رواية تائهة بين اروقة الماضي الفصل الحادي والأربعون 41 - بقلم الكاتبة نهى

#تائهة_بين_اروقة_الماضي
#بقلم_الكاتبة_nuha d h
احبتي كما وعدتكم بتنزيل البارت
واعتذر عن التاخير لكم مني احلى تحية اختكم نهى
بس مع الاسف شوية تاخير يقوم بعض المتابعين
بالكلام عني بحجي ماله داعي
اني نزلت هذا البارت وجان كلش طويل
يعني عيب عليكم انتو قراء مثقفين مو كاعدين بسوك
وهي مو عركة حتى تنزلون تعليقات تحط من معنويات الكاتب تعبانة واكتب لحتى اكون عند كلمتي وياكم رغم اني ما مجبرة انزل بارتين بس حبيت احافظ على وعدي وياكم
يعني شصار اذا اتاخرت
بتنزيل البارت اكو اسلوب بالكلام والله صدك انقهرت من بعض المتابعات وتعليقاتهم الجارحة واشكر البعض الاخر الي اتفهم تأخيري عليهم
(((((((((()))

🌷🌷🌷🌷🌷😊

ريام
زفوني اني وضرار بالبيت محبيت تكون ليلة عرسي بالفندق هنا ارتاح اكثر واحس بالحماية اخاف نبقى اني وياه لوحدنا
كلبي كام يدك مثل طبول الحرب
باوع علية بلهفة واقترب مني بعده ما مقترب
ودك نقاله اباوع عليه ظل يسب ويلعن وجاوب المتصل
.. ولك ليش هيج تسوي انا كاطع ليلة عرسك حتى هيج تكطع ليلة عرسي
يالله انا جاي هسة لحظة
باوعلي وابتسم وحجة
.. ابقي بمكانج لا تتحركين ما راح اتأخر طلقة واجي

طلع وتركني لوحدي اباوع للغرفة لهفته خوفتني
مر الوقت واتململت من الكعدة
هذا وين صار اشو اتأخر
كمت من مكاني وصرت باوع عالغرفة شفتهم شلون محضرين الغرفة ومزينيها بالشموع وحاطين ورد طبيعي عالسرير وريحتها تجنن تنطبع بالذاكرة
وميز مغطينه بشرشف ابيض رفعت شفت جواه اكل
مغصتني بطني جوعانة
باوعت عالسرير حطين سيت النوم الابيض ضحكت
بكل عقلهم البس هذا لأستاذ ضرار ليش لا يستاهل البسله والله يا ربي اذا يريد وحدة تلبسله الابيض خلي
يروح للي وعدها بالزواج لو يموت ما البس هذا
نزعت بدلتي الثكيلة وحطيتها على صفحة
ورحت للكنتور واخذتلي اتراك برمودة بي ارنب بالنص لونه وردي رحت سبحت ونشفت شعري
بالشسوار طلعت من الحمام واني احس بعظامي كلها توجعني ومعدتي كرصتني
مددت ايدية اتمغط من التعب للحظات نسيت نفسي
رحت عالصينية رفعت الغطة من عندها
.. تعالي ياحلوة ميتة من الجوع خلي اكل
مديت ايدي وكعدت افتح بالاغطية وضربتي الريحة
يمة تجنن بعد ما عندي صبر هجمت
وبأثناء ما جنت اكل واللكمة تارسة حلكي اندفع الباب ودخل ضرار عبالك عنده عركة كمزني ابن اللذين خلاني اغص بالاكل صرت اكح واضرب على صدري مديت ايدي على كلاص الماي وجريت نفس وحطيت ايدي على صدري
.. الله يلعن بليسك اكو واحد هشكل يدخل يا اخي
اعلن عن وجودك قبل لا تدخل
ضرار وهو فاتح حلكه على المنظر عقد حواجبه واتقدم بحذر من هاي الكاعدة كدامه بكل برود ولا وبعد لابسة اتراك ولا كأنما ستوها جانت عروس
يعني صدك انصدمت بصورتها وسرقت كل الحجي
الي جنت ضامه لحتى احجي الهاعلمود اطمنها واهدئ خوفها اشرت عالباب وراي
بسؤال .. اكول يا حلوة هاي الهوسة الي جنتي بيها والعرس والقاعة ما يذكروج بشي
مدت ايدها على قطعة خيار وصارت تاكل بيها
جاوبتني ببرد.. اي اعرف تذكرني بعرسي
.. اي يعني معناها انتي اليوم عروس وعريس
.. اممم اعرف اني عروس
جانت تاكل وبرودها رفع ضغطي
..زين ليش ما لابستلي هذا الابيض الي يكولون عنه تلبسه العروس بليلة عرسها والعريس يتخبل عليها لان بساعتها راح يشوفها مثل الملاك اشو
حضرتج لابستلي تراك وبي ارنب شنو اكو واحد كلج اليوم راح تنامين بحضن امج
انتبهت عليها جمدت بمكانها وتركت الاكل وكامت من مكانها بارتباك وبدت عليها بوادر الخوف
واخيراً بدت اول علامة من علامات العروسة والله اجيت اتخبل
.. يالله يا حبابة اتحركي روحي لبسيلي الابيض الي جنت احلم بي كل ليلة
ريام
اباوع عليه دخل وجان نازع السترة ورافع ردن القميص وفاتح الرباط وحاطه على كتفه
وشعره مهوس واكف كبالي يطالبني البس هذا الثوب الابيض الي يكول عليه حتى اطلع ملاك همزين مكال اريد جناحات وياه
اباوع عالثوب معلك كان شكله وتصميمه ما يمت بأي صلة للملاك لان عبارة عن قطعة من الاغراء والملاك يكون بريء محتشم
.. ما البسه ولا راح اخليك تلمس شعرة مني
وخلي هاي العوبة الوعدتها بالزواج هي تلبسلك الابيض
مو عبالك ناسية سالفة وعدك بالزواج من غيري
ضرار.. هسة اذا الزمج واخنكج اكو واحد يلومني
يعني هاي الهوسة كلها والعرس والمقدم الي كسر ظهري بي خالج راضي والمؤخر الي كسرت بي ركبتي جدتج خاجية وهاي ركضتي ولهفتي وفرحتي معقولة انا اسوي هذا كله لوحدة ما احبها
لج الكل شرني عالحبل وصرت مفضوح الهوى بسببج وكلها تعرف ضرار مجنون بريام وتالي طلعت ريام اخر من يعلم خرب حظي
كلبي كمز من مكانه من سمعت كلماته بس مو بيدي الخوف راح يقضي علية
.. حتى لو تحبني ما اريد البس هذا الثوب
اشرت عالتعلاكة
.. شوفي لج اذا ما اتحركتي ولبستيه اليوم اكلب الدنيا لج ريمة انا ما صبرت طول هاي الفترة علمود حضرتج تضربيني بوري اليوم حتى جدتي خاجية ما راح تكدر تمنعج عني اليوم انتي الي
والا اكول ليش اتعب روحي واكلب الدنيا
انا رايح لجدتي خاجية اشتكيج وافضحج عندها مثلما سويتي بية بذاك اليوم وفضحتيني يمها بيوم البوسة واخليها تشوف شغلها وياج
مشيت للباب وفتحته
ريام.. لالا عفية ضرار انت ليش هشكل مصعب علية الامور
ضرار.. يعني عريس وجنت احلم بهذا اليوم وتالي اصوم اصوم وافطر على بصل ما يصير
يالله حبابة روحي بدلي بين ما ادخل اسبح
ترة خلي ببالج العدو من امامنا والبحر من ورائنا
انا كدامج وجدتي خاجية وراج ماكو مفر

باوعت عليها ارتبكت وصارت حمرة
وهمست.. والله صعبة انت شايف الثوب شلون فضيحة
والله حتى استحي البسه بيني وبين نفسي
جاوبتها بخباثة .. لا والله ما شايفه بالله شو لبسي خلي اشوفه حتى اذا مو محتشم تنزعينه شنو قابل انا ما عندي غيرة واخلي مرتي تلبس مشخلع كدامي
باوعت عليها ابتسمت وعرفت زلة السانها
.. اي بنت الاوادم جا اذا ما تلبسين المشخلع لزوجج المن تلبسنه لماما
ضحكت على شكلها وخدودها الحمر واخذت المنشفة ودخلت للحمام
ريام
اباوع عالثوب والله صعبة رحت غمضت عيوني وكعدت البس الثوب الابيض الشفاف
فتحت عيوني وباوعت لشكلي بالمرايا وشهكت
..عزززة الله يلعن الي مصمم هذا الثوب
جان حيل قصير صرت احاول انزل بي
استغفر الله شضم وشنو استر اشو كله علي بعضه فضيحة
سمعت باب الحمام انفتح وطلع ضرار والمنشفة محوطة
خصره وشعره مبلل
اتسعت عيونه من شافني وصوفر باعجاب
واقترب مني
.. خرب عشيرتج اليوم اين تفرون الا طحين
لزمني ومن زندي وقربني عليه واخذ شفايفي
وبعدها ما حست والا انا بالسرير
احس بروحي هجمت علية عاصفة
واخذتني على غفلة كان هو الاستاذ وانا التلميذة
شافني شلون خايفة وارجف وكلما تصير حركاته جريئة
ابدي اصده من الخوف
همس بصوت خشن وانفاسه حارة
.. ريمة استرخي حتى ما تتأذين
همست .. خايفة
.. عفو عليج تخافين وانا يمج
.. ضرار هو انت سبب خوفي
..لتخافين ضرار حباب ما راح اذذيج بس سلميني نفسج
همس بعدها بكلمات هدئت خوفي وبعدها
وبشطارته وحرصه علية ومحاولته كدرنا بعدها نصير روح وحدة
وكانت اجمل ليلة انطبعت بذاكرتي
واندعيت بيومها ان يحفظ زوجي ويخلي الي
((((((((((())))))))))
هيام
رجعنا من العرس واني بعدها النار تكوي بصدري
وزادت ناري من رنا اجتي لضرغام وذكرته اليوم
يومها يعني هي نطقت هاي الكلمات واني حسيت بصدري اختنك
ما كدرت ابرد ناري
اريده ملكي ضرغام الي
ضرغام.. رنا خلي نوصل والله كريم مو وكته هذا الحجي
هيام
بس لا مو اني الي استسلم هيام الجديدة ما راح تتنازل عن حقوقها وما اطلع هيام اذا ما خليت رنا تنضرب بوري معدل
بس خلي تصبرلي
وصلنا وزفينا ضرار وريام لغرفتهم
والتهينا بالناس والاقارب الي نزلو عدنا
وعلاوي خبص الدنيا واجتي خالة حليمة
.. خالة اخذي ابنج وصعدي بي فوك هذا الولد بس لا انحسد اليوم انشلع كلبه بالعرس روحي بدلي ملابسه ونومي خطية وعوفي الشغل من ايدج عدنا كومة بنات
يسدن عين الشمس هنة يعدلن البيت
والله اجتي من الله صدك جنت تعبانة
وعلاوي خطية اليوم اتبهذل

صعدت فوك وبدلتله وكبل نام من التعب عبالك هو الي شايل العرس على راسه
سبحت وبدلت ملابسي
ولبست ملابس نوم واني ارسم براسي خطة
انتظرت ضرغام حتى يجي بس ماكو صارت ال١ بالليل وهو ما بين
هنا ودك الجرس عندي صدك اني غبية شلون اصعد واعوفه يم هاي الحية رنا شي اكيد ما راح تنطيه مجال
يتركها كمت من مكاني
واتصلت عليه جاوبتني الحية وكالت ضرغام بالحمام شنو تردين كولي واني اكله
.. لا سلامتج ما اريد شي
.. يالله حبابة لاتكعدين تتصلين وتخربين علينا الجو
لان ضرغومي راح يتخبل علية وكلي شطالعة اليوم
اليوم ما انام الا بحضنج
ما خليتها تكمل سديت النقال بوجهة اجيت اركعة بالكاع من القهر الحية الجذابة
جنت اروح وارجع بالغرفة وافرك بيدي من القهر والغيرة تاكل بكلبي احس بنار اليوم لو افتح كلبي الكاه معطب من ورة نار الغيرة الله ياخذج يا رنا ويخلصني منج ما كدرت انام وانا اعرف كلش زين هسة هو راح ينام بحضنها
ما كدرت اذا ابقى بعد دقيقة اموت
لبست عباتي الكت وطبقتها وحطيت شال على راسي
رحت اتسحب على اطراف رجلية
مثل الحرامية
وصلت لغرفة رنا ودكيت الباب بأستعجال
شوية وطلعلي ضرغام وشعره مهوس وقميصه مفتوحة دكمه جان يحجي بالنقال سد النقال وباعلي باستغراب
هيام .. عفية ضرغام الحكلي علاوي ما اعرف شبي بس يبجي
سويت روحي خايفة
انتبهت عليه انخطف لونه وسد الباب وراه
.. شنو شبي بس لا اتمرض بس لا انتكست صحته
.. لا ما اتوقع
دخل للغرفة وشافها هدوء يدور بعيونه على علاوي
جان واكف منطيني ظهره
سديت الباب وقفلته واني ابتسم بخباثة
فتحت العباية ونزعت الشال
التفت بسؤال
.. شنو علاوي وي......
وانقطع الكلام
اقتربت منه واني ابتسم
.. جنت ضيف معنا في برنامج الصدمة
علاوي مابي شي مو مريض
بس ام علاوي الي راح تموت اذا ما لحكت عليها
انتبهت عليه ابتسم واقترب مني
.. يعني افتهم من هاي حركتج شغلة غيرة نسوان
اقتربت منة واخذته لحظني
.. انت الي ما تصير لغيري واموت اليوم اذا نمت بحضنها
.. لج سبحان الله جنت اريد ادورلي على حجة حتى اطلع من الغرفة واجي لعندج بس التهيت بالنقال
كل ساعة اتصال واجيتي انتي
دك نقاله والمتصل رنا حوطت ركبته وحجيت بدلع
.. عفية لا ترد عليها
انتبهت عليه داخ ودنك راسه وحطها بركبتي وصار
يحوم بشفايفه على ركبتي
رجع النقال مرة ثانية يدك
ابتعد عني .. لحظة لا تتحركين راجعلج
ضرغام.. هَـا رنا
اي علاوي ما اعرف شبي وهسة راح اخذه للمستشفى
واشوف شبي يالله انتي نامي لا تنتظريني احتمال اتأخر
جنت اسمع كلامه واني ابتسم وهو كوة لازم روحه ما يضحك جان شكلنا مثل الجهال المشاغبين
خلص المكالمة
لزمت ايده واخذت النقال وسويته صامت
وسحبته وراي جانت عيونه تكصني من فوك ليجوة بنظراته
.. لج هيام شلابسة من احتركو لتمشين هشكل كدامي
ما لحكت اوصل للغرفة اخذني لحضنه وضعنا اني وياه
مثل المجانين من اللهفة
(((((((((((()))))))))))
بعد مرور شهرين
هيام
اتصل علية ضرغام .. هيام جهزيلي جنطة السفر
راح اسافر لدبي صار عندي شغل مستعجل
فرحت من اتصل علية وبلغني خلال هاي الشهرين ضرغام هواي اتغير بتعامله وياي وصار زوج واب مسؤل وبدة يتقبل حياة الارتباط ويسويلي حساب بكلشي
وكام يحجيلي عن كلشي يخص عمله حياته الخاصة
كعدت اجهز بجنطته
وعلاوي يمي ورة ربع ساعة دخل ضرغام
.. هَـا جهزتي الجنطة
.. اي تقريبا خلصتها
شال علاوي وصار يشم بركبته
اجيت لعدنه واخذت علاوي بالكوة صايرة هواي متعلق
بابوه .. جيبة وروح اسبح وبدل ما ظل عندك وكت
ضرغام.. تدرين على عيني راح اسافر اتمنيت اخذكم وياي بس المشكلة لازم افيز جوازاتكم ويحتاج وقت يالله تطلع الفيزة
.. لعد انت شلون راح تسافر بسرعة اذا ما ممفيز
.. لا انا مايحتاج عندي اقامة بدبي
.. بس اوعدج السفرة الجاية اخذج انتي وعلاوي وياي
حطيت ايدي على حلكه
.. ما اريدك تبررلي يكفي انت تحب وجودنا وياك
ابتسم .. يالله هم يالله اسبح وابدل راح يجي حمزة يوصلني للمطار
((((((((())))))
ريام .. هَـا ضرغام سافر
هيام.. اي سافر احس بروحي تايهة بدونه
ريام.. احس بيج انا هذا حالي من يوم التحق ضرار
اتذكر روحي كلبتها مناحة من كال لازم التحق
صرت الليل كلة ما انامه وكان كل يوم بالليل يتصل علية
ضرار.. هَـا مخبلة بعدج ما نايمة
ريام.. اي ما اكدر انام الا بحضنك كرهت الغرفة
تدري كل يوم انزل فراشي وانام يم بيبي خاجية
ضرار.. خرب حظي يعني انا وجدتي بنفس الميزان
ريام.. اي انت وبيبي تمثلون الامان
.. اه يعني بس الامان
.. ها لا وشوية وكاحة اشتاق لوكاحتك
ضرار.. لج باباتي انتي بنتي عاجنج وخابزج على ايدي متكدرين تنامين ليلج الا ضرارج يجي ياخذج لحلبة المصارعة وينتصر عليج
ريام.. شفت شلون من اكلك وكح تزعل وتكلي لا تتبلين علية
((((((((((((())))))))؛
انتبهت على هيام تحجي وياي
هيام .. لج ريمة نسيت اكلج شصار وياي بيوم عرسج
حجتلي عن موضوع النقال الضايع واسراء وموقفها
ريام بصدمة.. عزة بعينها وعين رجلها
يعني طلع النقال ماخذه عنده العار
هيام.. خطية انقهرت على عمو شلون كعد يبرر الموقف لضرغام ويعتذر عن الصار
ريام.. بكل عقلج صدكتي بسالفة ادارة المستشفى
هيام.. لا ما اقتنعت بكلامه بس ضرغام اقتنع لان ما يعرف شنو سالفة نبراس وياي اني بالذات
ادري بي هو ليش ضم النقال عنده حتى يصعب وصولي لبيت خالو ونبقى تحت رحمته وصدك خطته نجحت واني صرت مثل العمية وبقيت ورة نبراس وصدكت بكلام صديقه شفتي شلون طلع نبراس موهين
ريام.. لا موهين كولي شيطان بعده عينه عليج وبعده يتأمل ياخذج من ضرغام وترجعيله مثل قبل
جنا نحجي اني وريام وسمعنا حركة يم الباب
سوتلي ريام حركة حتى استمر بالكلام وكامت من مكانها همست بصوت ناصي
.. اكو واحد ورة الباب واكف يتسنط لكلامنا
.. شمدريج
.. لج هاي خبزتي ومهنتي واني اعرف وحدة بيها
استمري احجي
راحت لعند الباب وفتحته بسرعة وشفنا رنا
واكفة تتسمع
رنا .. احم ااااا جنت اريد ادك الباب لان بيبي تريدكم انتي واختج
بس وجها من الفشلة صار اصفر
ريام.. هسة نجي
راحت والتفتت على هيام
.. معقولة سمعت كلامنا
هيام.. عزة لا عفية الله لا يكولها ونوگع بلسان هاي الحية شيفكنا منها
.. بس ما اتوقع سمعت شي لان لو سمعت جان ظلت تحجي ما تسكت
.. الله اليستر هاي ما تعرفينها هاي حية ام راسين ما تخطي خطوة الا وعندها الف خطة وفكرة. براسها
نزلنا لجدتي وشفنا خالو راضي يمها
خالو راضي.. بنات حضرو نفسكم اخذكم لبغداد عمكم احمد مسوي عملية للقلب ويريد يشوفكم
لطمت على صدري بخوف ربي دخيلك سودة علية عمو ما يستاهل
الحجية خاجية.. جدة كولي يا الله يكلج ما بي شي بس سوة عملية ويريد يشوفكم ليش تفاولين عالرجال
اتصلت على ضرغام بالواتس اب كلتله عالسفر
ضرغام.. اي روحي وسلميلي عليه واذا تكدرين تتصلين علية وانتي يمه حتى اتحمدله عالسلامة
وديري بالج على علاوي
.. ان شاء الله
.. هيام عندج مصرف جوة ايدج لو لا
ها.. اي عندي خير من الله لا تاكل همي
سلمت عليه ورحت احضر جنطتي
...........
وصلنا لبيت عمو احمد اني وريام
بوقتها طالع من المستشفى
خطية شكله يكسر الخاطر وكوة يتنفس من صدره
لكيت هناك بنات عمي كلهن موجودات ومرت نبراس همين بس نبراس صادف ما موجود
خالو راضي وصلنا وسلم على عمو احمد واتحمدله. عالسلامة وصادف موصي بيت ابو مثنى قريبهم ببغداد يجيبوله خروف علمود سلامة عمو احمد
بعدين خالو اترخص وكال انا رايح على بيت نسابتي بيت ابو مثنى معزوم عندهم على غدة
.........
استغليتها فرصة واتصلت عالبنات لجين وريتا حتى
اشوفهم ما دامني ببغداد
كالن العصر احنا يمج جنت جاي اتغدة واجاني اتصال من ريتا
ريتا.. الو لج هيام لحكي محمد حبيب لجين مات
كمت من الاكل مفزوعة.. لحظة شلون مات
.. لج خطية راح بأنفجار الكرادة هسة الدنيا انخبصت ولجين الي كا اعرف شلون اوصللها الخبر عفية
هيام راح امر عليج اخذج وياي حتى نوصللها الخبر ما اكدر لوحدي
لبست والبنات يستفسرون شصار وكلتلهم
ريام.. لا ياربي دخيلك خطية لجين هسة تتخبل
والله تموت وراه يالله شكد جانو يحبون بعض وشكد حاولو اهلهم يفرقونهم هسة الموت بكبره اتدخل وفرقهم
عن بعض يارب يكون بعونها
((((((((((())))))))
هيام.. والله ممرود كلبي على لجين يالله بس ساكتة
ما تحجي اي شي سمعتها طلبت من امها تاخذها لبيت اهل محمد واني وريتا رحنا وياها منكدر نتركها لوحدها بس الي مخوفني هدوء لجين وجمودها
انتبهت على ابوها شلون يروح ويرجع عليها حتى يتطمن على حالتها خطية يحس بالذنب بأتجاهة
لان هو الي حرمها من محمد وفرقهم
انقهرت على ام محمد من شافتها صارت تلطم وتصيح يمة ياريحة محمد وهواه تعالي يمة وليدي راح
وانحرم من شم الهوى
ولك يمة محمد ما لحكت افرح بعرسك
((((((())))))
بعد مرور يومين جنت ببيت عمو طول ما اني هنا ببيت عمو نبراس ما وصل لبيت عمو
لان نسرين كالت بابا منع نبراس يعتب باب البيت ما دامكم هنا
وبلحظتها عرفت ان عمو ونبراس متعاركين وعرف حقيقة سالفة النقال باوعت لريام وباوعتلي وافتهمنا
الموضوع
جنت احضر بجنطة السفر وعلاوي عند ريام
دك نقالي والمتصل ام لجين وكع كلبي رديت
.. الو هلا خالة
ام لجين.. لج خالة هيام لحكي صديقتج اتخبلت
ما اعرف شبيها
.. شنو شكو خالة فهميني
.. اخوها نشوان شايفها طالعة من البيت حافية
وما اعرف وين راحت عفية اذا اجتكم اتصلي علية ابوها راح يموت حسرة عليها
سديت النقال واتصلت على ريتا وريتا نفس الحالة اتفاجئت بعدها اتصلت على بلال وسألته
كال انا طالع ادور عليها
.. عفية مو تنسى تتصل علية تطمني
ورة ساعتين من البحث اتصل علية بلال
.. هيام عفية بدلي وطليعلنا بالباب انا وريتا جايين عليج
ناخذج جماعة شايفين لجين لابسة بدلة عرس بيضة وتمشي بالكراد
وصلنا هناك لذاك المكان الي يسمونه منطقة الكرادة
او منطقة الاشباح من كد ما راحو بيها اموات
شباب نساء اطفال رجال كبار بالسن من كل الفئات
وصلنا وهالني المنظر شفت الشارع مليان شموع
وشفت لجين كاعدة عالارض ولابسة بدلة عرس بيضة
لازمة صورة لمحمد جانت تباوع عالصورة وتحجي وياها بعتب
يا الله شكد مردت كلبي وكسرت خاطري حالها يصعب عالكافر رحت لعندها حسيت بغصة تكسرت بصدري ما كدرت اواسيها واني منهارة وشوية وشفنا سيارة ابوها وصلت ونزلت امها وابوها وصار ابوها يحجي وياها وهو مكسور عليها
كوة كدر يقنعها تترك الصورة وتكوم وياهم تركب بالسيارة وبيومها طلب من عندي اني وريتا نبات يمها
اخاف يصير بيها شي وطلع كلامه صحيح اجة الليل ولجين انهارت وانقلوها للمستشفى
وبقينا وياهة والمشكلة ابني علاوي تاركته عند ريام
اتصلت علية وكالت ضرغام حرك تقالي علية حرك
سألني ليش هيام اتصل عليها ومتجاوب شنو ما عندها نـِـٓــــٓــِـت
وحجيتله على لجين صديقتج وسألني على علاوي وطمنته وكال اتصلي عليها خلي ترجع كافي
ميصير عايفة علاوي كل هاي الفترة ادري متفكر بي
لج هيام حسيت بصوت ضرغام ريحة غيرة
هيام.. يبووو لج عيتي صارلي يومين ممتصلة عليه هسة تلكينه نار
رجعت لبيت عمو احمد وشفت البنات والتهينة وياهم
وهناك واتصل علية خالو راضي
وكال خالو حظروا نفسكم الباجر نرجع للبصرة
((((((((((((())))))))))
بعد يومين
من وصولنا للبصرة اليوم يوصل ضرغام من دبي
فكعدت احضر نفسي وجهزت الغرفة جنت كلش مشتاقتله اتذكر البارحة بالليل اتصل علية
ضرغام..هيام مشتاقلج وراح اطك من الاشتياق ما اوصيج حضري روحج اجي الكاج جاهزة
لان يمكن لو اشوفج هسة كدامي اكلج
هيام.. صار ٺــڊٍلََُلََُؖ انت بس تعال حتى اني مشتاقتلك
سمعت صوته حوة وكلبي كام يدك يريد يطلع من مكانه
جان الوقت بال١٠بالليل تركت علاوي نايم بالغرفة
ورحت نزلت فرحانة بجيته وجان اشوفة
واكف حاضن رنا وهي تتدلع عليه
الكلجان كاعد
الحجية خاجية .. خايبة العوبة شمالج جلبتي بخوانيك
الرجال راح تخنكيه عوفي ترة ما راح يطير
رنا بدلع .. شسوي بيبي هذا من اشتياقي لحبيبي
احس دخان طلع من اذاناتي
سلمت .. الحمدلله على سلامتك ابو علاوي
ادري بيها تتخبل من هاي الكلمة لان تحسسها ضرغام راجع الي واني وياه نشترك بعلاوي وهذا الشي يغيضها ويرفع ضغطها
جاوبني ضرغام وعيونه تريد تاكلني وهذا الشي اسعدني
.. الله يسلمج ام علاوي
هيام حضريلي الحمام تعبان واريد اسبح
وغمزلي
عرفت هاي اشارة الي حتى اصعد قبله
صعدت ومشى اجة يصعد وراي
فجاءة سمعنا صرخة رنا درت وجهي
لكيتها لازمة بطنها وتبجي
راح عليها ضرغام .. شنو شبيج اسم الله ستوج ما بيج شي
رنا تبجي بدلع ..ما اعرف بطني كلش تأذيني
رحت عليها واني احس بركان اتمنى احطها وادوس ببطنها
هيام.. اسم الله شبيج تعالي خلي اوديج لغرفتج حتى ترتاحين
رنا.. لا ما يحتاج ضرغومي حبيبي يوصلني
هيام .. لاا عوفي عنج ضرغومي همة الرياجيل كلشي
ماكو سحتها من ايد ضرغام وكعدت اسندها
وضرغام كوة حابس ضحكته على منظرنا
.. انتي شنو سالفت اريع وعشرين ساعة معلولة ومريضة
دخلنا لغرفتها ومددتها عالسرير وكامت تدلع
رنا بغيض.. اسم الله علية من العلل والمرض ان شاء الله اليكرهوني
جبت بطانية ثخينة وشمرتها عليها وغطيت حتى وجها اتمنيت اخنكها
واجتني فكرة اخنكها واتذكرت فلم رية وسكينة من يخنكون الضحية
باوعت لعلبة الكلينكس واتخليت روحي
شلون استدرج الضحية
.. اتفضلي ياختي متخفيش دحنا حنبسطك اخر انبساط
ياختي عليها وياختي عليها
نفضت راسي من الافكار الشريرة
.. اعوذ بالله من الشيطان الرجيم
انتبهت لرنا شلون تباوعلي بخوف
رنا.. شنو شبيج ليش تباوعليلي هشكل نظراتج تخوف
باوعت لضرغام جان كوة لازم نفسه من الضحك وساكت
ضحكت على عقلي عايز بس اكللها متخفيش دك كوزي عباعال
ضليت اضحك وضرغام يضحك
وهي تباوع علينا
هيام.. يالله نامي ارتاحيلج شوية حتى بطنج شوية ترتاح
اجينا نطلع كامت تبجي بدلع غمضت عيوني
.. اللهم صبرج ياروح هسة شكو ليش تون
رنا .. ضرغام عفية ابقى يمي والله بطني كامت تكطعني
همست بصوت ناصي.. ان شاء الله تتكطع ومالج طبيب
ضرغام.. الله يلعن بليسج على هذا الدعاء
يالله روحي وانا جاي وراج
هيام .. شبية اتخبلت اعوفك يمها
ضرغام.. هيام طلعي وسدي الباب وراج
بغضب .. يعني شنو تطردني من غرفتكم
بسيطة
طلعت وانا اباوع عليها تضحك بأنتصار
حسيت بروحي كمت ادعم من القهر
دخلت للغرفة وطفيت الشموع وشغلت الضوة
اني الك ضرغام بسيطة
نمت واني الليل كلة اتكلب من وراه اخذتني النومة
وفجاءة حسيت على ايد تتلمس بجسمي
التفتت شفته ضرغام
.. وخر عني ما اريدك روح لست رنا
انت وياها واحد يلوك للثاني هي حية وانت ثعبان
ضرغام بضحكة.. وانتي التفاحة الي يحوم عليها الثعبان
يالله تعالي بحظني خليني اروي عطشي ولج جاي تعبان وميت تعب وانتي وذيج تلعبون علية
هيام.. اني ما سويت شي ولا سويت روحي مريضة
واني اعرف سوالفها تريد تاخذك مني
ضرغام.. ولج شتاخذ منج اشو انا وكلبي وروحي كلها ملكج هو شنو باقي حتى تاخذه
ما ظال بية بية صبر لا تخلصين هاي لحظاتنا بالعتاب وانا احسب الوقت لحظة لحظة حتى اجي لحضنج وانام
وارتاح لان انتي راحتي وجنتي وناري وكلشي اتمناه الكاه بيج
هيام.. هو اني شنو المصبرني ومسكتني على ضيم رنا غير هذا السانك الي يظل يحوم داير مدايري مثل السحر
وتخليني انسى حتى اسمي
اخذته لحظني وصرت اعبرله عن اشتياقي بالافعال وهو جان مجنون بية وبادلني الحضن وصار يرد الفعل
باضعاف وصرنا واحدنا يكمل الثاني
احبه واحب شفايفه واحب لهفته واحب لحيته من تمشي على خدودي وركبتي واحب كلشي بي
اباوع عليه نهض من السرير وراح فتح الجنطة وطلع من عندها علبة
اقترب مني وكعد يم رجلي
فتح العلبة وطلع منها الخلخال
ضرغام.. تتذكرين خلخال بيبتي خاجية بيوم لبستيه
وحركتي عشيرتي بي
ابتسمت ..اي اتذكر
وانا هناك بدبي شفت الخلخال واتذكرتج
كلت الا اخليها تشتري فستان قصير لونه احمر وتلبسلي
هذا الخلخال
كمت من السرير والغطة ملفوف على جسمي حضنته وبسته من خده
.. ربي يحفظك ويخليك الي وما يحرمني منك ولا من هداياك
(((((((()))))
مرت الايام ويوم عن يوم يثبتلي ضرغام حبه الي
وخصوصا بيوم الي يكون يوم رنا ما يعدي الليل
الا هو بين احضاني
ضرغام.. الله يلعن ابليسج صرت مثل الحرامي
اتسحب من غرفة لغرفة
ما انطيه مجال يحس بالذنب بأتجاه رنا كبل اخذه لحضني مثل المجنونة
وبنفس الوقت الي كنت اعيش احلى ايام بحياتي وية ضرغام ريام همين جانت هي وضرار مثل البلابل بالبيت يتنقلون من مكان لمكان مفضوحين بحركاتهم وافعالهم مرات ينسون نفسهم وكم مرة يفشلهم خالو
راضي ويحجي عليهم
ويكللهم عيب عندكم غرفة ورحو بيها ترة البيت بي حدايق جان يحجي ويأشر على ميس وضاري
ضاري.. ان شاء الله ما بقى شي واتزوج واصير المزرعة السعيدة
ضرار.. خايب شوف هذا الفطير عمي انصحك لا تتورط وتتزوج خليك هيج حر مثل الطير
لكزته ريام بكوعها
ريام.. اي وشبي الزواج عيني استاذ ضرار
ضرار يفرك بطنه من اثر الضربة
.. يخبل احلى منة ماكو زوجة تخبل الما يتخبل وتطلع
كرون الك وللخلفوك من ورة الشك والغيرة
((((((((((()))))
مر شهر على وفاة محمد
واني كل يوم اتصل عالبنات واتطمن على لجين
اشكد اندعيلها يا رب طلعها من هاي الشدة
وبهذا الشهر تم زواج ضاري على رفاه بنت خاله فاضل ورنا التهت وية اختها تجهيزات وضرغام صار كله الي صار كل يوم يطلعني اني وعلاوي حتى اشتريلي فستان ولعلاوي قاط وصرت اختار وياه ملابسه وانطيه ذوقي وهو يشتري على ذوقي لان ضرغام ملابسه كلها غوامق واقف على ذوقي باختيار تشيرت لونه فاتح
ضرغام.. والله اتعلمت على الاولوان الغامقة
هيام.. لخاطري حبيبي
باوع علية وهو يبتسم ..
هاي اول مرة تلفظين كلمة حبيبي خارج غرفتنا
اتعودت اسمعها منج وانتي بحضني
هيام.. احبك بالافعال مو بس كول باللسان
ضحك صرنا نعيش مثل العوائل الطبيعية ام واب وطفلهم بس رنا العثرة الوحيدة ومرات تسببلي مشاكل بالبيت وهواي تتشكة
وخالة حليمة مرة وياهة لان بنت اخوها وتخاف تزعل
اخوها ومرة وياي لان اني ام علاوي الحفيد ولي العهد
ههههه مرات تكسر خاطري خالة حليمة
والحمدلله خلص زواج ضاري على خير وهسة مر اسبوع على زواجه يالله رفاه اخت رنا شكد حبابة ووردة مال الله اباوع عليها حالها من حالنة تحبنا
وتساعدنا بالبيت وفاجئني ضرغام
من فتح موضوع وية ابوه وكله لكيت بيت بنفس منطقتنا معروض للبيع صحيح كلش تعبان بس مساحته جبيرة
بحدود ال٥٠٠متر كلت اشتريه وافلشه وابنيه
اسوي بيتين وانتقل انا ونسواني لان البيت صغر علينا

راضي.. بوية زين ما سويت وانا اايدك على هاي الخطوة مادام هنا يمنا بنفس المنطقة معناها موبعيد
عنا
حليمة.. يايمة شلك بالبيت وتنتقل خليك كاعد يمنا
هذا البيت الله طارح بي البركة وجبير
ليش تريد تبعدني عن علاوي
راضي.. كولي يا الله يامرة ترة الولد ما راح يسافر لبرة
كال راح اشيل هنا يمنا بالمنطقة يعني موبعيد وعلاوي
خلي عندج اذا تريدين
........
جنا كاعدين عالغدة
دك نقال ضرغام رد عالمتصل
ووكعت الخاشوكة من ايده وكال
.. انا لله وانا اليه راجعون
شد النقال وباوع علية وعلى ريام
.. هيام البقية بحياتكم عمكم احمد انطاكم عمره
حسيت سودت الدنيا بعيني وضاك النفس بصدري
كان يوم اسود وصلنا لبغداد اني وريام وخالة حليمة
وخالو راضي
........
ضرغام
طول ايام العزاء وانا وضرار ما تركنا الفاتحة
ولا لحظة وحدة هذا واجبنا لان نعتبر نسابتهم
وعمهم جان رجال نعم الرجل الله يرحمه
جنا نجي كل يوم للفاتحة من الصبح لليل ونرجع لبيت خالي ابو مثنى
جان بالي كله يم هيام جنت اتمنى ترجع وياي لبيت خالي هناك حتى ترتاح واخذها لحضني واواسيها بس هي ما تقبل وتكلي خليني يم بنات عمي
اسأل عنها امي تكول خطية هي واختها كلش مكسورات علمود عمهن وحالتهن حالة
جنت احاول اتغاضة هذا ابن عمها نبراس اباوع عليه لابس قاط رسمي وسيارتين قاطعة راس الفرع مالتهم
لان حضرته مسؤل ونافخ نفسه على شنو اباوع لشكله وطوله وجسمه جان كلش مرتب وكشخة ولاعبالك ابوه متوفي اهووو هسة انا شلطشت للولد
خلصت ايام العزاء واني ببيت عمو احمد لابسين السواد الوجوه الحزينة بكل مكان
احس بروحي مكشفة لان هذا ثاني سند الي بالدنيا راح
جان نعمة الاب والعم النة ربي يرحمه ويطيب روحه الجنة
وكف ويانة واخذنا لتحت جناحه ولايوم سمعنا حجاية
ضجر خاف الله بينا احنا يتامى اخوه دارانة وعاملنة بحنية عمري ما راح انساه
جنت كاعدة لوحدي يم البنات
لان ريام اتخربطت صحتها وخالة حليمة اخذتها واخذت علاوي وياهم وراحت لبيت اخوها ايو مثني كالت خلي اخذها وهناك ترتاح لان هنا البيت صغير وماكو مكان ترتاح بي
اليوم ثالث اخر يوم بالعزاء
وصار الليل واجتي بنت عمو احمد الصغيرة وكالت
ضرغام بالباب يكول خلي تجهز روحها انا انتضرها بالباب استغربت ليش ما اتصل علية
باوعت لكيت نقالي ناسيته بالجنطة ومغلق
لبست شالي و عباتي واخذت جنطتي وطلعت
لكيته واكف بالباب ينتظرني جان لابس دشداشة سودة ولاف الشماغ على راسه همة متعلمين بالفواتح هشكل يلبسون انتبهت على نبراس واكف يمه باوعت عليهم اثنينهم جان الفرق واضح بينهم
والعيون تحجي بكلام غير منطوق والتوتر مالي الجو
سلمت عليهم وسمعت صوت نبراس
.. هيام لحظة قبل لا ترحين
هذا البيت راح يبقى مفتوح الج ولاختج مثلما جان قبل
بايام عمج واذا الزمن ضامج انا موجود شوت ما تحتاجين لسند اتصلي علية وتلكيني كدامج
ضرغام
احس النار صارت تلعب بكلبي
اباوع عليه شلون يباوع لهيام واكلها اكل بعيونها
لميت ايدي بقبضة وعصرتها حسيت بعروكي تريد تطك من الغضب اتمنيت يزل السانه وياها بكلمة زايدة
لحتى اشوف شغلي وياه وامسح الكاع بي بس المشكلة هو يحجي كلام حسب الاصول اي ابن عم راح يعرض لبنت عمه دعمه وسنده ويواسيها ويحجي هذا الحجي
بس المشكلة نظراته لهيام موطبيعية
وانا كرجال واعرف شلون الرجال من تعجبه مرية
شلون يكعد ينظرلها
وهذا الشي خبلني اتمنيته يزل بحجاية وصرت اتململ وانافخ وردت استفزه واطلعه عن طوره
بس المطي هو فاصل بغير عالم
ضرغام.. يالله هيام صعدي بالسيارة
جنت احجي بغضب
فتحت باب السيارة الهة
وصعدت وجانت عيون هيام كلها حزن وما مبين عليها اي شي
وصلنا لبيت خالو ابو مثنى ونزلنا ودكيت الجرس
وطلعلي ابنه مثنى
سلم علية وانتبهت عليه فتح حلكه متفاجيء
مثنى.. هيام
انتبهت لهيام رفعت راسها
.. مثنى
ضرغام.. شنو الظاهر تعرفون بعضكم
مثنى.. هيام جانت تداوم وياي بنفس الكلية
تفضلو تفضلو لاتظلون واكفين بالباب ومبين عليكم التعب
دخلنا جوة وهيام راحت يم النسوان جوة وانا رحت بالاستقبال
ورة ربع ساعة دخل مثنى شايل بيده صينية
العشا
مديت ايدي اكل
مثنى.. ياربي الدنيا شكد صغيرة
.. ليش
.. يعني شلون انجمعتو انت وهيام
.. ليش وين العجبة بالموضوع
مثنى.. يعني كلشي منخيل بس مال هيام ما تتزوج نبراس هاي الما متخيلها
ضرغام.. شنو ما جاي افتهم عليك شكاعد تحجي
مثنى ببتسامة وكأنما يعيد الذكريات بكل ظنه ان ضرغام عنده علم باللي راح يحجيه
مثنى. اتذكر قبل كم سنة اتقدمت لهيام ردت اخطبها
وسألتها وهي رفضت وكالت اني مخطوبة لابن عمي نبراس رحت سألت على ابن عمها وعرفت
ان نبراس وهيام واحد يحب اللاخ وحبهم جان الكل
يحجي بي وصار مثل هسة اباوع شلون دارت الدنيا وكل واحد مشى بطريق وهي اتزوجت غيره وهو اتزوجت غيرها الدنيا غريبة
جان مثنى يحجي على لاهيته وانا احس الكلام ينزل فوك راسي مثل الصاعقة
((((((((((((()))))))
يوم ثاني واحنة نسوق بالطريق
جنت احس بروحي مختنك والدنيا ضاكت بعيني
كلشي جنت متوقع الا هيام جانت على علاقة وية نبراس هاي الماجنت حاسب حسابهة
وانا اكول هذا الرجال
ليش هيج هو مستقتل على هيام اثاري طلع الاستاذ والخانم مخطوبين وبينهم علاقة وقصة حب طويلة
متقبل غلط هيام هم بعدها تحبه والا هو ما يحاول بدون امل والامل وعد هيام اله
اي لعد ليش ما مخبرتني بهيج موضوع
المعرف ان اي يحفظ سر ويضعه بالظلام اذن هذا مو سر فضيحة لان كلشي يتخبة بالظلام فاسد
وهي لوما تشوف ان معرفتي بهيج شي غلط جان
جان ما ضمت علية
على طول الطريق اسوق وافكر
والشيطان اتربع براسي اجيت مرتين اسوي حادث بالطريق
راضي.. شبية ضرغام انزل خليني انا اسوق بمكانك
ضرغام.. لا حجي ما يحتاج
وصلنا للبصرة احس روحي واصلة لخشمي
نزلنا وعلاوي كام يبجي زمخت بيها بصوت خشن
.. لزمي ابنج وسكتيه راسي راح ينفجر
رحت صحت عبى رنا
.. حضريلي الحمام
وبيومها جان اول يوم الي ما انام بي بحضن هيام
فزيت بتالي الليل احس روحي مثل الطفل ويدور على جضن امه
اتعوذت من الشيطان وصرت اراجع افكاري
الماضي مومهم انا علية بالحاضر
الي كاعد اشوفه هيام مترباية وما يوم شفت عليها شي
ولا يوم حسستني او لمحتلي بحبها لذاك المطي
وغيرتها من رنا وحبها ولهفتها الي
خير دليل لان الانسان اذا ما يحب شخص ما راح يكعد يجامله ويمثل عليه ما مجبور
طلعت من غرفة رنا ورحت اتسحب لعرفة هيام
شفتها نايمة ولابسة ثوب نوم اسود
بنت اللذين صايرة البشرة وية الثوب تنافر ابيض حليب واسود ليل
رحت اتمددت عالسرير واخذتها لحظني التفتت بكل لهفة وحطت راسها بركبتي هاي حركتها تذركني بالبزونة شلون تتدلع
قنعت نفسي بلحظتها كل انسان وعنده ماضيه الخاص
ومو من المنصف احاسبها على ماضيها
((((((((((((((((())))))))))))))
هيام .. ريام اني هم راح احجز عند الدكتورة
وادخل وياج
اليوم اخذت ريام للدكتورة لان صارلها مدة صحتها بالنازل والدورة متأخرة عليها
فكلتلها خلي اخذج لدكتورتي
واني هم اريد اراجع لان الدورة فاتتني ما اجتي هذا الشهر اخاف رجع علية التكيس ما بية حيل اجع لخربطة الهرمونات وبعدين اسمن
دخلنا للدكتور وفحصتنا اثنينا وطلبت من عدنا تحاليل ومن ضمنها تحليل حمل حتى اني طلبت مني اسوي تحليل حمل
ورة مدة طلعت التحاليل واخذناها ورحنا للدكتورة
الدكتورة.. وينها ريام
ريام.. اني
.. مبروك حامل النتيجة ايجابية
ريام بفرحة.. دكتورة حلفي
.. ههههه وليش احلف هاي النتيجة كدامي تكول انت بعد كم شهر راح تصيرين ام
.. ووينها هيام
.. اني دكتورة
.. هم مبروك طلعتي حامل يعني سبب تأخر الدورة طلع الحمل مو تكيس عالمبايض
جانت الدكتورة تحجي
واني وريام وحدة تباوع عالثانية والدموع تجري
من الفرحة نزلت للارض بلحظتها وسجدت
سجدة الشكر لله
.. ربي ما اعظمك
رجعنا اني وريام نتسابق للبيت
حتى نبشرهم جان المجمع الطبي بنفس المنطقة قريب البيت
دخلنا للبيت وجانو الولد ستوهم راجعين من الشغل
وكاعدين بيبي خاجية
دخلت واني الفرحة ما سايعتني
شفت ضرغام كاعد
وخالو راضي وخالة حليمة كاعدة
هيام دخلت وصحت بفرحة
.. ضرغام اني حامل
شفت الوجوه جمدت
وخصوصا وجه ضرغام الي انخطف اللون من وجهه
وتركه اصفر مبهوت وجاوبني بأستنكار
.. حامل .. منين .. وانا عقيم
يتبع