رواية تائهة بين اروقة الماضي الفصل الرابع والخمسون 54 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha-d-h

صباح الخير والسعادة عليكم يا احبتي
اليوم كتبت البارت مرتين لان انمسح الاول
بحيث اجيت ابجي تعبانة من الكتابة وبعدين ينمسح
بس الحمد لله كدرت ارجع اكتب من جديد صحيح اتأخرت عليكم بس اهم شي انزله الكم اليوم
اتمنالكم قراءة ممتعة
اختكم نهى
🍀🍀🍀🍀😊😊🍀🍀🍀🍀🍀🍀🍀🍀😊😊😊😊
ريام
طلعت من الامتحان ودورت على رفاه ما لكيتها
اريد اشوفها واطمن عليها بعدين شفتها كاعدة لوحدها يم البوابة تنتظر السايق كان
وجهة ذبلان تكسر الخاطر رحت يمها
ريام.. هلا رفاه شلونج
شافتني وكامت وشمرت روحها بحضني وصارت تبجي وتشهك بحركة كلب
ياربي متت قهر عليها لميتها لحضني وصرت اسكتها
وكعدتها عالمصطبة وانطيتها ماي
.. كافي لا تبجين
.. لج ريام طلع كل كلامج صحيح
واني خسرت كلشي بغبائي اريد اموت من القهر وضاري راح يطلكني بعد ما يريدني
.. بالله شو كعدي ولاتبجين عيونج راح تنعمي من البجي شصاير بيج
.. لج يطبني مرض استاهل من عسى الموت يلفيني ولا اعيش بعيدة عنه
.. اسم الله عليج لتحجين هشكل ان شاء الله تبرد الكلوب وكلشي ينحل
اباوع عليها تطلع كلينكس من جنطتها وتمسح خشمها وتشمر بالكاع وظلت على هذا الحال واني بس اسمعها
ما بيدي شي اقدمة الهة الي اكدر عليه سويته قدمتلها النصيحة وحذرتها من اختها وحجيت عليها وهذا كلة ما فادها وراح عالفاضي باوعت عالكاع انترست كلينكس
حجت بصوت تعبان تبجي
.. اكول ريمة ضاري شلونه شنو جاي يسوي هم يجيب
طاري اسمي بالبيت
.. والله شكله يكسر الخاطر عبالك يتيم بدونج مو كدامج احجي لو اريد اصبرج بس صدك حاله يقهر
ذاك اليوم راد يصيح لميس تصبله غدة فحجة وياها وغلط بأسمج مو حسبالج هو ما يهتم لفراكج صدكي تلكينه ميت قهر بس يكابر لان الصار بي مو هين
.. عفية كليلي شنو اسوي حتى يرجع الي
.. والله ما اعرف شنو اكلج هي حيرة بس كل الي اكدر اكوله صبري عليه بلكي الله يهديه
جنا نحجي ودك نقالي ضرار
.. الوهلا ضرار
.. اوك هسة هو راح يجي علية؟؟
.. لعد يالله كله خلي يجي انتضره يم البوابة خلصت امتحاني
سديت النقال وباوعت لرفاه
.. هذا ضرار اتصل علية يكول ما اكدر امر عليج واخذج ضاري راح يجي عليج ياخذج
جنت احجي وياها ودك نقالي ضاري
ضاري .. يالله ريام انا وصلت انتي وين
.. هياتني كاعدة يم البوابة هسة اجيك
همس بصوت ناصي .. هاي شفتج راح اقرب السيارة عليج خاف ما بيج حيل تمشين
كمت من يم رفاه اباوع لمنظرها خشمها احمر وشفايفها منفوخة من البجي والكلينكس تارس الكاع وحالتها حالة
.. يالله حبيبتي اني رايحة ديري بالج على روحج
وكفت سيارة ضاري قريب علينا ورحتله
جانت رفاه تباوع عليه وعيونها بيهن الف حسرة
التفت باوع عليها ورجع باوع علية
نزل من السيارة وفتحلي الباب الامامي صعدت سد الباب وراي ودار رجع صعد بالسيارة التفت
وحجة وياي وطلع عصير من العلاكة
..هاج لزمي شربيلج شوية صرتي حمرة
وبطنج كدامج جنج رمانة
جان يحجي ويضحك وياي
.. اي والله اجة بوكته العصير رحمة الله والديك عبالك تدري بية عطشانة
حجة بصوت ناصي.. صارت عندي خبرة من وراها جانت دائماً تطلع عطشانة

هذا الموقف كله صار كدام رفاه جانت واكفة تباوع بحسرة مثل الطفلة المنبوذة صدك كسرت كلبي
ادري كلش زين ضاري اتعمد يعاملني كدامها بحنية وما وجهلها اي نظرة غير مرة وحدة وبعدها اتعامل وياها وكأنما هي غير موجودة شخص نكرة
ما اتمنيت اكون بمكانها لان فعلا استهضمت عليها
بس شكلهم ثلاثي الضاد يتميزون بالعناد والراس اليابس وزعلهم ثكيل الله لا يبلينا بزعلهم
حرك السيارة ومشينا
وصلنا للبيت شفنا اربع سيارات واكفة يم باب البيت
وزلم يم الباب ستوهم واصلين وخالو راضي جاي يسلم عليهم
ضاري.. انتظري مو تنزلين خلي الزلم تدخل وبعدين انزلج بالله خلي اشوف منو هذولي
نزل ضاري وتركني بالسيارة وشفته سلم ودخل وراهم
شوية وطلع ضرار من الباب وباوع علية وضحك
اجة يمي وفتح الباب
.. هاي شنو خرب عشيرتك ضاري شمسوي بيج حامسج بالحر هنا بالله شو نزلي
.. ريام لا خطية جانو زلم كال خلي يدخلون يالله تدخلين
.. اي هو كلي روح نزل مرتك ودخلها جوة قبل لاتموع
بس هذا الغبي ما يدري بيج ترفة وبسرعة تموعين من الحر
ريام.. يالله مصار شي هسة ادخل اخذلي حمام
وارتاح
جنا نحجي ودخلنا للبيت
.. اي خوش فكرة بس امانة عليج اذا تحتاجين اي مساعدة بالحمام ترة محسوبج ضرار بالخدمة
.. لا حبيبي مشكور ما تقصر خلي خدماتك الك ما محتاجتهم لان ادري بيك ما تقدم خدمة لله وبدون مقابل
ضرار.. حرام عليج شوكت طالب منج مقابل على خدماتي اصلا انا كلش حباب وياج
وفقير اريد بس ترضين علية

.. شوف اسمع منو جاي يحجي عمي اسكت لايسمعونك البنات ويحسدوني عليك ترة خدمة التدليك لحد يومك هذا ما ناسيتها دلكتني شوية وقشمرتني وجان المقابل ملكف
انت تعرف شنو ماحاجة اذكرك ياحباب
باوعت للاحذية بباب الاستقبال واتذكرت
.. اي صدك ضرار هذولي منو الجماعة
.. هذولي الولد المتطوعين الي وية ضرغام وصلو ستوهم وابوي لزمهم عالغدة
.. يا صدك رجع ضرغام الف الحمدلله
.. اي رجع بالسلامة
.. حرامات فاتتني ما شفت شلون اقتنع يدخل للبيت
.. سكتي هاي سالفة شطولها خلي ميس تسولفلج عنها انا رايح يم الزلم
دخلت للبيت ولكيته خبصة هيام تركض منا وتجي ومنا
وميس تمشي وراها وتصيح
((وي.. وي.. وي.. وي)) تقلد صوت سيارة الاطفاء
ريام.. شكو خير يا ستار شبيكم ليش هشكل مخبوصين
عفست خشمي
.. وشنو هاي الريحة
ميس.. لقد شب حريقاً في مطبخنا وأبي العزيز قرر اليوم ان يصبح كريماً كحاتم الطائي ويعزم الناس على الغداء
واختكِ العوبةُ حرقت الطعام وها نحن نلطم على ووجوهنا لانعرف ماذا نسوي واين نولي
وامي حليمةُ ذهبت ولم تعد
وظل البيت لأم طيرُة فطارت فيهِ
فرد طيرةٌ واه مصيبتاه نحن نريد حلاً
الزلم وصلو والغداء احترق ماذا نفعل
هيام والدمعة بطرف عينها
.. لج ريمة لحكيني شسوي
ميس .. سود علية امي جانت هاي كلها فوك راسها ولا يوم حسينا بعزيمة لو دخنا بطبخ
هسة صار المطبخ بيد الخارمات الفاهيات
وينها وينها انا ميسي من تالي عمري ادخل مطبخ
واكعد اسوي زلاطة ولا مو بس هيج وبيها بصل
وانا دموعي تنزل عبالك مكتولة
وهيام العوبة حركت الاكل لان علاوي خبصها
ريام.. زين وين خالة رحاب عنكم
.. خالة رحاب طالعة عندها دروس
هيام.. شلون ياربي
اباوع لهيام بجت بقلة حيلة ادري بيها بسرعة تغرك
دخل خالو راضي .. يالله بنات شدن الهمة وحضرن
علمود تصبن
ميس.. ااا بابا حبيبي اكو خبرين والاول حلو والثاني حزين
راضي.. احجي شكو
.. ابديلك بيمن بالمفرح لو بالحزين
..احجي وفضيها
.. الخبر الحلو احنا طبخنا الغدة
راضي.. اي والثاني شنو
ميس.. الغدة احترك
.. شلووووووون!!!
اباوع على خالو عيونه نطت
دخلت بيبي خاجية للمطبخ
.. هَـا ولجن شنو هاي الريحة خايبات بس لا حركتن الاكل
هيام.. بيبي والله طبخته وخلصته على حسب الاصول وكلت لميس عينج عليه علاوي بجة اخاف لجم طهوره
رحت عليه والتهيت وياه اجيت رجعت لكيت الاكل محروك
جانت تحجي والدمعة معلكة بعيونها
الحجية خاجية باوعت لميس.. وانتي يالخارمة وين سهيتي عن الاكل
ميس.. جدة هي كالت عينج عالاكل وراحت
وانا ظليت اباوع عليه بأهتمام وداعتج ولا غفلت عنه
.. جا شلون احترك
.. اي هو احترك بأثناء ما جنت اباوع عليه
الحجية خاجية.. الله ياخذج ميسة على هذا العقل ولج
انتي عودك هم تنحسبين عالنسوان وتاليتها وياج مافالحة بأي شي
دخل ضرغام للمطبخ واتحمدتله عالسلامة
باوع على هيام وسألني شبيها تبجي كلتله عالطبخ لان احترك وخالو ظل يحجي معصب
ضرغام.. بوية لا تعصب انا طالع اجيب غدة من المطعم وارجع
راضي.. بسرعة استعجل عيب من الزلم
اباوع على ضرغام اقترب من هيام وهمس يمها
.. مسحي دموعج لا تبجين يالله فدوة الج
انتبهت لهيام ابتعدت عنه ومحجت اي كلمة مبين من حركتها أختي شايلة بكلبها على ضرغام وزعلانه عليه
رحت صعدت بدلت ونزلت حتى اساعد البنات
حضرنا الركي واللبن والخضرة والطرشي
واجة ضرغام جايب صواني مندي
ودخل ضاري ينكل الاكل للاستقبال
باوعت لميس.. اكول ميسة شلون ضرغام وخالو راضي اتصالحوا
ميس.. ياا صدك انتي جنتي ما موجودة بالبيت
ولج حرامات فاتتج ابوي سمع ضرغام وصل للبصرة
وكال لبيبي خاجية تتصل عليه وتحجي وياه وتقنعه
بنزل عدنا للبيت ما يروح لأي بيت هو جان ناوي
يروح يم امي ببيت خالو مازن
بس جدتي خاجية وما ادراك ما خاجية داهية
كلتلي اتصلي على ضرغام وكليله
انا اتصلت عليك من وراهم حتى اكلك ترة جدتي خاجية
تعبانة وصحتها مو زينة وهسة طلعوها من المستشفى
للبيت همة ما كلولك ما يردون يخوفونك عليها
وانا سويت الي كالت عليه بالحرف الواحد
واجة ضرغام مثل المخبل مفزوع ناسي زعله ورفضه
على دخول البيت
وبعد ما دخل للبيت وشاف جدتي واطمأن عليها
دخل ابوي وباوع عليه وصار واحد يباوع للاخ
اخير شي اتحرك الجبل الكبير وراح حضن الجبل الصغير وشمه من صدره
راضي.. ولك ياحيد شلون انطاك گلبك تزعل على ابوك وتطلع من البيت شلون هنت عليك جا ما تدري
بأبوك ما يحلاله العيش من بعدك
ه
ضرغام.. اعذرني يالغالي حقك علية الصار ساعة غضب والشيطان اتربع النة ونساني
انت ابوي وراج راسي وانا مالي غنى عنك واهم شي رضاك عندي بالكون ما ابدله وان شاء الله ربي ما يجيب الزعل بيني وبينك

وباس ابوي من راسه ونزل باس ايده
ريام.. الحمدلله ربي يصفي الكلوب
خلصو الولد غدة والتهينا نصب جاي وماي ونغسل مواعين جنت اباوع على هيام تتلوة بس ما اعرف شنو بيها سألتها شبيج كالت ما بية شي بس تعبانة
ريام.. ميس حضري نفسج اليوم نروح لبيت خالج مازن نشوف خالة حليمة ونسلم عليها والله الهة وحشة واليوم البيت فاهي بدونها
صار العصر
ورحنا لبيت خالهم مازن وشفنا خالة حليمة
حليمة.. جا وهيام ليش ما اجتي وياكم
ميس.. يمة هيام صارلهة يومين متأذية
تكول لان تعبانة
حليمة بخوف.. يا عزة بس لا حملها بخطر
ريام.. لا خالة ما اتوقع بس يمكن لان زعلانة على ضرغام فتشوفينها عبالك مريضة
حليمة.. يا ليش تزعل على ضرغام شمسويلها الكرود
ميس.. يمة همة ولدج ورجلج ما ينحملون
واحدهم تكولين السلطان سليمان ما ادري على شنو شايفين نفسهم
حليمة.. انجبي ميسة لاتحجين هشكل على ابوج واخوانج ترة همة صحيح بساعة الغضب يخوفون
بس كلبهم طيب ما يحقدون على احد
.. انا ما حجيت شي بس اكول الله يساعدج انتي وجناينج عليهم
.. ولج شفايتلج لو تحصلين رجال مثل طبع اخوانج وشخصيتهم الله حابج
ميس.. يمة اسم الله علية بيمن طالبتني اتزوج واحد مثل اخوتي شبية بايعة روحي بس همة كالوها
سألو القنفذ منو انعم شعر بالحيوانات
كللهم ابني فهسة انتي كاعدة تحمدين بولدج معذورة لان امهم
حليمة.. ولج. ريام بعد اذا اجيتي لهنا مرة ثانية لاتجيبين ميس وياج لان رفعت ضغطي الله يلعن بليسج مو لسان حشة رشاشة
ميس.. عفو عليج يمة ليش تحجين علية هشكل الله يسامح
وانا البارحة الليل كلة ابجي عليج وكاتلة روحي من البجي وتشوفيني كاعدة بالكاع يم باب الشارع انتظرج وانا اصيح (اريد امي حليمة .. ما .. ما .. اريد ماما))
وخطية راضي احتار بية شلون يسكتني
وبعدين كومني واخذني بالسيارة واشترالي حلويات حتى يسكتني وما سكتت الا بعلبة نوتيلا جبيرة
وهذولي ولدج الطناطلة الي صارلج ساعة تحمدين بيهم ولا واحد بيهم ذكرج وكال امي خطية وتالي هيج تجازيني
حليمة.. بالله هاي شحجي وياها المخبلة
بس ماكول غير الله يساعد اليتزوجج
هذا امة داعية عليه بساعة مغربية
ريام.. ميس كافي خليني احجي وية خالة لاتنسيني انا علمين اجيت
حليمة.. شنو شبيج انتي الثانية
اشو من عفتكم نقالي ما بطل اتصال كل ساعة وحدة بيجن تتصل خالة شنو نسوي غدة خالة وين الغراض خالة علاوي يبجي عليج وخالة وين علاج بيبي وخالة وخالة شطلعت خالة
ميس.. اي والله يمة كلمة حق تنحجي انتي من طلعتي من البيت
وهو تخربط كل نظامه وصرنا واحد يدعم بالثاني
هههههه احلى شي ابوي اليوم طلع للشغل مدكم قميصه غلط وجدتي كامت تحجي عليه تكله اثاري انت بلا حليمة ضايع وعقلك مدوهن
وهو المغرور يكابر ويكللها لا ما انتبهت عليه شنو قابل حليمة جانت تدكم قميصي
خاجية .. لا هي جانت مرايتك الي تعكس صورتك تشوف نفسك بيها اسأل الله تلحك تصلح مرايتك وترجعها لبيتك ترة البيت اظلم من بعدها
راضي.. لا يمة ما ارجعها هي طلعت من البيت برجليها وهي ترجع بنفسها للبيت مثلما طلعت انا ما اروح ارجع مرة
الحجية خاجية.. جا خوش ياابن بطني خلي نشوف شكد تصبر بلياها
حليمة .. يعني ابوج هشكل يحجي جا بسيطة يحلم اخلي يشوفني والله ما ارجعله
ريام.. لا خالة احنا نريد نخليه يشوفج
حليمة.. شنو ليش اخليه يشوفني
ريام بمكر .. شوفي خالة ما ادري ليش احس بيج بزونة مغمضة ومن اهل الله وحتى هاي ميسة العوبة
عندها دهاء اكثر منج خالة
انا اجيتج اليوم حتى اطلع عينج
وادلعج وارجعج عروس بنت العشرين الا اخلي خالو راضي كون من يشوفج يعض ايديه من الندم لان فرط بيج
حليمة.. خايبة ريمة احجي عدل ما جاي افتهمج شتحجين شتردين تسوين بية
ميس.. شوفي يمة انا افهمج ريام تريد تشتغل عليج
راح تقتنص دور جويل الي تطلع ببرنامج (بالصراحة احلى ) وراح تغير النيولوك بتاعك
حليمة ببتسامة مكتومة.. يا ولجن صدك تحجن
انا من تالي عمري وبعد ما صرت جدة اكعد اعدل
بنفسي مثل البنات عيب يمة شبية اتخبلت
ريام.. خالة هسة اليسمعج يكول هاي عمرها ٧٠سنة
ما يدري بيج هو كلة عمرج ٤٧سنة
بس انتي تزوجتي صغيرة بالعمر وولدج كبروج
بس هذا ما يمنع تهتمين بروحج وتعدليها ترة موعيب
وخصوصاً انتي عندج خالو راضي يحب الاهتمام وهاي السوالف
ومن بعدما سمعت قصتكم من بيبي خاجية
عرفت بي شكد يحبج ويموت عليج بس انتي هم شوية
اتلحلحي يمه وخلي ما يشوف غيرج اشو انتي ما شاء الله عليج حلوة وما تحتاجين بس شوية تعديل
وهاي خليها علية
ميس.. اي يمة عفية ما اوصيج اريد كون راضي
يخيم بباب بيت خالي مازن ويصيح اريد مريتي

حليمة .. يا .. يا.. ولجن والله زحمة
شيكولون علية اخوانج امنا خرفت
ريام.. لا عيني مايكولون شي اصلا بالعكس يفرحون
من يشوفونج مهتمة بأبوهم
حليمة .. زين هسة شسوي
باوعت لميس وابتسمت بمكر .. خالة هاي عوفيها علية ما اريد منج شي بس سلميني نفسج
.............
هيام
ما اعرف شبية بس يوم عن يوم جاي يزيد الوجع عندي
رحت اخذت خالة رحاب للدكتورة وكالت ما بيج
شي لا تخافين هاي الالالم من التعب شوية خففي
الحركة ولاتكوفين هواي
جنت واكفة بالمطبخ والبنات ميس وريام صارلهن اسبوع كل يوم يرحن لخالة حليمة
حتى ياخذونها لمركز التجميل اللبناني
ما اعرف شنو راح يسون بخالة حليمة المكرودة
بس خالة هيفاء اجتي متعجبة عليها من شافت التغيير عليها تكول هاي مو حليمة طالعة كيكة راح اخليهن يحجزولي عند مركز التجميل انا هم احتاج شد بشرة وشوية فلر وعناية
خرب بيومكم ريام وميس شكلهم راح يسون ثورة
بالعائلة
من كلام خالة هيفاء صار عندي فضول اشوف خالة حليمة
طلبت منهن ياخذن صورة الهة حتى اشوفها كالن لا خليها مفاجئة
حتى ما يخلني اروح وياهن لخالة واسلم عليها
جنت كاعدة بالمطبخ اكشر بيبتة وصافنة
و دخل ضرغام للمطبخ وهو معصب حجة بغيض
.. كومي حضرلي ملابسي اريد اطلع
ابتسمت بداخلي على شكله المغنتب
اعرف كلش زين هو ليش معصب
لان هو من يوم السافر وتركني اني وابنه بدون ما يسويلنا حساب ولا حتى حاول يفكر بينا شيصير بينا من بعده
واتعامل وياي بكل برود والاستاذ المغرور
كل ضنه من رجع من السفر يتوقع مني راح استقبله بالاحضان وارحب بي فرحانة بسلامته
ما انكر اني اتطمأنيت عليه وفرحت من رجعلي سالم
بس سلامته ما تشفعله بگلبي ولا راح تخليني انسى
اهماله وتهميش دوري بحياته من اتخذ قراره وسافر بدون ميسوي حسابنا
لذلك قررت هالمرة ما ازعل عليه وادور وجهي عنه مغنتبه وهو مثل كل مرة يجي يتوددلي ويكعد يراضيني ويصالحني باسلوبه المتكبر واني مثل الغبية ارضة وانسى
لا اني هاي المرة راح اغير اسلوبي وياه
وقررت اتعامل وياه ببرود واستخدمت وياه نفس الاسلوب البارد واللامبالات وعدم الاهتمام
الي يستخدمه وياي
اتذكر من وصل والتهينا فرحانين بسلامته
اتعجب علية من سلمت عليه ببرود
وكلتله الحمد لله على سلامتك ابو علي
ودرت وجهي وطلعت من غرفة بيبي خاجية
اتذكر عليه شلون صفن بوجهي
ادري كلش زين جان متخيل يشوف لمعة الفرحة بعيوني مثل كل مرة من يرجع من السفر اجي اسلم عليه بلهفة والشوك فاضحني
بيومها صحيح هو التهة وية الناس وجماعته اجوي يسلمون عليه
بس انتبهت عليه كام كل ساعة يدخل للمطبخ
بحجة علمود يحجي وياي
بس جان ينصدم بجدار البرود والصد الي حوطت نفسي بي
جنت اجاوبه ببرود وااتعامل وياه عادي وكأنما هو اخر اهتماماتي وصلتله صورة ان هو اخر همي وحياتي ما تدور حوله
بس خطية من يجي الليل يظل يحوم فوك راسي مثل الطفل وما يصعد للغرفة الا اصعد كدامه طبعاً هو ما يطلب مني اصعد لان كبرائه ما يسمحله
بس يظل منتظرني لحد ما اصعد
ومثل كل مرة من اصعد اتعمد اماطل بالوقت وانوم علاوي وارتب نفسي وما احجي ولا كلمة افتح التلفزون
واكعد اباوع برامج واضحك وهو موجود لو اتصل على البنات ريتا ولجين واتبادل وياهم الاخبار ومرات اضحك وياهن على سوالفهن
انتبه عليه ينام عالسرير ويحط المخدة على راسه واسمعه كل ساعة ينافخ ويظل يتكلب
بالاخير يعيط بية
.. يعني شلون بالله نريد انام وانتي كاضيتها حجي
وكركة بالنقال ماتكولين عندي رجال تعبان ووراه شغل
من الصبح
جان يحجي وانا خربانة ضحك عليه بس بداخلي
لان لو اضحك هسة كدامه وهو معصب
يمكن يكوم يخنكني
سلمت عالبنات وسديت النقال ودرت وجهي عليه
.. اسفة والله نسيتك عبالي نايم
اعذرني سوالف البنات خلني انسى روحي
يمة انا حجيت هيج وهو كعد بكل غضب وباوع عليه ولزمني من زندي ورص سنونه
اباوعله شعره مهوس ولحيته بارزة وعيونه ذبلانة من النعاس للحضة ضعفت كدامه واجيت امد ايدية واسحب راسه واحطه على صدري وامتص عصبيته واطفي ناره بحضني
بس لا خليه هالمرة يحترك بناره لوحده
حتى يعرف شلون يكون شعور الواحد من يتهمش
وينركن عالرف خليه يشوف شلون يقهر هذا الاسلوب
قرب علية بغضب
.. طبعاً حقج تنسيني وانا بيش الحكة حتى تتذكريني اشو انا صاير اخر همج متفكرين بية
حجيت بدلع زايد اغيضه
.. اخ ضرغام ايدي توجعني
خفف من مسكته واقترب مني وهمس بضعف
.. لج هيام انا تعبان
رمشت بعيوني .. اعتذر قلقت راحتك بأتصالي وية البنات راح اطلع واخليك تنام براحتك وارجع بعدين
انام واوعدك من ادخل للغرفة ما راح اخليك تحس علية
اتحركت اريد انزل من السرير وهو عاط بية وسحبني حيل من زندي ولطشت على صدره ووكعت تعلاكة الثوب عن كتفي
باوع لكتفي المكشوف كبال عينه
.. ولج هيام حسي بية اشو صاير كلبج اسود
على ضرغام
رمشت بعيوني بعفوية وسويت نفسي ما جاي افتهم شيريد مني رفعت ايدي وردت اعدل ثوبي لزمت الشيالة حتى ارجعها لكتفي
بس قاطعني ولزم ايدي وهمس يم اذني عوفيها خليني
اشوف
وبدة الغارة الجوية واقترب مني وهو ضايع ادري بي محتاجني ومشتاق لحضني لكن هيهيات اخلي
يتمكن مني بدون ما يعترف باغلاطه
انا مو لعبة بيده اتصنعت الالم وعفست وجهي موجوعة
.. اااااه ضرغام بطني
ابتعد عني مفزوع ونزل عيونه لمستوى بطني ولمسها
رجفة جسمي جوة لمسة ايديه فضحتني اني هم مشتاقتله
بس لازم ما اضعف كدامه حتى تنجح حياتي وياه
..............
ضرغام.. شنو خير سالمين وين صافنة وشنو ماخذ تفكيرج
انتبهت على ضرغام يحجي وياي
.. هَـا ضرغام مسمعتك شنو جنت تكول
باوعلي بعصبية
.. اريد تحضريلي ملابسي
دخلت خالة رحاب للمطبخ واستغليت الفرصة
.. اكول خالة عفية بلا امر عليج تكدرين تصعدين
تطلعين ملابس لضرغام اني كاويتهم ومحضرتهم
بس طلعيهم من الكنتور لان هو خطية ما يكدر ما بي
حيل يطلعها
انتبهت لخالة رحاب رفعت حاجبها وباوعت عليه
.. شنو شبي حضرته حامل وما بي حيل لو خايف على طوله خاف ينقص والله عمي خوش مطلعة عينه بالدلال
ضرغام.. انا كلتلج الج ما طلبت من عمتي اشو صايرة
هواي تغلسين علية
رحاب.. يالله شو روح اصعد كدامي وحضر ملابسك بنفسك هاي بدال ما تكول خطية حامل وتشيل عنها الشغل وتساعدها اشو جاي تتأمر عليها
ضرغام .. يعني شنو ترديني اغسل مواعين العشا عنها
رحاب.. ضرغام خلي اكلك شغلة صحيح انت ابن سوك اتربيت وفتحت عينك عالدنيا وشفت المراءة تخدم الرجال وعبالك هذا واجبها بس خلي افهمك شي
ترة النبي محمد الف الصلاة والسلام عليه
وهو سيد الخلق جان يساعد زوجته السيدة خديجة
بعمل البيت وما يستنكف لان المساعدة بين المرة والرجال عمرها ما تنتقص من روجلة الرجل
ضرغام.. عمة شوفة عينج اطلع من الصبح للشغل ما ارجع الا بالليل طايح حظي صفح بس كلامج صحيح
وراح اخذه بعين الاعتبار واخليه ببالي
اجيت اكوم وحجيت.. لا خالة حبيبتي لاتحجين وياه هشكل خطية هو تعبان
باوعلي .. ابقي كاعدة بمكانج انا صاعد احضرهم
طلع من المطبخ وهو يدردم ويحجي جنة علاوي ابنه
من يضوج اذا ما صار اليريده
رحاب.. هذا شبي وياج
هيام.. ابن اخوج واحد عنودي يريدني دائما اهتم بي
ويضوج ويتخبل اذا شافني ملتهية عنه
بحب اهتمامي يردني ارجع ادلعه مثل قبل
رحاب.. اي وانتي شعندج ما تدلعينه وتدللينه للرجال
هيام.. زعلانة عليه من يوم السافر وخلة الكل يخاف عليه ودخلنا بالانذار
رحاب.. اي انتي بهاي حقج
اكول هيام ميس وريام وين
.. راحن لبيت مازن ابو ارشد حتى يشوفون خالة حليمة
رحاب.. هاي الغبية ميس مو كلتلها اذا تريد تروح لامها
تكلي حتى اروح وياها اشتاقيت لحليمة خطية عنت علية
هيام.. ياحلوة يعني بس اشتاقيتي لخالة حليمة
رحاب بارتباك .. ششنو قصدج طبعا بس لحليمة اشتاق
لعد لمنو اشتاق
.. لا هيج
رحاب.. هيام انجبي عيب شنو هذا الحجي
ضحكت بصوت عالي.. هههههه هسة اني شنو حجيت
حتى كلتي عيب بس شكل عقلج خالة منحرف
...........................
رفاه
كاعدة مثل كل مرة انتظرريام الي صارتلي مثل الاخت بهاي الفترة ووكفت بجانبي وساندتني لحتى ارجع اوكف من جديد من بعد ما انكسرت وانتكست حالتي على فراك ضاري
مرت علية ذيج الايام مسلوبة الروح جنت مالي خلك نفسي هملت نفسي وهملت دراستي
وصرت يوم عن يوم اذبل
لحد ما اجة اليوم الي وكفت بي كدام المرايا وشفت بقايا
رفاه صرت اباوع لروحي متعجبة معقولة هاي اني
جني عجوز ليش هيج
باوعت لنفسي جنت لابسة جبة اسلامية
نزعتها وغيرت رأيي اليوم ما اروح للكلية بالجبة
بدلت ملابسي ولبست ملابسي الكشخة
وحطيت اليوم ميك اب
اني صحيح غلطت بس ضاري هم غلط بيوم انطة
لحنين مجال حتى تدخل حياته
على الاقل اني جنت ضحية نصب واحتيال اختي وحنين
ليش اني اتعاقب واتحمل الغلط كله واتأذة واتدكر على فراكه وهو ولا هامه والاخ بعده مصر عالطلاق
حسب كلام ريام تكول عمو راضي وبيبي حاجيين وياه
وهو معند الا يطلك خلاص
ترة النفس عزيزة وذليت نفسي بما فيه الكفاية كدامه
وهو ولا رفله جفن
وصلت للكلية والتقيت بريام واتعجبت علية
ريام.. عفية عليج بنيتي اريدج قوية وترجعين مثل الاول واحسن
ترة الدنيا ما تسوى نخلصها قهر
راحت لقسمها ورحت لقسمي والتهيت انتقل من محاضرة لمحاضرة وقررت اخذ المحاضرات الي فاتتني من البنات وواحد من الطلاب الي وياي بنفس المرحلة اسمه كرار اتبرع يشرحلي كم موضوع
وخطية كعد يسرحلي وخلص الدوام واترخصت منة
ورحت التقيت وية ريام يم البوابة ننتظر السواق
جنت كاعدة وية ريمة وجانت تراويني صور عمتي حليمة
.. عزززة لج هاي موعمتي هاي مبدلينها حلفي وكولي هاي عمتي
ريام.. اي والله شبيج ترة خالة حليمة حلوة بس غير هي
متعبة نفسها وهاملتها
رفاه.. اي والله صدك الاهمال يبهذل الواحد ويكبره ميت سنة
اتخيلي اني مجرد هملت نفسي بذيج الفترة حسيت بروحي عبالك عجوز
ريام.. اي والله صدك صرتي جنج عجوز لابستلي عباية وتفترين بالكلية خرب مرات حتى انسى نفسي
واريد اصيحلج خالة
جنا نضحك وسمعنا صوت الهورن باوعت
شفتها سيارة ضاري
مثل كل مرة اجة ووكفها قريب علينا
كامت ريام وسلمت علية وراحت يمه صعدت بسيارته
باوعت عليه ودرت وجهي عنه بلا اهتمام
متعمدة جنت ابتسم على حجي ريام
ووكعت عيني بعين كرار ابتسلمي
عزة هسة هذا عباله جاي اضحك وياه اجة يمشي بأتجاهي
كرار.. شنو وين اختفيتي كلبت الكلية ادور عليج
رفاه.. شنو ليش تدور علية
كرار.. يابة ملازمج نسيتهم عندي
كلت هاي خطية نستهم عندي والباجر بسنو تمتتحن ما يسوى الشرح والتدريس الي درسناه
رفاه.. يبووووي والله فاهية شلون نسيتهم
كرار ببتسامة .. يالله عادي جلّ من لا يسهو
.. اشكرك والله تعبتك وياي
.. لا يابة تعبج راحة
ماحسينا الا على ظل شخص واكف فوك راسنا التفتت
اباوع وجان اشوف ضاري يباوع علية والشرر يتطاير من عيونه
ضاري.. اكول انتي شوكت يجي السايق عليج
رفاه.. هسة يجي ليش تسأل
كرار.. يالله رفاه انا اترخص مع السلامة
تركنا وراح واباوع لضاري ينافخ بغيض
ضاري.. بالله شو كومي اتحركي كدامي
خلي اوصلج لبيتكم
رفاه.. لا ما اريد ما يحتاج عندي سايق يوديني
ضاري.. اكلج تكومين تركبين بالسيارة لا اخذج سحل
رفاه.. رجاءاً ضاري روح عني انا ما ناقصة تسويلي مشاكل بالكلية والله بابا بس يسمع بيك تحجي وياي
يكلب الدنيا على راسي
ضاري.. شنو بوية وليش ما يقبل احجي وياج ترة انا زوجج واملك الحق عليج وشوكت كا يعجبني احجي وياج انا مو صاحبج وتمنعيني عنج
رفاه.. ترة هذا كلامك ماله داعي تحجيه ترة لتنسى انت
اختاريت حياتك وقررت تطلكني
فاتركني اعيش حياتي بعيد عنك وبدون مشاكل اظن اني كا طالبة غير بس حقي
جنت احجي وياه واجة السايق
..........
ضاري صعدة بالسيارة وانا العن اسب واغلط
مقهور منها ومحترك دمي شلون تحجي وياي هيج
ولا وبعد اشوفها تصحك وفرحانة ولا همها
معقولة نستني معقولة قررت تعيش حياتها
والله عشم ابليس بالجنة اخليها تتهنة
مثلما انا متلوع الا اخليها تتلوع
ريام.. عفية ضاري على كيفك سوق
لا تدعمنا
ضاري.. اكول هذا منو الي جان يحجي وية رفاه
.. هذا زميلها وياها بنفس المرحلة
.. وهذا من شوكت هيج بايع الميانة وهشكل ماخذ راحتة ومنطلق بالسوالف وية الست
.. ما اعرف بس هو مرات يكعد يدرسها ويشرحلها المواد الصعبة
جنت احجي بمكر حتى اغيضة
بس كاحسيت الا وكف السيارة فجاءة ابريك قوي
اجيت اطلع من الجامة
ضاري بتوعد.. قسماً بذات الله اذا ما اكسر سنون هذا الخروف باجر ما اطلع ضاري ابن راضي
عزززززة. كعدنا المارد من نومه
بس خليه احسن

............
ميس.. حجي راضي اريد امي هسة توديني الهة
عفية امي مريضة واريد اشوفها
راضي.. خلي اخوج ضاري يوديج انا ما اروح
ولا تلحين
ميس باوعت لريام واشرتلي ارجع اتوسل مرة ثانية
طبعا كدرنا نغير شكل امي تغيير جذري
يعني صدك جانت ظالمة نفسها رحنا اخذناها لدكتورة تجميل وسوتلها بعض التغيرات والعناية لبشرة امي
مرت الايام ويوم عن يوم بدت امي تتغير سوت شد بشرة وشوية فلر سوفت للوجه على كم شغلة
صدك صارت امي بنت العشرين خطية جانت تباوع لروحها بالمريا وتضحك
حليمة.. الله يلعن بليسجن شسوتن بية انا شجاني وسمعت كلامجن وسلمت روحي بيدجن
ميس.. والله يمة انتي كارثة وشلعتي كلبنا شلع علما
وافقتي على التغيير
ريام.. بس عليج الله خالة احجي الصدك شنو رأييج
بالتغيير
حليمة.. ما انكر التغيير حلو بس والله مستحية تصدكين
صرت استحي احجي وية اخوي مازن
ميس.. هههههه بس والله خطية خالي مازن جان شكله تحفة وهو صافن بوجهج ويكول العفو اختي حليمة وين وديتوها
حليمة.. اي بس خالج فاضل قصف جبهتي كال
شلج بهاي السوالف هو انتي حلوة ما يحتاج تغييرين
ريام.. لا اخوج فاضل يخاف على مرته تشوفج وتروح تسوي مثلج
ميس.. والله اتمنى اشوف شكل ابوي اذا يشوفج
عليج الله يمة اذا اجة ابوي لا تلبسين حجاب مثل كل مرة حجابج على راسج حتى كدامه
اريدج تطلعينا بهذا شعرج الحلو ولابسة الكلابية النص ردن الي اشتريناها اني وياج وريام
ريام .. اي خالة خلي اعلمج
من يجي خالو راضي انا اتصل عليج وانطيج خبر حتى تحضرين نفسج بس ما اوصيج
اريدج من يجي تسوين نفسج متفاجئة بجيته ودخلي عليه وسوي روحج مستغربة ورحي كعدي يم اخوج مازن
ولا تعبرينه عبالك ما موجود
ضحكت على وجه امي شلون فاتحة حلكها متعجبة على نصايح ريام
حليمة.. الله ياخذج يريام وانا اكول ابني ضرار شبي
متخبل ويمشي دايخ اثاري مسودنته بهاي سوالفج
ريام.. هَـا خالة اشو كلبتي علية خليج وراي صدكي ما تخسرين اذا ما اخلي خالو راضي يطلب رقم نقالج
حليمة.. امري لله راح اسوي الي كلتو عليه ونشوف وين تصفة تاليها
..............
الحجية خاجية.. يمة راضي شبيك
راضي.. شنو حجية كولي
.. ما تشوف الفرخة شلون مفرفحة على شوفة امها
ليش ما توديها لأمها
راضي.. خير حجية وانا شنو لازمها عن امها
ماتروح تشوفها ليش هي صارلها اسبوعين كل يوم
مو جاي تروح لأمها بعد شكو

عصرت نفسي حتى امثل ابجي
.. عفية حجي راضي كلبي ناغزني على امي
اتصلت عليها وسمعت صوتها ملش تعبان سودة علية
بس لا مريضة لو ضغطها مرتفع
ريام.. اي خطية سمعت البارحة خالو مازن ماخذها للمستشفى يجيك ضغطها
راضي.. عفية مرية منبع مال امراض
شوكت ما اجيها الكاهة مريضة
ميس.. انعم الله عليك حجي ما مرجية منك تحجي على امي انت ما دامك ما تريدها بعد ما لك حق تحجي عليها مريضة صاحية مالك دخل بيها
هسة تاخذني لامي لو اظل بعد ابجي حتى دموعي خلصت ترة والله تعبت من هذا الدور التعبان
حسيت على كرصة ريام من زندي تنبهني لا افضحهم
واخرب الخطة
ورجعت عيطت من جديدمن ورة الكرصة وضيعتها
على ابوي عباله عيطت علمود امي
.. اااااه اهيء اريد امي
راضي.. شنو سالفتج جنج جاهلة تبجين على امج
ميس.. حجي شتحجي هاي امي احب الناس لي امي ومن بالروح تفديني
راضي.. خرب يومج من تلزكين على واحد تاكلين راسه يالله كومي روحي لبسي عباتج حتى اوديج لامج
امري لله

يتبع