رواية تائهة بين اروقة الماضي الفصل التاسع والثلاثون 39 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha d h

مساءا محملا بالورد والياسمين لكم مني يا احبتي
هاقد شارفة ابطال قصتي على الرحيل
ولم يتبقى الا القليل لنودع حياة ابطالنا
هيام وضرغام
🌺🌺🌺🌺🌺🌺🌺🌺🌺🌺

تائهة هائمة على وجهي بين اروقة حياتي
احمد
بصوت تعبان بسبب حالته الصحية
.. حجي بعد ما اوصيك على بنات اخوي هذني بنات الغالي امانة عندك حطهم بعيونك
وانا اعتذر عن سوء التفاهم الصار بينا وبينكم
وان شاء الله احنا اهل وما ينعاد الزعل بينا
راضي.. والنعم منك ياخوي لاتاكل هم
بنات الغالية احطهم بعيوني بس انت ديربالك على صحتك
والله البارحة وكعت كلوبنا عليك والله ستر لحكنا عليك واخذناك للمستشفى ارتفاع حاد بالضغط حتى الدكتور اتعجب عليك يكول زين ماصار بي جلطة
احمد.. والله ياحجي كبرنا وصارت الامراض تتراكض علينا
هيام
اليوم عمو احمد راح يسافر لبغداد وما راح يكدر يحضر عرس ريام ويسلمها لزوجها بيده لان صحته ما تسمحله بس اليوم حضر وياهم عقد المحكمة
وهسة هو راح يسافر لبغداد
وضرغام اصر يوصله بنفسه لبغداد بس عمو رفض
وصمم يسافر لوحده كللهم ماعلية شي هو مجرد ارتفاع
بالضغط واني ظال بالي عليه خطية صحته على كده ما يتحمل صدمة وهذا نبراس ما راحمه من مصيبة لمصيبة انتبهت لخالو راضي بعد ما فتح الموضوع
مرة ثانية باوعت لعمو احمد
دار وجهه علينا اني وريام
واجة لعندنا وسلم علينا وحضنا واني وريام حضناه وظلينا نبجي
احمد.. ما اصيكم صيرو سباعيات وحافظو على ازواجكم وطولو بالكم وصبرو عليهم الله يوفقكم
هيام .. ان شاء الله عمو
احمد.. ديري بالج على رجلج انتي بالذات ترة ضرغام
ولد ذهب لاتفرطين بي اني رجال واعرف الرجال شلون يفكر ترة احنا مو على كلشي ندقق بحياتكم انتو النسوان
ولا عدنا العقل الي يخمن بشنو تفكرون عندج شي ضايجة من عنده روحي كبل احجي وياه لا تكعدين تجمعين مواقف وتضمين بكلبج وتكعدين تفسرين وتحللين بكيفج وتالي كلها توگع براسج
وتكعدين تندبين حظج وخليها حلقة باذنج لاتدخلين طرف ثالث بينج وبين رجلج وواجهيه واحجي وياه
عوديه على طبعج واتعلمي على طبعه خلي واحدكم يكمل الثاني ترة بعدكم ببداية حياتكم
ولاتكابرين لان ماكو بين المرة وزوجها مكابرة وكبرياء بالعكس الله خلق المرة والرجال وزرع بينهم مودة ورحمة يعني واحد يلكة راحته بحضن الثاني
همست .. ان شاء الله عمو لا يظل بالك علينا
احمد.. يالله في امان الله
.. مع السلامة
راح عمو احمد
دخل خالو والولد للبيت واني دخلت وراهم للمطبخ
لكيت المطبخ هوسة ويحتاج تعديل
مو من طبعنا نتأخر بتنظيف المطبخ لحد الان الريوك ما مشيول من عالميز بس اليوم المطبخ عالست رنا
وحضرتها ضاربة التغليسة
كعدت انظف واعزل الصحون واخليهم بالسنك دخلت ريام.. هاي شنو ليش انتي تسوين شغل الخاتون
هيام.. تلكيها زعلانة ومتقبل تنزل خو ما نعوف المطبخ هيج هوسة واحنة كومة نسوان بالبيت
ريام.. هَـا يعني اشتغلت رحمة الله هيام يعني راح ترجعين تسدين عن غيرج
هيام.. لا ريمة اني مو هشكل بس هذا البيت اعتبره بيتنا
وما احب اشوفه ما مرتب
ما علية برنا او غيرها بشنو يفكرون بية خدامة
لوكية اني اهم شي اقوم بواجبي وواجبي احافظ على هذا البيت منا ورايح لان هذا البيت نفسه الي راح يربى
ويكبر بي علي ابني
سمعنا صوت خالة حليمة دخلت للمطبخ وغيرنا موضوع الحديث
ريام.. اني راح احضر نفسي خالة هيفاء على جية تجي علمود تاخذني وياها لبيتها لان البارحة خطية اجتي
وما كدرت تاخذني شافتنا مخبوصين بعمو احمد
.. يالله مو تنسين تكولين لخالة هيفاء تأكد على الحجز مالت الحلاقة حتى نروح نسوي تعديلات للشعر والوجه
ريام .. اوك
راحت ريام وانتبهت لخالة حليمة جانت تفتر بالمطبخ وتطلع اللحم من الثلاجة وتحضر للغدة
رفعت راسها وباوعتلي التفتت عالباب ورجعت
تباوعلي
حليمة.. هيام اريد اسألج سؤال واريدج تجاوبيني بصراحة
.. شنو خالة
.. انتي ليش ما جبتي سيرتي بموضوع البارحة
رنا ماجانت تشتغل لوحدها ولا هي الوحيدة الي سممت افكارج ولا جبتي سيرتي من جنت اعيركم بأمكم
ولا ذكرتي اسمي بيوم كلتي لضرغام اني سمعتك بأذني
كلت يمة خطبيلي رنا
ليش هو بيومها مكال هيج كلي الي بس احجيلي وية رنا وانا شفتج واكفة وراه وانا الي كلتلج يريد يتزوج
هيام.. ما راح يتغير شي حتى لو جبت سيرتج بالموضوع وادري كلش زين اذا ذكرت اسمج بالسالفة
خالو راضي وبيبي خاجية ما راح يسكتون عليج
واني اعرف كلش زين شنو راح تكون ردت فعلهم وياج مو بعيد خالو يطلكج
حليمة.. اي بس انا سودت عيشتج
هيام.. هاي انتي والله تتجازين بس صدكي ذكر اسمج بالموضوع ما راح يقدم او يأخر شي
الي صار صار واثره يبقى بالگلب بس لا تنسين انتي تبقين جدة علاوي ابني وابني اتعلق بيج
مو من الانصاف بعدما صرتي جدة تطلعين من البيت زعلانة بسببي
اباوع عليها جان وجهها باين عليه الندم الغير المعلن
حليمة.. موقفج هذا عرفني اوادمي
شكد جنت خايفة منج ومن اختج لا تأثرون على اولادي وانتي بالذات اعتبرتج غريبة
وشفت ابني اتعلق بيج
جنت كأي ام تريد مصلحة ابنها
وكلت اخطبله بنت اخوي متربية كدام عيني واعرفها كلش زين
كلت هي بنت اخوي راح تسعد ابني وتسعدني
وتعيني اريدها تصير جنتي كلت الشين التعرفه احسن من الزين الما تعرفه
جانت هاي نظرتي بنت اخوي هي راح تداري كبرتي وتصوني وتحن علية
وجنت خايفة منج لان ما اعرف شنو تربيتكم ولا شنو طبعكم كلت هاي راح تشلع گلبي وگلب ابني ما تفيده بس تتدلع ام دميعة ومايعة انا هاي نظرتي عليج
وحقي محد يلومني
بس تالي الزمن علمني وراواني وثبتلي العكس
شفت الغريبة صانتني وبنت اخوي خلت بية وطعنتني
بسوالفها وعمايلها
ما اكلج ابريني الذمة وسامحيني لان مو من حقي بس اكلج انطي فرصة للزمن هو كفيل بنسيان الجرح
جانت تحجي وتكابر ادري بيها صعبة عليها تعتذر مني لان هي مرة جبيرة بالعمر بس على الاقل اعترفت بندمها وغلطها هي حقها حالها حال اي ام تريد لابنها
قريبتها تشوف بيها مواصفات محد يكدر يشوفها غيرها
على كلً الله يهدي الكلوب
سمعت صوت خالو راضي حجة وية ميس
.. روحي صيحي مرت اخوج رنا خلي تجيني بالاستقبال
ميس.. صار بابا
كعدت اكمل شغلي سمعت صوت ضرغام اجة من وراي
.. شنو ما كملتي شغلج
التفتت عليه ونشفت ايدية بالمنشفة باوعت عليه لابس
ملابس مال طلعة وشايل بأيده علاوي
.. تعالي شوفي هذا الدايح شسوة بملابسي
باوعت شفت اصابع صغيرة على قميصه وعلاوي وجهه كله كاكاو
رحت لعنده.. يبوو اني كم مرة اكلك لتشيله وهو ياكل
ضرغام.. مو انتي تاركته بيد هاي الغبية ميس
.. ليش شبيها
.. حاطة الولد بالحجلة وحاطة كدامه نوتيلا
وهو طايح بيها خمط ياكل بيده والست كاعدة تصور بي
مسوية الولد سماطة بعد لا تخليها تتدنة للولد
ابتسمتله
.. اي غير عمته وتسويله فيكات
.. بس اريد اعرف وين الفيكة بهذا كله
مديت ايدي واخذت علاوي منه
ضرغام بتلقائية.. حضريلي قميص نظيف اريد ابدل
باوعت عليه .. ملابسك مو يمي كلهم بغرفة رنا
اخذت علي ولزمني من زندي
وحجة .. واريد هذا الوضع يتصلح منا ورايح ملابسي
انتي المسؤلة عنهم
.. اكدر اعرف ليش
.. يعجبني اشوفج تهتمين بشغلاتي
فاجئني كلامه هذا مو طبع ضرغام يحجي بشي
يعجبه ابتسمت
وكمل كلامه.. ومنا ورايح يوم عليج علاوي ويوم علية
.. صار بس اتحداك اذا تكدر عليه
.. هاي عوفيها علية
دار وجهه وطلع من المطبخ
اخذت علاوي وكعدته عالسنك وصرت اغسل ايدة ووجهه وهو يمد ايده على الماي يريد يلزمه
واضحك على منظره
سمعت صوت رنا الحاد جانت وراي واكفة
رنا.. شوفي ولج مو عبالج البارحة وازتهم علية وحاشية عقلهم وودافعتهم علية
لا عيوني بعدج ما تعرفين رنا زين
حتى لو خالج راضي يطيح حظي ويكعد يتحلف بيا
ما راح يهمني كلامه الي براسي اسويه
مثلما كدرت اخذ منج ضرغام اكدر اخليه يطردج من البيت فلا تخلين راسج براسي
هيام.. خلصتي كلامج
رنا.. لا ما خلصت كلامي شوفي ولج جوزي مني
ترة ما اتردد لحظة وحدة بتشويه وجهج الحلو
وقد اعذر من انذر
هيام.. انتي مو عاقلة انتي وحدة مريضة ولا تتوقعين
بهذا كلامج راح تخوفيني او عبالج اهتم لا حبيبتي
انتي ما تهميني واعلى ما بخيلج اركبيه
تركتها واخذت ابني ورحت
(((((((((((((((())))))
ضرار بست راس عمتي وعيوني تدور
مرت يومين وانا ما شايفها لريمتي احس بروحي تايه او مضيع حاجة غالية علية

.. هلا عمة شلونج
هيفاء.. هلا وميت هلا بيك يابعد عمتك شذكرك بية
لو لان ريمتك هنا صرت تمر علينا وتسأل
ضرار ابتسمت على كلامها معقولة لهلدرجة مبين علية
.. لا والله عمة انا دائما اكول اجيكم وامر اسأل عليكم بس الظرف تمنعني بس هسة كلت ما دامني فارغ خلي امر اسلم عليج واخذ ايمن وياي هو وينه
هو وينه
هيفاء.. ايمن نايم كاضيهة سهر وية البنات فرحانين
بريام ويضلون للصبح يلعبون دومنة وسوالف وينكتون تعرف البنات عطلة وهو معطل وكلهم شباب وعندك الحساب
هي كالت هيج وانا دين ما ظل براسي هو انا ادري
باولادنا وبناتنا اذا التمو يكلبونها كلة لعب ونكات وسهر
وتصنيف متعود على بنات عمي وعماتي
بس الي ما متعود عليه ريام بنصهم وتحجي وتضحك وية ايمن كلبي كام يكمز جاي اتخيل لمعة عيونها من تضحك انا بكبري ادوخ بيهن زين هذا المطي ايمن شلون بي معقولة هو مو ملاك
انتهت على عمتي تحجي
هيفاء .. واليوم راح اخذها هي وهيام للحلاقة
.. اكول عمة صيحيلي ايمن حتى لو تكعدينه كوة
هيفاء.. ليش
.. تعرفين ماظل بس كم يوم عالعرس واحتاجه
اكلفه بشغلات يكملهن عني توزيع بطايق العرس وتزين السيارة وغيرها من هاي السوالف
واحتمال اخذه وياي يبات ببيتنا
هيفاء .. هسة عمة راح اصعد اكعده
راحت عمتي وانا بقيت كاعد لوحدي بالصالة
يعني الساعة ١٢ الظهر ولحد هسة الست نايمة
بس وين تروح مني انا اعلمها اتصل عليها ماترد
تتصل عليها هيام ترد اخخخخخ لو يمي جان بالحزام
نزلت عمتي ونزلت وياها ريام والبنات
مبين عليهم ستوهم كاعدين من النوم

رفعت حاجبي وباوعت عليها الحلك مورم والعيون
مورمة من اثر النوم كلبي كلم يكزكز عليها
اوووف شيخلص الايام وتصير حلالي والله تعبت من الانتظار
بس لحظة هي هم تحس مثلي بلهفة لو بس انا مسموط ابو ابوي من وراها
سلمت عالبنات وخليتها هي بالاخير واتعمدت اغلس عليها
.. عهود شلونها وياج كلية الطب
عهود.. اسكت ما اصدك بروحي معطلة رحمة على والديك لا تذكرني بيها
ضرار.. والله عمي حقج مو سهلة اشوفج ذبلانة
وضعفانة مبين عليج دكتورة
هيفاء.. كوة تاكل اللكمة اركض وراها حتى تتريك
قبل لاتطلع للدوام
جنت احجي وارقب ريام الي كامت تفرك بأيدها وتعض بشفتها بغيض
خرب عشيرتج .. لاتعضين شفتج
عمتي هيفاء وعهود اثنينهم بنفس السؤال
.. شنو لا تعضين شفتج
فتحت عيوني على وسعهن مصدوم ما انتبهت على زلة الساني معقولة ماانتبهت لروحي من حجيت حسيت بروحي عركت
.. شنو عمة ايمن وين صار
.. فوك كال اغسل وابدل وانزل
عهود.. ماما كليله خلي ياخذني لصديقتي تكول جايتهم
وجبة فساتين واريد اشوفهم حتى اذا عجبتني اشتريلي
على عرس ضرار وريام
هيفاء.. شنو هذا اللعب كل ساعة وحدة بيكم متذكرة
شغلة ترة ما صايرة هاي اثنين يتزوجون وعشرة مجانين
ضرار ببتسامة.. خليها عمة انا اخذها اوصلها لبيت صاحبتها
عهود.. اي هذا الكلام الحلو الله يخليك النة يا ناصر المظلومين يا (ربن هود )الفقراء والمساكين
ريام.. لا ما راح تكدر تاخذ عهود لصاحبتها
ضرار واخيراً نطق ابو الهول ولو هي الغيرة تنطق الحجر.. ليش
.. لان انت راح تاخذني اني وهيام وخالة للصالون
هيفاء.. لا انا عندي سيارتي اخذكم بيها ما يحتاج
باوعت عليها حصرتها البجية
وعيونها بيهن حجي بس ما تكدر تحجي
كامت عمتي هي وعهود وراحو للمطخ
باوعت للباب وانا كمت
سويت نفسي اريد اروح وراهم كامت وياي وحجت
ريام .. ضرار لحظة لا تروح اريد احجي وياك
ضرار ببرود.. احجي شكو
ريام.. ليش هشكل تحجي وياي ببرود وية عهود
منطلق وياها بالحجي وماخذ راحتك بعد
ضرار.. راجعي روحج مدام
وشوفي كم مرة متصل عليج وما تردين شنو ليش ماكو احترام لاتصالاتي
ريام.. ترة اني بعدني زعلانة
رفعت حاجبي .. على شنو زعلانة
.. ما ناسية ضربت الراشدي تدري خدي يومين احمر من وراك
اقتربت منها .. والمطلوب هسة شنو تردين
اقتربت مني بدون ما تحس على نفسها
.. ضرار لا توصل عهود
حسيت كلبي كام يدك وانا اشوف بعيونها الغيرة
اتمنيت اخذها لحضني واطفي نار كلبي بشفايفها وبعدها
كلشي ما اريد غير بس هي بحضني
.. ما اوصلها بس بشرط
ريام.. شنو الشرط
.. تجين توكفين كدامي وتنطيني بوسة
فتحت عيونهاعلى وسعهن وشهكت
.. لالا مستحيل ما اكدر صعبة والله صعبة
جانت تحجي وخدودها صارو حمر
اتحركت من مكاني وانطيتها ظهري وانا خربان ضحك عليها
.. لعد هاي هي خلاص اروح اوصل عهود واحتمال حتى اعزمهة هي وصديقتها عالغدة برة
كملت جملتي وما حسيت الا انجريت من قميصي
وانداريت اباوع عليها باوعت علية ورفعت نفسها على اطراف اصابيعها وطبعت بوسة على خدي عالسريع واجت تبتعد عني
لزمتها حيل ولميتها لحضني
وهمست قرب شفايفها .. شنو هي هاي هم تسميها بوسة
ترة انا مو جدة خاجية وتبوسيني من خدي
تعالي خليني اعلمج شلون تبوسين ضرار
خمطت شفايفها بين شفايفي وصرت اتفنن بيهن عبالك حلقوم بنت اللذين نسيت نفسي ومكان تواجدنا حتى حرصي عليها راح اتبخر
سمعنا صوت ايمن يصيح من فوك على عمتي
وكمزنا اثنينا من مكانا
رفعت ايدي ورجعت شعري للخلف وانا كوة اتنفس
من ورة اللهفة الله سترنا
ريام بخجل .. اني رايحة بس اياني وياك اسمع بيك موصل عهود والا اكلك اصلا بعد لا تجيً هنا لبيت خالة هيفاء عندها كومة بنات
ضحكت على غيرتها وحسيت بروحي ملك
ما تدري بنفسها هي مالكة الگلب والروح
والگلب ما هوى غيرها ولا راح يهوى
ضرار.. صار امرج ريمتي بعد تامرين على شي
ابتسمت .. ما يامر عليك عدو
....(((()))))))))
هيام بالصالون
بعد اربع ساعات بالصالون خلصناها كلهة تعديلات
عالوجه عالشعرً
غيرت لون شعري وصبغته شقارات وخصلت فوكاه
خصل رفيعة موشحة مثل اشعة الشمس
لون زيتي مطفي
جان اللون كلش راهم علية حتى برز لون عيوني
هيفاء..ً ما شاء الله لج خالة هيومة اقري على نفسج المعوذات وحصني روحج
ابتسمت.. يعني راهم علية
.. شنو راهم عليج غير طالعة تجننين
اليوم ضرغام ما ينام ليله
ابتسمت على كلامها وفاجئتني من حجت
هيفاء.. اي ابتسميً وضحكي وابدي حياة جديدة
وحاولي ترجعين زوجج لحضنج
هيام.. صعبة خالة ما اكدر هو ضرغام دائماً يحاول يتقربلي بس اني الي اصده
هيفاء .. ليش ولج
.. ما اكدر اسلمه نفسي ورنا بحياتنا وتشاركني بي
مو بيدي اموت
.. لج لاتظلين عوبة وهذا الكلام ما يفيدج. يعني هم راح تكررين غلطج بنفس الغلط
هم راح ترجعين تقدمين ضرغام بطبق من ذهب وتفرغين الساحة لست رنا.
لج عوبة انتي حاولي تكسبينه وخليه ماله غنى عنج
وهو تلقائيا راح يترك رنا والخلف رنا
لا تنسين انتي ام ابنه الوحيد وهو يحبج الج
هيام.. يحبني ؟؟!!
.. اي يحظي كلنا نعرف بضرغام يموت عليج
حقج انتي ما شفتيه شلون انكلبت حياته من سافرتي وتركتيه لوحده جان مثل المخبل يدور عليج بالموصل عباله اتتي هناك ومارجع لوما خوي راضي كاله اذا مترجع انا جايلك للموصل وهو خاف على ابوه ورجع
كلام خالة هيفاء وياي فتح عيوني على هواي اشياء جنت غافلة عنها
ومن هاي اللحظة قررت افتح صفحة جديدة بحياتي
وية ضرغام رغم صعوبة القرار بس حٍٍِْــًبٌٍـــِٓېٍٓ لضرغام
ووجود علاوي ابني ًسببً كافي لحتى يدفعني احاول
(((((((())))
ضرغام
جنت كاعد منتظر نتبجة تحليل رنا
اليوم اجتني رنا وكالت صارلهة اسبوع متأخرة عليها الدورة
نهض كلبي بفرحة بلكي الله وتطلع حامل
لان سالفة العقم كاعدة تاكل بكلبي هواي صعبة علية مو هينة ما يصير عندي خلفة احس بروحي ضعيف
اخذتها للمختبر حتى تحلل
وكعدت انتظر على نار
وجان يطلع التحليل سلبي ماكو حمل
حسيت بيومي كله انكلب
رجعتها للبيت واحس بروحي اختنكت
رنا.. ليش كلبت الخلقة علية اني شلي غرض وتعصب علية ترة مو مني السبب
هو كلة منك السبب المفروض انت تكعد تواسيني مو كاعد تعيط بوجهي
صحت بيها.. رنا رحمة على والديج كافي ترة روحي واصلة لخشمي ولاتكعدين تحجين حجي زايد بعدين اندمج عليه سامعة ولج
وصلنا للبيت وكفت السيارة.. يالله اتفضلي نزلي
رنا.. شنو وانت ما راح تنزل وياي
.. لا ما راح انزل
.. يعني راح تتركني لوحدي اواجه اسئلة جدتك وامك ويكعدن ياكلن كلبي عبالك اني ام الصوچ مو ابنهم
.. اكلج تنزلين لا انزل اطلع غضب الدنيا كلها بيج
هسة من صعدتي بالسيارة لحد هسة اريدج تحجين كلمة براسها خير ماكو خرب بقسمتي السودة جان يوم اكشر بيوم الفكرت اورط روحي بهيج قسمة
رنا بغضب.. شنو قصدك
.. قصدي يا رنا يا زوجتي المصون انتبهي لتصرفاتج
ترة المرة مو بس شكل حتى تسعد زوجها
لا ترة المرة تحتاج اكثر من الجمال لحتى تسعده تحتاج الاسلوب المرن واللسان الحلو هذني كلهن يملكن گلب الرجال انصحج غيري اسلوبج
رنا.. وانت عاد شلونه اسلوبك وياي
كلة نتر وزمخ وبالسنة حسنة تسمعني كلمة تطيب الخاطر
جر نفس عميق.. يابنت الناس انا هذا طبعي
جا ما اكول غير الله يساعدج يا هيام جنت شالع كلبها
وما يوم حاولت اونسها لو اغير عليها جو ورغم هذا كله جانت تتلكاني بالاحضان وما يوم سمعتني كلمة امك. او جدتك عكسج انتي المفروض بنت اخوها
وانتي الاقرب عليها ولازم تتحملينها بس شحجي وباج الحجي كلة ضايع
يالله بالله شو نزلي خلي اروح عندي شغل
نزلت وسدت باب السيارة حيل رگعتها بوجهي وراحت دخلت جوة انا منا الدتيا طافرة من عيني
وهاي رگعت باب السيارة حيل بكل قوتها
بوجهي عاد انا وصل حدي كمت نزلت وراها وانا العن اليوم
العرفتها بي يعني مرة بكد الفصمة هيج عندها قدرة تسود حياتي ما شايف والله بس صدك لو كالو
جرب غيري وتعرف خيري وانا جربت غير هيام وعرفت وشفت هواي فرق بينها وبين رنا سواء
بالاسلوب او بالتصرفات هاي من غير لهفتي لحضنها
اااخ يالله الهمني الصبر
دخلت للمطبخ وانا اصيح بصوت عالي
.. ولج رنا اليوم وين ترحين مني ولج شلون تركعين باب سيارتي بوجهي انا الج
سمعت ركضة امي
دخلت جوة للصالة وفتحتت حلكي اريد اكمل رزالة
بس فجاءة انبلع الساني
من شفت وحدة شكرة كاعدة يم جدتي خاجية بكل عقلي
عدنا خطار زادت صدمتي من رفعت راسها
هزيت راسي بصدمة وهمست .. هيام!!!!
ابتسمت بوجهي وعيونها لمعت
.. هاي شمسوية بروحج
اقتربت منها بدون ما احس على روحي ومديت ايدي
وسحبت خصلة من شعرها
.. هذا شعرج لو باروكة
همست وهي تضحك على شكلي
.. لا شعري بس غيرت لونه حبيت اغير ستايلي شوية
بس خلي اضحكك لو تشوف علاوي ابنك اول ما شافني
من شلته شلون يباوع علية بأستغراب ما مصدك اني امه
ااااخ الله يا ربي شلون فرق بين الاثنين
يعني صدك لو كالو جنة ونار وهيام هي جنتي
يعني كدرت ببتسامة وكم كلمة منها تمتص كل غضبي
وتنسيني سبب قهري
.. حقه هو اذا ابو علاوي بكبره انسطر ظلت على علاوي ما يدوخ ما اكول غير هنيال علاوي على هيج ام
ضحكت على كلامي
.. تدرين انا لو من علاوي وعندي هيج ام ابد ما اعوف حضنها اظل ليل نهار مجلب بيها
خاجية .. خايب شني ضرغام شكاعد اتهامسون
شمالك لازم شعر مريتك
جنك قرد من يكعد يفلي بشعر مريته ويطلع گمل
ضرغام.. هههههههههههه بس لو اعرف منين تجيبين هاي التشبيهات القاتلة جان ارتاحيت
انتبهت عليها استحت وسحبت شعرها من بين ايدية
خاجية.. ما ادري شجاكم ولد راضي هذاك سكن بيت عمته وانت من تالي وكت صرت تسهة وتهيم وتنسى روحك شمالكم يم نسوانكم هيج دايخين مو هيج

دايخين
دخل ضرار ووياه ايمن
انتبهت عليها لبست شالها
وخصلة طالعة منها
.. لبسي شالج عدل وتاليها وياج هاي عطوبج ربتلي علة
انتبهت عليها عدلته بدون كلام
ضرار.. كواج الله حجية شبيج وية ولد راضي شمسويلج اشو حاكمتهم حكم فرعون وياويل الواحد يفتح حلكه وياج اذا ما كمتي عليه بالعصا
الحجية.. هسة انت منين هاي جيتك
.. من بيت عمتي هيفاء
.. شفت وتكولون ليش احجي عليكم اذا واحدكم عقله مربوط وية مرته شمالكم ياجدة ركدولكم شوي
ثكلو
ضرار.. لا جدة رحت اجيب هذا المطي من بيت اهله
محتاجه اكربه بعرسي
ايمن .. اي والله لا عاب حلكك صدك مطي واستاهل بعد لان من ظهر الله لحد هاي الساعة انت كايدني وراك مثل المطي يا اخي اعتقني لوجه الله كافي طاح حظي حتى ابوي الي هو ابوي ما مسخرني بكدك
طيحت حظي اليوم ودي هذا وجيب ذاك كايليلك كاطع ليلة عرسك وانا ما ادري
ضرار.. اتحمل حبيبي ايمن ترة هذا كله مردودلك
من تتزوج اردهم الك واخدمك بعرسك
ايمن .. تريد مني اصدك الضابط ضرار بذات نفسه
يشتغل بعرسي الا الدنيا تريد تنكلب
ضرار.. تعرف ليش احبك لان انت الوحيد تعرفني
يالله اتحرك اخذ السيارة ووديها للغسل ما اوصيك اريدك تطلعها عروس
بس هَـا مو تنسى ترجع تبات عدنا حتى اعوضك على
تعب اليوم
ايمن.. مشكور ما تقصر ان شاء الله ارجع ولو مو من طبع الكرم بس هم مقبولة منك
اخذ السويج وطلع
حليمة .. يمة ضرغام تعال شوية محتاجتك بشغلة ضرورية
كمت لعندها ورحت وراها لغرفتها دخلنا وسدت الباب
والتفتت باوعت علية
حليمة.. يمة ضرغام عندي حجي مخزون بكلبي
وتعرفني زين انا مو من طبعي اتحمل اضم شي بكلبي عنك حتى لو اعرف راح اتأذة من وراه
بس مو بيدي هذا عيبي كون احجيلك
ضرغام.. كولي يمة اسمعج
حليمة.. تذكر يمة قبل لايجن بنات هناء لهذا البيت شنو جانت امنيتي ازوجك بنت اخوي رنا
جنت اكول هي تناسبك واحنا نعرفها ورابية وياك وتعرف طبعها وتعرف طبعنا بس ما صار الي ردته ودخلن بنات هناء وشفتك شلون اتغيرت وعرفت بوكتها انت هويت بنت هناء
جنت خايفة منها وما حبيتها اطباعهن مو مثلنا
حسيت شايفات نفسهن علينا وحامضات
هيج من الله ما حبيتهن تكدر تكول ماضي امهم وية اخوي جان الحاجز والسبب الي خلاني ما اطيقهن
بس كلمة حق تنكال البنات ما بيني وبينهن شي ولا يوم شفت عليهن شي ولاهنة قللن احترامهن وياي
رغم شكد ادوس بمصارينهن واكعد اعيرهن
بامهن
ضرغام.. وليش جاية تكللي هذا الحجي اشوف الانسب ترحين الهن وتحجين وياهن هذا الحجي هن صاحبات الحق
حليمة.. اصبر علية يايمة جايتك بالحجي
ولا تصعب علية الامر
مو هنا مربط الكلام انت من تزوجت هيام
انا حسيت انسحب البساط من جوة رجلي ومالي اي حجاية ولا اي رأي بالسالفة اجيت من بيت اخوي وشفتك عاقد عليها شنو تترجة مني وانا ام اشوف ابني البچر يروح لوحدة ما اعرفها شني ما شني ومحد عبرني وسمع مني
ومن يوم عقدكم صار شغلي الشاغل اسود عيشتها حتى يطلع معدنها المصدي واثبتلك ان كلام امك صحيح
واانا الادرى بمصلحتك
فما خليت شي ما سويته اتفقت وية رنا عليها ووهمتها انت تحب بنت خالك وهي تحبك ووهمتها ان انت طلبت مني اخطبلك رنا حتى تتزوجها
وخليتها تعتقد انت اتزوجتها لخاطر جدتك حتى ما تزعل عليك
وبعدين حاربتها بسالفة الخلفة وحتى مامر على زواجكم نص سنة وصرت اعيرها بمرضها
صحيح الله اخذ حقها مني وشربت من نفس كاس
القهر الي شربته لهيام والله كسرني بيك وصفيت
من جنت اعير هيام بعقمها ومرض التكيس العندها الى
ابني يصير بي حادث ويصبح عقيم
ما تدري يا يمة شلون وضعك ياكل ويشرب وياي
ولا يعدي علية الليل اذا ما اموت الف موته
ترة گلب ام موبيدي صحيح كل الي صار غلط
بس هاي هي الدنيا هيج تمشي تشوف الصح غلط والغلط صح الا من نتضرب على وجهك يالله
توعى على حالك وتعرف ان كل الي بنيته جان غلط
والي جنت اتعشم بي البارحة اصبح يطعني بظهري اليوم ...رنا بنت اخوي سوتلي درس عمري ما راح انساه
ضرغام
امي تحجي وانا اباوع عليها مصدوم معقولة اكو هيج ام تسلب سعادة ابنها وتهجم بيته بجهل
ما اعرف بلحضتها شنو اتصرف وياها بس حسيت النار صارت تكوي بصدري
.. وليش هسة يالله جاية تحجيلي هذا كله
.. حجيت من بعد ما شفت معدن هيام بيوم انفتح الموضوع وصار الحجي شفتها ما جابت سيرتي بالموضوع وحتى من ضغط عليها راضي وسألها
بس ما حبت تهجم بيتي وانت تعرف بأبوك اذا عرف
مو بعيد حتى يطلكني
فشفت مثلما سترت علية وحافظت على بيتي انا هم كلت راح افهمك السالفة واحجيلك الصار بلكي الله وترجع المياه لمجاريها وتتصلح الامور بينك وبين هيام

باوعت لأمي تحجي وياي وهي واثقة من نفسها ما مسوية شي غلط
.. بمة انتي منتبهة لروحج شكاعد تحجين يمة انتي هجمتي بيت ابنج وحركتي كلبي وطفشتي بنية يتيمة من بيت رجلها كلة هذا علمود تمشين حجايتج عالكل وتثبتين انتي الصح لا يمة انا مو هيام واسكتلج عالموضوع ما راح اكلج اروح لأبوي اشتكيه تصرفاتج
تدرين سوايتج وياي خسرتني هواي الثمن جان عمري وابني ومرتي
لا تتوقعين اعديلج الموضوع وكأن شيئاً لم يكن
حليمة.. كلشي تسوي بية قابلة بي بس لا تجيب سيرة لابوك
ولا تقسة علي ترة انا ابقى امك والي منزلة بكلبك
ما كدرت احجي وياها اي شي اخاف
احجي بساعة غضب واصير عاق واتعدة حدود الله بيها
غمضت عيوني وسحبت نفس بقهر
وطلعت من الغرفة بدون ما احجي شي
حسيت الدنيا شكد ظالمة ام تهجم بيت ابنها

طلعت واصطدمت بكتف ضرار
ضرار.. على كيفك باشا
ما درتله بال وطلعت وتركته وجهه فهة من وراي خطيه كسرت فرحته بس مو بيدي
جنت احس النار موجرة بصدري اتمنيت الي مسوي هاي السواية واحد غريب جان اتفننت بتدميره
جان كدرت اخذ حيفي منه بس هاي امي
وغصب عني لازم ما اتعدة عليها
هذا الامر مو بيدي هذا امر الله
مفروض علية طاعته وما اصير عاق
اااخ صدك موقف صعب يصبح كتالك منك وبيك
لا تكدر تاخذ بثارك منه ولا تكدر تكعد وتعاشره
صرت مثل بالع الموس ان بلعته يجرحني وان طلعته
يجرحني
(((((((((((((())))))))))))
هيام
تركت علاوي عند ابوه وانشغلت بريام وبنات خالة هيفاء لان بيبي خاجية دزت عليهم حتى تحجي وياها لان خوالي اتفقو مادام ريام هناك خلي تصير طلعتها من بيت خالة هيفاء
والتهينة نسوي عشا وضرار اجة وشاف شكل ريام الجديد من بعد الحف والتعديل
وهو كابل والبيت وكعد
وبيبي كالعادة ما يفوتها شي الا تعلق عليه
ورنا راحت لبيت اهلها حتى مناك تروح وية خواتها للصالون
مر الوقت بحيث نسيت علاوي لان ماله صوت
بعدما اتعشو واتفقو على العرس اجة زوج خالتي واخذهم وظل ايمن هنا
لان باجر العرس
صعدت فوك كلش تعبانة ونعسانة واني احجي هسة وين ضرغام وعلاوي
جنت متردده ادخل غرفة رنا حتى اخذ علاوي
بس غيرت رأي قررت ادخل اسبح واكمل وبعدين اروح اخذه ما دام هسة هو ساكت
دخلت لغرفتي وكفت بمكاني متفاجئة
ضرغام وابنه محتلين السرير وغاطين بسابع نومة
يا الله شلون جان شكلهم متشابه الثنين نايمين على بطنهم
تركتهم ودخلت اسبح خلصت حمامي
ولبست ثوب قصير بسيط ربع ردن
متعودة البسه وانام بي
نشفت شعري بالمنشفة سمعت. حركة بالغرفة الثانية طلعت من الحمام شفت ضرغام جاي يحط علاوي بسريره
.. اي عفية جاي اكعدك حتى تنقله بسريره
تركته ورجعت بالحمام فتحت الشسوار انشف شعري
خلصت تنشيف شعري
وطلعت لكيت الاضوية مطفية
سحبت نفس عميق بخيبة امل يعني ضرغام طلع
جنت اتمنى يحاول يقترب مني ويتوددلي مثل كل مرة
يستغل الوضع ويكعد يهمسلي بصوته الخشن
يالله شكد مشتاقة ياخذني وياه لذاك عالمنا
يكون وسادتي صدره وصوت انفاسه غطاي
رحت اتسحب اريد اوصل لسريري اريد انام
اتلمست السرير ورفعت الغطا ونمت وصرت اتكلب
بس فجاءة كمت مفزوعة على حيلي وشغلت ضوة النوم الي بجانب السرير
شفته نايم
همست ما مصدكة عيوني .. ضرغام
ماكو رد رجعت اكعده .. ضرغام
هم ماكو رد مديت ايدي ولزمت كتفه العاري
حيست اقشعر جسمي ورجفت ايدي
هزيته شوية.. ضرغام اكعد ترة انت نايم بسريري
فتح تك عين وحجة بنعاس.. اي اعرف هذا سريرج
مد ايده وسحبني عليه واخذني لحضنه
صار وجهي مقابيل صدره سكنت انفاسي صدره وصرت اشم ريحة صدره مثل المحرومة من شم الهوى
حسيت على انفاسه استقرت مبين عليه رجع نام
معقولة ما يدري بروحه
رمشت عيوني ونمت
........
ضرغام
كعدت من النوم واتفاجئت بروحي نايم وبحضني
هيام رجعت غمضت عيوني وفتحت ما مصدك هاي النايمة بحضني هيام ولا حاطة راسها بركبتي
يا الله شكد مشتاق لهاي حركتها
لا والله مشتاق لكلشي بيها
مديت ايد وحاوطتها من خصرها وقربتها علية حيل
ودنكت راسي وصرت اشم بعطرها وركبتها اتحركت بين ايدية بتململ وفتحت عيونها بنعاس
وهمست ببتسامة .. ضرغام
.. عيونه
.. اريدك
.. كلني الج وبين ايديج
ما اتحملت اصبر اكثر
صرت افترس واغزو كلشي بيها خدها شفايفها كلشي
جانت تبادلني الحضن بلهفة
وبعدها ختمت حٍٍِْــًبٌٍـــِٓېٍٓ الهة واخذتها وصارت كلها ملكي حجيت.. هيام مشتاقلج بكد رحمة الله
وتالي غفيت وهي بين احضاني
.())))(((()))(())
هيام
كعدت واني احس بروحي اميرة اي اميرة واني بحضن محبوبي اتذكر ليلنا البارحة جان واضح عليه الاشتياق
واللهفة خلاني التمس حبه من خلال همساته حركاته
ابتسمت وشفته كاعد ولازم نقاله وعاقد حواجبه وعيونه حمر
ويباوع علية بأستغراب
دار علية النقال
وحجة بصوت حذر.. هيام هاي شنو
باوعت شفت صورتي واني بلا حجاب ولابسة فستان
دلعة عريضة من الصدر
بخوف على ارتباك
باوعت مكتوب تحت الصورة شيسوي نقال مرتك وصورها عند رجلي

حطيت ايدي على حلكي مصدمة مثله
همست.. يعني شنو ما افتهمت هاي منين اجتي

يتبع