رواية تائهة بين اروقة الماضي الفصل الخامس والثلاثون 35 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha-d-h
#صفحة_قصص_الكاتبة_nuha-d-h
ملاحظة
(( احب اشكر صديقتي وحبيبتي الادمن هدى على وقوفها الى جانبي ودعمي وتشجيعي وابداء الرأي
بكل ما يخص القصة احب انوه على فقرة
الادمن هدى شاعرة
ودائما تغمر بارتاتي بشعرها الجميل
ولا تخلو مقدمة البارت من خواطرها الرائعة الي دتعب في صياغتها وكتابتها حتى تستفتح بها القصة في كل مرة تقوم بصياغة اجمل العبارات والكلمات
لكن مع الاسف اكو بعض البيجات
من ياخذون البارت ياخذون وياهم مقدمة الادمن هدى يمسحون اسمها ويحطون اساميهم بكل وقاحة
ترة مثلما القصة بيها حقوق الكاتب حتى المقدمة والعبارات الجميلة هم بيها حقوق حصرية للادمن
فأحب اكلج يا حبيبتي يا ست هدى انتي شمس
اينما تحلين يحل النور اذا اخذو
اشعارج وخواطرك الجميلة فهذا يثبت مدى جمال وعذوبة كلماتك الثمينة )))
nuha,,-d-h
🌷🌷🌷🌷🌷🌷🌷🌷🌷🌷🌷🌷🌷🌷🌷
كان الصمت سيد الموقف الجميع كانو كاعدين وينقلون نظراتهم بين العم احم وريام كأنهم ينتظرون تكذيب ماسمعته اذانهم لكن صوت العم احمد اكدلهم الخبر
احمد.:. ضرغام ترة ريام مخطوبة
ضرار بصدمة ومن غير ميحس على نفسه
،: لحظة شنو مخطوبة
انتبهت متاخر على الكلمات الي طلعت مني وفضحتني وشفت الكل يباوع علية خرب
اشكد جنت معترض على قرار ضرغام من فرض علية اتزوج ريام
واشكد انتفضت وظليت اصيح عليه بغضب رافض هيج فكرة لان بعدني حاقد عليها وعلى موقفها وياي
ما راح انساه ولا راح انسى كلامها هي واختها بذاك اليوم قبل لا يشردون من بيتنا
بس من كال عمها ريام مخطوبة احس شي خمط گلبي
وفز من مكانه معقولة ريام تصير من نصيب غيري هذا
الما جنت مسوي حسابه رجف كلبي بسماع خبر خطوبة ريام من واحد ثاني عرفت بوكتها ان كلبي بعده
ما تايب منها وشكله بعده يهوى ريمته
الحمدلله ضرغام تدخل وانقذني عرف اخو محتاج مساعده لانقاذه من الموقف
ضرغام ببرود جاوب العم احمد وهو يمسح بلحيته ويباوع على ريام بتحدي :. اهااا كلت مخطوبة اي عادي وشنو يعني
تفسخ خطوبتها من الولد وتتزوج ضرار اسهل منها ماكو
راضي.. ضرغام وين كاعدين هو قابل بكيفك
الحجية خاجية .. انتظر يمة راضي ابنك ما حجة شي غلط وهذا من حقه خله
راضي.. حجية بس مو بهاي الطريقة هذا الگاعد يصير غلط وعيب
الحجية خاجية بغضب.. وين جان العيب من فكرن يسون سوايتهن ويشردن وهن بس بنات لوحدهن وخلن
الكل يحجي بينا
خلي ضرغام كلامه صحيح ضرار اولى من الغريب ببنت هناء وهي ما راح تلكة احسن منة ضابط ومركز وجاه والحمدلله ما ناقصه شي
اي يمة راضي لاتباوعلي هشكل سبق وان حجيت قبل واعيدها ما ارتاح الا اشوفهن متزوجات ومستورات ببيت رجالهن وما راح اضمن اي واحد يصونهن غير اولادك لان ولدك تربات ايدي وانا اعرف بيهم رجال
..
ريام جنت اباوع عليهم شلون يقررون مصيرنا اني واختي ويلعبون بينا مثل قبل يعني كاعد يقرر مصيري ولا كأنما اني صاحبة الشأن موجودة وعندي رأي بالموضوع التفتت على ضرغام واحس وجهي صار احمر من حرارة العصبيه
.. لك انت اشايف نفسك كاعد تقرر بمكاني ولاغي وجودي انت گلبك مخلوق من شنو انت متكولي ليش هشكل گلبك اسود
علينا ادري بيك تريد تنتقم مني اني واختي لان وگفنا بوجهك ورفضنا ظلمك تريد تدوس كلشي يوكف بطريق انتقامك
ما تكول هاي حياة بشر ومصير ناس معلك
اني مرتبطة ومخطوبة فرضاً كان عاقد علية سيد شراح تسوي
ضرغام بعده يجاوب بنفس البرود ويباوع على ريام رافع حاجبه باستهزاء وتحدي
: راح ابقى على نفس موقفي يطلكج ويتزوجج ضرار ما راح اغير كلامي
احمد.. شوف ضرغام انا ما عندي اعتراض عليكم انتو ناس خيرة
بس عيب من الولد جاب ناسه وخطبها من عندي وهسة همة جاي يحضرون لان بعد يومين يعقدون سيد ويسوون المهر شلون تريد مني ارفضه واخرب كلشي ترة كلش زحمة والسالفة واكفة
ريام.. ضرغام اتنازل عن كلمتك
لان اني مخطوبة ومستحيل افسخ خطوبتي
هاي خطوبة وارتباط ووعود مو لعب جهال

جنت ادافع عن خطوبتي من ابراهيم مو حباً بي بس
ما اريد اخضع لشروط ضرغام وارجع اخضع لتحكم بيبي خاجية بحياتي ولا اريد اصير تحت رحمة ضرار خصوصاً ضرار مبين عليه رافض الفكرة اصلاً ما يريد يتزوجني واضح من نظرات الحقد والكره باتجاهي
بس اني جنت احجي قاطعني وكال بصوت بصوته الخشن
ضرار.: عادي فسخي خطوبتج وشنو يعني
كسري وعدج للمكرود اعتقد انتي مو جديدة عليج مو اول مرة تكسرين وعودج
متعودة تعشمين الواحد وتوهمينة بالحب وبعدين تدورين وجهج عنه وتنهزمين مو صعبة عليج
اتبسمرت بمكاني وضليت عاجزة عن الكلام
جنت اعرف شنو قصد ضرار بهذا كلامه وهذا الشي يثبت ان هو بعده ما ناسي موقفي وياه
التفت عليه ضرغام
ضرغام.. يعني شنو افتهم من هذا كلامك وافقت عالزواج من ريام
ضرار اباوع عليها وحجيت ..
.. ما كدامي غير حل انت لزمتني من ايدي التوجعني ولوما الطفل وامه صدكني فلا اتزوجها لو تبقى اخر مرية بالعالم بس ما علينا الي صار صار وطاح الفاس بالراس واتورطت ماكو مفر لازم اوافق اتزوجها
وقبل كلشي انا عندي شروط
ضرغام .. شنو شروطك احجيها
باوعت على ريام وحجيت .. انا مواعد بنية عالزواج يعني خلي ببالكم حتى لو اتزوجت ريام راح ابقى مستمر وية البنية انتظرها تخلص كليتها وتتخرج واروح اخطبها مثلما اتفقنا انا وياها
انا مو من طبعي انطي حجاية ووعد واخلف بيها
ولا اعشم واحد بالحب واشرد مثل بعض الناس
انا رجال وكلمتي وحدة ما اكسرها لو على كص ركبتي وبنات العالم مو لعبة هذا شرف عالم

ضرغام
التفت على ريام وسألها وهو يحجي ببرود ونبرة التحدي بعدها تغلف كلامه
ضرغام.. هَـا ريام شنو قررتي بعدما سمعتي الحجي ترة ما ظل وقت بعد يومين اسافر انا وعلاوي للعلاج
ريام.. اني ما تهمني حياة ضرار ولا شروطه لان ما راح يهز شعرة مني وحياته لاتقدم ولا تأخر عندي شي
اني كل همي اختي وابنها
ولذلك راح اوافق لخاطر اختي وابنها بس غصب عني راح اقبل لان مصيرهم معتمد على موافقتي
جنت احجي ودكات كلبي تركض تريد تطلع من صدري جان ضرار يباوع علية اكلني بعيونه احس نظراته قيدتني بقيود غضبه
:.. بس قبل لا اوافق عندي شرط
ضرغام.. اليوم شنو سالفتكم راح تخلصوها علينا شروط بالله شو كولي شنو شروطج
.. اكمل دراستي ومن اتخرج اقدم على تعيين
ضرغام.. بس هاي بسيطة صار يجرالج بعد شنو تردين
ريام رفعت راسي.. واريد هاي شروطي تنكتب بعقد الزواج وتوقعون عليها
ضرغام.. انا انطيتج كلمتي شنو تشككين بحجايتي
ريام.. لا ماعندي ثقة بيك ولا بأي واحد واني اريد اضمن حقوقي لان ما عندي احد يطالب بحقوقي تعرف بية يتيمة وماعندي اهل وراي يوكفون بوجهك ويطالبون بحقي

ضرار جنت صافن
اباوع عليها شكد جاي تكابر وتبين كدامنا هي قوية
وصامدة بس يبقى هناك ورة نظرات عيونها خوف وهي تجاوب تحدي ضرغام بتحدي اكبر

ضرغام بهذا الاثناء كنت اباوع على امي وابويه اريد اشوف موافقين على كلامي لولا
التفتت على جدتي خاجية شفتها تبتسم
وباوعت لابوي كان ساكت وانا اعرفه كلش زين اذا سكت معناها قابل بالجاي يصير كدامه
ضرغام.. براحتج يجرالج نكتب شروطج بالعقد بعد اكو شي ثاني

احمد.. شنو عمو ريام اشو قررتي لوحدج وابراهيم
والخطوبة والعقد الي بعد يومين شنو راح اكول للناس
ضرغام.. عمي اذا عالناس ما تكدر تحجي وياهم ومستحي منهم خليها علينا احنا نحجي وياهم نكللهم ابن خالها حاجزها ويريد يتزوجها وهو اولى بيها من الغريب
احمد بغضب :.. لا ما يحتاج انا احجي وياهم اني مو صغير محتاج واحد يحجي بمكاني
باوع لريام باستغراب
.. عمو انتي ما مجبورة تحطمين حياتج علمود اختج
ريام.. عمو اني قررت وخلاص ما ينفع الكلام هسة اهم شي عندي اختي ترجع لابنها وبعدها كلشي ما اريد حياتي مو اهم من هيام
بس عندي سؤال لضرغام
.. انت ليش تسوي ويانا هشكل احنا شنو سوينا
اشو انتو الي حطمتو حياتنا ونبذتو اختي وابنها بعز حاجتها الكم وانتو الي خذلتونا ودرتو وجهكم عنها
ضرغام.. هاي عقوبتكم من شردتو من البيت
وعقوبة كتم خبر حملها اختج ما سوت حساب من ضمت ابني عني بدون علمي وبعدته عني
شنوتتوقعين راح اخذكم بالاحضان لو ارحمكم
من سمعت عندي ولد عمره سنة ما اعرف بوجوده
بس هيهات مستحيل انا الي يدوسلي على طرف اعتبره امه ماجبته
احمد.. لحظة عمو ضرغام انت ليش تحجي هشكل وتسوي روحك ما تعرف بموضوع حمل هيام
ترة انا دزيت واحد الكم
اجاكم للبيت حتى يبلغكم بحمل هيام ومكان وجودها وطلب منكم رقم الحجي
عقد ضرغام حواجبه وجاوب العم احمد.
ضرغام :اي صحيح دزيت واحد يبلغنا وصول البنات عندك بس كعد يهدد بينا ويتوعد بأسم ابنك
ريام.. جذب ماكو هيج حجي هذا افتراء من عندك حتى تبقى انت صاحب الحق تنكر انت اتزوجت
ست رنا على اختي
ضرغام.. لا ما انكر زواجي من رنا
ريام.. اذن كلام الولد كان صحيح فلا تكعد تتبلى علينا وتسوي روحك المظلوم ماكو مظلوم بهذا كله غير بس اختي هيام الله ورطها برجال ماعنده گلب شايف روحه
اذا تريد تلوم احد على الي صار فما تلوم الا نفسك
تدري ليش هيام شردت منك لان عرفت بيك واحد خاين راح تتزوج رنا عليها وسمعتك بأذنها وشافت خيانتك وية رنا بعيونها شنو تترجة منها تكعد تصفك لحضرتك
لو تنتظر تباوع عليك شلون راح تتزوج عليها وفعلا انت ما قصرت انتظرت اختي تطلع من حياتك رحت كبل اتزوجت رنا
بس شحجي وشكول الكلام كله ضايع وياك
بس ما اكول غير حسبنا الله ونعم الوكيل اني واختي وابنها بيك حوبتنا متتعداك.. الله لا يوفقك حطمت حياة اختي وكسرتها اريد كون حركة كلبها تصير بگلبك وتنجوي بيها وتعاني مثلما عانت اختي وبساعتها راح تعرف حركة كلب هيام وشلون عانت وياك ياظالم
ضرغام كمت افور من العصبيه شنو هالصلافة الي عدها هي واختها
)اصبر يا گلب خلي الحزن مكتوم
كل المعاني تغيرت وانگلبت الصورة
صار الصدك مثل الوفا معدوم
وكلوبنا تجرحت والفرحة مكسورة
المبادئ برخص التراب مصلخه بلايا هدوم
والمشاعر ارخص بعد والكلمة مهدورة)
(الشعر للادمن #Hoda)
‏كمت من مكاني بعد مااكدر اتحمل امثل البرود وصرخت بصوت عالي
ضرغام.. لج انتي متشوفين روحج اتجاوزتي حدودج وصرتي
تحجين حجي اكبر من راسج
احترمي نفسج واحجي عدل
ريام صوت ضرغام جمدني بمكاني بس حاولت اتماسك ومابين اني خفت اني هم كمت ووكفت على حيلي داريد اجاوبه
سمعت صوت خالة حليمة
حليمة.. يمة ضرغام صلي على محمد وهدي اعصابك
التفتت علية وكالتلي
تركو عنكم العتاب والفات مات هسة خلونا بسالفة الولد الصغير المريض
التفتت على ضرغام
علي ابنك المريض خطية هسة هو بحاجة امه والولد راح يروح من ايدينا وانتو كاعدين وكاضيها
عتاب وعرايك جنكم رويسية
ريام
اباوع عليها بحقد وكره واعرف ليش
اتدخلت ست حليمة وسدت الموضوع لان تعرف كلش زين
مو من صالحها نفتح دفاتر قديمة بس ما علينا ياحليمة اذا ما ندمتج على كل لحظة هضم وظلم وقهر وذل عيشتينا بيها اني واختي ما اكون اني ريام بنت هناء
الحجية خاجية .. يمة راضي خابر اخوتك خليهم يجون
واعزم عمامك حتى نبلغهم بخطوبة ضرار وريام ويجون يطلبون ايدها من عمها احمد
احمد جاوب الحجيه باستنكار:. لاحجية اني ارفض اقتراحج
مو بهاي الطريقة تخطبون مني بنت اخوي
اضنكم تعرفون الاصول
والاصول تكول تسوون مشية زلم لبغداد وتجون لبيتي هناك وتخطبوها مني اريد الناس كلها تعرف ريام انخطبت من عمها وتطلع من بيتي معززة ومكرمة ما اريد ينقصها شي واتوقع انا بهذا طلبي ما طلبت الا الاصول والي يحفظ حق بنت اخوية
راضي.. بالعكس اخوي احمد انت على راسي وما طلبت غير حقك وحق بنت اخوك انت سافر واحنا نحضر عگلنا
وشيوخنا ونسوي مشية زلم لبغداد ونطلب ايدها
لان ريام ذهب وتستاهل نرفع راسها بجيتنا
هسة انتو كومو ارتاحو
وانت بوية ضرار حضر نفسك باجر تسافر وياهم توصلهم لبغداد وتشوفهم هناك شيحتاجون وانا وعمامك جايين وراك
جنت صافن على ريام شلون صايرة كبرانه ومتغيرة وهاي القوة الي عدها زايدتها جمال حتى ضرغام بوكاحته مكدرلها ولاكدر على لسانها يسكتها حجت الي تريده شلون تحولت من قطه صغيرة مدلله الى قطة شرسه تنبش اظافرها بكل من يقترب منها ومن يعنيها ويهمها .. انتبهت على صوت ابوية
راضي.. ضرار وين صافن مرتك لاحك عليها سمعتني شنو كلت
فزيت .. ها اي بوية جاي اسمعك
بس اخذ اجازة واسافر وياهم

همة يحجون بسالفة الخطوبة واني كلبي گام يرجف خوف على ارتباك على مشاعر غريبة ما اعرفها شنو بس مو نفور احس بروحي صخنت
وخجلت
الحجية خاجية .. تعالي يمة ريمة خليني احبنج (ابوسج)
اقتربت منها واني رجل تطك برجل ومشاعري مختلطه بين اشتياق الى حضن بي ريحة امي المشتاقه من اعماقي الها وبين خوف من جبروتها الي مرحمني اني واختي وحقدي عليها لان تركتنا وحدنا موكفت ويانا بالعكس كانت ضدنا
واقتربت منها واخذتني لحضنها بلحظتها خنكتني العبرة
وبجيت شميت بحضنها ريحة ماما
الحجية خاجية.. مبروك عليج ضرار
دنكت.. الله يبارك بيج بس غصب عني مثل كل مرة تظلمونا
الحجية.. لو تدورين العالم كلة ما تلكين احن من كلبه لايغرج مظهره ترة هذا كلة مكابرة وليدي وانا اعرفه كلش زين ما يريد يقر انه هاويج فتشوفينة يكابر
ويعاند لان اعترافه يعتبره ضعف وهزيمة
هو واخوه ضرغام من نفس الطينة
ريام.. بيبي اني ميهمني ضرار وما يحتاج تواسيني
اعرف بي هو يحب وحدة ثانية وناوي يتزوجها
الحجية خاجية .. يعني لو ما حاجي بهاي البنية انتي راح تحبي
ريام.. لا راح ابقى حاقدة عليه هو واخوه لان فرضو علية كلشي وما تركولي خيار واستغلو نقطة ضعفي اختي
(((((((((())))))))))
ضرار
بالطريق لبغداد اسوق وهي كاعدة وراي اتذكرت
البارحة ليلي كله ما غفت عيني ولا أخذت نوم
الكلب يدري هي موجودة قريبة عليه وشلون بية
خايف انام وانسى روحي واحلم
واشوف نفسي اسير لهواها
وصلنا قريب من بيت عمهم احمد
احمد.. عمو ضرار انت تنزل ضيف عندي
وتبات عدنا
ضرار.. لا عمي تسلم انا اروح لبيت خالي ابو مثنى هنا ببغداد ما اريد اسوي عليك زحمة
احمد.. لا عمو ماكو اي زحمة انت تشرف
ريام.. عمو لا تحرجه اخاف يستنكف يبات عندك لان مو كد المستوى
سمعت ضرار كال بصوت ناصي استغفرالله العظيم
وبهاي اللحظه وصلنا يم بيت عمو وكف السيارة
التفت علية ضرار.. راح اعتبر نفسي ما سمعت شي
وافوتها هالمرة اذا انتي تستعارين من مستوى عمج
فمو معناها الناس كلها مثلج بس هو صدك لو كال ابو المثل كلمن يشوف الناس بعين طبعه
اباوع عليها صار وجهه طماطة من الغضب
احمد.. شنو هذا الحجي ريام بالعكس انا اشوف
بيت خالج راضي واولاده من رحتلهم كامو بية بالصلوات وابد ما حسسوني انا مو بكد المستوى شلج بهالكلام
ريام
مكدرت احجي شي انربط الساني ما اعرف ليش يم هذا الانسان احس بروحي ريام الضعيفه المستسلمة الخايفه ريام الي كانت متعلقة بثياب اختها وبعد ماتزوجت اختارت شخص ثاني تتعلق به ليكون الامن والامان لها وفي حينها كان هذا الشخص ضرار
الحقيقة ضرار طيب بس هذا ميعني لما احنا عدهم محسينا بالفوارق الاجتماعيه ااااخ
بس عمو حقك والله لو تسمع كلام امهم حليمة شلون جانت تعير بينا وبأصلنا جان ما دافعت عنهم
نزلنا وعمو سلم على ضرار
وضرار اترخص
رحت اركض لبيتنا اريد اشوف هيام وافرحها بالخبر لان قبل ساعتين واحنا بالطريق اتصلت علية لجين وكالت طلعنا من المستشفى واحنا بالبيت
لان بالليل اتصلت على هيام وحجيت وياها الصار بس ما حجيت عن شرط ضرغام وخطبتي من ضرار
وخطية جانت تحجي وياي بصوت تعبان بس من بشرتها فرحت رغم تعبها النفسي
واصرت يوم ثاني تطلع من المستشفى رغم اعتراض الدكتور يكول بعدها حالتها تحتاج العناية مو مال تطلع هسة لازم تبقى تحت الاشراف اخاف تنتكس صحتها
بس هيام من كد لهفتها على ابنها اصرت تطلع
دكيت الباب ونسرين فتحتلي الباب
سلمت ودخلت وشفت هيام رغم الذبول الموجود بعيونها
فرحانة كامت من مكانها واجتي لعندي خضنتني حيل وباوعت وراي
هيام.. ريام وينة علاوي ليش مجبتي وياج انتي مو كلتي وافقو اشوف ابني
ريام.. اي مو بس تشوفينة وتعيشين وياه وراح تسافرين
وياه حتى يتعالج مكدرنا نجيبه ويانا لبغداد لان جاي يطلعوله جواز فحضري جوازج وملابسج خالو راضي
راح يجي باجر وياخذج وياه
هيام .. يعني اعيش هناك وياهم يمهم
اباوع عليها شلون جاي تعاني وانخطف لونها
والله كسرت خاطري صارت بين خيارين واحد امر من الثاني
لو تترك ابنها وتبتعد عنه وتعيش هنا
لو تختار تعيش وية ابنها وتتحمل تشوف ضرغام ورنا سوية
.. هيام عندي موضوع ثاني اريد احجي وياج
.. شنو
.. ضرغام خطبني لأخوه ضرار ووافقت
هزت راسهة برفض
.. ولا تكليلي انتي وافقتي على طلبه
.. ماعندي غير حل
.. لج ليش ريام يعني رجعنا لنقطة البداية وما سوينا
شي بهروبنا من عندهم
يعني الرادوه صار
.. هيام لتخافين همة ما كدرو يفرضون علية رأيهم اني هم شرطت عليهم اكمل دراستي واتعين
.. اي بس شلون انتي قبل رفضتي ضرار لان مشوه وشكله يخوف يعني ما اتغير شي
ريام.. لج لا دتعالي شوفي هسة شلون صاير ابن اللذين
مسوي عملية تجميل وصاير شكله ياخذ العقل
سكتت فجاءة وانتبهت لروحي شلون زلك الساني بوصفه عبالك وحدة هايمة ومعجبة بي
لا لا اعوذ بالله اصلا اني اتخبل من عنده
بس كلمة حق لازم تنحجي الرجال صاير صاروخ يدوخ
ابن الاوادم اهووو هسة اني شنو لطشت على شكله
هيام.. خطية ضرار همزين سوة العملية
يستاهل كل الخير اشكد جان حباب ويانا بتعامله
ريام.. مثلما كلتي جان حباب تعالي شوفيه هسة شلون شايف نفسه شوفة ومتكبر
هيام.. مستحيل ما اصدك ضرار مو من هالنوع
هسة عوفج من هذا الحجي
كليلي علي ابني شلونه شنو جاي يسوي بدوني
ريام.. لتخافين عليه ابنج هناك عايش ملك زمانه
السلطان سليمان الكل هناك بالبيت متجند تحت امره
من خاجية الى اولاد مها يوسف وسيف حتى هذولي الجهال اشتغلو عنده حرس
لجين.. الملعون امه خابصة الدنيا خبص وهو كاعد يتونس شفتي مو كلتلج ابنج بخير وما عليه شي
بس انتي وحدة مخبلة ما تاخذ الكلام
ريتا.. يالله كومي سبحي وصحصحي ويانا
باجر راح ترجعين لبيت زوجج خو ما ترحين بهذا وجهج يشبه وجه العجوز
هيام.. على شنو ناوية ست ريتا

لجين.. ما ناوية على شي بس كلنا ناخذج شوية للصالون تعدلين وجهج وتسوين بعض التعديلات على شعرج يعني بيت خالج صارلهم هواي مشايفينج وشي اكيد اقاربكم هناك راح يبدون يتوافدون عالبيت علمود يشوفون ولي العهد ابن الاستاذ ضرغام وزوجته المصونة
هيام.. شبيكم بنات تخبلتو انتو ما سمعتو ريام شنو حجت قبل شوية
كالت شرط ارجع بس علمود علي وما يريد يشوف وجهي على كلٍ واني هم اصلا ما اريد اشوف وجهه
ولا رح اغير من نفسي ولا اعدلها علموده لان اخر همي هو ولو يموت ما اخليه يقتربلي ما دامه
فضل غيري علية خليه يتهنا بيها ونارهم تاكل حطبهم
لجين .. يمة يمة كل هاي الغيرة وتكول ما اهتمله لعد لو تهتمين شراح تسوين
جنا نحجي ودك نقالي
ابراهيم يتصل
اختفت ابتسامتي من على وجهي
رديت .. الو
ابراهيم بعصبية.. الو اكدر اعرف شنو معناها عمج يتصل علية ويكلي تعال للبيت حتى نفسخ الخطوبة
شكو ريام شنو صاير
ريام.. ابراهم تعال لبيت عمو احمد العصر ونتفاهم
لان ما ينفع الكلام بالنقال
.. ماشي انا جايكم العصر واحسنلكم يكون عندكم عذر
قوي شافي ماكو احرك الدنيا على راسكم انا مو لعبة عندج يا ست ريام
نهيت الاتصال واني اباوع عالنقال صافنة مثل المبنجة اريد اعرف
الزمن شبي ويانا اشو كل ساعة يضربنا على راسنة
اريد اعرف المصايب ما عندها غيرنا تروح تدك بابه
والله تعبت نفسيتي ما اعرف منين اتلكاها من ضرار لو من اختي لو ضرغام لو من ابراهيم
((((((()))))

اتصال
ضرار.. خير باشا شنو هي دكمة وادوسها واجيك لبغداد بس اريد اعرف هاي الحنية الي نزلت عليك
لابنك وين جانت اي مو جنة كلنا نتوسلك حتى ترجعها
علمود ابنها
ضرغام.. اكل تبن وبلا حجي زايد هسة تكدر تركب سيارتك و تجيب هيام وياك للبصرة لو متكدر ؟؟؟
ترة الولد هواي تعب
ضرار.. ضرغام شبيك مو باجر خطوبتي وراح اعقد على اختها شلون تريدني اسافر بيها للبصرة اليوم
يا اخي اصبر شبيك متلهف والله فضحتنا
.. انجب لك قابل انا مثلك فاضح نفسي
واصيح ما اريدها
وبعدين بأول شدة كبل زلك گلبك وفضحت روحك
بعدهم ما اخذوها منك كبل طلع وجهك الثاني
.. باشا هسة شتريد يعني لان ما راح اجيبلك المرة للبصرة هشكل تمسح بأخوك الكاع
ضرغام.. علمود علاوي خطية كسر خاطري يريد امه
ضرار .. شنو هالحنان راح ابجي طين على حنانك
خو كول علمود ابو علاوي الي ما عنده صبر ويريد مريته ببيته اليوم قبل باجر
ضرغام.. ولك انت مو مال الواحد يحترمك
لا تنسى ترة انا صاحب فضل عليك
ضرار.. اهووو هذا يافضل جاي تحجي عليه
ورطتني بأختها غصب عني
.. احلف خليني اصدك الله يرحم حلكك البارحة شلون
مفتوح ما سايعتك الفرحة بس ما علينا
يالله روح ولي من جهرتي خلي اخلص شغلي ضرار مو تنسى خليها تحضر جوازها وارواقها كلهم

(((((((((((((())))))))))))
احمد.. عمو ريام تعالي فوتي دخلي جوة ابراهيم يريد يحجي وياج
ريام
صار العصر واجة ابراهيم وهسة هو كاعد وية عمو
بالاستقبال سمعت صوته سلم وكعد وبعدين عمو حجة وياه هذا كلة واني واكفة ورة الباب استرق السمع
خرب حظي كبرت واتغير كلشي بية الا هَـا الخصلة الوحيدة ما كدرت اغيرها
رجعت اتسمع وفجاءة سمعت صوت ابراهيم علة على صوت عمو والله خطية عمو احمد شكد اتحمل من ورانا
حتى بناته ما تعب وياهن بكد تعبه ويانا
فتح الباب عمو وكال
.. عمو ريام فوتي دخلي ابراهيم يريد يحجي وياج
بلعت ريكي بترقب
ودخلت سلمت عليه
كام من مكانه باوعلي
ابراهيم.. ريام وين جانو بيت خالج من اتقدمتلج ووافقتي علية
ريام.. سبق وان اتقدمولي واني كنت رافضة
بس هسة الظروف جبرتني اوافق على زواجي من ابن خالي
ابراهيم.. ريمة انتي ما مجبورة توافقين عليه
انتي اصلا خطيبتي وتحت حمايتي
وعوفيلي هذا ابن خالج حسابي وياه بعدين
فجاءة سمعنا صوته الخشن
كمزت واكفة من مكاني

ضرار.. وليش بعدين تحاسبني تعال هسة حاسبني هذا انا موجود كدامك
دخل واتقدم من ابراهيم وعيونه بيها نار وشرار
ويكول يا شر اشتر

ريام
شهكت بخوف هذا شجابه هسه
عزة العزاج يريام جانت عايزة والتمت

يتبع