رواية تاروت الفصل الخامس وأربعون 45 - بقلم زيـنـب علـي 🦢

#تاروت

البارت «47»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

الظرف كاغد لچن حافظ هواي اسرار
مثل صـــدر المفـــارگ من يضــم خله

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

يمان"

سمعت علي يصيح

علي: يمان واحد من الولد طاح الزم مكانك بس تتحرك تنكتل ابقى بمكانك يماننن هسه هسه اشوف لا نتشتت بس نتشتت ننكتل خابرتهم راح يدزولنا دعم

حسيت الدنيا سودت بوجهي روحي راحت واحد من ولدي طاح وطاح نص حيلي ويا بس اريد اشوف ياهو منهم اباوع كلشي ماشوف والطلق مستمر من الجهتين ماگدر ارفع راسي

صحت بكل صوتي
يمان: علييييييي ولدي وينننن شصار بيهم

حچيتها وردت اگوم زحف يمي ماخلاني جرني حيل مددني بالگاع يحچي بنفس لاهث

علي: ماعرف منو بيهم طاح بس سحبوا الولد وجان يتحرك لا تخاف يمكن شظية والله جان يتحرك

يمان: تجذب عليه والله بيهم شي

زحفت يم الباب صار هدوء شويه لان الجيش طوق المكان والجنود صارت تدخل بس بعدهم محد بيهم ملزوم ، تلاگه وياي باتر گلي يحچي بتعب گوة يجر النفس

باتر: دائب مابي شي سطحية هيج اجت بصفحته راح انقله انا واللولد المهم لاضيع تعبناااا لاتطلع الا وانت مصفي هل چلاب حتى نخلص ودائب تكمل تجي تلكاهه صاغ سليم

يمان: باتر هذا دائب وصية حكمة اريده من الله وثم منك بداعت الخوة دير بالك عليه

ضرب على ايدي حيل وگال
باتر: ما حاجه توصيني على روحي

عافني وطلع يركض واحنا بقينا سادين عليهم الدرب اجت القوة صار القاء قبض عليهم وكالعادة گبل البغداد ومايطلعون منها

وهنا كملنا مهتمين وبقت وحدة لحد مايبدي شغل الثگيل طلعنا برا المقر كبل طلعت تليفوني خابرت باتر اخذت اسم المستشفى وتوجهت الهم گلبي مثل الجمر

اول ما وصلنا سألنا عليهم دلونا على الطوارئ اول ما طبيت شفت باتر متجي روحهه وكله دم احس رجلي ثگلن اريد بس اوصله ماكو كلشي ولا دائب قطعة من روحي هذا هذا اخوي الي ما جابتة امي هذا ابن حكمة هذا تچايتي اشد ظهري بي اكثر من ما اشده بأخوي ابن امي وابوي

وصلت يمه رايح كل حيلي كعدت گباله بالگاع وگلتله

يمان: ابن امي مابي شي احجي باتر لا تصفن بوجهي اخونا كلشي مابي هسه يطلع بحيله ويرجع الامي وبنته مو

باوع عليه بحيرة مسح على وجه بأيده المدماية وگلي
باتر: ماعرف گلولي حالته حرجة وفقد دم هواي نطيته دم

بلع غصته وگال بعبرة
باتر: يمان ختلط دمي بدمه بس وداعت امي حكمة يطلع منها دائب سبع ومتعود لا تخاف هسه تشوفه مثل الاسد يطلع وگول البتار ما گال

تچيت ظهري يمه وكتله بتعب

يمان: اذا انت وصية نرجس هو وصية حكمة وينهد حيلي لو جاس التعب حيلكم قوتي بالحياة انتم انا اذا فقدت واحد بيكم يعني راح حيلي كله لاتخلوني بهيج موقف ويا امي حكمة ونرجس لان ماريد شي ينعاد واحس نفسي مو كد الوصية لو بيدي اضمكم من وجع الدنيا كله وماشوف بيكم واحد متأذي اذيتكم توجع روحي قبلكم

بعدني احچي شفت الدكتور طلع والطوارئ صايرة هوسة شي طالعة وشي طابة فزيت رحت له سبقني علي يحچي ويا الدكتور

علي: طمنا دكتور

- الحمد لله حالته مستقرة ويصحى من البنج الخياط وينقل بغرفته بس راح ياخذون افادته

عافنا وطلع اتقربت من علي احچي
يمان: شني ياخذون افادته غير چنا وياهم

علي: لا تخاف اجراء روتيني ثروة يعرف شغلة يطلعه منها المهم هسه الحمد لله على السلامته

يمان: الف الحمد لله والشكر

بقيت قلق الا من طلعوا وشفته كلشي ما بي بس متأذي من الجرح وهذا الشي طبيعي رجع الماي الوجهنا ورجعت بينا القوة

عفتهم وطلعت اريد اشوف الدكتور واسأل التكاليف لگيت علي دافع كلشي ومضبط الامور ردت ارجع اتذكرت حداد والبضاعة فتحت تليفوني واتطلت عليه گلي نزلت البضاعة وحطها بالمخزن وكلشي تمام والكامرات كلها سليمة وماكو اي غلط

بس سديته منه تليفوني ماسكت امي رميم خيال

جاوبت خيال اجاني صوتها الخايف تسأل
خيال: حبيبي وين انتم شصار وياكم

يمان: خيال روحي بعيد عن امي وخليچ هادئة تمامًا

سكتت شويه بعدها ردفت
خيال: يمان وگعت گلبي شجاي يصير يمكم

جاوبتها وانا ادخل الغرفته
يمان: دائب تصوب وهسه بالمستشفى ولا تخافين طلع ومابي شي هذا هو مثل صل كبالنا عرج ما طكه وگولي الامي شوي ونرجع لان ادري بدائب مايقبل يبقى بالمستشفى

بقيت اطمن بيها شويه وراحت ودائب چان گاعد والولد ملتمين عليه انطوا مسكنات والشرطة اخذت افادته وضعه استقر نوعًا ما ، انتبهت عليه يحچي باوع لي وگال بتعب

دائب: شني صار نقبض على هذول لو تحيونتوا من وگعت وتليتهوا بيه وخربتوا الشغل

باتر :شكد زمال والله مو صوجك صوج الزمال النقذك لو باقي مثل الجلب الاجرب واكع احسن بعدين اي من انا انقذت حياتك عليوي ويمان سلموهم وحاليا هما في طريقهم على بغداد

دائب:  وامي خو محد كلها انا تصوبت ماله داعي تقلقوها مابيه شي .

باتر: لا محد گللها على شنو متعب امي عليك هو انت هسه تكوم مثل الصل وكلشي مابيك

دائب: وانت هي عليوي روح يجب ورقه خروج خو مابقى هنا

علي : شني عليوي خاف اشتغل بيتكم ومادري نوب هي نوب ديلا كايم رايححح

طلع وهو يصيح بالكلام لزمته احچي

يمان: مو زين عليك هسه تطلع وضعك ما مستقر بعده جرحك اخضر وين تطلع هسه اقل شي تبقى يومين تلاثة

گال بضجر
دائب: اي خاف الجنين يتحرك لو ينزل هو شكو هي طلقة بخاصرتي دوخر يمان رحمة الامك روحي بخشمي طلعني منا مابقى

باتر: وين يمعود بلا صار عندك مضاعفات

دائب: طلعوني منا اريد ارجع للبيت

بقينا نحچي ويا ما قبل قفل الا يطلع للبيت طلعنا على مسؤوليتنا

علي جاب الكرسي حتى نطلعه وماقبل كال انا امشي بس واحد بيكم يسندني اجيت  اريد اسنده ما اشوف الا باتر دفعني وصاح

باتر: انا انا اسنده وخروا

حضنه حيل من حضره ايده حطها على جرح ما حسيت الا دائب صاح بكل صوته

دائب :اخ اخ اخخ ولك اخخخخ هسه عاف جسمي كله يلزمني وين متصوب هسه غير متصوببب ولكك شتعلت لشة صمددد بهل ليلة حترك بگاز ونفط على هل خلفة هايييي

باتر: اي غير ماردت غيري يلزمك خفت على شرفك تعال علي الزم رجليه وانا الزم ايديه

علي :اي ومن طابق الاخير هيلا هب ونشمره

عطت بيهم هو متألم وهما كاعدين يحششون عليه
يمان: هييي مال شقه هسسه يلا گدامي للسيارة

اخذنا وطلعنا صعدنا بالسيارة وكعدت يمه لان ما أمن اكعدهم بصفة وباتر سيقاته رعنه وعلي بعد ارعن امري لله خليت باتر يسوق

وهناك وما اشوفلك غير باتر باكبر طسة بالبصرة ذبنا بيها وطب بنصها شاغت روح بدائب گام يصيح

دائب: خ** بيك ابن الـ**** راح بنص الطسة ابن الاثول

باتر: اي ابلط الشارع الك ماتشوف الوضعيةةة

يمان: لا تصير زمال وسوق مثل الاوادم على كيفك

باتر: هاي هي صار صار

ورا شوي هم رجع بنص الطسه بحيث السيارة ارتفعت وهو يسوق سريع يعني انا المابيه شي تأذيت

دائب گام رغم الالم صگع باتر ع ركبته من ورا
دائب :اي اي ابن الاثول بعد بعد شگيت ***** وين الطسة الزينة وطب بيها لو شامرنا من الجسر اشرفلك

علي :ادري نطير خو ما نطير شو صاير كلش رقيق دويب شد على روحك انريد نزوجك هاي اذا طسة هيج بعدين شلون تدبرها

باتر: باع هذا والله اخبارك قديمة ولكككك تزوج ومرتة حامل

صحت بي
يمان : شكد تجفصصص بزرع الله شكد تجفص

دار عليه علي عليه يحچي

علي: تريد تضممم عليه يعني ااامدااااك هسه هو متزوج مخترع الذرة قابل بشروني دبرها لا

باتر : خايب شمالك اثيول المره حبلة ومحتارين شنو نسمي وامي تريد سويله عرس يگول دبرها اذا دويب ما يدبرها هو ياهو يدبرها انا لو انت

علي: يهود شني محرم مابقى عليه شي يا زواج

باتر :شبيك بعد طن ع محرم

گالها ورجع طب بطسة بكل سرعته

دائب :ولكم الله اكبر  شكوني شك يمتى نوصل مو احس روحي راح تطلع من حلكي علي الخايس سد حلكك وباتر ابن **** سوق عدللل ****

علي :شنو نوصل ما ناكل يعني نشوف النا مطعم

بالكوه لازم دائب ما يكوم الهم لان خبلوا  طلعت تليفوني وخابرت امي اطمنها وكتلها جاين اكو اكل جنت فاتح سبيكر صاحت بينا

حكمة :هاهو هاهو جايني بالاربعة العصر يردون اكل اكو نعولة مكطعة تفيدكم يمه

يمان :يمه علي ويانه اله نعال

ما حسيت غير علي راسه بوجهي وسحب التليفون يحچي

علي :هلا بالعالم هلا اكثر مره سترونك بيچ يا دنيا ميت من جوع وانت بعد روحي مايهون عليچ

حكمه: خايب هذا انت الشلايتي لا هاي هي كملت بعد ناقصكم فرات

علي :لا هذا بشه ينام من المغرب حچيه

حكمة: دخوش تعال اسويلكم الاكل الي يحبة كلبكم تعالوا بس اوصلوني ما اطلع حكمة بت نعيم اذا ما علمتكم السنع

بقوا يشاقون ويا امي وهذا يسوق بخبال ودائب صيحة بالسما وصيحة بالارض ...

خيال..

سديت التليفون من يمان اريد انطق من الخوف ماكو طلعت وراي رميم تحجي بخوف

رميم: خيال ليش وضعچ تخربط وطلعتي من عدنا الولد شبيهم

خيال: شگلچ رميم دائب متصوب ويمان گال مابي شي بس لا تگولين الامي

لطمت على وجها تحچي بخوف
رميم: يمه صخام شلون تصوب

اريد اهديها ما سمعت غير صوت شهگة من ورانا اتقربت وتر تحچي

وتر: منو التصوووببب لا تگولن دائب بي شي فدوة خيال احچي منو تصوب

لزمتها احچي على كيفي
خيال: وتوره حكمة منا نصي صوتچ دائب مابي شي اصابة سطحية

حسيت بيها صارت ترجف جوه اديناتي ابتعدت شويه وگالت بصوت طبيعي

وتر: يعني بعده عايش

خيال: اي الحمد لله اصابته سطحية ويمكن هسه يطلع لان سمعت صوته من يمان جان يحچي وياي

تنهدت تحچي
وتر: اشوه على بالي يريد ييتم ابني البعده حتى النور ما شايفه من ورا سوالفة العوج

رميم: بس الي جاي يسوونه مو سوالف عوج جاي يساعدون بالقبض على الناس الي اذتهم واذت هواي ناس خطية دائب شبيچ

وتر: بس بالنهاية جان شغله مو قانوني ماريد اگول يستاهل لان اعرف حكمة شگد متعلقة بي وهي الما تستاهل تنفجع بواحد من ولدها

رادت تصعد رجعت باوعت علينا وگالت
وتر: يمكن هم الحد هسه عايشين وجاي رب العالمين يوفقهم هذا بسبب دعاء حكمة مو الغير سبب

عافتنا وصعدت فوگ واحنا رجعنا يم حكمة ما حسسناها بشي بس هي گلبها علمها بقت تحوس وكل شويه تتصل على يمان الحد ما جاوبها وبقت تتشاقه وياهم وگللها جايين بالطريق يلا ارتاحت شويه صعدت بدلت ملابسي ولبست حجاب ورميم اخذت جهالها فوگ تنومهم تقريب بالربع ساعة واندگ الباب نزلت شفت خالة حكمة فتحته هي شافت ساندين دائب گامت تدگ وتلطم ع وجها

حكمة: يماااااا ابني ولكم يمهه شمعتي ولكممم يبويي  يمههه كلبي حسني يابعد امك گلبي نغزني

يمان  بس يريد يفهمها ماكو بقت تلطم

يمان :اي بس صبري ياعيني موتي روحچ خلي افهمچ يمه دصبري

لزم ايديها بعدته راحت الدائب تشمه شم وتحضنه عجيب امر خالة شگد متعلقة بي مو شلون مجان

حكمة: عزيز روحي يبعد امك الحنين شمعة بيتي گون متأذي يبعد رويحتي

حضن راسها يبوس بي ويحچي
دائب: لا تخافين حبيبتي چا ابنچ زلمة مشورب تأثر بي هاي ماتذكرين طلعت من الاكبر منها

بقى يحچي ويها ويطمن بيها اتقربت سلمت عليهم وتحمدت له على السلامة ابتعد يمان من دائب حتى يدخل جوه وراح له باتر عود يسنده وجيب ايدك يا باتر وخليها سنتر على جرح صاح دائب

دائب: ولك اخ اخ واخ ولك نعلت والدي بهل ليلة دوخر انعل ابوك لابو حتى ابوك ابن سير النعال

ضربته حكمة تصيح
حكمة: غير دير بالك روحه شاغت سودة عليه دخلوا دخلوا

دخلوا يردون يمددونه على القنفة علي يگل الباتر
علي: اكلك باتر انت لزمه من رجليه وانا ايديها ونحطه هيج شمر

باتر: حرامات لو من الجسر مسويها وذابينه ومخلصين منه

وخرهم يمان من عنده وحكمة تحچي عليهم وتصيح عفتهم ورحت للمطبخ اسويلهم اكل دخلت حكمة وراي ووراها يمان اسمعه يگل الخاله

يمان: يمه هذا ابو الوسواس يريد يسبح خبلنا اريد اسبح جايف مدام مراح مفعول للمسكن خلي نسويله شي ماراح يرتاح ادري بي

حكمة: سهلة هسه انا اسبحة هو كاعد بالصالة

كامت خاله جابت طشت ومي حار ومي بارد ومنشفه وشامبو وفعلا كعدت غسلت اله مسحت الدم من جسمه انا جنت بالمطبخ بس اسمعهم يسولفون الحدما صاح عليه يمان حتى اشيل ويا الغراض من الصالة شفت خاله  تنشف بشعرة ومشطته وتبوس براسه وتگله

حكمة: يابعد امك ونضر عينها انت

انتبهت دائب الدمعة محبوسة بعينة رافضة تنزل بس عيونه تلمع بالدموع

نزلت رميم تحمدت له بالسلامة وعلي وباتر ما خلوني اطبخ طلعوا يجيبون اكل كلنا حواليه الا وتر ولا طلعت ومهتمه اصلا وهو يلوب وعينه على الباب كل شويه

ما گدر يتحمل سأل حكمة
دائب: يمه وتر بيها شي

حكمة: لا فوك تدرس بغرفتها

گمنا نجهز السفرة على ما يجي الاكل وخاله حكمة دخلت تصلي صلاة المغرب صعدنا صلينا ونزلنا قبلها هي نتأخر بصلاتها

كل شويه اطلع اطمن على دائب واشوفه يلوب عليها بس يريد يشوفها وما يكدر يحجي اخر شي صاح على رميم

دائب: ام الأكبر بعد اخوچ تعاي شوي

راحتله رميم اسمعها تگله
رميم: ها عيني گول

دائب: سالمة طلبتچ اريد اشوفها سوي اي شي وجيبيها رحمة الروح هذاك الاب الطيب

رميم: هاي مرتك انا اخاف منها هسه تتحول عليه

دائب: عليج بداعت باتر لملطلط بس اشوفها

رميم: لا تحچي على سر سعادتي شجابه ملطلط ثكل كله بي بعدين ماگلتلي اذا جبتها الك شتنطيني

دائب: شتردين انا رگبتي سدادة

طلعت من المطبخ احچي
خيال: يبوويي الله لا يعوزنا الچ انا صاعدة احچي وياها

دائب: لك هلا هلا بالعلم مرت العلم اخوي الچبير تاج رأسي ورأس عشيرتي كلها

ضحكت وبقوا هو ورميم يتناگرون صعدت الوتر فتحت الباب شفتها مخليه الايباد گدامها تباوع على كارتون وتاكل تارسه حلگها شامية بعدني ما حاچية دفعتني رميم وخلت عليها تخصرت

وتر: يمه شكو شبيجن سويتن عليه مداهمة

تخصرت رميم تحچي
رميم: وقز القرط يتراولي اكو چلب برا مجطول طالع من عملية ابو الي بطنچ وانتِ حتى ما كلفتي نفسج تتحمدين له بسلامة

خيال: اي والله انتِ شنو من بشر

گلبت عيونها تحچي
وتر :هسه على هاي خرعتني عبالي عدچن سالفة طلع دائب متصوب هسه يجيب ليلى تضمد جروحه عيني لا تخافن عليه

خيال: دگومي نزلي وياي خطية يريد يشوفچ

وتر: علساس ميت عليه هسه تلگينه رادها من الله يتصوب حتى يجيبها وتگابله وتگعد وراها يكافئها ويسفرها دروحن خيه وسدن الباب وراچن

رميم: حرام عليچ من اول ما طب عيونه تدورچ لو تفرين دنيا محد يحبچ بگد دائب صارلي دهر عايشة وياهم يمتى ما نحچي ويا بنيتي وبنيتي ماطيح من السانه

عوجت حلكها
وتر: عشتو بنيتي ابو التجميل رميم تطلعين منا لا اصيح حكمة واخلي طشاركم ماله والي هسه

حاولنا وياها ما قبلت تتهزهز وهم نخاف من حكمة ماتقبل أحد يحجي ويا وتر طلعنا من غرفتها

رميم: خطية دائب

خيال: عوفيها براحتها ولد حكمة يعرفون شلون يدبرون وضعهم بهاي السوالف حطيهم على يمينچ  واصلا علي وباتر اجو بعد وين تكدر تدخل

بعدها خلصنا كلشي والولد اكلوا وحكمة اخذتلهم الچاي واحنا صعدنا يم وتر الي داخله بغير عالم سمعت باب غرفة انسد گلت اكيد يمان بسرعة طلعت رحت الغرفتي لگيت يمان سابح هستوه وطالع يمشط بشعره

بس شافني اتقرب حضني وخرته مني ودرت وجهي استغرب حركتي گال

يمان :خيالي سويتلچ شي يضوجچ مني ليش بعدتيني عنچ

خيال :لا ما سويت بس جنت ممكن تموت وتأخرت عليه بالرد ساعات انا اتصل ماگلتلي اخوك الي هو مثله مثل ضرغام تصوب وما طمتني عليك وانا هنا مثل الغبية كلشي ماعرف

رجع حضني حيل خلا راسه على كتفي ياخذ نفس حيل تنهد وكلي
يمان: قبل ما اطلع شگلتلج ؟ مو گلت شما ابتعد اخرتي بحضنچ

هزيت راسي بلا كلام خلا انفه على خدي وهمس
يمان: وانا هسه وين ؟!

خيال: بحضني

يمان: يعني عد وعدي لو لا

خيال: انت ماتفهم اكلك خفت نرعبت گلبي راد يوگف ادك عليك ماترد طالع بمهمة ويا مجرمين شنو اسوي مثلا ما تفكر عندك مره انت مو عزابي وبكيفك على حل شعرك تمشي

رفع رأسه الي فوگ يحچي ويگز على اسنانه
يمان: يبوي شلون مره شرسة هاي

كالها وباسني وخرته اريد احچي مايقبل رجع باسني ابتعدت منه احچي

خيال: ترى الموضوع ماينحل هيج

ما سمعني رجع باسني قوي ابتعد يحچي
يمان: احبچ والبخت

ابتسمت رفع رأسه يباوع بعيوني
يمان: نحلت هسه مو

حضنته حيل احچي ببتسامة
خيال: اممم انحلت

ضحك ابتعد مني وگال
يمان: نازل جوه خاف اخوي يحتاج شي خليلي راح تنام بدوني الليلة

يحجيها ويحرك حواجبه بمكر
خيال: وانا رايحة يم خواتي ما محتاجتك

ضحك شبكني من خصري طلعنا من الغرفة انا رحت يم البنات وهو نزل جوه ...

يمان..

نزلت جوه انام بالصالة يم دائب والولد ادري بيهم يخبثون ويا وشقاهم ثگيل وهو ماله خلك لگيت الفراش مفروش وهم ماكو مدري وين تمددت اتصفح بتليفوني ما اسمعلك غير باتر صاح وصوته بالمطبخ اسمعه يگله

باتر: ولكك ايععع ادري اكل بيض بكشوره شبيك زمال فتفتت الكشر بنص البيض كبر لهل جرجوبة

وذاك يصيح يگله
علي: خاب صخونة واذا أكلت بيض بگشوره شماكل ******

تحرك دائب يسوي
دائب: توتوتو ياربي اخذني اي قبل شوي هدأ الألم ونطمرت هذول شنو ربي شهالبلاء ختبارك صعب صعب ربي

يمان: شمالهم هذول تخبلوا كلش

كمت اريد اخليهم ينصون صوتهم ناس نايمة بعدني ماداخل ويشغلولك اغنية بكل حسها چا وينه يلاوينه ، انا الطگ انا الحگ اشهگ موت من اشهگ

دخلت عليهم وشفتهم يطبخون ويركصون بعدني ما حاچي حسيت روحي اندفعت دخلت حكمة هاده عليهم وبيدها شحاطة الفواتح والعوچية بالايد الثانية

حكمة: ولد الچلاب ما تگولون الناسسس نايمة وانت عود صرت ابو امداك وامدا الابوه مالتك اي والله ماتگول هسه فروخييييي يگعدون من ورا الهوسة

يمان: حيل يمه بعد ايدي حيل عدچ اياهم

بقت تركض وراهم بالشحاطة وكل واحد اخذ المقسوم يلا ارتاحوا سكتتهم وباتر يبوس بيها گوه قنعوها بعد ما يسوون هوسة طلعت وهي تحچي

حكمة: دخل اسمعلكم نفس وروح نعيم الا ابيس بيكم ولد الچلاب مايگولون عدنا مريض عدنا فروخ

طلعت باوعت عليهم ولا مهتمين يضحكون جريت الكرسي گعدت احچي

يمان: هسه شتسوالكم بلا

علي: اهووو ولا يگعد العاقل

باتر: ولا يگعد شيخ الشباب الماكو منه

بقوا واحد يرفع واحد يكبس بعدها سوو اكل وگعدوا ياكلون وبقينا نحچي على الشغل مانحس الا صارت ركضة من يم الشباچ وخيال شخص خطف گام باتر بلا ما يحچي شي طلع بطرگ الشورت والفانيله الداخلية

يمان: هذا الخبل هيچ طلع خلي نلحگ بي

علي: انت هم شفت مو

يمان: اي چان الصوت والخيال واضح

راح علي اخذ سلاحة من يم رأسه وطلعنا ورا باتر فتشنا الحديقة تفتش ما خلينا زاوية تعتب علينا حتى طلعنا برا البيت دورنا كلشي ماكو ولا اثر

علي: خاف بزون حيوان شي

يمان: والبزون الخيال مالته هالطوله

علي: اي احتمال چلب

باتر: ما غيرگ الچلب ولك شني مطاية غير مبين خيال بشر

يمان: يعني اذا بشر وينه

باتر: شرد اكيد ما ينرادلها تفكير

رجعنا ندور ما لگينا مريب ابدًا بس الي شفنا مستحيل مو بشر ملينا من الدوارة ودخلنا دايخيين وكل واحد ينطي رأي شكل بس ما لگينا تفسير منطقي

اول ما دخلنا شفنا دائب گاعد گال
دائب: ما تگلولي وين هجيتوا شگد صيحت وراكم ولا واحد عبرني

سولفتله السالفة هم احتار ويانا
يمان: اعتقد ينرادلنا كاميرات البيت هم مو كلش امن انا شلون غفلت عن هاي السالفة

باتر: باچر من الصبح اطلع اشتري كاميرات مراقبة وانصبهن

من القلق ما گدرنا ننام للصبح بس دائب نام من العلاج مايگدر يبقى گاعد ، الصبح بدلنا وطلعنا للمستودع بلا ريوگ قبل لا البيت يگعد وصلنا هناك گلت العلي

يمان: علي اليوم او البارحة نزلت بضاعة بالميناء روح اخذها واخذ حيدر وطلعها من الكمارك وزعها على تجار

علي: هي بيها شي لو طبيعي

يمان: لا لا طبعًا طبيعية قانونية واريدك تخابر معارفك وتشوف سالفه هذا نسور مدري شسمه اليوم عنده بضاعة تعبر لو لا حتى اذا عنده نجهز نفسنا واليوم نخلص منه

علي: شلون نشتغل ودائب ماكو

يمان: ماكدر اوگف واوكف شغل حاليًا لان ورانا ثنين يرادلهم طن شغل خلي اخلص من هذا حتى اكون انجزت ٦٠٪؜من الشي الي اريد اوصل اله

گام وگال
علي: اعتبرة تم

عافنا وطلع شفت باتر عينه بتليفونه ما شالها ابد گلتله يخابر فرات يجينا

اتصل بي خبره يجينا وسده صفن شويه بعدها ردف بتفكير

باتر: زين هذا شغلنا لهنا وخلص يصير كلشي قانوني ونكون طلعنا؟

يمان: اكيد لا احنا بهذا شي نكون ساعدنا بشي مهم انجزنا اليطلع بيدنا من القذارة بس مو معنى نظفنا البصرة تروح شبكة تجي الف شبكة واكيد مو لهنا ومعناها خلص كلشي بعد ورانا هواي والثمن اكيد راح ندفعه غالي وممكن يوصل الخطر الحكمة وبناتها وهذا شي متوقع

بقينا نسوالف بالبيت وطريقة التأمين الحدما انفتح الباب ودخل فرات يصيح

فرات: ترا والله مايصير هيج يعني ساعه بـ 7 الصبح ادري يا ناس يا عالم حتى القاضي ما گاعد حتى الدائرة بعدهم يتريگونن يا محمد الميناء يصفر محد موجود بس انتم والسمچچچ

باتر: شبيك من الصبح چنك وحده تطلك

گعد يحچي
فرات: يعني جايبيني من السبعة الصبح شنو غير هستوني نايم يعني ياهو مات ياهو تخربط شبيكم خاله حكمة بيها شي لو يشتغلون ويشتغلون لو ينسحبون ومحد يشوف شكولتهم الزفرة ولد الچلب

يمان :اكلك هذا الحجي مايفيد خلي ندخل بالمفيد جوازاتنا كلها واگفة المفروض نجدد بس التهينا

فرات: اي التهتوا بالنسوان هذا مگابل بابها جنه عزوبية بيت الكار وهذا كاضيها رياض احمد واهاين وشبع بچي يمي ومواويل لحد ما زفيته يلا جريت نفس وضل فاك حلكه بالزفه ولا عبالك كضاها يركض وراها وهذا رايح ناهب البنية ومايقبل يرجعها عبالك هيه لعابة واخذها

يمان :هسه هذا تذكار لو معيار

فرات:لا معيار وجاي اعايركم بماضيكم خوشش ياريت تزعلون وتعفوني امنيتي تزعلون مني انا ما جاي اشتغل اعدل اكول بلكت يحسون يزعلون ياخذون موقف ماكو كرامة ماكوو

يمان :فروتي من الجامعة لحد لان انت وياي ازعل منك ليش شبيه ولا ازعل

باتر :الكرامة تذل الانسان لو حاجتك عد الچلب كله يا سيدي

فرات: طيب يا سيدي تفضل مخخخرط

باتر : هسه ليش لابس قاط شني عازمينك على عرسس

فرات :مو ادري هسه افتر المحاكم والمراكز احترمت روحي ولبست رسمي

يمان : هاي الجوزات اخذهن وسويهن ويوم الي يحتاج نجي بس نبصم وياخذون صورة ونطلع
وهذا زمال جهاله كلشي ماعدهم طلع الهم جواز وهاي سوالف هم الشهادة المدري شنيه يسوها للعائلة والجوزات تطلع هل يومين مانعرف شوكت ننصك ونطلع فهمت يعني الجوازات شي ضروري

فرات هاي هيه خلصتو يلا نطيني الخـ*ـا خلي اتكسح اسويهن

باتر :اكلك فروتي روتي مو تنسه جهالي

شال علبة مال كلينكس وشمرها عليه وطلع ...

❛❛❛❛

وتر"

للصبح ماگدرت انام احوس بالي يمه حتى من الولد صارتلهم هوسه جنت گاعدة بس ما فهمت شنو صار باوعت للساعة صارت بـ 7  ماكدرت اتحمل البنات نايمات يمي والجهال كاعدين قررت اخذهم وانزل الحكمة حتى اذا گاعد اسوي نفسي عادي ومنزلة الجهال الحكمة لا اكثر

الكريكوتات مالتهم تنحمل مثل الجنطة شلتهم وطلعت نزلت بيهم جوه شفته مخليله سرير نفر بالاستقبال ونايم مخلي ايده على عيونه

دخلت الغرفة حكمة لگيتها كاعدة وكالعادة هي بهذا الوقت ماتگوم تصلي وتقرأ قرآن وبعدها تباوع على التفزيون ورميم دائمًا تخليهم يمها على ما نگعد يلا تكوم ويانا

صبحت عليها وبوستني وگالت
حكمة: فدوة الهالوجه اليوم صبحت بي شعدچ گاعدة

وتر: نزلت الجهال لان گعدوا وامهم نايمة يمي

حكمة: وهسه انتِ عفتي نومتچ الحلوة علمود الجهال شو ساكتين حتى ما يبچون

وتر: لا لا چانوا يبجون هسه سكتوا

ابتسمت تلعب بيهم وتحجي
حكمة: چا دخوش عوفيهم وروحي

طلعت بسرعة من الغرفة شفته بعده نايم على وضعه تأكدت ان هو فعلاً نايم اتقربت يمه بحذر گعدت على طرف السرير بعدت ايده من وجهة بكل هدوء اباوع على ملامحة حتى وهو نايم عاقچ الوجه

مشيت اصابيعي على وجهة احس بي بين النايم والگاعد يمكن اثر المسكنات ما تخلي يگعد ويصحصح انوب من مسحت على وجهة سنح بالزايد حچيت

وتر: اششش مجرد حلم لا تفتح عيونك حتى مايروح

بتسم وبقى مغمض بقيت صافنة بوجها شويه بعدها همست
وتر: تفاصيلك تعبتني متخيل انت البارحة جان ممكن تيتمني انا وابني عاجبك ابنا يتربى مثل ماربيت انا وياك دير بالك على نفسك ابني يحتاجك يمة سند

بست عيونه ورجعت ردفت
وتر: بس ابنك انا اعتبرني متت بالنسبة الك

عقد حاجبه بأنزعاج عفته وگمت صعدت فوگ ركض البنات بعدهن نايمات دخلت بفراشي وسويت نفسي نايمة ماعرف السويته صح غلط بس احس ارتاحيت ..

من بعدها جرت الايام عادية وهو ما طلع للشغل بس الولد دائما مشغولين وحتى كاميرات مراقبة ترسوا الحديقة ترس وهو مايخلونه يتحرك بالبيت كاعد وساكت رغم هو شال الخياطات بس جرحه بعده يأذي

رميم ..

چنت اعزل بالاستقبال حكمة ودائب گاعدين يسولفون كامت حكمة وگالتله

حكمة: شني اذا البنت ما تريدك انا اجبرها وعلي ولا اجبرها واتحمل نتيجة افعالك

دائب: يمه شني معصوم انا غلطت ما كفرت

حكمة: كسرت بگلب طفلة ما عدها غيرك اتوقع منها كل الاحتمالات

عافته وطلعت ردت اطلع وراها استوقفني يحچي
دائب: من رخصتچ عيني ام الاكبر

رميم: گول محتاج شي انا برسم الخدمة

ابتسم بتعب يحچي
دائب: ما تقصرين بس ردت اسألچ وتر اول يوم تصوبت بي الصبح نزلت جوه

رميم: لا وين نزلت حتى احنا نايمين يمها يعني ما حسيت عليها اكيد لو نازله جان حسيت

سكت شويه بعدها گال
دائب: خدمة ثانية

فركت اديناتي احچي
رميم: يالله اجه الخير گول ابو النسب

دائب: اريد اشوفها سوي شي ونزليها مو مثل هذيچ المرة بروح اهلچ

اتقربت منه احچي
رميم: شراح تنطيني

دائب: يعني اذا انتِ ماخذه البتار بزره بعد شتردين انطيچ انا

رميم: امممم ممكن بالمستقبل احتاجك تقدملي خدمة مو الا هسه بس احتاجك بالايام الجاية

دائب: المهم نزليها وانا عد يمناج بس اشري وانا حاظر

رميم: هذا اعتبره اتفاق بينا

دائب: هاي هي

عفته وصعدت فوگ الغرفتها شفتها هستوها طالعة من الحمام الخاولي بعده براسها ركضت عليها لزمتها من ايدها احچي

رميم: وتوره الحلوة تعاي وياي محتاجتچ بشغلة

وتر: شبيچ جفلتيني خلي امشط وانزل وياج

رميم: لا هيج كلش حلو وهم لابسة احمر بيرفكت يلا خلي ننزل

وتر: وين ننزل

نفخت بملل وگلت
رميم: اريدج تشيليلي واحد من الجهال جوه بالاستقبال

باوعتلي صفح وگالت ببرود
وتر: ماانزل دويب جوه بالاستقبال هسه تلگينه كالعادة مظلمة وگاعد

رميم: لا وين غير عنده معاينه بالطبيب اخذوا الولد من الصبح الهسه بعدهم مراجعين

ماقبلت گوه سحلتها سحل ونزلتها جوه وكفت يم باب الاستقبال تحچي

وتر: يلا فوتي

رميم: انتِ فوتي شبيچ خايفة من استقبالنا

نفخت بملل وانا دفعتها اول ما خلت رجلها داخل الاستقبال سديت الباب وقفلته عليهم من برا

رجعت تدگ بي حيل ماهتميت عفتهم وابتعدت

وتر ..

دفعتني رميم وقفلت الباب راسآ عرفت الخطة شنو دكيت الباب مليت منها ماكو جواب سمعت صوته يحچي

دائب: نور الاستقبال بطبتچ

درت عليه شفته گاعد نفس گعدته مال هذيچ الليلة مرخي نفسه على القنفة ومخلي المنفضة على فخذ رجله ويدخن اتقربت صحت بي

وتر: دائب بطل هاي سوالفك وافتح الباب ماكو شي يربطني بيك خليهم يفتحون الباب يلا لا اصرخ واگول الحكمة عتدى عليه

گال ببرود
دائب : همزين متصوب وگاعد وصاير خردة بعدين انتِ تبدينها محرك وعتدى عليه وبعدها تبقين تلطمين وتگولين شلون حبلت

وتر: افتح الباب دائب

رفع اديناته بحرگة استسلام وگال
دائب: جاي تشوفين بيدي مفتاح وافتح الباب انا محبوس حالي من حالچ

وتر :هسه شنو حابسني هنا الها معنى گلتلك مايربطني بيك شي وبس اجيب الطفل نتطلك

شفته طفه جكارته وگام وگف وهو مخلي ايده على الجرح وعلامات الألم واضحة عليه بسرعة صار ببالي نفس المشهد بقيت بمكاني ماتحركت وهو سحبني من ايدي ولواها ورا ظهري بس ما اذاني مجرد قيد حركتي

الاستقبال ظلمة وبس صوت انفاسه المتسارعة بأذني احس دگات گلبي صارت تقرأ الف بالثانية  اجاني صوته يحچي بفحيح

دائب :اوتاري ماريد اتعامل وياج بشخصية ماتعرفينها ولا انتِ گدها حجاية طلگني تحسبين الها الف حساب قبل ما تگوليها

وتر: مو طايقتك صدگني ما بينا شييي اصلا كل الي بينا طفل مهمتي اجيبه الك وخلص

شد على ايدي اكثر وصار بيها ألم عيوني غرغرت بالدموع بس ما بچيت

دائب: وسالفه اجيب طفل وهاي هي لا مستحيل اخلي الي صار بيه ينعاد حتى لو نفس الاسماء بس مستحيل اخليج تذبينه وتعوفينه هذا الطفل يجي وتحبينه وتهتمين بي وتصيرين ام مثالية اله هم افتهمتي ومو هسه تذكرتي مابينه شي بينه هواي اوتار بينه هواي

وتر: شنو الييي بيناااا ممكن تفسرلييي

دائب: بينه ميتم وتسول وطفل واب وبنته الي بينا يا وتر مستحيل ينبتر واذا نبتر تنتهي حياتنا ثنينه وهسه تگليلي كلشي خلص مو انتي ذاتچ الي گلتي الي صار بينا يصير بين اي مره ورجال يحبون بعض ليش هسه كلشي اختلف اوتار انا غلطت بس حطي نفسج بمكاني شي تشوفينه شي وبين يوم وليلة يصير شي ثاني تسرعت بس لو منطتني مجال يوم واحد يومم چان كلشي تصلح وكلشي رجع الوضعة الطبيعي

دفعته حيل حتى ماهتميت الاصابته حچيت بدموع
وتر: بعمري مراح انسى الشعور الي عيشتني بي بعمري مراح اسامحك خليتني احس نفسي وحده اخذتها بفلوسك والصبح تندمت على السويته

دائب: ولچ انا احبچ افتهمي والله مو هيچ قصدي غلطت غلطت انا مو معصوم من الغلط

وتر: اتحمل دائب انا مو لعبة بيدك يوم تريدها يوم لا يوم تروح تسافر وتتونس وتحب وتتمعشگ حتى تنساني ويوم مگابل باب بيتي وگاعد انا مو فار تجارب المشاعرك المريضة روح تعالج خلصنييييي

دائب: اسمعيني

وتر: ماسمع دائب ظهري احسه راح ينفصم من الالم مابيه حيل اصيح اتصل على رميم تفتح الباب والا ابنك راح يكون ضحية هذا جدالك الما منه فايدة

اخذ نفس عميق ومن بعدها زفره صحت
وتر: يلااااااا

سد على ايده حيل بس خاف عليه يمكن مارادني انفعل طلع تليفونه واتصل على رميم اجت فتحتلي الباب خزرتها وعفتهم وصدت فوگ الغرفتي قفلت عليه الغرفة كلي ارجف وابچي

حاولت رميم تحچي وياي ما سمعت منها گوه تماسكت وهدأت نفسي مر اليوم عادي الولد مارجعوا لليل كلش يلا رجع يمان وباتر ماكو اباوع على رميم قلقه وكل شويه تتصل عليه لو تسأل يمان يگللها گال عنده شغل ويرجع وراي

لليل كلش تقريب الساعة 2 يلا رجع جنت بغرفتي وعرفته رجع من صوت رميم طلع شويه واندك الباب عليه گمت فتحته طلعت رميم گالت وهي فاقدة اعصابها وگوه تحچي

رميم: وتر خلي الجهال يمچ خاف اخليهم بغرفتهم ويبچون محد يسمعهم

وتر: جيبيهم اخليهم بعيوني بس وجهج اصفر بيچ شي

رميم: لا ما كو شي بس خليهم يمچ

اخذتهم منها وهي حتى اديناتها يرجفن وراحت شويه قامت القيامة ببيتنا انگلب گلب ...

رميم ..

رجع يمان وهو ماكو مارجع ويا اتصلت عليه سألت يمان گال عنده شغل ما حچيت شي كل من راح الغرفته حتى حكمة وانا هم اخذت جهالي وصعدت للغرفة مالتي

خليتهم على السرير وكعدت يمهم انتظرة عبرت الوحدة وهو بعده ماكو والجهاز مغلق عبرت الثنتين يلا انفتح باب الغرفة ودخل بلا كلام اتقرب باس راسي ونزع القمصلة مالته وشمرها بنص الغرفة يحچي

باتر: هلكان من التعب

يحچي ويجر بالكلام گوة حتى على بالي شارب بس ابد ما بي ريحة كريهة بقيت ساكته تنهد بملل عافني ودخل للحمام شلت القمصلة مالته من الارض ماعرف ليش اجاني فضول ادورها اول شي شميتها مابيها عطر غريب مديت ايدي ادور بجيبوها

ولگيت شي عساني ما لگيته حسيت الدنيا كلها سودت بوجهي مو معقولة الجاي يصير ....

    يتبع ...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

توقعاتكم شنو ممكن رميم لگت عند باتر 🤦🏻‍♀️💔 ؟

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

متابعة ممتعة🦋