رواية تاروت الفصل الثاني عشر 12 - بقلم زيـنـب علـي 🦢

#تاروت

البارت «12»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

لا تَسَل عني ...
لماذا جَنَّتي في النَّار ؟
فالهوى أسرار

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

وكعت المكنسة من ايدي ونصدمت من السمعته اسمع امي تگله

مرام: اسمع حكيم انا اغار من بناتك حتى اذا انت ابوهن

حكيم: مرام صدك تحجين تالي عمري تشكين بيه وتغارين ومنين من بناتي

مرام: والله كلشي اتوقع منك بعد سوالفك السويتها ، وهن صغار وحلوات والشيطان بعده ماميت

سمعت شي تفلش بالغرفة وهو يصيح
حكيم: انتييي تخبلتيي

مرام: نسيت نسوانك وعربدتك

خليت ايدي على حلگي مصدومة هاي شجاي تحجي وصلت بيها تغار على بابا من عدنا سمعت صوته من صاح بيها

حكيم: مرام اطلعي بره

انسحبت بالعجل ودخلت للمخزن وهي طلعت تنكث نار من العصبية

رحت للغرفة شفت عبير متمددة تگلب بتليفونها

عبير: شبيج وجهج اصفر

حجيتلها كل السمعته تحسرت بتعب وگالت

عبير: كلشي توقعي من امي ولو هي هاي هم ام بس شنسوي مجبورين نسكت ونتحمل

وتر: الى متى متگليلي الى متى

عبير: اشش اسكتي لا تسمعنا شخلصنا بعد

مرت الايام واحنا هو هذا وضعنا لو مشاكل امي وابوي لو مشاكل امي ويانا وهو ساكت حتى مايحاول يحجي وياها او يتقرب من عدنا ...

وبيوم جنت طالعة الظهرية من الدوام انتظرت الاشتراك مالتي ماكو مااجه وتأخر الوقت المدرسة كلها طلعت ماطلعت ويا الطالبات بقيت انتظر الحدما صفيت وحدي بالمدرسة اخاف اطلع مشي والبيت بعيد وهم اذا تأخرت مرام تسود عيشتي اليوم

سلمت امري الرب العالمين وطلعت من المدرسة امشي ظهرية والشارع فارغ امشي بهروله واتلفت وراي خايفة وحدي من الربكه والخوف جنت لازمه سجلات بيدي عثرت ووكعت وتطشرن دموعي صارت تنزل وانا الم بيهن احس شي صار گدامي جمدت من الخوف رفعت عيوني حجه

- شسوين هنا وحدج

وتر: هم انت !

نصه عليه يحجي بعصبية

- جايي اگول شسوين بهيج وكت وحدج هناااا

لميت سجلاتي وگمت حجيت وانا امسح بدموعي

وتر: شعليك بيه انت ولي امري وانا ماعرف

خزرني وحسيت عيونه اخترقتني مو خزرة لو ضاربني كف احسن بلعت ريگ خايفة ورجعت بجيت

وتر: اشتراكي مااجه اليوم ماعرف بي وين راح وماعندي رقمه وبقيت وحدي بالمدرسة

باوعلي من جوه الي فوك يمشي نظراته على طولي ابتعدت منه بخطوات بسيطة وردت امشي لزمني بسرعة فزيت احجي

وتر: لا تلزمني لا تلزمني

- شبيج بابا امشي ارجعج للبيت

جان يحجي وياي باريحية اليشوفه يگول يعرفني من قرون صح صار سنين اشوفه دائما بمنطقتنا بس يبقى غريب عليه

وتر: لا لا شكرا الك انا ارجع الوحدي اذا واحد من اهلي شافني وياك شيگولون عليه وبعدين منو انت اصلا حتى اروح وياك شمدريني ماتطلع حرامي وتريد تبوگني

لزمني من ايدي يسحب بيه

- دمشي ولج لو اريد ابوكج ماخايف حتى من ابوج

صرت اعيط بنص الشارع

وتر: انتتت شتريد منيي وخر وخررر

- صوتج منا الشارع ادبسيز

جريت روحي بالگوه منه وركضت بتجاة الشارع العام باوعت وراي شفته متخصر يباوع عليه بحيرة

وصار يمشي وراي واني اركض كل سرعتي الحد ما وصلت للشارع فكرت اصعد نفرات احسن من سيارة الاجرة لان وحدي وتخوف رحت الموقف السيارات ولكيت سيارة جبيرة هستوها تريد تطلع صعدت بيها وحسيته صعد وراي ماكو مكان وناس هوايه انحشگت بينهم انا وجنطتي

حسيت بي وگف وراي وخله اديه حوايله بلا ما يلمسني حتى محد يطخ بيه الواكفين كلهم شباب اكو مريه كاعدة وابنها گدامها ندسته وحجت

- كوم اوكف خلي البنت تگعد بمكانك

گام الولد وهو همس بأذني

- اكعدي بسرعة

گعدت وبقيت حاضنه جنطتي وارجف من الخوف وهذا عيونه عليه يسددلي سهام مو نظرات الحدما وصلت قريب منطقتنا ردت اطلع فلوس باوعت عليه هو انطه ووكف السيارة ماكدرت احجي كمت حتى انزل من الثول عثرت زين ماوكعت سمعت همسته

- ثول

غلست ونزلت ركض ماريده يلحگ بيه وهو هم بعد مامشى وراي بس وصلني للمنطقة وراح دخلت البيتنا لگيتها واگفتلي باب الحوش حجيت بنفس مگطوع

وتر: يمه فدوه خل افهمج الاشتراك مااجاني والله

مرام: الساعة راح تصير بـ 3 ادبسييززز وين جنتي دايحة

حجيتها وجرت الصوندة

وتر: والله ابو الاشتراك مااجه وبقيت انتظر حتى اتصلوا بي وشوفي كلامي صح لو غلط

اتقدمت عليه تحجي

مرام: خلي افوخ گلبي واطفي فورة الانتظار وبعدين اتأكد

گالت هيج ضربتني بالصوندة على رجليه متت تشلوطت

وتر: يمه فدوه والله بعد مااسويها والله ردت اجي مشي بس خفت الوحدي والمدرسة بعيدة

مرام: حتى تتوبين

ضربتني مرتين على ظهري لسوعتني روحي شاغت ودموعي صارت تنزل صاحت بيه

مرام: فوتيي جووه ماريد اشوف خلقتجج اليوومم ادبسيز

شفت عبير لازمة صفحتها وواكفه بالباب تجاوزتها دخلت ركض للغرفة مر اليوم بطولة ولليل وانا ماطالعة من الغرفة الحدما سمعت صوتها تصيح عليه

مرام: وتر

كمت رحتلها اول ماطلعت حجت

مرام: سوي چاي بيت عمج ارفد يمنا

من غير ما احجي شي دخلت للمطبخ سويت الچاي واخذته قدمته الهم سلمت عليهم وگعدت باوعتلي مرة عمي وحجت

رغد: وتوره كل يوم تحلين اكثر

ابتسمت سرعان ما نطفت ابتسامتي من حجت امي

مرام: حليانه من الدياحه اليوم الساعه 3 العصر يلا رجعت من المدرسة

حكيم: مراممم

ارفد: شنو هذا الكلام ام عبير كلنا نعرف باخلاق وتر العاقلة

رغد: مرام قبل شويه بالمطبخ كلتي متأخر عليه الاشاراك مالتها

مرام: والله مادري انا بعد ماكدر اتحمل مسؤليتهن اكثر من هيج

بقوا يحجون عليها جان يفز ابن عمي الغثة وكال

سنان: اذا ماتردونها انطونياها انا اخذه ههههه

اباوع العموا خزره والباقين غلسوا عليه هو كالعادة بقى يباوعلي بنظراته القذره من جوة الجوة اتذكرت هذاك الغثة شكد يعترض طريقي بس ابد ماباوعلي مثل هالنظرات ولا يسوي حركات وسخه مثل هذا عود ابن عمي عشتو

كمت وطلعت من الاستقبال بعدني ماداخله للمطبخ حسيت نفسي نجريت من اذني حيل بحقد

مرام: مرة ثانية تلبسين حجاب ولبس مستور من يجينا احد مو مرتبة روحج على اخر حباية شعدنا عرس

وتر: اخخ اخخ يمه ايي والله بعد ماسويها

امشي الغرفتج ماريد اشوفج گدامي مو عبالج نسيت سوايتج

عفتها ورحت للغرفة شفت عبير جان النقال على اذنها بس دخلت ارتبكت ونزلته بالعجل استغربت حالتها طلعت كتبي گعدت يمها اقرأ انتبهت عليها كلتلي

عبير: انطيني واحد من كتبج

بلا اهتمام شمرت عليها كتاب شفتها تاخذله صور وتخلي ايدها عليه وتكتب وهي مبتسمه بفرح ماخليت الموضوع ببالي فرحت لبتسامتها

بقيت اقراء ومن الصبح مماكله شي احس نفسي دخت من الجوع وماكدر اطلع امي ماتقبل غفيت وانا بمكاني الحدما نامت يلا عبير گعدتني طلعت اكلت ورجعت للغرفة

افكر هي ليش هيج تعاملنا ولا جنا بناتيها حتى عبير المريضه ماتهتملها هواي بس ماتغط عليها مثلي وابوي ملتهي بالشغل

وبيوم جنت نايمه وفزيت على صوت ضحكت عبير هاي اول مره اسمعها هيج تضحك دائما ماافز مخترعة على صوت انتها من الألم اسمعها تحجي

عبير: لا لا بالمدرسة وين اگدر اشوفك كرايبي كلهم موجودين

استغربت عبير منيلها مدرسة من يوم ما حالتها بدت تدهور وصحتها بالنازل كعدت من الدوام

من بعدها تكررت هالحالة مع الايام وصارت عبير تحجيلي على ان اكو شخص وهو يريد يتقدملها حجيت بحيرة

وتر: ووضعج

عبير: ديري بالج تحجين بهذا الموضوع مايعرف بيه انا مريضة

وتر: بس هذا الشي غلط المفروض من هسه تحجيله حتى يكون عنده علم بكلشي

عبير: منا البعد سنه اكون انا مسويه العمليه وتعافيه وهو هم يكون متخرج هاي اخر سنه اله

وتر: زين هو وين شايفج

ارتبكت من وجهتلها السؤال وحجت بتردد

عبير: هاا ايي شايفني بالصورة يعني دزيتله صورتي وانا لابسه حجاب ومستوره هو حتى امه خلاني احجي وياها

مارتاحيت للوضع وحتى ماقبلت عليها تدز صورتها من بعدها صاحتني امي وكالعادة نظفي ومسحي ماعدنا غير هاي الشغلة

مرت الايام وبدأت الامتحانات ومشت اخر يوم امتحان جنت طالعة من وكت ردت اصعد بالخط وسمعت واحد يصيح وراي

- عبيرر عبير لحظة

انتبهت عليه بس عيوني وگعت عليه بسرعة عرفته هذا نفسه محمد الي على اساس يحب اختي عبير  يباوع عليه ويحجي

محمد - همزين لحگت عليج عبير  ماعرفيني انا محمد

عكدت حواجبني وحجيت
وتر: منو عبير

حجه وهو يباوع عليه بنظرات اعجاب
محمد: شنو السالفة عبوره نسيتيني لو المفاجأة مأثرة عليج بس شفتج من بعيد عرفتج رغم انا ماشايفج غير بالصور

بقيت متصنمه بمكاني ماعرف شنو احجي وهو جان يحجي وعيونه يلمعن من يباوعلي صفنت. عليه لا اخذ ولا انطي كل الطلع وياي حجيت بخوف

وتر: من رخصتك انا تأخرت

راد يحجي مانطيته مجال صعدت بالسيارة وحجيت وانا اغلي وافور

وتر: امشي بسرعة عمو فدوه

بقيت احسب الدقايق حتى بس اوصل للبيت اول ماوصلت بسرعة رحت للغرفة شفت عبير گاعدة ودموعها على خدها اول ماشافتني زادت بالبجي سديت الباب وصرت اصيح عليها

وتر: شلون هيج تسووين شلون تدزين المحمد صورج على انها صوري شلوونن هيججج تسوين عبيرر

عبير: والله غصب عني والنبي ماعرف شلون دزيتله صورتج وتورطت بعد ماكدرت احجي

وتر: ولج انتيي اختي اختي نعرفين شنو اختي هسه شنو موقفي ولا موقفج هو يحبج الج ويتخيلني اني بالشكل شفكرتي من هيج سويتي

باوع عليها خلت ايدها على عيونها وصارت تبجي وتشهگ

وتر: بس فهميني ليش هيج سويتي ليش منطيته كل تفاصيل حياتي وحتى صورتي وانتي تحجين ويا

عبير: هو المثل حالتي وحظي المصخم هم يفكر يعيش حياته مثل الناس تورطت وحجيت ويا ماعرف تورطت والله

وتر: تورطتي بس ماتذبيها براسي اهلج اذا عرفوا يذبحوني منو يصدگ بيه

عفتها وكمت اباوع عليها لزمت صفحتها وبعدها لزمت صدرها وصار تتقيء ووجها صار زرگ اختنگت تخبلت لزمتها واصيح عبير بكل صوتي على صوت صياحي دخلت امي بس شافتها اجت تركض وتصيح

مرام: شبيها ولج شبيها

وتر: ماعرف فجأة حالتها انتكست الحكي يمه خلي ننقلها للمستشفى راح تموت

طلعت برا امي تعيط وتصرخ دخل ابوي راجع من الشغل بسرعة شالوها يركضون بيها نقلوها للمستشفى وانا بقيت الطم ساعة الومها ساعة الوم بروحي لليل كلش يلا رجعوها حالتها مستقرة بس بعدها تعبانه سكتت بعد مافتحت وياها الموضوع خاف ترجع تنتكس مره ثانيه ...

❛❛❛❛

خيال"

سمعت صوت سيارة دخلت للبستان طلعت حتى اشوف منو جاينا حكمة هذا بيتها محد يندله من غير هي مخليه ثنين حراس تعرفهم وتعرف امهاتهم يعني امان كلش نزلت بعدني يم الدرج وسمعت صيحته جايه من الاستقبال

يمان: حكمة صار سنتين على السالفة وانتي ماتحجين وياي بس كليلي شسوي حتى ترضين عليه اخلي اخوي بين حبل المشنقة

حكمة: ويطبه حريشي ومرض توكف ويا وهو كتل عايلة ولك فناهم فني بين ليلة ويم لو بيدي مو بس اتبره منكم حتى گلبي اكصه واجوي مكانه بعطابة لو حن عليكم ولد الجلب

يمان: ومنو يگول كتلهم طلع براءة لان ماعليه ادله كافية انتم ليش ماجاي تفهمون

اتقدمت دخلت للاستقبال سكتوا ثنينهم باوعلي وگال بنرفزة

يمان: انا ماجاي عليج جاي على امي

تجاهلت كلامه ولا كأنه موجود اخذت نقالي من الشاحن وطلعت ثنينهم بقوا ساكتين بس طلعت سمعت صيحته الرجت البيت رج ومدري شنو كسر

حكمة: تخبلت ولك شمالك جاي علينا حامي

دخلت للمطبخ لگيت رميم گاعدة هم تستمع الهم ومخليه ايدها على خدها باوعتلي وحجت

رميم: شوكت نخلص وتالي يعني خطية حكمة واگعة بين نارين وصية ولد بنت اختها واحنا

خيال: كلتلج شقتنا موجودة نروح نگعد بيها مقبلتي

دخلت حكمة للمطبخ تعض على اصبعها وتفرفح وتحجي

حكمة: انتي تردين تجلطيني وتموتيني بهاي سوالفج الا انجلط يلا ترتاحين

رحت عليها لزمتها احجي

خيال: مجرد اقتراح قابل صدك رحنا هسه احنا

حكمة: ميلي ادري بيج البالج تسوينه لو مطي يركب مطي ، رميم تعاي اسنديني اخذيني الغرفتي راح اموتن من وراهم

كامت رميم سندتها وطلعتها من المطبخ وهي تحجي

رميم: لا تخلين ببالج حكومتي وين نروح ماعدنا غيرج

بقيت بالمطبخ كمت اسوي چاي لان صدعت وعندي شغل لازم اكملة حسيت بحركه صارت وراي وصوته وصلني يحجي

يمان: مبين مرتاحة هواي

خيال: فوك ماتتصور حتى من الراحة حليانه بس كون ماشوفك گدامي

يمان: الهالدرجة ؟

التفتت عليه التفاته سريعة جان واكف بالباب ومرتجي عليه حجيت وانا اصب الچاي

خيال: تخيل تأذي شخص لدرجة مجرد ذكر اسمك يسببله وجع بمعدتة راح يكون مرتاح من يشوفك

ردت امر من يمه لزم ايدي ورجعني گباله يباوع بوجهي عيونه تنتقل من شفتي لعيوني گلبي مدري شبي صار يهتز وينبض حيل بس ملامحي جامدة حجه بهمس

يمان: وانا هم ناسيج من يوم ماقبلتي تسمعيني

خيال: اذا جنت رجال تطلگني شرعًا وتطلعني من ذمتك والا راح اتصرف غير تصرف

ماجاوب بقى يباوع عليه اتقربت منه كلش وحجيت

خيال: امراة مثلي ضد النسيان ،يعني لو تعاشر كل نسوان الدنيا ماكو وحدة شايلة تفاصيلي، احفظ هاي الجملة زين

عفته ومشيت سمعته يحجي گال
يمان: خليلي قويان

وصلت يم الدرج ورجعت حجيت
خيال: على فكرة سيفي شغلكم الوصخ كله صار عندي تحضر للمصايب بيبي

عفته وصعدت للغرفة اغلي من من الاعصاب مستفز وبكل وقاحه وعين قوية يحجي وياي ببرود اخذت نقالي واتصلت

خيال: بكر بعد ماكدر اتحمل لازم نتحرك ونحل هذا الموضوع بأسرع وقت ممكن

بكر: الموضوع بي خطورة هاي الناس مو سهلة ست خيال

خيال: شوف شغلك وخلي الباقي عليه لا تهتم المهم كلهم ينسحلون

بكر: ولو الموضوع بعد ينرادله دراسه وشغل اكثر بس هاي هي مثل ماتردين اعتبري تم باقرب وقت

خيال: Ok... شكرًا

غلقته من عنده افكر الراح اسوي صح لو غلط بقيت اشتغل بالقضية العندي وهيج مر الوقت ورا اسبوع بالضبط حكمة لحت علينا الا تاخذنا للزيارة البغداد وهم انا ماعندي شي ورميم عطلة

رحنا ورجعنا جانت بوقتها مصادف مناسبة دينية اول مادخلنا البيت اجاني اتصال شفته المحامي بسرعة فتحت خط

بكر: مثل مطلبتي القوا القبض عليهم بس لا تعتقدين راح يطولون لان اوراقهم نظيفة وتهم التهريب ما ثابتة

خيال: المهم ينسحلون شكرا الك

حكمة: منو هذول الينسحلون خويله

خيال: هيج حكوم قضية وحليتها

عفتهم وصعدت ثاني يوم الصبح كعدت على صوت رميم تگعد بيه وتحجي

رميم: كومي هاي عمة يمان سليمة هنا ومن الصبح جايه تتعارك ويا حكمة

خيال: ماعرفتي شنو الموضوع

رميم: لا ماعرفت حكمة ماتقبل ادخل يمهن

گمت بسرعة نزلت غسلت وجهي ودخلت للاستقبال اول ماشافتني هجمت عليه تحجي

سليمة: انتي منين طلعتيلنا من يامصيبة من يوم الخطبج يمان مابقت سالفة ماوگعت على روسنه شتردين

خيال: اهجمكم

سليمه: هو انتي هجمتينا البارحة شالوا يمان واخو اخواني شعليهم يشيلونهم وياهم

حكمة: يطبه مرض لا تصيحين وانتي بيتي وبعدين ياهو انطاج العنوان

سليمه: انتي ابقي دافعي الهذن اللقيطات عوفي ولدج الربيتيهم

حكمة: انهجم بيت الحنية من شوكت انتي صايره حنينة سليمه يلا براا يلا

طلعتها دفع بيها وهذيج تصيح وتدعي عليه وعلى اختي اباوع الحكمة ضاجت بس مابينت راحت توضت وگعدت تصلي وتقرأ قرآن

ورميم طلعت الدوامها وانا حتى للمكتب مارحت مالي خلگ كلش لليل واتصل بيه المحامي گال طلعوا حتى بالنظارة مبيتوهم

بقيت محتارة اريد الزم خيط حتى امشي بالسالفة ماكو ...

وبيوم جنا گاعدين انا ورميم نسولف باوعتلي وحجت

رميم: احس نفسي مربطة وانا اشوفج بس انتي تشتغلين على القضية الوحدج

خيال: غير هذا شغلي

رميم: لا اريد اساعدج بس ماعرف شلون ماريد دم اهلي يروح وانا گاعدة اتفرج

بستها وحجيت
خيال: انتي خليج بدراستج وخلي هذا الموضوع عليه

اباوعلها بقت صافنه بالسقف تفكر ماعرفت شنو يدور ببالها

باوعتلي وحجت بتسأل
رميم: انتى ماتشوفين ان يمان ويا حق من اختار وصية امه وفضله علينا

خيال: لا هو خذلنا واحنا ماعدنا غيرة وتركنا بأصعب الظروف الجنا نمر بيها وراح وكف بجانب اخو القاتل

رميم: ياترى خليتي نفسج بمكانه ؟

خيال: يعني شلون

رميم: لو جنت انا الغلطانة ومسويه فعل كلش بشع مستوى القتل ويمكن ابشع وانا هم وصية بابا عندج راح توكفين وياي لو ويا الحق

بقيت صافنة بوجها ماعرفت شنو اجاوب هو المفروض اوكف ويا الحق بس الاختيار صعب صعب الدرجة مانطقت بحرف

رميم: انا اگول خلي انتقامج بعيد عن يمان لان هو ضيحه مثلنا وفكري بأخوا المجرم

ردت احجي فجأة ثنينا فزينا على صوت ضربة قوية جايه من جوة

رميم: يمه شنو هاي

خيال: الصوت جاي من جوة

رميم: خلي نگعد حكمة بسرعة

حجيت اهدي بيها

خيال: اهدي يمكن بزونة خلي انزل اشوف

رميم: لا لا انزل وياج ماترحين الوحدج

فتحنا باب الغرفة وشغلت اضوية الطابق الفوگ وثنينا وحدة لازمه وحده ونمشي بهدوء

ماحسيت الا على صوت صرخة رميم وهي تحجي

رميم: هذا هذا

خيال: شبيج منوو

حجت برعب وهي تعيط

رميم: شفت واحد منا عبر من المطبخ وطلع من باب الاستقباااللل

ثنينا صعدنا نركض الغرفة حكمة تلاگت ويانا تركض وتحجي

حكمة: اسم الله الزهرة شبيجن تصرخن ولجن

خيال: حكمة هذا واحد جان يفتر بالبيت

نشغت وهي تحجي

حكمة: شنههيييي واحد بالبيت وساكتات شووو انطني عصاتيييي وينها

همت تريد تنزل واحنا لازمينها مانخليها

رميم: وين نازلة خاف يطلع مسلح

حكمة: مسلح على روحه الا اخلي سلاحة بـ **** خيبات ميلن مني خلي الحگ عليه

عافتنا واخذت العصى مالتها ونزلت واحنا نزلنا وراها شغلت اضويه البيت وصارت تفتر شفنا گالب البيت گلب مامخلي شي مامدور بي حتى المطبخ لاعب بي لعب

گعدت على الدرج صارت تلطم على رجلها وتحجي

حكمة: عمت عيني مالحگت بي ولا نطيته المقسوم

عفت رميم يمها تهدي بيها وانا صعدت اخذت نقالي واتصلت على الشرطة خبرت عن حادثة سرقة

وحكمة هم اخذت تليفونها مدري بيمن تتصل يمكن على الحراس المخليتهم لان طلعت برا تحجي شويه واجوها اسمع واحد يگلها

- قبل نص ساعة اجيت افتريت بالبستان مالگيت احد

ورا نص ساعة اجت الشرطة سمعت الصوت صار برا ورميم طلعت ورا حكمة انا بقيت جوة اتفقد بالغرف الباقية گالبهن گلب بس الغريب كلشي ما ناقص من البيت وكأن الجاي عنده فد حاجة معينه يدور عليها

بعدت البردة وباوعتلهم من الشباك شفت سيارة يمان طبگت يمهم ونزل يحجي وياهم تنهدت وطلعت من الغرفة تلاگت وياي حكمة حجيت

خيال: هذا شجابه هنا

كعدت على باية الدرج وحجت

حكمة: انا خبرته شنسوي يمه محتاجينه ماعندنا زلمه خلي يحل السالفة ويروح

خيال: والشرطة شنو شغلها وهذول الحرس المخليتهم

حكمة: من يشوفونه يسوون واجبهم اذا نبقى احنا بس ولايه محد يهتم

سكتت ماحجيت بعد فجأة دخل وحجه

يمان: يمه كون بيكم شي

حكمة: مابينا خلص شغلك وروح

قرفص گدامها باسها براسها وحجه
يمان: وين اروح ماكدر اعوفكم وحدكم هنا

ضحكت بستهزاء وهي جاوبته

حكمة: لاله رحم الله روح امك الطاهرة مامحتاحينك خلص شغلك وياهم وشوفنا مگفاك

گام وحجه
يمان: بعدين نحجي

بقت الشرطة تفتش بالبيت ويدورون ادلة بس المفاجأة طلعت حتى الكامرات مطفية ومن سألوا الحارس گال مادري بيهن مفصولة الكهرباء وطافيات من الشحن يمكن بقت ماكو اي دليل اخر تسجلت على انها محاولة سرقة وهاي هي

وهو حاول ويا حكمة حتى يبقى يمنا هي ماقبلت ابد رفضت عافها وقبل لا يطلع گال

يمان: لا عبالج راح اروح انا گاعد بالسيارة بره

بقينا نلملم بالبيت ورتبنا كلشي على مكانة ورميم كل شويه تباوع من الشباك تگول بعده موجود مرايح

لليل كلش تقرب الساعة 2 اكثر احس بحكمة مامرتاحة كل شويه طلع من الغرفة لو تدخل الغرفتنا تباوع من الشباك وتطلع ادري بيها گلبها عليه لان گاعد برا بالسيارة

گمت ورحتلها لگيتها گاعدة على الدرج كعدت بصفها فزت وحجت

حكمة: نعله على عدوج نززتيني شگعدج اضنه السبب المگعدني

خيال: ليش قلقة

حكمة: مامش شي بس الصار طير النوم من عيوني

خيال: صيحيله ينام بالاستقبال

باوعت عليه متفاجاة حجيت

خيال: الخاطرج والا انا گلبي ميت حتى مايحس بي

حكمة: لا خلي هو هسه يمل ويروح

خيال: كومي صيحي يدخل انا اريدج تطمنين معليج بيه صاعدة انام والصبح خلي يروح من وكت

صعدت اباوع من الشباك شفته شويه ونزل من السيارة متوجه للبيت يمكن اتصلت بيه

رحت نمت وگعدت الصبح مالگيته مرت الايام عاديه ورا سبوع بالضبط هم رجعت هالحالة تكررت مره ثانية هم گعدنا الصبح لگينا الطابق الجوه مگلوب گلب ونعادت نفس الاجراءات ورغم حكمة غيرت الحارس هم لگوا الكاميرات منطفيه

عاد هنا هو لگاها حجه جاب غراضة واخذ دور الحارس هو صار يراقب الكامرات وحكمة رغم ماتبين كدامي بس احسها مرتاحة الوجودة ومتطمنه  ردت اطلع من البيت بس ماخلتني ووعدتني بس كم يوم لهذا صرت اتجنبه وتاخر بالشغل وابد ابد ماتواجهنا انا ويا ....

وبيوم ظهريه نزلت للمطبخ اريد اشرب مي سمعت صوته بالاستقبال ومبين يحجي بالتليفون اتقربت اسمع شيحجي سمعته يصيح صاير عصبي

يمان: هو الشاهين وينه يعني مايتوب يوميا مطلعنا السالفه يوميا مسوي مصيبه كله بعد لا يشوفني خلقته ... المعلومات والمراسلات كلهن عندي بالحاسبة هاي يمي

سكت شويه بعدها حجه جملة صدمتني وخاصة من گال

يمان: قضية اهل خيال بعدك ماشي بيها لا لا عندي الاوراق وهم كل الملفات مو جودات على الحاسبة

عفته ورحت اخذت مي وصعدت شفت رميم فاتحة الحاسبة مالتي تدور بيها حجيت مستغربه

خيال: شجاي تسوين

رميم: جنت اترجم بيها الابتوب مالتي خلصان شحن

حجت الكلام وبتسامة نصر مرسومة على وجها سدت اللابتوب وشمرته بتجاهي اخذت تليفونها وطلعت وانا بقيت افكر شلون احصل لابتوب يمان وافتحة ضروري كلشش اخذه...

مرت الايام وصرت اشوف وضع رميم تغير اربعة وعشرين ساعة خانسه وعيونها بتليفونها ماعرف شسوي حاولت احجي وياها ماكو متحجي وانا هم جنت مشغولة مالحيت وياها ولا انتبهت عليها...

مر اكثر من عشر يام وهو يمنا صرت ماريده يروح لان اريد احصل الحاسبة مالته وبيوم رجعت من الدوام جان البيت فارغ بس رميم موجوده اول مادخلت صارت بوجهي سلمت عليها وحجيت

خيال: حكمة وين

رميم: طلعت تشتري مسواك للبيت ويمان اخذها

بسرعة باوعتلها

خيال: يعني محد بالبيت غيرنا

رميم: ايي مو كلتلج طالعين

عفتها وتوجهت للاستقبال لمعن عيوني وانا اشوف اللابتوب مالته عايفه بالبيت رحت بسرعة عليه وفتحته اجت رميم وراي باوعتلي وحجت

رميم: شجاي تسوين من كل عقلج تردين تفتحينه لو بي شي مهم ماعافه هنا هاي اذا ماطلع مخليلة شفره لو تموتين ماتعرفينها

خيال: راقبيلي الوضع ومعليج عوفي الباقي علية

رميم: راح اوكف بالشباك اراقبلج الوضع

شلت الحاسبة وكعدت يمها وفعلاً طلعت مشفرة مثل ماتوقعت باوعتلي وحجت

رميم: وهسه شلون راح تفتحينه وهو مشفرة

خيال: سمعته يحجي بالتليفون قبل كم يوم واكثر من مره كرر كلمة (شفرة فيجنير)

حجت بسأل
رميم: وشنو هاي

خيال: شفرة خاصة جانت تستخدم بالحرب العالمية الاولى وهي عبارة عن تشفير النص الابجدي والمفروض هو مستخدم كلمة طويلة بلا مسافات ويستخدم الكلمة الاولى بين كل كلمة والثانيه على طول الجملة بدل المسافات
يعني تتكون الشفرة باختصار من مجموعات متتالية من شفرات او اكواد قصيرة بس بترتيب بشكل رأسي وأفقي

رميم: وشلون راح تعرفين الجملة واحتمال خطأ بعد الحاسبة تقفل

خيال: ان شاء الله اكدر اخمنها

بقيت اجرب هواي جمل اكثر من 3 مرات وماصارت خفت تقفل

خليتها بالگاع وتربعت وبقيت افكر شنو ممكن يخلي الجملة اول شي فكرت باسمه واسم امه وميلادة بعدها تراجعت وكتبت اسم نرجس حكمة خيال وتاريخ خطوبتنا بالانكليزي وبلا فواصل

ورجعت كررت الجملة وصرت اخلي اسم نرجس بين الكلمات بدل الفاصلة الحدما كملتها كلها غمضت عيوني ودست موافق فجأة انفتحت گدامي ماصدكت باوعت الرميم وحجيت

خيال: موكلتلج راح افتحها

ركضت بسرعة فوگ جبت رام وبديت انسخ شكو موجود بيها مو مال ابقى ادور والوقت ضيق

اباوع الرميم تليفونها دگ باوعت عليه وحجت

رميم: مكالمة مهمه هسه ارجعلج

عافتني وطلعت تركض وانا كملت نسخ ورجعت الحاسبه بمكانها وردت اطلع بعدني بالباب بس فتحته صار گبالي عگد حواجبه وعيونه صارت على الحاسبة مالتة الوراي اتقدم عليه رجعت الي ورى وسديت على ايدي حيل حجه

يمان: شسوين هنا

خيال: وانت شعليك هم نزل وهم يدبج على السطح

نظراته صارت على ايدي ضميتها وراي مسح على وجها وحجه

يمان: يعني عبالج تكدرين تفتحين الحاسبة لو تاخذينها شوف مدري وين ماتكدرين تفتحينها

ضحكت بستهزاء وحجيت

خيال: ايي ميخالف ممكن توخر مني اريد اطلع

بحركه سريعة من عنده جذبني ناحيته حسيت ايدي تهشمت من قبض عليها حيل وهي مسدوده ميل راسه باوع بعيوني المتحديته وگال

يمان: خليلي صاير مو سهل وماكو شي يصعب عليك

خيال: ولا راح يكون اكو شي يصعب علية وحقي اخذه واطلعة من عيونكم انت واخوك وكل واحد مانصفنا بهاي القضية

يمان: ماحاولتي تفهميني ولا مره وحده

خيال: وانت ليش مافهمتني ورحت وكفت ويا اخوك المجرم وعفتني مثل المضيعة بنص الدرب

ابتعد من عندي يمسح على شعره ويحجي

يمان: اخوويي اخوويي يعني شترديني اسوي

خيال: والماتوا والقتلهممم اخووككك اهلي لو مو اهلي لاتبرر افعالك البشعة خلف ستار عواطفك غير هيج عرفت بكل شغلك القذر والجايي تسووييي

اتقرب حضن وجهي ويحجي بلهفة عيونه حمر ويلمعن بالدموع
يمان: رغم كل هذا الصار رغم كل المرينا بي بس انا احبج خيال احبج واحس روحي متعلگه بيج ماكدر ابتعد بس گليلي شسووييي انا بين نارين كليلي شسوي وانا اسوي

خيال: اكرهك انا اكرهك اموت منك وحق الحب الجنت شايلته الك بگلبي كلتلك وارجع اگولها واسمعها زين لو ترجع وجايب وياك نجوم السماء هم مراح اگدر اتقبلك مره ثانيه خلييي عندك كرامة وحسسسس

لزم ايدي يهز بيه ويحجي
يمان: ماعوفج افتهمتي مااعوفج ويجي يوم اثبتلج العكس واخليج تسامحينييي

دفعته وحجيت
خيال: هاي اخر مره اسمحلك تلمسني وخلي عندك كرامة وطلگني شرعًا ولا تخليني استخدم وياك غير اسلوب اندمك علية والله

ردت اطلع رجع سحبني عليه حضني حيل وهمس

يمان: احبج والبخت ويابخت البعد يجمعني بيج

باوعت بعيونه وحجيت
خيال: ماعتقد بعد اكو شي ممكن يجمعنا مو بس مسافات صارت بينا جبال ماتنهز ولا تنزاح من يوم الي اختاريت بي اخوج المجرم وضيعتني حاول تفهم هذا الشي

ردت اطلع اتقدم سد باب الاستقبال وقفله وشمر المفتاح بعيد صحت بي

خيال: هاي شجاي تسووييي افتححح البببابببب

حجيتها وهجمت عليه اضرب واخرمش بي بأديناتي واسمع حكمة ورميم صاروا يضربون بالباب

حكمة: يااا شمالكم ولكم ولك يمان افتح الباب شجاي تسوي بالفرخة

باوعت عليه كلشي ميسوي بس واكف يم الباب وساد ايده بغضب صرخت عيطت ضرب هو بس يباوع عليه ببرود ولا كأني گدامه روحي جاي تطلع

ماعرف شنو صار كل الاعرف بي ماحسيت نفسي الا وانا بين اديه حضني وقيدني بحضنه رجعني على الحايط وحجه

يمان: شوكت تهدين وتخلينا نحجي ونتفاهم

خيال: وخر منييي حقيرر اكرهك اموت منك

خليه ايدة على گلبي وهمس
يمان: بس دگات گلبج وانتي بين ادية تگول غير شي

هديت نفسي وحجيت ببرود

خيال: ماتگول غير تمقتك الحد الموت لا تعتقد بيوم من الايام گلبي يدك حب الشخص خذله واستغفله وان رجع ونبضلك من جديد اقلعة بيدي افهم هاي الجملة يمان افهم

اخذ نفس قوي من عندي واتقرب همس بأذني بكلمات حسيتهن مثل السم وينحقن بگلبي ...

   يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

معثوراتي لا تنسون التصويت+ متابعة الحساب+ تعليق بين الفقرات ♥️

متابعة ممتعة🦋