

ويا كلمته طلعت حكمة تحچي

حكمة: خايبين الله أحد عفيه حلوگ الماتمل منها طول الليل حاصر البت تمطگ بيها

ماتحملت ضحكت بصوت عالي اباوع الخيال وجها صار احمر وتضرب بـ يمان بقبضة ايديها على زنده مسح على وجهة وگال

يمان: تراقبينا حكمة

حكمة: صايرين فلم مصري ليش ما نعاين سينما ببلاش

عافتهم خيال ودخلت للغرفة صاح وراها

يمان: بدلي ولحگيني للسيارة

دخلت وراها للغرفة شفتها تطلع بملابسها بعصبية وتحچي

خيال: اشتغل على القضية وحدي ولا منية فلان وعلان

رميم: حرام عليج والله يمان اشوفه متندم وجاي يحاول يحل القضية وياج

خيال: حرمت عليه عيشته كولي امين

حجتها ولبست القميص جان طويل يغطي الورك بعدها ملابسه البنطرون فتح الباب ودخل من دون لا احم ولا دستور اباوع عليه راد يحچي من شافها هيج صفن وهي لزمت راسها تحچي بعصبية

خيال: يعنيييي ومن احچي اطلع مو خوش انسانة اكووو واحد يدخل الغرفة بنات بهاي الطريقة

مسح على وجهه يحجي گوه
يمان: هاا مادري آسف آسف

يحجي وياوعلها بتركيز عيونه ما نشالت منها جان شمرت عليه الجنطة تصيح بعصبية

خيال: بعده واگف ياربييي اييييي دطللععععع

يمان: خبال ايّ والله شبيج تسودنتي

ماتحملت فقدت من الضحك گعدت وصرت اعيط هو طلع من الغرفة مسطور يردم رجعت عليه ترزل بيه گوه سكتت كل شويه اتذكر وارجع اضحك ، كملت لبسها بعصبيه وطلعت ورى

بقينا بس انا وحكمة بالبيت كملت تعزيل وسوينا عشا هستوني گعدنا نريد ناكل وشفت المسجات صارت تجيني على الواتساب واحد ورا الثاني حتى حكمة انتبهت وگالت

حكمة: شنهي شماله تليفونچ انرعص

رميم: اكيد وحده من زميلاتي

حجيتها وفتحت تليفوني شفت مسجات من عنده سكرينات حچي من طيف دازتله اصغر تفصيلة عليه وعلى خيال حاجيتله قصة حياتنا كلها ماهتميت رجع كتب لي

باتر: " حذروني ياما گالوا عندك اكثر من وجه ، وجه يضحك وجه يبچي وجه يولد من وجه "

كتب له

رميم: "اسم الله عليك ابو وجه الثابت اليسمعك ولا يگول عليك متلون مثل الحرباء"

باتر: " تدرين شني اكثر شي كسرني بسوايتچ"

رميم: شنو ؟

باتر: "جنت شايفچ شي كلش چبير بعيوني بحيث چذبت الكل وصدگت بيچ حتى احساسي بيچ تجاهلته"

رميم: "هو هذا المطلوب بتاري"

باتر: " من عيوني حطامي اتفرجي وشوفي بتارچ شني راح يسوي"

ماجاوبته غلقت تليفون وشمرته بصفي افكر بالي ممكن يسوي مستحيل يگدر يوصل خيال ويمان وياها طمأنه من هاي الناحية

خلصنا ومر الوقت عادي يمان وخيال كلش تأخروا اتصلت عليهم حكمة گلولها عدهم شغل يتأخرون دخلت الغرفتي حتى انام اول ما غفيت سمعت نقالي يدگ سحبته وفتحت خط اجاني صوته التعبان يجر بالكلمة من يحچي مبين مو بوعيه

باتر: روح گلبي

رميم: بقيت ساكتة وهادئة مانطيت اي ردة فعل

باتر: ليش هيج سويتي بيه اريد انام سمعيني صوتچ ماكدر انام بدونه عايفتني كل هاي الايام بدونه ليش

غمضت عيوني مبتسمه احس نفسي مرتاحة وانا اشوفه وصل الهالحالة يتعذب عليه بقى يحچي ويتوسل بيه بس حتى يسمع صوتي مانطيته اهمية غمضت عيوني ونمت ...

❛❛❛❛

خيال:

طلعت ويا يمان حتى نتابع قضية نجيب

خيال: وهسه احنا وين رايحين

يمان: نشوف شلون يلزمون نجيب

حجيت مستغربة
خيال: منو راح يلزمه

صف السيارة على صفحة باوع لي وگال

يمان: يلا ننزل هذا الضابط منتظرنا

فتح باب السيارة ونزل نزلت وراه شفت مفرزة صغيرة واگفه 3 شرطة وضابط سلم عليه يمان بحرارة وينعته بأسم فواز وكأنه يعرفه وبينهم تعاون سابق استغربت الوضع كلش

يمان: استاذة خيال المحامية هي لأزمة القضية

فواز: اهلا وسهلا ، يلا نتحرك فورًا

صعدوا بسيارتهم واحنا هم صعدنا باوعتله احچي

خيال: يعني نجيب تعرفون مكانه

يمان: ايّ چا الشرطة المنو جايين

حجاها وحرك السيارة وكفنا يم عمارة قديمة بمنطقة كلش بعيدة نزل للضابط وانا بقيت گاعدة بالسيارة ماعرف شهو يحچي ويا شويه بعدها رجع للسيارة

يمان: دقايق ويلزمون نجيب بس كون مايصير شي

خيال: ان شاء اللّٰه خير

بقينا ننتظر شويه وهم دخلوا للعمارة باوعتله ورجعت حچيت

خيال: نروح ويا للتحقيق شلون يدخلونا ؟

يمان: دبرتها بس خلي ينزلم هسه

ماكو اقل العشر دقايق وطلعوا وياهم نجيب معتقلينه يسحلون بي تحت انظار أهل المنطقة باوع لي وگال

يمان: هسه بدينا خلي نروح وراهم حتى نفهم الوضع الزين ادخل وياهم للتحقيق وانتي انتظريني بالسيارة

خيال: لا انزل وياك

يمان: وين وياايي تدخلين الغرفة التحقيق

خيال: اعتقد انا محامية وهاي الاماكن ماتكون صعبة عليه

يمان: مستحيل

بقيت الح عليه ونتعارك الحد ما سكت

نهيت النقاش بـ
خيال: اتحرك يمان بسرعة

طلعنا وراهم وصلنا للمركز نزل الضابط وتوجه النا ثنينا نزلنا باوع اليمان وگال

فواز: بعدك مصر تدخل ويانا للتحقيق

يمان: فواز انا اتفقت وياك على هذا الأساس اثنينا ندخل الاثباتات عند المدام

باوعلنا بحيرة تنهد واشرلنا ندخل ورا للمركز ويمان مدلي ايده يحچي

يمان: يلا تعاي

لزمت ايده دخلنا للمركز الضابط يمشي گدامنا واحنا ورى دخلنا المكتب جان اكو ضابط ثاني موجود بي مبين هو هذا ضابط التحقيق اول ما دخلنا گام وگف مرحب بينا وبـ فواز

فواز: سامي الجماعة الگلتلك عليهم ماوصيك بعد

باوعلنا وگال

سامي: ياهلا وسهلا بعيوني بس يدخلون للتحقيق يستمعون ما يدخلون بشغلنا

يمان: هو هذا المطلوب

أشار بالموافقة وحچه
سامي: يلا خل نشوف نجيب منو وشعنده

دخلنا الغرفة التحقيق لازمة بيد يمان حيل شفت نجيب گاعد اول ما دخلنا گام يحچي

نجيب: سيدي انا ليش هنا

سامي: ضيف شرف نسألك كم شغلة وتطلع

نجيب: كل شي ما مسوي تم القاء القبض عليه وانا گاعد ببيتي

ماحسيت الا الضابط انطاه لكمة يمكن فلش وجه ضميت راسي ورى يمان همس بحدة

يمان: مو گلنا ابقي بالسيارة شكو نزلتي

اتقرب من عدنا فواز يحچي

فواز: خلي نگعد على صفحة الشباب يعرفون شغلهم

كعدنا على صفحة وانا صرت اطلع اوراق القضية

فزيت على صوت الضابط يصيح بي

سامي: اسمك عمرك معلوماتك بسسسرعة

جنت مركزة وياهم ويمان والضابط يتناقشون بالتسجيلات والصور بحاسبتي

نجيب: اسمي نجيب عمري 53 سنة عايش وحدي ماعندي احد

سامي: شنو شغلك

نجيب: عندي كشك صغير ابيع بي كتب

سامي: ها قصدك كتب مخدرة

انتفض يحجي بعصبية

نجيب: شنو هذا الاتهام سيدي مامقبول

ماحسيته الا انطاه دفرة قوية كلش لزمت يمان حيل خايفة گام فواز يمهم يحچي

فواز: مايفيدك النكران كل الادلة مثبتة عليك وموجودة بس انت هنا مو الاجل قضية المخدرات لا راح يتحقق وياك بقضية مغايرة تمامًا

سامي: صدك شنو القضية الثانية

فواز: قتل عائلة وهو طرف بيها

اتقدموا ثنينهم يطلعون على اوراق القضية ويشوفون الصور والفيديو

سامي: بس هاي القضية مسدوده ومابيها امر استئناف شلون ارجع احقق بيها مايصير

فواز: كلشي يصير

سامي: لا تعذرني ماگدر

اتقرب منهم يمان يحچي

يمان: بس نطلع منه جم معلومة وهاي هي

سامي: مستحيل

يمان: دبرها بمعرفتك

حجاها بعصبية گوه متحمل اشرله الضابط فواز يعني اهدأ واخذ ضابط التحقيق وطلعوا يم الباب يحچون اباوع على يمان اتقرب يم نجيب يحچي

يمان: ايّ نجيب عبالك مانصيدك يعني

نجيب: وانت منو شتردون مني

يمان: هاي سوالف الفطارية والثوالة عوفهن مايلوگن عليك وخلينا نتفق حتى اساعدك وتساعدني

اباوع النجيب صار يبلعم وكأنه يعرف يمان بس مغشم نفسه بقى ساكت

يمان: تعرف بنضال مختفي مو ؟

فتح عيونه حيل متفاجئ وگال بصدمة
نجيب: انت تعرف مكان نضال وين وليش مختفي

ضحك وجاوبه ببرود
يمان: قصدك انا الخليته يختفي وگعدته يمي

جره من ياخته ورجع يحچي بحدة
يمان: اسمع لك نضال عندي واعترف على كل الي سويتوا وشلون نفذتوا الجريمة بالاحسن الك تحجي

نجيب: شني احچي انا كلشي ماعرف عن الموضوع انت شجاي تحچي

اشر عليه وگال
يمان: انت بس احچي الحقيقة وانا اوعدك وعد راح اخليها تساعدك وتطلع منها مثل الشعرة من العجين

اباوع عليه مسح على وجهة يحچي بنظرات شاردة مرتبك

نجيب: انا بكلشي مادري غير بيوم الجريمة التحجي عنها نضال والشاهين وحسام واخوك باتر هم خططوا الكلشي

ابتسم يمان ونصه عليه يحچي
يمان: أنت متأكد ما تعرفني

نجيب: ولا بعمري شايفك

يمان: منين عرفت باتر اخوي وشلون عرفت انا احجي على هاي الجريمة بالتحديد

باوع على يمان مصدم خلا ايده على راسه وگال

نجيب: مادري توقعت وبعدين انا شكو هنا واخوك المجرم حر طليق

هنا يمان كلش اتعصب وسحبه من ياخته يصيح عليه

يمان: كلبببب عبالك بهاي سوالفك تضحك عليه لاعب لي دور الفقير

دخلوا الضباط ثنينهم على صوت يمان يردون بعدوا منه ماكو ويمان كلش انفعل يصيح ويغلط واني گمت ارجف منا المكان مخيف ومنا يمان صار يرعد واعترف هاي اول مره اخاف منه لان حرفيًا تحول يردون يوخرونه من نجيب وهو لازمه ودگ دفر دفعة فواز يحچي

فواز: شبيك متگلي خربت كل الشغل

يمان: الچلب يغشم روحه

گعده على صفحة وانا اجيت گعدت يمه احچي

خيال: يمان اهدأ وخلي نطلع منا هم يشوفون شغلهم ويا

فواز: وللاسف سامي ماقتنع يحقق ويا بخصوص الجريمة الا القضية يصير بيها استئناف من جديد

يمان: وعلى مايجي الاستئناف نجيب الف باب يلگه حتى يطلع

فواز: هو هذا القانون

خيال: مو مشكلة باچر انا اقدم الطلب ونشوف شيصير

طلعنا ويا الضابط فواز گعدنا بمكتب وهو بقى يگلب بأوراق القضية باوع لي وحچه بأعجاب

فواز: شگد شاطرة انتِ حتى جمعتي كل هاي المعلومات أهنئ جهودچ غيرچ ماتسويها

خيال: شكرًا

انظاري على يمان باوع له بطرف عينه وبسرعة گام وحچه

يمان: احنا لازم نروح تأخرنا

باوع لي وگال

يمان: يلا حياتي تأخرنا على البيت

گلبت عيوني وتنهدت منزعجة وكمت ويا قبل لا نطلع صاح ورانا فواز يحچي

فواز: ست خيال هذا رقمي الشخصي مرات تصير عدنا قضيا وامور محتاجين محامية شاطرة وذكية كلش مثل حضرتچ

لزم ايدي يمان وباوع له بنظرات يضربه بيهن أحسه هلگد ما تشنج

يمان: مايحتاج رقمك عندي اذا تحتاج شي خبرني

خزرته وهو مانطاني مجال اكمل جرني وطلعنا من المركز وخرت ايدي منه وحچيت

خيال: انت شلون هيج تسوي وبأي يحق تحچي بمكاني

يمان: صوتچ منا الشارع اصعدي

صعدت بالسيارة وهو هم صعد جان باوع لي وصاح بوجهي بعصبية

يمان: شتردييننن اسوووييي گدامي انطاج رقمه لو ما انتي موجودة وخفت عليج تصير مشكلة چا عرفت شتصرف ويا

خيال: ما لك حق تدخل بيه افتهمتتتتتت

يمان: خلي نرجع للبيت موهسه كلامنا بنص الشارع

ردت افتح الباب وانزل ميفتح قافله منه حچيت بعصبية

خيال: يمان افتح الباب اريد انزل

يمان: شويهههه شويه صبر

خيال: افتح الباب يمان اريد ارجع للبيت

اباوع عليه صار ينكث من العصبية فكه صار يتحرگ هلكد مايضغط عليه استغربت اول مره بحياتي اشوفه واصل الهاي المرحلة من العصبية اندار عليه خزرني ماحچيت بس درت وهي منه هو بقى يدردم اسمعه يگول

يمان: محامية شاطرة ابن الگـ*** مااصيرلكم چارة تبقون ***** حتى وانتم تحمون البلد

ابوعتله احچي

خيال: لا تفشر گدامي

اخذ كلينكس وصار يمسح بالجامة الي گدامه لان غوشت ويحچي

يمان: انتِ حسابچ بعدين خلي نخلص من هاي السالفة هسه

صحت بي
خيال: ممكن اعرف احنا ليش واگفين هنا هسه

يمان: نجيب راح يطلع

شهگت مصدومة
خيال: شلون عرفت راح يطلع

يمان: نص ساعة اذا ماطلع عاتبيني

بعده يحچي دگ تليفونه باوع له وگال هذا فواز جاوبه وفتح مايك

يمان: ها فواز

فواز: نجيب راح يطلع فجأة سامي انسحب واجه امر ان نجيب يطلع

يمان: والدلائل الي عليه

فواز: جان المفروض ينلزم ويا الخلية بس للأسف بوكت المداهمة هو ماجان وياهم والهذا السبب يكدرون يطلعونه وبكل سهولة

ماستغربت لان هواي تكررت هاي الحالة اكيد ورى احزاب وسلطات اباوع على يمان هز ايده وحچه

يمان: خوش يصير خير بس لا تلومونا من نسوي شي وبعدين تگولون خلوا القانون ياخذ مجراه

فواز: اصبر يوكع مره ثانية قابل وين يروح يصير

يمان: شكرًا الك تعبناك ويانا

قبل لا يحچي سده بوجهة ماحچه وياي بقى يگلب بتليفونه اتصل

يمان: دائب هسه تجيني وتجيب وياك وسام وخلي الولد يشددون على حراسة الشاهين انا راح انتظرك يم مركز ________

وصف له المكان وسد التليفون ماكو دقايق وشفنا نجيب طلع من المركز ضرب ايده حيل يحچي

يمان: هذا شطلعة هسه وانا شلون اتبعة ووين اوديج

خيال: اتبعه يمان بسرعة معليك بيه لا تخلي يضيع

صفت سيارة بباب المركز اخذته وانطلقت بي خلاهم يبتعدون شويه وطلع وراهم نتبعه من بعيد لبعيد اخذ تليفونه ورجع اتصل على اخو ويخلي بالصورة ويا كل تحرك حتى يلحگنا

بقى ورى نجيب الحد ما رجعوا النفس العمارة ذبته السيارة وراحت وهو صعد ماكو ثواني وشفت سيارة دخلت ورانا وصار يأشر له بالايت فتح الباب نزل وحچه

يمان: ابقي هنا

قفلها عليه عافني وراحلهم دائب وويا بعد ثنين ويمان صاروا اربعة صعدوا اقل الربع ساعة ونزلوا شايلين نجيب بسرعة يهرولون صعدوا بالسيارة الثانية وطلعت بي بقيت صافنة هذولي شجاي يسوون

اول ما صعد بالسيارة باوعت له وحچيت

خيال: وين راح تاخذونه

يمان: انتي يجيج الصافي

خيال: هاي حادثة اختطاف يمان مو سهلة

يمان: شتردين اسووييي اعوفه يسرح ويمرح الحد ما يشرد والشرطة وين عنه گدام عينچ دخل مع الادلة وطلع بريئ وماعليه شي

بقيت ساكته لان من صدگ ماكو غير هذا الحل وصلني للبيت وطلع بسرعة مستعجل دخلت لگيت البيت هدوء حكمة نايمة ودخلت للغرفة النايمة بيعا رميم هم شفتها رايحه بسابع نومة ردت اطلع لفتني تليفونها على اذنها استغربت ليش مخليته جوه اذنها اتقربت سحبته اشغلت الشاشة وموجود عليها اتصال مسجل بأسم 03.03 استغربت خليت التليفون على اذني ماكو صوت هدوء حچيت

خيال: الو

ماكو صوت رجعت احچي

خيال: اكو احد على الخط

فزت رميم باوعت عليه مخروعة تحچي

رميم: خيال شكو

خيال: منو هذا على الخط

سحبت تليفونها غلقت الخط تحچي

رميم: سمعتي صوت احد

خيال: لا حچيت ومحد حچه شنو هالاسم الغريب منو هاي

ضحكت تحچي مرتبكة
رميم: ههه هاي صديقتي نشاقة وهيج سميتها وهسه جنت احجي وياها ماعرف شلون نمنا والاتصال مفتوح

باوعتلها بشك
خيال: اممم

رميم: المهم انتم يمتى رجعتوا خلص شغلكم گدرتوا تعرفون شي

خيال: لا بعد السالفة مطولة وكل خيط ما لزمنا بيها

رميم: ميخالف ارتاحي وبعدها ارجعي افتحي القضية من جديد اولهم وتاليهم ينعرفون

غمضت عيوني بتعب وحچيت
خيال: باجر عندچ شغل

رميم: لا ميعاد مسافرة سبوع يلا ترجع وگالت الصيدلية تعزلها على مترجع من السفر

ابلوعلها تحچي مرتبكة ومخبوصة وانا گلبي يلعب من هاي حالتها ماحچيت وياها وقررت اتأكد بنفسي بالوقت المناسب عفتها بعد مابوستها وطلعت سبحت ودخلت للغرفة بقيت انتظر يمان الحدما رجع وسمعت حكمة گعدت تحچي ويا يلا نمت ...

❛❛❛❛

يمان: نزلت خيال بباب البيت وطلعت بسرعة اتصلت على دائب احچي

يمان: دائب لا تاخذ نجيب بالمستودع يم الشاهين مانريد سالفة حسام تتكرر مره ثانية

دائب: هو انا ردت اگلك هيج طالع بي المستودع شرحبيل اتصلت ورتبت الوضع ويا

يمان: وانا لاحگك هناك واتصل بفرات بس بلغه بمكانه خاف كلشي يصير

سديته منه وصلت قبلهم لگيت شرحبيل موجود ينتظرني اول ما نزلت گال

شرحبيل: واخيرًا شرفت احنا مانشوفك بس بوكت الطلايب گلت فرصة استقبلك بيها

سلمت عليه

يمان: خوش فرصة اسمحلنا ناخذ مستودعك جم يوم

شرحبيل: كله تحت امرك ابو الشباب حتى عندي الك خوش زلام يخلونه يقر ويعترف بساعة وحدة

طبطبت على كتفه صفت السيارة ونزل منا دائب والولد يسحلون بنجيب اول ما شافه شرحبيل گال بندهاش

شرحبيل: هذا مو نجيب كشك شجابه الك هذا فقير ماضن يعرف بشي

يمان: كل الحل والربط يمه لا يغرك منظره

دائب: هو الي يورط الشباب ويهخليهم يدمنون هذا فقير

حاجها وسحله دخلوا جوه اتقربت منه احچي

يمان: اي نجيب بالمركز جنت متحامي بالضابط وجماعتك طلعوك هنا وين تروح مني

نجيب: انت شتريد مني انا بكلشي ماعرف شغل نضال ماعرف بي

اشرت الدائب اتقرب عليه يحچي

دائب: شوف اليوم انا محمل طاقة سلبية وروحي طافرة اجيتني هدية من السماء حتى اطلع سلبيتي بيك

علگة وصار يلعب بي مثل جيس الملاكمة اتقربت منه احچي

يمان: راح تموته شمالك فقدت نريده عايش ترى

دائب: عاجبك هذا الوضع راح يصير اربع اشهر اعتراف واحد من الشاهين ما مطلعين

نجيب: انا معليه بالشاهين مااعرفه ولا عندي علاقة قريبة بي

يمان: منين تعرف اسمه

نجيب: عن طريق نضال

يمان: بس بيوم رأس السنة الصارت بيها الجريمة انت جنت موجود وياهم

حچه بتعب
نجيب: راح اگلك العندي من الاخير الجريمة كلها مدبرة بين نضال والشاهين وحسام واخوك دخل طرف وياهم

يمان: يعني اتفقوا يكتلونهم وباتر ماله علاقة

نجيب: حسب ماتذكر هم خلوله خطة حتى يقتلهم ونفذ بيهم لان بيومها جان عدهم اجتماع مغلق حسام ونضال والشاهين وانا بأذني سمعت باتر من طلعوا يردد انا ادخل اكتلهم واطلع

يمان: هو مشكلتة ويا ضرغام اهله شعليهم

نجيب: انا مره سمعت نضال والشاهين يحچون ان صار لازم ضرغام واهله يتصفون لان هم مالهم احد ورادوا يخلصون منهم بسبب ضرغام صار يهدد مصالحهم وصار يدخل بغشل كبير ما يعني ومن بطل منهم قرروا يكتلونه واخوك هو النفذ قتلهم

دفره دائب يصيح عليه

دائب: شنووو مصلحته باتر ليش حتى يكتلهمم

نجيب: انا السمعته هو طلع يصيح انا انفذ بيهم وانا اكتلهم والباقي تلكونه يم الشاهين هو يعرف ادق التفاصيل الصارت

دائب: مو گلتلك صوج البله هذاك الخنيثة

يمان: دخت دائب دخت وين الصدگ وين الچذب تاهت

دائب: كل الصار محد يعرفه غير الشاهين وگول دائب ما گال

يمان: والحل ؟

دائب: انت دور على نضال وعوف الشاهين عليه توصلك اخبارة

اتفقنا انا ادور على نضال ونجيب يبقى يم شرحبيل ودائب يستلم الشاهين وخيال ترجع تفتح القضية ونشوف تاليها وين تصفه مرت الايام واحنا نشتغل على هذا الأساس ...

❛❛❛❛

وتر"

مرت الأيام وانا الوحدة بدأت تموتني تاكل بيه جنت متمدده بنص الچرباية افكر بالفيديوات الشفتهن الابوي من اول ما شفتهن لليوم ماطلعن من بالي هسه يلا ادركت وعرفت دائب شلون جاب كل غراضي وملابسي من بيت حكيم هم نطوهم اله

مليت گد ما تعاركت ويا مايقبل يسمعني حتى

بيومها چانت حرارتي مرتفعة ماگدر اتحرك لميت نفسي وصرت ابچي بس دموعي تنزل اسمع الباب يندگ وصوته وهو يحچي

دائب: اوتار تسمعيني شبيچ بابا فتحي الباب

ماهتميت راح شويه ورجع فتح الباب بالقفل العندة ودخل اتقرب مني صاح بيه

دائب: مو صار شگد اصيح عليچ اذا گاعدة ماجاوبني شبيچ

غمضت عيوني ماجاوبته اتقرب خلا ايده على خدودي عدلني يحچي

دائب: هاي شني حرارتچ وتر مريضة

حچيت بدموع
وتر: راح تموتني مليت منا شوكت ربي يفك اسري منك اختنگت راح اموت

عدلني على الفراش ووخر الغطا مني يحچي بحدة

دائب: وكتها هسه وكتهااا

عافني وطلع مستعجل شويه ورجع بيده طاسة مثبت التليفون بين كتفه واذنه يحچي ماعرف ويا منو

دائب: ايّ حرارتها كلش مرتفعة اي اي بعدها طفلة

بسرعة باوعت له صفن عليه حمحم ورجع گال

دائب: لا مو كلش طفلة كبيرة شويه

بقى يسمع ويهز براسه سد التليفون وشمره تقرب مني بعد الغطا يحچي

دائب: لا تتغطين بابا مو زين

وتر: بردانه عوفني غول

انهد وصار يسويلي كمادات گوه عليه ماقبل ما تركني كل شويه يقيس حرارتي الحدما نزلت وبدأت افگ شويه واصحصح

دائب: شلون تحسين نفسچ

وتر: محتره اريد اغير ملابسي

گام وگال

دائب: انا ابدلچ انتي ماتگدرين

فزيت بسرعة احچي

وتر: اطلع برا

طلعلي ملابس شمرهن يمي يحچي

دائب: اششش ماكو اطلع برا

ردت اكوم بس ماكدر اتحرك جسمي كله يوجعني انتبهت عليه طفه الضوء وكال

دائب: ماراح اشوف شي شوفي ظلمة يلا بنيتي لا تعاندين

حجاها وحسيته لزمني فزيت اصلا مانطاني مجال اسويه شي بسرعة ماعرف شلون حسيته نزعني ملابسي وصار يلبسني الثوب الطلعة الي كلشي ما اشوف ظلمة حيل بس احس برجفة ايده من يلزمني وانفاسة تداعب بشرتي يعني هو كلش قريب مني ويا كل لمسة منه انتفض واريد ابتعد عنه وهو بس يهمس

دائب: لا تخافين خلصنا

طلعت روحي على ماكمل وشغل الضوء اباوع عليه جبينه متعرق گوه يسحب النفس باوعلي وگال

دائب: اي زين لابستهن عدل

هزيت راسي ورجعت تمددت غطاني باس راسي وطلع من الغرفة

ورا شويه سمعت صوته يحجي بالنقال وهم يسوالف بالشغل احتاريت اريد اعرف شغلة شنو وهم اريد اخطط اخذ تليفونه واتصل على ابوي انا حافظة رقمة

من بعدها مر كم يوم الوضع طبيعي بيومين خلاني اطيب هالگد ما شربني علاج كل شويه

غسلت وجهي وطلعت من الحمام شفته گاعد بالصالة شمرت نفسي على التخم احچي بملل وعيني على تليفونه

وتر: جوعانة

دائب: هسه اسويلچ اكل

راد ياخذ تليفونه ويگوم بسرعة خليت رجلي بحضنه رجع عدل گعدته يباوع عليه مستغرب اشرتله بحواجبي يعني دلك ابتسم وصار يدلك برجليه ويدغدغني منهن

دائب: ليش هيج رجليچ ثلج وين حفاياتچ ام الارنوب

وتر: ماريد

تنهد گام جابهن ورجع خلا رجليه بحضنه رفعهن لبسهن الي ويبوس بمفصل رجلي

سحبتها احچي

وتر: جوعانة

حاولت بگد مابيه انسي تليفونه الي على الطاولة ماكو اول ما گام اخذه ويا نفخت بملل اريد اطلع منا اريد اتواصل ويا ابوي اريد اتحرر زهگت وصرت اخطط شلون احصل تليفونه حتى اذا خمس دقايق كلشي ماريد ...

❛❛❛❛

رميم:

مر الأسبوع وانا گاعدة بالبيت على مارجعت ميعاد من سفرتها واتصلت عليه گالت باچر نرجع نداوم

من هذاك اليوم صرت حذرة ورقم باتر حذفته والواتساب مالتي القديم كله لغيته ماخليت اي تواصل بيني وبينه بدلت ونزلت سألت حكمة على خيال كلتلي طلعت من الصبح وحدها عدها شغل

استغربت من طلعت وشفت سيارة يمان موجودة وما طالع وياها ماهتميت اجه الاشتراك مالتي صعدت اول ما وصلت جنت اعرف وتأكدة اشوفه منتظرني بنفس مكانه المعتاد نزلت من السيارة امشي بهدوء ممهتمة الوجودة اتقرب مني يباوع الساعته يحچي ببتسامة

باتر: ريماي متأخرة سبع دقايق بالضبط

رميم: تحسبلي

باتر: اذا الج مااحسب المنو احسب

ردت اتجاوزة استوقفني من گال

باتر: اذا خطت رجلچ الداخل الصيدلية اعتبري اختچ صارت بالبايباي

رميم: چذاب وين لگيتها اختي

اتقربت يتحسس طرف شفته بلسانه طلع تليفونه كلب بي وخلا بيدي كلي صرت ارجف من شفت فيديو الخيال گاعده وكأنها منتظرة احد يجيها

رميم: هاي شنو هاي وين شداسوي احچيييي

باتر: بمكان كلش بعيد اتصلت عليها وكلتلها تشوفني بي وانا اعترفلها على كلشي وهي اجتني طايرة بلا تفكير

بلعت ريگ وحجيت بصوت يرجف

رميم: وشنو تريد بهاي حركتك

باتر: تمشين وياي والا

اتقربت منه اباوع بعيونه لوه رگبته يحچي بحدة

باتر: اختج بعد ماترجع ولا تشوفينها بحياتچ كلها

رميم: حقير شيطان

باتر: شيطان بس ما احول روحي ملاك يلا گدامي ماريد اسمع صوت

باوع بالشارع من الجهتين وسحبني ويا من مرفق ايدي حاولت اقاومه باوعلي رافع حاجبة تنهدت ومشيت ويا فتح باب السيارة وصعدني بدفعة سده حيل وافتر صعد

رميم: وين ماخذني على شنو ناوي انت

حرك السيارة يحچي ببتسامة

باتر: على كل الخير حياتي انتي

مشت السيارة ثنينا ساكتين استغربت من وگفت گبال مستشفى بسرعة باوعتله احچي

رميم: ليش اجينا هنا

باتر: نسوي فحص طبي حتى بعدها نسوي عقد محكمة حبيبي ....

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

اسفة على التاخير مو بيدي والله الصحة كلش مو تمام 💔

شنو رأيكم بالقصة والاحداث

شنو تتوقعون راح يصير بين باتر ورميم
و وتر على شنو ناوية 🌚💔

معثوراتي لا تنسون التصويت+ متابعة الحساب+ تعليق بين الفقرات zainab_ali1

TikTok: zeinab_.ali1

Insta: zainab__.ali1

متابعة ممتعة🦋