رواية تائهة بين اروقة الماضي الفصل السادس والثلاثون 36 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha-d-h

مساء الانوار عليكم احبتي القراء
ملاحظة قبل لا تقرون سوف يتم تنزيل البارت كل يوم الساعة ١٢ ليلاً لكم مني اجمل تحية واتمنى لكم قرائة ممتعة 🌹🌹🌹🌹
(((((((((((((())))))))))
ضرار.. وليش بعدين تحاسبني تعال هسة حاسبني هذا انا موجود كدامك
دخل واتقدم من ابراهيم وعيونه بيها نار وشرار
ويكول يا شر اشتر

ريام
شهكت بخوف هذا شجابه هسه
عزة العزاج يريام جانت عايزة والتمت
شلون يالله راح تصير مصيبة
شفت ابراهيم اقترب من ضرار بعصبية
ابراهيم.. الظاهر انت ابن خالها اللزكة
انت شنو ماعندكم احساس ريام مخطوبة الي
وانت قبل اتقدمتلها ورفضتكم بعد ليش تجبرونها مرة ثانية ياخي هي مو بالكوة تردون تاخذونها

اسمع بكلام ابراهيم وكلبي كام يدك حيل باوعت لضرارشلون اتغير لونه وباوع علية جانت نظراته
كلها غضب
ضرار.. منو كلك هي مجبورة
ابراهيم .. هي كالت ما تريدك

يبوي هذا شكاعد يحجي
ريام.. ابراهيم ماله داعي هذا الحجي انت انسان مثقف
وتعرف الحياة قسمة ونصيب واني قسمتي مو وياك
ابراهيم.. ريام انتي ما عليج لا تتدخلين
ادري بيج خايفة من عنده
ضرار يحجي بهدوء مخيف
.. الظاهر ست ريام مسويتنا ووحوش
عند الاستاذ خطية ليش هشكل مخوفته من عندنا
ابراهيم .. شوف واسمعني زين انت ما تعرفني شنو اكدر اسوي ترة اني وراي ظهر يوديك ورة الشمس لاتكعد تتباهي بعظلاتك كدامي اني هذا كلة ما يمشي عندي هي حجاية وحدة واسمعها زين خطوبة ما افسخ واعلى ما بخيلك اركبه

يمة شفت ضرار اجة يهد على ابراهيم وجامع ايده بقبضبة
.. دتعال مسوي روحك براسي سبع وكاعد تطالب بيها
شنو بوية انت منو ابن عمها ابن خالها وجاي تتوعد
وتصيح
وكف عمو احمد بوجهه
.. ضرار احترم ضيوفي ما اقبل تتعارك ببيتي
ابراهيم.. عوفة عمو خلي يراويني شيريد يسوي
ضرار.. عمي رحمة على والديك هدني عليه خليني افوخ كلبي بي هذا ما لاكي واحد يمسح بي الكاع
احمد.. ابراهيم انا اتصلت على اهلك ارجوك اكسر الشر وافهمني البنية مو الك انا عمها جاي اكلك ما عندك يمنا مرة لأبن خالها والقريب اولى
بيها من الغريب
ما صار نصيب وانتو بعدكم عالبر يعني حتى بعدكم
ما عاقدين ولا ملبسها الحلقات يعني بس حجي
ابراهيم.. حتى لو بس انت انطيتني حجاية
ضرار .. سمعت عمها شنو كلك
يالله حباب رحمة الله من زار وخفف
التفت ابراهيم على ريام وحجة
.. ريام احجيلج كلمة هذا شكاعد يخبص جاي يطردني من بيتكم
انتبهت على ضرار اتقدم ووكف كدامي وانطاني ظهره
وحجة.. ريام انتي فوتي جوة
وانت استاذ خلي كلامك وياي لا ادير فجك
ريام.. ما افوت جوة ترة اني صاحبة الشأن واني الي احط حل للموضوع
باوعت على ابراهيم احس مطالبة بتبرير
.. ابراهيم اني اعتذر منك
لازم افسخ الخطبة اني ما رافضتك لشخصك
بالعكس انت انسان خلوق ومحترم بس الظروف حالت بيني وبين

انتبهت عليه غمض عيونه وجر حسرة
كسر خاطري ادري بي يحبني واحس بحركة كلبه
بس يمكن الي صار يصب لمصلحة ابراهيم لان اني ما حبيته وهو انسان يستحق وحدة تبادله الحب
ضرار.. خلصتي ست ريام كلامج لو بعد اكو شي
ريام خزرته
ضرار.. اكلج تفوتين تدخلين جوة لاتعمين عالولد
سمعنا اندك الجرس وراح ابن عمو احمد يفتح الباب وشوية ودخل للاستقبال ووياه ابو ابراهيم واخوانه
سلمو علينا وكعدوا
جريت نفس بأرتياح هسة اطمن كلبي لان ابوه واخوانه
ناس محترمين ومتفهمين وما يحبون المشاكل بلكي الله يهدوئون ابراهيم
ضرار بصوت ناصي ..تفوتين جوة لا والله تصير موخوش
منا الزلم وانتي كاعدة بنصهم
ريام.. اوف منك شكد حقنة
ضرار بهمس.. بسيطة بعدين اعلمج منو الحقنة
كمت من مكاني وطلعت
وحطيت اذني عالباب اريد اسمعهم شنو يحجون
حجاية اسمعها والثانية لا بس الي افتهمته ابو ابراهيم واخوانه اتفهمو الموقف واعتذرو عن تصرف ابنهم المعارض خصوصا عمو فهمهم الموضوع وحجالهم على تصرف ابراهيم
وبعد فترة من الحجي اترخصو وطلعو
وجنت بعدني واكفة وحاطة اذاني عالباب
بعدني اتسنط
فجاءة انفتح واجيت اوكع على وجهي بس انضرب وجهي بصدر واحد رفعت راسي
شفت ضرار عاكد حواجبه بأستغراب
.. لاتكولين جنتي واكفة تسمعين الحجي
معقولة هالكد يهمج امره
.. طبعاً يهمني امره جنا مخطوبين
ولوما تدخلكم جان احنا جاي نحضر لزواجنا
لتتوقع
اتعمدت اغيضه وابين له انو بحياتي غيره
مثلما هو عندة بحياته وحدة يهتم لامرها وواعدها بالزواج
باوع علية بغضب عبالك يريد يخنكني
.. عاذرج الحقيقة موقفج مثل موقفي حتى انا جنت مخطط لحياتي غير شي بس فرضوج علية غصب
شسوي لازم نتحمل هذا امر الله

كان كلامه وياي مثل السجاجين تدك بكلبي
احس كلبي صار نار معقولة لهلدرجة يحبها
ومقهور عليها اهووو هسة اني شبية نارهم. تاكل حطبهم
((((((((()))))))

هيام
بالطريق الى البصرة تمت خطبة وعقد قران ريام وضرار واني حضرت جوازي وجنطة الملابس والاوراق
وبعد الوداع بيني وبين البنات ولجين وريتا بالنقال
ووصيت ريتا على لجين خطية وضعها كلش ماعاجبني حيل ذبلانة

حانت ساعة الرحيل اباوع لريام شكد تتدعي بالقوة
لكن من نظرات عيونها تبقى ذيج البنية الصغيرة الي اتعودت دائما تلزم طرف ثوب اختها الجبيرة
وتروح وياها وين ما تروح اي ريام ما اتعودت
تفاركني وهاي اول مرة راح نتفارك
حضنتني حيل بالباب وصارت تبجي مثل الطفلة
هيام.. يالله ريام ما اوصيج على دراستج شدي حيلج
ريام تمسح دموعها وترجع تبجي
.. ان شاء الله وانتي هم مو تنسين تراسليني وتتواصلين وياي بالاخبار اول بأول اريدج تطمنيني على علاوي حتى من تسافرين للهند عندج الوات تراسليني عليه
ورجعت تبجي
بوسيلي علاوي
اجانا صوت خالو راضي
.. خالو ريام لتبجين ترة انتي شهرين وجاية ورة اختج
بس خلصي امتحاناتج حتى اجي انا بنفسي اخذج
احمد.. بعد ما اوصيك ابو ضرغام هيام امانة بركبتك
راضي.. لا تاكل هم هذني بنات الغالية
يالله في امان الله

ركبنا السيارات وانتبهت على نظرات ظرار لريام بدون ما تنتبه شلون يباوع عليها بحنية انتبهت عليه من كامت تبجي شلون ظل يحوم فوك راسنا بتوتر وكل ساعة يستعجلني حتى اصعد بالسيارة
ابتسمت ضرار بالرغم يحاول يبين لريام ان هو مامهتم بيها بس نظراته فاضحته بس مع الاسف ريام
ماجاي تعرف معنا هاي نظراته او هو يتعمد يباوعلها بغرور من تكون تبادله النظرات
اووووف الله يهدي سركم
واتحركت السيارات واني على طول الطريق افكر شلون بية اذا التقيت برنا وضرغام يمكن ارتكب جريمة
لالا هيام صيري قوية لا تبينين الهم انتي مقهورة
بالعكس لازم احاول اتصرف وياهم ببرود
يارب انطيني الصبر والسلوان
مرت الساعات ووصلنا للبصرة وبالتحديد منطقة بيت خالو
دك نقال خالو راضي
.. الو هلا ضرغام اي هاي احنا وصلنا بالباب
ياخي والله خبصتنا شبيك اول مرة انا مسافر وانت كل ساعة داك تطمن علية وتسألني هَـا وين صرتو
يالله احنا بالباب
انهى الاتصال

احس كلبي يريد يطلع من صدري
اباوع على منطقة بيت خالو واتذكرت هروبنا وخطواتنا
الخايفة بهذا الطريق غمضت عيوني
راضي.. خالو هيام الحمدلله على سلامتج نورتي بيتج
بس قبل لا تدخلين خلي اكلج كلمة انا ما حجيت وياكم
اي كلمة تخص موضوع هروبكم بس مو معناها انا ناسي لا بس مرض علاوي
شغلنا كلنا وخلاني اجلت الموضوع لبعدين
بس خلي ببالج موضوعكم ما انتهى والنة
كعدة سوية ونتحاسب بس مو هسة
خلي علاوي يشفى من مرضه
جان خالو يحجي واني ساكتة مو خوفا منة لا
بس ادري بروحي اذا فتحت الموضوع ما راح اسكت وانهار واحتمال اجرح خالو بالكلام لان همة هواي ظلمونا
هيام.. خالو اريدك توعدني ما تنسى موضوعنا
لان اني هم الي حق يمكم ما ماخوذ
راضي.. ان شاء الله خالو لكل حادث حديث
وكفت السيارات يم بابهم وانا كلبي فز اتذكرت اول دخولنا اني وريام لهذا البيت شلون جنا خايفات
ونتأمل منهم الخير بس مع الاسف طلعنا من هذا البيت

اني واختي كلوبنا مكسورة
نزلت من السيارة ورفعت راسي وصارت عيني بعينه
ااااااه يا عيونه جان يباوعلي ونظراته غطتني من فوك
ليجوة مثل العباية للحظة خانتني دكات كلبي
بس بسرعة اتلاحكت لروحي
ضرغام .. احم الحمدلله على سلامتك حجي
جان يباوع علية ويحجي بعدت نظري عنه ودخلت جوة
ما اهتميتله شكد شايلة حقد بكلبي عليه
التهة وية عمامه وابوه واني دخلت للبيت جوة من باب المطبخ حسيت كلبي انعصر
واني اتذكر حياتي بهذا البيت حٍٍِْــًبٌٍـــِٓېٍ لضرغام ولهفتنا
ووكفتنا بهذا المطبخ وغزله ووقوفه بصفي عالسنك من ينتظرني اخلص غسل الصحون لحتى نصعد فوك لغرفتنا
غمضت عيوني اجتي خالة حليمة وبقية خالاتي
حليمة.. هلا وميت هلا بأم الغالي ومرت الغالي
يمة توه نور البيت
رمشت بعيوني مامصدكة هاي منو معقولة حليمة
والله كالت ريام عليها يمكن حليمة مسوين لعقلها غسيل
دماغ ااو مفرمتين ذاكرتها
سبحان مغير الاحوال من حالٍ الى حال
سلمت عالكل خالاتي شكد مشتاقتلهم الاخالة حمدية
ما مشتاقتلها
جنت ادور بعني علاوي ابني
اجتي ميس فرحانة وشايلة علاوي بيدها
يمة اجة كلبي يوكف
رحت تركت السلام وركضت لابني اخذته بكل لهفة
وهو شافني وشمر نفسه علية
صرت مثل المخبلة احضن بي واشمشم بركبته
وابجي ما مصدكة روحي ابني بحضني
حليمة .. تعالي خالة فوتي دخلي جوة سلمي على جدتج خاجية خبصتنا من الصبح كل ساعة تسأل وينها هيا ما وصلو وليش هلكد اتأخرو
رحت دخلت جوة وشفتها كاعدة. وايدها معووجة
كالت ريام بيبي مشلولة من ورة الجلطة اثر هروبنا من بيتهم
جانت تباوع علية بعتاب اقتربت منها واني شايلة عليها
بس بنفس الوكت مشتاقتله
اقتربت منها وسلمت عليها وبست ايدها وراسها

هيام.. شلونج بيبي
جنت احجي بتردد
الحجية خاجية.. الحمدلله عايشة بشريني انتي واخيتج شلونها ليش ما اجتي وياج
ودارت على علاوي وصارت تناغليه
برودها قهرني هو منو المفروض يزعل وينقهر
هو منو المظلوم
جريت حسرة الم وغمضت عيوني
بقيت كاعدة يم بيبي خاجية والبيت هوسة ومخبوص خبص بخالاتي وخوالي وبناتهم واولادهم
مرت ساعتين
الحجية خاجية .. جدة هيام كومي اخذي ابنج ورحي ارتاحيلج شوية اشو وجهج صاير اصفر من التعب
احس اجتي كلماتها بوقتها لان كلش تعبانة
حليمة.. انطيني علاوي ورحي ارتاحيلج شوية
هيام.. لا خلي علاوي عندي
كمت وشلت علاوي
سألت ميس وين ودت جنطتي كالت حطيتها بالغرفة
غمضت عيوني
نسيت اكللها تخلي جنطنتي بغرفتها
حسيت بكلبي كام يدك ما مستعدة اصعد فوك لغرفتنا
للغرفة الشاهدة على كل لحظاتنا اني وضرغام
اخاف اضعف وانهار ما اكدر اواجه هذا الكم الهائل من الذكريات احس كلبي ينعصر
اتململ علاوي بحضني واني شايلته
شفت البيت هوسة ومخبوصين
وميس غركانة وملتهية وياهم
خلي ادوس على كلبي واصعد لغرفتنا
هسة هو شي اكيد يم الخطار
رحت صعدت فوك وابني بيدي
ووصلت يم باب غرفتنا واني احس النبض صعد لشرايين ركبتي سحبت نفس عميق
ولزمت اليدة وحركتها انفتح الباب ودخلت
اذني لقطت صوت حركة رفعت عيوني كان الفاصل
بين سماع الحركة باذني ورؤية المنظر المزلزل كدامي
لحظة اي لحظات
شهكت بصوت مفجوع وجمدت بماكني جنت شايلة بيدي علاوي من هول الصدمة اجة علاوي يوكع من ايدي جانت اصعب لحظة تمر علية بحياتي
ضرغام واكف ورنا بحضنه اثنينهم بأحضان بعض
ووين بغرفتي
جانت الدمعة تلعب بعيوني
شفت ضرغام بعد رنا من حضنه
مصدوم من دخولي المفاجيء عليه
.. هيام شتسوين صاعدة فوك
هيام استدركت لروحي .. اسفة اتوقعتها غرفتي
غمضت عيوني وحضنت ابني لصدري قوي
ما انتظرتهم يحجون درت وجهي وباسرع ما عندي
صرت انزل الدرج رفعت راسي لكيت الكل يباوع علية
مصدومين سمعت صوت ضرغام جاي ينزل وراي ورنا وراه
غمضت عيوني
هيام.. ميس راح اروح لغرفتج ارتاح
ما كدرت احط عيوني بعين احد من كد النار الي بكلبي احس بيها تفور
دخلت للغرفة وسديت الباب واتكأت عليه وكعدت بالكاع
نزل علاوي من حضني وراح يزحف
حطيت ايدي على حلكي اكتم صرختي المغبونه
صرخت بصوت عالي مكتوم
.. لك. ضرغااااااااام من الله لا يوفقك
شبسرعة رنا اخذت مكاني وبدلت غرفتي واحتلت خصوصيتي شبسرعة
صرت اعصر بروحي اريد ابلع الموقف خايفة انفضح
اصعب موقف يمر بي الواحد من يكعد يعاني لوحده
ولازم يداري دموعه ويخبيها عن الناس
ومن اثر هذا الموقف دخلت لغرفة ميس واعتكفت بيها وما طلعت منها وصارت حجتي علي ابني
عدت الايام والكل انشغل
بتحضيرات السفر للهند
واني طول هاي الايام اني كاعدة فقط بغرفة ميس ابد ما اطلع منها مكابلة علاوي وكاعدة لان صحته كامت تاخذ بالنزول حتى نساني الم كلبي وكسرت ضرغام الي
خوفي على ابني شغل كل تفكيري خفت لا اخسره وما الحك عليه
والبيت كلهم داخلين بالانذار ومخبوصين وخايفين
على علاوي خلصت اوراق السفر والحجوزات
طول هاي الايام ما شفت لا رنا ولا
ضرغام بس مرات اسمع صوته بالليل
يم باب غرفة ميس
اتعمد من يجي يريد يشوف علاوي اني اتحجج بالحمام
وحان وقت السفر وحضرنا روحنا ومن هنا تبداء مشوار معاناتي مع مرض علي
(((((((((((((())))))))))))
بعد مرور شهرين

سافرنا وطول سفرنا حوالي
شهرين
بس ما اصدك مرت شهرين على سفرنا للهند خلصناها
بين تحاليل وفحوصات وشدة وقلق وتوتر وانتظار
شكد جنت شايلة هم لحظات التقائي وية ضرغام
بس مرض علي ابني شغل كل تفكيري وكدر يشغلني
ويشتت انتباهي عن ضرغام
لكن بفس الوقت فاجئتني تصرفات ضرغام
بهاي الشهرين كان شخص حنون ومراعي هواي يهتم لراحتي وراحت علي ابني واحياناً الاحظه هواي قلق وخايف وحريص على صحة علي
ودائما يسأل الاطباء
احنا سافرنا للهند لأجراء العملية لابني
واخذنا ويانا خالة حليمة الي اصرت والحت ان تجي
وحضورها كان بالنسبة الي حبل النجاة نقذتني
لان جنت شايلة هم شلون راح ادبرها وية ضرغام
اذا صرنا لوحدنا اني وياه بغرفة وحدة بالفندق
بس الحمدلله هذه الفقرة انلغت بقدوم حليمة
مرات انسى نفسي واكعد اراقبه شلون يلعب ابنه
جانو اثنينهم نسخة طبق الاصل الاب والابن
وعلي يوم عن يوم بدة يتقبل وجود ضرغام وحليمة بحياته وكان واضح على حليمة تلهفها لحفيدها
وجانت دائما تتجنب تحجي وياي او تتهرب من تواجدنا
سوية
بس كلمة حق تنكال حليمة هواي متغيرة عكس ما جنت
متوقعة كلت هاي راح تسود عيشتي بالسفر وراح
تتعمد تستفزني لكن صار عكس ما اتوقعت
هي وابنها كانو شبه ملائكة بالتعامل
حنية ضرغام وكلامه وياي ومراعاته خلتني لفترة من الزمن انسى مشاكلنا وفعلاً ركنت الزعل على صفحة
وقررت اتصرف وياه هو بالذات ببرود واحترام
لان احناء صرنا والدين ولازم نحاول التعايش مع بعض على الاقل كدام علاوي هو يستحق ان نوفرله جو من الالفة خصوصاً بهاي الفترة المر بيها
اول ايام وصولنا خلصت تحاليل والمتبرع
ضرغام وبعدها سكنا المستشفى وبعد كل هاي المعاناة
تمت عملية علاوي الي دامت ١٣ ساعة بنجاح الف الحمدلله وهسة خلصت فترة نقاهة علي
وطول كل هاي الفترة حرصت ما احجي وية ضرغام الا بشي يخص علي وهو كذلك جان مبين عليه التعب وخصوصا هو هم سوة عملية ويحتاجله فترة نقاهة
وخالة حليمة التهيت وية ضرغام واني انشغلت وية علي ابني ومابقة على رجوعنا للعراق بس يومين
كنت دائمة الاتصال وية ريام خطية هي راح تجي ورة ما اني ارجع للعراق
لان خلصت امتحاناتها ومنتظرتني ارجع حتى هي تسافر للبصرة ما تريد تروح واني ماكو
جانت هي الثانية هم خايفة
لان خالو راضي متصل على عمو احمد وكله
خلي ريام تجهز نيشانها لان ما بقة شي على زواجها
ولازم هسة تحضر نفسها
منتظرين نرجع وورة اسبوع يسون العرس
بس فاجئتني ريام من كالت ان ضرار ولا مرة اتصل عليها طول هاي المدة حسيت بريام جانت تحجي وتغلي من القهر
ريام.. اريد اعرف هذا الطاووس المغرور على شنو شايف حاله بس بسيطة اذا ما خليته يعض ايده من الندم
على بروده ما اكون ريام بنت هناء

يتبع