رواية تاروت الفصل الحادي عشر 11 - بقلم زيـنـب علـي 🦢

#تاروت

البارت «11»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب ♥️

‏مَيْلَن
لا تنكطن كحل..
فوك الدم
ميلن،
وردة الخزامه تنكط سَمْ

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

رميم"

نزلت من السيارة وعفت يمان وخيال يسولفون جنت تعبانة من التفرفر ودايخة گوه مفتحة عيوني دخلت للبيت واستغربت بيتنا اليوم ظلمة معقوله اهلي نايمين واحنا برا بعدني مداخلة للبيت وشفت خيال شخص ضخم صار مقابيلي صرخت بخوف عبالي حرامي

ماعرف منين اجتني الشجاعة ولزمته من ايده وهو رجع عليه لواها وصعد ايدة ليفوگ بلا كلام بس عيونه صارن گبالي يباوع بعيوني بخزرة ويريد اعوفه بقيت لازمته بحركه سريعة من عنده ضرب ايدي بشباك المطبخ ودخلت بالجام ونشكت وهو عبر من السياج گعدت لازمة ايدي اصرخ بألم اريد واحد من اهلي يطلع ماكو

رميم: حرراممييي وينك بابا ضرغغاامممم

دخل يمان يركض تجاوزني وفات للبيت وخيال ورا تركض الموقف صار بثواني معدوده يمكن ماعبر الدقيقة احس فزيت على صيحة خيال ودخلت اركض وكفت بالباب شفت اهلي متمددين وهي مخليه راس بابا الي عيونه شخصت على عليه وهو بحضنها

خيال"

شفتهم كل واحد طلقة براسه او بأماكن مختلفة من الجسم ميتين تقربت عليهم امشي بهدوء گعدت بينهم مديت ايدي على امي الكأنها نايمة وضرغام راسه على ايدها صرت اهز بيها اگعدها بصريخ

خيال: ماما يمه احنا رجعنا ليش نايمة اليوم مو مثل كل مره الگاج واكفة بالباب يمممااااا جاوبينييي

رجعت باوعت الابوي جان بي صوت مثل اليشخر بنفسه ركضت عليه خليت رأسه بحضني واحجي

خيال: باااباااا انت عايششش بابااا لااا تمووتتت اسعااافففف

دار عينه على الباب الواكفه بي رميم وكأنه يگللها مانمت انتضرتج مثل ماوعدتج

وسكن نفسه حضنت راسه حيل وصرت اصرخ بحرگه وبكل صوتي احس روحي جاي تطلع وتنسحب مني ويا كل صرخه وانا اشوف اهلي مكتولين گدامي ورميم كلشي ماسوت بس گعدت بالگاع بمكانها وتباوع عليهم

وانا ملخت نفسي كطعت شعري اريدهم يجاوبني ماكو محد بيهم يرد عليه ماعرف شسوي وين اروح من كل عقلي صرت افتر عليهم اسويلهم اسعافات واضغط على صدرهم اريدهم يتجاوبون وياي ....

❛❛❛❛
يمان"

بس شفتهم على هاي الحالة طلعت برا اركض ورى شفته بعيوني شفته ماصدك معقولة توصل بي المرحلة يقتل عائلة

بقيت ادور بعيوني شفته يمشي بنهاية الشارع ومشيته مو متوازنة ركضت عليه لزمته من رگبته اصيح فقدت

يمان: باااتر كتلتهم ولك ماصدك لييششش هييجج سوويتتت ليششش

باتر: يمان مادري بروحي انا شسويت والله بكلشي مادري شدخلني الهذاك البيت

بعده يحجي نطيته رفسه طاح للگاع نزلت اضرب بي فقدت علية بالضرب هو حتى ماحاول يدافع عن نفسه

باتر: يمان مستحيل اسويها انا مستحيل

يمان: بسسس سويتها باتر بعيوني شفتك طلعت من بيتهم

باتر: مادري بروحي شلون وشوكت كتلتهم حتى سلاحي مادري بي وين

شلته من ملابسه احجي

يمان: وهسه شتريد اسويلك هاا شتررييد

دفعني وصاح

باتر: تصدگني ولك مو انا الكتلتهم موو انااا افهممم شني كتلتهم ومادري بروحي

يمان: جا شسوي ببيتهم والناس مكتلين شجنت تسوي

گعد على الرصيف وحجه

باتر: كتلتهم بس مادري بروحي ولك ماتذكر شلون وليش شفت الباب مفتوح ودخلت الباقي كله مادري بي شلون صار

مشيت مسافة عنه احتاريت شسوي هسه انا وين التفت الها لو الاخوي وصية امي رجعت عليه جريته حيل گومته احجي

يمان: تروح تختفي من كدامي لا ارتكب بيك جريمة ابشع من الجريمة الرتكبتها واتمنى تختفي وماتطلع خليني تأكد واشووففف دربييي يلاااا

دفعته ورجعت ركض دخلت للبيت شفتها محتارة مدري شسوي بروحها تتنقل بين جثث اهلها تتوسلهم يگعدون ورميم گاعدة بالباب صافنة عليها رحتلها

خيال"

فقدت روحي شاغت ساعة الطم ساعة اگعد بيهم حسيت ادين سحبتني وقيد اديناتي بحضنه صرت ارفس برجليه وروحي تفرفح واصيح

خيال: يمااااان عووفننييييي اريد اهليييي عوفنييي يماانن اريدهمممم خلي يگعدون اتصل بالاسعاف بيهم نفس ما ميتين

مايحجي بس مقيدني واني صرت انازع بين اديناته وهو احتار مايعرف شيسوي بس مانطق ولا حرف

صرت اضرب بي واحجي

خيال: اتصل بالاسعافففف عايشين والله عايشين ادري بيهم مايعوفونا

طلع تليفونه وطلع برا رجعت عيني على رميم شفتها ساكته وصافنه عليهم بعدها على نفس گعدتها مثل المصدومة وجها باهت

دقايق وسمعت صار صوت الاسعاف والشرطة دخلوا بيتنا والناس التمت وكعدت على فاجعة قتل حجي سليمان وعائلته

صارت هوسه وصريخ اباوع عليهم يردون يشيلوهم بعد ما علنوا الوفاة تهسترت صرت ادفع بيهم واحجي

خيال: ماميتين اهلي وخروا ماتاخذوهم ماميتين

جرتني حكمة وهي تبجي وتحجي

حكمة: سوده بوجهي عليجن يمه سوده بوجهي

خيال: خاله والله ماميتين هسه يگعدون

اباوع عليهم صاروا يشيلون بيهم

خيال: يابه اگعد المن عايف بناتك ولك يابههه ، يمه گلبج الحنين مايقبل يعوفناا ولك ضرغام وين نايم وعايف خواتك وحدهن

محد يرد عليه بس لازميني ويبجون ويشيلون باهلي وخرت نفسي من بين ادين حكمة وركضت وراهم للشارع يصعدون بيهم بسيارة الاسعاف والشرطة ملت البيت مايخلون الناس تدخل ركضت ورى السيارة اضرب بالباب حتى يفتحوا الي حسيت روحي نجريت قيدني بحضنه يحجي بصوت مخنوگ

يمان: هسه نروح وراهم

خيال: يمان گللهم لا ياخذون اهلييي وين اروح انا اذا خذوهم اخذني وراهم

لمني الصدره بأديناته الترجف وهو يحجي
يمان: ميخالف هسه نروح وراهم والله راح تموتين

صرت املخ بنفسي واحجي

خيال: اريد اموتت وراهم شسوي بعمري باقيه شسوييي

اباوع حكمة طلعت رميم لازمتها من حرح ايدها ورميم ساكته وهادئة بس تباوع بعيونها

حكمة: ناخذها للمستشفى دمها راح ينشف الحگولنا

ركضتلها اخذتها بحضني وصرت ابجي بفزع باوعتلها ساكته هزيتها وحجيت

خيال: رميممم باوعييي عليييههه اهلنااا ماتوااا ماتواا

هزت راسها بـ ايي وسكتت صرت الطم على وجهي وحجي

خيال: راحوا اهلنا راحوا

جنت فاقده ماعرف بروحي شسوي وهي بس صافنه عليه وحكمة ونسوان المنطقة يحاولن يلزمني والناس كلها تباوع علينا وتبجي

طبك السيارة يمنا صعدنا بيها انا ورميم وحكمة ويانا مشى بكل سرعته الحدما وصلنا المستشفى حسيت بروحي بعد هاي هي ماگدر اوگف على رجليه بعدنا بالباب وغمضت عيوني وطحت مادريت بنفسي ولا حسيت بشي بعد غير من صحيت

ونفس الحالة رجعت ابجي بنهيار واملخ بنفسي مامستوعبة الصار حكمة تحاول تسيطر عليه تحجي وياي ماسمع منها شي

من بعدها واحنا بهذا الوضع گعدت الشرطة تحقق ويانا وتاخذ افاداتنا وحتى جنائزهم ماقبلوا ينطونها غير من صار وجة الصبح بعد التحقيق وتحديد وقت والوفاة واسطات من اهل المنطقة ويمان يلا قبلوا يسلموهم النا

اخذوهم للمغتسل وانا ورميم دخلنا ويا امي وحكمة ومرة المختار ويانا

انهاريت ماكدرت حتى المسها بس دموعي تجري منهارة بالبجي ماجاي اصدك ولا الفكره تدخل دماغي يعني شنو اهلي كلهم ماتوا بنفس اليوم

بس باوعت الرميم گعدتني على صفحة وشلحت ردناتها وحجت ويا ام المغتسل

رميم: علميني انا اغسل امي

- متاكده حبيبتي خاف متگدرين

غمضت عيونها وحجيت بحزم

رميم: لا اگدر انتي بس علميني

غسلوهم وطلعنا وانا روحي خاويه اسحل بيها حسيت بنفسي امشي جسد بلا روح

دفنوهم گبال عيني وترابهم چن هالوا على روحي مو على اجسادهم بقيت نايمه على گبورهم ورميم تتنقل يتگعد يم واحد واحد بيهم وتقرأ قرآن وادعيه

من بعدها اتقربت يمي ورفعتني وياها وهي تحجي

رميم: لا تخلص طاقتج هسه بعد ورانا درب طويل

حجتها مسحت دموعها بطرف شالها ماگدرت امشي نزلت على رگباتي وباوعت القبر ضرغام وصرت اصيح

خيال: ضرغغاممم يابعد اختك ولك اندارلك فدوه خويه كوم تخلي خواتك يرجعن وحدهن تعوفنا وحدنا ضرغام تخلينا بلا سند تقبلها غيرتككك علينا هيج نبقى بلا رجال يحامينا ولا ظهر يسندنا مارجيه منك گوممم

بديت اتهستر احس اريد اصرخ بس ماكدر صوتي راح بعد مايطلع

اتقربت على قبر بابا احجي ويا بتوسل

خيال: هاا يابه شنو نيتك بويه جا مو گلتلي طول ما النفس بيه تبقين رافعة راسج شنو بويه تريد تكسر رگبتي بنومتك مو كلتلي طول ما انا عايش ما تعتازين احد جا تريد تخليني بهالدنيا تلطش بيه وين عايف بناتك يابه المن

رجعت على امي اعاتبها

خيال: هاا يوم هاا هيلينتي شو نايمه هنا ليش مو بغرفتج يالجنه يالحنينه يمه الگاع بارده عليج وانتي رجليج كومي بفراشج يووم هاي النومه مو الج

گعدت يمي رميم حضنتني وصارت تشهك بالبجي بلا صوت وحكمة يمنا گوه شالني يمان شيل بين اديه يلا قبلت اروح منهم واعوفهم

رجعنا طول الطريق يمان مخليني بحضنه يحجي وياي ويهدي بيه ماعافني ولا لحظة وفرات صديقه يسوق دخلنا للمنطقة وشفت الفاتحه منصوبه وبس صوت القرآن يصدح والناس مگلوبه ابوي رغم ماعنده لا اهل ولا عمام منعرفهم ولا بعمرنا شايفينهم بس اهل المنطقة يموتون عليه وكلش هواي تأثروا على الصار بينا وعلى قتل اهلي

دخلت للبيت الناس ملتمه ونسوان گابلني وردها حجه حتى ارجع انهار ماتحملت رجعت تخربطت ووگعت ....

ماعرف شگد مر وقت يلا صحيت لگيت نفسي بغرفة اهلي نايمة على جربايتهم ومتغطاية فتحت عيوني محد يمي غير حكمة يمي تصلي وتقرأ قرآن الضوه داخل من الشباك وبيتنا هوسه وصوت المله يصدح بالبيت

يانارهم بالگلب تسعر
على افراكهم واشلون اصبر
عزيزين الاهل وغيابهم مر

ايست ونگطعت اضنوني
بعد هيهات ماضنهم يجوني
على افراكهم تهمل عيوني
انه العزيزه وضيعوني

خليت ايدي على عيوني وصرت ابجي بصوت عالي انفتح الباب واجتني رميم تركض اخذتني بحضنها تبوس بيه تحجي بصوت متشحرج ومبحوح

رميم: اسم الله يعمري اسم الله گعدتي

خليت راسي بحضنتها ابجي واحجي

خيال: رميم بقينا وحدنا وينهم اهلنا

حضنتني اكثر وصارت تبجي كالعادة بهدوء بلا صوت همست بأذني

رميم: قضاء رب العالمين وقدره هذا المكتوب علينا

گعدت يمي حكمة مسحت على شعري تحجي وياي بتفهم

حكمة: دگولي يالله يبعد گلبي وكومي اسبحي وبدلي هديماتج وگومي جابلي الناس تقبلين فاتحة اهلج تنكسر محد واكف بيها غير اخيتج المسيكينه

خيال: خاله صعبة والله صعبة

حكمة: يمه ادري بيها صعبة يابعد اهلي والله ادري بيها فاجعة ماتحملها جبال مو بنيات صغار مثلجن بس الجزع مايصير حرام مايجوز ورب العالمين لا يكلف نفسا إلا وسعها ترحميلهم اقريلهم الفاتحة وصليلهم يلا امي انتي حبيبة

خيال: بعد منو النا خاله

حكمة: جا انا هم متت وروح حجي سليمان العزيز وروح هيلين الغالية اضمجن بين ضلوعي عاهدتهم انا هناك وكفة على گبورهم اخيجن بعيوني وغمضها عليجن شعندي راسي وراسجن واعتبرني امجن من اليوم لا تشيلين هم وكومي يلا

عدلتني رميم وگالت

رميم: جهزتلج الحمام وطلعتلج ملابس يلا گومي وياي

كمت وياها سبحتني وبدلتلي وانا مادري بروحي وين بالي عالق على مشهد اهلي مايطلع من دماغي وگوه جبرتني اكل شويه ...

وهيج مرت أيام الفاتحة انا كل شويه اتخربط جني انا الميته مو هم يمان يدخل بالليل يشوفني يكعد يحجي وياي مادري بي اصلا شيحجي وبالنهار يتصل لو على حكمة لو رميم يتطمن عليه

خلصت الفاتحة وحكمة جبرتنا گوه نعوف البيت ونروح وياها البيتها ...

مرت الايام ورميم رجعت الدوامها لان مابقى شي على الامتحانات وانا دخلت حالة اكتآب حادة الدرجة مالي خلك حتى احجي ويا يمان يجي يسولف وياي ويروح مااحس بي
والقضية مفتوحة الشرطة تحقق بيها

وحكمة محتارة شتسوي وتحط كدامنا طايره بينا

وبيوم فزيت من النوم جنت اتحلم بأبويه يوصيني على رميم هواي ابد ماوصاني على نفسي جان بالحلم يردد بس خلي عينج على اختج فتحت عيوني ريگي ناشف باوعت حواليه وكأني صارلي سنين نايمة والدنيا تزخ مطر قووييي

باوعت شفت بس رميم نايمه يمي بالسرير الثاني بعدت الغطى وگمت طلعت من الغرفة بيت حكمة هدوء بس صوت المطر القوي اسمع وصوت التلفزيون جاي من الصالة رحت باوعت محد موجود غير حكمة كالعادة مشغله التلفزيون ونايمة بالصالة

اخذت مفتاح بيتنا معلك يم الباب فتحته وطلعت من البيت كلش حنيت البيتنا وبابا جان بالحلم كلش بعيد ماگدرت اوصله طلعت حافية رحت البيتنا فتحت الباب ودخلت اول مره ادخله بعد الصار

بقيت امشي واتلمس بالحياطين يم كل ركن عندي ذكره هنا اتذكر گعدنا .... هنا بابا جان معصب ويرزل بضرغام صدى صوته الهسه بعده بأذني

التفتت يم الدرج هنا امي جانت توكف تصيحني من تريد شي ... هنا جانت تگعد تنتظر ضرغام يرجع من برا .... هنا جنه نگعد وياها نتابع مسلسل ونبقى نتعارك على حضنها

بقيت اتفقد ارجاء البيت ودموعي تتسابق ويا المطر البره تنزل على خدودي امشي واتذكر وصوت صدى ضحكاتهم عركهم سوالفهم بأذني ، رغم ضويت كل البيت بس بعده عتمه وموحش خلافهم اجت ببالي ابيات حكمة دائما ترددهن بيقيت امشي واردد بيهن

دار اهلي الگبل چنت اعتنيها
التضوي والفرح لايگ عليها
مشت عنها البدور التضويها
انا بياحال اروحن وأمر بيها

اجاني العيد ياداري الزهيه
گبل. واليوم مهظومه وخليه
انوح الصبح وانحب كل مسيه
على الماتصح منهم بعد جيه

ريت اصغار بيها ماكبرنه
دار البيها. گضينه عمرنه
اهلها مابعد واحد يمرنه
انكسرنه. ولادوه اليجبر كسرنه

يادار النطبها وندگ ياباب
عنها گوطروا للدوم الاحباب
مافاد النحيب ودمع سچاب
اهلها حيف صاروا حدر التراب

يدار البخت وعليها ولمنه
ابونه مابعد بيها ولمنه
يفطر الصخر ويكسره ولمنه
على احباب الصفوا تحت الوطية

الحد ما وصلت غرفتهم فتحتها ورحت ركض شمرت روحي على الجرباية وصرت ادور عطرهم لميت روحي وغطيتها بفراشهم وصرت انحب بكل صوتي ركضت للكنتور طلعت منه ملابس امي ابوي بقيت اشم بيهن وابجي بعياط بقيت ابجي ابجي بالساعات الحدما خويت كلششش وحسيت راسي صفه بعد مابيه اشيله گمت وانا لازمة قميص بابا طلعت من البيت ماعرف وين اروح ، جاي امشي ودموعي وحده ورا الثانيه شهگاتي عالية همزين محد موجود الشارع فارغ هيج وكت كلها نايمة حست صار ضوه سياره على عيوني جايه بتجاهي نزلت على ركباتي بنص الشارع وصرت ابجي بصوت عالي ونحيب نزل من السيارة واجاني يركض نصه گبالي لزم ايدي الترجف غلفهن بديه ميل راسه يباوع بوجهي وحجه بنبرة مليانه حنية

يمان: دموعج يغسلني فزة گلبي

تقربت حضنته حيل احجي وانا اناشغ
خيال: يمان لا تعوفني بعد ماعندي غيرك لا تعوفني

ضمني حيل وحجه بصوت مخنوگ

يمان: ليش هيج يعمري شمسويه بروحج صارلج شهرين على هذا الحال وانا حتى روحي جاي تنمرد وياج

خيال: ماكدر يمان ماگدر روحي جاي تنسحن اريد اهلي

غمض عيونه حيل وگومني ويا وهو يحجي
يمان: تعاي يعمري باردة وانتي هيج جوة المطر هسه تتمرضين

دخلني للبيت شايلني تلاگت ويانه حكمة شهكت بخوف وگالت

حكمة: يمه سودة عليه ليش هيج حالج

يمان: لا تخافين يمه خيال القوية رجعت من اليوم

حجه الكلام وباوعلي رجع ردف
يمان: موو

اومئت بـ ايي

حكمة: تعال يمه دخلها للحمام خلي تغسل وانا اجيبلها ملابس

مشه بيه للحمام غسل رجليه بيده واديناتي ووجهي سألته

خيال: شصار على القضية

بسرعة جمد باوعلي وحجه بهدوء

يمان: بعدهم جاي يحققون بيها بس ماتوصلوا الشي

خيال: فدوة يمان انا مخليتها عليك ماريد افكر بالموضوع اعرف بيك كدها وراح تطلع حق اهلي لان والله مابيه حيل الكلشي گوه شايله روحي

هز راسه ساكت بس اديناته صارت ترجف عيونه مايخليهن بعيوني گام وحجه

يمان: استعجل امي وين راحت بردتي

راد يطلع لزمت ايده وحجيت

خيال: عمري صاير شي بخصوص القضيه ضامه عليه

ابتسم باس راسي وحجه

يمان: ماكو شي ارتاحي انتي عوفي الباقي عليه

سكتت وحكمة جابتلي ملابس طلع واني بدلت وطلعت جان واكفلي بالباب شالني ومشه بيه حجت حكمة

حكمة: هاا ولك وين ماخذ البت

يمان: الغرفتي انومها

حكمة: لا لا تنام يم اخيتها انت لا تدخل

يمان: حكمة انوم خيالي مثل يوميه واروح لا تخافين الباب مفتوح

تجاهلها وهي بقت تحجي عليه ابتسمت بتعب وهو من شافني هم ابتسم باسني بجبيني وحجه

يمان: افيش هسه يلا الدنيا ضحكتلي من ابتسمتي

خيال: شدعوة

كعدني على الجربايه وراح جاب خاولي ينشف بشعري ويحجي

يمان: ضحكتك ترد روحي خليلي

نشف شعري ورتبه بيده حجه وهو يعدل بي

يمان: ليش شعرج قصير دائما

خيال: من جنت صغيرة الهسه ابد ماخليته يعبر اكثر من رگبتي

ارتجه على تاج الجرباية وسحبني الحضنه يشم بشعري بعد الخصلات من عيوني وگال

يمان: يجنن عليج فزة گلبي

ارفعت عيوني اله خله انفه على انفي وغمض عيونه ياخذ نفس همست

خيال: تحبني

رفع ايده يتلمس خصلات شعري فتح عيونه باوع بعيوني وگال

يمان: احبج والبخت الجمعني بيج

حاوطته وغمضت عيوني بقى يلعب بشعري حتى انام بعدني هسه جاي اغفى وسمعت صوت نقاله يدگ

رفعت راسي من رگبته اباوع عليه جاوب بس ماحجه فتح عيونة حيل صارن حمر بركان وفز يحجي

يمان: شوكت لزموا وين يندلوا مكانه

سكت شويه بعدها صاح وصوته رج الغرفة
يمان: انتتتتت غبببييييي شلون هيج

سده لزمت ايده احجي بخوف
خيال: يمان شكوو

دخلت حكمة مفزوعة من صوت الصيحة حجت
حكمة: خير خير يمه شكوو

گام بسرعه نزع تيشيرته ولبس قميص يدگم بي ويحجي مستعجل

يمان: ماكو شي سالفة علمود الشغل لازم اروح هسه

عافنا وتقدم للباب التفت باوع عليه ورجع حضن وجهي وباس راسي وگال

يمان: لو كلشي يصير ابقى احبج خيالي

خيال: يمان شكو

كرص خدي يحجي بهدوء حتى يطمني

يمان: ماكو شي حبيبي نامي وارتاحي

طبع بوسه على جبيبني وطلع بقينا انا وحكمة ثنينا مستغربين حالته الموطبيعية

بعدها كم يوم مر ماشفنا اتصل عليه بس يسأل علينا ويروح يگول مشغول لو جايتنا سيارات جدد من هذا الكلام

الحد ما بيوم جنا گاعدين انا وحكمة ورميم نتفرج تلفزيون گوه حكمة تجبرني اگعد يمهن بس حتى مابقى الوحدي دخل يمان بلا سلام ولا كلام كعد على التخم وحجه بتعب

يمان: لزموا طرف من اطراف الجريمة

بسرعة فزينا عليه

خيال: وينه ومنو فدوه احجي

يمان: بعدهم يحققون ويا الهسه مانعرف اي معلومات هو لو مو هو

رميم: يعني نفس اوصاف الشخص الشفتة الكاميرات هم اعتقد ملتقطاتة بس محد گدر يشوفهن ليش

تجاهل كلامها وحجه

يمان: تقريبا ايي والكاميرات عند الشرطة هي تحقق بالموضوع وتشوف

حكمة: اتصلت بالمحامي

هز راسه بـ ايي وباوعلي حجه بتعب

يمان: ترحين تشوفينه لو تعوفينها ورى المحامي

خيال: لا انا عايفتها وراك انت تحقق من الموضوع واذا رادوا افاداتنا من جديد او توقيع نروح

سكت وگام حمحم وحجه
يمان: عندي شغل انا رايح

حكمة: اخوك المسربت مارجع من السفر بلا هذاك الشلايتي امس مر عليه

يمان: لا بعده بتركيا

راد يطلع صحت ورا

خيال: يمان عرفت اسم المتهم

باوع عليه وحجه بتردد

يمان: ااا ايي اسمه حازم صلاح بعده ماثابت شي عليه عود انا اجيب الاخبار من المحامي

حجاها وطلع من البيت

مرت الايام تشبه بعضها الحد ما نصدمت صدمة عمري بيوم المحكمة ....

❛❛❛❛
2017 .....

رميم: خيياللل خيال شبيج اگعدي المنبه صار ساعه يدك تأخرتي

فتحت عيوني مثل المصدومه تكلمت بصوت يرجف وريگ ناشف

خيال: اني وين ؟

كامت متوجه للمرايه تحجي بستهزاء

- بالمالديف خيه.. وين يعني بالشقه كومي تاخرتي هسه شويه وتجيج حكمة الا تشوي على اذنج بصل من البارحه بس تتصل وتلوم بروحها لان عافتنا وحدنا

تثأبت ومددت جسمي حجيت بنعاس

خيال: ادري بيها ما ترتاح الا نصير گدام عيونها بس لازم تتقبل الواقع احنا صار النا بيت خاص بينا واني اشتغل وانتي مابقى شي وتتخرجين

كمت وصرت اعدل بالجربايه منطيتها ضهري حجت بقهر

رميم: تذكرين اول مجابتنا يمها شلون جان حالنا بهذاك اليوم

شديت على يدي حيل بمجرد ما يمر سيره هذاك اليوم وليلته المشؤمه تتفجر بداخلي براكين الغل والحقد وارجع انكسر بعاصفة الخذلان وخيبه الامل

رفعت راسي باوعت عليها صافنه على جرح ايدها حجت بغصه

رميم: السوء حظي انترك بأيدي علامه ازلية من خمس سنوات تخليني حتى اذا انسى شوية بمجرد ما اباوع الها ينعاد المشهد گدامي

اتقدمت لزمت ايدها تحسست الجرح همست

خيال: والله ارجع حقنا مربع بس اصبريلي شويه جاي اخطط الهم

رميم: ادري بيج اختي الحلوة اكبر محامية بيك ياعراق عدها ماجستير بالمحاماة مو شوية طبعا ترجع حقنا وفوگه بوسه

بوستني اخذت جنطتها وطلعت من البيت واني هم رتبت نفسي بسرعة بسرعة عندي قضية لازم اراجعها نزلت من الشقة شفت سيارته واكفة يم العمارة سحبت نفس وتجاهلت وجوده مشيت مكملة طريقي فتح الباب ونزل كتف اديه ورجع نفسه مرتجي على السيارة ماكدرت اتجاهل الوضع وصلت يمه حجيت مستهزئه

خيال: شنوو لازم من البارحة انت هنا نايم صاير حارس شخصي

نزع نظارته الي لبسها اول ما نزل من السيارة حجه ببرود مستفز

يمان: ليش ومنو انتي حتى اصيرلج حارس شخصي

ضحكت هازة راسي بغرور فتت من عنده رجعت باوعت عليه اتقربت شاورته وحجيت

خيال: انا سيده الجمال والقوة وگلبك ياوقح

رفعت راسي اله شفته مغمض عيونه ويزفر الهوى بطريقه سريعة ، عفته وكملت طريقي ولا باوعت وراي واني احس بالنار تطلع ويا انفاسي الحارة جمر رغم الجو بارد واحنا بالشتا ، ادري بي لان وحدنا هو طول الليل جان گاعد بسيارته گبال العمارة يخاف علينا ضحكت على نفسي من فكرت بكلمه يخاف علينا سمعت صوت خطواته قريبة للهروله وراي لزمني من مرفق ايدي بالعجل شلتها من عنده

خيال: لا تلمسنييي ماريد ايدك تلمس خيط من طرف ملابسي افتهمتتتت

ردف بنبرة حنونة
يمان: اهاا هيج صارت مو جنتي ماتنامين الا بحضني

خيال: جنت جنتتتت انت گلتها

رفعت اصبعي بوجه وحجيت بنبرة حازمة

خيال: اياك مره ثانية اشوفك تحوم حواليه او حوالين اختي قسمًا بذات الله تشوف شي ميعجبك

بقى متخصر ويباوع عليه ببرود كملت بنفس الحده والاسلوب

خيال: او اتحضر للي راح يجيكم هالمرة غير صدگني غير

ابتسم واردف بكلمته المعتادة
- حتى اذا كلشي تسوين تبقين خيالي الواسع وابقى انا خيالج يا مهرتي الجامحة

خيال: انت شنووو من بشرر فهمنيي انت شنووو بس اريد اعرف شكد شفت وقاحه ونذاله مثلك ماشفتتتت

عفته ومشيت سريع للشارع وگفت تكسي وصعدت بيها رجعتني ذاكرتي اليوم المحكمة والصار بيها

المحكمة ....

دخلت ويا المحامي وعفت رميم گاعدة بره بعد مانتظرته ومااجه كلت يمكن صار عنده شغل يجي بعدين

دخلنا وسعت عيوني بصدمة من شفت يمان واگف يم محامي الطرف الاخر ويتناقش ويا ردت اروحله استوقفني صوت المحامي مالتي يحجي

بكر: ممنوع تحجين الطرف المقابل داخل الجلسه ست خيال

خيال: هذا خطيبي واكف ويا يحجي

رفع راسه شاف يمان وحجه بستغراب

بكر: ليش يمان اخو المتهم يصير خطيب حضرتج

شهگت باوعتله

خيال: اخوو منو

بكر: المتهم باتر صمد مجيد يصير اخو يمان صمد مجيد

ماگدرت اتحمل السمعته راسي فتر ودخت گعدت وحجيت

خيال: المتهم مو اسمه حازم صلاح

بكر: اسمه باتر صمد منين جبتي الاسم الاخر

بقيت ساكته وفهمت اللعبة الكتل اهلي اخو وهو هسه واكف ويا وعافني اختار الباطل

خيال: بس اكو لعبة بالموضوع انا ماجنت اعرف اسم المتهم شلون هيج

كعد يمي يگلب بالاوراق وخلاهن كلهن گدامي

بكر: بس انتي موقعة على كلشي اصلا جنت استغرب من ماتردين تشوفيني وكالوا حالتج صعبة ونايمه مستشفى لهذا جنت ادزلج الاوراق بكل خطوه حتى توقعين ونمشي بالقضية يعني الشغله كلها قانونية ١٠٠٪

مسحت على وجهي وباوعتله همست بصوت يرجف

خيال: وهسه شنو راح يصير

بكر: الادله العدنا غير كافيه وهم محاميهم ملعب بس نتوكل على الله وان شاء الله خير

بدات المحكمة كمت وكفت ورفعت راسي اباوع بعيونه وهو نظره مركز عليه احس نظراته تترجاني واتذكرت كلامه سمعته قبل يومين يحجي بالنقال ماعرف ويا منو يگله

يمان: بين گلبي ووصية امي انا تهت

خلصت القضية ورغم عدم وجود الادله الكافية ورغم اشرطة الكاميرات الي اختفت فجأة حكمله القاضي براءة وخلصت القضية وتسجلت قضية اهلي ضد مجهول وسدوها بقيت مثل التايهه ادور بعيوني على احد يوكف وياي مالگيت وهو شفته مبتسم وحاضن ايد اخو من هذاك اليوم وانا موته بگلبي ونهيته من حياتي ....

من بعدها حكمة ابد ماعافتنا عادتهم كلهم وقطعت علاقتها بيهم علمودنا وانتقلنا وياها الغير بيت جان بعيد بالاطراف بوسط مزرعة گالت ان هذا ببيت ورثته من زوجها قبل كم سنه اهل المرحوم يلا رجعوا الها جانوا ماخذينه ومحد يندل مكانه وين

(عودة)...

ماتحملت انفجرت بالبچي واني بالتكسي لكن دقايق وتمالكت نفسي مسحت دموعي واخذت نفس عميق وصلت للمكتب وراها للمحكمة كملت القضية وهكذا يمر اليوم

رجعت للشقة لگيت حكمة موجودة اول مادخلت حجت

حكمة: شنهي تردين الناس تاكل وجهي وتكول مگعدة بنات صفر حمر وحدهن ببيت

تقربت حضنتها وانا احجي

خيال: حكوم يعني عاجبج البهذله الحنا بيها دوام رميم بالمعهد ومكتبي ويوميه طريق ساعة يلا نوصل

حكمة: احسن من ما تگعدن وحدجن

راحت للغرفة رحت وراها صارت تطلع بالجنط مالتنا وتحجي بعصبية

حكمة: لا له لا لو هسه كلشي يصير ماعوفجن هنا يلا لمن هدومجن ولحگني

خيال: حكمة صدك تحجين

حكمة: وحگ هو علي صدك احجي البارحة طول الليل ماهودت ونمتلي ساعة انا ماجاي اخذ رأيج انا جاي اخذجن

دخلت رميم تحجي

رميم: وانا ارجع ويا حكمة الصراحة ماكدر على بعدها

باستها وحجت

حكمة: بعد روحي روحج بس انتي على گليبي مو مثل هاي الفوصه والله شني درب بعيد وين ماشيتله على باعر هن كلهن سويعه وتوصلين

ماقبلت بقت تحجي علينا الحدما اخذتنا ورجعتنا وياها البيتها وللمزرعة ....

❛❛❛❛

وتر"

جنت بالمدرسة رجعت اول مادخلت البيت صارت بوجهي امي حجت

مرام: يلا بسرعة نزعي جنطتج والحگيني نجهز الغدا ابوج على جيه

زفرت بتعب
وتر: ماما خلي اخذ نفس شنو القضية

مرام: وغمامه يلا بسرعة اختج اليوم كلش تعبانه

شهگت بخوف

وتر: يمه شبيها عبير هم كليتها

حجيت الكلام ورحت ركض الغرفتها دخلت شفتها متمدده ووجها اصفر اول ما شافتني ابتسمت وحجت

عبير: رجعتي حبيبتي

تقربت بستها وحجيت

وتر: هم رجعتي تعبتي

عبير: لا تخافين شويه كليتي اذتني هو انا يايوم ماتعبانة دشوفيني حتى ماكدر امشي

انقهرت على حالتها سويت نفسي مامهتمه بستها وحجيت

وتر: بس ابدل واجيبلج الاكل

عبير: شلونه الخامس وياج

وتر: بعدها ببدايتة ومطيح حظي وامج تكرب عليه يادوب الحگ الزم الكتاب ساعة

زفرت بملل وكأنها تعرف بتصرفات امي

بدلت ملابسي وطلعت كالعادة مثل يوميا اجهز الغدا ويا امي وبعدها نتغدا اني وعبير وحدنا بالغرفة لان هي ماتكدر تتحرك بسبب كلياتها عدها فشل كلوي وكل شهر يسوولها غسيل كلى

كملت وطلعت غسلت المواعين ونضفت المطبخ صبيت جاي واخذته الابويه جان كاعد بالصاله وحده قدمته اله قابلني ببتسامة بارده هو دائما هيج مايضهرلنا مشاعرة ابد وقاسي الابعد الحدود وخاصة وياي بس مامقصر ويانا گعدت يمه وحجيت

وتر: بابا حبيبي

حكيم: گولي وتر بسرعة لان مشغول گاعد اسمع اخبار

اتقربت يمه خليت ايدي على كتفة وحجيت

وتر: صديقتي عازمتني على عيد ملادها فدوه خلي اروح

حكيم: لا ماكو طلعة

انتجيت علية اتوسل وانا احجي

وتر: حبيبي انت حباب حباب

بعده ماحاجي دخلت امي عاطت بية

مرام: ادسييززز شنووو هاي الگعده متستحيييننن

باوعتلها بصدمة ماعرف على شنو جاي تحجي اتقدمت عليه جرتني من گصيبتي عطت بألم

حكيم: مرام على كيفج ويا البنيه

عاطت بي

مرام: لا تدخل انت هاي ينرادلها تربية من جديد

ابوع عليه سكت وهز ايده ماعاجبه ورجع يباوع للتلفزيون

وهي طلعتني سحل من الصاله دخلتني للغرفة

عبير: شبيج ماما وياا وتر

تجاهلتها گرصتني حيل عطت متالمه شدد على ايدها وگالت بغيض

مرام: مره ثانيه اذبحج اذا شفتج هيج گاعده وتلزگه بابوج اذبحجج

جرتني من ايدي طيحتي للگاع حيل بقيت ابجي وعبير تحجي على امي عافتنا وطلعت وانا بقيت بس دموعي تنزل واختي تحاول تسكتني تمسح على ضهري وتحجي وياي

اخر شي عاطت امي من برا حتى اطلع انظف الصالة مسحت دموعي وطلعت لان ادري بيها بس اعاند ترجع عليه

بقيت انظف بالبيت وبلا قصد مرت من غرفة امي سمعتهم يتعاركون وامي تحجي بعياط وعصبيه ماعرف ليش بقيت واكفة وكعت المكناسه من ايدي ونصدمت من السمعتة ....

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

شنو رأيكم بالقصة والاحداث

شنو توقعاتكم للمستقبل

معثوراتي لا تنسون التصويت+ متابعة الحساب+ تعليق بين الفقرات♥️

متابعة ممتعة🦋