رواية تائهة بين اروقة الماضي الفصل الخامس والخمسون 55 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha-d-h

مساء القرنفل عليكم يا احبتي طبعا انا من الساعة ب١١
مجهزة انزل البارت بس النت كلش ضعيف وهسة.
كوة يالله كدرت انزله وما اعرف انتو وحظكم يوصللكم
البارت لولا اترككم لقراءة البارت ما قبل الاخير
وانشاءالله الباجر اصل معكم الى نهاية قصة هيام وضرغام وعائلة الحاج راضي
ولكم مني اجمل الامنيات اختكم نهى
🍀🍀🍀🍀🍀🍀🍀🍀🍀🍀🍀

ريام
بعدما اتفقنا اني وميس حتى نقنع خالو راضي يؤديها لخالة حليمة
اخذها وراح بعد توسل وبجي ميس الي اجتي تفضحنا وتخرب كلشي على اخر لحظة
بنت اللذين
وهسة جاي احوم اروح وارجع بالمطبخ منتظرتهم
اشو اتأخرو صارلهم هواي من راحوا اتمنى كون طير واروح اشوف ردة فعل خالو
دخل ضرار وشافني
.. هاي انتي هنا وانا ادور عليج
.. شنو تدور علية قابل ضايعة وانا ما ادري
.. لا بس صعدت فوك للغرفة كلت هسة الكاهة نايمة كالعادة وخفت ما الحك عليج بس ما لكيتج شعندج هنا
.. منتظرة خالو وميس
.. عفية سويلي جاي
.. اي هسة جنت احجي وعين عالباب وعين عالطباخ
حطيت القوري عالنار
ودخلو خالو وميس للمطبخ
خالو وجهه ينطي الوان ويدردم بصوت ناصي
وميس كوة لازمة حلكها ما تضحك
دخلو للهول واني كبل رحت وراهم اسمع ضرار يصيح من وراي
.. يمعودة ام راضي الجاي
اشرتله هسة جاية
اباوع عليه باس جف ايده وحطها على كصته ورفع ايده بالدعاء وهمس.. تبقين مخبلة مو بيدج بس كون الله يشافيج
رحت وراهم وسمعت بيبي خاجية تحجي وياه
الحجية خاجية.. هَـا يمة راضي بشر شلونها حليمة
ما جاوبها جان يصفن بغير بدون ما ينتبه
ميس بصوت عالي.. حجي راااااضي حدتي تحجي وياك
.. وجع على هالصوت
.. الي ماخذ عقلك يتهنى بي بس جدتي تحجي وياك
.. شنو يمة
.. أنشدك عن صحة حليمة شلونها
راضي.. هَـا حليمة زينة ورادة ردود بالعمر مدري شمسوية بروحها من الله يلعن بليسها بنت الاوادم
أسمع كلامهم ومتحمسة ما كدرت اصبر اكثر
رحت سحبت ميس من ايدها وتركتهم يحجون هو وبيبي ورحنا لغرفة ميس
.. يالله هسة تحجيلي كلشي بالحرف الواحد وما تعبرين ولا تفصيل شنو سوة خالو من شاف امج
ميس..ولج صار فلم كارثة
أوكفي خليني اكعد اتربع لان السالفة طويلة
وصلنا انا وابوي لبيت خالو مازن وجان الحجي راضي
ما يريد يدخل لبيت خالو مازن يعني وصلني يم الباب
وكلي نزلي
التفتت عليه.. عفو عليك حجي تتركني لوحدي
جا منو يرجعني والباجر عندي دوام
.. انا ادزلج ضاري
.. لا حجي متسوى بس ادخل اسلم على امي واشوفها واتطمن عليها ونرجع
انت انتظرني ما راح اتأخر عليك نزلت وخالو مازن طلعله ورحت وكفت يمهم
مازن.. شنو السالفة حجي ليش منتظر بالباب انزل
شوية خلينا نشوفك ولو انا ماخذ على خاطري منك
راضي.. خاطرك عزيز علينا
مازن.. زعلان عليك لان ام ضرغام صارلها اسبوعين عندي وانت حتى
ماكلفت نفسك تتصل وتطيب من خاطرنا
راضي.. مازن انت اجيت واخذت اختك من البيت بدون رضاتي
مازن .. حجي تعال ادخل جوة وخلينا نكعد ونتفاهم عيب تظل واكف ببابنا حالك حال الغريب
نزل الحجي راضي ودخل للبيت
وكعد بالهول وية خالو مازن
مازن.. يعني ترضاها تشوف اختك رجلها يقلل من شأنها ويتزوج عليها يعني بذمتك انت راح تسكت اذا تشوف هيفاء مهضومة
راضي.. اي اسكت اذا جنت اعرف باختي كلش زين مقصرة بحق رجلها وانت يا مازن بالذات مالك حق تحجي لان انت تعرف البئر وغطاه
.. شوف حجي انا ما راح احجي واكعد اعاتبك شلون تتزوج على اختي لان هاي حياتك وانت حر بيها
انا اعرف الك حق تتزوج وعندك عذرك بس هي تبقى اختي وانقهر من اشوفها مكسورة من تالي عمرها
لذلك انا استغليت فرصة جيتك لبيتنا وردت احجي وياك بعيد عن الكل اريد اقدملك نصيحة اخو لأخوه
طبعا احنة اولاد عم وما اشوف بيها اي احراج من احجي وياك بخصوص سالفة حليمة عكس فاضل الي كبريائه ما تسمحله يتنازل ويحجي وياك
اتمنى تاخذ كلامي بعين الاعتبار اكعد وية مرتك
واحجي وياها وتفاهموا. انتو كبار وعندكم اولاد وجناين واحفاد وانتو قدوتهم
راضي.. حجيك كله صحيح بس خليها ترتاح عندك وهي من تشوف نفسها ارتاحت وتكعد تراجع نفسها
راح ترجع من نفسها
مازن.. هذا هو براحتك حجي ما اجبرك ترجعها او تحجي وياها هذا الشي راجعلك انا حبيت اصفي الكلوب
واصلاح ذات البين واجب
انا عني اختي تكعد عندي معززة ومكرمة واذا ما تشيلها الكاع تشيلها عيوني ما متعاجز منها
وانت هم من تشوف نفسك اكتفيت تعال اخذها
لان اختي ما ترجع لبيتك بنفسها حتى لو هي تطلب مني انا راح ارفض هذا الشي لان كرامتها من كرامتنا
صحيح احنا اولاد عم بس لكلشي والة حد انا عني عرضت عليك غصن الزيتون ومديتلك ايدي لحتى اسهل عليك الامور وانت ظليت متمسك بموقفك خلاص
هذا هو
جان خالو مازن يحجي ضايج من ابوي
والحجي راضي وانا اعرفه كلش زين
عنودي وراسه يابس وعنده هو الصح والباقي كلهم غلط
وما يقبل يتنازل
جانو يحجون ودخلت علينا امي مثلما اتفقنا وياها
طبعاً كوة قنعتها تدخل لو تشوفين شكلها من رادت تدخل توصل للباب وترجع تغير رأيها تكول لا لا عيب ما ادخل
وانا أرجع من جديد اتوسل حتى اقنعها تدخل
وبألف يا علي يالله قبلت تدخل
بس سبقتها ورحت كعدت يمهم علمود تبين
هي دخلت للهول بدون متعرف منو موجود عبالها ابوي راح
بس ما اوصفلج شكل ابوي شلون انصدم من دخلت امي
جان يحجي وية خالو مازن وامي دخلت
اباوع للحجي راضي قطع كلامه وية خالو مازن
وباوع لامي ورجع دار وجهه صد عنها محرج يغض البصر عباله وحدة غريبة
ليش ما امي سلمت والوجه احمر خرب وكالت
.. ما ادري عدنا خطار
واجتي تطلع عرفت بيها راح تخرب الخطة ادري بأمي ما راح تدبرها بس الله ستر وخالو مازن حجة
مازن .. تعالي ام ضرغام فوتي جوة محد غريب
انتبهت لأبوي شلون رجع دار راسه بسرعة مصدوم وكعد يباوع على امي وعيونه تريد تطلع من مكانها متفاجيء
خرب اتمنيت أصوره
اما لو احجيلج عن امي والله تخربين ضحك
خطية فاهمة السالفة غلط عبالها ابوي جاي يخطبها
مدنكة راسها والوجه احمر
سمعت خالو مازن كعد يحم حم وحاصرته الضحكة
عم الهدوء المكان
جان شكل أبوي و نظراته مفضوحة خرب امي وابوي
شكد شفافين ومن اهل الله شكلهم مفضوح
مازن .. اي حجي كمل كلامك
ابوي كاعد بعده سرحان انطيته ضربة كوع خفيفة على خاصرته حتى ينتبه فضحنا ابن اللذين
راضي.. هَـا ابو ارشد العفو ما انتبهت عليك
مازن .. لا عادي مصار شي معذور
اباوع لابوي شلون كام يحوم وكل ساعة يحم حم
حجة وياي بصوت ناصي
.. ولج ميسة هاي امج شنو مسوية بروحها
ميس.. حجي خليها تشوف مستقبلها وتلحك على ما تبقى من السنين المهدورة من عمرها كضت طول عمرها
تخدم بالشعب والشعب ما راضي عليها
بس عليك الله شلونها مو طالعة صاكة بنت اللذين
ضربني على راسي خفيف
.. احجي عدل شنو هاي الألفاظ جنج ولد
رجع يباوع لامي
عاد انا هنا صارت الطوبة بملعبي
ميس.. يالله حجي راضي امشينا
راضي.. ابقي شوية شعندج مستعجلة مو اكلتي كلبي علمود اوديج تشوفين امج
.. اي شفتها واتطمنت عليها وما شاء الله شوفت عينك راجعة شباب
التفتت على امي
.. يمة ابقي هنا احسنلج بعد لا ترجعين لبيتنا
احنا ناس تعبانين وما نفيدج وبس نرفع الضغط
راضي .. دنجبي وسدي حلكج بلا حجي زايد
شنو قابل احنا جنا نكرب عليها
حليمة .. لا بس الراحة النفسية تلعب دورها
راضي.. ليش من شوكت صارت راحتج بعيد عنا
امي سكتت مجاوبته وهاي مو من عوايدها ما ترد الكلمة بعشرة خرب شكل التغيير صار مو بس على شكلها يمكن حتى على اسلوبها
والله يا ريمة انتي مو هينة سويتي المستحيل
باوعت لأمي كامت التفتت على خالو مازن وابوي
.. انا اترخص منكم مامحتاجين شي
وحجت وية خالو مازن
.. ابو ارشد لا تنسى تاكل عشاك ترة سويتلك تبسي دجاج من هاي اليحبها كلبك
مازن.. رحمة الله والديج يالغالية تدرين انا المستفاد الوحيد بهاي زعلتكم هواي اتدللت بوجودج من اكل من طبخ من واهس من بيت يفتح الكلب صرت اتمنى بس ارجع للبيت صار البيت بي طعم
خرب خالو مازن طلع مو هين ادري بي اتعمد يحجي هيج كدام ابوي علمود يغيضه وفعلا جاب كلامه نتيجة
راضي.. اي بس لا تفرح هي ما دايمتلك هي عندها بيتها وولدها محتاجينها ترجعلهم
حليمة.. لا ولدي ما يحتاجوني عندهم نسوانهم والحمدلله
والبيت بي الحجية كلها خير وبركة
اتمنيت اصيح بصوت عالي
كفو والله اثاري نبع الحنان هم تعرف تقصف
مازن.. الله لا يحوجهم الج حتى تبقين عندي تدلليني
راضي بغيض.. اكلك صدك انت ما ناوي تتزوج
مو على الاساس كلت راح اتزوج
خطية ابوي انتبهت عليه يريد يكوم يخنك خالي مازن
حليمة.. يالله يمة ميسة انتبهي على روحج ودراستج
وسلميلي على اخوانج ولو همة كل يومية يجوني خطية ما تركوني الله يخليهم الي وما يحرمني من جيتهم وسؤالهم عني
كامت من يمنا ومشت من كدام ابوي
جانت لابسة الكلابية والزنود البيض طالعة تلج كدامه
والشعر صحيح هي لامته بقراصة عادية بس جان حلو
وفيكة ومبين عليه التغيير
والحجي راضي خطية جان خوش رجال راح ينجلط كام يبلع ريكه ويباوع عليها

ميس.. يالله حجي كوم ترة نعست شنو سالفتك
لو كوة أجيبك الهم لو كوة أطلعك منهم
راضي.. احتركت عشيرتج شنو من مصيبة انتي
يالله ابو ارشد انا ترخص ولو كعدتك حلوة وما تنمل بس هاي اللزكة اكلت راسي وراها دوام
وانت هم خلينا نشوفك الحجية مشتاقتلك وتسأل عنك دوم
مازن .. ان شاء الله من افرغ امر عليكم اسلم عليها
طلعنا من بيتهم وابوي نزل علية فرد نزلة بالاسئلة
امج شكاعد تسوي وليش هشكل مغيرة روحها وشعندها
اشو امج محلوة على فراكنا وماخذة راحتها تطلع وتمشي وظل بس يحجي
ريام.. هههههههه احسن خليه يشوف شنو خسر
وخالج مازن خوش يعزف على الوتر الحساس
خليه يحس بنعمة خالة حليمة ووجودها
طلعت من غرفة ميس رحت كعدت يم بيبي خاجية وخالو
دخلت هيام وكالت
.. خالو عفية اتصل على واحد من الولد خلي يجيبلنا وياه قنينة غاز لان خلصنا غاز
التفت على بيبي
راضي.. حجية ترة ما يصير هيج اتصلي على حليمة وكليلها خلي ترد للبيت ترة هاي مو وضعية البيت سايب وحلل
الحجية خاجية.. وهي شنو دكمة أدوسها وأرجعها
واكللها بالله حليمة ما ترجعين للبيت ترة الحجي راضي ضاج يكول البيت سايب وحلل
راضي.. اي ما غصبن عليها ترجع شنو هو قابل بكيفها
شنو كعدتها ببيت اخوها وملتهية بروحها
وعايفة البيت وراها يضرب يقلب
الحجية خاجية.. شوف يمة راضي انطيك اياها من الاخير اذا تريد مريتك لا تظل تلف وتدور بالحجي وتطلع حجج بالبيت والاولاد
ترديها ذيج هي ببيت اخوها روحلهم وكللهم اريد مريتي
راضي.. انا ما محتاجها ولا كاتل روحي عليها انا احجي علمود البيت وعلمودكم
الحجية خاجية.. اذا علينا فاطمن ما عليك بينا احنا عايشيين والبيت البنات دايرات بالهن عليه
اباوع عليه ضل يفر بأذاناته
بيبي خاجية حشرته بزواية مكدر يتحرك او يكول شي
..........................
ميس .. لج هيام لو تشوفين ابوي البارحة
من دخل علية للغرفة ويكلي يالله امشي خلي اوديج لامج
ريام.. هههههههه لج اي سمعته خطية صار يتخذج حجة حتى يروح لهناك خطية خالو راضي عباله محد منتبه
هيام.. الله يهدي سرهم
ميس.. ولكم مو بس هيج يكلي روحي احجي وية امج وابجي يمها حتى ترجع للبيت
وانا كلتله .. ليش ابجي على امي قابل انا صغيرة لو جاهلة واريد امي اشو كل يوم اروحلها واشوفها
راضي.. يعني حضرتج فالحة بس تاكلين راسي من تردين شي وتصيرين جاهلة شوكت ما يعجبج
دكومي كدامي
ميس .. حجي راح اخصمها الك من الاخير شكد تنطيني وارجعلك امي
ضربني على راسي وكلي
.. طاح حظج شلون تحجين وية ابوج هشكل
على كلٍ انا ما داخل شي بجيسي اريدها ترجع علمودكم
ما يهون علية اشوفكم تكسرون الخاطر جنكم يتامى
ميس.. ها خوش لعد اذا علمودنا الله يخلي مودنا
ماعليك بينا احنا النة الله والليالي والايام هي كفيلة تربينة وتهمتم بينا
........
هيام .. بس تردون الصدك خطية خالو اباوع عليه من يوم شاف خالة حليمة لليوم اباوع عليه ضاربها صفنات
ريام.. تدرون شنو سالفة خالو
سالفته جان مسيطر ومتعود كلما يسوي الغلط ويتزوج عليها
يلكة خالة حليمة موجودة وبعدها كاعدة ببيته وما تنتفض عليه
فهو جان ضامنها موجودة ومتأكد منها ما راح تتركه
وليش ما اجة اليوم الي تركته بي خالة حليمة
وسحبت البساط من جوة رجليه
وشاف روحه في ليلة وضحاها لوحده
بدون صوت خالة حليمة واهتمامها ودورها
هنا عرف روحه هو الغلطان ولازم يروح يعتذر
منها ويرجعها
وخالو بهذا عمره اعرفه متعصب ما راح يعترف بغلطه ويعتذر ويرجع مرته
دخلت بيبي هي وضاري يمشي يمها
الحجية خاجية.. اي يالفالح شوكت ناوي تطلك مريتك
ضاري بتهرب.. بعدين مو هسة اطلكها عندي شغل
هواي و ما فارغ احك راسي
الحجية خاجية.. اي جدة بس بنت العالم ما تكعدلك
ضاري .. وشنو وراها ما غصبن عليها تكد وتسكت ببيت ابوها
دخل ضرغام وسلم علينا وباوعلي
ضرغام .. حجية حضري روحج انتي وعمتي رحاب اخذكم لبيت غسان ابوه رجع من الحج فكلت اخذلهم خروف ونروح حتى نباركله عالحج
الحجية خاجية.. اي يمة زين تسوي ابو غسان رجال والنعم منه يستاهل نروحله ونكوم بالواجب وياه
ميس.. ضرغام عفية خلي اروح وياكم لان وعدت هديل صديقتي اجي وياكم لبيتهم وخطية هي تنتظرني مسويتلي كيكة
.. خوش العصر حضري نفسج ترحين ويانا
ميس
رحت طلقة اتصلت على هديل حتى ابشرها
اتصلت عليها ماكو رد تالي فتحت الخط
ما انطيتها مجال تحجي نزلت عليها رشك بالكلام
.. ولج عوبة وينج اتصل عليج ليش متردين راح اجيكم
حضريلي قالب الكيك الي وعدتيني بي ها واتذكرت
وياج ماعون دولمة من هاي الي سوتها امج اليوم
انتبهت على هديل ساكتة متحجي نزلت النقال باوعت عليه عبالي انكطع الخط بس اشو الخط بعده مفتوح عقدت حواجبي وحجيت
.. الو عوبة شبيج متحجين
جاوبني صوت خشن .. كملي كلامج اسمعج
كمزت من مكاني واجة النقال يوكع من ايدي
وحجيت بدون وعي .. منو وياي ؟؟
.. وياج اخو العوبة
شهكت
وسديته النقال بوجهه بسرعة عزة شكد عيب هذا غسان
صخام الصخمني هسة شيكول علية ياربي
حصرتني البجية جنت اتمنى ياخذ عني فكرة حلوة
بس مع الاسف الله يسلطه علية بكل المواقف الحرجة
ولو هو انا اصلاً كلي على بعضي
قنبلة احراج وكضيت حياتي تصرفاتي كلها غير خاضعة للرقابة ما عندي كونترول على لساني لذلك جاي اعاني من الاحراج وية غسان وشكلي راح ابقى اعاني لان هاي انا وهذا طبعي وهذا الساني وما راح يتغير شسوي لحظي وابو طبع ما يغير طبعه

هيام
جنت ارتب بالغرفة وحسيت بألم ببطني بس هاي المرة اقوى
دخل ضرغام وهو يباوع علية
.. حضريلي ملابسي اريد اطلع
.. هذني ملابسك محضرتهم
جنت احجي عافسة الوجه
اخذ الملابس من ايدي وكعد يبدل كدامي ويحجي
.. شنو شبيج
.. ما بية شي بس شوية مغص ببطني
.. جهزي نفسج اروح لبيت غسان واجي اخذج
.. ميحتاج تاخذني الالم هسة يروح متعودة عليه
.. شنو سالفتج هواي تتعززين وتكابرين
انا كلت اخذج للدكتورة معناها اخذج ما غصبن عليج
كمل تبديل ملابسه وطلع وتركني لوحدي
ما اعرف شبية اليوم خلكي ضيك وتعبانة والحمل
صاير ثكيل وضرغام وضغوطه علية
..............
ميس
وصلنا لبيت اهل غسان وطلعلنا غسان وابوه
واني لبدت ورة بيبي وعمة رحاب
حتى ما اشوفه والله مستحية منه
دخلنا وسلمت علينا امه جانو عندهم خطار بيت خالتهم وبنات خالته خرب وحدة تكول للثانية كومي انا احلى منج ما ادري ليش حسيت بالتهديد
يعني انا شبية مو من طبعي اضوج من وجود بنات
وخصوصاً اني لا اعرفهن ولا يعرفني ولا مسوياتلي شي المكرودات زين انا ليش ضايجة منهن
اوف هسة شنو نشبت وياهن
جانت يحجن ويضحكن منطلقات دخلت هديل وسلمت
علينا
هديل.. تعالي كومي وياي ساعديني اصب عصير وقدم
للخطار
.. وانا شكو جايتني ما ترحين لبنات خالتج تاخذين وحدة منهن تكربينها لو تخافين عليهن
هديل غمضت عيونها بصبر
.. الله يساعد كلبي عليج اي اخاف عليهن خاف تتكسر اظافيرهن
سحبتني من ايدي واخذتني وياها للمطبخ
.. خرب هاي انتو كلكم هيج من الله حلوين
.. اي لعد لو تشوفين بنات عمي شتسوين
.. لاعفية ما اريد اشوف
.. على طاري الحلوين اتقدملي واحد بقلاوة من قرايب
بابا بس من بعيد
ميس.. اي شنو مواصفاته
.. حلو وحباب وكيوت وشعره موديل وهو كشخة وصاحب ذوق بأختيار الملابس تدرين بية اتخبل من الرجال الي ماعنده ذوق
ميس.. امداج عوبة هي هاي كل صفات الرجل المناسب
عندج للزواج
هديل.. اي لعد شنو اختار كل بنية وعندها مواصفات زوج المستقبل يعني هسة انتي تقنعيني ماعندج مواصفات لرجل المستقبل
ميس.. اي عندي مواصفات بس مو مثلج
.. اي بالله شنو هاي الموصفات مال زوج حضرتج المكرود
.. اني اريد زوج المستقل كون رجال حوك
وزلمة خشن واخو خيته سبع
مثلما تعرفين اني تربيت بين ثلاث اخوان وانطبعت بطبعهم لذلك ما ينفع وياي واحد يهتم بشعراته وملابسه
واذا خربت كذلته يظل يبجي ويعصب
انا اريد واحد حمش يشكمني كون من يصيح ميس اني
اكوم ارجف وما يخاف من اخواني ولا من ابوي
كون اذا يخزرني يغمى علية من الخوف
واذا كلي تعالي انا اركض لعنده واكله ها يا ابو فلان
جنت احجي وانتبهت لهديل عضتلي شفة واتأشرلي اسكت وانا منطلقة
بالكلام
اي واتذكرت واريده من يجيني بالليل يراضيني كون يراضيني بعضة خرب هاي قمة الرومانسة
انتبهت عليها تباوع وراي وتضحك وتسويلي حركات مال وحدة واكعة مزنوكة
عكدت حواجبي .. شنو شبيج محصورة مترحين للحمام
درت وجهي واني احجي وياها
وجان يصير بوجهي غساااااان
لا لا والله هواي لا (دة كيدا اوفر )
يعني ماكو هيج شي حسيت وجهي عرك وحصرتني البجية اول مرة بحياتي اريد ابجي من صدك

غسان .. هديل انطيني صينية العصاير
راحت هديل تجيب الصينية من المخزن وهو حجة
.. اكول ميس ولو فضول مني بس هذا الكلام الي ذكرتيه قبل شوية جنتي تقصدين بيه على زوج المستقبل ؟؟
ظليت مدنكة راسي ومجاوبته بس هزيت راسي بنعم
غسان بضحكة .. حشة هذا مو رجال طلع وحش زومبي
جان يضحك
رفعت راسي وهو كتم ضحكته وبدل معاني وجهه بجدية
وحجة.. على العموم عيب هذا الحجي مو مال عمرج
ظليت اباوع عليه فاتحة حلكي اجتي هديل وانطته الصينية اخذها وراح
هديل.. هههههه حل تستاهلين عوبة شكد فشلة
ااشرلج اعضلج شفة اريدج تسكتين ماكو انتي بس تحجين
حاصرتني البجية .. مرة ثانية ضربيني على. حلكي اذا ما سكتت خرب بعد هاي اخر مرة اجي لبيتكم
وتحلمين تشوفيني اذا تردين انتي تعالي
لان خية انا ما ينطلع بية افشل
رحت كعدت يم بيبي وعمتي وبعد ما اتحركت من مكاني
وبعدين اجة غسان وكال ضرغام يكول يالله يتنظركم بالباب
وام غسان ظلت تحجي علينا ما تقبل نطلع الا نبقى عالعشا
هي ما تدري انا طالعة وماخذة عشاي وياي
بس بيبي اعتذرت منها وكلتلها غير مرة وطلعنا
وصلنا للبيت ولكينا ابوي كالب البيت ومعصب على البنات ريام وهيام وهنة خطية ضالات وحدة تدعم بالثانية
واخيراً بدت بوادر غضب ابوي وشكله وصل للحافة من الغضب
الحجية خاجية .. شنو شبيك راضي حارك البيت ومخوف البنات
.. يمة غرفتي هوسة
ميس.. شبيها انا منظفتها
راضي.. هي هنا المصيبة لان انتي منظفتها ما جاي الكة شي بمكانه كلشي مخربط ومهوس وملابسي معفسة مامكويات
واغلب غراضي ماكو
ترة هاي مو حالة
.. يمة اليوم خلي ضرغام ياخذج لبيت مازن ورجعو حليمة للبيت ترة ما صارت هاي ست الحسن
كاعدة هناك ببيت اخوها وانا ماكل تبن
ظلينا وحدة تباوع بوجه الثانية ونضحك على شكل ابوي
واخير اهتز الجبل ونطق ابو الهول
الحجية خاجية.. يمة انا كلتلك تريد مريتك لا تضل تعوي اركب سيارتك وروح جيبها
مو حضرتك كاعد هنا تتأمر جيبوها وانا ضايج وماعاجبك العجب
شوف يمة راضي ترة زمن اول تحول
وما كو شي يظل على حطته وحليمة ما تقبل ترجع الا انت تروح تجيبها بنفسك
.. والله عمي خوش طالت وشمخت
......................
ضرغا
دخلت للبيت وانا ادور على هيام ظال بالي يمها خطية مبين عليها موجوعة
وهي من رجعوي من السفر لحد هذا اليوم تتعامل وياي ببرود حتى من اتقربلها وتكون بحضني اشوفها بعيدة عني وهذا الشي قهرني حتى صرت ادوس على نفسي
واجبر روحي وما اقتربلها
لان ما ينفع تسلمني نفسها وتنام بحضني ببرود
انا ما اريد بس جسد اريد حتى روحها وكلبها وانفاسها ولهفتها ونظرات عيونها الي تلمع من اخذها لحضني
صعدت فوك شفتها منومة علاوي
وجاي تصفط بملابسي اقتربت منها وحضنتها وقربت ظهرها على صدري
حسيت بيها جمدت بين ايدية صدك عصبتني حركتها
ضرغام .. انتي ما تكليلي شنو سالفتج
ترة صدك مصختيها
التفتت علية وعيونها حمر وترجف
وكع كلبي بالكاع وانخبصت
سحبت نفس عميق وحجت وهي ترجف
.. ضرغام الحكلي ما اعرف شبية بس شكلي راح
اولد
حسيت عبالك واحد ضربني على وجهي
لزمتها من ايدها وحضنتها حيل جانت ترجف بصورة موطبيعية
.. لج بطة لا تخافين انا يمج
بجت.. ضرغام شلون ما اخاف ترة بعدني بشهر السابع
غمضت عيونها وحجت بحدة.. اااااااه لك ضرغام اجتي اللوية
جاوبتها بغباء من ورة الخوف.. ها وينها
.. لك ضرغام موجوعة وانت كاعد تحشش علية
انخبصت وما اعرف شسوي اول مرة بحياتي اشوف مرة تطلك
.. اوكفي لا تتحركين من مكانج راح اصيح عمتي واجيج
نزلت
وجان ابوي وجدتي وميس وريام والولد كلهم موجودين وابوي جان يحجي وية جدتي بخصوص امي
.. عمة رحاب لحكي هيام جاي تطلك
انا حجيت هاي الكلمتين
والكل كام على حيله وصار واحد يدعم بالثاني
حتى ضاري وضرار انخبصو
بس اقواهم ردة فعل ابوي من كال
انت روح جهز مريتك وانا رايح اجيب امك تجي تلحك عليها
رحت اركض فوك لهيام وشفتها واكفة بمكانها ما متحركة رحت طلعتلها العباية وصرت اساعدها حتى تلبسها ودخلو البنات ميس وخالة رحاب وريام
عدلو عبايتها
ونزلنا بيها ركض واخذناها عالمستشفى واتصلنا على دكتورتها ورحت عليها جبتها من بيتها
كوة يالله وافقت تجي
وفحصتها وطلعت عندها ولادة ولازم عملية
جانت اصعب لحظات بوقتها جنت اصارع نفسي لا انهار وابجي خفت لا افقدها اتمنيت اذخل وياها للعملية
والزم ايدها واطمنها واكللها انا يمج وراح ابقى كل عمري بجانبج
اجة ابوي وجايب امي وياه جانت خطية كلش خايفة
اباوع حتى لابسة عبايتها بالمكلوبي ادري بأمي
ياكلها كلبها علينا خصوصاً من يصير الموضوع بي احفادها
راضي.. ها دخلوها للعمليات
.. اي حجي دخلوها
لزم كتفي يصبرني.. يالله ابو الشباب
اصبر واندعيلها هانت ان شاء الله ساعة وسلامات
ورة ساعات الانتظار الاجراءات الروتينية جابت هيام
ونقلو الطفل للخدج
ورة ساعتين انطونا الاذن بالدخول حتى نشوفها
كسرت كلبي وجها اصفر وتعبانة
كعدت يم راسها وبستها من راسها
.. الحمدلله على سلامتج يالغالية
همست بتعب وهي مغمضة عيونها .. الله يسلمك يابو جهالي
ابتسمت ربي يحفظج الي يا ام بيتي حجيتها بكلبي وخاني الساني
.......................
ريام
من يوم ولادة هيام وضرار متشدد علية وكل ساعة يصيح بيا اذا شافني اتحرك زايد
يخاف اولد بشهر السابع مثل هيام
خطية صارلها شهر من جابت وخطية خالة حليمة رجعت للبيت حتى تدير بالهة على هيام و
ما قصرت شالتها شيل بالعناية والاكل و ما خلتها تحس بالتعب
والطفل بدة ينشنش وسموه الطفل محمد
جنت حاطة حمودي بحظني واجتني ميس خربانة
ضحك
.. لج فاتتج
.. شنو
.. ابوي كالعادة المطاردة اليومية لحتى يراضي حليمة
فشفته دخل ورة امي للغرفة وسد الباب حسيت امي بخطر
رحت كبل دكيت الباب اصيح .. يماااااااااااي لحكي حمودي ما اعرف شبي
خطية وامي طلعت وجها احمر وصاحت بية احجي شبي حمودي كلتلها ما. اعرف شبي
فعفية ريام الله عليج كليلها كوة سكته لا تضربني على سوايتي وياهم
بس والله شكلهم تحفة خرب يدخلون للغرفة لوحدهم
وكدام منو كدامي عيني الخونة
ريام.. ولج مخبلة احنا ما نعول خالة حليمة وخالو راضي يتصالحون وانتي كاعدة تخربين عليهم
ميس.. يا اختي ناس كفار ما يسون حساب للحدايق الي مثلي شسويلهم عايشين اللحظة
ريام.. والله انتي قردة مو حديقة
ههههه اني مفرق الجماعات
اجتي خالة حليمة واخذت حمودي من ريام
وصارت تكلب بي بخوف شبي اشو نايم
.. اي يمة هاي خطية من شدة البكاء لقد غفى نائما
حليمة.. الله ياخذج يا شاخطة
ريام .. اكول خالة صدك اخوج مازن راح يتقدم
يخطب خالة رحاب
ابتسمت .. اي وحجة وية راضي والحجية خاجية
وهمة فرحوا وكيفوا بي
وكالو نسأل رحاب
والله واليوم الحجية خاجية سالت رحاب وهي مجاوبتها
بالموافقة
ميس.. كلللللللللووووووش كولي والله يمة هاي من شوكت اشو انا ما ادري بخالو مازن عينه على خالة
رحاب خرب وانا اكول خالو ليش دائما يسألني عنها وهي مرات هم تسألني عنه
وانا المطي الي بينهم يروح ويرجع يوصل اخبارهم لبعض بدون ما انتبه
احس بيهم استغلوني اشعر بالهزيمة انا ميسي شلون عبرت علية هاي السالفة
.............
هيام
من جبت محمد هواي تغيرت امور بحياتي اولها ضرغام الي صار مرات يشاركني افكاره لازال الرجل العصبي والعنيد حاله حال هواي رياجيل بس احسن بهواي من غيره
وبعدين اتوصلت لنقطة عرفت ان الانسان مو كامل وكلنا عدنا عيوبنا واحنا غير منزهين ومن عندها
بديت اتعلم على طبع ضرغام واتعامل وياه بعيني واغاتي يعني اكسر واجبر
وهو همين يوم حباب وحنين وماكو منه ويوم معصب وعافس الخلقة بس عندة شعلة حلوة
انا وجهاله عنده بالمقدمة وهواي يخاف على ولده
...................
ميس
دخلت للكلية مثل كل يوم وهم شفت ايمن ينتظرني
سحبت نفس عميق وغمضت عيوني لا انهد بي واطيح حظه لان هو اخر فترة كلش مصخها وياي
صار يتصل علية بالليل ويحاسبني اذا يشوفه مشغول
متصلة بهديل اني ما عندي غيرها احجي وياها بنص الليل بس هو صار مو بس هيج صار حتى يفرض نفسه وباخر ايام صار يسمعني كلام غزل
لو مرة يكلي طول شعرج عذبني لو يكلي جسمج يموت
وكل مرة اغلط عليه واسد النقال والبارحة سويته حضر
ونزلت لجدتي خاجية وحجيلتها عن كلامه وياي
وهي كالت .. ولج حرام تتهمين حظج وبختج خاف
جاي يتشاقة وياج ترة هو يشوفج بحسبة اخته
.. جدة انا اعرف شنو جاي اكول
سمعنا ضاري وضل يصيح ويغلط ويتوعد وبيومها جماعة ضرغام بالاستقبال
وجدتي كلتله عيب نصي صوتك منا الخطار لايسمعوك
ا
ضاري .. خليهم يسمعون ما يهمني بس اشوفه هذا العار الا ادفنه
وجان فعلا ابن الحلال بذكره
اندك الجرس وطلع ضاري معصب
لحظات وجان نسمع العيطة وصياح بالباب وضلينا وحدة تدعم بالثانية نريد نعرف شنو الصار
شوية وضرغام دخل وهو يدفع بضاري كدامه ويصيح بي وضرار دخل ايمن اتفاجئنا بأيمن شجابه
ضرغام يحجي وية ضاري
.. شبيك انت تخبلت شلون تتعارك وية ابن عمتك
بباب بيتنا وكدام العالم فضحتنا ماتستحي
ضرار.. خليه هذا ادبسزز يستاهل الكتلة الي اكلها
جان يقصد ايمن
ضرغام.. افتهم هو متعدي على اختنا بس عيب زحمة من جماعتي عرفو بالموضوع
ضرار.. عادي ترة اي واحد بمكان ضاري ما يستحمل ويصبر علما يطلعون جماعتك
وبيومها ايمن اكله طن رزالة وهو يكول والله جنت اتشاقة وياهة بلحظتها وكع من عيني
وصرت اباوعله بغير نظرة معقولة اني حبيت هذا الشخص في يوم من الايام شنو جنت احس
معقولة هذا المتقلب المزاجي الي ماعنده شخصية
اني سميته حبيبي
ايييييع حبه برص
............
ضاري
مريت اخذ ريام من الكلية ومثل كل يوم ما اتحرك الا يجي سايق رفاه ياخذها يالله
صعدت ريام وشافتني اضحك
ريام.. دوم الضحكة ضحكنا وياك
ضاري.. هسة ارتاح كلبي اليوم راح انام مرتاح
.. ليش شنو صاير
ضاري بمكر.. تعرفين هذا الولد الي اسمه كرار
الي جان طول هاي المدة يحوم على رفاه
.. اي اعرفه شبي
.. اليوم تم نقله من الكلية بكبرها
.. عزة لك ضاري صدك تحجي
.. اي صدك احجي جا شعبالج اشوفه شلون ماخذ راحته وية رفاه واسكت
.. اي وانت شلك دخل يا اخي انت مو راح تطلكها
.. حتى لو اطلكها هم ما راح اعوفها بحالها
ولا تحب وتتمعشك وانا ابو ابوي محترك
.. بس خطية ليش نقلته
.. ماعندي غير حل اتمنيت يتعارك وياي شكد حاولت اضايقه اسمعه حجي بالعظم اتمنيت يهد علية ويتعارك بس حرامات شكله مطفي ومو حمل عرايك
وما لكيت غير هذا الحل ونقلته وخليته عالدوام المسائي
.. الله يسامحك يعني لا انطيك ولا اخلي رحمة الله تنزل عليك
...........

ميس
يوم ثاني كوة جبرت نفسي اداوم
دخلت للكلية جانت هديل ستوها واصلة
سملت علية
هديل .. لج هاي شنو البارحة شصاير
ميس اجيت احجي وشفت ايمن واكف كدامي
همست لهديل .. سكتي بعدين نحجي
التفتت باوعت عليه بغيض جانت عينه زركة من الضربة الي اكلها بارحة
ايمن.. ميس لحظة اريد احجي وياج
ميس.. ماكو اي كلام بيني وبينك خاف هم تتجاوز بالحجي وبعدين تطلعني جذابة كدامهم وتكول ما حجيت
تركته وهديل تمشي وراي
دخلنا قاعة المحاضرات
هديل .. خرب هذا شمسوين بيه اخوانج
ميس.. ليش انتي شمدريج خواني ضاربينه

هديل .. اي ولج خطية غسان البارحة دخل ضايج ومعصب وسألته امي شبيك
كال هذا العار ابن عمة ضرغام متحارش بأخت ضرغام الصغيرة واخوانها لزموه ومسحو بيه الكاع واتمنيت الله ممكني عليه جان حرمت عليه شم الهوى
وامي تكله خطية ميسة بنية فقيرة مو مال هاي سوالف
غسان.. هو انا هذا القاهرني ادري بيها خام وبهاي طلعته وياها احس دنسها
...
هديل .. جان يحجي وهو معصب
جانت هديل تحجي وانا كلبي انتفض ما اعرف ليش كلبي يدك حيل من اسمع بطاري غسان
ميس.. شكد عيب من غسان هسة شيكول عني
.. بالعكس جان مقهور عليج يكول عنج خام ما يدري
بيج ميسي كل اصبع زلمة
...........

هيام
بديت ارجع لحياتي الطبيعية وصرت اكدر اعتمد على نفسي ورجعت صعدت انام فوك بغرفتي من بعد
ماجنت انام بغرفة ميس
وحمودي حبيبي بدة يكبر وشوية صارت بي لحمة
وصارله اسبوعين من طلع من الخدج وجانت طول هاي الاسبوعين خالة حليمة وخالو راضي يباتون يمه
بالمستشفى
والحمدلله
وعلاوي الوحيد الي متعبني لان يغار
جنت كاعدة بالهول ارضع حمودي وحاطة الشال على صدري اخاف واحد من الولد يدخل
وجانت بيبي خاجية وخالة حليمة وخالو راضي وضرغام جان كاعد يمي والبنات يشربون جاي
اجة علاوي يركض يريد يكعد بحضني ويدفع بأخوه نزل الشال عني وصار يبجي الا اوخر اخوه وهو يكعد اجتي ميس تريد تشيله توخره عني
.. تعال علاوي حبيبي خلي نلعب انا وياك
هيام.. صاير شكد نحس يغار من اخوه
حسيت بهمسة ضرغام
.. عمي حقه يغار والله تردين الصدك حتى ابو علاوي
صاير يغار من حمودي
جان يحجي وانفاسه على ركبتي ورفع الشال وغطة صدري وراسي
ابتسمت بخجل وعرفت المغزى وين خرب يومك ضرغام
جنا مندمجين دك نقال خالو راضي
ورد عالمتصل لحظات حسيت بي صار اعصاب
خمس دقايق وسد النقال
وسأل وين ضاري
حليمة .. ليش تسأل على ضاري
راضي بغضب .. هذا اخوج فاضل اتصل علية ويكول خلي ضاري يستعجل ويجي يطلك رفاه ويباشر بالمعاملة مالت المحكمة لان جايينها ناس يردون يخطبونها ويدرون بيها مطلقة
كلتله ليش مستعجل على قسمة بنتك
كلي مو حلوة كعدة البنية بالبيت خليني ازوجها وارتاح
صعبة بناتي اثنينهن مطلكات انا مامصدك اجوني ناس طلبوها مني
سمعت شهكة خالة حليمة
وباوعت لريام فاتحة حلكها وحجت بصوت ناصي
عزة والله هسة رفاه تموت من القهر

يتبع
.