رواية تائهة بين اروقة الماضي الفصل الخمسون 50 - بقلم الكاتبة نهى

#تائهة_اروقة _الماضي
#بقلم _الكاتبة_nuha-d-h
مساء الخير والصحة والعافية عليكم يا احبتي
النت جداً ضعيف يعني بطلاع الروح يالله كدرت انزل البارت
اتمنالكم قراءة ممتعة مع ابطال قصتي وما يجري عليهم من احداث املة الوصل معكم الى نهاية قصتنا فانتظروني بالباراتات القادمة لاختم معكم نهاية قصتهم
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀

ريام
يوم عن يوم بدة الحمل يصير ثكيل
وهيام خطية متقدمة علية بشهر اليوم اول يوم الي بالامتحانات وضرار نازل مجاز من يشوفني تعبانة
يلح علية اكعد بالبيت واغيب عن الكلية واليوم امتحاني ما يكدر يعارض بس قرر هو يوصلني وكال راح ابقى اوصلج طول ايام الامتحانات جنت اضوج من يوصلني لان اسوف البنات شلون ياكلنه بعيونهن ولا يحاولن يدارن نظراتهن اتمنى اروح افكس عيونهم
حجيت بصوت ناصي
..عمة حتى عمة شلون يباوعن عابت
التفت علية ضرار باوعلي وجان لابس نضارة شمسية
..شنو شبيج ليش تحجين وية نفسج
.. ضرار عفية بعد لا توصلني للكلية عندي سايق
هو يوصلني
.. لا والله خاف ماترضين واخليج لوحدج وية السايق خير شنو شايفتني مكرن
.. ليش هو مو جان يوصلني قبل
.. اي من جنتي انتي ورفاه سوية بس هسة انتي لوحدج
وما ارتاح اخليج وية السايق لوحدج
بس اريد اعرف انتي ليش ضايجة اوصلج
.. يعني ما جاي تشوف البنات شلون عيونهم
عليك
اباوع عليه ظل يضحك.. يعني هنا الحجي
طلعت هاي كلها غيرة
وكف السيارة يم البوابة التفت علية
.. فديت الي تغار على محبوبها بس صدكي الي عنده الگمر شله بالنجوم
.. اي وانت قشمرني بهاي سوالفك
.. ولج والله احجي صدك انتي بس ديري بالج علية
ودلليني وانا ما اباوع على غيرج
كرصته بزنده بغيض .. عابتلك بالله
واذا اجة اليوم الي تعبت بي وما فارغة ادلعك شلون يعني تروح تتزوج غيري حتى تدلعك
ضرار بضحكة .. لا يابة شبية مخبل هي مرة وحدة اتورطت واتزوجت كافي علية انتي
برطمت وبدلع رمشت عيوني .. يعني شنو قصدك انت متندم
.. لا يابوي هو الي عندة مثلج ما يكدر يشوف دربه
يظل طول عمره يمشي ويسوي حسابج انتي وراه
تدرين انتي صحيح علة وثقيلة وخصوصا هسة انتي وبطنج بس تبقين احلى علة بحياتي
ابتسمت .. ذكرتني بأغنية كاظم الساهر من يكول ( زيديني عشقاً زيدني يا احلى نوبات جنوني )
.. يالله يا ام راضي نزلي قبل لا اطلع جناني عليج
ترة راح اتأخر
واليوم اذا ما لحكت اجي عليج ادزلج ضاري
.. عابتلك خربت علية الجو الرومانسي واغنية كاظم بس يالله خيرها بغيرها ويكون احسن ما تجي
نزلت من السيارة وسديت الباب وعليت صوتي حتى يسمعني البنات
.. ابو راضي حبيبي مع السلامة
حرك السيارة وهو خربان ضحك على حركتي
مشيت واني ابتسم
وشفت من بعيد رفاه ورنا وحنين
جانو رنا وحنين يسولفون ويضحكون
ورفاه كاعدة يمهم صافنة بغير عالم
اتذكرت موقف ضاري البارحة جان كاعد بالحديقة ويحجي بالنقال لفت انتباهي اسم حنين من بين كلامه
اخذني الفضول اسمع واعرف وية منو جاي يحجي
معقولة هاي حنين نفسها
ظليت احوم يم باب المطبخ وفتحته على حيله
وسمعت الكلام كله وظليت واكفة بمكاني مصدومة عزة بعينج يا حنين شلون شيطانة كاعدة تحوم عالولد
والفطير كاعد يحجيلها عن رفاه زعلانة من وراها
ما يدري شنو السالفة
ليش رفاه مو كالت حنين بعد ما اتصلت عليه غير مرةً وحدة علمود تجربه
اشو هاي كاعدة تدك سوالف وياه ومبين من حجي ضاري عادي بس الظاهر هي الي لازكة
الله يلعن بليسج يا رفاه
صرت نار كبرة اني من يمي احترك كلبي
اتمنيت الزم رفاه واخنكها لان امنت بوحدة زبالة مثل حنين ومتدري الماي هسة يمشي من جواها حل تستاهل
طبعاً اني اخذت عهد على نفسي وحلفت ما اتدخل بحياتها خليها تجني ما زرعته ايدها
بس ما ادري ليش من شفتها هسة شلون ذبلانة وصافنة
بغير عالم انكسر كلبي عليها ومتت قهر من شفت حنين ورنا شلون يسولفن ويضحكن ما اتحملت اصبر واسكت واشوفهن شلون يحطمن حياتها
رحت وكفت يمهن وباوعت لرفاه وسلمت نقلت نظري على حنين وقررت احجي وياها واحطها امام الامر الواقع
اني اعرف كلش زين اذا اخذت رفاه وحجيت وياها
راح تجاوبني مثل كل مرة هاي اختي وهاي صديقتها ومستحيل يأذوني خلاص راح اراويها اختها وصديقتها
شنو مسويات من وراها
.. هلا رفاه شلونج
رفعت راسها وابتسمت بوجهي حسيت عليها
عندها كلام تريد تحجي وياي واكيد هذا الكلام يخص ضاري مبين عليها الشوك
سلمت علية وجرت كرسي .. هلا بريمة تعالي كعدي
لتظلين واكفة وانتي حامل مو زين عليج
كعدت يمها حتى احجي وياها بس
دك نقالها والمتصل ضاري
اجتي ترد بس رنا مدت ايدها واخذته منها
رنا .. اني كم مرة كلتلج ما تردين عليه خليه يتصل
وينشلع كلبه ولبسيه احسن هذولي ما يجون الا بالعين الحمرة يعني جاي بكل وقاحة بعدما خانج ومد ايده عليج وضربج جاي يتصل عليج ولا بعد يرسل رسايل تهديد
حتى تردين عليه
ما عليج منه
رفاه.. بس خلي اشوفه شنو يريد الجائز صاير شي مهم
رنا.. لج عوبة لا تخلينه ينصب عليج بكم كلمة
اسمع كلام رنا واني النار صارت تفور بگلبي يا الله شكد حقدت على رنا اخاف جنت
اكرها علمود سالفتها وية اختي لا هسة كمت حتى ادعي عليها من الله لا يوفقها على هاي الدكة
اباوع على رنا لزمت النقال وانطته رفض
باوعت لرفاه.. انتي ليش تسمحين الهة تتدخل بحياتج وتقرر عنج ترة هو زوجج مو زوجها
رنا.. خير وانتي شكو اني واختي رجاءاً انتي خليج بعيدة عن الموضوع انتي مو احرص مني على اختي
فاهمة ولاتسوين روحج ماما الحنونة
باوعت لرفاه وعرفت رنا ما راح تنطيني مجال احجي براحتي وية رفاه
.. اكدر احجي وياج على صفحة لوحدنا
لزمتها رنا من ايدها.. لا ما تكدر تحجي وياج
عندج شي كوليه احجي كدامنا
كمت من مكاني ولزمت جنطتي
.. رفاه تجين لو لا
لان الشي الي راح احجي وياج كلش مهم
رفاه.. انتظري ريام اخذني وياج

رنا.. لج رفاه لتصيرين غبية هاي شي اكيد دازها
ضاري حتى تحجي وياج
والتفتت على رنا
رفاه.. رنا لازم اسمعها لان ضاري زوجي وهو كل حياتي ولازم انطي فرصة لحياتي وياه
باوعتلي .. يالله ريمة امشي
رحنا كعدنا بغير مكان بعيد عن البنات وانا احس بعيون رنا تتبعنا بغيض
رفاه.. يالله ريمة احجي اني اسمعج
ريام.. ولو اني زعلانة عليج وحالفة ما ادخل نفسي بمشاكلج انتي وضاري
رفاه.. ليش تحجين هشكل
.. لان ياما نصحتج لحد ما مليت
وانتي مو هامج ضربتي تحذيري الج بعرض الحايط وفضلتي تمشين مثل العمية ورة رنا
اوك بالله رنا اختج وعاذرتج تسمعين كلامها زين حنين شنو شفتي منها وامنتي بيها
رفاه.. ريام ترة كلامج دخل الخوف بگلبي شنو انتي سامعة شي عن حنين
ريام.. قصدج كولي سامعة اشياء عنها لج عوبة
هاي حنين الي كاعدة تحجين وتشتكين وتسولفين وياها عن حياتج وتورجينها على اسرارج انتي وزوجج
هاي هي نفسها الي سبب مشاكلج وزعلج وية ضاري
رفاه بشك.. شنو قصدج
.. قصدي يا فالحة حنين هي نفسها البنية الي كاعدة تحوم على ضاري تدرين بعد شنو اكتشفت

اباوع عليها شلون انخطف وجهها وبهت لونه وهمست
.. شنو اكتشفتي
.. اكتشفت انتي بزعلج هذا تركتي مكانج فارغ
ودفعتي بضاري لحضن حنين وقدمتيه الهة بصحن من ذهب
وحنين استغلت الفرصة عرفت شلون تلعبها صح فانصحج ترجعين لبيتج وتتلاحكين لزوجج قبل لا يضيع منج ومثلما كلتلج هو شاب والف وحدة من تتمناه وحقه اذا فكر بغيرج
لان هو جاي يحاول وياج وانتي حضرتج مثل النعامة
دافنة راسج بالطين ورافضة تسمحيله يحجي وياج
وترفضين مكالماته
لج انتي شلون ينطيج كلبج يتصل عليج ومتردين عليه
وتكولين انا احبه وين حبج اذا انتي ابسط الاشياء ما كدرتي تحتوين زوجج
لتخلين رنا تأثر على حياتج ارجع واكلج رنا مو كفو تخلينها قدوة الج لان سبق وان فشلت بحياتها
سابقاً فأحسنلج اتبعي كلبج
رفاه بخوف.. لج ريام شكاعد تحجين والله ما جاي اكدر اصدك لا مستحيل ترة حنين هي كالت بنفسها اني مسحت رقم ضاري من نقالي
وكالت عذريني بعد ما اكدر اتصل عليه لان اخاف من اخوي لا يشوفني وانا كل الي علية نبهتج وهاي هي وانتي دير بالج
يعني هذا كان كلامها معقولة تجذب علية شنو راح تحصل
.. لج هسة اذا اكوم اخنكج اكو واحد يلومني
لج عوبة راح تحصل تاخذ رجلج منج يا فهيمة
خلاص بما ان انتي فاهية وعمية بنفس الوكت ادري بيج صعبة عليج تصدكين كلامي
روحي اتأكدي بنفسج هي مو كالت ما سحته للرقم روحي دبريلج حجة علمود تنطيج نقالها
ودكي رقم ضاري بنقالها وشوفي اذا كان رقم ضاري موجود بنقالها معناها هي جذبت عليج
وبعدها راح تعرفين كلام منو بينا الصح والحليم تكفيه الاشارة
انا رايحة للمحاضرة واتمنى من اطلع اعرف شنو سويتي بخصوص حنين
راحت ريمة وتركتني كاعدة بمكاني مصدمة ومحتارة ما اعرف اصدك منو اختي بنت امي وابوي لو اصدك ريمة مرت حماي
اتصلت علية
رنا .. شنو انتي وين بعدج يمها
.. لا راحت واني هسة اروح عندي محاضرة

.. كليلي شنو حجت وياج
..بعدين التقي وياكم وواحجيلج شنو كالت يالله مع السلامة
كمت من مكاني واني جسمي كله يرجف اتجهة على محاضرتي واني احطط براسي شلون راح اخذ النقال من حنين
............

ميس
مر فترة على خطوبة ايمن حسيت بروحي نكرة وكرهت كلشي بحياتي وصرت اسأل نفسي للمرة الالف
شمعنا اني يصير بية هشكل صرت اكره من يجي الليل
لان عشت بي اسوء لحظات بحياتي صرت اني والليل اعداء ما نتوالم هو يهيج علية المواجع وانا ابقى سهرانة
للصبح افكر بيهم واتخليهم يحجون بالنقال سوية للصبح ويسمعها كلام الغزل وهي تخجل منة
جنت من اروح للكلية احاول ما التقي بيهم
لان على مرتين شفتهم بالصدفة واكفين سوية لوحدهم عبالك عصافير حب
اجيت اتخربط وصرت ما اشوف طريقي
حتى الساني بوكتها انعقد من اثر المنظر
هواي علية اني هم بشر شكد ما احاول اتصنع القوة
وما ابين كدامهم ضعفي بس غصب عني انحط بموقف
اقوى من قدرة تحملي
هديل.. لج ميس خير وين صافنة مو جاي احجي وياج
انتبهت على هديل تحجي وياي ومغنتبة بوجهي
.. خير شكو شنو تردين
.. صارلي ساعة اتوسل بيج علمود تجين لحفلة عيد ميلادي
ميس.. لا والله ما اكدر عذريني اولاً اخوي ضرغام
ما يقبل اروح لحفلات صديقاتي هاي احد قوانينه
ثانياً حتى لو يوافق انا ما اكدر لان باجر لعبة برشلونة
والساعة٦ العصر راح تبدي فعذريني ما اكدر افوتها
هديل.. لج عوبة الطوبة احسن من صديقتج
.. اسفة تعذريني مسي لا يعلى عليه حتى ابو جهالي
ما يلحكه
.. عزة بعينج والله انتي مو صاحية
هسة عالعموم احنا عندنا بالبيت جهاز ينقل مبارات برشلونة دائماً اخواني يتابعون الطوبة عليه
.. ليش الباجر ما راح يتابعون اللعبة
.. لا انا حذرتهم وكلتلهم اني عازمة صديقاتي بالبيت
وهمة محجوا شي متعودين اغلب الاحيان يتابعون الطوبة بالكوفي وية جماعتهم
.. هَـا ما دام هشكل لعد انا اجيكم بس خلي بالاول احصل على موافقة القيادة العليا
هديل.. خرب حظي انا ساعة من اقنع بيج وهسة وراج اهلج تقنعيهم ما طلعت جية والله ذليتيني
قاطع كلامنا حضور ايمن سلم علينا واني رديت السلام بصورة عادية مثل كل مرة
باوع علية وحك راسه عرفت هاي حركته عنده كلام يريد يحجيه
خرب اعرف كلشي عنه وافتهمه حتى بالحركات
سألته.. شنو شبيك اشو اليوم لوحدك جاي شعجب هالة وين
ايمن.. هالة اليوم غابت
.. ليش اشو ما كالت راح تغيب
.. لا هي باللحظة الاخيرة غيرت رأيها وغابت
ما حبيت اطول وياه بالكلام احس روحي تختنك
اجيت اروح اني وهديل
سمعته .. ميس لحظة اريد احجي وياج
باوعت عليه ورفعت حاجبي
.. نعم تفضل اسمعك
شفته نقل نظره على هديل محرج وهديل كبل دك جرس عندها وانسحبت
هديل.. يالله اني رايحة مو تنسين ترديلي خبر
.. اوك اتصل عليج بعدين
درت وجهي عليه وباوعتله
ايمن.. ميس انتي ليش صايرة تبتعدين عني احس بيج من خطبت لليوم انتي تتهربين مني
ميس.. لا ليش اتهرب منك بس تعرف كلت خطية ستوك خاطب وشي اكيد راح تلتهي وية خطيبتك
فكلت ابتعد عن طريقك حتى ما اسببلك احراج
ايمن.. لا غلطانة بالعكس انا طول هاي الفترة الي ما حجيت وياج بيها
حسيت اكو شي مهم بحياتي ناقصني وغايب عني
افتقدت وجودج وكلامج واهتمامج وسؤالج عني
ابتسمت بتوتر.. لا ايمن كلت ابتعد عنك حتى اسوي مجال لخطيبتج هالة
لان هذا دورها ومكانها وهي راح تهتم بيك وتشغل وقتك
ايمن .. تصدكين ميس مختنك
فتحت حلكي مصدومة .. هاا اسم الله شبيك مختنك
.. ما اعرف شبية من خطبت هالة واني احس بروحي تايه عجبتني هالة بنزاكتها وترتيبها وجمالها
بس ما اعرف ليش من خطبتها حسيت بفراغ
يعني جنت اكول ان قلة كلامها وياي قبل وثكلها
لان هي خجلانة وتستحي بس هسة احنا مخطوبين
والخجل ماله محل بينا
وعرفت هواي اشياء عنها خلتني اراجع حساباتي
ميس.. شنو عرفت عنها
.. عرفت ان هي ما تهتم للاشياء الي احبها
ولا تحب تعرف عن اهتماماتي ولا مرة سألتني
عن اخر شي سويته عكسج انتي تماماً بحيث جنت احجي وياها ربع ساعة ونغلق النقال
عكسنا من جنا نحجي بالنقال نبقى للصبح نسولف ونضحك ونتشاقة والله حتى ما احس بالوقت من يمر يمج ولا احس بالملل
خرب ولج ميس تصدكين من احجي وياها انعس
.. لا ايمن لتحجي هشكل ترة اني لان بنت خالك
ولتنسى احنا رابين سوية من الصغر لحد ما كبرنا لذلك انا اعرف عنك كل صغيرة وكبيرة بحياتك اعرف شنو تحب شنو تكره وشنو اهتمامك
يعني مو من حقك تحكم على هالة وتقارنها وياي
هي مصارلهة هواي من خطبتها يا اخي انطيها فرصة
حتى تفهمك وتفهمها مو كبل حكمت عليها
الجائز هي هم بعدها ما متعودة عليك وما تكدر تنطلق وياك بالكلام متعرفك انت من يا نوع
ايمن.. ما اتوقع عالعموم انتي شلونج
صارلي هواي ما سامع اخبارج تصدكين اشتاقيت
لايامنا من جنا نلعب ابلاي سوية
ميس.. اهووو هسة الي يسمع كلامك يكول هذا رجال جبير بالعمر وجاي يتذكر ايام شبابه
صار يضحك وعيونه تلمع
ابتسمت على ضحكته وعرفت بنفسي انا مستحيل اتقبل
ايمن لو مهما صار حتى لو فسخ خطوبته وخربط حياته
اني كرامتي ما راح تسمحلي ارجع اتخيله يصير من نصيبي
ايمن.. الله صارلي شكد ما ضاحك هشكل خرب يومج ميس امانة لاتكطعين بية
سمعنا صوت خشن من ورانا التفتت وجان توكع عيوني على صدر عريض رفعت نظراتي المسافرة على عرض الاكتاف ولحكهم الركبة العريضة الحنك
المرسوم بنصه رصعة مثل النكرة
لحية خفيفة كملت رفع عيوني واجتي بعيون
تجدح مثل الصكر
شهكت بفشلة لان جنت ملتهية اتفحص معانيه وناسية صاحبها من يكون
انخبصت وارتبكت .. اااا هلا شلونك غسان
غسان وعيونه عليها يتمنى يخنكها ادري هاي كلما اشوفها الكاهة فاتحة الحلك وبس تضحك وخصوصاً وية هذا الطرن الفاهي عبالك محد موجود بالكلية بس هي وياه الست منطلقة بالسوالف
غمضت عيوني بصبر هسة انا شلي غرض بيها
ابوها اخوها حتى اراقب تصرفاتها
نفضت راسي من افكاري المريضة
وسألتها بصوت خشن مبين بي الحدة مو بيدي ما اعرف ليش هشكل طلع صوتي
.. ميس وين هديل اتصل عليها متجاوب
.. هديل بالمحاضرة
خزرني.. وانتي ليش مو وياها بالمحاضرة شعندج واكفة هنا تدكين سوالف وهاملة محاضراتج
ايمن .. وانت منو حتى تكعد تستجوبها
هشكل
ميس جمدت بمكاني وانعقد الساني خرب والله شخصيته تشبه شخصية ضرغام
ميس .. لحظة ايمن غسان سألني من باب الحرص لان متعود علية دائما وية هديل
غسان .. وانت شلون تعطلها عن محاضراتها وخصوصا قربت بأيام الامتحانات
.. لحضة غسان ترة هديل راحت تاخذ تقوية محاضرة
اضافي يعني مثلما كلت احنا امتحانات واني قوية بهاي المادة
لكيت روحي تلقائياً ابررله موقفي واني عمري ما بررت تصرفاتي لأحد وهاي اول مرة بحياتي اصير بهيج موقف اهووو هسة اني شبية مهتمة بي هلكد
جنا نحجي
ودك نقاله رد عالمتصل
غسان.. هلا بضرغام شلونك
اي اليوم امر عليك لا ماناسي ستوني جنت افكر بيك
واتذكرتك بموقف كلت مكانك فارغ
.. لا هيج موقف عادي ميحتاج تعرفه بس كلت لو انت
موجود بمكاني شنو راح يكون ردك
.. اي والله مريت اخذ هديل من الكلية
اها اوك ابلغها يالله باشا اترخص انا رايح
جان يحجي ويباوع علية
اتسعت عيوني بصدمة وحطيت ايدي على حلكي
باوعت لأيمن وجهه كام ينطي الوان
هذا ليش يحسسني عبالك مسوية جريمة
سد النقال وحجة
.. ميس بلا زحمة تكدرين ترحين تشوفيلي هديل وين
وتبلغينها انا جاي انتظرها
هذا مو طبيعي والله داهية
لعب بأفكاري لعب خلاني خلال ثواني
اتگلب من الخوف الى الحذر بعدها نقلني لخانة الصغار
وعاملني مثل الطفلة رزلني وبعدها امرني اروح اصيح هديل
اول مرة بحياتي افقد الكلام وما اعرف ارد على واحد
يتعامل وياي بأستفزاز وهذا مو طبعي
اجيت اروح وايمن حجة
ايمن.. ميس اليوم اجيكم للبيت ونكمل حجينا
ما اعرف ليش نقلت نظراتي لغسان
شفته لام ايده بقبضة حيرني تصرفة
ما انتظرت لحظة وحدة رحت ابتعدت عنهم
الله يلعن بليسه شنو من رجال
خلاني عايز بس اخذ منه الاذن اتنفس لو لا بحضوره
.................

ضاري
جنت كاعد بمكتب الصيرفة
ودخلت علية حنين وامها اتفاجئت بيها
سلمت على امها وعليها
.. هلا حنين اتفضلي امري مامحتاجة
شي
حنين بدلع.. ما يأمر عليك عدو بس جنت اني ماما مارين من يمكم وشفتك كلت اسلم عليك وكلت فد مرة
عندنا ورق نريد نحوله لاخوية بالخارج
ضاري .. اتفضلو كعدوا وان شاء الله سهلة بس انطوني المعلومات واسم اخوج الثلاثي واقرب منطقة دالة عليه وانا احولهم
فتحت الجنطة وطلعت الورق
واخذتهم وكتبت بالحاسبة التهيت بالتحويل
وامها جانت تحجي وياها وهي كل ساعة تحجي وياي

وتضحك جنت ملتهي بالتحويل ودخل ضرغام وشافهن
باوع علية وانطاني نظرة
كمت من ورة المكتب وكعد هو بمكاني
حنين.. ضاري اشو ما عرفتنا منو

انتبهت لضرغام رفع حاجبه
.. هذا اخوي الجبير ضرغام
انتبهت عليها اتسعت عيونها متفاجئة
امها حجت .. اكلج يمة حنين هذا مو نفسه زوج رنا صديقتج
ضيكت عيوني بشك
ضرغام.. ضاري شنو الجماعة تعرفهم
.. اي يعني تكدر تكول عرفتهم صدفة
وهسة همة جايين يردون يدزون حوالة لأخوها
باوعت عليها
حسيت بيها وجها صار ينطي الوان
ضيكت عيوني ودنكت عالحاسبة
.. شنو حضرتج صديقة رنا
حنين .. اي رنا صديقتي وهسة يالله عرفتك منو
من شفت ضرغام زوج رنا واتفاجئت انت اخوه شوف الدنيا شكد صغيرة
ضاري .. هاي شلون صدفة يعني معقولة تعرفين رنا وما تعرفين اختها رفاه
.. اي اعرفها شلون ما اعرفها تصير اختها الاصغر منها بس علاقتي وياهة مو قوية
ليش تسألني عنها
.. اي لان رفاه تصير زوجتي
حنين اتسعت عيونها متفاجئة.. لا مستحيل معقولة
وظلت تضحك
يعني صدك مفاجئة حلوة يا ربي شكد مشتاقتلهن
التفتت باوعت لضرغام خزرني
اهوووو تعال هسة شيقنعه
انا ماعندي شي وياها
باوعت عليها وانطيتها الوصل ردت اتخلص منها
.. هاج هذا الوصل وباجر يكدر اخوج يستلم الحوالة بأي وقت
كامت هي وامها وشكرتني وكالت امانة سلملي على رفاه ورنا لان صارلي هواي ما شايفتهم
ضاري.. ان شاء الله يوصل
اخذت امها وطلعت سكتت ما حجيت شي بس نظرات ضرغام ما تطمن سويت نفسي ما مهتم اي صدك انا ماعندي شي احجي وياه ما دام ما عندي اي شي وية
حنين غير هسة سالفة تحويل وخلاص
وحتى واتس اب حضرتها من بعد الاشكال الي صار
وانا هم ما فارغ كلش كافي علية دلع رفاه وزعلها علية
ما ناقص تجي وحدة وهم تكعد تتدلع وتتمزعل براسي
اشو هنة كلهن نفس الشي اول ما تجي تتعرف عليهن
يحطولك القمر بيد والشمس بيد تالي من تعاشرهن
يخلنك تكره الساعة الي عرفتها بيها
الا رفاه هاي تختلف هاي بنت كلبي وربيتها على ايدي واعترف انا الغلطان اي وحدة بمكانها من تقرة هيج رسايل راح تزعل وتنقهر وانا هم ما قصرت انطيتها المقسوم وضربتها
بس الي قاهرني بهذا كلة ترفض ترد على مكالماتي
وكل مرة اتصل عليها وتنطيني رفض احلف
بعد ما اتصل بس كلبي يخوني وارجع الكة ايدي تنمد عالنقال ودايس على رقمها واتصل عليها من جديد
اليوم كلت اتفق وية ريام اوصلها للكلية وتجيبها احجي وياها ريام تعرف شلون تقنعها تحجي وياي
.........................................
ميس .. يمة عفية الله يخليج قنعيلي ضرغام علمود اروح لعيد ميلاد هديل
حليمة.. وانا شكو ذاك هو اخوج روحيله واحجي وياه
ميس.. شبيج يمة اخاف يعند ويرفض اذا انا اطلب منه
بس اذا انتي تحجين وياه يوافق يسويلج حساب
حليمة.. يمة منج ومن السانج هسة الي يسمعج يكول شكد فقيرة هاي البنية ويحسدوني عليج
.. والله يحسدونج علية اصلا المفروض انتي كل يوم تصلين ركعتين شكر لوجه الله تعالى
لان عندج هيج نعمة بالبيت بس انتي ما مقدرتها
الحجية خاجية.. ولج جدة ميسة سطرتي راسي الله يلعن بليسج روحي لعيد مدري شنو هذا مال صديقتج وانا احجي وية ضرغام
طفرت على جدتي وبستها من راسها
.. عاااا جدة الله يخليج الي
الهي يعطيك الصحة والعافية يا ناصرة الفقراء والمساكين
الحجية خاجية.. احتركت عشيرتج شنو بالعة مسجلة
ميس.. يمة عفية احجي وية ضاري خلي يوصلني لبيت هديل
حليمة .. يالله روحي انتي بدلي وانا احجي وياه
رحت ركض ابدل واتحضر عالسريع انا ما يحتاج اسوي اي شي
دخلت فتحت الكنتور وطلعت ملابسي
جينز كاحت مشكك ولبست فوكاه بدي ابيض بي شعار نادي برشلونة ولبست سوار برشلونة
وحذاء رياضي هم بي شعار برشلونه رفعت شعري
ذيل حصان عالي
سمعت صوت ضاري يصيحني حتى استعجل
ركضت لبست العباية وشالي وطلعت اركض
الي يشوف شكلي يكول هاي مطرودة مو رايحة لعيد ميلاد بس مشكلتها ست هديل مو مشكلتي هي الي لحت
علمود احضر عيد ميلادها
طلعت لضاري شفته كاعد بالسيارة وبس ينافخ
ركبت يمه بالسيارة والتفتت عليه
.. الله بالخير ابو الشباب شنو راح نطير
.. وين نطير
.. اندري اسأل روحك بس تنافخ
حرك السيارة وطلع بينا اي مو اللعبة راح تبدي وانتي حضرتج عرستي الا هسة ترحين وجدتي اكلت كلبي الا
اوصلج لو بس اعرف انتي شعندج وية جدتي وهشكل
تدافع عنج
.. خمسة وخميسة بعين المايصلي عالنبي
يا اخي تحبني لله اني بزر الكعدة وصغير القوم
يعني لازم تدللني
وصلني يم بيت هديل ووكف السيارة
.. يالله بلا حجي زايد دوختيني لو ادري ما حاجي حشة هذا مو السان غدارة
نزلت وشفت باب بيت هديل مفتوح شوية
اجيت اسد الباب وطلعت الساني اعيب على ضاري
ودخلت جوة وانا اضحك عليه شلون يسويلي حركة التوعد بمعنى اصبريلي انا الج
اجتي هديل طالعة جنها باربي بنت اللذين
تخبل وراها اجوي البنات هالة وبقية صديقاتنا
خرب هاي شطالعات وحدتهن تكول رايحة على عرس ابوها
ظليت ابلعم عزة همست يم اذن هديل
.. اكول هديل انتي ما كلتي ابوج معرس جان بدلت ورحت صالون بعد انتي بس كلتي عيد ميلادج
هديل بضحكة.. لج ثولة هو عيد ميلاد يعني حفلة واغاني وبدلات وفساتين
.. ولج عوبة انا ما لابسة غير ملابس عادية
.. يالله عادي انتي كلشي يلوكلج
اخذتني لغرفتها حتى اعدل روحي
يا حسرة شنو اعدل عبالها انا مثل البنات وانا داخلة عليهم
جني يونس محمود الرياضة تنطق بكلي شبر بملابسي
خرب
هديل.. ميس نزعي عبايتج وعدلي هنا وهذا الميز كلة ميك اب اذا تردين استخدمي عادي
طلعت وتركتني لوحدي خطية هاي مصدكة روحها ولا بعد تكلي حطي ميكياج
باوعت لاقلام الحمر والكريمات واجتني فكرة ليش اضيع الفرصة
عدلت شعري ورسمت على خدي شعار برشلونه
ولونته بمكياج هديل ادري بيها راح تنجلط اذا شافتني لاعبة طوبة بمكياجها بس هذا ماجنته براغش على نفسها
طلعت من غرفتها ورحت اتبع اصوات البنات شفت امها وخواتها وصديقاتنا جنت واثقة من نفسي واثق الخطوة يمشي ملكاً اي نعم هذه انا ميسي بنت راضي
من الثقة الزايدة حسستهم عبالك بنت السلطان دخلت عليهم اجوي امها وخواتها سلمو علية واني بادلتهم السلام وختها كالت
.. اووي انتي شكد كيوووت
رمشت بعيوني وفتحت حلكي هاي شنو تقصدني اني
اقتربت مني وكالت ..هاي عند منو سويتي هذا الوشم الي على خدج يخبل اريد اسوي مثله
بس كون مؤقت
سمعت شهكة هديل. . لج ميس عوبة لاعبة بمكياجي
ولج اني كلتلج مكيجي مو روحي خططي خارطة العالم
على وجهج
.. يا اختي ما اعرف احط مكياج لوجهي كلت استفاد من
كرمج وخطيت الشعار على خدي يعني كل واحد وهو حر شلون يستخدم الميك اب على وجهه
باوعت لأمها شلون تضحك
.. لج عيني انتي دمج عسل الله يحفظج لاهلج
والله من دخلتي وشفتج اكول ياربي هاي البنية ولا تكبر
والله هسة الي يشوفج يكول هاي عمرها ب١٦سنة
لان بعدج محافظة على برائة الطفولة بوجهج مو مثل هديل تريد بس تكبر بروحها
خجلت من مدحها وينج يايمة تعالي شوفي شلون النسوان يحمدن ببنتج يالله عالعموم هو الظاهر كل الامهات ما راضيات على بناتهم
.. اشكرج خالة هذا من ذوقج
ابتسمت على روحي شكد حلوة واني محترمة
وينج ياريمة
احتفلنا بعيد ميلاد هديل وانطيناها الهدايا وشغلن الاغاني والبنات كامن يركصن ويغنن وية الاغاني وانا
جنت مندمجة وياهن وفجاءة اتذكرت اللعبة عزززة
رحت يم هديل
.. هديل عفية شغليلي التلفزيون ايريد اشوف اللعبة حتى لو بس الحك اشوف النتيجة
هديل.. عابتلج هسة مو جاي نحتفل عوفي اليوم اللعبة لخاطري
.. اكول عندج تلفزيون يطلع اللعبة لو اتصل على اخوي ضاري يجي ياخذني واشوفها ببيتنا
هديل .. اوف منج تعالي اخذتني للصالة مالتهم وشغلت التلفزيون وخلته ع القناة الرياضية المشفرة
وكعدت عالقنفة وحطيت الكوشة بحظني
الحلو بيهم هنا الهول مفتوح عالصالة جانو البنات كلهم متجمعات بالهول يمي
لذلك اخذت راحتي وكعدت اباوع ونسيت روحي واندمجت وية اللعبة
سمعت امها كالت نصي صوت الديجي لا يجي اخوج ويسمعه ويضل يحجي علينا
هديل.. يمة سدي باب الصالة حتى ناخذ راحتنا
سدت الباب ونصة صوت الديجي واني عليت صوت المباراة والمعلق المغربي يرفع المعنويات
جنت مركزة وية الطوبة وفجاءة عرقلو مسي
صحت بصوت عالي.. والله جزاء والله المفروض ينطونه ضربة جزاء
وكفت من القنفة .. انت حكم لو بياع لبلبي اي غير تنطي ضربة جزاء من الله ياخذك
سمعت واحد يمي سألني
.. شنو منو الي ينطونه ضربة جزاء
جاوبة بدون ما انتبه على روحي
.. اسكت غير هذا الحكم المطي ضيع علينا ضربة جزاء
؟؟؟.. صدك مطي لا مو بس مطي
مطي وفاهي بعد
جمدت بمكاني من الصدمة وانتبهت لروحي حجيت وية واحد بدون ما انتبه عليه منو
غمضت عيوني وعفست وجهي ودرت وجهي على كيف حتى اشوف منو شهكت بصدمة ولطمت على صدري

..عزة غساااان!!!
.. لا خياله من كرت عين امج عليج كاعدة تابعين اللعبة
ليش ما كاعدة وية البنات تحتفلين
انكتم صوتي وما كدرت احجي اي شي من الاحراج
كمت من مكاني وهو باوع علية ودار وجهه
نزلت عيوني وانتبهت على روحي شلابسة
عزة بعيني يا الله انا شكد عوبة رحت اركض
مثل بيبيب ما يشوف الا غباري
سمعت صوته وهو يضحك من وراي
غسان اتصلت على امي حتى تسويلي طريق علمود اصعد لغرفتي دخلت للبيت وسمعت اصوات البنات وضحكهن و اجيت اصعد فوك بس لفت انتباهي صوت بنية معصبة وتصيح عالتلفزيون ركزت بوجها خرب
معقولة هاي ميس اترددت للحظة ان هاي الجنية الحلوة الواكفة كدامي هي نفسها ميس ظليت مصفصف معقولة
هيج الحجاب يغيرها بنت اللذين باوعت عليها شلابسة ووجها وشعرها ردت بكل طريقة اغض بصري عنها
ما كدرت اشيل عيني منها جنت اباوع لبنية صغيرة بجسد امراءة كبيرة
حسيت كلبي انتفض وبلحضتها عرفت انا ليش كلما اشوفها كلبي ينتفض اثاري هاي الجنية باكت كلبي
بدون علمي
ميس رحت دخلت يم البنات وكلبي يدك عبالك جنت اركض بسباق دخلت ام هديل وكالت غسان يكول خلي البنات يلبسون حجاباتهم يريد يدخل حتى ينطيج الهدية
ركضو البنات يلبسن حجاباتهم واني همين اخذت عباتي من اختها جابتها وية الشالات مالت البنات
قررت اتصرف طبيعي اي عادي هو مثل ضرغام
واصلاً اني متعودة عليه
اخذت ماعون وحطيتلي قطعة كيك وكعدت اكل
دخل وسلم عالكل وراحت هديل يمه وباسها من راسها
انتبهت للبنات كلبن دقلة واحتارن شلون يلفتن انتباه غسان خرب يومه هو شدعوة عليه هشكل طويل
وصاحب طلة بهية يا اخي كلش اوفر
انتبهت لروحي صافنة بوجهه ولكمتي تارسة حلكي
وملتهية اكل
جان يباوع علية وحاصرته الضحة
رفعت حاجبي هذا شبي شنو شايف قرد كدامه ويضحك
رفع صبعه واحطه بطرف شفايفه واشرلي على شفايفي بعيونه
رفعت ايدي واتلمست المكان الي اشر عليه
عزة الكريمة ملطخة طرف شفتي
مسحتها واني احس خدودي صارت حمر
يارب بعد شنو بقى ما سويتة كدام هذا الرجال
شكو شغلة تعبانة عرفها عني وكل موقف اوكع وياه اسخف من الثاني حصرتني البجية الا شوية همزين
ضاري لحكني واتصل علية منتظرني بالباب
جان جبت العيد لو بس متأخرة عندهم شوية
.......................

هيام
اليوم حفلة طهور علاوي والكل مخبوص خبص
وخصوصاً خالة حليمة وخالو راضي وبيبي خاجية
محتارين شنو يسوون
اليوم خالة حليمة عزمت الكل عالعشا وكالت نحتفل بطهوره
وميس اتفقت وية بنية منظمة مناسبات واجتي وسوت ديكور يجنن وميز جبير عليه العاب وهدايا وشرايط يعني صدك مسويته حلو
لبست علاوي دشداشة بيضة وهو فرحان ما يدري شنو ينتظره
دك نقالي وجاوبت واني مبتسمة
.. هلا ضرغام شلونك
.. هلا بيج بطة
.. عفية ضرغام اليوم حاول لا تتأخر على طهور علاوي اريدك تكون موجود يمه من يطهرونه
لان ماتعرف شلون خايفة عليه
.. لتخافين ان شاء الله اخلص كم شغلة واجيكم
يالله ما محتاجة شي
.. لا حبيبي سلامتك ما اريد شي
.. اكول بطة قبل لا تسدين النقال اريدج اليوم تلبسيلي الفستان الاحمر القصير ترة ضرغامج صارله هواي صايم على حضنج واريد اليوم افطر بيج
.. ان شاء الله بس لا تنسى اليوم طهور علاوي واخاف التهي وياه
.. لا تطلعيلي سالفة الطهور حجة
علاوي اليوم راح يبات عند امي حتى تدير بالهة عليه هي كالت البارحة
ضحكت على كلامه.. صار حبيبي تدلل انت ما طلبت غير حقك
ضحك .. يالله ام الحقوق خلي يجي الليل ونشوف
شراح تسوين اتمنى تبقين محافظة على وعدج
وما تطلعينا بسالفة ثانية تخرب علينا الليلة
ضحكت بدلع
وهمس.. من احتركت عشيرتج ولج لاتضحكين هشكل
وتحركين بدمي
سمعت اصوات رياجيل قريبة عليه اتغير صوته
.. احم يالله انا رايح عندي شغل
افتهمت لازم انهي المكالمة لان حرم الباشا ضرغام ممنوع رجال غريب يسمع صوتها
ابتسمت وهمست .. يالله اني انتظرك على احر من الجمر مع السلامة
سديت النقال
والتهيت احضر وية خالة حليمة للعزيمة
انتبهت لخالو راضي كل ساعة يدخل للمطبخ
يحجي وية خالة حليمة وهي دائماً تجاوبه ببرود
من ورة خشمها
ضحكت على شكلهم عبالك شباب ستوهم متزوجين متزاعلين
الي معجبني بالموضوع تصرفات خالو راضي
ادري هو مو تزوج عليها بعد ليش جاي يفتر وراها مثل الطفل من يريد يصالح امه
ما جاي افتهم الموضوع عبالك معادلة صعبة
يعني اتزوج وشاف راحته بحضن غيرها
اي معناها هي صار مالها دور بحياته اتمنى اسأله
شنو يحس وليش هشكل يسوي
عدت اربع ساعات
وعلاوي ابني جهزته
حضرت نفسي وبدلت وصلو بيت خالة هيفاء وبيت خالة حمدية واولادهم وبناتهم
وبيت خالو مؤيد وخالو حسن اجوي وبيت خالو مازن ابو ارشد اجوي بس بيت فاضل اخو خالة حليمة
اتعذرو عن الجية والظروف معروفة بناته زعلانات
وصل المضمد حتى يطهر علاوي وخالو راضي
وبقية الولد كالو حظرو علاوي
بس ضرغام كلش اتأخر ليش
اتصلت على ضرغام
يطلعلي مشغول اتصل على ضاري ماكو ينطيني رفض ضل بالي يمهم
.. اكول ريمة عفية بالله اتصلي على ضرار
ريام .. شنو ليش اتصل صاير شي؟؟
.. اشو ضرغام وضاري اتصل عليهم ماكو محد يرد
وضرار هم ماكو شجاهم وهاي اني مأكدة عليهم يرجعون من وكت
......................
ضاري
جنت جاي اعزل بالمكتب حتى اليوم ارجع من وكت
ضرغام.. يالله ضاري انا طالع كبلك عندي كم شغلة اخلصها بطريقي وارجع للبيت انت عزل وروح بوجهك للبيت
اتصلت على حمزة
ضرغام.. الو هَـا حمزة تعال للمكتب حتى تساعد ضاري
حمزة الوحيد الي اكدر اامنه على حلالنا واثق بي
طلع ضرغام وانا كملت السجلات وحضرت المفاتيح حتى اعزل اجة حمزة وسلمته الامانة
حتى يوصلهن للبيت وبقة منتظرني باوعت عليه ورفعت حاجبي
.. يالله اتحرك شوف شغلك شعندك واكف فوك راسي
حمزة ببتسامة.. باشا نرجع سوية شعدنا
ضاري.. محد كايلك انت لزكة
حمزة بضحكة.. والله تريد الصدك باشا هذا انت ثاني واحد من بعد امي يكلي لزكة
ابتسمت وهزيت راسي وقفلت المكتب وشمرت المفاتيح عليه
صعدت بالسيارة وحركتها وحمزة راح ركب بسيارة البيت
اتحركت ودك نقالي اباوع عالمتصل حنين
غلست عليها ترة هواي مصختها شوكت ما يعجبها اتصلت عبالك انا كاعدلها ما عندي شغل وعمل
اجتني رسالة فتحتها هم حنين بس لفت انتباهي
كاتبة.. عفية ضاري ضروري ترد علية محتاجتك وماعندي غيرك اامن بي على فلوسنا وحلالنا
غمضت عيوني بصبر رجعت اتصلت مرة ثانية
جاوبتها
.. هلا حنين
.. عفية ضاري ماما التوت رجلها وعندي حوالة
لأخوية محمود مسوي حادث بتركيا ولازم ادزله فلوس ضروري اوصلهم الة
وماما متكدر تطلع من البيت
فكلت اتصل عليك لان انت الوحيد الي اكدر انطيه الفلوس ويحولهم لأخوي
.. يعني هسة شنو تردين
.. اريدك تجي لبيتنا حتى انطيك الفلوس وتحولهم لان ما اكدر اطلع لوحدي مثلما تعرف اني بنية ولوحدي
.. هذا هو خليهم عندج الفلوس وانا الباجر احولهم وتعالي انتي وامج جيبي الفلوس من تكدرون
حنين.. لا لا ضرغام عفية ما اريدهم يبقون عندي لان المبلغ جبير مو مال اخلي لبعدين
اذا ما تكدر البس عباتي واشوف اي صيرفة تحولهم الي امري لله واسفة اذا ثقلت عليك
.. لا ما يحتاج تطلعين لوحدج بس انطيني عنوان بيتكم
وانا جايكم
حولت اتجاه الطريق ورحت لبيت حنين
اتصل علية حمزة.. هَـا باشا على وين اشو غيرت الطريق
اهوووو بالله هذا شحجي وياه
.. حمزة انا طالع بشغلة ضرورية انت روح كمل طريقك لبيتنا
حمزة.. صار باشا
................
ضرغام بالطريق لبيتنا اتصل ابوي يستعجلني لان المضمد وصل وراح يطهرون علاوي
ويريدني اكون يمه
سديت النقال واجاني اتصال من حمزة
.. الو هَـا حمزة
.. الو باشا لازم تجي بسرعة ضروري
.. شكو شصاير
.. باشا اخوك ضاري اجاه اتصال من حنين الي كلتلي عليها اجمع عنها معلومات قبل كم يوم
.. اي شبيها
.. هسة هي اتصلت عليه وما اعرف شنو طلبت منة بس الي افتهمته هسة هو رايح عليها لبيتها
باشا والمعلومات الي عرفتها عن البنية ما تطمن
البنية سمعتها مو شي والي اعرفه محد موجود ببييتهم
حالياً
ضرغام جان حمزة يحجي وجرس الانذار دك عندي
وافتهمت حمزة شنو قصده
يعني ضاري اخوي انصبله كمين
ضرغام.. حمزة كلي انت هسة وين وانا جايكم
انطاني العنوان واكدت عليه يبقي عيونه على ضاري وما يتركه
اتصلت على نقال ضاري ما جاوبني
ضليت اسب واغلط الله يلعنك يا ضاري ضربت المقود
وشخطت السيارة بسرعة وغيرت الاتجاه
كبل اتصلت على ضرار
.. ضرار هسة تجيني وتجيب وياك كم ضابط
من جماعتك
ضرار بخوف.. ضرغام شنو شصاير كلي انت وين
انطيته العنوان
ضرار.. ياخوي وكع كلبي بس كلي شنو صاير

جنت احجي وية ضرار احس باعصابي تلفت اريد الحك على ضاري
دك نقالي الثاني حمزة يتصل وجاوبته وضرار عالخط الثاني يسمعني
.. هَـا حمزة شنو
.. باشا استعجل ضاري دك الباب عليهم
..لك حمزة حاول تمنعه بكل طريقة
صار باشا بس عفية باشا استعجل ترة ما اضمنلك استاذ ضاري ما يسمع كلامي
يالله هاي احنا وصلنا بالمنطقة يمكم
نهيت الاتصال من حمزة وكملت كلامي وية ضرار
.. ولك ضرار اخوك راح يجيبلنا مصيبة وبس الله اليسترنا

يتبع