تاروت الفصل الرابع وخمسون 54 - بقلم زينب علي

#تاروت

البارت «52»

بقلمي: زينب علي

حلواتي لا تنسون التصويت+تعليق بين الفقرات ومتابعة الحساب zainab_ali1 ♥️

TikTok: zeinab_.ali1
Insta: zainab__.ali1

اشظل بعد من العمر
يالماتجين
راحت الدنيا بأهلها
واحنا باچر رايحين
لا گعدنا ولا حچينا
ولا اديچ تشابكن مرة ويا ادينا
ولا ربيع المر علينا
وجم خريف احترگت بسدة السنين

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

يمان"

دخلنا ولگينا الباب مسدود گبل فتحته بالمفتح وايدي ترجف والف دعاء لحد ما نفتح الباب كلشي اجه بالي ممكن نخطفن ممكن متكتلات ممكن معتدين عليهن ممكن الجهال بيهم شي لكن بمجرد ما نفتح الباب ودخلنا نركض انصدمنا من الي گبالنا عكس التوقعات تمامًا خيال ورميم گاعدات وكل وحدة سلاحها بيدها وسلاح بأيد امي وخنجر بأيد وتر

يمان: هاي شنو شصاير وليش شايلات اسلحة يمه شكو

گامت امي وصاحت
حكمة :جا شنهي تريدهم يكتلونا ونسكت طلعت سلاحي وتوليناهم ودگه مادگه هذول الصخول طلقة ما رموا شحده الي يرمي طلقة على بيتي تويلانهم بناتي يا بناتي دگه مادگه نعلت ابو شواربهم

حچيت بذهول

يمان:يعني هاي انتن مزرفات البيت ؟

حكمة: اي بس انا الرميت بمسدسي جا تريدهم يكتلونا ويطبون شلنا سلاحنا وطلعنا ونعلنا والديهم

عضت على اصبعها ورجعت كملت
حكمة: بسسس اخخخ راح حيلي جان لزمتهم ودگ بالنعال على راسهم وروس اهلهم

باتر: وشنو طبوا عليكم الحديقة مگلوبة گلب

حكمة: اي چا غير نسوي سواتر النا نوب تجي بينا طلقة خاب غير انتم ماتعرفون امكم منهي

تحچي وتهز بالسلاح

يمان: شني يمه يا سواتر رايحة تحررين الموصل سواتر ايش

اخذت المسدس من ايدها
يمان: بعدين شنهي هذا السلاح شكدودته منين جايبته يمه من يمتى عندچ هذا

حكمة: نجب نجب صارلي سنين عندي حتى اخير منكم على الاقل مرخص بعدين شنهي مستهزء بسلاحي شو تعال اجربه بيك واشوف يوجع لو لا

ضحكت حضنتها ابوس براسها
دائب راح الوتر وشال ايدها الي بيها الخنجر واخذه منها وگال

دائب: هاي شنو بابا شلازمة انتِ هذا منيلچ بعدين خنجر يعني شيسوي

برطمت تحچي
وتر: غير ادافع وياهم خاف يجونه اضربه بي

ضحك بصوت عالي جرها عليه حضنها
دائب: اخ لا يكلبي لا يروحي انتِ لا تدافعين انتِ ضلي هنا احمي روحك حبيبي انت فدوة للخنجر اروح انا

صاح باتر سكتنا كلنا
باتر: نقطة نظام بس باعوا الذيبة باعوا ذيبتكم شلازمة ولكم شايلة الكلاشنكوف مالتي ثكيلة ثكيلة ام الأكبر

ضربت خيال سلاحها على الطاولة وگامت

خيال: بالله على شنو انتم مستهينين بالوضعية وگاعدين تضحكون اكو اطفال بالبيت هاي اولًا ثانيا هذول الچلاب صح ما خليانهم يضربون طلقة وحدة على البيت بس مو معناها انتهى الموضوع اليوم اجو اربعة باچر يجي ضعفهم هاي السالفة خطرة وكلش خطرة هم البيت مو أمن لازم نطلع منا لحد ما أيمن ينلزم واذا هما اجو بس اربعة مو معناها من ضعفهم هذا مجرد تهديد وتنبيه الكم أن يگدرون يوصلون النا بكل سهولة

رميم: وانا رأيي من رأي خيال لازم نطلع منا واليوم ، حضروا نفسكم من هسه واعتقد ناخذ بس الاشياء المهمة ومثل ما وضحتوا نروح الاربيل افضل هناك أأمن النا كلنا

يمان: وهذا جان اقتراحي من البداية لهيج فرات جاب النا الجوازات بس احنا راح نروح بسيارة مو بطيارة خاف كلشي يصير تطلع اسامينا ممكن مقيدة او شي على الاقل النقل البري نأمن ان نوصل الاربيل بس قبلها نمر ببغداد الصديق هو راح يرتبلنا طلعت اربيل حتى بعدها نتفرغ الأيمن الكلب

خيال: شلون نروح اليوم وانتم كلشي ممحضرين معقولة نخلصها فنادق

يمان: فرات راح يروح قبلنا يحضر كلشي من سكن الكم وكلشي گوموا حضروا غراضكم بس المهم وياريت كل واحد جنطة وحدة هدوم ارجع اكرر ست وتر جنطة وحدة هدوم وجنط واحذيه وسوالف الكير مالتج مدري شنو ماريد كل واحد هو ومرته جنطة وحدة

صاحت بزعل
وتر: دودييييييي يگلييي جنطة وحدة انا وياك وين تكفي ما تكفي وبعدين بس هدومي ينراد جنطة وحدهن وهدومك نوب وياي !

دائب :عود احط هدومي بعلاكة مال زباله والجنطة خليها كلها الچ

باتر: والله عمي خوش دودي ابو الوسواس والنظافة يخلي هدومة بعلاگة زبالة

لزم ايد وتر يمشيها ويحچي
دائب: دودي بعينك لا تدخل بيني وبين مرتي

اخذها وصعدوا فوگ وباتر يصيح ورى بكل صوته
باتر: اااهههه دوودددييييي احبكككككك لاااااا

رميم: شنو راح ننچبس بسيارة وحدة شلون اختنگ احنا 6 وحكمتي سبعة وجهالي ثنين شنيه وين نگعد

يمان :عيني ست ريمه انا اسوق وهذول الزوج الي گدام وخيال ووتر وحكمة بالوسط وعود گعدي وحدچ ورى بعد بس فكينا

باتر: واذا تحبين اگعد يمچ ورى ادير بالي على جهالي مشتاقلهم

خزرته وحكمة صاحت

حكمة: هاهوو هاهوو ناس وين وعرب طنبورة وين نگلهم ثور ويصيحون احلبوا دوكومن سون اغراضجن بسع

باتر: چا حكمة شنو انتِ ما تحضرين هدومچ وتبدلين

حكمة: ولكم انطوني شحاطتي خلي ابرد گلبي خايب شعندي هي عباية وجواريب ودشاشه اخخخ ولكم راح يجلطني وگوم سوي هدومك انت رميم لو تطلع نخلة براسك ما تلمهن وتخليك تروح ميرد

اباوع الرميم شمرت السلاح على باتر وهي تگله
رميم: هاك الگفها

شمرتها عليه حيل صار حافة السلاح على صدره

باتر: اخخ عنيفة عنيفة ام الأكبر بداعت الكرار لمي هدومي بدربچ بالحسين ماعرف

رميم: لم هدومك انت ما مسؤولة عليك عيني طليقي

مشت گدامه وصعدت فوگ وهو يعض على شفته ويهز رأسه بتحسف ...

نسحبوا البنات كل وحدة گامت تلم اوراقهم الرسمية وملابسهم وصاروا يجهزون حتى يطلعون المكان مجهول وكلشي مجهول طلعتهم روحتهم وحتى حياتهم كلشي ما معلوم عنها تقريبًا مر وقت طويل واجه نص اليل وتحديدا الساعه ٢ الفجر واجه موعد طلعتهم من البيت
كل وحده نزلت من غرفتها وبيدها جنطتها

خيال....

الخوف مسيطر علينا كلنا الرهبان اخذوا اسلحتهم واخذوا الترخيص خاف توكفهم سيطرة او شي اسلحتهم مرخصة

وتر: دائب شنو راح يصير هسه احنا وين راح نروح

دائب :ماعرف كلشي مجهول وتر حالتنا شبه بـ أن تلعبين ويا وحوش بمتاهة والدنيا عتمة كل الي تعرف ان بأي لحظة راح تجيك ضربة وماتدري من اي جهة ماگدرنا ننتظر علي لان تأخر الوقت اتصل بي يمان گله نطلع وهو يلحگنا بالطريق

قفلنا البيت والگراج جمعنا بي سياراتنا وقفلنا عليهن ويمان جايب حارس انطاه مفتاح الغرفة الخارجية وطلعنا ركبنا بالسيارة جان نوعها جمسي 8 راكب رميم كعدت ورى هي ووتر وبالكشن الوسط كعدت انا وحكمة ، ودائب وباتر يم السايق الي هو يمان

ظلمة هندس وحرفيًا الطريق جولة ويخوف باوعت وراي شفت وتر ماسكة ايد رميم وحاضنتها الولد ايديهم على اسلحتهم دائب عيونه على المرايات كل ما نشوف سيارة ورانا نحس گلبنا راح يوگف وخاصة من الرهبان يصيرون يتهامسون بينهم

حكمة تدعي واحنا نردد وراها وخاصة هذا الدعاء
"اللّهم احفظني واحفظ ما معي ، وسلمني وسلم ما معي، وبلغني وبلغ ما معي ببلاغك الحسن الجميل"

نمشي على الطريق السريع دنيا ظلمة وبدينا نغفي والسيارات تمشي سريع يمكن دربهم مايشوفونه من تمر من عدنا سيارة تهفنا هف وتطلع

فجاءة صارت سيارة تمشي ورانا وبسرعة گبل يمان صار يسوق سريع والولد طلعوا اسلحتهم باوع يمان الخالة بالمراية وسألها

يمان: يمه الجنطة يمچ

چان يقصد الفلوس لان كلهم ضامين فلوسهم يم خاله حكمة
حكمة: يمي بالحفظ والصون لا تخاف بس شوفلنا هذا ياهو

بعدها تحچي صفت السيارة يمنا ضلت تدگ هورن لحد ما وصل گبالنا كلش ونزل الجامة رجال كبير بالعمر صاح على يمان

- بوية شبيك فحطتني التاير مالتك نازل لا يروح يبنجر بيكم بالطريق

تنفسنا براحة اشرله يمان وگله
يمان: مشكور حجي

طلعنا وراح

باتر: حجي هي وكتك هسه گطعت خلفتنا على تاير نازل دروح اكل دهينة اكل لوزينة

مشينا مسافة طويلة كلش يلا وگفوا السيارة ونزلوا يشوفون التايرات اسمع يمان يگلهم

يمان: وينه التاير النازل التايرات مثل الورد

دائب: خاف هذا الشويب من الجماعة ووكفنا حتى يأخرنا

باتر: اصعدوا شباب خلي نفلت يلا

رجعوا بسرعة صعدوا ورجعنا انطلقنا ماكو دقايق ورجعت غير سيارة تمشي ورانا بسرعة ويمان يحاول يسبقها لان الطريق سريع مابي لوفات او يغير طريقة لحد ما صارت قريبة علينا كلشش

باتر: يعني لو متأخرين بالوگفة دقايق جان الله اليعلم هسه شصار يمكن صفونا

يمان زاد من السرعة شگد مايگدر كلنا خفنا حسينا السيارة گامت ما تمشي على الگاع نحس بيها من ترتفع تطير من السرعة وليل والطريق كله تريلات متنا من الخوف نعيط وهم يهدون بينا ظلت حكمة تردد

الصلاة الإبراهيمية
(اللهم صل على محمد وال محمد كما صليت على إبراهيم وال إبراهيم اللهم بارك على محمد وال محمد كما باركت على إبراهيم وال إبراهيم في العالمين آنك حميد مجيد )

وضلت ترددها لحد ما السيارة تخطتنا ومشت گبالنا

باتر: هذا تهديد واضح ان وين ماترحون احنا وراكم

دائب: مو بس هيج لو جايبين سيارتين ومسلحين جان تكتلنا كلنا بس هاي الحرب الباردة تخوف كلش تخوف ماتعرف يمتى راح ينفذون الي براسهم

صاح بيهم يمان حتى مايخوفونا ووتر رادت تموت وبس تصيح الا دائب يجي يمها اسمع رميم تگلها

رميم: هو هاي انا حاضنتچ چا الا سور الحمه عشتو

وتر: دائب اذا ماتجي يمكن اولد هسه من الخوف

حكمة: ولك اعبرلها راح نعبر رميم ويمنا

دائب: اجيتچ بابا اجيتچ لا تخافين

گوه رميم انطتنا الجهال وعبرت گعدت بنصنا انا وحكمة ودائب بشبختين عبر وصار يم وتر ويمان گله حتى هم تراقب من الجامة الورا افضل حضن وتر يهدي بيها وجهال رميم عبرناهم الابوهم

باتر: عود هذا راح يبقى يلعب علينا افاااا

يمان: أيمن كلش ذكي عكس شلة المطاية الي تعاملنا وياهم تصرفاته محسوبه بالملي سنة كاملة يسرح ويمرح بالميناء ومحد حس عليه وما حط على نفسة مقدار ذرة من الشك او دليل

باتر: والحل احنا مانگدر نبقى با أربيل لازم نرجع شلون نأمن يبقون هناك وحدهم ؟!

گال يمان بحيرة
يمان: ماعرف شسوي وين اوديهم وين اروح بيهم يعني ؟

باتر: ابو النشمي نوديهم يمه الطير الطاير ما يمر عليهم بعد

يمان: فشلة الولد صارلي سنين تاركه مو كافي هسه رايحله ماعرف شلون اوجهه بالله الكريم الولد ابو وكفات حلوة وخاصة بموضوع تسجيلات القضية مالتك بس غير انا مافرغت اروحله بعد

صاح عليهم دائب من ورا
دائب: ترى ابو النشمي سيف مجرب ونعم من نعومه هسه من نوصله نتفاهم وربك يحلها فرات وعلي ترى هم گدامنا وحبايبنا مو تگول ثولات ومطفيات اذا هم اجو هادين عليهن طلقة ماخلوهم يرمون كل وحدة شايله سلاح بگد راسي عليمن خايف عليهن بعد

باتر: من سچينة ست وتر ام الياي حتى زلاطة ما يتسوه بيها

دائب: صدك اوتار منين جبتيها

اسمعها تگله
وتر: رميم انطته الي گالت هذا بأيام علاقتها هي وباتر منطيلها هدية

بعدها تحچي وما حسينا الا طلقة اجت على السيارة بسرعة يمان صاح الكل ينزل راسه ورجع هل مرة نفس قبل بس هذول سيارتين ومن جهتين بس الصدمة جانت هنا الولد مامهتمين ويلعبون بتليفوناتهم وباتر يصيح

دائب: اكلك باتر شو بالله افتح كلاش مو عدنا حرب شو يلا يمان تكدر تفتح !

شمر يمان تليفونه على باتر يگله
يمان: هاك افتح تليفوني وادخل لا تروح عليه

باتر: افتح تليفونك لو اهجم يولددد محد عنده ساحر ينطيني اهجم بي عليكم العباس

هم يلعبون وحكمة تصيح عليهم وتحچي والسيارتين ورانا وكل شوي نسمع طگه تصير لو يكسرون علينا وتنشخط السيارة وهذول بغير عالم يسوون هيچ حتى لا نخاف وترسوا السيارة بصياحهم وضحكهم السيارات كلش صارت
قريبة وكسرت علينا وحسينا بضربه قوية

باتر: خ*ا بيككك خسرنييي شبيك يمان سوق عدل هذا طخني باع وين ذبيتهم خسرت خ*ا على أيمن وعلى دائب هم ويا

دائب: اهوو انطوني تنين يمعودين راح اخسررر هسه غير يدعمني يمان انت مو عندك نطيني

باتر: يااا عليييييييي راح اخسررر خ*ا بيك أيمن اذا خسرت بهل حرب انعل اهله الخياس كلهممم باع باع تكتلنا يهل العالم تكتلنا

يمان وهو عين الى الشارع وسيارات وعين على التليفون
يمان: اوكف هذول بالقران خبلوني هسه غير يولون راحت الموارد

صاحت خاله
حكمة: وتيره اكو شحاطه حاطتها بعلاكه بيضه بعدها جديدة نطيني ياهااا خلي العبها على روسهمم ولد الچلب راح نموت شجاي تفصمونن وانت هي سوق عدل وانتم تلوهوهم سولهم شي صخونه امداي شمربيه حواوين يربي

رميم: صدك تحجون احنا وين وانتم وين جاي تشوفون الوضعية ترى الوضع خطر باع التيرلات والطريق ظلمة وسيارات يضربون عليكم شجاي تحسون بالله شهل لا مبالاة العدكم

باتر: ام الأكبر هاي زلاطة مرن علينا هواي هاي منهم يا رقم هسه يطگطگون ويرحون

رميم: خليك بحالك عيني ابو الكرار

وفعلًا شويه والسيارات طلعت قبلنا وراحت خوف مو طبيعي احس كلوبنا راحت الطريق صار سنين مانعرف بيا سيارة من السيارات راح نموت بيها لحد ما دگ تليفون يمان وجاوب

يمان: هلا بالعضيد الله يسلمك هاي هي هستونه دخلنا بغداد ساعة ونكون يمك ماتقصر ماتقصر ونعم منك بيتك عامر اغاتي

صاح دائب
دائب: تحس ما مكتوب بغداد ترحب بكم لا مكتوب الحلوات ترحب بكم

باتر: جوك واجوائك كله فلر وبوتوكس ولو البصرة مامقصرة

رميم: اي بيش مقصرة وياكم البصرة انت طايحة عيونك من الشوف والتلصلص

دائب صاح بألم وتر تگلة
وتر: دودي ترى گاعد بصفي خوشش

بعدها ما مكملة حجايتها وانا حسيت صارت تجيني كرفات ببطني كلشش قوية واحس صار شي دافي يمشي على رجلية تخبلت عبالي دم صحت بكل صوتي

خيال :اخخ اهه بطني يمان بطني الحك عليههه حموتتتتتت لج يمه بطني جاي تتكطع راح جيبببب

لزمتني خالة حكمة تحچي
حكمة: يا فلك راح تجيب الفرخة يمان للمستشفى گبل گبل

رميم: خالة شلون هي بنص الثامن

حكمة: من الخوف صارت عدها ولادة

ويمان توتر مايعرف شيحچي بس يصيح
يمان: يمه شبيها شبيها شسويلها سوده عليه شسويلها

صاحت بي خالة
حكمة:شسويلها يعني تعال اطلك بمكانها

انخبصوا بيه وهو تخردل حتى مايعرف يسوق صار وباتر يهدي بي اخر شي نزل هو وباتر افتر يسوق ورميم گعدت يمه وانا صرت بين يمان وخاله حكمة

وتر ...

كلنا انصدمنا ان خيال راح تولد قبلي انا هسه بنص التاسع وهي بعدها بنص الثامن هرجت الدنيا شكلها يقهر وانا صرت ارجف من الخوف وحتى مغص صار عندي لزمت ايد دائب حيل حس بيه خايفة سحب راسي الحضنه ساد اذني ويهمس بأذني الثانية

دائب: لا تخافين بابا لا تخافين يعمري ماكو شي

وتر: خطية خيال جاي تتوجع

دائب: ميخالف بابا لا تخافين اهدأي

ماسمع بس خيال تصيح
خيال: اخ يمان راح موت راح موت ماتحمل بعد اكثر حيلي راح والله

يمان: سودة عليه اسف والله اسف توبة بعد ماكو جهال آسف والله ماعرف هيج راح تتأذين وعد بعد ماكو جهال بس لا شلعين گلبي

مديت راسي اباوع عليهم يمان عيونه مدمعة كل شويه انتبه عليه يمسح عيونه بأيده وماسك ايدها يهدي بيها لحد ما وصلنا للمستشفى

كبل طببوها وخيال تصيح على يمان

خيال: يمان اطفالي من اطلع اريد اشوفهم ثنينهم بخير اذا واحد بيهم نقص اموت وراه واذا ما طلعت امانه عندك تربيهم رميم وحكمة وتر ماتربيهم مره غريبة جهالي يربون عد خالاتهم وخالة حكمة

هنا يمان كلش فقد عليها دموعه صارت تنزل بغزارة وخيال بقت فوك الساعة تصرخ وهو ينطي فلوس للممرضات وتوسل بيهن ما تتأذه ويديرن بالهن عليها مع ان مستشفى اهلية لحد ما طلعت دكتورة وكلنا كما عليها بس هو سبقنا يحچي

يمان: ها دكتورة بشريني مرتي بخير مو

جاوبته بضحكة
- بس مرتك لعد واطفالك ههه على العموم كلهم بخير مرتك البطلة ولدت التوأم طبيعي اجتي بنوته تخبل مثل السُكر ولد جميل اية من الجمال يتربون بعزكم وراح ننقل الماما لغرفتها والاطفال بالخدج وضعهم مستقر الحمد لله بس نطمأن عليهم ونجيك وضعهم العام

طلعت خيال وودوها الغرفتها وصديقهم ومرته ما عافونا دقيقة شلون ناس شلون اخلاق يخبلون بودچ بس تگابليهم وتكعدين وهي البنت هيچ كلامها مثل امي حكمة جنوبي وحسيتها على لاهيتها تجنن وأمي ماتت عليها

دخلنا انا ورميم وأمي ويمان ورى خيال للغرفة اتقرب يمان گعد يمها لزم ايدها يبوس بيها يحچي

يمان: الحمد لله على سلامتچ خليل گلبي نورت دنيتنا واجوا البخت وشهم

همست خيال وهي تحضنته
خيال: نرجسوتي وشهمي نوروا الدنيا مو اريد اشوفهم كلبي ناطف على ريحتهم يمان فدوة

يمان: نوروا يروحي اجو هسه اگللهم يجيبونهم ماردت اشوفهم قبلچ ردت اشوفهم وياج انتضريني ثواني

طبع بوسه خفيفة على راسها وراح يشوفهم واحنا بقينا نبوس بيها ونتحمدلها على السلامة امي طلعت ورا يمان ورا شوي رجع دخل ودخلت وراه الدكتورة فحصت خيال وبعدها جابوا الاطفال گمنا حتى نباوع عليهم اية من جمال البنية تجنن تجنن صغيرونة حييللل وناعمة وتجنن خيال شالتها وشمتها حيل بقت شويه بحضنها بس رجعتها بمكانها شالت شهم اول ماخلته بحضنها بچت گبل حضنته على صدرها

خيال: اخ يا تالي تعب روحي هلا بيك أمي نورت حياتي بجيتك ربي يجعلك من الأولاد الصالحين البارين يابعد روح امك يمه گلبي يرف عليك أمي

كلهم جانوا ملتهين بخيال بس انا جنت اباوع على منظر اعمق من خيال وشهم منظر اطهر من كلشي شفته بحياتي يمان شايل نرجوسة وهي تفتح عيونها على كيف اله شلون رفعت ايدها وحطتها على لحيته وضل يشم بيها برغم ما نطق ولا كلمة غير يهمس

يمان :هلا بأمي نرجس نولدت من جديد ليش هيج روحي تعلگت بيچ بابا ليش احس روحي صارت بروحچ

ظلت طول الوقت هي حاطه ايدها على خده وتضحكله كلنا استغربنا برغم شهم بعده حتى ما فتح عيونه بس هي لا تضحك وتحط ايدها على وجهة امر عجيب عجيب حسينا

بقوا شويه گاعدين هو مايقبل يعوفها ولا نزلها من حضنه لحظة وحدة أخر شي صديقهم اخذ حكمة ورميم علمود اطفالها لان مستشفى وتعبوا وهم الصغار موزين عليهم انا ماقبلت اروح وبقينا بس احنا بس الي صار جان كسرتنا حرفيا ماعرف شلون اوصل هاللحظة وشلون استرجعها بذاكرتي

اباوع يمان ونرجس بحضنه ومثل ما سماها البخت وهي لازمه ايده وهو احسه مالك الدنيا ويباوعلها عيونه مغرغرة بالدموع

يمان: خيال مجاي اگدر انزلها من حضني احس اريد اضمها بروحي ماريد اعوفها هيچ احس روحي بروحها اختلطت هاي ماانزلها من حضني الحدما تصير عروس وحتى من تكبر ماازوجها يخسي واحد ياخذها مني

خيال: هاي شنو حبيبي اجه من ياخذ مكاني

يمان....

بعدها امها تحچي حسيت نرجس عصرت اصبعي حيل وبتسمت ابتسامة واسعة وايدها الثانية مو قربت روحي عليها حطتها على صدري
عبالي جاي تلعب او شي بس الي صدمني هو فجأة

ايدها رخت ووگعت وضلت عيونها مفتوحة ومبتسمه هزيتها بخوف

دائب بسرعة طلع يجيب الدكتورة

يمان: بختي بابا بنيتي امي انتِ شبيچ بابا

بقيت احرك بيها وهي ماكو لا حس ولا نفس الحد ماقربت راسي من انفها وشفت النفس فارق صدر بنتي ضميتها الصدري وصرخت

يمان: لاااااالالا ربي بنيتي حبيبتي بابا هسه عرفت ليششش روحي تعلگت بيهااا حتى اتعذب ربييي بنتييي اخذ عمري وعوفهااا ربييي فدوة الاسمك

وتر : شكو يمان شبيك شبيها نرجوسة اسم الله

رجعت حضنتها الصدري حيل
يمان: بنيتي امي انتي ما تموتين مرتين لا امي لا

ظلت دموعي تصب على وجها وخيال بس صافنه مانطقت ولا حرف اخر صاحت بيه

خيال: يمان بنوتي شبيها جيبها خاف تريدني جيبها هسه من تجي يم ماماتها راح تناغيني شوفنياها يمان

وتر: تخبلنا بين لحظة والثانية نگلبنا گلب يمان يصيح فقد عليها ضامها على صدرة أحتار شيسوي

ومن اجوا الدكتورة بسرعة دخلت تركض خطية حافية وحتى ملابسة الصدرية اتقربت تريد تاخذها عاط يمان

يمان: لااا ماتاخذونها من حضني روحي بيها ماتخاذونها

- خلي ننعشها بس ابتعد شويه

جرتها من ايده التموا عليها لكن للاسف الدكتورة مجرد ما باوعت للطفلة وقاست النبض نزلت دمعة منها وگالت بعبرة

- انا لله وانا إليه راجعون البقيه بحياتكم الطفلة فارقت الحياة مابيها نبض

حچتها وتريد تاخذها ماحسيت الا يمان دفعها واخذ بنته وحضنها حيل مثل الفاقد

يمان: وخري عنها مابيها شي هستوها چانت ماسكتني مابيها شي البخت بابا حبيبي يلا شو رجعي ضحكييلي والله حسيت بطعم الدنيا بضحكتچ امي انتي حبيبتي صح دخلتي لحظات الدنيتي بس هسه احسها الدنيا بدونچ ما تنطاق يا يُبه لا بنيتي لا تسوين هيچ بـ أبوچ يهون عليچ ابوچ يموت وراچ يا روحي انتِ

فقد يحچي ويشم بيها ويحضنها الصدره حيل حتى الدكتورة صفنت عليه وانا گوة لازمة خيال تعيط بهستريا وتريد تگوم ودائب لازم يمان يردون ياخذونها من ايده ماكو

فقد خطية عليها كلشي وهي بحضنه ماحسيت الا خيال صار عدها اغماء نفجعنا بيها ساعات قليلة شفناها وطول الوقت بحضن ابوها بس يا سبحان الله دخلت گلوبنا وتركت بينا اثر عميق كلش حبينا ضحكتها وكلام يمان من شبها بخالة نرجس وكاحتها وهي تلزم خشم يمان لو لحيته وكأنها سوت كل هذا حتى ابوها يتعلق بيها
نخبصنا بخيال ودائب اتصل على امي اقل الساعة وهي ورميم وباتر صاروا يمنا دائب راح ويا يمان ماعرفت الي صار بعد انطوا الخيال مهدئات وخالة حكمة فرفحت عليهم

❛❛❛❛

دائب"

بعد ما كملنا الاجراءات من المستشفى گوة يمان فاقد مايعرف وين يروح ووين يجي وماقبل الا تندفن بالنجف وشرط يم خاله نرجس عفت باتر يم امي والبنات وطلعنا للنجف غسلها وكفنها على حسب الاصول وقبلها اتصلت انا حتى يجهزون كلشي على مانوصل ....

نزلها وفتح الغطة عن وجهه مرد گلبي وهو يحچي ويا قبر امه منهار

يمان: ولج نرجس هانت الدنيا علي من بعد عينچ يا امي انتِ هم فارگتي الحياة بحضني وبنتي نفس الحالة يعني مكتوب عليه عيش مثل القدر مرتين يمه جبتلچ بنتي راح اخليها بحضنچ اليوم ديري بالچ عليها بداعتي

دائب: فدوة اروحلك ابويه انت على كيفك

تلمس وجها
يمان: وجهچ الترف يا بابا مو للتراب باباتي حلاتچ يم اخوچ بحضن امچ بنيتي

بالگوة طلعته من القبر بس من بده يشمر عليها لتراب گبل دفعت الدفان ونزل لها

وظل امسح بخدودها رفع راسه الي يهمس

يمان: خدودها باردات

ماگدرت اتحمل دموعي صرت مااسيطر عليهن

يمان: نرجس ام ابوها ما تموت نرجس بت روحي ليش هيچ شفت الدنيا بضحكتچ ليش هيج عفتيني بابا والله روحي صارت بروحچ خدودچ الترفات ما تتحمل برودة التراب تعاي ادفيچ بين ضلوعي خاف تجوعين وما اسمع بچيتج خاف تخافين من الظلمة تعاي اشعلچ روحي واضويلچ سنينچ رسمت وياچ احلام وشفتچ بعيني خريجة ردت ازفچ بيدي البيت رجلچ ماردت ادفنچ بقبر يابوية ردت احطچ بچربايتج يم اخوج ماردت احطچ بشبرين يا بوية يابوية كسرتي ظهري يابوية

بقى يبچي شويه بعدها رجع يحچي ما قاطعته خليته يطلع البگلبه

يمان: خفت احد يشيلچ وتتأذين تالي احطچ بحفرة وياگلج الدوود عمت عيني يابوية وين اشرد بيچ الدنيا الانتِ مابيها ما تنعاش بوية

حتى الدفان ضل يبچي ويا ويحاول يهون عليه وهو ماكو فاقد

يمان: ولك بعدها اشافت من الدنيا بوية ردت اشوفچ بثوب الأبيض ماردت اشوفچ بجفن وانت ماعشتي غير ساعات بوية بوية اشتريتلچ كلشي حلو ليش اختاريتي الجفن باباتي

يا بختي منين اجيب البخت بعد وانتِ رحتي

گعدي واخذج الامچ بابا ولچ بابا كعدي شلعتي گلبي والله

بقى على عالحال الحد ماسحبته گوة واخذتها من ايده ونزلتها وانا روحي رايحة وطلعت بسرعة لزمت يمان والدفان بده يذب عليها التراب
وهنا يمان فقد

يمان: نرجس بويه خاف تختنگ ولك دائب عوفني ولك شلون يهون عليك تلزمني وبت اخوك جوه التراب ولك احلامي كلها جاي تندفن وخر عني دائب بداعت الخوه خلي اطلعها دائب اريدها خوية اريدها اريد بتي بداعت خوتنا والله ما تتحمل والله والله خفت خاف لحيتي تجرحها ولك دائب هدني اخذها هدني التراب دائب وثكيل عليها

حضنته حيل وصرخت من كل گلبي على حالته يعني ماعرفت افسر شنو سر هالتعلق العجيب وهو ماشفها بس دقايق مو اكثر

يمان: ولك دائب گلتلي جهالي ثنينهم اريدهم شلوننن اروح الها بدون بتها شلون ولك شلون احط عيني بعينها وبتنا ماكو شلون عيني تنام وبتي سكنت المگبره شلون ليش يمه حطيتيها يمچ يمههه يمهه تلكي بتي يا يمةة خليها بحضنچ لا تتأذه تلكيها بتي اجتلچ واخذت حيلي وروحي وياها يمه مرتين رحتي مني يمه هيلي نهد مرتين متي بحضني

ورا ما ندفنت دفعني وراح حضن گبرها

يمان: اضمچ بين ضلوعي يُبه شلون نايمة هسه بابا بوية شفتج بعيوني خريجة والله شفتچ خريجة ومحققه كل احلامي بوية من شفتچ كبرت احلامي وياچ يابوية شفتچ بعيوني بنية شابه وترهن عيني بشوفتها ليش هيچ بابا رحتي والله مالحكت اشبع منچ هي ساعات وعفتييني

دائب: كوم ابوي كوم شد حيلك طير من طيور الجنة تشفعلك رب العالمين جابلك ياها رحمة اصبر القضاء رب العالمين حرام تجزع وتعترض على حكم ربك اصبر ابوي انت اصبر هذا ثمن ودفعته بالدنيا ولا تدفعة بالآخرة

شددت عليه وكملت كلامي
دائب: كافي ابوي راح تموت بس اهدي شويه طير ذهب بجنة حبيبي كوم شد حيلك ابنك ومرتك يردونك گوم حبيبي گوم

گومته وسندته وطول الطريق دموعة ما نشفت وبس يستغفر

من وصلنا للبيت الي المفروض نستقر بي 3 ايام طلعت امي تلگته تحچي

حكمة: يبعد امك يحيلي ليش هيچ مسوي برويحتك شنهي ششفت منها يبعد گلبي مناغاتها لو ضحكاتها لا تجزع ابني شد حيلك مريتك محتاجتك

يمان: يمه روحي صارت بيها

حكمة: يبعد حيلي شني صرت شايب العمر گدامك وكلشي يتعوض

يمان: نرجس ماتتعوض يمه ماتتعوض

بقت امي تواسي بي وتمسح بوجها تحاول تخفف عنه

رميم ...

سمعنا صوت يمان وخاله برا بالحوش مال البيت جنت بالصالة گاعدة يم خيال مخليلها فراش متمدده بي وشهومي يمها ووتر گاعدة يمنا وباتر مقابيلنا على الدرج طول الوقت مگابل تليفونه يحچي ويا دائب منتظرينهم يرجعون بس سمعتهم خيال فزيت لزمتها احچي

رميم: اسم الله شبيچ يعمري مايصير تگومين موزين عليچ

ماردت عليه خلت حجاب على راسها وطلعت حافية شفنا يمان گدامنا خاله حكمة حاضنته عيونه صارت على خيال الي اتقربت منه اتحچي

خيال: يمان شو ايدك فارغة يمان سلمتك بنتي وين راحت شو ايدك فارغة عفتها بالچولة بوحدها يمان تعوف بنتك وحدها ولك گلبك شلون انطاك بنتك وحدها خانگها التراب شلون بنتي وين يمان ولك نرجس وين

اتقرب عليها حضنها
يمان: دفنتها بيدي ولچ بيدي اباوع على وجهه شلون يذبون التراب عليه من نطمت بنتي بالتراب الهواء راح من صدري والله والله من گطعت النفس شح الهواء من صدري والله وديتها للمقبرة خيال دفنت بنتنا هناك ردتها تكبر وبأيدي اسلمها الرجلها ماردت اسلمها للدفان

ردت اوديها التخرجها ماردت اوديها للنجف والله خيال بنتي من فتحت الجفن عن وجهه لگيتها مبتسمه
حضنته حيل اتبچي بقوة

يمان: لگيتها ضاحكتلي ياريتها طالعة روحي قبل ما اشوف ضحكتها يغطيها التراب الدود ياكل بتي ولج يمه بعد مابيه طاقة خلصت

حكمة: ولك يمه على كيفك ويا روحك الجزع حرام انت مو مؤمن بالله ومحمد مايجوز تجزع

خيال : ابوس ايدك يمان ابوس ايدك بس اشمها بس اريد ريحتها اريد اضمها الصدري ماشلتها هواي بنتي ترفة على القبر ما تتحملة خفت عليها من لحيتك خاف تجرحها اخليك توديها للدوود ياكل بيها يمااانننن سلمتك روحي شلون دفنتها

حضنته وثنينهم بقوا ديبچون وحرفيًا احس الكل نهار وياهم بهذا اليوم من بعدها دخلنا جوه واتصلت بيبي صفية هم ما يدرون بينا كنالهم طالعين للمصيف باربيل وخيال ولدت هناك ونتها توفت بقى بس الولد وگوة خيال حچت وياهم واسمع بيبي تبچي وتصبر بيها

ثالث يوم من وفاتها سافرنا والي تكفل بكلشي هو صديقهم ابو النشمي حتى سيارات خفية ورانا هم طلع لان كلنا مابينه حيل ويمان جسد بدون روح الحدما وصلنا أربيل

واول وا دخلنا للبيت وجان بيت اثاث كامل ومرتب وكلشي حسب الاصول وجاي كل واحد يحط غراضة دخلنا خيال الغرفتها بدلتلها وخلينا شهوم يمها انا وخاله

اول ما طلعنا من خيال سمعنا صرخة وتر اجت من الغرفة ثنينا ركضنا عليها دگت الباب حكمة تصيح

حكمة: شبيها مرتك دائب

ماكو مايرد فتحت الباب ودخلت وانا وراها شفنا وتر على الچرباية گاعدة وودائب لازم ايدها وهي تصيح

وتر: دائب راححح اموت بطني بطنيييييي يا يمةةةة راح اموتتتتتتت مجاي اتحملل

دائب: يعني شنييي اوتار لا تخبليني فدوة
گولي اشاقة وياك

حكمة: ياا شتشاقة وياك البت راح تولد عليناااا گوممم خلي ناخذها للمستشفى گووممم

خطية خيال گالت انا اگدر اتحرك واهتم بأبني ماخلتني اعوف وتر وحدها وعلى سريع طلعنا بيها وديناها للمستشفى وگلوبنا رايحة من الخوف خاف الي صار بت يمان ينعاد

ويمان اجه ورانا بس باتر بقى بالبيت اتقرب اشر براسه ان شلونها

دائب: ماعرف بعدهم جوه يمان فدوه دعيلي روحي جوه هي وابنها

اشر برأسه بعلامة موافقة وگعد على صفحة هو ابد مايطلعله صوت الا ماندر وخاصة اخر فترة

طلعت دكتوره تحچي كلنا صدمتنا من گالت

- الحمد لله اجتكم بنوته مثل القمر وشلعت كلب امها يلا طلعت مبينه وكيحة والماما شوي حالتها مو مستقرة

فز دائب يحچي بخوف
دائب: شبيها دكتورة حيلي شبيها خو ماكو شي خطر

- عدها نقص حاد بالدم والحديد وبالإضافة الى مناعتها ضعيفة وحليب الي بصدرها كله احتمال جاف يعني مراح تكدر ترضع بتها تكدرون تعتمدون على الممة

حكمة: متاكدة البنية زينة وماعليها شي ولا حتى بعد ساعات

- لا حجية كلش اطمئنوا البنوته حالتها ممتازة وزنها ممتاز كلش زينة بتكم حتى تگدرون مجرد ما تطلع الماما تاخذوها

بقينا ننتظر وتر بالغرفة مالتها وخالة انطتهم جنطة الملابس ورجعت استفقدت يمان گلت يجوز راح منا او منا دخلت وتر ودائب لازم بيدها وهي تحچي بدموع

وتر: ابني دائب ابني وينه يمه ابني ما صار شي بي مو

خلوها على سريرها ودائب يبوس بيها ويحچي
دائب: اهدي حبيبي مابيها شي هسه اصيح الدكتورة تجيبها

وتر: شنو مابيها بنية !

دائب: اي جبتي بنية مو ولد

وتر: مستحيل دائب شلون هيچ

رميم: خطأ تشخيص السونار عيوني المهم الحمد لله على السلامة

اتقربت خالة حكمة بوستها وتحمدتلها بالسلامة وهي تعبانة وتغفي بس تريد تشوف بنتها

دائب: طلعت اريد اروح البنتي گلتلي الممرضة ان اكو شخص شافها وگال ان قرايبكم

هنا صار عندي افلام تركية وصرت اتخيل بكيفي هرولت القسم حديثي الولادة وانا احچي

دائب: ايمن معقولة كلشي ولا بنتي

ركضت عليها بكل المستشفى لگيت غرفة يم غرفتنا بابها مردوده شفت يمان كاعد بالكاع يم سرير زجاجي ومتجي راسه على ايدع ويباوع الشي گباله

طبيت ولكيتها طفلة اتقربت وگفت اباوع عليها نسخة مستنسخة من يمان نسخة نسخة نفس البياض من جان طفل والشعر والعيون والله لو ماعرف اهلي الحقيقين چا گلت يمان اخوي الحقيقي وبنتي هيچ طالعة تشبهه غوشت عيوني من الدموع بنتي حبيبتي شگدوتها نتفه نتفه

تقربت منه خليت ايدي على متنه وگلتله

دائب: تعال جيب بنتك وتعال وياي

رفع راسه الي شفت دمعه من عينة نزلت من كتلة جيب بنتك وگوم وياي ابوي

اخذناها وطلعنا طبت وتر مبدلين الها ومرتبينها واول ما شافت بنتنا بيد يمان ابتسمت وگالت بتعب

وتر: هسه اطمئن على بنتي صار عدها احلى واحن بابا بالدنيا نيالها عدها ابو مثل يمان وعدها البتار ودائب بنتي ياهو گدها

دائب :اي شنو راح تسميها

اول مره ينطق من يوم وفاة بنته

يمان: غلا بنيتي اسمها غلا غلا دائب وغلا يمان وغلا باتر هي غلاتنا كل احنا

وتر...

اباوع عليهم دموعي تنزل وامي ورميم هم حطها يمان بيد دائب وكله كبر بذانها وسميها

وفعلا سواهن دائب وحطها بحضن يمان وماردت اخذها منه اصلا حسيته هو محتاجها اكثر من عدنا كلنا

وهيه ضلت طلع صوت مثل تنهيده اجت دكتورة كالت ظاهر البنوته مرتاحة بيد عمها هواي شوف شلون طلع صوت ان هي مرتاحة

گللها دائب ببتسامة
دائب: هو ابوها مو عمها احن مني عليها

- ياعيني ربي يحفظكم ويحفظها الكم بس لازم تجيبون الها ممه اكيد جوعانه اذا الماما ماگدرت ترضعا

اتقرب يمان خلاها بأيدي من تليفونه دك وطلع يجاوب تقرب دائب مني گعد على حافة الجرباية يباوع عليها باسني هواي بوسات رفع راسه وگال الحكمة

وتر: يمه شوفي غلاي شكد حلوة اوتاري الصغيرة رجعتلي

رميم: ايي عيني المفروض هسه عندك خبرة بتربية الاطفال وانت تسويلها كلشي تسبح وتحفظ

دائب: جا انا اخلص من البتار تطلعلي مرته وين اشرد منكم

رميم: مو مرته عيني طليقته لو سمحت

ضحك وبقوا يتشاقون شويه بعدها اتقرب همس بأذني

دائب: احبچ ام غلاتي

خليت راسي على كتفه وهمست
وتر: أحبك ابو غلاتي

شال ايدي يبوس بيها من بعدها حكمة گلتلي اجرب ارضعها بلكي اكو حليب ماكو ناشفه مدري شنو صار بس يمكن لان نقهرت على يمان وخيال شاط حليبي هواي حاولنا ماكو وهي جاعت بس تبچي حاولنا ننطيها الممه ماتقبل تاخذها كوه اخذت منها شويه الحمد لله گعدت حكمة وگالت

حكمة: مو مشكلة نوديها الخيال ترضعها ويا شهومي

وتر: شلون شهومي يصير اخوها وانا اريد ازوجهم يمه ما تشوفينا شلون صاك شحلاته

حكمة: عود نزوجها الاكبر مو مشكلة

دائب :ايعع ولد الملطلط وطالعين ملطلطين اكثر منه عمرهم سنه وشايلين الگاع وصايحين نباع ايع ماريدهم

رميم: ليش يمه ماتريد ولدي خوش الا ننهي عليها وناخذها غصب عنكم

دائب: شحدكم

رميم: كلام يفيدك هي معروفة بنت العم الابن العم لو ماخليت ابني ينهي عليكم دصبرولي

وتر: ونكتب قصتهم نهوة

بقوا يضحكون على تفكيري

من بعدها ارتاحيت كم ساعة وطلعنا ماقبلت ابقى بالمستشفى اكثر ورجعنا للبيت طول الطريق يمان حاط غلا على صدرة

ومن وصلنا حاولنا ننطيها ممه ماقبلت ابد وظلت تبچي لان جاعت وديناها الخيال الي جانت حاضنه شهم وتبچي طول الوقت تعلقت بشهم بصورة تخوف كلش النهار كله حاضنته وتكعد مرعبة گبل تحضنه ماتخلي ينزل من حضنها وحكمة تحچي عليها
دخلت عليه تحمدتلي بالسلامة حضنتها وبعدها انطيتها غلا وخليتها بحضنها صفنت عليها تمسح بخدودها وتبتسم

وتر: وهسه غلا الحلوة راح تروح الماما خيال حتى تسوي عمعم ويا اخوها شهم

خيال: بعدج ماعندج حليب

وتر: ايي والله

خيال: اذا اخذها بعد ماننطيها الكم

حضنت ايدها احچي
وتر: ياريت تربينها وتربيني وياها والله لا يغرچ المظهر انا محتاجة تربية اكثر منها

ضحكت وباستني بعدها شالتها بلهفة وحضنتها وشمت عطرها وتبوس بيها

خيال:يمه امي اروح فدوة جوعانه سودة عليه هسه اشربچ حليب

دخل يمان وگعد يم خيال على چربايه خيال طلعت صدرها ورضعت غلا والفرحة مرسومة على ملامحها بس بعيون يمان كسرة وضحك برغم شگد تلهف وظل طول الوقت ويا غلا بس نضرتة الها مختلفة اخذوها وطلعوا لان صاحتهم رميم على الغدا

رادوا يجيبولي بغرفتي ماقبلت اخذتي حكمة للاستقبال وكعدنا كل احنا بس فاجأنا بقرارهم

باتر: لازم نرجع للبصرة أيمن صار هناك لازم نلزمه بـ أسرع وقت حتى بعد فترة نسلم نفسنا للعدالة والقانون

دائب: صح يمان تگدر تروح مو لو نضبط انا وباتر الوضعية وانت لاتسلم نفسك رب العالمين غفور رحيم

يمان: شهالحچي لا اگدر اروح وياكم الشغل لازم ينتهي كافي الثمن الي دفعنا بسبب هالشغل انروح نطلع باچر واليوم باليل يوصلون فرات وعلي يبقون هنا هاي الاستقبال البرا واكو حمام خارجي وغرفه كاملة بس الاكل امي تدخله الهم أأمن نخلي ايمن بقبضة العدالة ونرجع هنا فترة من ياخذون الاعترافات منه بساعتها نروحلهم

ثاني يوم طلع الصبح وكلنا طلعنا وراهم وامي الدموع بعينها وهم يبوسون بيها وهي توصيهم

حكمة: خوتكم خوتكم خوتكم الاخر يوم بحياتكم خوتكم لا تتباغضون ولا تتعاركون ولا تشيلون على بعض ربيتكم روح وحدة يا 3 اجساد وتبقون للممات روح وحدة بـ 3 ديروا بالكم على نفسكم وعلى بعض وانا اعرف بولدي

ربيت صگور محد يعلا عليهم

يمان باس راسها يحچي
يمان: بعيني ذول وليدي وادعيلنا يمه ادعلينا الروح تعبت يمه محتاجة دعائچ

حكمة: روحي وگلبي وياكم يابعد حيل حيلي

وراحوا وطشت حكمة وراهم طاسة ماي

وطبينا للبيت على أمل رجوعهم بس قبلها انتبهت على رميم عيونها على باتر وهو هم عيونه عليها وكل شويه يغمزلها الحدما طلعوا وبنفس اليوم جانت غرفة حكمة اكبر غرفة وفرات وعلي بعدهم ما واصلين باجر يلا يوصلون گالت رميم

رميم: كل وحدة تجيب جهالها وتجي وراي الغرفة حكمة نبقى هناك افضل وأأمن كلنا بمكان واحد

وصدگ كلنا انجمعنا بمكان واحد بنص الليل وتقريبًا بـ 2 صرنا نسمع صوت اقدام بالطابق الفوگ من البيت گبل كل وحدة سحبت سلاحها امي كدامنا طبعًا مسدسها بيدها سحبته من جوه راسها ولبسنا حجابتنا وطلعنا حكمة تريد تصعد بس صعدت رميم قبلها بسرعة بس من صعدنا كلنا شفنا ماكو شي ومجرد الشباك مفتوح واكو ورقة مثبته عليه اخذها رميم تقرأ المكتوب بيها

( نساء جميلات شرسات وهذا نوعي المفضل ) وجواه توقيع وحرف A ...

يتبع...

𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵۫𓄵

بقلمي: زينب علي

بارت واحد يفصلنا على الختام 🫂♥️

معثوراتي لا تنسون التصويت+ متابعة الحساب+ تعليق بين الفقرات zainab_ali1 ♥️

متابعة ممتعة🦋