رواية تائهة بين اروقة الماضي الفصل الثامن والثلاثون 38 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha-d-h
مساء النور والسرور والخير على احبتي
((((((((())))))))))
حليمة .. هلا يمة ضرار الحمدلله على سلامتك
ضرار بست راس امي وعيوني تدور على ريام
.. الله يسلمج يالغالية
رحت لجدتي ونزلت كعدت يمها وانا بعدني بملابس
العسكرية تعبان بست ايدها وراسها
وبعدني ادور عليها
ضربتني جدتي على كتفي
.. شنو شبيك صرت احول هلكد تگلب عيونك منا ومنا شنو ضايع لك شي
.. هَـا لاجدة بس جنت ادور على ميس والبنات وين
حليمة .. ميس وريام جاي يصفطن بملابس
مريتك بغرفتك
ضرار.. اها يمة الله يرضى عليج صيحيلي ميس
حليمة.. صار يمة
الحجية خاجية.. شعندك نازل مجاز مو جنك راجع من وكت
ضرار.. جا حجية نسيتي انا على وجه زواج عندي تجهزات
.. لا مانسيت بس بعد وكت منا على عرسك بعد اسبوعين
ضرار.. احم هن الاسبوعين غمض فتح يخلصن بسرعة بدون ما نحس
جنت احجي ودخلت ميس اي الله جابج خلي ازحلكها
ميس.. الحمدلله على سلامتك ضرار
.. الله يسلمج ميوسة الله يرضى عليج روحي كتري الاستقبال راح يجون جماعتي

ميس.. الاستقبال نظيفة ما بيها شي
غمضت عيوني .. هَـا زين روحي صبيلي اكل
ميس.. انتظر ما بقة شي عالغدة حتى كلنا نتغدة
كمت من مكاني هاي شلون بيها لطشت شلون راح اصرفها
.. اكول ترحين تصبيلي غدة لو اكلج هسة
ميس.. يالله ماشي رايحة بس راح اصبلك تصبيرة
ضرار براحة.. يالله ميخالف قابلين
راحت
.. يالله جدة انا اترخص رايح ابدل
ما انطيتها مجال طلعت من يمهة طيران اريد
اصيد ريمتي وهي بغرفتي هههههه
دخلت وشفتها مندمجة تصفط ملابسها بالكنتور
سديت الباب على كيف
حجت وهي دايرة وجهة عالكنتور
.. اكول ميس وين نحط ملابس اخوج اشو ملابسي قبطت الكنتور شنو رأيج احط ملابسه بالكومدي كافي عليه
اقتربت منها همست يم ركبتها المكشوفة جانت رافعة شعرها .. مو انا البنكالي مالت الخلفوج وتحطين ملابسي بالكومدي بعد فد نوب ما اوصيج حطيهم بكومدي الاحذية
شهكت ودرات بين ايدية وحطت ايدها على صدرها
.. عزة بعينك كمزتني اي غير اتحم حم من تدخل
.. وليش احم حم منو غريب اشو بس مريتي بالغرفة
وانا وياها لوحدنا
وحرك حواجبه والشيطان ثالثنة
ريام
دفعتة ارتبكت من قربه ودفعته من صدره
جان لابس زي عسكري خرب ابجي طين على هذا
الزي والله لو ما استحي وفشلة اخلي حتى بعرسنا يلبس
هشكل .. اااا روح وخر منا عيب زحمة
سبل عيونه وقرب راسه بصف ركبتي وهمس
بحيث حسيت بحرارة انفاسه على بشرتي
احس بجسمي كلة انصهر
.. شنو وين صارالسانج اشو كمتي اتعتين
حصرتني البجية حسيت الموقف اكبر مني وخارج
سيطرتي يعني كلشي اعرف شنو ارد الا هذا الموقف جديد علية
.. كملي شنو وين ناوية تحطين ملابسي
احس خدودي صارو نار .. بس شوية ابتعد واني اكلك وين
ابتسم .. ليش صرتي حمرة ترة بعدني ما مسوي شي
ريام.. عفية ضرار ابتعد من عندي شتسوي صاعد للغرفة
ضرار .. صعدت حتى اشوفج واحجي وياج
.. شنو تحجي وياي
.. اكولج ما ظل شي على زواجنا
.. اي اعرف
.. لا بس الي ما تعرفينة انا شراح اسوي بليلة عرسنا
عزة يمة صرت ماي الله يلعن بليسك شنو من وكاحة
كمل كلامه .. والا اگولج خليها مفاجئة بيوم العرس
دفعته بكل قوتي وابتعدت عنه.. بكل عقلك اخليك
تلمسني والله ياربي مصدك نفسه
اخلي يقترب مني
.. روح لحبيبتك الي وعدتها بالزواج
اقترب مني ولزمني من زندي وقربني عليه
.. بس اريد اعرف هاي الشفايف الي تنكط سم شلون يكون طعمهن وهنة بين شفايفي
شهكت متفاجئة من جرأته اول مرة بحياتي اسمع هيج
كلام ومن منو من ضرار كلبي صار يرفرف مثل العصفور دنك راسه وطبق كلماته بالفعل
حسيت بنار تجوي شفايفي صرت كلي ارجف جوة ايده وگلبي يدگ يم گلبه ايده لافتني واني ضايعه بصدره العريض
غمضت عيوني اخذني بحركته وصرت مثل المنومة مغناطيسي رفع راسه واتلمس شفايفي باصبعه
وهمس.. خو ما تأذيج
رمشت بعيوني وفتحت حلكي مثل الخبلة وشفايفي ترجف
.. هَـا
ضرار.. ووجعا من احتركت عشيرتج لتسوين هشكل بشفايفج
ورجع دنك راسه باسني مرة ثانية وهو يعصرني بحضنه بقوة وزادت حركته ترك شفايفي وكام يبوسني بوجهي وبركبتي وحسيت على نار اخذتني بعدما بدا يعضني عضات خفيفه بركبتي
وقضى على اخر ذرة عقل عندي
فجاءة صوت ميس.. استاذ ضرار بيبي خاجية تكول
تعال اتغدة لا اجي اخلي العصا تركص على ظهرك
واغديك بيدي
فزيت بسرعة من مكاني ودفعته بخوف من المستحة الدمعة صارت بطرف عيني
ريام.. والله الا اكول لبيبي خاجية عليك انت واحد ما يستحي
انتبهت عليه اجة يوكع من الدفعة لان جان دايخ اكثر مني.. وكعد يمسح على صدره
ضرار .. الله يلعن بليسج منو من قبل شوية ذابت بيدي وحضنتني
اشو مالج صوت هسة صرت كخ
بس همة كالوها السمچ ماكول مذموم
بس لحظة شنو راح تكولين لجدتي
تعالي لضرار كطع شفايفي من البوس واني جنت ذايبة بحضنه

والله حصرتني البجية رحت فتحت الباب لميس واني
الدمعة بطرف عيني شفت ميس وحجيت
..هذا اخوج واحد ما يستحي
ميس تباوع علينا بأستغراب ورفعت حاجب
ميس.. شبي اخوي
سمعنا شهكة ميس ولج ريام هاي شنو بركبتج
دارت وجهة على ضرار.. لاتكول عضيت البنية
خطية اشوفها المكرودة شلون تبجي
والله الا اراوي عضتك لجدتي خاجية واكولها عليك بس اصبرلي لزمت ريام من ايدها واخذتها وياها
راحت نزلت جوة وانا بعدين انتبهت ركضت وراهم اريد الحك عليهم قبل لا يفضحوني بس وين الست راحت
خرب والله فضحني هذني الثنين الله يلعن بليسج يريام
هاي بس جم بوسة هشكل فضحتني جا بليلة العرس من اخذها شراح تسوي بية اظن تلم علية الوادم
ويصير كتلي رفس خرب
سمعت صوت جدتي خاجية تصيحني من جوة
الحجية خاجية.. ولك ضرير شمصخم بالبنية
ولك تعال انزل اليوم احرك عشيرتك تعال خليني اصخم وجهك
نزلت وانا اباوع على ريام واكفة ورة جدتي تبجي وميس يمها وامي تباوع بأستغراب وهيام شايلة علاوي تسأل ريام ليش تبجي
هسة عرفت شعور الواحد من يسطي على عرض الناس شلون يحس اتوقع يكون احساسه مثلي هسة حاليا اباوع للوجوه شلون تباوع علية
.. ها بيبي خير ليش تصيحين
.. ووجعة ابو بيبي
نزلت وانا لابس قناع البرائة على وجهي
.. يا ستار شكو شصاير ليش تصيحين حاركة الدنيا
.. خايب ضرير ليش هيج مسوي بالفرخة
ميس.. اي جدة حيل وياه اليوم عض البنية الباجر الله اليعلم شيسوي بيها مو بعيد يكتلها بالعصا
هيام والله ضحكت من كل گلبي على كلام ميس لان جانت تجهل شنو سبب الاثر الموجود بركبة ريام بكل ضنها ريام معضوضة لان مضوجه ضرار وهو عاقبها اباوع لاختي خدودها حمر من الفشلة
ومدنكة مسكينه ريام خجلانة ومالهة صوت بس دموع الخجل والغيض تنزل على خدودها
الحجية خاجية دارت على ميس.. انتي سكتي لا اكسر العصا انتي الثانية على ظهرج
ميس.. جا جدة انا شلي غرض هو ياهو العضها انا لو ضرار والله ياربي
الحجية خاجية.. بالله شو طلعي برة خليني احجي ويه هذا المجلوب
ضرار.. انعم الله عليج حجية سويتيني مجلوب
ترة السالفة ما تستاهل كل هاي الهوسة
جان يحجي ويباوع على ريام وهي تبجي
شدعوة عليكم فضحتوني هشكل هم لو ساطي على عرض ناس يمكن ما انفضح مثلما سويتو هسه بيه
خاجية.. خايب دنجب واسكت ونوب فوكاها هو ابو الراهي
بالله شو تعال خليني احجي وياك
وانتي تعالي يالغمة ما بيج خير دخانج يعمي
ريام بخجل وخوف.. هَـا بيبي
هيام
جنت اباوع عليهم واضحك جان منظرهم يذكرني بموقفي اني وضرغام وجدتي خاجية
الحجية خاجية.. شوف ولك ضرير راح ادز على عمتك هيفاء تجي تاخذ ريمة ببيتهم تبقى عندها منا لحد ما
تعرس لان انت مجلوب ما اضمنك
ضرار بأعتراض.. لا والله خاف تزعلين
خير حجية توديها لبيت خالتي هيفاء لا يكون تردين
اخلي ريام هناك تفتر كدام ايمن ورجل عمتي هيفاء
الحجية خاجية.. خايب ما تسكت وتسد حلگك على الاقل ايمن وزوج خالتج راح يعتبرونها امانة ويصنونها ويحافظون عليها بس خوفك من الحرامي الي يزحف بتالي الليل حتى يستفرد بيها
ضرار.. اه هيجي صارت انعم الله عليج حجية سويتيني حرامي وقبلها سطيت عالبنية ومالي امان
وبعد ما بقى بس تشربيني مخدرات وحشيشة حتى تكمل السبحة شبيج علية اليوم حجية
الحجية خاجية.. يمة رحاب اتصلي على اختج هيفاء كليلها خلي تجي اليوم حتى تاخذ ريمة يمها
لان هذا الملعون ابن الملعون ظل يحوم فوك راسنا عليها مثل العتوي (القط )
ضرار.. هههههههههههه اخ بطني والله حجية عليج سوالف منين طلعتيلي بهالسالفة ونوب عتوي
خرب وينهم خلي يجون الجنود يشوفون الضابط ضرار شلون جدته خاجية ماسحة بي الكاع
الحجية خاجية.. خايب ما تكعد ضابط على روحك مو علية بالله كوم من كدامي لا اكسر هاي على ظهرك
ضرار.. حجية الله ما يرضى عالظلم ترة هي حلالي ما سويت حرام
الحجية خاجية.. ماكلنا شي ندري بيها مريتك بس خلها تصير بغرفتك عودك اخذ راحتك وياها مو هسة
مخرع الفرخة الله لا يقبلها عليك شمسويلها وهشكل ترجف وتبجي
ضرار.. جدة شبيج جاي اسويلها بروفات وجلسات احماء ما قبل الزواج
جنت اسمع كلامه واضحك بس ما حسينا الا العصى انشمرت بأتجاه ضرار الي طكها ركضة وطلع من الغرفة
رجع مد راسه من الباب قبل لا يروح
.. والله حجية خاجية انتي امريكا بحالها ماتكدر عليج
تردين انا خلك ضابط اكدر عليج
.. خايب ابن حليمة انا الك الا اعلمك
حليمة.. هم رجعت لحليمة هسة هو كدامج انا شلي غرض
.. جا مني امه غير انتي مخلفة شياطين ما بيهم ولا رحماني
.. رحمة الله والديج حجية
.. هَـا حليمة شو تنافخين ما عاجبج الحجي
.. عمي يعجبني شلون ما يعجبني من احتركت عينك ضرار بعد شيفكني من السان جدتك
هيام
جنت اضحك على الموقف وبنفس الوكت اخذني الشوك والحنين لذيج ايامنا اني وضرغام
وجان يدخل شاغل افكاري
ضرغام.. السلام عليكم
الكل.. وعليكم السلام والرحمة
حليمة .. هلايمة ضرغام الله يساعدك اجيت لوحدك لو ابوك واخوك وياك
ضرغام.. لوحدي ابوي وضاري جايين وراي
.. شكو شصاير البيت مكلوب كلاب وخبصة
حليمة.. نقلنا غرفتك انت ورنا بغرفة ثانية الي بصف غرفة ضرار واشتريت مثلما وصيتني غرفة خاصة لهيام وغرفة لعلاوي
ضرغام.. اي بالعافية جا وين رنا
من سأل على رنا احس سجين وذبحني بيها
دنكت احس مالي الحق بعد ازعل احس اني الي قدمت ضرغام بطبق من ذهب لرنا حتى يتزوجها احس اني الي جبرته يتزوجها اي لولا هروبي وخروجي من حياته جان ما شاف نفسه مجبور عالزواج منها
حليمة.. يمة مريتك ما عجبها الحجي ورفضت ننقل غرفتها تكول ما تكفيني بس غرفة وحدة تريد الا تستخدم السويت غرفتين يالله يكفن رنا
ضرغام.. ماعليج منها انا احجي وياها
رفعت راسي
يعني شنو قصده راح يكعد يقنعها ويراضيها وهي تتدلع عليه
ضرغام.. وين علاوي
حجيت بدون ما احط عيني بعينه
.. علاوي نايم
.. كعدي اريد اشوفة
.. روح انت بدل ملابسك وارتاح بين ما اكعده
ضرغام.. ان شاء الله
كام من مكانه واني رحت لغرفة ميس دخلت جنت مطفية الضوة اجيت افتح الضوة
انحطت ايد على ايدي تمنعني
.. لاتشغلين الضوة خليه الظاهر مرتاح
همست بصوت ناصي اباوع عليه
.. ليش انت مو كلت كعديه
ضرغام.. اي كلت حتى تكومين ترحين للغرفة
واجي وراج
يمة لحكي علي كلبي راح يوكف
دفعني دخلني للغرفة وسد الباب على كيف
.. شلونج اليوم صارلج يومين وجهج ما عاجبني شبيج مريضة
.. هَـا لا مو مريضة ما بية شي
.. ادري بيج جاي تعبين وية اختج وعلاوي تسهرين عليه لوحدج بس من اليوم ورايح يوم يمج ويوم يم رنا حتى اساعدج بعلاوي ما تسهرين لوحدج
من جاب سيرت رنا وانا احس بروحي كمزت مثل المكروصة
.. لا انعم الله عليك اشكر عطفك علينا ما يحتاج
اني متعودة على علاوي اسهر وياه وبعدين انومه بحضني وانقله لسريره انت ما راح تعرفله
ضرغام.. ادري بيج شاطرة وما تقصرين وياه سبق وان شفت بعيني حرصج عليه بس ابو علاوي ماله حق بهذا الحضن هم تعبان ومريض
باوعت عليه بقلق بس ما ردت ابين جنت حيل خايفة عليه لان عمليته وية عملية علاوي ومن وصلنا للعراق هو كبل نزل للشغل ما انطة نفسه فترة راحة
.. شنو شبيك شنو اليوجعك
لزم ايدي وحطها على صدره
.. هذا اليوجعني
جان جو الغرفة ظلمة والضوة الوحيد الموجود بس
ضوة صغير خافت للنوم
اقترب مني وحجة.. هيام رحمي حالي اريدج
ما جاي اكدر اطلعج من راسي ولا جاي اكدر انام ليلي
لج حتى رنا ما جاي اكدر اقترب منها
ما ادري ليش من يذكر رنا اموت قهر واحقد مو بيدي
دفعته
.. اسفة ضرغام انت مو الي انت صرت لرنا روح لعندها اني ما اريدك
ضرغام.. مو بكيفج انا اذا كلت اريدج معناها اخذج
ما جاي اخذ رأيج انتي مرتي حلالي
هيام.. زين ورنا ضرغام اموت ما اتحمل
تنام بحضني ويوم ثاني تروح تنام بحضنها
اتخبل انجن انت لو تصير كلك الي لوحدي ملكي لو ما اريد .. اني مااقبل وحدة ثانية تشاركني بيك
.. اي كلة منج صوجج انتي رحتي وتركتي مكانج خالي ومن ضربتني الدنيا وشفت روحي بأمس الحاجة لوجودج بجانبي بمحنتي التفتت ما لكيتج بس لكيت رنا غصب عني من لا جارة اتزوجتها
اذا تردين تلومين احد على زواجي من رنا فما تلومين الا روحج
هيام.. ادري بروحي غلطانة بس هذا ما يمنع
انت اتزوجتها واني رغم اعرف بروحي غلطانة
بس ما جاي اتقبل وجودها بحياتك وابقى ارفض وحدة ثانية تشاركني بيك
انت لو تصير كلك الي لو ما اريد
ما اقبل بأنصاف الحلول
ضرغام بغضب.. يعني رغم دست على كرامتي واجيتج برجلي وطلبت منج الوصل وردتج ترجعين تصيرين ام بيتي واتغاضيت واتنازلت عن كل الي صار
هروبج هجرج وحملج جحودج كل هذا كدرت اتغاضى عنه
وانتي ما فرق عندج ولا اثر عليج
خلاص هذا هو براحتج ترة النفس عزيزة
ما راح اذلها اكثر من هيج اجيت لحد عندج وانا الشاري
وكلت نفتح صفحة جديدة انا وياج بس مع الاسف
طلعتي بايعة لانج انانية تحبين بس نفسج
بس خلي ببالج ترة الحياة بمحاولة منج ومني يالله تنجح انا قبلت اتنازل بس انتي بشنو حاولتي تقدمين لحياتنا من تنازل
سكتت محجيت شي ما عندي شي احجي
ما اكدر اقرر مو بيدي غصب عني ما اتحمل وحدة غيري تشاركني بي حتى لو اني جنت الغلطانة واساس الخراب صعبة علية والله صعبة
.. خلاص هذا هو افتهم من سكوتج ماعندج شي تحجينه
يالله اخذي راحتج وديري بالج على علاوي
واي شي تحتاجينه طلبي مني
طلع وتركني لوحدي محتارة وخايفة ما اعرف شتصرف
سمعت صوته صاح على رنا
يمة احس النار شبت بصدري همزين رفضت
قربه مني لان اذا هسة اني مقهورة مرة يمكن اموت الف مرة اذا اني بحضنه واتخيله شلون ينام بحضنها
لا صعبة خليني هيج احسن على الاقل احافظ على سلامة عقلي
..
ريام جنت جاي ادور على ميس حتى تصعد لغرفة ضرار تحضرلي جنطة ملابس الي لان خالة هيفاء راح تجي علية تاخذني يمهم
اتذكرت موقف ضرار ما اعرف اضحك مدري ابجي
اضحك على شكله شلون اكل بهذلة ورزالة معدلة من الحجية خاجية ما ادري ابجي على ضعفي وسهوتي واني بين ايديه فر عقلي فر يمكن بلحظتها لو ياكلني ما افتح حلكي من كد ما دوخني ابن اللذين شكله خبرة
جنت جاي امر من الاستقبال
وسمعت صوت ضرار رحت اقتربت من الباب وحطيت اذني اتسمع
اووف مني عيب ريام انتي مو كلتي بطلت اتسنط وراح اتوب
يالله بس هالمرة وبعد ما اعيدها
حطيت اذني وسمعت صوته يحجي شكله يحجي بالنقال لان ما سمعت صوت احد يمه
بس فجاء حسيت جمد الدم بجسمي
ضرار.. هَـا يالغالية الله عليج لا تزعلين مني والله غصب عني
.. هههههههه لا تخليني هسة اجيج واراضيج وتعرفين بية شلون من اجي
.. اه صدك والله هيج الحجي صار
.. لا لا عفية كلشي ولا زعلج احس اذا تزعلين
تظلم الدنيا بعيني هسة شنو تردين اجي عليج وانا ارجعج لو لا يالله جا انتظريني جايج مسافة الطريق

جانت كل كلمة تطلع من عنده تروح كبل على كلبي مثل الرصاصة غمضت عيوني حسيت الدنيا افترت بية وكفختني على وجهي
ما كدرت اتحمل ابقى ساكتة اكثر
فتحت الباب عليه وهو جان ستوة ساد النقال
ريام.. انت واحد نذل وعار وما عندك ذرة احترام
ولا عندك ذرة غيرة اصلا انت مو رجال لو رجال جان ما تلعب باعراض العالم
ما حسيت والراشدي اجاني حسيت بخدي عبالك نار تطلع منه
من ورة الحرارة لزمت خدي وباوعت عليه وحبست دموع الالم گوة وابتسمت
بأستهزاء .. هو هذا ردك هذا الي الله قدرك عليه
ضرار.. واكسر راسج بعد اذا عدتيها واتجاوزتي حدودج وياي
.. اتجاوز حدودي وياك لان انت ما خليت لروحك حشمة كاعد توعد بنت العالم اذا انت هيج متعلق بيها ليش تجي لعندي وتوهمني انت تريدني
ضرار بغضب.. بالله فهميني منين كاعد تجيبين الحجي وتصفطين وتتهمين
.. ضرار ترة جنت واكفة ورة الباب وبأذني سمعت كلشي
غمض عيونه وسحب نفس
.. اهااا وانتي شنو سمعتي
.. ما يحتاج اكلك انت تعرف شنو حجيت وية الخاتونة
.. يعني بكيفج سمعتي وقررتي وحكمتي خلاص هذا هو براحتج يعني ما تحتاجين افهمج
اخذ السويج واجة يطلع
ريام.. لك ضرار اذا رحت لعندها الا اكول لجدتي خاجية اخليها تطلكني منك
ضرار.. خوش عودك من ارجع نكعد نحل الموضوع
طلع وتركني واني افور
نذل واكبر نذل وناقص بعد ..واني اطلع حيوانة اذا خليتك تشوف ظفري الا ندمك على هذا الراشدي
..........
ضرغام
جنت ضايج وديني كامز واحس بروحي مخنوك
من وراها استاهل صدها لان هواي اتنازلت لحضرتها
ونوب هي ام الراهي وصاحبة الفضل وترفض بعد ولا همها تسامحي وياها
خلاص يجرالها التريده الا اكسر خشمها
دخلت لغرفتي وشفت رنا كالبة الخلقة ومغنتبة وضاربة البوز
.. خير شكو شبيج
رنا بزعل.. ضرغام ترضاها امك تتطردني من غرفتي وتنقلني على هاي الغرفة
.. اول شي اسمها عمة مو امك
ثاني شي ادري امي استأذنتني وانا كلتلها عادي نقلي غرفتنا بالغرفة الثانية ما صار شي ...باوعت عالغرفة شبيها اشو حلوة وواسعة
رنا.. يعني يرضيك عمة حليمة تكلي غصبن عليج نتنقلين وكأنما اني مو بشر والي رأي بالبيت
.. هذا كلام الوالدة يمشي عليج وعالكل وعلية بعد
واحنا ننفذ ونسكت بدون نقاش فاهمة لو اعيد
رنا.. لا ما فاهمة ولا اريد افهم يعني ست ريام وابنها ياخذون السويت واني وانت ننام هنا بهذا الجحر
.. الله ياخذج ولج هذا شكبره تسمينه جحر عمي الله لا ياخذنا بعفاج انتي وحدة متعافية حمدي الله وشكري غيرج ما لاكي هاي النعمة
رنا.. اهوووو شخبصتني اليسمعك يكول مكعدها ببيت لوحدها هي خلك غرفة
.. رنا هذا الموجود هسة شنو تردين
.. اريدك تروح تنزل لامك تكللها اريد ارجع انا ورنا للسويت مالتنة
ضرغام.. بالله شو ما اروح وما تحرك من مكاني عاجبج اهلا وسهلا ما عاجبج هاي اربع حياطين ركعي راسج بيها ما راح اوكف بوجه امي واخالفها علمود حضرتج

رنا .. شنو لهالدرجة تخاف من امك شبيك انت مو زلمة
لو ما تكدر تخاف منها
حسيت الشياطين اتربعت براسي
ما حسيت الا وانا طافر عليها
ومطلع حركة كلبي كلها بيها
.. لج عار منو المو زلمة
(((((((((((((())))))))
هيام
جنا كاعدين يم خالو راضي وبيبي خاجية اني والبنات ودخل ضرار وجايب وياه خالة حليمة جانت عند بيت اخوها
سلم علينا وعيونه على ريام خزرها
وحجة .. انا تعبان وراح اصعد انام
تصبحون على خير
وراح اتجه على خالة حليمة وباسها من راسها
.. حقج علية يالغالية كلشي ولا زعلج علية تصدكين من تزعلين مني احس الدنيا تصير ظلمة بوجهي
حليمة.. يمة ما اريد شي منك بس لا تخليني بحلك جدتك وبعدين تكعد تبهذلني من وراكم انتو مو جهال واكعد اعلم بيكم كضيت عمري اركض وراكم واصيح بيكم
وماكو فايدة كون ينحجي علية من وراكم يالله ترتاحون
ضرار.. حقج علية وهذا راسج ابوسه وايدج واذا تردين ابوس رجلج كلشي ولازعلج
حليمة .. روح يمة كلبي راضي عليك راضية
باوع على ريام بزعل وصعد فوك
سمعت شهكت ريام
باوعت عليها
.. هَـا شكو شبيج
ريام.. هَـا هيج كلشي ماكو
هيام.. خدج ليش احمر
ريام.. يمكن لان جنت نايمة على هاي الصفحة قبل شوية
سمعنا صوت صياح وعياط فوك هذا صوت رنا
حليمة.. ياستار شكو
كامت خالة حليمة وميس ورحاب
راضي يشوفون شكو اني بقيت كاعدة بمكاني اجتي ريام تكوم تشوف شنو صاير
لزمتها .. انتي كعدي عيب مو بكلشي حاشرة روحج
ما تبطلين من الفضول
ريام.. هسة همة كلهم كامو يشوفون شنو الصاير بقت علية
شوية وشفنا ضرغام لازم رنا من شعرها ونزلها من الدرج
رنا تصيح.. عوف شعري الله يكسر ايدك
وهو يشد حيل بشعرها .. بنت الكلب اليوم احرك عشيرتج منو المو زلمة ها ولج اليوم الا اربيج من جديد نزلو ودفعها لعند خالة حليمة
ضرغام بغضب.. شوفي يمة تاخذين بنت اخوج وتربيها ماكو قسماً بذات الله اذبحها واشرب من دمها
هالعار
هيام جنت اباوع على ضرغام
واتذكرت موقفي وياه بيوم اتحاوزت عليه ووجهتله نفس الكلمة وبلحضتها عرفت
ان الرجال ما ينحجي وياه هيج كلام
ماكو اي رجال يقبل مرته تتجاوز عليه
وهسه هم عرفت ان ضرغام ما ضربني لان اني بنت هناء لا ضربني لان اتجاوزت عليه واتعديت حدودي وياه
بس هو ليش هشكل ما عنده اي تفاهم كبل يستخدم ايده والضرب
اهوو هسة اني شلي دخل هو وزوجته
كلمة زوجته تمرد كلبي خرب شلون بية شوكت اتعود

دك نقالي وشفت المتصل عمو احمد
.. الو هلا عمو شلونك هلا بيك ننتظرك
ريام.. هَـا شنو كلج عمو احمد
هيام .. كال انا يم بابكم فتحيلي الباب
.. خالو عمو احمد اجة وهسة هو بالباب
راضي.. ضرغام اتعوذ من الشيطان
ودار وجهه على حليمة
.. وانتي حليمة اخذي بنت اخوج وصعديها لغرفتها وعلميها غلطها
(((((((((()))))
(((((((((()))))
هيام
كاعدين كلنا بالاستقبال بعدما وصل عمو احمد طلب
من عدنا خالو راضي ندخل اني وريام بالاستقبال واجة وهو جايب جدتي وجان ضرغام كاعد يم عمو
دخلنا كلنا وكعدنا واجتي خالة حليمة وكعدت هي اللاخ
يم جدتي
احمد.. خير ابو ضرغام شنو صاير وهشكل مجمعنا احس عندك كلام
انتبهت لخالو راضي باوع علينا اني واختي
وحجة
راضي.. اي والله عندي حساب وحجي ما مكيول
شوف ياخوي ترة انا ما ناسي سالفة هروب البنات من بيتنا وهاي مو هينة تعتبر عيلة علينا وغلط بحقنا
وهسة اليوم استغليت فرصة وجودك بالبصرة حتى اسأل البنات احنا بشنو قصرنا وياكم ليش شردتو من عدنا
واحنا مأمنين بيكم انتي يا هيام شلون تطلعين هيج طلعة وتعوفين حضن رجلج وتنهزمين
انتي يا ريام ليش وافقتي اختج
انتبهت لريام باوعتلي وحجت
ريام.. خالو احنا انهزمنا من الظلم الي اتعرضناله واحنا ببيتكم
راضي عقد حواجبه .. احنا ظالمينكم ؟؟؟؟!!
بشنو الله الشاهد من اول يوم وكعت عيني عليكم وانا اعتبركم مثل بناتي
ريام.. اعرف خالو صحيح انت ماقصرت ويانا
وصحيح عاملتنا مثل بناتك بس جنا عايشين تحت اسم امنا جنا اي حركة تبدر من عندنا اني او اختي
يعيرونا بأمنا هناء الي انهزمت وتركت بيت ابوها
واحنا مالنا ذنب نتحاسب
راضي.. منو هذا الي اتجراء وعيركم بامكم
ريام.. اولهم بيبي
هيام.. ريام
ريام.. لا هيام لاتسكتيني صيحيح بيبي تحبنا بس عيبها الوحيد بعدها تشوف بينا غلطة امي
والدليل منعتني من حقي اكمل كليتي
لان اني بنت هناء واخاف اسوي شي يكسر ركبتهم
في نفس الوقت بنتهم ميس دتكمل كليتها عادي ما عاملتوني مثلها وبعدين من اتهجم علية ابن خالة حمدية محد وكف بوجهه وخالة صارت تصيح هاي بنت هناء وكأنما احنا عار وابنها النزيه لان هذا وراه اهل يوكفون
لجانبه
راضي.. ليش انا مو رحت لبيتهم واتعاركت وياهم
.. اعرف خالو بس بقت السالفة معلكة بثيابي
والدليل خالة اجتي وخطبتني لابنها وجدتي خاجية
خيرتني لو اتزوج ابن خالة حمدية لو اتزوج ضرار
يعني خيارين واحد اصعب من الثاني
جنت اسمع خالة حمدية تكول اخذها لابني هي الوحيدة الي راح تسكت على سوالفه المكسرة لان يتيمة وماعندها اهل تزعل عندهم يعني هي مقتنعة تاخذني لابنها السكير وتكسرني
لو اسمع خالة حليمة تكول ازوجها لضرار لان مشوه ومحد ترضى بي وهي بنت هناء تحلم تطول تتزوج ابنها
يعني ادري هاي لو بناتكم تقبلون تزوجوهم هيج قسمة
واني جنت بنية صغيرة بالعمر يادوب عمري١٨ سنة
وهم جنت احلم اتزوج واحد وسيم وابن عائلة حالي حال اي بنية انتو حتى محد سألني
حكمتو كبل لان جنت احجي وية ضرار جنت اشوف
بحنانه مثل الاخ والابو جنت بحاجتهم
حكمتو علية اني مو زينة والعب عالولد وغصب عني ردتو تزوجوني
خالو احلفك بالله هاي لو وحدة من بناتك هم راح تجبرها عالزواج غصب عنها
.. لا والله ولا مرة بحياتي غاصب ولد او بنية عالزواج
همة مخيرين
اباوع لجدتي جانت ريام تحجي وهي تباوع عليها

.. وهذا انت كلتها مخيرين زين اني ليش محد خيرني
جنتو ممحسسينا مسوين براسنا فضل
ولازم نوافق على كلشي واحنا الممنونين
باوعت علية
هيام احجيلهم ليش انهزمتي من بيت زوجج
ترة همة يردون يعرفون احنا ليش انهزمنا و
باوعت لضرغام
هيام .. ريمة بدون متكولين اني راح احجي
اني اعترف واقر بغلطة هروبي لكن عندي اسبابي الي خلتني اترك زوجي واسافر لعند بيت عمي
اولهم جدتي خاجية وخيانة زوجي وتعامله البارد وياي وتجاهله الي وخباثة ودنائة رنا هي الي بعدتني عن ضرغام
اتزوجني ضرغام واني كل ظني ان هو يحبني
تالي اكتشفت اني مفروضة عليه والسبب بيبي شرطت عليه اذا يتزوجني يصير هو المسؤل عن ورث امي اني هذا مو همي وبعدها عرفت بيبي
انطته هدية عمارة بأسمه لان وافق يتزوجني
كدرت اتعايش وية هاي الحقيقة واتزوجت ضرغام ولايوم سمعته كلمة بخصوص هذا الموضوع جان هو كل عالمي وحبيته بس يوم عن يوم هو صار ما ينطاق
واعصابه وياي ما يتفاهم ورنا
راضي.. شبيها رنا
هيام.. خالو كثرت جياتها للبيت ودائما اشوفها مستفردة وية زوجي بغرفته وبعد ازيدك من الشعر بيت كثرت تدخلاتها بحياتنا وصلت حتى تقاطع اوقاتنا الحميمة
تتصل وتطلب منه يجي وهو يتركني ويروح بدون اي تفسير ولا كلف نفسه يبررلي ويطفي ناري
وغيرها من المواقف روح خالو واسأل رنا
كللها كم مرة اتصل على نقال ضرغام هي تجاوب واكتشف هو عندهم بالبيت
وكم مرة هي تتصل علية وتسمعني كلام ان هي وضرغام يحبون بعض وهو جان ينتظرها تكمل كليتها
ويتزوجها بس بيبي فرضتني عليه
راضي.. وانتي ليش ما اجيتي وكلتيلي
هيام.. ليش اكلك واني عندي رجال هو المطالب بتفسير كلامها اسأله يجاوبني ببرود اوحيانا يتركني اتكلب بناري يكلي يتخليج ماكو هيج حجي ورنا مثل اختي
زين مثل اختك شعندك وياه تفتر بيها بالمطاعم
باوعت على ضرغام الي جان صافن وكاعد يمسح بلحيته ويباوع علية وكأنما كاعد يدرس الموقف
اي اني شفتكم بعيني اثنينكم كاعدين بالمطعم وتسولفون
وهي جانت تبجي وانت تمسح دموعها
لان بيومها رنا اتصلت علية وكالت اذا ما تصدكين
بكلامي تعالي شوفي زوجج وياي
ورحت لنفس مكان الوصفته الي وبيومها شفتكم اثنينكم
لزمت نقالي واتصلت عليك انت باوعت على رقمي ومجاوبت تطلع وياها وتاركني عالهامش
مايوم كلفت نفسك تطلعني ووياك
لأي مكان او تسفرني مثلما جنت انت تسافر لوحدك
وتتركني هذا كله ورنا تكلي يستعار منج يستحي يطلع وياج لان انتي بنت هناء ويخاف يشوفونه جماعته وياج
راضي.. خلي تولي هو ضرغام طبعه يكره يطلع وية البنات من اهله
هيام.. زين من يطلع وية رنا اشو ما يكره هذا الشي
عادي عنده
وفوك هذا كله سمعته بأذني حجة وية خالة حليمة بالمطبخ ويكللها احجيلي وية رنا لان يريد يتزوجها
كل هذا وتردوني اتحمل واسكت
بس اني بلحظتها قررت انهزم
لان حسيت بروحي مالي اي دور بحياة صرغام غير بس حضن يدفي سريره بالليل
لان لاحظت ماعندنا اي علاقة خارج الغرفة
كام حتى من يسافر ما يكلي ولا يكون عندي خبر
وصرت اذا احجي حجاية بغضب هو يترجمها اني بنت هناء ويزيد ببروده
وصده الي ما يوم كلف نفسه وقربني من حياته الخاصة
والدليل اني من انهزمت هو ما كدر يخمن مكان وجودي بس هو لو مكلف نفسه وسائلني عن حياتي قبل لا نتزوج او عن اهلي اشياء تخصني جان كدر يخمن اني وين هو ما يعرف عن هيام اي شي غير بس حضنها
التفتت عليه
اسألك تعرف اني شنو احب اكل اشرب شنو احب البس تعرف اني بيا كلية داومت تعرف شنو اختصاصي
تعرف كم عم عندي تعرف كم عمة عندي
تعرف همة وين عايشين
ظل صافن بوجهي
.. اني صحيح غلطانة بس مو لوحدي غلطت الكل ساعدني عالغلط وانت اولهم
ضرغام.. خلصتي كلامج لو بعد عندج اتهام تضيفينه عالقائمة
هيام.. حتى لو عندي ما اتوقع راح يغير شي من الصار
ضرغام.. انا عمري ما بررت تصرفاتي لاحد
تكدرين تكولين هذا طبعي هشكل
بس راح اوضحلج كم شغلة جنت مستهان بيها لان
ما جنت متوقع عقلج صغير يكعد يفسر الامور ويعقدها

شوفي هيام جدتي ما هدتني العمارة
بس هي حولت العمارة بأسمي
لان هي بالاصل عمارتي حلالي وتعبي من كدي لان هاي العمارة جانت اول شي احطه من فلوسي الخاصة مالهة علاقة بحلال ابوي وحبيت استبرك بجدتي خاجية وسجلتها بأسمها بس من صار موضوع تقسيم الورث كالت جدة هذا تعبك وحلالك اسجلها بإسمك خاف كلشي يصير الحياة فوت وموت ليش تنضم للورث
وسالفة ورث امج ماكو شي اسمه ورث لان جدي الله يرحمه من اتوفى ماترك وراه اي شي من الحلال
وتكدرين تسألين جدتي وخالاتي اذا تحبين تتأكدين
بس الورث الي جانت جدتي تحجي عنه هي املاكها
رادت تضمن حقجن تخاف يصير عليها شي
ووكلتني بهاي المهمة هذا كل ما بالموضوع
اما عن سالفة انا اتزوجتج علمود مصلحة فهاي كلش واكفة يعني ما سألتي روحج وشفتي بعينج انا ما محتاج
وعندي خير من الله واضنج تعرفيني كلش زين مو انا
الانجبر عالزواج
ما جنت اتوقع عقلج لهاي الدرجة تعبان
كام من مكانه وهو نار كبره
ورنا جانت كدامي قبل لا اعرفج ما اتزوجتها شمعنا من اتزوجتج اتزوج رنا شنو قابل حلت بعيني
بس انتي انسانة مريضة والظاهر عندج عقدة
بعدم الثقة يالله ولو الكلام بعد ما ينفع
انتي انهزمتي وتركتيني وضميتي خبر حملج عني وانا اتزوجت رنا وصار الي جنتي خايفة منه بعد الكلام ما يفيد ماكول خيره
احمد.. تعال انت اشو كل حجاية والثانية تكول ضمت خبر حملها عنك ليش انا مو رسلت واحد
يبلغكم بحملها ومكان وجودها وحتى طلب من عندكم رقم الحجي
هيام.. لحظة عمو الولد الي رسلته لبيت خالو
الظاهر ما وصل كلامك بالحرف الواحد وسوء التفاهم الي كاعد يصير لازم تروح تسأل عنه نبراس
وتتحقق من السالفة بيت خالو مالهم اي علم بخبر حملي
راضي.. احنا ماجنا موجودين بالبيت بيوم اجة الولد
بس طلعتله بنتي ومخبرها ووصل رسالة تهديد
من ابنك يكول اطلكها من رجلها واريد زلمة
يفتح حلكه
انتبهت على عمو احمد شلون انكلب لون وجهه اصفر
وعرفت ان هو فهم الموضوع وعرف ابنه ليش سوة هشكل كسر خاطري هذا ابنه وما يكدر ينطي بي
انتبهت عليه اختنك وفتح دكم قميصه يطلب الهوى
كمت من مكاني مفزوعة وركضت لعنده
وصرت افرك بصدره وابجي
هيام .. عمو دخيلك ا
ضرغام بفزعة.. بوية سنده انا راح اشغل السيارة
خلي ناخذه للمستشفى
ركض خالو عليه وخالة حليمة انطتني كلاص ماي
حليمة.. رشي شوية ماي عليه
وشفت عمو انعوج حلكه
هيام.. لا ربي دخيلك

يتبع