تاروت الفصل الثالث وخمسون 53 - بقلم زينب علي

#تاروت

البارت «51»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

هل تسمح
لمن أضاع العُمر
أسفارًا
بأن يرتاح يومًا
بين أحضان الزهر؟
هل تسمح
بأن ينام على جفونكَ
طفلٌ يُطارده الخطر؟

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

رميم"

ابد ماتوقعت باتر هيج يسوي شعر راسي شاب وانا اسمع صوت زينة يمه تگله

زينة: انت ماتحبني اصلًا داسوي كل هذا حتى بس تاخذ الصور والفيديوهات

ردت اطلع بس تمالكت نفسي وبقيت بمكاني اريد اشوف وين يريد يوصل انصدمت من كلامه مستحيل اصدگ هذا باتر هيج يحچي

باتر: يعني انا لو مااحبچ تتوقعين اطلگ مرتي شكو بيها اذا دزيتيلي الصور انت مو تحبيني

زينة: طبعًا حبيتك من اول يوم شفتك

باتر: بعد شكو يلا حياتي فدوه الهالوجه اصعدي فوگ ودزيلي العندچ لان تعبان واريد انام يلا بسرعة لا احد يشوفچ

صار هدوء بعدها رجع ردف
باتر: راح تدزينهن مو

زينة: طبعًا ثواني وكلشي يمك

ابتعدت من الشباك شفتها دخلت وبوجها صعدت فوگ بسرعة طلعت للحديقة شفته گاعد على كرسي تليفونه بيده ويدخن اول ما حس عليه رفع راسه بأتجاهي حسيت العبرة اذت حنجرتي الي توسعت گلت بقهر

رميم:ما توقعتك هيچ

گام بسرعة وگف وحچه
باتر: وين چنتي

رميم: بمكان سمعت بي كل قذارتك تخوني باتر وگدام عيني وويامن ويا زينة هذا مستواك بت الشاهين؟!

باتر: اششش ماريد اسمع منچ نفس واحد يطلع

رميم: اليا قذارة واصل شهل مستوى المنحط الي انت بي تريد صور وفديوات جان استحيت من نفسك عندك جهال ثنين وعمرك طگ الثلاثين وبعدك بسوالف المراهقة بس ذيل الچلب عمره ما يتعدل

باتر: ايي احبها وهسه شتردين مالچ حق يمي واذا طلع منچ صوت واحد تحسبين الله ماخلقچ ترى واصله وياي لهنننااااا

گالها واشر على انفه دفعته احچي

رميم: يا خسارة حبي بيك يا خسارة التضحية الضحيتها الخاطرك والله الا اندمك على الساعة الي فكرت بيها تخوني هي هاي الي بعتني الخاطرها زينة !

بقى يباوع عليه ابتعدت منه بخطوات لزمت راسي بألم اتمتم
رميم: وهي الهالدرجة حقيرة هيج تعض الايد الي نمدت الها كلهم ما تقبلوها من اجيت الا انا كلت لا شنو ذنبها حتى ربنا يگول بكتابة (وَلَا تَزِرُ وَازِرَةٌ وِزْرَ أُخْرَىٰ .....الخ ) بس ابن البط عوام نكسة وعمرها كله نكاسة الشاهين تجري بدمها

شفت تليفونه صارت تجي اشعارات فتحه ماحسيته الا ضحك بصوت عالي وصاح

باتر: هههههاااييي عمي ماتجيبها غير رجالها

بقيت صافنه عليه هذا شبي اتقرب عليه يحچي
باتر: ريمتي فهمتي غلط عليج بداعت الكرار والاكبر بس فهمي مستحيل اخونچ

رميم: تريدنييي اچذب اذني شبيك انت منفصم قبل شويه تهدد هسه تتوسل شبيك الخاطر ربك

باتر: بس خلي افهمچ الموضوع ظلمتيني مره لا تسويها مرتين ريمه خلي افهمچ

رميم: شتفهمني اكثر باتر لعبت نفسي ليش هيچ سويت بيه ليش ما استاهل منك كل هذا ابد مو هيچ لو شگد ما جنت سيئة ما استاهل هذا الشي منك

بعدني احچي عافني ودخل للبيت يصيح بكل صوته
باتر: يماااننن يمااان وينك هاي هيييي كلشي خلصصص كلشي صار بيدييي

ثواني وكلها طلعت خيال ويمان وحكمة وزينة هم نزلت چنت مصدمة مجاي استوعبه شيسوي شهالخبال

حكمة: اسم الله الرحمن يمه شمالك تسودنت

اتقربت زينه منه خلت ايدها على كتفه تحچي بخوف
زينة: باتر شكوو شنو الكلشي صار بيدك

نتر ايدها وصاح بوجها
باتر: لا تلزمييننييييي وخري

يمان:شكو شصاير صوتكم هرج المنطقة زينة شسوين هنا شكو خلي افتهم

ابتسمت بأستهزاء احچي
ريمه: اخوك السبع يخوني ويا زينة ويريد منها صور وفيديوهات

باتر: خاب باع هاي تالي عمري ادور صور وفيديوهات من طفلة

رميم: لعدددد هذاااا كلامكم وتصرفاتكككك شنو تسميهن

باوع عليه وگله
يمان: يعني خلصت شغلك

شال باتر تليفونه وخلا بيد يمان
باتر: كلهن دزتهن وكلشي صار موجود هنا وحيدر شناشيل صار بالجيب الزموا هاي البربروگ الحد ما يصير وبقبضة العدالة

گالها واشر على زينة ويمان ضرب على كتفه يحچي
يمان: عفية بالبطل

رميم: اي بطل شبيكم يمان صدگ تحچي ترى عنده علاقة بزينة لا تخبلني

اتقرب مني باتر رفع حاجبه وگال
باتر: طليقتي لا تدخلين لو سمحتي حياتي الشخصية لا تدخلين بيها

باوع الزينة المصدومة والدموع بعيونها من جوه الفوگ وگال
باتر: هاي تاليها رگابنا تصير بيد المزعطة

عافنا وصعد يهز بأيده الكل داخل بصمت محد فاهم السالفة شنو اقرتب مني يمان يحچي

يمان: ريمة مو هيج الموضوع فهمتي غلط تعاي وياي انا افهمچ كلشي بس اهدي ولا تعصبين اذا طلع مسويها صدك انعلچ ابو ابوه بس انا افهمچ

رميم: يمان انت تعرف بي وبعلاقته ويا زينة معقولة يمان انت تسويها ؟

حكمة: فهموني لا اكطع نعال على روؤسكم شكو وشنو يخونچ ويا زينة باتر ما يسويها ويا الامانة العدنا

خيال لزمت حكمة تهدي بيها
خيال: تعاي وياي هسه يفهمونا حبيبتي خلي نگعد عيب هسه نفضحنا كدام امة محمد اصواتنا طالعة نص الليل

رادت زينة تصعد صاح بيها يمان
يمان: اياچ وبالچ تتحركين من گدام عيونا يمه لزميها يمچ لاتخلينها تتحرك على ما افهم رميم الموضوع واجيچ

زينة: شنو تريد تاخذني رهينة ترا انا بت الشاهين ماتنلزم هسه بأشارة وحده اسويكم طحين

يمان: خوش يمه لزميها

اتقربت منها حكمة تحچي
حكمة: ها طلع السانچ يالخوينسه تعاي هنا اريد اشوفچ تتنفسين

ماقبلت گوه سحلتها حكمة الغرفتها صاح يمان على باتر اول مانزل گال

يمان: ريمه وباتر تعالوا وياي بالغرفة وباتر جيب حاسبتك وتعال اخذني رحت للغرفة ويا خيال مدري وين راحت شويه ورجعت دخلت ورانا

خيال...

صعدت وراهم بعد ماتاكدت زينة لازمتها حكمة ، اشوف رميم ترجف من عصبيتها

ويمان گام جاب الحاسبة والتليفون نفسه الي ماقبل يفتحه باتر الرميم

وگعد گللها
يمان: سمعيني من البداية للنهاية وتفهمين وتستوعبين وتعرفين اقل غلط راح نروح بيها كلنا فهمتي ريمة !

فتح الها الابتوب وصار يطلع الها اشياء تشيب الرأس منها زينة وهي تزور ابوها بالسجن وفيديوهات ويا ولد جاي تنطي جنطة واكو فديوهات تنطي اوراق وفيديو ينطيها حاسبة باتر

يمان: شوفي احنا مو ثولان وزينة بت البارحة مستحيل تعبرهن علينا وبكل شبر بالبيت اكو كاميرات وشفنا مكالماتها ولازم واحد بينا يشتغل ناعم ومحد يعرف يسوي هاي السوالف غير باتر وخاصة هي اخر فترة دارت وجها مني وصارت تنجذب الباتر والتليفون بي مكالماتهم ومسجاتهم كله يوصلني اول بأول چان لازم نسوي هيچ حتى نصيد أيمن الي مسافر وابو حيدر شناشيل

رميم: منو أيمن ؟

يمان: أيمن واحد جان يشتغل ضدنا وخرب شغلنا كله وجان ينزل مواد ممنوعة احنا ما ننزلها ما نزل هيج مواد ابدا شغلنا مجان متاجرة ولا بيع شغلنا تأمين طريق لا اكثر وتأمين طرق فقط يعتبر مو متاجرة بس مساهمة او تستر وما جانت هاي الاسلحة تروح الاي جهه ارهابية او تتمرد على الحكومة تروح الاسلحة للعشائر تگدرين تگولين كذخيرة وما النا اي علاقة بالمخدرات او الاعضاء او الدعارة كلها ما شتغلنا بيها

خيال: وبعدها شراح يصير بعد ما تسلمونه

يمان: نسلم روحنا بيدنا بس هسه محتاجين زينة بسبب ان زينة عدها علاقة ويا أيمن الي احنا نريده هسه ومن باتر دخل زينة من باب الحب وهي طايشة بسرعة سلمتها گلتله تسلمه ايمن والفيديوهات مال الشغل

تنهد باوع الرميم وگال
يمان: اكيد مايريد سوالف خايسة مثل الي بعقلچ هاي الفيديوهات تبين دخولية ايمن للعراق حتى من تتسلم للشرطة يكون شغلنا قانوني ومايطلع منه وهسه تلكين علي استلم وبلغ وتقريبًا زينة خلص دورها حاليًا

خيال: يمان بعدها طفلة واكيد ضحكوا على عقلها وانت الآخر لحظة تعاملها معاملة حلوة ابد ما بين عليك

يمان: للأسف تمنيت اطلع غلطان وظالمها بس هاي بعد مثل مجاي تشوفين گدامچ كل شي بالادلة

خيال: طيب وين راح توديها

يمان: قبل فترة دورت وسألت طلعت عدها خالة عايشة بتركيا تواصلت وياها وطلبت اسفرها الها راح اكسب بيها اجر وماأذيها واسفرها تبقى مراهقة وطايشة واكيد ابوها ضاحك على عقلها من جانت تطلع من المدرسة واكو جماعة ياخذونها اله ما شفتيها يوم تحبني يوم تحب أيمن وهسه باتر واذا تبقى حتى دائب تحبه

باتر : وهاي اخير مهمة راح تخلص وراها راح نتسلم للشرطة ونشوف العدالة شلون تاخذ مجراها

خيال:ممكن تنحكم مؤبد او إعدام انت تهريب اسلحة والقانون هذا عقابة الكم

يمان :صح لكن بسبب ان احنا تعاونا وياهم في أسقاط اكثر من خمس شبكات بالبصرة يصير علينا تخفيف حكم بالاضافه الا ان مساهمتنا ما تتجاوز الـ 7 بضائع لهيچ حكمنا يتخفف وهواي بس هم ممكن ننحكم سنتين او اكثر

باتر: وبعد هاي الموضوع كله ينتهي تطمنوا شغلنا كله قانوني وزينة هم ورقة وحتركت يجي دائب يحجز الها وتطير لان بعد ما راح نحتاجها بشي ومجرد ما نلقي القبض على أيمن وأبو اخير شي نكون خلصنا من شغلنا الغير القانوني تمامًا

باوع يمان الرميم وگللها
يمان: وهسه باتر بريئ وما خانچ جان الموضوع علمود شغلنا لا اكثر والتليفون جان بي الصور والمحادثات وكلشي يخص زينة والشغل ما اكدر اكلج سامحي بس هذا الموضوع كله وانتِ حرة

گالت وحچت بهدوء وبرود
رميم: تمام من رخصتكم بكل الاحوال يعتبر طليقي ومالي علاقة بي ولا بحياته الشخصية وربي يفك ازمتكم ويخفف الحكم عليكم بالنهاية تبقون اصحاب أطفال

گام باتر اتقرب منها ونتر بصوت خافت
باتر: ابقي بهذا عقلچ خلي نشوف وين يوصلنا

توجه للباب يريد يطلع وهي تكتفت صاحت ورا
رميم: عقلي يطيرك السابع سماء ينزلك السابع ارض وانت من هاي وقيس

كالتها وتوجهت للباب جرته من ايده وفتحته تحچي بنتر
رميم: وخر انااا اطلع اول

عافتنا وطلعت وهو تحسر بتعب طلع وراها يحچي
باتر: صبرني عليها صبرني يحزام الحمزة

بقينا بس انا ويمان الي صفن يدخن رحت گعدت بصفة حضنت ايده وخليت راسي على كتفه خلا وجها براسي يطبع بوسات بشعري همست بدموع

خيال: مو هين عليه اگلك بس مستحيل تنحكم اقل شي 3زسنوات وراح الزم القضية انا مراح اكلك أطلعك برائه بالعكس راح احرص تاخذ جزائك العادل

يمان: مستحيل اخليچ تدخلين بهاي القضية خاصة بوضعچ هذا وانتِ حامل

خيال: بس يمان

يمان: خلص خيال احنا متفقين بخصوص هالموضوع خلص ماريد نرجع نتناقش بي انا بكل ما بيه اريد ابعدكم عن الخطر

خيال: زين انت متأكد من هذول الضباط خاف تنحكم هواي حبيبي والله اموت بدونك

يمان: ميخالف شكد ما انحكم خلي انحكم اخذ جزائي بالدنيا ولا بالآخرة ولا تشيلين هم عندج رب كريم يگول كن فيكن اذا جان رب العالمين قابل توبتي ومسامحني راح اطلع منها بتسهيل من رب رحيم غفور واذا ربي ما قابل توبتي وما مسامحني راح اضل حياتي كلها بالسجن وشنو ما جان الحكم انا قابل وراضي بي لان ذبيت حملي على رب العرش العظيم ولو بقيت كل عمري بالسجن اعرف وراي ذيبة تدير بالها على كلشي من بعدي

بچت وحضنته حيل

خيال: يمان صدكني رب العالمين مراح يتركك رب العالمين ويانة صح انت غلطت بس ربك يعرف بنية البشر گوم حبيبي گوم ولا تهتم كبير الغيم راح يحلها وتشوف وراح نربي شهم سوه ربنا مايترك عبد يرفع ايده للسماء يطلب منه المساعدة يرده خايب

صار يبوس بيه ويحچي
يمان: احنا اقوى من كل هاي ظروف وراح نعديها تصير سوالف عدينا الصعب وبقى السهل

خيال: حبيبي انت

يمان: روح حبيبچ

رفعت راسي اباوع اله صار يعدل بشعري ويهمس
يمان: نگوم نصلي

خيال: يلا نگوم

گمنا توضينا وگعدنا نصلي ...

❛❛❛❛

وتر"

نايمة وگعدت على بوسات رقيقة تخترق بشرتي بلطف ابتسمت صار يزيد اكثر تحركت جريت الغطا احچي

دائب: صح النوم يااحلى عروسة عنونه

وتر: حبيبيييي نعسانة

دائب: عنوني الساعة 10 لازم نگوم حتى نروح للمحكمة نكمل العقد وبعدها نرجع للبيت

وتر: نعسانة حباب

تمدد يمي سحبني الحضنه يحچي
دائب: كسولي وراك دوام وامتحانات وراك ابنه وهواي اشياء

غطيته وگلت بنعاس
وتر: ماورانا شي نام واسكت حياتي

جعص خدودي
دائب: شلون حلگ هذا الي يگول من الصبح حبيبي وحياتي شلون حلووو

درت عليه بسته بخده وحچيت
وتر: صباح الخير دودي

دائب: صباح الحب ودودي بعينچ

ضحكت وهو گالها وخلا انفه برگبتي يهمس
دائب: تگومين لو نسوي اشواط اضافية للعبة الي نهيناها الفجر

فزيت احچي
وتر: گوم خلي نبدل تأخرنا

دائب: هاا شو غيرتي رأيچ مو نعسانة تعاي نامي

وتر: گوم دائب گووممم هسه امي منتظرتنا والمحكمة حينتهي الدوام بيها

احچي وادفع بي ابتعدت منه صاح

دائب: تعاااايي ولججج

وتر: شبيك دودي تأخرنا

ابتسم شمرتله بوسة بالهواء اضحك ورحت للحمام سبحت هو جان سابح قبلي وطلعت بدلنا وبعدها رحنا خلصنا عقد المحكمة ورجعنا للبيت الكل چانوا منتظرينا واول مادخلنا حكمة استقبلتنا بالچوكليت والهلاهل والبنات وكلهم چانوا موجودين باركولنا والتمينا كلنا بالصالة بس استغربنا حكمة كل شويه تگول الرميم عينچ على زينة الحد ما دائب سألها

دائب: يمه شكو شو كل شويه تسألن عن زينة شصاير

حكمة: يا يمه چا غير خطة اخوتك نجحت ومع الاسف طلعت هالزينة داهية ذابها هذا الشاهين بنص بيتنا

دائب: ويعني

يمان: انا افهمك بس لا تاخذ الموضوع بحساسية

دائب: ايي شو بلا فهمني

گعد يمان يسولفة من اول يوم باتر بدأ بالخطة مالته الحد البارحة نصدمت زينة الخوينسة يطلع منها كل هذا بس الي صدمني اكثر ردة فعل دائب الي گام وصاح

دائب :تضمون عليه هيچ شي !
هي هاي خوتنا هيج صارت يعني بينكم انتم متفقين وانا مادري ادري حالي من حال غيري وكأني واحد غريب بينكم

يمان: مو بس انت ماتدري حتى امي والبنات قابل غربة

دائب: بغض النظر عن امي والبنات احنا يا يوم سوينا شي وخبرناهن بس انا اخوكم المفروض اكون على علم على الاقل

باتر:اي دائب غير علمود خاف يصير شي ما گلنالك

دائب: اي مو راح اتعاون ضدكم لو اروح احچي وابلغ عليكم لو اخذ زينة واحميها بس الظاهر فعلًا انا مو اخوكم ولا معتبريني اخ الكم ومنكم وبيكم

يمان: بلا تمسلت منو گال غريب بس احنا خفنا الموضوع يطلع لهذا انطيت المهمة الباتر هو يخلصها وبعدين نگلك

دائب: انا طول عمري احطكم اول شي بكلشي اسوي وانتم بهاي ما معتبريني ومخليني اخير شي مو مشكلة انا حتى من البيت طالع

گام له يمان لزمه ماخلته حكمة يحچي صاحت بيهم

حكمة: شلوونن تضمون عليه هيج شي انتم شنو من خوان هيج تسون باخوكم جان ستحيتوا

يمان: يمه والله ماعبالي الموضوع يستاهل الغلط مني من البداية

حكمة: هاي انت عود الجبير مأمن باتر الي لسانه فالت وما تأمن بدائب سوده عليه هو اذا الحايط حجه هو حجه

باتر: يمه تشعلين الجو لو تهدينه

صاحت بي
حكمة: وغمة چا شلون تحسسون اخوكم هو مو منكم من يمتى انتم تسون شي من وراه ! الف مره گلت دائب من تتعاملون ويا تتعاملون ويا مثل روحكم تشكون بروحكم وما تشكون بدائب يمان جم مره گلتلك تأمن بدائب وما تأمن بباتر وانت كذالك تأمن بي وما تأمن بيمان

عضت على اصبعها تحچي وتفرفح
حكمة: من اخوكم يصير له ملجأ غيركم يروح اله معناها خسرتوا وخاصة هاي حيه من تحت التبن وانتم غمان راح تبقون مگابليني لحد لان وداعته هو عزيز گلبي اذا طلع من البيت مغتاظ وزعلان اشعل صمد بكبره

دائب: عوفيهم يمه عوفيهم اريد اشوفهم وين يوصلون بهذا تصرفهم

يمان: والله ماردت اوصل الشي بس شفتك مشغول وگلت مازيد حملة واوله وتاليته يعرف

هز رأسه بوعيد لزم ايدي جرني ورا وطلعنا من البيت بلا كلام صعدنا السيارة وانطلقنا بيها

الطريق كله محترگ حرگ

دائب: شلون هيج يسوون معقولة بعد هذا العمر كله يعتبروني مو اخوهم بعد هذا كله انا هيج مو اخوهم !

وتر: اكيد لا حبيبي مو هيچ قصدهم بس يعني او شافوك مشغول يمكن حسبوا الموضوع مو مهم وانت اخذته بحساسية يجوز مرادوا احد يعرف

دائب :انا مو احد انا اخوهم انا عضيدهم شنو مايگلولي من يمتى نضم على بعض شيء

وتر: وهسه احنا وين رايحين

صفن شوية بعدها گال
دائب: تذكرت شي ممكن يفيدنا

وتر: يم أمك

أومأ بـ ايّ وهو ساكت بس العصبية هيج تطافر منه

وصلنا البيتها اول مادخلنا تلگتنا بالاحضان كيفت عبالها هي اجيناها اول شي

أوتار: حبيبي ادري بيك ماتنسى امك يبعد امك

باس راسها بكل برود وبتعد منها گعد على التخم وحچه

دائب: اگلج عزيز ابوي حسب ماعرف جان ضابط صح !

أوتار: ايّ ضابط وهسه ترقه وصارت رتبتة عالية كلش حتى هو قبل أربع خمس سنوات چان يدور عليگ كلب الدنيا فوگ راسي من حچيتله الصار وبعد ماعرف هو بقى يدور عليه

عدل گعدته يباوع عليها همس
دائب: شنو الصار گلتيله شمرته بالشارع

نزلت راسها ماجاوبته بسرعة غيرت الموضوع وگلتلي

أوتار: ايّ وتوره الحلوة ام لسان شلونچ مرتاحة ويا ابني

شابكت ايدي وچنگلتها بأيده وحچيت
وتر: طبعًا مرتاحة خلصت عمري كله عايشة تحت جناحه حتى وانا بعيدة عليه چان مغرگني بخيره وحنانه وبعد كوم اشياء من اليحبهن گلبچ الدور والعتب على الشمرت هالزين كله وما التفتت وراها

التفت عليه دائب مبتسم رغم هو من مزاجه يسوء او يتعصب لو يموت ابتسامة ماتنرسم على وجهة حمحم وگال

دائب :عندج رقمه ؟!

أوتار: بس لا تريد تروح العزيز

دائب: يمه هذا الشي يخصني وهسه عندچ رقمه لو اروح ادبره بطريقتي

گامت وگالت
أوتار: ايّ عندي ثواني واجيبه الك

گامت تجيب الرقم اباوع جسمها يجنن انثوي وضعيفة اباوع على روحي واباوع عليها تضربني عشرة صفر

اول ماطلعت باوعلي دائب وگال
دائب: شبيچ تباوعين عليها

وتر: دخيل ربك شتاكل هاي امك باع النضارة الي بوجهه باع جسمها وانا صارلي ساعه مستحية شلون اصارحك اريد بركر باع هي مسويه شوربه بروكلي حاسة نفسي عجوز

دائب: راح تحسدين المره ثول دكي الخشب

وتر: لا تخاف عيني مانحسد امك

سكتت من طلعت بيدها تليفونها انطته الدائب وگالت
اوتار :هاك يمه هذا رقمه

اخذه نقل الرقم التليفونه وانطاه الها
دائب: هاي هي مشكورة عيني يلا وتر

رجع گال الأمه
دائب: اذا حتاجيتي شي تصلي عليه

طلعنا وصعدنا ربط التليفون على السياره وخابره

شوي ورد صوت رجال

عزيز: الو منو وياي

سكت شويه يعصر بعيونه ويدك راسه بألم مديت ايدي لزمت ايده باوع عليه بنظرات ضايعة وهذا يصيح الو وتفضل استجمع قوته وگوة جلى صوته

دائب :السلام عليكم عيني وياي عزيز

قبل اسمه گال الرتبة مالته

عزيز: اي عيني وصلت منو وياي

دائب: ويا دائب ابن اوتار ابن حضرتك

اجانا صوته مثل المصدوم گال بفزع
عزيز: دائب بابا هذا انت شگد دورت عليك وهاي الغبية مدري وين ذبتك ابني حبيبي وينك دليني مكانك اشوفك اريد اجيك انت وين

غمض عيونه وگال بعدم اهتمام
دائب: ما يحتاج دليني مكانك جايك بس ياريت مو بمكان عملك لان زوجتي وياي

عزيز: لا تعال البيتي انت مو غريب وليدي هلا بيك تعال يابعد ابوك بمنطقة*****

هو يحچي ودائب يهز بأيده سده وگال

دائب: لو ما الزمن الاغبر انا امد ايدي واخليها بيدك انت

طريق مر بهدوء

وصلنا البيت كلش كبير بمنطقة راقية دگ الجرس اول ما نفتح الباب استغربت من ابو طول بهيبة ما شاء الله حيل مرتب من صدگ لايگ الاوتار

بقى صافن مصدوم بدائب گال بصوت خافت
عزيز: انت دائب ابني

دائب: انا اسمي بالجنسية دائب شهاب الدين وانت اسمك عزيز

ما حسيت غير حضنه وظل يبچي
عزيز: شگد دورت عليك يابعد ابو شگد سألت عليك يا يابه امك كالت ذبيته بالشارع شصار بيه من گلتلي هيچ شلون حالك يابعد ابوك

ابتعد منه بكل برود
دائب: اهلا عيني جايك بخدمة وعتبرها رد دين على عدم تربيتك الي

عزيز: شلونچ بابا

وتر: الحمد لله

فتح الباب وگال
عزيز: تفضلوا ندخل جوه

دائب: لا هنا كلش زين باع من الاخير انا وخواني طبينا بشغل بمساهمة تهريب اسلحة وهي تقريبًا 7 مرات هربنا بيها فقط وجانت الناس معروفة مو الجهات ارهابية ولا الجهات الي تحاول التمرد على الحكومة وساعدنا بالزم من اهم خمس شبكات بالبصرة واكثر من 10 بيوت دعارة وكلها احنا سويناها بمساعدة الحكومة واحنا جنا الطرف المخفي طبعًا وهسه نريد نسلم نفسنا للعدالة ونتحاسب بالقانون

صفن عليه شويه سوه بحلگه حركة اسف بعدها گال
عزيز: اذا انتم متعاونين ويا الدولة ومثل ما تگول ممكن يخفف الحكم الى النص تقريبا لان تعاونكم مهم جدا واذا انتم مو شغل مستمر وما راح الجهه ارهابية ممكن هالشي هم يساعدكم لكن مهما يكون يعتبر اسلحة وتهريب يعني يعني 6سنوات وتسلم نفسك للعدالة ويا كفاله ومحامي شاطر تنزل ممكن تنزل للـ4 سنوات وانا راح كون المسؤول عن هذا الموضوع

دائب: المقابل ؟

عزيز: المهم تطلعون من هذا الشغل وهذا الي يهمني الحمد لله مو تجارة التجارة مؤبد الى اعدام بس ما گلتلي منو اخوانك ولد اوتار

دائب: الموضوع طويل اوصل وتر للبيت واجيك

صعدنا بالسيارة وانا احچي
وتر: شنو راح يصير هسه دائب راح تدخلون سجن

دائب: چا شني دولة الخلفنا واحنا ماندري غلطنا ولازم نتعاقب بالقانون وحسب الأصول حتى بعدها نعيش حياتنا مرتاحين

وتر: بس انتم سلمتوا من اهم خمس شبكات بالبصرة ليش ما يسجنوكم بسبب هل شي

دائب: يتخفف الحكم علينا بسبب هذا الشي مو ما ننسجن نهائي طبعًا ننسجن واحتمال العقوبة هواي ويمكن مؤبد

سكتت وهو اتصل بالولد مكالمة جماعية رابط الفون على السيارة

اول شي بقوا يحچون عليه لان زعل عليهم وبررون اله

دائب: ماكو داعي تحجون هذا شي يخصكم رحت الابوي وگال ان احنا ما نعتبر هربنا
نعتبر مساهم لان احنا مجرد امنا طريق نقلهن داخل البصرة والسجل مالتنا نظيف يعني ننحكم اربع سنوات الى ٧سبع سنوات

باتر :اليوم نكمل من مهمه أيمن الي طلع هو ابن حيدر شناشيل وكلهم بالجيب حتى ما يحتاج نروح بس ايمن دفتره نظيف راح يبقى يشكل خطر علينا
لان حتى لو الزم ابو يبقى هو ما عليه شي

بوقوا يسولفون بخصوص الشغل الحد ما وصلني للبيت طبيت واجت حكمة بالباب حجت ويا دائب وانا ما انتظرت اسمعهم بسرعة دخلت جوه شفت خيال صارت گبالي حضنتها وبچيت

خيال: شبيج امي منو وياچ ليش تبچين

وتر:صدك راح ينسجنون سمعتي راح ينسجنون اقل شي 7 سنوات انتِ مو محامية طلعيهم

فتحت حجابي حتى اخذ هوا چنت ابچي وگوه اسحب النفس
خيال: اهدي حبيبتي هذا جزاء اغلاطهم ولازم يتحاسبون عليه ويتحاسبون بالدنيا ولا بالاخرى ومستحيل انا اكدر ادخل يمان مستحيل يقبل الزم هيج شي ولا يدخلني بهذا المجال وكل الي علينا نصبر وندعي ربنا الرحيم يفرج هاي الغمة علينا

وتر: خيال تخيلي ينسجون سبع سنوات

خيال: حبيبتي بالنهاية هذا امر رب العالمين ندعي ان يخفف الحكم عليهم يطلعون النا سالمين يلا عمري اهدي وصيري سباعية ورانا ايام حتى لياليها صعبة مو مال نبجي ونضعف لازم نصير اقوى من هيج متفقين

بقت تهدي بيه بعدها عفتها وصعدت على كيفي اسحل بروحي مالي خلگ حتى روحي ومابقى شي على الدوام وراه نص السنة تقريبا 3 ايام

فتحت الباب ودخلت شفت غرفتنا مرتبة تأملت الغرفة شلون اغراضي وغراضة كلهن سوه ملابسي وملابسة حسيت نفسي صدك تزوجت وصار مسؤوليتي حسيت الاول مره ان انا ام وزوجة وهذا الشخص شريك حياتي الي الآخر العمر راح اضل ويا

شفت اكو صورة النا انا ويا مصورتها النا رميم بعرس خيال واحد يباوع لثاني والصورة جانت تجنن حاطينها على الميز مال الجرارات

بقيت صافنه علينا برغم متناقضين بكلشي ومختلفين بكلشي حتى ملامحنا وتصرفاتنا والي نحب والي نكره بس بينا ترابط روحي اقوى من كلشي

انسان حبني من عمر الاشهر لحد هاي اللحظة اهتم بكلشي يخصني بدون ما يزعلني بيوم حتى من مره ضربني من جنت عندة ما ضربي حيل او أذاني لكن مرات من تنفرين من شخص تحسين حتى النظرة مالته ما تتقبلينها وتحسين بيها مؤلمة ومكروها

ومرات شخص تحبي يضربچ حيل بشقة ماتحسين بيها اكو صوره بصف صورته هو واخوانه حاطينها كلهم ضاحكين اباوع على ملامحة شكد حلوة برغم الي يشوفة يكول معقد وحقنه بس دائب مايحب ينطي مجال الاي شخص خارج اطار عائلته وعلي وفرات لانهم اشخاص مقربين على الرهبان وحنون جدًا اكثرهم حنية وخوف دائب شخصية استثنائية عمري متوقعت راح اتقبلة او احبه

بس كتشفت انا اشوف الدنيا بعينه ...

بدلت ونزلت جوه زينة بغرفة حكمة ماتخليها تطلع وتتحرك سمعت الحدما يحجزون الها ويسفرونها الخالتها لان اعرف بيهم مستحيل يسلمونها للشرطة لو يعرفون ينحكمون مؤبد من بعدها مرت الايام كآيبة وانا بدأت عندي امتحانات ويا الامتحان وحامل ومنا موضوعهم والسجن احس نفسي هلكت ....

خيال...

گاعدين بالبيت وساكتين ننتظر ونشوف شراح يصير انتبهت على يمان يحچي ويا الولد وهو عينه بالحاسبة

يمان: صح اليوم احنا راح نتمم اخير شبكة بس تذكروا ان ايمن ابن شناشيل مسافر وما عليه اي شي او اشكال وراح يلاحقنا الخطر بكل مكان لهيج احنا اليوم راح نبقى بالبيت وخابرولي فرات شوفولي وين صار بجوازات وعلي هو الي راح يروح ويا الضابط حتى يلقي القبض على حيدر لان شغلهم كله مكشوف اصلا

طول ما احنا نسوي عشه هما واحد رايح واحد جاي وكل شوي مخابرين احد وكل واحد حاط سلاحة يمه لحد ما فجأة عاط باتر يگله

باتر: سباععع هاي هي خلصت يمان خلصت لزموهم اباوع يمان كبل كعد على التخم وحط ايده على عيونه بتعب ودائب حضن باتر

باتر: كفو بخوتي گدرنا نطيحهم خلصنا خلصنا ههاايي بينا وبين الحياة بس السجن بعد خلصنا من كلشي

طلعتلهم حكمة تسأل
حكمة: شمالكم نرعصتوا شصار

راحلها دائب باس راسها وگال
دائب: يمه عدت الأيام السودة عدت بقى القليل مابقى شي راح يخلص كلشي

گام يمان يمهم ماعرف شنو حچوا بعدها طبطب على ظهرهم يحچي

يمان: سباع ولدي الحمد لله تجاوزنا هاي الشدة

دائب: بس تبقى اكو مشكلة ايمن بعده حر ومراح يسكت عن اعتقال ابو ابد واحنا تقريبا مكشوفين گباله بس احنا ماعدنا شي عليه غير جم معلومة

يمان: سهلة هاي البنات نطلعهم هما وامي نوديهم الاربيل هناك أأمن الهم وياهم فرات وعلي واكيد احنا بوقتها نكون لازمين ايمن يلا نسلم نفسنا

باتر :هسه نحضر المهد قبل الولد المهم خلصنا العالم منه هل نكس هذا طاح بالعالم نهب بنهب مو زين راح وتسلم لدولة وخلصت العالم من شرة

يمان: المهم ما سوينا شي وحدنا كلشي سلمنا لدولة والقانون والشغل كله قانوني وبالاصول من اول مهمة سويناها جانت كلها ضباط ويانا حتى يكون اكو شهود النا

حكمة: شلون نطلع ودراسة وتر

يمان: هي بس شغلة دراسة وتر عائق بعد طن هستوها خلصت نص السنة منا لحد ما تمتحن بكلوريا أيمن جاي وگاعد النا ركبه ونص

كل هذا واحنا ما فاهمين شكو وشنو ديصير كملنا العشه نقلنا على ميز طعام وصحنالهم

گوه عليهم اكلوا شويه الكل تضرب صفنات واحنا من غير شي الگعدة متنطاق بلا تعليقات باتر والشقة مالته

خلصنا وبقوا گاعدين هواي جوه يتناقشون ويسولفون ويا حكمة الحدما كل واحد صعد الغرفته

بدلت ملابسي واجيت تمددت على مكاني اشوف يمان عينه بتليفونه نغيته من خاصرته اتحرش بي

خيال: يحلو شدعوة ما منطينا وجه

ابتسم ترك التليفون واتقرب عليه حضني
يمان: صايرة تتحرشين

بسته بخده وحچيت
خيال: اتحرش برجلي متحرشة بيك قابل

يمان: هم صدگ

ابتسمت رفعت نفسي نمت على ايده وهو ايده الثانية صارت على بطني تحسسها يحچي

يمان: يمتى نعرف جنس الجنين

خيال: مابقى شي وادخل الشهر الرابع ونروح انا ووتر ونشوف لان ماتقبل تعرف هسه تگول وياچ

باوعتله ورجعت همست
خيال: شنو تتوقعين يطلع جنس الجنين

يمان: اليجي من الله نعم الله كلشي الچان نعمة

خيال: حكمة تگول توأم حتى انا هيج حاسة

خلا راسه برگبتي يهمس
يمان: توأم بنات لو واحد منهم بنت شايلة عطرچ ايبوويي يويل حالي املك الدنيا واهلها اذا صارت عندي بنت

ابتسمت حضنته حيل وغمضت عيوني كالعادة مثل كل يوم يوصيني اتوضأ قبل النوم وهو يبقى يهمس بأذني آيات قرآنية يگول الطفل ببطن أمه يسمع الي الأم تسمعه

غفيت على همساته ماعرف شكد مر وقت فزيت على صوت شهگات خافته خفت ردت اگوم بس تراجعت من شفت يمان يصلي

بقيت اسمع توسلاته وادعيته طول الليل وهاي هو مو بس اليوم يوميًا على هذا الحال يبقى يصلي ويناجي رب العالمين طول الليل

اخر فترة يمان كلش التزم بعبادته بحيث صار يسوي طقوسه الخاصة قبل كل صلاة وهواي يقرأ القرآن بس يصير عنده مجال اصعد اشوفه لازم القرآن ويقرأ خلص صلاته ورجع تمدد يمي درت نفسي عليه دحست روحي بحضنه رفع الغطا علينا ونمنا

الصبح گعدت على صوت تليفون يمان يدگ طلع من الحمام اخذه وجاوب خلا على الميز فاتح مايك

يمان: تفضل منو وياي

علاء: السلام عليكم وياك محامي المرحوم صمد وانت يمان صمد وباتر صمد أبنائه صح !

يمان: وعليكم السلام اي نعم تفضل صاير شي

علاء: بخصوص الميراث مال ابوكم ياريت تنوروني بالمكتب او انا اجيكم تنطوني عنوانكم

يمان: اي انت تعال بمنطقة**** ثاني بيت على ايدك اليمين

سده گمت يمه بسته وصبحت عليه حچيت متسائلة
خيال: هذا محامي صمد شنو ميراث هسه يلا تذكر

يمان: اندري طلعلنا ميراث من صمد تالي وكت

رحت بدلت وطلعنا راح دگ الباب على دائب وباتر يصيح

يمان: كوموا هييييو راح يجي محامي عدنا شغل كوموا

طلع باتر جان نايم بغرفة الصغار
باتر: انت طول الليل اضرب ركعة وگعدلنا من الصبح شغل ما شغل شوكت تلحگ تناممم

يمان: بلا لغوة انزل وراي طلعلنا ورث من ابوك

هز ايده ماعاجبه ورجع دخل نزلنا جوه صبحنا عليهم ومن بعدها دائب وصل وتر للمدرسة ورجع الحدما اجه المحامي گعدوا بالاستقبال وحكمة تتسمع عليهم ويمها رميم رحت وكفت يمهن احچي

خيال: هسه يطلع واحد من الولد يگوم يحچي

حكمة: اشش خلينا نسمع

علاء (المحامي) : طبعًا هاي لفلوس هي ميراث الكم انا الي عليه اجي وانطيكم اوراقه وانتم تتصرفون بكيفكم بهاي الاموال

باتر: ليش هو شكد عنده شو كضه حياته حافي مهتلف

علاء: ابوكم يمتلك $$$مليون دولار

گال مبلغ خيالي يعني اكيد طلعها كله من فلوس الحرام صاح دائب

دائب: بوية طلع عدكم ثروة تعيشكم وتعيش احفادكم بختتتت

باتر: هلا هلا راح نلعب بفلوسسس صمد لعببب عمي طگينااا يالربع

ضحكت اكيد هيج جاي يسسون ويمان ما قابل سمعت صوته يحچي

يمان: عيني استاذ علاء هاي الأموال كلها تاخذها وتتبرع بيها الدور الأيتام المحتاجين صناديق التبرعات والمتسولين هذول الفلوس من ايدك للتبرعات ودور الايتام دار العجزة وزعهم انت بالتساوي على هذول الاشخاص احنا مانريدهم ولاتبقي فلوس احمر اي عائلة محتاجة وقسم منها وديها للنازحين هم

گالت حكمة بفخر وابتسامة
حكمة: عفية بولدي ورفعة راسي يبعد امكم

رجعنا للمطبخ على ما طلع المحامي رجعوا گعدوا يم حكمة ويشتغلون على موضوع ايمن وقرروا يأجلون كلشي حاليا الى ما بعد امتحانات وتر

زينة اخذوها گالوا الخالتها تجي تستلمها من بيتنا وفعلًا اجت واخذتها من بيتنا والرهبان وصلوهم للمطار وتأكدوا منها طارت وراحت يلا رجعوا ونقفل بابها

وتر..

گاعدة انتظر خيال تكمل تبديل حتى نروح للدكتورة نعرف جنس الجنين ودائب ويانا تأخرت لزمت بطني وصحت بكل صوتي وانا واگفة يم الدرج

وتر: اي ديلا رايحة العرسجججج هو بكل الاحوال تعرفين شنو الي بطنچ صارلها ساعة

صاحت بيه رميم
رميم: ايعع وتر صوتج قرجججج طرشتيني

التفتت عليها تخصرت احچي
وتر: بالله ماسكتين عني انتِ وفروخچ الي يسمعها يصدك لو ما جهالچ بعدهم هستوهم بدأوا يناغون وصوتهم واصل النهاية الشارع

وگف يم دائب يحچي
دائب: شدعوة عيني ام الأكبر اعتبري بنتي واحد من جهالچ لو باتر يجوعر ماتحچين شي

رميم: دخذ بنتك واشطح لا ابتلي بيك انت وباتر

دائب: رميم مان اسقري بنفخة تطيرين

بقوا يشاقون ويضحكون وانا رجعت صحت

وتر: خيياالللل يلااااا

نزلت مدري شدور بجنطتها
خيال: يبويييي اي خبصتيني اريد البس حذائي ماعرف شبيج مشلوشههه شعندج رجل يطلك حماية تفلك وخبصتينا

وتر: اريد اشوف ابنيييي موزين مني وانتظرتچ شهر

خيال: ديلا امشي كملت

گالتها وراحت الحكمة باستها تحچي

خيال: حكومتي رايحين احنا محتاجة شي يروحي

حكمة: بعد گلبي الله وياكم درب السلامة ربي يقر عينكم بالاولاد الصالحين البارين الي يشليون كبرتكم يمة امانة الله ورسولة طمنوني عنكم اول ماتطلعن خابرني ماتحمل اصبر لمن ترجعون

خيال: بعد روحي بوجودچ يلا مع السلامة

طلعنا وركبنا بسياره وكعدت گدام وخيال ورا وصلنا والحمد لله هستوه جاي دورنا دخلنا سوه اول شي بدأت بيه

- يلا ياحلوة تعاي كعدي نشوف شنو جنس نونو وصحته

مدري ليش خفت اليشوفني يگول موديني للمگصب وجهي صار اصفر تمددت وخلت الجهاز على بطني بقت شويه ساكته تگلب بي بعدها گالت

- فدوه النونو صحته زينة ووضعه مستقر وهذا هو شوفي كاعد الباشا

حچيت بصدمة
وتر: ولد ؟

- اي باعي

كالتها وتأشر على جهاز

- ولد هذاك هو مبين شحلوة يشبهه ماماته

دموعي من وحدها صارت تصب وانا احچي
وتر: صدگ يعني

- لا تبچين ماما الحمد لله حبيبتي ومتأكد ميه بالمية ولد يلا عيني ست خيال تفضلي

خيال ....

اتقربت گعدت واحساس الجهاز على بطني شعور يجننن وتحسين گلبچ يدك بكل جسمچ والشعور يشبهه اول مره حسيت نفسي احب يمان ويشبهه من عقدنا يشبه كل لحظة حلوة ويا زوجچ وشريك حياتچ

سألتني الدكتورة
- حاسه بيچ توأم لو لا

خيال: لان اختي صار عدها توأم وهم بطني مقسومة اي جاي احس بداخلي روحين

- فعلًا احساسچ بمحله فدوه للحلوين الي وضعهم مستقر ويخبلونن توأم ولد وبنوته عندچ امي

وتر لزمت ايدي وانا صرت ارجف ودموعي تنزل بفرح حچيت
خيال: ولد وبنية توأم تأكدي مره ثانية لان اختتي توم ثنين ولد متأكدة من البنوته

- وداعتج حبيبتي هاي هي داتخيلها هي وگرونها ومبينه وكيحه هم مردت اخوها مرد

ضحكت احچي
خيال: يعمري فدوه العمرها شكرا الج دكتورة

بعدها خلصنا اجرائاتنا وانا طايرة من الفرح ونطتنه ادويه ومقويات ورجعنا للبيت وفرحة دائب شي خيالي جانت عيونه مدمعة وبس يبوس بوتر وكل شويه يشيل ايدها ويخليها على خده ويبقى يبوس بيها ماعرف شنو يهمسلها انا مسويه روحي مغلسة

بعدنا بالطريق اتصلت بحكمة بشرتها جايينها بالطريق 3 احفاد جكه وحده ماسمع بس الهلاهل هي ورميم ومن رجعنا تلگتنا بالچوكليت چانت طايرة من الفرح

اجاني مسج على تليفوني شفته من يمان كاتب
" بلا نقاش اصعدي فوگ بسرعة "

ابتسمت عفتهم گاعدين وصعدت فوگ اول ما فتحت الباب جرني عليه حضني يهمس

يمان: خليل گلبي وفزته مامصدگ من وصلني الخبر الهسه

خيال: راح يصير عدنا شهم وويا اخته

لزم راسي يبوسني حيل ويحچي بهيام
يمان: فدوه اروح الاخته جعلني فداكم ينظر عيني

خيال: فرحان

يمان: شلون ماافرح وراح يجوني طيور ذهب انتِ امهم وبنت هم وتطلع هيچ تشبهچ يويل حالي

حضنته
خيال: انا احبك حيل

يمان: وانا عاشگچ موت

بعدها لزم ايدي وگال
يمان: تعاي نصلي صلاة شكر الرب العالمين

رحنا توضينا وصلينا صلاة شكر الربنا على النعمة الي احنا بيها

❛❛❛❛

وتر"

شفت دائب صعد وصعدت ورا للغرفة وگفت گبال المراية اباوع البطني واتلمسها حچيت

وتر: عود صدگ راح يجينا ولد

اتقرب حضني
دائب: صغيرونيي وين اضمك انت وهاي بطنك المدعبلة شوكت كبرتي ولچ شوكت

وتر: تريدني ابقى طفلة

دائب: تبقين طفلة بعيوني شما كبرتي اساسًا انا اشوفچ تصغرين

درت نفسي عليه قبلني وانا بادلته بحب بعدها حسيته بدأ يسحبني اله ويتعمق ابتعدت احچي

وتر: مو حلالك الوضع دودي اريد اقرأ وراي امتحانات ومابقى شي حتى گعد للمراجعة

دائب: اووف شوگت امتحاناتچ

وتر: بعد رمضان

باسني هواي بوسات بعدها بدل وطلع وهاي هيچ مرت الايام عادية كلش روتينيه وهم بس مشغولين حتى باتر ورميم بينهم فترة هدوء نسبية الله اليستر من هذا الهدوء

وبعد مرور ٤اشهر خلصنا رمضان والعيد وبدأت امتحاناتي

ماصدگت شوكت صار اخر امتحان بطني وصلت الحلگي وكوه امشي طلعت من المركز الامتحاني وكالعادة يمان ودائب منتظريني الي طول ايام الامتحانات ما عافوني حتى سهر يسهرون وياي ورميم خطية تشرحلي ويمان هم يشرحلي ويبقون وياي يصبرون بيه من التعب لو خيال الي تگعد تدلك ايدي رغم هي هم حامل وتوأم كلش حملها متعب وامي كل شويه تسويلي شي معافوني ولا لحظة

الحمد لله خلصت على خير وبعد انتظر النتيجة فقط وهنا صرنا نلملم غراضنا حتى نطلع الاربيل والرهبان يخلصون شغلهم وبعدها نشوف شنو يصير ...

❛❛❛❛

يمان"

خلصنا شغلنا ويا علي واتفقنا ويا على يوم الطلعة ورجعنا للبيت 3 بنفس السيارة اول ما وصلنا باتر اتقرب على الجام يباوع ويحچي بخوف

باتر: هاي شصاير هنا شبي باب البيت مخسف

التفت اباوع وشفت الباب متفلش تفلش صاح دائب

دائب: وگف السيارة يماااننن وگفها بسرعة

ماگدرت انطق شي بسرعة وگفت السيارة عفنا بيبانها مفتحه ونزلنا نركض على البيت اول ما دخلنا شفنا البيبان مفتحة والبيت واضح عليه اثار الطلق والحديقة صايرة هوسة ....

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

اسفة على التأخير مابقى شي ونختم وهاي البارتات يحتاحلها تركيز شويه احاول ماتأخر عليكم وبنفس الوقت مااستعجل بالاحداث ماريد يبقى شي مبهم بالنسبة الكم 😔♥️♥️

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

متابعة ممتعة🦋