رواية تائهة بين اروقة الماضي الفصل الحادي والخمسون 51 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha-d-h

مساء الانوار عليكم احبيتي اعتذر عن التاخير بتنزيل
البارت بس اليوم يالله كدرت اروح لمكتب برمجيات
وانزل برنامج Vpn برنامج تقوية الانترنيت. ويفتح الفيس والواتباد
حبيباتي اشكركم على سؤالكم عني للاطمئنان
وان شاء الله. اذا اكو نـِـٓــــٓــِـت بالليل. انزل البارت
الوراه
احبكم. هواي احبكم كومة
اختكم نهى
🍀🍀🍀🍀🍀🍀🍀🍀🍀🍀🍀

ضاري
وصلت يم بيتهم واتصلت على حنين وكلتلها انا يم الباب
حنين.. ضاري فوت جوة محد موجود بس ماما
واني هسة جاي اسند ماما حتى تكوم تجيك وتنطيك الفلوس
نزلت من السيارة وتركت النقال بالسيارة رحت
دكيت باب الشارع بالسويج ودخلت جوة لكيت باب المطبخ مفتوح صحت .. يا اهل الدار اقتربت من باب المطبخ ودكيت عليه بس مدخلت ظليت واكف انتظر بالكراج يم باب المطبخ
.. خالة ام محمود
جنت احجي حسيت بحركة خطوات سريعة اجتي من وراي وبنفس اللحظة طلعت كدامي حنين
باوعت عليها اتفاجئت بمنظرها جانت لابسة ملابس فاضحة واقتربت مني رجعت للخلف مستنكر الوضع كبل دك جرس عندي الي كاعد يصير وياي كمين
وحنين تريد تبليني بفضيحة
حنين بدلع.. ضاري تعال فوت جوة محد موجود لتخاف
البيت بيتك هسة ماما تجي
ابتعدت عنها واجيت ادور وجهي واطلع ما حسيت الا على ضربة
اجتني على راسي وصوت وشة بأذاني
وكعت بالكاع ردت اتمالك نفسي لازم اكوم
بس الظلام صار يبلعني بالتدريج غصب عني
اختنكت وهمست بصوت يائس
.. ياربي لطفك
سمعت صوت صياح قريب علية وبعدها ما حسيت بأي شي غطيت بحضن الظلام

.........
ضرغام
نهيت الاتصال من حمزة واجاني بعده اتصال من رفاه
مرت ضاري عقدت حواجبي مستغرب
جاوبتها وسمعتها تبجي وتعيط كلشي ما افتهمت منها
غير بس كلمتين
.. ضرغام الحك على ضاري حنين صديقة رنا مسويتله كمين تريد توكعه وتبليه بفضيحة
صحت .. لج رفاه انا هسة
بالطريق رايح الحك على ضاري قبل لا تصر المصيبة
بس خلي ببالج كلامي وياج ما خلص وحسابي وياجن بعدين
جانت تحجي وتبجي.. ميخالف ضرغام شتريد تسوي سوي بية بس ابوس ايدك استعجل
حياتي كلها بين ايديك والله اذا صار شي على ضاري اموت روحي
نهيت الاتصال منها وانا راح اتخبل من التفكير
شلون التقت طرقهن رفاه ورنا وية وحدة مثل حنين
جنت اسوق وايدي ترجف واعصابي تلفت اريد بس اوصل والحك على اخوي لاتصير كارثة بينا وتوكع فوك روسنا
ادري بأخوي ضاري اتصرف وية البنية من باب الشهامة بس استغفر الله من ورة افعال بعض البشر وتصرفاتهم الدونية كطعو حتى سبيل المعروف
يعني الواحد حتى لو بعد يريد يسوي معروف يتوبونه لله
يخاف يتورط من باب الحذر واجب
وصلت لراس الفرع لكيت حمزة كاعد يتلاوة وية واحد ضخم
كبل ركنت سيارتي يمهم وجريت سلاحي من جوة الكشن وسحبت اقسام ونزلت اركض مفزوع احس كلبي صار نار على اخوي
صادف بنزلتي وكفت سيارة ضرار نزل منها هو واثنين من ربعه لابسين زي عسكري
شافني لازم سلاحي كبل سحب سلاحه من حزامه
ضرار بخوف
.. ولك ضرغام احجي شصاير ضاري وين
جاوبته وانا اركض بأتجاه حمزة اباوع عليه كدر يسيطر عالولد ويكتفه وينومه على وجهه
حمزة.. باشا روح الحك لأستاذ ضاري ضربوه على راسه عفته جاي ينزف
دفعت الباب الرئيسي ودخلت بحذر وشفت اخوي مدد عالكاع والدم ماخذه
حسيت برجلية ثكلن وحيلي راح
اريد بس اروح يمه ما اعرف شجاني
سبقني ضرار راح يمه ونزل بالكاع يجس نبضه
ضرار.. ولك ضاري منو اتجرىء وسوة بيك هيج ياخوي
سمعت صوت ضاري يون موجوع
سنده ضرار والشباب جان دايخ والدم ينزل من راسه على وجهه
اجة من وراي حمزة وجايب الولد
مكتفه وجابه قريب يمي
وجريت الولد من مقدمة شعره ورفعت راسه وقربت منه صحت بيه بعالي صوتي
.. ولك ياعار انت تسوي بأخوي هيج
اليوم الا اخلص الدنيا من شرك
والا اخليك تطلب الموت بيدك وما تحصله
كلي منو وراك وليش تريد توكع اخوي
طلعت ام حنين شافتنا وشهكت مفزوعة
اشو هاي شافتني كومي فتحتي حجابج وشكي ثوبج وصارت تلطم وتصرخ
..يبوووو لحكونا ياناس ياعالم سطو علينا المايخافون ربهم يبووووو يردون يكتلون وليدي
عاد انا جن جناني صحت بيها بصوت
رج اركان بيتها التفتت وسحبت ابنها من شعره ا
وحطيت المسدس بحلكه
ودرت وجهي عليها
.. شوفي ولج صوت واحد منج
وافرغ المسدس براس هذا الطلي

صاحت بخوف.. لا خالة دخيلك عفية كلشي ولا محمود ابني والله هذا اخرس وبي حالة نفسية
عوفه الله يخليك
باوعت لحمزة وانطيته اشاره
هو كبل افتهمني وانطاه دفرة على سيقانه خلاه يوكع على اركبه مثل الراكع جان مبين عليه الخوف
هي عاطت .. لا خالة ابوس ايدك عوفه ترة هو ماله دخل
باوعت لحنين طلعت لابسة عباية وشال مشمور على راسها بأهمال
دك نقال حمزة رد وكللهم فوتو دخلو جوة و شوية ودخلو الحماية
حمزة .. باشا انت اخذ استاذ ضاري
وهذولي عوفهم علية انا اشوف شغلي وياهم
باوعت لجماعة ضرار سندو ضاري واخذوه
واحد منهم حجة وية ضرار.. سيدي احنا راح ناخذ اخو حضرتك للمستشفى حتى يكشفون عالجرح ونضمده ونسوي تقرير بالصار عند الطبيب
ضرار.. تٌـٌـمــام هذا هو اخذوه واحنا جايين وراكم بس نخلص تحقيق وياهم
التفتت على حنين اتمنيتها رجال جان ابتليت بدمه بس ياحيف مو زلمة واتكاون وياه
جنت افور من القهر والغضب
باوعت عالخروف اخوها و انطيته دفرة على بطنه برجلي
سمعت صرخة خوف صدرت منها باوعت عليها
.. وانتي هم حضري روح جايج الدور
وكف كدامي حمزة
.. باشا لاتوصخ ايدك بيهم هذولي عوفهم علية وانا
اخليهم يزوعون ويعترفون بكلشي
احس انفاسي نار مشتعلة التفتت عليه
..حمزة اريدك خلال دقايق تخليهم يعترفون بكلشي
ضرار.. ضرغام ليش ماتخليني اشمرهم جوة بالسجن حتى يخيسون هناك وهناك جماعتنا يشوفون شغلهم وياهم ويكومون بالواجب
حنين .. لالا عفية ضرغام دخيلك والله راح احجي كلشي بس لاتخليهم يسولي شي
باوعت عليها.. يالله اسمعج بس قبل لاتحجين
ما اريد لف ودوران بالحجي بس اشم ريحة تلاعب بالكلام كبل اسلمج لضرار
نقلت نضرها مني لضرار جان لابس زي عسكري
بلعت ريكها وصارت كلها ترجف
.. لالا هذا هو راح احجي كلشي بس تركو امي واخوية
ترة هو مريض
..شوفي ولج لا تحاولين تنخيني انا مو ضاري
ابو كلب الطيب وتكسرين خاطري انا ضرغام
والي يتعداني ادوسه برجلي وما يرفلي جفن
............
ريام.. لج هيام كافي لاتبجين هسة هذا هو علاوي كدامج الحمدلله طهروه ومابي شي بعد المن البجي
الحجية خاجية .. خايبة جدة عوفيها خليها تولي هاي عيارة نسوان لاهو اول ولد يطهروه ولا هو اخر واحد
هيام.. بيبي والله مو بيدي حسيت روحي طلعت من طهره المضمد كدام عيني يا الله ماشفتيه شلون فرت روحه وصار ازرك من البجي والله اجيت اموت
لو ما صارخ جان لميت العالم بالصريخ
حليمة .. انتي صوجج مو خالج كلج طلعي من الاستقبال خاف تخبصين المضمد
الحجية خاجية.. خابية جدة صلي على محمد
مو زين فزيتي بوجه الولد و لاتخلينه يشوفج تبجين نوب يكوم يزيد بالبجي
جنت ابجي خايفة على ابني وبنفس الوقت مقهورة
من ضرغام لان اتأخر وما حضر طهور ابنه اهم لحظات بحياتنا هو ماموجود
والاستاذ اتصل عليه ما يرد علية وبقينا منتظرينه لحد ما خالو راضي قرر مايتنظر ضرغام
وطهر علاوي وخلصو واحتفالنا وصبينا العشا واني ساعة يم علاوي وساعة بالمطبخ وبعدين
اتجمعو خالاتي وخالة حليمة وبيبي خاجية كعدن يهوسن
ويصفكن لعلاوي وبعدها اجوي خالو حسن وخالو مؤيد واولادهم وهم سألوا على ضرغام والولد
وخالوراضي كللهم عندهم شغل مهم يخلصونه ويجون

اباوع ع البنات منطلقات بالسوالف والولد منطلقين بالتصنيف على علاوي جنت كاعدة احرك بروحي من ورة موقف ضرغام واجتني ميس
تركض تريد تاخذ صورة لعلاوي لا مو بس هيج تريد التصوير مباشر فضيحة
ميس.. يالله تعال يابعد عمتو خلي اخذلك صورة من قلب الحدث
وانزلها على الانستاغرام واكتب عليها هاشتاك طهورعلاوي واخلي المايشتري يتفرج
.. اكول ميس خالو اتصل ع الولد لوبعده
.. اي قبل شوية كدر يحصل ضرار وحجة وياه وكله
احنا ما بينا شي لايضل بالك يمنا احنا عندنا شغلة مهمة نكملها ونرجع
.. شنو هاي الشغلة المهمة الاهم من علاوي ابنه
ميس.. هيام الغايب عذره وياه لتضلين تفكرين لو بيهم شي جان كال ابوي بس الظاهر ظرف طارئ حال بينه وبين حظور الطهور
.. افتهم بس اذا الغايب مغلس حتى ما يكلف نفسه يشيل
نقاله ويتصل ويطمنة والله مليت من اخوج ولا مبالاته
وياي كضة عمره حاطني اخر قائمة اهتمامه تاركني عالهامش اريد اعرف شوكت يفكر بية ما ويسوي حسابي مثل الناس
سمعت صرخة علاوي وكمزت من مكاني وشفته عند خالة حليمة باوعتلي
حليمة .. على كيفج لا تخافين هذا لان تبول حس بألم
بالجرح
سودة علية شلون بي ياربي
التهيت وية علاوي كلش تعبني وبزعت روحي جنت كلش محتاجة ضرغام يساعدني بعلاوي لان كل ساعة يتحرك ويلجم روحه خطية و خالة حليمة شافتني تعبت واني منا حامل
حليمة.. خالة هيام عوفي علاوي عندي وماعليج بي
انا اعرفله خلي علية
وانتي كعديلج شوية اليوم هواي وكفتي على رجليج انتي حامل و الثكل مو زين عليج ستري علينا وكعدي
كعدت يمها عالقنفة واتكأت وكعدت امرر كف ايدي على اسفل ظهري دخلت بشهر السابع والكل داخل بالانذار
خايفين لايصير عندي ولادة مبكرة مثل علاوي لان جبته بالشهر السابع وما لحكت اوصل للتاسع
فخالة حليمة من اخذتني للدكتورة وسمعتني حجيت للدكتورة عن معاناتي بولادة علاوي وشرحتلها مخاوفي بهذا الطفل اخاف هم يصير بية مثلما صار بعلاوي
بس بوقتها الدكتورة طمنتني وكالت مو شرط يصير عندج تشابه بالولاداة يعني كل طفل ينولد حسب الظروف يختلف الوضع من طفل لاخر
بس تعال جيب اليقنع خالة حليمة يوم ثاني اصرت تاخذني غير دكتورة نسائية كالت حتى اتأكد من سلامة الطفل خطية صار بيها هوس رحنا للدكتورة الثانية هم نفس حجي الدكتورة الاولى الصحة تٌـٌـمــام والطفل وضعه جيد اباوع عالبيت صار هوسة وجهال تتراكض وخالو راضي كل ساعة يجيه اتصال

والوقت اتأخر وضرغام ما بين واني صرت نار كبرة وزاد الحقد بكلبي عليه
انتبهت على خالو راضي كثرت اتصالاته ونظرات القلق بينت على وجهه صار كل ساعة يطلع للحديقة يتصل ويرجع يدخل
رحت يمه وسألته .. خالو شكو شصاير ضرغام والولد وين
خالو راضي.. ماكو شي الولد شوية ويجون
عفية هيومة يابعد خالج سويلنا جاي النة انا وخوالج
.. صار خالو ٺــڊٍلََُلََُؖ

رحت دخلت للمطبخ اشوف شغلي واساعد ريام خطية هواي تعبت وميس اباوع عليها ساعة تركض ورة الجهال تعيط بيهم حتى ما يوصخون البيت وساعة الكة الجهال همة اليركضون وراها لان الست خامطة جبسهم لو ماخذة من حلوياتهم
ما اعرف منو بيهم الطفل هي لو همة بس شكلها هاي البنية ما ناوية تكبر ولا مفكرة اصلا بهذا اليوم الي راح تصير بي مرة يعتمد عليها
دخلت للمطبخ وباوعت للتل
مالت المواعين وريام والبنات متحزمات يغسلن عالسنك
هسة الله يحفظها خالة حليمة الابيوم الطهور تعزم
رحت احظر صينية الجاي
جنت لازمة نقالي بيدي اكلب بي اشوف بلكي ضرغام متصل علية واني ما سامعته بس مع الاسف
ماكو اتصال اباوع على سجل المكالمات
وشفت اتصاله اليوم واتذكرت طلبه الغريب يريد مني البسله الفستان الاحمر القصير عقجت وجهي ليش لا يلوكله البسله واعدله يستاهل الاستاذ جنت اطلع بالاستكاين واحطهم بالصينية وادردم عليه
البسله دشداشة بازة هواي عليه
..........

ضرغام
بالطريق لبيت خالي فاضل
بعدما سمعت اعتراف حنين وخطتها وعرفت منو ورة هاي الهوسة كلها
من بعدما جماعة ضرار اخذو ضاري للمستشفى يضمدون جرحه ويجي ورانا
لبيت خالي طلبت من حمزة يجيب حنين وامها ورانا
اسوق وايدي ترجف من الغضب
شفت شاشة نقالي ضوت جنت ناسيه بالسيارة شلته حتى اجيكه لكيت ابوي متصل علية ١٥مكالمة لم يرد عليها وهيام هم متصلة علية كم مكالمة الظاهر ضال بالهم علية
حجة ضرار جان كاعد بصفي
ضرار .. والله ماجاي اكدر اصدك الي سمعته يعني معقولة
بنات خالي فاضل هشكل يسوون
ضرغام.. لا رفاه مالهة ذنب بس سوسة البلة هي رنا
كل الي صار سببه رنا
بس خلي تصبرلي اليوم اذا ما اخلي خالي فاضل
يصدر شهادة وفاتها ما يكون اسمي ضرغام
ضرار.. تدري ابوي حرك النقال علية حرك وحجيتله الموضوع كله وكال انتو وين هسة حتى اجيلكم
كلتله يابة ما يحتاج تجينا احنا راجعين ما ردت يعوف العزيمة وعمامي وعماتي يعرفون بالسالفة كلت خلي الموضوع بس بينا لا يطش بين العوائل ونصير علج بحلكهم
.. اكول سألت ابوي عن علاوي شنو طهروه لو بعده
.. اي خطية مطهرينه و سمعت صوته يبجي يم ابوي
جريت حسرة وغمضت عيوني بقهر
من عساه بحظهم وببختهم
فوتو علية طهور ابني
غمضت عيوني بقهر واتذكرت هيام خطية اليوم شكد جانت خايفة على علاوي واترجتني ارجع من وكت حتى ابقى يمه
اتصل صديق ضرار وكله ضاري مابي شي جرحه بسيط خطيوه وضمدوه وهسة جايين ورانا لبيت خالي فاضل
.......................
رفاه
ندم وحيرة والم وقهر كلهم اتجمعو بكلبي
تركت وراي رنا وانا مصدمة اريد الحك على ضاري دخلت لغرفتي
ابجي واشهك بقهرمن ورة سواية اختي بنت امي وابوي
احس النفس ضاك بصدري رفعت ايدي لصدر الثوب
اريد اتنفس شفايفي ترجف صحت بصوت مجروح
لج رنا من الله لا يوفقج
.......
اليوم الصبح بالكلية قررت ادبرلي حجة اخذ نقال حنين منها
انتظرت تخلص المحاضرة وقفلت النقال مالتي
ورحت للنادي شفتها كاعدة لوحدها لان رنا اليوم مجازة مو وياها
سلمت عليها وكعدت يمها صرنا نسولف وكعدت تسألني عن ضاري وشنو سويت وياه واني اجاوبهة عادي مثل كل مرة وهي تنصحني ان ما استعجل وارجع له
واني هم وافقتها الرأي مثل كل مرة كنت اريد بس اجاريها بالكلام ما اريد يبين علية شي
رفاه.. عفية حنين ممكن تنطيني نقالج اتصل على ماما
لان نقالي خلص شحن وانطفى اريد اطمنها اخاف يظل بالهة علية واكللها النقال انقفل لا يظل بالج علية
حنين .. هاج حٍٍِْــًبٌٍـــِٓېٍٓ اتفضلي
اخذت النقال منها وسويت نفسي اتذكر رقم ماما
حاولت اماطل واخلي النقال بيدي لأطول فترة ممكنة
كحيت بتصنع وحطيت ايدي على حلكي طلعت فلوس من جنطتي .. عفية حنين بلا امر عليج جيبلي ماي عصير اي شي اريد اشرب علاجي
حنين.. صار حياتي هسة جنج على ماي
كامت راحت تشتري من الكافتيريا
وتركت النقال بيدي
كبل دكيت ارقام نقال ضاري
وانصدمت وانشلت ايدي من الصدمة حسيت كلبي اجة يطلع من صدري
طلعت مسجلته بنقالها بأسم( حبيبي العنيد)
الله ياخذج ياحنين ياحيوانة
التفتت اباوع عليها جانت واكفة تنتظر تاخذ صينية العصير والماي
كبل رحت دخلت عالواتس اب ودخلت على محادثتها وية حبيبي العنيد
وصرت سويت سكرين للمحادثات وكصيتلهم صورة
صارو بيهم بالعشر صور وكبل رسلتهم الي
وبعدها الشك صار سيد الموقف مادام طلع كلام ريام
صحيح اذن شي اكيد رنا الهة يد بالموضوع
ردت اتأكد دخلت على محادثات حنين ورنا بالواتس اب
وكبل اخذتلهم صور بدون ما اقرة جانت ايدية ترجف والخوف والارتباك والتوتر قضى علية
اجة كلبي يوكف جنت اكلب بالنقال وارسلهم الي وكل شوية التفت اباوع بأتجات حنين اخاف تجي
كملت الارسال واني احس بالحرارة صعدت لراسي
احس صخنت خلصت ارسال كل صور المحادثات الي تخص ضاري والي تخص رنا
ومسحتهم من الاستديو مالتها
اجتي والصينية بيدها
سلمتها النقال وانا كوة لازمة روحي ما اهجم عليها واكلها بسنوني وامسح بيها الكاع
اخذته مني وكعدت تكلب بي وضيكت عيونها وسألتني
.. اكول رفاه شنو اتصلتي على امج
رفاه حجيت وياها بنترة وعصبية
.. اي اتصلت عليها شكراً
حنين بشك.. زين ليش ماكو مكالمة صادرة ولا اي رقم غريب
هنا حسيت حنين شكت بالموضوع
ما كدرت استحمل اكثر كبل عطت بوجها
.. لج انتي وحدة ساقطة وحيوانه وعار
وكفر تتسمين صديقة من الله ياخذج بس هين يا حنين
ان ما خليت ابوي اليوم يعزل عليج البيت انتي واهلج
ما اكون رفاه
حنين.. حبيبتي مو بكيفج اني مو لوحدي وراي ظهر يسندني انصحج لا تفشلين نفسج وية ابوج
لان بساعتها اذا حجيتي محد راح يصدكج تدرين ليش؟؟
لان اختج رنا بكبرها راح تنكر الموضوع وتصيرين انتي لوحدج بوجه المدفع
دفعت الكرسي على ورة
وكمت من مكاني
.. كفر وياج احجي انتي الكلام ضايع وياج
رحت اركض واتصلت عالسايق اجة اخذني رجعني للبيت على طول الطريق
جنت اقرة بصور المحادثات ضاري وحنين جانت مو هواي محادثات وجانت اغلب الرسايل هي المبادرة بالارسال مو هو
ووصلت لاؤل محادثة الهم وانصدمت من شفتها راسلة صورتها وشلون داخلة عليه من يا باب
الله ياخذها شنو من بشر هاي اكيد راضعة وية ابليس
شلون دبرت المكيدة
جنت اقرة وابجي وصلت لصور محادثة رنا وحنين وهنا جانت الصدمة اختي تتفق علية وية حنين حتى توكع زوجي مو هنا المصيبة
المصيبة بكلام اختي وياها جانت كاتبة
.. راح احطمها واهجم بيتها مثلما هجمت بيتي وبهاي الحالة راح اضرب عصفورين بحجر واحد اذا ثبتت خيانة ضاري ورفاه تتطلك بوكتها راح اثبت لبابا ان بيت اخته حليمة الوفي
الهم الي يحترمهم ويسويلهم خاطر بكلشي
وحتى من طلكني ضرغام بابا ذب الصوج كلة بية
واعتذر منهم يكول بيت عمتج ماتطلع منهم العيبة
والغلط مو بيهم
الغلط بيج انتي وانا ما عرفت اربيج
وصار يعاملني يقسوة وغضب وحرمني من كلشي وشد وياي وسود عيشتي كلة بسببهم
جنت اقرة كلام حنين ترد عليها تكللها لتخافين حبيبي
لابد ويجي اليوم وابوج يعرف انه غلط بحقج
كملت قراءة رسايل رنا
وهسة راح اثبتله ان اولاد اخته حليمة الي خابصنا بيهم خبص
شوف شنو يسوون من وراه بدون ما يسوله احترام او اعتبار
ظليت اباوع مصدومة والنقال بيدي
اني شسويت بروحي وبضاري اني جرمت بحياتي وسلمت حبل المشنقة بيد حنين ورنا حتى يعدومني بي
نزلت من السيارة وكبل رحت ادور على رنا وصرت اصيح مثل المخبلة بالبيت ما لكيتها ظليت احوم بالبيت ماما وبابا اتعذور عن حظور طهور علي بس خالة حليمة رجعت اتصلت عليهم وكالت اذا ما تجون ازعل عليكم فبابا استحى منها وكللها بس انا وام رنا نجي للطهور زين رنا وين ليش مو بالبيت اتصلت عليها مترد
عدت ساعتين من الانتظار احس روحي كاعدة على نار انتبهت لروحي حتى ما بدلت ملابس الكلية
اتصلت على امي اسألها عن رنا
ظليت جامدة بمكاني من كالت راحت لبيت صديقتها حنين
يعني شنو حنين كلت لرنا عن الصار
دخلت رنا رحت عليها واني احس النار تاكل بكلبي مقهورة منها
.. لج رنا الله لايوفقج شلون انطاج كلبج تهجمين بيتي وتخربين حياتي لج اني مو اختج
رنا.. يالله نصي صوتج ولاتكعدين تصيحين
عرفت بيج ماخذة نقال حنين وعرفتي كلشي ما يحتاج
تعيطين
رفاه.. لج ليش هيج سويتي معقولة هنت عليج تشوفيني اموت كدامج
رنا.. تستاهلين كل الي يصير بيج
تتذكرين شلون وشيتي بية وفضحتي سري وخليتيني اتطلك وهجمتي بيتي كلة بسسبج
واليوم راح اخليج تشربين من نفس كاس المر الي شربته قبلج

جانت تحجي واباوع عليها مصدومة
.. لج رنا لا تخليني شماعة تعلكين عليها فشلج
ترة انتي اتطلكتي وتحطمت حياتج كلة من ورة ايدج
انتي بنيتي حياتح وية ضرغام على اساس فاشل وكلة
حيلة ومكيدة كان اساس ضعيف من اول عاصفة وكع كلشي على راسج فاذا تردين تلومين احد على فشل حياتج فما تلومين الانفسج لان اني مسويت غير حجيت الحقيقة
اني مسؤلة امام الله وكان لازم احجي اني ما دبرتلج
مكيدة ولا حفرتلج مثلما انتي هسة سويتي وياي
وصدكي من بعدما عرفت بمكيدتج ونيتج وياي
فمن هاي اللحظة اقطع صلتي بيج لا انتي اختي ولا اعرفج بعد ولاتعرفيني
وكل وحدة من اليوم ورايح بطريق
واليوم راح الم ملابسي واخلي بابا يرجعني على بيت زوجي والحك اصلح الي حاولتي تهدمينه واحجي لبابا كلشي
ضحكت رنا بشيطنة
.. راحت عليج ياحلوة ما راح تلحكين على ضاري اليوم تسمعينه
راح يخطب حنين غصب عنه وعن الخلفوه لان هسة
هو وكع بالكمين الي نصبناه اله
وبساعتها حتى لو رحتي حجيتي لبابا كلشي ما راح يصدكج لان راح يكون ملتهي بفضيحة ضاري وحنين الي راح يلزمهم اخوها سوية بفرد فراش
لطمت على وجهي واني اصرخ وابجي
..لج الله لا يوفقج ولج انتي شنو من اخت
ربي يحرك كلبج مثلما حركتي كلبي الله ياخذج يا حيوانة
تركتها ورحت اركض مثل المخبلة بالبيت
افتر اريد اشوف شلون الحك على ضاري
وصرت اتصل على نقال ضاري ماكو
ميجاوبني رحت اتصلت على ميس هم مجاوبتني اضطريت اتصل على ضرغام وابلغه كلشي اتصلت عليه وكلبي يدك حيل جاوبني مخبوص كلتله الحك على ضاري بس فاجئني انه يعرف بالموضوع وهو رايح بالطريق على بيت حنين جان يحجي بغضب واتحلف بينا اني ورنا بس ميخالف اهم شي يلحك على ضاري وبعدها كلشي ما اريد
ورة ساعاين يالله اتصلت علية ميس
وكالت عذريني مسمعت النقال من دك لان البيت هوسة ومخبوصين علمود اليوم طهور علاوي
وسألتها عن الولد كالت بعدهم ما راجعين
نهيت الاتصال واني احس بروحي جاي انازع بالروح
يا الله شكد صعب شعور الندم يموت عبالك سلطان بطيء ياكل بالكلب
صرت اضرب على حلكي بدون شعور
الله ياخذني على هالغباء ماجنت اتصور اقرب ناسي
يسوي هشكل بية يعني اذا اختي هيج تسوي
لعد شنو بقت للغريب وصارت الافكار تاخذني
على كلام ريام وتحذيرها وياما حالت تنبهني
بس اني بكل غباء اكول هي لان متحب رنا تحجي هشكل اي حقي لان نا يوم شفت رنا اذتني وحانت كلة تدافع عني اذا واحد حاول يأذيني مايوم شفتها سوت شي
يستعدي اشك بيها ياربي اني ضعت وضيعت ضاري من بين ادية جنت ابجي بحركة كمزت من مكاني على صوت صياح جوة بالبيت وصوت رنا تترجى بخوف
نزلت اركض ورجلية ترجف اريد اشوف منو
جنت ما لابسة حجاب على راسي وبعدني بملابس الكلية وكان الوقت ب١٠ليل
بكل ضني بابا وصل وعرف بالموضوع
وجاي يحجي على رنا بس وكفت جامدة بمكاني مصدومة شفت اولاد عمة حليمة ضرغام وضرار ووراهم ضاري راسه كله ضماد ولافينه بشاش ابيض
ضليت اباوع عليهم وايدي على حلكي من الصدمة
وراسي ظل يودي ويجيب بالافكار والاسئلة شنو الصاير وضاري شبيه وهمة ليش هنا
احس كلبي يريد يطلع من مكانه
زمخ ضاري بية وخزرني بعيونه الي تجدح نار
.. روحي فوتي لبسي شال على راسج
.................
وديت الجاي لخالو راضي للمرة الثانية
اباوع للكل وجهم طبيعي الا خالو راضي احس بي بريد يجاريهم وما يريد يبين الهم اكو شي صاير
ما اعرليش اني كلبي حاس اكو مصيبة
صايرة
جنت يم باب الاستقبال وانتبهت لخالهم فاضل
طلع سلم علية بسرعة وراح جان يحجي بالنقال
اسمعه يكول هَـا ضرغام انا جاي بمسافة الطريق ما راح اتأخر
سمعت اسم ضرغام واني النار صعدت لراسي
يعني حضرته يمه النقال وشايف مكالماتي
وما حاول يشوف يتصل ويتطمن على علاوي
دخلت للمطبخ ما اشوف كدامي من القهر لزمت نقالي واتصلت عليه
لحظات ووصلني صوته
جنت احجي وارجف.. ضرغام شنو الصاير ليش مترد على اتصالاتي
ضرغام.. هيام ارجع للبيت وافهمج على كلشي
.. بس كلي انت وين كلبي راح يوكف من القلق
.. طلعتلي شغلة مهمة اخلصها وارجع
.. اكو شي اهم من علاوي ابنك وصحته
غمض عيونه بصبر.. هيام لتلحين كلتلج ارجع وافهمج
جنت احجي وياه واني خايفة عليه ومقهورة منة على اهماله
فجاءة سمعت صوت بنية يمه تكله
.. عفية ضرغام لخاطر بابا
ركزت بالصوت وشهكت مفزوعة اي هذا صوت رنا
صحت بصوت متهسترة
.. لك ضرغام الله ياخذك اني ميتة خوف وعايفني اني وابني وتكذب علينا وتكول شغلة مهمة
تالي تطلع كاعد هناك يم رنا ببيت خالك فاضل
شتسوي هناك وخالك فاضل ومرته هنا عدنا
ضرغام.. هيام رحمة على والديج لا تكعدين تفسرين بكيفج كلت ارجع وافهمج
.. ضرغام ما يحتاج تفهمني اني عرفت كلشي انت واحد خاين وجذاب وانا ماراح اسمعك
.. لحظة هيام لا تسدين النقال سمعيني زين كبري عقلج ولا تتخبلين
مو بكيفك وراح اسد النقال بوجهك وهاك اسمع وشوفني شلون راح اسده بوجهك
.. هيااا
ما انطيته مجال يكمل كلامه جان نار كبرة
بس ما يلحك ناري
شلون هو يم رنا ببيت خاله وخاله فاضل ومرته هنا شنو معناها هاي

يتبع

..........