رواية تائهة بين اروقة الماضي الفصل الثاني والأربعون 42 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha-d-h
مساءاً محملا بعبير الورد والياسمين الى كل احبتي
اشكر حسن متابعتكم لي وتفاعلكم مع قصتي
فلكم مني اجمل واطيب تحية اختكم نهى
🌹🌹🌹🌹🌹🌹🌹🌹🌹🌹🌹🌹🌹🌹

ضرغام
هسه راجع من الشغل وحيل تعبان
سألت امي
..يمة هيام رجعت من الدكتورة لو بعدها
حليمة.. لايمة بعدها هسة تلكاها على جية
تعرف ريام مريضة وشي اكيد راح يطلبون من عندها تسوي تحاليل
ضرغام.. اي ادري اتصلت عليها ماكو رد
رحت كعدت يم جدتي خاجية واتمددت يمها عالقنفة الي موجودة بالصالة ما اريد اصعد لغرفتنا وهيام ما بيها انتضرها هنا حتى تجي وتحضرلي حمامي اليوم يومها ولو بيدي اكضي الايام كلها عندها مرات احس بالذنب بأتجاه رنا لان ظلمتها وياي من اتزوجتها بس انا سبق وان كلتلها انا ما راح اكدراحبج بيوم من الايام وفهمتها شنو سبب زواجي منها واليوم الصبح اتعاركت وياهة قبل لا اطلع للشغل بزعتني بحجيها من عرفت انا وين اروح كل يوم بتالي الليل من اطلع من غرفتها وكامت تتعارك وتحجي بس كلامها الاخير جان مثل السجين بالكلب
رنا.. يعني فوك ما اني صابرة على حرمانك الي من الخلفة وفوك صبري وسكوتي من رجعت هيام لحياتنا يعني حضرتك تجازيني هشكل بسوايتك الما تنحجي
ضرغام.. ليش انا شسويت
رنا.. شنو يسمونها من تروح تتسحب كل ليلة من غرفتي وتروح على غرفتها
ما ردت اجرحها
.. جنت اتطمن على ابني واتعودت كل يوم اشوفه وهو نايم
رنا.. ضرغام اني مو غبية وتحجي وياي هشكل اعرف انت ليش تروح لعندها والله اليعلم هي شنو مسويتلك من سحر لحتى تخليك هيج متعلك بيها بس صدكني راح يجي اليوم الي راح تكشفها على حقيقتها
وترجعلي وتطلب مني السماح
......
انتبهت على صوت هيام وضحكتها عدلت كعدتي من وضعية النوم لوضعية الجلوس باوعت عليها جانت تضحك والفرحة مالية
عيونها وريام تمشى وراها هم فرحانة
شفتها اتقدمت من عدنا وحجت وانفاسها تتسابق من اللهفة عبالك كانت بسباق
هيام.. ضرغاام ..اني حامل
كمت مفزوع من الصدمة واحس انخمط اللون من وجهيعقلي اتوقف عن التفكير وجاوبتها بدون شعور
.. حامل !!!!.. منين .. !!!وانا عقيم!!!
انتبهت عليها شلون اختفت الفرحة من وجهة وصارت تباوع عالكل بأستغراب
هيام.. شنو قصدك منين ما افتهمت
فركت وجهي
.. هيام انا عقيم ونسبة العقم عندي عالية
.. ليش انت مو كلت من رحت للبنان اتعالجت
.. اي صحيح خضعت عدة مرات للعلاج
بس ثبت فشل العلاج وهاي راح يصير سنة من اتزوجت رنا وماكو بالرغم هي سبق وان صار عندها حمل من زوجها الاول وطرحت اذن انا لازلت عقيم
هيام.. لا انت مو عقيم والدليل اني حامل
احتمال برنا الاشكال
انتبهت على ضرغام عيونه كامت تلمع والدمعة كامت تلالي بس رجولته تمنعه يعبر جان الامل ينضح بعيونه..سمعت صوت رنا
رنا.. شنو حبوبة شكلتي عيدي ما سمعتج زين ولج تردين تذبين بلاج علية ..لا حبيبتي اصحي على روحج مو تسوين المكسورة
وتركبيها براس هذا المكرود شوفي عيوني مو عبالج ذاك اليوم ما سمعتكم انتي واختج
ترة لحد هسة ما ناسية سالفة النقال ونبراس ابن عمج حبيب الكلب ..حبوبة مو بس انتي تعرفين تحجين حتى انا كادرة اكول هذا الحمل مو من ضرغام اشو حضرتج سافرتي هناك لبغداد لبيت عمج ورجلج مسافر ورجعتي وبعدها صارت فاتحة عمج وصحتي حامل منو يكول هذا الي ببطنج مو ابن نبراس
ما كدرت اسكت .. اكلي تبن يا وصخة يا قذرة
انتبهت لريام هدت على رنا تريد تضربها
بس خفت عليها وعلى روحي اني وياها حوامل اخاف تأذينا ..
ريام.. لج عار اكص السانج النگس ا ذا تجيبن طاري شرف اختي ..لج ماكو وحدة عار بهذا البيت الا انتي
رنا.. شبيج حبوبة هديتي علية اني محجيت الا الصدك يعني ضرغام عقيم واختج حامل ونبراس موجود بحياتها ليش انتي مو بذاك اليوم حجيتي بلسانج وكلتي نبراس بعده يريدج ترجعين بحياته ودائما يحاول يرجعج
ما حسينا الا والراشدي انطبع على خد رنا
باوعت شفت ضرغام عيونه جمر ونار
لزمت خدها وياوعت عليه
.. تضربني علمود هاي الساقطة ام الرجولة والله انت تستاهل كل الي يصير وياك وحيل بيك وابو زايد راح توكع براسك هالنغل وتضحك عليك وتوهمك انت ابوه
ما حسينا الا ورنا اتكطعت واتملخت حسيت بضراغام يضرب بدون وعي مثل الي اتهستر
ضرغام.. لج عار سدي حلكج لاوالله ادوس راسج دوس بالقندرة
جنت اباوع عليهم بخوف شلون يضرب رنا
وهي تجاوبه والسانها ما بطل
.. الله لا يوفقك انت وياها بس تستاهل كل الي يصير بيك ياعقيم وخليها هاي الساقطة تجيبلك النغولة ما ادري منين والله الا افضحكم
رجع ضرغام هد عليها
.. لج اليوم احرك عشيرتج كلبة بنت الكلب اليوم موتج على ايدي
انتبهت لضاري وخالو راضي لزموه
راضي.. كول يا الله ضرغام ما عليك منها هاي رعنة
ضرغام.. بوية اذا هسة ما تاخذها وتوديها لاهلها اليوم اجرم بيها واحسب الله ما خلقها مو انا مرة بكد القندرة تحجي وياي هشكل وتمدلي اللسان ..السانها اكصه
انتبهت على خالة حليمة كومت رنا من الكاع
.. كومي من الله لا يرضى عليج حركتي البيت حرك وخبصتي الامة خبص وما افتهمنا من البنية المكرودة شنو السالفة
كومتها واخذتها لغرفتها
صاح ضرغام وراهم .. يمة كلتلج طلعيها من البيت خابري على اخوج هسة يجي ياخذها ويخليها عنده يربيها ما الفي لبيتي عار
بعدما رنا راحت
التفت علية والنار تجدح من عيونه
هيام .. ضرغام
ضرغام.. هيام وخري من وجهي
هيام بقهر.. لا ما اتحرك من كدامك
الا تحجيلي انت مصدك بكلامي لو عندك شك بأتجاهي
ضرغام.. هيام اترجاج وخري من كدامي اعصابي تلفت وما اريد احجي حجاية وانتندم عليها بعدين
هيام شهكت من تهربه من الجواب حسيت بي محتار لاي جانب يركن
.. يعني شنو قصدك تشك بية
الحجية خاجية .. يمة لعنو الشيطان وصلو عالنبي
شبيكم منين تجيبون هذا الحجي الما ينلبس عليه هدوم
راضي.. بوية ضرغام كول يا الله وانتي خالو هيام روحي صعدي لغرفتج خلي يهدي شوية الله يلعن الشيطان سلب فرحتنا بالخبر
ضرغام.. بغضب بوية رحمة على والديك ارحمني والله عقلي راح يوكف من التفكير عوفوني بحالي
انتبهت عليه اخذ سويج السيارة وطلع
الحجية خاجية.. يااا ولك جدة ضرغام وين مولي .سودة علية شوف الولد هج من البيت‏
‏وهو توه راجع تعبان راضي شوف وين راح
‏التفتت عليه وكالت ..وانتي تعالي كعديلج شوية
بقيت كاعدة يمها مصدومة احس انسلبت فرحتي بالحمل
باوعت لريام حتى ما لحكت تتهنة وتكللهم عن حملها والله موقف صعب
راح. ضرغام وخلاني معلكة وما ردلي جوابه
باوعت لعلاوي بحضن ميس تلعبه بالنقال
غمضت عيوني وكمت رحت صعدت لغرفتي
كوة اجر بروحي من خيبة الامل الي مرت علية
.........................
ريام
شكد جنت فرحانة بحملي بس من صار الموقف وضرغام وصدمته بالخبر وتردده بتقبل الحمل تركنا كلنا بحيرة ما اعرف شنو اكول حقه معذور صعبة رجال يعرف بنفسه عقيم وفي ليلة وضحاها تجي مرته تكله حامل كانت ردة فعله طبيعية هو ما اتهمها وبنفس الوقت ما طمنها طلع من البيت وما رجع انتبهت لهيام انطفت فرحتها وذبلت متت قهر عليهاانتبهت على ضرار دخل للغرفة جان هسه جاي نازل مجاز
ضرار.. هَـلا بريمة ضرار شلونج
طمنيني شنو كالت عليج الدكتورة من شنو تشتكين
ريام بذبول.. مكالت شي بس عندي فقر دم وهو سبب الدوخة
ما اريد افرح بحملي وافرح البيت واختي تشوفهم شلون يباركولي وهي انحرمت من فرحة حملها اشوف روحي مو من حقي لازم اراعي مشاعر اختي
ضرار.. شبيج اشو كاعد تصفنين بوجهي
ريام .. ما بية شي بس اخوك ضرغام اتخبل على اختي
ضرار.. شنو ما افتهم وليش يتخبل على هيام شعجب
حجيتله الموقف وكل الي صار ظل صافن بوجهي
.. والله ما اعرف شنو اكلج بس اخوي هم حقه يتردد وينصدم لتنسين الكل يدري بي عقيم وانا بنفسي سافرت وياه من اخذ العلاج والدكتور كله كلشي وارد احتمال هذا العلاج ما يجيب وياك نتيجة وفعلا علاجه مجاب نتيجة اتزوج رنا وصارله سنة تقريبا ماكو شي
ريام بعصبية.. يعني اذا ست رنا مصار عندها
حمل يكوم يتهم اختي
.. وهسة هو ياهو المتهم اختج بس تحبين تكمزين انتي كلتي بنفسج ضرغام محجة اي شي يدين هيام غير انه انصدم وطلع من البيت يعني اخوي هم الله يساعده الي صار بي مو شوية الحادث سلب من عنده كلشي
مو زين هو عايش اليوم ويانة انتي حقج ما شفتي شكد عانى هناك من كعد يتعالج
ترة هاي الضغوط الي كاعد تصير وياه مو زين عليه هيام لازم شوية تتفهمة
ريام.. واني اختي شنو ذنيها هيج يخرب فرحتها بحملها هي هم تعبت بحياتها انت ما شفتها شلون صارت بحملها بعلاوي جانت شبه انسان انتبهت عليه ابتسم واقترب مني
.. هسة عوفج من. اختج واخوي وتعالي
لحضن ضرار مشتاقلج موت
اقتربت من عنده وحضنته وحطيت راسي على صدره
.. ضرارطمني وكلي اختي ما يصير عليها شي خايفة عليها
.. لا تخافين على اختج راح تشوفين بعينج شلون الموضوع راح ينحل وتصير سوالف
.. والله يا ريت
.. تدرين مرات احسد هيام
.. ليش تحسدها هي مناقصة مشاكل وتجي تحسدها
.. احسدها لان عندها هيج اخت تحبها وتفكر بيها ..مرات حتى اغار منها اكول هم تحبيني مثلما تحبين اختج
ابتسمت وضربته على صدره .. لتصير غيار
تدري بية شكد احبك بس هو للحب انواع
حب الاهل يختلف عن حب الحبيب صحيح الحب كله نابع من الكلب بس نبضة عن نبضة تختلف
ضرار.. الله دوخيني بكلامج ونسيني انا تعبان وجوعان حضن واكل
ريام بضحكة .. ههههه بالاول ادخل اسبح وخلي اشبع بطنك وبعدين من ترتاح اشبعك حضن ...يالله اني نازلة
ضرار.. اشتغلت رحمة الله راح تكعد تتهرب مني
((((((((((()))))))))
هيام
عدة يومين ضرغام يطلع من الصبح ما يرجع الا بنص الليل حتى صار محد يشوفه
وخالة حليمة وبيبي الي يتصرفن وياي وكأنما شيئاً لم يكن محتارات شيسون
خالة حليمة تكلي ديري بالج تتحركين وبعد ممنوع تشيلين علاوي ثكيل عليج وانتي حامل وصعدة ونزلة درج ماكو ستري علينا
والحجية خاجية لبستني بروش ما اعرف بي خزعبلات
تكول هذا وكفمال حمل يحمي الطفل من الاسقاط
جاريتهة ولبسته واني ممقتنعة بي
انا هذا كلة بصفحة وبرود ضرغام وياي بصفحة
ما اعرف احس بروحي وحياتي وياه معلكة لا اني طايلة سما ولا اني طايلة ارض
واليوم الثالث ما شفته يروح على غرفة ضاري وهناك ينام يعني لا بغرفة رنا ولا بغرفتي
بس مرات يجي يدخل للغرفة ويلعب علاوي وكأن شيئا لم يكن وما يجيب طاري الحمل
جنت اتمنى يجي ويطمني ويهديء من خوفي منة وعليه
معقولة ما عنده ثقة بية اي شنو معناها هاي تصرفاته
جنت كاعدة يم بيبي خاجية
واباوع على رنا الصلفة بكل عين وكحة
تفتر بالبيت خالو راضي زعلان منها وما يحجي وياها وخالة حليمة هددتها اذا تفتح حلكها بحرف كبل تتصل على اخوها فاضل يجي ياخذها
الست رنا بيوم الي ضربها ضرغام وطردها من البيت رفضت تطلع اسمعها تكول والله ما اعوف بيت رجلي واطلع منة واتركلها ضرغام يعني هي فوك سواد وجهه يكوم علية اني
..........
قاطعني صوت بيبي
الحجية خاجية.. ولج شجاج يجدة وبس تصفنين
هيام.. مو زين ومني ما اطك واموت من ورة ضرغامج
.. يا يمة اتهدي عليه وصبري ترة الرجال واكع بشدة اندعيله الله ينور طريقه
جنا نحجي ودخل ضاري
ووياه خالو راضي راجعين من الشغل
انتبهت لريام نزلت هي وضرار جنت اباوع لوجه ضرار بس جان وجهه عادي ما بي
اي فرحة معقولة ريام ما حجتله عن حملها
اني بالاول كلت هي ضمت خبر حملها عالكل تنتظر ضرار ينزل مجاز حتى تسويله مفاجئة بس اشو لحد الان ماكو شي ادري شنو تنتظر لازم اكعد وياها واشوف شنو سالفتها
سلمت عليهم واجيت اكوم اروح للمطبخ
احضر السفرة حتى نصب غدة للولد وصلت يم باب الصالة وسمعت ضاري
ضاري.. بوية اليوم ضرغام سافر للبنان
وكفت متصنمة بمكاني
حليمة .. عزة بعيني وليش ما حجة ما كال انا مسافر
راضي.. شكو ليش يسافر بدون علمي هيج فجاءة
ضاري .. والله بوية انا هم مثلك متفاجيء
اتعجبت عليه من طلع مفيز للبنان وكلي تعال
وصلني للمطار
الحجية خاجية .. هذا شماله اتسودن صاير ما يحشم احد ولا يسوي حساب لغيره وصاير كلة يتصرف من راسه
رجعت لعندهم واني احس كلبي يريد يوكف خبر سفر ضرغام اجة على راسي من الضربة وهاي الضربة القاضية بهذا سفره حط لزواجنا حد
باوعت لبيبي بجمود ووجهي ما يكصه السيف من الغضب.. بيبي ما دام ضرغام سافر للبنان اني بعد ما الي كعدة بهذا البيت
حليمة .. يمة اسم الله ليش تحجين هشكل
هيام.. لان ابنج بروحته للبنان اثبت ان هو ما عندة ثقة بية وراح يتأكد من نفسه اذا كان عقيم اولا خلاص والحليم تكفيه الاشارة انا كلشي اصبر واتحمل بس مال واحد يجي يشكك بشرفي هاي الي ما اتحملها
حليمة.. كولي يا الله هسة هو الولد شوكت فتح حلكه وياج واتهمج بشرفج
.. هو صحيح ما حجة ولا كال بس افعاله
خير دليل ما يحتاجلها روحة للقاضي
ضرغام ما عنده ثقة بية
حليمة .. على كيفج حبوبة سودة علية وليدي هو اذا نفسه ما عندة ثقة بيها شلون تردين يثق بيج بس مو معناها اتهمج بشرفج
.. خالة ما الومج حقج هذا ابنج وتدافعين عنه بس اكلج المرة على كلشي تسكت الا عدم الثقة والشك هاي النقطتين اهم شي لحتى ينجح الزواج وشوفة عينج صرغام وبروده وصده وياي بهاي اليومين رسالة واضحة
حليمة.. يمة هو كلج محتاج اكون لوحدي استوعب صدمتي ترة مو هينة عليه مثلما انتي عندج اسبابج هو هم عنده اسبابه
باوعت على جدتي
.. بيبي اني مالي كعدة بهذا البيت صحيح ما عندي اهل ازعل عندهم ولا عندي احد يوكف بوجهه ويحطله حد ويكله يعني هي منين جابته للحمل اذا مو منك منين يعني هي وحدة من الثنين لو اي لو لا وهو بسفره هذا ثبت ان هو يشك بية
الحجية خاجية.. هذا هو يجرالج وانا هالمرة وياج مو ضدج لان هذا ضرغام ما لاكي الي ينطيه ضربة على راسه ويوعيه
راضي .. يمة الله يهديج شنو هذا الحجي ترة الولد حقه كاعد يمر بحرب بينه وبين نفسه محصور بين خيارين ما يعرف يختار يصدك منو بيكم يصدكج الج انتي مرته لو يصدك الدكتور الي كضة سنة كامله عنده يعالج
وفشل علاجه واضح برنا
الحجية خاجية .. انا هذا كلة ما ياكل عندي بس صار لازم واحد بينا يسويله كرصة اذن حتى منا ورايح يبطل يستعجل ياخذ قراره من نفسه بدون ما يسوي حساب لكسرة كلب غيره يعني قرر وسافر لحتى يتأكد ونسى يسوي حساب لهاي المكرودة ما يدري بهاي طلعته كسر مرته وخونها
حليمة.. الله يسامحج حجية هاي بدال ما تهدين البنية كاعد تشيشنها على رجلها
الحجية خاجية.. شوكت ما يكون رجلها يفكر بعقل عودك بذيج الساعة راح اعذره بس ما دامه عقله مو براسه جا خلينه انطيه ضربه تخليه يصحى على حاله
حليمة بخوف .. شراح تسوين
الحجية خاجية .. انتي ما عليج طلعي منها
رحاب يمة اتصليلي على اختج هيفاء خليها تجي..باوعت علية
.. وانتي كومي لمي هدومج واخذي غراضج كلها وما تبقين ولا شي بالغرفة يخصج
راضي.. حجية بس فهمينا شراح تسوين
الحجية خاجية .. ما راح اسوي شي
بس اخذ بحق هاي المكرودة واراوي ابنك النجوم بعز الظهر بس خل يصبرلي هذا اتعافى على نعمته الا اخلي منا ورايح يسوي الف حساب لهيام من يريد يتصرف ويقرر
حليمة .. حجية هذا مو حل تشجعين البنية تعوف بيت رجلها وتطلع
الحجية خاجية.. انا ما اشجع المرة تترك بيت رجلها وتطلع زعلانة بس مرات الرجال يحتاج من يسويله كرصة اذن فخليه لابنج عباله هيام ماعندها اهل تروح لعندهم
متاكد منها راح تنجبر تبقى هنا غصب عنها
لان مالي ايدة منها يرجع ويلكاها
راضي.. والله ما اعرف شنو اكلج يايمة هذا ابني وهاي
بنت اختي والله الشاهد اثنينهم اعزاز عندي

جانو يحجون حسيت بالدموع نزلت على خدي ما اعرف شيوة بية كلام بيبي حسستني اني مو لوحدي
واكو من ياخذ بحقي
الحجية خاجية .. مسحي دموع لا تبجين وداعتج وحق هاي الدمعة اذا ما خليت ضرغام يحفة وما يطولج ما كون خاجية بنت جبار
((((((((((((((((((((()))))))))))))))))))
ضرغام
طلعت من المطار منتظر ضاري يجي علية ياخذني
جنت طاير من الفرح بعد نا رحت واتأكدت بنفسي
صحيح عندي نسبة ضعف قليلة بس النسبة الباقية
قابلة للارتفاع يعني عندي امل ٥٠٪؜ اصير اب
فكرت بهيام ورحت لارقى محلات بشارع الحمراء
واشتريتلها طقم ذهب عربون اعتذار على اهمالي الهة
بيوم سلبت فرحتها
ما شكيت بيها لان عيب علية اشك بيها وهي بحضني الا انا مو رجال بس كل الموضوع
انا جنت مصدوم خايف واجتني رنا بكلامها الي طير
برج من دماغي وصارت الشياطين تلعب براسي
ما ردت احجي وياها ولا ايتعجل بالحكم كبل طلع من البيت واخذت جوازي وفيزت حتى اسافر للبنان
واكطع الشك باليقين
بس مرت علية يومين اصعب واطول يومين بحياتي
جنت اروح انام بغرفت ضاري
واصير الليل كلة اتكلب مو بيدي غصب عني
اريدها حتى لو بس انام على ريحة عطرها
زين اريد اعرف شمعنا هي بالذات تملك علية هيج سلطة وتتحكم بكلبي
مرات الكة روحي يم باب غرفتها
ادخل واحجي وياها وهي تباوعلي بنظرات ملها امل
ادري بيها تريد مني اطمنها بس هي ما تعرف انا بروحي محتاج اليطمني
سمعت صوت ضاري
.. ضرغام .. باشا
ابتسمتله ورحت لعنده
.. يا هلا بأخوي الكاطع ليش محد منكم كلف نفسه
واتصل علية ويتطمن شنو لا ابوي لا امي لا جدتي
شبيهم صاير شي عليهم
ضاري بتهرب .. والله ياخوي ما اعرف شنو اكلك
بس المل زعلان عليك
عقدت حواجبي مستغرب.. ليش وانا شسويت
ضاري.. هذا عيبك ياخوي مشكلتك تكسر بخاطر الناس
وتدوس على كلوبهم بدون ما تحس على روحك
.. يا ستار شصاير ولك ضاري حسستني مسوي مكسورة وانا ما ادري بروحي
ضاري.. اوصل للبيت وانت تعرف كلشي
(((((((((((((())))))))))
هيام
صارلي اسبوع ببيت خالة هيفاء
وخطية هي وبناتها وابنها ايمن شالوني بالصلوات
ما حنك جايتهم طالعة زعلانة من بيت زوجي عبالك
جايتهم حتى احتفل وياهم بهاي المناسبة
كل يوم سهرة وكل يوم طلعة نتعشا برة يم الكورنيش
وهذا كلة وعلاوي انطلق عندهم وهمة الكل متخبل عليه لان بيتهم ما بي هيج كائنات على كولت عهود
بس طول هاي المدة ماكو اي خبر عن ضرغام
وجدتي خاجية كالت خلي نقالج عندي
وحذرت خالة هيفاء ما تتواصل وية ضرغام
وخالة حليمة الوحيدة الي انشلع كلبها بالمشكلة
كل يوم تجي مسوية اكلة او جايبة حلويات
وتجيب ميس وياها
تجي تسألني على صحتي وكل ساعة تكول ما اتنسيتي على شي اسويلج اياه
واني اضحك شكلها ولهفتها
حليمة.. خلي اخابر على السكرتيرة مالت الدكتورة حتى احجزلج عندها
وبعد منا ورايح نراجع كلة عندها لان هاي دكتورة شاطرة
هيام.. ان شاء الله
اباوع لنظرات ميس لأيمن
شلون تتبعه من يكعد لحد ما يكوم
حليمة.. بالله خلي اروح اشوف هيفاء ووين غطت هو اكلاص عصير شنو نامت
كامت خالة حليمة
واني كبل كرصت ميس الي رايحة بغير عالم
.. اااخ شبيج ليش تكرصين
.. لج انتبهتي على روحج شلون اكلتي الولد بعيونج
.. يا ولد
.. اكو غيره هنا ببيت خالة هيفاء ايمن الروح
.. لج عوبة نصي صوتج فضحتيني
لا تسمعج امي
.. لعد ليش تسوين رحج غبية ومتعرفين عن منو احجي
المهم احجيلي شعندج كل يوم ناطة على بيت عمتج هيفاء بالله امج افتهمنا شنو فلمها
بس انتي شعندج
جرت حسرة واخذتلها صفنة عشك
.. اوووووف خليني عايشة اللحظة لج ما تدرين
ربي شلون زرع حبه بكلبي
سبحان الله على كد ما جنت اكره واموت منه
على كدما هسةاموت بهواه
لج تدرين شنو اتمنى
.. شنو
.. اتمنى تبقين طول عمرج زعلانة ببيت عمتي
حتى كل يوم اجيكم واكحل عيني بشوفته
.. عمة بعينج عوبة تدعين علية انا اخوج علمود
حبيب الروح
.. اي والله يا خية همة كالوها مصائب قومٌ عند قومٌ فوائد
لج لو تدرين شنو اتمنى
.. ما اريد اعرف كمت اخاف منج ومن امنيات كلها توجع الكلب
.. لا لا الله عليج خلي اكلج بافكاري السودة
.. اتفضلي غردي
.. اتمنى تطيحين وتتخربطين بالفراش
وانا ابجي عليج طبعا هذا من زود حٍٍِْــًبٌٍـــِٓېٍٓ
الج
.. اي كملي
.. واحلف دين قسم محد يكعد يداريج الا اني
الله وامي تكلي ابقي باتي عند بيت عمتج
الله وبساعتها اصير ملكة وانا اني وياه تحت سقف واحد وبيت واحد يجمعنا
يعني على الاقل اكون حققت ولو جزء بسيط من حلمي
الضائع ننجمع بفرد بيت
دفعتها ووكعت من الكرسي
.. لمشي روحي عوبة كاعدة تفاول علية وتريد تحقق احلامها براسي ليش هو اني ناقصة ضيم مو كلش
كافي ضيم وقهر اخوج علية
ميس.. شدعوة عليج رب الي اتحملتي ضيم هولاكو
ما كادرة تتحملين ضيم اخت هولاكو
ترة والله احنا ناس حبابين
.. يعني ما اعرف شنواكلج بس اندعيلج ربي يكملج بعقلج
.. لا لا ما اريد ربي يكملني بعقلي اندعيلي ربي
ينولني البراسي ويصير من نصيبي
.. مخبلة
دخل ايمن وقطع سالفتنا
.. ميس هذا الكتاب الي كلتلج عليه
همست يمها
.. انتي من شوكت صرتي تقرين كتب
.. انجبي اني من يوم يومي قارئة زماني بيتنا كلة
يصيحوني القارئة ميس بس انتي طلعي من الموضوع وما عليج مني
.. لج عوبة راح تفضحين روحج كدام الولد
.. شلون بيج يعني لا انطيك ولا اخلي رحمة الله تنزل عليك
يعني تقبلين تتخربطين وتساعديني بتحقيق حلمي ولا تخليني اشوف وجه الله عمي الله يساعد اخوي عليج
.. عابتلج انتي واخوج
كمت من عندهم وتركتهم لوحدهم حتى ياخذون راحتهم
ورحت يم خالة حليمة وهيفاء بالمطبخ
سمعت خالة حليمة تحجي وية خالة هيفاء
حليمة.. اليوم ضرغام راح يرجع من لبنان ولازم هسة
ارجع واشوف شنو السالفة
هيفاء .. ليش يعني انتي لحد هسة متعرفين عنه اي شي
.. اي مو راضي اخوج والحجية خاجية حطو علية
دين قسم محد يتصل عليه ولا يواصله
حتى اتصال ما خلوني اتصل عليه واتطمن
شنو عليه الحرب
هيفاء.. تردين الصدك يستاهل خلي يعرف الله حق وان
هو مو لوحده عايش بهاي الدنيا وموبس هو عندة احاسيس ومشاعر ومو بس هو مقهور ويعاني
اكو غيره همين كاعد يعانون وياه وعندهم كلب
مكسور مثله
حليمة.. شبيج يخيتي حتى انتي كمتي عالمكرود
والله هذا الولد ما مكتوبله الراحة
.. والله اني تدرين بية ما اعرف اجامل
وكلمة حق تنحجي هو بهاي طلعته هواي خسر والله العالم امي بشنو تفكر
.. هو اني شنو المخوفني غير امج وخططها الجهنمية
(((((((((((((()))))))))
ضرغام
وصلت للبيت تلكتني امي
حليمة.. هلا يمة ضرغام الحمدلله على سلامتك
توة نور البيت بشرني عنك يايمة
رحت عليها وبستها من رسها
.. الله يسلمج يالغالية لو جنت لهاي الدرجة هامج
جان كلفتي نفسج واتصلتي وسالتي عني
شنو وين ابوي وجدتي والولد
.. كلهم كاعدين بالصالة
جنت امشي وادور عنها بعيوني اتمنى اخذها واحضنها واعوضها عن سلب فرحتها

دخلت شفت جدتي وابوي رحت لعندها
صدت وجها عني اقتربت منها وبست راسها
.. شلونج يالغالية
.. وليش تسأل عن لوني شني قابل تهمك احوالي
.. عفو عليج حجية انتي الخير والبركة اذا انتي ما تهميني جا منو اليهمني
كمت ورحت لابوي سلم علية من ورة خشمه
باوعت عليهم بأستغراب.. شكو خير شصاير
ليش كل الوجوه مكلبه مسولي عملة وما ادري
الحجية خاجية.. سلامتك ما مسوي شي روح يمة ارتاحلك شوي انت ستوك جاي من السفر
.. والله انتو مو طبيعين هاي كلة علمود ماكلتلكم من سافرت
اجتني رنا تركض كالعادة معدلة ومعطرة وضاربة دقلة عبالك رايحة حفلة
رنا.. الحمدلله على سلامتك حبيبي
بعدت راسي عنها وحجيت وياها من ورة خشمي بعدني ما ناسي ولو تموت ما راح اسامحها عالسوته
باوعت لريام وضرار نزلو وفز كلبي بكل ضني هيام وراهم بس اشو ماكو لحد هسة ما بينت
سألت امي .. اكول يمة شنو هيام علاوي وين
باوعت لامي كامت تبلعم
.. يمة انا مالي دخل اسأل جدتك
ضيكت عيوني شميت ريحة مؤامرة ومصيبة جاية بالطريق والمصيبة اذا جانت جدتي خاجية وراها
.. واحد بيكم يفهمني شنو جاي يصير هيام وين
الحجية خاجية.. هيام لمت هدومها وطلعت زعلانة
.. بالله شو عيدي حجية ما سمعتج عدل
شنو هيام زعلانة !!! وليش تزعل ومن شنو تزعل

راضي.. ولو هو الحجي وياك ماكول خيره وانت دومك مستعجل وتتصرف من راسك بدون ما تسوي حساب لغيرك شوف بوية انت بهاي سفرتك كسرت بخاطر مريتك وخونتها
فتحت عيوني على وسعهن
.. انا اعترف كسرت فرحتها بالحمل بس ما حجيت وياهة اي شي يدينها اتريثت وما استعجلت بالحكم وانتظرت اتأكد واحجي
الحجية خاجية..
ومريتك ما تنتضرك لحد ما تتاكد هي هم بشر وعندها حد للصبر
وشافت بسكوتك وببرودك وكملتها من سافرت
حتى تتأكد وانت بخطوتك هاي خونتها وطعنتها بشرفها
ضرغام.. جدة انتي شكاعد تحجي اكو رجال يتهم عرضه بس كل الي صار جنت مصدوم والشياطين لعبت براسي ما انكر الشك اتربع بكلبي
بس هذا كلة ما اثرت عليها ولا جرحتها بكلمة
يعني انا مو ملاك حقي واريد اعرف راسي من رجلية
ترة ليش تعضمون الامور
الحجية خاجية.. شوف جدة الرضيت والمارضيت
انت اتعديت حدودك وية الفرخة وطعنتها بشرفها من رحت تتاكد صحيحما حجيت بس انت سويت
والحيلم تكفيه الاشارة وهيام افتهمت الرسالة من سفرك
وصممت ما تضل لحظة وحدة بالبيت
وكالت كلشي تتحمل وتسكت عليه الا واحد يجي يتهمها
وشكك بشرفها هاي الما راح تسكت عليها
ولا انا راح اسكتلك عليها مشكلتك ما سويت اي حساب من قررت
وانا هم راح اكلك منا ورايح ما اسويلك اي حساب
وهيام شنو تكول انا وياها واريد واحد يعارض ويفتح حلكه
غمضت عيني وانا احس بروحي من القهر والغيض صرت ارجف
.. جدة رحمة على والديج لا تمتحنين صبري
انتي بس كليلي هيام وين
.. انا وديتها لبيت خالتها هيفاء
..شنو حجية هاي مرتي شلون توديها هنا
والله احرك الدنيا اذا انعادت هاي الحالة وطلعت من البيت من دون علمي
كمت من مكاني واحس النار تفور بصدري
.. شنو وين رايح
.. رايح اجيب مريتي وارجع واريد واحد يفتح حلكة
راضي.. اخذني وياك لان الظاهر انت ما كمت تحشم
احد وخلي ببالك انا بمكان ابوها واذا تريد تاخذها غصب عنها لازم تتعداني
.. بوية ما لازمك تعال هلا بيك
مريتي اخذها اخذها
وباوعت لجدتي .. شبيكم درتو علية فرد دورة
جني مو ابنكم صفيت خروف بوسط الذياب
واحدكم ما يعول اغفل عنه حتى ياكل بلحمي
راضي.. يالله امشي كدامي بلا حجي زايد محد كايلك
صير خروف

ريام
اباوع عليه شلون وجهه انكلب احمر من الغضب وكوة لازم روحه ما يسوي مصيبة
طلع من البيت وهو يدردم
الحجية خاجية.. روحي اتصلي على خالتج هيفاء
اتصلت عليها واخذته مني
وحجت وية هيام .. شوفي ولج راح يجي ضرغام
لا يخوفج نباحه من ينبح ما عليج منه
ما راح يكدر يسوي شي وقسي كلبج وديري بالج توافقين ترجعين وياه سمعي كلامي وامشي وراي وخلي الباقي علية

((((((((((((((()))))))))))

هيام
سديت النقال من جدتي خاجية واني احس كلبي يدك مثل طبول الحرب
صار جسمي كلة يرجف من عرفت بي عرف بية مو بالبيت وافتهمت منهم هو ضال يصيح ويتوعد
اندك الجرس وسمعت صوته
لبست شالي ونزلت واني اقرة ايات بكلبي وقويت كلبي
ما يهمني شي الكل وياي جدتي وخالو راضي ما راح يكدر يوصلني
((((((((((((((((((()))))))))
ريام
جنت كاعدة يم جدتي واني افكر شلون
شنو راح يسوي ضرغام وية هيام اتمنيت كون طير اروح اشوف شراح يصير وهيام شلون راح تواجهه
بس اتمنى ما تضعف وتتنازل وترجع وياه بسهولة

باوعت لرنا شلون مطنكرة وغنتبة علمود ضرغام
راح يرجع هيام
سمعت جدتي تحجي وية خالة حليمة
.. اكول حليمة جا ما دام ابنج ضرغام ما بي شي
ليش ما تاخذين بنت اخوج وتكشفين عليها عند الدكتورة
خاف بيها شي وتطلع العلة منها
رنا.. لا عيني اني ما بية شي لو هي كوة تردون تذبون بلاكم عليه هو ابنكم عقيم اني شلي غرض عودك هسة
يالله ارتفت النسبة شوية يعني موذنبي
وانتو كلكم تعرفون اني صار عندي حمل من زوجي الاول
حليمة.. اكلج اشو انتي تصيحين وما تحترمين
ترة والله اكسر راسج اذا سمعتج تعلين صوتج عالحجية
رنا.. يعني كوة لا عنها تردون تطلعون بية الصوج اشو من جان ابنج عقيم ما اسمعلج صوت هسة من دريتي ابنج ما بي شي درتي علية وانتي تدرين كلش زين اني ما بية شي وحملت وطرحت ورحمي نظيف
كلشي ما بي
.. ولج عايقة انتي تعيرني بابني اليوم الا اربيج
اذا ما اخلي فاضل يكسر راسك ويمسح بيج الكاع ما اتسمة حليمة

انتبهت على رفاه ظلت تحوم وكامت تسكت اختها

رفاه .. لج رنا وتالي وياج بهذا السانج الي راح يعم عليج
رنا.. بالله شو وخري من وجهي انتي الثانية
رفاه.. رنا انتبهي لنفسج ترة انتي حركتي البيت بالمشاكل
.. لا تكعدين تلوكين وانتي مالج دخل عودك من توصلج ناري ابتعدي حتى ما تحتركين
رفاه .. خلاص انا حذرتج
وهذا الي راح اسوي ما راح انتظر
تحركيني بنارج وينهجم بيتي
انتبهت على رفاه صاحت على ضاري من الاستقبال وصعدت فوك
اباوع لهاي رنا شكد جسرة وشيطانة وما اعرف على شنو شايفة روحها
اجتي ميس وحجيت وياها وكعدنا نتفق
علمود المفاجئة وكالت راح اوصيلج على زينة وكيكة
شكل بيبي فيس
.. اي عفية اريد شي مميز حتى افرح ضرار بخبر حملي
.. بس الله عليج انت عليج تحجين الخبر لضرار
.. وخليني انا ابشر الباقين عفية علمود احصل منهم البشارة خصوصا امي ما تعرفينها شلون تصير كريمةم
من تنطي البشارة من فرحتها تنطي الفلوس الي بجنطتها كلها
جنة نحجي وفجاء سمعنا عياط رفاه وصياح
ضاري
كمزت من مكاني اريد اشوف شنو

يتبع