رواية تائهة بين اروقة الماضي الفصل السابع والأربعون 47 - بقلم الكاتبة نهى

#تائهة_اروقة_الماضي
#بقلم_الكاتبة_nuha-d-h
مساء الخير عليكم يا احبتي
هَـا انا قد عدت لكم من قلب الحدث من بصرة الفيحاء
الجريحة رغم الصعاب نستمر بالعطاء ارجو من الجميع ان يدعو لعراقي الجريح وبالاخص البصرة
الحبيبة لما عانته من ظلم لا اطيل عليكم بالكلام لأدعكم
تقرؤن البارت الجديد
مع تحيات اختكم نهى
(((((((((()))))))
هيام
صعدت فوك ورة ضرغام
وسمعت صوت ضاري يصيح على رفاه
دخلت لكيتها تبجي وخدها احمر
هيام.. ضاري ليش ضاربها لرفاه
رحت لعندها وحضنتها
وسمعت صوت ضرغام دك الباب ودخل
ضرغام.. شبيك اتخبلت عالبنية
ضاري بغضب.. ضرغام خليها تولي
هاي تالي اختها راح تهجم بيتها بيدها
ضرغام.. بلا صياح تعال اطلع برة وفهمني
شنو صاير
والتفت علية
.. هيام كوميها خلي تغسل وجهها وهديها
طلعو الولد
والتفتت على رفاه اسألها
.. شنو شبيكم انتي وضاري
رفاه
رفاه.. والله مليت وتعبت
لو ادري مامتزوجة ولا هاي العيشة احس بروحي داخلة بحرب ولازم انتصر
وما اعرف منو عدوي
هيام.. على كيفج لتبجين مسحي دموعج
واجيلي كلشي حتى افتهم
.. هيام ضاري من يوم سالفة رنا وهو محرم علية ما اقترب من رنا ولا اطلع وياها لأي مكان ولا اكعد
وياها حتى بالكلية وانتي مثلما تعرفين
رنا رجعت للكلية بفضل عمو مازن هو الي
حجة وية بابا وكله خطية خليها ترجع للكلية لان هي هاي السنة معيدة
وحتى بالكلية ما يريدني احجي وية اختي
يعني هيام خلي روحج بمكاني هاي اختي وهذا زوجي حرت ارضي منو بيهم ولازم اختار واحد منهم واقاطع الثاني
هيام.. صدك صعبة ليش متحجين لخالو راضي يحجي وياه
ما اكدر اني وضاري من اتزوجنا اتفقنا ماندخل اي طرف بحياتنا
وضاري فهمني هو الامر الناهي بحياتنا الا بالشدة الشديدة يتدخل احد
فاني قررت احجي وية اختي واتواصل وياها
بدون ما يعرف ضاري
.. عفية عليج عين العقل
لعد هسة شبي
.. اليوم خالة حليمة عرفت بخبر زواج عمو راضي عليها
.. وانتي شنو دخلج بالموضوع
.. مو رنا حجت وية خالة حليمة من نقالي وخبرتها عن زواج عمو يعني
اني مالي دخل جنت كاعدة وياها هي وصديقتها
بالنادي ورحت اجيب عصاير وتركت النقال والجنطة يمها
من رجعت للبيت اتفاجئت بالصار حالي حالكم بس هسة ضاري الي صدمني
وكلي انا كم مرة منبه عليج ما تقتربين ولا تكعدين يم رنا
كلي راح تهجم بيتج وتالي اطلكج من وراها
ونوب كلي عليها هي المتصلة نكرت الموضوع لان هي اختي وهو من غير كلشي متخبل منها
ونوب تصير هي سبب قهر عمة حليمة
من نكرت راح جاب نقال امه وشوفني المكالمة وضربني راشدي لان نكرت
رجعت تبجي بقهر
.. يعني ما اعرف شنو اكلج بس اني ما علية بضاري ومو لان حماي بس هو كلامه صح
يعني شنو معنى طلعة رنا يعني هي من اتصلت بخالة حليمة من نقالج وحجت هشكل وياها مفكرت بيج وبزوجج
اذا عرفتو شنو راح يكون موقفج كدام عيالج
اباوع لرفاه شلون سكتت وكأنما تريد
تعيد التفكير بموقف اختها
رفاه.. حتى لو كان كلامج صحيح بس هاي تبقى اختي ممعقولة تأذيني بس تلكيها من حركة گلبها
من عمة حليمة لان هي اتعاركت وياها اخر مرة من شافتها ببيتنا
اني اعرف رنا من تعصب تحرك الاخضر باليابس
.. وهاي انتي كلتيها من تعصب تحرك
اخاف نارها تطولج وتهجم بيتج
رجعت تبجي من جديد
.. يعني حليها الي اذا تجي يمي اطردها
واكللها ضاري ما يقبل اكعد يمج
.. ما اعرف بس انتي لازم تحطين حد للي كاعد يصير
يالله هسة كومي غسلي وجهج
وعذريه لضاري موقف اختج جان مستفز
وانتي المشكلة نكرتي الصار لو حاجية من البداية الي كلتيه لضاري جان اتفهم الموضوع
على الاقل جان ما مد ايده عليج
قطع كلامنا
صوت علاوي يبجي
كمت من يمها .. يالله كومي كافي بجي روحي غسلي واتعوذي من الشيطان
تركتها ورحت لعلاوي
بغرفتنا كاعد عالسرير
وضاري وضرغام كاعدين يحجون يمه
وضرغام منطي سويج السيارة لعلاوي حتى يسكته ويسمع لضاري
رحت شلت علاوي وكعدت اسويله ممية واسمع حجي ضاري
ضاري.. ضرغام الف مرة كلتلها اختج اتخبل منها ما اريدج تندين يمها لا بخير ولا بشر
ضرغام .. مالك حق تمنعها عن اختها يعني لا تدخل هاي بهاي انا طلكتها وهي اتحاسبت على غلطها خلاص ليش تريد تخرب رفاه على اختها
.. مو حقك انت ما تعرف شصار
خوية انت تعرف بية انا مو بطران واريد بس اتعارك بالعكس ما اهتميت لرنا بقيد شعرة من طلكتها جان عادي عندي
ما احجي ولا الي دخل بعلاقتها وية اختها بس يا اخي
انت ما شايف رنا بأخر فترة شلون اتربعت ركبة ونص لأختها وصارت كل يوم تحشي براس رفاه
احس بيها متقصدة تسمم افكار رفاه ضدي
وانا اعرف رفاه مربيها على ايدي
وبأخر ايام حسيت بيها اتغيرت علية وصارت
تطلب طلبات غريبة
ومرة سمعتها تحجي وية رنا بالنقال وتكللها
رنا صعبة ما اكدر اطلب منة يعزل بية ببيت
واني حتى ماعندي اطفال او ممحتاجة اعزل ببيت لوحدي واني بيت عمة حليمة زينين وياي
اسمع ذيج الشيطانة تكللها
.. لج لا تصيرين عوبة شمعنا هيام راح تعزل ببيت وريام هم راح تعزل وتالي يبقونج
تخدمين حليمة وراضي
لو تطلب منها تطلع هي وياها للسوك لوحدهم مثلما متعودات
لو كل يوم دازة لرفاه قطعة ذهب صورة
تكللها طلبي من رجلج يشتريها الج
ماعندي اشكال تشتري ذهب بس مو بهيج طريقة احسها متزوجتني استغلال
وانا هذا الشي ما يصرفلي
ومن عندها عرفت منو ورة تغيير رفاه
سببه رنا
والله لوما شايف تأثير رنا على رفاه
جان ما فتحت حلكي بس سوايتها تنطق الحجر
من يومها حذرتها ما تقترب من درب رنا
وتبطل متخابرها
اعرف رفاه خام ما اريد ذيج تدمرها بسمها

ضرغام.. ما اعرف والله شنو اكلك بس حقك بكل الي كلته
وانا لو بمكانك هم راح اسوي هشكل حفاظاً على مرتي وبيتي
بس على كيفك وية رفاه وانت كلتها هي طيبة وما عندها دغش
خلك وياها اكسر واجبر بس لا تنطي بيها
كدام اختها وبعدين تصير عليك لزمة
تالي تخذلها
وتفضل اختها عليك
اخذت علاوي ورحت بي لغرفته وتركتهم بغرفتنا يكملون حجيهم
طلعت ملابسه وبدلتله
وسويت حليب وكعد يرضع بين ما نام وحطيته بالسرير وطفيت الضوة وطلعت من الغرفة
لكيت ضرغام نايم على وجهه بملابسه حتى ما مبدلهم
ضجت لان ما كلف روحه ينتظرني
هذا شبي نام خرب شبسرعة نام
معقولة مل من عندي ومن كثرت المحاولات
ونام بدون ما يديرلي بال
صرت اتحرك بالغرفة واطلع صوت اعلن عن وجودي حتى يكعد
بس لا حياة لمن تنادي خرب قافل
والله حصرتني البجية
اشتاقيت للهفته علية ومحاولات التقرب مني
اشو صارله يومين ماكو
صرت اكل بروح احجي واتعارك وية نفسي وبعدين اتعاركت وياه براسي
وزعلت عليه وهو ما يدري
ما يسوى التحضيرات الي جنت ناوية اسويها الة اليوم بس الاستاذ ضربني بوري واصلاً مو بحالي
رحت لغرفة علاوي مبوزة لبست ثوب وردي
قصير كلش فوك الركبة بشبر
ونمت يم علاوي بسريره
جان مثل السيارة بس يكفي انام وياه
نمت واني ادردم عليه
((((((((((((())))
ضاري
دخلت للغرفة لكيتها مرتبة وشفت رفاه
نايمة وخدها احمر من ورة الراشدي
خطية ترفة وبيضة وبسرعة يبين بيها الاثر
اقتربت منها ونمت بصفها واخذتها لحضني وقربتها مني
احس بيها بنتي وما اريد احد يخربها علي
بستها من خدها الاحمر حسيت بي صاير نار
بستها من راسها وحطيتها على صدري
وهي بدون متحس لمت روحها وحشرت نفسها مثل الطفلة جواي والله لو كاعدة
احلم تخليني اقترب منها خصوصاً بعد ما ضربتها بس بنت اللذين فورتني وموتتني قهر
تنكر سواية اختها بكل عين صلفة
اقسى عليها حتى تعرف غلطها وتسمع كلامي
((((((())))))
ريام
جنت مقهورة من ضرار وطلعته الغريبة وياي
وسمعت صياح ضاري ورفاه
رحت اشوف شكو شنو صاير
اجيت اطلع وقطع علية الطريق ضرار
باوعت عليه ورفعت حاجبي
.. بعد عن طريقي اريد انزل جوة
.. ماكو طلعة من الغرفة الا تحجيلي شبيج اليوم دخلتي للبيت جنج ثور هايج بدون
ما تنطين مجال لأي واحد يفهمج الموضوع
.. ميحتاج تفهمني اني مفتهمة كلشي
جنت احجي وارجع للخلف لان ضرار
ديتقدم باتجاهي وعيونه تمشي علية
هو يحجي شكل وعيونه تحجي شكل
.. ريمة انا الله الشاهد من خوفي وحرصي عليج بس سألته للولد عن كم شغلة
تخص البنات صديقاتج والشباب الي حواليج
يعني عينك على مالك دوة
وانتي حلالي شلون ترضيها افرط بيج
وانا ادري بيج لا حول ولا قوة
ريام.. على يا اساس استندت بحكمك هذا
شلون عرفتني اني ضعيفة وما اكدر احمي نفسي
غمض عيونه وسحب نفس عميق يطلب الصبر
.. ترة الله وكيلج لحد هذا يومج مناسي
سالفة طارق ابن عمتي حمدية
بيوم حاول يعتدي عليج ما انسى منظرج شلون جنتي خايفة وضعيفة لاحول ولاقوة لدرجة ما تكدرين حتى تحمين نفسج
منة وانتي ببطن بيتنا
تدرين منو ورة سالفة رفض بيبتي خاجية
لتكملة دراستج بالكلية
فتحت عيوني على وسعهن وسألته
.. منو
.. انا الي اكدت عليها متسمحلج تكملين كلية
اتخيلتهم ياكلونج وانتي جنتي طيبة ووردة مغمضة واشوفج شلون تتعاملين وياي
وتبتسمين بوجهي عبالك بس انا بالكون
وهذا الشي فرحني وحسسني بوجودي
بعد ما كرهت كلشي بحياتي رجعت وبسببج حبيت نفسي وقررت اجري عملية
بس الدكتور كال متكدر تسوي العملية الا بعد
سنة. خفت لا تداومين بالكلية وتصير هاي ابتسامتج وفرحتج لغيري خفت تنعجبين بغيري وياخذج مني
وهذا الشي دخل الخوف بكلبي
ريام.. يعني انت سبب كل الي صار
قبل كم سنة زين هسة شنو الي غير رأيك وخليتني اكمل كليتي
ضرار.. اول شي ثقتي بنفسي ان انا رجال
وتارس عين مرتي وما مقصر وياج بأي شي
يخليج تدورين عليه عند غيري
سواء من حب حنان شغف ولع. احترام
كلشي يخص هذا الجانب من الرجولة
لذلك جنت مسيطر بس جنت خايف عليج
منهم خصوصاً. انا ضابط
ودائما اسمع بالحوادث الي تصير بالكليات
وهواي بنات ناس شرفاء يرحون ضحية
مكيدة شباب ناقصين غايتهم
النصب واللعب بأعراض العالم حتى ياخذون منها الي يردونه بالتهديد
تكدرين تكولين صرتي هووس بالنسبة الي
كم مرة تخوني افكاري وما الكة روحي الا وانا
واكف بباب الكلية اريد ادخل وبعدين
اغير رأي اكول لا خليها هي سباعية وتربية
ايدي ومرت الضابط ضرار كدها وكدود
بس من سمعت بهذا الشاب الي متقدملج
اتخبلت
ريام
جان يحجي واني اباوع عليه
كان كلامه بالنسبة الي مثل صمام الامان حسسني بالحماية
كل ما يحجي احس اني صدك عندي سند
وظهر واكدر اتجي عليه بدون خوف
باوعت عليه واقتربت منة
وحطيت ايدي على شفايفه
.. اشش لتحجي وتبرر مصدكتك
انت زوجي وحبيبي وادري بيك متخطي خطوة الا وتكون لمصلحتي
بس جان يعجبني تكلي بدال ما تخلي الافكار السودة تتربع براسي
حوطني بأيديه .. ولج هو انتي تنطين مجال جنج رشاشة اريد الحك افهمج ماكو
خرب اصيح وراج ام راضي يمعودة ام الغيرة تعالي خلي افهمج ماكو قفلتي
متسمعين
ريام استندت عليه بدلع
وصرت العب بشعر صدره
واحجي.. اكول ضرور حياتي عفية بعد لتصيحني ام راضي
يعني مع احترامي لخالو وحبي اله
بس والله الاسم قديم يعني والله من تصيحني ام راضي احس بروحي مرية عجوز موكعة سنونها والله الاسم مو ستايل
خطية الطفل شنو ذنبه
ضرار.. ما ادري احتمال اغير رأيي بس انتي حاولي وياي بطريقتج حتى تقنعيني اغير رأيي
ورفع حاجبه بوكاحة
افتهمته رفعت نفسي على اطراف اصابعي واستندت على صدر
لحتى اوصل لشفايفه
وهمست قريب عليهن
.. ضروري حبيبي غير الاسم
انتبهت عليه داخ وضاعت اخباره جوة ايدي
وحجة .. من احتركت عشيرة ضروري
دتعاي تحركين بأعصابي صارلج ساعة
ما انطاني مجال اكمل الي بديته
وصار هو الي محتل الساحة
واخذني وياه للسرير
لذاك عالمنة صرت كلي بين ايديه
تحت امره مو بيدي شكد احبه
وبلمسة منة ينسيني حتى اسمي
بحركاته وخبرته ضعت
وحرارة انفاسه زارت كل شبر بجسمي
همس يم اذني واني بغير عالم
.. ريمة انا احب اسمي ابني راضي
جاوبته واني بغير عالم
.. براحتك
باوعلي بأنتصار وصارت حركاته اكثر خشونة وحرارة وسألني بثقة يدري بروحه مسيطر علية وعلى افكاري
.. هسة شنو اسم ابنا
جنت ذايبة بين ايديه والتفكير قافل
همست بصوت خافت
.. اسمه راضي
ابتسم بأنتصار وانقلب السحر على الساحر
همس يم اذني .. وانا شنو ينادوني
همست ضايعة بين ايديه .. انت ابو راضي
وصرت اني الي انفذ اوامره
ابتسم .. وانتي شنو ينادونج
باوعت بعيونه وعيوني ذبلت .. ام راضي
ضحك بانتصار وهمس.. واحلى ام راضي
تنحط بالكلب
.. ............
هيام
كعدت يوم ثاني الصبح على صوت حركة بغرفتنا وبعدها سمعت صوت باب الغرفة انسد
باوعت للساعة جانت ب٧الصبح
كمت من مكاني وغطيت علاوي رحت لغرفتنا
شفت ضرغام مبدل ملابسه وطالع
صرت افور من الغيض

صدك انقهرت من بروده هسة هو مو جان يفتر وراي حتى يقتربلي لو هو كل ممنوع مرغوب
بدلت دشداشتي
ونزلت جوة شفته كاعد يتريك وخالة رحاب
كاعدة يمه وتسولف وبيبي خاجية جاي تشرب جاي
دخلت وصبحت عليهم
رفع راسه وباوع علية .. شنو وين جنتي
نزلت جوة ادور عليج
رفعت حاجبي .. جنت نايمة بغرفة علاوي لتكلي ما انتبهت علينا من دخلنا للغرفة ونومت علي بغرفته كدامك من جنت تحجي وية ضاري
.. حرام علية اذا انتبهت
هو مو زين دماغي باقي سالم ما فصل من ورة
مشاكل البارحة ما ادري شلوو اتحملت ما خنكت ضاري
جان يحجي ويباوع علية جان مبين من وجهي
الزعل وصار ضرغام يعرفني اذا زعلت
رفعت حاجبي بوجهه بعدم اقتناع هذا مو سبب حتى يغلس علية البارحة
حسيت بي يريد يبرر
ضرغام.. والله البارحة ما اعرف شبية جنت حيل تعبان حتى من نمت ما ادري بروحي
شلون نمت

هيام .. الله يساعدك بس محد طلب من عندك تبرر
كعدت بصفه وصبيتلي كوب جاي وصرت اتريك وياه دخل خالو وراضي وخالة حليمة
وبعدها دخلو البنات ميس وريام ورفاه وضاري
والكل كعد يتريك علمود يرحون على دوامهم
دك نقال ضرغام وحجة وية حمزة
وكله هاي هي خلاص انا اسافر واحلها
انهى الاتصال
ضرغام.. هيام اليوم حظري جنطتي ضروري صارت عندي سفر ة مستعجلة لأربيل
الكادر التقني التركي واصلين هناك ولازم استقبلهم هناك فجهزي الجنطة وحمزة راح يجي عليها ياخذها بعد ساعتين ومناك من الشغل اروح للمطار
هو يحجي وانا احس بكلبي نار من القهر
جاوبته ببرود .. ان شاء الله احضرها بعد تأمر على شي ثاني

همس بصوت ناصي
.. ادري بيج ضايجة مني لان البارحة نمت وتركتج لوحدج بس صدكي البارحة جنت كلش تعبان
وان شاء الله وعد علية اعوضج
هيام .. ميحتاج تعوضني اصلاً عادي اني متعودة مو جديدة علية انام بعيد عن حضنك
تدري اني ممهتمة لموقف البارحة لان اني دائما انام بحضن ابني علاوي
واصلاً شايلة هم اخاف انت تفرقني عن حضنه
حسيت بوجهه صار ينطي الوان وصك على اسنانه من الغيض
وكام من الريوك وعيونه تتوعدلي
.. يالله ضاري كوم خلي نتوكل على رزقنا
ضاري.. ضرغام انت روح وانا اجي وراك
اليوم اريد اوصل البنات للكلية
جان يحجي ويباوع لرفاه الي
محجت اي حرف من كعدت لحد ما كامت
خطية حتى ريوك ما اكلت
((((((((((((()))))))))
رفاه
مر اسبوع وضاري كل يوم هو يوصلني
بس بهذا الاسبوع احس صار بعيد عني ومشغول دائماً صحيح ضرغام مسافر وعايف عليه الشغل كله
بس حتى لو عنده شغل الدنيا ميصير هشكل
يبقى بعيد عني
صعدت بالسيارة وياه اني وريام حتى يوصلنا
وجنت مقهورة منة
ضاري.. رفاه ليش ما اتريكتي
صرت اكره الاكل وكمت احاربه بي
.. ممشتهية اكل نفسي مسدودة
.. متأكدة ممشتهية لو تردين تعاقبيني وتأذين روحج رفاه والله ترة هي واصلة حدها وحيل مخنوك
والشغل واصل لاذاناتي اعتذرت منج وصالحتج وانتي تتعززين براسي
وانا دين ما باقي براسي من ورة دوخة الشغل
وابوي الي كل يوم مسويلي فلم يخليني اشيل روحي واركعها بالكاع وضرغام مسافر
وعايف هاي الهوسة كلها براسي فرحمة لوالديج لتصيرين انتي والوكت عليه

.. لتخاف مستحيل ااذي نفسي علمودك
اني مو جاهلة كافي علية انت مأذيني

انتبهت عليه وكف السيارة ونزل يم محل
شوية ورجع النة
وبيده علاكة
صعد بالسيارة وحط العلاكة بحظني
.. هاج اكلي بسرعة قبل لا نوصل ومبري عقلج ضربتج واعترف غلطان بس ما مستعد كل يوم اعتذرلج علمود ترضين
اريدج تفهميني بدون ما احجي لان انتي راحتي فلازم تتحمليني مو تكعدين تنكين فوك راسي

.. شنو ضاري شبيك ليش هشكل حريص على اكلي وبعدين تحجي علية
ريام .. مو همة المجرمين دائما يكونون حريصين على تغذية الضحية قبل القتل

التفت ضاري.. انعم الله عليج ام راضي ونوب سويتيني مجرم
هي من غير كلشي زعلانة ومتحجي وياي ومسودة عيشتي
هاي بدال ما تحننين كلبها علية
ريام.. شوف ضاري انا وية الحق وانت هاي المرة غلطان يعني ضربتها علمود اختها افتهمنا ونوب كاضيها كلة برة البيت
وتاركها لوحدها خطية
ضاري.. اي غير عندي شغل على باب الله
يعني شلون بالله اترك شغلي واكعد اكابلها
ريام كعديها واحجي وياها
خليها تكبر عقلها وتبطل نگة
هسة انتي مو بين اسبوع واسبوع تشوفين ضرار. وتنتظرينه من ينزل مجاز
ريام.، اي صحيح
.. زين اسألج بالله يصير من ينزل مجاز وتعبان
انتي تستقبلينه بالزعل والنكة والشكاوي
رفاه.. اني شوكت فاتحة حلكي وياك
هو اني خلي اشوفك بالاول وبعدين احجي وياك واشتكيلك بس اني اعرف ما عندي حظ وياك من اول يوم اتزوجتك واني ما اتهنيت بحياتي
ريام.. كافي صلو عالنبي ميصير تتعاروكون
من صباحيت الله
وصلنا للكلية ونزلت واخذت وياي علاكة الكيك والعصير
ضاري.. رفاه لحظة
التفتت عليه شفته مسح وجهه بكف ايده. وسحب نفس عميق
.. لتزعلين مني وحقج علية
بس اموت قهر من اشوفج ضايجة وزعلانة ويزيد قهري من اعرف انا سبب حزنج
غمضت عيوني والدمعة غركتهم نزلت من
يمه بدون ما احجي ولا كلمة
حسسني بكلامه قبل شوية بالسيارة
عبالك اني اسوي المشاكل
اباوع عليه شلون يحاول يصالحني
مشت وية ريام
.. ريمة اشكرج
ريام.. على شنو تشكريني
.. لان وكفتي لجانبي وحجيتي وية ضاري
.. انا ما حجيت شي غلط هو صدك جان غلطان بحقج هاي المرة بس خلي ببالج
اني مكدرت احجي وياج بموضوع عن اختج كدامه
وهسة بما ان ضاري مو يمنا فراح اكلج
انتبهي على رجلج وبيتج وديري بالج من اختج
مو اوزج عليها بس يا اختي تصرفها
الاخير يستدعي الخوف
لان بموقفها هذا هي اذت اقرب الناس الهة والي هي انتي اختها
ما استبعد اي شي تسويه بيج خصوصا من بعدما كنتي انتي السبب بطلاكها من زوجها

شهكت وفتحت عيوني على وسعهن
.. حيييييل انتي هواي رايحة بعيد
لااا لا ريام هاي انتي وين رحتي مو لهاي الدرج عاد
ترة احنا خوات ممعقولة تسوي بية هشكل
ريمة اني عاذرتج لان انتي هواي ضايجة من رنا فلذلك شي اكيد راح تظلمينها بحكمج
ريام.. براحتج رفاه اني عني مداخل شي بجيسي بس حبيت انطيج نصيحتي
لان هو بالاول والاخير يبقى بيتج الي ينهجم مو بيتي
تركتني وراحت على قسمها
واني رحت للقسم مالتي
دخلت للقاعة واخذنا اول محاضرة
جان نقالي صامت وحاطته بصفي جوة الملزمة اشتغل ضوة الشاشة معلن عن وصول رسالة من ضاري تركتها وركزت بالمحاضرة لان جانت الدكتورة من النوع المتشدد متقبل نغقل عن المحاضرة
خلصت المحاضرة وفتحت النقال وشفت رسالتين من رنا ومن ضاري
قريت رسالة ضاري
((حبيبي بعدج زعلانة من ضاري
تدرين بالشغل وافكر بيج يارب شكد مشتاق لحضنج اليوم حضري نفسج امر عليج بالكلية واخذج ونتغدة برة ))
فرحت برسالته

((تسلملي حبيبي ضاري انتظرك من اخلص دوام ))
ما اعرف ليش بكلمة وحدة منة يراضيني وانسى زعلي
حٍٍِْــًبٌٍـــِٓېٍٓ الة يشفعله عندي ويخليني بسرعة ارضى واقبل الصلح بينما هو بالعكس
اذا جنت اني الغلطانة يكون زعله ثكيل
جنت امشي والتقيت بريام
واخذتها ورحنا للنادي حتى ناكل لان كلش جعت كعدنا اني وياها
طلبت فطائر وعصير وريام طلب بس قطعة كيك وجاي
ريام .. هَـا شنو اشو تبتسمين
رفاه.. ضاري رسلي رسالة صلح وعزمني
عالغدة
ريمة.. ايا ام بطن يعني ضاري عرف شلون يدخل لكلبج من يا باب معدتج
رفاه.. لا والله ما يهمني الاكل بس اهم شي عندي هو اتذكرني ويحاول يرضيني
ريام.. عفية عليج صيري سباعية وكبري عقلج
يعني هسة انا اليوم ارجع لوحدي وية السايق
لا ليش تعالي ويانا اتغدي
.. لا حبيبتي ما اريد اصير العذول بينكم
كل ثنين ثالثهم الشيطان
ضحكت على كلامها
جنا نحجي واجتي رنا اختي وصديقتها
وسلمت علية ومسلمت على ريام
سحبن الكراسي وكعدن
رنا.. شنو وينج مو رسلت لج رسالة اسأل عن مكانج وين

انحرجت اكللها ضاري محرم علي اكعد وياج او احجي وياج وهي رنا من النوع بسرعة تزعل وهاي اختي كلشي ولا تزعل علية ما يهون علية وزعلها
استسلمت بس قررت ما اسمحلها تتدخل بحياتي
رفاه.. ما انتبهت للرسالة
رنا.. شنو شبيج عيونج مورمة شنو جنتي تبجين
رفاه.. لا يعني موجنت ابجي بس يمكن لان تعبانة
رنا.. لج عوبة رجعتي تضمضمين للاستاذ
لج اني اختج واعرفج كلش زين هاي عيونج
مورمة من البجي والله العالم شنو مسويلج
انتبهت لريام ظلت تنافخ بغيض
اخير شي كامت مكدرت تتحمل تكعد لحظة
وحدة وية رنا
ريام.. رفاه حٍٍِْــًبٌٍـــِٓېٍٓ اني اترخص وانتي وضاري روحو معليكم بية لتتقيدون بية
راحت وتركتنا
رنا.. ليش انتو اتصالحتو انتي وزوجج؟؟
.. اي اليوم عزمني على غدة ورة الدوام يجي
علية وياخذني
رنا.. ولج انتي شكد غبية شلون تتنازلين هيج
بسرعة وتقبلين عليه
لج انتي مو كلتي ضاري صاير ما يحجي وياي وهواي يطلع من البيت
شنو اتغير هسة
.. ما اتغير شي بس اليوم هو برر موقفه وكال
لان ضرغام مسافر فالشغل كله صاير عليه
وهو لوحده لان خالو راضي هم صاير
يتسحب من الشغل
.. امداج عوبة اكص ايدي اذا ما يطلع عنده وحدة ثانية غيرج وملتهي وياها وكاضيها عليج كلة حجج
حنين صديقة رنا .. طبعاً اني اعرف وحدة هم جانت مثلج تثق برجلها ثقة عمياء
وتصدك كلشي يكولة الهة
وهو الماي يمشي من جواها عاميها بالكلام الحلو خطية تالي اكتشفته متزوج عليها
وحدة ثانية وهي اخر من يعلم
رنا.. وهاي شلون عرفت متزوج عليها
حنين.. اختبرته خلت وحدة من صديقاتها
تتصل عليه وتختبره حتى تجربه
.. اي كملي
.. المهم بعدما جربته هو زوجها الفطير
هم حاجي وية صديقتها وهي مجرجرته بالحجي ومكتشفة زواجه الثاني
رنا.. عزة
التفتت علية
ولج عوبة سمعتي
رفاه.. واني شلي غرض بيها كلمن وحياتها وزوجها
رنا.. زين ليش ما نتأكد منه ونجربه ونشوف اذا جان كلامه صحيح وهو رجال فقير ما عنده ذيل
رفاه.. شلون اختبره ؟

حنين .. هاي عوفيها علية انتي بس انطيني رقم زوجج واني اتصل عليه واجس نبضه
اني اعرف شلون اجرجر السانه
رنا.. هو اذا انطاج مجال معناها عندة ذيل
واذا لا غلس عليج معناها ظلمنا الرجال
ويرجع كلشي لمكانه
التفتت علية رنا بالله شو طلعي نقالج وانطي رقم ضاري لحنين
رفاه بتردد .. لا لا ميحتاج ما اريد اختبره
بس رنا منتظرتني سحبت مني النقال
وردت رقم ضاري لحنين
واني كلبي يدك حيل سريع عبالك
مسوية جريمة
.. رنا لحظة اخاف بعدين يعرف بالموضوع والله يحرك الدنيا على راسي
رنا.. ماعليج لتخافين ما تجيب سيرة بأي كلمة
بس كلامهم عكد معدتي ودخل الشك براسي
خلص الدوام واتصل علية ضاري
ووصلتني رنا وحنين
للبوابة شفته جان راكب سيارته الكمارو
ولابس نضاراته الشمسية
سمعت شهكة حنين .. عزززة لاتكولين هذا هو زوجج
رفعت حاجبي وتركتها هي ورنا. جاوبتها
سمعتها تكللها
.. لا يغرج مظهره الكشخة ترة هذا مسود عيشتها وما عنده اسلوب وياها

رحت لعنده وصعدت بالسيارة
التفت علية.. جا وين ريام
.. كالت ارجع للبيت وية السايق لو اتصل على
ضرغام وهسة هي بعدها محاضرتها ممخلصة
باوع باتجاه رنا
.. وانا مو منبه عليج ما اريدج تلتقين وية
رنا
.. ضاري والله حاولت بس هي حرجتني واجتي كعدت يمي يعني حط روحك بمكاني
شلون اكوم من يمها واكللها ما اكدر احجي وياج
((((((((((((((((((((())))))
هيام
صعدت لغرفتي حتى انام مثل كل يوم واني
متلهفة لان عندي موعد وية ضرغام يتصل علية كل يوم بالليل ونظل نسولف
دخلت للغرف وبدلت علاوي وحضرته للنوم
ومن سافر ابوه ينام ويمي عالسرير
لبست ثوب نوم خفيف بي دلعة نازلة عالصدر
وفتحت شعري دك نقالي بالغرفة الثانية ركضت عليه بلهفة وشفته ضرغام
جنت اتنفس سريع
.. الو هلا
ضرغام.. هلا بيج بطة مشتاقين
.. تشتاقلك العافية
.. بس العافية تشتاقلي وانتي ما مشتاقة لضرغامج
.. اسكت لا تذكرني بالاشتياق يمكن لو تفتح كلبي تلكة مشعوط من اللهفة عليك
جنت احجي وياه واتمددت على بطني
عالسرير وعلاي يمي يلعب
.. شنو علاوي شلونه اسمع صوته
.. الحمدلله يزهو

هيام
صعدت لغرفتي حتى انام مثل كل يوم واني
متلهفة لان عندي موعد وية ضرغام يتصل علية كل يوم بالليل ونظل نسولف لحد ما ينام
يحجيلي عن يومه واحجيله عن يومي اني وعلاوي ويسألني عن ابوه وامه دائما لان علاقتهم كلش متوترة هاي الايام
دخلت للغرفة وبدلت علاوي وحضرته للنوم
حطيته عالسرير
ورحت ابدل ملابسي ولبست ثوب نوم خفيف بي دلعة نازلة عالصدر
وفتحت شعري دك نقالي بالغرفة الثانية ركضت عليه بلهفة وشفته ضرغام
جنت اتنفس سريع
.. الو هلا
ضرغام.. هلا بيج بطة مشتاقين
.. تشتاقلك العافية
.. بس العافية تشتاقلي وانتي ما مشتاقة لضرغامج
.. اسكت لا تذكرني بالاشتياق يمكن لو تفتح كلبي تلكة مشعوط من اللهفة عليك
جنت احجي وياه واتمددت على بطني
عالسرير وعلاي يمي يلعب
.. شنو علاوي شلونه اسمع صوته
.. الحمدلله يزهو بالنصر بيبي خاجية وخالة حليمة راح يطلعون عينه بالدلال صاير هواي يدلع
.. خلي يلوكله ابن ابوه الكل يتمنى وده
.. شنو جاي اشم ريحة غرور بكلامك
.. لا مو غرور وانما واثق من نفسي
سحبت نفس عميق
..ليش تتنفسين سريع
.. اي مو ركضت عالنقال جان بالغرفة الثانية واني جنت ابدل
ابتسم .. شنو لابسة
.. مثل كل يوم ملابسي العادية مال نوم
.. اااااااخ بوية هيام طك گلبي عليج اريد اشوفج
حسيت عليه اتحرك عدل كعدته
.. راح اتصل عليج فديو اريد اشوفج شلابسة
الفضول راح يكتلني
ضحكت .. من احتركو لا تضحكين
سد النقال واتصل علية بالواتس كامرة
فتحت الكامرة
شفته كاعد متكي عالسرير
ولابس فانيلا وعيونه ذبلانة من التعب مبين عليه نعسان
اباوع على لحيته الخفيفة اتمنيت امسح ايدي عليها
غمضت عيوني وفتحتهم
.. لج من احتركت عشيرتج شلابسة وتكلي
لابسة عادي
بنت الاوادم طالعة جنج جمارة
شلون بالله هسة كون يمي دكمة ادوسها والكة روحي بحضنج
جان يحجي واني ابتسم
.. هيام
.. عيونها
.. ولج لا تنعوصين بصوتج ترة انا مسموط ابو ابوي وانتي كاعدة تحركين بدمي
رجع همس بصوته الناعس
.. بطة
.. اممم
.. قربي الكام عليج اريد اشوفج
درت جسمي ونمت على ظهري
ورفعت النقال
وهو سوة مثلي صرنا ثنينة نبتسم على
حركتنا
.. اريدج
.. حتى اني اريدك
.. لا مو بكدي
.. بالله شو قربي علية خلي اشوف حضنج
بديت اقرب النقال علية
واني ابتسم ماحسيت والا كوشة السرير انشمرت علية كمزت من مكاني مخروعة
درت وجهي شفت علاوي يضحك ويريد يعيد
الحركة
.. لك علاوي مرب يومك وكعت كلبي
ضرغام .. هههه خرب يومه قطع علينا اللحظة
رجعت احجي .. شفت ابنك شلون شن الغارة علية
واجة علاوي نام على صدري
مثلما متعود
شافه ضرغام
.. اااااخ بوية ولك علاوي بوية هذا مكان ابوك
بقيلي شوية
ابتسم .. انت وابنك راح تجلطوني بحركاتكم
شفتة شلون ضربني بالكوشة
جنت احجي وياه وعلاوي دار وجهه وباوع عالشاشة ومد ايده صاح .. بابا .. بابا
يريد يلزم النقال
..هَـا ياكلب بابا ولك والله مشتاقلك
بعدت النقال على ايد علاوي وكام يبجي
.. ضرغام شنو شوكت ناوي ترجع موجنك طولت السفر
.. بس اخلص كبل ارجع احتمال يومين واخلص الشغل

.. يالله روح هذا علاوي زعل ظل يبجي اتنحس
علمود ياخذ النقال
.. يالله روحي سكتي لتخلينة يبجي
وانا راح انام
.. يالله حبيبي تصبح على خير
.. وانتي من اهله
سديت النقال
ودرت على علاوي
.. هَـا هسة ارتاحيت خربت علينا السهرة بالله شو تعال
ظل يدردم واخذ النقال من ايدي وحطه على
اذنه ويحجي كلام غير مفهوم بس كلمة وحدة عرفتها بابا
والباقي جيب مترجم يترجم شيحجي الله اليعلم يمكن يسبني
اندك الباب وانفتح ودخلت ريام
.. هَـا بعدكم كاعدين
شنو جنتو تسوون
.. والله جنت احجي وية ضرغام كامرة وهذا الاستاذ عرس علينا وكام يبجي عالنقال
ريام.. هلا هلا صايرين تحجون كامرة خرب
بالحظ
بس خوش فقرة هاي تفيدني حتى اتأكد من ضرار محد يمه يعني بحجة المشتاقة واشوفه بالكام
وهم اتحقق من مكان وجوده
.. شنو انتي يعني كلشي عندج تحقيق ومراقبة وترصد
.. شعندي غيره هذا زوجي وابو راضي
لازم ادرير بالي عليه
..
.. هاي شنو اشو ابو راضي يعني اخيراً اقتنعتي
بالاسم
.. والله يا اختي ضرار قنعني بالاسم
.. بالله فهميني شلون قنعج
.. اششششش عيب هاي حالة خاصة
.. والله انتي داهية
.. سكتي اليوم متت قهر على رفاه
.. شبيها هي مو اتصالحت اليوم هي ضاري بعد شكو
.. لج لا مو هشكل قصدي خايفة عليها من اختها
احجي وياها على اختها وهي ما جاي تتقبل فكرة اختها تأذيها
.. اي هم حقها ترة هاي اختها متكدر تثق غير بس بيها شلون انتي واني
يعني واحد يجيج ويكلج هيام تأذيج وتخرب حياتج تصدكينه
.. لا ما اصدكه لان الله انطاني عقل وكل حياتي وياج مشفتج يوم اذيتي احد او حقدتي على احد
بس هي جاي تشوف اختها شتسوي وياها
لج اليوم اجتي وكعدت يمنا بالنادي عينك عنك كدامي ومسلمت علية واني عاندت وظليت كاعدة اريد ادقها
بس يا اختي كلامها كلة تحريض ووز
بعدين متحملت ضلت تحجي على ضاري
مكدرت اسمع اكثر واسكت كمت من مكاني
بس تدرين بية مو بيدي احب اعرف شنو راح يحجن ظليت احوم فوك راسهن بدون مينتبهن علية
خية وسمعتها تكللها خلي نجرب نختبر ضاري اخاف عنده وحدة ثانية
وبعدين كومي اخذي رقم ضاري وانطيه لصاحبتها حنين
.. اي وانتي شبيج مقهورة
.. لج انقهرت على رفاه الي رفضت وهاي رنا
الخبيثة اخذتة بدون موافقة رفاه
ولج لو تعرفين هاي حنين شكد منحطة وسمعتها زفت يعني متعجبة على رنا شلون مرافقة هيج وحدة
.. ريمة انتي مالج غرض عوفيها ترك رفاه جبيرة ولازم تصير قوية الشخصية وتوكف بوجه اختها
وترفض تدخلها بحياتها
.. اخاف تعرف بخباثة اختها بعد فوات الاوان
بعد ما ضاري يكتشف لعبتهم
.. انتي عليج بس فطنيها وعلميها
جنا نحجي ودخلت علينا ميس
ميس.. هلا هلا مجتمعين من وراي
غير تكولون عندكم اجتماع
ريام.. هلا بالضلعة تعاي هاتي ما عندك.
من اخبار شكلج جاية وجايبة العيد كله
.. شلون عرفتي عندي حجي
.. من عيونج مبينة تلمع من الفرحة
هيام.. يارب دوم الفرحة
ميس.. سكتو اليوم ايمن صارحني وكلي عندي حجي وياج كلش مهم
اخذني على صفحة بعيد عن البنات
وصار يسمعني كلام كلش حلو وكلي
احنا كبرنا سوية واناي اكثر وحدة قريبة على كلبي لج يكول حتى اقرب من خواتي علية
ما اعرف ليش احب احجي وياج كلشي يصير بحياتي
وكلي انا حبيت اكلج انا راح اخطب
.. ولجن واني كلبي كام يدك دمام
واني سويت نفسي ما اعرف على شنو يحجي
وكلتله .. مبروك منو هاي سعيدة الحظ الي راح تكون من نصيبك
كال.. انتي تعرفينها كلش زين ما يحتاج اكلج
والباجر راح نجيكم انا وامي حتى تحجي وية جدتي عليها
تدرون انا اجة يغمى علية من الفرحة
هيام.. والله انتي مخبلة
.. لج سكتي كمت ابيع ثكل براسه
وكلتله الله يتمم عليك يارب
باوع علية مستغرب وكلي
.. يعني انتي ماعندج اشكال موافقة
محجيت شي بس ابتسمت ودنكت ورحت
ركض عالمحاضر وكلبي يدك سمعته
يصيح من وراي مخبلة والله مخبلة
كامت ريمة لعند ميس وحضنتها بفرحة
.. ربي يتمم عليج حبيتي والله انتي طيبك وتستاهلين كل الخير وايمن حباب
واني فتحت ايدية وهي اجتي لحضني
.. لج ميس واخيراً راح نشوفج عروس

يتبع